Blog

Zonja dhe zotërinj

Të dashur bashkëqytetarë,

Po kthehemi pas një muaji në vendin e krimit. Këtu në ketë sallë, më 18 Dhjetor, maxhoranca e kapur nga krimi dhe e zhytur ne krim, e kthyer ne një ushtri ndihmëse të trafikantëve të drogës, ç’ka mishërohet më mirë dhe më qartë se askush tjetër, se nga Saimir Tahiri, kreu krimin kushtetues, kapi prokurorinë dhe që prej datës 18 Dhjetor në këtë vend janë shembur kollonta ekzistenciale të demoracisë, ndarja e pushteteve.

Njeriu që ka uzurpuar kreun e ekzekutivit, njeriu që udhëheq dhe drejton me grusht të hekurt teatrin e kukullave të grupit të tij parlamentar, të dalë nga vota e trafikuar dhe e blerë e 25 qershorit, është sot edhe kryeprokurori i vendit.

Ky krim kushtetues u paralajmërua nga opozita, u paralajmërua nga PD, sepse rruga që kryeministri ka nisur është rruga drejt një fundit e të paralajmëruar për homologët e tij kudo në botë e kurdo në histori. Kjo është rruga e aleancës me krimin për të marrë dhe mbajtur pushtetin, kjo është rruga e mbrojtjes dhe e garantimit të paprekshmërisë së kriminelëve si prioritet abzolut i një pushteti të korruptuar deri në qelizën e fundit. Dhe e vetmja mënyrë për ta garantuar këtë pushtet, e vetmja mënyrë për të garantuar paprekshmërinë e kriminelëve me të cilët Edi Rama erdhi në pushtet dhe mbahet në pushtet, është kapja e institucioneve, shkelja e Kushtetutës dhe shkelja e ligjit.

Autokracitë nuk kanë rrugë tjetër. Autokratët e lidhur me krimin aq më pak. Kapja e shtetit është forma më e avancuar dhe e fundit e autokracive kriminale para se të shkatërrohen nën peshën e zullumit të tyre. Qëllimet e kapjes së Prokurorit të Përgjithshëm nga Edi Rama janë të qarta për këdo. Edhe më paragjykuesit, edhe më kritikët ndaj qëndrimeve të opozitës, sot i kanë para syve të tyre, dhe për ata që duan të mbyllin sytë para hundës së tyre duhmën e akteve kriminale që kanë pasuar pas kapjes së Prokurorit të Përgjithshëm dhe kurorëzimit të Edi Ramës kryeprokuror. Menjëherë pas këtij akti, Saimr Tahirit iu hoq masa shtrënguese e ndalimit të daljes jashtë shtetit, pasi arrestimi i tij ishte ndaluar nga Partia Socialiste apo më mirë të themi nga votat e diktuara nga krimi në grupin parlamentar të PS.

I dyshuari për pastrim të parave të Saimir Tahiri, Orest Sota, i kapur në flagrancë me 863 mijë euro, u lirua dhe nuk është sot në qeli. Nga ana tjetër, po bëhen sforco dhe përpjekje të mëdha për të ndaluar hetimet në adresë kryetarit të Bashkisë së Durrësit, një njeriu që është shndërruar në simbolin e kapobandës së Durrësit, Vangjush Dakos dhe Qazim Sejdinit dhe klanit të tij, që para disa javësh goditi makinat e polcisë me vullnetin dhe mbrojtjen  e krimit. Ish deputetit të mazhorancës Mark Frroku dhe anëtarëve të grupit të strukturuar kriminal “Xibraka”, fabrikës së kokainës ku ka dyshime të forta për përfshirjen e familjarëve të afërt të Kryeministrit, iu ul dënimi në mënyrë lehtësuse dhe prokuroria nuk mori mundimin ta kundërshtojë. Disa çështje të tjera të trafikut të drogës dhe të kriminelëve më në zë si Emiljano Shullazi me shokë, kanë marrë kthesa të forta drejt mbylljes apo dështimit të tyre. Këto janë efektet e para, në më pak se 4 javë të kapjes së Prokurorisë dhe vetëemërimit të Edi Ramës Prokuror i Përgjithshëm.

Sot, Prokuroria ka njoftuar zyrtarisht refuzimin për të hetuar aktet kriminale të 18 Dhjetorit, pengimin banditesk të deputetëve të opozitës për të marrë fjalën, falsifikimin e votimit, dhunimin e rregullores.

Zonja dhe zotërinj, të dashur bashkëqytetarë, asnjë nga këto akte e shumë shumë të tjera që kanë ndodhur e do të dalin në dritë nuk janë rastësi por janë veprime të komanduara politikisht dhe rezultat dhe produkt i kontrollit politik të Prokurorisë nga kryeministri. Ndërkohë vendi është në udhëkryqin dhe krizën më të rëndë të 27 viteve.

