Kryetari i Partisë Demokratike është takuar me banorë të Kavajës dhe Rrogozhinës. Zoti Basha është njohur me shqetësimet e tyre, si papunësia, largimi nga skema e ndihmës ekomomike të familjeve të varfra dhe futjes në skemë të miqve dhe të afërmve të qeveritarëve, rritja e çmimit të energjisë dhe mashtrimi për kompensimin e saj.

Banor: Kanë çu popullin në mënyrë të jashtëzakonshme, 900 vetë i kanë hequr vetëm nga përkrahja. Mos t’i japësh, unë jam një invalid i grupit të katërt i pjesshëm, marr 90 mijë lekë, nuk del as bukë thatë. 

Banor: Jam pa bukë në shpi po të them. S’kam ça të më bëjnë më, vetëm me më marrë shpirtin. 

Banor: Lekët e dritave s’i japin, i thashë merri mbajini, jepjani Edi Ramës lekët! 

Banor: Jam pa punë, më thuj ti si do ti ushqej unë, jam kryefamiljar, fëmijët e mi. Të shkoj të vjedh? Të lyp apo të bëhem kriminel? 

Basha: Zgjidhja është të bashkojmë të gjithë votën për të ndalur të keqen, për të larguar të keqen dhe për t’i hapur rrugën punësimit me djersën e ballit, me aftësi dhe me meritë. Ne po bëjmë një ofertë për qytetarët, që të ulim taksat, të ulim çmimin e energjisë me 25 për qind, të falim kamatë-vonesat sepse janë bërë të papërballueshme për shqiptarët. Ne po ofrojmë mundësi që përmes dedikimit të fondeve të shtetit për investime publike dhe mbështetje ndaj biznesit, duke ulur taksat të hapen më shumë vende pune. 

Të zhgënjyer dhe të braktisur janë sot qytetarë të majtë e të djathtë dhe kjo dëshmohet nga vetë ata. Listat në dyqanet e ushqimeve shtohen çdo ditë, i thanë zotit Basha tregtarët. Shqetësim i madh është shëndetësia e cila sot jo vetëm nuk është falas por është vjedhur edhe fondi prej 1.5 milionë dollarësh i kompensimit të ilaçeve. 

Banor: Unë në 2013-ën votova Rilindjen, nuk gjeta as rilindje, as asgjë tjetër, vetëm fukarallëk dhe vuajtje.

Banor: Ka varë tjetri veten për 30 mijë lekë të vjetra. Në një kohë ku ne jena pa bukë dhe ai tjetri vjen e pret dritat, ai pret të ardhmen e fëmijëve tanë. Ku do të studiojnë, në errësirë?!

 

Banor: Kam një dyqan që ther mish, kam pas ther një viç në ditë, sot s’e bëj dot një viç në javë. 

Banor: Ne po bëjmë detyrën që duhet të bënte qeveria, me ndihmu njerëzit, po e bëjmë ne, po i  mbajmë me bukë.   

Banor: Kam gruan 25 vite invalide, e kam pas të shtruar në spital, ilaçet po i blej me pare, me pare borxh po i marr. Më kanë kërku 7 mijë euro me e operu. Ku ti gjej? 

Basha: Mashtrimi me shëndetësinë falas është mashtrimi më i pashpirt. Përveç mashtrimit kanë futur duart edhe në fondin e kompensimit, kanë vjedhur 1.5 milionë dollarë që ishin për këto raste.

Njoftim për shtyp i Partisë Demokratike, 27  Maj 2015