- Vendimi i Këshillit të Europës për të anulluar misionin e vëzhgimit për farsën elektorale të 30 qershorit është fakt kuptimplotë se 30 Qershori nuk është ligjërisht ditë zgjedhjesh në Shqipëri.
- Vendimi është politik, sepse tërheqje nga Këshilli i Europës nuk ka patur as për zgjedhje të zhvilluara në zona konfliktesh të armatosura apo konfliktesh civile, përfshirë, Maqedoninë dhe Ukrainën.
- Tërheqja e institucionit kryesor europian të mbrojtjes së të drejtave të njeriut dhe demokracisë, është distancim i qartë nga votimet farsë një-partiake, anti-demokratike dhe anti-kushtetuese të Edi Ramës.
- Në Shqipëri nuk ka dhe nuk ka për të pasur zgjedhje të lira dhe të ndershme për aq kohë sa Edi Rama është kryeministër dhe për aq kohë sa kriminelët e politikës dhe të bandave që vodhën zgjedhjet, të dalin para drejtësisë.
- Votimet e 30 qershorit janë nul. Opozita dhe qytetarët janë në këmbë në mbrojtje të Kushtetutës, në mbrojtje të demokracisë! Ne nuk do të lejojmë votime të paligjshme dhe farsë! Asnjë hap pas!
DEKLARATË E KRYETARIT TË PARTISË DEMOKRATIKE, LULZIM BASHA
Të dashur bashkëqytetarë!
Sot bota perëndimore dha sinjalin e parë, të qartë dhe të prerë, se 30 Qershori nuk është ditë zgjedhjesh në Shqipëri.
Vendimi i Kongresit të Autoriteteve Rajonale e Lokale të Këshillit të Europës për të anulluar dërgimin e Delegacionit Vëzhgues për farsën elektorale që po tenton të zhvillojë Edi Rama, është fakt kuptimplotë se në 30 Qershor nuk ka zgjedhje në Shqipëri.
Për herë të parë nga rënia e komunizmit, Këshilli i Europës ka vendosur të mos dërgojë Delegacion Vëzhgues për zgjedhjet, pavarësisht ftesës që i ka bërë Qeveria shqiptare. Këtë vendim Këshilli i Europës e ka marrë jo sepse ia ka kërkuar opozita, por sepse 30 Qershori nuk është ligjërisht ditë zgjedhjesh në Shqipëri.
Është një vendim qartësisht politik sepse tërheqje nga Këshilli i Europës nuk ka patur as për zgjedhje të zhvilluara në zona konfliktesh të armatosura apo konfliktesh civile nga Ukraina në Gjeorgji nga Armenia në Azerbajxhan apo edhe gjatë konfliktit të armatosur në Maqedoni.
Duhet të mbahet parasysh se Këshilli i Europës është institucioni kryesor i monitorimit të zgjedhjeve vendore në Europë.
Tërheqja e Këshillit të Europës, institucionit kryesor europian të mbrojtjes së të drejtave të njeriut dhe demokracisë, është distancim i qartë nga votimet farsë një-partiake, anti-demokratike dhe anti-kushtetuese që kërkon të bëjë Edi Rama.
Në Shqipëri nuk ka dhe nuk ka për të pasur zgjedhje të lira dhe të ndershme për aq kohë sa Edi Rama është kryeministër dhe për aq kohë sa kriminelët e politikës dhe të bandave që vodhën zgjedhjet në Durrës, Dibër dhe gjithë Shqipërinë të dalin para drejtësisë.
Votimet e 30 qershorit janë nul, janë dhe do të jenë zero.
Ato janë tentativë për grusht shteti i Edi Ramës për të rrëmbyer të gjithë qeverisjen vendore të Shqipërisë, me të njëjtat banda dhe me të njëjtët kriminelë që vodhi edhe zgjedhjet e 2015-s dhe të 2017-s.
Opozita dhe qytetarët janë në këmbë në mbrojtje të Kushtetutës, në mbrojtje të demokracisë!
Ne nuk do të lejojmë votime të paligjshme dhe farsë!
Nuk do të lejojmë që në Shqipëri të instalohet përfundmisht regjimi autokratik kriminal i Edi Ramës.
Ne nuk do të lejojmë që Edi Rama t’i shkojë deri në fund planit të tij kriminal për të mbajtur me dhunë pushtetin dhe për të destabilizuar vendin.
Asnjë hap pas!
Ne do t’i dalim për zot Shqipërisë, demokracisë dhe rendit kushtetues!
Ju ftoj të jemi bashkë! Ju ftoj të jeni të vendosur në këtë betejë vendimtare për të ndalur rrëshqitjen e vendit, të ardhmes tuaj dhe të fëmijëve tuaj nën humnerën e diktaturës së krimt, për të hapur së bashku rrugën e shpresës, ndryshimit të thellë dhe të vërtetë për të gjithë ju.
Ju siguroj se fundi i Edi Ramës dhe regjimit të tij, është pranë.
Bashkë kemi mundësitë, bashkë kemi forcën ta nxjerrim vendin nga gremina ku ka rënë, sepse ne jemi shumica!
Ne jemi të bashkuar dhe më të fortë se kurrë në betejën tonë për Shqipërinë si gjithë Europa, për Shqipërinë e të gjithë shqiptarëve!
Ju faleminderit!
