Blog

Të dashur bashkëqytetarë!

Sapo përfundova një video-konferencë me Komisionerin për Zgjerimin në Bashkimin Europian, Oliver Varhelyi.

E falenderova atë dhe Bashkimin Europian për shprehjen e vullnetit pozitiv për hapjen e negociatave me Shqipërinë, pas përmbushjes së 15 kushteve. E garantova se opozita, Partia Demokratike dhe unë personalisht, do të bëjmë gjithçka që është në dorën tonë për të kontribuar për plotësimin e këtyre kushteve.

Plotësimi i 15 kushteve dhe zbatimi i reformave të nevojshme për këtë, do të sjellin jo vetëm hapjen e negociatave, por edhe forcimin e shtetit të së drejtës dhe rritjen e mirëqenies ekonomike për çdo familje shqiptare.

Komisionerin dhe Bashkimin Europian i falenderova edhe për ndihmën që i akorduan Shqipërisë për të përballuar pasojat e koronavirusit, dhe i kërkova të shohin çdo mundësi për ta shtuar këtë ndihmë, pasi përveç pamundësisë për plotësimin e nevojave në shëndetësi, Shqipëria është një vend me nivel të lartë varfërie dhe e ka të domosdoshme mbështetjen për familjet në nevojë, për shtresat në nevojë, për biznesin dhe për ekonominë.

I kërkova, po kështu, edhe mundësinë e rialokimit të fondeve brenda instrumentit të paraaderimit, që njihet si IPA, në drejtim të tre prioriteteve kryesore:

1. Mbështetje për shëndetësinë.

2. Mbështetje sociale për njerëzit në nevojë.

3. Mbështetje për biznesin dhe ekonominë shqiptare.

Po kështu i kërkova komisionerit të bëjnë gjithçka për të na ndihmuar edhe me instrumentet e tjera në dispozicion të Bashkimit Europian, si Banka Europiane e Investimeve dhe Banka Europiane për Rindërtim dhe Zhvillim.

Të dashur bashkëqytetarë!

Nuk jemi vetëm.

Pavarësisht ditëve të vështira që po kalojmë, të jeni besimplotë se ditë më të mira do të vijnë për ju, për familjet tuaja dhe për Shqipërinë.

BASHA PËR NEGOCIATAT: ASKUSH NUK MUND TË LUAJË MË ME FJALË. FAKTET JANË MBI TAVOLINË. SHQIPËRIA DUHET TË PLOTËSOJË 15 KUSHTE, QË TË NISË BISEDIMET SI MAQEDONIA

Pyetje: Europa kthen sytë nga Shqipëria kur kufinjtë janë mbyllur , si do ta cilësonit këtë?

Lulzim Basha: Nuk jemi vetëm. Ndryshe nga ç’mund të  pretendohet në moment paniku apo ankthi, Shqipëria nuk është vetëm. Nuk ishte vetëm kur Shtetet e Bashkuara të Amerikës na përfshinë në ndihmën e tyre 100 milionë dollarëshe për vendet e Ballkanit që po dedikon përmes USAID-it dhe nuk është vetëm edhe në këtë moment, kur Bashkimi Europian I ka ndarë plot 50 milionë euro për vendin si pjesë e një pakete e ndihmës për të gjitha vendet e Ballkanit Perëndimor. Ndaj fjalët e para janë fjalë mirënjohjeje për taksapaguesit europianë, të cilët sot ndodhen në situate të ngjashme me ne për sa I përket pandemisë, rrezikut ndaj të cilit janë ekspozuar natyrisht ne kushte shumë më të mira  dhe të favorshme sesa shumica dërrmuese e qytetarëve shqiptarë dhe janë kujtuar përmes qeverive të tyre, përmes Bashkimit Europian të ndajnë në këtë ditë të vështirë para nga paratë e tyre për t’u ardhur në ndihmë vendeve tona, në këtë rast për t’I ardhur në ndihmë Shqipërisë.  Në këtë kuptim dua të them se është një vepër bujarie, por edhe largpamësie se është një ndihmë që alokohet në të njëjtën kohë me atë që po bën qeveria shqiptare pas ato 2-3 javësh kërkesash të shoqërisë, opozitës dhe të miat personalisht. Ndaj thirrja ime është që këto para të administrohen me transparencë, me kujdes dhe të shkojnë aty ku ka më shumë nevojë  dhe të shkojnë sa më shpejt.

Pyetje: Çfarë ndryshon që nga sot me njoftimin e dalë publik për Shqipërinë në raport me familjen e përbashkët europiane?

Lulzim Basha: Ajo që ndryshon është që marrin fund paqartësitë. Për fat të keq për më shumë se tre vite këtu është bërtitur fitore dhe hapje negociatash, kur negociatat nuk ishin hapur. Tanimë askush nuk mund të luajë më me fjalë, faktet janë mbi tavolinë, Bashkimi Europian ka bërë të vetën, vendet anëtare më në fund kanë krijuar mjaftueshëm konsensus për të bërë përpara dhe rruga përpara për dy vendet tona është e qartë. Maqedonisë i është dhënë dritë jeshile dhe do të nisë përgatitja e ngjarjes së parë qe shënon hapjen e negociatave e ashtuquajtura Konferencë Ndërqeveritare. Ajo është hapi i parë formal i nisjes së bisedimeve të një vendi në bllokun e Bashkimit Europian. Që Shqipëria të vijë tek ky hap duhet të plotësojë katër parakushte dhe 11 kushte, ndryshe nga Maqedonia e Veriut, ndryshe nga fqinji ynë. Dhe këtu janë nëntë kushtet e Bundestagut tashmë të njohura për qytetarët shqiptarë, për publikun shqiptar dhe janë shtuar po ashtu disa kushte të tjera, disa parakushte të tjera të cilat kanë të bëjnë me ato probleme të cilat shqiptarët i njohin fare mirë, problemet e demokracisë, të zgjedhjeve, të luftës kundër korrupsionit, të luftës kundër blerjes së votës, të drejtësisë së pavarur, të dhënies fund të kulturës së pandëshkueshmërisë të njerëzve me pushtet, qoftë ky pushtet politik apo pushtet kriminal, apo qoftë edhe ekonomik. Pra një sërë kushtesh plotësimi i të cilave në vetvete do ta bëjë Shqipërinë më të mirë, më të lirë, më të barabartë për të gjithë qytetarët shqiptarë.

