Blog

• Me tërheqjen e policisë, Rama tregoi se ka skenar perplasjeje, duke nxjerrë gjendjen jashtë kontrollit!

• Protestuesit erdhën për të protestuar pa dhunë. Policia ka ndêrprerë kontaktin me organizatorët.

PRONONCIMI I KRYETARIT LULZIM BASHA

Ministri i Brendshëm e di fare mirë që kordoni i policisë ka hapur radhët për të krijuar një skenë të tillë. Siç e shikoni rrinë duarkryq sepse kanë një skenar për të nxitur dhe për të stimuluar dhunë.

Ka nisur para katër ditësh me deklarata të papërgjegjshme të Policisë, ka vazhduar gjithë mbrëmjen e djeshme, ditën e sotme, gjatë kohës që kanë qarkulluar protestuesit.

Dhe tani ndërkohë që protesta filloi plotësisht në mënyrë paqësore dhe s’kam asgjë me efektivët, se efektivët kanë marrë lule nga ne në fillim të protestës.

Ndërkohë me presionin më të vogël të turmës, që natyrisht që janë të irrituar sepse janë banorë të Unazës së Re, kanë shkuar për t’u prishur shtëpitë për t’u vjedhur 18 milionë euro, papritur shohim që hapet kordoni policor.

Kjo do të thotë që ka një plan për të nxitur dhunë. Ka një plan për të nxitur dhunën që t’i drejtojë gishtin e akuzës opozitës dhe kjo është e papranueshme.

DEKLARATA E DYTË E KRYETARIT LULZIM BASHA

Ky që shohim është një skenar. Ju e patë sesi, pas një përpjekjeje fare të lehtë nga një grup banorësh të Unazës, papritur u ça kordoni i policisë, që të përdorej dhuna, të hidhej gazi lotsjellës.

Dhe e gjitha kjo që dëgjoni në altoparlant, është pjesë e një skenari kriminal të policisë, të vënë nën urdhrat e Edi Ramës, për të provokuar një gjendje të tillë. Protestuesit kishin ardhur për të demonstruar paqësisht, pa dhunë.

Po flisnin qytetarët.

Në qendër të sheshit po flisnin qytetarët e Unazës, po flisnin fermerët, studentët, minatorët dhe, për shkak të skenarit të tyre ogurzi, tani gjendja ka dalë jashtë kontrollit dhe nuk duket asnjë polic, askund.

Nuk merr kontakt me organizatorët e protestës, por vazhdon t’i fryjë skenarit të përplasjes dhe të dhunës me këto mesazhe idiote. Policia nuk po zbaton ligjin, policia e ka thyer ligjin.

DEKLARATA E TRETË E KRYETARIT TË PD, LULZIM BASHA.

Siç e patë edhe ju, në veçanti ju që e njihni punën  e policisë, patë një hapje të menjëhershme dhe të çuditshme të gardhit të oficerëve të policisë që mbronin perimetrin e kryeministrisë.

Kjo është qartësisht pjesë e një plani për të provokuar futjen e protestuesve në selinë e Kryeministrisë, sepse në asnjë rast policia dhe gardhi policor, edhe kur kanë presion shumë më të madh, nuk hapet në këtë mënyrë.

Pra ka patur një skenar të mirëmenduar madje të paralajmëruar nga Edi Rama për të çuar në dhunë dhe konfrontim.

Në qëndrojmë në krah të tyre dhe do të vazhdojmë të qëndrojmë në krah të qytetarëve deri në fund.

Pyetje:  Protesta është organizuar nga ju, a keni një thirrje që ata të mos kryejnë akte dhune?

Basha: Qytetarët janë thirrur nga opozita me një qëllim të qartë politik. Qeveri tranzitore, zgjedhje të parakohshme, t’i japim fund qeverisë, që është kapur në vjedhje tek Unaza, tek Teatri, është kapur në vjedhje të votave, siç BIRN dhe Zëri i Amerikës që, në fakt, kanë meritat, por edhe ju si gazetare investigative (Klodiana Lala), demonstroni përmes fakteve të prokurorisë dhe sistemit të drejtësisë në çdo vend të Europës, kur qeveria kapet në vjedhje, ikën qeveria dhe shkon në burg hajdutët, nuk vuan populli.

Populli e ka kuptuar këtë dhe është bashkuar në një protestë më të madhen në këto 30 vite.

Asnjë protestues nuk erdhi për të bërë akte dhune.

Ju e dini fare mirë se si organizohen protestat e dhunshme. Asnjë prej protestuesve këtu nuk erdhi për të kryer akte dhune. Ato u provokuan dhe u nxitën  nga një skenar i mirëmenduar i Edi Ramës dhe i ekzekutuar nga një grusht policësh të korruptuar dhe të lidhur me krimin.

U bëj thirrje të gjithë efektivëve të policisë të ruajnë qetësinë sikundë, u bëj thirrje qytetarëve të vazhdojnë të rrinë të bashkuar për të drejtat e tyre.

DEKLARATA E KATËRT E KRYETARIT TË PARTISË DEMOKRATIKE, LULZIM BASHA 

Absolutisht, aktet e dhunës janë shkaktuar si pjesë e një skenari dhunënxitës të Edi Ramës, të zbatuar nga narko-kupola e policisë së Shtetit.

Unë dua të falenderoj ata efektivë që nuk u bënë pjesë e këtij skenari, sikundër dua t’i bëj thirrje çdo efektivi të policisë, që ka për detyrë të mbrojë jetën e qytetarëve, ka për detyrë të garantojë të drejtën e tyre për të protestuar, të mos bëhet vegël e një narko-qeverie dhe një narko-kryeministri, i cili sot është rrëzuar përfundimisht nga ky bashkim i madh i shqiptarëve.

Pyetje: Zoti Basha, sa janë gjasat që protesta të përfundojë sot?

Basha: Keni sot lajme për gjithë ditën, për të gjitha çështjet e tjera do të flasim. Natyrisht që ne do të shqyrtojmë të gjitha hapat për të arritur objektivin e shqiptarëve; një qeveri të pakapur nga krimi, që garanton zgjedhje të lira e të ndershme dhe një parlament të pakapur nga krimi. E gjithë bota e ka parë sesi Edi Rama ka vjedhur zgjedhjet e 2017. Zëri i Amerikës ka publikuar vetëm majën e dosjes 339, një dosje gjyqësore. Janë kapur duke vjedhur pushtetin, janë kapur duke vjedhur paratë e shqiptarëve dhe janë kapur duke dhunuar popullin më të varfër. Ky është reagimi i popullit dhe rruga e zgjidhjes politike është largimi i Edi Ramës, një qeveri tranzitore që ka besimin e palëve për të bërë të gjitha reformat e nevojshme, përfshirë ato që garantojnë dhënien fund të shitblerjes së votës dhe në këtë mënyrë t’i hapim derën Shqipërisë për t’u futur në Evropë. Në Europë nuk shkohet kurrë me një narko-kryeministër, me një qeveri të kapur në vjedhje, kudo në Europë kur ndodh kjo, qeveria largohet dhe hajdutët shkojnë në burg, nuk vuan populli.

Pyetje: Si i komentoni reagimet e kryeministrit Rama, I cilI ju quan një opozitë e dalë boje?

