Blog

11 Shk

Basha në ish kampin e internimit në Tepelenë: Ka ardhur koha që kulti i krimit i trashëguar nga diktatura, të marrë fund.

by PD in Lajmi fundit

Kryetari i Partisë Demokratike, Lulzim Basha, vizitoi kampin e internimit të Tepelenës, i shoqëruar nga disa të mbijetuar të një prej kampeve më të tmerrshëm të diktaturës komuniste. Sipas dokumentacionit të paplotë që ekziston, më shumë se 3 mijë veta u mbajtën në këtë kamp nga viti 1949 deri në vitin 1953, kryesisht gra, pleq e fëmijë.

Simon Miraka, i mbijetuar i kampit të Tepelenës, i tregoi zotit Basha për kushtet e shfarosjes që ekzistonin në kamp.

“Kazanët e gjellës ishin fuçia që u kishin shërbyer italianëve për naftë. I prenë ato, i sharruan dhe i bënë kazanë. Ai spirilëngu, ajo gjella e famshme, e quajtur gjellë, se gjellë s’ishte, kur shkonin njerëzit për ta marrë me tasa a gaveta, ishte gjithë pisllëk e naftë. Këto shkaktuan epidemi, zgjebën, kolerën dhe sëmundje të ndryshme. Vdekjet filluan me 32 vetat e parë dhe vazhduan këtu me 300 fëmijë, mosha nga 6 muaj deri në 3-4 vjeç”.

Kryetari i opozitës tha se kushtet e këtij kampi u ngritën sipas parimit të shfarosjes, i cili u zbatua më herët edhe nga nazistët.

“Nga pikëpamja ligjore ky është krim kundër njerëzimit, sepse, në qoftë se 1 në 3 humbën jetën për shkak të kushteve qëllimisht shfarosëse, çnjerëzore, atëherë këtu bëhet fjalë për kamp shfarosjeje. Duke qenë se gjithçka u zhvillua edhe pa legjislacionin që diktatura e përdorte për të burgosur dhe për të ekzekutuar kundërshtarët e regjimit dhe u drejtua kryesisht kundër familjarëve të tyre, nuk ka asnjë diskutim se edhe motivi i xhelatëve që i sollën këtu, edhe mënyra e veprimit këtu kishte një qëllim, shfarosjen e tyre”.

Gjatë vizitës në ish kampin e internimit, i mbijetuari Filip Gjomarkaj rrëfeu se familja e tij u dërgua këtu në vitin ’49 dhe qëndruan deri në 54-n, kur pas vdekjes së Stalinit, kampi i Tepelenës u prish dhe të burgosurit e mbijetuar u shpërndanë në disa kampe të Lushnjës.

Dëshmitarët e mbijetuar të krimeve të komunizmit, pasardhësit e tyre dhe kreu i opozitës ndanë të njëjtin mendim se ruajtja e ish kampit të Tepelenës është domosdoshmëri, që ai të shërbejë si një institucion kujtese për brezat, për të shmangur përpjekjet e pushtetit aktual për rehabilitimin e diktaturës apo, më keq akoma, për rikthimin në krye të institucioneve publike të nomenklaturës komuniste të brezit të parë apo të dytë.

“Majmunëria e udhëheqjes aktuale, që në poture e në gjuhë, në kuptimin e imitimit të Enver Hoxhës e të xhelatëve të tjerë, që i kanë zhytur duart në gjakun e foshnjeve e të fëmijëve, nuk është thjesht teatralizëm, është një investim i rrezikshëm për të rikthyer dramën, sepse historia tregon që një popull, i cili nuk kujton, e përsërit dramën e vet. Sot ne ballafaqohemi me mungesën e vetëdijes dhe të kujtesës. Riqarkullohen emra xhelatësh në institucionet e drejtësisë e në institucionet e shtetit dhe vazhdojnë flasin ata për drejësi të standardeve evropiane apo janë bashkëhartues të legjislacionit të Shqipërisë të vitit 2019” – theksoi Basha.

Kryetari i PD denoncoi kultin e krimit që mbizotëron sot tek partia në pushtet, duke thënë se ky kult kishte mbijetuar si virus gjatë procesit të paplotë të shndërrimit të PPSH-së në PS dhe që tani po shërbente si një politikë për të marrë pushtetin me kriminelë apo më tej për ta mbajtur atë me kriminelë.

Lideri i opozitës vuri në dukje gatishmërinë e PD për të ndërmarrë nisma të mëtejshme parlamentare dhe publike për dënimin e krimeve të komunizmit dhe shprehu besimin se në këtë përpjekje PD dhe opozita nuk do të ishin vetëm, por bashkë me shumë faktorë të shoqërisë, pasi kishte ardhur koha që kulti i krimit të marrë fund.

11 Shk

DEKLARATË E PARTISË DEMOKRATIKE

by PD in Lajmi fundit

3 ditë me vonesë, të shtrënguar nga presioni ndërkombëtar dhe revolta e opinionit publik, kukullat e Edi Ramës në Ministrinë e Brendshme dhe në Ministrinë e Drejtësisë u bënë pjesë e teatrit kriminal me aktor Dritan Dajtin dhe regjisor Edi Ramën.

Lotët e krokodilit nuk e ndryshojnë dot faktin se vrasësi i 4 Dëshmorëve të Atdheut, Dritan Dajti, është praktikisht i liruar nga drejtësia e re e Edi Ramës.

Shqiptarët mund të gënjehen njëherë, por jo përgjithmonë!

Në vend që t’u besojnë kërcënimeve qesharake të eunukut të Ramës në Ministrinë e Brendshme, shqiptarët e dinë se karrigia e Edi Ramës është blerë nga votat e krimit të organizuar, i cili, fatkeqësisht, nuk luftohet dot me lotë krokodili.

Faktet janë kokëfortë:

1. Edi Rama kishte nën kontroll Gjykata e Lartë, kur ajo zhvlerësoi dënimin me burgim të përjetshëm për Dritan Dajtin dhe i hapi rrugë vendimit skandaloz që siguron lirinë e shpejtë të një prej kriminelëve më të tmerrshëm.

2. Edi Rama, njeriu që përgojon gjithë Tiranën, heshti kur Gjykata e Lartë ndihmoi Dritan Dajtin, heshti edhe 3 ditë më parë, pas vendimit skandaloz për Dritan Dajtin.

3. Në qeverisjen e Edi Ramës të gjithë bandat dhe kriminelët më të rrezikshëm janë lënë të lirë, që nga Hakmarrja për Drejtësi, Banda e Durrësit tek Banda e Lushnjës dhe trafikantët ndërkombëtarë të kokainës në Xibrakë.

Në vend të lotëve të krokodilit për një vendim të dirigjuar nga Edi Rama, Ministrja e Drejtësisë duhet t’i kërkojë prokurorisë që të zbardhë përgjimet nga burgu të Dritan Dajtit dhe t’u thotë shqiptarëve:

 Me kë komunikon nga burgu Dritan Dajti?

 Kë shantazhon nga burgu vrasësi i 4 policëve në krye të detyrës?

 Kush i ka dalë Dritan Dajtit garant për lirimin e tij të shpejtë?

Pyetjet janë konkrete dhe kërkojnë përgjigje konkrete, jo lojra fjalësh e mashtrime për shkarkime gjyqtarësh nga qeveria që ka në dorë të shkarkojë Vangjush Dakon, por vazhdon ta mbrojë atë për blerjen e votave në bashkëpunim me të ngjashmit e Dritan Dajtit.

11 Shk

Shqipëria, në raport me vendet e tjera të rajonit, është e fundit përsa i përket pëlqyeshmërisë nga bizneset. Shkaqet janë mungesa e politikave ekonomike, politika plotësisht e gabuar fiskale dhe korrupsioni.

by PD in Lajmi fundit, Fjalime

Shqipëria, në raport me vendet e tjera të rajonit, është e fundit përsa i përket pëlqyeshmërisë nga bizneset. Shkaqet janë mungesa e politikave ekonomike, politika plotësisht e gabuar fiskale dhe korrupsioni.

Vizioni i PD për të ringjallur ekonominë përbëhet nga 3 shtylla kryesore: çlirimi i tregut nga monopolet, oligarkia dhe korrupsioni; një politikë fiskale, që nxit prodhimin dhe punësimin; orientimi nga prioritet e ekonomisë.

Nuk mundet askush, sado kohë të ketë qenë në paradhomat e PD dhe tani në paradhomat e PS, të marrin tendera nga 200-300 milionë euro pa studim fizibiliteti.

Të gjitha kontratat e 2.9 miliardë euro PPP dhe koncesione të 5 individëve dhe korporatave të tyre, do të anulohen dhe çdo cent publik, do të rikthehet tek arka e shtetit.

Platforma antimafia do të godasë këtë element të përparuar të korrupsionit, por ne besojmë se platforma fiskale e taksës së sheshtë 9%, thjeshtimi i sistemit fiskal, do të ndihmojnë në reduktimin e korrupsionit.

5 Prioritet e PD për zhvillimin e e ekonominë janë turizmi, për të mos patur në çdo cep të bregut nga një klient të qeverisë; energjetika, teknologjia e informacionit. bujqësia dhe agroturizmi, logjistika.

PD është parti pro sipërmarrjes, sepse objektivi ynë numër 1 është punësimi. Sa më shumë vende pune do të jeni në gjendje të krijoni, aq më mirë do t’ju mbajmë.

FJALA E KRYETARIT TË PARTISË DEMOKRATIKE, LULZIM BASHA NË TAKIM ME PËRFAQËSUES TË BIZNESIT NË VLORË

Nuk kam ardhur këtu të bëj fushatë elektorale. Natyrisht turi që po bëj nëpër Shqipëri është për protestën e 16 shkurtit, por bashkëbisedimi me ju po e bëj në një kuadër shumë të më të thellë. Jam jashtëzakonisht i shqetësuar për gjendjen ekonomike në Shqipëri. Të gjithë indikatorët kritike janë në rënie.

Anketa më e fundit e Bankës së Shqipërisë tregon besimin e konsumatorit, besimin e biznesit me rënien pikiatë për 4-5 tremujorë. Kreditimi i biznesit, sipas të njëjtit buletin, është në rënie, klima e biznesit në përkeqësim, sipas edhe vetë Forumit Ekonomik Botëror. Vendi ynë, në raport me vendet e tjera të rajonit, nuk po flas më gjerë, përsa i përket pëlqyeshmërisë është i fundit, na ka kaluar edhe Kosova, edhe Bosnjë Hercegovina.

Analiza jonë që na çon në një paketë masash, në një shock për ta rizgjuar ekonominë nga gjendja e komës ku është dhe pastaj për të ecur përpara, pra, analiza tregon se 3 janë faktorët kryesorë pse kemi ardhur në këtë pikë:

Mungesa e politikave ekonomike. Këtu kemi përfaqësim të botës së biznesit, jo vetëm të mbështetësve të PD, dhe ju ftoj të më thoni një politikë ekonomike, një politikë që nxit punësimin, një politikë që nxit investimet e huaja. Ka mungesë totale të vizionit për vendin dhe ky është shkaku i parë.
Një politikë tmerrësisht e gabuar fiskale është shkaku I dytë. Rritja e taksave 15 %, kur të tjerët e ulin, kur Maqedonia dhe Mali i Zi i çuan në 9 %, ngarkimi i komoditeteve mbi të cilat funksionon ekonomia me taksa dhe tarifa të paimagjinueshme. Nafta më e shtrenjta në Europë, energjia që prodhohet këtu, 99% nga shiu me koston më të ulët, prapë më e shtrenjta në rajon, për të mos vazhduar me taksat e fshehta. Një biznesi i shkojnë mesatarisht 100 ditë në vit vetëm inspektorët. Do të bëjë biznes apo do të merret me inspektorët?!
Korrupsioni, plagë e tranzicionit, nuk nisi me këtë qeveri, por që ka arritur në nivele të paimagjinueshme. As më skeptiku ndër ne nuk do ta kishte imagjinuar këtë shkallë korrupsioni, që merr forma të tilla si afera e Unazës, me 20 milionë euro 1 kilometër. Dhe pastaj ndahet në 3 pjesë që të përjashtohen garuesit e huaj dhe, prapë një bashkim kompanish me një garues të huaj dhe ca shqiptarë, fiton në një rrugë ekzistuese që siç e dini përfundoi në 1 kilometër 20 milionë euro. Dhe pastaj zbulohet se kanë falsifikuar firmën e Sekretarit të Shtetit të Delaware. Pasi ndodh e gjitha kjo, që edhe në Nigeri do të kishte shkuar një ministër në burg, këta i trajtojnë si gjëra normale, si gjëra që ndodhin. Është dhe rasti tjetër i fitimit të 4.5 mln eurove për 8 orë me një transaksion të KESH-it. Shembuj të tillë ka pa fund.

Çfarë propozojmë ne?

Ne kemi një vizion mbi të cilin do të bazojmë politikat tona ekonomike. Ky vizion përbëhet nga 3 shtylla kryesore:

Çlirimi i tregut nga monopolet, oligarkia dhe korrupsioni
Një politikë fiskale, e cila do të nxisë prodhimin dhe punësimin si objektivi ynë numër një.
Orientimi nga prioritet e ekonomisë shqiptare.

Shkurtimisht.

Për të parën kemi propozuar platformën tonë antimafia për oligarkinë. Nuk mundet askush, sado kohë të ketë qenë në paradhomat e Partisë Demokratike dhe tani në paradhomat e PS, të vijë dhe të marrë tendera nga 200-300 milionë euro pa studim fizibiliteti, pas asgjë fare. 5 individë dhe koorporatat e tyre kanë lidhur sot duart e buxhetit të shtetit me 2.9 miliardë euro PPP, që nuk e dimë çfarë vlere do t’i sjellin ekonomisë. Të gjitha këto kontrata do të anulohen dhe çdo cent publik, që janë paratë tuaja, që kanë ndërruar duar, do të rikthehet tek arka e shtetit.

Ne do t’u japim fund këtyre praktikave. Nuk do të ketë propozime të pakërkuara, nuk do të ketë kompani fantazëm, që krijohen dy ditë para tenderit, nuk do të ketë tendera me konkurencë fallco ku futet një bedel në të tre lotet dhe pastaj zeron ofertën, që të dalë oferta më e lartë që të marrë 40 milionë euro për 2 km për tendera si ai i unazës me 40 milionë euro, që janë paratë e shqiptarëve. Platforma antimafia do të godasë këtë element të përparuar të korrupsionit, por ne besojmë se platforma fiksale e taksës së sheshtë 9%, thjeshtimit të sistemit fiskal, po kështu, do të ndihmojnë shumë në reduktimin e korrupsionit, duke reduktuar mundësitë për korrupsion.