BASHA KUNDËR DY STANDERDEVE. KESHILLI I SIGURISË BËHET ONLINE PËR TË RUAJTUR VETEN, RAMA NUK MBYLL FASONERITË DHE CALL CENTERS

Pas shpalljes së fatkeqësisë natyrore, kryeministri duhet të mbyllë menjëherë bizneset me numër te madh të punësuarish në hapësira të mbyllura, si call center, fasoneri, fabrika të panevojshne për funksionin jetik në ekonomi. Nuk kam asnjë mëdyshje për këtë kërkesë. Arsyeja kryesore është se mund të na zhvlerësohet çdo sakrificë tjetër, nëse vazhdojmë të mbajmë në qendrat tona urbane në Tiranë, në Durrës, Lezhë, Shkodër, Fier, Vlorë, Korçë, Elbasan vende me perqendrim të madh njerëzish, kryesisht kryefamiljarë, që mund të qarkullojnë virusin, të kthehen në shtëpi. Nuk ka asnjë alibi, duhet vepruar urgjentisht. Sot, u njoftuam për mbledhjen e Këshillit të sigurisë Kombëtare. Fillimisht u njoftuam se do të nbahej në Pallatin e Brigadave. Më pas, erdhi njoftimi se do të bëhej online, mesa duket si masë paraprake, mdonëse u informova se edhe në Pallatin e Brigadave do të respektoheshin distancat e rekomanduara nga mjekët. Çështja është kur marrin këto masa për veten tonë pse nuk i marrim për ata që punojnë tek fasonët apo tek ata që punojnë në call center. Nuk është puna të ruajmë vetëm kurrizin tonë. Duhen marrë masa për të mbrojtur njerëzit që janë më të ekspozuar. Kjo është thirrja që kam. Jemi të vonuar në këtë drejtim, duhet bërë një orë e më parë.

ÇFARË PËRFITOJNË QYTETARËT NGA SHPALLJA E GJENDJES SË FATKEQËSISË NË TË GJITHË TERRITORIN? BASHA E SHPJEGOI PAK MINUTA PËRPARA MARRJES SË VENDIMIT NGA QEVERIA

Pyetje: Çfarë do të ndryshonte gjendja e fatkeqësisë natyroe?

Lulzim Basha: Do te ndryshonte shumë sepse do të autorizonte qeverinë të përdorte financat, pushtetet, institucionet, policinë, forcat e armatosura, të urdhëronte biznesin, civilët, të ndërmerrnin apo të mos ndërmerrnin veprime të caktuara. Për këtë Shqipëria ka një kuadër ligjor. Prandaj shpallja e fatkeqësisë natyrore, e cila është deri në fund të këtij muaji në fuqi për qarqet e Tiranës, Durrësit dhe Lezhës për shkak të tërmetit të 26-nëntorit, duhet të shpallet pa asnjë vonesë në të gjithë territorin e vendit po kështu. Ka po kështu ka dhe përfitime për qytetarët, përfitime për biznesin, shumë prej atyre bizneseve që fjala bie janë kontraktuale me biznesin e huaj, mund te evokojë gjendjen e jashtëzakonshme, gjendjen e fatkeqësisë natyrore, mund të jetë i mbrojtur nga klauzolat e kontratës së tij, është i mbrojtur në qoftë se thotë që në Shqipëri ka një gjendje të fatkeqësisë natyrore dhe në qoftë se evokon një klauzolë të tillë të cilën mund ta ketë në kontratën e vet, mbrohen financiarisht, nuk dëmtohet financiarisht. Po kështu duhet të kuptojmë se gjithçka që po ndërmerren sot dhe ndihma, ky hapi i parë i ndihmës financiare dhe ndihma tjetër që kërkova sot për të gjithë kategoritë e tjera që janë shumë më shumë njerëz në nevojë nuk janë thjesht dhe vetëm pjesë e humorit dhe moralit apo dëshirës të kësaj qeverie apo cilësdo qeverie që të jetë aty, janë detyrime ligjore, të cilat rrjedhin nga kushtetuta, dhe nga  ligjet e Shqipërisë. Pra dhe vonesa për të shpallur gjendjen e jashtëzakonshme në të gjithë vendin është jo thjeshtë e pakuptueshme por është me kosto të lartë, është e rrezikshme.

Dua që pavarësisht se mungon baza ligjore urdhrat e deritanishëm Uroj dhe shpresoj që kjo bazë ligjore të plotësohet sa më shpejt, dhe sonte nuk lodhem t’i bëj thirrje qeverisë urgjentisht të ndërmarrë aktin që ka paralajmëruar tani e  dy ditë kryeministri që do ta shpallë, nuk ka nevojë ta mbajë mistrerioze se kur do ta shpallë, tani është koha për ta shpallur. Nuk është çështje këtu as luftë nervash as sfide, detyra jonë kjo është që ta kujtojmë qeverinë, veçanërisht në kohë krize, pa asnjë tendencë, të bëjë detyrat për të cilat është aty, për të cilat e ngarkon ligji.

BASHA: NUK KA ASNJË VËSHTIRËSI PËR T’I REALIZUAR KUSHTET E HAPJES SË NEGOCIATAVE. DUHET VULLNET POLITIK

Pyetje: A janë hapur apo nuk janë hapur negociatat?

Lulzim Basha: Një nga aftësitë më të tmerrshme të politikanëve është ta shesin sapunin për djathë. Dhe kjo është padiskutim pjesa më e turpshme e profesionit tonë. Nuk është një sëmundje e kufizuar vetëm në Shqipëri, por për fat të keq në Shqipëri ka marrë përmasa groteske, sepse për fat të keq fjalimin që sapo vutë (Edi Rama për negociaatat) e kemi dëgjuar për 4 vite me rradhë. Unë i bëj thirrje kujtesës së shqiptarëve, madje dhe fizikisht është hapur shpampanja, jo vetëm në kuptimin figurativ. Prandaj është e rëndësishme të heqim dorë nga kjo sjellje, sepse kështu mund të shkosh diku, por jo në Europë. Kështu mund të arrish diçka, por jo integrimin e vendit në një bllok vlerash, parimesh dhe normash, që ju shërbejnë qytetarëve.

Pyetje: Pra 15 kushtet janë kushte të domosdoshme, përndryshe negociatat nuk konsiderohen të hapura?

Lulzim Basha: Unë mendoj se është i tepërt çdo koment i imi nëse ju lexoni të plotë deklaratën e zotit Whadepul apo nëse lexoni pjesë nga deklarata e ministrit të jashtëm holandez, që janë dy prononcimet e para, është e qartë që Shqipëria ka detyra për të kryer para se të hapen negociatat.

Pyetje: Pra nga 5 pyetje në 2016, kemi shkuar në 15 në 2020. A e bën kjo më të vështirë procesin, sepse një pjesë e shqiptarëve sot kanë festuar? Ndërkohë që ne flasim nga 2016-ta deri në 2020-ën, nga 5 kanë shkuar në 15 kushte, kjo e vështirëson, aq më tepër kur kam parasysh zoti Basha, për të plotësuar ato kushte opozita dhe maxhoranca shqiptare kanë precedentë të frikshëm të gjetjes së gjuhës së përbashkët?

