Blog

Këlliçi thirrje të rinjve: Të bashkohemi për të ndihmuar familjet e përmbytura.

Zyra e FRPD-së pranë selisë së PD është e hapur për të mbledhur dhe shpërndarë ndihmat e ofruara.

Kryetari i FRPD, Belind Këlliçi së bashku me kryetarin e Forumit Rinor të Paskuqanit dhe anëtarë të FRPD-së, ishte pranë familjeve të përmbytura në zonën e Babrrusë, Kodër të Kuqe dhe Paskuqan.

Të rinjtë demokratë shpërndanë ndihma ushqimore për familjet e prekura nga përmbytjet për t’u ardhur sado pak në ndihmë në këto ditë të veshtira, ku varfërisë ekstreme të tyre, u janë shtuar dhe përmbytjet që kanë shkatërruar dhe ato pak gjëra që kishin.

Pa ujë dhe drita prej 3 ditësh, këto familje janë braktisur tërësisht nga shteti.

Këlliçi u bëri thirrje të gjithë të rinjve, jo vetëm anëtarë e simpatizantë të FRPD-së, por të të gjitha forumeve rinore dhe atyre të paangazhuar, të solidarizohen me banorët e përmbytur duke dhuruar, në bazë të mundësive të gjithkujt, diçka për t’u ardhur në ndihmë.

Zyra e FRPD-së pranë selisë së PD është e hapur për të mbledhur dhe shpërndarë ndihmat e ofruara. “Sot bashkëqytetarët tanë kanë nevojë për ne, prandaj t’u gjendemi pranë me sa mundësi kemi. Sot ata kanë nevojë për ne më shumë se kurrë, ndaj secili të mendoje si për familjarët e tij” – theksoi Këlliçi.

Kryetari i PD, Lulzim Basha vizitoi zonat e përmbytura në Fushë-Krujë, ku kërkoi ndërhyrje urgjente nga qeveria. Atje janë me qindra familje pa asnjë ndihmë nga shteti prej të paktën dy ditësh. Edhe pse niveli i ujit ka rënë, situata është shumë e vështirë.

“Banor: S’është normale të mos vijë askush. 

Basha: Të mbarojë kjo gjendje se andej nga jugu është akoma më e vështirë.

Banor: Kam edhe dy pleq të vjetër. Me gomone i kemi nxjerrë nga Gjiri i Lalzit.”

Basha ishte brenda në Fushë-Krujë, ku janë përmbytur dy lagje, në fshatin Bilaj dhe në Hasan, ku banorët kanë 24 orë pa ushqime.

“Banor: Ça kanë ardhu gocat dhe miqtë me më sjellë pak bukë se nuk është kujdesuar askush. Kam 24 orë pa ngrënë.

Basha: Kam ardhur t’ju shoh dhe për të ndërgjegjësuar që t’ju gjenden pranë e t’ju ndihmojnë. Ju keni nevojë për ndihmë. 

Banor: Edhe vjet kanë ardhur. Nuk është kujdesur askush.” 

Banorët në Fushë-Krujë i thanë Lulzim Bashës se mesnatën e mbrëmshme Kryeministri qëndroi fare pak minuta në autostradë dhe nuk i takoi të përmbyturit. Basha i kërkoi Ramës të shkojë pranë njerëzve dhe t’i ndihmojë ata me ushqime, veshje dhe strehim. Por banorëve të përmbytur, dëmshpërblimi material nuk u mjafton dhe i kërkuan Bashës të kujdeset që të dalin përgjegjësit.

“Basha: Të bëjmë çdo perpjekje për të shpëtuar njerëzit. Kjo është e para. Pastaj të gjithë përgjegjësit do të mbajnë përgjegjësi. 

Banor: Ashtu shpresoj!

Basha: Të gjithë do të mbajnë përgjegjësi.” 

Në Fushë-Krujë Basha pati rastin të falenderojë të gjithë ata që po bëjnë gjithçka për të shpëtuar jetën e njerëzve.

“Edhe atyre njerëzve që kanë bërë sakrificë, ushtarë dhe policë u jam shumë mirënjohës. Se ata janë duke u përballur me rrezikun. I falenderoj nga zemra.” 

Deputeti Agron Shehaj po ndjek në terren  situatën në disa nga fshatrat e përmbytur në Vlorë.

“Në fshatin Fitore, situata është në prag katastrofe. E vetmja zgjidhje qe jep qeveria është braktisja e shtëpive”,  u shpreh deputeti, ku në takim me të prekurit kërkoi ndërhyrje emergjente për sigurinë e jetës së banorëve të izoluar nga uji. Ai tha se banorët nuk kanë mjetet për të lëvizur nga shtëpitë dhe për këtë arsye kërkoi që emergjencat të zbresin dhe në zona që mbeten të paprekura. Qeveria dhe ministrat, tha ai, të lenë shfaqjet para kamerave pasi qytetarët në këto orë të vështira po përballen me një katastrofë të vërtetë në temperatura të ulëta.