Çlirimi nga korrupsioni, po kështu do të fokusohet tek çështja e inspektorateve që, siç ju thashë, sipas vetë anketave të INSTAT-it dhe Bankës së Shqipërisë u konsumojnë sot bizneseve deri 100 ditë më vit, 1/3 e vitit duke u marrë me inspektoriatet. Për biznesin e vogël kjo do të thotë eliminimi i pranisë së inspektorëve pas fiksimit të pullës fiskale. Për bizneset e mëdha kjo do të thotë një maksimum prej 5 ditësh në vit në bazën e analizës në vlerësimit të riskut, siç përdoret ne Europë, siç përdoret në SHBA, sic përdoret në Maqedoni dhe Kosovë.

Kthehem tek shtylla e dytë-paketa fiskale.

Biznesi nën 140 milionë lekë të vjetra do të futet në fashën e biznesit të vogël dhe do të hiqet nga TVSH. Askush nuk përfiton, as biznesi i madh. Nën 140 milionë lekë të vjetra, biznesi i vogël do të tatohet me 0.5 % të xhiros vjetore. Shlyerja e këtij detyrimi do të njihet përmes pullës fiskale dhe i gjithë detyrimi do t’i shkojë pushtetit vendor, i cili nuk do të ketë të drejtë të vendosë asnjë taksë tjetër përveç kësaj tek binesi i vogël. Kjo të paktën do të mundohet të ndalë arrestin kardiak ku ndodhet biznesi i vogël. Sot po mbyllën 50 biznese në ditë, sipas QKR. Minimumi janë 50 vende pune që mbyllen në ditë. Sepse biznesi është në gjendje të arrestit kardiak, sepse i kanë rritur taksat, se ka 100 taksa të fshehura, gjoba, tarifa të pushtetit vendor. 0.5% e xhiros vjetore, pulla fiskale dhe kjo pullë do të jetë edhe ndalim kalimi për inspektorët tatimorë.

Për biznesin e madh taksa 9%, taksë e sheshtë, kemi pasur taksën 10%, i thonim taksë e sheshtë, por nuk ishte taksë e sheshtë, sepse taksat për kontributet shoqërore nuk u prekën. Kësaj radhë kjo do të prekë edhe taksën për kontributin shoqëror. Do të jetë 9+9. 9 për punëdhënësin, 9 për punëmarrësin, 9 % edhe taksa e fitimit të korporatës.

Ndërsa për dy komoditetet bazë do të kemi këto përqasje:

Uljen me 300 lekë të çmimit të karburantit, eliminimin e taksës “Rama” mbi karburantin, që siç e dini është shtimi në dy këste i taksës së qarkullimit dhe çmimin e energjisë do ta trajtojmë me tre fasho, 20% ulje për biznesin e vogël, 30-40 % ulje për biznesin prodhues dhe fasha e tretë do të jetë për konsumatorët.

Prioritet tona që janë edhe të Shqipërisë, nuk është se i shpikëm:

Në mënyrë absolute turizmi, potenciali më i madh, i cili pritet që në nivel global të dyfishohet. Imagjino çfarë do të thotë kjo për një perlë të Mesdheut, siç është Vlora. Mundësi e jashtëzakonshme edhe përgjegjësi e jashtëzakonshme. Do ta kthejmë tallava apo do të përfitojmë nga turistët më të kamur. Nëse po, si? Infrastruktura, çmimi i naftës, energjisë, që janë bazike, elementare, pa këto është e kotë të fluturojmë e të ëndërrojmë. Do ta bëjmë këtë duke ndërtuar fshatra turistike, duke gërmuar siç pashë andej nga Bregu, kur u ktheva nga Gjirokastra, çdo cep të Bregut nga një klient të qeverisë apo një plan me të vërtetë të konsoliduar, i cili të çojë në një rezultat që ky vend të ketë pjesën që i takon nga turizmi cilësor europian, si shtyllë kurrizore të rritjes ekonomike. Çfarë e nxori Greqinë nga kriza? 90% turizmi, 10% peshkimi.

Së dyti energjetika. 30% e energjisë që konsumojmë çdo ditë vjen nga investimet private në energjetikë. Është shfrytëzuar vetëm 50% e potencialit. Vetëm me Devollin janë hapur 9 mijë vende pune. Investimet në energjetikë duhet të vazhdojnë, natyrisht në harmoni me prioritetin numër 1 që është turizmi dhe mjedisi. Turizëm pa mjedis nuk mund të ketë.

Teknologjia e informacionit. Nevoja për programues në Europë përllogaritet të rritet në miliona njerëz. Vetëm në Gjermani 2 milionë njerëz përgjatë dekadës së ardhshme. Një programues sot në Tiranë e fillon punën me 800 euro, brenda 2 muajve 1200 euro, po të jetë i aftë brenda vitit merr 2 mijë euro. 3 herë më pak se në Bratislavë, 6 herë më pak se në Berlin, por jeton me një pagë mbi mesataren italiane në Tiranë, por nuk ka më. Janë 4-5 kompani kryesore që i kanë thithur të gjithë dhe nuk ka më programues. Kemi 12 universitete publike që i mbajmë me serum gjallë, se janë në gjendje kome, sepse lekët shkojnë për koncesione, kur mund të kishin marrë trajnuesit më të mirë, të kishim marrë 3-4 kompanitë më dominante të tregut dhe sot të kishim 10 mijë-20 mijë të rinj të trajnuar dhe prapë është një shkretëtirë që i thith si pikat e ujit. Miliona vende pune me paga të garantuara të nivelit europian – fusha të teknologjisë së informacionit, fusha e inovacionit.

Bujqësia dhe agroturizmi. Totalisht e pashfrytëzuar. Edhe kjo, parë në perspektivë globale veçanërisht në fusha si ajo e vajit të ullirit, prodhimit të verës, kur marrin dimensionet bio edhe më të çmuara në tregun europian dhe në tregje të tjera. Të gjithë po vrapojnë pas këtij tregu, vetëm shqiptarët jo, me disa përjashtime të rralla për bimët medicinale, erëzave, të tjerët nuk po përfitojmë sepse ne jemi i vetmi vend në Europë qe nuk subvencionojmë bujqësinë, nuk subvensionon agrobiznesin.

Dhe fusha e pestë prioritet-logjistika. Jemi si një kuti shpërndarëse. Na ka dhënë Zoti në zemër të Mesdheut, në qendër të Ballkanit. E nisëm me një plan kombëtar transporti, me Rrugën e Kombit, tani i kanë vënë traun. Në vend që ta bëjnë me të lirë koston e transportit, po si ta bëjnë më të shtrenjtë. Nuk mjafton 300 lekëshi për litër karburant, por i vëmë edhe traun. Ne nuk kemi as port të thellësisë së madhe, rrimë e kënaqemi me krunde, kur ne mund të jemi porti kryesor deri më Budapest. Ju duket si ëndërr, se ndoshta kështu ju dukej dhe heqja e vizave deri para 2010. Nuk është ëndërr. Duhen bërë disa detyra dhe unë flas me kompetencë të plotë si ish Ministër i Transportit. Kam jetuar në një vend që është kutia shpërndarëse e Gjermanisë së Veriut, në Holandë. Logjistika e Gjermanisë. Ka qenë shtylla kryesore e ekonomisë hollandeze, natyrisht, janë diversifikuar tani, janë prodhuesi numër 1 apo 2 i zarzavateve në botë, por logjistika është shumë e rëndësishme. Të mbajë me me logjistikë, të paktën Malin e Zi, Maqedoninë, Kosovën. Këto të treja ne duhet t’i dominojmë. Porti i Vlorës, shkretëtirë, Porti i Durrësit, 1/3 e kapaciteteve.

Këto janë 5 prioritetet sipas vizionit tonë. Asgjë nuk është e shkruar në gur. Kjo tavolinë dhe shumë të tjera si kjo kanë këtë qëllim, ta ndajmë këtë vizion me ju, ta pasurojmë me ju dhe të keni nesër një qeveri që nuk ju vë shkelmon më fyt, por ju shtrin dorën.

Jemi një parti që jemi pro sipërmarrjes, jo thjesht dhe vetëm pse jemi pro sipërmarrjes, por sepse objektivi ynë numër një është punësimi dhe nuk ka punësues tjetër përveç sipërmarrjes. Sa më shumë vende pune do të jeni në gjendje të krijoni, aq më mirë do t’ju mbajmë. Ky është objektivi ynë, ky është vizioni i Partisë Demokratike dhe qendrës së djathtë me mbështetjen edhe të aleatëve tanë europianë për të nesërmen e ekonomisë shqiptare.

10 Shk

Vlora po përjeton krizën më të thellë. 15 mijë të rinj vlonjatë janë larguar nga qyteti i tyre. Numri i studentëve të Vlorës, ka rënë me të paktën 800.

by PD in Fjalime, Lajmi fundit

-Vlora po përjeton krizën më të thellë. 15 mijë të rinj vlonjatë janë larguar nga qyteti i tyre. Numri i studentëve të Vlorës, ka rënë me të paktën 800.

-Unë besoj se shteti, arsyen e ekzistencën e ka të lidhur me kujdesin për njerëzit. Arsyeja e ekzistencës së shtetit dhe të qeverisë, është të ju shtrijë dorën

-Askush nuk përfiton, nga ky sistem i kalbur, që në fakt përfaqëson interesat vetëm të Edi Ramës dhe të një grushti oligarkësh.

-Kur është punë për të liruar kriminelët nga burgu, kur është puna për të liruar vrasësit e policëve nga burgu, si Dritan Dajti që ja ulën në 25 vjet, kur kishte 4 dënime npërjetë, atëherë po, shteti papritur ngrihet në këmbë.

-Kur është puna për të falur miliona euro të taksave tuaja, oligarkëve, kur është puna për të falur copat e bregdetit, pronës së të gjithë shqiptarëve, kur është puna për të dhënë koncensione dhe PPP, po, aty është Edi Rama, aty është shteti

-Europë, do të thotë; liri. Europë, do të thotë; mundësi, vetëpunësim dhe mirëqenie. Unë besoj, se këto mund t’i arrijmë këtu, me një qeverisje normale që I shtrin dorën qytetarëve, në vend që t’ju vejë këmbën tek koka.

-Kur e lidh fatin me Gjushin e me Niçen, me Habilajt, me Geron Xhafën, e me Bajrat, Dajtët e me Shullazët, gjëja e fundit që të shkon në mendje, janë hallet e njerëzve. Kur ke ardhur në pushtet me ta, nuk kujtohesh më për njerëzit.

-Vetëm disa fletë të dosjes 339, nga mijëra orë përgjime, vetëm disa minuta përgjime, të vetëm një dosje, kanë zbuluar se si u vodhën votat në 4 qarqe të Shqipërisë; në Kavajë, në Lezhë, në Durrës dhe në Dibër.

-Ky sistem i kalbur, duhet përmbysur. Duhet përmbysur.

-Rruga jonë drejt Europës, do të mbetet e bllokuar. Ne duhet ta çelim derën drejt Europës, se vetëm duke çelur derën drejt Europës, do të mund të sjellim zhvillim, punësim

-Procesi politik, ka marrë fund. Dhe koha për fjalë, ka mbaruar.

Me 16 shkurt, është koha për një bashkim dhe një vendimarrje të madhe popullore.

FJALA E PLOTE E KREUT TE PD, SOT NE VLORE

Faleminderit zonja dhe zotërinj, të rinj dhe të reja të Vlorës, që u bashkuat sot në këtë tur takimesh dhe bashkëbisedimi, në një nga lagjet më të vjetra të Vlorës, në lagjen e Muradies.

Jam i nderuar që kam qenë sot dhe mbrëmë, i pranishëm në Vlorën e krenarisë kombëtare. Jam i pikëlluar nga ajo që kam dëgjuar, nga goja juaj, e pedagogëve të universitetit të Vlorës, studentëve dhe përfaqësuesve të binzesit.

Vlora po përjeton krizën më të thellë ekonomike, sociale dhe psikologjike të viteve të fundit. Në dy vitet e fundit, afro tre mijë biznese janë mbyllur. Që do të thotë, se mijëra njerëz, kanë humbur vendet e punës.

15 mijë të rinj vlonjatë, janë larguar nga qyteti i tyre. Numri i studentëve të Vlorës, ka rënë me të paktën 800. Këto janë të dhëna dramatike, të cilat nuk I takojnë, nuk i meriton, një perlë, jo vetëm e Shqipërisë por e Mesdheut, siç është qyteti i Vlorës. Me mundësi të jashtëzakonëshme, me potencial të jashtëzakonshëm, për tu shëndërruar në një qëndër e fuqishme e zhvillimit ekonomik, jo thjeshtë e vetëm për banorët e Vlorës, por edhe të zonave përreth.

Të dashur miq!

Një pyetje që i shtrojmë sot vetes është: ku është shteti?!

Çfarë roli ka shteti, përveç se të kujdeset për ju?!

Unë besoj se shteti, arsyen e ekzistencën e ka të lidhur me kujdesin për njerëzit. Arsyeja e ekzistencës së shtetit dhe të qeverisë, është të ju shtrijë dorën, duke filluar nga më të pamundurit. Nga ata në nevojë ekstreme ekonomike. Duke vazhduar me ata që kërkojnë punë. Pra, punësimi, si objektivi kryesor i një qeverie që mendon për njerëzit, duke vazhduar me ata që krijojnë vende pune; sipërmarrjen, biznesin e vogël, të mesëm, biznesin e madh. Për tu ardhur në ndihmë me taksa të ulëta, me anë të uljes së çmimit të naftës dhe të energjisë, që të krijojnë vende pune me kushte e paga dinjitoze.

Unë besoj, se roli i shtetit, është të kujdeset për shkollat e vogëlushëve, gjimnazet e të rinjëve dhe universitetet e studentëve shqiptarë. Të kthehen në institucione që përgatisin brezin e ri, jo vetëm me vokacion, por edhe me aftësi europiane.

Unë e di, që ky shtet sot, nuk ju ndihmon. Nuk jua bën më të lehtë jetën. Unë e di që ky shtet, ua bën më të vështirë jetën. Jua bën më të vështirë të pamundurve, sepse vetëm në qytetin e Vlorës, janë hequr 300 familje nga ndihma ekonomike, pa asnjë shpjegim. Jua bën më të vështirë, atyre që mezi e mbajnmë vendin e punës. Jua bën më të vështirë, punëdhënësve të cilët i mbysin me fatura, taksa, gjoba, me padrejtësi, me inspektoriate, me terror. Jua bën më të vështirë studentëve. Jua bën më të vështirë, prindërve dhe të moshuarve, sepse ky është një system, i cili është ngritur vetëm për të vjedhur shqiptarët. Askush nuk përfiton, nga ky sistem i kalbur, që në fakt përfaqëson interesat vetëm të Edi Ramës dhe të një grushti oligarkësh.

