Ju jeni njohur me qëndrimin politik të Grupit Parlamentar të Partisë Demokratike, një qëndrim që shpreh papajtueshmërinë e plotë me standardin tërësisht kriminal që ka ndjekur Edi Rama, ku nga njëra anë urdhëron dënimin e denoncuesit të Emiliano Shullazit me përjashtimin 10 ditë të Doktor Berishës nga Parlamenti dhe nga ana tjetër, merr në mbrojtje siç ka bërë gjatë këtyre tre viteve Emiliano Shullazin, siç bëri edhe para disa ditësh në Parlament, ku në vend që të falenderonte prokurorinë, sulmoi ashpër Prokurorinë duke i dalë sërish në krah bandave dhe lidhjeve me bandat, duke i dalë në krah sërish Emiliano Shullazit duke thënë se me demek Policia i kishte kërkuar arrestimin e Emiliano Shullazit por ishte Prokuroria ajo e cila e kishte vonuar arrestimin e Emiliano Shullazit. Një deklaratë, qe nuk arriti ta artikulonte as avokati de jure i Emiliano Shullazit para kamerave. Kjo është drejtësia që do Edi Rama.

Në vend që si kryeministër të dilte në mbrojtje të prokurorisë, të dilte në mbrojtje dëshmitarëve të cilët janë kyç në një proces të tillë si ky i Emiliano Shullazit, në vend që të dilte në mbrojtje të biznesmenëve të cilëve u është vënë gjoba duke u marrë pasurinë e tyre me armë në kokë, doli në mbrojtje dhe bëri avokatin e Emiliano Shullazit. Kjo është drejtësia që kërkon Edi Rama dhe nuk mund të jetë kurrë një drejtësi që e duan qytetarët shqiptarë.

Nëse drejtësia do të ishte e gjitha nën këmbët e Edi Ramës, sot Emiliano Shullazi do të ishte sërish jashtë duke i vënë pistoletën në kokë biznesmenëve e duke grabitur prona. Atë që ka bërë gjatë këtyre 3 viteve Edi Rama duke i dhënë prona Emiliano Shullazit dhe bandës së tij, atë gjë vazhdon ta bëjë edhe sot dhe flet për Reformën në Drejtësi. Kush flet për Reformën në Drejtësi?! Ai që mbolli gjithë Shqipërinë me kanabis, që ka mbjellë çdo kodër nga jugu në veri me kanabis. Flet ai që me dorën dhe firmën e vetë futi në Parlament deputetë me rekorde të tmerrshme kriminale, njerëz të dënuar nga drejtësia për trafik droge dhe trafik prostitucioni. Flet ai për sistemin e drejtësisë, ai që kur trafikanti me 400 kg heroinë drogë gjendej në makinën e deputetit të tij, Mark Frroku urdhëroi lirimin. Ai që ngriti traun për vrasësin e komisarit, ai që kaloi makinën e Emiliano Shullazit në doganë, pa asnjë dokument dhe pa kontroll. Ai që hoqi prizën e kamerave të komisariatit kur deputeti i tij qëlloi qytetarët para komisariatit. Ai flet për sistemin e drejtësisë?! Sistemi i drejtësisë duhet të jetë larg Edi Ramës. Dhe kjo është imediate.

Qytetarët duan një sistem drejtësie larg qeverisë, larg Edi Ramës. Projekti që ka pasur në kokën e vetë Edi Rama për sistemin e drejtësisë është rrëzuar, nuk ekziston më. Ai ishte një projekt që u rrëzua nga Venezia. Ky ishte ai që vonoi Reformën në Drejtësi të paktën prej dy vjetësh. Që nga Shtatori e deri në Dhjetor vonoi Byronë Kombëtare të Hetimit sepse donte patjetër ta kishte nën Emiljano Shullazin, për të mbrojtur Emiljano Shullazin dhe gjithë shullazët që kishte dhe ka. Edhe kur ia rrëzoi venecia në Dhjetor, sërish e shtyu deri në Mars dhe kërkon ta mbajë Byronë Kombëtare të hetimit nën Shullazin. Kjo s’mund të jetë drejtësia që duan shqiptarët.

