Blog

Partia Demokratike i kërkoi Prokurorisë dokumentacionin e plotë për çështjen e verifikimit të Agim Kajmakut, i arrestuar dhe i kërkuar në Greqi me emrin Jorgo Toto për një krim që dënohet me 10 vjet burg. Duke shfrytëzuar të drejtën që i jep ligji, Partia Demokratike kërkon të njihet me çdo veprim të prokurorisë që nga data e dorëzimit prej saj të kërkesës së verifikimit në 20 Gusht deri në 5 Shtator.

Letra e firmosur nga Sekretari i Përgjithshëm i PD, Gazment Bardhi, vë në dukje mashtrimin publik të prokurorisë për pretendimin se Agim Kajmaku nuk ka dorëzuar akoma gjurmët e gishtërinjve, përtej afatit 5 ditor të përcaktuar nga ligji, sepse, siç u shpreh prokuroria, “shërbimi postar ka ngatërruar adresën e tij dhe ende nuk ka dorëzuar shkresën.” Në letër theksohet përgënjeshtrimi i ardhur nga Posta Shqiptare, e cila konfirmoi se dokumenti i prokurorisë është dorëzuar në Bashkinë Vorë, fakt ky që, siç deklaroi Posta, vërtetohet lehtësisht në dy mënyra:
1. Sistemin e dërgesave nga bar kodi përkatës.
2. Prova e dorëzimit e firmosur nga sekretaria e Bashkisë Vorë”.

Duke iu referuar përgjigjes së Postës, Partia Demokratike thotë se nuk ka asnjë dyshim që shtetasi Agim Kajmaku e ka marrë njoftimin zyrtar për dorëzimin e gjurmëve daktiloskopike më datë 29 Gusht dhe sipas nenit 8 të ligjit të dekriminalizimit, duhet të kishte përmbushur detyrimin e tij deri në datën 3 Shtator 2019. “Çuditërisht, nga ana juaj më datë 4 Shtator thuhet se subjekti nuk e ka marrë ende shkresën. Ky në fakt duket më shumë si justifikim i paligjshëm nga ana e organit të prokurorisë për të mos zbatuar sanksionin që parashikon ligji në rast se subjekti nuk dorëzon gjurmët daktiloskopike.”- thuhet në kërkesën e Sekretarit të Përgjithshëm të PD për të marrë të gjithë dokumentacionin me veprimet e Prokurorisë për këtë çështje.

Partia Demokratike kërkon nga Prokuroria përgjigje zyrtare përse nuk ka zbatuar ligjin për përcaktimin ligjor të dekriminalizmit, që përcakton në nenin 8 se ndaj funksionarit që nuk dorëzon shenjat e gishtërinjve brenda 5 ditëve, zbatohen ndalimi i ushtrimit të mandatit. “A i keni administruar ju provat që përmend Shërbimi Postar në deklaratën e tij zyrtare dhe që provojnë se Agim Kajmaku e ka marrë njoftimin në datën 29 Gusht? Nëse jo, pse? Nëse po, pse nuk është aplikuar sanksioni i parashikuar në nenin 8 të ligjit?”- janë pyetjet konkrete që ngre Partia Demokratike dhe për te cilat prokuroria është r detyruar të përgjigjet.

Sekretari i Përgjithshëm Gazment Bardhi shpreh bindjen e forcës më të madhe të opozitës se “çdo shkelje e ligjit nga ana e organit të prokurorisë mbi këtë çështje, do të evidentonte edhe më shumë faktin që sot Prokuroria e Përgjithshme, nën drejtimin e shtetases Arta Marku, është shndërruar në një celulë të mbrojtjes së krimit. Ju, sipas urdhrit të Edi Ramës, mund ta zvarrisni, pengoni apo tentoni ta manipuloni të vërtetën, por ju kurrsesi nuk do mund të pengoni që ajo të dal qartë dhe në mënyrë të pakontestueshme përpara të gjithë qytetarëve shqiptarë!- thuhet në kërkesën e Partisë Demokratike për të zbardhur veprimet e prokurorisë për çështjen e Agim Kajmakut, i cili ka fshehur nga formulari i dekriminalizimit faktin se është arrestuar në Greqi dhe është akoma në kërkim atje për një krim që dënohet me 10 vjet burg.

• Për herë të parë në historinë e vëzhgimit të zgjedhjeve nga OSBE/ODIHR në raportin final, nuk specifikohet që zgjedhjet ishin demokratike, që zgjedhjet ishin legjitime apo që zgjedhjet përmbushën standardet ndërkombëtare

• Raporti specifikon shprehimisht: Se veprime dhe sjellje të qeverisë, veprime dhe sjellje të institucioneve të tjera përfshirë prokurorinë apo gjykatën kanë qenë tërësisht në kundërshtim me ligjin

• Nuk mund të jetë kurrsesi përgjegjëse opozita e vendit për sjelljet kriminale, anti-shtet dhe antiligjore të qeverisë apo administratorëve të zgjedhjeve dhe nuk ka asnjë përgjegjësi, fjala vjen se KQZ dhe Kolegji Zgjedhor ka shkelur në çdo vendimmarrje të tij ligjet e këtij shteti

• Shqiptarëve në 30 qershor, sipas OSBE/ODHIR, dhe jo raportit që shkruan zëvendësi i Edi Ramës në Ministrinë e Jashtme, votuesve shqiptarëve nuk iu dha mundësia të zgjidhnin dhe kjo jo se opozita bojkotoi zgjedhjet por sepse opozitës nuk iu garantuan kushtet që të marrë pjesë në zgjedhje

• Raporti skanon se si organi i prokurorisë nga një institucion që do të duhet të zbatojë ligjin dhe të ndëshkojë krimet elektorale, është shndërruar në një institucion që mbron kriminelët që vjedhin zgjedhjet

• Opozita u detyrua të dorëzonte në bllok mandatet e veta parlamentare, pas rrëzimit të iniciativës për Vettingun në Politikë nga ana e maxhorancës dhe rrjedhimisht doli nga Komisioni i Reformës Zgjedhore

• Nuk ka asnjë përgjegjësi opozita pse Edi Rama tentoi të krijonte opozitë “fake” duke regjistruar në kundërshtim me ligjin dhe me praktikat e mëparshme të vetë Komisionit Qendror të Zgjedhjeve, një parti satelit të tij

• Skanimi që raporti i bën sjelljes së institucioneve shtetërore në Shqipëri është një analizë objektive që tregon se këto institucione nuk japin asnjë garanci për zgjedhje të lira dhe të ndershme.

