Në mbledhjen e sotme të Komisionit për Çështjet Europiane është zhvilluar seancë dëgjimore me Ministren e Shtetit dhe Kryenegociatoren znj. Majlinda Dhuka. Deputeti i Partisë Demokratike, Kreshnik Çollaku, në fjalën e tij është shprehur se lidhjet me krimin e organizuar dhe korrupsionin është pengesa politike që Shqipëria nuk po i përgjigjet dot për të përmbushur standardin jetik për aleatët tanë strategjikë.
Në lidhje me këtë, Çollaku pati dhe një pyetje të drejtpërdrejtë për zonjën Dhuka, ku ku tha se sa e ndihmojnë qeverinë shqiptare akuzat e një ish zëvendëskryeministri karshi kryeministrit për lidhje me mafien dhe krimin e organizuar në trafiqet ndërkombëtare të drogës.
Fjala e Nënkryetarit të PD, deputeti, Kreshnik Çollaku:
Pra ju e dini që ka një dekret të presidentit Biden, ku aktorët e korruptuar në Ballkanin Perëndimor kategorizohen rrezik jo vetëm i sigurisë kombëtare të vendeve përkatëse, por dhe i aleancës Euro-Atlenatike. I njëjti qëndrim ndahet përgjithësisht dhe nga Mbretëria e Bashkuar. E njëjta frymë edhe pse e thënë ndryshe përcaktohet dhe në kërkesat që ka Bashkimi Europian. Pra, lidhjet me krimin e organizuar dhe korrupsionin është pengesa politike që vendi nuk po i përgjigjet dot për të përmbushur standardin jetik për aleatët tanë. Në këtë pikëpamje unë doja t’u bëja një pyetje të drejtpërdrejtë, nuk jam as prokuror, as polic, as hetues. Sa e ndihmojnë qeverinë shqiptare akuzat e një ish zëvendëskryeministri karshi kryeministrit për lidhje me mafien dhe krimin e organizuar në trafiqet ndërkombëtare të drogës?
