Blog

Fjala në Kuvend e Kryetarit të Grupit Parlamentar Edmond Spaho

Nga sa na ka njoftuar kryeministri ynë me statuset e tij të cilat i nxjerr si simitet nga furra, ai ka fituar një betejë 72 orëshe me dallgët dhe BE na paska hapur negociatat për anëtarësim. Pas shtyrjes së negociatave në Dhjetor 2013 dhe “hapjes” me kushte të negociatave në Qershor 2016, tani në Qershor 2018, “shkëmbi i granitit” në buzë të Adriatikut, fitoi një betejë tjetër duke iu “hapur” negociatat, ndoshta në Qershor 2019. Në haremin qeveritar shpërtheu shampanja, gëzimi derdhet lumë, valon darja dhe gërneta, ca të huaj thonë që kjo është fitorja më e madhe e arritur nga Rama që nga kanabizimi i vendit në 2016, kurse Ditziu falenderon Europën që negociatat nuk u hapën. Por cila është e vërteta? Në Qershor 2016 Evropa na vuri 5 kushte dhe shpresonim që negociatat do të hapeshin pas një viti, pra në 2017. Sot në 2018 na kanë vënë 13 kushte dhe shpresojmë se ndoshta hapen në 2019-ën. Kemi humbur 3 vjet nga “hapja” e vitit 2016 dhe 6 vjet nga viti 2013 kur Rama me Rilindjen e tij erdhi ne pushtet. Të gjithë e dinë që në 2019 as bëhet fjalë që të hapen negociatat me Shqipërinë. Me këtë kryeminister dhe qeveri, mundësia më e parë është pas zgjedhjeve të vitit 2021. Cilat kushte nuk plotësoi qeveria dhe për pasojë iu mohua hapja e negociatave kushte për të cilat opozita ka kohë që insiston.

1.     Korrupsioni.  

Paratë e shiptarëve vidhen sheshit dhe askujt nuk i hyn gjëmb në këmbë. Me PPP janë vjedhur qindra milionë euro dhe janë planifikuar të vidhen qindra milionë të tjera. Konçesionet në shëndetësi, projektet e Rilindjes urbane, po shoqërohen me konçesionet në infrastrukturë si “Rruga e Arbrit”, inceneratorët, Aeroporti i Vlorës, shoqëria ajrore AirAlbania, ndërtimi i “Stadiumit Kombëtar” dhe një sërë projektesh të tjera me të cilat thithet edhe pika e fundit e gjakut të një populli të varfër.

2.     Krimi i organizuar dhe mpleksja në mënyre të pazgjidhshme me qeverinë e Edi Ramës.

Një qeveri e cila pak kohë më parë kishte Ministër të Brendshëm Sajmir Tahirin të lidhur me bandat kriminale të Vlorës që drejtoheshin nga kushërinjtë e tij. 5 milion euro në muaj fitonte Sajmir Tahiri si mbrojtes i bandave ose rreth tre Toyota Yaris me euro në muaj. Rreth 7 Toyota Yaris me euro shpenzonte Sajmiri për të vjedhur dhe manipuluar zgjedhjet.

Tani është koha të rishtrojmë disa pyetje:

·        Për ekstradimin e Nezar Seitit di kush të thotë, kush e pati fajin: Prokuroria apo Ministria e Drejtësisë? Sepse ka filluar nje hetim i cili duhet të hetoje ca fakte të thjeshta të cilat mund të vërtetoheshin në disa ditë por që në të vërtetë hetimi do mbarojë në kalandat greke.

·        Kush ndërhyri për lirimin e Sajmir Tahirit në gjykatë që ju akuzoi ambasadorin amerikan, mund të na e thoni? Pas Sajmirit erdhi Fatmiri i cili nuk kishte kushërinjtë por vëllain të përzier me banditët.

·        Di të thotë njeri përse nuk erdhi ekspertiza e audiopërgjimit dhe ku është i ashtuquajturi aktor që bëri audiopërgjimin?

·        Di të thotë njeri, se çfarë u bë me ato 613 kg kokainë? Perveç dy çirakëve dhe atij të kapur në Gjermani ka dalë ndonjë emër tjetër?

·        Kush ishte grupi që e porosiste, e priste, e paketonte dhe e shpërndante drogën nëpër Europë dhe shpëlante paratë? Kjo histori është harruar, çudia më e madhe 3 ditë zgjat në Shqipëri.

3.     Pastrimi i parave. 

Shqipëria është kthyer në lavatriçen më të madhe në Europë të pastrimit të parave të krimit të organizuar, jo vetëm atij shqiptar por edhe ndërkombëtar. Doni shembuj?

3,6 milione euro ne dy Toyota Yaris. Por kur me nje Toyota me bagazh të vogël pastrohen pothuaj 2 milion euro, po me nje kamion të madh me rimorkjo sa milion euro pastrohen? E ekzagjeron opozita thonë daullet e Edi Rames. Po shvlerësimi i euros si shpjegohet?