Basha: Unë nuk jam këtu për të komentuar broçkullat e një kryeministri hajdut, të kapur në vjedhje, por jam këtu për të mbështetur aspiratën e të gjithë shqiptarëve, të djathtë e të majtë, për t’i dhënë fund kësaj gjendjeje. Kështu nuk vazhdohet më dhe kështu nuk do të vazhdohet më. Ky është fillimi i një qëndrese popullore, e cila do të diktojë çdo ndryshim që duan njerëzit. Është në dorën e njerëzve. Proceset politike, të cilat propozuam, përfshirë vetingun e politikanëve, u hodhën poshtë, sepse Edi Rama mendon se është zot i fateve të Shqipërisë. Sot shqiptarët po i tregojnë se kush është zot i fateve të Shqipërisë.​

DEKLARATA E PESTË E KRYETARIT TË PD, LULZIM BASHA

Zonja dhe zotërinj,

Vëllezër dhe motra, qytetarë dhe qytetare të Tiranës dhe të gjithë Shqipërisë,

Mbarë Shqipëria dhe kombi shqiptar dhe gjithë bota, kanë parë sot bashkimin më të madh të shqiptarëve në 30 vite dhe fundin de facto të kryehajdutit Edi Rama.

Dhe në fakt iku, u fsheh dhe do të vazhdojë të ikë në arrati deri sa të largohet një herë përgjithmonë nga pushteti që ka uzurpuar me duart e krimit, për të vjedhur xhepat e shqiptarëve.

Zonja dhe zotërinj,

“Sot çdo kush e ka parë forcën e qytetarëve të bashkuar, të vendosur për të mos pranuar më asnjë ditë një kryeministër dhe një qeveri të kapur në vjedhje flagrante, në vjedhje të zgjedhjeve, në vjedhje të votave, në vjedhje të taksave, në vjedhje të burimeve pasurore të Shqipërisë, në vjedhjen e të ardhmes së shqiptarëve, në vjedhjen e të ardhmes evropiane të Shqipërisë.

Ndaj, dua sot në emër të opozitës, t’ju shpreh mirënjohjen më të thellë, qindra e mijëra qytetarëve, që i dhanë zë, për ta dëgjuar gjithë bota, revoltës dhe kryengritjes qytetare. Le të zotohemi sot, se kjo kryengritje qytetare do të vazhdojë deri në përmbysjen përfundimtare të këtij sistemi të kalbur, dhe t’ju ftoj të enjten në orën 10.00, në protestën tjetër, më të bashkuar, më të vendosur se kurrë.

Ne u bashkuam këtu për qëndresë të vendosur, kundër qeverisë hajdute.

Provokimet e Edi Ramës dhe narkopolicëve të tij ishin e vetmja dhunë.

Por, dijeni mirë provokatorë të narkoshtetit, narkoqeverisë i erdhi fundi, derën e kryeministrisë ta bllokojë me duart e tij, dhe nga ajo derë as nuk do të hyjë e as nuk do të dalë më legjitimisht kryehajduti i kapur në vjedhje.

Ndërsa ditën e enjte populli do t’i japë një përgjigje tjetër narkoshtetit, duke marrë fatin në duart e tij dhe duke i dhënë fund një parlamenti të vendosur ngfa vota e drogës dhe jo nga vota e qytetarëve shqiptarë.

Duke ju falenderuar nga zemra për këtë qëndresë të jashtëzakonshme që dëshmuat para botës, të jeni edhe më shumë edhe më të vendosur, edhe më të bashkuar të enjten e javës së ardhshme.

Zoti ju bekoftë ju dhe familjet tuaja!

Zoti e bekoftë Shqipërinë!

Liri!

Demokraci!

Shqipëri si gjithë Europa!

• Ka një person të lidhur me krimin, që është i interesuar dhe i përgatitur për të ushtruar dhunë. Ai quhet Edi Rama.

• Se ku do të protestojë populli, këtë e vendos populli dhe jo kryeministri i dalë boje në sytë e shqiptarëve dhe të partnerëve ndëkombëtarë.

• Në protestë nuk do të jenë Rama Dako, Tahiri, Ndoka, Prenga, Frroku, Bushi, Bardhi, as Roshi, Çyrbja, Xhafaj, Gjiknuri.

• Edi Rama dhe Policia Politike e dinë se numërimi mbrapsht ka filluar dhe se asgjë nuk mund ta ndalë dot popullin!

DEKLARATË E SEKRETARIT TË PËRGJTIHSHËM TË PARTISË DEMOKRATIKE, GAZMENT BARDHI

Jam sot këtu, në emër të Partisë Demokratike, për të lajmëruar Policinë Politike të frikacakut Edi Rama se ka vetëm një person të lidhur me krimin, që është i interesuar dhe i përgatitur për të ushtruar dhunë. Ai quhet Edi Rama. Thirrjet e policisë që ne të distancohemi nga ata që inkurajojnë dhunë apo nga personat me rekorde të rënda kriminale janë sa qesharake, aq edhe kriminale.

Partia Demokratike nuk ka nxitur kurrë dhunë dhe as nuk ka patur në rradhët e saj njerëz të krimit! Persona me rekorde të rënda kriminale nuk janë mes nesh, nuk janë mes protestuesve, por janë në qeveri dhe me qeverinë.

Njoftojmë Policinë Politike se as shtetasi Vangjush Dako, as shtetasi Saimir Tahiri, as shtetasi Arben Ndoka, as shtetasi Armando Prenga, as shtetasi Mark Frroku, as shtetasi Artur Bushi, as shtetasi Artur Bardhi, as shtetasi Elvis Roshi, as shtetasi, Jurgis Çyrbja, as shtetasi Fatmir Xhafaj, nuk do të jenë në protestë. Ndërsa shtetasit Edi Rama dhe Damian Gjiknuri do të jenë në Vlorë, në një antimiting, ku administrata është detyruar forcërisht të marrë pjesë.

Në shesh do të jetë Populli i vjedhur dhe i varfëruar nga kjo bandë kriminale, duke protestuar kundër kësaj bande kriminale!

Gjithashtu, njoftojmë Policinë Politike se asnjë nga rrugët në Tiranë nuk është më e rëndësishme se hapja e rrugës për të ardhmen, të cilët shqiptarët do ta realizojnë nesër me bashkimin më të madh pas pluralizmit politik. Rrugën tonë nuk ka fuqi të na e bllokojë! Aq më pak një polici e keqpërdorur nga një kryeministër frikacak apo akoma më keq, një polici që u përdor nga trafikantët e drogës për ta bërë Shqipërinë Kolumbinë e Europës.

Se ku do të protestojë populli këtë e vendos populli dhe jo Policia Politike e kryeministrit të dalë boje në sytë e shqiptarëve dhe të partnerëve ndërkombëtarë.

Edi Rama dhe Policia Politike e dinë se numërimi mbrapsht ka filluar dhe se asgjë nuk mund ta ndalë dot popullin! Të bashkuar ne do të jemi të gjithë në shesh për ta çliruar vendin nga e keqja!

Ndryshimi është në dorën e shqiptarëve të bashkuar dhe, që nga nesër, të gjithë bashkë, nuk do të lejojnë më një bandë të vendosë për ta, por do ta marrin fatin në duart e tyre!

•        Deputetja Albana Vokshi takime me gratë dhe vajzat në Kukës dhe Lezhë: Modeli qeverisës i Edi Ramës duhet të marrë fund! Të protestojmë për familjen dhe fëmijët tanë!

Lidhja Demokratike e Gruas Shqiptare e sheh me shqetësim mjerimin, poshtërimin, përçudnimin që po i bëhet nënave dhe vajzave shqiptare çdo ditë, nga mospërfillja shtetërore.

Përdhunimi i të miturës në Kavajë mbetet simboli i shkatërrimit të çdo hallke të zinxhirit të shtetit, Drejtorisë Arsimore, prokurorisë e policisë që fshehën ngjarjen.

Kryetarja e LDGSH-së, Albana Vokshi, gjatë takimit me gratë dhe vajzat në veri të vendit tha se ky është modeli qeverisës që Edi Rama promovoi që në ditën e parë të qeverisjes së tij.