Lulzim Basha: Jo, nuk ka asnjë vështirësi për t’i realizuar këto kushte. Kushtet kanë të bëjnë me problemet që ka hasur Shqipëria. P.sh, një nga problemet që nuk përmendem, por është kusht tashmë, është blerja e votave. Votat u blenë në shtator të vitit 2016, u blenë në Dibër dhe pastaj në zgjedhjet e vitit 2017-të. Ky është një problem që BE nuk e kapërdin, nuk mund t’i mbyllë sytë. A mund të zgjidhet ky problem? Patjetër që mund të zgjidhet. Nëqoftëse partia apo partitë që blejnë vota vendosin mos ta bëjnë këtë, vendosin mos të kandidojnë më persona që nuk përfaqësojnë qytetarët, por persona që përfaqësojnë llumin e shoqërisë. Nëqoftëse financimi i partive dhe fushatave bëhet në mënyrë transparente dhe paraja e pisët nuk dikton as parlamentin dhe as qeverinë, as ministrat, as ligjet, atëherë të gjithë qytetarët do të përfitojnë. Po të shikojmë këto, nuk janë kushte postbllok, ku BE po na mban larg me dorë, por janë kushte për të përmirësuar qeverisjen e vendit. Për të përmirësuar vetë shtetin shqiptar dhe aftësinë e shtetit shqiptar për t’i shërbyer qytetarëve. Ndaj në këtë kuptim, duhet të mirëpriten dhe jo të pretendohet se nuk ekzistojnë.

Pyetje: Në fakt ministri Blok, thotë se vendi i tij dëshiron të shikojë gjykime specifike ndaj funksionarëve të lartë para se të japë miratimin për fillimin e negociatave për kapitullin e parë. Në fakt duhet pranuar se jemi në kushte të jashtëzakonshme, sa na shtyn, ku shkon kjo datë?

Lulzim Basha: Padyshim jemi në gjendje të jashtëzakonshme dhe lajmi siç e thatë ju në fillim të emisionit, ka ardhur në kushtet e një gjendje të jashtëzakonshme. Por, një gjë është e qartë, se nëse ka vullnet politik, atëherë secili prej këtyre kushteve mund dhe do të plotësohet. Mos harroni, kur BE nuk na vuri 15, por 150 kushte që të hiqeshin vizat. Shqiptarët mbase e kanë harruar dhe mua më vjen mirë që kanë harruar kohën e radhëve të gjata para kosullatave dhe ambasadave me ditë e me netë dhe pastaj gjysma nuk e merrnin vizën. Kanë harruar se sa shumë na ka kushtuar kjo po kështu në kuptimin e jetevë të humbura, të sakrificave për të kaluar në mënyrë të paligjëshme kufirin. Por ne ia dolëm. Pikërisht 10 vite më parë ia dolëm që shqiptarëve t’u garantonim edhe lëvizjen e lirë, edhe dinjitetin. 150 kushte për t’u përmbushur! Kjo tregon se kur shteti, qeverisja, ka vullnetin, absolutisht Shqipëria ka të gjitha mundësitë për të realizuar kushtet e vënë nga BE.

Pyetje: Zoti Basha shpresojmë që ky COVID që na ra të ketë ndihmuar edhe për të reflektuar lidhur me çfarë ia vlen realisht dhe të përshpejtojë edhe ato vullnete të ngecura në këtë periudhë 30 vjeçare.

Lulzim Basha: Edhe një shembull për ta përmbyllur këtë çështje. Është padyshim fqinji, Maqedonia e Veriut. Para disa vitesh ka pasur disa probleme të ngjashme me tonat. Disa vite më parë edhe në Maqedoni ishin problem zgjedhjet. Ishte problem drejtësia e kapur politikisht. Ishte problem mos ndëshkimi i politikanëve të lartë. Problem korrupsioni dhe krimi. Edhe njëherë, më vjen keq ta them, jo në dimensionet që ka Shqipëria sot. Por tregoi përmes vullnetit politik dhe përmes bashkëpunimit midis forcave politike, diti të kapërcejë këto probleme. Diti të zhvillojë zgjedhje të pakontestuara.

• Shpallje e gjendjes së fatkeqësisë natyrore, mbyllja e bizneseve me prani të madhe shpëton jetë! Koha është tani!

• Detajimi i planit ekonomik dhe një plan i ri për ndihmë të mjaftueshme ekonomike, është jetik!

• Aa më e fuqishme në duart e qytetarëve është vetëizolimi dhe distancimi social. Do t’ia dalim bashkë si një familje e madhe.

DEKLARATË E KRYETARIT TË PARTISË DEMOKRATIKE, LULZIM BASHA

Të dashur bashkëqytetarë!

Kjo javë nis me një rritje të numrit të infektuarve nga koronavirusi dhe për fat të keq edhe rritjen e numrit të viktimave. Dua t’u ofroj ngushëllimet e mia familjeve të viktimave dhe dua të uroj nga zemra të gjithë ata që ndodhen në kushtet e infektimit dhe të shtrimit spitalor, shërim sa më të shpejtë.

Dua ta nis me nje falenderim me gjithësecilin prej jush qytetarë të dashur që respektuat ditën e djeshme rregullat e vetëizolimit, distancimit social dhe karantinës së detyruar nga kjo situatë. Dua po kështu të bëj një thirrje nga zemra të respektoni pikë për pikë udhëzimet e detajuara sot nga Policia e Shtetit për të vazhduar, në mënyrë të disiplinuar distancimin social, si një nga mjetet më të fuqishme për ndalimin dhe ngadalësimin e përhapjes së virozës dhe të efekteve të saj shkatërruese mbi shëndetin e të dashurve, të afërmve, në veçanti, të prindërve tanë dhe të atyre që nuk gëzojnë shëndet të plotë.

Të dashur qytetarë!

Sot, është koha që të gjithë sëbashku të bëjmë çfarë të mundemi! Në duart tona kemi një armë të fuqishme përmes distancimit social, përmes rregullave të distancës, edhe kur detyrohemi të dalim nga shtëpia për të kryer nevojat e domosdoshme të ditës, ne mund dhe do ta ngadalësojmë përhapjen e virusit.

Nga ana tjetër, dua t’i bëj sot thirrje qeverisë të shpallë gjendjen e fatkeqësisë natyrore në të gjithë territorin e Republikës së Shqipërisë. Dua, po kështu, t’i bëj thirrje qeverisë të urdhërojë menjëherë mbylljen e të gjithë bizneseve me dendësi të madhe punonjësish në ambjente të mbyllura, siç janë fasoneritë, call-centers apo të tjera fabrika prodhimi ku afërsia fizike e punonjësve përbën një rrezik të pashmangshëm për transmetimin e virusit dhe për kthimin e tyre në bartës dhe infektues përmes virozës.

Por, nga ana tjetër, jam tërësisht i vetëdijshëm se kjo sakrificë e madhe që ju kërkohet ju ka nevojë për një mbështetje të madhe. Ndaj dua të përsëris përultësisht thirrjen time ndaj qeverisë: Të mos vonojë detajimin e paketës së ndihmës që ka shpallur dhe të bëjë gati një paketë tjetër, sepse kjo është qartësisht e pamjaftueshme. Të gjithë ata që do të detyrohen të qëndrojnë në shtëpi për shkak të mbylljes së biznesit apo për shkak të mbylljes së bizneseve, ku janë punëmarrës, duhet të marrin pagën e mjaftueshme për të vazhduar minimumin jetik në shtëpitë e tyre. Dhe kjo është një përgjegjësi shtetërore. Ndaj thirrja ime është që menjëherë të ndërpritet çdo shpenzim tjetër, të ndërpritet çdo transferim tjetër nga thesari dhe të gjitha paratë e taksapaguesve shqiptarë të shkojnë për shëndetin e shqiptarëve, të shkojnë për nevojat akute ekonomike me të cilat përballet një numër i madhe njerëzish i cili mund dhe do të vijë në rritje.

