Blog

Ditën e djeshme Prokuroria e Krimeve të Rënda, SPAK-u, Struktura e Posaçme Anti Korrupsion, ka arrestuar Lefter Kokën dhe disa bashkëpunëtorë në aferën e inceneratorëve, sikundër ka shpallur në kërkim edhe disa të tjerë. Bashkë kemi komunikuar gjatë ditës së djeshme, menjëherë pasi ndodhi kjo ngjarje, dhe sot dua t’iu drejtohem të gjithë qytetarëve shqiptarë me 4 mesazhe të qarta të cilat në fakt i kemi komunikuar gjatë këtyre kohëve, nisur nga afera të ndryshme korruptive, por padiskutim nga afera më e madhe siç e kemi cilësuar ajo e e inceneratorëve dhe e mafies së inceneratorëve.
Mesazhi parë që dua të ndaj me gjithsecilin prej jush, është që për Partinë Demokratike, lufta kundër Korrupsionit, njësoj si dekriminalizimi i politikës, është jetike për Shqipërinë. Është vendimtare për Shqipërinë, për shtetin ligjor, për të drejtat e njeriut, për të ardhmen europiane që duan të gjithë shqiptarët dhe mbi të gjitha për mirëqenien e shqiptarëve. Problemi numër një i vendit, është problemi i ekonomisë, i varfërisë, i papunësisë, pra i mungesës së mirëqenies. Problemi i mirëqenies së shqiptarëve, apo i keq qenies së shqiptarëve, është problemi i keqqeverisjes. Dhe problemi numër një i keqqeverisjes, është korrupsioni. Shqiptarët nuk janë të varfër, por janë të vjedhur. Shqipëria nuk është e varfër, po është e vjedhur. E kemi thënë dhe e kemi përsëritur këtë gjatë këtyre viteve, dhe ja ku duket sot fare qartë se si taksat që kanë marrë nga bashkëqytetarët tanë, taksat që kanë marrë nga shqiptarët, i kanë vjedhur në bashkëpunim me njëri-tjetrin, politikanët pushtetarë. Një skemë e ndërtuar nga persona me precedent penal, pra anëtarë të Krimit të Organizuar në bashkëpunim me oligarkinë. Dhe pasi e kanë ndërtuar këtë skemë, pasi kanë vjedhur ashiqare, ditën për diell, paratë e buxhetit, pra paratë e taksave të shqiptarëve, me këto para kanë paguar edhe për të heshtur dhe mbyllur gojë.
Të gjithë jemi dëshmitarë se inceneratorët dhe mafia e inceneratorëve është, ka qenë prej muajsh një nga sponsorizuesit kryesorë për të hequr çdo lajm, për të censuruar çdo media, madje dhe për të hequr gazetarë nga puna dhe mjafton të shikosh nëse është e mundur akoma nga ana teknike, qoftë në median tradicionale, televizione, qoftë në median e re, në portale, se si e kanë mbytur me reklama inceneratorët vetëm e vetëm për të heshtur dhe mbyllur gojët e njerëzve. Nuk kanë arritur të na mbyllin gojën ne. Me shumicën dërrmuese prej jush, sepse disa kolegë mund të kenë dyshuar, kemi qenë këtu, në këtë sallë, për 3 javë rresht duke denoncuar aferën kriminale të inceneratorëve. Nuk jemi mjaftuar me kaq, jemi drejtuar prej kohësh me thirrje dhe së fundmi edhe me hapat ligjor SPAK-ut.
Edhe një herë dua ta them, njësoj siç është i rëndësishëm dekriminalizimi për këputjen e lidhjeve të krimitme politikën, njësoj është e rëndësishme lufta kundër korrupsionit për mirëqenien e shqiptarëve. Pa rezultatet konkrete në këtë luftë, asgjë nuk mund të ndryshojë. Pa i dhënë fund pandëshkueshmërisë të të korruptuarve që vjedhin taksat e shqiptarëve, asgjë nuk mund të ndryshojë. Ndaj për Partinë Demokratike dhe për mua si kryetari i saj, misioni numër 1 është lufta kundër korrupsionit dhe kundër krimit. Kur Shtetet e Bashkuara të Amerikës shpallin luftën kundër korrupsionit prioritet kombëtar, ku Shtetet e Bashkuara të Amerikës dhe demokracinë e tyre të zhvilluar, shpallin se korrupsioni cenon interesat e tyre kombëtare, po ne këtu? Ku një grusht njerëzish kanë grabitur dhe gllabëruar çdo gjë, para të buxhetit, para të taksave, prona publike, pasuri kombëtare, prona private që i kanë tjetërsuar, ku ministra të qeverisë pastrojnë para dhe grabisin fonde publike, a mund të ketë gjë më të rëndësishme për ne sesa lufta kundër korrupsionit dhe lufta kundër krimit?
Vettingu i politikanëve, është në fakt vetëm një mjet për të luftuar korrupsionin dhe lidhjet me krimin. Shembull i përpjekjeve tona më serioze. Pse e kemi kërkuar Vettingun e politikanëve? Pikërisht për ta bërë më të lehtë transparencën dhe për t’ia bërë edhe më të lehtë SPAK-ut të bëjë punën e tij. Sepse politikanët dhe pushtetarët që kanë vjedhur dhe vjedhin shqiptarët, përmes Vettingut të politikanëve, dalin haptas si të tillë, si hajdut dhe përvetësues të fondeve publike, pra të fondeve të shqiptarëve. Pra, në këtë kuadër, siç e thash dhe dje, përshëndes dhe mbështes drejtësinë në të gjitha veprimet kundër këtij armiku të mirëqenies të shqiptarëve. Partia Demokratike e mbështet pa kushte drejtësinë në luftën kundër këtij armiku të çdo shqiptari, që është korrupsioni.
Përshëndes në veçanti ata prokurorë dhe hetues të sistemit të drejtësisë që kanë filluar të godasin korrupsionin në nivelin më të lartë me gjithë presionin e madh të përditshëm siç është ushtruar edhe për këtë aferë. Presioni është ushtruar haptazi, publikisht siç do ta shikoni dhe natyrisht është ushtruar me të gjitha format dhe mënyrat e tjera edhe larg syve  të publikut për të mos hetuar këtë aferë dhe afera të tjera të pushtetarëve. Ndërsa ne ashtu siç kemi bërë deri më sot ashtu do të vazhdojmë të bëjmë detyrën tonë jo vetëm me denoncime, por ku të mundemi me çdo instrument tjetër siç është hetimi parlamentar kjo është një nga arsyet që kemi ngritur Komisionin e hetimit parlamentar për aferën e incerneratorëve.
Pra, do të vazhdojmë të bëjmë punën tonë  për korrupsionin galopant të qeverisë së Edi Ramës, qeveria më e korruptuar e Europës sipas raporteve ndërkombëtare. Dhe do të përkrahim dhe përshëndesim me forcë të gjitha goditjet që drejtësia i bën  armikut të mirëqënies së shqiptarëve.  Natyrisht që do të donim që kjo të kishte nisur kohë më parë. Nuk dua të  ndalem gjatë këtu. Më mirë vonë se sa kurrë. Natyrisht që do të donim dhe presim jo vetëm ne si opozitë,  por të gjithë shqiptarët që kjo goditje të jetë e plotë dhe e vërtetë dhe të mos mjaftohet me ‘koka turku’. Natyrisht Lefter Koka nuk është thjesht një ‘kokë turku’, por është ministër i qeverisë Rama. Por, siç e thashë dje Lefter Koka nuk mund të bënte  17 vendime brenda ditës.
Lefter Koka nuk mund të mblidhte të gjithë Grupin Parlamentar të Partisë Socialiste me në krye Edi Ramën tek skena  e krimit që ka sekuestruar prokuroria që është landfilli dhe inceneratori i Elbasanit. E mbani mend apo jo? Së katërti, edhe ish-qeverisja e Partisë Demokratike ka patur korrupsion. Jemi  të vendosur ta luftojmë edhe atë për të ecur drejt të ardhmes që meritojnë dhe duan shqiptarët. Nuk mund të ketë ndryshim për shqiptarët pa patur një luftë pa kompromis dhe  pa ngjyra politike kundër korrupsionit në nivele të larta. E dinë shpesh kjo retorikë është bërë bajate sepse sa herë që ne kemi dalë në denoncime propaganda e kundërshtarit, por jo vetëm edhe qytetarët shqiptarë kanë folur për korrupsionin në ish-qeverisjen tonë pjesë e plagës së madhe të shoqërisë shqiptare. Por ajo që dua t’ju them të gjithë shqiptarëve është që ne jemi të vendosur të ecim përpara, të shkëputemi nga pjesa  e keqe e të kaluarës tonë dhe të zgjedhim të ardhmen që vetëm Partia Demokratike, që vetëm ne mund ta sjellim dhe ta  garantojmë për shqiptarët, një të ardhme ndryshe, një të ardhme ndëshkueshmëri dhe jo me mbrojtje të politikanëve që përvetësojnë fondet e qytetarëve më të vjedhur e për rezultat më të varfër të Europës.

ENKELEJD ALIBEAJ GJATË KONFERENCËS ME GAZETARËT

Mbështetja që do të duhet t’i jepet drejtësisë nuk është vetëm një detyrim moral, por kërkon edhe akte konkrete të cilat nuk do të duhet të kufizohen vetëm tek denoncimi publik. Ky është një detyrim ligjor për këdo që bie në dijeni të një vepre penale, ka vetëm një zgjidhje. E para, ta denocnojë, e dyta të shkojë në dyert e drejtësisë.

Këtë kemi bërë ne lidhur me të gjithë megapërmasën e këtij megakorrupsioni.

Për secilën nga tre inceneratorët, Elbasanit, Fierit, Tiranës kemi shkuar në dyert e SPAK-ut për të depozituar kallëzime penale. Me prova, me fakte, me arsyetim ligjor. Ky është detyrimi ynë politik dhe qytetar.

Tre kallëzime penale, voluminoze, në arsyetim, prova dhe fakte.

Në njoftimin e SPAK-ut, po të shihni pjesën e arsyetimit të dhënë, hetimet e kryera është e provuar se në procedurat e dhënies së koncesionit dhe lidhjes së kontratës, nuk janë kryer të plota. Duke shkelur dispozitat e ligjit përkatës, të cilat ne e kishim tjerrë gjerë dhe gjatë. Shqip dhe saktë. Edhe në pjesën e dytë të saj nuk është bërë gjë tjetër, vetëm se është pranuar, verifikuar e çertifikuar ajo se çfarë kemi shkruar në kallëzimet penale të Elbasanit, Fierit dhe Tiranës.

