Blog

• PD dhe opozita ka qenë dhe është e hapur për të diskutuar me transparencë me shqiptarët cili sistem zgjedhor do të aplikohet në zgjedhjet e ardhshme parlamentare.
• Praktika e 7 viteve të fundit ka faktuar se cilido sistem të zgjidhet, do të dështojë, nëse nuk garantojmë ndarjen e politikës nga krimi, ndaljen e blerjes së votës dhe ndëshkimin e krimeve elektorale.
• Alibia se “fajin e ka sistemi”, mund të kthehet në një shtojcë të propagandës së Ramës, sipas së cilës të gjithë janë njësoj dhe se fajin për kriminelët e ka çdokush, përveç atij që i kandidoi dhe bleu votat me ta.
• Axhenda e Ramës është pushteti i tij personal. Axhenda ime është ekonomia, mirëqenia, dinjiteti i shqiptarëve dhe demokracia.
• Jemi të gatshëm të hedhim çdo hap për t’i dhënë fund këtë vit, një orë e më parë, krizës së thellë politike, ku e ka futur vendin Edi Rama dhe qeveria e tij e dështuar.

KOMUNIKIMI ME GAZETARËT I KRYETARIT TË PARTISË DEMOKRATIKE, LULZIM BASHA.

Pyetje: Zoti Basha, do të zhvilloni një mbledhje me aleatët, është rënë dakord për të gjitha pikat që përfshin Reforma Zgjedhore? Kujtojmë këtu një nga pikat më të diskutuara ka qenë ajo e sistemit zgjedhor. Aleatët kanë kërkuar ndryshim sistemi, a ka një konsensus?

Lulzim Basha: Në emër të Partisë Demokratike dhe të opozitës së bashkuar, kam qenë dhe jam i hapur, e kemi shprehur këtë zyrtarisht, për të diskutuar me të gjithë qytetarët shqiptarë në mënyrë gjithëpërfshirëse dhe transparente, cili sistem zgjedhor do të aplikohet në zgjedhjet e ardhshme parlamentare. Nisur nga praktika e 7 viteve të fundit, mund të themi me siguri të plotë se cilido sistem të zgjidhet, do të dështojë, nëse nuk garantojmë ndarjen e politikës nga krimi, ndaljen e blerjes së votës me paratë e pista dhe ndëshkimin e krimeve elektorale nga një drejtësi e pavarur. Ndaj, nga kjo pikëpamje,  mund të them se alibia, se “fajin e ka sistemi”, fatkeqësisht mund të kthehet në një shtojcë të propagandës së Ramës, sipas të cilës jemi të gjithë njësoj, sipas të cilës fajin e ka çdokush, përveç atij,  për kandidimin e personave me rekorde kriminale, për kapjen e gjithë kupolës së shtetit dhe policisë duke blerë vota me krimin e organizuar. Në fakt e dimë të gjithë se Shqipëria është sot në një krizë të thellë politike, e cila ka precipituar në krizë ekonomike dhe në një krizë të paimagjinueshme emigracioni, për shkak të përgjegjësive të këtij kryeministri dhe të dështimit total të tij dhe të qeverisë së tij.

Pyetje: Kryeministri sot nga Vjena ka deklaruar se vendi nuk ka një krizë politike, ndërkohë që reforma e re zgjedhore të bëhet bashkë me opozitën jashtë parlamentare, pra me ju, duke pasur parasysh edhe rekomandimet e OSBE-ODIHR. Komenti juaj?

