Demokratët Euroatlantikë - Partia Demokratike

12 Kor

0

Vrasja në Tropojë, Myzafer Elezi: Ndodh në mes të sezonit turistikë! Qeveria ka dështuar në vendosjen e sigurisë publike

by PD in Lajmi fundit

Anëtari i Kryesisë së Demokratëve Euroatlantikë, Myzafer Elezi, ka reaguar në lidhje me ngjarjen e rëndë të ndodhur në qytetin e Tropojës, ku një person u vra dhe një tjetër u plagos. Me anë të një postimi në facebook, Elezi shprehet se kjo ngjarje ndodh në mes të sezonit turistik kur qyteti duhet të jetë një vend i sigurtë dhe mikpritës për të gjithë.

Sipas tij, është e qartë që qeveria aktuale ka dështuar në mënyrë të përsëritur në detyrën e saj kryesore, të vendosjes së rendit dhe sigurisë publike për qytetarët.

Si ekspertë sigurie, Elezi më tej i kërkon qeverisë përforcim të patrullave policore sidomos në zonat turistike, hetimin e paanshëm të aktit kriminal, rritjen e burimeve dhe trajnimet për forcat e rendit , si dhe transparencë nga ana e qeverisë për çdo hap që ndërmerr në luftën kundër krimit.

Reagimi i plotë i Myzafer Elezit:

Të nderuar qytetarë,

Sot, Tropoja është tronditur nga një akt i tmerrshëm dhune ku një person është vrarë dhe një tjetër është plagosur. Kjo ngjarje tragjike ndodh në mes të sezonit turistik, kur qyteti duhet të jetë një vend i sigurt dhe mikpritës për të gjithë. Kjo ngjarje tragjike është vetëm një nga shumë raste të krimeve të rënda që kanë tronditur vendin tonë kohët e fundit.
Është e qartë se qeveria aktuale ka dështuar në mënyrë të përsëritur në detyrën e saj kryesore: të vendosjes së rendit dhe sigurisë publike për qytetarët e Shqipërisë. Paaftësia për të kontrolluar situatën e krimit dhe për të mbrojtur jetën e njerëzve është e papranueshme dhe tregon një mungesë të theksuar lidershipi dhe përgjegjshmërie.
Qytetarët e Tropojës dhe turistët që vizitojnë vendin tonë meritojnë më shumë. Meritojnë të ndihen të sigurt në rrugë, në shtëpitë, në mjediset pubkile dhe gjatë pushimeve të tyre. Është koha që qeveria të marrë përgjegjësi për këtë situatë të papranueshme dhe të ndërmarrë masa të menjëhershme dhe efektive për të rikthyer rendin dhe sigurinë në qytetin tonë.
Në emër të Partisë Demakratike – Demakratët euroatlantikë, kërkoj nga qeveria:
* Përforcimin e patrullave policore dhe praninë e tyre të shtuar në zonat turistike dhe të ndjeshme ndaj krimit.
* Hetime të plota dhe të paanshme për këtë akt kriminal dhe të gjitha aktet e tjera të dhunës, duke siguruar që fajtorët të nxirren para drejtësisë, në mënyrë që të marrin dënimin që meritojnë.
* Rritjen e burimeve dhe trajnimet për forcat e rendit për të përballuar më mirë situatat e kriminalitetit në vend.
* Transparencë dhe llogaridhënie nga ana e qeverisë për çdo hap që ndërmerr në luftën kundër krimit.
Siguria e qytetarëve shqiptarë dhe e turistëve të huaj është e panegociueshme. Ne do të vazhdojmë të ngremë zërin deri sa të shohim një ndryshim real dhe të qëndrueshëm.
Koha për fjalë boshe ka mbaruar. Kërkojmë veprime të qarta dhe të vendosura nga qeveria tani.
Me respekt
Myzafer ELEZI

12 Kor

0

Raporti i OECD/ Mirela Karabina: Shqipëria përkeqësohet me 28% të objektivave të zhvillimit, arsimi pëson rënien më të madhe

by PD in Lajmi fundit

Zëdhënësja e Demokratëve Euroatlantikë, Mirela Karabina, ka reaguar pas raportit të Organizatës për Bashkëpunim dhe Zhvillim Ekonomik, që vë në dukje se Shqipëria është përkeqësuar në 28% të objektivave të zhvillimit dhe se arsimi ka pësuar rënien më të madhe.

Në një deklaratë për mediat, Karabina u shpreh se kjo vjen si shkak i reformave të dështuara dhe përdorim politik të arsimit nga kryeministri Edi Rama dhe qeverisë së tij që di të bëjë vetëm propagandë të shfrenuar.

Duke iu referuar raportit të OECD, Karabina tha se lënia pas e sektorit të arsimit është vënë re me rënien e normave të regjistrimit të nxënësve parashkollor dhe fillor, që ndër të tjera është një tregues i qartë i shpopullimit të vendit, braktisjes së tij dhe plakjes së popullsisë.

DEKLARATA E ZËDHËNËSES SË DEMOKRATËVE EUROATLANTIKË, MIRELA KARABINA

Propagandë të shfrenuar, reforma të dështuara dhe përdorim politik të arsimit, kjo është strategjia që Edi Rama dhe qeveria e tij planifikuan për arsimin në këto 11 vite.
Së fundmi, Organizata për Bashkëpunim dhe Zhvillim Ekonomik (OECD) duke analizuar me hollësi zhvillimet në Shqipëri në lidhje me “Zhvillimin e Qëndrueshëm të Axhendës 2030” vë në dukje se Shqipëria është përkeqësuar në 28% të objektivave të zhvillimit dhe, arsimi ka pësuar rënien më të madhe.
Sipas raportit, Shqipëria ka bërë hapa pas në sektorin e arsimit (objektivi 4), me rënie të normave të regjistrimit në parashkollor dhe fillor, tregues i qartë i shpopullimit të vendit, braktisjes së tij dhe plakjes së popullsisë.
Rezultate ndërkombëtare të PISA 2022 për nxënësit 15 vjeçarë, ku Shqipëria u rendit nga fundi për aftësitë e nxënësve dhe e fundit në botë për “menduarit krijues”, evidentuan gjëndjen ulëritëse në arsim.
Shqipëria ka pësuar rënien më të madhe të rezultateve në gjithë historinë e zhvillimit të Testit Ndërkombëtar PISA, që nga 2001.
Këto rezultate në arsim janë një këmbanë alarmi se zhvillimi ekonomik e social i vendit është ndalur dhe e ardhmja është në rrezik.
Nga njëra anë shpopullimi i vendit nuk po ndalet dhe nga ana tjetër, edhe kjo rini e pakët e mbetur në vend, është një rini jo mirë e arsimuar.
Shkatari i kësaj gjendje të rëndë në këtë sektor jetik për vendin dhe të ardhmen, është Edi Rama dhe qeveria e tij.
Shqipëria e vërtetë nuk është ajo e “10 milionë turistëve” të Edi Ramës por, Shqipëria e vërtetë është ajo e analfabetëve funksionale që shtohen çdo vit dhe do t’i kushtojë shumë rëndë dhe gjatë shoqërisë.
Nxënësit dhe studentët nuk meritojnë këtë trajtim dhe këtë arsimim të dobët që ofron qeveria e korruptuar e Edi Ramës.
Shqiptarët meritojne më shumë.
Shqipëria meriton më shumë.

