Koordinatorja për mediat, Silvi Bardhi, denoncon shifrat dramatike në rënien e zhdoganimit të cigareve, krahasuar me të njëjtën periudhë të një viti më parë
Partia Demokratike e përshëndet aksionin e djeshëm të punonjësve të doganës që ndaluan cigaret që dyshohet se janë kontrabandë.
Por përpara se të vetëshpallen si heronj dhe heroina të doganave shqiptare, Kryeministri dhe Drejtoresha e Doganave, duhet të sqarojnë opinionin publik në lidhje me të dhënat dramatike që vijnë në fushën e zhdoganimit për sa i përket cigareve.
Për periudhën janar-prill të 2014, rezulton se janë zhdoganuar 220 tonë më pak cigare se në të njëjtën periudhë të vitit të kaluar.
Sigurisht se nuk ka rënë konsumi i cigares në vend.
Këto të dhëna tregojnë se është rritur kontrabanda dhe evazioni.
Edi Rama dhe Elisa duhet të kthehen nga bota e çudirave dhe të përballen me shifrat reale.
Ku kanë shkuar 220 tonë cigare në tre muaj, krahasuar me të njëjtën periudhë me vitin e kaluar?
Ku kanë shkuar të paktën 10 milionë dollarë që është vetëm efekti financiar i zhdoganimit ?
Kjo është transparenca që Kryeministri dhe Drejtoresha e doganave i detyrohen qytetarëve shqiptarë, jo rrahja e gjoksit për një aksion që administrata e ka për detyrë ta bëjë.