Ajo çfarë ka ndodhur për Fierin. Hapen në nëntor ttë 2015 procedura në Mbrostar, aty ku është vendosur varreza e inceneratorëve. Brenda ditës duke shkelur të gjitha procedurat, hapet me një urdhër 751 të 25 nëntorit 2015, ngrihet komisioni menjëherë dhe fillon procedurat.

Dërgohen shkresat, ish-Ministri i Financave Shkëlqim Cani, e refuzoi. E dini të gjithë se çfarë ndodhi me ish-Ministrin e Financave. E larguan.

Më 18 korrik 2016 u hap gara për këtë incenerator. Nuk kishin marrë dakordësinë e Ministrisë së Financës. E marrin një muaj më vonë dhe në një muaj kishte ndodhur një ngjarje, kishte ikur Shkëlqim Cani, kishte ardhur Arben Ahmetaj. Pas kësaj gjithçka ecën me shpejtësi duke shkelur të gjitha rregullat, hapat, detyrimet ligjore.

Procedura ishte ajo e një tenderi ndërkombëtar por që u hap brenda vendit. Absurd logjik. Paraqitet ajo që inicionte koncesioni, një shoqëri që kishte marrë një bonus 10%, në tender nuk merr pjesë, shoqëria që kishte marrë bonusin.

Futet një kompani “Tagrated Technology Services & Energy”, 28 milionë euro.

Tre ditë, pas lidhjes së kontratës konçesionare, saktësisht 26 tetor 2016, Shoqëria Konçesionare kërkon dhe njofton miratimin tek autoriteti kontraktor, përfundimisht edhe me një shoqëri tjetër “Ndërtim – Montim Patos”, vetëm për 20 mijë lek e blenë dhe merr inceneratorin që në përfundim shkon në 28 milionë euro të futur në xhep.

Tani që flasim, inceneratori nuk është në ndërtim, nuk është në funksion.

Para 3 muajsh u helmua Fieri, qytetarët e Fierit. E mbani mend edhe gjënë tjetër që sot dhe një vit më parë atë se çfarë Rama tha, do të ishte në funksion të plotë.

Inceneratori nuk u vu në ndërtim, qytetarët u helmuan, paratë u vodhën. 28 milionë. Fakte kaq plateale për shkeljen flagrante të dispozitave ligjore të rregullave më minimale që i kupton kushdo që s’i ka rënë rasti ndonjëherë të lexojë ligjin për koncesionet.

Këto ishin ato të cilat ne depozituam në SPAK, për Fierin, Elbasanin dhe Tiranën.

Detyrimi qytetar dhe politik dhe i subjekteve politike është të ndihmojë drejtësinë, ta mbështesë drejtësinë duke kryer detyrimet e veta.

Të depozitojë kallëzime dhe ta lërë drejtësinë të lirë.

Cila ishte përgjigja e Ramës? Sfidoi prokurorinë. Mblodhi të gjithë grupin parlamentar dhe i futi në gropën e inceneratorit  cila është skema e krimit.

Kishte vjedhjen, paratë e zhdukura, autorët e vjedhjes, skemë krimi e cila do të duhet të rrethohej me shiritin, skenë krimi, ndalohet hyrja.

I lejohet hyrja vetëm Prokurorisë, vetëm SPAK-ut.

(Video/ Rama më 19 prill 2017: E kam mbështetur këtë  projekt që ditën e parë, kur kemi votuar në Këshillin e Ministrave. I jam shumë mirënjohës Ministrit të Mjedisit dhe Ministrit të Financave që megjithëse është gjirokastrit në këtë rast e zgjidhi deri në fund qesen.
Rama më 21 tetor 2020: Ky është ndryshimi që ndodh kur PS ka në dorë çelësat e shtëpisë.)

Alibeaj: Kjo ishte skena e krimit ku i mblodhi të gjithë. E patë edhe mizën që i shkoi se plehrat janë atje. E dyta ishte “inaugurimi”. Inaugurimi i asgjë më shumë dhe asgjë më pak i vjedhjes të parave të shqiptarëve.

Ky është qëndrimi se çfarë do të thotë të mbështesësh drejtësinë dhe çfarë do të thotë të pengosh drejtësinë. Ajo demonstronte refuzimin ndaj zbatimit të ligjit dhe ndaj të drejtës dhe detyrimit të SPAK për të bërë detyrën e vetë.

Lulzim Basha: Faleminderit zoti Alibeaj. Para se ti kaloj fjalën zonjës Tabaku, e cila është dhe kryetarja e komisionit hetimor dhe që e ka ndjekur këtë çështje me detaje prej fillimit, do ti lutem edhe një herë bashkëpuntorëve të teknologjisë ta venë edhe një herë, ta luajnë edhe një herë atë sinkron. Kjo është përgjigjja e Edi Ramës. Pyetja që kam për çdo shqiptar kur dëgjon këtë dhe kur merr vesh që sot ministri i tij është në pranga, pra është denoncuar afera korruptive, është çuar në SPAK nga Partia Demokratike me të gjitha faktet, denoncimet, në formën ligjore dhe përgjigjja e kryeqeveritarit është në vend që të thërrasë, aq sa ka në dorë, vartësit e tij, në qoftë se do të kishte dorë jashtë dhe t’ju kërkojë llogari, mobilizon të gjithë grupin parlamentar të Partisë Socialiste me Lefter Kokën brenda, me Damian Gjiknurin brenda, me Arben Ahmetaj brenda, i vetmi që ndoshta ka munguar ka qenë Engjëll Agaçi dhe i çon tek skena e krimit, e cila sot është e rrethuar me shirit të verdhë, sepse sipas asaj që ka thënë SPAK-u është vendosur në sekuestro. Vendoseni dhe një herë të lutem, për herë të tretë sinkronin.

Është unike në botë të mbledhësh grupin parlamentar në një vend grumbullimi mbetjesh, është unike në botë ta bësh këtë pasi je akuzuar publikisht nga opozita, se ai vend grumbullimi dhe i ashtuquajturi incenerator i ndërtuar aty është një aferë e madhe korruptive. Është unike në botë, që pasi është dërguar një kallëzim në prokurori për këtë aferë, në vend që të përgjigjesh me masa, në vend që të përgjigjesh me shkarkime, në vend që ti kërkosh drejtësisë ta hetojë deri në fund, të mbledhësh grupin parlamentar dhe qeverinë për të mbrojtur skenën e krimit. Pyetja që shtrohet është çfarë e shtyn një kryeministër, çfarë e shtyn çfarëdo njeriu me përgjegjësi politike ti përgjigjet një akuze konkrete , me denoncim penal, që të mbledhë grupin parlamentar te skena e krimit, nëse vetë është dorë jashtë, nëse vetë nuk është pjesë e kësaj skeme, përfitues i kësaj skeme? Dhe këtu rikthehemi dhe një herë që arrestimi i djeshëm i Lefter Kokës është më mirë vonë sesa kurrë, por nuk mund të jetë kurrsesi maja e hetimit.
Sepse nuk ka njeri ti mbushë mendjen shqiptarëve, se Edi Rama mblodhi grupin parlamentar te inceneratori i Elbasanit, ditën apo ditë pas denoncimeve tona për të mbrojtur Lefter Kokën. Jo, kjo është një skemë brenda të cilës është vetë Edi Rama, janë kryetarët e tre bashkive, e Tiranës, Elbasanit dhe të Fierit. Është Arben Ahmetaj, i cili sapo zvendësoi Shkëlqim Canin bëri të mundur firmosjen brenda një mbledhje qeverie, të 17 akteve të qeverisë, 17 akte, pavarësisht se pak më vonë mund ta kenë lënë me gisht në gojë, sepse u fut në skemë Eron Veliaj me Damian Gjiknurin. Është një skemë e vërtetë mafioze, ku nxirren kaq shumë përfitime në kurriz të taksave të shqiptarëve, por edhe në kurriz të shëndetit të shqiptarëve, sa që një pjesë e tyre dedikohen për të blerë heshtjen e mediave.
Dua ta them, se megjithëse dje ka qenë një ditë e ngarkuar për mua, nga raportimet e monitorimit të medias, nuk ka munguar, për fat të mirë, raportimi i deklaratave tona, deklaratës time poshtë, i deklaratës që ka dhënë zonja Tabaku në një nga mediat, por në tërësi duket qartë që presioni vazhdon për të minimizuar padyshim atë që është vjedhja e këtyre 21 viteve. Në dritë të diellit, me një skemë mafioze, ku përfshihen po kështu edhe llogari bankare jashtë shtetit, edhe regjistrime kompanish jashtë shtetit, për të fshehur pronarët dhe përfituesit, pra për të bërë të mundur pastrimin e parave., Inkurajoj fuqimisht hetuesit dhe prokurorët, edhe një herë, më mirë vonë sesa kurrë, dje padiskutim isha edhe jam dhe sot kritik për vonesën e madhe, por sot është rasti të them dhe diçka tjetër, qytetarët duhet ta dinë që këta prokurorë dhe këta hetues janë në një presion të jashtëzakonshëm, në përmasa kriminale për të mos vepruar. Presioni publik ishte ai që sapo patë.
Grupi parlamentar i Partisë Socialiste mburojë e skenës së krimit. Ndaj dua tu them që Partinë Demokratike e kanë në krah, teksa lufton armikun e mirëqenies së shqiptarëve, që është korrupsioni i pushtetarëve, korrupsioni i politikanëve të lartë. Për të kaluar dhe një herë në thelbin e çfarë do të thotë kjo për xhepat e shqiptarëve, sa dhe si janë grabitur këto para nga xhepat e nënave dhe baballarëve, si është hequr buka nga goja e fëmijëve shqiptarë, për ti çuar tek Klodianët, tek Lefterët tek Gugallia, që është shpallur në kërkim siç ju paralajmërova para një viti. Para një viti ju thashë në kërkim dhe para disa ditësh morëm një kallëzim për shpifje nga Gugallia, tha nuk jam në kërkim.
Tani shpresoj të jetë në kërkim, uroj të jetë në kërkim, uroj të mos ia kenë mbyllur gojë përgjithmonë. Sepse kjo aferë i përfshin të gjithë, nga i pari, tek i fundit, nga Gugallia që është një prestanome, është një prestanome si ata filmat e mafies që gjendet një në rrugë që kapet një në rrugë, një lypës, s’po them që është lypës, por e tillë është e deri tek kryeministri i vendit cili në panik u vetëzbulua kur ditën që duhet t’i përgjigjej politikisht me aktet dhe veprimet që i takojnë një kryeministri të papërfshirë në korrupsion, denoncimit të Partisë Demokratike për aferën korruptive, mblodhi të gjithë Grupin Parlamentar dhe e çoi tek skena e krimit. Më qartë se kaq nuk bëhet. Cili është dëmi, sa është dëmi, si është dëmi, si ka funksionuar gjithçka e kemi zbërthyer dhjetëra herë. Jemi censuruar dhjetëra herë dhe nuk do të ndalemi së denoncuari.