“Dhe këtë model e përçon kudo. Në Kavajë, kë vuri? Elvis Rroshin. Ju e dini se kë ka kryetarë në disa bashki të vendit, trafikantë ose përdhunues.

Sepse ju e dini se kë ka futur brenda në Parlament. Prandaj kemi rastin të reagojmë”, tha Vokshi nga Kukësi.

Duke e cilësuar si strategji të Edi Ramës për të lënë në prapambetje shqiptarët, duke u mbyllur shkollat, mbyllur bizneset, lënie pa ndihmë ekonomike, Vokshi theksoi se këto janë manovra të një njeriu që planifikon t’i blejë në fund shqiptarët në zgjedhjet e ardhshme.

“Këtë Edi Rama e ka bërë sepse do që t’i lërë në varfëri të tejskajshme që kur të vijnë zgjedhjet ajo familja që nuk i jep dot fëmijëve për të ngrënë ta detyrojë që të shesë votën për pak lek.  Do të çojë bandat kriminale. Me paratë e krimit dhe të drogës ai do të mundohet që t’i blejë qytetarët dhe të ruajë karriken e pushtetit”.

Zonja Vokshi takoi gratë dhe vajzat edhe në Lezhë. Nga aty së bashku me deputeten Lindita Metaliaj bënë thirrje që gratë t’i bashkohen protestes së 16 shkurtit, për të ardhmen e fëmijëve te tyre.

“Ti’ japim fund këtij regjimi diktatorial. Të marrim në dorë fatin tonë dhe të fëmijëve tanë. Të mos lejojmë që një dikator, një sundimtar të vendosë për të ardhmen tonë dhe të ardhmen e fëmijëve tanë. Ne kemi lindur këtu, duam të jetojmë këtu. Duam të rrisim fëmijët këtu me nder dhe dinjitet”, tha Metaliaj.

Data 15 shkurt u theksua nga Vokshi si dita e fundit ku presim që Edi Rama të largohet, ose përkundrazi, tha ajo, jemi ne që duhet të marrim fatet tona e të fëmijëve tanë në dorë.

• Anëtarësimi i Maqedonisë së Veriut në NATO është meritë e madhe e të gjithë faktorit politik, në veçanti e faktorit politik shqiptar, për të cilin anëtarësimi në NATO spikati që në fillim si prioritet i prioriteteve.

• Konfirmoj vizionin e palëkundur të PD se problemi shqiptar në Ballkan merr zgjidhje përfundimtare me Kosovën e pavarur në NATO dhe në BE, të pacopëtuar e të pacënuar në integritetin e saj territorial, me Maqedoninë në NATO dhe në BE.

• Le të mos jemi as hipokritë, as të pasinqertë. Futja a Maqedonisë së Veriut në NATO erdhi pas një përballje të fortë me korrupsionin, krimin e organizuar, shtetin e mafias, përqëndrimin e pushteteve në një dorë, që ishin bërë pengesë totale për hapat e mëtejshëm të fqinjit tonë.

• Skenari i Maqedonisë së Veriut deri para pak kohësh është shumë më i lehtë se ai ku gjendemi sot dhe ky është morti i dytë në të cilën merr pjesë Kryetari i Kuvendot, Talat Xhaferri, morti i rënies së shtetit ligjor dhe demokracisë në Shqipëri.

• Parlamenti është i mbushur me njerëz që kanë ardhur këtu si shprehje e vullnetit të bandave, të krimit të organizuar, të një grushti oligarkësh që kanë kapur qeverinë dhe e kanë detyruar të braktisë dhe tradhtojë interesin publik dhe detyrimet ndaj BE.

• Këto janë arsye pse ne nuk mund të festojmë me fqinjët tanë, ndonëse na bëhet qejfi, kur dëgjojmë miqtë tanë se jeni gati të merrni dritën jeshile për hapjen e negociatave, por me siguri edhe ju e dëgjoni se frika e tyre është se këtë qershor Shqipëria nuk mund dhe nuk do ta marrë hapjen e negociatave.

• Qytetarët do të mblidhen në protestën më të madhe që ky vend ka njohur në 30 vite për të diktuar, përmes bashkimit, atë që nuk e kemi diktuar dot nga kjo sallë, ndarjen e politikës nga krimi, dhënien fund të vjedhjes me ligj të shqiptarëve.

• Qeveria dhe kryehajduti janë kapur në vjedhje në flagrancë, duke vjedhur qytetarët më të varfër të Europës, me ekonominë, taksat dhe votat e tyre. Në Europë, kur qeveria dhe kryeministri kapen duke vjedhur, ndëshkohet qeveria, ikin hajdutët në burg, nuk vuan populli.

• 1 në 3 mandate nuk përfaqëson votën e socialistëve, por votën e kriminelëve, e trafikantëve të drogës, që e kanë shndërruar Shqipërinë në Kolumbinë e Europës. Këto karrige janë vjedhur, janë blerë, por pushtetin e vërtetë e kanë ju, ndaj duhet ta merrni vetë fatin në dorë.

• Kryehajduti, që është kapur duke vjedhur refuzon të japë të vetmen zgjidhje politike për të shmangur krizën, një qeveri tranzitore, me një kryeministër të pakapur nga krimi dhe zgjedhje të parakohshme për të çuar një parlament me të vërtetë të popullit.

• Në Europë shkohet me ligjin e barabartë për të gjithë, me zgjedhje të lira e të ndershme, me punë, me vlera, jo me vjedhje, gënjeshtra dhe hilera. Shpëtimi ynë është të hapim derën e mbyllur të Europës.

• Ju, shqiptarë që e doni familjen tuaj, vendin tuaj, mund dhe do të bëheni shtytësit më të mëdhenj të rrugëtimit. Ju nuk jeni pengesa, ju jeni shpëtimi i vendit nga kjo klikë hajdutësh të kapur në vjedhje. Të heqim qafe këtë sistem të kalbur, që përbëhet vetëm nga një grusht njerëzish. Ky sistem duhet përmbysur, nuk mund të ngremë asgjë të re dhe asgjë të mirë për njerëzit nga ky sistem.

• Ditën e shtunë përballja është e qartë: matanë gardhit të policëve, është kryehajduti i kapur në vjedhje, përballë tyre është populli vjedhur. 16 shkurti është dita e madhe e bashkimit kundër vjedhjes. Derën e Europës, ne do ta hapim të gjithë bashkë me 16 shkurt.

FJALA E KRYETARIT TË PARTISË DEMOKRATIKE LULZIM BASHA NË PARLAMENT

I nderuar mik i shtrenjtë, Kryetar i Kuvendit të Republikës së Maqedonisë së Veriut, z. Talat Xhaferri!

Sot kjo nuk është një seancë normale për disa arsye.

Akti i mbështetjes konsensuale nga të gjithë partitë politike të Kuvendit të Shqipërisë për ratifikimin e Marrëveshjes së Anëtarësimit të Republikës së Maqedonisë së Veriut në NATO duhet, edhe në kushtet e krizës totale që po kalon vendi ynë, të ishte një mesazh feste, por ky mesazh feste ndodh në kontekstin e një morti.

Aksidenti tragjik i natës së mbrëmshme ka mbushur me dhimbje shpirtrat e familjeve të viktimave dhe ka tronditur thellë popullin shqiptar, popullin e Maqedonisë së Veriut, natyrisht edhe ne këtu.

Ndaj, në këto momente, në këto orë të tmerrshme të dhimbjes, dua t’u drejtoj familjarëve të viktimave në emrin tim dhe në emrin e Partisë Demokratike ngushëllimet tona më të ndjera! Ngushëllimet tona edhe ju zoti Xhaferri, si përfaqësues më i lartë i shtetit fqinj, sot i pranishëm në këtë seancë!

Zoti ju lehtësoftë dhimbjet!

