Blog

• Refuzimi i KAS për marrjen e provave edhe në Vlorë. Ivi Kaso: Po mbulohen provat që faktojnë shkeljen e ligjit gjatë zgjedhjeve në favor të PS.

DEKLARATË E SEKRETARIT PËR ÇËSHTJET ZGJEDHORE, IVI KASO

Sapo ka përfunduar shqyrtimi i kërkesës tonë për pavlefshmëri të procesit zgjedhor në Qarkun e Vlorës dhe përsëri për të tretën herë radhazi, KAS me shumicë votash, ka refuzuar kërkesën tonë për marrjen e provave, të cilat Partia Demokratike ka kërkuar dhe gjenden në disponibilitetin e institucioneve të ndryshme shtetërore.

Provat e kërkuara nga ana jonë janë prova thelbësore për të provuar masakrën zgjedhore të 25 prillit sepse faktojnë dhe dëshmojnë çdo aspekt të sjelljes së institucioneve në këtë proces zgjedhor. Sjellje e cila sipas të gjitha evidencave  që disponojmë ka qenë tërësisht në kundërshtim me ligjin dhe në shkelje flagrante dhe të vetë vendimmarrjeve të vetë KQZ-së.

Ky refuzim që iu bë sot kërkesës tonë për marrjen e provave nga ana e KAS është më e domosdoshëm dhe më e nevojshme se kurrë, për të zbuluar dimensionin e plotë të asaj qe ne me plot gojën e kemi quajtur masakër zgjedhore në zgjedhjet e 25 prillit.

Pasi për shkak të provave të tjera që po merren në këtë proces apo të kërkuara nga opozita, apo të marra me iniciativë të dy anëtarëve të KAS, ditë pas dite po dëshmohen parregullsi dhe shkelje të ligjit që e kanë karakterizuar këtë proces.

Prandaj kërkesa dhe nevoja për administrimin e të gjitha provave dhe veçanërisht të sjelljes së institucioneve në zgjedhjet e datës 25 prill, sot është ulëritëse dhe heshtja e KAS-it për marrjen e tyre. Refuzimi i vendosur i  KAS-it është një shkelje e çdo standardi zgjedhor e cila shkon në drejtim të kundërt me atë që është interesi i qytetarëve shqiptarë sot.

Interesi i qytetarëve shqiptarë sot është një dhe i qartë, që të kenë transparencë të plotë për atë që ka ndodhur në procesin zgjedhor të datës 25 prill.

Çdo veprim i KAS për të hedhur poshtë kërkesat tona të përsëritura për marrjen e këtyre provave thelbësore dhe të domosdoshme, shkon në drejtim të kundërt me transparencën, shkon në drejtim të kundërt me interesin e qytetarëve shqiptarë për të mësuar se vërtetë çfarë ka ndodhur në procesin zgjedhor, të cilin jemi duke lënë pas.

Aq më tepër sot u vendos një standard i dyfishtë, kur vetë anëtarët e KAS artikuluan nevojën për të kryer hetim të plotë dhe të gjithanshëm të pretendimit të PS lidhur me zgjedhësit të cilët dyshohen që kanë votuar më shumë se një herë dhe po nga ana e tyre me një vendimmarrje konsekuente, për të tretën herë refuzuese nuk është pranuar kërkesa e opozitës për të marrë prova të domosdoshme, të cilat gjenden sot në disponibilitetet të institucioneve shtetërore.

Ne do të vazhdojmë në  rrugën tonë. Ne do të vazhdojmë me kërkesat tona për të shpallur të pavlefshme zgjedhjet në zonat e tjera zgjedhore të cilat i kemi çuar përpara KQZ-së.

Nuk do të rreshtim së bëri publike fakte apo prova të cilat i kemi çuar përpara KQZ-së, nuk do të reshtim së bëri publike faktet dhe provat por edhe ato fillime provash, ose indicie që ne i disponojmë nëpërmjet strukturave tona, por nga ana tjetër do të donim që institucioni që gjykon krimet zgjedhore, të ngrihej në lartësinë e detyrimeve të veta ligjore dhe të administronte çdo provë të cilën ne si opozitë e kemi sot të pamundur ta sigurojmë, ose që na është refuzuar të na vihen në dispozicion, nga institucionet, që qëllim të vetëm sot kanë fshehjen e sjelljes së tyre në kundërshtim flagrant me ligjin që kanë bërë për të përgatitur [procesin zgjedhor të datës 2 prill.