08 Kor

0

REAGIM I PARTISË DEMOKATIKE – DEMOKRATËT EUROATLANTIKË

by PD in Lajmi fundit

REAGIM I PARTISË DEMOKATIKE – DEMOKRATËT EUROATLANTIKË

Nëpër disa media kemi parë një tekst keqinformues, me përmbajtje identike, të spinuar nga nuk dihet se kush, pasi nuk ka as emër as mbiemër.

Qartësojmë opionin publik se Partia Demokratike – Demokratët Euroatlaintikë funksionon mbi vendimmarrjen e organeve të saj drejtuese, të zgjedhura nga vota e anëtarëve, siç është Kryesia dhe Këshilli Kombëtar.

Vendimmarrja nuk është në dëshirën e Kryetarit apo të ndonjë individi tjetër, por vendimmarrje e shumicës dërrmuese të strukturave të saj drejtuese.

Kryesia dhe Këshilli Kombëtar i Demokratëve Euroatlantikë ka vendosur të bëjë rekurs për vendimin e paligjshëm të Gjykatës së Apelit. Të qartë se mos bërja e rekursit ndaj një akti të pranuar gjerësisht si të paligjshëm, do të thotë të pranosh në heshtje pazarin Rama-Berisha.

Kryesia dhe Këshilli Kombëtar i Demokratëve Euroatlantikë, po kështu, kanë vendosur që pa asnjë hezitim të jenë pjesë e zgjedhjeve të ardhshme, me ekipin dhe alternativën tonë dhe këtë nuk mund ta pengoj asnjë pazar apo makinacion i dyshes Rama-Berisha, që synojnë të ruajnë status quo-në.

Demokratët Euroatlantikë do të jenë çdo ditë në terren pranë qytetarëve për të shpalosur alternativën e tyre dhe së shpejti edhe ekipin që do të konkurrojë në z

08 Kor

0

Basha reagon për propozimet e PS për zgjedhoren: Sabotimi i listave të hapura dhe i votës së diasporës është kurorëzimi i një plani anti-demokratik kundër interesave të qytetarëve

by PD in Lajmi fundit

Kreu i Demokratëve Euroatlantikë, Lulzim Basha, ka reaguar në lidhje me propozimin e PS për zgjedhoren. Në një postim në Facebook, Basha shkruan se sabotimi i listave të hapura dhe i votës së diasporës është kurorëzimi i një plani anti-demokratik kundër interesave të qytetarëve shqiptarë.

Sipas tij, dështimi i Reformës Zgjedhore, kishte pikerisht këtë qëllim, që shqiptarët të mos zgjidhnin me votën e tyre deputetët në parlament dhe që të pamundësohet vota e shqiptarëve që jetojnë jashtë vendit.

Basha sjell në vëmendje propozimet e Demokratëve Euroatlantikë për lista të hapura, Shqipëria një zonë zgjedhore dhe garantimi i votës së diasporës, të cilat ndodhen prej muajsh në syrtarët e Kuvendit.

Ndërsa më tej ai thotë se shqiptarët do të kenë mundësi të shohin në Kuvendin e Shqipërisë se kush është për lista te hapura dhe kush jo, kush është pjesë e pazarit me Edi Ramën ne kurriz të shqiptarëve dhe kush mbron interesin e tyre.

Postimi i plotë i Bashës:

Sabotimi i listave të hapura dhe i votës së diasporës është kurorëzimi i një plani anti-demokratik kundër interesave të qytetarëve shqiptarë.

Dështimi i Reformës Zgjedhore, kishte pikerisht këtë qëllim, që shqiptarët të mos zgjidhnin me votën e tyre deputetët në parlament dhe që të pamundësohet vota e shqiptarëve që jetojnë jashtë vendit.

Sot ne Kuvendin e Shqiperisë janë dy nisma, ajo për lista të hapura, Shqipëria një zonë zgjedhore dhe garantimi i votës së diasporës, të propozuar prej nesh, Demokratëve EuroAtlantikë, dhe propozimi i socialistëve që sërish i mban listat e mbyllura dhe u pamundëson shqiptarëve jashtë vendit të votojnë.

Shqiptarët do të kenë mundësi tashmë të shohin në Kuvendin e Shqipërisë se kush është për lista te hapura dhe kush jo, kush është pjesë e pazarit me Edi Ramën ne kurriz të shqiptarëve dhe kush mbron interesin e tyre.

Frika nga vota e lirë, firka nga humbja e pushtetit, frika nga fundi i pandëshkueshmërisë, nuk mund të mbajne peng vullnetin e shumicës së qytetarëve shqiptarë që kërkojnë ndryshim të vërtetë.

Qytetarët shqiptarët meritojnë një Reformë Zgjedhore të vërtetë!

08 Kor

0

Kreu i Demokratëve Euroatlantikë në Vlorë, Gjergji Nika: Bashkia e qytetit ka nevojë për reformim të thellë

by PD in Lajmi fundit

Këshilltari i Demokratëve Euroatlantikë në Bashkinë e Vlorës, Gjergji Nika, duke iu referuar problematikave të shumta në këtë institucion, shprehet se bashkia bregdetare ka nevojë imediate për reformim. Në një reagim të gjatë në Facebook, ai shqetësimin e ngre që nga aktiviteti i ulët i këshilltarëve në mbledhje, e deri tek menaxhimi i taksave dhe mungesa e transparencës.