Lulzim Basha: Unë zgjedh të besoj Bundestagun dhe nuk besoj se ka shqiptar që në mes të Bundestagut dhe Edi Ramës, zgjedh këtë të fundit. E shkruar e zezë mbi të bardhë, vendi është në një krizë të thellë politike dhe këtë shqiptarët, jo vetëm opozita, e ndjejnë në lëkurën e tyre. E ndjejnë në papunësinë që rritet, në bizneset që mbyllen, e ndjejnë në mungesën totale të shtetit që nxori në pah tërmeti i 26 nëntorit. E nxori mbretin lakuriq. E nxori shtetin pa emergjenca civile, tregoi se edhe një shtet i ri si Kosova kishte dhjetëra herë më shumë kapacitete për t’u ardhur në ndihmë njerëzve në nevojë dhe e tregon sot ku i ka braktisur me mijëra familje në pikë të hallit. Dua t’ju falënderoj ju dhe kolegët tuaj që vazhdoni t’i mbuloni, në veçanti, në këto ditë të acarta. Axhenda e Edi Ramës është pushteti i tij personal. Për pushtetin e tij personal e ka zhytur vendin në një krizë të thellë legjitimiteti. Sot është publikuar një raport nga Finch, që tregon se Shqipëria renditet me fundin e botës, si një vend me qeveri ilegjitime. Axhenda e tij, është pushteti i tij. Axhenda ime është ekonomia, shpëtimi ekonomik i Shqipërisë, demokracia, dinjiteti dhe mirëqenia e çdo shqiptari. Dhe në funksion të kësaj, jemi të gatshëm të hedhim çdo hap të nevojshëm, për t’i dhënë fund një orë e më parë, krizës së thellë politike, ku e ka zhytur vendin Edi Rama dhe qeveria e tij e dështuar.

Pyetje: Zoti Basha, a ka PD në tryezë emra të tjerë kryebashkiakësh që kanë shkelur ligjin e dekriminalizimit?

Lulzim Basha: Për të gjitha këto çështje do të informoheni hap pas hapi.

Pyetje: Një pyetje për tensionin SHBA-Iran. Sa e rrezikuar është Shqipëria?

Lulzim Basha: Liria dhe demokracia e vërtetë ka një çmim të lartë. Në kuptimin e brendshëm, shqiptarët po e kuptojnë, e kanë kuptuar tashmë, se pa luftuar për demokracinë ditë për ditë, ajo rrezikon të zhduket nën peshën e një qeverie të korruptuar dhe të inkriminuar. Po kështu, liria ka një çmim të lartë ndërkombëtarisht dhe unë jam krenar që, si ministër i jashtëm, kam rreshtuar Shqipërinë krah për krah Shteteve të Bashkuara të Amerikës në NATO dhe besoj fort se kjo aleancë vlerash, mbi të gjitha, është një aleancë e lirisë, dinjitetit njerëzor. Ndaj dua të shpreh edhe njëherë në emrin tim, në emër të PD dhe në emër të opozitës së bashkuar, qëndrimin tonë të qartë, që e kemi bërë të ditur prej orës së parë të zhvillimit të ngjarjeve, përkrah SHBA, përkrah vlerave të lirisë dhe demokracisë.

DEKLARATË E SEKRETARIT TË PËRGJITHSHËM TË PARTISË DEMOKRATIKE, GAZMENT BARDHI

Të dashur bashkëqytetarë,

Sot, Partia Demokratike i ka kërkuar zyrtarisht Prokurorisë së Përgjithshme verifikimin të të kaluarës kriminale të Edi Ramës së Mallakastrës. Sipas të dhënave të mbledhura nga PD, Qerim Ismailaj, rezulton se ndodhet në kushtet e ndalimit për të kandiduar në një funksion publik. Ai dyshohet se ka qenë i arrestuar në Greqi dhe më pas është dënuar dhe dëbuar në periudhën 1999-2000.

Ky është rasti i katërt, pas atij të Shkodrës, Vorës, Vaut të Dejës që konfirmon se Edi Rama ka ardhur në pushtet falë mbështetjes së krimit të organizuar dhe ndan pushtet politik me krimin e organizuar. Njëlloj si Valdrin Pjetri, Agim Kajmaku apo Babani i Vaut të Dejës edhe Edi Rama i Mallakastrës u përbetua sot para mediave se nuk ka patur asnjëherë probleme me drejtësinë në Greqi.

Në fakt ky është një mashtrim. Ai njëlloj si Edi Rama e di mirë se ka të shkuar kriminale dhe se është i dënuar në shtetin grek. Partia Demokratike po punon dhe shumë shpejt do të provojë për opinionin publik edhe zyrtarisht se Edi Rama i Mallakastrës ka të shkuar kriminale dhe se në bazë të ligjit të Dekriminalizimit nuk duhet të ushtrojë asnjë funksion publik.

Në fakt kjo nuk është detyrë as e Partisë Demokratike dhe e asnjë partie politike në vend, detyrë për të zbatuar ligjin e Dekriminalizimit e ka në radhë të parë njeriu që i kandidon këta kriminelë në pozicione publike dhe pas tij organi i Prokurorisë së Përgjithshme.