Banorët thanë ndër të tjera se përmbytjet erdhën si pasojë  e mos pastrimit prej kohësh të kanalizimeve  dhe dëmtimit të territorit për shkak të interesave të ngushta private.

Përmbytjet kanë shkaktuar gjendje emergjente dhe në Mat. Situata më e rënduar paraqitet në fshatin Bruc, ku disa  familje janë izoluar për shkak të përmbytjes së shtëpive, gjësë së gjalllë dhe tokave bujqësore. Pranë tyre ka shkuar deputetja Dhurata Çupi e cila i ka bërë thirrje për ndërhyrje emergjente strukturave të Emergjencës Civile dhe shtetit në tërësi.  “Pushteti vendor po bën maksimumin me kapacitete që ka, por ndërhyrja tha ajo, duhet bërë  nga strukturat kompetente”, tha deputetja Çupi.

Zonja Cupi shprehu shqetësimin për sigurinë e jetës së grave dhe fëmijëve, të cilët po strehohen ku të munden.Të bëjmë gjithcka për të shmangur cdo rrezik për jetë njerëzish, apeloi deputetja, e cila vuri në dukje dhe mungesën e energjisë elektrike. Ndërkohë banorët thanë se temperaturat e ulëta e rëndojnë edhe më shumë izolimin e zonës nga niveli i  ujit.

Banorët në fshatin Ferras në Njësinë Administrative Levan të Fierit vazhdojnë  të mbeten të izoluar ndërkohë që  niveli i ujit po rritet. Deputeti Luan Baçi tha se pavarësisht prezencës gjatë ditës së emergjencave civile, ushtrisë dhe bashkisë, tashmë në orët e pasdites banorët janë të izoluar dhe rrezikohen nga​ niveli i ujit. Ai kërkoi ndërhyrje emergjente dhe mbajtje të situatës nën kontroll të vazhdueshëm nga strukturat e Emergjencës.

Banorët  e Ferrasit dhe fshatrave të njësisë Frakull, si Cervenë, Kashisht, etj, shprehën  shqetësimin se gjenden të izoluar dhe kanë nevojë për ndihmë.

Deputeti Baçi tha se paraqet rrezik dhe zona e Pojanit ku ka filluar të rritet niveli i ujit dhe bëri apel për sigurinë e jetës së  njerëzve e të garantohet një orë e më parë.

Deputeti i qarkut të Elbasanit, Luçiano Boçi ka qëndruar pranë banorëve të Polisit, zonë e përmbytur dhe e shkatërruar nga dalja e shtratit të lumit Shkumbin.

Në një status të tij në facebook, deputeti Boçi, ironizon kryeministrin Edi Rama se “Shteti është në këmbë”.

“E dëgjuat Ramën?!!

Shteti në këmbë – tha

Partia në ballë,

Por….

Populli është nën ujë!!!!

Ja pamjet nga Polis Valë ku Shkumbini ka zaptuar hektarë të tëra dhe po i afrohet banesave.

Askush nuk i përgjigjet banorëve.

Ndërkohë shteti me siguri po e bën në këmbë”, thekson deputeti demokrat, i cili prej dy ditësh ndodhet në terren si pjesë e ekipit të monitorimit të Partisë Demokratike, ngritur pas përmbytjeve që kanë shkatërruar qindra banesa, mijëra ha toka dhe ka mbytur qindra krerë bagëti.

Deputeti i qarkut të Durrësit, Oerd Bylykbashi, i cili po ndjek nga afër situatën e përmbytjeve në zonën bregdetare, thekson se kryetari i Bashkisë së këtij qyteti, Vangjush Dako, ka sjellë pasoja të rënda në përmbytjen e këtij qarku, me abuzimet e fondeve për betonizim.

Ai dokumenton me foto situatën në Sukth dhe Katund të Ri.

“Këto foto të përmbytjeve janë në ish-bashkinë e Sukthit dhe në ish-komunen e Katundit të Ri në Bashkinë e Durrësit, në kontrast të dhimbshëm me pemën festive të Dakos mbi gërmadhën e Velierës në Durrës.‎ Janë dy vite rresht që kjo zonë përmbytet. Sigurisht, nëse shpenzon 8 milion euro beton për Velierën në qendër të Durrësit dhe disa miliona euro të tjera për qepje-shkepjen e rrugës së plazhit, betonizimin e sheshit të qytetit edhe me taksat e banorëve të Sukthit apo Katundit te Ri, sigurisht nuk mbetet më asnjë qindarkë për të pastruar kanalet e kullimit me qëllim që reshjet e shiut të mos përmbytin shtëpite, bagëtitë dhe tokat, apo së paku të minimizohen dëmet”.