Askush në Vlorë, Shkodër, Tiranë, në Durrës, nuk ia ka parë hajrin. Të gjithë e ndjeni peshën e taksave më të larta. Të gjithë e ndjeni peshën e çmimit të lartë të energjisë. të gjithë e ndjeni peshën e gjobave dhe të padrejtësisë. Të gjithë e ndjeni peshën e një shteti të kapur, të një drejtësie të kapur, në funksion të oligarkëve dhe të bandave, në funksion të politikanëve të korruptuar. Me dhjetëra raste më shpjeguan sot qytetarët, që nuk kanë ku të shkojnë e të ankohen, për të marrë të drejtat që ju takojnë dhe ju garanton ligji. Të shurdhër e gjejnë administratën locale, akoma më të shurdhër e të verbër, institucionet e administratës shtetërore. Të heshur dhe të korruptuar prokurorinë dhe drejtësinë për të vepruar, kur është puna për të mbrotjur të drejtat e njerëzve të pambrojtur.

Kur është punë për të liruar kriminelët nga burgu, kur është puna për të liruar vrasësit e policëve nga burgu, si Dritan Dajti që ja ulën në 25 vjet, kur kishte 4 dënime përjetë, për vrasjen e 4 oficerëve. Atëherë po, shteti papritur ngrihet në këmbë. Kur është puna për të falur miliona euro të taksave tuaja, oligarkëve, kur është puna për të falur copat e bregdetit, pronës së të gjithë shqiptarëve, kur është puna për të dhënë koncensione dhe PPP. Po. Aty është Edi Rama, aty është shteti, aty janë vendimet e padrejta, të cilat cënojnë ditë përditë liritë dhe të drejtat tuaja. Shkatërrojnë ditë për ditë, të ardhmen tuaj dhe të fëmijëve tuaj.

Ekonomia është në kolaps, sepse jemi vendi me taksat më të larta në Ballkan. Ekonomia është në kolaps, sepse jemi vendi më çmimin më të lartë të naftës në Europë. Ekonomia është në kolaps, sepse, ndonëse e prodhojmë vetë energjinë me kosto më të ulët, e shesim me çmimin më të lartë, qytetarëve dhe bizneseve prodhuese.

Ekonomia është në kolaps, sepse ka 6 vite që nuk ka një investitor të huaj. Edhe ata që ishin, u përzunë me dru, me dajak, apo me masa të padrejta. Ekonomia është në kolaps, sepse të gjithë shqiptarët bashkë, kanë paguar 2 miliard eruo më shumë taksa me Edi Ramën, por nuk ia kanë parë hajrin, asnjë prej këtyre taksave që kanë paguar. As në investime, as në shërbime. Shëndetësia është në rrënim. Edhe këtu në këtë lagje, kanë hedhur 13 mlion euro, gjoja investime, dhe më thanë banorët e lagjes; 13 milionë euro, për çfarë? Për të lyer disa fasada dhe për të bërë disa punë shkel e shko!

Këto janë paratë tuaja. Janën paratë e taksave tuaja që mund të kishin shkuar për të jua bërë jetën më të lehtë.

Unë besoj, se detyra e shtetit kjo është. Të ju shtrijë dorën njerëzve në nevojë. Të jua lehtësojë barrën. Të jua bëjë pak më të lehtë, mbijetesën. T’ju japë më shumë mundësi, për punësim. Të mbështesë mirëqenien. Të investojë tek brezi i ri.

Unë besoj, se një shtet normal, një qeverisje normale, është plotësisht e mundëshme dhee aftë ti bëjë këto.

Zonja dhe zotërinj!

Unë kam jetuar për një kohë, që 18 vjeç, në Europë dhe kam studiuar atje. Dhe padyshim kam përfituar nga kjo, por unë e di se asnjë vend I huaj nuk të bëhet si vendi yt. E di që ata mijëra të rinj vlonjatë, profesionistë, inxhinierë, dhe mjekë, që largohen në emigracion, nuk ikin sepse nuk e duan Vlorën, por ikin nga dëshpërimi. Dhe nuk janë krenarë, që e ndërtojë jetën e tyre dhe të ardhmen e tyre, me djersën e ballit, në Itali, Gjermani, Amerikë apo kudo tjetër. Sepse do të donim që të njëjtën gjë, të bënim këtu.

Europë, do të thotë; liri. Europë, do të thotë; mundësi, vetëpunësim dhe mirëqenie.

Unë besoj, se këto mund ti arrijmë këtu, me një qeverisje normale që I shtrin dorën qytetarëve, në vend që t’ju vejë këmbën tek koka. Me një vizion të qartë, për të sotmen e të nesërmen. Për ta zgjuar nga shoku ekonominë shqiptare. Për ti dhënë energjinë e mjaftueshme, besimin e mjaftueshë, pozitivitetin, financimet, që motorri i ekonomisë të fillojë e të punojë dhe të gjenerojë vende pune, shpresë dhe besim. Besim te konsumatori, besim tek biznesi, besim tek investitorët e huaj.

Unë besoj, se Zoti n aka bekuar, jo vetëm me natyren më të bukur, por dhe me rracën më të bukur dhe punëtore. Brezi ynë i ri, është dhe duhet të jetë, një burim krenarie për secilin prej jush, si prindër, si vlonjatë, si patriot.

Unë besoj, se ky brez i ka të gjitha mundësitë, të ndërtojë këtu në Vlorë, në Shqipëri, një realitet tjetër ekonomik dhe social. Nëqoftëse ne i marrim masat e duhura, që të shkollohen ashtu siç duhet, nëqoftëse ne i marrim masat e duhura, që ekonomia të kyçet në zhvillimet e vrullëshme të ekonomisë europiane, unë besoj se mund të krijojmë vende pune, me paga dinjitoze, me kushte dinjitoze të niveleve europiane, këtu në Vlorë, në Tiranë, Shkodër.

Por, për këtë, na duhet një qeveri që mendon për ju.

A mund të mendojë për njeriun e thjeshtë, për hallexhiun, për investitorët, për vendet e punës, një qeveri që ka ardhur në pushtet me ndihmën e krimit?

Kur e lidh fatin me Gjushin e me Niçen, me Habilajt, me Geron Xhafën, e me Bajrat, Dajtët e me Shullazët, gjëja e fundit që të shkon në mendje, janë hallet e njerëzve. Kur ke ardhur në pushtet me ta, nuk kujtohesh më për njerëzit.

Ardhja në pushtet e Edi Ramës, është faktuar tashmë dhe është publikuar nga Zëri i Amerikës, si një grusht shteti, jo nga ushtarakët, por nga banditët.

Ata kanë publikuar fakte tronditëse, të një prej dosjeve hetimore të prokurorisë, që ka kohë që fle në sirtarët e drejtësisë së kapur. Imagjinoni vetëm për një moment; vetëm një dosje!

Dosja 339!

Vetëm disa fletë të kësaj dosje. Nga mijëra orë përgjime, vetëm disa minuta përgjime, të vetëm një dosje, kanë zbuluar se si u vodhën votat në 4 qarqe të Shqipërisë; në Kavajë, në Lezhë, në Durrës dhe në Dibër.

Imagjoni tani, ka me dhjetra hetime të tilla. Me mijëra orë përgjime, që përfshijnë jo vetëm kupolën socialiste, por dhe të parin e Rilindjes, Edi Ramën, në këtë shit-blerje massive votash.

Në vend që të distancoheshin menjëherë, dhe të lejonin arrestimin e këtyre hajdutëve të votive, me Vangush Dakot dhe me Damian Gjiknurët me shokë, Edi Rama I mbron.

I mbron, sepse mbron veten e tij. Sepse emir I tij, është në atë dosje. Se ai e ka dhënë urdhërin.

Për të njëjtën arsye që mbron dhe aferat korruptive të Unazës së re të Tiranës, sepse asgjë nuk do të ishte e mundur, nëqoftëse në krye të kësaj afere korruptive, nuk do të ishte vetë, i pari i qeverisë.

Normalisht, kjo mund të zgjidhej me votë, por, vota është kapur. Në Europë, do ta zgjidhte prokuroria, por, prokuroria është kapur. Prokuroria ka në mend të hapë hetime ndaj gazetarëve që zbuluan të vërtetën, mirë që nuk hap hetime ndaj Zërit të Amerikës, por jo ndaj banditëve.

Ka ardhur pra, një moment kyç.

Ju e dini, ne u përpoqëm ta pstrojmë këtë system nga brënda, nga koka, me ligje, me propozime. Por, sistemi nuk funksionon. Institucionet nuk funksionojnë.

Ky sistem, nuk mund të pastrohet më.

Zonja dhe zotërinj!

Ky system i kalbur, duhet përmbysur. Duhet përmbysur.

Rruga jonë drejt Europës, do të mbetet e bllokuar. Ne duhet ta çelim derën drejt Europës, se vetëm duke çelur derën drejt Europës, do të mund të sjellim zhvillim, punësim, një ekonomi më të mirë, vende pune, shpresë dhe besim tek shqiptarët.

Por, ne mund ta hapim atë derë, vetëm duke shembur sistemin e kalbur që e mban peng Shqipërinë. Ky sistem i kalbur, që në fakt është vetëm një grusht njerëzish, është pengesa e vetme.

Procesi politik, ka marrë fund. Dhe koha për fjalë, ka mbaruar.

Me 16 shkurt, është koha për një bashkim dhe një vendimarrje të madhe popullore.

Rregulli numër një i Europës është; që pushteti I takon qytetarëve.

Rregulli numër një i Europës është; që kur pushteti uzurpohet, janë qytetarët atë që e çlirojnë.

Ndaj, pjesmarrja massive popullore me 16 shkurt, zëri juaj dhe vemdimarrja juaj me 16 shkurt, është vullneti i sovranit. Këtë jua them sot, jo thjeshtë dhe vetëm si kryetar i opozitës, i alternativës, si një njeri që kam ardhur me përgjegjësi, për planin ekonomik që kam shpalosur para jush, edhe me ndihmën e partnerëve tanë europianë, po kam ardhur mbi të gjitha t’jua them, si vlera themelore e Europës ku duam të shkojmë:

Me 16 shkurt, duhet patjetër ti japim fund këtij grushti shteti.

Me 16 shkurt, duhet patjetër të merrni në dorë fatet tuaja, si vlonjatë dhe si shqiptarë. Si prindër dhe si europianë.

Kjo është ftesa që kam për gjithësecilin prej jush. Kjo është ftesa që kam, për çdo vlonjate e çdo vlonjat.

Kjo është ftesa që kam për socialistët e tradhëtuar e të braktisur, e të poshtëruar, nga një klikë kriminale, që e ka marrë peng edhe partinë e tyre. Kundërshtarët tanë politikë, me të cilët mund të ndajmë mendime të ndryshme politike, për përqasjet ekonomike, për përqasjet mbis shëndetësinë , për arsimin etj., por që kemi 5 vite që nuk flasim për këto, sepse ka 5 vite që opozita nuk ndeshet me socialistët, por ndeshet me kriminelët. Ndeshet me bandat.

Mesazhi që ju jap sot, nuk është thjeshtë dhe vetëm mesazhi i opozitës. Dëgjoni mbani vesh, hapini sytë. Pritshmëritë e Europës, pritshmëritëe perëndimit, tanimë janë te i vetmi faktor që mund të sjellë ndryshimin, dhe ky faktor jeni ju.

Shikoni njëri-tjetrin në sy, shtrini dorën njëri tjetrit. Bashkohuni jo vetëm rreth halleve, por bashkohuni rreth zgjidhjeve. Bashkohuni rreth vendosmërisë për një të ardhme, për vetën tuaj, por mbi të gjitha për fëmijët tuaj. Shikoni në sy fëmijët tuaj, rininë shqiptare, vogëlushët shqiptarë dhe jepini përgjigje një pyetje vendimtare;

A ja vlen të luftoni për fëmijët tuaj?

Populli: Poooo

A ja vlen të luftoni për rininë shqiptare?

Populli: Poooo

Atëherë, e di që jeni të mërzitur dhe të dëshpëruar, por mblidhini forcat në emër të rinisë shqiptare, në emër të fëmijëve tuaj, në emër të së ardhmes tuaj:

Le të bashkohemi me 16 shkurt, për ti dhënë goditjen finale këtij sistemi të kalbur, një rrugë pa kthim, me vetëm një rezultat.

Shqipërinë e çliruar nga pengmarrësit.

Shqipërinë e çliruar nga oligarkët.

Shqipërinë e çliruar nga padrejtësia.

Zoti e bekoftë Vlorën e pavarësisë ev të flamurit!

Zoti i bekoftë familjet tuaja!

Zoti e bekoftë Shqipërinë!

09 Shk

Anembanë vendit po fryn një erë ndryshimi, që është shprehja më e qartë e forcës së qytetarëve të bashkuar.

by PD in Lajmi fundit

Anembanë vendit po fryn një erë ndryshimi, që është shprehja më e qartë e forcës së qytetarëve të bashkuar. Sot shqiptarët janë ngritur dhe bashkuar në Gjirokastër, Shkodër, Korçë, Dibër, Tiranë kundër qeverisë që është në pushtet me votat e blera nga krimi, që i vjedh çdo ditë për t’u pasuruar vetë.

Taksat janë shtuar për 97% të shqiptarëve. Çmimi i naftës është më i larti në Europë për popullin më të varfër në Europë. Çmimi i energjisë është më i larti në rajon. Edi Rama mbledh 2 miliardë euro taksa më shumë, por nuk ua kthen shqiptarëve në investime dhe shërbime më të mira.

Ky nuk është regjim demokratik, por një grusht shteti, i bërë jo nga ushtarakë apo grupe ideologjike, por nga një grusht kriminelësh dhe oligarkësh, që synon t’ju mbajë peng dhe të vazhdojë të përdorë Shqipërinë për t’u pasuruar në kurrizin e shumicës së shqiptarëve.

Sot dua t’ ju them qartë dhe prerë! Ky sistem duhet përmbysur me çdo kusht e me çdo çmim. Pa përmbysur këtë sistem, vendi nuk ka të ardhme, nuk do të ecim dot përpara në rrugën e futjes së Shqipërisë në Europë. Ky sistem nuk i përfaqëson dhe nuk i mbron shqiptarët.

Koha për fjalë ka mbaruar. Më 16 shkurt, ejani dhe flisni me pjesëmarrjen tuaj, me bashkimin tuaj. Jepuni dorën njëri-tjetrit dhe bashkohuni, jo thjesht sepse ju bashkojnë hallet, por sepse ju bashkon shpresa, ju bashkon vendosmëria për të luftuar për fëmijët tuaj.

Ju jap fjalën se kjo betejë është një betejë pa kthim. Nuk ka asnjë opsion tjetër, përveçse ta shembim këtë sistem. Të mos i paguajmë më gjobën këtij sistemi që, me drejtësinë e kapur nga Edi Rama, po bën gati lirimin e kriminelit që vrau 4 policë në krye të detyrës.

Më 16 shkurt nuk ju kërkoj të vini më Tiranë për të sjellë PD në pushtet. PD do të vijë në pushtet me votë. Ju kërkoj të bashkoheni, demokratë e socialistë, për ta hedhur në lumë këtë sistem të kalbur dhe për t’i hapur Shqipërisë perspektivën e zhvillimit, mirëqenies dhe të zhvillimit.

