Blog

Gjatë vizitës në Londër, Kryetari i PD-Demokratët Euroatlantikë, Lulzim Basha, zhvilloi takime edhe me zyrtarë të Ministrisë së Jashtme të Mbretërisë së Bashkuar dhe diskutoi mbi situatën në Shqipëri, lidhjet e politikës me krimin dhe korrupsionin. Ai vuri në dukje rëndësinë e dosjes së SPAK që çoi në arrestimin e deputetit Jurgis Çyrbja, si një dëshmi e lidhjes të krimit me qeverisjen e Edi Ramës.

Basha theksoi mbështetjen për SPAK-un dhe kërkoi drejtësi për ata që kanë abuzuar me paratë e shqiptarëve. Gjatë takimit me Lord David Richards, ai diskutoi për sfidat në rajon, përfshirë korrupsionin dhe ndikimin destabilizues të Rusisë.

Basha theksoi rëndësinë e anëtarësimit të Kosovës në NATO dhe mbështetjen për Ukrainën përballë agresionit rus.

Postimi i plotë i Bashës:

Në vijim të vizitës sime në Londër, pata një sërë takimesh të rëndësishme në Ministrinë e Jashtme të Mbretërisë së Bashkuar. Gjatë takimit me drejtuesit për Ballkanin Perëndimor, diskutuam për situatën në Shqipëri, lidhjet e politikës me krimin dhe korrupsionin.
Dosja e SPAK, që çoi në arrestimin e deputetit të Edi Ramës, Jurgis Çyrbja, është një kambanë alarmi që tregon qartë se si krimi i ka dhënë pushtet Edi Ramës dhe se qeveria e tij është vënë në shërbim të krimit. Theksova mbështetjen tonë për SPAK-un, si dhe pritshmëritë për të çuar para drejtësisë të gjithë ata që kanë abuzuar me paratë e shqiptarëve dhe që kanë blerë zgjedhjet duke i shërbyer krimit.

Sot pata kënaqësinë të takohesha edhe me mikun tim Lord David Richards, ku diskutuam për sfidat me të cilat përballet sot Shqipëria, Kosova dhe rajoni.

Diskutuam për situatën në vend, për korrupsionin që po shkatërron ëndrrat dhe shpresat e të rinjve, kapjen e shtetit dhe trajtimin e tij si pronë private nga Edi Rama. Edhe pse SPAK ka nisur të japë rezultate në këtë luftë, ai ndodhet nën presionin e vazhdueshëm të qeverisë dhe një pjese të opozitës. Theksova se denoncimet tona ndër vite janë faktuar nga drejtësia, duke treguar se si krimi ka zgjedhur deputetët e Edi Ramës, të cilët më pas kanë vendosur qeverisjen në shërbim të interesave të tyre.

Bashkëpunimi i Edi Ramës me një pjesë të opozitës, të drejtuar nga Sali Berisha, u materializua në bashkimin e votave për të liruar zyrtarët e korruptuar, duke mos lejuar që qytetarët të zgjedhin deputetët e ardhshëm me votë të drejtpërdrejtë dhe duke bërë që PD të jetë peng i interesave të një individi.

Me Lord David Richards, ish-shefi i Shtabit të Përgjithshëm të Forcave të Armatosura të Mbretërisë së Bashkuar, diskutova gjithashtu për programin tonë për sigurinë. Prioritet që do të jetë zhvillimi i partneriteteve strategjike me vendet aleate në vlerësimin e përbashkët të rreziqeve dhe kërcënimeve në hapësirën Euro-Atlantike, themelimi i Komandës së Mbrojtjes Kibernetike, krijimi i Agjencisë së Sigurisë Kombëtare brenda vitit 2029, rritja e shpenzimeve reale për mbrojtjen në interes të sigurisë kombëtare, dhe reformimi i Forcave të Armatosura.

Theksova nevojën e avancimit të antarsimit të Kosovës në NATO edhe përballë ndikimeve të Rusisë, e cila kërkon destabilizimin e rajonit.