Pyetje: Edhe për qarqet e tjera do të ketë një shqyrtim nga ana e KAS,  a keni besim se do të ndryshojë, apo do të vijojë e njëjta gjë të cilën ju e cilësonin, KAS-in, në kundërshtim me ligjin?

Ivi Kaso: Ne, ashtu siç na është kërkuar dhe na është thënë në seancën e mbledhjeve të KAS-it, që nuk duhet të kemi paragjykim në lidhje me vendimmarrjen e tyre, e fillojmë çdo proces ankimor të shqyrtimit jo vetëm të kërkesave tona, por edhe të kërkesave të subjekteve të tjera, pa asnjë lloj paragjykimi, duke shpresuar gjithmonë që KAS të na provojë që e kemi ne gabim që mund të artikulojmë kërkesa ose qëndrime të cilat mund të jenë paragjykuese në raport me vendimmarrjen e KAS-it, në çdo vendimmarrje shpresojmë që ata të na provojnë që ne e kemi gabim që i paragjykojmë. Siç e keni parë, në mënyrë të vazhdueshme kjo është vendimmarrja e tretë në të njëjtën linjë, del qartë që nuk jemi ne që paragjykojmë KAS-in, por KAS-i është në një linjë të vazhdueshme atë të mosbërjes transparencë mbi aspekte të ndryshme të këtij procesi zgjedhor, të cilat në një mënyrë ose në një tjetër që falë KAS-it, ose institucioneve të tjera, qofshin institucione të shqyrtimit të kërkesave ankimore, qofshin institucione të tjera ligjzbatuese, ka për t’u hedhur dritë e plotë mbi çdo aspekt të shkeljeve të mëdha që kanë karakterizuar dhe masakruar procesin zgjedhor të 25 prillit.

Pyetje: Nesër jepet vendimi për Beratin, a keni pritshmëri nga ana e KAS-it?

Ivi Kaso: ne kemi pritshmëri të ligjshme mbi atë që KAS-i të bëjë atë çka duhet të bëjë përsa i përket kërkesës ankimore  që do të shqyrtohet nesër, pra për rinumërim dhe rivlerësim të votave të caktuara në qarkun e beratit. Jemi të bindur që KAS ka detyrimin të bëjë transparencë, më pas nuk është më çështja jonë, është çështja e vullnetit të qytetarëve i cili gjendet në kutitë e votimit. Nqse vullneti i qytetarëve shkon në drejtim të një subjekti politik ose të një subjekti tjetër, nuk kemi absolutisht asnjë lloj paragjykimi dhe asnjë lloj komenti për këtë, por ajo çka kemi kërkuar që në fillim të këtij procesi dhe vazhdojmë t’i qëndrojmë me forcë, është vullneti i qytetarëve të mos tjetërsohej përpara procesit zgjedhor, të mos tjetërsohej gjatë procesit zgjedhor dhe të mos tjetërsohej në procesin e numërimit dhe të nxjerrjes së rezultatit. Do të kemi mundësi, shpresojmë, në zbatim të detyrimeve që Ligji i njeh institucioneve që shqyrtojnë ankimimet zgjedhore, që të shohim si është vullneti i vërtetë i qytetarëve i cili gjendet në kutitë e votimit dhe më pas kur sovrani të ketë folur, askush nuk do të ketë të drejtë të komentojë.

NJOFTIM I KOMISIONIT ZGJEDHOR TË PARTISË DEMOKRATIKE

Komisioni Zgjedhor i Partisë Demokratike me vendimin nr. 1, datë 17.05.2021 ka vendosur që të caktojë modalitetet për paraqitjen e kandidaturave për Kryetar të Partisë Demokratike.

Sipas pikës 4 të nenit 10 të Statutit të PD, zgjedhja apo caktimi në funksione brenda Partisë bëhet bazuar në:
– kohëzgjatjen e anëtarësimit në parti apo shfaqjes si simpatizant i saj;
– kontributit në fushata elektorale;
– kontributit profesional e politik në parti, si dhe në promovimin e vlerave themelore që udhëheqin PDSH-në;
– aktivizimit në jetën politike e publike të vendit;
– mbrojtjes në vazhdimësi të interesave, vlerave dhe programit të PDSH-së; si dhe
– reputacionit në radhët e anëtarësisë dhe/ose shoqërisë në tërësi.

