Kreu i PD-Demokratët Euroatlantikë, Lulzim Basha, ka reaguar sërish për amnistimin që i bënë socialistët deputetes Olta Xhaçka. Në një postim më facebook, Basha shprehet se pasi dolën kundër Gjykatës Kushtetuese, po përpiqen të kamuflojnë puçin kushtetues përmes sorollatjes në Komisionin e Venecias.
Sipas tij, pengimi i drejtësisë është një akt antishtetëror dhe se Edi Rama nuk punon për qytetarët por për veten dhe ortakët e tij.
Postimi i plotë i Bashës:
Pasi dolën kundër Gjykatës Kushtetuese, socialistët po përpiqen të kamuflojnë puçin kushtetues përmes sorollatjes në Komisionin e Venecias të çështjes “Xhaçka”.
Pengimi i drejtësisë është një akt antishtetëror, dëshmi e një modeli që ka në qendër interesat e pushtetit, jo interesat e qytetarëve.
Edi Rama nuk punon për ju, por për veten dhe ortakët e tij.
Shqipëria nuk e meriton këtë model klientelist që kërcënon shtetin ligjor dhe integrimin e vendit. Shqipëria meriton më shumë.