JORIDA TABAKU GJATË KONFERENCËS ME GAZETARËT

Jorida Tabaku:  Dua të falënderoj të gjithë gazetarët që me guxim kanë vazhduar të reflektojnë këtë aferë, edhe kur shumë mikrofona na janë fikur. Edhe kur para një muaj PD depozitoi kërkesën për komision hetimor.
Fatkeqësisht mediat e bojkotuan.
Ashtu siç na kanë bojkotuar këto muaj masivisht.
Unë dua t’ju tregoj disa fakte që më shumë se çdo retorikë politike tregojnë qëndrueshmërinë e PD në denoncimin e kësaj afere.
Departamenti Antirkorrupsion në PD për herë të parë në 2015-ën ngriti flamurin e kuq dhe tha “po ngrihet një procedurë koncesioni nga asgjëja”.
Qazim Sejdini pi kafe me Klodian Zotonm dhe këto të gjitha i kemi provuar me shkresa dhe brenda ditës i dërgon shkresë Lefter Kokës dhe i thotë “Elbasani është në një situatë të jashtëzakonshme të mbetjeve, duhet të hapim një procedurë konceisoni për incenerimin”.
Po brenda ditës arrin shkresa. Lefter Koka e pret brenda ditës Klodian Zoton dhe po brenda ditës hap procedurën e koncesionit dhe brenda ditës merr ofertën e pa kërkuar nga Klodian Zoton.
Pse Qazim Sejdini nuk është arrestuar?
Ai e ka iniciuar këtë procedurë.
Z.Basha përmendi 17 procedura të cilat janë marrë për inceneratorin e Elbasanit që tregojnë se Lefter Koka nuk ka qenë vetëm.
16 dhjetor 2014, për ironi të fatit, të njëjtën javë, por 7 vite më parë mbahet gara për inceneraotrin e Elbasanit ku kompania e vetme shpallet fituese, koha e ankimimit që është 7 ditë, përfundoi po atë ditë.
Përcaktohet abuzivisiht se nuk ka asnjë ankesë. Megjithëse duhet të pritet 7 ditë.
Hartohet një draft -kontratë për kompaninë fituese po në 16 dhjetor.
Dërgohet draft kontrata për mendim ministrinë e Financave po me 16 dhjetor.
Dërgohet draft kontrata për mendim ministrinë e Zhvillimit Ekonomik, Sipërmarrjes po në datë 16 Dhjetor; njëkohësisht edhe në ministrinë e Infrastrukturës, ministrinë e Drejtësisë.
Dërgohet drafti për mendim tek Autoriteti i Prokurimit Publik por njëkohësisht edhe tek sekretari i i Përgjithshëm i Kryeministrisë, ka luajtur një rol kyç në përshpejtimin e gjithë procedurave po në të njëjtën datë.
Vjen përgjigja po në të njëjtën datë e gjithë këtyre institucioneve po në datën 16 Dhjetor, për një kontratë 60 faqe.
Vjen përgjigja nga ministria e z.Ahmetaj, e Infrastrukturës.
Merret konfirmimi nga kryeministri po në datë 16 Dhjetor.
Pse sot kryeministri nuk është arrestuar?
Vjen përgjigje pozitive edhe nga ministria e Drejtësisë. Hartohet kontratë përfundimtare.
Negociohet po në 16 Dhjetor.
Firmoset po në datë 16 Dhjetor.
Dhe me 17 dhjetor Rama e firmos dhe miraton në mbledhje qeverie si kontratë koncensionare për incenerimin.
Sa ministra përmenda sot këtu? Pse nuk janë përpara drejtësisë?
Zyrater të lartë të PS, zëvendëskryeministër dhe persona të përfshirë në këtë proces.
Procedurën për inceneratorin e Fierit e shpjegoi z.Alibeaj, nuk i shtoj asgjë.
Por krimi më i madh në fakt është për inceneratorin e Tiranës. Një jetë, një i ri sot nuk jeton më për inceneratorin e Tiranës.
Nuk e kam bërë kurrë, nuk e kam përmendur kurrë vdekjen për politikë. Por sot ne mund të flasim se ato miliona euro, 430 mln euro  kanë shkelur edhe mbi jetën e një njeriu.
Inceneratori i Tiranës që nisi me një kontratë prej 129 mln euro, me TVSH dhe me gjithë të gjitha kostot e tjera shtesë e çuan 179 mln euro.
KLSH thotë se është një kontratë që shkon deri në 400 mln euro. Sepse a e dini që për këtë kontratë rriskun nuk e mban koncensionari por e mban buxheti i shtetit?! Që pagesa rritet çdo dite edhe për inceneratorin e Tiranës.
Çdo ditë kemi rritje pagesash nga buxheti i shtetit dhe kjo është vetëm për ndërtimin.
Do ndalem më pas për operimin.
Përfaqësues të PD kanë shkuar tek inceneratori i Tiranës… në fakt ai është vetëm një landfill sepse nuk bëhet procesi i incenerimit.
Kanë shkuar atje për të treguar se çfarë po ndodh. Disa prej mediave tuaja e kanë transmetuar. Jemi sulmuar në mënyrë mafioze dhe kriminale me makina. Jemi censuruar dhe nuk ka dalë asgjë në media.
Menjëherë pas kësaj ne kemi bërë edhe padi. Ka qenë e njëjta periudhë. I referohemi vjeshtës së vitit të kaluar.
Dhe a e dini pse?
Sepse kontrata e koncensionartit të Tiranës nga 179 mln euro shkon rreth 400 mln euro, thotë KLSH. Se është kontrata me abuzive. Dhe të treja bashkë, në shembullin e tyre unik, janë kontrata me çelësa në dorë.
Që do të thotë se ne momentin që parë që janë firmosur, kontrata ka filluar pagesa.
Inceneraotri i Elbasanit ka filluar pagesa 22 mln. 26 mln kanë shkuar për inceneratorin e Fierit.
Ndërkohë që në total shkojnë në pothuajse 92 mln euro, 35 mln i ka inceneratori i Tiranës.
92 mln euro të paguara deri më sot për korrupsionin e Edi Ramës, Arben Ahmetaj, Damian Gjinkurit dhe tre kryetarëve të Bashkisë; Erion Veliaj, Armando Subashi dhe Qazim Sejdini.
Pa u arrestuar këta të 7 nuk ka drejtësi.
Për të kaluar tek puna e komisionit hetimor. Për të falënderuar të gjithë ata kolegë që kanë reflektuar.
Një heshtje e shurdhët nga institucionet. Por ajo që ka më shumë rëndësi nga koncensionari.
Çfarë indiciesh ka PD që donte ti konfirmonte.
Dhe unë dua këtu të përmend dy rrugë kryesore.
Ashtu siçc janë hapur kompani fiktive për inceneratorin e Elbasanit, ku përfitues ka qenë z.Lefter Koka.
Janë hapur kompani fiktive edhe për inceneratorin e Fierit dhe për inceneratorin e Tiranës. I kemi dërguar koncensionarit kërkesë për të na dërguar informaicon për të gjithë nënkontraktorit. Nuk e ka sjellë.
I kemi kërkuar sistemit bankar, në të drejtën tonë kushtetuese, që na jep ligji dhe Kushtetuta për targin e komisionit hetimor, që të na japë të dhëna bankare. Nuk na janë vendosur në vendosur në dispociion nga ana shumicës së bankave.
Përkundrazi, një sulm mediatik i paguar me para publike është ndërmarrë ndaj përfaqësuesve të PD.
Për të vërtetuar që nuk është Lefter Koka rasti i vetëm, janë hapur edhe kompani të tjera.
Deputeti i PS, Alqi Bllako që sot është në grupin parlamentar të PS, ish sekretari i Përgjithshëm i Ministrisë së Mjedisit, ka marrë pagesa familja e tij, babai i tij si nënkontraktor. Të tre kompani të lidhura me njëra tjetrën. Megjithëse me emra të ndryshëm, i bashkon një zyrë, një adresë në Sky Tower që sot i janë i vënë çelesat. I janë vënë çelësat kur morën vesh që kjo aferë kriminale po shkonte drejt finalizimit.
Për inceneratorin e Tiranës kanë përfshirë edhe kompani të regjistruara në off shore. Deputetja e PD, znj. Flutura Açka, bashkë me disa gazetarë ka shkuar në adresën e kompanisë që regjistrohet në Holandë, si përfaqësuese e një kompanive që ka marrë inceneratorin e Tiranës. Dhe e dini që në zyrë atje nuk ka njeri. Është dhënë një adresë fallso. I kanë rënë derës. Kanë pritur me ditë me radhë. Aty nuk është askush.
Prandaj kur themi se afera e inceneratorëvëe është zbuluar vetëm në 1/10 e saj dhe që nuk është bërë drejtësi, I referohemi të gjitha këtyre fakteve që janë sot përpara SPAK.
Ndërkohë që kemi informacione të pafund. Komision hetimor ka mbledhur indicie pa fund që jemi në proces verifikimi që do t’ia vendosim në dispozicion edhe SPAK. Mendoj se do të na i vendosin edhe ata ne materialet që mund të kenë.
Për ne nuk ka absolutisht asnjë ambicie se kush e heton këtë korrupsion. Për ne ka vetëm një nevojë të shkojnë përpara drejtësisë ata që kanë përfituar padrejtësisht nga kjo aferë.
Së fundi, për tarifat e pastrimit.
Patë videot dhe pamjet që në momentin u inaugurua inceneratori i Elbasanit. Kur grupi parlamentar i PS u mblodh në inceneratorin e Elbasanit. Nuk arritëm dot të shfaqnim disa pamje të tjera, ku Edi Rama i ka dalë zot deri para një jave.
A e dini që tarifat e pastrimit në çdo qytet janë rritur?!
Në Tiranë janë rritur 30% dy vite më parë.
Ndërkohë që flasim Vlora i ka rritur 60% tarifat e pastrimit për bizneset.
70% po rriten në Durrës për qytetarët.
E njëjta gjë në Fier, me vendime të Këshillit Bashkiak.
Kjo është kosto e operimit për inceneratorët. Sepse koston e financimit dhe ngritjes si koncesion/ ndërkohë që ne do të vazhdojmë të paguajmë me tarifat e pastrimit të gjithë koston për çdo qyet që depoziton mbetjet. Tirana ka disa vite që e paguan. Qytetet e tjera, kur filluan të digjen plehrat në mënyrë kriminale në Shijak, Durrës, Fier. Në çdo qytet gjatë verës kemi parë pamje të jashtëzakonshme.
Pse ka ndodhur kjo?!
Kjo ka ndodhur sepse mafia e plehrave i ka detyruar të gjitha bashkitë dhe atë që i doli zot deri para një jave, që iu thoshte “do paguani  tarifat e pastrimit që ti çojmë tek inceneratorët.”
Dhe kjo është pagesa e dytë që shkon tek inceneratorët.
Përveç për ngritjen e koncesionit që vjen nga buxheti i shtetit, që nuk ndalet nga buxheti i shtetit. Tarifat që i shkojnë nga bashkitë çdo ditë.
Në momentin kur përfaqësues të PD kanë shkuar në landifillin e Sharrës kemi parë që nuk pranoheshin kamionët që vinin nga qytete. Kamionë që vinin nga Durrësi duke pritur atje në radhë sepse në mënyrë kriminale nuk i lejonin t’i depozitonin pa i bërë pagesat bashkitë.
Unë besoj që nëse ka pak guxim nga SPAK-u mund t’i shkohet deri në fund kësaj afere.
Jemi të kënaqur me Lefter Kokën?!
Nuk jemi të kënaqur.
Nuk duam që kjo histori të mbyllet me Lefter Kokën. Kjo nisi me Lefter Kokën. Duhet të përfundojë me Edi Ramën.
Dhe do të vazhdojmë deri në fund të bëjmë transparencën, deri kur kjo të mbyllet me Edi Ramën.