Kur ne shpjegonim vjet rënien e euros me paratë që u përdorën për manipulimin e zgjedhjeve, Rama zgërdhihej. Po sot çdo të thotë? Sa kamionë me euro kanë hyrë që kursi i këmbimit ra me 200 lek si kurrë më parë. Dhe i lutem ekspertëve të kazanit që të na i kursejnë shpjegimet për rënien e kursit të euros me turistët.

Nëse nuk pastrohen para, si shpjegohet rritja 300% e lejeve të ndërtimit në Tiranë? Me se po ndërtohen kullat, ku gjenden paratë? Sistemi bankar nuk ka rritur asnjë cent kredinë për sektorin e ndërtimit. Di të më thotë kush nga vinë paratë dhe si ta kuptojmë termin “ Ndërtimet realizohen me vetëfinancim”?

I vetmi shpjegim për to janë paratë e krimit dhe të drogës. A është e përzierë qeveria në këtë pastrim masiv të parave të krimit shqiptar dhe atij ndërkombëtar?

Kokë e këmbë duke filluar nga vete Edi Rama. Idea e ndërtimit të hoteleve  me 5 yje në bregdet dhe në Tiranë dhe heqja e taksave per ta është ide e tija dhe shpërblim që po i bën vetes dhe narkotrafikut.

4.     Kanabizimi i vendit.  

Shqipëria ka qenë dhe vazhdon të mbetet hambari më i madh i Evropës për kanabis. Ata që thonë që është eleminuar kultivimi i kanabisit por po trafikohen stoqet e viteve të kaluara thjesht gënjejnë.

Të vërtetën e tha nje general i policisë italiane për gazeten franceze “Liberation”: “Kemi bërë analizat e dhjetëra tonëve kanabis të kapura në brigjet e Italisë së jugut dhe na rezulton që është prodhim i 6 muajve të fundit”. Lufta që gjoja Edi Rama po i bën kultivimit të kanabisit është një farsë. Nuk ka si të jetë ndryshe kur ai është ideatori dhe realizuesi i idesë më shkatërruese siç është kanabizimi i tërë vendit në bashkëpunim me rrjetet ndërkombëtare të drogave. Kanabizimi i Shqipërisë dhe heshtja ndaj kësaj masakre që ju bë një kombi të tërë është turpi dhe faji i atyre që e panë dhe nuk folën.

5.     Kthimi i Shqipërisë në vendin e parë që dërgon azilantë në Evropë. 

Si mund të pranohemi në Europë kur problem i parë që ka Europa është ndalimi i emigrantëve dhe azilantëve. Çfarë standardesh politike, ekonomike dhe shoqërore ka një vend i cili renditet i pari në listën e vendeve që dërgojnë më shumë azilantë në BE. Zero standarde ka vendi i cili renditet në një vend të tillë. Si mund të pretendojë Edi Rama që ka plotësuar standardet kur gjatë 5 viteve të qeverisjes së tij 157 mijë shqiptarë kanë kërkuar azil në vendet e BE? 5% e popullsisë kërkon azil gjatë një periudhe 5 vjeçare dhe vendi pretendon të ketë kryer reformat dhe të hyjë në BE. Për të qeshur dhe për të qarë!

6. Kapja e të gjithë pushteteve dhe heshtja ndaj kthimit të Edi Ramës në një diktator të ngjashëm me ata të Lindjes së Mesme.

Sot Shqipëria nuk ka Prokurori. Kemi një Prokurore të Përgjithshme të përkohshme e cila thuhej që do rrijë në funksion deri në Prill, por vetëm viti i cilit Prill nuk dihet ende. Krimi lulëzon nga të katër anët dhe Prokurorja e Përgjithshme e Përkoheshme bën sehir. A u gjet kush e vodhi Prokurorinë e Durrësit dhe korrespondencën e saj në Postë? Shqipëria që do të hyjë në Evropë është pa Gjykatë Kushtetuese dhe pa Gjykatë të Lartë. Të na falë Afrika se na ka ngelur zakon të themi që as në Afrikë nuk ngjet kjo kur në fakt ne jemi me vite larg Afrikës. Qeveria jonë mund të bëjë ç’të dojë dhe askush nuk ka ku të ankohet. Media është venë e gjitha nën kontrollin e pushtetit dhe me dëshirë të plotë i bije vetëm gajdes së Edi Ramës. Pronarët e mediave shohin veçse për leje ndërtimi. Kryeministri ka stacionin e tij privat ku derdh diarenë e përditshme për të trrullosur popullin e tij. Shoqëria civile inekzistente, jargavitet veçse për fonde dhe të drejtat LGBT. Për para të zezës i thotë e bardhë dhe të bardhës e zezë. Për ta mbyllur po i referohem se çfarë tha Rojter për hapjen e negociatave për Shqipërinë: “Vetëm duke parë progresin e bërë qershorin e ardhshëm dhe pas një tjetër Raporti të Komisionit Europian, qeveritë e BE-së mund të vendosin për çeljen e negociatave të antarësimit në fund të vitit të ardhshëm. Këto dhe të tjera janë arsyet përse Europa nuk na hapi negociatat. Ne keto kushte te degjosh Kryeministrin te thote fituam nje beteje me dallget dhe Ministrin e Jashtem te thote sot eshte nje dite e mire per Shqiperine nuk mund te mos ju drejtohesh me fjalet e Shvejkut: Mire qe u cmendet te gjithe por pse ne nje dite?

