Blog

• Amaneti dhe sakrifica e Azem Hajdarit janë shembull frymëzimi për të çuar deri në fund idealin e një Shqipërie europiane dhe demokratike.

• Plaga e 12 Shtatorit është akoma e hapur pas 21 vjetësh. Krimi vazhdon të ketë mbrojtjen dhe postet shtetërore. Pushteti nuk buron nga vota, por nga krimi dhe korrupsioni.

• E sotmja është një thirrje për bashkim mes shqiptarëve të ndershëm, që nuk e pranojnë politikën e lidhur me krimin. Mbyllja e tranzicionit dhe Shqipëria si Europa është nderimi më i madh për Azem Hajdarin.

DEKLARATË E KRYETARIT TË PARTISË DEMOKRATIKE, LULZIM BASHA

Sot shqiptarët anembanë nderojnë Azem Hajdarin, liderin e Lëvizjes Studentore të Dhjetorit 1990, kreun e Komitetit Nismëtar, themelues të partisë së parë pluraliste, të Partisë Demokratike të Shqipërisë, i cili u vra mizorisht nga kriminelët e veshur me uniformën e shtetit bashkë me shoqëruesin e tij, Besim Çerja më 12 shtator 1998.

Amaneti dhe sakrifica e Azem Hajdarit janë përjetë shembull frymëzimi për të çuar deri në fund idealin e një Shqipërie europiane, të një Shqipërie demokratike ku qytetarët janë zotër të fateve tyre, të një Shqipërie me politikë të ndarë nga krimi, ku kriminelët të jenë para drejtësisë dhe prapa hekurave dhe fatet e vendit të merren me përgjegjësi të plotë nga ata që shqiptarët i gjykojnë me votë të lirë e të ndershme si më të mirët dhe më të aftët për të marrë barrën e përgjegjësive dhe për ta çuar atë drejt finalizimit me sukses.

Sot në këtë 21 vjetor akoma është aktuale plaga e hapur më 12 shtator 1998. Krimi vazhdon të ketë uniformat, mbrojtjen dhe postet shtetërore. Shqiptarët vazhdojnë të vuajnë ekonomikisht, të jenë pa punë, të kërkojnë shpëtim rrugëve të botës, për shkak të një pushteti që nuk buron nga vota dhe nuk shpreh vullnetin e qytetarëve, por buron nga krimi dhe korrupsioni dhe i shërben krimit dhe korrupsionit.

Ndaj e sotmja është, po kështu, edhe një thirrje për bashkim, mes gjithë shqiptarëve të ndershëm, demokratëve, opozitarëve dhe socialistëve të ndershëm, që kurrë nuk e kanë pranuar dhe nuk mund ta pranojnë politikën e lidhur me krimin dhe vjedhjen me ligj si politikën e vetme për t’u bërë bashkë dhe për të hapur bashkë rrugën e Shqipërisë si e gjithë Evropa.

21 vjet pas sakrificës sublime të liderit të studentëve të dhjetorit 1990, ka ardhur koha që rinia shqiptare dhe gjithë shqiptarët e bashkuar, ta mbyllin siparin e dhimbshëm të tranzicionit dhe të hapim rrugën e vlerave të demokracisë, të lirisë, të barazisë para ligjit dhe të mundësive të barabarta për çdo shqiptar. Ky është dhe nderimi më i madh për Azem Hajdarin dhe për dhjetëra e qindra të tjerë të sakrifikuar në altarin e lirisë dhe demokracisë.

I paharruar qoftë kujtimi i tij!

Lavdi veprës së tij!

Zoti e bekoftë Shqipërinë!

• PD ka zbuluar prova të pakundërshtueshme nga filmimet e tavolinave të numërimit, që faktojnë manipulimin me votimet e 30 Qershorit nga PS.

• Videot tregojnë se përfaqësuesit e PS kanë shtuar votat me çdo formë të mundshme, përfshirë edhe fletët e votimit të pavlefshme, të cilat janë numëruar për PS.

• Disa shkelje janë: fletët e votimit merren në grup pa numëruar secilën prej tyre, në kuti ka fletë votimi pa vulë, numërim i kryer pa kamera, plotësim i fletëve bosh.

• Shkeljet janë shkelje subtanciale, të cilat bëjnë të pavlefshëm të gjithë procesin e tabulimit dhe nxjerrjes së rezultatit përfundimtar të zgjedhjeve për bashkitë përkatëse.

• Edhe raporti i OSBE/ODIHR pohon se prokuroria ka forcuar frymën e pandëshkueshmërisë, duke mos çuar përgjegjësit e manipulimit para drejtësisë.

DEKLARATË PARTIA DEMOKRATIKE, OERD BYLYKBASHI

Përshëndetje! Sot jemi para jush për të vazhduar denoncimet e PD në lidhje me procesin skandaloz të votimeve të datës 30 qershor 2019. Tashmë raporti i OSBE/ODIHR është lajmërimi për vdekjen e zgjedhjeve në Shqipëri.

Raporti i OSBE/ODIHR ka shkuar në një thellësi të tillë që nuk ka parë vetëm problemet teknike të procesit zgjedhor, por ka hyrë në gurët e themelit që garantojnë jo vetëm procesin zgjedhor, por garantojnë demokracinë dhe provon që tashmë i tërë sistemi, i cili garanton zgjedhje të lira dhe të ndershme, ka rënë dhe, për rrjedhojë, në 30 qershor nuk kishte zgjedhje.

Që prej asaj date ju e keni parë që Kryeministri Rama ka heshtur, sepse askush nga qeveria “Rama” nuk është në gjendje që të mbrojë atë që raporti i ODIHR e ka faktuar në një raport, i cili është raporti më i keq që OSBE/ODIHR-i ka shkruar ndonjëherë për zgjedhjet në Shqipëri.

Raporti evidenton qartë se në Shqipëri administrata publike është e politizuar dhe nën presionin politik, madje ka shkuar aq larg sa ka rekomanduar reformim për depolitizimin e administratës publike.

Raporti është fare i qartë se KQZ dhe Kolegji Zgjedhor vepruan si celula politike dhe nën presionin e qeverisë dhe Kryeministri Rama.

KQZ është një organ, i cili nuk garanton as minimumin e një pavarësie dhe një paanshmërie në vendimmarrje dhe vendimet e marra prej tij kanë qenë haptazi me qëllimin politik për të zhvilluar zgjedhje, që OSBE/ODIHR-i i cilësoi si zgjedhje që zhvilluan pa marrë në konsideratë interesin e elektoratit.

Një nga problemet kryesore dhe një nga rekomandimet kryesore që del nga këto zgjedhje është presioni mbi zgjedhësit.