• Kodi Zgjedhor nuk pengon dot Avdylajt të përfshihen në bashkëpunim me Partinë Socialiste për të ushtruar presion mbi votuesit e Partisë Demokratike.

KOMUNIKIMI ME GAZETARËT I SEKRETARIT TË PËRGJITHSHËM TË PD, GAZMENT BARDHI

Të nderuar bashkëqytetarë!

Jam sot këtu përpara jush për të dënuar sjelljen e papërgjegjshme, absurde dhe fëminore të qeverisë, e cila fajësoi opozitën se raporti i OSBE/ODIHR-it delegjitimoi zgjedhjet e 30 qershorit.

Në fakt të gjitha interpretimet e bëra sot në emër të Edi Ramës nga zëvendësi i tij në Ministrinë e Jashtme janë citime të gabuara që nuk gjejnë pasqyrim në raportin e OSBE/ODIHR-it. Në asnjë rresht të këtij raporti i cili tashmë është publik, qytetarët nuk kanë nevojë për interpretime të gabuara dhe fëminore të tij, sepse dinë ta lexojnë vetë raportin.

Për herë të parë në historinë e vëzhgimit të zgjedhjeve nga OSBE/ODIHR nuk specifikohet që zgjedhjet ishin demokratike, që zgjedhjet ishin legjitime apo që zgjedhjet përmbushën standardet ndërkombëtare.

Përkundrazi për herë të parë në raportin për zgjedhjet lokale edhe në vendin tonë specifikohet shprehimisht: Se veprime dhe sjellje të qeverisë, veprime dhe sjellje të institucioneve të tjera përfshirë prokurorinë apo gjykatën kanë qenë tërësisht në kundërshtim me ligjin.

Për këtë nuk mund të jetë kurrsesi përgjegjëse opozita e vendit. Opozita ka  detyrën t’i denoncojë sjelljet kriminale, anti-shtet dhe antiligjore të qeverisë apo administratorëve të zgjedhjeve dhe nuk ka asnjë përgjegjësi, fjala vjen se KQZ ka shkelur në çdo vendimmarrje të tij ligjet e këtij shteti. Nuk ka opozita asnjë përgjegjësi pse gjyqtarët e Kolegjit Zgjedhor kanë qenë nën presionin e qeverisë për shkak të procesit të vettingut. Nuk ka opozita asnjë përgjegjësi që sipas OSBE/ODIHR-it punonjësit e administratës shtetërore dhe ndërmarrjeve shtetërore kanë qenë nën presion për largim nga puna, apo siç thotë raporti, dëshmi të qytetarëve që kanë treguar përpjekje apo shantazh nga qeveria për t’i hequr ata nga skema e ndihmës ekonomike.

Në fakt raporti nuk është një skanim i një procesi antikushtetues i votimeve të 30 qershorit, ai skanon të gjithë shtetin privat që ka ndërtuar Edi Rama.

Raporti nis me fjalinë se “votimet lokale të 30 qershorit u mbajtën pa u marrë shumë në konsideratë interesin e elektoratit”.

E në fakt mospjesëmarrja e opozitës në  zgjedhje farsë ishte pikërisht për këtë arsye, sepse në zgjedhjet që organizohen nën drejtimin e Edi Ramës, nuk merret në konsideratë interesi i qytetarëve, por merret në konsideratë interesi i bandave që ndihmojnë qeverinë të vjedh zgjedhjet dhe më pas duke qeverisur me zgjedhjeve të vjedhura, të vjedhin dhe grabisin qytetarët shqiptarë.

Raporti skanon se si organi i prokurorisë nga një institucion që do të duhet të zbatojë ligjin dhe të ndëshkojë krimet elektorale, është shndërruar në një institucion që mbron kriminelët që vjedhin zgjedhjet, kriminelët që shantazhojnë për bukën e gojës punonjësit e administratës, kriminelët që shkelin ligjin hapur vetëm e vetëm për të arritur objektiva të caktuar politike të qeverisë.

Nuk ka, siç thotë raporti, asnjë procedim penal ndaj anëtarëve të KQZ-së apo administratës zgjedhore për shkelje flagrante të ligjit.

Nuk ka asnjë procedim penal, thotë raporti i OSBE/ODIHR-it, për ato që vëzhguesit kanë konstatuar me sytë e tyre, presionin ndaj qytetarëve për të marrë pjesë në votime apo për të votuar në një formë të caktuar.

Shqiptarëve në 30 qershor, sipas raportit të OSBE/ODHIR-it, dhe jo raportit që shkruan zëvendësi i Edi Ramës në Ministrinë e Jashtme, votuesve shqiptarëve nuk iu dha mundësia të zgjidhnin dhe kjo jo se opozita bojkotoi zgjedhjet por sepse opozitës nuk iu garantuan kushtet që opozita të marrë pjesë në zgjedhje.

Ne nuk mund të kandidojmë përballë një trafikanti droge në Shkodër sepse nuk jemi në politikë për tu përballur në zgjedhje me trafikantët e drogës. Me trafikantët e drogës duhet të përballemi në drejtimin e institucioneve ligjzbatuese. Sepse ata nuk e kanë vendin në qeverisje, por e kanë vendin në burg.

Leximi i raportit nga ana e qeverisë duke faturuar të gjithë përgjegjësinë mbi delegjitimimin e 30 qershorit opozitës, kur në fakt kjo e fundit nuk ishte fare pjesëmarrëse në zgjedhje, nuk ka asnjë përgjegjësi në administrimin e zgjedhjeve, tregon jo vetëm papërgjegjshmërinë e qeverisë, jo vetëm papërgjegjshmërinë e Edi Ramës, por mbi të gjitha tregon mungesën e vullnetit që ka kjo qeveri për të organizuar zgjedhje të lira dhe të ndershme.

