Blog

• Dëmtimet e rënda nga tërmeti në Gjimnazin Sami Frashëri edhe pas restaurimit pak muaj më parë, dëshmojnë korrupsionin e thellë të Bashkisë së Tiranës. Rindërtimi me urgjencë është një krim korruptiv ndërtimor që po përpiqet të fshihet, pa transparencë, pa dokumentacion, çertifikim, kolaudim dhe as projekt inxhinierik.

DEKLARATË LUÇIANO BOÇI, NGA GJIMNAZI SAMI FRASHËRI

Pushteti lokal dhe pushteti qëndror i ka bërë nxënësve të shkollës Sami Frashëri, situatën e shihni vetë, e keni në pamjet tuaja. Sikurse ka braktisur këta nxënës, kështu ka braktisur me qindra të tjerë nxënës në zona të tjera të prekura nga tërmeti, në shkollat e dëmtuara ku ende nuk është vënë dorë dhe nuk ka inspektim të plotë të dëmeve.

Po kështu janë braktisur me mijëra qytetarë sot të lënë mes katër rrugëve, në mes të shiut dhe në udhëkryqin e fatit të tyre të mbrapshtë pa asnjë mbështetje nga kjo qeverisje.

Siç e shihni, shkollës i është vënë dryni. Në fakt duhej t’i ishte vënë shiriti i vendit të krimit, ky është një krim korruptiv ndërtimor që po përpiqet të fshihet në të gjitha format dhe mënyrat madje edhe shkarkimi i drejtoreshës militante është bërë për këtë arsye.

Të mos harrojmë se kjo shkollë është rikonstruktuar para një viti me një bujë të madhe, me tam-tame dhe me zhurmë, ku vetë kryetari i Bashkisë ka garantuar nxënësit dhe prindërit për sigurinë e ambienteve.

Por situata mbrapa flet ndryshe.

Nuk ka pasur dhe nuk ka siguri, as për nxënësit dhe as për prindërit.

Madje mungon edhe transparenca për të gjitha dokumentat që duhet të paraqesë Bashkia e Tiranës për çertifikimin, kolaudimin, për projektin inxhinierik dhe të drejtën e ndërhyrjeve në elementë mbështetës kryesorë të ndërtesës e cila sot është e rrënuar, e dëmtuar dhe e pafrekuentuar nga nxënësit dhe mësuesit.

Ju e pasqyroni, fasada e propagandës nuk mund të mbulohet sepse realiteti është ulëritës dhe nuk e mbulon as Rama me ecejaket dhe batutat e tij, me talljet që i bën qytetarëve dhe mësuesve, nuk e mbulon as Veliaj që fshihet pas gishtit të propagandës. Në vend që të fshihet pas gishtit së propagandës do ta ftoja të vinte këtu, t’u japë përgjigje pyetjeve që kush mban përgjegjësi në shkollën Sami Frashëri që gjoja është rikonstruktuar.

Kush mban përgjegjësi për shkollat e dëmtuara në Tiranë, Emin Duraku, Petro Nini etj, dhe të japë përgjigje pyetjes se si u procedua për të nxjerrë firmën fituese që bën rikonstruksionin, t’i japë përgjigje pyetjes, sa para janë harxhuar për rikonstruksion dhe të japë përgjigje pyetjes, se a mban Bashkia përgjegjësi për situatën e shkaktuar në këtë shkollë dhe shkolla të tjera.

Këtë duhet të bëjë Kryetari i Bashkisë dhe jo të përpiqet të mbulojë gjurmët e krimit korruptiv dhe ndërtimor që kemi pas nesh.

Boll me propagandë, përgjegjësitë le ti marrin ata që kanë kryer krimin, kanë bërë korrupsionin dhe të japin llogari përpara qytetarëve.

Dështimi, paaftësia dhe këmbëngulja për të mos prekur me asnjë çmim milionat që shkojnë në xhepat e oligarkëve, po e shtyn vendin drejt një krize të thellë ekonomike dhe sociale.

Banorët në Hamallaj, Manzë dhe Radë vazhdojnë të flenë jashtë, në çadra ose në makina. Pavarësisht propagandës, shteti ështe inekzistent, ndërsa familjarëve tashmë u duhet të përballen edhe me përkeqësim të gjëndjes shëndetësore kryesisht të fëmijëve dhe të moshuarve për shkak të të ftohtit, shirave dhe mungesës së ngrohjes.

Disa prej banorëve kanë që prej tërmetit të 21 shtatorit që janë në mes të rrugës, të harruar nga shteti. Ende qytetarët presin për një vendim për sigurinë e banesave të tyre. Ata nuk e dinë se cfarë do të bëhet me ta, me shtëpitë e tyre me mundin dhe djersën e një jete.

26 Nëntori nxorri në pah dështimin dhe paaftësinë e kësaj qeverie. Nxorri në pah sjelljen e pashpirt dhe kriminale ndaj pasojave të tërmetit të 21 shtatorit që solli humbje jetësh njerëzore.

Banorët më thanë se për faturën e ujit e të dritave shfaqën që në orët e para të mengjesit punonjësit e shtetit, ndërsa në fatkeqësi ata janë të braktisur e të injoruar. Në prag të festave ata janë në mëshirë të fatit, propaganda tregon një realitet larg të vërtetës.

E ndërsa ankthi, pasiguria e qytetarëve, mbyllja e bizneseve, shkurtimi i vendeve të punës vazhdon, qeveria po përgatit vjedhjen e rradhës mbi rrënojat e tërmetit. Kjo qeveri është gati të sakrifikojë qytetarët, fëmijë e të moshuar vetëm të mos prekë 150 milionë dollarët që marrin oligarkët.

Nëse ky kryministër dhe qeveria e tij do të punonte me të njëjtin pasion dhe përkushtim për qytetarët, siç punon për oligarkët, nuk do të kishte qytetarë qe nuk e dinë fatin e banesave të tyre apo jetojnë nëpër çadra, të uritur, të shokuar, dhe në dëshpërim. Tërmeti i 26 nëntorit i ka lënë vendin tërmetit të dështimit dhe shembjes së shtëtit prej kartoni nga babëzia, korrupsioni dhe paaftësia.

• PD: TË RUHET BESIMI TEK SPAK DHE INTEGRITETI I ANËTARËVE TË TIJ

• PD: PROKURORËT, PËR TË CILËT PUBLIKISHT ËSHTË VËNË NË  DYSHIM INTEGRITETI, DUHET MENJËHERË TË VLERËSOJNË SERIOZISHT MUNDËSINË PËR TË HEQUR DORË NGA PËRBËRJA E SPAK. 

• PD: DREJTËSIA E RE NUK MUND TË BËHET AS ME HETUES TË KOHËS SË KOMUNIZMIT DHE AS ME SHËRBËTOR TË RINJ POLITIK TË PARTISË NË PUSHTET.

DEKLARATË E SEKRETARIT TË PËRGJITHSHËM TË PD, GAZMENT BARDHI

Partia Demokratike e Shqipërisë nuk ka ndërhyrë dhe nuk ka komentuar procesin e përzgjedhjes dhe emërimit të prokurorëve të SPAK, duke patur bindjen se integriteti i kësaj strukture duhet të ruhet në çdo rast.