Arrestimi i sotshëm i ish-ministrit të Edi Ramës, Lefter Koka, është një tjetër provë që fakton drejtësinë e denoncimeve të Partisë Demokratike. Sot është dita të kujtojmë se është dita të kujtojmë se ishte Partia Demokratike e cila në shkurt të vitit 2018-të, nisi procesin e denoncimeve dhe të interpelancave parlamentare, përkundër gjithë zhumnajës, blerjes së heshtjes publike duke përfshirë influencimin përmes parave të inceneratorëve pothuajse të gjithë mediave shqiptare. Për 400 milionë euro që iu janë zhvatur taksapaguesve shqiptarë. E pra sot, arrestimi i ministrit të Ramës provon se akuzat tona kanë qenë të drejta. Se denoncimet tona kanë qenë të bazuara. Thënë kjo, nuk ka qytetar shqiptarë ta besojë se ky është peshku i madh. E dinë të gjithë që 17 vendime qeverie brenda dite, nuk i nxirrte dot një ministër kushdo qoftë ky. Emrat e vërtetë që qëndrojnë pas kësaj afere, pas këtij abuzimi me 400 milionë euro të shqiptarëve, janë ato të Edi Ramës, të Damian Gjiknurit, të Erion Veliajt, Klodian Mërtirit, Arben Ahmetajt dhe surogatëve të tjerë, dy kryetarëve të tjerë të bashkive të tjera. Ndaj sa kohë që nuk ka veprim të plotë, nuk ka drejtësi të plotë për këtë aferë të tmerrshme korruptive e cila ka varfëruar edhe më shumë xhepat e shqiptarëve.
Nuk mund të themi se sot është një ditë triumfi, për drejtësinë. Është ndoshta fillimi i një procesi, por që nuk mund të përfundojë pa i dhënë përgjigje pyetjeve se çfarë bëhet me kokat e kësaj afere, me kreun e qeverisë që kaloi 17 vendime qeverie brenda një dite. Paratë e kujt po pastronte ministri i Ramës që është arrestuar sot?
Kjo dëshmon edhe njëherë rëndësinë që ka komisioni hetimor për inceneratorët, dëshmon edhe njëherë rezistencën, arsyet për rezistencë që iu bë  ngritje së këtij komisioni dhe rikthen vëmendjen e qytetarëve faktin që ne, Partia Demokratike po e bëjmë këtë betejë për interesat e shqiptarëve, për xhepat e shqiptarëve, në krahun e shqiptarëve, por po tregohet qartë që me refuzimin për t’ju përgjigjur në kohë me dokumentacionin e kërkuar dhe me dëshmitarët e kërkuar fajtorët janë vetëzbuluar para opinionit publik.
Ky është momenti për t’i thënë çdo shqiptari që Komisioni Hetimor për Inceneratorët dhe beteja e nisur që në shkurt të vitit 2018, madje që në 2017 për denoncimin e kësaj skeme mafioze, kjo betejë do të  vazhdojë dhe se pavarësisht prej vullnetit të plotë apo jo të drejtësisë të cilës i kërkoj sot të veprojë pa hezitim për  të vënë para përgjegjësisë të gjithë duke filluar nga kokat dhe jo duke u kënaqur vetëm me 1, 2 apo 3 pjesëmarrës në këtë skemë gjigande korrupsioni. Pavarësisht nga gjithë kjo Partia Demokratike, deputetët tanë në komisionin e hetimit për inceneratorët do të vijojnë betejën tonë për transparencën pikërisht në funksion të zbardhjes  së kësaj  skeme gjigande kriminale që nga njëra anë ka rënduar qytetarët sepse ju të gjithë e dini që  qytetarëve dhe bizneseve, taksat e pastrimit u janë rritur e ju janë shtuar. E dini fare mirë se kjo nuk ka sjellë as cilësi më të mirë ajri, asnjë higjenë më të madhe në qytetet tona.
Përkundrazi, ka sjellë ndotje më të mëdha sepse e gjithë skema e inceneratorëve është një skemë mafioze e ndërtuar për të vjedhur shqiptarët dhe  për të dëmtuar shëndetin e tyre. Nuk mund të mos e shpreh se ky hap i parë i ndërmarrë sot padiskutim është i mirëpritur, por nga ana tjetër dua ta them fare qartë në emër  të Partisë Demokratike se pa shkuar tek peshqit e mëdhenj të kësaj afere, gjithçka do të mbetet një farsë dhe në vend që të ndërtojë rrezikon që të rrënojë besimin e drejtësisë. Ndaj, e nxis drejtësinë në këtë ditë kur ka hedhur këtë hap të marrë të mos ndalet me kaq, mos ta fusë për kalendar greke siç i thonë procesin e hetimit, por  të shkojë menjëherë tek autorët që e kanë bërë të mundur siç e thashë firmosjen e 17 akteve qeveritare  me një ditë.
Sot është dita kur Lefter Koka është arrestuar, që Edi Rama, Ëngjëll Agaçi, Damian Gjiknuri, Srben Ahmetaj, së bashku me Klodian Mërtirin, Erion Veliajn dhe kryetarët e dy bashkive të tjera të thërriten dhe të merren urgjentisht sipas ligjit, të procedohen sipas ligjit, sepse pa ta Lefter Koka, sigurisht që nuk do të arrinte dot të kryente këtë vepër monstruoze dhe këtë krim të rëndë mbi xhepat e shqiptarëve.

Pyetje: Zoti Basha keni zhvilluar një takim sot me ambasadorët, kishte lidhje me ngjarjet e djeshme?

Lulzim Basha: Takimi i sotëm me ambasadorët ishte për të djeshmen, për të sotmen dhe për të ardhmen.

https://youtu.be/62ekqcl-vUw

REZOLUTË E KËSHILLIT KOMBËTAR TË PARTISË DEMOKRATIKE

Këshilli Kombëtar i Partisë Demokratike, i mbledhur sot, në 12 dhjetor 2021, në përmbushje të përgjegjësive të veta politike dhe statutore, si organi më i lartë i Partisë Demokratike midis dy Kuvendeve,

• Diskutoi mbi situatën shqetësuese të krijuar nga lëvizja e zotit Sali Berisha pas pezullimit të tij nga Grupi Parlamentar dhe tubimi i  tij përmbledhës i datës 11 dhjetor;
• Konstatoi se thirrja e këtij tubimi, me pretendimin se po mblidhte një Kuvend të Partisë Demokratike, dhe të ashtuquajturat “vendime” shkelin të gjitha normat e Statutit të PD-së që rregullojnë funksionimin dhe vendimarrjen e saj si institucion politik;
• Vëren se tubimi fallsifikoi dhe përdori simbolet dhe logot e Partisë Demokratike në thyerje flagrante të normave statutore dhe ligjore;
• Vlerëson se lëvizja “Berisha” dhe tubimi i djeshëm, si finalizim i saj, janë një përpjekje për të deligjitimuar institucionet e Partisë Demokratike deri në zhbërjen e saj si forca më properëndimore në vend, duke synuar shndërrimin e saj në një bunker për mbrojtjen e interesave personale të Sali Berishës përballë SHBA.
• Konkludon se çdo i ashtuquajtur qëndrim apo vendim i këtij tubimi është nul dhe nuk ka asnjë vlerë politike dhe ligjore për Partinë Demokratike.
• Afirmon se Kuvendi Kombëtar i datës 18 dhjetor është Kuvendi i vetëm i ligjshëm dhe gjithëpërfshirës i demokratëve, ku do të diskutohet, debatohet dhe vendoset, në mënyrë demokratike, për thellimin e demokracisë se brendshme dhe fuqizimin e PD-së përballë sfidave të kohës.
• Konsideron se duke instrumentalizuar disa problematika të brendshme të Partisë Demokratike, shqetësimet dhe ndjeshmëritë e sinqerta të mjaft demokratëve, pas masakrës zgjedhore të 25 prillit, si dhe duke mobilizuar dhe mbledhur rreth vetes një grup organizatorësh me axhendë dhe interesa personale të së shkuarës dhe të sotmes, lëvizja “Berisha” për të shantazhuar Shtetet e Bashkuara të Amerikës,  siç e deklaroi hapur në fjalën e tij Sali Berisha, hodhi dje bazat e një organizate politike me frymëzim antiamerikan që vetëm me PD-në nuk ka e nuk do të ketë asnjë lidhje kurrë. Kjo është lëvizja e parë antiamerikane në historinë e tri dekadave të sistemit demokratik dhe e dyta në historinë e Shqipërisë pas asaj të Enver Hoxhës.
• Partia Demokratike distancohet me forcë dhe dënon lëvizje të tilla që bien ndesh me përcaktimet identitare të saj, me interesat e demokratëve dhe të gjithë shqiptarëve, me marrëdhëniet strategjike jetike të Shqipërisë dhe Kombit shqiptar me SHBA.
• Këshilli Kombëtar apelon demokratët që ishin në tubimin e 11 dhjetorit për shqetësimet e tyre legjitime, që nuk kanë lidhje me axhendën dhe interesat përsonale të Sali Berishës, të reflektojnë dhe të qëndrojnë të bashkuar me shumicën e demokratëve rreth historisë dhe vlerave të shenjta të Partisë Demokratike.
• -Këshilli Kombëtar e konsideron luftën kundër korrupsionit dhe pandëshkueshmërisë në sferat e larta si një element kyç për vendosjen e shtetit të së drejtës, mbajtjen e zgjedhjeve  të lira e të ndershme,  integrimin e Shqipërisë në BE, mbrojtjen e dinjitetit njerëzor, zhvillimin dhe mirëqenien e familjeve shqiptare. Në ketë luftë vendosja nga SHBA e antikorrupsionit si përparësi e politikës së saj dhe përdorimi i sanksioneve kundër zyrtarëve dhe ish-zyrtarëve të korruptuar në  Shqipëri ka qenë dhe është një faktor vendimtar për shembjen e sundimit  aktual dhe shumëvjeçar të korrupsionit dhe paligjshmërisë në vend
• Këshilli Kombëtar shpreh vlerësimin dhe mbështetjen e plotë për ngritjen në një nivel të ri dhe më të ngushtë të marrëdhënive të bashkëpunimit të Partisë Demokratike dhe kryetarit të partisë me SHBA.
• Këshilli Kombëtar mbështet të gjithë veprimtarinë dhe vendimarrjen e Kryetarit, Kryesisë dhe Grupit Parlamentare për mbrojtjen e interesit të Partisë Demokratike dhe vlerave të saj si opozita dhe altenativa e vetme për largimin e regjimit të Edi Ramës dhe rikthimin e demokratëve si forcë qeverisëse.