Ju lëntë me forcën e kujtimit të të dashurve tuaj!

Zonja dhe zotërinj!

Me të vërtetë momenti që po i afrohemi, ai i anëtarësimit të Maqedonisë së Veriut në NATO është një moment i veçantë. Personalisht, rikujtoj shock-un, tronditjen dhe dhimbjen, me të cilën përjetuan 10 vite më parë kolegët tanë nga Maqedonia, refuzimin e ftesës dhe të anëtarësimit në NATO për shkak të rrethanave botërisht të njohura.

Ndaj është meritë e madhe e të gjithë faktorit politik të fqinjit tonë e në veçanti e faktorit politik shqiptar, i cili kurrë nuk u lëkund nga kthjelltësia e prioriteteve, ku anëtarësimi në NATO spikati prej momentit të parë si prioritet i prioriteteve. Ky është qëndrimi i partive politike shqiptare në Maqedoni, ky është qëndrimi i shqiptarëve, ky është qëndrimi i kombit shqiptar kudo, kombi më proantlantik, kombi më pro amerikan, kombi më proeuropian i Ballkanit, dhe ndoshta i Europës dhe mbarë rruzullit.

Në ëndrrën tonë për liri kombëtare dhe bashkim kombëtar, ne e kemi formuar pikërisht përmes linjave, parimeve dhe vlerave të europianizmit dhe euroatlanticizmit.

Ndaj, më lejoni edhe një herë të konfirmoj këtu vizionin e palëkundur të Partisë Demokratike, prej ditës së parë të themelimit të saj, ku çështje kombëtare është dhe mbetet ylli polar, problemi shqiptar në Ballkan merr zgjidhje përfundimtare me Kosovën e pavarur, në NATO dhe në BE, të pacopëtuar e të pacënuar në integritetin e saj territorial, me Maqedoninë në NATO dhe në BE, në zbatim të plotë të detyrimeve që rrjedhin nga marrëveshja e Ohrit dhe nga të gjitha standardet e tjera europiane dhe euroatlantike për popullin shtet formues shqiptar që jeton në Republikën e Maqedonisë.

Progres domethënës ka patur këto ditë, këto kohë, në veçanti sa i përket Gjuhës Shqipe dhe jam i bindur se anëtarësimi i Maqedonisë në NATO do t’i shërbejë konsolidimit të këtyre standardeve. Ndaj inkurajoj dhe mbështes përpjekjet e faktorit politik shqiptar, e gjithë faktorit politik në Maqedoni për të realizuar plotësisht detyrimet që rrjedhin nga kjo marrëveshje paqeje dhe të orientuar nga e ardhmja.

Por zonja dhe zotërinj le të mos jemi as hipokritë, as të pasinqertë. Procesi i futjes së Maqedonisë së Veriut në NATO erdhi pas një përballje të fortë dhe finale midis jo thjesht dhe vetëm faktorëve që nuk duan Ballkanin në NATO dhe në Europë, por edhe faktorëve që, me korrupsionin dhe me lidhjen e tyre me krimin e organizuar, ishin bërë pengesë totale për hapat e mëtejshëm të fqinjit tonë lindor.

Të gjithë i mbajmë mend skenat e shëmtuara në parlamentin e fqinjit tonë, ato nuk ishin thjesht përplasje mes palëve politike. Por përplasje midis një qeverie dhe një shteti të kapur në çdo qelizë nga korrupsioni galopant, nga krimi i organizuar, nga rënia e shtetit ligjor dhe zëvendësimi me shtetin e mafias, nga përqendrimi i gjithë pushteteve në një dorë, në një taraf që kontrollin qeverinë, parlamentin, shërbimet sekrete, drejtësinë, ekonominë, mediat.

Po kush jemi ne, të zgjatemi më shumë me hallet dhe problemet e Maqedonisë, aq më shumë tani që duket se i kanë vënë në rrugë të mbarë?!

Skenari që sapo përshkrova është prapë se prapë shumë më i lehtë se ai ku gjendemi sot dhe ky është morti i dytë në të cilën jeni i pranishëm z.Xhaferri, morti i rënies së shtetit ligjor në Shqipëri, morti i rënies së demokracisë në Shqipëri.

Ju jeni sot i pranishëm në një sallë, që quhet Kuvendi i Shqipërisë, por që është i mbushur me njerëz që nuk kanë ardhur këtu si shprehje e vullnetit të qytetarëve të Shqipërisë, por si shprehje e vullnetit të bandave të krimit të organizuar, si shprehje e një grushti oligarkësh që kanë kapur qeverinë dhe e kanë detyruar atë të braktisë dhe tradhtojë interesin publik, të braktisë dhe tradhtojë detyrimet ndaj Bashkimit Europian.

Dhe kjo është arsyeja se përse në këtë ditë ne nuk mund të festojmë bashkë me ju. Ndonëse na bëhet qejfi, kur dëgjojmë miqtë tanë se jeni gati të merrni dritën jeshile për hapjen e negociatave, por me siguri edhe ju e dëgjoni se frika e tyre është se këtë qershor Shqipëria nuk mund dhe nuk do ta marrë hapjen e negociatave.

Ndaj më lejoni z.Xhaferri, duke ju falënderuar për praninë tuaj këtu, ta drejtoj pjesën time të fjalimit tashmë jo thjesht dhe vetëm drejt kësaj salle, por drejt bashkëqytetarëve të mi, të cilët, pasnesër, do të mblidhen në protestën më të madhe që ky vend ka njohur në 30 vite, për të diktuar përmes bashkimit të tyre atë që nuk e kemi diktuar dot nga kjo sallë, ndarjen e politikës nga krimi, dhënien fund të vjedhjes qeveritare, vjedhjes me ligj, vjedhjes me dekret të popullit shqiptar.

Sepse sot kemi një problem, kemi një problem të të gjithë problemeve, i cili duhej të ishte zgjidhur e do të ishte zgjidhur, në mos me rrugën europiane, të paktën me rrugën e fqinjit tonë lindor prej kohësh.

Këta që kemi prapa nesh janë kapur në vjedhje, në flagrancë. Janë kapur në vjedhje në flagrancë duke vjedhur qytetarët më të varfër të Europës, janë kapur në vjedhje në flagrancë, janë kapur duke vjedhur ekonominë, taksat, janë kapur duke vjedhur votat e shqiptarëve.

Kjo qeveri dhe ky kryeministër ka vjedhur studentët, ka vjedhur të pamundurit, ka vjedhur banorët e Unazës së Re, ka vjedhur teatrin, ka vjedhur Tiranën, ka vjedhur Durrësin, ka vjedhur Shkodrën, Vlorën, Dibrën dhe Sarandën. Kjo qeveri ka vjedhur edhe votat, siç tregoi Zëri i Amerikës, vetëm nga maja e përgjimeve të dosjes 339 dhe kjo qeveri hajdute u ka hequr bukën e gojës dhe vazhdon t’u heqë bukën e gojës përditë fëmijëve tuaj, të dashur bashkëqytetarë, për të mbushur xhepat e saj dhe xhepat e banditëve dhe hajdutëve për të cilët punon.

Kjo qeveri dhe ky kryehajdut janë sot lakuriq para syve tuaj dhe para syve të botës, sepse janë kapur duke vjedhur.