FJALA E KRYETARIT TË PARTISË DEMOKRATIKE, LULZIM BASHA NË GJIROKASTËR

Mirë se ju gjej zonja e zotërinj!

Vëllezër dhe motra, qytetare dhe qytetarë të Gjirokastrës!

Ju përshëndes nga zemra dhe ju përgëzoj, për këtë zgjim të jashtëzakonshëm të qytetarisë që keni demonstruar sot. Keni treguar se qytetarët janë më të vetëdijshëm se kurrë, se një ditë e re po vjen.

Një ditë e re po agon, një ditë ndryshe, një ditë ndryshimi dhe se çelësi i afrimit të këtij ndryshimi pozitiv për të gjithë banorët e Gjirokastrës, është bashkimi me njëri-tjetrin, bashkimi me të gjithë shqiptarët, më 16 shkurt në Tiranë, për të përmbysur një sistem të kalbur, që në fakt është vetëm një grup njerëzish, i cili ka marrë peng vendin, ka marrë peng ekonominë, ka marrë peng rininë, ka marrë peng universitetet, ka marrë peng sistemin shëndetësor. ka marrë peng pagat dhe pensionet e shqiptarëve, ka marrë peng të ardhmen tonë.

Zonja dhe zotërinj!

Dita e sotme ka qenë një ditë ku shqiptarët janë ngritur dhe bashkuar, në Gjirokastër, në Shkodër, në Korçë, në Dibër, në Tiranë.

Anembanë vendit po fryn një erë ndryshimi që është shprehja më e qartë e forcës së qytetarëve të bashkuar.

Cili është qëllimi i shtetit?

Pse ekziston shteti si një kontratë mes qytetarëve?

Besimi im i thellë është që detyra kryesore e ekzistencës së shtetit, është të kujdeset për qytetarët, të kujdeset për ju, për punësimin tuaj, për mirëqenien tuaj, për arsimimin e fëmijëve tuaj, për sigurinë e qyteteve, fshatrave dhe shkollave të fëmijëve tanë.

E pra sot, ne nuk kemi një shtet të tillë. Nuk kemi një qeveri të tillë.

Detyra kryesore e qeverisjes është t’u shtrijë dorën njerëzve, t’i ndihmojë ata, duke filluar nga më të pamundurit, duke vazhduar me sipërmarrjen që krijon vende pune, duke vazhduar me rininë që kërkon vende pune, me shëndetësinë, me arsimin, të ulë sadopak vështirësitë dhe barrën e rëndë të halleve dhe problemeve të jetës, t’i ndihmojë me investime, të cilat rrisin ekonominë.

Të përmirësojë gjendjen e shkollave, të investojë për një shërbim shëndetësore më të mirë e cilësor.

Por sot ne kemi një shtet, i cili nga mëngjesi deri në darkë, ditë për ditë, nuk mendon për asnjë nga këto halle. Mendon si e si të vjedhë shqiptarët dhe taksat e tyre, t’jua shtojë taksat dhe dhe taksat janë shtuar për 97% të shqiptarëve.

Çmimi i naftës është sot më i larti në Europë për popullin më të varfër në Europë.

Çmimi i energjisë është më i larti në rajon, në një vend që 99% e energjisë e prodhon vetë nga uji, me koston më të ulët në rajon.

Ne kemi sot një shtet i cili ka mbledhur nga xhepat e shqiptarëve, me taksat e Edi Ramës, 2 miliard euro më shumë se sa katër vite më parë, por asnjë qindarkë nuk është kthyer tek ju.

Investimet që japin vende pune nuk duken kërkund.

Investime të huaja zero! Kujdesi për sigurinë, zero!

Ngjarjet e rënda që ndodhin, në veçanti ato që kanë të bëjnë me sigurinë e vogëlushëve dhe fëmijëve tanë, janë tregues në radhë të parë, të shpërbërjes totale të ligjit e të kujdesit për fatin e qytetarëve dhe të fëmijëve të tyre nëpër shkolla.

Dhe në radhë të dytë, janë pasojë e drejtpërdrejt e modelit që ka ndërtuar Edi Rama, modelin e përdhunuesve kryetar bashkie, modelin e përdhunuesve deputetë, modelin e përdhunuesve që iu rreh krahët në fushatë.

Fushatë i thënçin, sepse me këta përdhunues, me këta kriminelë, ka ardhur dhe ka mbajtur pushtetin.

Këtë ne e kemi denoncuar prej kohësh. Këtë e ka denoncuar prej kohësh, opozita dhe Partia Demokratike.

Tani nuk është thjeshtë dhe vetëm denoncim, është provë zyrtare e prokurorisë shqiptare, bërë publike nga Zëri i Amerikës.

Dhe çfarë shohim?!

Në çdo vend normal, do të distancohej menjëherë i pari i qeverisë, në qoftë se politikanët e lidhur me krimin për të blerë vota, siç tregon dosja 339 publikuar nga Zëri i Amerikës, dhe të ishin të lidhur me partinë në pushtet, siç janë të lidhur me Edi Ramën, hapi i parë që një kryeministër do të bënte, do të ishte shkarkimi dhe arrestimi i tyre.

Edi Rama, jo vetëm hesht, por e mbron Dakon me shokë, sepse Edi Rama është urdhëruesi dhe zbatuesi i kësaj skeme.

Edi Rama nuk është kryeministri i shqiptarëve, nuk është kryeministri i Shqipërisë.

Ai është kryeministri i Gjushit.

Është kryeministri i krimit, dhe kjo është arsyeja se pse vuan Shqipëria! Pse vuan Gjirokastra!

Sepse, ai nuk e ka lidhur fatin e tij, me fatin e qytetarëve të thjeshtë. Prandaj, nuk do t’ia dijë për hallet tuaja.

Prandaj, i poshtëron, i shan, i nëpërkëmb me gjuhë zuzare dhe rrugaçërore, të padenjë edhe për më rrugaçin e rrugaçëve, por që sot është gjuha e përditshme e atij që i thotë vetes kryeministër i Shqipërisë.

Sepse nuk e ka lidhur fatin e tij me fatin tuaj!

Fati i tij është lidhur me fatin e një grushti kriminelësh, ata e sollën në pushtet dhe ata e mbajnë në pushtet.

Ky nuk është regjimi demokratik për të cilin Kushtetuta e Shqipërisë dhe qytetarët shqiptarë kanë votuar.

Ky është një grusht shteti i bërë jo nga oficerë, ushtarakë apo grupe ideologjike, por i bërë nga një grusht kriminelësh dhe një grusht oligarkësh, me një qëllim: që t’ju mbajë peng dhe të vazhdojë të përdorë Shqipërinë dhe pasuritë e saj, për t’u pasuruar në kurrizin e shumicës dërrmuese të shqiptarëve.

Nuk i bëhet vonë që Gjirokastra braktiset ditë për ditë nga dhjetëra e qindra të rinj, profesionistë, mjekë, inxhinierë, nga ata për të cilët ka më shumë nevojë.

Nuk i bëhet vonë që qytetet dhe fshatrat e Shqipërisë po boshatisen me ritmin më të lartë që nga eksodi i fillimit të viteve 90-të, përkundrazi, kjo i duket meritë e madhe.

Ne duhet t’i japim fund këtij sistemi!

Ky sistem nuk ju përfaqëson. Ky sistem nuk ju mbron. Ky sistem nuk ju shërben.

Ky është sistemi me të cilin është asgjësuar mirëqenia e të gjithë shqiptarëve të djathtë e të majtë, demokratë e socialistë. Ky është sistemi që i vjedh të gjithë shqiptarët.

Ky është sistemi, që shkatërron perspektivën e vendit.

Ky është sistemi që pasuron vetëm një grusht oligarkësh.

Ne jemi përpjekur ta pastrojmë këtë sistem. Jemi përpjekur, ta pastrojmë nga koka me ligjin e dekriminalizimit dhe iniciativën tonë për vettingun e politikanëve.

Jemi përpjekur ta pastrojmë nga brenda. Jemi përpjekur ta pastrojmë nëpërmjet institucioneve.

Ju të gjithë e dini se këto përpjekje kanë dhënë rezultate të limituara, apo janë hedhur poshtë me kartonët e asaj partie që ka ardhur në pushtet me krimin.

Sot dua të jua them i qartë dhe i prerë:

Ky sistem duhet përmbysur.

Pa përmbysur këtë sistem, vendi nuk ka të ardhme.

Pa përmbysur këtë sistem, nuk do të ecim dot përpara në rrugën e futjes së Shqipërisë në Europë.

Unë e di që asnjë vend nuk bëhet si vendi yt. 18 vjeç jam larguar nga vendi, kam studiuar dhe punuar jashtë Shqipërisë, dhe ua them nga përvoja personale, siç e dinë shumë prej jush që kanë jetuar në emigracion, e shumë prej të tjerëve që nuk janë sot këtu, sepse janë në emigracion, asnjë vend nuk të bëhet si vendi yt.

Prandaj, ne duhet të ndërtojmë këtu vlerat europiane. Ne nuk kemi rrugë tjetër. Nuk ka rrugë tjetër dhe nuk ka derë tjetër, që të na çojë drejt mirëqenies, drejt punësimit, drejt standardeve përveç rrugës europiane.

Por, ajo derë nuk do të hapet, sa kohë në krye të punëve të kemi qeveri që nuk ka ardhur me votën e qytetarëve, por me ndihmën e krimit.

Ajo derë nuk do të hapet e do të vonohet e do të zvarritet, ditë pas dite, javë pas jave, muaj pas muaji, siç është zvarritur tre herë me radhë, sa kohë që në krye të vendit të kemi oligarkët dhe kriminelët.

Unë e di, që po ta hapim atë rrugë që nuk është e lehtë, rrugën drejt sjelljes së standardeve europiane në Shqipëri, gjërat do të shkojnë më mirë për të gjithë. Kjo është një rrugë, të cilën do të duhet ta bëjmë të gjithë së bashku, por që të ecim të gjithë kësaj rruge, me taksa të ulta, me rritjen e rrogave dhe të pensioneve, me uljen e çmimit të energjisë dhe të naftës, me rindezjen e motorrëve të ekonomisë, rindezjen e pozitivitetit, që Gjirokastra si gjithë Shqipëria, të gëlojë nga energjia positive. Që të rritet ekonomia, që të krijohen vende pune me paga dhe kushte dinjitoze për rininë e Gjirokastrës dhe të gjithë Shqipërisë, ne duhet së pari të krijojmë këtu kushtet e një sistemi europian.

Ky sistem i kalbur, që në fakt është vetëm një grup njerëzish, duhet përmbysur me çdo kusht dhe me çdo çmim.

Vetëm duke e çliruar Shqipërinë nga këta pengmarrës, vetëm duke i kthyer Shqipërisë, shpresën për një ndryshim të vërtetë, ne do të mund t’i bëjmë realitet, planet tona ekonomike, të cilat siç i keni parë, kanë jo vetëm ekspertizën europiane, por kanë edhe mbështetjen europiane.

Ne do të mund të kthejmë besimin tek vendi ynë, që kapitali të investohet këtu. Të vijnë dhe jo të ikin investimet e huaja.

Që t’i bëjmë të gjitha këto realitet të dashur zonja e zotërinj, qytetarë dhe qytetare të Gjirokastrës, na duhet që ky bashkim i jashtëzakonshëm, që në fjalët e vetë bashkëqytetarëve tuaj, votues deri dje të së majtës, është bashkimi më i madh qytetar në 6 vite.

Këtë bashkim ta përsërisni më 16 shkurt, sot një javë në Tiranë, për t’i dhënë fund këtij sistemi të kalbur, për të marrë në dorë fatet tuaja, për të marrë në dorë institucionet që nuk i takojnë dhe nuk kanë për t’i takuar kurrë kriminelëve, por i takojnë sovranit, i takojnë qytetarëve.

Dhe menjëherë pas kësaj ju garantoj se ne do të vëmë në lëvizje planin tonë ekonomik.

Ne do të derdhim gjithë energjinë pozitive për të filluar ndryshimin, por deri në atë moment, nuk është më në dorën tonë, nuk është më në dorën e procesit politik.

Fjala nuk bën më fajde. Koha për fjalë ka mbaruar.

Më 16 shkurt, ejani dhe flisni me pjesëmarrjen tuaj, me bashkimin tuaj.

Jepuni dorën njëri-tjetrit dhe bashkohuni, jo thjesht sepse ju bashkojnë hallet, por sepse ju bashkon shpresa.

Ju bashkon apo jo vendosmëria për të luftuar për fëmijët tuaj, për rininë tuaj?

Dhe kështu të bashkuar ta hapim rrugën e bllokuar nga kjo klikë, rrugën drejt zhvillimit, rrugën drejt Europës.

Unë ju jap fjalën se kjo betejë është një betejë pa kthim.

Nuk ka asnjë opsion tjetër përveçse ta shembim këtë sistem.

Ky sistem, dhe po them edhe një herë, është vetëm i një grusht njerëzish, nuk është sistem, i ka marrë peng të gjithë, ka marrë peng edhe Policinë e Shtetit.

Shikoni si i trajtojnë, një herë i trajtojnë si hamejtë, si hamejtë e Saimir Tahirit, pastaj si stjuardesat e Agron Xhafës dhe kur vriten nga krimi, shikoni se çfarë i bëjnë.

Krimineli që vrau katër policë në krye të detyrës, drejtësia e kapur nga Edi Rama, e bërë njësh me Edi Ramën, me krimin, me oligarkinë, tani i dhanë atë që kërkoi vetë ai.

25 vite burg dhe po bëhen gati ta lirojnë, një kryekriminel që vrau 4 policë, 4 oficerë policie në krye të detyrës.

Ky është sistemi që ka ndërtuar, ky është sistemi që i ka rënë në qafë çdokujt.

Çdokush paguan fajdet, gjobën e këtij sistemi. Asnjëri prej jush nuk përfiton nga ky sistem, as socialistët e ndershëm të Gjirokastër, as socialistët e ndershëm shqiptarë nuk përfitojnë nga ky sistem.

Dua t’jua bëj të qartë!

Më 16 shkurt nuk ju kërkoj të vini aty për të sjellë Partinë Demokratike në pushtet.

Partia Demokratike e Shqipërisë do të vijë në pushtet me votën e qytetarëve shqiptarë, me vizionin tonë për ta nxjerrë vendin nga kriza.

Por ju kërkoj të bashkoheni siç po bashkoheni të gjithë, të djathtë e të majtë, demokratë e socialistë për ta hedhur në Lanë këtë sistem të kalbur dhe për t’i hapur Shqipërisë perspektivën e zhvillimit, mirëqenies dhe të zhvillimit.

Faleminderit edhe një herë për këtë pritje të jashtëzakonshme, ju ftoj të gjithë së bashku të merrni me vete edhe miqtë, shokë, shoqe, të rinj dhe të reja dhe ju mirëpres në Tiranë në ditën e parë të ndryshimit, më 16 shkurt të shtunën e ardhshme.