Shumë raporte ndërkombëtare si ai i CIA-se thonë qartë; Shqipëria është kthyer në një narkoshtet me korrupsion të shfrenuar ndërkohë edhe kriminelët e kanë marrë sinjalin. Vrasjet mes qyteteve, tritoli dhe grabitja e bizneseve, e shtëpive, e qytetarëve është përditshmëri. Sot ka ndodhur një grabitje banke në mes të Tiranës. Dje një atentat në mes të qytetit me një të vdekur dhe një të plagosur. Një tjetër vrasje para pak ditësh në një zonë të populluar të Tiranës. Eksplozivi është bërë pothuaj i përditshëm. Në shkodër u plagosën 8 persona, shumica e tyre qytetarë të pafajshëm. Vetëm në fillim të vitit janë shënuar shpërthime me eskploziv në Vlorë, Krujë, Fushë-Krujë. Grabitja e banesave raportohen në mënyrë të përditshme. E gjitha kjo ndodh sepse krimin e ka marrë sinjalin. Nga njëra anë Edi Rama e ka rilindur policinë me njerëz të inkriminuar, të larguar nga radhët e Policisë nga qeveri paraardhëse socialiste, si eskponentë dhe mbështetës të trafiqeve, të kriminalitetit, dhe të organizatave kriminale të cilët sot kanë për qëllim transportimin e qetë të drogës së shefit dhe jo jetën dhe pronën e qytetarëve që kërcënohet çdo ditë.

Ekonomia është në kopals. Edhe burimet zyrtare nuk e fshehin dot depresionin në të cilën ndodhet biznesi, sipërmarrja, prodhimi dhe konsumi. Besimi i bizneseve në të gjithë sektorët e ekonomisë shënoi një rënie rekord siaps vrojtmit të Bankës së Shqipërisë, rënie e cila tejkalohet vetëm nga një rënie tjetër, besimi i konsumatorëve tek ekonomia.

Gjatë vitit 2017, 12 960 subjekte falimentuan me një shpjetësi prej 1 mijë e 80 biznesesh në muaj, apo po të heqim të shunat e të dielat, afërisht 50 sipërmarrje e biznese në ditë të mbyllura gjatë vitit që lamë pas. Vetëm gjatë 11 ditëve të para të këtij muaji, 334 subjekte kanë deklaruar falimentin, mesatarisht 30 në ditë. Ndërsa të dhënat tronditëse nga të dhënat e popullsisë të cilat të ngjethin mishin duket se nuk kanë asnjë impakt e s’mund të kenë asnjë impakt në një qeveri që ka zëvendësuar hartimin  dhe zbatimin e politikave publike me sundimin mafioz dhe mbrotjen e kriminelëve dhe politikanëve të kapur me krimin si prioritet të saj.

Një në 10 fëmijë në Tiranë dhe në gjithë Shqipërinë konsumojnë konsumon vetëm një vakt në ditë. Shqiptarët e kapën një record vitin që mbyllëm. 30 mijë shqiptarë janë regjistruar si azilantë. Në Francë, numri i shqptarëve që ka kërkuar azil është më i madhi krahasuar me çdo grup tjetër krahasuar kryesisht me afrikanë dhe aziatikë, duke ia kaluar edhe popullsisë siriane e cila vazhdon të ndodhet në kushtet e një luftë të tmerrshme civile.

Kjo është fatura që po paguajnë qytetarët kur maxhoranca shkel Kushtetutën për të mbrojtur peshqit e mëdhenj të krimit dhe korrupsionit. Kur kryeministrit i duket një Prokuror i Përgjithshëm për të kontrolluar dhe mbyllur çështjet penale bashkëpunëtorëve të tij më të afërt dhe jo vetëm kaq por por për të diktuar përmes një prokurori të paligjshëm e jo kushtetues edhe formimin e Këshillit të Lartë të Prokurorisë me një qëllim; të shmangë me çdo kusht krijimin e një SPAK-u të pavarur nga kontrolli i kryeministror. Me të vetmin qëllim që struktura e posaçme antikorrupsion, vepra më e rëndësishme e reformës në drejtësi, instrumenti më i rëndësishëm për kapjen dhe vënien para drejtësisë të peshqëve të mëdhenj si kushti kryesor për hapjen e negociatave, t’i përkasë kryeministrit dhe bandës së cilës i ka dalë për zot dhe e mbron me çdo akt dhe me çdo frymë të tij. Ne jemi sot këtu për të regjistruar kundërshtimin tonë të plotë dhe të prerë dhe për t’i bërë një thirrje çdo shqiptari dhe çdo socialisti, të mos vëmë Habilajt, Tahirin dhe krimin mbi Shqipërinë, të mos ta lëmë Shqipërinë dhe as Partinë Socialiste në dorë të habilajve port ë bashkohemi për të rikthyer Kushtetutën, për të rikthyer ligjin pasi pa to nuk ka as parlament dhe as demokraci.  ​

Kryetari i Partisë Demokratike, Lulzim Basha tha në Vorë se një qeveri e zgjedhur nga krimi nuk ka prioritet të zgjidhë problemet e qytetarëve. Basha mori si shembull faturën që mijëra familje shqiptare detyrihen ta paguajnë si këst mujor për energjinë dhe faturën që qeveria paguan për konçesionet që nuk u shërbejnë shqiptarëve, por pasurimit të kryeministrit.