Nika shpreh nevojën urgjente për një drejtori auditimi të brendshme në bashkinë Vlorë, e cila do të auditojë me përgjegjësi detyrat e lëna, por edhe funksionimin e administratës së bashkisë. Gjithashtu, kreu i Demokratëve Euroatlantikë të Vlorës thotë se duhet rishikuar paketa fiskale, duke vendos taksa të ulëta për rritjen e të ardhurave, pasi taksat e larta bën që të ketë shumë informalitet.

Më poshtë reagimi i plotë i kreut të Demokratëve Euroatlantikë në Vlorë, Gjergji Nika:

Nevoja për reformim në bashkinë e Vlorës është imediate!

Në hierarkinë e qeverisjes, pushteti vendor zë vend të rëndësishëm. Qeverisja vendore është qeverisje pranë qytetarit. Ajo lidh qytetarët me sistemin, ajo zgjidhet direkt prej tyre, ajo merret me problemet e përditshme dhe të prekshme: çerdhet, kopshtet, shkollat, universitetet, rrugët, gjelbërimin, mjedisin, punësimin, infrastrukturën, urbanistikën, shërbimet sociale dhe publike, rregullin dhe jetesën në komunitet.

Si mund të kemi qeverisje më të mirë vendore? Qytetarët a mund të ushtrojnë demokracinë direkte dhe llogaridhënien? Ata janë pushtet real, vota e tyre përcakton modelin dhe standardin e qeverisjes vendore, ata që ushtrojnë qeverisjen dhe ata që do të marrin vendime në emër të tyre. Qytetarët mund të zgjedhin me votë midis disa alternativave. Qytetarët mund të kërkojnë kontratë sociale dhe politike në përfaqësim. Por pushteti lokal a i përmbush pritshmëritë e tyre?

Një vit pas betimit të kryetarit të ri të bashkisë dhe këshilltarëve bashkiakë të Vlorës, pushteti vendor vijon të reflektojë probleme serioze të funksionimit, mangësi në bazën ligjore dhe në kompetenca, tendencën e kontrollit nga pushteti qendror, vertikalizim të modelit të administrimit lokal, fragmentarizëm i qeverisjes, kufizim i pjesëmarrjes qytetare në vendimmarrje si dhe tregues të tjerë problematikë të eksperimentit të radhës, të cilat së bashku bëhen pengesë në përmbushjen prej tij të pritshmërive qytetare.

Ndërkohë jemi zgjedhur të përfaqësojmë qytetarët.
Të marrim vendime për ta, për hapësirën publike, për taksat dhe për projektet e ardhshme. Kur u zgjodhëm në 2023 premtuam shumë, por mbi të gjitha, premtuam një qeverisje për qytetarët dhe me qytetarët. Por sa i kemi realizuar këto premtime?
Të gjithë flasim në çdo diskutim për qytetarët dhe interesat e tyre, por sa i mbrojmë realisht ato, kur kartonat që ngrihen nga mazhoranca në këshillin bashkiak për të miratuar vendimet janë politike dhe shterpë?

Vetëm një pjesë e këshilltarëve bashkiakë janë aktivë, përqindja e pjesëmarrjes së qytetarëve në vendimmarrje vijon të jetë minimale, pushteti vendor përballet me sfida të mëdha në ofrimin e shërbimeve, madje shpesh herë në një krizë shërbimesh dhe sistemi i qeverisjes vendore në Vlorë vijon të jetë ende dobët në shumë elementë të kompetencave të tij.

Prandaj nevoja për ndryshime është imediate.

Mendoj se bashkia e Vlorës ka nevojë emergjente për:

a. Një reformë të thellë në burimet njerëzore. Sipas të dhënave të vlerësimit të brendshëm 66% e punonjësve të bashkisë janë vlerësuar “mirë”, 30% “shumë mirë” dhe 4% janë vlerësuar “mjaftueshëm”.
Përballë kësaj gjendjeje nevoja e një reforme të thellë është e domosdoshme, ose në rastin më të mirë këta punonjës duhen trainuar. Gjithashtu në mënyrë që bashkia të funksionojë në mënyrë kapilare duhet rishikuar sistemi i organigramës.

b. Duhet rishikuar paketa fiskale. Besoj se taksat e ulëta sjellin të ardhura të larta, ndërkohë që taksat e larta u hapin rrugë abuzimeve të mëdha. Vërtet që taksat sigurojnë mundësinë që të përmbushin prioritetet, eficencën dhe administrimin e të ardhurave, por ato duhen përdorur drejt për të shmangur apo zvogëluar evazionin fiskal. Miratimi i paketës fiskale me një rritje prej 37% të taksave dhe 50% SPL duhet të mbushë arkën e bashkisë dhe të përdoret për investime reale në shërbim të qytetarëve e qytetit dhe jo vetëm për rroga.

c. Menaxhimi i bashkisë duhet të jetë më i mirë. Dhe një menaxhim më i mirë nënkupton lënien e detyrave të qarta dhe kërkesën me afate të përcaktuara qartë për zbatimin e këtyre detyrave. Këtu besoj se është i domosdoshëm krijimi i një drejtorie të auditimit të brendshëm, drejtori, e cila do të auditojë me përgjegjësi detyrat e lëna, por edhe funksionimin e administratës së bashkisë.

d. Transparenca në vendimmarrje. Kur u zgjodhëm dhe u betuam premtuam një qeverisje për qytetarët dhe me qytetarët. Premtuam trasnparencë, llogaridhënie e përgjegjshmëri përpara qytetarëve.
A i përmbush bashkia kriteret e transparencës dhe llogaridhënies, të cilat përbëjnë detyrime ligjore për të drejtën e informimit? Ato publikime të bashkisë lidhen me llogaridhënien e vërtetë, si raporte auditi, prokurime dhe kontrata, apo janë raportime sa për të shkuar radhën?

Informacionet për taksat, investimet dhe prokurimet publike janë të rëndësishme, si për të ushtruar demokracinë vendore ashtu edhe për të luftuar korrupsionin.

Nëse ju kujtohet përpara disa javësh kemi denoncuar çështjen e Ujësjellës Kanalizime Vlorë për gjyqet e fituara nga punonjësit, gjyqe, të cilat u njohën punënjësve dëmshpërblime stratosferike.
Atëherë me forcën e kartonave të majtë u hodh poshtë kërkesa jonë për ngritjen e një komisioni hetimor për këtë çështje. Dy ditë më pas ministrja Balluku i quajti në një takim në Vlorë: “Grup i strukturuar kriminal”. Por çfarë u bë? Çfarë ndodhi? Pse po heshtin?