Mungesa e shkarkimeve të ujërave nëntokësore, të punimeve në shesh, janë bërë shkak i përmbytjes dhe shkatërrimit të qindra titujve dhe materialeve në Bilbiotekën Kombëtare dhe në Arkivin e Bashkisë së Tiranës.

Denoncimi i bërë publik nga deputetët e Partisë Demokratike Romeo Gurakuqi dhe Hekuran Hoxhalli, vë në dukje një tjetër skandal të investimeve nga Bashkia Tiranë.

“Punimet në shesh, përballë hyrjes së Bibliotekës ka bllokuar rrjedhjen e ujërave nëntokësore”, tha z.Gurakuqi i cili theksoi se i është drejtuar parlamentit me kërkesa të vazhdueshme për një Bibliotekë të re Kombëtare dhe të një Arkiv Qëndror modern.

“E kam kërkuar disa herë në Parlament dhe gjatë diskutimit të buxhetit të shtetit, por kemi hasur në vesh të shurdhët”, tha Gurakuqi.

Deputeti Hekuran Hoxhalli theksoi se qeveria po mundohet të shesë idenë se përmbytja erdhi nga reshjet e shiut, por e vërteta është krejtësisht tjetër, tha ai.

“Përmbytja me themel e Bibliotekës Kombëtare shkaktar ka investimet pa kushtin bazë në shesh, shkarkimin e ujërave, të cilat mungojnë. Kjo është arsyeja që 20 milionë euro investim, nuk mjaftojnë për të kryer fillimin e çdo pune publike, trajtimin e ujërave të shiut”, tha Hoxhalli, duke kërkuar hetim dhe ndëshkim për këtë abuzim.

Ai theksoi se Kryearkitekti diletant i Shqipërisë, kur “dhunoi” Sheshin Skënderbej nuk e la në duart e ekspertëve të inxhinierisë, por fantazisë dhe kapriçios së tij, tha Hoxhalli.

Biblioteka Kombëtare pas përmbytjes kishte mbyllur të gjitha hyrjet e saj, ndonëse deputetët demokratë kërkojnë prej ditësh të vëzhgojnë nga afër situatën.

Parlamenti Europian në Bruksel diskutoi mbi trashëgiminë kultutore në Europë me praninë e autoriteteve më të larta të Bashkimit Europian si kreu i Parlamentit Antonio Tajani dhe Presidenti i Komisionit Europian, Jean-Claude Juncker. Pjesë e kësaj Konference të nivelit të lartë ishte edhe kryetarja e Komisionit të Kulturës, Albana Vokshi e cila ngriti shqetësimin e shkatërrimit të trashëgimisë kulturore shqiptare. Në fjalën e saj në Parlamentin Europian, Vokshi apeloi për ruajtjen e Teatrit Kombëtar.

“Arsyeja kryesore pse kërkova fjalën është kjo godinë i përket qendrës së qytetit, e ndërtuar nga arkitekti i famshëm Italian Xhulio Berte, e cila qënë për 80 vite Teatri Kombëtar. Aktualisht jemi në javën e tretë të një proteste të përditshme nga artistët para Teatrit sepse qeveria ka vendosur ta shembë. Ne duam të mbrojmë këtë ndërtesë sepse qeveria vendosi ta prishë që ti japë tokën privatit për të ndërtuar kulla të larta. Kam një apel për ju për të shpëtuar këtë ndërtesë por edhe ti kushtoni më shumë vëmëndje vendeve si Shqipëria, për të pasur projekte për ruajtjen e trashëgimisë kulturore, për të lidhur të shkuarën me të ardhmen”, tha Vokshi.

Deputetja shqiptare tha para autoriteteve të larta europiane se trashëgimia kulturore shqiptare është duke u rrënuar.

“Arsyeja pse kërkova fjalën sot është ndarja e një shqetësimi dhe një apel për të gjithë ju. Ndërsa flasim, kati i parë i Bibliotekës Kombëtare është nën ujë pas stuhisë dhe mund të jenë mijëra libra që mund ti humbasim. Me vete kam edhe disa foto, ura e Hoshtovës dhe Orgockës. Këtu kam edhe një manastir mëse 300 vjeçar në jug të vendit që janë zhdukur për shkak të mungesës së vëmëndjes nga autoritetet”, tha Vokshi.

