Blog

Kryetari i Partisë Demokratike-Demokratët Euroatlantikë, Lulzim Basha, ka akuzuar qeverinë e Edi Ramës si një nga më të korruptuarat dhe të inkriminuarat në Europë, e konfirmuar nga hetimet e SPAK dhe vendimet e gjykatave kundër krimit dhe korrupsionit.

Sipas Bashës, modeli qeverisës i Ramës është simbolizuar nga “tigri i korrupsionit,” ndërsa ai dhe Sali Berisha janë në bashkëpunim për të ruajtur pozitat e tyre në pushtet dhe opozitë.

Basha thekson se pakti mes Ramës dhe Berishës ka për qëllim mbajtjen peng të Shqipërisë për interesa personale. Ai fton qytetarët që më 11 maj të zgjedhin mes vazhdimit të këtij modeli dhe një të ardhme më të mirë për familjet dhe vendin.

Postimi i plotë Bashës:

Që qeveria e Edi Ramës është ndër më të korruptuarat dhe të inkriminuarat në Europë, tashmë është një e vërtetë e njohur për çdo shqiptar, e konfirmuar nga hetimet e SPAK dhe vendimet e gjykatave kundër krimit dhe korrupsionit. Pikërisht për këtë arsye, mijëra shqiptarë po braktisin masivisht vendin e tyre.

“Tigri i korrupsionit” është pasqyrimi më i qartë i modelit qeverisës së Edi Ramës. Po ashtu, fakti që Edi Rama dhe Sali Berisha janë në koordinim për të ruajtur karriget e tyre – njëri në pushtet dhe tjetri në opozitë – është i dukshëm për çdo shqiptar.

Dje, çdo dyshim që mund të ekzistonte, u hodh poshtë nga Arben Ahmetaj. Berishës iu dha vula e Partisë Demokratike nga Edi Rama për ta përdorur si mjet për të ruajtur pushtetin dhe për të zhvilluar luftra të brendshme politike. Nga ana tjetër, ai organizon protesta dhe denoncime me regji dhe bekimin e Edi Ramës.

Ky është pakti që synon të mbajë peng Shqipërinë dhe ti përdorin partitë për interesa personale. Me 11 maj shqiptarët e kanë në dorë të vendosin, nëse duan të vazhdojnë të përdoren për interesat e dy njerëzve apo do vendosin për fatin e familjes së tyre.

Shqipëria meriton më shumë

Kreu i Partisë Demokratike-Demokratët Euroatlantikë, Lulzim Basha, i është përgjigjur kryeministrit duke thënë se kush nuk vjedh, për Edi Ramën fle gjumë. Ai shprehet se nuk ka halle të tilla që Ramën e shqetësojnë, si akuzat për lidhjet me Çyrbet e kapura duke blerë vota krimi, apo “mikun” McGonigal, që sot është në burg, i paguar, për të sajuar poshtërsi ndaj Bashës.

Postimi i plotë i Bashës:

E di, për ty, kush nuk vjedh, fle gjumë. Nuk kam nga ato halle, që ty ta kanë vrarë gjumin, me shokë e shoqe, që t’i zunë me mollë e dardhë, “pas shpine”, me çyrbet e kapura duke blerë vota krimi për ty, apo “mikun” tënd McGonigal, që sot është në burg, i paguar, për të sajuar poshtërsi ndaj meje.

Kryetari i Partisë Demokratike-Demokratët Euroatlantikë, Lulzim Basha, Shqipëria mbetet e fundit për të ardhurat dhe konsumin për frymë, ndërsa gjysma e popullsisë tonë jeton në rrezik varfërie.

Basha thekson se 38% e tyre nuk mund të ngrohin banesën për shkak të kostove të larta dhe të ardhurave të ulëta, norma më e lartë në Europë.

Sipas tij, kjo situata është rezultat i keqqeverisjes dhe korrupsionit të qeverisë Rama. Basha më tej thotë se programi i Demokratëve Euroatlantikë propozon masa konkrete për mirëqenien e familjes, duke përfshirë: Subvencion prej 2,000 euro për çdo bebe; 20,000 euro për fëmijën e tretë; Mbulim të plotë të interesit të kredisë së banesës për 30,000 çifte të reja.

Postimi i plotë i Bashës:

38% e familjeve shqiptare nuk ngrohin dot banesën, për shkak të kostove të larta dhe të ardhurave të ulëta. Në Shqipëri afro gjysma e popullsisë jeton në varfëri.