Të dashur bashkëqytetarë!

Këto janë kohët më të vështira që kemi jetuar në një kohë shumë të gjatë. Por unë kam bindjen e thellë se me të njëjtën forcë që na ka karakterizuar gjatë gjithë historisë tonë, me besimin në Zot dhe me mbështetjen tek njëri-tjetri, do ta kalojmë këtë të keqe të gjithë sëbashku.

Si një familje e madhe, do të mund të krenohemi për jetët që kemi për të shpëtuar, për shembullin që kemi dhënë për fëmijët tanë dhe, mbi të gjitha, për një Shqipëri të nesërme në normalitet, në mirësi, në pozitivitet, edhe më të afruar e më të bashkuar me njëri-tjetrin se para kësaj epidemie.

Ndaj ju lus edhe njëherë, respektoni plotësisht të gjitha rregullat, të qëndroni në shtëpi, të merrni të gjitha masat higjeniko-sanitare. Sikundër e lus qeverinë që, menjëherë, hapat e shpallur t’i detajojë dhe t’i bëjë efektive për t’u ardhur në ndihmë njerëzve në nevojë.

Menjëherë të shpallë gjendjen e emergjencës së fatkeqësisë natyrore në të gjithë territorin e Shqipërisë dhe të urdhërojë menjëherë mbylljen e çdo biznesi me prani të madhe dhe të dendur punonjësish.

Këto janë hapa që shpëtojnë jetë dhe koha për të vepruar është tani.

Ju uroj një javë sa më të lehtë!

Zoti ju bekoftë ju dhe familjet tuaja dhe Zoti e bekoftë Shqipërinë!

Shifrat e të prekurve nga COVID 19 po rriten. Prandaj shtohet nevoja për të ndërmarrë një plan të detajuar masash për parandalimin e përhapjes së shpejtë të virusit.  Pa u bërë tepër vonë duhet vepruar për ti dalë të keqes përpara.

Duhen marrë masa të menjëhershme:

1. Të shpallet gjendja e fatkeqësisë natyrore në të gjithë territorin e Republikës së Shqipërisë. Të mbyllen call centers, fasoneritë dhe sipërmarrjet e tjera me numër të madh punonjësish në një hapësirë të mbyllur që kanë probabilitet të lartë për të përhapur virusin.

2. Të hartohet një plan masash i detajuar dhe me afate të mirëpërcaktuara për mënyrën e operimit të bizneseve që janë të domosdoshme për jetën e qytetarëve.

3. Marrjen e masave të menjëhershme diktuar nga gjendja e jashtëzakonshme për të garantuar kushtet jetike për të gjithë qytetarët që për shkak të pamundësisë për të punuar nuk përballojnë nevojat e përditshme.

Ne duhet të bëjmë gjithçka për ta kaluar me sa më pak dhimbje këtë situatë të vështirë. Qytetarët duhet të vazhdojnë të qëndrojnë në shtëpi ndërsa qeveria duhet t’u japë siguri për të përballuar jetesën e tyre.

BASHA: AKTI NORMATIV PËR PËRBALLIMIN E KRIZËS NUK ËSHTË BËRË PUBLIK AKOMA. QEVERIA PAGUAN 4 NDËRTUES 22 MILION EURO BRENDA DY DITËVE, NDËRSA SHËNDETËSISË I JEP VETËM 25 MILION EURO

Pyetje: Dëgjova dje që nga qeveria “Rama” ka paguar 20 milionë dollarë?

Lulzim Basha: 22 milionë euro janë transferuar para dy ditësh nga thesari i shtetit vetëm për katër kompani duke shkelur të gjitha afatet kohore. Brenda 48 orëve janë bërë faturat, janë konfirmuar faturat, janë bërë pagesat dhe duke përdorur 22 milionë euro cash lekët e shqiptarëve, taksat e shqiptarëve në një kohë kur akoma nuk kemi një buxhet për shëndetësinë.  Është njoftuar  nga z. Rama para dy ditësh që buxheti do të jetë 25 milionë euro, por akoma nuk kemi detaje, akoma nuk kemi një akt formal shtetëror siç është akti normativ apo siç është vendimi perkates per t’i dhene keto para për shëndetësinë. Mjeket, infermieret, stafi shendetesor jane ne kushte jashtezakonisht te veshtira, po perballen dite per dite me numrin ne rritje te infektuarve dhe personave qe po vuajne pasojat e infektimit, janë më të rrezikuarit. Dhe nderkohe kemi dy jave qe kerkojme te vendosin mjaftueshëm fonde per te blere pajisje shëndetësore; per te blere respiratore, ventilatore per pacientet, per te rritur numrin e pajisjeve testuese dhe kiteve testuese. 22 milionë euro të shqiptareve shkojnë ne nje drejtim krejtesisht te panevojshem, shkojne per 4 kompani apo 4 persona dhe ky padyshim eshte nje skandal ku nuk mund te mos terhiqte vemendjen e medias dhe te mos merrte denimin me te madh.

Pyetje: Çfarë pagesash janë?

Lulzim Basha: Këto 4 pagesa jane për 4 kontrata ndërtimi, ndërkohë që ka edhe dhjetëra pagesa të tjera. Por ky nuk është problemi, ose je ne gjendje te jashtëzakonshme ose nuk jemi. Sepse ne qofte se u kërkojmë qytetareve sakrifica te tilla, të rrinë pa punë, të mbyllin bizneset, të qe drojnë larg të dashurve të tyre, te cilat padyshim janë te nevojshme, atyre qe kane me shume, jo vetem nuk u kerkojme asnje sakrifice, por u bëjmë edhe pagesat te majme. Kjo nuk është thjesht padrejtësi, nuk eshte thjesht papërgjegjshmëri, kjo është ne kufijtë e krimit.

Pyetje: A duhej që Edi Rama të bllokonte hyrjen e njerëzve nga Italia në Shqipëri kohë më parë?

Lulzim Basha: Prej 2 shkurtit, kemi bërë thirrje që të merren masa. Për një kohë të gjatë, fjalët tona kanë rënë në vesh të shurdhër. Thirrjet tona nuk janë bërë për një debat të përditshëm politik, por për debatin e diçkaje që shkon përtej politikës së përditshme, ka të bëjë me jetën dhe shëndetin e njerëzve. Sot nuk është koha për t’u marrë “pse nuk u bë në kohë dhe kush e ka përgjegjësinë”. Sot, fokusi i opozitës, PD dhe imja personalisht është të bëjmë ç’të mundemi, çfarë kemi në dorë për të ndihmuar njëri tjetrin, për t’ia dalë mbanë dhe për te kaluar këtë të keqe të madhe.

“ÇFARË DO TË BËNIT NDRYSHE?”, BASHA TREGON 3 PRIORITETET PËR PËRBALLIMIN E KRIZËS. “DUHET SHPALLUR GJENDJA E JASHTËZAKONSHME NË TË GJITHË TERRITORIN”

Pyetje: Çfarë do të bënit ndryshe në qoftë se do të ishit kryeministër sot?