Transparenca është kusht për mirëqeverisje dhe për luftimin e korrupsionit dhe mund të arrihet nëpërmjet publikimit informacione publike të prodhuara dhe administruara nga autoriteti publik.

Transparenca është akoma më e rëndësishme në pushtetin vendor, sepse aty qytetari është më afër pushtetit, aty merr shërbimet publike dhe mund të shprehë nevojat e veta. Ndaj duhet që transparencën duhet ta demonstrojmë nga ballafaqimi i të ardhurave me shpenzimet, nga luftimi i nepotizmit dhe konfliktit të interesit, që vihen re në bashki, por edhe nga afrimi i specialistëve, të cilët mund të mos jenë partiakë, por janë të aftë dhe profesionistë, të përgjegjshëm dhe të përkushtuar!

e- Nëse do të punohet vërtet me transparencë, përgjegjshmëri, llogaridhënie dhe përkushtim, atëherë jam i bindur që në zgjedhjet e ardhshme do të mendohen mirë të gjitha forcat politike për emrat, të cilët do të përbëjnë listën e këshilltarëve.
Do të gjejnë njerëz të formuar, specialistë me integritet, njohës të ligjeve dhe funksionarë të përkushtuar, të cilët përpara se të ngrenë kartonin për të miratuar një vendim, do të vënë përpara interesin e përgjithshëm, moralin, të mirën e qytetit dhe qytetarëve, për të cilët “betohen” dhe jo të jenë thjesht militantë partiakë…

05 Kor

0

Nga rekursi në Gjykatën e Lartë, tek hyrja në zgjedhje me çdo kusht/ Rezoluta e Këshillit Kombëtarë të Demokratëve Euroatlantikë: Vijomë shpalosjen e alternativës

by PD in Lajmi fundit

Demokratët Euroatlantikë zhvilluan sot mbledhjen e Këshillit Kombëtar, ku u diskutuan pikat për vijimin e aksionit politik.

Në rezolutën e miratuar, Demkratët Euroatlantikë nuk do heqin dorë nga iniciativa për rekurs në Gjykatën e Lartë vendimin për vulnë dhe kërkesës për zbardhjen sa më të shpejt të vendimit të Gjykatës së Apelit.

Gjithashtu Demokratët Euroatlantik mbeten të angazhuar që shqiptarëve t’u paraqitet alternativa e tyre në zgjedhjet e ardhshme me çdo kusht.

Këshilli Kombëtar gjithashtu inkurajon organet drejtuese dhe mbështet zhvillimin e dialogut dhe aleancave me të gjithë faktorët shoqërorë dhe politikë që bashkëndajnë vlerat dhe vizionin e Demokratëve Euroatlantikë, për bashkëpunimin para dhe pas zgjedhor, me qëllim dhënien fund të tranzicionit tëtejzgjatur.

REZOLUTË E KËSHILLIT KOMBËTAR TË PARTISË DEMOKRATIKE TË SHQIPËRISË – DEMOKRATËT EUROATLANTIKË

PREAMBUL
Duke njohur rëndësinë e situatës aktuale politike, ekonomike dhe sociale në Shqipëri, dhe duke pasur parasysh sfidat dhe kërcënimet me të cilat përballen qytetarët shqiptarë, Këshilli Kombëtar i Partisë Demokratike të Shqipërisë – Demokratët Euroatlantikë, të mbledhur më 4 korrik 2024, deklaron angazhimin e palëkundur për përmirësimin e gjendjes së vendit dhe mbrojtjen e interesave kombëtare. Me një shqetësim të thellë për shpopullimin alarmues, degradimin e jetës politike dhe ekonomike, dhe përhapjen e korrupsionit, ne dënojmë fuqimisht çdo akt që minon stabilitetin dhe prosperitetin e Shqipërisë. Duke vlerësuar përpjekjet e institucioneve të reja të drejtësisë dhe duke mbështetur SPAK dhe GJKKO në luftën kundër korrupsionit dhe krimit të organizuar, ne riafirmojmë angazhimin tonë për ndarjen, balancimin dhe kontrollin e pushteteve si themeli i një shteti të drejtë dhe demokratik.
Duke dënuar sabotimin e Reformës Zgjedhore dhe marrëveshjet e fshehta që dëmtojnë interesin publik, Këshilli Kombëtar riafirmon mbështetjen e tij për drejtësinë dhe transparencën në proceset zgjedhore dhe qeverisëse. Në një përpjekje të vendosur për të forcuar aleancën me Shtetet e Bashkuara të Amerikës, Bashkimin Europian dhe Britaninë e Madhe, ne theksojmë rëndësinë e këtyre partneriteteve për zhvillimin dhe mirëqenien e Shqipërisë.
Kjo rezolutë shpreh vendosmërinë tonë për të luftuar kundër korrupsionit, për të mbrojtur të drejtat e qytetarëve dhe për të ndërtuar një të ardhme më të mirë për Shqipërinë, duke përqafuar vlerat dhe parimet euroatlantike që kanë udhëhequr demokratët shqiptarë për më shumë se tre dekada. Ne besojmë se vetëm përmes një angazhimi të përbashkët dhe të sinqertë mund të përmbushim potencialin e jashtëzakonshëm të Shqipërisë dhe të sigurojmë një të ardhme të ndritur për brezat e ardhshëm.

I. QËLLIMI I REZOLUTËS
Qëllimi i kësaj rezolute është të adresojë me urgjencë dhe vendosmëri situatën kritike politike, ekonomike dhe sociale që po kalon Shqipëria, duke denoncuar korrupsionin dhe degradimin e institucioneve shtetërore, duke mbështetur reformat e nevojshme zgjedhore dhe të drejtësisë, si dhe duke riafirmuar angazhimin e patjetërsueshëm ndaj aleancave strategjike me Shtetet e Bashkuara të Amerikës, Bashkimin Europian dhe Britaninë e Madhe, për të siguruar një të ardhme demokratike, të drejtë dhe të prosperuar për të gjithë qytetarët shqiptarë.