Folëm gjithashtu për rrezikun që paraqet agresioni rus ndaj Ukrainës dhe pasojat e tij për sigurinë europiane. Theksova domosdoshmërinë që Rusia duhet të detyrohet të paguajë për rindërtimin e Ukrainës dhe ofrimin e mbështetjes së gjithanshme për luftën që Ukraina po zhvillon me Rusinë.

Kryetari i PD-Demokratët Euroatlantikë, Lulzim Basha, zhvilloi një takim me Lord Richard Keen, anëtar i Partisë Konservatore britanike dhe Ministër i Drejtësisë në hije, ku diskutuan për luftën kundër korrupsionit në Shqipëri, ndikimin e krimit të organizuar në proceset zgjedhore dhe përparësinë e anëtarësimit të Kosovës në Këshillin e Evropës.

Basha theksoi se pavarësisht përpjekjeve të SPAK dhe GJKKO për të hetuar dhe ndëshkuar korrupsionin, progresi nuk do të jetë i mjaftueshëm nëse nuk mbështetet nga një qeveri e përkushtuar për të luftuar paligjshmërinë dhe për të siguruar qeverisje të mirë.

Gjithashtu, ai kërkoi përdorimin e aseteve të ngrira të Rusisë për rindërtimin e Ukrainës, si pjesë e një raporti të miratuar nga Këshilli i Evropës.

Postimi i plotë i kryetarit të PD-Demokratët Euroatlantikë, Lulzim Basha:

Lufta kundër korrupsionit, ndarja e politikës nga krimi dhe anëtarësimi i Kosovës në Këshillin e Evropës ishin në qendër të diskutimit që zhvillova me Lord Richard Keen, anëtar i Partisë Konservatore dhe pjesë e Dhomës së Lordëve, si dhe Ministër i Drejtësisë në hije në Parlamentin e Mbretërisë së Bashkuar.

Në Shqipëri, korrupsioni mbetet një sfidë madhore, edhe pse SPAK ka bërë përparime të rëndësishme në luftën kundër tij. Korrupsioni i përhapur gjerësisht ka ndikuar negativisht në jetesën e shqiptarëve, gjysma e popullsisë jetojnë në varfëri, dhe numri i atyre që emigrojnë është me i larti në Balllan.

Hetimet e SPAK për zyrtarë dhe deputet të Edi Ramës kanë faktuar ndërhyrjet e krimit të organizuar në proceset zgjedhore, duke deformuar vullnetin e shqiptarëve dhe si këmbim qeverisja është vënë në sherbim të organizatave kriminale

Pavarësisht përpjekjeve të SPAK dhe Gjykatës së Posaçme për të hetuar dhe ndëshkuar korrupsionin, progresi nuk do të jetë i mjaftueshëm nëse nuk mbështetet nga një qeveri e përkushtuar për të luftuar paligjshmërinë dhe për të siguruar qeverisje të mirë.

Në këtë takim me Lord Keen, diskutuam gjithashtu për rolin e tij si Kryetar i Komisionit për Çështjet Ligjore dhe të Drejtat e Njeriut në Këshillin e Evropës. Unë ritheksova rëndësinë që BE dhe NATO duhet t’i japin njohjes së Kosovës për stabilitetin e rajonit dhe përshpejtimin e anëtarësimit të saj në Këshillin e Evropës, si interesi më i mirë i shqiptarëve dhe serbëve që bashkëjetojnë në Kosovë.

Folëm gjithashtu për Ukrainën, ku theksova nevojën për të përdorur asetet e ngrira të Rusisë për të financuar rindërtimin e vendit. Rusia mban përgjegjësi për shkatërrimet e shkaktuara dhe duhet të kompensojë dëmet në përputhje me ligjin ndërkombëtar, si pjesë e raportit tim të miratuar nga Këshilli i Evropës, që synon gjithashtu parandalimin e agresioneve të ardhshme.

Kryetari i PD-Demokratët Euroatlantikë, Lulzim Basha, u takua në Parlamentin Britanik me kryetarin e grupit parlamentar gjithëpartiak për Shqipërinë dhe Kosovën, si dhe deputetin e Partisë Konservatore, Martin Vickers.