• Janë kapur duke ju vjedhur ju qytetarë të Tiranës dhe të gjithë Shqipërisë, kur nisën të prishin shtëpitë e njerëzve, të nxjerrin vogëlushët në rrugë për 18 milionë euro që do të merrte DH Albania, një kompani që nuk ekziston fare. Janë kapur duke vjedhur me OSHEE, që do t’i jepte 12 milionë euro po kësaj kompanie që nuk ekziston fare.
• Në mes të Tiranës u kapën duke vjedhur për të shkatërruar Teatrin Kombëtar, u kapën duke vjedhur në aferën 200 milionë euro.
• U kapën duke zhvendosur lumin e Lanës për të prishur 700 shtëpi të tjera, në mënyrë që krimineli, trafikanti i drogës, miku i tyre të ndërtonte dhe të mos i prekej asnjë cm2, një kompleks me vlerë 60 milionë euro.
• Dhe pastaj e keni parë vetë tek përgjimet e Zëri i Amerikës sesi i vodhi dhe i bleu votat me Gjushër, me Avdylër. E keni parë sesi vetëm një hetim, sesi vetëm disa minuta përgjim tregojnë manipulimin e votave në 4 qarqe të Shqipërisë.

Prandaj zonja dhe zotërinj këta hajdutë me këta lekë të vjedhur kanë blerë edhe këto karrige ku ulën përditë. 1 në 3 mandate nuk përfaqëson votën e socialistëve, përfaqëson votën e kriminelëve, e trafikantëve të drogës, e narkokarteleve që e kanë shndërruar këtë në një narkoqeveri dhe Shqipërinë në një narkoshtet, të cilin mediat ndërkombëtarë dhe diplomatët e quajnë Kolumbia e Europës.

Ju ftoj të na tregoni se edhe kush është Pablo Eksobari i Europës. Shqiptarët e dinë, por duhet ta thoni edhe ju, keni kohë që e vononi.

Këto karrige nuk janë në shitje, këto karrige nuk u përkasin këtyre, u përkasin ju të dashur qytetarë shqiptarë. Këto karrige janë vjedhur, janë blerë por pushtetin e vërtetë e keni ju, ndaj duhet ta merrni vetë fatin në dorë.

Në Europë aty ku duam të shkojmë kur qeveria dhe kryeministri kapen duke vjedhur, ndëshkohet qeveria, ikin hajdutët në burg, nuk vuan populli.

290 mijë qytetarë shqiptarë hanë vetëm një vakt në ditë. Gjysma e shqiptarëve nuk harxhojnë dot më shumë se 5 mijë lekë të vjetra në ditë, në nivel familje dhe jo nivel individi. Ndërsa këta dhe ky, (tregon nga qeveria dhe Rama) vjedhin miliona. 4.5 milionë euro në 8 orë ka vjedhur kompania të cilin gazetarët sllovenë e lidhin me familjarët e tij vetëm me aferën e KESH, 4.5 milionë euro në 8 orë. Miliarda euro taksa, miliarda euro nga çmimi i rritur i energjisë dhe naftës të zhdukura nga xhepat tuaja, që nuk u kthyen kurrë as në rritje pensionesh, as në rritje rrogash, as në investime për ju, as në hapje vende pune. mjerimi ka mbërthyer vendin nga jugu në veri, nga lindja në perëndim.

Por fjalë pistë, fyes, indiferent dhe poshtërues ndaj popullit, kryehajdutit që është kapur duke vjedhur refuzon të japë të vetmen zgjidhje politike që mund të ketë sot vendi.

Zgjidhja politike e vetme për të shmangur krizën totale është ajo e një qeverie tranzitore, me një kryeministër të pakapur nga krimi dhe zgjedhjeve të parakohshme për të çuar një parlament me të vërtetë të popullit. Ne kemi bërë përpjekjet për të zgjidhur punët nga brenda.

Zonja dhe zotërinj i kemi bërë të gjitha përpjekjet për t’i zgjidhur problemet në mënyrë institucionale dhe ligjore.

Ne kemi bërë këto me shpresën dhe besimin që kriza nuk do të thellohet dhe të vinte në një pikë pa kthim. I kemi bërë sepse besojmë se ligji duhet të jetë i barabartë për të gjithë. Sepse nuk mundet që një kryefamiljar të përfundojë në burg dhe të vrasë veten për një faturë të energjisë dhe asnjë qeveritarë të mos mbajë përgjegjësi kur kapet duke vjedhur miliona euro, siç u kapën tek Unaza.

Se nuk mundet që një grua shtatzënë të shoqërohet, sepse mbron pragun e derës nga fadromat shkatërrimtare të korrupsionit dhe gjushërit me shokë të vazhdojnë të bredhin të lirë, edhe kur kapen duke vjedhur votat. Ne besojmë se ligji duhet të jetë i barabartë për të gjithë.

Ne besojmë se detyra kryesore e shtetit, arsyeja përse ekziston është:

• Të kujdeset për qytetarët duke u nisur nga ata që s’kanë asgjë,
• Duke u dhënë dorën njerëzve, jo duke i vjedhur ata,
• Duke i harxhuar paratë publike për investime që u vlejnë, në radhë të parë njerëzve, jo për të pasuruar një grusht oligarkësh.
• Duke iu përmirësuar jetën njerëzve
• Duke ia lehtësuar barrën e jetës
• Duke i ndihmuar që bizneset të rriten dhe të punësojnë, jo duke bërë projekte luksi.
• Duke futur në punë shqiptarët që të rrisin mirëqenien e tyre, jo duke vjedhur lekët me korrupsion, bashkë me një grusht oligarkësh, jo duke paguar për projektet personale të shefit.

Kështu shkohet në Europë: Me ligjin e barabartë për të gjithë, me zgjedhje të lira e të ndershme, me punë, me vlera, jo me vjedhje, gënjeshtra dhe hilera.

Ndaj Europa, këtyre ua ka mbyllur derën.

Por ajo derë duhet hapur, sepse ajo derë është shpëtimi ynë. Europë do të thotë liri, Europë do të thotë vlera. Udhëtimi ynë drejt Europës është i dhimbshëm. Duhet të jetë më i shpejtë dhe më i sigurt, por vetëm ky udhëtim, vetëm ky proces do të na çojë drejt shpëtimit, drejt çlirimit tonë nga e keqja që i ka zënë frymën shoqërisë, drejt mirëqenies.

Ndaj, zonja dhe zotërinj!

Vëllezër dhe motra!

Siç jeni mbledhur këtë muaj, duhet të vazhdojmë të mblidhemi rreth njëri-tjetrit.

T’i japim dorën njëri-tjetrit.

Të gjejmë brenda vetes, atë që na bashkon: e sotmja me halle që ne jetojmë të gjithë dhe e ardhmja që të gjithë duhet të ndërtojmë së bashku.

Ndaj, duhet të bëhemi të gjithë gati që kjo ditë, mos të vonohet më. Ndaj, duhet që gjithsecili të japë ndihmën e tij, sepse ky është qëllimi ynë madhor si shoqëri.

Ju, shqiptarë që e doni familjen tuaj, që e doni vendin tuaj, mund dhe do të bëheni shtytësit më të mëdhenj të këtij rrugëtimi.

Ju nuk jeni pengesa, ju jeni shpëtimi i vendit nga kjo klikë hajdutësh të kapur në vjedhje.

Ne i kemi të gjitha mundësitë, por në fillim duhet të heqim qafe këtë sistem të kalbur, që në fakt i përket dhe përbëhet vetëm nga një grusht njerëzish.

Shumica dërrmuese e shqiptarëve nuk kanë fituar asgjë prej këtij sistemi. Shumica dërrmuese e shqiptarëve vidhen ditë për ditë nga ky sistem.

Shumica dërrmuese e shqiptarëve varfërohen çdo ditë nga kjo klikë hajdutësh. Shumica dërrmuese e shqiptarëve poshtërohen ditë për ditë nga ky sistem dhe i pari i tij.

Ndaj, ky sistem duhet përmbysur. Përmbysur!

Ne i provuam të gjitha: ta pastrojmë nga koka, me ligje, me amendamente, me iniciativa, ta pastrojmë nga brenda. Dhe sot, të gjithë e kanë kuptuar se pa e përmbysur këtë sistem, nuk mund të ngremë asgjë të re dhe asgjë të mirë për njerëzit.