Nuk ka asnjë përgjegjësi opozita pse Edi Rama urdhëroi anëtarët e Komisionit Qendror të Zgjedhjeve që të shkelin ligjin për të mos pranuar komisionerët që me ligj i takojnë opozitës, kjo bëri që administrata zgjedhore ishte tërësisht e pa balancuar dhe kishim një proces votimi ku një parti merrte pjesë në zgjedhje, e njëjta parti administronte procesin, e njëjta parti numëronte dhe e njëjta parti nxirrte rezultatin e votimit.

Kjo nuk është përgjegjësi e jona, kjo ishte përgjegjësi e drejtpërdrejtë e qeverisë që me një urdhër politikë të katër anëtarëve të qeverisë në KQZ i mohuan një të drejtë ligjore dhe kushtetuese opozitës për të administruar procesin zgjedhor.

Nuk është përgjegjësi e opozitës, por është përgjegjësi e qeverisë që organizoi dhe mbajti votime pa një dekret në fuqi të Presidentit të Republikës dhe raporti i OSBE/ODIHR-it është i qartë e shkruar e zeza mbi të bardhë se mbi kushtetueshmërinë e dekreteve të Presidentit nuk gjykon dot as Denar Biba në KQZ, as 6 apo 7 anëtarët nën presionin e vetingut, shumica prej tyre kanë kaluar vetingun dhe janë në proces apelimi për shkak të shkeljeve skandaloze që kanë të bëjnë me ligjshmërinë e pasurisë së tyre marrin përsipër në shkelje të ligjit të gjykojnë mbi dekretin e Presidentit. Raporti thotë qartë që mbi këto dekrete mund dhe duhet të gjykojë vetëm Gjykata Kushtetuese. Dhe pa u shprehur Gjykata Kushtetuese mbi kompetencën kushtetuese të Presidentit për të zhvilluar zgjedhje, në Shqipëri nuk mund të ketë zgjedhje legjitime.

Nuk është përgjegjësi e opozitës që në papërgjegjshmëri totale dhe në vullnetin e vetëm për të marrë pushtet dhe për të përfituar pushtet Edi Rama injoroi interesin e qytetarëve dhe i detyroi ata që në vend që të zgjidhnin për kryetarët e tyre të bashkive të ishin përpara zgjedhjes nëse duhet apo jo të merrnin pjesë në votim, ky është thelbi i votimeve të 30 qershorit sipas raportit të OSBE/ODIHR-it.

Dhe është e qartë se rezultati në këtë rast është zhgënjyes për qeverinë, më pak se 15% e qytetarëve, pjesa dërrmuese e tyre me detyrim dhe nën presion morën pjesë në votime.

Nuk është përgjegjësi e opozitës që raporti shprehet qartë se administratorët socialistë të zgjedhjeve apo të votimeve të 30 qershorit jo gjithmonë i kontrolluan gjurmët e bojës apo jo gjithmonë shënjuan me bojë përpara dhënies së fletëve të votimit. Madje sipas ekspertëve të ODIHR-it provohet edhe pretendimi i opozitës për shtim fiktiv të numrit të votuesve. Sepse raporti shprehet se në listën e zgjedhësve u konstatuan nënshkrime dukshëm identike që janë pro votimeve me përfaqësim nga të tjerët.

Nuk ka asnjë përgjegjësi opozita pse Edi Rama tentoi të krijonte opozitë “fake” duke regjistruar në kundërshtim me ligjin dhe me praktikat e mëparshme të vetë Komisionit Qendror të Zgjedhjeve, një parti satelit të tij, e cila, edhe pse afati i regjistrimeve skadonte me 23 prill, arriti që të regjistrohej në gjykatë vetëm 4 ditë më vonë, konkretisht, me 27 prill. Raporti flet qartë se punonjësit e administratës publike dhe ndërmarrjeve shtetërore ishin nën presion të drejtpërdrejtë e indirekt, për t’u përfshirë në veprimtari politike, gjatë dhe pas orarit zyrtar, dhe se punësimet në sektorin publik varen përkatësisht nga bindjet politike. Nga ana tjetër ekspertët e ODIHR-it shprehen se ata ishin dëshmitarë të rasteve të kërcënimit të votuesve, dhe shkeljet së fshehtësisë së votës në qendrat e votimit, mirëpo për këto raste nuk është regjistruar zyrtarisht asnjë procedim penal nga prokuroria. Ka një shqetësim thonë ekspertët e ODIHR-it për mungesën e përgjithshme të efektivitetit të hetimeve penale që kontribuojnë në perceptimin e përhapur të pandëshkueshmërisë mbi krimet elektorale të kaluara, duke përfshirë votimin dhe presionin ndaj votuesve.

Opozita prej dy vitesh kërkon vetëm një gjë, ndëshkimin e kriminelëve që kanë vjedhur zgjedhjet, siç treguan përgjimet e publikuara nga Bild, në dosjen 184 dhe në dosjen 339. Deri më sot, qeveria jo vetëm nuk është distancuar nga vjedhësit e zgjedhjeve, dhe nuk ka si të distancohet, sepse është ajo që i vjedh zgjedhjet, por kryehajdutin e zgjedhjeve në Dibër e ka vënë dhe e ka promovuar si kryetar të Komisionit të Reformës Zgjedhore. Pra, jo vetëm nuk lejon ndëshkimin e krimeve elektorale, por me veprime politike, i merr ato në mbrojtje.

Skanimi që raporti i bën sjelljes së institucioneve shtetërore në Shqipëri është një analizë objektive që tregon se këto institucione nuk japin asnjë garanci për zgjedhje të lira dhe të ndershme. Raporti nuk mund të ketë qenë, siç u shpreh zëdhënësi i Edi Ramës në Ministrinë e Jashtme, më shumë për opozitën sesa për zgjedhjet, sepse çdo shqiptar e di se misioni i vëzhguesve të OSBE/ODIHR-it nuk është të monitorojë opozitën, por është të monitorojë proceset zgjedhore apo votimet në vendet anëtare të OSBE-së. Raporti nuk ka nevojë për interpretime, sepse ai është i qartë, i shkruar në mënyrë korrekte, të drejtpërdrejtë dhe që evidenton qartësisht përgjegjësinë e qeverisë dhe detyrimin e saj për të garantuar zgjedhje të lira dhe të ndershme. Është detyrë dhe përgjegjësi e qeverisë që t’i garantojë opozitës të gjitha kushtet për zgjedhje të lira e të ndershme, sepse qëllimi i ekzistencës së partive politike është padyshim pjesëmarrja në zgjedhje, por jo në zgjedhje të diktuara nga krimi, por në zgjedhje të lira dhe të ndershme.