II. RRETHANAT QË DIKTUAN MIRATIMIN E KËSAJ REZOLUTË

1. Duke vlerësuar si kritike situatën politike, ekonomike dhe sociale që po kalon Shqipëria, Këshilli Kombëtar i Demokratëve Euroatlantikë, i mbledhur sot, më 4 korrik 2024, në përmbushje të përgjegjësive të veta politike.

2. Thellësisht të shqetësuar për shpopullimin alarmues që po pëson vendi, të kamufluar përmes një censusi jo transparent dhe me legjitimitet të cunguar, si një kërcënim për stabilitetin shoqëror, demokratik dhe ekonomik të Shqipërisë;

3. Të shqetësuar për degradimin e jetës politike dhe ekonomike për shkak të kontrollit asfiksues nga ana e qeverisë së korruptuar të Edi Ramës që po varfëron familjet shqiptare, po largon masivisht rininë shqiptarë, po vret garën dhe konkurrencën e ndershme ekonomike, që mban nën thundër shtresën e mesme, që trysnon dhe shantazhon sistemin mediatik e që ka shkatërruar ndarjen dhe balancimin e pushteteve;

4. Duke dënuar me forcën më të madhe korrupsionin e përhapur në çdo degë të pushtetit qendror dhe vendor, i cili cënon sigurinë kombëtare, shëndetin dhe mirëqenien e familjeve shqiptare.

5. Duke konstatuar përgjegjësitë e qarta të Partisë Socialiste dhe disa deputetëve të zgjedhur me vota opozitare në sabotimin e Komisionit të Reformës Zgjedhore, si një përpjekje për të penguar listat e hapura, votën e diasporës, votimin dhe numërimin elektronik dhe barazinë e votës, për të mbajtur në këmbë marrëveshjen e vitit 2008, të cilën koha e ka dëshmuar si të dëmshme dhe me pasoja të rënda për zhvillimin demokratik të vendit;

6. Duke dënuar ashpërsisht marrëveshjet mes Partisë Socialiste dhe deputetëve të zgjedhur me vota opozitare në dëm të interesit publik dhe të luftës kundër korrupsionit, të nisura me amnistinë ndaj të dënuarve për korrupsion nga GJKKO dhe të vijuara me dështimin e qëllimshëm të Reformës Zgjedhore;

7. Të bindur se SPAK dhe GJKKO ka nisur të japin rezultate konkrete dhe të prekshme në luftën kundër korrupsionit, në nivelet e larta, e për pasojë politikanë të të gjithë spektrit po bashkërendojnë dhe bashkëpunojnë për t’u mbrojtur nga pandëshkueshmëria, për të shantazhuar organet e reja të drejtësisë, duke kërcënuar funksionimin dhe vetë ekzistencën e tyre;

8. Të vetëdijshëm se fundi i pandëshkueshmërisë kërcënon mbijetesën e sistemit të korruptuar politik dhe ekonomik, vazhdimësinë e aktorëve destruktiv për mirëqeverisjen, demokratizimin dhe ndarjen e pushteteve, konstatojmë se përpjekjet e këtyre të fundit për ta mbajtur hapur rrugën pa krye të tranzicionit 34-vjeçar, kulmuan me vendimin e padrejtë dhe të paligjshëm të 11 Qershorit 2024, duke cënuar besimin e qytetarëve te Reforma në Drejtësi dhe duke sfiduar përpjekjet e demokratëve dhe partnerëve ndërkombëtarë për ta shkëputur Partinë Demokratike nga e shkuara problematike e për ta kthyer në identitetin e saj EURO-ATLANTIK, si instrument ndryshimi në duart e qytetarëve;

9. Të vendosur për ruajtjen dhe forcimin e aleancës me Shtetet e Bashkuara të Amerikës, Bashkimin Europian dhe Britaninë e Madhe si vlerë identitare e patjetërsueshme, e pazëvendësueshme dhe e përhershme, si kusht thelbësor për zhvillimin, mirëqenien dhe mbrojtjen e interesit kombëtar;

10. Të qartë se ndarja, balancimi dhe kontrolli i pushteteve janë garancitë për një shtet ligjor dhe konsolidim të demokracisë funksionale në vend, si rruga e drejtë dhe e vetme për t’i dhënë fund tranzicionit të tejzgjatur;

11. Duke mbështetur dhe inkurajuar SPAK në veprimtarinë hetimore ndaj politikanëve të nivelit të lartë për dhënien fund të pandëshkueshmërisë dhe praktikave korruptive që kanë shpopulluar vendin dhe varfëruar familjet shqiptare;

12. Duke besuar se potenciali i jashtëzakonshëm njerëzor dhe natyror i Shqipërisë gjen përmbushje përmes programit reformues të shpalosur nga Demokratët Euroatlantikë në Kuvendin Programor të 1 qershorit 2024;

13. Të vetëdijshëm se Demokratët Euroatlantikë kanë një detyrim moral të pashlyer ende në këto 34 vite kundrejt të përndjekurve politikë gjatë regjimit komunist dhe viktimave të tij si dhe pronarëve, si përfaqësues të të djathtës historike të çliruar nga hijet e të shkuarës, idhujtaria dhe kulti i individit;

14. Të vendosur për t’u angazhuar në një përballje pakompromis me këdo që ka abuzuar dhe abuzon me pasuritë, besimin dhe mirëqenien e shqiptarëve;

15. Duke besuar se asnjë forcë politike nuk mund dhe nuk do të jetë kurrë konkuruese duke qenë në papajtueshmëri dhe konflikt me SHBA, BE dhe Britaninë e Madhe, aleatët historikë dhe strategjikë të Kombit tonë.

III. QËNDRIME POLITIKE / REKOMANDIMET
Të bindur se vlerat themelore dhe identitare të Demokratëve Euroatlantikë nuk mund të tjetërsohen nga përbetime kundër interesit kombëtar, në mbrojtje të status quo-së dekadente në të cilën një grusht i vogël njerëzish kërkojnë ta mbajnë me çdo kusht Shqipërinë;
1. Këshilli Kombëtar i bën thirrje strukturave drejtuese të çojnë përpara aksionin ligjor për kthimin e simboleve të Partisë Demokratike, duke ndjekur rekursin pranë Gjykatës së Lartë për vendimin e padrejtë dhe të paligjshëm të 11 Qershorit, si dhe mbështet angazhimin për të bërë drejtësi deri në hallkat më të larta të sistemit juridik europian.