Udhëkryqi në të cilin ndodhet familja shqiptare për shkak të keqqeverisjes dhe korrupsionit të qeverisë Rama, mund të lihet pas vetëm përmes votës tuaj për ndryshim më 11 maj.

Familja shqiptare meriton më shumë, dhe pesha më e madhe në familje bie mbi gratë.
Prandaj e kemi vendosur familjen në zemër të programit tonë përmes fondit për mirëqenien e familjes, përmes të cilit në propozojmë subvencione konkrete dhe të drejtpërdrejta:
✅2 000 euro për çdo bebe;
✅20 mijë euro për fëmijën e tretë;
✅Mbulim i plotë i interesit të kredisë së banesës për 30 mijë çifte të reja.
✅​Rritje e pensioneve me të paktën 20% dhe indeksimi i tyre me dyfishin e vlerës së inflacionit çdo vit;
✅​Bonus periodik prej 250,000 lekësh për pensionet e ulëta;
✅​Dyfishim i ndihmës ekonomike për familjet në nevojë;
✅​Pagesa për personat me aftësi të kufizuara do të jetë 70% e pagës minimale;
✅​Statusi i jetimit do të përfshijë edhe ata që nuk kanë njërin prind.
✅​5 milion euro grant për krijimin e 1,000 bizneseve të reja nga gratë sipërmarrëse;
✅​Lehtësi për bizneset që punësojnë gra dhe vajza;
✅​Mbështetje financiare për gra dhe vajza që merren me punë artizanale ose në sektorin e bujqësisë;
​

Vendi ynë ka të gjithë potencialin të jetë vendi i mundësive të mëdha për çdo shqiptar: me punë dhe paga të larta

Plani i Demokratëve Euroatlantikë, i hartuar me ekspertët më të mirë vendas dhe të huaj, i shpalosur në detaje për qytetarët e dëshmon se një qeveri e përgjegjshme mund të bëj me shumë, sepse Shqipëria meriton më shumë

Reagim i kryetarit të Partisë Demokratike-Demokratët Euroatlantikë, Lulzim Basha:

Ndoshta disa do të trishtohen, por, ndryshe nga lajmi i rremë që është përhapur, jam gjallë e mirë dhe nuk kam vdekur në një aksident automobilistik.
Njerëzit që duan që të përhapen këto lajme të rreme, janë po ata që duan të shkatërrojnë Shqipërinë.
Unë dhe ju nuk do t’i lejojmë!

Kryetari i Partisë Demokratike-Demokratët Euroatlantikë, Lulzim Basha, ka vënë theksin te rëndësia e zgjidhjes së problemit të pronave, të cilin e cilëson si një nga barrierat kryesore për zhvillimin ekonomik dhe demokratik të vendit.

Në një postim në Facebook, Basha shkruan se keqpërdorimi i pronave nga qeveritë e kaluara për interesa politike dhe ekonomike, si dhe burokracitë, kanë ushqyer pasigurinë pronësore. Ai më tej shprehet se kryeministri aktual pati çdo pushtet në dorë dhe ka dështuar për 12 vite të ofrojë një zgjidhje për këtë çështje jetike.

Sipas tij, zgjidhja e qëndrueshme mund të vijë vetëm përmes një programi serioz, të propozuar nga Demokratët Euroatlantikë, i cili përfshin: kthimin dhe kompensimin e menjëhershëm të pronave, regjistrimin e drejtë dhe transparencën në këtë proces.

Postimi i plotë i Bashës:

“Problemi i pazgjidhur i pronave ka penguar për dekada zhvillimin ekonomik dhe demokratik të Shqipërisë
Toka dhe pasuritë e patundshme janë shfrytëzuar në mënyrë sistematike për përfitime politike dhe ekonomike, ndërsa korrupsioni është përdorur për të ushtruar presion mbi pronarët dhe ka nxitur konflikte ligjore.

Pa zgjidhje të qëndrueshme dhe afatgjata, pasiguria pronësore do të vazhdojë të pengojë zhvillimin kombëtar. Këto zgjidhje nuk mund të vijnë nga kryeministri aktual, që në 12 vite pati çdo pushtet në dorë për t’i dhënë fund problemit të pronës, por i shërbeu vetëm interesave klienteliste.

