· Vendimi popullor i protestës – Sot vdes 25 qershori dhe politika që mban pushtet të vjedhur. Largim i qeverisë së paligjshme, krijim i qeverisë antimafia, që lufton krimin, çon përpara reformën në drejtësi dhe përgatit zgjedhjet e lira e të ndershme.
· Shqipëria e Edi Ramës ngjan me shtetet e falimentuara të Afrikës dhe Azisë si Guinea, trafiku i drogës drejtohet nga i pari i vendit, si Nikaragua ku fushata financohet me milionat e drogës, si Afganistani, ku vëllai i kreut të ekzekutivit është trafikanti më i madh i drogës.
· Banda në qeveri po realizon projektin e saj për pushtet absolut me përqëndrimin në pak duar pushtetin politik dhe ekonomik të vendit, me eksodin e shqiptarëve, me izolimin ekonomik dhe politik të vendit, që askush mos ta konkurojë apo rrezikojë pushtetin e Ramës.
·Shqiptarët e kanë kuptuar se drejtësia nuk është një copë letër dhe fjalë në ajër, por ndëshkim i vërtetë për peshqit e mëdhenj të krimit dhe korrupsionit. Nuk ka as Europë, as drejtësi, as siguri, as punësim, as të ardhme me banditët në qeveri.
· Ne duam një qeveri të dalë nga vota e lirë. Të lirë nga krimi dhe nga oligarkia. Duam mundësi për të punuar dhe ndërtuar, ne duam një ekonomi që prodhon mirëqenie për të gjithë. Një shoqëri me dinjitet për të gjithë. Ne duam drejtësinë që ka Europa, duam lirinë dhe dinjitetin që ka Europa, duam qeverisjen e Europës.
· Sot jam para jush, Jo për të kërkuar pushtet për vete, por shtet të drejtë për të gjithë. Jo për t’u bërë vetë kryeministër, por që kushdo që të jetë kryeministër, shqiptarët të jenë mirë. Unë nuk po kërkoj të marr pushtetin me manipulim dhe forcë, por unë kërkoj që njerëzit të jenë të lirë për të zgjedhur pushtetin që duan.
· Për ata që pyesin: Çfarë strategjie keni? Strategjia jonë është përballja, është rezistenca KUNDËR kësaj të keqe që ka marrë peng njerëzit dhe të ardhmen tonë, ka gllabëruar liritë dhe të drejtat tona! Për ata që pyesin cfarë doni të arrini: Përgjigja është vetëm NJË FJALË: FITORE!
Fjala e plotë e kryetarit të Partisë Demokratike, Lulzim Basha, në protestë
Zonja dhe zotërinj,
Vëllezër e motra,
Mirë se keni ardhur në këtë plebishit madhështor,
Mirë se jeni bashkuar për të shpallur sot së bashku vendimin e madh popullor të kësaj gjykate
popullore për Edi Ramën dhe bandën e tij në pushtet.
“Përditë shoh qartë e ma qartë dhe vuaj thellë e ma thellë!”
Kështu e përshkroi Migjeni zgjimin e një populli për të parë dramën e tij.
Një vit më parë, qindra mijëra shqiptarë u mblodhën në këtë shesh për të ndalur të keqen.
Qindra mijëra të tjerë na panë nga larg, duke shpresuar se e keqja nuk ishte e vërtetë.
Sot, ne që jemi këtu shumë më shumë se në 18 shkurt, por edhe ata që qëndruan larg, e shohim qartë
se e keqja është e vërtetë!
E keqja nuk ikën vetë. E keqja nuk ikën po nuk u luftua.
E keqja nuk ikën po nuk u bashkuam të gjithë kundër saj.
Dhe ja ku jemi bashkuar sot, në këtë plebishit madhështor nga më mëdhenjtë që ka njohur historia e demokracisë.
Mirë se keni ardhur zonja dhe zotërinj në këtë orë të madhe dhe vendimtare të bashkimit të popullit kundër të keqes.