Çdo kandidat, që plotëson kriteret statutore të mësipërme ka të drejtë të paraqesë kërkesën për konkurim pranë Sekretarisë së Komisionit, në selinë qëndrore të Partisë Demokratike, duke plotësuar Formularin e miratuar me vendim të Komisionit.

Kërkesa për kandidim duhet të paraqitet deri në datën 22 Maj 2021. Formulari gjendet në faqen zyrtare në internet të Partisë Demokratike ose mund të tërhiqet pranë Sekretarisë së Komisionit.

Për çdo informacion shtesë lutem kontaktoni me Sekretarinë e Komisionit në numrin +355 4 22 76 920.

KOMISIONI ZGJEDHOR
SELIA QENDRORE E PARTISË DEMOKRATIKE
Bulevardi Zhan D’Ark , Nr 11, Tiranë

Deklaratë e Partisë Demokratike

Edi Rama është autori i masakrës elektorale dhe tjetërsimit të vullnetit të shqiptarëve për ndryshim. Me qëllim që të largojë vëmendjen ai vazhdon gënjeshtrat, manipulimet dhe diversionet. Vjedhja e zgjedhjeve nga Rama-Doshi-Rakipi e çuan vendin tonë drejt një masakre masive elektorale, ku viktimat janë qytetarët shqiptarë dhe e ardhmja e tyre. Detyra jonë ndaj shqiptarëve është të qëndrojmë të vendosur dhe të luftojmë fort për kthimin e demokracisë në vend. Asnjë diversion nuk do të na ndalë në këtë betejë, duke filluar me shpalosjen e fakteve, provave dhe të dhënave që dëshmojnë pëmasën e plotë të masakrës zgjedhore nga regjimi Rama-Doshi-Rakipi.

–  PD dorezon  në KQZ dosjet voluminoze me fakte që provojnë tjetërsimin e vullnetit tê shqiptarëve dhe vjedhjen më të madhe të zgjedhjeve në Shqipëri.

–  Përfaqësuesit ligjorë të PD: “Është detyra jonë të shpalosim gjithë dëshmitë dhe dokumentet që kemi dhe të vazhdojmë betejën për të vërtetën dhe për qytetarët shqiptarë në të gjitha frontet, mënyrat dhe mundësitë që ekzistojnë.

DEKLARATË E PËRFAQËSUESVE JURIDIKË TË PD, MARINELA ZIU DHE MARASH LOGU, PAS DORËZIMIT TË DOSJES ANKIMORE NË KQZ PËR ZGJEDHJET E 25 PRILLIT

Procesi i 25 prillit ishte nje masaker elktorale e orkestruar dhe zbatuar nga regjimi Rama-Doshi-Rakipi. Viktimat e kesaj masakre elektorale janë shqiptarët dhe familjet e tyre. Detyra e Partisë Demokratike është të qëndrojmë fort dhe të vendosur dhe të luftojmë me të gjitha fuqitë për kthimin e demokracisë në vend.

Sot, ne po dorëzojmë në KQZ qindra prova fakte dhe të dhëna që provojnë tjetërsimin e vullnetit tê shqiptarëve dhe vjedhjen më të madhe të zgjedhjeve në Shqipëri.

Nga blerja e votave dhe presioni ndaj votuesve, tek vjedhja e të dhënave personale të qytetarëve nga partia-shtet dhe përdorimi i tyre për presione kriminale nga sistemi i patronazhisteve te partise shtet.

Nga angazhimi i shtetit dhe administrates, tek tenderat, punesimet, legalizimet dhe pagesat e paligjshme per te blwre vota.

Nga kandidimi i përfaqësuesve të krimit të organizuar tek perdorimi i bandave per te blere vota dhe kercenuar qytetaret nen mbrojtjen dhe mosveprimin e policise dhe prokurorise.

Nga ndryshimet antikushtetuese te Kodit Zgjedhor, tek ndryshimet me urdher politik te fletes se votimit  qe sollen zhvleftesimin e 83 mije votave baraz me afersisht 8 deputete.