Tiranë, 12 dhjetor 2021

REZOLUTA E KËSHILLIT KOMBËTAR TË PARTISË DEMOKRATIKE

• “Shumicë absolute”, Gazment Bardhi bën transparencën për Kuvendin Kombëtar të 18 Dhjetorit: Konfirmojnë pjesëmarrjen 69% e anëtarëve ose 5259 delegatë.

KONFERENCA E PLOTË E SEKRETARIT TË PËRGJITHSHËM TË PARTISË DEMOKRATIKE, GAZMENT BARDHI

Përshëndetje të gjithëve!

Jam së bashku me zëdhënësen e partisë dhe Kolegjin e Kryetarëve të degëve të Partisë Demokratike në këtë komunikim me median dhe nëpërmjet jush me anëtarët e PD për t’ju informuar për organizmin e Kuvendit Kombëtar të PD të datës 18 Dhjetor.

Siç jeni në dijeni, pas një rrëmuje disamujore, me gjoja nevojën apo kërkesën për thirrjen e Kuvendit Kombëtar të PD, në ditën kur do të duhej të dorëzohej kërkesa zyrtare pranë institucionit të Partisë Demokratike për të mbledhur Kuvendin u krye një proces talljeje me anëtarët e partisë, veçanërisht me anëtarët e Kuvendit Kombëtar.

Duke vlerësuar këtë situatë, Kryesia e partisë me datën 15 Nëntor 2021, vendosi thirrjen e Kuvendit Kombëtar të Partisë Demokratike në datën 18 Dhjetor, ora 11.00 në Pallatin e Kongreseve.

Për fat të keq, gjuha përçarëse dhe retorika përçarëse e z.Berisha vijoi edhe pas vendimit të Kryesisë për të thirrur Kuvendin Kombëtar të PD, ku çdo demokrat, çdo delegat i PD do të duhej dhe do të duhet të marrë pjesë për të diskutuar të gjithë sëbashku, si një familje e madhe çdo problematike që cilido prej anëtarëve gjykon që ekziston në Partinë Demokratike.

Unë dua fillimisht, përpara se të ndjekim një material dhe më pas t’ju informojmë mbi ecurinë e procesit të organizimi të Kuvendit të datës 18 Dhjetor, të falënderoj çdo kryetar të degëve të PD-së që sot më mua janë në këtë komunikim publik, për përgjegjësinë e lartë të treguar gjatë gjithë këtij procesi, për komunikimin intensiv që kanë patur me strukturat e partisë dhe me anëtarët e Kuvendit Kombëtar gjatë gjithë kësaj periudhe dhe me ndjekjen me përgjegjësi të lartë, në raport me çdo demokrat, të procesit të informimit dhe konfirmimit të pjesëmarrjes në Kuvendin Kombëtar të PD të datës 18 Dhjetor.

Siç thash, edhe pse Kryesia e partisë vendosi thirrjen e Kuvendit Kombëtar, u shpall fillimisht jolegjitime dhe u bë thirrje anëtarëve të Kuvendit Kombëtar të mos marrin pjesë në Kuvendin e tyre Kombëtar, në Kuvendin Kombëtar të demokratëve në datën 18 Dhjetor.

Dua shkurtimisht të shohim deklaratën, që është një retorikë përçarëse ndaj demokratëve dhe më pas do t’ju informoj për përgjigjen që i kam dhënë kësaj deklarate anëtarët e Kuvendit Kombëtar të Partisë Demokratike.

Sali Berisha: “Në fakt i përshëndes ata qindra dhe mijëra demokrate dhe demokratë që i kanë grisur dhe po i hedhin në kosh, dhe po refuzojnë mençurisht antikuvendin e turpshëm, apo si të themi themelimin e shoqatës Basha-Bardhi.

Në fakt anëtaret e Kuvendit nuk i kanë hedhur në kosh me përgjegjësinë e tyre ndaj demokratëve që përfaqësojnë në Kuvendin Kombëtar. Kanë firmosur masivisht pjesëmarrjen në Kuvendin Kombëtar të Partisë Demokratike.

Gjithsecili prej tyre ka nënshkruar nën prezencën e një zyrtari të partisë një formular që konfirmon pjesëmarrjen në Kuvendin Kombëtar të PD të datës 18 Dhjetor, ora 11.00.

Kësaj thirrje përçarëse nuk i janë përgjigjur duke konfirmuar pjesëmarrjen në Kuvendin Kombëtar të Partisë Demokratike 5259 anëtarë të Kuvendit Kombëtar, ose 69% e tyre.

Konkretisht, kanë konfirmuar pjesëmarrjen:

• Qarku Dibër 352 anëtarë të Kuvendit Kombëtar
• Qarku Korçë – 326 anëtarë të Kuvendit Kombëtar
• Qarku Berat – 287 anëtarë të Kuvendit Kombëtar
• Qarku Lezhë – 258 anëtarë të Kuvendit Kombëtar
• Qarku Shkodër – 389 anëtarë të Kuvendit Kombëtar
• Qarku Gjirokastër- 205 anëtarë të Kuvendit Kombëtar
• Qarku Vlorë – 342 anëtarë të Kuvendit Kombëtar
• Qarku Fier – 508 anëtarë të Kuvendit Kombëtar
• Qarku Durrës – 308 anëtarë të Kuvendit Kombëtar
• Qarku Elbasan – 544 anëtarë të Kuvendit Kombëtar
• Qarku Tiranë – 1326 anëtarë të Kuvendit Kombëtar
• Qarku Kukës – 112 anëtarë të Kuvendit Kombëtar

Ndërkohë që nga anëtarësia e Këshillit Kombëtar dhe me gjasë pas konferencës sime edhe Këshilli Kombëtar do të shpallet ilegjitim, kanë konfirmuar pjesëmarrjen 302 anëtarë të Këshillit Kombëtar të Partisë Demokratike.

Në total kanë konfirmuar 5259 anëtarë të Kuvendit Kombëtar ose 69% e totalit të anëtarëve të Kuvendit.

Ndërkohë gjatë kontakteve që strukturat e partisë kanë patur me anëtarët e Kuvendit Kombëtar, dua të bëj transparencën e plotë 1046 anëtarë të Kuvendit Kombëtar nuk kanë konfirmuar pjesëmarrjen në Kuvendin Kombëtar të Partisë Demokratike duke refuzuar pjesëmarrjen në Kuvendin e thirrur nga Kryesia e partisë.

Ndërkohë që janë në proces njoftimi, një pjesë prej tyre raportohet se janë në emigracion ndërkohë që në në 11 degë të partisë për shkak se kryetarët e degëve nuk ja ë përfshirë në ketë proces, procesi procesi i njoftimeve ka nisur më vonë dhe vijon me afat deri të mërkurën e javës që vjen. Lidhur me degët e partisë që nuk janë përfshirë në këtë proçes njoftimi, si Sekretar i Përgjithshëm kam përgatitur një raport të plotë dhe do të kërkoj thirrjen e mbledhjes së Kryesisë për të parë veprimet që do të duhet të ndërmarrë kryesia e partisë në raport me këtë papërgjegjshmëri të treguar nga një numër i vogël i kryetarëve të degëve.

Unë do të lexoj personalisht listën e Këshillit Kombëtar, më pas zëdhënsja e partisë do të bëjë transparencë të plotë emër, mbiemër të çdo anëtari të Kuvendit Kombëtar të Partisë Demokratike që ka konfirmuar me shkrim dhe me vullnet të lirë pjesëmarrjen në Kuvendin Kombëtar të thirrur nga kryesia e Partisë më 18 dhjetor.

Do të jetë një proces i gjatë por i nevojshëm për shkak të situatës së krijuar për të bërë një transparencë të plotë.

Anëtarët e Kuvendit nuk mbyllen dot në kasafortë.

Sikundër nuk caktohen dot as në rrugë dhe as në shkallët e partisë. Anëtarët e Kuvendit janë zyrtarë të përgjegjshëm të partisë. I kemi patur dhe do të vazhdojmë t’i kemi në krah në çdo përballje me regjimin e Edi Ramës. Në çdo fushatë zgjedhore kanë qenë aty në mbrojtje të votave të demokratëve dhe për të përfaqësuar interesat e demokratëve, kanë treguar konfirmimin masiv të pjesëmarrjes në Kuvendin e datës 18 që mes interesit personal të doktor Berishës dhe interesave të PD-së, interesave të demokratëve, zgjedhin interesin e PD, interesin e demokratëve.

Mes hallit të Sali Berishës dhe mes halleve të shtuara për shkak të keqqeverisjes 8 vjeçare të regjimit të Edi Ramës kanë zgjedhur të jenë në krah të halleve dhe problemeve të anëtarëve të thjeshtë të PD, të halleve dhe problemeve të qytetarëve shqiptarë.

Unë do të lexoj emrat e këshillit Kombëtar, e bëra të qartë se edhe Këshilli Kombëtar të dalë jolegjitim. Sikundër do të dalë edhe Kuvendi Kombëtar. Pra çdo isntitucion i partisë për shkak se nuk kontrollohet dhe nuk i nënshtrohet dot interesit personal të doktor Berishës por ka zgjedhur të jetë krah demokratëve në mbrojtje të interesit të PD dhe demokratëve. Keni parë gjatë këtyre ditëve dhe do të shikoni në vijim që do të shpallen jolegjitime.