Qëndrimi i sotëm i qeverisë, që në fakt vjen 48 orë pas publikimit të raportit të OSBE/ODIHR-it, çka tregon për vështirësinë e tyre për gjetjen e argumenteve, apo për të bërë keqinterpretimet e nevojshme në kuadër të propagandës së tyre, për të bindur qytetarët shqiptarë se OSBE/ODIHR-i i ka njohur si të rregullta zgjedhjet, kur në fakt, raporti i OSBE/ODIHR më shumë se sa një raport që skanon procesin zgjedhor, është skanim i një veprimtarie kriminale të ndodhur përpara, gjatë dhe pas votimeve të 30 qershorit.

Pyetje: Raporti i OSBE/ODIHR thotë se bllokimi i reformës zgjedhore erdhi sipasojë e daljes së opozitës nga Kuvendi dhe një ditë më parë ka pasur një ftesë nga ana e kryeministrit edhe për opozitën jashtë kuvendit, për tu bërë bashkë e për të realizuar këtë reformë. Zoti Basha e vuri dje në krye të prioriteteve të PD. Por kjo vendosje në krye të prioriteteve, a do të thotë që PD do të çojë propozime dhe a do të thotë se do të zërë vend në komisionin ku është ofruar e drejta e vetos? Pra si do të bëheni ju pjesë e reformës zgjedhore në kushtet kur jeni kritikuar në raport për këtë?

Gazment Bardhi: Në fakt, nëse e citojmë korrekt raportin, raporti shprehet qartë “se opozita u detyrua të dorëzonte në bllok mandatet e veta parlamentare, pas rrëzimit të inisiativës për Vettingun në Politikë nga ana e maxhorancës.” Ju e mbani mend që ne propozuam fillimisht një masë legjislative për të garantuar shkëputjen mes politikës dhe krimit të organizuar, veçanërisht me fokus në zgjedhje, dhe Edi Rama refuzoi të miratonte këtë propozim ligjor. Ky ishte shkaku që na detyroi ne që nga një veprim institucional ligjor, të kalonim në një veprim politik që ishte lënia në bllok e mandateve parlamentare. Kjo solli sigurisht dhe largimin tonë nga Komisioni i Reformës Zgjedhore. Janë tre raporte të OSBE/ODIHR që kanë lënë rekomandime konkrete për ndryshime ligjore. Por edhe nëse ato ndryshime do të bëhen dhe sigurisht që do të bëhen, përsëri nuk janë garanci e mjaftueshme për zgjedhje të lira e të ndershme. Të gjithë e dimë që sot vjedhja e votave në bashkëpunim me krimin e organizuar, shantazhin ndaj punonjësve të administratës publike, janë vepra penale. Pra ka ligj në Shqipëri për këtë. Problemi është se ky ligj nuk zbatohet. Sigurisht ne mund të kemi një kod, siç e kemi në pjesën dërmuese të tij, një kod me standarte ndërkombëtare, por kjo nuk mjafton për të garantuar zgjedhje të lira e të ndershme.   Pikë së pari, më shumë se sa Reformë Zgjedhore garanci për zgjedhje të lira dhe të ndershme, është vullneti politik.

Nuk mundet Kodi Zgjedhor të parandalojë Ramën që një falsifikator të kërkuar në Greqi, ta kandidojë në Bashkinë e Vorës, siç është Agim Kajmaku.

Kjo është çështje e vullnetit politik.

Pra, nëse ti zgjedh krimin për të garantuar, apo zgjedh qytetarë të nderuar që përfaqësojnë interesin e elektoratit.

Nuk i thotë Kodi Zgjedhor Edi Ramës të zgjedhë një trafikant droge në Shkodër, si Valdrin Pjetri, është vullneti i tij politik për të zgjedhur një trafikant droge.

Nuk i thotë Kodi Zgjedhor Edi Ramës të zgjedhë një hajdut, në kuptimin e plotë të fjalës, në një tjetër Bashki në vend, siç do të bëjmë publik rastet në ditët në vijim.

Kjo është çështje e vullnetit politik.

Prandaj pa asnjë dyshim, realizimi i Reformës Zgjedhore, përmirësimi i legjislacionit që lidhet me zgjedhjet, shtimi i garancive që kanë të bëjnë me administrimin e procesit, çështjet që lidhen me financimin e partive sigurisht që kanë nevojë të reformohen dhe kemi thënë gjithmonë që jemi gati për këto çështje, sikundër ju jeni dëshmitarë që ne i kemi prezantuar masat e nevojshme ligjore që do të duhet të ndërmerren në kuadër të Reformës Zgjedhore, qoftë në Komisionin e Reformës Zgjedhore, por edhe në prezantimin për publikun që kemi bërë disa kohë më parë, por qëndrimi logjik dhe i arsyeshëm është që, këto nuk mjaftojnë për të garantuar zgjedhje të lira dhe të ndershme. Kodi Zgjedhor nuk pengon dot Avdylajt të përfshihen në bashkëpunim me Partinë Socialiste për të ushtruar presion mbi votuesit e Partisë Demokratike. Kjo është çështje vullneti. Nëse do të vish në pushtet nga qytetarët për të qeverisur në dobi të qytetarëve, ose do të vish në pushtet me krimin e organizuar për të qeverisur për llogari dhe në ndihmë të krimit të organizuar. Edi Rama qartësisht ka zgjedhur formën e dytë. Qëndrimi ynë është se, duhet të vijmë në pushtet nëpërmjet bashkëpunimit dhe votës së lirë të qytetarëve shqiptarë në funksion të pasjes së një qeverie në interesin e qytetarëve.

Pyetje: Lulzim Basha pas një takimi që pati dje me krerët e partive opozitare doli për një platforemë kombëtare ku përfshihet Reforma Zgjedhore si dhe ndryshimet në Reformën në Drejtësi. A është kjo platformë në fakt një mundësi për nisjen e negociatave me mazhorancën. A po i jepni ju kohë vetes për t’u ulur me shumicën parlamentare?