Nga pamundesimi i votes se emigranteve tek karantina  për të penguar emigrantet te vijne fizikisht për te votuar.

Siç e pamë gjatë zgjedhjeve, regjimi Rama-Doshi sundon gjithë sistemin shtetëror në vend, dhe e përdor atë për përfitimet e tij politike. Këtu përfshihet edhe KAS i cili vendosi fletën e votimit sipas urdhrit politik të Edi Ramës. Por është detyra jonë të shpalosim gjithë dëshmitë dhe dokumentet që kemi dhe të vazhdojmë betejën për të vërtetën dhe për qytetarët shqiptarë në të gjitha frontet, mënyrat dhe mundësitë që ekzistojnë.

Kjo betëjë nuk ka të bëjë me PD apo me partitë politike, ajo ka të bëjë me të ardhmen tonë, fëmijët tanë, demokracinë tonë. Dhe përfundimi i saj do të jetë i qartë: përmbysja e regjimit Rama-Doshi-Rakipi dhe kthimi i Shqipërisë shqiptarëve.

• Kallëzimi në SPAK për blerjen me 100 euro vota, PD bën publike skemën kriminale të aleancës Rama-Doshi në zonën e Pukës.

• Benet Beci, Tom Doshi, Mark Frroku, kryebashkiaku i Pukës, në krye të listës për blerjen e votave. Kallëzimi u dorëzua që në 16 prill, por SPAK heshti.

DEKLARATË E PARTISË DEMOKRATIKE, ENEKELEJD ALIBEAJ

Zgjedhjet e 25 Prillit nuk ishin të lira, të ndershme dhe demokratike. Në 25 prill ishte finalizimi i ekzekutimit të planit për të qendruar në pushtet përmes blerjes së votave nga aleanca Rama-Doshi.

Partia Demokratike e ka denoncuar këtë plan në organet e drejtësisë përpara zgjedhjeve, por SPAK nuk bëri asgjë për ta ndaluar masakrën e blerjes së votave.

Në 16 prill kemi kallëzuar në Prokurorinë e Posaçme Antikorrupsion krimin elektoral të blerjes së votave në zonën e Pukës nga njerëzit e Edi Ramës dhe vetë Tom Doshi.

Benet Beci, kandidat i Partisë Socialiste në qarkun e Shkodrës, Tom Doshi, kryetar i Partisë Socialdemokrate dhe kandidat në këtë qark, Mark Frroku, ish deputet aleat i Ramës, me rekorde kriminale, Gjon Gjoinaj, Kryetar i Bashkisë Pukë dhe disa nëpunës të tjerë dhe persona privatë kanë vepruar si bashku si një grup i struktuar kriminal për blerjen e votës me 100 euro për person në zonën e Pukës.

Ne kemi vënë në dijeni SPAK se në krye të skemës kriminale qendron Benet Beci, i cili ka angazhuar në zonën e Pukës Mark Frrokun dhe gjithë lidhjet e tij kriminale, të përdorura që nga zgjedhjet e vitit 2013.

SPAK nuk bëri asgjë, megjithëse ishte në dijeni se:

• Në Gjergjan të Pukës, Mark Frroku ka organizuar familjen Luka për blerjen e votave,
• Në Rrapë anëtarë të familjes Lasku,
• Në Qerret administratorin e njësisë Martin Përdedaj,
• Në Qelëz ka angazhuar për blerjen e votave Administratorin e Njësisë, Florin Kolaj, këshilltarin bashkiak Arben Guga dhe shoferin e kryetarit të Bashkisë Pukë, Sokol Frroku.
• Në qytetin e Pukës, ka patur disa pika shpërndarje të parave për blerjen e votës, kryesisht lidhje familjare të Mark Frrokut apo punonjës në pronat e kryebashkiakut të Pukës, Gjon Gjoni.
• Në Fierzë skema kriminale e blerjes së votave është drejtuar nga Benet Beci, në cilësinë e Drejtorit të KESH-it dhe nga Vasil Musliu, Drejtor i Hidrocentralit në Fierzë.
• Në Fushë Arrëz, skema kriminale e blerjes së votave dhe e shpërndarjes së parave organizohet nga vetë Tom Doshi.