Për fat të keq përsëri OSBE/ODIHR-i rekomandon masa të forta edhe pse në 2017 u tha për të siguruar sekretin dhe lirinë e zgjedhësve në votim. Lirinë e zgjedhësve për të votuar pa frikë nga ndëshkimi.  Këto janë shkelje të angazhimeve themelore të shtetit shqiptar karshi OSBE. Pra, janë shkelur standardet ndërkombëtare për organizimin e zgjedhjeve.

Në mënyrë të veçantë OSBE/ODIHR-i ndalet mbi presionin që është ushtruar mbi administratën, mbi zgjedhësit e administratës publike, presion për t’u bërë pjesë e aktiviteteve të PS; një fushatë pa kundërshtarë. Presion i cili është jo vetëm i dokumentuar nga opozita, por edhe i denoncuar vazhdimisht, por i vërtetuar dhe faktuar edhe raporti përfundimtar i OSBE/ODIHR.

Shantazhe deri në largimin nga vendi i punës dhe më pas edhe masa të marra drejtpërdrejtë mbi personat. Tashmë siç thotë edhe ODIHR në raportin e tij, zgjedhësve u ishte lënë vetëm një mundësi, të merrnin pjesë në votim ose të mos merrnin pjesë në votim. Dhe të gjithë janë dëshmitarë, gjithçka është faktuar në këtë dokument, që zgjedhësit kanë qenë të detyruar përdhunshëm për të marrë pjesë në votim.

Edhe pse ishte një proces i organizuar vetëm nga Partia Socialiste, fushatën e bëri e vetme, votimin e organizoi e vetme, duke refuzuar pjesëmarrjen në administrimin e zgjedhjeve komisioneve të opozitës të cilëve iu takonte me ligj të merrnin pjesë dhe OSBE/ODIHR-i e konsideron si një shkelje, duke qenë se edhe numërimin e bën vetëm tashmë ne kemi prova dhe do t’ua paraqesim provat për manipulimin skandaloz të procesit të numërimit të votave nga PS.

Nëse në vitin 2009 raporti i ODIHR-it përveçse tha se zgjedhjet arritën shumicën dërrmuese të standardeve dhe nuk pati prova për manipulim në votim, pavarësisht se Edi Rama pretendonte këtë.

Kësaj rradhe provat janë në sytë e të gjithëve për atë manipulim skandaloz që ka ndodhur në procesin e numërimit të votave. Ju tashmë jeni në dijeni të asaj që është denoncuar dhe është faktuar, sesi Komisioni Qëndror i Zgjedhjeve ka manipuluar në mënyrë të vazhdueshme pjesmarrjen në votim. Ndërkohë që pjesëmarrja ishte 15 përqind dhe shpesh herë shumë më e ulët, KQZ e manipuloi këtë pjesmarrje. Ajo që është më e rëndë, janë provat që kemi zbuluar drejtëpërdrejtë nga filmimet e tavolinave të numërimit që disponojmë nga KQZ, ku rezulton që Grupet e Numërimit dhe KZAZ-të e kontrolluara vetëm nga Partia Socialiste kanë manipuluar shifrat e numërimit që kanë dalë nga numërimi i çdo tavoline.

Kemi parë shkelje të llojeve të ndryshme, shkelje që dalin nga filmimet që ju mund t’i merrni dhe t’i verifikoni vetë.

• Është parë në mënyrë të rregullt që shpesh herë fletët e votimit janë marrë në grup dhe nuk janë numëruar veç e veç.

• Vendoseshin mbi tavolinë dhe hiqeshin pa u numëruar.

• Fletë votimi, të cilat janë numëruar jashtë kamerave të numërimit që është detyrim për transparencë nga Kodi Zgjedhor.

• Janë plotësuar fletëvotimi bosh në tavolinat e numërimit.

• Siç do të shikoni dhe nga videot, në kutitë e votimit janë gjetur fletë votimi pa vulat e Komisionit. Pra thjesht janë futur fletë votimi në kuti jashtë procesit standard të votimit.

Ne e kemi denoncuar rregullisht faktin që kutitë e votimit janë mbushur me fletë votimi nga komisionerët socialistë vetëm e vetëm për të arritur objektivin e PS dhe ju sot keni provat për këtë.

Të gjitha këto  Partia Demokratike i ka denoncuar, por deri më sot nga Prokurorja e Përgjithshme dhe nga Prokuroria e Republikës së Shqipërisë nuk ka asnjë veprim për të filluar hetimet ndaj atyre që manipulojnë me votat e shqiptarëve.

Provat janë përpara prokurorisë, por tashmë e kemi të dokumentuar edhe në raportin e OSBE-ODIHR i cili konstaton që pavarësisht asaj që u pa dhe u provua, prokuroria, policia dhe organet e tjera ligjzbatuese nuk ndërmarrë asnjë veprim për të nxjerrë të vërtetën dhe për të vënë para drejtësisë personat që manipulojnë, duke ndikuar në këtë formë, duke ndihmuar krijimin e frymës së mos ndëshkimit e cila është në themelet e përkeqësimit të standardeve zgjedhore deri më sot.

Ne jemi këtu sot edhe procesverbalet e disa Komisioneve të Administrimit Zgjedhor, KZAZ-ve, të cilat gjatë numërimit kanë deklaruar shifra në tabelat zyrtare të manipuluara dhe nga verifikimi i videove të numërimit, rezultati është krejt i ndryshëm.

Për ilustrim do t’ju jap disa raste:

Kemi rastin e KZAZ-së numër 62 në Urën Vajgurore, ku rezultati i publikuar nëpërmjet manipulimit nga KZAZ përkatëse është 8035 vota, ndërkohë që nga numërimi i votave një më një, nëpërmjet videoregjistrimit zyrtar, janë vetëm 5958 vota.

Po ashtu në KZAZ-në 67 në Pogradec janë zyrtarisht 17986 vota, ndërkohë të numëruara fletë votimit një më një janë 15487.

Pra, jo vetëm kanë manipuluar me shifrat e ojesmarrjes në votime, por kanë mbushur kutitë e votimit me fletë votimi të cilat nuk i përkasin realitetit.

OSBE-ODIHR e thotë që “shpesh herë u panë firma nga e njëjta dorë, e cila është indikatori i drejtpërdrejtë i mbushjes së kutive nga komisionerët.

Shkojmë më tej në një element tjetër shumë të rëndësishëm që fakton manipulimin që i është bërë procesit të numërimit të votave dhe shpalljes së rezultatit.