Zgjidhja e kësaj çështje jetike mund të vijë vetëm përmes një ndryshimi të vërtetë më 11 maj ️, përmes një vote që mbështet një program serioz për reformën e pronës, fryt i punës së ekspertëve më të mirë vendas dhe të huaj.

Programi i Demokratëve Euroatlantikë parashikon:
Zgjidhje të menjëhershme, pa burokraci;
Kthim të menjëhershëm të pronës aty ku është e lirë;
Kompensim me vlerë tregu ku është zënë;
Lëshim të obligacionit/bonove nga shteti, që paguhen çdo vit me 1/20 e vlerës;
Regjistrim i pronave me parimin Uti Posidetis, secili mban atë që ka.

Përfundimi i kësaj reforme themelore çel një perspektivë të re ekonomike, shoqërore dhe demokratike për familjet dhe sipërmarrjen e ndershme shqiptare.

Shqipëria meriton më shumë”

Kreu i PD-Demokratët Euroatlantikë, Lulzim Basha, zhvilloi sot një takim me strukturat drejtuese të këtij grupimi politik, ku u diskutua strategjia për zgjedhjet e 11 majit.

Gjatë fjalës së tij, Basha shprehu bindjen se strukturat drejtuese të Demokratëve Euroatlantikë do të mbështesin një ekip vlerash në mbarë vendin, duke e parë politikën si një shërbim ndaj qytetarëve dhe jo si një mjet vetëshërbimi për kastën e vjetër të tranzicionit.

Lideri i Demokratëve Euroatlantikë, Lulzim Basha, rikonfirmoi gjithashtu mbështetjen pa kushte për drejtësinë dhe kandidimin me lista të hapura, duke theksuar se kjo është një garanci për një Shqipëri që meriton më shumë.

Postimi i plotë i Bashës:

“Shqipëria meriton më shumë. Me këtë bindje, do të shkojmë në çdo qytet, në çdo fshat, në çdo lagje, në çdo derë, për të shpalosur programin tonë për zgjedhjet e 11 majit. Strukturat drejtuese të Demokratëve Euroatlantikë do të mbështesin një ekip vlerash në mbarë vendin, që e sheh politikën si shërbim ndaj qytetarëve, dëgjon shqetësimet e tyre dhe ofron vizionin për t’i kapërcyer ato.

Jo si vetëshërbim për kastën e vjetëruar të tranzicionit, që ka varfëruar vendin dhe ka larguar rininë. Plani ynë konkret për Shqipërinë, mbështetja pa kushte ndaj drejtësisë për t’i dhënë fund pandëshkueshmërisë, demokratizimi dhe hapja e sistemit politik përmes listave të hapura, si dhe mbrojtja dhe promovimi i orientimit euro-atlantik të vendit, janë kontrata jonë me qytetarët shqiptarë që kërkojnë ndryshim, jo riciklim. Shqipëria meriton më shumë!”

Lulzim Basha ka risjellë programin e Demokratët Euroatlantikë për sistemin shëndetësor në Shqipëri, duke theksuar se “paraja ndjek pacientin”. Sipas Bashës, Shqipëria meriton një sistem shëndetësor ku çdo qytetar trajtohet sipas nevojës dhe jo sipas mundësive financiare. Ai shprehet se qeveria e Edi Ramës ka dështuar në realizimin e premtimit për “shëndetësinë falas” dhe u shndërrua në një piramidë aferash korruptive.

Sipas tij, programi i Demokratët Euroatlantikë përfshin forcimin e sigurimeve shëndetësore, rritjen e buxhetit për shëndetësinë, eliminimin e PPP-ve të panevojshme, dhe investime në teknologji digjitale dhe përmirësimin e kushteve të trajtimit për pacientët. Ai thotë se me mbështetje nga qytetarët, ky program mund të sjellë një ndryshim të thellë në sistemin shëndetësor shqiptar.

Postimi i plotë i Bashës:

Shqipëria meriton një sistem shëndetësor ku çdo shqiptar të trajtohet me respekt, cilësi dhe merr kujdesin që i takon sipas nevojës, jo sipas xhepit.