2. Këshilli Kombëtar i bën thirrje Gjykatës së Apelit për zbardhjen sa më parë të vendimit të 11 Qershorit, duke i kërkuar përfaqësuesve të institucioneve të drejtësisë ta trajtojnë me prioritet dhe ndjeshmëri të lartë këtë çështje.

3. Këshilli Kombëtar nxit strukturat drejtuese të vazhdojnë përgatitjet për përballjen e ardhshme elektorale, duke përfaqësuar me çdo kusht alternativën e Demokratëve Euroatlantikë në zgjedhje;

4. Këshilli Kombëtar inkurajon organet drejtuese dhe mbështet zhvillimin e dialogut dhe aleancave me të gjithë faktorët shoqërorë dhe politikë që bashkëndajnë vlerat dhe vizionin e Demokratëve Euroatlantikë, për bashkëpunimin para dhe pas zgjedhor, me qëllim dhënien fund të tranzicionit të tejzgjatur.

5. Këshilli Kombëtar mbështet veprimtarinë e Harkut Opozitar Euroatlantik dhe nxit forcimin dhe zgjerimin e Aleancës Qytetare për Demokracinë, si platforma bashkëpunimi që synojnë forcimin e demokracisë, shtetit të së drejtës, ndarjen e pushteteve, lirisë dhe konkurrencës ekonomike.

6. Këshilli Kombëtar i bën thirrje strukturave drejtuese të Demokratëve Euroatlantikë të të gjitha niveleve të vijojnë përgatitjet për zgjedhjet e ardhshme parlamentare, duke nxitur një debat kombëtar mbi programin e shpalosur në Kuvendin Programor të 1 qershorit 2024.

7. Këshilli Kombëtar mbështet me vendosmëri përpjekjet serioze të SPAK dhe GJKKO për t’i dhënë fund pandëshkueshmërisë dhe dënon ashpërsisht sulmet verbale dhe institucionale si dhe çdo tentativë publike dhe jopublike për të cënuar veprimtarinë e SPAK dhe GJKKO në përballjen pa kompromis kundër krimit të organizuar dhe korrupsionit të kudogjendur.

8. Këshilli Kombëtar i cilëson SPAK dhe GJKKO si investimet më të mëdha të shqiptarëve dhe partnerëve ndërkombëtarë për ta nxjerrë Shqipërinë nga bataku 34-vjeçar i tranzicionit dhe rikonfirmon mbështetjen pa kushte për organet e reja të drejtësisë duke ritheksuar edhe njëherë angazhimet konkrete përmes nismave ligjore të depozituara tashmë në Kuvendin e Shqipërisë, të cilat synojnë forcimin e tyre.

9. Këshilli Kombëtar dënon zvarritjen e qëllimshme të Reformës Zgjedhore nga Partia Socialiste dhe deputetëve të zgjedhur me vota opozitare, duke i cilësuar këto veprimtari si anti-demokratike dhe në papajtueshmëri flagrante me kërkesat e shumicës dërrmuese të qytetarëve shqiptarë për lista të hapura, votën e diasporës, numërim dhe votim elektronik dhe barazinë e votës, duke e konsideruar bllokimin e paarsyeshëm të projektligjeve të depozituara në Kuvendin e Shqipërisë nga Demokratët Euroatlantikë për Reformën Zgjedhore si një dëshmi flagrante e një pakti antihistorik dhe antidemokratik për të mbrojtur ndryshimet kushtetuese famëkeqe të 2008-ës.

10. Këshilli Kombëtar i Demokratëve Euroatlantikë i bën thirrje anëtarëve dhe simpatizantëve të Partisë Demokratike të mos pajtohen me paligjshmërinë dhe vendimet e padrejta përmes të cilave synohet asgjësimi i forcës së parë properëndimore të Shqipërisë, që e kthejnë atë në aneks të qeverisë të korruptuar dhe në një strukturë anti-perëndimore në funksion të kastës 34-vjeçare, si dhe apelon për bashkimin rreth vlerave më të mira për t’u ndarë njëherë e mirë nga e shkuara e korruptuar, për të ndërtuar së bashku një të ardhme europiane, të vetëdijshëm më shumë se asnjëherë më parë se Shqipëria meriton më shumë.

IV. KONKLUZION
Këshilli Kombëtar i Partisë Demokratike të Shqipërisë – Demokratët Euroatlantikë, duke marrë në konsideratë të gjitha çështjet dhe sfidat e përmendura në këtë rezolutë, riafirmon përkushtimin për të mbrojtur interesat kombëtare dhe të qytetarëve shqiptarë. Ne jemi të vendosur për të luftuar kundër korrupsionit, për të forcuar institucionet demokratike dhe për të siguruar një të ardhme më të mirë për Shqipërinë përmes reformave të nevojshme. Ne do të vazhdojmë të mbështesim aleancat strategjike me Shtetet e Bashkuara të Amerikës, Bashkimin Europian dhe Britaninë e Madhe, duke punuar për një Shqipëri të drejtë, demokratike dhe të zhvilluar. Ne i bëjmë thirrje qytetarëve shqiptarë të bashkohen në këtë përpjekje të përbashkët për të ndërtuar një të ardhme më të ndritur dhe për të përmbushur potencialin e jashtëzakonshëm të vendit tonë.

05 Kor

0

“Censusi tregoi se Shqipëria po plaket”, Mirela Karabina: Rinia largohet për shkak të keqqeverisjes dhe mungesës së shpresës

by PD in Lajmi fundit

Zëdhënësja e Demokratëve Euroatlantikë, Mirela Karabina, shprehet se korrupsioni i qeverisë është shkaku i shpopullimit të Shqipërisë.

Në një deklaratë për mediat, Karabina duke iu referuar të dhënave të Censusit, tha se afër gjysmë milionë shqiptarë janë larguar nga vendi në këto 12 vite, ndërsa mosha mesatare e popullsisë është ritur me 7 vjet, tregues ky i tendencës së plakjes së popullisë dhe e eksportimit të popullsisë aktive jashtë vendit.

Ajo gjithashtu thotë se rinia largohet për shkak të keqqeverisjes dhe mungesës së shpresës dhe si pjesë vitale ndikon drejtëpërsëdrejti në ngadalësimin e zhvillimin e vendit dhe plakjen e tij.