Në KZAZ-në numër 3 në Shkodër, numri i fletëve të votim të pavlefshme, të deklaruara në procesverbalin zyrtar është 121 vetëm për këtë KZAZ, që do t’i korrespondonte një përqindje pavlefshmërie prej 4,3 %, ndërkohë që e vërteta është 230 vota të pavlefshme, pra thuajse dyfishi, ose 9,5 %. Pra, është manipuluar numri i votave të pavlefshme dhe ato vota që s’janë deklaruar si të tilla, i janë transferuar kryesisht Partisë Socialiste. Ndërkohë në të shkuarën, në vitin 2017, ka qenë 2, pra kemi 4,7 herë rritje të numrit të votave tëpavlefshme.

Në KZAZ-në numër 40 në Tiranë, ku kandidonte Erion Veliaj, kemi të deklaruar zyrtarisht 352 vota, ose vetëm 5,7 % e fletëve të votimit të pavlefshme, ndërkohë që realiteti tregon 756 vota, ose 13 %, ndërkohë që në të shkuarën ka qenë 2,1 %, numri i votave të pavlefshme në atë KZAZ.

Në KZAZ nr.50 në Elbasan kemi 422 vota të pavlefshme të deklaruara zyrtarisht, por nga numërimi me video dalin 815 vota të pavlefshme.

Në KZAZ nr 67 në Pogradec, kemi 680 fletë votimi të pavlefshme, të deklaruara zyrtarisht, por nga numërimi në video faktikisht fletë votimi të pavlefshme janë 1025. Pra, kemi rregullisht përgjysmim të votave të pavlefshme në tabelat zyrtare të KZAZ-ve.

Jemi përpara manipulimit të votimit, që është vepër penale e veçantë, jemi përpara faktit se fletët e votimit të pavlefshme, të cilat nuk janë deklaruar si të tilla janë transferuar kryesisht Partisë Socialiste.

Këtë po e ilustrojmë me një shembull, me rastin e Erion Veliajt në Tiranë. Partia Socialiste rezulton me 5853 vota rezultatin zyrtar, ndërkohë që nga numërimi në atë KZAZ dalin 3831 vota, pra janë shtuar votat, me çdo formë të mundshme, përfshirë edhe fletët e votimit të pavlefshme.

Por nuk ndalet këtu. Kemi një fenomen i cili drejtpërdrejt me atë që thamë më përpara. Partia Socialiste ka ushtruar në mënyrë brutale presion mbi administratën publike, mbi zgjedhësit që janë të punësuar në administratën publike, të detyruar për të marrë pjesë në votim, përndryshe kërcënoheshin me vendin e punës. Fakti që kemi një rritje dramatike me disa herë të numrit të fletëve të votimit të pavlefshme është i lidhur drejtpërdrejt me faktin që punonjësit në administratën publike janë detyruar të shkojnë të votojnë dhe, më pas, kur kanë patur mundësinë, kanë prishur fletën e votimit.

Partia Socialiste, Edi Rama kryeministër, Erion Veliaj dhe të gjithë zyrtarët e tjerë të Partisë Socialiste janë kujdesur që nëpërmjet Komisionit Qendror të Zgjedhjeve dhe administratës zgjedhore, që e kishin totalisht nën kontroll, të fshihet numri i fletëve të votimit të pavlefshme, sepse është denoncues i këtij presioni që i është bërë administratës publike, për të marrë pjesë në votim.

Kemi manipulim të numërimit, transferim të votës së pavlefshme tek subjektet zgjedhore, kryesisht Partia Socialiste dhe e gjithë kjo është e lidhur drejtpërdrejt me presionin e ushtruar mbi administratën publike i cili ka prodhuar këtë rritje dramatike, siç është në rastin e Shkodrës me rritje 4.7 herë rritje të numrit të votave të pavlefshme në krahasim me 2017-ën, 6 herë në Tiranë në KAZAZ-në nr 40 në raport me 2017-ën, apo 6.4 herë në Elbasan në raport me 2017-ën.

Nuk ka ndodhur kurrë. Mesatarisht ka qenë 1.8 deri në 2%, kësaj rradhe ka shkuar në nivelet 10-13% fleta të votimit të pavlefshme.

Ne kemi vënë në dispozicion dokumentacionin zyrtar të marrë nga KQZ, gjithashtu videot të cilat janë përdorur për të numëruar një më një fletët e votimit në këto KZAZ do të bëhen të disponueshme për gazetarët.

Fakti është se kemi Prokurorinë e Republikës së Shqipërisë, e cila e kapur tërësisht nuk ka bërë asnjë veprim deri më sot, për të hetuar dhe për të vënë përpara përgjegjësisë penale ata që kanë panipuluar rezultatin zgjedhor tashmë në vetëvete farsë që për shkak të procesit, por i manipuluar tashmë edhe me fletët e votimit.

DEKLARATË SEKRETARI PËR ÇËSHTJET ZGJEDHORE  TË PARTISË DEMORKATIKE, IVI KASO

Përsa u përket filmimeve, të cilat do t’jua vëmë në dispozicion, të cilat tregojnë tipologjitë e shkeljeve që ne kemi denoncuar, të cilat kanë ndodhur në tavolinat e numërimit, si psh kalimi i disa fletëve bashkë, mund të lexohet vetëm e para, ose numërimi dhe tabulimi i fletëve, të cilat nuk kanë kaluar përmes procesit të kamerave. Në rradhë të parë është shkelje e dokumentuar dhe e vërtetuar nga ana jonë që nuk mund të përdoret sot për konsumim publik, por ju ftojmë që të verifikoni saktësinë e të dhënave të cilat ne ju vëmë në dispozicion.

Së dyti, shkelja që ato vërtetojnë, filmimet dhe dokumentimi i kamerave, nuk është thjeshtë i një aspekti thjesht formal ose e një aksesori të procesit dhe të votimit dhe numërimit, por detyrimi për grupet e numërimit që tabulojnë fletët e votimit, pasi janë numëruar në prezencë të kamerave ka një qëllim të shumëfishtë që lidhet drejtpërdrejt me vlefshmërinë e të gjithë procesit të votimit në atë qendër votimi.

Kalimi i fletës së votimit nga të dyja anët, nga anë e pasme ku verifikohen vulat, dhe nga ana e përparme ku verifikohet shprehja e vullnetit që është shprehur vetëm një herë, është një element substancial i procesit të numërimit që lidhet drejtpërdrejt me vlefshmërinë e procesit të votimit.

Jo vetëm kaq por ai bën lidhjen e fletës së votimit dhe vullnetit të shprehur në qëndrën përkatëse të votimit e cila presupozohet që të jetë nuke numëruar.

Verifikimi i procesit të vulës tregon që ajo fletë votimi dhe ai vullnet i shprehur ka kaluar përmes procesit të rregullt të votimit në qendrën e votimit ku zgjedhësit i është dhënë në dorë një fletë e vulosur dhe për më tepër e lidh atë votë e cila shënohet në proces verbalin përfundimtar me një qëndër të caktuar votimi.