Prej 12 vjetësh, Edi Rama i ka mashtruar shqiptarët me parullën e “shëndetësisë falas”, një premtim që jo vetëm nuk u mbajt, por u shndërrua në një piramidë aferash korruptive. Sot, qytetarët paguajnë 60% të shpenzimeve nga xhepat e tyre, teksa shëndetësia vuan nga keqfinancimi, korrupsioni endemik, koncesionet klienteliste, keqmenaxhimi dhe largimi masiv i personelit shëndetësor. Ky dështim kolosal i qeverisë dëshmon qartë se asgjë nuk e lidh Edi Ramën me mirëqenien dhe dinjitetin e familjeve shqiptare.

Kjo situatë kërkon një ndryshim rrënjësor për të garantuar shëndetin e çdo shqiptari, i cili mund të vijë me votën tuaj më 11 maj.

Programi i Demokratëve Euroatlantikë mundëson një sistem shëndetësor që i përgjigjet nevojave të qytetarëve, jo fuqisë së portofolit të tyre.

Me mbështetjen tuaj, ne:

Zbatojmë parimin “paraja ndjek pacientin”, duke i dhënë çdo shqiptari kartën e sigurimit shëndetësor, me të cilën mund të zgjedhë ku dhe si të trajtohet (publik apo privat) pa pagesa shtesë;
Forcojmë skemën e sigurimeve shëndetësore, kalojmë nga pagues i vetëm në disa pagues;
Rrisim buxhetin për shëndetësinë, ku 50% më shumë shkojnë në rimbursim dhe motivimin e personelit mjekësor;
Anulojmë PPP-të e panevojshme, që zhvasin milionat e taksapaguesve; Krijojmë Agjencinë Kombëtare të Llogarive Shëndetësore për kontroll shpenzimesh në sektorin publik dhe privat;
Investojmë në teknologjinë digjitale, si kartelën elektronike, e cila i mundëson pacientit trajtim kudo dëshiron, duke pasur historikun mjekësor më vete;
Përmirësojmë paketën bazë të sigurimeve shëndetësore, me rimbursim sipas diagnozës, në mënyrë që asnjë pacient të mos mbetet pa mjekim për shkak të mungesës së barnave në lista;
Luftojmë barnat jocilësore dhe mafian e barnave, duke siguruar medikamente bashkëkohore e të sigurta për çdo qytetar.

Bashkë mund ta bëjmë të mundur këtë ndryshim, ku secili gëzon mirëqenie, dinjitet dhe siguri.

Shqipëria meriton më shumë.

Kryetari i Partisë Demokratike-Demokratët Euroatlantikë, Lulzim Basha, ka shprehur ngushëllime për ndarjen nga jeta të Kryepeshkopit Anastas Janullatos. Në një postim në facebok, Basha shkruan se ky është një moment trishtimi për Kishën Ortodokse Autoqefale të Shqipërisë dhe për të gjithë ata që e njihnin dhe vlerësonin veprën e tij. Ai më tej shpreh ngushëllimet e tij për besimtarët ortodoksë, klerikët dhe të gjithë ata që e kujtojnë me respekt dhe mirënjohje.

Postimi i plotë:

Me trishtim mora lajmin e kalimit në amshim të Fortlumturisë së Tij, Kryepeshkopit Anastas Janullatos. Ky është një moment pikëllimi jo vetëm për Kishën Ortodokse Autoqefale të Shqipërisë, por për të gjithë ata që patën fatin të njihnin dhe të vlerësonin kontributin e tij për paqen, dialogun fetar dhe veprat bamirëse në shërbim të njerëzve në nevojë.
Kryepeshkopi Anastas Janullatos do të mbetet një simbol i përkushtimit shpirtëror, i urtësisë dhe i forcës së karakterit, duke na kujtuar rëndësinë e bashkëjetesës fetare, të tolerancës dhe të dashurisë për çdo njeri.
Ju shpreh ngushëllimet më të sinqerta besimtarëve ortodoksë, klerit dhe të gjithë atyre që do ta kujtojnë gjithmonë me mirënjohje e respekt. U prehtë në paqe!

Kryetari i Partisë Demokratike-Demokratët Euroatlantikë, Lulzim Basha, shprehet se koha do të jetë e pamëshirshme ndaj atyre që përdorin politikën për pushtet dhe pasuri personale.

Në videon e postuar në facebook nga intervista e mbrëmshme, Basha nënvizon se prioritetet për Shqipërinë mbeten lufta kundër korrupsionit dhe mbështetja për reformën në drejtësi, të cilat jo vetëm që nuk ndryshojnë, por forcohen më tej.