Gazment Bardhi: Z. Basha ka folur së pari për një platformë që do t’u prezantohet qytetarëve shqiptarë dhe jo mazhorancës. Aty do të jetë vizioni ynë, për Shqipërinë si gjithë Europa, aty do të jenë të propozuara masa konkrete për daljen një herë e përgjithmonë nga tranzicioni i vështirë dhe krizat e her pas hershme që janë shkaktuar në Shqipëri, ku pa dyshim do të ketë propozime mbi çështjet që lidhen me zgjedhjet e lira dhe të ndershme, mbi funksionimin e pavarur jo vetëm të institucioneve të drejtësisë por në tërësi të të gjitha institucioneve të pavarura përfshirë edhe të administratës zgjedhore, sepse këto votime treguar edhe një herë KQZ nuk është një organ që zbaton ligjin, por zbaton urdhrat politikë dhe dialogun siç e kemi patur, do të vazhdojmë ta kemi me qytetarët shqiptarë.

Kryetari i Partisë Demokratike, Lulzim Basha e përball Ramën me premtimin e 300 mijë vendeve të punës.

“Vodhi dhe largoi nga vendi 300 mijë shqiptarë”

Premtoi 300 mijë vende pune, por i përzuri nga Shqipëria më shumë se 300 mijë shqiptarë.

Miliarda euro janë vjedhur, abuzuar dhe shpërdoruar nga Hajduti Psiqik këto 6 vjet, të gjitha kanë përfunduar në xhepat e Edi Ramës dhe klientëve të tij ose janë shpërdoruar për tekat e tij në fasada dhe lluks.

Shqiptarët janë pa punë sepse ekonominë dhe mundësitë ekonomike i kanë marrë oligarkët dhe klientët e Edi Ramës. Që të hapim vende pune dhe mundësi për njerëzit, duhet të largojmë bandën e grabitqarëve dhe Hajdutin Psiqik. #ShqipëriaSiEuropa #HajdutiPsiqik #RamaIk

• Prokuroria gënjeu për shenjat e gishtërinjve të Agim Kajmakut, në mënyrë që të mbrojë nga sharkimi kriminelin e Ramës në Bashkinë e Vorës.

• Sipas ligjit të dekriminalizimit, kush nuk jep shenjat e gishtërinjve 5 ditë nga marrja e njoftimit, humbet menjeherë mandatin dhe shkarkohet.

DEKLARATË E SEKRETARIT TË PËRGJITHSHËM TË PARTISË DEMOKRATIKE, GAZMENT BARDHI

Çështja e Agim Kajmakut, i arrestuar në Greqi dhe akoma në kërkim në shtetin fqinjë, ka demaskuar Prokuroren e Përgjithshme, Arta Marku, si një vegël e pushtetit kriminal të Edi Ramës.

Arta Marku është kapur në flagrancë duke gënjyer shqiptarët dhe partnerët ndërkombëtarë për të mbrojtur kriminelin e Edi Ramës në Bashkinë e Vorës nga dhënia e gjurmëve të gishtërinjve.

Në një rast të paprecedentë, Posta Shqiptare e përgënjeshtroi Arta Markun, e cila deklaroi dje se nuk i ka marrë shenjat e gishtërinjve të Agim Kajmakut, për shkak të postierit që nuk i ka gjetur adresën.  Kjo është një gënjeshtër që nuk mund ta besojë as një fëmijë, sepse adresa e Agim Kajmakut, edhe pse nuk është e shkruar në formularin e dekriminalizimit, është botërisht e njohur – Bashkia e Vorës, 15 kilometra larg zyrës së Arta Markut.

Mashtrimi publik i Arta Markut për të mbrojtur kriminelin e Edi Ramës në Bashkinë e Vorës u provua si i tillë nga Posta e Tiranës, e cila ka deklaruar se ka të gjitha dokumentet që provojnë se Agim Kajmaku e ka marrë njoftimin për të dhënë gjurmët e gishtërinjve në datën 29 Gusht.

Ka një arsye pse Arta Marku është detyruar të gënjejë publikisht për të justifikuar mosdorëzimin e gjurmëve të gishtërinjve të Agim Kajmakut.

Sipas ligjit të dekriminalizimit, personi që nuk jep shenjat e gishtërinjve 5 ditë nga marrja e njoftimit, humbet menjeherë mandatin dhe shkarkohet nga funksioni shtetëror.

Agim Kajmaku është në këto kushte.

Afati taksativ që parashikon neni 8 i ligjit të dekriminalizimit është tejkaluar dhe prej datës 3 shtator, për shkak se nuk ka dhënë shenjat e gishtërinjve, Agim Kajmaku duhet të mos ishte më në zyrën e Kryetarit të Bashkisë së Vorës.

Partia Demokratike e ka paralajmëruar që ditën e parë të denoncimit të fshehjes së krimit prej tij, se Prokuroria e Përgjithshme do të bëjë gjithçka që i kërkon Edi Rama, për të mos lëshuar një tjetër kriminel në pushtetin lokal.

Pavarësisht këtyre skenarëve qesharakë dhe të dëshpëruar të Edi Ramës, Agim Kajmaku, që pret të dënohet në Greqi për një krim, që ndëshkohet me 10 vjet burg, do të largohet dhe do të dalë para drejtësisë edhe për fallsifikimin e formularit të dekriminalizimit.

Agim Kajmakun nuk e mbron dot më as Arta Marku, as Edi Rama, as krimi i organizuar që e ka sponsorizuar atë. Të gjithë këta janë subjekte të drejtësisë dhe do të mbajnë përgjegjësi për aktet e tyre kundër interesit të qytetarëve shqiptarë.

DEKLARATË E SEKRETARIT TË PËRGJITHSHËM TË PD, GAZMENT BARDHI

Raporti i ODIHR eshte konfirmim se Shqiperia ka nevoje jetike per zgjedhje te lira e te ndershme. Me shume se nje ligj, nje vendim, nje rregullore, zgjedhjet demokratike jane vullnet politk.

Konfirmimi nga ODIHR se votimet moniste dhe antikushtetuese te 30 Qershorit “nuk moren ne konsiderate interesin e qytetareve shqiptare”, eshte vleresim qe ndihmon forcimin e demokracise funksionale ne Shqiperi.