Mirë se keni ardhur në këtë shesh të historisë dhe të së ardhmes, burra dhe gra, të rinj dhe të reja,
studentë dhe pedagogë, profesionistë, intelektualë dhe të papunë, të përndjekur dhe pronarë, fermerë
dhe sipërmarrës, naftëtarë dhe minatorë, ambjentalistë, prindër dhe fëmijë, nga Jugu në Veri,
anembanë Shqipërisë!
Jemi bashkuar sot për motive të ndryshme, por me një qëllim:
Për të refuzuar qeverinë e paligjshme të Edi Ramës! Rama ik!
Për të shpallur solemnisht se ne nuk e pranojmë më këtë bandë që i shërben vetëm interesave plaçkitëse të një grushti njerëzish të pasuruar duke vjedhur dhe grabitur shqiptarët dhe duke e shndërruar Shqipërinë tonë të dashur në çerdhe të krimit të organizuar dhe të drogës.
Çdo e keqe, çdo e keqe, çdo hall dhe padrejtësi që ndodh sot në Shqipëri, çdo mynxyrë që rëndon mbi shpinat dhe tavolinat tuaja nga varfëria tek falimentimi, nga pasiguria tek depresioni, nga papunësia tek eksodi, nga taksat e larta tek çmimet e papërballueshme, nga shpërfillja tek arroganca; të gjitha burojnë nga një e keqe e madhe: zgjedhjet e blera, qeveria e paligjshme.
Kur pushtetin e merr me vota të blera, nuk ndjen asnjë përgjegjësi për njerëzit e thjeshtë, për hallet e tyre, për jetët e tyre dhe të ardhmen e tyre.
Qeveria e paligjshme e votave të blera, shkel dhe dhunon të drejtat dhe liritë e njerëzve të thjeshtë sepse nuk ndjen asnjë përgjegjësi për ta.
Sa më shumë ta lemë, aq më keq për Shqipërinë, për gjithë shqiptarët.
Ndaj sot, në emrin tuaj, në emër të gjithë shqiptarëve që na mbështesin në këtë shesh e kudo ku janë, në emër të opozitës, kërkoj largimin e Edi Ramës dhe qeverisë së tij të paligjshme, krijimin e qeverisë antimafia që do të luftojë krimin, do të çojë përpara reformën në drejtësi sipas Kushtetutës së Shqipërisë dhe do të përgatisë zgjedhjet e lira dhe të ndershme.
Kjo kërkesë, ky akt solemn, është vendimi popullor i kësaj proteste. Ju burra dhe gra, të rinj dhe të reja, të moshuara, nëna dhe baballarë, dëshmoni këtu me këtë prani gjigante dhe madhështore fundin e raporteve të deformuara politike me farsën kriminale të 25 qershorit.
Me këtë protestë, me këtë demonstrim madhështor, opozita dhe qytetarët shpallin dhe vendosin një raport të ri, një raport të vërtetë.
Një raport të ri e të vërtetë mes forcave politike, por mbi të gjitha një raport të ri mes qytetarëve të lirë dhe pushtetit të krimit.
Sot vdes 25 qershori. Sot mbaron dhe merr fund politika që mban pushtet të vjedhur, që mban pushtet të grabitur dhe të blerë. Sot vdes pushteti që nuk i përgjigjet qytetarëve dhe vullnetit të tyre.
Ky është vendimi, kjo është thirrja e popullit që ju mohua liria të zgjedhë me votë sepse narkoqeveria e Edi Ramës ndërseu bandat dhe paratë e drogës.
Deri dje e dinin vetëm disa.
Sot e dinë të gjithë shqiptarët. E kanë parë mbarë bota.
Ndaj sot duke iu kthyer poetit tonë kombëtar, dua të shpall në emrin tuaj se sot kemi zgjedhur të mos vuajmë thellë e më thellë.