Ajo që ka vërejtur Partia Demokratike gjatë gjithë kësaj kohe ka qenë një sorollatje e pajustifikuar e procedurave të verifikimit nga ana Prokurorisë së Përgjithshme.

Gjithashtu, organi i prokurorisë ka dështuar në të gjitha rastet të zbatojë në mënyrë të plotë ligjin e Republikës së Shqipërisë, por asnjë nga rastet nuk rezulton të jetë zbatuar ligji antimafia dhe kriminelët e Edi Ramës, kriminelët që Edi Rama t’i fuste në politikë sot gëzojnë të paprekur pasurinë e vënë nga veprimtaria e tyre kriminale.

Për t’iu kthyer rastit të Mallakastrës që provon edhe një herë, e ripërsëris bashkëqeverisjen e Edi Ramës me krimin në vend, dua t’i drejtoj një pyetje publike se çfarë i kujton Edi Ramës së Mallakastrës data 25 shkurt 2000?

Sot nuk është koha për mashtrime, është koha për veprim nga organi i prokurorisë, është koha që ligji të veprojë dhe është koha që Edi Rama të mos fshihet pas Qerim Ismailajt, Valdrin Pjetrit, Agim Kajmakut dhe Mark Babanit, por të dalë dhe të marrë përgjegjësi dhe t’u shpjegojë qytetarëve shqiptarë se përse alternativa e tij e vetme është krimi i organizuar. Përse kandidon në bashkitë bastion të Partisë Demokratike individë me të shkuar kriminale?

Përse të tenton të fusë në politikë individë me të shkuar kriminale?

Shqiptarët e kanë të qartë, Edi Rama nuk fiton dot pa bashkëpunimin me krimin e organizuar, nuk qeveris dot pa ndarë pushtet me krimin e organizuar, prandaj përgjigja e shqiptarëve do të jetë e shpejtë dhe pa asnjë hezitim.

DEKLARATË PARTIA DEMOKRATIKE, LINDITA METALIAJ 

Edi Rama mund të bëjë propagandë 24 orë në 24 dhe të keqpërdorë njerëzit në nëvojë për një foto apo për një video më shumë, por ai nuk mund t’i fshihet dot të vërtetës së numrave. Dhe numrat tregojnë se Edi Rama po vjedh dhe po zhvat shqiptarët për t’u pasuruar vetë me ministrat dhe oligarkët e tij.

Vetëm me skemën korruptive të inceneratorëve, Edi Rama u ka marrë shqiptarëve 47 milionë euro, duke i futur ato në xhepat e Klodian Zotos, bashkëpuëntorit të Arben Ahmetajt dhe administrator në tre inceneratorët.

Ajo që e bën edhe më skandaloze këtë skemë gjigande vjedhjeje është fakti se inceneratorët paguhen miliona euro çdo vit, megjithëse 2 prej tyre as nuk ekzistojnë.

Sipas kontratës korruptive të firmosur nga Edi Rama, inceneratori fantazëm i Fierit ka marrë deri tani 18 milionë euro, ndërsa ai i Tiranës 14 milionë euro.  Keto të fundit as nuk dihet në xhepat e kujt përfundojnë zyrtarisht, pasi kompania është e regjistruar në parajsë fiskale dhe pronari i vërtetë është i panjohur.

47 milionë euro të vjedhura me inceneratorët fantazëm dhe të paktën 8.5 milionë euro vetëm nga koncesioni i check up, që denoncuam dje, janë një pasuri e madhe që, në vend të investohen

për shqiptarët, i shkojnë një grushti politikanësh dhe oligarkësh të korruptuar.

Pasurimi i paligjshëm është prioriteti absolut i Edi Ramës dhe mënyra e vetme për të mbajtur pushtetin e tij të paligjshëm. Për Edi Ramën nuk ka asnjë rëndësi që pensionet nuk rriten, pagat nuk rriten, që të rinjtë dhe profesionistët po largohen nga vendi, që ekonomia është në krizë dhe biznesi i vogël lufton për mbijetesë.