Me konstatimet se votuesit nuk paten mundesi te zgjidhnin, se KQZ dhe Kolegji Zgjedhor shkelen ligjin dhe nuk vepruan ne pavaresi, se u shkaterrua besimi i publikut ne legiitimitetin e zgjedhjeve, se administratat zgjedhore cenoi besimin e publikut,  se ne listen e zgjedhesve u konstatuan nenshkrime dukshem identike qe jane prove e votimit me perfaqesim nga te tjeret, ODIHR i vuri vulen paligjshmerise se 30 Qershorit.

Mirenjohje eksperteve te ODIHR per kete kontribut ne forcimin e demokracise funksionale ne Shqiperi.

Ne 30 qershor 85 % e shqiptarëve i paraprine ketij Raporti dhe vendosën të refuzojnë qe t’u vidhet vota nga Edi Rama.

Shqipërisë i duhet nje qeveri qe te respektoje vullnetin e qytetareve te saj per zgjedhje te lira e te ndershme, qe u mundeson qytetareve te saj te ndikojne ne qeverisje dhe qe mbajne ne konsiderate vetem interesat e tyre.

• Prokuroria, duke u fshehur pas procedurave, nuk i merr shenjat e gishtërinjëve dhe krijon mburojë mbrojtjeje për Agim Kajmakun

• Edi Rama duke u fshehur pas postierit të Vorës po bën gjithçka për të shpëtuar të inkriminuarin e tij

DEKLARATË E PARTISË DEMOKRATIKE, LUÇIANO BOÇI

Prokuroria e Përgjithshme konfirmoi sot se Edi Rama, duke përdorur segmentet e hetimit dhe të institucioneve të shtetit, është duke penguar hetimin dhe duke marrë në mbrojtje Agim Kajmakun.

Jorgo Toto, Agim Kajmaku, të cilin Edi Rama ua dërgoi qytetarëve të Vorës si peshqesh të qeverisë së tij të krimit, ka refuzuar të depozitojë shenjat e gishtave, duke konfirmuar kështu se është ai personi i arrestuar në Greqi nën akuzën e trafikimit të parave të falsifikuara.

Prokuroria, duke u fshehur pas procedurave, po ndërton një mburojë mbrojtjeje për të inkriminuarin e radhës.

Në njoftimin zyrtar, organi i akuzës pranoi publikisht se ka dështuar të marrë shenjat e gishtave të personit të akuzuar Agim Kajmaku dhe për këtë dështim paraqet si shkak ngatërresën e adresës nga Zyra e Postës (!!).

Një justifikim banal dhe padyshim i turpshëm, pasi askush nuk e beson se Posta nuk e ka gjetur dot zyrën e kryetarit të bashkisë në Vorë. Prandaj, e gjitha kjo është thjesht një përpjekje e dëshpëruar për të mbrojtur të inkriminuarin e radhës së Edi Ramës.

Edi Rama duke u fshehur pas postierit të Vorës po bën gjithçka për të shpëtuar Jorgo Kajmakun.

Duke refuzuar të japë shenjat e gishtërinjve të kandidatit të tij dhe duke përdorur prokurorinë, postierin e Vorës dhe duke heshtur përballë fakteve të publikuara nga PD, Edi Rama tashmë është zbuluar publikisht mbrojtësi i trafikantit të parave të falsifikuara, i arrestuar në Janinë dhe më pas i arratisur prej drejtësisë greke.

Edhe prokuroria, njësoj si kryeministri që fshihet pas omerta-së, u fsheh sot pas procedurave, duke u bërë vegla qorre e kryeministrit në mbrojtje të Kajmakut.

Edi Rama është njësoj si Jorgo Toto. Ai është vetë Agim Kajmaku.

I kërkuari nga drejtësia greke është vetëm fytyra e të inkriminuarit të radhës me të cilën Rama u shfaqet shqiptarëve.

Edi Rama hesht dhe e mbron, sepse ai nuk qeveris dot pa modelin kriminal që përfaqëson njeriu të cilin Rama ua ka servirur për kryebashkiak qytetarëve të Vorës.

Jorgo Kajmaku vazhdon të mbajë padrejtësisht zyrën e bashkisë, ndërkohë që bashkë me Valdrinin, Pjerinin, Vangjushin, Eltonin, Elvisin duhet të ishin duke ndarë sëbashku qelinë e burgut.

Por megjithë provat e pakundërshtueshme që faktojnë inkriminimin e Jorgo Totos alias Agim Kajmaku, Edi Rama nuk e lëshon mollën e kalbur të radhës.

Ai e mban fort shportën e kriminelëve me të cilët ka grabitur votat e shqiptarëve, po grabit Shqipërinë dhe të ardhmen e shqiptarëve.

Edi Rama e di se duke lëshuar Kajmakun, i afrohet radha për të dhënë vetë llogari për inkriminimin që i bëri qeverisë, parlamentit, shtetit dhe jetës së shqiptarëve.

Provat janë aty, në dritën e diellit.

Agim Kajmaku duhet të jetë në burg, jo në zyrën e bashkisë së Vorës.

Krimi nuk mund të qëndrojë asnjë minutë ulur në karrigen e kryeqytetarit të Vorës dhe të asnjë bashkie të vendit.

Edi Rama duhet dhe do të ikë sëbashku me shportën e tij të krimit me të cilët po grabit pasurinë dhe jetën e shqiptarëve.