Numërimi në grup i fletëve të votimit  ose numërimi jashtë prezencës së kamerave të fletëve të votimit, është një proces totalisht i paligjshëm që bën nul jo vetëm rezultatin dhe tabulimin e atij rezultati në një qendër përkatëse votimi, por të gjithë procesin e votimit dhe të administrimit të vullnetit të zgjedhësve në një qendër të caktuar votimi.

Pra shkeljet që ju bëjmë sot me dije janë shkelje subtanciale të cilat në një pjesë të madhe të rasteve invalidojnë dhe bëjnë të pavlefshëm të gjithë procesin e tabulimit dhe nxjerrjes së rezultatit përfundimtar në një KZAZ të caktuar ose në një zonë zgjedhore të caktuar që në rastin konkret është bashkia.

Edi Rama dhe Erjon Veliaj bëjnë show propagande me librat “falas”, ndërsa prindërit harxhojnë buxhetin e familjes për librat me çmime të rritura

Për një prind në muajin shtator i bie që të ketë zero lek për nevojat familjare, sepse të gjitha paratë i ka zhvendosur për të blerë libra dhe mjete shkollore për fëmijët

DEKLARATË E PARTISË DEMOKRATIKE, ORJOLA PAMPURI

Jemi pranë njërës prej librarive të kryeqytetit ku siç shikohet ka rradhë njerëzish, madje gjatë drekës ka edhe më shumë, sepse njerëzit dalin pak më herët nga puna për të shfrytëzuar rastin që të blejnë librat për fëmijët e tyre.

Pra për pos fakti që çmimet e librave janë jashtëzakonisht të shtrenjta, janë pra me çmim të lartë që variojnë nga 8 mijë lek të reja deri në 12 mijë lek të reja për ciklin 9-vjeçar dhe të mesëm, prindërit duhet të përballen dhe me vështirësi të tjera duke humbur ditën e punës e për të mbajtur rradhët e gjatë e për të blerë librat e fëmijëve të tyre.

Ndërkohë nga ana tjetër, dy shoëman-ët Rama-Veliaj dalin dhe trumbetojnë për librat dhe fillimin e shkollës, realiteti është tjetër. Realiteti është: libra të shtrenjtë, pamundësi për ti blerë nga një prind që është I papunë, një familje që është me ndihmë ekonomike, një fëmijë që është nën kujdestarinë e dy gjyshërve pensionistë me pensione qesharake, nuk ka mundësi të blejë këto libra me çmime jashtëzakonisht të larta. Nga ana tjetër Edi Rama dhe Erjon Veliaj shfrytëzojnë paratë që duhet të shkonin për librat falas për fëmijët, për nxënësit e shkollave 9-vjeçare dhe të mesëm i shfrytëzojnë për koncensione duke filluar me rrugën Milot-Balldren apo Orikum-Dukat për të cilat është abuzuar me 328 milion euro, ndërkohë që duke i shtuar kësaj shume abuzimet me Unazën e re, koncensionet PPP, para të cilat Edi Rama dhe Erjon Veliaj shumë mirë mund ti vendosnin si prioritet për qytetarët dhe nevojat e tyre prioritare. Por ata kanë vendosur prioritet nevojat personale dhe të oligarkëve më të cilët ata përfitojnë dhe ndajnë fitimet.

Ky është realiteti, jo ai që prezanton Rama dhe Veliaj.

Realiteti është ky, realiteti i prindërve të cilët qëndrojnë në radha të gjata për ditë të tëra për të përfituar çmime me çmime të larta, çmime të cilave u shtohen edhe shpenzimet për mjetet e nevojshme. Për një prind në muajin shtator i bie që të ketë zero lek për nevojat familjare, sepse të gjitha paratë i ka zhvendosur për të blerë libra dhe mjete shkollore për fëmijët. E mos më keq ata që nuk kanë as para, duhet të marrin hua, për të blerë librat për fëmijët.

Ky është realiteti i trishtë shqiptar që u ofron Edi Rama dhe Erjon Veliaj fëmijëve. Një tjetër hall për familjet shqiptare dhe jo një ditë e bukur më për ditën e parë të shkollës.

Një hall i madh është dita e parë e shkollës për familjet shqiptare

Kryetari i Partisë Demokratike, Lulzim Basha deklaroi në Bruksel se për Shqipërinë situata është bërë edhe më e vështirë për integrimin për shkak se vendi nuk ka bërë progres në kushtet e vendosura. Zoti Basha veçoi raportin e OSBE/ODIHR-it për të treguar se në vend që Shqipëria të plotësonte kushtin e zgjedhjeve të lira e të ndershme, zhvilloi një proces antikushtetues votimesh moniste. Kreu i opozitës theksoi se në këtë moment të vështirë është i rëndësishëm zëri dhe vizioni i opozitës për daljen nga kriza.

“Në Asamblenë Politike të PPE-së, kam gjetur mundësinë për t’u shpjeguar partive tona simotra, se megjithë gjendjen e vështirë, megjithë faktin se tashmë e pranon gjithkush se Shqipëria nuk i ka përmbushur kushtet e vëna për të hapur negociatat, lypset një vendim politik. Një vendim politik i cili nga njëra anë t’i sinjalizojë popullit shqiptar se Europa me të vërtetë i mban dyert e hapura dhe nga ana tjetër, për t’u dhënë një mesazh të qartë autoriteteve shqiptare, se Bashkimi Europian, vendet anëtare, tashmë përmes procesit të negociatave, do të ushtrojnë presion të shtuar mbi qeverinë. Ky presion do të ndihmojë për të kapërcyer krizën kushtetuese, demokratike dhe institucionale të vendit, përmes të vetmit instrument që njeh Evropa, që njohin demokracitë, që janë zgjedhjet e lira dhe të ndershme.”

I pyetur se cili është qëndrimi i opozitës për një Po me kushte që mund të vijë nga shtetet anëtare, për shkak të kontestimeve të shteteve anëtare, zoti Basha u përgjigj:

“Kriteri bazë për të qenë anëtar i Bashkimit Europian është demokracia dhe këtu konvergojnë jo vetëm interesat e PD dhe opozitës së bashkuar, por të të gjithë shqiptarëve të ndershëm, për t’i dhënë fund një autokracie të korruptuar dhe të lidhur me krimin, dhe garantuar kushtet për demokraci funksionale. Kjo do të thotë votë të lirë dhe të ndershme, ndëshkim politikanëve të kapur duke bashkëpunuar me krimin për të vjedhur zgjedhjet.

E kundërta po ndodh sot në Shqipëri, çështjet e famshme, dosjet “184” e “339” nuk hetohen, dosjen “184” e ka çuar në Dibër që ta mbylli.