Pyetje: Z Halimi, a po kërkon opozita pretekste për të zvarritur Reformën në Drejtësi?

Halimi: J’ua thashë se ai që e ka penguar Reformën në Drejtësi ka qënë Edi Rama që ka patur një projekt të vetin  dhe nuk ka pranuar kurrë të jetë një projekt bashkë me opozitën, një projekt që të jetë sipas parimeve të Komisionit të Venecias dhe sipas parimeve europiane. Por ai ka dashur të jetë një projekt i veti. Ju jeni dëshmitarë që është ai që e ka vonuar nga Shtatori ku bëri vetë projektin, ku donte që Byronë Kombëtare të Hetimit dhe prokurorinë speciale ta kishte nën ministrinë e Brendshme dhe rezistoi sërish edhe kur Venecia në Dhjetor ia rrëzoi. Kur ne i thamë më Dhjetor hajde ta miratojmë siç do Venecia, vazhdoi dhe e mbajti deri në Mars Byronë Kombëtare të Hetimit, nën hyqmin e vet dhe kjo është e paimagjinueshme. Sigurisht që ekspertët e Partisë Demokratike kanë punuar gjatë javës së kaluar dhe kanë treguar bashkë me PD-në se janë për një projekt gjithëpërfshirës për Reformën në Drejtësi, një projekt që do të nisë me komponentin antikorrupsion, një projekt që do të bëjë të mundur krijimin e Byrosë Kombëtare të Hetimit dhe prokurorisë speciale, jo ashtu siç e do Rama nën Shullazin për të mbrojtur Shullazin dhe bandën e tij por nën Prokurorinë. Një projekt që do të bëjë të mundur largimin e gjyqtarëve dhe prokurorëve të korruptuar, do të bëjë të mundur dërgimin para drejtësisë siç bëri sot me Emiljano Shullazin por edhe me gjithë shullazët dhe bandat që janë nëpër këmbë në Shqipëri dhe gjithë zyrtarëve, ministrave, deputetëve të korruptuar që marrin fonde publike.

Pyetje: Z Halimi, ju thatë se z Rama duhet të mbahet larg nga Reforma në Drejtësi dhe sistemi i drejtësisë. A mbahet jashtë duke mos shkuar opozita në këtë reformë dhe duke ndenjur këtu jashtë me gazetarët?

Halimi: Thashë që opozita tregoi sot se ka një qendrim politik për të treguar qartësisht si të papranueshme me një standard tërësisht kriminal që mban Edi Rama. Në vend që të promovojë Prokurorinë dhe denoncuesit, dënon denoncuesit dhe bëhet krah për krah me krimin dhe avokatët e krimit. Kjo nuk mund të jetë drejtësi të cilën e duan qytetarët. Prandaj Reforma në Drejtësi do të bëhet. Projekti i Reformën në Drejtësi do të miratohet. Jo ai projekt që ka Edi Rama që në kokë, ai që ka pasur para dy vjetësh dhe e mban peng se do të realizojë krijesën e vetë por do të realizohet Reforma në Drejtësi siç e kërkon Komisioni i Venecias, sigurisht që në ditët në vijim mbasi të mbarojë edhe vendimi politik i Grupit Parlamentar, ndërkohë që edhe gjatë kësaj jave ekspertët e Partisë Demokratike do të vazhdojnë të punojnë me ekspertët ndërkombëtare për të përpunuar draftin e amendamenteve kushtetuese dhe draftin e ligjeve të tjera të cilat kanë të bëjnë me komponentin antikorrupsion. Draftin e ligjeve për Byronë Kombëtare të Hetimit, draftin e ligjeve për SPAK-un, draftin e ligjeve për kontrollin e gjithë gjyqtarëve dhe prokurorëve. Në ditët në vijim do të jetë punë e Komisionit të Reformës në Drejtësi që duhet të miratojë një projekt që ta mbajë drejtësinë larg Edi Ramës.

Deklarata për mediat e deputetit, Eduard Halimi, 25 Prill 2016