Policia e Shtetit nuk është më më shërbim të qytetarëve dhe nuk ka më objektiv luftën kundër krimit, por mbrojtjen e pushtetit kriminal të Edi Ramës!

Policia e Shtetit është shndërruar në policinë private të Edi Ramës për të mbuluar lidhjet e pushtetit të tij me trafikun ndërkombëtar të drogës dhe pastrimin e parave.

Pasi e vuri policinë në shërbim të trafikut të drogës së ministrit të brendshëm Saimir Tahiri;

Pasi e përdori policinë për të mbuluar dhe për të mbrojtur vëllanë trafikant droge të ministrit të brendshëm Fatmir Xhafaj;

Edi Rama e përdori policinë për të fshehur të vërtetën për lidhjet e Kryetarit të Grupit Parlamentar të Partisë Socialiste, Taulant Balla, me milionat e eurove, para të pista të drogës.

Pasi heshti për 24 orë për kapjen e detyruar të 3.5 milionë eurove të drogës, Policia private e Edi Ramës gënjeu shqiptarët  për rrethanat, në të cilat drejtuesit e saj janë informuar për ngarkesën me Toyota Yaris, që po sillnin në Shqipëri milionat e parave të drogës.

Policia e Shtetit është informuar nga partnerët për çdo detaj, që nga targa e automjetit transportues,  marka e makinave që transportohej, ku gjendeshin paratë dhe deri kush ishte garanti i tyre.

Partia Demokratike deklaron me përgjegjësi të plotë se:

Taulant Balla ishte garanti për hyrjen në Shqipëri pa problem të milionave të drogës, që i përkasin një prej bandave më të rrezikshme të trafikut të drogës që vepron kryesisht në zonën e Elbasanit.

E vërteta është se policia shqiptare ka identifikuar ngarkesën nën presionin e një prej vendeve anëtare të Bashkimit Europian dhe është vënë menjëherë në shërbim të fshirjes së gjurmëve që do të çonin tek pronarët e vërtetë të parave të drogës.

Policia ka vepruar njësoj si në rastin e drogës së Maminasit. Ka bllokuar ngarkesën në Portin e Durrësit, duke mos u lënë partnerëve asnjë mundësi që të ndiqnin se kush do të merrte rreth 3.5 milionë euro, para që vijnë mga shitja e drogës në vendet e Bashkimit Europian.

Ky është bashkëpunimi më flagrant që një polici mund të bëjë me krimin e organizuar, duke konfirmuar plotësisht mbështetjen politike që trafiku i drogës dhe krimi kanë më Shqipëri.

Edi Ramën, Saimir Tahirin, Fatmir Xhafën, Erion Veliajn dhe Taulant Ballën i lidh trafiku i drogës, pastrimi i parave dhe ndërtimi i kullave.

Janë këto para të pista të drogës që po pastrojnë me betonizomin e shfrenuar në Tiranë, me shkatërrimin e Teatrit Kombëtar dhe me ngritjen e kullave në territorin e Teatrit Kombëtar.

Tani, askush nuk ka më dyshime për paralajmërimet e përsëritura të Partisë Demokratike se janë paratë e drogës, qe kanë zhvlerësuar euron në Shqipëri, që mundi i emigrantëve shqiptarë, të cilët u sjellin para familjeve këtu, kushton më pak për shkak të parave të pista të drogës.

Jane paratë e drogës, janë lidhjet e pushtetit të Edi Ramës me krimin që u kanë mbyllur shqiptarëve dyert e Europës.

Për fat të mirë, shqiptarët po binden çdo ditë se e vërteta është me Partinë Demokratike dhe se me Edi Ramën ky vend nuk ka të ardhme!​

• Taulant Balla është garant i miliona eurove para të drogës të kapura në Toyota Yaris, që i përkasin një prej bandave më të rrezikshme të trafikut të drogës.

• Policia shqiptare veproi nën e një prej vendeve partnere, që është skeptik përsa i përket kushteve të Shqipërisë për integrimin europian.

• I vetmi dekonspirim është ai i planit të Taulant Ballës dhe i strukturave brenda Policisë së Shtetit dhe Parlamentit shqiptar për të çuar deri në fund bashkëpunimin me një nga bandat kryesore të drogës së Elbasanit dhe për të futur miliona euro të drogës në Shqipëri.

• Edi Ramën, Sajmir Tahirin, Fatmir Xhafën, Taulant Ballën, Erjon Veliajn i lidh trafiku i drogës, pastrimi i parave, ndërtimi i kullave, siç janë këto të Teatrit Kombëtar.

• Ndërtimi narkoshtetit nga Edi Rama është arsyeja pse këtë javë Bashkimi Europian, vendos që Shqipëria s’i ka plotësuar kushtet për hapjen e negociatave.