Si zgjidhje për këtë situatë, sipas Karabinës është alternativa e Demokratëve Euroatlantik për një qeverisje të pakorruptuar dhe me fokus qytetarin dhe zhvillimin, shpëton vendin dhe e fut në shina normale.

DEKLARATA E ZËDHËNËSES SË DEMOKRATËVE EUROATLANTIKË, MIRELA KARABINA

Korrupsioni galopant në çdo ind të shtetit është shkaku i shpopullimit të vendit.
Të dhënat e Census 2023 tregojnë shpopullim të pandalshëm të vendit, pavarësisht përpjekeve të shumta të qeverisë së Edi Ramës për treguar të kundërtën.

Afër gjysmë milion shqiptarë janë larguar nga vendi në këto 12 vite, mosha mesatare e popullsisë është ritur me 7 vjet, tregues ky i tendencës së plakjes së popullisë, eksportimi i popullsisë aktive jashtë vendit dhe ngurtësimi i asaj brenda vendit në ndërtesa të boshatisura, këtë dëshmojnë të dhënat e Census 2023.
Përgjatë këtyre 12 viteve, ҫdo vit janë larguar nga Shqipëria rreth 40 mijë vetë ose gati 1.5% e popullsisë rezidente.

Ritme alarmante të shpopullimit, ndërkohë që nuk jemi as në periudhë lufte e as të ndonjë fatkeqësie natyrore, por jemi në regjimin më të korruptuar të Edi Ramës që vazhdon të përzë dhunshëm shqiptarët e pashpresë nga vendi.
Megjithëse Census 2023 ka kushtuar 20 milion euro, me një trupë prej 7 mijë punonjësish të trajnuar dhe përdorim i teknologjisë së lartë, dalja e të dhënave paraprake është me 7 muaj vonesë, dhe për vetëm 2.4 milion banorë.

Vonesa e daljes së të dhënave ngre hije dyshimi mbi besueshmërinë e tyre dhe kjo është përgjegjësi direkte e qeverisë shqiptare dhe institucioneve shtetërore. Ndërkohë që qeveria përmes propagandës paraqet një Shqipëri ndryshe të 10 milionë turistëve, Shqipëria e vërtetë është ajo e 420 mijë banorëve më pak, me rënie 13.8% krahasuar me Censin e vitit 2011. Dhe me shtesën natyrore, numri i banorëve të larguar shkon ne 490 mijë.

Shqipëria e vërtetë është ajo e braktisjes së periferive e tkurrjes së qyteteve, mbipopullimit të Tiranës dhe në 1 milion banesa, rreth 40% e tyre janë bosh.

Shqipëria e vërtetë është ajo që pavarësisht shpopullimit, Sektori i ndërtimi është përfshirë në zhvillime të vrullshme vitet e fundit duke bërë që për çdo 2.2 banorë të ketë një banesë.
Kjo është Shqipëria e vërtetë që Edi Rama kërkon ka mbulojë me propagandë të rrezikshme në kurriz të jetës së qytetarëve dhe zhvillimit të vendit!

Nga njëra anë një popullsi aktive, sidomos rinia, që largohet për shkak të keqqeverisjes dhe mungesës së shpresësh dhe si pjesë vitale ndikon drejtëpërsëdrejti në ngadalësimin e zhvillimin e vendit dhe plaken e tij, dhe nga ana tjetër një popullsi e ngurtësuar në banesa të mbetura bosh e të braktisura apo dhe ndërtesa të reja të mbetura stok, të ndërtuara përmes pastrimit të parave të ardhura nga burime të dyshimta.

Qytetarët shqiptarë nuk e meritojnë qeverinë e korruptuar dhe antikombëtare të Edi Ramës.
Të rinjtë meritojnë shkollim, punësim dhe jetesë të mirë e me dinjitet në vëndin e tyre.
Alternativa jonë për një qeverisje të pakorruptuar dhe me fokus qytetarin dhe zhvillimin, shpëton vendin dhe e fut në shina normale.

Shqiptarët meritojnë më shumë!
Shqipëria meriton më shumë!

05 Kor

0

Flutura Açka: Nëse “vula” është kleringu për të shitur të drejtën e votës së Diasporës, Opozita kurrë mos ardhtë në pushtet

by PD in Lajmi fundit

Deputetja, Flutura Açkë, ka reaguar në lidhje me votën e diasporës. Në një postim në Facebook, Açka shkruan se një nga pikat e marrëveshjes të skutës parlamentare është që emigrantët të regjistrohen në portalin E-Albania. Sipas saj ky partal është aparati i ri të Sigurimit që qeveria ngriti.

Açka gjithashtu thotë se opozita shqiptare NUK duhet te lejojë që Diaspora të ndëshkohet me mohimin e votës në zgjedhjet parlamentare 2025 ngaqë nuk është regjistruar te gaveta e pushtetit.

Deputetja më tej thotë se nëse “vula” është kleringu për të shitur të drejtën e votës së Diasporës, Opozita kurrë mos ardhtë në pushtet.

Reagimi i plotë i Flutura Açkës:

Ndëshkimi i Diasporës

Shqiptar nuk të bën rreshtorja në E-Albania

Një nga pikat e marrëveshjes së Skutës Parlamentare padyshim është vota e Diasporës.

Çështja është: Si do të votojë Diaspora?

Si do të ta shprehë vullnetin politik ky 51% i shqiptarëve, të cilët duan një Shqipëri Europiane, mu si ajo Europa ku kanë vendosur të ndërtojnë jetën e tyre, për t’i shpëtuar kësaj Shqipërie ku u persekutuan 50 vjet nga komunistët dhe 30 vjet nga PseudoEuropianistët barbarë që i morën me rehatinë e tyre dhe fëmijëve të tyre.

Socialistë nuk do t’ia falin Diasporës shpërfilljen që ajo i bëri E-Albania, aparatit të ri të Sigurimit që pushteti ngriti në mënyrën më perfide të mundshme, gjë e vërtetuar tashmë nga patronazhimi i 900 mijë shqiptarëve, të dhënat e të cilëve u shitën në tregun e pistë politik.

Po, skeptike me PseudoEuroianët që kanë drejtuar Shqipërinë në tridhjetë vite të demokracisë, Diaspora ka refuzuar të matrikullohet nga diktatorët me brekushe é me zemrën e tahmasë me tri barkushe.

Opozita shqiptare NUK duhet te lejojë që Diaspora të ndëshkohet me mohimin e votës në zgjedhjet parlamentare 2025 ngaqë nuk është regjistruar te gaveta e pushtetit, pra nuk është markuar nga pushteti.