Një përqasje e tillë do të ndihmonte përpjekjen jo vetëm të opozitës, por të të gjithë shqiptarëve për të rivendosur vendin në shinat e sundimit të ligjit, të ndëshkimit të politikanëve të lidhur me krimin dhe mbi të gjitha me zgjedhje të lira dhe të ndershme, të cilat janë i vetmi hap që mund ta nxjerrë vendin nga kriza e thellë ku ndodhet.”

Gjatë intervistës kreu i opozitës foli edhe mbi rëndësinë e zgjedhjeve të lira dhe të ndershme për procesin e integrimit Europian.

“Bashkimi Europian i vendosi zgjedhjet e lira si kusht edhe vitin e kaluar. Në fakt, jo vetëm që nuk u zhvilluan zgjedhje të lira dhe të ndershme, por vendi nuk zhvilloi dot as zgjedhje demokratike. Shkoi drejt një procesi monist me një parti që vetë kandidonte, vetë votonte, vetë numëronte, duke shkelur Kushtetutën, duke shkelur ligjet, duke dhunuar institucionet kushtetuese, duke shpërfillur dekretet e Presidentit të Republikës.

Nuk ka zgjedhje në Republikën e Shqipërisë pa dekret dhe këto ishin votime që u zhvilluan pa asnjë bazë kushtetuese dhe juridike. Këtë thotë edhe Raporti i OSBE- ODHIR që është përmbledhja më domethënëse e problematikës shqiptare. Aty tregohet qartë se vetëm pasi opozitës iu mohua çdo rrugëdalje institucionale siç ishte propozimi që bëmë për të ndarë politikën nga krimi me ligjin për Vetingun e politikanëve, ne u detyruam drejt hapave që hodhëm për të shpëtuar demokracinë, për interesin publik, jo për pushtetin tonë. Ndaj në këtë kuptim, nuk pres të ketë ndryshim të kushteve të vendosura tashmë nga Bashkimi Europian por vetëm forcim të tyre.”

Një nga pyetjet që iu përgjigj zoti Basha ishte nëse opozita mendon se e ka fituar betejën e ndërgjegjësimit të e komunitetit ndërkombëtar dhe sidomos të Bashkimit Europian për problematikën me të cilën përballet Shqipëria.

“Pa dyshim në Bruksel ka një vetëdijësim të madh për krizën e thellë të demokracisë, për krizën e thellë të sundimit të ligjit në Shqipëri. Një meritë e madhe i takon Partisë Demokratike, i takon opozitës që ka bërë betejat e duhura për Shqipërinë, për shqiptarët. Është e qartë se me mënyrën si po zhvillohen ngjarjet në vend, Shqipëria po i largohet Europës.

Partia Demokratike dhe opozita e bashkuar qëndrojnë fuqishëm për integrimin europian dhe kërkojnë që edhe procesi i hapjes së negociatave t’i shërbejë fitores së kësaj kauze. Kauzës së zgjedhjeve të lira dhe të ndershme si themel i demokracisë, i llogaridhënies para qytetarëve dhe i një shoqërie të drejtë dhe të barabartë përpara ligjit.

Këto janë themelet e Europës, këto janë themelet e çdo vendi anëtar i BE-së dhe duke patur me vete në këtë kauzë edhe autoritetin e BE-së dhe vendeve anëtare, i bëjmë një shërbim të madh Shqipërisë dhe shqiptarëve dhe afrojmë ditën e fitores së kësaj beteje, të zgjedhjeve të lira dhe të ndershme si zgjidhja e krizës së tmerrshme politike dhe ekonomike ku e ka zhytur vendin, qeveria aktuale”.

Partia Demokratike i kërkoi Prokurorisë verifikimin e Mark Babanit të Bashkisë së Vaut të Dejës, pasi dyshohet se ai ka fshehur ndalime, dënime dhe dëbime nga Italia dhe Maqedonia e Veriut. Sekretari i Përgjithshëm i PD, Gazment Bardhi i vuri në dispozicion prokurorisë të gjithë informacionin që disponon Partia Demokratike për kryebashkiakun e tretë të Edi Ramës, që rezulton me të kaluar kriminale.

“Ai dyshohet se ka qenë i arrestuar/ndaluar në Itali gjatë periudhës 1994 -1999 dhe, më pas, ndaj tij është marrë masa e dënimit dhe dëbimit nga autoritetet përgjegjëse italiane. Nga ana tjetër, të dhëna të bëra publike më parë tregojnë se ai ka qenë i arrestuar/ndaluar dhe më pas dënuar edhe në Republikën e Maqedonisë së Veriut gjatë periudhës 2002-2003.”- thuhet në shkresën e Partisë Demokratike, ku zbulohet edhe një detaj tjetër, që ngre dyshime të arsyeshme se Mark Babani i Bashkisë së Vaut të Dejës ka gënjyer në formularin e dekriminalizimit.

“Në Formularin e Vetëdeklarimit shtetasi Mark Babani ka deklaruar se ka jetuar për 5 vite në Itali. Nga verifikimi i të dhënave të sistemit TIMS rezulton se shtetasi Mark Babani nga periudha 1994 – 2005 nuk ka udhëtuar në asnjë rast të vetëm në drejtim të Italisë me identitetin e tij real, çka përbën një indicie për saktësinë e të dhënave të bëra publike më parë.”

Partia Demokratike vë në dijeni Prokurorinë edhe për të paktën 3 identitete të tjera që Mark Babani, i emëruar nga Edi Rama në Bashkinë e Vaut të Dejës, nuk i ka deklaruar në formular.

“Në Formularin e Vetëdeklarimit shtetasi Mark Babani ka deklaruar se ka mbajtur identitetin e ndryshuar Mark Ndoc Babaj, i datëlindjes 24.12.1966. Ekzistojnë dyshime të arsyeshme sipas indicieve të bëra publike më parë, se ky shtetas, gjithashtu në mënyrë ilegale ka mbajtur edhe disa identitete të tjera, të padeklaruara në Formularin e Dekriminalizimit, si më poshtë:

1. Mark Ndoc Babani, i datëlindjes 24.12.1965
2. Marq Saimir Babaj, i datëlindjes 11.06.1967
3. Ylli Saimir Babaj, i datëlindjes 02.11.1968”-

Në kërkesën për verifikimin e Mark Babanit nga Prokuroria,e shoqëruar me firmat e 500 qytetarëve,  Partia Demokratike vë në dukje se pret një verifikim dhe reagim të shpejtë nga Prokuroria, për shkak të interesit të lartë që çështja paraqet.

• Në lojën e turpshme për të kapur të gjitha pushtetet duke shkarkuar Presidentin, Parlamenti përpiqet të tërheqë Komisionin e Venecias dhe Këshillit të Europës.