Ndaj, ditën e shtunë përballja është e qartë: mMatanë gardhit të policëve, është kryehajduti i kapur në vjedhje, përballë tyre është populli vjedhur.

Këtu ka përfunduar vendi, këtu e ka çuar kryehajduti. Një shtet i kapur që vetëm vjedh dhe mbron hajdutët kundër njerëzve, kundër shumicës së tradhtuar, kundër popullit të varfëruar në palcë.

Por, 16 shkurti është dita e madhe e bashkimit popullor, bashkimit kundër vjedhjes, kundër qeverisë hajdute dhe bashkimit për Shqipërinë si çdo vend europian.

Derën e Europës, ne do ta hapim të gjithë bashkë të shtunën me 16 shkurt.

Ejani ta çlironi veten tuaj nga kjo humnerë.

• Këta hajdutë me lekët e vjedhura kanë blerë dhe ato karrige ku ulen përditë. Ato karrige nuk janë në shitje! Ato karrige janë vjedhur! Ato karrige ju përkasin juve! Pushtetin e vërtetë e keni ju, ndaj duhet ta merrni vetë fatin me dorë!

• Edi Rama dhe banda e tij janë kapur duke vjedhur. Kjo qeveri është kapur duke vjedhur, në flagrancë. Është kapur duke vjedhur bizneset, pensionistët, studentët, pacientët, votat dhe zgjedhjet e shqiptarëve

• Në çdo vend të Evropës, kur qeveria dhe kryeministri kapet duke vjedhur, ikën qeveria dhe hajdutët shkojnë në burg, nuk vuan populli. Karriget ku janë ulur i kanë blerë me paratë e vjedhura shqiptarëve, i kanë blerë me paratë e krimit.

• Ndaj duhet të marrim në dorë fatin tonë. Duhet të merrni në dorë fatin tuaj dhe t’i çlironi institucionet e kapura nga krimi dhe nga mafia. Kudo në Evropë kjo do të ndodhte, por këtu janë asgjësuar dy kolona të shtetit: zgjedhjet dhe drejtësia.

• Të mblidhemi të gjithë bashkë këtë të shtunë, le të vërshojë sovrani nëpër rrugët dhe sheshet e Tiranës të shtunën në ora 11, në referendumin më të madh popullor, që do t’i japë fund kësaj qeverie bandite.

• Bashkimi i datës 16 shkurt ka forcë dhe fuqi mbi parlamentin dhe qeverinë e hajdutëve, Është një bashkim europian dhe kushtetues, për t’i dhënë fund njëherë e mirë, këtij sistemi të kalbur që është një grusht njerëzish

• Europa i ka sytë nga ne. Ditën e shtunë keni mundësinë me bashkimin tuaj t’i tregoni Europës, se ditën e shtunë merr fund largimi i shqiptarëve nga padrejtësitë, fillon shembja e këtij sistemi të kalbur antipopullor, antieuropian.

• Ju jap fjalën se, falë bashkimit tuaj, një standard i ri do të vendoset: prej datës 16, kurrë më populli nuk do të ketë frikë qeverinë, por çdo qeveri që vjen pas datës 16, do t’i bëjë llogaritë vetëm me popullin dhe forcën e drejtësinë e vendimeve të popullit.

FJALA E KRYETARIT TË PARTISË DEMOKRATIKE, LULZIM BASHA, NË TAKIMIN ME QYTETARËT NË MAT

Mirë se ju gjej vëllezër e motra matjanë,

zonja e zotërinj,

qytetare e qytetarë,

fermerë, të rinj e të reja.

Faleminderit për këtë pritje të jashtëzakonshme në këtë javë vendimtare për Matin, për Shqipërinë, për fatin tonë evropian, për çlirimin nga humnera ku gjendet sot vendi.

Faleminderit për këtë temperaturë vere në këtë ditë shkurti këtu, që buron nga shpirti juaj, nga zemrat tuaja dhe nga vendosmëria juaj për t’i dhënë fund sistemit të vjedhjes dhe varfërimit të Matit e të gjithë Shqipërisë.

Vëllezër e motra,

kudo ku kam qenë gjatë këtyre javëve, kam parë nga njëra anë varfërinë e madhe, papunësinë, braktisjen, tradhëtinë që Edi Rama dhe banda e tij e hajdutëve ka bërë ndaj çdo shqiptari.

Kam parë pamundësinë ekstreme të prindërve për të siguruar bukën e gojës për fëmijët e tyre, kam parë kushtet e vështira të shkollave e të spitaleve tona, kam parë fermerët në krizë ekzistenciale, minatorët e dëshpëruar, të përdorur e të keqpaguar, pensionistët në kufijtë e ekzistencës, kam parë edhe punonjësit e policisë kokëposhtë, sepse kolegët e tyre përdhosen dhe vriten dhe kriminelët në vend që të dënohen përjetë apo të ekzekutohen nxirren nga burgu nga kjo qeveri. Dhe, asnjeri prej këtyre lajmeve nuk është thjesht lajm, por është e përditshmja e qytetarëve, është e përditshmja e njerëzve, është e përditshmja e popullit.

Papunësi, varfëri, mjerim, padrejtësi, braktisje, harresë,…dhe një palo-kryeministër që rri sallave i rrethuar nga luksi dhe propaganda, që nuk i njeh dhe as do të dijë për hallet tuaja.

Kemi qenë afër njëri-tjetrit këto vite të vështira dhe e di që sot ka shkuar aty ku nuk mban më.

Ka shkuar thika në palcë, siç thotë populli.

Jam kthyer sot këtu në Mat, jo thjesht për t’ju takuar, jo thjesht për të parë si jeni, sepse e di fare mirë si jeni. Unë me ju kam qenë, me ju rri e me ju do të rri gjithmonë, jo me kriminelët, jo me oligarkët, jo me hajdutët, por me njerëzit.

Por, dua të ndaj me ju sot edhe një lajm tjetër, lajmin se bashkë me gjendjen e dëshpëruar ku ndodhet vendi, kam parë një zgjim të madh të shqiptarëve, nga Shkodra në Vlorë, nga Korça në Gjirokastër, nga Durrësi në Mallakastër e në Tiranë.

Ky zgjim i madh i shqiptarëve, ky zgjim i madh i juaji, jam i bindur vjen në radhë të parë sepse si asnjëherë njerëzit e kanë kuptuar se janë zotër të fateve të veta. Fati juaj është vetëm në dorën tuaj dhe të askujt tjetër. Nuk ka qeveritar t’ju heqë ju bukën e fëmijëve.

Edi Rama dhe banda e tij janë kapur duke vjedhur.

Kjo qeveri është kapur duke vjedhur në flagrancë.

Është kapur duke vjedhur bizneset dhe taksat e tyre, është kapur duke vjedhur pensionistët, është kapur duke vjedhur studentët, është kapur duke vjedhur ilaçet dhe pacientët, është kapur duke vjedhur votat e shqiptarëve dhe zgjedhjet e shqiptarëve, siç e nxori Zëri i Amerikës.

Kjo qeveri është kapur duke vjedhur dhe tani është kapur duke ju hequr bukën e fëmijëve tuaj për të mbushur xhepat e hajdutëve dhe të kriminelëve për të cilët punon.

Para syve të të gjithë shqiptarëve, të djathtë apo të majtë, gegë apo toskë, të krishterë apo myslimanë, që jetojnë në Shqipëri apo që janë detyruar të emigrojnë dhe para syve të botës, ka dalë lakuriq ky kryeministër dhe kjo qeveri.

Ka dalë lakuriq e vërteta: këta janë kapur duke vjedhur.