Faleminderit nga zemra!

Zoti e bekoftë Gjirokastrën dhe popullin e saj!

Zoti e bekoftë Shqipërinë!

09 Shk

SHQIPËRIA NË KËMBË, PROTESTA NË DISA QYTETE TË VENDIT

by PD in Lajmi fundit

Shqipëria e gjitha në këmbë, në vigjilje të protestës mbarëkombëtare me 16 shkurt në Tiranë.

Në 4 qytete kryesore të vendit sot janë organizuar nga opozita protesta masive kundër qeverisë.

Mijëra qytetarë iu bashkuan përfaqësuesve të opozitës në Shkodër, Korçë, Dibër dhe Gjirokastër duke drejtuar gishtin tek qeveria si shkaktare e varfërisë, rritjes së çmimeve, papunësisë, ikjes masive të shqiptarëve dhe mungesës së sigurisë.

Korça proteston: Qeveria na braktisi, nuk mbajti asnjë premtim

Qytetarët e Korçës dhe zonave përreth, protestuan në qendër të qytetit dhe në sheshin përpara bashkisë, duke ngritur zërin për gjendjen e vështirë që po kalon çdo qytetar sot.

Megjithëse një nga zonat më prodhuese në vend, fermerët korçarë, janë të falimentuar, për shkak se gjendja ekonomike e popullsisë është gjithnjë e më në rrënim dhe nuk ka konsum.

Për pasojë, ata thonë se janë të detyruar t’i hedhin prodhimet bujqësore, ndërsa qeveria i ka lënë jashtë çdo skeme subvensioni.

Në mungesë të subvencioneve, mallrat e importit janë duke falimentuar fermerin dhe biznesin shqiptar.

Qytetarët që i janë përgjigjur thirrjes së opozitës dhe kanë marshuar në rrugët e qytetit, duke hedhur parulla kundër qeverisë dhe bashkisë së Korçës:

Prodhimet po i hedhim. Nuk ka treg. Nuk kanë njerëzit lekë me ble.

Ndjehemi te braktisur nga Qeveria. Nuk mbajti asnjë premtim.

Qeveria nuk na jep asnjë subvencion. Lekët e subvencioneve i marrin vetëm 2-3 njerëz të lidhur me pushtetarët.

Në Shqipëri sot s’ka punë, s’ka mundësi për të ecur përpara po nuk njohe dikë, korrupsioni është bërë standard, shteti nuk kujdeset më për qytetarët e vet.

Njerëzit janë të papunë, po ikin te rinjtë. Qytetet dhe fshatrat po braktisen nga të rinjtë.

Kemi me pak lekë, nuk mbyllim dot muajin, çmimet janë rritur pas rritjes se taksave.

Po na helmojnë me TEC-in që duan të ndërtojnë.

Duhet te protestojmë ne Tiranë me 16 Shkurt. Te gjithë kundër Kryeministrit te varfërisë.

Shqipëria në këmbë, proteston Shkodra: Investimi i vetëm i Rilindjes, bandat e krimit

Shkodra e harruar nga qeveria dhe e nënshtruar nga krimi i mbështetur nga Rilindja, është ngritur në protestë duke fajësuar direkt qeverinë e Edi Ramës, si shkaktare e nivelit gjithnjë në rritje të varfërisë e pasigurisë në kryeqendrën e veriut.

Të thirrur nga opozita, qytetarët e qarkut të Shkodrës, protestojnë nëpër rrugët e qytetit për të adresuar thirrjet dhe parullat e tyre para prefekturës. Protestuesit thonë se rritja e çmimeve, mungesa e punës e kanë bërë shumë më të vështirë jetesën në Shkodër, Malësi e Madhe dhe Pukë. Në 6 vjet qeverisje, Rama bllokoi çdo investim për veriun e sidomos për kryeqendrën historike, Shkodrën, – deklarojnë protestuesit. Kjo situatë, shoqëruar sipas tyre edhe me rritjen e frikshme të krimit e bandave kriminale, po i detyron të rinjtë të ikin në emigracion. “Dy rrugë ka për të rinjtë, ose të bëhen pjesë e bandave kriminale, ose të ikin në Gjermani”.

Thirrjet dhe parullat e qytetarëve protestues drejtuar qeverisë:

Politika e Edi Rames ne 5 vjet është ulja e financimeve per arsim dhe rritja e tarifave.

Qëllimi i Edi Rames është te mbaje rininë të paarsimuar, që ta ketë më të thjeshtë të shkelë ligjin.

Edi Rama është Kryeministri i emigracionit. Po detyron të rinjtë të largohen, sepse nuk ka më shpresë për të gjetur punë.

Në Shkodër njerëzit kanë frikë nga bandat, sepse ato i mbron pushteti.

Ne i dimë lidhjet e deputetëve të PS me kriminelët në Shkodër, i dimë tenderat që marrin si shpërblim për terrorin në zgjedhje dhe blerjen e votës.

Rinia shkodrane nuk pranon të qeveriset dhe të urdhërohet nga krimi. Ne jemi njerëz të lirë.

Ndjehemi të braktisur nga Qeveria. Nuk mbajti asnjë premtim.

Në Shqipëri sot s’ka punë, s’ka mundësi për të ecur përpara po nuk njohe dikë, korrupsioni është bërë standard, shteti nuk kujdeset më për qytetarët e vet.

Çdo ditë e më shumë po varfërohemi.

Dibra në këmbë: Nuk kemi punë, nuk sigurojmë dot bukën e fëmijëve

Në Dibër, protesta u zhvillua në rrugët kryesore të qytetit të Peshkopisë, për të kulmuar me thirrjet në sheshin qëndror. Protestuesit akuzuan qeverinë për situatën në Dibër, që me gjithë propagandën e Rilindjes, mbetet sot një nga qarqet më të varfra në Shqipëri. Në fjalën e tyre, shumë prej protestuesve, adresuan problematikat duke vënë theksin tek rritja e madhe e çmimeve, ndërkohë që mundësia për të siguruar një punë mbetet minimale. Qytetarët thanë, se bashkia ashtu si edhe qeveria është kthyer në një vatër korrupsioni duke zhytur edhe më shumë në mjerim familjet pa asnjë ndihmë ekonomike të Dibrës, duke detyruar të gjithë të aftët për punë të marrin rrugën e emigrimit. Parullat kryesore të protestës në Dibër:

Gjendja ekonomike e familjeve është përkeqësuar.

Ndjehemi te braktisur nga Qeveria. Nuk mbajti asnjë premtim.

Në Shqipëri sot s’ka punë, s’ka mundësi për të ecur përpara po nuk njohe dikë, korrupsioni është bërë standard, shteti nuk kujdeset më për qytetarët e vet.

Njerëzit janë te papunë, po ikin te rinjtë.

Kemi me pak lekë, nuk mbyllim dot muajin, çmimet janë rritur pas rritjes se taksave.

Qeveria e ka mendjen vetëm tek koncesionet. Llixhat janë pasuri e Dibrës. Edi Rama kërkon të na i marr dhe t’ia jap privatit.

Llixhat janë tonat. Qeveria të heq dorë menjëherë nga dhënia me koncesion.

Duhet te protestojmë ne Tiranë me 16 Shkurt. Te gjithë kundër Kryeministrit te varfërisë.

Gjirokastra në këmbë: Na premtoi shëndetësi falas, por na fali mjerimin

Qytetarët e Gjirokastrës, krahas shumë problematikave që kanë me rritjen e çmimeve, papunësinë dhe varfërinë, protestuan sot edhe për mugesën e një prej shërbimeve jetësore, shëndetësinë. Të thirrur nga opozita, qytetarët gjirokastritë, u derdhën në rrugët e qytetit, duke bllokuar kryqëzimin pranë ish-NSHN-së. “Na premtoi shëndetësi falas, por falas po na jep vetëm mjerimin”, – ishin thirrjet e qytetarëve. Mungesa e ilaçeve në spitale, largimi i mjekëve dhe mbyllja e qëndrave kryesore shëndetësore në këtë rajon të jugut të Shqipërisë, ishin disa nga shqetësimet që ngritën protestuesit, shoqëruar me thirrje kundër qeverisë dhe me parulla në duar:

Qeveria na premtoi “shëndetësi falas”, por “falas” po na jep vetëm mjerimin.

Në spitale nuk ka ilace. Po vdesim njerëzit.

Mjekët po braktisen Shqipërinë.

Të rinjtë po braktisen Shqipërinë. Shkollat po mbyllen. Arsimi po rrënohet.

Ndjehemi te braktisur nga Qeveria. Nuk mbajti asnjë premtim. Na ka vrarë shpresën.

Në Shqipëri sot ska punë, ska mundësi për të ecur përpara po nuk njohe dikë, korrupsioni është bërë standard, shteti nuk kujdeset më për qytetarët e vet.

Duhet te protestojmë ne Tiranë me 16 Shkurt. Te gjithë kundër Kryeministrit te varfërisë.

09 Shk

Kudo në Shqipëri shoh vendosmëri për të mos pranuar më poshtërimin dhe vjedhjen, vendosmëri për të marrë në dorë fatet tuaja dhe për të mos ia lënë atë në dorë krimit e oligarkëve, që e kanë marrë peng Shqipërinë.

by PD in Lajmi fundit, Fjalime

Kudo në Shqipëri shoh vendosmëri për të mos pranuar më poshtërimin dhe vjedhjen, vendosmëri për të marrë në dorë fatet tuaja dhe për të mos ia lënë atë në dorë krimit e oligarkëve, që e kanë marrë peng Shqipërinë.

Ky sistem i kalbur ka marrë peng bukën e fëmijëve tuaj, paratë me të cilat mund të hapen vende pune, ka marrë peng të drejtat e shqiptarëve, sistemin shëndetësor e arsimor. Ky është grusht shteti, jo nga ushtarakët, por nga kriminelët.

Në Shqipëri ka shpresë se, të gjithë bashkë, mund ta zgjidhim problemin që po i detyron shqiptarët të largohen nga vendi, po i varfëron çdo ditë, duke e grabitur shumicën për të pasuruar pakicën, e cila qeveris me Edi Ramën.

E vetmja alternativë për të zhvilluar vendin është alternativa evropiane e PD, ku objektivi numër 1 është hapja e vendeve të punës me paga dhe kushte dinjitoze. Kjo është plotësisht e mundur, kur të ndërtojmë një qeveri që u shërben njerëzve.

Zëri i Amerikës tregoi se nuk kemi një qeveri të zgjedhur nga vota, por kemi një kryeministër të përcaktuar nga paratë e drogës, që mbron nga drejtësia politikanët e kapur në përgjime se kanë blerë vota me krimin dhe që nuk I hap rrugë një zgjidhjeje politike.

Procesi politik ka mbaruar. Zgjedhjet janë asgjësuar nga një grup kriminelësh, të cilët nuk ballafaqohen me drejtësinë. Më 16 shkurt ju ftoj t’i japim fund këtij grushti shteti, ta shembim këtë sistem të kalbur dhe të ndërtojmë një qeveri në shërbim të qytetarëve.

Një qeveri e PD do të ulë taksat, do të eliminojë taksën “Rama” mbi karburantet, do të bëjë të mundur një klimë miqësore për biznesin, sepse objektivi ynë numër një është punësimi i qytetarëve. Për të arritur këtë na duhet nje qeveri tranzitore, që të sigurojë zgjedhje të lira e të ndershme.

Tani është në dorën tuaj. Më 16 shkurt zëri i vetëm dhe verdikti i vetëm që do të dëgjohet nuk do të jenë fjalimet e politikanëve, zëri i vetëm që do të buçasë, vendimi i vetëm që do të merret dhe do të zbatohet do të jetë vendimi i popullit të bashkuar.

FJALA E KRYETARIT TË PARTISË DEMOKRATIKE LULZIM BASHA NË TAKIMIN ME QYTETARË TË MIRDITËS.

Të dashur vëllezër e motra, mirditore e mirditorë,

vëllezër e motra,

zonja e zotërinj,

të rinj e të reja,

Faleminderit nga zemra për këtë pritje të jashtëzakonshme.

Kudo ku takoj qytetarët e këtij vendi të vuajtur, të nëpërkëmbur e të poshtëruar prej 5 vitesh, shoh vendosmëri për të mos pranuar më asnjë minutë poshtërimin dhe vjedhjen, vendosmëri për t’u ngritur e për t’u bashkuar, vendosmërinë për të marrë në dorë fatet tuaja dhe për të mos ia lënë atë në dorë as krimit, as hajdutëve e as oligarkëve që e kanë marrë peng Mirditën dhe të gjithë Shqipërinë.

Së pari dua t’ju them se në çdo dorështrëngim, hall dhe problem që qani, ju dëgjoj me vëmendje dhe ju kuptoj shumë mirë. Ju duhet ta dini fare mirë se problemet tuaja, me të cilat përballeni ditë për ditë, janë problemet e shumicës dërrmuese të shqiptarëve. Se ky sistem i kalbur, që në fakt është një pakicë njerëzish, vjedh nga ju dhe i shërben vetëm një grushti grabitqarësh, të cilët kanë rrënuar ekonominë, kanë shkatërruar sigurinë dhe i kanë vënë kazmën shpresës së shqiptarëve për një jetë më të mirë, duke detyruar shumë prej jush të largohen e shumë prej të tjerëve të mendojnë largimin si rrugën e vetme.

Jam këtu për t’ju thënë se duke i dëgjuar e kuptuar këto probleme, të cilat i kemi qarë së bashku për vite me radhë, po kështu shoh se, bashkë me diellin që ka dalë, po kështu, ka dalë e ka lindur një shpresë e re për ndryshim, një vendosmëri për të mos iu larguar problemit, duke e konsideruar vendin tuaj problem, por për ta zgjidhur të gjithë së bashku problemin.

Unë e di se nuk ka gjë më të rëndë se të largohesh nga vendi yt. 18 vjeç jam larguar në kërkim të mundësive dhe e di se nuk ka gjë më të çmuar se vendi yt. Ndaj dua t’ju them, nisur edhe nga përvoja ime personale, se ajo që duhet të bëjmë është një detyrë e shenjtë, jo vetëm për veten tuaj, por, në radhë të parë, për fëmijët tuaj, për të rinjtë e Mirditës dhe për brezat që vijnë.

Arsyeja e vetme e ekzistencës së shtetit është t’u japë dorën qytetarëve, t’u shtrijë dorën njerëzve, duke filluar nga më të pamundurit, nga ata që kanë nevojë për ndihmë.

Arsyeja kryesore e ekzistencës së shtetit është që t’i mbështesë njerëzit në nevojë ekonomike, arsyeja kryesore e ekzistencës së qeverisë është që të mendojë sesi të hapë vende pune.

Arsyeja kryesore e ekzistencës së ligjeve dhe institucioneve është të garantojë sigurinë tuaj, shëndetësinë, arsimin dhe punësimin.