Komunikimi me gazetarët i Kryetarit të PD, Lulzim Basha. 

Pyetje: Pas ngjarjes së djeshme janë kuriozë të gjithë të dinë si e mësuat për Toyota-n me një shumë, shumë më të madhe sesa e thatë ju në Parlament?

Basha: Mund t’ju them vetëm tre gjëra.

E para, që Paratë janë të një prej bandave më të rrezikshme të trafikut të drogës, aktive kryesisht në zonën e Elbasanit, por edhe të gjithë Shqipërisë.

E dyta, Taulant Balla kishte marrëveshje për të garantuar hyrjen e këtyre parave pa problem në Shqipëri.

E treta, policia shqiptare ka qenë nën presionin e një prej partnerëve tanë për të vepruar. Është një nga vendet partnere, i cili është skeptik përsa i përket kushteve të Shqipërisë për integrimin në veçanti kundër krimit dhe korrupsionit.

Pyetje: Gjermania apo Belgjika?

Basha: Kaq mund t’ju them. Tre gjëra thashë që do t’ju them dhe jua thashë.

Pyetje: Zoti Basha po shkohet drejt idesë së bojkotit parlamentar nga ana e opozitës?

Basha: Ç’lidhje ka kjo me Toyota Yaris dhe me drogën e Taulant Ballës?

Pyetje: Nisur nga letra më e fundit e kryetarëve të grupeve të opozitës.

Basha: Të rrimë pak tek droga dhe krimi. E di që nuk është temë favorite as e Partisë Socialiste, as e ndërtuesve e as e disa mediave.

Pyetje: Është dekonspiruar?

Basha: Po, sigurisht, është dekonspiruar plani i Taulant Ballës dhe i strukturave brenda Policisë së Shtetit dhe Parlamentit shqiptar për të çuar deri në fund këtë bashkëpunim me një nga bandat kryesore të drogës së Elbasanit dhe për të futur miliona euro të drogës në Shqipëri. Kjo është dekonspiruar pa pikë dyshimi. S’besoj se ju vjen keq, sigurisht që jo. Çështja është fare e thjeshtë.

Kemi një Ministër të Brendshëm, kokën e trafikut të drogës, që del e shëtit me kalë, sepse e ka liruar Edi Rama, kryeprokurori, kryegjyqtari aktual.

Kemi Ministrin tjetër të Brendshëm që përpiqet nga mëngjesi deri në darkë të justifikojë vëllain e tij trafikant droge.

Tani, kemi kryetarin e Grupit Parlamentar të Partisë Socialiste, Sekretarin e Partisë Socialiste, i cili merret me pastrimin e parave të drogës.

E kam thënë dhe dua ta përsëris. Nuk jemi më në fazën e kanabisit. Kanabisin ia kanë lënë gjynahqarëve. Kanë kaluar tek kokaina dhe heroina. Tani kanë kaluar tek pastrimi i parave të pista. Ja çfarë ndodh. 1 milionë e 500 mijë euro ka qenë pakti. Të shikojmë sesa është komunikata zyrtare e policisë dhe marrëveshja është garantuar nga Taulant Balla. Ky ka hyrë garant. Këtë mund t’ju them unë sot, sepse jam i sigurtë që këtë pastaj e vërtetojnë faktet dhe koha, siç i ka vërtetuar deri më sot, të gjitha siç ju kam thënë.

Pyetje- Taulant Balla ju tha atë ditë që nuk…

Basha  – Taulant Ballën mund ta pyesni vetë. Nuk jam këtu për të komentuar deklaratat e një personi që sot duhet të ishte para drejtësisë për shumë çështje dhe jo vetëm për këtë. Por çështja më e thjeshtë është kjo. Ku do të shkojnë këto para? Se gjërat lidhen. Çfarë e lidh Sajmir Tahirin, Fatmir Xhafën, Talant Ballën, Erjon Veliajn, çfarë i lidh këta të katërt, përveç Edi Ramës, bosit të bosëve, çfarë i lidh? I lidh trafiku i drogës, pastrimi i parave, ndërtimi i kullave

E gjithë kjo që bëhet, edhe zallamahia që bëhetpër të rrëmbyer tokën e teatrit për të ndërtuar kullat, ato kulla do të ndërtohen për të pastruar këto para të krimit.

Kjo është gjëma që ka ndërtuar Edi Rama në Shqipëri. Kjo është arsyeja pse këtë javë Bashkimi Europian, përkundër dëshirës së 97% të shqiptarëve, përkundër punës që ne kemi bërë si opozitë, prapë se prapë vendos që Shqipëria s’i ka plotësuar kushtet. Sepse kushti themelor është të ndërtojë një shtet të së drejtës dhe jo një shtet të drogës, jo një narkoshtet. Kushti themelor është të ndërtojë një ekonomi me shanse për të gjithë dhe jo një ekonomi të pastrimit të parave të pista të drogës, ku pesë banda kriminale dhe pesë oligarkë kontrollojnë të gjithë ekonominë. Biznesi i vogël dhe i mesëm është në kolaps, profesionistët janë në arrati, mediat janë të kapura, rinia është e pashpresë.  Ky është treguesi.