“200 milionë është borxhi total i shqiptarëve ndaj KESH-it. 200 milionë është fatura që shqiptarët paguajnë vit për vit për 5 koncensionarë, për 5 derra të krimit dhe korrupsionit që ndajnë paratë me Edi Ramën. Nuk ka asnjë arsye pse një qeveri që e ka lidhur fatin me njerëzit të mos ndërpresë menjëherë këtë marëdhënie kriminale korruptive, të shlyejë borxhin ndaj KESH-it dhe të çlirojë qindra e mijëra familje shqiptare nga zgjedha e kamatave të padrejta të KESH-it apo nga mënxyra e rritjes së çmimit të ujit.”- u shpreh kreu i opozitës.

Basha tha se një qeveri që nuk ka pakt me krimin, e dalë nga zgjedhje të lira e të ndershme do të kishte prioritet amnistinë për të çliruar qytetarët nga pagesat e prapambetura, dhe për të anulluar vendimet korruptive për vjedhjen e shqiptarëve nëpërmjet konçesioneve.

“Ky është plani. Ky është vendimi. Kjo është vendosmëria e demokratëve. Tu japë shqiptarëve një qeveri e cila paratë nuk i çon tek oligarkët por i çon tek qytetarët. Çmimi energjisë, çmimi i naftës, çmimi i ujit, çmimi i ushqimeve bazë janë shqetësime themelore të njerëzve. Papunësia, varfëria, mungesa e shpresës janë pasojat e drejtpërdrejta të këtyre mënxyrave që janë dhurata dhe prodhimi i vetëm i Edi Ramës për popullin.”- theksoi Basha.

Kreu i opozitës tha se 27 Janari nuk është vetëm nje protestë politike e thirrur nga disa parti, por ajo do të jetë një goditje që shumica absolute e shqiptarëve do t’i japë pakicës që qeveris me krimin.

“Qytetarët në këmbë me pjesëmarrje masive popullore do të jenë mesazhi më i qartë, që do të flasë më qartë se çdo fjalim politik. Se sundimi i krimit, se sundimi i Edi Ramës dhe bandës së tij në Shqipëri kanë marrë fund dhe janë të papranueshëm.”- u shpreh Basha.

Kryetari i Partisë Demokratike vuri në dukje se përmes protestës shqiptarët do të imponojnë largimin e një qeverie ilegjitime dhe krijimin e një qeverie antimafia, e cila do të përfundojë reformën zgjedhore do të çlirojë drejtësinë nga krimi dhe do t’u kthejë shqiptarëve të drejtën për të vendosur me votë të lirë se kush do t’i qeverisë.

Në 105 vjetorin e themelimit të Policisë së Shtetit, Kryetari i Partisë Demokratike, Lulzim Basha vizitoi familjen e Artan Cukut, ish-policit të vrarë për shkak të detyrës. Basha tha se në këtë 105 vjetor “Policia është në një moment tragjik, e tradhtuar nga drejtuesit politikë.” Kreu i opozitës u shpreh se policia është në këtë gjendje për shkak të aleancës së Edi Ramës me krimin. I pyetur për vettingun në polici, Basha tha se “Policia do të pastrohet, kur qeverisja të pastrohet nga politikanët e lidhur me krimin.”

Basha u shoqërua nga deputetët Flamur Noka, Gent Strazimiri, Enkelejd Alibeaj dhe ish-drejtues të lartë të Policisë së Shtetit.

Komisar Artan Cuku, është nderuar nga Presidenti Bujar Nishani me dekoratën “Shqiponja e Artë”.

Komunikimi i plotë i Kryetarit Basha me gazetarët:

Sot në këtë 105 vjetor të Policisë së Shtetit dua t’i drejtoj një mesazh çdo punonjësi  të policisë në detyrë apo në lirim, i cili apo e cila ka punuar me integritet dhe ndershmëri duke iu përmbajtur betimit për mbrojtjen e Kushtetutës, ligjit, jetës dhe pasurisë së qytetarëve.