Edhe pse disa prej anëtarëve janë zgjedhje ekskluzive e Qeverisë dhe i kanë shërbyer Partisë Socialiste, ne zgjodhëm të japim mbështetje publike për të gjithë trupën, pa i paragjykuar, duke patur si objektiv strategjik ruajtjen e integritetit të SPAK-ut dhe moscënimin e besimit të publikut tek kjo strukturë, sepse përmes së cilës u është premtuar shqiptarëve lufta kundër krimit të organizuar dhe ndëshkimi i korrupsionit në nivelet më të larta qeveritare.

Por Partia Demokratike nuk mund të qendrojë indiferente ndaj 2 fakteve të rënda, të bëra publike nga media online, që venë në dyshim serioz integritetin e kësaj strukture!

Një dokument i Korrikut 1990, i bërë viral ditën e djeshme, ka zbuluar se Drejtuesi i SPAK-ut Arben Kraja, ka marrë pjesë në procese politike, duke i shërbyer regjimit diktatorial deri në grahmat e tij të fundit.

Partia Demokratike ka bindjen se një ushtar i diktaturës më të egër në Europë, që dënon qytetarët me motivacionin “për dëmtim të moralit komunist”nuk mund të jetë shërbëtor i shtetit të së drejtës. Përveçse një hetues i diktaturës, drejtuesi i SPAK-ut, Arben Kraja, është propozuar nga PS si zëvendëskryetar i KLSH dhe ka punuar në Kryeministri për qeverinë e PS.

Fakti i dytë i rëndë, edhe ky i bërë publik nga media online, është takimi një ditë para votimit, i Prokurorit Altin Dumani me përfaqësuesin e Partisë Socialiste, Ulsi Manja. Altin Dumani ishte një nga kandidatët kryesorë për drejtimin e SPAK dhe ky takim, siç analizon me të drejtë media, për të marrë në KLP votat e kontrolluara nga njëri prej klaneve në Partinë Socialiste, vendos në pikëpyetje profesionalizmin, pavarësinë dhe paanshmërinë e tij. Minimalisht prokurori Dumani ka detyrimin t’i sqarojë opinionin publik motivin e takimit me Ulsi Manjën, një ditë përpara votimit në KLP.

Duke marrë shkas nga këto dy fakte të rënda, Partia Demokratike kërkon fuqimisht nga partnerët tanë SHBA dhe BE, që t’i përmbahen garancisë që i kanë dhënë popullit shqiptar për të siguruar pavarësinë e Strukturës së Posaçme Antikorrupsionit dhe Krimit të Organizuar. Çdo e dhënë që ul besimin e publikut tek SPAK nuk ndihmon në forcimin e integritetit dhe paanshmërisë së kësaj strukture.

Ruajtja e besimit të publikut është jetike për të garantuar suksesin e SPAK dhe për të bërë realitet pritshmërinë e publikut për të luftuar pandëshkueshmërinë në rradhët e zyrtarëve të lartë.

Në funksion të mbrojtjes së interesit publik dhe eleminimit të çdo dyshimi për integritetin e SPAK, prokurorët, për të cilët publikisht është vënë në  dyshim integriteti, pavarësia dhe paanshëria, duhet menjëherë të sqarojnë pozicionin e tyre dhe vlerësojnë seriozisht mundësinë për të hequr dorë nga përbërja e SPAK.

Mbi interesin personal dhe politik, në këtë moment, duhet të prevalojë, nevoja për të ruajtur të paprekur imazhin, integritetin dhe besimin tek SPAK.

Drejtësia e re nuk mund të bëhet as me hetues të kohës së komunizmit dhe as me shërbëtor të rinj politik të partisë në pushtet.

Partia Demokratike rikonfimon edhe njëherë mëbshtetjen e plotë për SPAK, duke besuar se me ngritjen e kësaj strukture Shqipëria ka një shans të ri dhe real, për të luftuar krimin e organizuar dhe korrupsionin në nivelet më të larta, nga kriminelët me mbështetje qeveritare, tek politikanët dhe zyrtarët e lartë.  Por që kjo të arrihet, duhet domosdoshmërisht që SPAK të pastrohet nga çdo hije dyshimi mbi integritetin e anëtarëve në përbërje të saj.

 DEKLARATË E PARTISË DEMOKRATIKE, ENO BOZDO ANËTAR I KRYESISË SË PD

Sekretariati i Energjisë në Vjenë, institucioni me i rëndësishëm evropian për politikat energjetike, konfirmoi dështimin e qeverisë së Edi Ramës më sektorin energjetik.

Shqipëria është klasifikuar prej Sekretariatit si i vetmi vend në rajon, që ka hedhur hapa prapa në këtë sektor strategjik, që prek jetën e çdo shqiptari për një arsye të vetme – Edi Rama dhe qeveria e tij janë të korruptuar.

Zvarritja e reformave energjetike apo ndryshimi i tyre sipas interesave financiare të klaneve në qeverinë e Edi Ramës, performanca e keqe e OSHEE-së, pavarësisht çmimit të rritur të energjisë, janë dy nga treguesit kryesorë të dështimit për shkak të korrupsionit.

Kjo është arsyeja pse Ministrja Përgjegjëse Belinda Balluku u përpoq t’ua mbyllte gojën mediave më një seancë të zhvilluar thuajse në terr informativ për një nga shtyllat thelbësore të ekonomisë së vendit, sektorin energjetik.

Kreu i Sekretarit të Energjisë në Vjenë konfirmoi përkeqësimi  në 4 drejtime:

1. Shqipëria nuk ka bërë progres përsa i përket reformës në sektorin e energjisë elektrike. “Reformat e këtij viti janë vetëm në letër”- theksoi ai;

2. Reformat strukturore te sektorit duhet të përshpejtohen. Ngecja e tyre po dëmton liberalizimin e sektorit si kusht i nevojshëm për shëndoshjen financiare të tij.

3. Ka vonesa të mëdha të ndarjes së OSHEE në tre kompanitë e veçanta sipas Direktivave të BE-së dhe angazhimeve të marra nga qeveria shqiptare për liberalizimin e tregut. Kjo reformë mbi të gjitha do të jetë në dobi të konsumatorit familjar.

4. Shqipëria po vuan mungesën e investitorëve të huaj në energjinë e rinovueshme. Kjo për shkak të politikave qeveritare, klimës së keqe për të bërë biznes dhe mungesës së sigurisë ligjore për kompanitë e huaja në Shqipëri.

Në këtë raport Shqipëria vlerësohet me ecuri shumë të ulët, me vetëm 50% të pikëve të mundshme. Ky rezultat është edhe më i ulët se viti i kaluar.

Qëndrimi i Sekretariatit është gjithashtu kritik kundrejt performacës së OSHEE. “Humbjet në sistemin e shpërndarjes janë të larta dhe kjo gjë po rrezikon financat e OSHEE. Kështu nuk mund të vazhdohet më”, – deklaroi Kopac.

Gjendja e vështirë financiare e OSHEE tashmë nuk është më sekret.