Sot kemi zgjedhur të bashkohemi, të refuzojmë të keqen, të luftojmë për ta larguar.
Le ta dëgjojë Edi Rama mesazhin tuaj në cilin do bunker të jetë futur sot. Bëjeni ta dëgjojë mesazhin tuaj sot, tani : Rama ik!
Më fort!
At Zef Pllumi na mësoi se i mjerë është ai popull që nuk ia del me i zotnue bijtë e vet të këqij.
Vendi ynë, kjo Shqipëri ka patur bijtë e saj të këqij, por edhe mes tyre pak kanë qenë ata që vunë në jetë projekte kaq antikombëtare për pushtetin e tyre.
Kjo po ndodh sot.
Në Shqipëri po zbatohet një projekt, një komplot antikombëtar, aniteuropian, antidemokratik,
për pushtetin absolut të një njeriu të vetëm mbi të gjithë Shqipërinë.
Për pushtetin e tij, ky njeri ka bërë ortakëri me krimin, me oligarkët dhe mercenarët e pangopur.
Shqipëria e Edi Ramës i ngjan shteteve të falimentuara të Afrikës dhe të Azisë.
Sepse vetëm në një vend si Guinea ndodh që familja e të parit të vendit të drejtojë trafikun e drogës dhe larjen e parave.
Vetëm në një vend si Nikaragua ndodh që kreu i qeverisë të financojnë fushatën e tij elektorale me milionat e drogës.
Vetëm në diktaturat e Afrikës ndodh që ministri i Brendshëm të jetë edhe i pari i trafikut të drogës.
Vetëm në Venezuelë ndodh që shefi i mbrojtjes të jetë bashkëpunëtori më i ngushtë i baronëve të drogës.
Vetëm në Afganistanin e opiumit ndodh që vëllai i kreut të ekzekutivit të jetë edhe trafikanti më i madh i drogës.
Sot, Edi Rama i ka arritur të gjitha këto rekorde të zeza. Parti, qeveri, polici, ushtri, dhe drejtësi në shërbim dhe në përfitim të trafikut të drogës.
Kjo nuk është Shqipëria që duam. Kjo nuk është Shqipëria që meritojmë.
Atyre që për këto krahasime më thonë se nuk është e denjë për një ish-ministër të Jashtëm dhe shef diplomacie, ju them se thika ka arritur ku nuk mban dot më, ka arritur në palcë të shqiptarëve, ndaj dua t’i them çdo miku shqiptar dhe të huaj, çdokujt që i do të mirën këtij vendi: Kjo nuk është Shqipëria europiane , kjo është Shqipëria e drogës, e krimit. Kjo është një diktaturë orientale. Ne e refuzojmë! Nuk e dua dhe nuk e duam Shqipërinë e standardeve të falimentuara të Afrikës dhe të Azisë. Unë jam kryetari i një partie që ka lindur me thirrjen “Ta bëjmë Shqipërinë si gjithë Europa!”
Pengesa e vetme, barrikada e vetme për Shqipërinë europiane është kjo bandë e cila për pushtetin e saj absolut po përqendron në pak duar të gjithë pushtetin politik dhe ekonomik të vendit. E cila po zbaton një politikë eksodi, zbrazje dhe shkretimi të Shqipërisë;
Izolimin ekonomik dhe politik të vendit, që askush mos ta konkurrojë apo rrezikojë pushtetin e kësaj bande.
Hidhni vështrimin dhe shikoni si po shpaloset ky projekt:
Pasuritë publike dhe fondet publike i rrëmbejnë oligarkët, me PPP, me koncesion, me korrupsion.
Shëndetësia, arsimi, nafta, bregdeti, parqet çdo gjë që duhet t’u shërbejë shqiptarëve po grabitet nga oligarkët e Edi Ramës.