Fusha SHPK paguan për luksin e drejtuesve të bashkisë me lekët e taksapaguesve të Tiranës që përfiton nga Veliaj me tendera, koncensione dhe PPP

• Prokuroria duhet të hetojë për lidhjen mes pagesave private per Maznikun dhe ndikimin e tij për marrjen e këtyre tenderave

DEKLARATË E PARTISË DEMOKRATIKE, ZËDHËNËSJA INA ZHUPA

Veliaj dhe Bashkia Tiranë kanë pranuar shkeljen e ligjit, kur kanë pohuar për Zërin e Amerikës se Shkëlqim Fusha, pronari dhe administratori i Fusha shpk ka paguar hotelin 908 euro nata për nënkryetarin Mazniku.
Justifikimi ishte se kështu nuk po harxhonin paratë e taksapaguesve të Tiranës. Por paratë e Fusha shpk në origjinë jane paratë e qytetarëve, taksapaguesve të Tiranës.
Janë të taksapaguesve sepse oligarku Fusha, nga taksat i ka marrë milionat. Aq shumë ka marrë, sa ja mban xhepi të bëjë shpenzime luksi për zyrtarët e Veliajt
I ka marrë nga paratë e qytetarëve të Tiranës, sepse ata e mbushin buxhetin e bashkisë, me faturat e rritura të Ujit, me tatimet dhe me taksat e reja që janë shtuar çdo vit. Paratë e banorëve të Tiranës shkojnë në buxhetin e bashkisë, dhe nga aty i merr Fusha Shpk.
I merr pa garë, i merr me ofertën me çmim më të lartë, i merr me shumicë duke i qepur edhe ligje speciale dhe me kritere preferenciale.
Shembulli më i madh i vjedhjes me oligarkët, është pikërisht favorizimi që bashkia e Erjon Veliajt i ka bërë që prej vitit 2015, kompanisë Fusha shpk, e cila rezulton përfituesja më e madhe e pasurive publike.
Gjatë periudhës 2015-2019, kjo kompani ka përfituar 49 tendera me një vlerë mbi 40 milion euro, nga të cilat, 34 pa garë dhe në 47 prej këtyre tendera vlera e fondit limit ështe thuaj se e njëjtë me vlerën e kontratës. Nga këto para burojnë shpenzimet e luksit për Maznikun e bashkisë.
Prokuroria e Tiranës ende nuk ka nisur hetimet për Maznikun, i cili duke pranuar dhuratën e oligarkut që fiton tenderat në bashkinë Tiranë ka shkelur njëkohësisht disa ligje.
Prokuroria duhet të hetojë për lidhjen mes pagesave private per Maznikun dhe ndikimin e tij për marrjen e këtyre tenderave. Një subjekt në tender që paguan zyrtarin e institucionit klasifikohet si korrupsion, ushtrimi ndikimi, konflikt interesi.
Gjithashtu në zbatim te ligjit nr.9367, datë 7.4.2005 “Për parandalimin e konfliktit të interesave në ushtrimin e funkisioneve publike” është e ndaluar rreptësisht që një zyrtar të kërkojë ose të marrë, në mënyrë të drejtpërdrejtë a të tërthortë, dhurata, favore, premtime ose trajtime preferenciale, të cilat i jepen për shkak të pozicionit të tij, nga një individ, person fizik ose juridik privat .
Arbjan Mazniku ka shkelur detyrimin ligjor për deklarimin e kësaj dhurate pranë ILDKPI në formularin periodik vjetor të interesave private siç përcaktohet në faqen 8 të formularit.
Veliaj hesht, sepse ky është modeli i qeverisjes së tij. Vidh me oligarkët dhe pasurohu me ta, shpenzo per luks paratë e taksapaguesve. Është koha që ky model, këto skandale të padëgjuar në vende që duan të hyjnë në BE, të marrin fund.
Për këtë ka vetëm një rrugë: Të largojmë bandën e Edi Ramës me Veliajt dhe Maznikët e tij që pushtetin e kanë shndërruar në një sistem grabitje e vjedhje.

• Dokumentat, zbulohet një tjetër skandal me fondet në Shkodër, drejtoresha e Zyrës së Punës “punëson” personat e punësuar dhe lekët i ndan me kompaninë private

• Që paratë publike të mos vidhen por të kthehen në vende pune e ndihmë sociale ka vetëm një rrugë: Largimin e Edi Ramës dhe bandën e tij që po e grabit Shqipërinë

DEKLARATË E PARTISË DEMOKRATIKE, IZMIRA ULQINAKU

Rilindja është zhytur thellë në korrupsion.

Organizata kriminale që qeveris vendin shkon deri aty sa po grabit edhe fondet për punësimin e të papunëve.

Një rast i tillë vjedhje është zbuluar së fundmi nga PD në Zyrën e Punës në Shkodër, ku drejtoresha e këtij institucioni ka ndërtua një skemë korruptive për të gllabëruar paratë publike të përcaktuara për punësimin.

Pasi e privatizoi gjithë buxhetin e shtetit, duke i çuar fondet në xhepat e miqve të kryeministrit, me koncesione e me PPP-ra, tani ka ardhur radha që vartësit e Edi Ramës të bëjnë kërdinë me fondet që jepen për shtimin e vendeve të reja të punës.

Vjedhja me këto fonde është bërë normë qysh kur vetë Kryeministri deklaroi me të madhe në janar të 2018-s se e kishte marrë në patronazh këtë sektor, në mënyrë që të shmangen abuzimet.

Për hapjen e vendeve të reja të punës ekzistojnë një sërë programesh të posaçme, kryesisht drejtuar shtresave në nevojë, me qëllim përfshirjen e tyre në tregun aktiv të punës. Por fatkeqësisht, babëzia e “Rilindjes” nuk po lë asnjë qindarkë që të mbërrijë tek qytetarët.

Rasti më flagrant i shpërdorimeve është Zyra e Punës në Shkodër, ku drejtoresha Rozafa Zmijani, nën bekimin e shefes së saj Elira Demiraj, po shpërndan në mënyrë klienteliste fondet publike për subjektet që janë të gatshme “të bashkëpunojnë” në këtë skemë korruptive.

E njohur si “zonja 20%”, Zmijani siç provohet edhe nga provat e publikuara në ekran, abuzon me fondet publike duke paguar për punësimin e punëtorëve që prej kohësh figuronin si të punësuar në evidencat e firmës DELIA.

(foto VKM)

Nga dokumentet bashkëlidhur vërehet qartazi që Zmijani, në mënyrë klienteliste po shpërdoron fondet publike për trajnim në punë dhe punësim, pasi sipas VKM nr.47/2008, kërkohet qartazi përfshirja në këtë projekt vetëm e punëkërkuesve të papunë, por në realitet, ajo ka përfshirë si përfitues fondesh njerëz të punësuar qysh kohë më parë në subjektin DELIA IMPEX.