Lulzim Basha: Tre gjëra, e para do të merrja masa urgjente për të mbrojtur shëndetësinë, mjekët infermierët, gjithë punonjësit e shëndetësisë që janë në vijën e parë të mbrojtjes që janë jashtëzakonisht të ekspozuar dhe të rrezikuar. Përqindja e lartë e deklaruar të mjekëve dhe infermierëve të infektuar apo të karantinuar tregon sa të papërgatitur kemi qenë për fat të keq. Njësoj si tërmeti edhe viroza ka zbuluar dobësinë e shtetit shqiptar që është padiskutim diçka e ndodhur jo në disa muaj por në vite me radhë. Pra në këtë kuadër gjëja e parë që do të bëja është do të alokoja mjaftueshëm fonde për të mbrojtur mjekët, infermieret, personelin shëndetësor. Se dyti duke qëndruar tek shëndetësia do të kisha vepruar shumë më shpejt për të blerë respiratorët, për fat të mirë 10 ditë pasi kemi bërë thirrjen tonë dhe dy ditë më parë qeveria ka hapur tenderin për respiratorët prapëseprapë më mirë vonë se kurrë por ende shpresoj që sa më shpejt të kemi kapacitetet të rritura për respiratoret të cilët janë mënyra e vetme e trajtimit intensiv për ata që sëmuren nga virozat.

Së treti dhe jo më pak e rëndësishme, numri I testimeve në Shqipëri është habitshëm  I ulët  në çdo vend tjetër të rajonit dhe prandaj kemi një numër zyrtar të infektuarish që është në vlerësimin e ekspertëve , të grupit të ekspertëve me të cilët jam në komunikim, nuk është numri real. Numri real është më I lartë prandaj për këtë arsye prioriteti I parë dhe kryesor do të ishte investimi tek shëndetësia, në veçanti në këto tre aspekte : mbrojtja e mjekëve dhe infermierëve, rritja e kapaciteteve testuese dhe  rritja e kapaciteteve për të trajtuar ata që përfundojnë në spital.

Ky është prioriteti I parë dhe kryesor. Prioriteti I dytë për fat të keq, kjo gjendje na ka gjetur në të njëjtën situatë si shumicën e vendeve perëndimore, na ka gjetur në një Shqipëri ku  1 në 10 shqiptarë sipas statistikave zyrtare  ushqehet 1 herë në ditë , gjysma e papunësisë është nën nivelin e varfërisë dhe situate po rëndohet për shkak të rrethanave që të imponon kjo pandemi. Biznese që mbyllen,  konsumi që bie, dikush që fitonte një lek diku  me një punë të bardhë apo të zezë nuk e çon dot në shtëpi, fëmijët duan të hanë, faturat duhen paguar. Është urgjente që paratë të cilat kanë shkuar deri  tani në drejtime të tjera të kanalizohen në ndihmë të këtyre njerëzve në nevojë. Pra një buxhet social për të cilin kemi propozuar masa konkrete. Së treti  ky është një zinxhir krisjesh  që është vënë në lëvizje. Ka filluar me virozën , ka goditur dhe po godet shëndetësinë, po godet njerëzit në nevojë, po godet edhe ekonominë. Ndaj prioriteti I tretë do të ishte  ekonomia për të cilën ne kemi paraqitur prej më shumë se 10 ditësh një paketë masash për të ndihmuar ekonominë, për t’i dalë para të keqes, duke përdorur edhe përvojat më të mira  që po shohim dhe dëgjojmë nga Shtetet e Bashkuara të Amerikës, paketën e presidentit Trump që mori  po ashtu edhe mbështetje në Kongres, paketat e tjera të  ndihmës. Natyrisht ne nuk jemi Amerika, nuk jemi Britania, nuk jemi Gjermania, por brenda mundësive tona buxheti ka  mjaftueshëm para nëse qeveria ka  planin, vullnetin, transparencën, mirëmenaxhimin për t’i çuar këto para atje ku duhet. Jo më tek një grusht njerëzish, por te gjithë shqiptarët që  janë në  nevoje dhe ne veçanti tek shëndetësia,, shtresat sociale dhe tek ekonomia me theks biznesin e vogël  dhe fermerët shqiptarë.

Pyetje: Lulzim Basha: Pse nuk veproni në koordinim me qeverinë që të ketë një plan të përbashkët, të koordiniar, siç vepron p.sh Franca? Çfarë ju pengon zoti Basha që të uleni në tavolinë pa shumë pompozotet? Se në fund të fundit, populli do zgjidhje?

Lulzim Basha: Siç e thatë, populli ka nevojë për zgjidhje, jo për fasadë apo për shfaqje. Prandaj, opozita shqiptare ka bërë atë që bën çdo opozitë perëndimore, në Europë apo SHBA. I kemi kërkuar qeverisë të veprojë dhe të veprojë sa më shpejt. Ajo që ka rëndësi është se po e bëjmë punën tonë dhe si rezultat edhe i punës sonë kemi arritur ta shkundim qeverinë të marrë disa masa. U pranua propozimi që njëri nga prindërit që do të qëndrojë në shtëpi me fëmijët, të paguhet. U pranua propozimi për shtyrjen e kësteve të kredive për të paktën 3 muaj. U pranuan plotësisht apo pjesërisht edhe disa propozime të tjera. Kjo është detyra e opozitës. Të sensibilzojë, të kërkojë transparencë, të kërkojë llogari dhe të propozojë. Jemi në shërbim të shqiptarëve pa bërë politikë. Nuk është koha për debate politikë, është koha për të dhënë ndihmën tonë dhe për ta kaluar këtë të keqe sa më shpejt dhe me sa më pak pasoja.

Pyetje: Ju po silleni si një kryeministër në detyrë, por pa mandat zyrtar. A i duhen Shqipërisë këto masa me tanke, kur ka familje që nuk ushqehen dot 1 herë në ditë? Nëse do të ishit në vend të kryeministrit, çfarë do të bënit?

Lulzim Basha: Thirrja ime është e qartë. Ata që kanë më shumë nevojë, duhet të ndihmojnë të parët. Banorët që jetojnë në çadra pas tërmetit janë më të rrezikuarit. Gjëja e parë që do të bëja është që nuk do t’i kisha lënë në çadra. Prapë nuk është vonë për ta bërë një gjë të tillë.  Në lidhje me ushtrinë, përtej aspektit kushtetues, i cili është i rëndësishëm, jam në mbështetje të çdo mase. Kam qenë në mbështetje kohë përpara se të merreshin, sepse pa kufizime, përhapja e virusit bëhet shumë më e lehtë. Kjo do të na kushtontë më shumë. Por këto masa duhet të merren sipas ligjit. Nuk janë në vullnetin dhe në humorin e kryeministrit, kushdo qoftë ai, ky, unë apo ndonjë tjetër. Ndaj, shpallja e gjendjes së jashtëzakonshme në të gjithë territorin e Shqipërisë, në bazë të Kushtetutës dhe ligjeve të Republikës së Shqipërisë dhe pastaj, përdorimi i të gjithë instrumentave, kjo është rruga. Ushtria, patjetër që ka dalë në mbështetje të policisë për të zbatuar rregullat e distancimit social dhe izolimit, por nuk ka pse të dalë me mitroloz. Le të dalë të mbështesë njerëzit në nevojë, të çojë ndihma tek banorët e goditur nga tërmeti, tek më të pamundurit. Dalja me mitroloz duhet t’i kursehet këtij populli, sepse tregon mungesë idesh, aftësish për t’u përballur me krizën.