Ethja e patronazhit të Diasporës është trendi i ri qeveritar që do t’i imponohet Parlamentit në korrik. A do të sillemi në Opozita si me ligjin e Amnistisë Penale? Aferim!

Nëse “vula” është kleringu për të shitur të drejtën e votës së Diasporës, Opozita kurrë mos ardhtë në pushtet.

Opozita vjen në pushtet vetëm duke bashkuar forcat, dhe një sinergji e madhe është padyshim Diaspora.

Mos é tradhëtoni Diasporës me vendime nën tavolinë, siç po mëton ky trafikant politik votash që flet në emër të maxhorancës, e qē për vota në Elbasan po i qeth kreshtat e ullishtave të lashta duke dorovitur me to (ai dhe pushteti i tij) të fortët.

Diaspora nuk është 15 mijë a 18 mijë të regjistruar, por plot 1 milion e gjysëm e kusur shqiptarë që janë pjesë e fateve shqiptare dhe duhet t’i shenjojnē ato edhe në zgjedhjet parlamentare të vitit 2025.

04 Kor

0

“Bashkia Krujë hedh mbeturinat në zonë të banuar”, Merita Bakiu: Është gjendje alarmante, qeveria të ndërhyjë

by PD in Lajmi fundit

Në një kohë kur qeveria mburret me turizmin, Kruja mbytet nga plehrat në kulmin e sezonit turistik. Deputetja, Merita Bakiu, ka ngritur shqetësimin se në bashkinë Krujë, hidhen mbeturinat në një zonë të banuar duke u kthyer në një shqetësim serioz për ata që jetojnë aty. Përpos kësaj, Bakiu shprehet se aty pranë ndodhet dhe një liqen i cili ndotet nga pirgu i mbeturinave.

Ajo gjithashtu i bën thirrje qeverisë që të marrë masa të menjëhershme dhe të largohet kjo pikë grumbullimi mbetjesh pasi aty jetojnë qytetarë që kanë familjet dhe fëmijët e tyre.

“Jam këtu për një problematikë tepër shqetësuese të Bashkisë Krujë. Besoj që pamjet nuk kanë nevojë për shumë fjalë. Është pika e grumbullimit të plehrave të zonës së Krujës dhe të zonës së Fushë Krujës. Shikojeni se në cfarë situatëe ndodhemi këtu. Me taksat e njerëzve që banojnë në këto zona, mbahen inceneratorët që i trumbeton qeveria me të madhe. Poshtë kësaj zone, banojnë me qindra qytetarë që kanë familjet dhe fëmijët e tyre. Por mbi të gjitha kjo pikë grumbullimi është ngjitur me një liqen, imagjinojeni se çfarë do të thotë që të kemi ndotje jo vetëm të ajrit por edhe ndotjen e ujërave. Është gjendje alarmante, prandaj kërkojmë ndërhyrje të menjëhershme nga ana e qeverisë për të sistemuar grumbullimin e këtyre mbetjeve në Bashkinë Krujë. Shqetësimi i njerëzve ka kohë që ka qenë për këtë problem dhe ato sot vazhdojnë me insistim ku kërkojnë që të largohet sa më parë kjo pikë grumbullimi nga zona e banuar” – shprehet deputetja Merita Bakiu.

04 Kor

0

Deklarata e Harkut Opozitar Euroatlantik

by PD in Lajmi fundit

DEKLARATË E HARKUT OPOZITAR EUROATLANTIK

Tiranë, 4 korrik 2024

Tryeza e dialogut të Harkut Opozitar Euroatlantik me pjesëmarrjen e 24 partive politike opozitare parlamentare dhe jo-parlamentare;

Të shqetësuar për mos avancimin e procesit të Reformës Zgjedhore, ndërkohë që kanë mbetur rreth 10 muaj deri në zgjedhjet e përgjithshme parlamentare të 2025-ës,
Nisur nga nevoja dhe kërkesa e mbarë qytetarëve për t’u mundësuar shqiptarëve të zgjedhin me votën e tyre përfaqësuesit në parlamentin e ardhshëm,

Të detyruar nga Kushtetuta dhe nga Gjykata Kushtetuese për t’u mundësuar shqiptarëve jashtë vendit të drejtën e votës,

Kërkohet që me urgjencë dhe pa humbur kohë:

1. Të hartohet dhe miratohet një paketë e plotë reformash ligjore e institucionale për të korrigjuar ndërhyrjet e rënda të ndryshimeve kushtetuese të prillit 2008, të cilat i mohuan të drejtën shqiptarëve të zgjedhin me votë përfaqësuesit e tyre.

Për të realizuar këtë mision për demokracinë dhe shtetin e së drejtës, janë emergjencë kombëtare:

– Vota e lirë, barazia e saj sipas Kushtetutës së Shqipërisë;

– Listat e hapura;

– Shqipëria një zonë zgjedhore;

– Mundësimi i votimit të diasporës;

– Votimi dhe numërimi elektronik;

2. Nëpërmjet Reformës Zgjedhore duhet synuar që të rregullohet përfaqësimi dinjitoz i qytetarëve në Kuvendin e Shqipërisë, bazuar në meritokraci dhe intergritetin e figurës, në mënyrë që ky përfaqësim të kontribuojë në ndërtimin dhe përmirësimin e shtetit shqiptar.

3. Shqipëria, si një vend që synon anëtarësimin në BE, duhet fillimisht të garantojë standartet demokratike të zgjedhjeve të lira dhe të ndershme, ku qytetarët dhe jo krimi e korrupsioni dhe oligarkët të vendosin rezultatin e zgjedhjeve.

4. Mbështesim dhe inkurajojmë organet e drejtësisë të hetojnë dhe çojnë para drejtësisë të gjithë ata që kanë abuzuar më votën e shqiptarëve, për t’i dhënë fund krimit zgjedhor, shitblerjes së votës, përdorimit të fondeve e aseteve publike në zgjedhje dhe përfshirjes se krimit të organizuar në deformimin e vullnetit të zgjedhësve.

Barazia para ligjit, zgjedhjet e lira dhe të ndershme dhe demokracia funksionale janë parakushte për zhvillimin e vendit dhe integrimin e plotë në BE, si aspirata më e lartë e qytetarëve shqiptarë.

Blog