Mjaftoi vetëm një vit thatësirë për të nxjerrë zbuluar keqmenaxhimin financiar të kompanisë. Vetë kompania pohon se është në vështirësi të mëdha likuiditeti.

OSHEE deklaron se është e paaftë të paguajë detyrimet e saj, duke rrëzuar propagandën disa vjeçare të Edi Ramës mbi performancën e OSHEE-së dhe fitimet që ka realizuar ajo.

Për shkak të menaxhimit të keq, që në thelb ka vjedhjen dhe korrupsionin, sot OSHEE është në pamundësi të mbledhë borxhin e saj ndaj të tretëve. Në tetor të këtij viti, borxhi shkoi 590 milionë euro, shumë më e lartë se koha kur Edi Rama erdhi në pushtet.

Një muaj më parë edhe Fondi Monetar Ndërkombëtar deklaroi se “Shqipëria ka nevojë për reforma të thella në sektor sepse sektori është i prekur periodikisht nga humbjet financiare, nga detyrimet e ndërsjellta të ndërmarrjeve dhe entiteteve shtetërore, nga qeverisja e dobët koorporative dhe reforma gjysmake…”

Partia Demokratike është e vendosur dhe ka planin për të kapërcyer këtë krizë të thellë, të reformojë thellësisht sektorin duke synuar mbi të gjitha liberalizimin dhe transparencën e tregut të energjisë.

Kompanitë publike të sektorit do t’i nënshtrohen auditimit të thellë dhe abuzuesit me paratë publike do të përgjigjen përpara drejtësisë.

Reformat tona synojnë, mbi të gjitha, përmirësimin e cilësisë së furnizimit, duke ulur ndjeshëm çmimin e energjisë elektrike për konsumatorët familjarë dhe bizneset prodhuese.

Partia Demokratike përshendet fillimin e punës së SPAK-ut dhe mbështet funksionimin e pavarur të kësaj strukture.  Fillimi menjëherë nga puna dhe ndëshkimi i krimit të organizuar dhe korrupsionit duhet të bëhet në mënyrë profesionale, të paanshme dhe të vendosur.

Partia Demokratike, e cila ka miratuar ligjin për ngritjen e SPAK dhe të Byrosë Kombëtare të Hetimit, ka vullnetin për t’i dhënë besim dhe për të mos paragjykuar asnjë prej prokurorëve në përbërje të kësaj strukture, pavarësisht vendimeve të disa prej tyre, në të shkuarën.

Është koha që prokurorët të ngrihen në lartësinë e detyrës dhe të përmbushin pritshmërinë e qytetarëve shqiptarë për t’i dhënë fund pandëshkueshmërisë së krimit të organizuar, promovuesve të kriminelëve në politikë dhe zyrtarëve të korruptuar.

Shqipëria ka një shans të ri dhe real për të luftuar krimin e organizuar dhe korrupsionin në nivelet më të larta, nga kriminelët me mbështetje qeveritare, tek politikanët dhe zyrtarët e lartë.

Partia Demokratike falenderon Shtetet e Bashkuara të Amerikës për ndihmën e dhënë deri më tani për bërjen funksionale të SPAK dhe për gatishmërinë e treguar për të vijuar mbështetjen për funksionimin e pavarur të SPAK.

·        Duke dënuar me burg opozitën dhe duke i mbyllur gojën medias, Edi Rama i ndihmuar nga krimi i organizuar, ka hedhur sot në erë dy kolonat kryesore të demokracisë në Shqipëri
 

·        Gjyqtari Artan Gjermeni, i cili dënoi sot pa prova Ervin Salianjin dhe gazetarin Jetmir Olldashi është as më pak e as më shumë, anëtar i bandës së Lushnjës, e cila ka nisur të gjallërohet sërish nën pushtetin e Edi Ramës
 

·        PD gëzon besimin e shumicës së shqiptarëve. Bashkë me ta, do të bëjmë të mundur që, me zgjedhje të lira e të ndershme, të shpëtojmë vendin nga një kryeministër që sundon me një grusht kriminelësh dhe oligarkësh

·        Partia Demokratike është dhe do të jetë në krahun e çdo gazetari, në krahun e çdo qytetari, që denoncon padrejtësinë, korrupsionin dhe lidhjet e Edi Ramës me krimin e organizuar

·        Mesazhi për Edi Ramën është i thjeshtë dhe i qartë: I ke bërë llogaritë gabim!

DEKLARATË E KRYETARIT TË PARTISË DEMOKRATIKE, LULZIM BASHA

Edi Rama ka hedhur sot në erë dy prej kolonave kryesore të demokracisë në Shqipëri. Sot, ai dënoi me vendim gjykate, pa asnjë provë, opozitën dhe median që zbuluan dhe denoncuan përshirjen në trafikun e drogës të vëllait të Ministrit të brendshëm të Edi Ramës.  Po sot, Edi Rama miraton ligjin që synon t’i mbyllë gojën medias online për të mos denoncuar aferat e rënda korruptive të tij dhe të familjes së tij, afera që fusin dorën në xhepat e shqiptarëve për t’i vjedhur ata, në mënyrë që të pasurojnë Edi Ramën.

Të dy këto vendime, që minojnë demokracinë dhe shtetin e të drejtës në Shqipëri, Edi Rama i merr sot, i ndihmuar nga krimi i organizuar. Me krimin e organizuar ai vodhi dhe bleu votat e shqiptarëve për të sunduar në parlamentin ilegjitim. Me krimin e organizuar, Edi Rama sundon drejtësinë.

Gjyqtari Artan Gjermeni, i cili dënoi sot pa prova Ervin Salianjin dhe gazetarin Jetmir Olldashi është as më pak e as më shumë, anëtar i bandës së Lushnjës, e cila ka nisur të gjallërohet sërish nën pushtetin e Edi Ramës.

Për Partinë Demokratike dhe për mua personalisht, nuk ka asnjë dyshim se ushtari i bandës së Lushnjës e kishte marrë prej kohësh vendimin politik që Edi Rama e shpalli prej ditës së parë të publikimit të skandalit Xhafaj. Për ne nuk ka asnjë surprizë për hakmarrjen e Edi Ramës ndaj deputetit Ervin Salianji dhe gazetarit Jetmir Olldashi që ekspozuan qeverinë e tij si të përfshirë direkt në trafikun e drogës.

Në këto 6 vjet ne jemi përballur me padrejtësinë dhe hakmarrjen politike të Edi Ramës sa herë kemi denoncuar lidhjet e tij me krimin e organizuar dhe me aferat korruptive. Për pothuajse të gjithë përfaqësuesit politikë të Partisë Demokratike, drejtësia e kapur ka vendosur sipas urdhërit dhe interesit politik të Edi Ramës, duke u bërë palë me këtë pushtet të kriminalizuar dhe të korruptuar.

A na e ka mbyllur gojën dot ne Edi Rama me të korruptuarit dhe kriminelët e tij në polici, prokurori dhe gjyqësor? Jo! Dhe nuk ka për t’ia dalë kurrë!