Nisën të prishin shtëpitë e banorëve tek Unaza për t’i dhënë 18 milionë një kompanie DH Albania, që as nuk ekziston fare, 12 milionë euro të njëjtës kompani OST-ja, paratë tuaja të energjisë së shtrenjtë që paguani, të çmimit më të lartë të energjisë që paguani në rajon.

Janë kapur duke vjedhur 200 milionë euro me Teatrin Kombëtar në Tiranë.

Janë kapur duke vjedhur miliona euro me bregdetin, me tenderat, PPP-të, ku ka shkuar 20 milionë euro kilometri i rrugës.

Janë kapur duke vjedhur me minierat, me naftën. Janë kapur duke vjedhur me gjushër e me abdylaj zgjedhjet në të gjithë Shqipërinë, siç i nxori Zëri i Amerikës provat e prokurorisë shqiptare.

Këta janë kapur duke vjedhur, janë kapur në flagrancë dhe e gjithë Shqipëria, të gjithë shqiptarët e di këtë.

Në çdo vend të Evropës, kur qeveria kapet duke vjedhur, kur kryeministri kapet duke vjedhur, ikën qeveria dhe hajdutët shkojnë në burg, nuk vuan populli.

Këta janë kapur duke vjedhur dhe me paratë e tyre kanë vjedhur edhe karriget ku janë ulur. Karriget ku janë ulur i kanë blerë me paratë e vjedhura shqiptarëve, i kanë blerë me paratë e krimit.

Por kanë harruar diçka, nuk janë karriget e tyre. Nuk janë për shitje ato karrige, ato janë karriget e qytetarëve.

Karriget mund t’i kenë vjedhur, por të mos ta harrojnë kurrë se pushteti nuk është i atyre karrigeve të vjedhura, pushteti nuk është i atyre që ulen në karrige të vjedhura, pushteti është i qytetarëve shqiptarë.

Ndaj duhet të marrim në dorë fatin tonë. Duhet të merrni në dorë fatin tuaj dhe t’i çlironi institucionet e kapura nga krimi dhe nga mafia.

Kudo në Evropë kjo do të ndodhte, por këtu janë asgjësuar dy kolona të shtetit: zgjedhjet dhe drejtësia. Por zgjedhjet dhe drejtësia, parlamenti dhe qeveria nuk janë gjë tjetër veçse produkt i vullnetit tuaj. Ndaj le të mblidhemi të gjithë bashkë këtë të shtunë, le të vërshojë sovrani në rrugët dhe sheshet e Tiranës të shtunën në ora 11 në referendumin më të madh popullor, që do t’i japë fund kësaj qeverie bandite.

Të shtunën, miqtë e mi, mos harroni, në anën tjetër të gardhit të policëve të keqpaguar, të tradhtuar dhe të poshtëruar, në anën tjetër të gardhit të policëve është hajduti, është kryehajduti që është kapur duke vjedhur paratë tuaja, taksat tuaja, votat tuaja.

Në anën tjetër është shumica dërrmuese e popullit shqiptar që është vjedhur nga kjo qeveri, ndaj të shtunën më shumë se çdo ditë tjetër, bota e ka kuptuar dhe do ta shohë se ku e ka katandisur shtetin Edi Rama, një shtet i kapur i cili vetëm mbron hajdutët që janë kapur duke vjedhur.

Një shtet i kapur që vetëm mbron vjedhjen, që vetëm mbron hajdutët e votave dhe që nuk i shërben asnjë qytetari të ndershëm, që godet shumicën e tradhëtuar, shumicën e varfëruar, shumicën e shpunësuar nga ky shtet hajdut.

Prandaj bashkimi i datës 16 shkurt ka forcë dhe fuqi mbi parlamentin e hajdutëve mbi qeverinë e hajdutëve.

Është një bashkim europian dhe kushtetues, për t’i dhënë fund njëherë e mirë këtij sistemi të kalbur që në fakt është vetëm një grusht njerëzish.

Një grusht njerëzish që fitojnë miliarda euro, paratë që dalin nga xhepat tuaja, paratë që nuk shkojnë për bukën e gojës së fëmijëve tuaj.

16 shkurti është bashkimi popullor kundër vjedhjes, është bashkimi popullor kundër hajdutëve të shqiptarëve, kundër hajdutëve të taksave tuaja, kundër hajdutëve të pasurive tuaja.

16 shkurti është bashkimi i shqiptarëve, kundër vjedhjes së votave, kundër vjedhjes së zgjedhjeve, kundër vjedhjes së të ardhmes së shqiptarëve.

Në Europë ne do të shkojmë se jemi një popull fisnik dhe një rracë europiane njerëzish punëtorë.

Sot mijëra bija dhe bij të Matit, jetojnë në Europë me djersën e ballit, ndihmojnë familjet e tyre, rrisin familjet e tyre, ndihmojnë dhe këtu në Mat, ju bëjnë ju krenar si prindër, na bëjnë gjithë krenar, por nuk duhet të jetë kështu.

Nuk duhet t’i braktisin shtëpitë e tyre.Nuk duhet të na mungojnë, sepse asnjë vend nuk bëhet si vendi yt.

Ne duhet të krijojmë kushtet që Mati, Dibra dhe gjithë Shqipëria të kenë mundësi të kenë liri për të krijuar mirëqenie dhe për të krijuar punësim, në radhë të parë për rininë e Matit, për rininë shqiptare dhe pastaj për të gjithë ata që kanë nevojë për punë.

Dhe plani ynë ekonomik që ka aprovimin dhe vulat e Europës dhe Gjermanisë mike dhe partnere, do të bëjë pikërisht këtë; ditën tonë të parë kur të marrim besimin me votë të qytetarëve se Partia Demokratike do të vijë në pushtet me votë, me votën e lirë të qytetarëve, ne do të eliminojmë taksën “Rama” 300 lek mbi karburantin.

300 lek mbi naftën, mbi benzinën, kjo taksë do të eliminohet që ditën e parë.

Ulja e çmimit të naftës, ulja e çmimit të energjisë, taksat më të ulta në Ballkan, do të rikthejnë jo vetëm optimizmin, por dhe kapitalin e besimin që motorët e ekonomisë të ndizen, që biznesi mos të mbyllet, por të hapet e të krijojë vende pune, vende pune me kushte dhe paga dinjitoze.

Që ekonomia shqiptare të shfrytëzojë plotësisht potencialin e shqiptarëve punëtorë, siç e shfrytëzon sot Gjermania apo Anglia, Italia e vende të tjera ku kanë emigruar ata për të cilët kemi më shumë nevojë.

Ne i kemi zgjidhjet për të papunët.

Ne i kemi zgjidhjet për studentët.

Ne i kemi zgjidhjet për minatorët.

Ne i kemi zgjidhjet për fermerët.

Dhe me ndihmën tuaj, me votën e shqiptarëve të lirë, ne do t’i bëjmë këto zgjidhje realitet.

Por, para kësaj dite, na pret një betejë vendimtare dhe beteja është fare e thjeshtë: çdo popull ka qeverinë që meriton.

Europa po pret, i ka sytë nga ne. Në Europë, kjo qeveri do të kishte rënë dhjetëra herë, gjysma e tyre do të ishin sot në burg. Ditën e shtunë, keni mundësinë me bashkimin tuaj dhe vendosmërinë tuaj ti tregoni Europës dhe mbarë botës, se jemi popull europian, se jemi popull i qëndresës, se ditën e shtunë merr fund largimi i shqiptarëve nga padrejtësitë, fillon largimi dhe shembja e këtij sistemi të kalbur antipopullor, antieuropian.

Dita e shtunë, është dita e bashkimit, është dita e fitores së gjithë popullit shqiptar kundër kësaj bande.