E gjithë toka e Shqipërisë i është vënë në dispozicion drogës, dhe i gjithë shteti është vënë në shërbim të trafikut të drogës, burrat dhe gratë në uniformë janë sot kokulur. Sepse një kupolë kriminale i sundon, që synon t’i kthejë në një organizatë kriminale, hamej të thasëve të drogës.
Me paratë e drogës u blenë zgjedhjet.
Me paratë e drogës tani po blihet ekonomia e shqiptarëve.
Investitorët e huaj u injoruan, u mbajtën larg.
Ata që ishin në Shqipëri u rrahën, u dhunuan dhe u përzunë që oligarkët dhe kriminelët që ulen natë për natë në sofrën e Edi Ramës të mos kishin konkurrencë.
Qeveria e dëbimit të qytetarëve i nxori tepër shqiptarët në vendin e tyre si asnjëherë tjetër.
Qindra mijëra shqiptarë janë larguar këto 4 vite. Ky është dëbim. Nuk është lëvizje e lirë.
Shqipëria kështu vdes.
Ne nuk mund ta pranojmë këtë.
Integrimi në Bashkimin Europian po sabotohet sepse futja në Europë është rrezik për pushtetin politik dhe kriminal të Edi Ramës.
Njerëzit e thjeshtë po shpërfillën, përçmohen, trajtohen me arrogancë dhe dhunohen.
Për t’i frikësuar,
Për t’i bërë të pafuqishëm, për t’jua ulur kokën,
Mbi ta po rëndojnë taksat e rritura, çmimet dhe faturat që nuk ndalen, dënimet dhe gjobat e zyrtarëve të shtetit që sillen si plaçkitës.
Mbi shqiptarët sundon papunësia, sundon varfëria.
Mbi shqiptarët rëndon padrejtësia, standardi i dyfishtë i Ramës që dënon të varfrin dhe të dobëtin, mbron kriminelin dhe hajdutin.
Kujtojmë sot në këtë shesh 22 vjeçarin Estref Halilin nga Kolonja e Lushnjës, që Edi Rama e arrestoi dhe u çoi në vetëvrasje për një cigare hashash. Për Saimir Tahirin dhe Habilajt që janë kapur me miliona nga trafiku i drogës, po Edi Rama ka ngritur shtetin në këmbë që t’i mbrojë.
Kujtojmë sot Melita Çengën, infermiere nga Shkodra, Brunilda Mekën nga Korça u hoqën nga puna dhe u çuan drejt vetëvrasjes se nuk mbanin dot familjen. Resmije Allën 35 vjeçare që humbi jetën sepse donte që fëmijën e saj azmatik sepse nuk kishte mundësi të paguante. Qindra pacientë presin më kot ilaçet e premtuara por që nuk vijnë. Sepse Edi Rama i paguan vetëm Vilma Nushit 20 mijë euro në ditë nga taksat e shqiptarëve.
Kujtojmë sot, Qamil Zelën, të burgosur, të vetëvarur për një borxh prej 3 mijë e 200 lekësh ndaj OSHË-së, Arif Doda, Klajdi Muça, Llazar Nasi, Gjovalin Gjini, e dhjetëra të tjerë, të cilët Edi Rama i çoi drejt vetëvrasjes për faturën e energjisë, por Besos dhe miqve të tij ju fal miliona euro të shqiptarëve, taksa dhe pasuri tuaja.
Kjo është mafia qeveria, ky është narkoshteti që burgos dhe dhunon të varfërit, që mbron e u bëhet mburojë kriminelëve dhe trafikantëve.
Rama ik!
Për njerëzit e thjeshtë qeveria kriminale dhe narkokryeministrit sot ka vetëm dy zgjedhje: eksod ose nënshtrim.
Ose të marrin rrugët e botës, i patë vëllezërit dhe motrat tona në çadrat e Francës.
Ose t’i nënshtrohen kësaj bande mizore plaçkitëse, e veshur me rrobat e babagjyshit të Vitit të Ri, që i grabit, i varfëron, i tall dhe i dhunon.