Ne jemi Partia Demokratike! Ne jemi sot partia që gëzon besimin e shumicës dërrmuese të shqiptarëve. Bashkë me ta, do të bëjmë të mundur që, me zgjedhje të lira e të ndershme, të shpëtojmë vendin nga një kryeministër që sundon me një grusht kriminelësh dhe oligarkësh.

Partia Demokratike është dhe do të jetë në krahun e çdo gazetari, në krahun e çdo qytetari, që denoncon padrejtësinë, korrupsionin dhe lidhjet e Edi Ramës, familjes apo qeverisë së tij me krimin e organizuar.

Mesazhi im për Edi Ramën është i thjeshtë dhe i qartë: I ke bërë llogaritë gabim!

• Përfaqësuesi i opozitës, Ervin Salianji dhe gazetarit Jetmir Olldashit, nuk u dënuan nga drejtësia por nga anëtari i bandës së Lushnjes, Artan Gjermeni.
• Në momentin kur Artan Gjermeni do të kalojë në vetting, do të vërtetohet fakti se ai është anëtar i bandës së Lushnjes.

DEKLARATA E SEKRETARIT TË PËRGJITHSHËM TË PD, GAZMENT BARDHI, DHE ISH-DEPUTETIT ERVIN SALIANJI NGA GJYKATA PENALE E TIRANËS

Një vendin i pritshëm. Asnjë surprizë që gjyqtari anëtar i bandës së Lushnjes, Artan Gjermeni, do të merrte këtë vendin ndaj një përfaqësuesi të Partisë Demokratike, që ka futur në burg bashkëpunëtorët e tij, anëtarë të Bandës së Lushnjes.

Mbajeni mend këtë që unë po ju them. Në momentin e parë që zotëria do të kalojë në vetting, do të shikoni që kjo që unë them sot, është tërësisht e vërtetë.

Sot, Ervin Salianji dhe gazetari Jetmir Olldashi, nuk është dënuar nga drejtësia, nuk është dënuar nga gjykata, është dënuar nga një anëtar i Bandës së Lushnjes.

Sikundër prokuroria edhe gjykata, kanë marrë një vendim politik për të mbrojtur bandën e Agron Xhafajt, për të mbrojtur trafikantët e drogës në qytetin e Vlorës, dhe për ti mbyllur gojën opozitës dhe medias.

I garantojmë të gjithë qytetarët, që ky vendim për dënimin e përfaqësuesit të opozitës, Ervin Salianji, dhe të gazetarit Jetmir Olldashi, jo vetëm që nuk do të na ndalë në betejën e përditëshme me qeverinë që bashkëpunon me krimin e organizuar, por na bën më të fortë për të vazhduar betejën, jo vetëm me përfaqësuesit e krimit në qeveri, por edhe me përfaqësuesit e krimit në prokurori dhe në gjykatë.

Pyetje: Zoti Bardhi, ku e bazoni këtë deklaratë, është një akuzë shumë e fortë në drejtim të një gjyqtari?

Gazment Bardhi: Ky është një fakt i mirënjohur. E ripërsëris: Në momentin e parë që përfaqësuesi i Bandës së Lushnjes, Artan Gjermeni, do të dalë në procesin e vettingut do të shikoni edhe ju mediat dhe opinioni publik, provat që Artan Gjermeni nuk është thjeshtë, ky gjykatës, një bashkëpunëtor i Bandës së Lushnjes, është anëtar i bandës së Lushnjes.

Sot Ervin Salianji, e përsëris, është dënuar nga Banda e Lushnjes, pse ka sulmuar bandën e Agron Xhafajt.

Ankesa sapo ky zotëri, anëtar i Bandës së Lushnjes, e përsëris: gjyqtari Artan Gjermeni, është anëtar i bandës së Lushnjes. Dhe ky është një fat për të cilin opinioni publik, ky nuk është një fakt që e them unë për herë të parë, është një fakt publik pavarësisht se shpesh, media, edhe për shkak të zhvillimeve, e harron këtë fakt. Artan Gjermeni, përveçse është anëtar militant i Partisë Socialiste, është anëtar i Bandës së Lushnjes.

Sot është bërë bashkë Banda e Lushnjes me bandën e Agron Xhafajt, të cilët kanë bashkëpunaur edhe në të shkuarën për trafikun e drogës në jug të Shqipërisë. Dhe ky vendin i sotëm, është konfirmim i kësaj aleance.

E ripërsëris, për të mbrotjur bandën e Agron Xhafajt, Ervin Salianji dhe gazetari Jetmir Olldashi, sot janë dënuar nga një anëtar i Bandës së Lushnjes.

• Vendimi sipas dëshirës politike të kryeministrit dhe në ambicien politike të gjyqtarit anëtarë të bandave të Lushnjës

• Nuk ka mafie, nuk ka llum, nuk ka llucë, nuk ka qelbësira në këtë vend që as nuk më ndalin dot dhe e ritheksoj as nuk më izolojnë dot

Ervin Salianji: Siç ishte e pritshme, siç e kam deklaruar, siç e kemi deklaruar prej kohësh, një pretencë e shkruar, një vendimmarrje e parashkruar dhe e bërë gati kohë më përpara. As për sy e faqe nuk priti për ta dhënë apo për të marrë kohën e nevojshme pas provave që ne depozituam. Ishte një vendimmarrje e shkruar shumë kohë më përpara, e  pabazuar në ligj, e pabazuare në prova, e pabazuar në fakte. E bazuar vetëm në dëshirën politike të kryeministrit dhe në ambicien politike të gjyqtarit anëtarë të bandave të Lushnjës dhe të akuzuar me lidhje të forta me bandat dhe me krimin në këtë vend. Famëkeq në lidhje me vendimet që ka dhënë për lirimin e bandave dhe famëkeq edhe në vendimin e sotëm i cili i shërben drejtpërdrejtë vetëm karrierës së vet pas gjyqësore, për të hyrë në rrugën politike me Partinë Socialiste dhe për t’i shërbyer verbërisht shokëve të vet, të cilët e ka vënë.

Ka disa shkelje të qarta të cilat e bënin që ky vendim të ishte në këtë konkluzion shumë kohë më përpara. Dhe më kryesorja është që po ky gjyqtar në një çështje tjetër të mëparshme timen me një përfaqësues lokal të PS është tërhequr për një konflikt interesi. Ndërkohë që kemi kërkuar tre herë përjashtimin e tij dhe ka qëndruar për ti shërbyer verbërisht dhe në kundërshtim me ligjin PS dhe grupit të strukturuar kriminal.

Pa diskutim që nuk ka mafie, nuk ka llum, nuk ka llucë, nuk ka qelbësira në këtë vend që as nuk më ndalin dot dhe e ritheksoj as nuk më izolojnë dot. Është e qartë fare që kanë tërhequr në llum edhe në një llucë të vogël këtu ku janë edhe ndihen komod, për të kontrolluar edhe disa prokurorë dhe gjyqtarin që e kanë të partisë së vet për të tentuar të devijojnë të vërtetën për t’i shërbyer mafies. Pa diskutim që jo vetëm që nuk më trembin por më bën akoma, jashtë modestisë, më bën të privilegjuar që jam unë që jam në 50 procese gjyqësore me përfaqësues të Partisë Socialiste, përfshirë edhe procesin e sotëm.