Postimi i plotë i Bashës:

Koha do jetë e pamëshirshme ndaj atyre që përdorin politikën vetëm për pushtet e pasuri personale, dhe asgjë nuk e ndalon llogaridhënien e tyre. Prioritetet për Shqipërinë mbeten lufta kundër korrupsionit dhe mbështetja për reformën në drejtësi, të cilat jo vetëm nuk ndryshojnë, por forcohen më tej.

Zbardhja e videos:

Unë mendoj se koha do të jetë e pamëshirshme me të gjithë ata që politikën e shohin thjeshtë dhe vetëm si një mjet të përvetësimit të pushtetit apo pasurive në nivel personal dhe një nga një siç e kam thënë do të japin llogari aty ku duhet të japin llogari dhe është e qartë që asgjë nuk e ndal dot këtë, ndryshe nga çdokush që mund të shpresojë se me ndryshimin e administratave në Uashington do të ndryshojnë prioritetet. Një gjë duhet ta konfirmoj qartë dhe saktë nga Uashingtoni që prioritet për Shqipërinë është lufta kundër korrupsionit, prioritet për Shqipërinë është mbështetja e reformës në drejtësi, kjo jo vetëm nuk ndryshon por forcohet edhe më tej.

Në një intervistë për emisionin “360 gradë” në Abc Neës, Lulzim Basha theksoi se Demokratët Euroatlantikë janë në proces bisedimesh me parti të tjera opozitare që ndajnë të njëjtat vlera, për të unifikuar votat dhe për të penguar manipulimin e rezultatit zgjedhor nga Edi Rama dhe Sali Berisha.

Basha theksoi se sa më shumë të bashkohen opozitarët, aq më e vështirë bëhet për Ramën të qëndrojë në pushtet. Ai ritheksoi qëndrimin kundër një koalicioni me Sali Berishën, duke kërkuar që ky i fundit të kërkojë falje për gënjeshtrat që hedh në treg, të heqë dorë nga sulmet ndaj SPAK-ut dhe të lërë të gjithë faktorët opozitarë të konvergojnë.

Basha gjithashtu tha se pavarësisht prej kolpos që bëri Rama me votat e Sali Berishës për mbylljen e listave, Dmokratët Euroatlantikë do shkojnë në këto zgjedhje me lista të hapura.

Pjesë nga intervista:

Pyetje: Do ishte Lulzim Basha i gatshëm të bënte një koalicion me strukturat e tjera opozitare, me partitë e tjera opozitare?

Lulzim Basha: Ne jemi në një proces bashkëbisedimi me faktorë të tjerë opozitarë, sepse është e udhës që ata që ndajnë të njëjtat vlera me ne dhe konvergojnë votat opozitare, pamundësojnë skenarin për të cilin punojnë natë e ditë zoti Rama me dakordësinë e zotit Berisha, për t’i hequr, për t’i zhvlerësuar këto vota, për mos t’i kthyer në mandate. Thënë ndryshe, sa më shumë të konvergohen votat opozitare aq më të pamundur e ka zoti Rama që të sundojë edhe për 4 vite të tjera.

Pyetje: Me Sali Berishën?

Lulzim Basha: Në mënyrë absolute jo.
Pyetje: Po në qoftë se Sali Berishës i duhen votat e tua dhe krijon diferencën në masën kritike për të bërë rotacionin?

Lulzim Basha: Ka rrugë të gjatë Sali Berisha që të arrij aty. Duhet të kërkoj falje për të gjithë gënjeshtrat që ka hedhur në treg, duhet të heq dorë nga sulmet kundër SPAK-ut, duhet të hedh një hap pas sa kohë është deklaruar “non grata” nga Shtetet e Bashkuara të Amerikës dhe nga Britania e Madhe. Dhe t’i lërë të gjithë faktorët opozitarë të konvergojnë. Sali Berisha e ka vetëpërjashtuar veten. Bashkëpunojmë me këdo tjetër që ndan këtë qëndrim; mbështetje totale për SPAK-un në luftë kundër korrupsionit dhe lista të hapura. Pavarësisht prej kolpos që bëri Rama me votat e Sali Berishës, ne aplikojë sistemin e listave të hapura. Dmokratët Euroatlantikë do shkojnë në këto zgjedhje me lista të hapura. Kush nuk ka problem me këto dy parime kryesore, është i mirëpritur.