Kryetari i Partisë Demokratike Lulzim Basha, në një shënim në llogarinë e tij në facebook njoftoi mbi takimet që ka patur sot, gjatë paneleve që po mbahen në kuadër të Dialogut të Nivelit të Lartë që po zhvillohet në Berlin, një organizim prestigjioz i Fondacionit “Konrad Adenauer”.
Postimi i plotë i kryetarit Lulzim Basha
Ne qendër të Dialogut të Nivelit të Lartë që po zhvillohet nga Fondacioni Konrad Adenauer në bashkëpunim me Këshillin Ekonomik Gjerman në Berlin, është angazhimi i Gjermanisë për perspektivën europiane të Ballkanit Perëndimor. Referues kryesor ishte edhe dr. Joachim Bertele, zv/Kryekëshilltari i kancelares Angela Merkel për Politikat e Jashtme, të Sigurisë dhe Zhvillimit.
Pavarësisht krizës që po kalon aktualisht Shqipëria, problemeve me lidhjet e politikës me krimin, shitblerjes së votave, korrupsionit, ne do të bëjmë gjithçka që ashtu siç liberalizuam vizat ti hapim rrugën edhe anëtarësimit të Shqipërisë në Bashkimin Europian.
Nuk ka asnjë diskutim që e ardhmja e Shqipërisë dhe e Ballkanit Perëndimor është BE. Mirënjohje për angazhimin dhe mbështetjen e pakursyer të Gjermanisë në procesin e integrimit të Shqipërisë në BE por dhe të ruajtjes së pacënuar të tërësisë territoriale të Kosovës.
Tani është koha për të ndalur politikanët e korruptuar dhe të lidhur me krimin që për interesat e tyre po kërcënojnë perspektivën europiane dhe paqen e stabilitetin në Ballkanin Perëndimor.