Ne do të jemi bashkë krah më krah atë ditë, që do të jetë dita e parë e ndryshimit që gjithsecilit prej jush pret, meriton dhe shpreson.

Ju jap fjalën, se falë bashkimit tuaj i cili do të jetë më i madhi që ka dëshmuar populli shqiptar këto 30 vite, një standard i ri do të vendoset. Prej datës 16, kurrë më populli nuk do të ketë frikë qeverinë, por çdo qeveri që vjen pas datës 16, do ti bëjë llogaritë vetëm me popullin dhe forcën e drejtësinë e vendimeve të popullit.

Ndaj ju bëj thirrje, siç jeni mbledhur sot, siç u mblodhët në protestën madhështorë para disa ditësh, duke i dhënë një mesazh të qartë, jo vetëm qarkut të Dibrës, por gjithë Shqipërisë, ashtu të bashkuar të derdheni në Tiranë. Të derdheni në sheshet e Tiranës, me drejtësinë e kauzës popullore në zemër dhe me vendosmërinë për të mos u larguar pa e shembur sistemin e kalbur që ju varfëron dhe ju vjedh ditë për ditë.

Një ditë e re po agon për gjithsecilin prej jush dhe për këtë vend.

Një ditë e re do të agojë dhe meritën për këtë , meritën që do t’i nxirrni fëmijët tuaj në një diell që ngroh me vende pune, me ndihmë ekonomike dinjitoze, me pensione dhe rroga të mjaftueshme, për të garantuar mirëqenie, meritën për këtë do ta keni ju.

Sepse, siç ju thashë në fjalën time të parë dhe kështu dua ta mbyll, mos e harroni:

Fatin tuaj e keni në dorë vetëm ju!

Të gjithë bashkë me datë 16!

Zoti e bekoftë Matin!

Zoti ju bekoftë ju dhe familjet tuaja!

Zoti e bekoftë Dibrën!

Zoti e bekoftë Shqipërinë!

• Edi Rama i ka bërë llogaritë gabim për të penguar protestën me makinacionet qesharake për bllokimin e rrugëve kombëtare.

• Paralajmërojmë çdo kompani ndërtimi të mos nxjerrin në rrugë asnjë makineri që cënon lëvizjen e lirë të protestuesve drejt Tiranës.

Edi Rama do të mbajë përgjegjësi për çdo pasojë që sjell zbatimi i skenarit të tij pengues për protestën e 16 Shkurtit.

DEKLARATË E SEKRETARIT TË PËRGJITHSHËM TË PARTISË DEMOKRATIKE, GAZMENT BARDHI

Edi Rama, kryeministri më i vetmuar në Europë, po bën çdo përpjekje për të ngadalësuar fundin e tij me protestën e 16 Shkurtit.

Pasi dështoi me përdorimin qesharak të policisë, që i njihte kriminelët në protestë, por nuk i arreston ata, sot ka përdorur një makinacion edhe më qesharak – ka urdhëruar bllokimin e dy akseve kryesore kombëtare që lidhin Tiranën me Veriun dhe Jugun e Shqipërisë.

I vetmuari Edi Rama mendon se duke  bllokuar autostradën Tiranë Durrës dhe rrugën Tiranë Kamëz, do të mund të pengojë gjysmën e Shqipërisë të vijë në Tiranë e të protestojë kundër qeverisë së tij të kapur në vjedhjen e zgjedhjeve dhe në vjedhjen e qytetarëve të saj.

• Teknikisht, nuk ka asnjë motiv për bllokimin e autostradës dhe rrugëve të tjera kombëtare.
• Teknikisht, nëse do të ishte vërtet e nevojshme dhe jo një vendim në kushtet e panikut, qytetarët duhet të ishin lajmëruar disa ditë më parë, siç është vepruar në raste të tjera.
• Politikisht, Edi Rama ka frikë.

I ka bërë prapë llogaritë gabim! Edi Rama dhe kushdo tjetër që pranon të përdoret në këtë skenar është i pafuqishëm të ndalë shqiptarët të vijnë në protestë!

Po paralajmërojmë që tani çdo kompani ndërtimi që të mos nxjerrin në rrugë asnjë makineri  dhe të mos bëjnë asnjë veprim që cënon lëvizjen e lirë të protestuesve drejt Tiranës! Përndryshe fati i tyre është i njohur! Qytetarët do t’i heqin pengesat me mënyrat e tyre, njësoj siç bënë banorët e Unazës së Re!

Për çdo pasojë që sjell zbatimi i këtij skenari që pengon protestën e 16 Shkurtit, Edi Rama do të jetë i vetmi që do të mbajë përgjegjësi.

Shqiptarët do të jenë në Tiranë të shtunën! 16 shkurti është protesta që do t’I japë fund një pushteti të blerë me votat e krimit, një qeverie të kapur në vjedhjen e zgjedhjeve dhe në vjedhjen e qytetarëve të saj.

Makinacionet qesharake dhe mjerane të Edi Ramës nuk do ta ndalin dot vullnetin e shqiptarëve të bashkuar për të shembur këtë sistem të kalbur nga krimi dhe korrupsioni!

Më 16 shkurt qytetarët do t’i japin vendit shansin historik që të drejtohet nga një qeveri që lufton krimin, lufton korrupsionin dhe krijon mundësi e mirëqenie për të gjithë!

DEKLARATË E SEKRETARIT TË PËRGJITHSH TË PD, GAZMENT BARDHI

Në një përpjekje të mjeruar, i rrethuar nga zhgënjimi, zemërimi dhe revolta e shqiptarëve, Edi Rama, i vetmuar, shfaqi sot gjithë pasigurinë dhe frikën e tij, kur urdhëroi Policinë e Shtetit të përhapë panik lidhur me protestën e 16 shkurtit.

Skenari për të përdorur policinë si vegël politike është kriminal.

Partia Demokratike garanton çdo qytetar për sigurinë e tij në datën 16 Shkurt.

Shqiptarët do t’i bashkohen protestës së opozitës, sepse e dinë mirë që kriminelët dhe bandat janë me Edi Ramën dhe jo mes protestuesve. Ne do të protestojmë si njerëz të lirë dhe me dinjitet.

Paralajmërojmë Policinë Politike të Edi Ramës të rrijë larg protestuesve! Të mos pengojë lëvizjen e lirë të tyre! Përndryshe, secili prej shërbëtorëve të skenarit kriminal të Edi Ramës, do të mbajë përgjegjësi personale dhe ligjore!

Në Shqipëri ka vetëm një skenar destabilizimi. Ai është skenari i Edi Ramës për të qeverisur bashkë me krimin e organizuar, i cili blen vota dhe mandate për të mbajtur në pushtet Edi Ramën.

Edi Rama ka vetëm një detyrë: t’i hapë rrugë zgjidhjes politike! Ai nuk mund të qeverisë më me mandate të vjedhura dhe kundër interesit të shqiptarëve! Koha për Edi Ramën është drejt skadimit!

I bëjmë thirrje të heqë dorë nga çdo skenar destabilizues që ka mbi tryezën e tij! Në të kundërt, Edi Rama do të jetë i vetmi që do të mbajë përgjegjësi, njësoj si çdo diktator që del kundër vullnetit të popullit të bashkuar!

Ftojmë shqiptarët të injorojnë kërcënimet e një pushteti të kalbur nga krimi dhe korrupsioni! Shumica dërrmuese e policëve janë me protestuesit, sepse ata duan që të luftohet krimi. Njësoj si ne të gjithë, edhe policët duan më shumë siguri për fëmijët e tyre, më shumë mundësi për ta dhe duan t’i rrisin ata në një vend normal.

Më 16 shkurt, së bashku do t’i hapim rrugë normalitetit europian në Shqipëri!

Të bashkuar askush nuk do të na ndalë dot!