Në vend të pushtetit të njerëzve, Edi Rama i do njerëzit skllevër të pushtetit.
Skllevër të oligarkëve.
Skllevër të krimit.
Skllevër të mashtrimit.
Skllevër të së keqes.
Ne jemi sot këtu për ta ndalur këtë të keqe që ekonomia e Shqipërisë të mos mbetet në duart e oligarkëve grabitqarë dhe të kriminelëve.
Që qeveria të mos jetë vegël në shërbimin e tyre.
Që fatkeqësia dhe mjerimi i një brezi mos të trashëgohet brez pas brezi.
Që Shqipëria mos të shkretohet nga braktisja.
Në të shkuarën tonë ne shqiptarët jemi gënjyer shpesh nga e keqja.
Në të shkuarën tonë ne e kemi duruar dhe toleruar gjatë të keqen derisa e keqja na ka rrënuar.
E vërteta duhet thënë ashtu siç është. Në të shkuarën ne kemi besuar lehtë.
Jemi gënjyer lehtë.
Dhe nuk kemi menduar gjatë.
Sot në ditën botërore të Holokaustit është e udhës të kujtojmë thënien ogurzezë të Hitlerit: Sa fat i mirë për qeveritë kur njerëzit nuk mendojnë!
Por sot jemi këtu për t’i dhënë përgjigje narko-kryeministrit se ne mendojmë, se ne reagojmë, se ne jemi ngritur. Ja ku jemi!
Me këtë bashkim i tregojnë botës dhe njëri tjetrit se kemi vendosur:
T’i japim fund gënjeshtrës dhe mashtrimit të madh të mafias në pushtet!
Të refuzojmë dhe të përballemi me pushtetin e të keqes derisa ta largojmë. Rama ik!
Dhuna është mjeti kryesor i mafias në pushtet.
Dhuna e shtetit, dhuna e varfërisë dhe dhuna e rrugës.
Nga dhuna e kartonëve, e narko-kartonëve në Kuvend që dhunojnë Kushtetutën,
tek dhuna e taksidarit dhe inspektorit që rrënon biznesin e vogël,
nga dhuna e policit që arreston denoncuesin dhe ndihmon kriminelin,
tek dhuna e krimit mbi të gjithë.
Mafia në pushtet shpenzon çdo muaj, çdo muaj miliona euro për të gënjyer, për të mashtruar, për të
keqinformuar, për të shpëlarë mendjet e njerëzve.
Mafia në pushtet ka ngritur makinerinë më të madhe dhe më të kushtueshme të propagandës që ka njohur ndonjëherë Shqipëria.
Mafia në pushtet shet çdo ditë të zezën për të bardhë dhe sulmon këdo që sheh dhe sulmon të zezën.
Propagandë me para droge që t’u mbushë mendjen shqiptarëve se policia bëhet duke veshur
kriminelët me uniforma firmato.
Se avionët e drogës janë mushkonja dhe kanabisi që shikonin kudo imagjinatë dhe jo realitet.
Se trafikantët, vrasësit dhe përdhunuesit janë deputetë dhe kryebashkiakë që punojnë dhe sakrifikojnë
për Shqipërinë, e të mirën e njerëzve.
Se gjelbërim është të zësh parqet me kulla betoni dhe të mbjellësh bar në tarracë.
Se oligarkët grabitqarë janë bamirës që punojnë për Shqipërinë.
Mafia në pushtet paguan çdo ditë ushtrinë e mercenarëve që i shërbejnë për t’i lustruar faqen e saj të zezë.
Mercenarë të pacipë që politikanin, kryeministrin dhe ministrin në shërbim të krimit e shesin për njeriun që po lufton krimin!
Që autokratin që dhunon ligjet e mbajnë për lider që po bën drejtësi!
Që dallkaukun oriental të Ballkanit ia shesin botës si mall europian.
Mercenarët që stabilitetin e krimit e shesin për stabilitet demokratik.