Më bën që të jem më i motivuar, edhe më i fortë, edhe më denoncues edhe me emra konkretë ndaj këtij grupi të strukturuar kriminal të cilat do t’i bëj publike gjatë javëve në vijim dhe nuk më tremb aspak përveç parashikimit që ishte i saktë që fjala e kryeministrit dhe i përfaqësuesve të Partisë Socialiste për të intimiduar opozitën duke krijuar një farsë politike dhe për ta kërcënuar se ky nuk është një kërcënim për burgosje, por është një kërcënim për karrierën politike të kujtdo që denoncon. Nuk ka asnjë diskutim që pjesë e drejtësisë së vjetër që janë këta dhe llumit në të cilin janë përfshirë dhe kanë mbetur në sistemin gjyqësor do të demontohen dhe çmontohen siç kanë bërë prokurorët dhe gjyqtarët e mëparshëm.

Së pari është apelimi, pa diskutim më pas ndjekja në çdo instancë gjyqësore dhe nëse vazhdohet me këtë situatë deri në Gjykatën e Strasburgut që të zbulohet tërësisht e vërteta.

E sigurt është që gjyqtari është shok me Xhafajn dhe bandat në këtë vend.

Sot i ka bërë një shërbim jo vetëm PS-së por vetë bandave sepse me vendimin e sotëm pushohet dhe mbyllet çështja për trafik narkotikësh ndaj Agron Xhafajt dhe shpërdorimi i detyrës ndaj Fatmir Xhafajt.

Do kemi kohë për të folur për skandale të tjera.​

Kryetari i opozitës Lulzim Basha, ishte sot në Shënavlash, njësi administrative e bashkisë së Durrësit, ku pa nga afër gjendjen e banorëve të dëmtuar nga tërmeti.

Basha u njoh nga afër me situatën, ku ishin vetë banorët ata që deklaruan se janë lënë në harresë nga shteti.

“Nuk jemi mirë hiç. Prej 3 javësh rrimë në plastmas, vetë i gjashti. Njeri me na pa kërkush jo. Kanë vu shiritin dhe s’ka ardhur askush me na pa. As ushqim asgjë. Shkova në komunë, por më tha: ndihma. Nuk dua ndihma, dua një çadër se jam jashtë. Çadër nuk ka”, – thotë një i moshuar teksa tregon edhe një çadër të sajuar me plastmas në oborrin e shtëpisë së rrethuar me shirit nga policia.

Banorët apeluan për ndihmë, pasi nuk dinë se çfarë të bëjnë. Nuk kanë as ku të fusin kokën, ndërkohë që rindërtimi banesave nuk është i mundur pa fonde. Gjatë bisedës me banorët e Shënavlashit, Basha ripërsëriti edhe njëherë thirrjen për qeverinë që të lëvrojë fondet që banesat e fshatit të ndërtohen nga vetë banorët që të mos presin me vite.

“Po ta rregullojnë ata e bëjnë me tender. Gjysmat e parave do ti vjedhin, mos më shumë. Prandaj, në veçanti për shtëpitë në fshat, zgjidhja është fare e thjeshtë: Vlerësohet dëmi dhe nxirret fondi për të ndërtuar shtëpitë”
Shefi i opozitës e quajti situatën pas tërmetit dramatike dhe drejtoi gishtin tek shteti.

“Jemi shumë të shqetësuar nga kjo situatë. Kudo e njëjta situatë. Filloi java e katërt dhe shumica e familjeve janë pa çadra, pa siguri, pa qartësi për banesat e tyre. Tek Isa, komshiu juaj isha, kishin vënë një shirit para disa ditësh dhe asgjë. As kishin ardhur me i pa, asgjë fare. Me dhjetëra mijëra familje në këtë situatë janë. E pamundur të vazhdohet kështu. Kjo është e papranueshme. Kjo nuk është fatkeqësi natyrore më. Kjo është fatkeqësi njerëzore. Ky është dështim i shtetit. Shteti nuk mund të lejë as dy familje kështu, jo me dhjetëra mijëra familje”, – tha Basha, ndërsa apeloi banoret që të mos rrezikojnë jetën duke banuar në këto shtëpi.

“Në mënyrën më absolute nuk do të futeni brenda pa pasur një letër që ju thotë futini brenda, me firmë e garanci nga shteti. Kush guxon me e dhënë atë letër, të marrë përgjegjësinë. Atëherë po. Nuk besoj se ka njeri guximin të vijë e t’ju thotë: futuni brenda në këtë shtëpi.”

Në secilën prej banesave të Shënavlashit, Basha merr të njëjtën përgjigje: Askush nuk ka shkuar ti shohë e tu japë zgjidhje.

“Tërmeti është forcë e natyrës, është punë e Zotit. Përgjigja ndaj tërmetit, shpëtimi i njerëzve, ardhja në ndihmë njerëzve që janë pa shtëpi, mbajtja e ndihmës hapur në kuptimin e ushqimeve, medikamenteve, ndihmës për të moshuarit, çuarjes së fëmijëve në shkollë, kjo është detyrë e shtetit, e atij që merr taksat e shqiptarëve, e atij që ka qesen e taksave. Kjo punë pa para nuk bëhet. Ne fjalën kemi, ata që kanë qesen e parave duhet ta zgjidhin dhe në vend që të bëjnë dërr-dërr nga mëngjesi deri në darkë, të sjellin paret”, – deklaroi Basha duke iu përgjigjur ankesave të banorëve të kësaj zone për harresën nga shteti.

Në një banesë në qendër të fshatit, familjarët thonë se askush nuk i ka parë e dëgjuar. Madje ata hedhin dyshime se kjo është edhe ndarje politike.
“Ne me sa duket meqë jemi demokratë, na kanë ndjekë më tepër këto…”, – thotë i zoti i shtëpisë, shqetësim që merr menjëherë apelin e fortë të kryetarit demokrat.

“Ju ka ndarë politikisht? Këtë më thanë. Vetëm 3 veta kanë marrë bonus qiraje. Kjo është kriminale. Kjo nuk është fushatë elektorale. Si mundesh me i nda në socialistë dhe demokratë, njerëzit që u janë prishur shtëpitë! Ky është dështim, është korrupsion, kjo është babëzi. Ky është dështim total.

Katër javë pasi ka ndodhur kjo, mos me ardhë me i pa njerëzit, mos me iu thënë hyn apo nuk hyn. Nëse nuk hyn, ja ku i ke paratë, rregulloje shtëpinë”, – apeloi kryetari i opozitës.

Në Shënavlash, janë mbi 40 shtëpi të dëmtuara nga tërmeti dhe qindra banorë janë pa një vend ku të fusin kokën.

• Miratimi i paketës së censurës nga parlamenti i cunguar dhe ilegjitim është një shpallje lufte ndaj themeleve të demokracisë, është atentat ndaj çdo qytetari shqiptar.

• Mosinformimi dhe keqinformimi i qytetarëve është një nga objektivat kryesorë strategjikë të Edi Ramës dhe qeverisë së tij. Arrestimet arbitrare, presionet financiare e penale janë për këdo që cënon objektivin e kryeministrit.