Anëtarë të Këshillit Kombëtar që kanë konfirmuar pjesëmarrjen në Kuvendin Kombëtar të PD-së më datë 18 dhjetor ku përfshihen deputetët e Kuvendit të Shqipërisë, anëtarët e kryesisë së partisë, si edhe anëtarët e zgjedhur nga Kuvendi Kombëtar i 17 korrikut dhe kryetarët e degëve të PD-së.

Shumica absolute e anëtarëve të Kuvendit Kombëtar, 69% e tyre, ose 5259 anëtarë të Kuvendit Kombëtar, kanë konfirmuar pjesëmarrjen në Kuvendin Kombëtar të PD-së të datës 18 dhjetor.

I hapur për pyetjet tuaja për çështjet që keni interes.

Pyetje: Z.Bardhi ju deklaroni se mbështetja e delegatëve të PD për Kuvendin Kombëtar të datës 18 Dhjetor është 69%. Nga ana tjetër mbështetës të “Foltores”, Sali Berisha deklaron se ka 5 mijë firma të delegatëve të PD. Sa anëtar të Kuvendit Kombëtar ka Partia Demokratike? 

Gazment Bardhi: Ka një dallim dhe një diferencë të madhe midis konfirmimit të pjesëmarrjes dhe pretendimit për ekzistencën apo firmave për thirrjen e Kuvendit Kombëtar. Ju e dini që procesi për thirrjen e Kuvendit ka nisur, nëse nuk gaboj, në javën e dytë të muajit shtator dhe ka vijuar deri në 10 Nëntor. Ndërkohë që procesi i konfirmimeve për pjesëmarrjen, nënkupton se në cilin apo kush është Kuvendi legjitim i një partie. 5259 anëtarët e Kuvendi Kombëtar kanë firmuar pjesëmarrjen, pra nuk kanë kërkuar thirrjen e Kuvendit. Dhe nuk është sekret t’ju them që një pjesë prej anëtarëve të Kuvendit Kombëtar kanë deklaruar gjatë këtij procesi që kanë deklaruar se mund të kenë firmosur për thirrjen e Kuvendit Kombëtar sepse kanë gjykuar se mund të kishte nevojë për Kuvend Kombëtar, mirëpo nuk mbështesin as retorikën përçarëse, as tentativën për përçarjen e Partisë Demokratike dhe kësisoj kanë zgjedhur të marrin pjesë në Kuvendin Kombëtar të demokratëve. 18  Dhjetori është Kuvendi Kombëtar i Partisë Demokratike.

Në total Kuvendi ka 7646 anëtarë, prej të cilëve 5259 kanë konfirmuar pjesëmarrjen në Kuvendin Kombëtar të datës 18 Dhjetor. E për ta vazhduar logjikën, që njëra nuk kundërshton tjetrën, konfirmimi i pjesëmarrjes në datën 18 Dhjetor konfirmon edhe për dikë që ka firmosur për thirrjen e Kuvendit, heqjen dorë nga ajo kërkesë. Sepse kërkesa e tyre nuk ka qenë për të përçarë partinë, siç e finalizoi për fat të keq dr. Berisha gjithë lëvizjen e tij. Duke treguar përpara çdo demokrati që nuk kish pasur as shqetësim dhe as problem për demokracinë e brendshme apo për respektimin e Statuti në PD. I vetmi problem i tij, tashmë i bërë publik, ishte pushteti brenda PD. E mes të shkuarës dhe të ardhmes, anëtarët e Kuvendit Kombëtar të PD kanë zgjedhur të ardhmen e PD, kanë zgjedhur t’i qëndrojnë interesit të demokratëve dhe PD dhe jo interesit personal të z.Sali Berisha.

Pyetje: Z.Bardhi ju thatë se këtu është Kolegji Kryetarëve të PD. Por në fakt nga kontaktet që unë kam patur, disa prej tyre nuk e kanë marrë këtë njoftim. A është ky një ndëshkim që ju po i bëni atyre që kanë dalë hapur se do të shkojnë në Kuvendin e 11 Dhjetorit? 

Gazment Bardhi: Së pari, nëse keni qenë e vëmendshme gjatë fjalës time unë deklarova që 11 kryetare të degëve  të PD nuk kanë pranuar të përfshihen në procesin e organizmit të Kuvendit Kombëtar të PD, të datës 18 Dhjetor. Kanë refuzuar të ushtrojnë përgjegjësitë e tyre në kuadër të këtij procesi.  Dhe sigurisht që nuk mund të jenë pjesë e këtij procesi.

Ky komunikim sot me opinionin publik është pjesë e procesit të organizimit të Kuvendit Kombëtar të datës 18 Dhjetor. Është i nevojshëm për shkak të rrëmujës së madhe të krijuar dhe shifrave, që sikurse iu kam deklaruar që ditën e parë, nuk është çudi që nesër të dalin 110%. Mos u habisni fare nga kjo! Dhe çdo kryetar dege që është angazhuar me përgjegjësinë e tij në raport me demokratët dhe PD është sot këtu në sallë.

11 kryetarët, të cilët nuk kanë pranuar të ushtrojnë përgjegjësinë e tyre, e thash në cilësinë time si Sekretar i Përgjithshëm, ndërkohë që sekretariati i Partisë ka përgatitur një raport të plotë dhe shumë shpejt do të kërkojë thirrjen e Kryesisë së Partisë për të marrë veprimet e mëtejshme në përputhje me Statutin e partisë.

Pyetje: Nga përfaqësues të “Foltores” ka patur deklarata se në 11 Dhjetor do të ngrihet një Komision i Posaçëm për të ngritur pjesën e punimeve të këtij Kuvendi dhe do të përdorë asetet e PD. si do ta mbroni PD, në rast se këto persona do të vijnë në seli dhe do duan të përdorin asetet.  

Gazment Bardhi: Së pari, nuk e kam dëgjuar këtë deklaratë. Së dyti, nuk e kuptoj se çfarë do të thotë ajo deklaratë. Selia e Partisë Demokratike është pronë e Partisë Demokratike, është pronë e demokratëve. Asnjë demokrat nuk është i përjashtuar për të qenë në selinë qendrore të partisë së tij. Nuk keni parë ndonjëherë ju që ne të kemi mbyllur ndonjë derë. Çdo demokrat, çdo anëtari i PD është i ftuar t’i vizitojë selinë qendrore të PD.

Pastaj deklarata të papërgjegjshme të një njeriu, nëse i referoheni zëdhënëses të asaj që ju e quajtët “Foltore”, që flet në emër të demokratëve, ndërkohë që nuk përfaqëson asnjë demokrat, se nuk ka bërë asnjë betejë përkrah këtyre burrave dhe grave, e përpara mijëra demokratëve që këto 8 vite kanë qenë përballë me regjimin e Edi Ramës, nuk mund që as të na tregojë se çfarë të bëjnë demokratët, as t’i mësojë se çfarë do të bëjnë demokratët.

Demokratët i kanë dalë për zot PD edhe në momente të vështira të kaluara më parë. Do t’i dalin për zot PD për të kryer një betejë, një betejë kemi ne. Këta burra dhe gra që kemi këtu në sallë dhe mijëra të tjerë jashtë kësaj salle, përfshi 5259 anëtarët e Kuvendi Kombëtar kanë përballje dhe betejë me Edi Ramën. Dikush tjetër ka vendosur për problemet e tij personale, për interesin e tij personal të ketë betejë me demokratët. Në këtë moment përgjegjësia e jona, e çdo institucioni të PD është të mos vendosë qoftë edhe një demokrat përballë një demokrati tjetër.

Dhe ne kemi bërë gjithçka gjatë gjithë kësaj kohe që kjo të mos ndodhë. Nuk keni dëgjuar kurrë edhe pse jemi provokuar, edhe pse jemi fyer, edhe pse jemi baltosur, edhe pse ndaj nesh shpifet çdo ditë; nuk keni dëgjuar kurrë asnjë prej nesh të anatemojë askënd sa kohë është anëtar i PD.

Në momentin që nuk do të jetë anëtar i PD do të marrë përgjigjen e merituar. Sa kohë është anëtar i PD është përgjegjësia jonë për të mos i fryrë një fryme përçarjeje që ka vetëm një qëllim, të krijojë rrëmujë për interesin personal të një individi.

Pyetje: Përgjatë këtyre dy muajve personat që kanë qenë më në pozitë, besoj kryetarët e degëve e dinë, është që çdo person që mban pozicionin e delegatit të Kuvendit Kombëtar, dy javët e fundit bashkëpunëtorë të z. Berisha në Partinë Demokratike kanë lexuar me mijëra emra të pretenduara si emra të firmosura për mbledhjen e Kuvendit të datës 11, ju pak momente më parë thatë se edhe ju vetë përgjatë procesit të mbledhjes së konfirmimeve të Kuvendit të datës 11, ka patur nga ata delegatë që kanë konfirmuar se kanë firmosur edhe për atë të datës 11 dhe ju thatë se…

Gazment Bardhi: kanë kërkuar thirrjen e Kuvendit Kombëtar pa caktuar datë, e kam thënë edhe më parë.

Pyetje: … dhe ju thatë që çdo delegat që e ka konfirmuar tashmë prezencën në datën 18 ka injoruar Kuvendin e mëparshëm.

Gazment Bardhi: Ky është pohim i tyre, jo i imi.

Pyetje: … ditën e nesërme do të ketë një tubim, e konsideroni ju, pjesa tjetër e konsideron Kuvend Kombëtar. Nëse persona të cilët do të marrin pjesë në atë Kuvend, kryetarët e degëve e dinë se kush janë delegatët e Kuvendit Kombëtar, me emër dhe mbiemër dhe me fytyrën e tyre e cila deri tani nga pala organizatore është konfirmuar se secili prej tyre do të konfirmohet, automatikisht këta persona heqin dorë për thirrjen e Kuvendit më datë 18?