Mercenarët që sot propagandojnë se të gjithë janë njësoj, se droga ka qenë gjithmonë këtu, se krimi ka qenë gjithmonë mes nesh, se të gjithë paskan faj njësoj. Edhe kriminelët, edhe të dhunuarit.
Por shqiptarët tani shohin qartë. Shqiptarët tani mendojnë dhe gjykojnë vetë.
Shqiptarët po e mposhtin frikën, po e mposhtin propagandën, po shpërfillin mercenarët.
Shqiptarët e kanë kuptuar se drejtësia nuk është një copë letër dhe fjalë në ajër, por ndëshkim i vërtet
për peshqit e mëdhenj të krimit dhe korrupsionit.
Shqiptarët e dinë se në Shqipëri nuk ka drejtësi sa kohë që Saimir Tahiri dhe qeveritarët e tjerë të
lidhur me drogën dhe krimin janë në pushtet dhe jo në burg.
Shqiptarët e kuptojnë se në Shqipëri nuk luftohet krimi, kur kokat e drogës dhe të organizatave kriminale bredhin të lirë dhe kur paratë e drogës nuk i pengon askush të blejnë dhe gllabërojnë ekonominë e shqiptarëve.
Shqiptarët e dinë se ekonomia është e shkatërruar kur ata nuk gjejnë punë.
Shqiptarët e dinë se shëndetësia është e shkatërruar kur të sëmurët nuk kanë ilaçe.
Shqiptarët e dinë se po varfërohen; e dinë se nuk paguajnë dot dritat, ujin dhe ushqimin e fëmijëve të tyre.
Shqiptarët e dinë se në BE nuk integrohesh duke integruar rrjetet e drogës dhe të krimit por duke integruar ligjet, ekonominë dhe dijet.
Shqiptarët e dinë se në Europë do të futen, kur të fusin kriminelët në burg.
Shqiptarët e dinë se nuk ka as drejtësi, as siguri, as punësim, as të ardhme me banditë në qeveri.
Nga ky shesh zëri ynë është i qartë.
Mesazhi ynë është i qartë.
Ne duam drejtësi të vërtetë dhe të barabartë për të gjithë.
Ne e duam Saimir Tahirin para drejtësisë, pa imunitet, i duam ministrat dhe politikanët e lidhur me krimin dhe korrupsionin në burg.
I duam kriminelët e drogës, të trafikut të qenieve njerëzore, të gjobvënies dhe shantazheve në burg.
Ne duam zgjedhje.
Ne duam një qeveri të dalë nga vota e lirë.
Sepse vetëm kështu do të kemi një qeveri të lirë nga krimi dhe nga oligarkia.
Ju, të gjithë ne bashkë, të gjithë shqiptarët duam mundësi për të punuar, për të ndërtuar.
Duam mundësi për sipërmarrjen.
Duam të çmontojmë monopolet dhe oligarkinë.
Duam një ekonomi që prodhon mirëqenie për të gjithë. Një shoqëri me dinjitet për të gjithë.
Një shoqëri europiane dhe një Shqipëri në Europë.
Ne e duam Europën, sepse duam vlerat e Europës.
Ne duam drejtësinë që ka Europa, duam lirinë dhe dinjitetin që ka Europa, duam qeverisjen dhe standardet që ka Europa.
Nuk e kërkojmë Europën duke kërcënuar, nuk e kërkojmë Europën duke shantazhuar. Ne, shqiptarët e ndershëm të bashkuar në këtë shesh e kudo ku jemi, e kërkojmë Europën sepse jemi të aftë, plot besim dhe të jetojmë dhe punojmë me nder dhe me mund si të gjithë europianët.
Prandaj shpallim sot këtë vendim për të qëndruar ndaj të keqes, për të luftuar për të mirën.
Sot jam para jush, Jo për të kërkuar pushtet për vete, por shtet të drejtë për të gjithë.
Jo për tu bërë vetë kryeministër, por që kushdo që të jetë kryeministër, shqiptarët të jenë më mirë.