Basha diskutoi për përpjekjet e SPAK-ut në luftën kundër korrupsionit dhe rëndësinë e vetting-ut të politikanëve për të eliminuar lidhjet me krimin. Ai theksoi gjithashtu nevojën për anëtarësimin e Kosovës në NATO dhe heqjen e pengesave nga disa vende anëtare, duke kërkuar një rol aktiv të Britanisë për sigurinë në Ballkanin Perëndimor.

Postimi i plotë i kryetarit të PD-Demokratët Euroatlantikë, Lulzim Basha:

Kënaqësi të takoja sot në Parlamentin Britanik kryetarin e grupit parlamentar gjithëpartiak për Shqipërinë dhe Kosovën dhe deputetin e Partisë Konservatore, Martin Vickers. Diskutuam për situatën në Shqipëri dhe përpjekjet e SPAK-ut në luftën kundër korrupsionit dhe krimit të organizuar. Dhënia fund e pandëshkueshmërisë dhe ndarja e politikës nga krimi janë sfidat me të cilat përballet Shqipëria. Rasti i fundit i arrestimit të deputetit të Edi Ramës tregoi se si krimi i ka siguruar pushtetin Ramës.

E informova mbi propozimin tonë të depozituar tashmë në parlament për vetting-un e politikanëve, një nismë që synon të largojë nga politika politikanët e korruptuar dhe të lidhur me krimin.

Po ashtu, një tjetër çështje për diskutim ka qenë edhe situata e sigurisë në Ballkanin Perëndimor, dhe veçanërisht në Kosovë, ku Britania e Madhe ka një rol të rëndësishëm në garantimin e sigurisë përballë një agresioni të vazhdueshëm nga aktorë të ndryshëm që mbështeten nga Beogradi.

Theksova domosdoshmërinë që Kosova të nisë sa më parë procesin e anëtarësimit në NATO dhe, në funksion të paqes së qëndrueshme në rajon, hapjen e këtij procesi përmes heqjes së pengesave nga 4 vendet anëtare që akoma nuk e kanë formalizuar njohjen e saj.

Kryetari i PD-Demokratët Euroatlantikë, Lulzim Basha, ka reaguar sërish për arrestimin e deputetit të Partisë Socialiste, Jurgis Çyrbja. Në një postim në facebook, Basha shkruan se Edi Rama është arsyeja pse krimi përdor pushtetin.

Ai thotë se Jurgis Çyrbja u zgjodh deputet si në zgjedhjet e 2017-ës, ashtu edhe në zgjedhjet e vitit 2021, dhe krimi nuk do të mund ta zgjidhte pa bekimin e Edi Ramës.

Kreu i demokratëve euroatlantikë gjithashtu thotë se përveç faktit që krimi është bërë njësh me pushtetin dhe qeveria është vendosur në shërbim të krimit, kjo është skema përmes së cilës Edi Rama ka ardhur në pushtet dhe e ka mbajtur pushtetin në Shqipëri. Ndërsa ata opozitarë që sipas tij tre vite më parë, i fërkonin barkun Edi Ramës duke legjitimuar krimin zgjedhor në Shqipëri, sot duhet të ndihen të paktën të turpëruar.

Dhe si zgjidhje për këtë situatë, Basha sheh vettingun e politikanëve dhe ndarjen e politikës nga krimi.

Postimi i plotë i Lulzim Bashës:

Pa Edi Ramën, Çyrbet e tij, nga jugu në veri, nuk do ta përdornin dot pushtetin në shërbim të krimit.

Në mënyrë të përsëritur kam denoncuar lidhjet e kësaj qeverie me krimin dhe nënshtrimin e saj përballë tij, i cili e ka ndihmuar atë të vijë në pushtet.

Jo për herë të parë dalin në dritë fakte për lidhjet midis krimit dhe politikës, si dhe për ndihmën që krimi u ka dhënë në zgjedhje.

Jurgis Çyrben e zgjodhi krimi në vitin 2017. Jurgis Çyrben e zgjodhi krimi edhe në vitin 2021. Por krimi nuk do të mund ta zgjidhte atë pa bekimin e Edi Ramës, i cili e futi dhe e mbajti atë në listë. Sepse Rama kërkonte pushtetin për veten e tij dhe jo për shqiptarët.