Unë merrem me anën politike. Unë e kuptoj dëshirën që unë të merrem me anën policore dhe të prokurorisë, se këtu policia dhe prokuroria kanë përfunduar aty ku kanë përfunduar, por këtë nuk mund ta bëj unë. Këtë do ta bëjë do ta bëjë shteti që do ta ndërtojmë bashkë me shqiptarët nesër.

Sot merrem me anën politike dhe ana politike është kjo: kanë kaluar nga kanabisi i Sajmir Tahirit, tek kokaina e heroina e Xhafajt me shokë, tani tek pastrimi i parave të pista të drogës nga Sekretari i Përgjithshëm i Partisë Socialiste dhe kryetari i Grupit Parlamentar Socialist. Ku do të shkojnë këto para? Këtë pyetje duhet të bëni sot. Ku do të shkojnë këto para, përveçse tek kullat e Erjon Velisë? Ku tjetër do të shkojnë këto para të drogës? Sa biznese do të shkatërrojnë, sa vende pune do të mbyllin? Sa viktima do të shkaktojnë? Sa shqiptarë do të largojnë nga vendi? Për sa kohë do t’ia mbajnë të mbyllura dyert e Europës? Këto janë pyetje që duhet të na mundojnë dhe për të cilat duhet të gjejmë zgjidhje dhe përgjigje.

Faleminderit!

Partia Demokratike depozitoi në Prokurori 3 prova të reja për paligjshmërinë e veprimeve të Edi Ramës, Lindita Nikollës dhe Ogerta Manastirliut për shkeljen e ligjit me mbledhjen e të dhënave personale, me qëllim përdorimin e tyre për qëllime elektorale.

3 provat janë përgjigjet zyrtare të Komisionerit për të Drejtën e Informimit dhe Mbrojtjen e të Dhënave Personale, që vlerëson të paligjshme urdhrat e nxjerrë nga Ministret Manastirliu dhe Nikolla.

Dokumentat e publikuar më herët nga PD provojnë se aktiviteti i paligjshëm e ka burimin nga Zyra e Kryeministrit, që ka urdhëruar mbledhjen antikushtetuese të të dhënave për prindrit e nxënësve dhe pacientët ose rreth 80% e elektoratit.

Edi Rama, Lindita Nikolla dhe Ogerta Manastirliu u paditën nga Grupi Parlamentar i PD për veprat penale të “shpërdorimit të detyrës” dhe “përdorimit të funksionit publik për veprimtari politike apo zgjedhore”.

Megjithëse padia është dorëzuar që në 8 Maj 2018, deri tani nuk ka asnjë veprim të prokurorisë pët të hetuar aktin antiligjor të kryeministrit dhe dy anëtarëve të tjerë të kabinetit qeveritar.

Me ftese te Junge Union (forumi rinor i CDU/CSU) dhe Fondacionit Konrad Adenauer Stiftung, delegacioni i FRPD kryesuar nga kryetari Belind Kelliçi zhvilloi nje vizite zyrtare ne Berlin. Gjate kesaj vizite z. Kellici pati takime me: z. Florian Feyerabend, Drejtor per Europen Juglindore prane Konrad Adenauer Stiftung, z. Hans-Joachim Falenski, Keshilltar per Marredheniet me Jashte i CDU/CSU, me z. Paul Ziemiak, Kryetar i Junge Union dhe anetar i Komisionit te Marredhenieve me Jashte ne Bundestag dhe Mark Hauptmann, Kryetar i grupit parlamentar te deputeteve te JU ne Bundestag, etj.

Zhvillimet politike ne Shqiperi, sfidat me te cilat perballet rinia, duke nisur nga situata ekonomike, arsimi e deri tek emigrimi, organizimi i Akademise Politike te FRPD, si dhe ikja e trurit nga Shqiperia, ishin ne qender te bashkebisedimit.

Z. Kellici shprehu shqetesimin per krimin qe ka kapur shtetin, korrupsionin e perhapur ngado dhe pastrimin e parave te droges nepermjet PPP-ve. Promovimi i personave me rekorde kriminale ne poste kyce ne administrate, ne parlament, pushtet vendor dhe qendror, ka demotivuar te rinjte dhe ka ulur besimin tek politika ne Shqiperi. Beteja e bere nga PD qe solli miratimin e ligjit te dekriminalizimit, solli largimin nga parlamenti dhe pushteti vendor te shume personave me rekorde kriminale, por serish mjaft te tjere vazhdojne te mbajne poste te rendesishme.