LLOGARITË E SAKTA, BASHA TREGON KUSH DHE ÇFARË DUHET SAKRIFIKUAR: BUXHETI KA 260 MILIONË EURO PËR TË PËRBALLUAR 3 MUAJ KRIZËN PA DHIMBJE

Pyetje: A ka para buxheti i shtetit? 

Lulzim Basha: Ekspertët tanë kanë bërë një analizë të buxhetit të shtetit 2020 dhe kanë evidentuar një shumë prej 260 milionë eurosh, e cila është menjëherë e rialokueshme. Këto janë 120 milionë euro, të cilat kjo qeveria dhe kryeministri i kanë ndarë për ato 10 oligarkë, 12 kontrata konçesionesh e PPP. Jane afro 140 milionë të tjera të ndara në dy kategori kryesore që janë investime dhe shpenzime operative, shpenzime luksi, karburanti etj. Pra kemi një analizë të buxhetit, kemi të paktën 260 milionë euro, të cilat pa asnjë dhimbje për askënd  në vend që të shkojnë të drejtime në pak njerëz, të shkojnë tek shëndetësia, të shkojnë tek shtresat në nevojë, tek njerëzit e mbetur pa shtëpi nga tërmeti, tek njerëzit pa mundësi ekonomike, tek ata që hanë një herë në ditë, tek 50% e popullsisë që mezi mbyll njëherë muajin dhe natyrisht të shkojnë në ndihmë të biznesit dhe ekonomisë. Nëse kriza sjell një kolaps ekonomik, shqiptarët  masivisht do t’ia ndjejnë këtë, do t’ia ndjejë çdokush pavarësisht prej rrethanave ekonomike do të ndjejë krizën ekonomike. Pra po, kemi bërë një analizë. Kemi të paktën sot në dispozicion, në qoftë se ka mirë menaxhim, nëse ka transparencë, në qoftë se ka me te vërtetë një vullnet për t’i shërbyer gjithë shqiptarëve jo vetëm një grushti shqiptarësh, 260 milionë euro janë sot ne dispozicion të qeverisë për të marrë masa.

Pyetje: Për sa kohë mund të dalin ato?

Lulzim Basha: Në vlerësimin tonë kjo masë do të ishte e mjaftueshme për të menaxhuar të paktën 3 muajt e ardhshëm në të tre frontet, edhe në frontin e shëndetësisë, edhe ne frontin e ndihmave për njerëzit në pamundësi dhe në nevojë edhe në frontin e injeksioneve për ekonominë, frymëmarrjes për ekonominë.

DEKLARATË E PARTISË DEMOKRATIKE TË SHQIPËRISË

Sot Edi Rama ka shpërndarë një gënjeshtër të rrezikshme për t’i trembur edhe më shumë qytetarët e Shqipërisë. Video e shpërndarë nga Edi Rama në profilin e tij zyrtar në facebook është mashtrim, sepse ajo është shkëputur nga një protestë antiqeveritare në Algjeri dhe jo nga situata e virusit në Spanjë.

Në Spanjë situata është e rënduar, por një shtet demokratik i Bashkimit Europian nuk vepron kurrë me dhunë ndaj shtetasve të vet, siç gënjen dhe mashtron Edi Rama.  Ai është sot burimi kryesor i panikut dhe pasigurisë në Shqipëri.

I gjendur i papërgatitur, pa ide dhe në majë të një qeverie të kalbur nga skandalet dhe korrupsioni, ai ka dështuar të qetësojë dhe të kompensojë njerëzit, si dhe të menaxhojë një karantinë të efektshme.

Paradite detyron qytetarët të dynden në dyqane, në drekë i terrorizon me video nga protestat antiqeveritare kundër regjimit autoritar në Algjeri, duke e shitur atë si dhunë që ndodh rëndom në Bashkimin Europian. Kjo është papërgjegjshmëri.

Partia Demokratike i bën thirrje Edi Ramës të dalë nga shtëpia dhe të bëjë detyrën, t’u japë fund mesazheve që përhapin panik tek qytetarët dhe të përqendrojë të gjithë vëmendjen e tij tek detyrat e Qeverisë për të parandaluar përhapjen e virusit dhe për të zgjidhur krizën social-ekonomike që ka krijuar situata.

Partia Demokratike i bën edhe njëherë apel të fortë çdo qytetari të ndjekin me seriozitet dhe përgjegjshmëri masat e kufizimit të lëvizjes dhe distancimit social. Zbatimi rigoroz i këtyre masave është me rëndësi JETIKE për të mbrojtur veten dhe njerëzit tanë më të dashur.

BASHA THIRRJE QYTETARËVE: QËNDRONI NË SHTËPI. NUK KA DILEMA, E KEQJA MUND TË NDALET VETËM NËSE NE TË GJITHË JAPIM KONTRIBUTIN TONË DUKE RESPEKTUAR MASAT SHTRËNGUESE

Së pari dua t’u drejtohem gjithsecilit që na ndjek sot dhe ti bej një thirrje edhe si qytetar edhe si familjar, edhe si kryetar i Partisë Demokratike, kreu i opozitës që të vazhdojnë të zbatojnë masat rigoroze të distancimit social. Jam shumë i shqetësuar në informacionet që kam marrë sot, të dokumentuara edhe me foto, të dendësisë së njerëzve, kryesisht në Tiranë, çfarë është një thyerje totale e rregullave elementare të OBSH-së, është jashtëzakonisht e rrezikshme, për shëndetin, për jetën. Është një nga format më të sigurta të përhapjes së virusit dhe vjen në një moment ku bashkohen dy gjëra: Bashkohet një 7-ditësh i mundimshëm për shumë shqiptarë I cili ndoshta për një moment është bërë tepër i mundimshëm dhe ata kanë vendosur, shumë prej tyre kanë vendosur disa prej rregullave, po bashkohet po ashtu me momentin e fundit të inkubacionit  për ata që besohen se  janë të infektuarit e parë  që kanë hyrë në Shqipëri . Prandaj nuk duhet të kemi absolutisht asnjë dilemë. E keqja mund të ndalet vetëm nëse ne të gjithë japim kontributin tonë dhe kontributi i qytetarëve, kontributi i gjithsecilit prej nesh për të mbrojtur shëndetin tonë në radhë të parë, shëndetin e familjarëve tanë dhe shëndetin e prindërve tanë, me të moshuarve dhe njerëzve të sëmurë është që ne të zbatojmë në mënyrë rigoroze rregullat e distancimin social. Natyrisht këto nuk janë rregulla normale. Ne kemi kërkuar që këto masa të merreshin shumë më herët, por nuk është momenti që të merremi me përgjegjësinë përse nuk u morën me herët, tani është momenti për t’i zbatuar këto rregulla.