• Cënimi i interesit publik, duke instaluar me ligj censurën është i papranueshëm, është një vijë e kuqe. Nëse çmenduria për paketën e censurës çohet deri në fund, në ditët e para të qeverisjes sonë, ne do ta zhbëjmë këtë paketë.

• Paketa e censurës ka për qëllim asgjesimin e shtyllave kryesore të një shoqërie të lirë e demokratike, lirisë politike, lirisë së zgjedhjes, shtetit të së drejtës, drejtësinë e pavarur dhe median e lirë.

• Nuk ka ironi më të madhe në historinë e OSBE që shteti i përzgjedhur për të marrë kryesimin e organizatës, e nis atë me një paralajmërim për një sjellje rrugaçërore, kriminale në raport me një nga kolonat kryesore për të cilën kjo organizatë ekziston – lirinë e medias.

• Objektivi ynë është të sigurojmë të gjithë instrumentet për të garantuar standardet europiane për lirinë e shprehjes në lidhje me normat, praktikat e vetërregullimit dhe të autonomisë së medias.

• Bashkë me gazetarët dhe shoqatat e tyre, do të ndërmarrim çdo hap brenda dhe jashtë vendit për të pezulluar, zmbrapsur dhe anulluar çdo masë të tillë arbitrare.

• Kjo betejë do të fitohet!  Nëse opozita dhe mediat e humbin këtë betejë Shqipëria e humb këtë betejë. Këtë ne nuk mund ta lejojmë. Këtë ne nuk do ta pranojmë!

FJALA HAPËSE E KRYETARIT TË PARTISE DEMOKRATIKE NË TRYEZËN PER LIRINË E MEDIAS

Mirëse keni ardhur të nderuar përfaqësues të medias!

Faleminderit që i jeni përgjigjur ftesës sime dhe të opozitës së bashkuar dy ditë para se Kuvendi i cunguar i Shqipërisë të ndërmarrë një akt të paprecedentë jo vetëm për Shqipërinë, por për gjithë hapësirën europiane.

Ndërsa presim akoma disa kolegë që po afrohen për shkak të trafikut, me vonesë, më lejoni ta nis me një, ne i themi anekdotë, por në fakt ka ndodhur në të vërtetë, ndonëse çështja nuk është aspak për të qeshur.

Gjatë Luftës së Dytë Botërore, një gazetar e quajti Winston Churchill budalla. Dhe u arrestua. Të nesërmen, në Parlament opozita ishte bërë gati që ta piqte kryeministrin. Çfarë u bë? Britania u kthye në një shtet policor? Winston Churchill mori fjalën dhe tha “Të qartësojmë diçka, personi nuk u arrestua, sepse ofendoi Kryeministrin e Britanisë së Madhe, por sepse nxori një sekret shtetëror.”

Nuk e di nëse është e vërtetë apo anekdotë, por kjo me të cilin po ballafaqohemi nuk është anekdotë. Është vazhdimi i pandërprerë kundër medias, kundër gazetarëve, kundër lirisë së shprehjes. Dua t’ju them që në fillim që këtë ftesë nuk e kemi thirrur vetëm për të treguar solidaritetin me ju, as nuk jemi këtu në pozita paternalizmi për t’ju marrë nën krahët e opozitës, sepse ju nuk keni nevojë. Keni bërë luftë të jashtëzakonshme. Ne kemi detyrën, nderin dhe privilegjin të jemi në krahun tuaj në këtë betejë, sepse pa lirinë e medias, pa lirinë e shprehjes, nuk ka liri politike.

Dua ta them fare qartë që në fillim, që këtu jemi si partnerë, jo partnerë ne në interesin tonë dhe ju në interesin tuaj, por partnerë në një interes: partnerë në interesin e informimit të qytetarëve. Kjo është ajo që na intereson ne. Kjo është detyra juaj, informimi i qytetarëve.

Mosinformimi i tyre dhe keqinformimi i tyre është një nga objektivat kryesorë strategjikë të gjithë sjelljes së kësaj qeverie dhe të këtij kryeministri, të gjithë masave të propozuara, të arrestimeve arbitrare dhe shoqërimeve, presioneve financiare, penale e të gjithanshme, ndaj çdo individi që kërcënon këtë objektiv strategjik të këtij kryeministri, të kësaj qeverie, të ngushtojë çdo ditë hapësirat e informimit të qytetarëve.

Kjo për ne është e papranueshme, për PD, për secilin prej aleatëve tanë, për opozitën e bashkuar kjo është një vijë e kuqe, siç do të ishte në çdo vend sadopak demokratik.

Nuk dua të marr me radhë shembujt që ilustrojnë përshkallëzimin e kësaj lufte të shpallur kundër medias, kundër gazetarisë, kundër lirisë së shprehjes, sepse këtu në këtë tavolinë kemi mjaftueshëm prej kolegëve tuaj që janë mishërim i këtij degjenerimi të paimagjinueshëm të lirisë së medias në 30 vite dhe të presionit të jashtëzakonshëm, që po bëhet për të kulmuar në propozimin që do të shkojë në Kuvend ditën e mërkurë, propozimin për të instaluar edhe me ligj censurën.

Dua t’ju them tre gjëra:

1. Së pari, të vetëdijshëm edhe për mangësitë tona dhe për problemet tona, edhe sot si opozitë, edhe dje si qeverisje, dua t’ju them se synimi ynë, objektivi ynë është t’i japim vendit jo vetëm një kuadër ligjor por edhe të gjitha instrumentet për të mbyllur një herë e përgjithmonë derën e hambarit të shëmtuar të tranzicionit përsa i përket lirisë së medias, për ta zhvendosur median dhe lirinë e shprehjes përfundimisht në hapësirën europiane sa i përket lirisë, standardeve, normave, praktikave të vetë rregullimit dhe të autonomisë, sa i përket legjislacionit të medias, rolit të gazetarëve dhe të shoqatave të gazetarisë.

2. Së dyti, padiskutim që, nëse çmenduria çohet deri në fund, ditën e premte nga parlamenti i cunguar dhe ilegjitim, opozita jo vetëm që nuk do ta njohë, por do të bëjë çdo gjë që sa më shpejt, sapo të ketë mundësinë dhe përgjegjësinë e qeverisjes ta zhbëjë këtë legjislacion. Ndërkohë që do të ndërmarrë të gjitha hapat e nevojshëm në bashkërendim me ju, me shoqatat që ju përfaqësoni, brenda dhe jashtë vendit për të pezulluar, zmbrapsur dhe anulluar çdo masë të tillë arbitrare.

3. Së treti, dua t’ju them se këtë partneritet, për hir të mirë informimit të qytetarëve, pa të cilën nuk mund të ketë demokraci funksionale, nuk mund të ketë një shoqëri të lirë, duam ta përkthejmë në një bashkëpunim konkret, i cili, jo nesër, as pasnesër, por sot, në kuptimin metaforik të fjalës, t’i japë çdo gazetari, çdo punonjësi të medias, çdo qytetari shqiptar konturet dhe përmbajtjen e një korpusi legjislativ dhe rregullator që do të varrosë njëherë e përgjithmonë mundësitë e një qeverie nesër për ta trajtuar pushtetin e katërt – siç jemi mësuar rëndom këto 6 vite, por edhe gjatë tranzicionit apo siç e trajton pushtetin e tretë, apo pushtetin e dytë – si një shtojcë të qeverisë, apo përndryshe, si një bezdi që i duhet mbyllur goja me kërcënime, me para apo me çdo formë tjetër.