Rasti i ministrit te brendshem Fatmir Xhafaj, vellai i te cilit eshte i denuar me 7 vjet burg per trafik droge ne Itali, si dhe lirimi i Saimir Tahirit,  i konsideruar si peshk i madh nga cdo nderkombetar, jane raste flagrante te cilat kane nje ndikim tejet negativ ne rrugetimin e Shqiperise drejt BE.

Ceshtje te rendesishme te diskutuara ne takime kane qene dhe te rinjte te cilet shohin si shprese vetem emigrimin per shkak te papunesise, kriminalizimit te shtetit si dhe tarifat e paperballueshme te edukimit te larte ne Shqiperi.

Drejtuesit e FRPD diskutuan gjeresisht per thellimin e bashkepunimit mes FRPD dhe Junge Union edhe me Philip Müller, sekretar i pergjithshem i Junge Union dhe me perfaqesues te tjere te Junge Union dhe politikane rajonale si Tim Christopher Zeelen Mda, Dr. Adrian Haak, Stefan Gruhner dhe Hannah Niemeyer.

Drejtuesit e FRPD zhvilluan gjithashtu takime dhe ne qytetin e Dresdenit me Sekretarin e Pergjithshem te CDU per Shtetin e Saksonise, Aleksander Dierks Mdl dhe Kryetarin e Junge Union, Tom Unger. Se shpejti drejtues te larte te CDU dhe Junge Union do te vizitojne Shqiperine per te forcuar edhe me tej marredheniet tona te bashkepunimit.

​

Deklaratë e deputetes Jorida Tabaku 

Që nga shtatori 2013 ka vetëm një lajm të sigurtë, taksat rriten çdo vit, por  rritje pagash e pensionesh nuk ka. Për pesë vite me radhë Rama ka rritur çdo taksë të mundshme për qytetarët, bizneset, studentët e deri tek pensionistët.

Sa herë që Rama përbetohet se 97% e shqiptarëve paguajnë më pak, aq herë ai gënjen dhe, po aq herë, ai u vjedh shqiptarëve para nga xhepat e tyre duke shpikur taksa dhe tarifa.

Barrës së rëndë të taksave të rritura iu shtua këtë vit TVSH-ja për biznesin e vogël, por edhe taksa e rritur për pronën. Sot, një biznes paguan mesatarisht 230 mijë lekë më shumë taksa për pronën sesa katër vite të marra së bashku.

Një biznes në qytetin e Tiranës për vitin 2018 paguan taksë prone të rritur nga qeveria socialiste, 510 mijë lekë ndërkohë që nga viti 2015 e deri në vitin 2017 taksa e pronës në total kishte vlerën e 282 mijë lekëve.

Siç edhe duket qartë, një biznes për një hapësirë prej 20 metra katrorë pagesa i është dyfishuar. Në vitin 2015 paguante prej 56 mijë lekë, ndërsa sot, për të njëjtën godinë, paguan 128 mijë lekë.

Mbi 100 mijë biznese vuajnë sot dyfishimin e kësaj takse, ndërkohë që nga viti 2015 pushteti i bashkisë Tiranë ka përdorur të gjitha format për të rritur jo vetëm taksat e tarifat, por edhe çmimin e ujit.

Në 4 muaj, 5834 biznese kanë ulur qepenat. Për vitin e shkuar ky bilanc ishte me 3 mijë biznese të mbyllura më shumë se sa ato që u hapën.

Qeveria e një grushti oligarkësh që, siç nuk ka ndodhur kurrë më parë, prodhon ligje me emrat e tyre, me rritjen e taksave, merr nga xhepat bizneseve dhe qytetarëve 2 miliardë Euro më shumë.

Brenda 5 viteve në pushtet, Edi Rama, që premtoi uljen e taksave për 97 përqind të shqiptarëve,

• Rriti taksën e qarkullimit me 150%,
• Rriti tarifat e arsimit të lartë me 30%,
• Rriti energjinë elektrike me 24% për treçerekun e rriti familjeve
• Rriti tatimin mbi të ardhurat personale me 23%,
• Rriti tatimin mbi fitimin nga 10% e rriti në 15%.

Qeveria socialiste dhe kryeministri Rama e kanë shndërruar mekanizmin e politikës fiskale në një armë me të cilën godasin pa mëshirë biznesin e ndershëm dhe amnistojnë dhe u falin taksa oligarkëve pranë tyre. Kjo qeveri ka përkëdhelur dhe u ka falur taksat atyre që sot ndërtojnë kullat e betonit në qendër të qyteteve, që betonojnë bregdetin tonë ndërsa godet me kamzhikun e taksave xhepat e tregtarëve dhe biznesit të ndershëm.

Partia Demokratike deri në minutën e fundit u përpoq të jepte zgjidhje dhe propozime konstruktive, ku megjithëse nuk ishim dakord me vlerën e lartë, i kërkuam qeverisë të fillojë më vonë zbatimin, të krijojë databazën, të ketë një periudhë lehtësimi me taksë të reduktuar, por të gjitha u refuzuan.