Gazment Bardhi: Së pari, nuk ka kërkesë të tyre për thirrjen e Kuvendit të datës 18, Kuvendi i datës 18 është thirrur nga kryesia e partisë. Konfirmimi për të marrë pjesë nënkupton marrjen pjesë në Kuvend. Unë uk dua të komentoj se çfarë do të ndodhë nesër, sepse në një tubim ndodh gjithçka. Ai që organizon tubimin mund të bëjë çfarë e shikon ai të arsyeshme në atë tubim. Është e drejtë e tij, është përgjedhje e tij. E sigurt është që nesër nuk ka mbledhje të asnjë organi të Partisë Demokratike. E sigurt është që asnjë institucion i PD-së nuk është nesër në tubim. Nuk organizon asnjë tubim. Kur të organizojmë tubim do t’ju vëmë në dijeni detajet se çfarë do të ndodhë në atë tubim. Procesin e vetëfirmos, vetëverifikoj, vetëskanoj, vetëvotoj dhe vetënumëroj, e kam thënë edhe një herë, 31 vite më parë burrat dhe gratë e familjes sonë politike e hodhën poshtë, e rrëzuan.

Pyetje: A keni kërkuar informacione nga krerët e degëve lidhur me ata delegatë të cilët kanë shprehur dëshirën për të qenë pjesë e të dy Kuvendeve, ose tubimit të ditës së nesërme dhe Kuvendit të datës 18. Ndërsa ditën e nesërme do të ketë një tubim që ka parashikuar edhe shkarkimin e kryetarit të Partisë Demokratike z. Basha, po Kuvendi i datës 18 çfarë ka parashikuar? Do të ketë përjashtime atje?

Gazment Bardhi: Nuk kam informacion nga drejtuesit e degëve për konfirmime për pjesëmarrje në dy kuvende. Kam patur konfirmim që disa prej anëtarëve të Kuvendit kanë konfirmuar që kanë firmosur kërkesën për thirrjen e Kuvendit Kombëtar sepse kanë gjykuar që situata në Partinë Demokratike nuk zgjidhjet as me mitingje e as me foltore. Zgjidhet në institucione, dhe do të duhet të zgjidhet në institucione dhe kjo ka qenë arsyeja përse i janë bashkuar kërkesës për thirrjen e Kuvendit Kombëtar. Në momentin që Kryesia e partisë ka miratuar Kuvend Kombëtar, kanë konfirmuar se do të marrin pjesë në Kuvendin Kombëtar të datës 18.

Përsa i përket pyetjes së dytë, nuk ka për të pasur shkarkim të askujt. Sigurisht për z. Berisha, kryetari i Partisë Demokratike është shkarkuar që në 9 shtator, në momentin kur vendosi që përballë interesit personal të doktor Berishës të mbronte interesin e demokratëve dhe interesin e Partisë Demokratike. Në atë moment, Sali Berisha vendosi që për të, Lulzim Basha është i shkarkuar, sepse deri në atë moment e kishte menduar kryetarin e Partisë Demokratike si institucion për të mbrojtur interesin personal të z. Berisha. Momentin që kontatoi që Lulzim Basha është kryetari i Partisë Demokratike, i mandatuar nga demokratët, me përgjegjësinë për të udhëhequr demokratët dhe për të mbrojtur interesin e tyre, sigurisht që mendoi se në atë moment nuk mund të ishte më ai që z. Berisha kishte menduar.

Ka një proçedurë statutore se si mund të kërkohet shkarkimi i kryetarit të partisë.

Sikundër ka një proçedurë statutore se si kërkohet shkarkimi i Sekretarit të Përgjithshëm, i nënkryetarëve të partisë, i kryetarit të Këshillit, të kryetarëve të degëve. Ka proçedurë në Statut. Dhe për ta sqaruar për çdo demokrat që nuk e njeh apo nuk ka rënë rasti për ta njohur aq mirë Statutin e partisë, do të duhet të ketë një mbledhje paraprake të Këshillit Kombëtar, një mocion për shkarkim i miratuar nga shumica e anëtarëve të Këshillit Kombëtar që i nënshtrohet për vendimmarrje mbledhjes së Kuvendit Kombëtar të Partisë Demokratike. As është kërkuar mbledhja e Këshillit Kombëtar, as ka patur një debat për këtë çështje, prandaj nuk mund të ketë kurrë një vendimmarrje të tillë në asnjë Kuvend. Aq më tepër se z. Basha është konfirmuar si kryetar partie tre muaj përpara këtij momenti. E vetmja gjë që ka ndryshuar nga ai moment është se z. Berisha nuk është më anëtar i Grupit Parlamentar të Partisë Demokratike. Vetëm kjo gjë ka ndryshuar, asgjë tjetër.

Pyetje: A mund të na tregoni se cilët janë 11 kryetarët e degëve të cilët kanë refuzuar të marrin pjesë në procesin e konfirmimit për Kuvendin e 18 dhjetorit? Cili do të jetë vendimi që do i propozoni kryesisë së partisë duke qenë se thatë dhe keni mbledhur të dhëna për këta 11 kryetarë degësh dhe do të shkoni me një propozim në kryesinë e partisë. Nëse ne Kuvendin e 18 dhjetorit nga delegatë të PD do të mblidhen firmat e nevojshme për të paraqitur një mocion mosbesimi ndaj kryetarit apo lidershipit aktual të PD, a do të aprovohet një mocion i tillë? Do të hidhet në votim?

Gazment Bardhi: Nuk e kuptova pyetjen e dytë.

Pyetje: Nëse në Kuvendin e 18 dhjetorit disa delegatë të PD do të kërkojnë një mocion mosbesimi ndaj kryetarit Basha dhe lidershipit aktual të PD, a do të aprovohet një kërkesë e tillë? Do të hidhet në votim?

Gazment Bardhi: Mocioni zhvillohet në Këshillin Kombëtar të Partisë Demokratike. Nëse shumica e anëtarëve të Këshillit Kombëtar miratojnë një mocion të tillë i kalohet për votim dhe përfshihet automatikisht si pikë në rendin e ditës. Nuk ka patur asnjë kërkesë të tillë sepse nuk ka patur asnjë arye për të patur një kërkesë të tillë. Përsa i përket raportit që do të prezantoj në kryesinë e Partisë sigurisht që do më lejoni në të drejtën time që fillimisht t’ia prezantoj kryesisë dhe më pas të informoj median mbi këtë raport.

Bëhet fjalë për degën Tropojë, Shijak, Fushë-Krujë, Tirana 1, Tirana 3, Tirana 9, Paskuqan, Devoll, Kolonjë, Vlorë dhe Gjirokastër.

Pyetje: Na ndajnë shumë pak orë nga Kuvendi i 11 dhjetorit që z. Berisha ka thirrur dhe aty do të shohim se sa do të jetë pjesëmarrja reale e delegatëve pasi z. Berisha ka thënë se janë mbi 5 mijë e 200. Nëse rezulton se është një shifër e tillë, do të thotë që shumë prej atyre që kanë konfirmuar se do të jenë edhe në Kuvendin e 18 dhjetorit. Do të marrin pjesë në të dy Kuvendet/ dhe si procedohet në të tilla raste kur delegatët pranojnë të jenë të pranishëm në të dyja Kuvendet që janë thirrur.

Gazment Bardhi: Anëtarët e Kuvendit Kombëtar të Partisë Demokratike 5259 anëtarë të Kuvendit të PD kanë konfirmuar pjesëmarrjen në Kuvendin Kombëtar të datës 18. Nuk ka asnjë Kuvend tjetër të PD-së. Nuk kanë ku të marrin pjesë anëtarët e Kuvendit Kombëtar.

Pyetje: Po ata që janë me kartë delegati?

Gazment Bardhi: Kush është pajisur me kartë sepse nuk i kemi shpërndarë akoma.

Pyetje: Organizimi…

Gazment Bardhi: Cili organizim?

Pyetje: Ju jeni në dijeni që delegatët janë pajisur me një kartë.

Gazment Bardhi: Sikundër ju jeni në dijeni që ka një deklaratë të Sekretarit të Përgjithshëm të Partisë që do të ndjekë çdo hap ligjor për lindo që ka guxuar të falsifikojë dokumenta duke vendosur logon, stemën indentifikuese të Partisë Demokratike pa asnjë autorizim apo vendimmarrje të organeve të PD. Për këtë do të keni informacion shumë shpejt. Flas për individët që për interesa personale keqpërdorin simbolet e PD-së. Nuk fola për anëtarët. Çdo anëtar partie përdor simbolet e partisë në ato raste kur lejohet të përdoren por nuk lëshon dokumenta në emër të ndonjë organi partie. Dokumentat lëshohen vetëm në emër të organeve të partisë.

Dua të bëj një saktësim, në listën që kam lexuar të Këshillit Kombëtar, nuk janë konfirmuar dy emra, më njoftojnë nga sektori i organizimit, z. Alban Daci nuk ka konfirmuar, z. Spiro Vaso nuk kanë konfirmuar. Është lexuar gabim gjatë kohës së kalimit të listës. Pra janë me shënimin, nuk kanë konfirmuar.

Pyetje: Mqse ndaluat tek kjo çështja e moskonfrimimit, unë kam dy emra të tjerë që konfirmojnë për Syri.tv, z. Kreshnik Bozho dhe z. Xhulian Guçe si anëtarë të Këshillit Kombëtar, thonë se nuk kanë firmosur për Kuvendin e datës 18. Na e tregoni dot formularët e këtyre dy përfaqësuesve të Këshillit Kombëtar?

Gazment Bardhi: Një pjesë të anëtarëve të Këshillit Kombëtar janë njoftuar nga Sekretari i Përgjithshëm, ndodhen në zyrën time, ndërkohë që një pjesë tjetër ka konfirmuar pjesëmarrjen në takim me Sekretarin e Përgjithshëm, Kryetarin e Partisë apo me kryetarët e degëve. Emrat që ju përmendi, mqse njërin prej tyre e njoh, ka firmosur dhe formulari ndodhet në zyrën time për 1 minutë jua vendos në dispozicion.

Pyetje: Ju deklaruat që një pjesë e delegatëve ndodhen jashtë vendit. Do të kemi një listë se kush janë këta delegatë për të mos patur keqinterpretime apo falsifikime dhe aludime gjatë kësaj kohe. A keni një listë të deegatëve se kush është jashtë vendit përveç pjesës që do të lexohen emrat e 5259 delegatëve që kanë firmosur për datën 18 dhjetor.

Gazment Bardhi: Ajo që unë thash është se nuk kanë arritur të kontaktohen dhe arsyeja që jepet është se mund të jenë në emigracion. Unë nuk kam marrë të dhënat e TIM-sit se kush ka dalë jashtë dhe kush është në territor. Strukturat e partisë kanë raportuar pamundësinë e një numri të caktuar anëtarësh për t’u kontaktuar për shkak se numri i telefonit të tyre del i fikur dhe nga intersimi që kam bërë pranë strukturave përkatëse, ka rezultuar që janë jashtë vendit. Unë nuk kam marrë dhe nuk kam asnjë të drejtë të jap të dhëna se a ndodhen brenda territorit të Republikës së Shqipërisë dhe kush ndodhet brenda territorit të Republikës së Shqipërisë. Nuk është kjo as e drejta ime, as përgjegjësia ime.

