Deklarata e deputetit Halimi mbi veprimtarinë antiligjore të Komisionit Hetimor për shkarkimin e 2 anëtarëve të KLD-së me qëllim kapjen politike të këtij institucioni. 

Jam këtu sot për t’i bërë të qartë opinionit publik shqiptar dhe partnerëve tanë ndërkombëtarë, se Partia Demokratike e cilëson Komisionin Hetimor për shkarkimin e 2 anëtarëve të KLD, si antikushtetutes, antiligjor dhe një perpjekje e qartë për të kapur Këshillin e Lartë të Drejtësisë.

I kemi bërë me dije për muaj me radhë se paketa e ligjeve e cila u hartua dhe miratua me arrogancë dhe injorim të ekspertizës ndërkombëtare, në shkelje të Kushtetutës dhe parimeve ndërkombëtare të ndarjes dhe balancimit të pushteteve, nuk kishte si qellim as shqetësimin qytetar për gjendjen e korrupsionit në drejtësi, dhe as shqetësimin ndërkombëtar për një sistem të pavarur dhe efiçent. Vetëm 24 orë pas hyrjes në fuqi të kësaj pakete, Edi Rama urdhëroi ngritjen e Komisionit Hetimor Parlamentar i cili nuk kishte asnjë qëllim tjetër, veç justifikimit të vendimit të marrë kohë më parë nga vetë Edi Rama. Nuk kishte as një qëllim tjetër veç një gjyqi publik, pa asnjë fakt dhe provë, veç mllefit politik dhe propagandes histerike ndaj 2 anëtarëve të këtij Këshilli.

Nuk ka sot asnjë dyshim sot për çdo shqiptar por për çdo partner ndërkombëtar dhe çdo ambasador të vendeve mike se qëllimi i vetëm i asaj paketë të shkruar natën, të miratuar natën, të botuar natën dhe që iu fsheh ekspertëve ndërkombëtarë, duke injoruar thirrjet e tyre, kishte si qëllim të vetëm zëvendësimin e anëtarëve të KLD-së,  kapje dhe vetëm kapjen politike të këtij institucioni.

Nuk ka asnjë dyshim për të gjithë partnerët ndërkombëtarë se shqetësimi opozitar, nga njera anë e shprehur në media por dhe në takimet zyrtare me ta, ashtu si injorimi tërësor në bllok që iu bë thirrjeve të tyre në korrik nga Rama dhe Meta, kishin një qëllim të vetëm: zëvëndësimin e njerëzve në KLD. Kapjen politike të këtij institucioni në mënyrë antikushtetuese dhe antieuropiane.

Parnerët ndërkombërë i bënë thirje të mos miratonin paketën e ligjeve sepse kjo paketë kishte si synim të vetëm gjunjëzimin e drejtësisë, zëvëndësimin e njerëzve dhe kapjen politike. Progres raporti dhe gjithë ekspertiza ndërkombëtare që erdhi në Tiranë në 6 tetor e cilësuan këtë paketë si mënyra se si një qeveri demokratike e një vendi europian nuk duhet të veprojë.

Hipokrizia e Ramës dhe Metës në lidhje me drejtësinë sot ka dalë në dritë të diellit për çdo shqiptar dhe çdo partner.

Gjyqi politik i stilit komunist që iu rezervua anëtarëve të KLD-së në sallën e Kuvendit nga Edi Rama, është një goditje e rëndë që i bëhet frymës së konsesusit dhe gjithëpërfshirjes së tryezës së 6 Tetorit, të organizuar nga Presidenti i Republikës në prani te faktorit politik dhe ekspertizës ndërkombëtare.

Është një goditje që i bëhet reformës që duhet të nisë në drejtësi këtë vjeshte persa i përket ruajtjes së pavarësisë së sistemit, gjithëpërfshirjes dhe konsesusit me të cilin është e lidhur ngushtë jetëgjatësia e reformave. Një goditje që i bëhet Kushtetutës duke kërkuar të ndërpresë mandate kushtuteese të një institucioni të pavarur.

Partia Demokratike i bën thirrje dhe i kërkon publikisht gjithë faktorit ndërkombëtar dhe në veçanti parnërëve ndërkombëtarë që asistojnë në drejtësi, të monitorojnë procesin dhe të shprehin hapur qendrimin e tyre në favor të parimeve europiane për një sistem drejtësie të pavarur dhe ruajtjen e parimit check and balance. Njëkohësisht, Partia Demokratike i bën thirje mazhorancës të ndalojë menjëherë zbatimin e skenarit të Ramës dhe Metës për të zëvëndësuar anëtarët e KLD-së dhe se vijimi i kësaj rruge të nisur prej tyre do të thellonte akoma më shumë krizën politike që ka mbërthyer vendin duke lënë në udhëkryq demokracinë e vendit, dhe reformat e integrimit europian të cilat kërkohen për hapjen e negociatve me Bashkim Europian.

Deklaratë e deputetit të Partisë Demokratike, Eduard Halimi, 17 Tetor 2014