Sot, qeveria dhe oligarkët kanë krijuar aleancën që punon vetëm në interesin personal. Për to çdo frymë e gjallë e këtij vendi do të taksohet rëndë si e si për të mbushur arkat e tyre personale me paratë e djersës dhe mundit të qytetarëve.

Partia Demokratike fton biznesin të denoncojë këtë taksë abuzive, e cila sot po faturohet në mënyrë afrofe, pa një regjistër pronash.

Në qendër të platformës tonë është taksa e sheshtë që do t’i japë frymë ekonomisë e do të ndihmojë biznesin e ndershëm të dalë nga asfiksia dhe të rritet pa gjobëvënien e shtetit.  Ne qëndrojmë fort për uljen e taksave për çdo qytetar dhe çdo biznes, pasi besojmë se çdo lek më shumë në xhepin e qytetarëve është më i dobishëm sesa në xhepat e qeverisë.

Seanca parlamentare e datës 21.06.2018, shënoi një akt të paprecedentë në historinë e Parlamentit Shqiptar.

Edhe pse deputetët e opozitës kishin regjistruar në sekretari kërkesën e tyre për të diskutuar për çështjet e përfshira në rendin e ditës, Kryetari i Grupit Palamentar të Partisë Socialiste, pasi njoftoi tërheqjen nga diskutimi të të gjithë deputetëve të mazhorancës, i kërkoi Kryetarit të Kuvendit që të ndërpriste diskutimet e deputetëve dhe të kalonte menjëherë në votimin e pikave të rendit të ditës. Një kërkesë e tillë, e padëgjuar kurrë më parë, nuk ka asnjë mbështetje ligjore dhe mohonte të drejtën e deputetëve të opozitës për të diskutuar.

Kryetari i Kuvendit në kundërshtim flagrant me Kushtetutën dhe Rregulloren e Kuvendit, hodhi në votim kërkesën për të ndërprerë diskutimet, e cila u miratua po nga mazhoranca, duke i mohuar kështu të gjithë deputetëve të opozitës të drejtën e tyre kushtetuese dhe ligjore për të diskutuar në seancë plenare, edhe pse ato nuk ishin tërhequr nga diskutimi.

Ky akt i paprecedentë për Parlamentin Shqiptar, ku hidhet në votim dhe miratohet një propozim për t’i hequr të drejtën e fjalës opozitës, shënon një tjetër rekord të errët dhe antikushtetuese në veprimtarinë e Kuvendit të Shqipërisë. E drejta e fjalës së deputetëve të opozitës, si përfaqësues të popullit, është një e drejtë e pa mohueshme dhe që nuk varet në asnjë rrethanë apo arsye nga vullneti i mazhorancës. Ky akt bën nul seancën e sotme plenare dhe të gjitha vendimet e marra, pa lejuar diskutimin e deputetëve mbi to, dhe për pasojë seanca plenare duhet të rimblidhet me të njëjtin rend dite.

Nëse mazhoranca, për shkak të numrave në Kuvend, merr vendime se kur duhet të flasë apo nuk duhet të flasë opozita, atëherë akte të tilla shënojnë fundin e parlamentarizimit dhe dhunim më flagrant të demokracisë funksionale në vend.

Ne Kryetarët e Grupeve Parlamentare të opozitës, shprehim shqetësimin tonë të thellë për këtë akt të paprecedentë në Kuvendin e Shqipërisë dhe për dhunimin brutal që Kryetari i Kuvendit dhe mazhoranca i bëri sot të drejtës së opozitës për të folur në Parlamentin e shqiptarëve. Akte të tilla dëmtojnë në mënyrë të parikuperueshme bashkëjetesën midis mazhorancës dhe opozitës në Kuvendin e Shqipërisë, dhe thellojnë edhe më tej klimin e mungesës së bashkëpunimit konstruktiv midis palëve.

Opozita shqiptare nuk do të tolerojë një dhunim të tillë flagantë të të drejtës së vet kushtetuese për të diskutuar në Parlament, si dhe shpreh të gjithë vullnetin e saj për të mos lejuar degradimin e Kuvendit deri në akte të tilla të paprecedentë për demokracinë në vend. E drejta e fjalës është mekanizimi i vetëm sesi opozita mund të përfaqësojë interesat e qytetarëve në sallën e Kuvendit. Nëse opozitës i mohohet edhe kjo e drejtë, atëherë prezenca jonë në Kuvend shndërrohet në fasadë, që nuk i shërben interesit publik dhe vetë funksionimin normal të Parlamentit.

Me respekt,

Kryetar i Grupit Parlamentar PD

Edmond Spaho

Kryetar i Grupit Parlamentar LSI

Petrit Vasili