Pyetje: Gjatë kësaj kohe janë lexuar 4890 emra në selinë blu të delegatëve të cilët kanë firmosur për datën 11 dhjetor. Mqse keni drejtuesit e degëve në këtë konferencë për shtyp, shpesh janë ngritur aludime se disa nuk janë delegatë të Kuvendit. A ka ndonjë përfaqësues dege që të hedhë poshtë ndonjë nga emrat që është lexuar dhe nuk është delegat?

Gazment Bardhi: Po sigurisht. Kam një raport të plotë edhe pse të pakërkuar nga kryetarët e degëve, jo vetëm për emra që janë lexuar tek shkallët apo në rrugë që nuk janë anëtarë të Kuvendit Kombëtar, jo vetëm për deklarime me zë dhe figurë të disa prej emrave që janë lexuar që deklarojnë se nuk kanë firmosur, pra nuk i ka pyetur askush dhe dikush tjetër ka firmosur në emër të tyre. Një listë të gjatë të personave që nuk ndodhen fare në territorin e Republikës së Shqipërisë dhe deklarohen sikur kanë firmosur, por për shkak të rrëmujës së madhe që kjo krijon dhe për shkak se kjo do të na kthente në sytë e opinionit publik jo si një parti që synon të marrë drejtimin e vendit, por si një celulë ilegale, kam porositur çdo kryetar dege që të mos bëjë publike të dhëna të tilla sepse kjo do të dëmtonte në mënyrë të parikuperueshme imazhin e Partisë Demokratike në sytë e opinionit publik. Por mund të konfirmoj që një numër i konsiderueshëm, sipas raportimeve të verifikuara, nuk janë anëtarë të Kuvendit Kombëtar të PD-së.

Pyetje: Z. Berisha pak më herët në një deklaratë për mediat i bëri ftesë kryedemokratit Lulzim Basha por edhe të gjithë deputetëve të PD-së që të merrnin pjesë në Kuvendin e 11 dhjetorit apo në tubimin që ju e quani të 11 dhjetori. A do të jeni ju pjesë e këtij Kuvendi, apo këtij tubimi?

Gazment Bardhi: Nuk e kam ndjekur deklaratën e z. Berisha. Konfirmoj pjesëmarrjen time në Kuvendin Kombëtar të PD-së të datës 18 dhjetor, ora 11.00 në Pallatin e Kongreseve. Ftoj edhe z. Berisha të jetë aty prezent të parashtrojë çështje që mendon se do të duhet të diskutohen mes demokratëve. E kam përgjegjësi statutore ta ftoj si anëtar i Këshillit Kombëtar të Partisë Demokratike.

Pyetje: Jemi të qartë për rendin e ditës së 11 dhjetorit. Po ashtu, edhe për Kuvendin e 18 dhjetorit. Nuk jemi shumë të qartë se çfarë do të ndodhë më 12 dhjetor. A keni një strategji konkrete në rast se mbështetës të z. Berisha do të vinin dhe do të protestonin përpara selisë blu për largimin e z. Basha duke u mbështetur në vendimet që do të merren me 11 dhjetor?

Gazment Bardhi: Unë nuk parashikoj dot se çfarë ka në mendje z. Berisha. E sigurt është që institucionet e partisë do të jenë 24 orë në 24 në punë në mbrojtje të interesit të Partisë Demokratike dhe në mbrojtje të interesit të demokratëve.

Për t’iu kthyer pyetjes së Syri.tv, në funksion të transparencës. Ky është formulari (tregon formulatin) i z. Xhulian Guçe. Një kopje mund t’jua vendosim në dispozicion televizionit tuaj për të bërë verifikimet e mëtejshme në transparencë të plotë të informimit të demokratëve dhe qytetarëve shqiptarë.

Ju falemnderit.

Ishte kënaqësi e veçantë të mirëpres sot në ditën ndërkombëtare të Luftës Kundër Korrupsionit, përfaqësuesin e Lartë të shteteve të Bashkuara të Amerikës zotin Escobar. Lufta kundër korrupsionit është përcaktuar si një interes kombëtar i Shteteve të Bashkuara të Amerikës, është edhe më shumë interes Kombëtar i Shqipërisë. Është ajo për të cilën Partia Demokratike, ka luftuar dhe është përpjekur më shumë se gjithçka tjetër në këto 8 vite. Që nga iniciativat tona për dekriminalizimin e politikës, tek miratimi i ndryshimeve kushtetuese për Reformën në Drejtësi sipas përcaktimeve të Venecias, me insistimin e Partisë Demokratike, tek ligji për SPAK-un dhe BKH-në, po kështu të miratuara me iniciativën dhe ndryshimet Kushtetuese dhe ligjore të Partisë Demokratike dhe mbështetjen amerikane, tek iniciativa jonë për Vettingun e politikanëve për të pastruar politikën nga krimi i organizuar, të gjitha këto dëshmojnë se Partia Demokratike ka qenë, është dhe mbetet e vendosur në luftën kundër korrupsionit, që është kyçi për zgjidhjen e gjithë problemeve që ka Shqipëria sot. Nga demokracia e plagosur rëndë nga masakra zgjedhore e 25 prillit, tek sundimi i ligjit dhe dhënia fund të pandëshkueshmërisë dhe siç e kemi parë tashmë me një hap të shpallur, siç është ai i sanksioneve siç edhe ai ndaj individëve dhe kompanive që mbështesin politikanët e korruptuar në Kosovë, edhe sa i përket pra midis politikanëve të korruptuar, oligarkëve dhe krimit të organizuar.
Prioritetet e Partisë Demokratike kanë qenë këto, betejat e Partisë Demokratike kanë qenë këto dhe është kënaqësi e jashtëzakonshme që të shohim një rikthim të fuqishëm si prioritet të parë dhe kryesor të Shteteve të Bashkuara të Amerikës në Ballkan dhe në Shqipëri, të një beteje që e kemi luftuar për vite me radhë. Me zotin Escobar, diskutuam për të gjitha çështjet e aktualitetit politik shqiptarë, natyrisht edhe për situatën në rajon, me theks të veçantë, sigurisht për ato çështje që kanë të bëjnë me të drejtat e shqiptarëve dhe në veçanti me Kosovën. Ku ia bëra të qartë zotit Escobar, qëndrimin e Partisë Demokratike për pacenueshmërinë e integritetit territorial të Kosovës. Në përputhje me përkushtimet e ndërmarra sipas paketës Ahtisari që çojnë në pavarësinë e Kosovës dhe në përputhje me angazhimet që të gjithë shtetet që e kanë njohur Kosovën kanë në raport me integritetin territorial të saj. Jam i kënaqur t’iu raportoj se në këtë qëndrim që paraqita kam marrë mbështetjen dhe mirëkuptimin e plotë të zotit Escobar.
Diskutuam padiskutim edhe për ecjen përpara të Shqipërisë në rrugën e reformave ku kyç mbetet një drejtësi e pavarur që nuk i mbron, por i ndëshkon politikanët e korruptuar. Natyrisht ku e dini që këtu Partia Demokratike ka disa iniciativa kushtetuese dhe ligjore duke përfshirë vettingun e politikanëve dhe shumë shpejt ashpërsimin e dënimit të politikanëve të zgjedhur me votat e krimit si një hap i parë për rikthimin e legjitimitetit dhe demokracisë përmes zgjedhjeve të lira dhe të ndershme në Shqipëri.

Pyetje: Patët një diskutim për shpalljen e zotit Berisha “non grata” në SHBA dhe në rast se zoti Escobar ka prova dhe do t’i paraqesi ato për institucionet e drejtësisë?

Lulzim Basha: Padiskutim që çështja e pandëshkueshmërisë sikundër politikat e sanksioneve “non grata”, ishin pjesë e diskutimit ndërsa sa i përket çështjeve që i takojnë vendimeve të Departamentit të Shtetit jam i bindur që do të keni mundësinë të dëgjoni drejtpërsëdrejti nga Escobar qëndrimet e Departamentit Amerikan të Shtetit?

Pyetje: Keni planifikuar ndonjë udhëtim në Ëashington duke qenë se e morët ftesën?
Lulzim Basha: Është një ftesë e përsëritur dhe e mirëpres me kënaqësi dhe padiksutim po planifikoj një vizitë në Ëashington në mënyrë që të shtyjmë përpara jo vetëm objektivat politike të Partisë Demokratike, por atë që është sot agjenda e çdo familje shqiptare, dalja nga kjo gjendje pezullie, dëshpërimi, plogështie që ka shkaktuar 25 prilli dhe ecjen përpara të Shqipërisë me reformat politike, me zgjedhje të lira dhe të ndershme dhe me procesin e integrimit europian të Shqipërisë që garancitë janë spirancat e mirëqenies ekonomike dhe punësimit. Dy objektivave kryesore të shqiptarëve, dy objektivave kryesore të Partisë Demokratike.
Ju faleminderit!

https://youtu.be/Gkm1RZbAcbM

REAGIM I PËRBASHKËT I NËNKRYETARËVE DHE SEKRETARIT TË PËRGJITHSHËM TË PARTISË DEMOKRATIKE

Prej disa ditëve, për shkak të qëndrimit tonë në mbrojtje të demokratëve dhe interesit të Partisë Demokratike, z. Sali Berisha ka nisur një fushatë të padenjë sulmesh ndaj Nënkryetarëve dhe Sekretarit të Përgjithshëm të PD. Me keqardhje, përsëritet kërkesa që ne duhet të braktisim Partinë Demokratike dhe demokratët, dhe të bëhemi bashkë me Sali Berishën kundër partisë.

Secili prej nesh është i vendosur të refuzojë shkeljen e Statutit për interesa personale të Sali Berishës dhe izolimin e Partisë Demokratike. Kërkesa e z. Berisha nuk ka asnjë lidhje me PD, asnjë lidhje me standartet demokratike, asnjë lidhje me hallet dhe problemet e demokratëve. Demokratët kanë 8 vite që përballen me dhunën dhe terrorin e Edi Ramës, me krimin dhe bandat e tij dhe nuk janë sprapsur as kthyer nga rruga për t’i shërbyer Shqipërisë dhe shqiptarëve. Ne e kemi për detyrë të jemi krah tyre.

Asnjë intimidim nuk do të ndikojë në qëndrimin tonë në krah të demokratëve, për një parti që u shërben atyre dhe jo që kthehet në mburojë të interesave personale të Sali Berishës, aleatëve të tij dhe cilitdo tjetër.