Me një falënderim të thellë nga zemra, për sakrificën, përkushtimin, trimërinë dhe kurajon me të cilën kanë përmbushur dhe përmbushin detyrat e tyre. E di se në këtë 105 vjetor Policia është në një moment tragjik e tradhtuar nga drejtuesit politikë. Ndodhet në një moment tragjik sepse, nëse më parë kriminelët merrnin arratinë dhe oficerët e policisë ishin në ballë të luftës, sot, kriminelët, janë në krye të kupolës drejtuese të Policisë, Ministrisë së Brendshme dhe institucioneve politike të vendit, dhe janë drejtuesit dhe punonjësit me integritet të policisë që kanë marrë arratinë apo janë ekzekutuar nga dora e krimit, siç janë rastet e njohura të drejtuesit të lartë të Policisë së Shtetit, Artan Cuku, dhjetëra punonjësve të tjerë të policisë të cilët janë  goditur nga krimi për të vetmen arsye, sepse nuk dinin të ktheheshin pas në luftën kundër krimit. Siç janë rastet e Dritan Zaganit dhe kolegëve të tij, të cilët janë detyruar të marrin arratinë dhe të kërkojnë azil politik, pasi denoncuan lidhjet e pushtetit kriminal, lidhjet e Saimir Tahirit dhe shefit të tij politik me bandat më të rrezikshme të trafikut të drogës dhe të krimit. Shqipëria është në këtë gjendje, sepse Policia e Shtetit i është dorëzuar nga politika, nga pushteti i korruptuar i Edi Ramës, i Saimir Tahirit dhe  drejtuesve të tjerë politikë të kësaj aleance me krimin, krimit dhe veprimtarisë kriminale.

Shqipëria është kthyer në një zonë të lirë të krimit, si pjesë e paktit kriminal, midis Edi Ramës dhe  atyre që e ndihmuan të vijë në pushtet me vota të blera, vota të shitura. Ndaj shërbimi më i madh që mund të bëjmë ndaj burrave dhe grave të ndershëm në uniformë është të bashkohemi në një aleancë vlerash, për të shporrur aleancën e krimit në pushtet dhe për të rikthyer edhe një herë drejtësinë çliruar nga krimi, policinë e çliruar nga krimi e cila të mund të kryejë detyrat e saj të larta dhe fisnike. Në këtë 105 vjetor i uroj çdo burri dhe gruaje në uniformë, të gjëjë forcën, të përballet me këtë të vërtetë të dhimbshme dhe t’i bashkohet me shpirt kurajës qytetare që po ngrihet dhe do të ngrihet në aksionin qytetar dhe politikë për t’i dhënë fund aleancës së krimit në pushtet.

Pyetje: Z.Basha si e vlerësoni nismën e z.Xhafa për vettingun në Policinë e Shtetit? Ka hartuar  një projektligj që shumë shpejt do të paraqitet në Kuvend.

Basha: Korrupsioni dhe lidhja e tij me krimin nuk nisi nga rradhët e policisë por nga koka politike e policisë. Nisi nga Saimir Tahiri dhe Haki Çako, kjo është tashmë katërcipërisht e provuar. Saimir Tahiri dhe Haki Çako janë dy hallka të sistemit kriminal që drejtohet nga Edi Rama dhe ku Fatmir Xhafa ka lidhje dhe rolin e tij të padiskutueshëm. Pra, vettingu nga Fatmir Xhafa, apo Edi Rama, apo  kjo shumicë e bërë njësh me krimin, është si t’i varësh mëlçitë ujkut në qafë. Policia do të pastrohet, kur qeverisja të pastrohet nga politikanët e lidhur me krimin.

Pyetje: A mund të bëni një koment për emrat që kanë dalë për Drejtor të Përgjithshëm të Policisë së Shtetit, si e vlerësoni?

Basha: Asnjë vlerë nuk kanë manovrat dhe fasadat. Më kujtojnë gjithçka që ka ndodhur 4 vite më parë, kur  Saimir Tahiri nga njëra anë u bë Ministër i Brendshëm dhe nga ana tjetër u bë koka e trafikut të drogës. Jemi në një situatë të ngjashme dhe këtë ua them bazuar jo në hamendësime, as në supozime, as në mllefe politike por në fakte kokëforta, një pjesë prej të cilave kanë dalë dhe jam i sigurt që të tjera do të bëhen publike.  Është kjo qeveri e inkriminuar, kjo qeveri e bërë njësh me interesat e krimit dhe ky Ministër i Brendshëm, të cilët janë shkaktarët dhe arsyet pse policia ndodhet në këtë gjendje të mjeruar, ku jo vetëm nuk lufton krimin, por sa herë Lufton, goditet nga krimi. Ndaj zgjidhja për pastrimin e policisë dhe kupolës së policisë nga shërbëtorët e krimit fillon me pastrimin e qeverisë dhe dhënien fund të aleancës së krimit, që mishërohet nga ky kryeministër, nga ministri i Brendshëm dhe gjithë figurat politike të kësaj maxhorance. Faleminderit!