• Me aktet e tij me zgjedhjet, Presidenti është përpjekur të garantojë pluralizmin politik në Shqipëri dhe kjo është një nga detyrat fisnike që ka luajtur në këtë rast.

• Raporti i OSBE – ODHIR është lajmërimi i vdekjes së zgjedhjeve në Shqipëri. Vërtetoi arsyetimin e Presidentit pse nuk mund të kishte zgjedhje më 30 Qershor.

DEKLARATË E OERD BYLYKBASHIT PAS TAKIMIT ME DELEGACIONIN E KOMISIONIT TË VENECIAS

Komisioni i Venecias ka ardhur këtu me ftesë të Kuvendit për të dhënë një opinion në lidhje me procedurën e turpshme për shkarkimin e Presidentit të Republikës që Parlamenti ka nisur.

Ne ua bëmë të qartë se kjo është një përpjekje e qeverisë që, në mungesë të Gjykatës Kushtetuese, në themelet e një krize kaq të madhe, Parlamenti përpiqet që të tërheqë Komisionin e Venecias dhe Këshillit të Europës në lojën e tij të turpshme për të kapur të gjitha pushtetet, përfshirë Presdentin e Republikës.

Kushtetuta është e qartë. Presidenti i Republikës shkarkohet vetëm nga Gjykata Kushtetuese, nëse ka shkelur rëndë Kushtetutën.

Presidenti i Republikës është përpjekur të garantojë zgjedhje të lira dhe të ndershme, unitetin e popullit dhe pluralizmin politik në Shqipëri dhe kjo është një nga detyrat fisnike që ka luajtur në këtë rast Presidenti i Republikës. Presidenti i Republikës u dha garancinë zgjedhësve shqiptarë që zgjedhjet të bëheshin në një moment të dytë, në kushte më të mira.

Parlamenti përpiqet që të shkarkojë Presidentin dhe në këtë lojë të turpshme përpiqet të bëjë palë institucionet ndërkombëtare, të cilat janë shumë të qarta në lidhje me këtë.

Pyetje: Jua ka shprehur delegacioni i Komisionit të Venecias këtë?

Oerd Bylykbashi: Të qëndrojmë jashtë bisedave tona specifike. Ne bëmë të qartë aspektin politik. Arsyet përse kemi ardhur në këtë situatë, të cilat tashmë nuk kanë nevojë të parashikohen prej nesh. Raporti i OSBE – ODHIR është lajmërimi i vdekjes së zgjedhjeve në Shqipëri. Praktikisht vërtetoi se zgjedhjet në Shqipëri kanë vdekur, atë gjë Presidenti i Republikës e përmend në mënyrë të qartë në arsyet që ai parashikonte se përse 30 Qershori nuk mund të kishte zgjedhje dhe për këtë arsye duheshin më 13 tetor.

NJOFTIM NGA TAKIMI I KRYETARIT TË PD LULZIM BASHA NË ASAMBLENË POLITIKE TË PPE-SË

Kryetari i Partisë Demokratike Lulzim Basha po merr pjesë në Asamblenë Politike të Partisë Popullore Europiane, që po zhvillon punimet në Bruksel. Në ditën e parë të punimeve të Asamblesë, zoti Basha u takua me përfaqësues të partive anëtare të PPE-së, drejtues të politikës së jashtme dhe të zgjerimit në Parlamentin dhe Komisionin Europian, si dhe Parlamentet e vendeve anëtare.

Lideri i opozitës ka kërkuar mbështetjen e tyre për hapjen e negociatave për Shqipërinë si një aspiratë e shqiptarëve, por edhe si garanci për të ndërtuar në Shqipëri një shtet demokratik, me pushtete të ndara, ku të garantohet vota e lirë.  Siç u dëshmua nga raporti i OSBE/ODHIR për votimet moniste dhe antikishtetuese të 30 Qershorit, zgjedhjet nuk janë as të lira, as demokratike. “Hapja e negociatave është e rëndësishme – tha Zoti Basha – pasi do të sjellë një mbikqyrje të shtuar nga BE për të ndihmuar në ndarjen e politikës nga krimi, i cili sot ka kapur shtetin dhe për të penguar kandidimin e personave me rekorde kriminale, siç demonstrojnë rasti i Shkodrës dhe Vorës, ku është provuar tashmë se dy të inkriminuar u caktuan të kandidonin për bashkitë.”

“Shqipëria sot ka një krizë të thellë politike, institucionale dhe ekonomike. Zgjidhja – theksoi zoti Basha – janë zgjedhjet e lira dhe të ndershme, të mbikqyrura nga një qeveri tranzitore.

Punimet e Asambelesë Politike të PPE-së do të vazhdojnë dhe gjatë ditës së nesërme, ku në axhendën e diskutimit, do të jenë sfidat me të cilat përballet Evropa aktualisht dhe përgatitjet për Kongresin e PPE-së, i cili këtë vit mbahet në Zagreb.

• Kryengritja e Postribës kundërshtoi sistemin gjakatar që po instalohej në Shqipëri 73 vite më parë. I njëjti sistem është ngritur edhe sot në Shqipëri, i cili cënon të drejtën themelore të njeriut, për të zgjedhur i lirë.

• Ajo rezistencë është një leksion se lirinë nuk mund ta marrim të mirëqenë nëse qytetarët rrezikohen gjithnjë nga qeveritë shtypëse.

FJALA E SEKRETARIT TË PËRGJITHSHËM TË PARTISË DEMOKRATIKE, NË AKTIVITETIN PËRKUJTIMOR TË “KRYENGRITJES SË POSTRIBËS”.

Të dashur vëllezër dhe motra, zonja dhe zotërinj

Fillimisht dua t’ju përcjell përshëndetjet e përzemërta të Kryetarit të Partisë Demokratike z. Basha, i cili për shkak se ndodhet në një aktivitet jashtë Shqipërisë e kishte të pamundur të ishte këtu sot me ju.

Unë ndjehem i privilegjuar që përfaqësoj Partinë Demokratike në këtë aktivitet të organizuar në kuadër të kësaj dite përkujtimore, sepse 9 shtatori, për çdo malësor, për çdo shkodran, për çdo qytetar të vendit, por sidomos për ne demokratët,  është një moment i rëndësishëm për të përkujtuar atë që ndodhi këtu, kryengritjen e parë antikomuniste në Europë.

Politikisht, ne demokratët, mund ta themi me bindjen e plotë dhe me krenari, se jemi bijtë e asaj lëvizje që ndodhi 73 vite më parë.

Ne demokratët e kemi vijuar, e kemi pasur në ADN-në tonë mesazhin, amanetin e atyre burrave që dhanë jetën për liri.

Atë që nisën ata, e realizuan shqiptarët në vitet ‘90.