Që t’i japim fund kësaj krize, duhet zhbërë pushteti i paligjshëm i Edi Ramës. Antidoti i vetëm për ketë virus janë zgjedhjet e lira e të ndershme, që do t’i japin vendit një qeveri e cila u shërben qytetarëve, duke nisur me anullimin e koncesioneve dhe PPP-ve korruptive, si ky i inceneratorëve.

Banorët e Tiranës paguajnë çdo vit rreth 7.5 milionë euro vetëm për taksën e arsimit, por tërmeti zbuloi se kjo taksë shpërdorohet. Bashkia e Tiranës nuk e përdor atë për të përmirësuar infrastrukturën në shkolla e kopshtet, duke lënë në mëshirën e  e fatit sigurinë e jetës së fëmijëve.

Përfaqësuesit e PD, Jorida Tabaku dhe Klevis Balliu sollën në vëmendje situatën me Shkollat “Musine Kokalari” dhe “Lasgush Poradeci”në zonën e Kombinatit. Ato janë anë dëmtuar rëndë nga tërmeti dhe rreth 2500 nxënës janë shpërndarë në shkolla të tjera.

Në 3 vjet, Erion Veliaj u ka marrë banorëve të Tiranës më shumë se 23 milionë euro, por nuk ka investuar asnjë qindarkë prej tyre në të dyja shkollat, që sot janë të dëmtuara.

Tërmeti zbuloi se nisma “Adopto një shkollë” ishte vetëm fasada e një propagande të shëmtuar dhe të rrezikshme, që, nëse tërmeti do të kishte rënë ditën, mund të kishte pasoja tragjike për fëmijët.

DEKLARATAT E PËRFAQËSUESVE TË PARTISË DEMOKRATIKE NË DY SHKOLLA TË DËMTUARA NGA TËRMETI NË KOMBINAT

JORIDA TABAKU, SHKOLLA “MUSINE KOKALARI”, TIRANË

Sot bashkë me përfaqësues të Partisë Demokratike të Kombinatit jemi pranë shkollës Musine kokalari, një shkollë e cila është shpallur e papërdorshme. Këtu mësimi është pezulluar që në datën 26 nëntor, por, fatkeqësisht, akoma nuk kemi një akt ekspertimi të plotë as nga Bashkia, as nga institucionet përgjegjëse për dëmet që ka pasur kjo shkollë.

Shkolla Musine Kokalari ka qenë e pjesë e programit “Adopto një shkollë”, nga Bashkia e Tiranës,  e programit korruptiv që Partia Demokratike ka denoncuar, ku oligarkë, ndërtues të ndryshëm, bënin investime qesharake në këmbim të lejeve të ndërtimit dhe, siç rezulton, sot të gjitha këto ishin fasadë, njësoj si puna e Bashkisë, ishin thjesht propagandë, një lyerje boje, që me tërmetin e 26 nëntorit,  i nxori bojën punës që Bashkia e Tiranës bën.

22 milionë euro janë mbledhur nga viti 2016 deri më sot për taksën e infrastrukturës në Arsim, 22 mln euro që duhej të ishin investuar në shkolla, në kopshte, në çerdhe, ndërkohë që Tirana, megjithëse pasojat e tërmetit nuk ishin si në zonat e prekura më rëndë, ka numër  të madh të shkollave, të dëmtuara nga tërmeti.

Pothuajse 20 shkolla janë shpallur të papërdorshme dhe sot janë bosh. 1200 nxënësit e kësaj shkolle janë shpërndarë nëpër shkolla të tjera të zonës. Nuk ka asnjë përgjigje se kur do të rifillojë mësimi, por, njëkohësisht, e njëjta situatë është edhe me familjet e prekura nga tërmeti.

Kombinati është një nga zonat me numrin më të madh të familjeve të prekura.

Struktura e Partisë Demokratike dega 6, pothuajse përditë ka qenë në terren duke vizituar zonat më të prekura. Janë banorë që ndodhen sot në tenda dhe janë jashtë shtëpive të tyre dhe nuk u është dhënë zgjidhje.

E vetmja zgjidhje qesharake është një bonus qeraje prej 15,000 lekë të reja, ku familje me 10, 12 persona presupozohet që të marrin në qytetin e Tiranës një banesë me një qera të tillë, që është pothuajse e pamundur.