Arsyeja kryesore e ekzistencës së shtetit, pra, është kontrata me njerëzit për t’u shërbyer njerëzve, jo për të vjedhur fondet publike me skema korruptive, por për t’i kthyer ato në investime që hapin vende pune. Jo për të zhdukur fondet e shëndetësisë me koncesione, por për të bërë të mundur, që spitalet e klinikat, tona të ofrojnë po të njëjtin shërbim, me të njëjtën cilësi, siç ofrohet në vendet e tjera të rajonit. Jo për të varrosur arsimin dhe për të arsimuar rininë në universitete, që kanë cilësinë më të ulët për çmimet më të larta, por për të bërë të kundërtën, që rinia shqiptare, ajo që do të marrë në dorë fatet e këtij vendi, të ketë arsimin e duhur, profesionin e duhur dhe shanset për punësim, kur të mbarojë shkollën.

E vetmja alternativë për ta arritur këtë është alternative evropiane që Partia Demokratike ka hartuar dhe ka bërë publike, është alternativa e zhvillimit, ku objektivi numër 1 është hapja e vendeve të punës me paga dhe kushte dinjitoze për rininë shqiptare dhe për të gjithë popullin shqiptar. Kjo është plotësisht e mundur, kur së bashku të ndërtojmë një qeveri që u shërben njerëzve, kjo është plotësisht e mundur kur miliardat e eurove, të taksave të rritura, të çmimit të rritur të energjisë, të çmimit të rritur të naftës, që sot zhduken dhe bëhen rrush e kumbulla, me pasuri marramendëse për Edi Ramën dhe klikën e tij të korruptuar, t’ua kthejmë qytetarëve shqiptarë, t’ua kthejmë zotërve të vërtetë, që jeni ju.

Ne duam, pra, të kemi një qeveri që u shtrin dorën dhe ju ndihmon, ne duam të kemi një bashki, që ju shtrin dorën, ju ndihmon dhe nuk ju braktis.

Dhe për këto, edhe Evropa ka dy mënyra: zgjedhjet e lira, sistemin e drejtësisë.

Tash dy javë, Zëri i Amerikës ka publikuar fakte tronditëse të drejtësisë shqiptare. Ato tregojnë se në krye të vendit nuk është një qeveri e zgjedhur nga vota, por një kryeministër dhe një bandë e përcaktuar nga paratë e drogës dhe të krimit. Normalisht ata e lidhën fatin e tyre me kriminelët dhe kush e lidh fatin me kriminelët, i braktis qytetarët, i vjedh, i gënjen, i mashtron. Ju e keni provuar këtë në kurrizin tuaj gjatë këtyre viteve e, në veçanti, këtë vit e gjysëm që Shqipërisë i është mohuar e drejta për të zgjedhur qeverinë me votën e qytetarëve.

Në çdo vend normal, po të ndodhnin skandale të tilla, do të kishte një veprim të hekurt të drejtësisë. Gjushi dhe shokët e tij do të ishin prapa hekurave. Por Edi Rama i mbron. Në vend që të dënojë këtë akt, të distancohet dhe të arrestohen politikanët që kanë bërë masakrën elektorale, me bandat e krimit, Edi Rama i mbron, për arsyen e vetme që ju e kuptoni të gjithë, se pas kësaj skeme, është vetë Edi Rama. Siç është pas skemës së çdo koncesioni, çdo PPP-je dhe çdo tenderi. Edhe qeveria më e korruptuar e botës do ta kishte futur në burg ministrin e një tenderi si ai tek Unaza, ku me 20 milionë euro/km, bëhej gati grabitja e parave të popullit më të varfër të Evropës për të mbushur xhepat e politikanit më të korruptuar të Evropës, që ka zaptuar karrigen e kryeministrit.

Kjo është arsyeja përse nuk ndodh, sepse pas kësaj vjedhjeje qëndron i pari, shefi i qeverisë.

Zonja dhe zotërinj, procesi politik ka mbaruar. Zgjedhjet janë asgjësuar nga një grup kriminelësh të cilët nuk ballafaqohen me drejtësinë. Por një gjë Edi Rama nuk e ka kuptuar dhe ju duhet t’ia kujtoni me 16 shkurt, se zot i fateve të vendit, se pronar i institucioneve të vendit nuk mund të jetë kurrë një parti politike, aq më fort një parti politike e bërë njësh me krimin. Zot i fateve të vendit dhe sovran i institucioneve është populli, janë qytetarët.

Ndaj, me 16 shkurt ju ftoj që e gjithë Mirdita, të gjithë së bashku, qytetare e qytetarë, në veçanti të rinj e të reja, shumë prej jush i dhatë tonin, dinjitetin dhe zërin Lëvizjes Studentore – faleminderit dhe mirënjohjen time dhe të të gjithë shqiptarëve, të gjithë së bashku, me datë 16 t’i japim fund këtij grushti shteti.

Ky është grusht shteti, jo nga ushtarakët, por nga kriminelët. Kanë marrë shtetin peng, kanë marrë institucionet peng. Ky sistem i kalbur ka marrë peng bukën e fëmijëve tuaj, ka marrë peng paratë me të cilat do të hapen vende pune për ju dhe për rininë shqiptare, ka marrë peng të drejtat tuaja, të drejtat e pronarëve, dëmshpërblimin e të përndjekurve, ka marrë peng sistemin shëndetësor e sistemin arsimor, ka marrë peng bukën e gojës për të papunët e ata që kanë nevojë për ndihmë ekonomike, ka marrë peng Shqipërinë.

Ndaj tani, zgjidhjet politike po shterrojnë dhe, çdo ditë që afron Edi Rama nuk reflekton për përgjegjësitë që ka ndaj qytetarëve shqiptarë.

Mua, në emër të Partisë Demokratike nuk më mbetet rrugë tjetër veçse t’ju bëj thirrje që të shprehni vullnetin e lirë të popullit të Mirditës, krahpërkrah qytetarëve të tjerë të Shqipërisë, në Bulevardin e Dëshmorëve të Kombit, me datën 16 shkurt.

T’i jepni fund grushtit të shtetit, ta shembim këtë sistem të kalbur, që është, në fakt, një grup grabitqarësh, dhe të ndërtojmë së bashku një shtet dhe qeveri që u shërben qytetarëve.

Një qeveri e Partisë Demokratike do t’ju ulë taksat, do të eliminojë taksën Rama mbi karburantet, duke diktuar që çmimi i karburanteve në Shqipëri të ulet që prej ditës tonë të parë të qeverisjes me 300 lekë. Do të bëjë të mundur përmes platformës tonë të taksave të ulura një klimë miqësore për biznesin, sepse objektivi ynë numër një është punësimi i qytetarëve.

Por një gjë ju garantoj, pa u futur në detaje për programin tonë, të cilin do të kemi rastin ta diskutojmë, kur të kemi vendosur dhe diktuar zgjedhje të parakohshme dhe një qeveri tranzitore, që do të garantojë votën tuaj. Dua t’ju garantoj sot se ju e meritoni dhe do të keni një qeveri dhe kryeministër, që do t’ju shtrijë dorën dhe do të punojë për ju dhe do të zgjidhë hallet dhe problemet tuaja.

Dhe rruga për këtë fillon duke ia hequr Shqipërinë nga kthetrat një grushti njerëzish dhe për t’ia kthyer atë shqiptarëve, pronarëve dhe sovranëve të vërtetë të këtyre trojeve.

Vëllezër e motra, zgjidhja e vetme tani është në duart tuaja.

Ju i dini qëndrimet tona, ju i njihni zgjidhjet tona, ju e keni dëgjuar shurdhërinë e qeverisë, përbuzjen dhe mospërfilljen e tyre.

Ju e njihni Dosjen 339, e cila është maja e ajsbergut dhe tregon se as Edi Rama e as qeveria nuk janë legjitime.

Tani është në dorën tuaj. Është në dorën tuaj dhe me 16 shkurt zëri i vetëm dhe verdikti i vetëm që do të dëgjohet nuk do të jenë fjalimet e politikanëve, zëri i vetëm që do të buçasë, vendimi i vetëm që do të merret dhe do të zbatohet do të jetë vendimi i popullit të bashkuar.

Ndaj ju ftoj që t’i japim legjitimitetin e plotë këtij verdikti popullor, të jeni të gjithë të bashkuar, kështu siç u bashkuat sot, në këtë shesh, edhe me shumë, me miqtë, me vëllezërit dhe motrat, me bashkëshortët e bashkëshortet dhe me mbarë rininë e pamposhtur të Mirditës.

Të gjithë bashkë për të marrë fatin tuaj në duart tuaja, për të diktuar qeverinë dhe institucionet që ju shërbejnë ju, dhe për një gjë tjetër të madhe, një mision tjetër të madh kombëtar, i cili rëndon me përgjegjësinë e tij mbi shpatullat e çdo shqiptari, rëndon akoma më shumë mbi këtë themel të identitetit evropian të Shqipërisë, që quhet Mirditë, që kurrë nuk u nda shpirtërisht nga Evropa, që nuk e ndau dot as fuqia më e madhe ushtarake e botës. Nga vlerat evropiane të demokracisë dhe të lirisë nuk ju ndau fuqia më e madhe ushtarake e botës, nuk ju ndau dot as diktatura, me gjak i mbrojtët këto vlera këtu në Mirditë, në djepin e vlerave evropiane, e vlerave të krishtërimit evropian.

(thirrje E duam Shqipërinë si e gjithë Evropa)

Dhe patjetër do ta bëjmë si e gjithë Evropa.

Ky është testament prej ditës së parë të krijimit të saj në Partinë Demokratike, me çdo mirditore dhe çdo mirditor, ne do ta bëjmë Shqipërinë si gjithë Evropa.

Zoti i bekoftë Mirditën dhe mirditorët!

Zoti e bekoftë Shqipërinë!

Mirupafshim, më 16 shkurt, në Tiranë.

08 Shk

Koha për ndryshim po vjen. Kukësi, Vlora, Shkodra, Fieri, Durrësi, Korça dhe Tirana po vlojnë nga padurimi për t’i dhënë fund padrejtësisë

by PD in Lajmi fundit

Koha për ndryshim po vjen. Kukësi, Vlora, Shkodra, Fieri, Durrësi, Korça dhe Tirana po vlojnë nga padurimi për t’i dhënë fund padrejtësisë. Kuksianët kanë vuajtur më shumë nga të gjithë aktet prej pushtuesi të Ramës, i cili ka spastruar zonën dhe e ka zhytur në varfëri.

Masa e menjëhershme e Partisë Demokratike do të jetë heqja e taksës së “Rrugës së Kombit”, duke sjellë drejtësi për kuksianët, që arritën ta reduktojnë atë përmes qëndresës që i dha kurajo të gjithë shqiptarëve,

Vendi po lëngon, sepse ne nuk kemi një qeveri të zgjedhur nga populli dhe që jep llogari para popullit. Ne jemi sot duke u sunduar nga një bandë e cila e ka marrë pushtetin nga një grusht shteti, jo me ushtarakë, por me bandat e krimit dhe oligarkët.

Zëri i Amerikës publikoi fakte tronditëse, që tregojnë se si vetëm nga disa minuta përgjim, del vjedhja dhe manipulimi i votave në 4 qarqe të Shqipërisë. Del se si nga Durrësi në Lezhë, nga Kavaja në Dibër, Edi Rama dhe krimi i organizuar vodhën pushtetin që u takon qytetarëve shqiptarë.

Përgjimet tregojnë se kjo mazhorancë, nuk është mazhorancë, se ky kryeministër, nuk është kryeministër, se këta janë kukullat e krimit të organizuar, të oligarkisë që ka uzurpuar pushtetin. Përgjimet provojnë se mendja dhe përfituesi kryesor i shkatërrimit të zgjedhjeve të vitit 2017 është Edi Rama, kryeministri i krimit dhe i oligarkëve.

Ne i kemi zgjidhjet për t’i dhënë fund krizës. Ne kemi zgjidhje emergjente, për të ndalur rrënimin ekonomik, për të rifilluar investimet private që do të krijojnë vende pune, me paga dhe kushte dinjitoze nëpërmjet uljes së taksave për biznesin dhe qytetarët, heqjes së taksës Rama mbi karburantin, uljes së çmimit të energjisë elektrike.

Mbyllja e filialit të Universitetit të Kukësit, ishte një akt kriminal dhe racist. Hapja e këtij universiteti dhe financimi i tij për ta kthyer në një qendër ekonomike-akademike midis Tiranës dhe Prishtinës, ku të studiojnë të rinjtë nga qarku i Kukësit deri nga Prizreni, Prishtina e Lipjani.

Për të zhbërë padrejtësitë e Ramës për Kukësin dhe Shqipërinë, duhet t’i japim fund sundimit nga pakica dhe ta kthejmë pushtetin dhe ekonominë në duart e shumicës së ndershme të shqiptarëve.

Dy kolonat e shtetit, zgjedhjet dhe drejtësia kanë rënë. Shqipëria është në kushtet e grushtit të shtetit. opozita ka shteruar çdo mundësi në institucione dhe është refuzuar. Ndershmërisht ju them, më 16 shkurt nuk kam fjalë për t’ju thënë. Më 16 shkurt është gjithçka në dorën tuaj për të çliruar të drejtat tuaja të marra peng.

Një gjë ju siguroj, marrëveshje me Edi Ramën, nuk ka për të pasur më kurrë. Ndaj, ju kërkoj të bëheni pjesë e zgjidhjes. Ju kërkoj ta merrni në dorë zgjidhjen ju, sepse nuk ka e nuk mund të ketë zgjidhje tjetër, përveç asaj që do të diktojë populli i bashkuar.

FJALA E PLOTË E KRYETARIT, LULZIM BASHA PAS TAKIMEVE ME QYTETARËT NË KUKËS

Faleminderit për këtë pritje madhështore,

Zonja dhe zotërinj,

Të rinj dhe të reja,

Sot tek e shoh vendosmërinë tuaj, bindjen tuaj, për të marrë në dorë fatin tuaj dhe të familjeve tuaja të Kukësit, Hasit, Tropojës dhe gjithë Shqipërisë, dhe kur shoh se Zoti e ka bekuar këtë ditë me këtë diell të bukur, po mendoj dhe unë si shumë prej jush që më thanë gjatë kësaj ecje, sa larg e paskemi lënë datën 16, se me sa shoh, kështu siç jemi mund të nisemi sot, e t’i japim fund padrejtësisë.

Apo jo?

Koha për ndryshim po vjen.

Kukësi dhe Vlora, Shkodra dhe Fieri, Durrësi dhe Korça dhe Tirana po vlojnë nga padurimi për t’i dhënë fund padrejtësisë.

Pakkush në këtë Shqipëri, të vjedhur e të grabitur, të dhunuar e të kallur nga Edi Rama dhe klika e tij e oligarkëve grabitqarë dhe kriminelëve në pushtet, e kanë ndjerë thikën në palcë, si banorë të këtij qarku.