Nuk kërkoj ta marrim pushtetin me manipulim dhe forcë, por kërkoj që shqiptarët të jenë të lirë për të zgjedhur pushtetin që duan.
Vitet e fundit kanë qenë vite beteje dhe përpjekje të madhe për demokratët dhe për mua: me arritje dhe me zhgënjime.
Por një gjë ka qenë e pandryshuar:
Ne kemi zgjedhur gjithmonë të jemi në anën e njerëzve dhe të interesit të tyre.
Ne kemi zgjedhur të jemi me Dritan Zaganin, kur të tjerët e quanin tradhtar dhe mbrojnë sot e kësaj
dite Saimir Tahirin dhe habilajt.
Ne kemi zgjedhur të denoncojmë dhe të luftojmë kriminelët në Qeveri, Bashki e Kuvend, kur ky që i solli, bën biznes dhe qeveris me ta.
Ne kemi zgjedhur të luftojmë kundër drogës, kur ky paguhet me paratë e drogës, paguan me paratë e drogës për të na sulmuar, dhe për të blerë pushtet dhe pasuri.
Ne nuk jemi lëkundur asnjëherë në zgjedhjen tonë.
Nuk do lëkundemi as tani.
Ne demokratët do të luftojmë për ato që kemi luftuar e kërkuar këto katër vjet: një shoqëri europiane, një shoqëri të denjë, ku sundon drejtësia, arsyeja dhe mirëqenia për të gjithë.
Por kjo nuk është vetëm beteja e demokratëve, kjo nuk është vetëm beteja ime, kjo nuk është vetëm beteja e opozitës që është e bashkuar për të arritur objektivin e kësaj kauze të madhe.
Kjo është beteja e të gjithë shqiptarëve.
Prandaj jemi bashkë këtu dhe në të gjithë Shqipërinë.
Bashkë do të sjellim drejtësinë, integrimin dhe përparimin e vendit tonë.
Zonja dhe zotërinj,
Klika që na sundon është sa 1/100.000 e këtij bashkimi.
Ata sundojnë mes frikës, përçarjes dhe propagandës.
Po të qëndrojmë kështu bashkë, po të vazhdojmë kështu bashkë, koha e së keqes do të numërohet mbrapsht me shpejtësi të madhe.
Për ata që pyesin: Çfarë strategjie keni?
Ju them sot: strategjia jonë është përballja, është rezistenca, është beteja totale me gjithë sa kemi në dorë, në shpirt, në zemër, me gjithë fuqinë që na jep Zoti i madh KUNDËR kësaj të keqe që ka pushtuar vendin tonë, ka marrë peng njerëzit dhe të ardhmen tonë, ka gllabëruar liritë dhe të drejtat
tona! Kjo është strategjia.
Për ata që pyesin çfarë doni të arrini? Përgjigja është vetëm një fjalë: FITORE! FITORE FITORE — me çdo kusht dhe sado sfiduese dhe e mundimshme të jetë rruga drejt saj!
Sepse pa fitoren e kësaj kauze, nuk ka të ardhme. Nuk ka të ardhme për fëmijët tanë, nuk ka të ardhme për popullin shqiptar, nuk ka të ardhme për Shqipërinë!
Le të bashkohemi në këtë betejë pa kthim, në këtë shesh dhe anembanë Shqipërisë.
Ne jemi shumica.
Ne jemi shqiptarët e ndershëm që nuk do ta ulim më kokën para së keqes. Rama ik! Rama ik! Rama ik!
Ju ftoj të gjithë si jemi bashkë të përshëndetemi këtu me njëri tjetrin. Unë do të jem në mesin tuaj e të vazhdojmë kështu të demonstrojmë forcën e pathyeshme të kësaj beteje popullore kundër krimit.
Zoti e bekoftë Shqipërinë!
Zoti bekoftë shqiptarët!
Fitore!