Ky vit i ri do të jetë shumë i trishtë për këta banorë, do të jetë i trishtë edhe për qytetarë që janë prekur nga tërmeti.

Partia Demokratike nuk e zëvendëson dot qeverinë, megjithëse jemi duke bërë maksimumin e duke iu gjendur pranë këtyre banorëve, por Bashkia, Ministria e Arsimit, të gjitha institucionet duhet të vijnë dhe të marrin përgjegjësi.

Mjaft luajtën me jetën e këtyre njerëzve, me pronën e tyre, mjaft luajtën me sigurinë e institucioneve arsimore, duhet një orë e më parë të investojnë atë taksë që kanë paguar qytetarët e Tiranës, taksën e infrastrukturës në Arsim, për shkollat, kopshtet, çerdhet, të cilat i kanë rikonstruktuar në mënyrë korruptive.

KLEVIS BALLIU, SHKOLLA “LASGUSH PORADECI”, TIRANË

Jemi në shkollën “Lasgush Poradeci “në Kombinat me përfaqësuesit e Partisë Denmokratike Dega 6, për të denoncuar vjedhjen makabre të Bashkisë, ku paratë e qytetarëve të cilat shkojnë për infrastrukturën arsimore, janë çuar dëm, janë vjedhur, pasi në këtë shkollë nuk ëstë bërë asnjë investim dhe pasojat duken qartazi, shkolla sot, për shkak të tërmetit, është mbyllur. Për shkak të mungesës së investimeve, është mbyllur.

Pyetja themelore është: ku shkojnë paratë e qytetarëve.

Në këtë shkollë pak kohë më parë janë bërë disa punime për lyerje bojërash, të cilat i shërbejnë për propagandë dhe fotografi Bashkisë së Tiranës, por nuk është bërë asnjë punim serioz duke bërë matjet e duhura dhe të parashikuara me ligj.

Dhe është kjo arsyeja themelore se përse sot shkolla është e mbyllur.

Bashkia e Tiranës u jep ndërtuesve, që marrin përsipër të lyejnë shkollat për sy e faqe dhe propagandë, atyre ndërtuesve u japin qindra milionë euro leje ndërtimi, ndërkohë që dhjetëra miliona euro të taksave të qytetarëve shqiptarë shkojnë në xhepat e qeveritarëve dhe pushtetarëve të korruptuar.

Ky është një akt bandidesk i cili i ka lënë fëmijët e Kombinatit pa shkollë, ka lënë fëmijët në vështirësi për t’u arsimuar dhe vështirësi të tjera.

Kombinati është një nga zonat më të prekura pas tërmetit dhe është një zonë jo më larg se 2 km nga qendra e Tiranës, kryeqyteti i Shqipërisë. Dhe kur këto probleme ndodhin në shkollat që janë në kryeqytet ju vetë mund ta imagjinoni se në çfarë konditash janë shkollat e tjera jashtë Tiranës.

Tërmeti i 26 nëntorit ka nxjerrë në pah tërmetin e vjedhjes dhe korrupsionit me fondet publike nga qeveria dhe Bashkia e Krujës. Dy shkolla janë shkatërruar plotësisht në Thumanë dhe Borizanë, por dokumentet për tenderat përkatës janë zhdukur nga sistemi.

Albana Vokshi, Çlirim Gjata dhe Dashamir Hidraliu, sekretari i degës PD Krujë, i cili humbi motrën dhe nipin në një nga pallatet e shembur në Thumanë, sjellin në vëmendjen e publikut pasojat e tërmetit të vjedhjes me shkollat e fëmijëve.

Janë mbi 1 milionë euro të zhdukura. Në Thumanë, nga shkolla 9 vjeçare “Ramazan Jangozi” kanë mbetur vetëm një grusht tullash të thërrmuara, pasi ajo u prish me shpejtësi nga qeveria, e cila, bashkë me dokumentet e tenderit, ka zhdukur çdo gjurmë për përgjegjësit e shembjes së shkollës.

E njëjta situatë është edhe në Borizanë. Pak ditë pas tërmetit pritej inaugurimi i saj, por tani ajo është e shkatërruar. Nëse tërmeti do të kishte rënë gjatë kohës së mësimit, pasojat do të ishin katastrofike.