Sot me nderim përkulemi përpara qindra intelektualëve, klerikëve dhe burrave trima të Postribës që frymëzuan dhe realizuan kryengritjen e parë antikomuniste në Europë. Që tronditi nga themelet regjimin gjakatar, që kishte vënë në shënjestër patriotët e Shqipërisë, që donin vendin të lirë, demokratik dhe të pavarur.

Vlerësim maksimal për ata burra që të parët e ndjenë, e kuptuan se çfarë e keqeje po i vinte vendit, dhe këtë e kuptuat herët, qysh në ditën e parë, dhe rezistuan e u sakrifikuan në vitin 1946.

73 vite më pas, kryengritja e Postribës mbetet aktuale; sepse na thërret për të qëndruar sërish, për të luftuar për lirinë, për të drejtat humane, përkushtimin për të mos pranuar sundimin.

Sepse edhe sot, kemi në fuqi një regjim që po sfidon çdo ditë, të drejtat, liritë dhe vlerat tona europiane.

Kemi në emër të çdo demokrati, nderimin më të thellë para çdo patrioti të kombit, para Postribës, para trimave të Postribës, që 73 vite më parë e paguan me gjakun e burrave të kësaj treve, përpjekjen për liri.

Kurajoja e Postribës, tregoi se komunizmi nuk ishte zgjedhja e këtij populli, por një sundim që u vendos me dhunë, që ishte gati të bënte gjithçka për pushtet.

Ne s’mund të harrojmë dhe kemi shumë për të mësuar nga ajo kurajo e atyre që i bënë ballë terrorit dhe barbarive komuniste që e kishin vendosur në shënjestër Postribën e Shkodrën, duke vrarë e prerë, torturuar, burgosur e internuar.

Një lëvizje që u pa dhe u shënua edhe ndërkombëtarisht, duke i treguar gjithë botës se çfarë sistemi gjakatar po instalohej në Shqipëri.

Ai vizion, ajo rezistencë janë një leksion i përhershëm, sepse liria nuk është e dhënë një herë e mirë dhe s’mund ta marrim të mirëqënë, sepse qytetarët rrezikohen gjithnjë nga qeveritë shtypëse.

Ai vizion dhe ajo kurajo na lypset edhe sot, pasi një prej të drejtave dhe lirive themelore të njeriut, e drejta për të votuar dhe zgjedhur të lirë, është cënuar dhe është goditur thellë, këtu, në Shkodër dhe në mbarë vendin. Dhe kjo ndodh prej kësaj qeverie në mënyrë të përsëritur edhe sot, çdo ditë.

Kam frikë se patriotët e kryengritjes së Postribës, do të na qortonin rëndë po të shihnin se sot sërish është në rrezik dhe luhet me këtë liri fondamentale, me vlerat kryesore të qytetërimit.

Ne kujtojmë, por respekti më i madh për atë lëvizje, për atë kryengritje do të ishte nëse angazhohemi të gjithë që regjime e sundime të tjera të mos instalohen më në vendin tonë.

Të mos lejojmë më hordhi e brigada të krimit, që marrin pushtetin me çdo kusht e shtypin pastaj qytetarët e tyre.

Ju e dini mirë, dhe unë ju siguroj në emër të Partisë Demokratike se ka nisur numërimi mbrapsht i kohës së bijve të etërve.

Me burrat e gratë e Postribës, me të rinjtë e të rejat, me malsorët me shkodranët dhe me çdo qytetar kudo në vend do t’i japim fund këtij regjimi të korruptuar e kriminal, e do t’i hapim sërish Shqipërisë rrugën europiane.

Lavdi përjetë martirëve të Postribës

Zoti ju bekoftë, Postribën, Shkodrën dhe gjithë Shqipërinë.

Në 73-vjetorin e Kryengritjes madhështore të Postribës, 9 shtatorin e 1946-s, çdo shqiptar patriot përkulet me nderim para qindra burrave, intelektualëve, malësorë e klerikë të të gjitha besimeve, që frymëzuan e u ngritën në të parën kryengritje antikomuniste në Europë. Kryengritja tronditi nga themelet regjimin gjakatar që si vegël e verbër e dhunës staliniste ishte vënë në gjueti të të gjithë patriotëve në të gjithë Shqipërinë, të cilët e donin vendin e tyre, të lirë e të pavarur nga pushtues ashtu si etërit themelues e kishin shpallur me 28 nëntor të 1912-s.

Në raportet e pushtetit antishqiptar, që ruhen sot në arkiva, vërehet tmerri që kishte ngërthyer kupolën e regjimit, e cila shihte fare mirë se Kryengritja e Postribës mund të shndërrohej në fillimin e një lëvizjeje për t’u çliruar nga klika diktatoriale që kishte uzurpuar pushtetin. Regjimi vërente me shqetësim se Kryengritja e Postribës mund të sillte jo vetëm ndërhyrjen e aleatëve tradicionalë të shqiptarëve, por mund të shndërrohej në një shembull për të gjitha vendet e rëna nën thundrën e diktaturës komuniste.

Këtij rreziku ndërkombëtar që paraqiste Kryengritja e Postribës, regjimi ju përgjigj me metodën e vetme që njihte, dhunën masive, vrasjet e pushkatimet pa gjyq. Në raportimet zyrtare të Sigurimit të Shtetit dëshmohet gjuetia e shëmtuar që strukturat e Sigurimit kryen ndaj popullsisë, jo vetëm në Postribë, por edhe në Shkodër, në Malësinë e Madhe, në Pukë e në Mirditë, të kapluara nga paniku se Postriba do të shërbente si një burim frymëzimi.

Kjo gjueti njerëzore, bilanci përfundimtar i të cilës ende nuk dihet, por ku raportimet flasin për mbi 60 të vrarë, dhjetëra të tjerë të vdekur burgjeve e mijëra të dënuar me burgime të gjata e punë të detyruar, i zgjati jetën një diktature që s’kishte më asgjë të përbashkët me idealin antifashist që predikonte, por ishte shndërruar në një makineri vrasëse që e trajtonte popullin si skllav dhe që kishte hedhur në treg interesat kombëtare, për hir të përjetësimit të pushtetit të vet.

Gjuetia njerëzore nuk njihte as kanun e as ligj. Forcat e verbra të Sigurimit, e pushkatuan Ymer Beqirin në vend të të birit, Sadikut, në një akt zëvendësimi të viktimës, që s’njeh kurrfarë kodi zakonor, e morën zvarrë Osman Hysenin e plagosur, nga Hoti i Ri e deri në fshatin Mes, ku e pushkatuan dhe e lanë të pavarrosur. Aktet makabre u kryen jo vetëm ndaj drejtuesve të Kryengritjes, Osman Haxhisë, Jup Kazazit, Idriz Tahirit e të tjerëve, por edhe ndaj familjeve të tyre e fshatrave të tëra pa dallim. Djegia e fshatrave nxorri zbuluar mizorinë e regjimit si një palë pushtuese që s’kishte asgjë të përbashkët as me idealin çlirimtar, e as me pallavrat për progres shoqëror.