Kjo që po ndodh është dramatike, por jam dakord me analizën e një prej kolegëve tuaj se është vetëm një akt tjetër në një dramë të madhe që ka nisur të shpaloset dhe që ka për qëllim asgjësimin e të gjithë shtyllave kryesore të një shoqërie të lirë e demokratike, lirisë politike, lirisë së zgjedhjes, shtetit të së drejtës, duke e zëvendësuar me shtetin e fermanit, respektit për kushtetutën dhe garantimin e të drejtave dhe lirive themelore të njeriut, drejtësinë e pavarur dhe median e lirë.

Po e përfundoj me faktin që nuk besoj se ka ironi më të madhe në historinë e Organizatës për Siguri dhe Bashkëpunim në Europë, që shteti i përzgjedhur, në kulmin e një krize politike, për të marrë kryesimin e kësaj organizate, e nis kryesimin e kësaj organizate me një paralajmërim për një sjellje rrugaçërore, kriminale, në raport me një nga kolonat kryesore që kjo organizatë ekziston – lirinë e medias.

Me këtë nuk dua të them asgjë më shumë e asgjë më pak sesa mirënjohjen për të gjithë ata përfaqësues të institucioneve ndërkombëtare, që kanë ngritur zërin dhe i janë përgjigjur shqetësimit legjitim nga ju dhe nga shoqatat e organizatat tuaja. Kam dhe një thirrje për të gjithë faktorët politikë, jopolitikë, shoqërore dhe ndërgjegjes qytetare për t’u bashkuar në këtë betejë, në këtë kauzë, që, natyrisht, është e gazetarëve, është e medias, padyshim është e politikës, por, mbi të gjitha, është e qytetarëve.

E mbyll duke thënë edhe një herë se këtu nuk na bashkon thjesht dhe vetëm simpatia, dëshira për të mbrojtur gazetarët, për të mbrojtur luftëtarët e fjalës së lirë. Na bashkon diçka shumë më fondamentale, interesi publik.

Përpjekja për të shkatërruar një nga instrumentet kryesorë të demokracisë, që është mirë informimi i qytetarëve, është thjesht kriminale dhe duhet të ketë  një përgjigje totale, frontale dhe proporcionale.

Ju faleminderit!

NDËRHYRJA E DYTË E KRYETARIT TË PD, LULZIM BASHA, PASI GAZETARI ARMAND SHKULLAKU KËRKOI, MES TË TJERASH, QË OPOZITA TË JETË MODELI MË I MIRË I TRANSPARENCËS, DUKE BËRË KONTRASTIN ME QEVERINË DHE BASHKINË. 

Dua të them tre gjëra qartë.

E para, që kjo është çështje kulture, kulture e audiencës, dhe interesi ynë kryesor është informimi i qytetarëve, kulture e aktorëve, kryesisht e aktorëve politikë dhe natyrisht e kulturës së medias.

Prej kohësh është kërkuar një mea culpa dhe, kur mea culpa është bërë, nuk është dëgjuar.

Ta them fare qartë, mea culpa e Partisë Demokratike për gjithçka në këto 30 vite, nuk është thjesht dhe vetëm një deklaratë e imja, si kryetar i Partisë Demokratike për gjithçka në këto 30 vite, edhe për ekseset e periudhës ’92-’97; edhe për pjesën tjetër të borxhit moral ndaj medias, ndonëse mendoj se në periudhën e qeverisjes së kaluar ia kemi dalë të vendosim standarde, ndoshta standarde jo ekzistuese, siç ishin ato të mosçuarjes për shpifje të asnjë gazetari të vetëm në 8 vite të qeverisjes së Partisë Demokratike.

Por mea culpa më e fuqishme është ajo që ju kërkoni, me të drejtë, dhe unë jam sot këtu për të konfirmuar se jam sot i gatshëm ta bëj në emër të Partisë Demokratike, në emër të opozitës së bashkuar, një zotim solemn, zyrtarisht, publik:

Së pari, për anulimin e këtij akti dhe çdo akti tjetër ekzistues apo potencialisht për sa kohë kjo qeveri është në pushtet, për sa kohë cënon standardet minimale europiane të së drejtës së fjalës dhe shprehjes së lirë.

Së dyti, kërkesën për të hartuar së bashku një kuadër rregullator, legjislativ dhe vetërregullues i cili do të hyjë në fuqi që në javët e para të një maxhorance të re të përbërë nga opozita e bashkuar sot.

Dhe së treti, zotimin tim personal, jam i bindur do të pasohet edhe nga zotimet e aleatëve, por ata flasin secili për veten e tyre, për t’i dhënë fund çdo praktike që ka për qëllim dobësimin, apo degjenerimin, apo korruptimin e rolit të medias në transmetimin e mesazhit nga aktorët shoqërorë dhe politikë tek publiku, duke nisur me praktikën e kasetave, bllokimin e aksesit të gazetarëve dhe kamerave në çdo lloj aktiviteti apo atë që Koloreto e quajti “listë të zezë,  për të cilin ju siguroj që nuk ekziston, por në rast se perceptimi ekziston atëherë është njësoj sikur ekziston dhe që është bazë për reflektim.

Këto tre përkushtime i marr sot zyrtarisht para jush, natyrisht për të parin kërkohen të hidhen hapa të mëtejshëm, të cilat në emër të opozitës së bashkuar konfirmoj se jemi të gatshëm t’i hedhim me të gjitha shoqatat, më të 25 shoqatat e medias dhe të gazetarëve që përfaqësojnë interesin e medias dhe interesin publik nga dita e mërkurë, që është dita kur është planifikuar kalimi i këtij ligji e tutje apo edhe më përpara. Dhe për këtë mirëpres çdo formë konsultimi apo bashkëpunimi me ne, me ekspertët tanë në orët dhe ditët e ardhshme.

Faleminderit!

NDËRHYRJA E TRETË E KRYETARIT BASHA NË MBYLLJE TË TRYEZËS PËR LIRINË E MEDIAS

Edhe një herë ju falënderoj për praninë tuaj dhe për përgjigjet pozitive ndaj ftesës së Partisë Demokratike dhe opozitës së bashkuar.

Dua të përsëris shumë shkurt qëndrimet tona.;

E para, ligjet kundër fjalës së lirë janë antikushtetuese. Forumi që po i kalon është ilegjitim. Vetë procesi i planifikuar për të mërkurën është një hap më shumë në një shtet ku nuk ka më as demokraci, as shtet të së drejtës, as kontroll dhe balancë të pushteteve dhe as drejtësi të pavarur. Për Partinë Demokratike dhe opozitën e bashkuar ky akt, si shumë akte të tjera të kaluara më përpara, janë nul dhe void (ligjërisht e pavlefshme). Formalisht, ky akt do të shfuqizohet momentin e parë që shqiptarët do të na besojnë me votë të lirë dhe të ndershme për qeverisjen e vendit.