Është kështu apo jo?

Aktet e qeverisë së Edi Ramës ndaj kukësit dhe kusianëve, janë akte prej pushtuesi, janë akte armiqsore që kanë pasur një qëllim, nënshtrimin, varfërimin, zbrazjen dhe spastrimin e Kukësit nga banorët.

Dy nga këto akte flasin më shumë se çdo fjalë e imja apo e juaja.

Vendosja e traut korruptiv e taksës që ndalon një nga liritë më të mëdha që Kukësi fitoi, liri që e fitoi për shkak të sakrificës së vetë dhe për shkak të pozicionit në ekonominë mbarëshqiptare, midis Shqipërisë dhe Kosovës duke e vënë një çmim të padrejtë mbi lëvizjen e biznesit dhe qytetarëve të këtij qarku drejt Tiranës dhe në kthim drejt Kukësit.

Le ta nisim me largimin e menjëhershëm të kësaj mase korruptive që do të jetë masa e ditës sonë të parë të qeverisë së ardhshme, heqja e taksës së Rrugës së Kombit.

Heqja e kësaj takse do të jetë jo vetëm drejtësi për kuksianët, që jo vetëm arritën ta reduktojnë atë përmes qëndresës që i dha kurajo të gjithë shqiptarëve, por do të jetë po kështu drejtësi për të gjithë shqiptarët këtej dhe andej kufirit.

Sot dua t’i jap një paralajmërim të qartë organeve të drejtësisë. Kini kujdes. Gjithçka do të shënohet, padrejtësinë ndaj kuksianëve nuk do t’jua falim kurrë!

Asnjë prind apo i ri kuksian që u ngrit kundër padrejtësisë, nuk meriton veçse nderimin, mirënjohjen dhe dekoratën!

Drejtësia duhet dhe do të veprojë ndaj Edi Ramës dhe qeveritarëve të tjerë të korruptuar që ishin shkaku i vendosjes së kësaj takse të padrejtë.

Të dashur bashkëqytetarë,

Të nderuar banorë të Kukësit dhe miq që keni ardhur sot edhe nga Hasi dhe Tropoja,

Vendi po lëngon sepse ne nuk kemi një qeveri të zgjedhur nga populli dhe që jep llogari para popullit

(Rama ik…brohoritje)

Ne jemi sot duke u sunduar nga një bandë e cila e ka marrë pushtetin nga një grusht shteti.

Ndryshe nga vendet e tjera, ku grushtin e shtetit e bëjnë ushtarakët apo bandat ideologjike, këtu grushtin e shtetit e kanë bërë bandat e krimit dhe të oligarkëve.

Zëri i Amerikës publikoi fakte tronditëse që tregojnë se si, vetëm nga disa minuta përgjim, del vjedhja dhe manipulimi i votave.

Vjedhja e mandateve në 4 qarqe të Shqipërisë.

Vetëm disa minuta, mjaftuan për të treguar, se si nga Durrësi në Lezhë, nga Kavaja në Dibër, Edi Rama dhe krimi i organizuar, vodhën pushtetin që nuk u takon atyre, por u takon qytetarëve shqiptarë.

Imagjinoni, janë me mijëra orë përgjime vetëm në këtë dosje dhe janë me dhjetëra dosje të tilla!

Kjo tregon se kjo mazhorancë nuk është mazhorancë.

Se kjo qeveri nuk është qeveri.

Se ky kryeministër nuk është kryeministër.

Se këta janë kukullat e krimit të organizuar, të oligarkisë që ka uzurpuar pushtetin.

Pushteti, nuk i takon partive politike, ato kërkojnë delegimin me votë dhe për votën që marrin, duhet që japin llogari.

Pushteti i takon qytetarëve, qytetarët janë sovrani.

Në qoftë se Edi Rama do të kishte qenë dorëjashtë, nuk do të heshtte dhe aq më pak, të mbronte Gjushin me shokë.

Do t’i kishte arrestuar, do t’i kishte shkarkuar, do t’ia kishte çliruar duart drejtësisë, në vend që të bënte një mijë manovra, për të mbrojtur Gjushin.

Por, Edi Rama, mbron Gjushin, mbron gjushërit e tjerë, sepse mbron veten e tij, sepse në këto dosje të prokurorisë, qartësisht provohet se mendja, truri dhe përfituesi kryesor i shkatërrimit të zgjedhjeve të vitit 2017 dhe i kapjes së institucioneve, tamam si në një grusht shteti, me ndihmën e bandave, është një dhe vetëm një njeri, dhe ju e dini se kush është ky.

Është Edi Rama, kryeministri i krimit, kryeministri i oligarkëve.

Në qoftë se në një nga vendet më të korruptuara të botës do të bënte vaki ajo që ndodhi me unazën, ku u kap në flagrancë duke vjedhur 20 milion euro kilometrin, në një rrugë të ndërtuar.

Edhe qeveria më e korruptuar e botës do ta kishte çuar Ministrin përgjegjës në burg.

Është kështu apo jo?

Populli: Po!

Ndërsa këtu jo! Sepse po të shkojë Damian Gjiknuri në burg, emri i parë që do të nxjerrë, është emri i atij që ka marrë milionat dhe që i ka çuar në kontot bankare sekrete, dhe ju e njihni fare mirë se kush është ky.

Kush është njeriu që ka përfituar nga kjo aferë korruptive?

Populli: Edi Rama.

2 miliard euro, taksa më shumë, u ka marrë shqiptarëve këto vite të qeverisjes.

I rriti taksat për 100% të qytetarëve. E rriti me 300 lek çmimin e naftës. E rriti çmimin e energjisë. Jo vetëm që nuk u ktheu asgjë, por siç e dini, jo vetëm këtu në Kukës i përgjysmoi familjet që ishin në ndihmë ekonomike. U hoqi bukën e gojës! U hoqi bukën e fëmijëve me një të rënë të lapsit.

2 miliard euro është fatura minimale e korrupsionit, para që iu morën shumicës së shqiptarëve, për t’ia dhënë një pakice, një grushti njerëzish, pesë njerëzve me të cilët ai sundon Shqipërinë.

Kjo është deviza e regjimit që përballemi me 16 shkurt.

Edi Rama i ka marrë gjithçka shumicës së shqiptarëve.

Kuksianëve, korçarëve, beratasve, vlonjatëve, fierakëve, shkodranëve, dibranëve, matjanëve, tiranasve, durrsakëve, të gjithëve.

Absolutisht të gjithëve dhe ia ka dorëzuar, pesë vetave, ortakëve të tij në krim.

Kjo nuk është qeveri!

Qeveria ekziston për t’u kujdesur për sigurinë tuaj. Qeveria ekziston për t’u kujdesur për punësimin tuaj.

E vetmja arsye që një qeveri ekziston, është të kujdeset për qytetarët, për mirëqenien, për punësimin, për rrogat, për pensionet.

Dhe në qoftë se ata janë të papunësuar për ndihmën sociale, për shërbimet sociale, për arsimin, për shëndetësinë.

Edi Rama i ka braktisur këto detyra, që prej ditës së parë, se ashtu si ju, edhe ai e di se nuk është kryeministri i shqiptarëve, nuk është kryeministri i kuksianëve, është kryeministri i kriminelëve, është kryeministri i oligarkëve.

Ne i kemi zgjidhjet, për t’i dhënë fund krizës. Ne kemi zgjidhje emergjente për të ndalur rrënimin ekonomik, për të çliruar energjitë pozitive dhe kapitalin në ekonomi, për të rifilluar investimet private të brendshme dhe të huaja, që do të krijojnë vende pune, me paga dhe kushte dinjitoze, që kuksianët dhe gjithë shqiptarët, të mos e braktisin vendin e tyre, mos të braktisin qytetin e tyre, mos t’ii braktisin fshatrat e tyre.

Ne i kemi këto plane dhe unë kam pasur nderin dhe privilegjin, të shpalos një pjesë të tyre, krah për krah ekspertëve që na mbështesin nga e Gjermania dhe e gjithë Europa demokratike, për ta nxjerrë Shqipërinë nga kriza.

Hapi i parë do të jetë:

Ulja me 300 lek e çmimit të karburantit.
Heqja e taksës korruptive Rama, mbi karburantin, e cila do të mundësojë që prodhimet dhe mallrat shqiptare të kthehen edhe njëherë në fashën e konkurrencës e cila do të mundësojë që ekonomia të fillojë të lëvizë më lirshëm, duke ulur koston dhe duke rritur xhiron e konsumit të shqiptarëve, duke krijuar vende pune, dhe duke mundësuar mirëqenie përmes punësimit.
Energjia elektrike, masakra tjetër e Edi Ramës, po kështu do të njohë një politikë të re. Të paktën 20 për qind do të ulet çmimi për biznesin e vogël 30%-40% për biznesin prodhues dhe do të vendosen fashat mbrojtëse që Edi Rama hoqi për popullsinë, sepse energjia nuk është paja e Edi Ramës, energjia është pasuria e shqiptarëve. Ne do të bëjmë të mundur që asnjë shqiptar, të mos mbetet pa energji, pavarësisht kushteve ekonomike.
Ne, do të vendosim një taksë minimale prej 0.5% të xhiros vjetore, për të gjithë biznesin me xhiro nën 140 milion lek të vjetra në vit, dhe kjo do të jetë taksa e vetme, që biznesi i vogël do të paguajë. E gjitha do të shkojë për pushtetin vendor, por as pushteti vendor nuk do të ketë të drejtë të vendosë asnjë taksë tjetër.
Ne do të vendosim një pullë, në premisat hyrëse, vitrinë, derë apo dritare, që asnjë inspektori të mos i shkojë mendja të shkojë e të terrorizojë biznesin. Sepse biznesi i vogël, është punësuesi dhe vetëpunësuesi më i madh dhe është kjo pjesë e ekonomisë që jep besim në prodhim, jep besim në ekonomi dhe krijon një klimë pozitive. Mundëson punësim dhe jo shpunësim. Sot, 50 biznese në ditë mbyllen në të gjithë Shqipërinë. Mbi 300 biznese janë mbyllur këtu në Kukës, dhe kjo për mua është e papranueshme, është kriminale. Ne do ta ndalim këtë, me politikën më liberale që ka njohur Shqipëria dhe Ballkani. Ndërsa, për biznesin e madh, që gjithashtu është gjenerator pune, ne do të sjellim paketën më konkurruese në rajon; 9% taksë e sheshtë, që është taksa më e ulët që Shqipëria ka pasur ndonjëherë e cila do të mundësojë që bizneset jo vetëm që nuk do të mbyllen e të shkurtojnë vendet e punës, të investojnë këto para që sot ia dorëzojnë Edi Ramës dhe oligarkëve, për të hapur vende pune dhe për të rritur pagat e shqiptarëve të ndershëm, që duan të jetojnë me djersen e ballit.

Unë e di që asnjëri prej jush këtu, nuk kërkon lëmoshë. Ju kërkoni mundësi.

Partia Demokratike dhe unë, jemi të vendosur t’jua japim këtë mundësi kuksianëve dhe të gjithë shqiptarëve të ndershëm dhe punëtorë, përmes lirisë dhe një akti politik, më të rëndësishmin.

Sot shumica punon dhe grabitet nga një pakicë.

Ne do t’i japim fund kësaj.

Ne do ta heqim Shqipërinë nga kthetrat e pesë oligarkëve dhe të Edi Ramës, dhe do t’ia kthejmë gjithë shqiptarëve të ndershëm.

Ne do t’ia kthejmë Shqipërinë, shqiptarëve.

Por, këto janë masa vetëm për stabilizimin e situatës.

Në çdo zonë të Shqipërisë, padrejtësia ka hyrë thellë, askund s’ka hyrë kaq thellë sa në Kukës.

Mbyllja e filialit të Universitetit të Kukësit, ishte një akt kriminal dhe racist.

Hapja e këtij universiteti dhe financimi i tij, për ta kthyer në një qendër të fuqishme të mësimdhënies, të trajnimit të rinisë kuksiane dhe jo vetëm, në një qendër të fuqishme intelektuale universitare, në një promotor të konsumit dhe të rritjes së ekonomisë së Kukësit, në një promotor të vendosjes së Kukësit, në një qendër ekonomike, akademike, midis Tiranës dhe Prishtinës, ku të vijnë e të studiojnë me nder e të diplomohen studentët nga Kukësi, Hasi e Tropoja, por edhe nga Prizreni, edhe nga Prishtina, edhe nga Lipjani.

Është hap kryesor që ne do të hedhim. Dua t’ju them sot, se çdo padrejtësi që keni përjetuar, këto pesë vite e gjysëm të sundimit nga Edi Rama, do të zhbëhet. Do ta zhbëjmë, duke nisur me rihapjen e Universitetit të Kukësit dhe fuqizimin e tij për rininë kuksiane, për gjimnazistët kuksianë dhe të gjithë zonës.

Unë e njoh shumë mirë problemin e mbi 5 mijë familjeve kuksiane, të përmbytura, që tash sa vjet nuk marrin dëmshpërblimin që meritojnë.

Po ju them, siç diskutova me kryetarin dhe anëtarët e shoqatës, se Partia Demokratike dhe unë e kemi studiuar dhe e njohim këtë problem në detaje. Fatura e dëmshpërblimit, është afro 70 milion euro.

Ne kemi parë vetëm këtë vit se si KESH-i ka nxjerrë 70 milion euro fitim, në një vit, dhe se si në 8 orë, vetëm në 8 orë, një kompani që media hetimore sllovene e akuzon si të lidhur me familjarë të Edi Ramës, vetëm në 8 orë, ka fituar 4.5 milion euro me transaksione të dyshimta, me KESH-in.

Tre hapa do të ndjekim, për të trajtuar dhe dhënë fund kësaj padrejtësie:

Së pari, ju garantoj, se një nga aktet e para do të jetë, firmosja e ngritjes së Komisionit Shtetëror për dëmshpërblimin me vlerë tregu, të gjithë banorëve që kanë pësuar nga përmbytja, në zonën e Kukësit

Së dyti, kalimin e një ligji, ku do të sanksionohet se dëmshpërblimi do të bëhet sipas vlerës së tregut.

Së treti, nuk ju premtoj dot se këtë vlerë do ta paguajmë menjëherë, por ju jap fjalën, se qeveria e ardhshme do të bëjë gjithçka që brenda dy viteve, ky dëmshpërblim të paguhet për të gjitha familjet të cilat kanë më shumë se 30 vjet që nuk marrin drejtësinë që meritojnë.

Zonja dhe zotërinj!

Këto pjesë të platformës tonë, e të tjera që kanë të bëjnë me të drejtat e studentëve, me mundësinë që çdo bije dhe bir i juaji, të mos privohet nga mundësia për të shkuar në universitet, për t’u diplomuar, për shkak të pamundësive ekonomike.

Të gjitha këto janë plotësisht të mundura.