PD i kërkon prokurorisë të mos vonojë hetimin për këto dy shkolla fantazëm, për 1 milionë eurot e zhdukura, për këdo që ka vjedhur dhe ka vënë në rrezik jetët e mbi 700 nxënësve dhe mësuesve.

Partia Demokratike dënon përpjekjen e Këshillit të Lartë të Prokurorisë për të mashtruar qytetarët dhe për të devijuar arsyen e vërtetë të shqetësimit të opinionit publik mbi të kaluarën si hetues politik i diktaturës për Drejtuesin e SPAK dhe për takimin e pajustifikuar të një anëtari të SPAK-ut me Ulsi Manjën e PS.

Reagime të tilla të dënueshme janë të pritshme nga një organ si KLP, që është nën drejtimin e militantit të PS Gent Ibrahimi dhe me shumicën e anëtarëve të kontrolluar nga pushteti dhe të zgjedhur në mënyrë të paligjshme.

Prokurorët e SPAK kanë kaluar të njëjtin proces të vetingut, siç kanë kaluar me dhjetëra prokurorë e gjyqtarë të tjerë. Në thelb, kjo është një përpjekje e KLP-së për të mashtruar qytetarët me teknikalitete të panjohura për ta,  në një kohë kur sondazhet tregojnë rënie të besimit të opinionit publik tek vetingu.

KLP kishte detyrimin të informonte opinionin publik, nëse Arben Kraja, Drejtues i SPAK, ka qenë apo jo hetues i regjimit gjakatar komunist përpara viteve 1990 në gjyqe politike?

KLP duhet të mbante qëndrim, nëse për të është e pranueshme që në vitin 2020 drejtësia e re të bëhet me hetues të regjimit komunist. Kjo është njësoj sikur drejtësinë në Gjermani ta jepte një prokuror që i shërbeu Hitlerit deri në momentet e fundit para dorëzimit të Berlinit.

KLP ka detyrimin të informojë opinionin publik, nëse Altin Dumani, prokuror i SPAK, është apo jo personi në foto, i raportuar nga media që një ditë përpara se KLP e partisë të votonte Drejtuesin e SPAK, kërkonte mbështetjen e përfaqësuesit të Partisë Socialiste Ulsi Manja. Drejtësia nuk mund të bëhet me shërbëtorë të rinj të partisë së vjetër në pushtet.

Këshilli i Lartë i Prokurorisë duhet t’i shpjegojë opinionit publik se përse alternativa e tij e vetme është të ofrojë vetëm drejtësinë që i duhet PS.

Shqipëria ka kapacitete për të ofruar një drejtësi normale, pa lidhje me politikën, pa lidhje me komunizimin, pa lidhje me Qeverinë. Shqipëria ka juristë, prokurorë e gjyqtarë të kualifikuar dhe me integritet, që mund t’i shërbëjnë vendit në organet e reja të sistemit të drejtësisë. Problemi është se këtë drejtësi nuk e do Edi Rama.

Edi Rama nuk ka ndërmend të lejojë ndërtimin e një drejtësie më të mirë për shqiptarët, por një drejtësi që i shërben atij, ministrave të tij të korruptuar dhe krimit të organizuar me të cilin bashkëqeveris.

Partia Demokratike kërkon që, në funksion të mbrojtjes së interesit publik dhe eliminimit të çdo dyshimi për integritetin e SPAK, prokurorët, për të cilët publikisht është vënë në  dyshim integriteti, pavarësia dhe paanshmëria, duhet menjëherë të sqarojnë pozicionin e tyre dhe vlerësojnë seriozisht mundësinë për të hequr dorë nga përbërja e SPAK.

Mbi interesin personal dhe politik, në këtë moment, duhet të prevalojë, nevoja për të ruajtur të paprekur imazhin, integritetin dhe besimin tek SPAK.

DEKLARATË E PARTISË DEMOKRATIKE, ZËDHËNËSJA INA ZHUPA

Viti 2020 nuk do të jetë për qytetarët e Tiranës një vit me shërbime më të mira, që rrisin cilësinë e jetës në kryeqytet. Përveç propagandës që e ka me shumicë, Erion  Veliaj do ta shpenzojë për paga dhe luks pjesën më të madhe të taksave të rritura për banorët e Tiranës.

