Basha: Në zgjedhje do jemi me një ekip vlerash, njerëz që janë në politikë për t’ju shërbyer qytetarëve e jo vetes

Kryetari i Partisë Demokratike-Demokratët Euroatlantikë, Lulzim Basha, ka postuar një video në facebook nga intervista e mbrëmshme, ku foli për ekipin e ri që do të garojë në zgjedhjet e ardhshme.

Basha shkruan se angazhimi i ekipit të ri do të jetë për të mbrojtur interesin publik me koherencë dhe integritet, duke qëndruar të vendosur kundër politikës së vjetër dhe konfliktuale. Ai nënvizon se ky angazhim do të vazhdojë edhe për të ofruar alternativën që qytetarët meritojnë në zgjedhjet e ardhshme.

Postimi i Lulzim Bashës:

Ne po ndërtojmë një ekip vlerash, me njerëz që janë në politikë për t’ju shërbyer qytetarëve e jo vetes. Demokratët Euroatlantikë qëndrojnë në mbrojte të interesit publik me koherencë dhe integritet, dhe ashtu siç zgjodhëm dhe mbrojtëm me bindje dhe karakter ndarjen nga politika e vjetër dhe konfliktuale, do të qëndrojmë të vendosur në krah të qytetarëve, për t’i dëgjuar ata dhe për t’ju ofruar alternativën që ata meritojnë në zgjedhjet e ardhshme.

Zbardhja e videos:

Ne do t’i qasemi njerëzve pa asnjë kompleks nga e kaluara. Ne do t’u çojmë kandidatë për deputetë, që e para, vijnë nga komuniteti. Zgjohen me ta, çojnë fëmijët në shkollë me ta, përballen me problemet me rendin publik me ta, kur thonë, e dëgjojnë krismën e krimit në një kohë me ta. Pra, njerëz që jetojnë me hallet e njerëzve. Ky është mësimi i parë nga e kaluara.

Dhe mësimi i dytë është që ne do t’i japim fuqi atyre që këto 3 vite kanë qëndruar me sakrificë personale për diçka më të madhe në të cilën kanë besuar. Këta njerëz që kanë qëndruar 3 vite përballë joshjeve dhe presioneve qeveritare dhe të shumëllojshme edhe të krimit, po dhe të pjesës tjetër të opozitës, e kanë provuar tashmë që duke zgjedhur të qëndrojnë me sacrifice për interesin e njerëzve kundër interesit të tyre të njëjtën gjë do të bëjnë edhe nesër si deputetë.

Pra kemi, si me thënë, fushën e hapur për të ecur përpara me një ekip, me një korpus kandidatësh, që si asnjëherë tjetër do të jenë më afër qytetarëve se kurrë më parë, që ka qëndruar me kosto të mëdha për interesin e demokratëve, për interesin e opozitës, për interesin e Shqipërisë kundër Trekëndëshit të Bermudës dhe intrigave të Edi Ramës dhe qeverisjes së tij.