E vetmja armë me të cilën Edi Rama sot lufton, është gënjeshtra dhe mashtrimi.

Sepse për Edi Ramën, ato 70 milion euro të dëmshpërblimit të këtyre banorëve, duhet të përfundojnë në xhepat e tij, të oligarkëve dhe të miqve me të cilët i ndan.

Sepse për Edi Ramën, ato miliona që duhet të shkojnë për rikthimin në skemën e ndihmës ekonomike, të atyre që u janë hequr me të padrejtë, duhet t’i marrin vetëm 3-4 koncesionarët e shëndetësisë.

Sepse për Edi Ramën, nuk ka rëndësi se çfarë kosto përballon ky qytet dhe kjo zonë, për shkak të taksës së rrugës së Kombit, për sa kohë që taksa e rrugës së kombit dhe koncesionet e tjera të korruptuara të infrastrukturës, mbushin trajsën e Edi Ramës.

Zgjidhja është e thjeshtë.

T’i japim fund sundimit të Shqipërisë nga pakica dhe ta kthejmë pushtetin dhe ekonominë, në duart e shumicës së ndershme të shqiptarëve.

Tani, dy mënyra ka për ta bërë këtë.

E para kutia e votimit. Por, ju e keni parë, se Edi Rama i frikësuar nga gjykimi popullor, për gjithë këto të zeza që i ka bërë shqiptarëve, e ka asgjësuar procesin zgjedhor.
E dyta është drejtësia. Po ku është drejtësia? Ku është drejtësia? Ku fshihen prokurorët dhe gjyqtarët, kur Gjushi, Gjiknuri, e të tjerë socialistë, kapen gafil duke vjedhur vota me krimin e organizuar?

Të dyja këto kolona të shtetit, kanë rënë!

Prandaj e them dhe e përsëris, se Shqipëria është në kushtet e grushtit të shtetit.

Ne, opozita parlamentare, Partia Demokratike, ka shteruar çdo mundësi.

Mundësia e fundit ishte vettingu politik, që ata e refuzuan.

Prandaj, vëllezër dhe motra, në mbyllje të fjalës sime, dua t’jua them hapur, ndershmërisht, më 16 shkurt nuk kam fjalë të tjera për t’ju thënë.

Me 16 shkurt është gjithçka në dorën tuaj.

Është në dorën tuaj, të derdheni kështu dhe të sillni zemërimin dhe ndershmërinë tuaj, para kryeministrisë.

Është në dorën tuaj, të derdheni dhe të vini kështu, për të çliruar të drejtat tuaja të marra peng.

Një gjë ju siguroj, marrëveshje me Edi Ramën nuk ka për të pasur më kurrë.

Ndaj, ju kërkoj të bëheni pjesë e zgjidhjes.

Ju kërkoj ta merrni në dorë zgjidhjen, ju sepse nuk ka e nuk mund të ketë zgjidhje tjetër, përveç asaj që do të diktojë populli i bashkuar.

Ndaj ju kërkoj, ju ftoj dhe ju pyes: A do të jemi kështu, bashkë në Tiranë, edhe me 16 shkurt?

Populli: Pooooo

Edhe më të shumtë në numër?

Populli: Pooooo

Të vendosur për të hapur një rrugë të re?

Populli: Pooooo

Të lirisë, të mundësive për Kukësin dhe gjithë Shqipërinë?

Populli: Pooooo

Faleminderit!

Zoti ju bekoftë ju!

Zoti e bekoftë Kukësin, Tropojën dhe Hasin!

Zoti e bekoftë Shqipërinë!

08 Shk

Mijëra kuksianë mikpresin Bashën! Në 16 Shkurt të gjithë në Tiranë për t’i dhënë fund izolimit dhe varfërisë.

by PD in Lajmi fundit

Me mijëra kuksianë pritën sot Kryetarin e Partisë Demokratike, Lulzim Basha, duke iu bashkuar me entuziazëm ftesës së tij për të marrë pjesë në protestën e 16 Shkurtit.

Kuksianët shprehën hapur shpresën e tyre tek Lulzim Basha dhe plani i Partisë Demokratike për të nxjerrë Kukësin nga izolimi dhe varfëria.

“Je i vetmi që vjen, na takon dhe na qan hallin, kurse ai tjetri vetëm e ka shpopulluar Kukësin”- u shpreh një banor i Kukësit, ndërsa një tjetër e krahasoi izolimin e Kukësit me Gazën.

“Vendosja e taksës së Rrugës së Kombit na ka izoluar. Ne po jetojmë më keq se minoritetet, se minoritetet kanë të drejta, por ne kemi dy dogana, një në Morinë dhe një në Kalimash” – u shpreh një banor kuksian, duke iu drejtuar Bashës se atë e shohin si të vetmen ndihmë dhe shpresë të tyre.

Kreu i opozitës i garantoi banorët e Kukësit se izolimi i tyre do të marrë fund me qeverisjen e Partisë Demokratike.

“ Çdo padrejtësi që Edi Rama ka bërë ndaj Kukësit, do ta zhbëjmë në javët e para të qeverisjes sonë, duke nisur me anullimin e traut. Taksa për Rrugën e Kombit do të zerohet” – u shpreh Basha.

Kreu i opozitës, bashkë me banorët e Kukësit, dënuan politikën e spastrimit dhe zbrazjes së Kukësit. Një banor i tregoi zotit Basha se nga familja e tij kishin emigruar këto vite 15 anëtarë të familjes së tij, të gjithë të rinj të papunë. Basha tha se zgjidhja e PD për të rikthyer shpresën dhe besimin bazohet në dy drejtime:

Së pari, duke fuqizuar ekonominë.
Së dyti, duke rihapur Universitetin në Kukës.

Masat e stabilizimit të ekonomisë do të jenë të menjëhershme dhe do të rrisin konsumin:

Eliminimi i taksës Rama mbi karburantin, duke e bërë 300 lekë më lirë për litër
Ulje e çmimit të emergjisë elektrike.
Biznese me xhiro nën 140 milionë lek të vjetra në vit, do të hiqen nga TVSH.
Do të ketë vetëm një tatim, 0.5% e xhiros vjetore dhe gjithçka tjetër do të anullohet.

Gjimnazisti Blerim Cena, i cili i tha Kryetarit Basha se shumë nxënës nga shkolla e tij kanë ikur emigrantë, e priti me entuziazëm angazhimin e Bashës për të rihapur Universitetin.

“Rihapja e Universitetit të Kukësit është një nga planet për të ndaluar zbrazjen. Kemi në plan ta kthejmë Kukësin në qendrën e kualifikimeve profesionale sipas modelit gjerman”, tha Basha.

Një nga masat e planit të PD qe banorët e Kukësit pritën me duartrokitje ishte dëmshpërblimi për përmbytjen nga hidrocentrali.

“Ne nuk duam lëmoshë. Duam të na trajtojnë si të barabartë, kemi nevojë për vende pune, jo të na vjedhin me lekët që fitojnë vetë nga hidrocentrali”.

Kryetari Basha tha se vlera e dëmshpërblimit është 71 milionë euro, por kjo nuk do të thotë se nuk ka para, sepse sipas investigimeve, familjarët e Ramës fituan në 8 orë 4.5 milionë euro nga KESH.

Hapi i parë do të jetë ngritja e komisionit për dëmshpërblimin

Hapi i dytë do të jetë vendosja me ligj e dëmshpërblimit sipas vlerës së tregut. “Nuk ju premtoj se do ta bëjmë për një vit, por brenda dy viteve do ta zgjidhim këtë çështje”.

Basha u tha banorëve të Kukësit se “në kushtet e papunësisë, padrejtësisë, pasigurisë, kur kanë mbaruar rrugët politike, qytetarët kanë detyrimin t’i japin vendit zgjidhjen që Edi Rama refuzon t’ia japë, duke pranuar një qeveri tranzitore. Ai ka edhe një javë kohë dhe pas kësaj do të përballet me popullin”.

Fjalëve të një kuksiani, i cili foli për shtetrrethim të Kukësit, Basha iu përgjigj me ftesën për të ardhur në Tiranë më 16 Shkurt.

“Ta rrethoni në Tiranë dhe të tregoni se fuqia është në duart tuaj dhe jo në duart e tyre”.

07 Shk

Basha takon banorët e Tiranës: Biznesi i vogël është detyra e parë e qeverisë sime. Gjithçka do të jetë në funksion të punësimit.

by PD in Lajmi fundit

Basha takon banorët e Tiranës: Biznesi i vogël është detyra e parë e qeverisë sime. Gjithçka do të jetë në funksion të punësimit.

Kohë të vështira, por po i shoh njerëzit më të vendosur dhe më të qartë se kurrë. Ia vlen të bëjmë gjithçka për ta ndryshuar këtë gjendje.

Kryetari i Partisë Demokratike, Lulzim Basha, u takua me qytetarë të Tiranës për t’i ftuar, personalisht, të marrin pjesë në protestën e 16 Shkurtit. Zoti Basha përshkroi në këmbë rrugën e Kavajës dhe rrugën Myslym Shyri, ku u përshëndet dhe bisedoi me banorë dhe tregtarë të zonës. Ata i thanë Bashës se, megjithëse janë ndër rrugët kryesore të Tiraës, kanë ngelur të fundit, sepse “puna është copë-copë”. Tregtarët tregojnë se xhiro është ulur ndjeshëm, ndërsa TVSH-ja është një barrë e re për ta, pasi duhet të paguajnë kontabilist, që e llogarisin rreth 500 mijë lekë të vjetra në vit.

“Biznesi i vogël shikohet nga qeveria si kriminel. Ka taksuar edhe këpucarët, orëndreqësit, të gjithë. Po shkatërron ekonominë edhe me TVSH-në.”-thanë disa tregtarë të tjerë në një treg perimesh.

Basha e njohu çdonjërin prej tyre me alternativën e Partisë Demokratike, e cila, veç të tjerave, garanton anullimin e menjëhershëm të TVSH-së.

“Çfarë janë biznese me xhiro nën 140 milionë lek të vjetra në vit, do të hiqen nga TVSH. Do të keni vetëm një tatim, 0.5% e xhiros vjetore, që do t’i shkojë bashkisë dhe jo qeverisë dhe gjithçka tjetër do të anullohet. Taksat e Bashkisë janë 7-10 fishuar në krahasim me 4 vjet më parë, duke shpikur taksë pas takse. Do të keni pullën fiskale në vitrinë dhe asnjë inspektor nuk do të ketë të drejtë të hyjë në biznesin tënd.”- tha Basha.

Një nga tregtarët shprehu me pak fjalë atë që thotë çdo njeri me një biznes në Shqipëri: “Po mbajtët biznesin e vogël, keni mbajtur çdo gjë, se po punuam ne, punon gjithë Shqipëria”.

Duke e konsideruar biznesin e vogël gjenerator të punësimit, Kryetari Basha theksoi se edhe masat e tjera për heqjen e e taksës Rama mbi karburantin, do ta bëjnë atë 300 lekë më të lirë për çdo litër. Bashkë me uljen e çmimit të energjisë për bizneset dhe për familjarët, lideri i opozitës ka llogaritur që qytetarëve t’u mbeten më shumë para në xhepa, çka përkthehet në më shumë mundësi për investim, më shumë mirëqenie dhe mundësi për hapjen e vendeve të të reja të punës. “Biznesi i vogël është detyra e parë e qeverisë sime. Gjithçka do të jetë në funksion të punësimit”- garantoi Basha tregtarët, nga të cilët mori premtimin se do ta mbështesim me pjesëmarrjen në protestën e 16 Shkurtit.

Qytetarët dhe tregtarët e mikpritën ftesën e Kryetarit Basha për protestën e 16 Shkurtit, si dhe shpjegimin e tij për të fuqizuar biznesin e vogël, për t’u kthyer njerëzve në formën e investimeve, rritjes së pagave dhe pensioneve, të të paktën 2 miliardë taksa që tani ndahen me 3-4 klientë të kryeministrit.

Kreu i opozitës pati rast t’i shpjegonte përparësitë e tjera të programit të PD për biznesin, gjatë një bashkëbisedimi me një sipërmarrës Call Center.

“Do të keni taksë të sheshtë 9%, tatimi i fitimit dhe taksa e kontributit shoqëror do të jetë 9% për punëdhënësin, 9% për punëmarrësi.. Çmimi i energjisë për biznesin që prodhon ulet me 30-40%, për biznesin e vogël dhe për konsumatorët 20%”-shpjegoi Basha.

Kryetari Basha u ul në një bar me një grup pensionistësh, të cilët i kërkuan mbështetje dhe rritje për pensionet, pasi këto vitet e fundit ndjejnë braktisje nga qeveria.

“E njoh gjendjen shumë mirë dhe në planin tonë është rritja e pensioneve. Të dy prindrit i kam pensionistë dhe pa ndihmën time, si shumica, e kanë të pamundur të mbyllin muajin. Por kanë shumë që nuk ndihmojnë dot. Është krim që ata të ushqehen vetëm 1 herë në ditë, vetëm se këta të babëzitur duan të marrin gjithçka për vete”- u shpreh kryetari i PD.

Një nënë iu ankua për pamundësinë për ta çuar vajzën në universitet, për shkak të tarifave të larta. Po ashtu dy prindër, që kishin në pronësi një dyqan të vogël kishin të njëjtin shqetësim.

“Për studentët nga familjet me të ardhura nën 640 mijë lekë, ne do t’i heqim tarifat univeristare, për studentët nga famlljet me mbi 640 mijë lekë në muaj, do t’i përgjysmojmë tarifat. Paratë do t’ua marrim koncesioneve korruptive dhe do t’i çojmë për rininë dhe studentët”- tha Basha, i cili i ftoi prindrit të vijnë bashkë me fëmijët në protest në datën 16.

“Kohë të vështira, por po i shoh njerëzit më të vendosur dhe më të qartë se kurrë. Ia vlen të bëjmë gjithçka për ta ndryshuar këtë gjendje, se po e bëjmë për njerëzit tanë, për prindrit, për fëmijët, për të nesërmen e këtij vendi.”- u shpreh Basha duke u dhënë kurajo banorëve të Tiranës për të marrë pjesë në protestën e 16 shkurtit si mundësia më e mirë për ndryshim.

306 307 308…309 312 315 318 321 324 327 330 333 336 339 342 345 348 351 354 357 360 363 366 369 372 375 378 381 384 387 390 393 396 399 402 405 408 411 414 417 420 423 426 429 432 435 438 441 444 447 450 453 456 459 462 465 468 471 474 477 480 483 486 489 492 495 498 501 504 507 510 513 516 519 522 525 528 531 534 537 540 543 546 549 552 555 558 561 564 567 570 573 576 579 582 585 588 591 594 597 600 603 606 609 612 615 618 621 624 627 630 633 636 639 642 645 648 651 654 657 660 663 666 669 672 675 678 681 684 687 690 693 696 699 702 705 708 711 714 717 720 723 726 729 732 735 738 741 744 747 750 753 756 759