BASHA: TË SHPALLET EMERGJENCA KOMBËTARE. QEVERIA TË DETYROHET ME LIGJ TË NDIHMOJË QYTETARËT DHE BIZNESET. BUXHETI KA PARA. KA PAGUAR 22 MILIONË EURO NË NJË DITË PËR 4 OLIGARKË

Duhet urgjentisht shpallja e emergjencës kombëtare e cila, nga njëra anë qartëson detyrimet e qytetarëve, por qartëson dhe detyrimet e shtetit. Se në një gjendje të tillë edhe shteti ka detyrimet e veta ndaj qytetarëve. Nuk është me çështje pastaj morali i qeveritar apo aftësia qeveritare. Është çështje detyrimi ligjor për t’u përgjigjur qytetarëve

Thirrja ime sot është të ketë transparencë, të ketë detajim.  Ore ne themi për një moment që e ka ky mirë dhe e kemi ne gabim. Shumë mirë, do ta duartrokas, do ta përshëndes. Do ta falënderoj në emër të Partisë Demokratike, në emër të gjithë opozitës, por duhet të jetë e qartë çfarë  duhet të presë çdo qytetar, çfarë duhet të presin njerëzit që janë të papunë, çfarë do të presin ata që janë në pamundësi për të dalë në punë dhe nuk marrin dot rrogën. U tha që do të merrni rrogë. Si do merret rroga? Pra është  detyrë e qeverisë në këto moment të veprojë  shpejt, të veprojë qartë, të veprojë me transparencë. Detaji, qartësia një dhe e dyta nuk ka mjaftueshëm fonde, nuk ka mjaftueshëm fonde  në planin që ka shpallur dje kryeministri dhe mundësitë e buxhetit janë. Buxheti ka para, buxheti ka para, por duhet të ketë  një plan të qartë për t’i vendosur këto para  në shërbim të njerëzve  sepse një media ka publikuar dhe  pas saj shumë të tjera se vetëm dje  22 milionë euro janë paguar nga buxheti për katër kompani.  Në kulmin  e koronavirusit, epidemisë paguajnë 22 milionë euro. Tani ta vendosim pak këtë në perspektivë.  Ndan 25 mln euro për shëndetësinë në total në mes të kësaj dhe, papritur për 48 orë janë bërë faturat. Do të thotë që atyre u është thënë hajde bëjeni shpejt sepse pas kësaj s’do të ketë me lekë. Domethënë ti favorizon katër klientë të tutë dhe u jep të njëjtën shumë që i jep shëndetësisë të gjithë shqiptarëve.

Janë 4 kontrata. Ka para, nuk po them që kemi mundësitë e Italisë, Gjermanisë, Francës apo të Anglisë, por kemi mjaftueshëm mundësi për të financuar plotësisht 3 prioritet kryesore. Prioriteti i parë dhe më kryesori që mbetet i nënfinacuar, është shëndetësia. Do të të lexoja mesazhet e mjekëve që kam në telefon, por nuk jam unë ai që përdor tonet e panikut për t’i futur frikën njerëzve, fakti është që mjekët janë në ditën e tyre më të vështirë. Nuk kanë mjaftueshëm pajisje mjekësore. Po bëjnë një punë të jashtëzakonshme. Nuk kanë mjaftueshëm pajisje mbrojtëse në radhë të parë dhe në radhë të dytë nuk kanë pajisje testuese. Ne jemi në një krizë për to. Duhet urgjentisht të merren masa. Kemi kaq ditë që e kërkojmë. Për fat të mirë, dy ditë më parë u hap më në fund tenderi për aparatet respiratore. Nuk dihet pse duhej hapur vetëm para dy ditësh, por të paktën u hap dhe e përshendeta, por tani është momenti për të siguruar mjetet mbrojtëse dhe pajisje testuese. Dje I dërgova një letër edhe rezidentit të OBSH-së në Tiranë, duke kërkuar që të bëjë gjithçka për të na mbështetur në këtë fushë. Tani është shumë më e vështirë sesa në kohë normale, por po të kërkosh, gjen. Thirrja ime për qeverinë është të mos humbasë asnjë minutë kohë për t’u siguruar mjekëve këto pajisje. Nuk mund të paguash 22 milionë euro dy ditë përpara dhe t’i japësh 25 milionë euro shëndetësisë në këtë ditë. Ato 22 milionë euro duhet të kishin shkuar të gjitha për shëndetësinë për mjekët apo duhet t’u kishin shkuar për ndihmë familjeve në nevojë, apo për masat që duhen marrë që ekonomia të mos bjerë.

“PO TË ISHE KRYEMINISTËR?”, BASHA TREGON FATURËN MUJORE TË PAKETËS SË PD NË NDIHMË TË QYTETARËVE DHE BIZNESIT. PLANI I QEVERISË NUK KA QARTËSI, ËSHTË I PAMJAFTUESHËM

 Ftesa ime është transparencë maksimale. Për planin e shpalosur dje, duhet transparencë maksimale, sepse sot askush nuk mund të thotë me siguri se çfarë është ky plan. Nuk është i detajuar, informacioni është i mangët. P.sh nëse bëhet fjalë për një biznes të vogël nga ato dhjetra mijëra që kanë më shumë se një javë që janë mbyllur, askush prej tyre nuk e ka idenë se çfarë do të thotë 65 milion dollarë pako sociale për biznesin e vogël. Çfarë do të thotë kjo për pronarët e një biznesit të vogël? Çfarë do të thotë dy javë, tre javë apo katër javë, gjashtë javë në vazhdim të karantinës, nuk do të jenë në gjendje të gjenerojnë xhiro, të gjenerojnë fitim, me çfarë do të jetojnë? Ndërkohë ka ardhur marsi dhe duhet paguar taksat! Kemi kërkuar prej fillimit shtyrjen e detyrimeve, deklarimit të detyrimive.

Pyetje: Por ai tha se do të paguhen detyrimet?

Lulzim Basha: Po çfarë detyrimesh do të paguash kur ti ke mbyllur biznesin?! Pse nuk mund të shtyhet dy javë, katër javë, deklarimi që është tani në mars për t’i dhënë edhe biznesit pak më shumë frymëmarrje?

Pyetje: Ti që je kryeministri në hije, kryeministri i ardhshëm i Shqipërisë, a e keni bërë kalkulimin sa është shifra e pakos tuaj?

Lulzim Basha: Absolutisht është e kalkuluar në detaje. Çfarë është paketa jonë? Le ti marrin një nga një temat. Nëse marrim temën e biznesit të vogël, do të thotë që për një numër biznesi të vogël, në skenarin kur janë 95 përqind e tyre të mbyllur dhe vetëm 5 përqind prej tyre operojnë, kostoja nuk kalon 25 milion euro në muaj. Dhe kjo duke marrë 300 euro për biznes, pra kompensimi 300 euro për biznes. Ndërsa në paketën që ka propozuar dje kryeministri, ne nuk e dimë se çfarë propozohet për një biznes? Çfarë propozohet për pensionistët? Çfarë propozohet për njerëzit në nevojë ekonomike? Çfarë propozohet për shëndetësinë? 25 milion euro a janë të mjaftueshme për të realizuar çka na duhet sot? Respiratorët, pra ventilatorët, testuesit, pajisjet mbrojtëse për mjekët, pavijonë shtesë që vihen në dispozicion?