Deputeti Bylykbashi thekson në statusin e tij në facebook se banorët me bindje akuzojnë autoritetet edhe për hapjen dhe shkarkimin e rezervuarëve në lumin Erzen të cilat kanë përmbytur zonat duke shkaktuar dëme në shtëpi, prona, bagëti dhe bazë ushqimore.

“Ende pa marrë asnjë qindarkë nga dëmshpërblimi i premtuar për përmbytjen e vjetshme, këtyre banorëve u erdhi përmbytja përsëri”, thekson deputeti demokrat, duke shtuar se: “Mashtrimi i ka këmbët e shkurtëra”!

Partia Demokratike ka ngritur një ekip që merr informacione nga të gjitha njësitë administrative dhe po monitoron situatën e krijuar nga moti i keq.

Në Qarkun e Shkodrës nuk raportohen përmbytje, por në disa njësi, si në Rrethina, Shosh, Gur i Zi, Dajç, Ana e Malit mungon energjia elektrike.

Problem kryesor mbeten shkarkimet nga Vau-Dejës. Që nga dreka, në zonën e Obotit e deri në Bërdicë, është rritur niveli i ujit me rreth 1,5 metër. KESH raporton për 500 m3 ujë/sek, por sipas informacioneve shkarkohet mbi 1200 m3/sek.

Në Qarkun e Korçës, në Maliq parashikohen përmbytje tek Fusha e Maliqit, tek ish këneta. Reshjet vazhdojnë me intensitet dhe Lumi Devoll mund të dalë nga shtrati. Bashkia Maliq nuk ka marrë asnjë masë, ndërkohë që mungon energjia elektrike dhe qendrat shëndetësore funksionojnë pjesërisht. Në kopshte dhe në shkolla nuk ka ngrohje.

Në qarkun e Gjirokastrës, qyteti i Gjirokastrës i përmbytur në pjesë të veçanta të lagjes së poshtme, nënstacioni i përmbytur dhe për pasojë disa lagje në qytet dhe gjithë fshatrat janë prej 24 orësh pa drita. Qindra hektarë tokë bujqësore të përmbytura në Dropull, Libohovë, Lazarat, Valare, Andon Poçi e Cepo.

Rruga e Viroit kalohet vetëm me makina të larta. Rrezikohet nga përmbytja qendra administrative e Cepos për shkak të fryrjes së Lumit Kardhiq. Janë dëmtuar dhe nuk kalohen rrugët që të çojnë në fshatin Palokastër. Asnjë ndihmë nga shteti e bashkia në këtë zonë. Përroi i Lazaratit rrezikon të çajë digën.

Informacion nga Mallakastra.

Për shkak të prurjeve të mëdha të lumit Vjosë, situata vjen duke u përkeqësuar. Rrezikohet stacioni i pompave në Poçem dhe qyteti rrezikohet të mbetet pa ujë. Deri tani janë përmbytur 15 ha tokë në njësinë administrative Hekal dhe Kutë.

Ne Sarande dy pika janë disi problematike, Ura e Gajdarit, ne hyrje te qytetit, per shkak te daljes se lumit nga shtrati dhe zona e Vanes, e Delvinës, ku rrezikohen nga permbytja disa familje dhe bageti.

Në Bashkinë Mat situata është rënduar në disa njësi. Në fshatin Bruc, Prroi i Urakës ka dalë nga shtrati dhe ka shkaktuar dëme në disa banesa, ka shkatërruar plotësisht një biznes peshku, ka përmbytur toka bujqesore.

Në fshatin Urakë uji ka demtuar trupin e rrugës që lidh njësinë Rukaj me pjesën tjetër të Bashkisë.

Në njësinë Komsi, Baz, Derjan janë demtuar disia ura qe lidhin fahatra të ndryshme me Burrelin, në German, Fushëbaz, Rethbaz, Lekhot, Urxallë,

Në Bashkinë Klos ka situatë emergjence. Njesia Xibër është e izoluar nga shkatërrimi i urave.

Në njesinë Gurrë dhe Suc ka bllokime të rrugëve nga rreshqitja e dherave

Në Fushë Krujë situata është shumë problematike, por pakësimi i rreshjeve ka ndikuar në rënien e nivelit të përmbytjeve.

Në Qarkun Fier problemi kryesor është Vjosa. Niveli i saj po rritet. Në Kashisht, Frakull, Ferras niveli i ujit po rritet dhe vazhdimi i reshjeve i rrezikon seriozisht banorët.

Në Bashkinë Memaliaj ka disa probleme: Njësitë administrative Luftinjë dhe Buz, prej 30 fshatrash janë pa energji elektrike prej 48 orësh.

Rrugët që lidhin këto fshatra janë të dëmtuara dhe janë të rrezikshme për udhëtarët.

Qendrat shendetësore nuk funksionojnë.

Nëse vazhdojnë reshjet, Lumi Vjosë është një rrezik për banorët e Memaliajt.​