Kryetarja e Komisionit Parlamentar të Shëndetësisë, Albana Vokshi dhe deputetja Albina Deda shkuan sot pranë spitalit të pediatrisë në QSTU për të parë nga afër situatën e vështirë ku prej 3 muajsh mungon  illaçi për fëmijët e sëmurë me leuçemi.

Pas reagimit të fortë të Partisë Demokratike për mungesën e medikamentit, mjekët informuan kryetaren e Komisionit se medikamendi ka mbërritur në spital.  “Drejtoria na tha që ilaçi ka ardhur dje për nevojat e gjithë vitit. Kemi bërë sot kërkesën për marrjen e medikamentit “, tha një prej mjekeve të spitalit.

“Ky është një lajm i mirë. Më të fund pasi sensibilizimi ynë bëri të mundur ardhjen e ilaçit”, tha Vokshi. Deputetet demokrate konstatuan situatën e vështirë pasi prej muajsh prindërit me fëmijët e sëmurë nuk marrin medikamentin, duke bërë të pamundurën për ta siguruar atë privatisht e madje me kosto të lartë jashtë vendit. “Unë tani nuk di si ta bëj se e kam porositur privatisht ilaçin në dy vende. Nuk di ku ta çoj tani. E kam porositur vetë në Greqi”, tha një prind.

Kryetarja Vokshi bashkëbisedoi edhe me mjekët për këtë situatë të vështirë që po kalojnë fëmijët e sëmurë me leuçemi. “Dua të di çfarë mund të bëjnë prindërit e këtyre fëmijeve kur ilaçi mungon prej 3 muajsh? Unë si prind si do ia bëja ?! Unë s’mund ta imagjinoj këtë situatë kur spitali nuk ia jep ilaçin fëmijës së sëmurë prej muajsh sepse ministri ka bllokuar importimin”, tha Vokshi.

Mjekët u shprehën se s’mund të japin përgjigje por edhe ata si prindër do të vepronin në të njëjtën situatë.

Deputetja Vokshi i bëri thirrje Prokurorisë të nisë menjëherë hetime për këtë rast abuziv që ka lënë fëmijët e sëmurë pa ilaçe dhe i kërkoi kryeministrit të reagojë pas kaq muajsh heshtje.

“Unë do ti kërkoja Prokurorisë që ta hetonte këtë rast për të nxjerrë përgjegjësi para ligjit. Në të njëjtën kohë i bëj thirrje kryeministrit që të reagojë për herë të parë pas kaq muajsh sensibilizimi të bërë. Të reagojë e të urdhërojë ministrin e tij që të ndalojë bredhjet e tij nga një bregdet në tjetrin, por të kthehet e të firmosë blerjet e ilaçeve jo vetëm për këta fëmijë por për të gjithë pacientët shqiptarë sepse posti i asnjë kryeministri apo një ministri nuk duhet të ketë kosto kaq të larta humane. Jeta e çdo qytetari është shumë e rëndësishme për ne. Duhet të jetë e rëndësishme për kryeministrin jeta e këtyre fëmijëve”, tha Vokshi.

Njoftim për shtyp i Partise Demokratike, 11 Gusht 2016