Kryengritja e Postribës u pasua nga Masakra shtetërore e Postribës. Por për zbardhjen e emrave të urdhëruesve të kësaj masakre, shteti shqiptar bëri shumë pak në këto 30 vjet. Në vend të një ndjese të pandërprerë për dhunën në përmasa genocidale të ushtruara ndaj zonave të tëra të vendit, sot e kësaj dite shohim, dëgjojmë e lexojmë justifikime nga pseudo-historianë e politikanë të paskrupullt, se regjimi komunist ishte i detyruar të kundërpërgjigjej ashtu, se në fund të fundit dhuna shtetërore ishte një mbrojtje legjitime, se pushteti u mor me pushkë e natyrisht edhe duhej mbrojtur me armë.

Kjo mendësi dhe mënyrë veprimi në thelb antishqiptare, ka dalë këto vite nga tulatja, dhe në hapësirat publike tashmë nuk përkujtohet Kryengritja, trimëria, por masakrat shtetërore ngrihen në piedestal si “fitore të shtetit shqiptar”, si “faqe e lavdishme e historisë”.

Pasardhësit e xhelatëve po tentojnë ta kthejnë sërish në kulturë zyrtare përkujtimin e masakrave shtetërore dhe po synojnë të nxjerrin nga diskursi publik përkujtimin e qëndresës ndaj diktaturës dhe të heronjve që ranë në përpjekje për liri e dinjitet.

Në 73-vjetorin e Kryengritjes madhështore të Postribës më duhet të pranoj se kjo krenari e xhelatëve fatkeqësisht ka një frymëzim shtetëror. Struktura të shtetit janë angazhuar ethshëm për restaurimin e pushtetit të bijve të nomenklaturës dhe me forcën e propagandës e të strukturave të pushtetit po kërkohet të tulasin ish-të përndjekurit politikë, po tentohet t’i getoizojnë ata në cep, jashtë jetës publike, jashtë angazhimeve civile e jashtë përpjekjeve legjitime për të marrë pjesë në pushtet e në ndërtimin e shtetit.

Ky restaurim kumtëzi e kthen pas Shqipërinë, e ridërgon atë në hapësirat antidemokratike e orientale të Lindjes. Por kjo përpjekje që shkon në kundërshtim me idealet perëndimore të heronjve të Postribës dhe me aspiratën e mbarë shqiptarëve për integrim në Perëndim, nuk ka për të patur sukses.

Pasardhësit e heronjve të Postribës, ata që themeluan Partinë Demokratike me idealin e Shqipërisë si Europa, janë krenarë për historinë e tyre dhe e kanë shndërruar atë në thesar, në një pasuri shpirtërore dhe mebdore që i ndihmon për ta kaluar edhe situatën aktuale. Sakrifica e heronjve të Postribës do i ndihmojë të gjithë shqiptarët patriotë ta fitojnë betejën tinzare që pasardhësit e xhelatëve u kanë vënë përballë, atë të kthimit në Lindje. Shqiptarët do ta fitojnë këtë betejë të pamerituar në nderim të heronjve të Postribës, por edhe për të garantuar të ardhmen e fëmijëve tanë, një të ardhme të merituar në gjirin e kombeve demokratike të Perëndimit.
Lavdi përjetë kreshnikëve të Kryengritjes së Postribës!
Zoti e bekoftë Shqipërinë!

• Ndryshimi i ligjit të pushtetit lokal, që zhbën shumicën e cilësuar për tjetërsimin e pronave, është grabitja më e rëndë me ligj e pronës së bashkive.

• Heqja e shumicës së cilësuar shkon paralel me ligjin tjetër korruptiv, të Korporatës së Investimeve. që u rrëmben pronat bashkive për t’ua dhënë pa garë klientëve të Ramës.

DEKLARATË E PARTISË DEMOKRATIKE, DHURATA ÇUPI

Edi Rama, bashkë me përfaqësuesit e oligarkëve në parlament vendosën dje të grabisin me ligj pronat e pushtetit vendor.

Me rrezimin e dekretit të presidentit për ligjin e qeverisjes vendore, Edi Rama në parlament i hapi rrugë tjetërsimit të pronave të bashkive me shumicën e thjeshtë të votave, duke hequr pengesën e shumicës së cilësuar që ata, deri para 30 qershorit, nuk e kontrollonin, në pjesën dërrmuese të bashkive.

Neni 54 detyronte dakortësinë me shumicë të cilësuar të të gjitha forcave politike në këshill për të garantuar që prona e tjetersuar apo e dhënë në përdorim do të kishte impakt për qytetin dhe nuk ishte abuziv dhe korruptiv.

Vendimi për t’i shkuar deri në fund ndryshimit të ligjit të qeverisjes vendore është grabitja më e rëndë me ligj e pronës publike.

Asgjë nuk ndodh rastësisht. Shqiptarët janë dëshmitarë sesi Bashkia e Tiranës, për shkak të kundërshtimit të opozitës në Këshilin Bashkiak, dështoi që t’ia kalojë në pronësi kompanisë Fusha pronën e Bashkisë pas Teatrit. Por me shfuqizimin e ketij neni, asgjë nuk e ndalon më Edi Ramën dhe uzurpatoret e tij në bashki që të vjedhin pasurinë publike, duke ua dhënë atë klientëve, me të cilët ndajnë fitimet.

Shfuqizimi i shumicës së cilësuar për tjetërsimin e pronës së bashkive është projektuar disa muaj më parë. Ajo është pjesë e strategjisë për plaçkitjen e pasurive të vendit dhe shkon paralel me ligjin tjetër korruptiv, klientelist dhe antikushtetues të korporatës së investimeve.

Ky është një tjetër ligj që u rrëmben pronat bashkive për t’I vendosur në fondin e Korporatës së Investimeve, të drejtuar de facto nga Edi Rama dhe që nëpërmjet këtij ligji, lejohet t’u japë oligarkëve, klientëve, miqve dhe familjes se tij pasuritë e bashkive pa garë, pa prokurim publik, madje edhe pa votë.

Plaçkitja, vjedhja e zgjedhjeve dhe e pasurive të shqiptarëve është i vetmi projekt i Edi Ramës. Prandaj, vendi ka nevojë urgjente të çlirohet nga kjo qeveri dhe ky kryeministër , që po rrënon shqiptarët dhe pasurohet për vete!