Pyetje: Çfarë mundësish ka shteti shqiptar, me këtë buxhet që ka, të japë kaq lekë apo kaq lekë? Prandaj pyeta sa është totali?

Lulzim Basha: Ne e kemi bërë propozimin bazuar në nevojat akute të ekonomisë. Plani i nxjerrjes së ekonomisë afatgjatë është diçka tjetër. Nevojat akute sot, çfarë kanë nevojë akute familjet në nevojë? Çfarë kanë nevojë shtresat sociale? Çfarë ka nevojë biznesi i vogël? Çfarë kanë nevojë bizneset që do të mbyllen? Pra, nevojat minimale për të mos i futur në kolaps. Po u futën në kolaps, humbin gjithçka. Pako totale kushton 90 milion euro në muaj.

Pyetje: Po të ishe kryeministër, se je kryeministri në hije…

Lulzim Basha: 1 në 10 shqiptarë ha një herë në ditë gjysma e shqiptarëve nuk mbyllin dot muajin, faturat e energjisë, faturat e ujit ishin të larta edhe pa nisur kriza. Tani ka nisur kriza. Gjendja e tyre po precipiton, kësaj po i shtohet me shpejtësi 2 ushtri, ushtria e sipërmarrësve të vegjël që i kanë mbyllur dyqanet. Ushtria tjetër e të punësuarve që nuk shkojnë dot në punë dhe nuk kanë garanci që do të marrin rrogën, sepse një pjesë e bizneseve nuk do të jenë në gjendje të paguajnë rrogën. Kjo është sfida ekonomike. Paketa jonë jep këtë zgjidhje. Kjo është një zgjidhje emergjence. Dhe për këtë duhen kanalizuar shpënzimet për mbështetje sociale, ekonomike, të shëndetësisë, që sot po i çon, siç i çoi dje 22 milionë euro për 4 njerëz. Ky është propozimi ynë, është plotësisht i mundshëm, është i llogaritur. Në strukturën e buxhetit 2020 janë gjetur ku janë këto para. Asgjë që kemi propozuar nuk është e pazbatueshme. Po të isha kryeministër, sot do të kishim aktin normativ. Do të kishte hyrë në fuqi, do të kishte nisur efektet dhe do të kishte një masë lehtësuese, një frymëmarrje për ekonominë dhe një farë sigurie minimale për njerëzit që tani po nisin të përjetojnë edhe shtrëngesën ekonomike dhe sociale.

Kryetari i opozitës, Lulzim Basha, i kërkoi ndihmë për Shqipërinë Organizatës Botërore të Shëndetësisë. Në një letër drejtuar sot drejtorit të Zyrës së OBSH-së në Tiranë,  Dr. Raul Gonzalez, kreu i opozitës kërkoi mbështetje për pajisjen e autoriteteve shqiptare me pajisje për testimin më të madh të qytetarëve.

“Duke qenë të ndërgjegjshëm për mundësitë e pakta që kanë autoritetet tona për ta përballuar të vetëm këtë situatë, si dhe duke shfrytëzuar këtë mundësi komunikimi, dëshiroj t’Ju kërkoj që të ndihmoni autoritetet shqiptare dhe Shqipërinë me sa mundeni, për marrjen e sa më shumë pajisjeve testuese, të kiteve testuese dhe të tjerave materiale testuese. Vetëm duke shtuar numrin e testimeve dhe duke verifikuar në kohë çdo person të dyshuar si të prekur nga virusi, ne arrijmë të izolojmë personin në kohë dhe të frenojmë përhapjen e virusit në numër më të lartë qytetarësh.”- shkruan zoti Basha në letrën për OBSH.

Kreu i opozitës e mbështet këtë kërkesë në shqetësimin e bërë publik se, nga njëra anë, po refuzohet testimi i shumë qytetarëve me shenjat e COVID-19 nga ana tjetër, numri i raportuar zyrtarisht për testime, është në rënie prej datës 11 mars, për shkak të mungesës së testeve. Në letrën drejtuar Zyrës së OBSH-së në Tiranë, zoti Basha ngre edhe shqetësimin e ekspozimit të stafeve mjekësorë ndaj infektimit

“Do të ishim shumë mirënjohës, nëse do të ndihmonit në sigurimin e një sasie të konsiderueshme vjeshjesh dhe pajisjeve mbrojtëse të tjera të domosdoshme për të mbrojtur stafet tona mjekësore.”-shkruan lideri i opozitës Basha.

Deklaratë e Sekretarit të Përgjithshëm të Partisë Demokratike, Gazment Bardhi

E vërteta është më e qartë dhe e pastër se çdo lojë e pisët apo maskë e skaduar. Le ta shohin dhe gjykojnë vetë shqiptarët se kush e ka mendjen tek pushteti dhe përdor mesazhe të sajuara kundër kreut të opozitës. Me qëllimin e vetëm, të largojë vëmendjen nga propozimi ynë që ndihmon realisht qytetarët dhe biznesin për të përballuar krizën. 👇

Reply to PD letter. Albanian. 200320 (1)

Përgjigja nga Vodafone tregon se:

1- SMS nuk është dërguar nga Lulzim Basha apo nëpërmjet sistemit të kompanisë celulare.
2- SMS është dërguar nga një platformë e huaj SMS në internet për dërgimin e SMS-ve, jashtë rrjetit të kompanisë celulare.

Ne email eshte derguar komunikimi i plote mes PD dhe Vodafone. Pas verifikimit te te dhenave, Administratori i kompanise konfirmoi se mesazhi ne emer te Lulzim Bashes eshte i sajuar. Ai nuk eshte derguar nga numri i kreut te opozites.

DEKLARATE E PARTISË DEMOKRATIKE TË SHQIPËRISË

Dje në emisionin Open është dërguar një mesazh i sajuar me pyetje drejtuar Edi Ramës nga gjoja numri i telefonit të Kryetarit të Partisë Demokratike, Lulzim Basha. Ky mesazh i sajuar në mënyrë të paligjshme është një akt i turpshëm i atyre që duan të fshehin keqmenaxhimin e krizës.

Ata që sajojnë mesazhe në emër të kryetarit të opozitës, duke ndërhyrë në mënyrë të paligjshme në telefonin e gazetarëve, mund ta bëjnë këtë akt të rrezikshëm me çdo qytetar. Ne do t’u kërkojmë organeve përgjegjëse të zbardhin këtë skandal kriminal për të zbuluar me prova autorët dhe për ti ndëshkuar ata sipas ligjit.

Edi Rama duhet të ndalë menjëherë lojërat e pista dhe luftën politike me mesazhe fallso, njerëz fallso dhe propagandë të skaduar kundër opozitës. Ai duhet t’u kthejë sot shqiptarëve lekët e taksave për të përballuar krizën e bukës që po thellohet nga mbyllja e vendeve të punës.

Thirrja jonë për Edi Ramën është: Mirato urgjentisht paketën e ndihmës! Shqiptarët kërcënohen nga rreziqe të mëdha. Ndal sulmet politike, fillo bëj punën për të cilën paguhesh!