Deputeti i Edi Ramës, me bekimin e tij, ka dekonspiruar aksionet e policisë, duke i shërbyer personave të shpallur në kërkim ndërkombëtar, për t’u shpëtuar arrestimeve nga policia. Në këmbim, këta persona i siguronin atij votues për ta mbështetur si kandidat për deputet në Qarkun e Durrësit.

Përveç faktit që krimi është bërë njësh me pushtetin dhe qeveria është vendosur që nga dita e parë e Edi Ramës në krye të saj në shërbim të krimit, kjo është skema përmes së cilës Edi Rama ka ardhur në pushtet dhe e ka mbajtur pushtetin në Shqipëri.

Ata opozitarë që, tre vite më parë, i fërkonin barkun Edi Ramën duke më fajësuar mua dhe duke legjitimuar krimin zgjedhor në Shqipëri, sot duhet të ndihen të paktën të turpëruar.

Që Shqipëria t’i kthehet normalitetit sa më parë, duhet të bëhet vetting-u i politikanëve dhe ndarja e politikës nga krimi.

Kryetari i PD-Demokratët Euroatlantikë, Lulzim Basha, dhe deputetja Oriola Pampuri gjatë vizitës në Berlin zhvilluan një takim me Stefan Kaufmann, raportuesin për Shqipërinë në Grupin e Punës për Çështjet Europiane të Bundestagut Gjerman. Basha theksoi rëndësinë e sundimit të ligjit dhe luftës kundër korrupsionit, duke e cilësuar korrupsionin, pastrimin e parave dhe varfërinë si sfidat kryesore që përballet Shqipëria.

Ai shprehu shqetësim për përpjekjet e kryeministrit Edi Rama, në bashkëpunim me disa opozitarë, për të shantazhuar dhe kontrolluar institucionet e drejtësisë, duke përmendur amnistinë si një rast të qartë të lirimit të zyrtarëve të korruptuar. Kreu i demokratëve euroatlantikë theksoi se shqiptarët presin që pas 33 vitesh demokraci, ata që janë të korruptuar dhe të inkriminuar të përballen me drejtësinë.

Basha gjithasthu shprehet se folën për situatën politike në vend dhe teatrin politik në vend i cili kulmoi me amnistinë, ndryshimet në kodin zgjedhor dhe vendimin e Gjykatës së Apelit për legjitimitetin e PD-së nga e njëjta trupë gjyqësore, që në një rast të paprecedent, dënoi deputetin Ervin Salianji, duke treguar qartë se sistemi ynë i drejtësisë është nën presion.

Postimi i plotë i Bashës:

Kënaqësi të takoja në Berlin z. Stefan Kaufmann, raportues për Shqipërinë në Grupin e Punës për Çështjet Europiane të Bundestagut Gjerman.
Gjatë takimit, ndamë të njëjtin mendim mbi rëndësinë që ka për Shqipërinë sundimi i ligjit dhe lufta kundër korrupsionit. Korrupsioni, pastrimi i parave, gjendja e ekonomisë ku gjysma e popullsisë jeton në varfëri dhe emigrimi masiv, janë disa nga sfidat më të mëdha me të cilat përballet vendi ynë.
Shpreha shqetësimin tim për përpjekjet e kryeministrit Edi Rama, në bashkëpunim me një pjesë të opozitës, për të shantazhuar dhe vendosur nën kontroll institucionet e drejtësisë, si SPAK. Një shembull i qartë i këtyre përpjekjeve ishte amnistia, e cila çoi në lirimin e zyrtarëve të korruptuar.
Shqiptarët presin që, pas 33 vitesh demokraci, ti jepet fund pandëshkueshmërisë, dhe që të korruptuarit e të inkriminuarit të përballen me drejtësinë. Me qeverisjen e Edi Ramës, kriminelët dhe trafikantët janë veshur me pushtet, duke caktuar deputetë, drejtues policie dhe figura kyçe në institucione, siç kanë treguar përgjimet e prokurorisë së posaçme dhe ato të publikuara në media.
Diskutuam gjithashtu për situatën politike në vend, ku së fundmi po shohim një teatër të përsëritur që synon të legjitimojë një pazar të ri politik, si ai i disa muajve më parë, që kulmoi me amnistinë, ndryshimet në kodin zgjedhor dhe vendimin e Gjykatës së Apelit për legjitimitetin e PD-së nga e njëjta trupë gjyqësore, që në një rast të paprecedent, dënoi deputetin Ervin Salianji, duke treguar qartë se sistemi ynë i drejtësisë është nën presion dhe segmente të tij janë ende nën kontrollin politik të atyre që kanë drejtuar për 34 vjet vendin.