Buxheti i miratuar një ditë më parë parashikon që 130 milionë euro të shkojnë për rrogat e bashkisë së Tiranës dhe për shpenzime të tjera luksi, nga të cilat qytetarët nuk përfitojnë asgjë.

Erion Veliaj, personi që u emërua me votat e administratës së vet, e ka çuar në 7 mijë numrin e atyre që do të paguajë me taksat e banorëve të Tiranës. Kjo fryrje që kalon çdo standard europian i shërben vetëm Erion Veliajt, pasi shërbimet për qytetarët nuk do të përmirësohen.

Uji i pijshëm do të vazhdojë të mungojë ose do të vijë i ndotur në rubinetat tona, shkollat dhe kopshtet do te vazhdojnë të jenë të mbipopulluara, rrugët nëpër lagjet e Tiranës do të vazhdojnë të jenë gropa – gropa, sepse Erion Veliaj nuk ka prioritet zhvillimin e qytetit, por betonizimin e tij.

Në vitin e pestë të drejtimit të Tiranës Erion Veliaj vazhdon të mburret me projektet madhore të Lulzim Bashës, Bulevardin e Ri, Pazarin e Ri, lumin e Tiranës, ndërsa ai do të mbahet mend si kryebashkiaku që ka thyer edhe rekordin e Edi Ramës për lejet e ndërtimit, betonizimin e kryeqytetit dhe zhvatjen e qytetarëve.

Për vitin 2020 ka një lajm te keq për qytetarët e Tiranës. Zonat ku Erion Veliaj do të vendosë parkim me pagesë, do të zgjerohen. Kjo do të thotë që qytetarëve do t’u merren edhe më shumë para nga xhepat për të mbushur xhepin e Veliajt.

Buxheti 2020 i Bashkisë së Tiranës është në të njëjën frymë me atë të buxhetit të qeverisë së Edi Ramës. Ai nuk ka lidhje me interesat e qytetarëve, por është një derë e hapur për aferat korruptive dhe pasurimin e paligjshëm të një grushti klientësh të bashkisë dhe qeverisë.

“Këta janë të pashpirt”, Basha në fshatrat e braktisur të Bubqit: Dështimi për t’u ardhur në ndihmë njerëzve është tërmet i korrupsionit dhe i babëzisë.

Një muaj pas tërmetit shkatërrues të 26 nëntorit, shteti është inekzistent për mijëra familje me shtëpi të dëmtuara rëndë nga tërmeti. Në fshatin Tarin, një nga më të goditurit në zonën e Bubqit, banorët i thanë Kryetarit të Partisë Demokratike, Lulzim Basha, se të vetmit që u kanë ardhur në ndihmë janë vullnetarët, ndërsa vlerësimi i banesave të shkatërruara akoma nuk është bërë.

“Kemi patur nevojë për njerëz. Le të mos sillte shteti asgjë, vetëm të na shikonte. Kanë ardhur vetëm vullnetarët nga Bubqi dhe Teatri”, – thotë i revoltuar një kryefamiljar, shtëpia e të cilit sihte dëmtuar që në 21 shtator dhe prej 3 muajsh jeton në çadër, bashkë me 6 persona të tjerë të familjes. “Ne kërkojmë vlerësimin e shtëpisë”- thotë një kryefamiljar tjetër, i cili ngre shqetësimin e shumë banorëve në zonat e tërmetit për trajtim të pabarabartë. “Çdo gjë deri tani është selektive. Nuk ka asnjë informacion se çfarë do të bëhet me ne”, – i tha ai kreut të opozitës, që e cilësoi këtë një krim të dyfishtë.

“Dështimi për t’u ardhur në ndihmë njerëzve është tërmet i korrupsionit dhe i babëzisë. Është korrupsion. Mos t’u vish në ndihmë njerëzve është krim dhe korrupsion, kurse ndarja e njerëzve në të nënës e të njerkës është krimi më i shëmtuar. Tregon që këta kanë marrë fund, vetëm qeveri nuk janë më. As bandë nuk janë më. Këta janë të pashpirt”, – theksoi zoti Basha, duke treguar rrugën e zgjidhjes nga një qeveri e përgjegjshme.