Kalimi i këtij akti është një atentat jo ndaj gazetarisë dhe opozitës, por ndaj çdo qytetari shqiptar, ndaj lirisë më themelore ,pa të cilën nuk mund të ketë liri politike, që është liria e shprehjes. Dhe në këtë kuptim është një shpallje lufte ndaj themeleve të demokracisë.

Në emër të Partisë Demokratike dhe të opozitës së bashkuar i bëj thirrje sot Partisë Socialiste të tërhiqet menjëherë nga ky plan. Përkundrazi, përgjigjja politike e opozitës ndaj shpalljes luftë ndaj këtij themeli të demokracisë do të jetë proporcionale dhe masive.

I bëj thirrje të gjithë mediave dhe punonjësve të mediave të na ndihmojnë dhe të qëndrojnë në krahun tonë dhe ne do të jemi në krahun tuaj për t’i mbrojtur këto liri themelore të qytetarëve. Ne nuk do ta bëjmë për ju dhe ju mos e bëni për ne. Por ejani ta bëjmë bashkë për çdo qytetar shqiptarë sot dhe për të shmangur atë që do të vijë nesër, nëse kjo betejë nuk fitohet.

Kjo betejë do të fitohet!  Nëse opozita dhe mediat e humbin këtë betejë Shqipëria e humb këtë betejë. Këtë ne nuk mund ta lejojmë. Këtë ne nuk do ta pranojmë!

·       Edi Rama mbrojti kriminelin e qeverisë së tij dhe inskenoi një proces të manipuluar për të dënuar opozitën, duke keqpërdorur prokurorine dhe policinë e shtetit.

·       Vendimi i prokurorisë, i orientuar që ditën e parë nga Edi Rama dhe Fatmir Xhafaj, tregoi se drejtësia e pavarur në Shqipëri është një iluzion

·       Kushdo që sot po e keqpërdor drejtësinë në shërbim të këtij pushteti të inkriminuar, do të mbajnë përgjegjësi para ligjit për shpërdorim detyre dhe për favorizimin e mafias

DEKLARATË E ISH-DEPUTETIT TË PARTISË DEMOKRATIKE, ERVIN SALIANJI

Një vit e gjysëm pas publikimit të skandalit të përfshirjes në trafik droge të Agron Xhafajt, vëllait të Ministrit të Brendshëm të kohës Fatmir Xhafaj, drejtësia e kontrolluar nga Edi Rama ka bërë dy veprime domethënëse.

1.   Për Agron Xhafajn nuk ka asnjë akuzë për përfshirje në trafik droge.

2.   Për opozitën dhe median që e denoncoi këtë skandal të qeverisë së Edi Ramës prokuroria ka kërkuar burgosjen.

Përpara se gjykata të marrë një vendim për këtë çështje, është në detyrimin tonë për të risjellë në vëmendjen e opinionit publik se procesi kundër opozitës dhe gazetarit Jetmir Olldashi është një proces i montuar, sipas urdhrit politik të Edi Ramës që prej fillimit të bërjes publik të skandalit.

EDI RAMA SINKRON

Gjatë gjithë këtij 1 viti e gjysëm, Edi Rama, duke përdorur pushtetin politik mbi policinë dhe prokurorinë ka sajuar dosjen kundër opozitës, ka shpikur dhe paguar aktorët kundër saj, ka manipuluar dosjen, duke hequr prej saj përgjimet zyrtare që implikojnë në mënyrë flagrante dëshmitarin e saj të rremë dhe drejtues të lartë të policisë kundër opozitës në një proces të montuar politik.

PËRGJIMET SINKRON

Përgjimet zyrtare të prokurorisë, të patranskriptuara prej saj, në shkelje flagrante të ligjit, faktojnë 2 të vërteta:
1.   vënien e qeverisë në shërbim të krimit dhe të mbulimit të tij për të shpëtuar qeverinë e Ramës

2.   sajimin e dëshmitarit të rremë. Gjithçka kemi thënë që nga zbulimi i skandalit, provohet i vërtetë.

Përgjimi zyrtar me drejtorin e policisë së Fierit, fakton se policia është vënë në shërbim të qëllimit politik të qeverisë për të fshehur të vërtetën e vëllait të ministrit të brendshëm dhe për të akuzuar opozitën.

Dokumentat zyrtare faktojnë se përvec gazetarit që po investigonte, Agron Xhafaj dhe Babalja ishin në survejim nga Shërbimi sekret dhe nga prokuroria për transportin e një sasie marramendëse droge.

Përgjimet zyrtare faktojnë se, Fredi Alizoti, pranon që po merr para dhe se, në këmbim të tyre, nuk e ka problem të bëjë burg duke u shfaqur si dëshmitari rremë i qeverisë.

Përgjimet tregojnë se si prokurori i shkarkuar nga vetingu, flet me dëshmitarin e rremë të qeverisë dhe e pret sa herë që ai ka nevojë, jashtë çdo procedure të lejueshme.

Faktet tregojnë degradimin e shtetit dhe përfshirjen në trafikun e drogës, se në qeverinë e Ramës pushtetin real e kanë kriminelët. Tregon edhe nënshtrimin e policisë, prokurorisë për interesa kriminale politike kundër kundërshtarit politik që denoncon lidhjet me krimin.

Faktet në dosje tregojnë, më së paku, shpërdorimin e detyrës nga ministri i brendshëm, drejtuesit e policisë, implikim të numrit dy të partisë në pushtet në një çështje që përfshin në krim gjithë shtetin për sajimin e një dëshmitari të rremë kundër opozitës.

Për fat të keq, asgjë nga këto nuk është bërë pjesë e hetimit. Pjesë e hetimit është bërë vetëm opozita dhe media, me një akuzë qsharake, të pabazuar në prova, të sajuar politikisht.

Kjo çështje kishte vetëm një zgjidhje. Ose të dënohej për trafik droge vëllai i ministrit të brendshëm, duke faktuar politikën qeveritare të favorizimit të trafikut të drogë,s ose të dënohej opozita që e denoncoi atë.
Edi Rama mbrojti kriminelin e qeverisë së tij dhe inskenoi një proces të manipuluar për të dënuar opozitën, duke keqpërdorur prokurorine dhe policinë e shtetit.

Vendimi i prokurorisë, i orientuar që ditën e parë nga Edi Rama dhe Fatmir Xhafaj, tregoi se drejtësia e pavarur në Shqipëri është një iluzion.

Kushdo që përfshihet në fabrikimin dhe montimin e procesit politik për të dënuar opozitën dhe median, për të mbrojtur krimin e organizuar, të lidhur me pushtetin, do të trajtohet si  bashkëpunëtor i krimit  të organizuar.

Cilido prej personave që sot po e keqpërdorin drejtësinë në shërbim të këtij pushteti të inkriminuar, do të mbajnë përgjegjësi para ligjit për shpërdorim detyre dhe për favorizimin e mafias. Askush nuk do t’i shpëtojë dënimit!