Kryetari i PD-Demokratët Euroatlantikë, Lulzim Basha, së bashku me deputeten Oriola Pampuri, u takuan me deputetin gjerman Gunther Krichbaum, zëdhënës i grupit parlamentar CDU/CSU për çështjet evropiane. Gjatë takimit, ata diskutuan mbi integrimin europian të Shqipërisë dhe rëndësinë e forcimit të sundimit të ligjit dhe luftës kundër korrupsionit.

Basha theksoi se Shqipëria renditet ndër vendet me nivelin më të lartë të korrupsionit në Europë, duke penguar përparimin ekonomik dhe duke detyruar shumë të rinj të emigrojnë. Ai gjithashtu tha se qeveria po pengon përpjekjet e SPAK për të luftuar korrupsionin dhe për refuzimin e zbatimit të vendimeve të Gjykatës Kushtetuese.

Në prag të zgjedhjeve parlamentare, ai kërkoi mbështetje nga partnerët gjermanë për të garantuar një proces zgjedhor të drejtë dhe të besueshëm, pasi ndodhemi në kushtet kur Edi Rama dhe një pjesë e opozitës e drejtuar nga Sali Berisha kanë mbyllur listat dhe kanë penguar një reformë të plotë zgjedhore.

Postimi i plotë i Bashës:

Pata kënaqësinë që së bashku me Oriola Pampurin të takonim deputetin e Bundestagut Gjerman, z. Gunther Krichbaum, i cili është edhe zëdhënës i grupit parlamentar CDU/CSU për çështjet evropiane në Bundestagun gjerman.

Gjatë takimit, u diskutua çështja e integrimit europian të Shqipërisë, rëndësia e forcimit të sundimit të ligjit dhe luftës kundër korrupsionit, si dhe sfidat me të cilat përballet vendi ynë. Indeksi i perceptimit të korrupsionit, publikuar nga Transparency International, vijon ta rendisë Shqipërinë ndër vendet me nivelin më të lartë të korrupsionit në Europë, gjë që pengon përparimin ekonomik dhe shoqëror të vendit, duke detyruar kryesisht të rinjtë të emigrojnë.

Edhe përpjekjet e SPAK për t’i dhënë fund pandëshkueshmërisë dhe për të luftuar korrupsionin po pengohen nga qeveria, e cila tregon nivelin më të ulët të bashkëpunimit dhe madje refuzon të plotësojë kërkesat për t’u krijuar më shumë hapësira ligjore dhe mbështetje logjistike për punën e tyre. Shqetësues është refuzimi i mazhorancës për të zbatuar vendimet e Gjykatës Kushtetuese dhe bashkimi i votave në parlament me një pjesë të opozitës për të liruar zyrtarët e korruptuar.

Hapja e negociatave pas 12 vitesh bllokim nga Edi Rama është një lajm i mirë për Shqipërinë, por përpjekjet e qeverisë për të kontrolluar çdo pushtet dhe korrupsioni i përhapur janë sinjale negative për kohën e gjatë që do t’i duhet vendit për t’i përmbushur këto kushte.

Ndërkohë që Shqipëria po shkon drejt zgjedhjeve parlamentare, dhe në kushtet kur Edi Rama dhe një pjesë e opozitës e drejtuar nga Sali Berisha kanë mbyllur listat dhe kanë penguar një reformë të plotë zgjedhore, shitblerja e votave, përdorimi i pushtetit, fondeve dhe administratës, si dhe përfshirja e krimit, tashmë të dëshmuara me fakte, janë shqetësuese. Kërkova ndihmën dhe mbështetjen e partnerëve gjermanë për të garantuar një proces zgjedhor të drejtë dhe të besueshëm.