“Po ta kishin marrë këtë punë seriozisht, dy gjëra do t’i kishin bërë. E para, çadrat në fillim janë të pashmangshme. Pas kësaj, merrnin masa për strehim të përkohshëm me kontenierë dhe pastaj paratë në dorë, në bazë të dëmit, që ju t’i ndërtoni vetë, sepse, përndryshe, nuk i dilet kësaj pune. Kam një muaj që i them hiqu lekët oligarkëve. Mjaftojnë ato për të zgjidhur problemin në të gjithë zonën rurale dhe pjesën më të madhe të zonës urbane të goditur nga tërmeti. Sillet e përdridhet me justifikime. Vetëm llafe, vetëm mashtrime, vetëm gënjeshtra për të fshehur dështimin.“- tha zoti Basha, i cili shprehu bindjen se e vetmja zgjidhje që zgjidh problemin, është largimi i kësaj qeverie.

“Pa e zgjidhur këtë problem, nuk ka për t’u zgjidhur as halli juaj, as halli i gjithë shqiptarëve, që është ekonomia dhe varfëria. Një qeveri që është damkosur si qeveri hajdutësh dhe merr kryehajdutin, e bën ministër të rindërtimit, do të thotë që do të vjedhësmbi rrënojat e tërmetit!”- theksoi kreu i opozitës.

URIMI I KRYETARIT BASHA NGA KISHA ORTODOKSE NË DURRËS

Nga Kisha e Shën Palit dua të uroj nga zemra të gjithë besimtarët e krishterë të Durrësit dhe të gjithë Shqipërisë Krishtlindje të gëzuara! Kjo festë sjelltë besim, shpresë dhe ua mbushtë zemrat me dritë të gjithë shqiptarëve!

Mendimet dhe lutjet e mia janë për ata që janë më shumë në nevojë, në veçanti, për të goditurit nga tërmeti i 26 Nëntorit.

Qoftë kjo festë, kjo ditë e shenjtë e lindjes së Krishtit edhe një thirrje për një bashkim më të madh, me të fuqishëm, si një familje, për të perballuar çdo të keqe dhe për të dalë në dritën e begatisë dhe bekimit të Zotit!

Gëzuar! Zoti e bekoftë Shqipërinë!

Shembja dhe dëmtimi nga tërmeti i dhjetëra shkollave të reja apo të rikonstruktuara së fundmi ka nxjerrë në pah abuzimet dhe vjedhjet në bashkitë kryesore të vendit. Pas shkollës “Sami Frashëri” në Tiranë, Partia Demokratike denoncoi njërën prej tyre, shkollën e Mesme të Bashkuar “Ismet Nanushi”, në Sukth, pjesë e Bashkisë së Durrësit.

Gent Strazimiri, Enkelejd Alibeaj dhe Xhemal Gjunkshi panë nga afër dëmtimet e rënda të shkollës së rikonstruktuar 1 vit më parë. Shkollës i është vënë kryqi i verdhë, duke treguar rrezikshmëri të lartë, megjithëse për rikonstruksionin e saj u shpenzuan dhjetëra milionë lekë.

“Shkolla është rikonstruktuar para një viti me një fond rreth 70 milionë lekë, por për shkak të cilësisë së dobët të punimeve, është dëmtuar rëndë. Nuk ka as informacion cila është firma që ka bërë punimet dhe as kush e ka marrë në dorëzim, bashkia apo drejtuesit e shkollës. Nëse tërmeti do të kishte rënë gjatë orarit të mësimit dhe jo në 4 të mëngjesit, do të kishte bërë një masakër të fëmijëve të Sukthit. “ – u shpreh Gent Strazimiri.

Në emër të Partisë Demokratike, zoti Strazimiri kërkoi nisjen e hetimeve për të çuar para drejtësisë këdo që, për të vjedhur, ka vënë në rrezik, jetën e fëmijëve në shkollën “Ismet Nanushi” në Sukth.

“Mendoj që është një rast flagrant i abuzimit financiar, një rast flagrant i përqeshjes me jetët e njerëzve, edhe në keq akoma, me jetët e fëmijëve. Prokuroria duhet të konsiderojë nisjen e një hetimi për të gjetur autorët e kësaj grabitjeje, që, nëse nuk do t’i kishte ruajtur Zoti, do të kishte sjellë tragjedi për fëmijët.”- tha Gent Strazimiri.