(dokumentet PDF)

Pra punonjës që derdhin kontribute rregullisht përgjatë gjithë vitit, regjistrohen fiktivisht si të papunë në sistemin e Shërbimit Kombëtar të Punësimit, për t’u çregjistruar më pas si përfitues të programit të Zyrës së Punës

(fotot e sistemit).

Drejtoresha e “Rilindjes” në vend që t’u japë shansin për punësim punëkërkuesve afatgjatë, ripunëson punonjësit e Firmës DELIA në këmbim të 20% të shifrës totale që jepet nga projekti shtetëror për hapjen e vendeve të reja të punës.

Ky skandal i ri tregon se centralizimi i fondeve, qoftë për hapjen e vendeve të reja të punës, qoftë për skemën e ndihmës ekonomike dhe asistencës sociale, nuk u bë për shmangien e abuzimeve, por vetëm për përqendrimin e fondeve në dorë të drejtorëve e drejtoreshave të partisë. Këto fonde kanalizohen më pas si përqindje që drejtorët i marrin në ortakëri me firmat e partisë, duke grabitur edhe qindarkat e fundit që shteti jep për luftën kundër varfërisë.

Sot Shqipëria është shteti më i varfër i Evropës, dhe do të vijojë që të varfrit të bëhen më të varfër ndërsa të pasurit akoma më të pasur, sa kohë Edi Rama do vijojë të mbajë në patronazh të gjithë buxhetin e shtetit, duke e ndarë atë vetëm për shërbime partiake me drejtoreshat e partisë dhe firmat e partisë, në çdo qark.

Që paratë publike të mos vidhen por të kthehen në vende pune e ndihmë sociale ka vetëm një rrugë: Largimin e Edi Ramës dhe bandën e tij që po e grabit Shqipërinë.

• Jorgo Toto alias Agim Kajmaku mbrohet nga Edi Rama sepse ai është simboli i modelit kriminal me të cilin qeveris Shqipërinë prej 6 vitesh.

• Rilindja e mbron me kodin Omerta të mafias Agim Kajmakun, sepse një organizatë mafioze kodin e heshtjes e ka themelin e funksionimit të saj.

• Edi Rama është ulur në karrigen e kryeministrit dhe ndërron fytyrën duke marrë imazhin e kriminelit të radhës me të cilin ka ardhur në pushtet

DEKLARATË E PARTISË DEMOKRATIKE, KLEVIS BALLIU

Organizata kriminale e Rilindjes po zbaton kodin mafioz të heshtjes, Omerta, për të mbrojtur të arratisurin nga drejtësia greke, Jorgo Toto, të cilin të konvertuar në Agim Kajmaku, shefi i organizatës Edi Rama  ia ka servirur Vorës për kryetar bashkie.

Kryeministri i të inkriminuarve nuk guxon të thotë asnjë fjalë!

Provat e publikuara nga Partia Demokratike nuk mundet ti kundërshtojë dhe as ti mohojë dot.

Edi Rama flet për gjithçka, por nuk guxon të thotë asnjë fjalë për Jorgo Kajmakun.

Kyç gojën sepse ai e di se “Gimi është njësoj si ai”.

Shefi i bandës së Rilindjes hesht sepse Agim Kajmaku është fytyra e tij.

Edi Rama nuk thotë dot asnjë fjalë, se nga shporta e tij kriminale u sërvir shqiptarëve vetëm Elvisë, Vangjushë, Saimirë, Arbenë, Damianë, Valdrinë dhe Kajmakë.

Jorgo Toto mbrohet nga kryeministri i ardhur në pushtet me krimin, sepse ai është simboli i modelit me të cilin qeveris Shqipërinë prej 6 vitesh.

Rilindja e mbron me kodin Omerta të mafias Agim Kajmakun, sepse një organizatë mafioze kodin e heshtjes e ka themelin e funksionimit të saj.

Rama e mbron kriminelin e radhës, sepse pas çdo të inkriminuari që ai u sërvir shqiptarëve qëndron vetë me modelin e qeverisjes me krimin dhe për krimin.

Agim Kajmaku është vetë Edi Rama.

Edi Rama është fytyra e krimit në qeveri vetëm se në raste të ndryshme ndërron emrin dhe bëhet Elvis Rroshi, Vangjush Dako, Armando Prenga, Arben Ndoka, Saimir Tahiri, Agron Xhafaj, Damian Gjiknuri, Dionis Imeri, Pjerin Ndreu, Jurgis Çyrbja, Astrit Avdylaj, Ilir Ndrazhi, Elton Arbana apo Valdrin Pjetri e me rradhë një listë e gjatë emrash që sot duhet të ishin në burg.

Me heshtjen e tij, Edi Rama provoi se është ai mbrojtësi i Agim Kajmakut, me kandidimin e të cilit provoi edhe njëherë se është i lidhur pazgjidhshmërisht me krimin.

Omerta edhe nga Katicat e Ramës në prokurori , që njësoj si shefi i tyre në qeveri mbrojnë me “heshtjen” e institucionit të tyre të kërkuarin në Greqi.

Megjithëse provat tashmë i ka në dritë të diellit, Arta Marku e përfshirë nga ethet e konfirmimit, kërkon nga PD të dhënat që i ka në sistem.

Sipas dokumentacionit zyrtar të autoriteteve greke rezulton e provuar se shtetasi Agim Kajmaku alias Jorgo Toto i është shmangur drejtësisë greke për përballjen me një akuzë, që parashikon të paktën 10 vjet burg.

Përveç kësaj ai ka mashtruar në formularin e dekriminalizimit, veprim ky që përbën vepër penale dhe prokuroria duhet të nisë menjëherë procedim penal ndaj të zgjedhurit të Ramës në Vorë.

Por megjithë këto fakte, i gjithë sistemi kriminal i ngritur nga Edi Rama hesht dhe mbron modelin kriminal në këtë rast nën emrin e Jorgo Kajmakut.

Ky model, tashmë i kthyer në sistem të qeverisjes duhet të marrë fund. Edi Rama si kryetar i bandës kriminale që qeveris sot vendin duhet larguar një orë e më parë.

Krimi nuk e ka vendin në qeveri, por në burg.

Shqiptarët meritojnë një pushtet që buron prej tyre dhe jo prej kriminelëve me të cilën Edi Rama e ka mbushur plot buqeten e Rilindjes.