Për të gjitha këto informacione SPAK është vënë në dijeni dhe ka heshtur. Nëse do të kishte bërë detyrën, do të kishte zbuluar se pikërisht në këtë zonë, pak orë zgjedhjeve, policia ka kapur në flagrancë një furgon të Partisë Socialiste, që shpërndante para dhe është urdhëruar nga eprorët ta lirojë menjëherë.

Të vërtetat e masakrës elektorale të 25 prillit nuk do të shkojnë dëm. Si përfaqësues të shumicës së shqiptarëve që duan një Shqipëri jo peng të krimit, ne kemi për detyrë të çojmë deri në fund betejën e përbashkët për rikthimin e demokracisë dhe rrëzimin e rregjimit Rama-Doshi-Rakipi.

• PD prezanton faktet dhe bisedën telefonike Rama – Balluku në krye të operacionit kriminal të vjedhjes së zgjedhjeve duke përdorur legalizimet në këmbim të votave.

DEKLARATË E PARTISË DEMOKRATIKE, SEKRETARI I PËRGJITHSHËM, GAZMENT BARDHI

Çdo ditë dalin në pah fakte, prova dhe dëshmi të veprimeve të Ramës/Doshit dhe bandave të tyre për të vjedhur zgjedhjet.

Provat që do të ekspozojmë sot faktojnë masakrën zgjedhore. Ato janë vënë në dispozicion të Prokurorisë prej datës 12 Prill dhe ajo deri në këtë moment nuk ka vepruar.

Kjo që shikoni në ekran është grupi i whatsapp i hapur me urdhër të Belinda Ballukut dhe drejtuar nga Këshilltarja e saj në Kabinetin e Ministrit Laureta Omeri. Përmes këtij personi, Belinda Balluku ekzekuton skemën e blerjes së votave, duke legalizuar banesa në këmbim të votave.

Kjo bisedë në whatsapp fakton se për më shumë se 1 muaj administrate publike është vënë në funksion të blerjes së zgjedhjeve.  Provat tregojnë se si PS jep leje legalizimi në këmbim të votës.

Në këtë bisedë ka detaje të ndërtesave dhe adresave përkatëse për të cilat shtabet elektorale të Partisë Socialiste urdhërojnë legalizimin e menjëhershëm para zgjedhjeve, në këmbim të votës. Aty dalin në pah hartat e banesave, emrat e punonjësve të administratës publike në vënë në shërbim të kësaj skeme kriminale të blerjes së votës, emrat e votuesve, por edhe shumë informacione të tjera.

PD ka bërë kallëzim kundër ministres Balluku dhe stafit të saj për krime elektorale, shpërdorim detyre dhe grup të strukturuar kriminal që prej datës 12 prill 2021.

Prokuroria nuk ka bërë asgjë as për ta ndalur, as për ta parandaluar dhe as për ta ndëshkuar këtë skemë të pastër kriminale të blerjes së votës në këmbim të legalizimit të banesës.

Kjo është një provë flagrante që provon se si Edi Rama dhe Belinda Balluku janë në krye të operacionit kriminal të vjedhjes së zgjedhjeve, duke shkelur ligjin dhe duke përdorur burimet shtetërore për të deformuar vullnetin e qytetarëve dhe rezultatin e zgjedhjeve.

Të gjithë shqiptarët janë të vetëdijshëm se si kanë vepruar Rama-Doshi dhe bandat e pushtetit për të vjedhur dhe blerë rezultatet e zgjedhjeve të 25 prillit. Të tjera fakte dhe të dhëna do të publikohen në ditët në vijim.

Deklaratat sa për të larë gojën se prokurorët duhet të hetojnë krimet zgjedhore nuk mjaftojnë. Sot Prokurori i Përgjithshëm dhe Drejtuesi i SPAK kanë përpara tyre një krim të dyfishtë, atë të vjedhjes së zgjedhjeve dhe atë të mosveprimit të organit të prokurorisë për të parandaluar e ndëshkuar krimet zgjedhore të provuara. Ky rast flagrant është një provë sesa të përkushtuar janë vërtetë këto organe për të përmbushur detyrën e tyre, siç pret opinion publik shqiptar dhe partnerët tanë ndërkombëtarë.

Një gjë është e sigurt. Ne do të luftojmë me gjithë fuqinë dhe besimin e madh që qytetarët na dhanë në këto zgjedhje, që ta rrëzojmë regjimin Rama-Doshi.