Blog

U provua sot para shqiptarëve se Edi Rama dhe Saimir Tahiri janë një: ata kanë ndarë bashkë paratë e krimit dhe pushtetin e fituar me paratë e krimit. Prandaj Edi Rama do ta mbrojë Saimir Tahirin, deri në fund.

Siç u pa sot, Rama, Ruçi dhe Xhafaj, ata, që qeverinë dhe institucionet e shtetit i kthyen në repart logjistik në mbështetje të trafikut të drogës dhe krimit, do të tentojnë të sulmojnë, trembin, kërcënojnë dhe blejnë prokurorinë, gjykatat dhe këdo që do tentojë të nxjerrë para drejtësisë Saimir Tahirin.

Sot ra dhe fasada e drejtësisë dhe reformës së drejtësisë së Edi Ramës. Sot Tahiri, Xhafaj dhe vetë Rama ushtruan dhunë ndaj prokurorëve dhe drejtësisë duke treguar se ata janë kërcënim serioz për drejtësinë në Shqipëri.

Sot, të gjithë e panë lakuriq, mashtruesin e pafytyrë që shtirej për drejtësi, kur e vetmja drejtësi që ai mund të pranojë është drejtësia nën këmbët e tij.

Unë e di se ka shumë njerëz të ndershëm që ndihen sot të fyer dhe të revoltuar me dhunimin që Rama, Ruçi dhe Tahiri i bënë drejtësisë, duke mohuar ndalimin e Tahirit dhe duke e shtyrë me plot një javë që nga dita e kërkesës së prokurorisë, kontrollin e shtëpive të Tahirit, pasi ai, i ndihmuar nga klanet mafioze dhe vetë qeveria, të ketë patur kohë për të pastruar dhe krehur një qytet të tërë dhe jo më shtëpinë e tij.

Sot, ka mijëra qytetarë dhe familje të thjeshta që pasi kanë provuar këto katër vjet dhunën arbitrare të kësaj qeverie, pasi kanë provuar gjobat, pasi kanë parë t’u prishen shtëpitë, pasi kanë përjetuar bastisjet e bizneseve, dhe pasi kanë vuajtur arrestime, shoqërime dhe ndalime për shkelje të vogla ligjore, ndihen të skandalizuar dhe të pashpresë në këtë vend.

Atyre dua t’u them se drejtësia mund të vonojë por nuk do të mungojë. As Sajmir Tahiri, as Edi Rama nuk do t’i shpëtojnë drejtësisë.

Në luftën tonë për të çmontuar krimin nga politika ne tashmë kemi shumë partnerë dhe miq, të cilët, janë ata që nxorën zbuluar Saimir Tahirin dhe që, së bashku me ne, nuk do ndalemi më këtu.

Ka ardhur koha që Shqipëria të ndahet përfundimisht nga krimi dhe politikanët e krimit dhe të hyjë në rrugën e drejtësisë ku ecin të gjitha vendet perëndimore.

Për 4 vite opozita ka denoncuar me fakte se trafiku i drogës dhe kanabizimi  i vendit është bërë me lejen, mbrojtjen dhe për përfitimin pasuror dhe politik të Edi Ramës, Sajmir Tahirit dhe eksponentëve të lartë të PS.

Për 4 vite, Edi Rama ka bllokuar cdo hetim. Ai vetë me zë dhe me figurë i ka kërcënuar, transferuar, hequr nga puna dhe burgosur oficerët si Dritan Zagani. I ka quajtuar ata kriminelë, ndërkohë që kriminelët e vërtetë, Habilajt me shokë bënin trafik droge dhe armësh  të ndihmuar nga Tahiri dhe kupola e korruptuar e Policisë.

Tani prej 4 ditësh shqiptarët janë ballafaquar me disa fakte të thjeshta dhe të kuptueshme nga të gjithë: antimafia italiane ka paraqitur prova ligjore të trafikut të drogës dhe armëve të kryer nga banda Habilaj e  ndihmuar direkt nga Ministri i Brendshëm Saim​ir Tahiri dhe drejtues e oficerë të policisë.

Dosja Habilaj-Tahiri e drejtësisë italiane ju tregon shqiptarëve dhe gjithë botës, sesi krahu i djathtë i Edi Ramës është kapur në flagrancë në trafik droge, dhe se si krejt shteti është kalbëzuar dhe është vënë në shërbim të trafikantëve.

A nuk është provë fakti që makina e ministrit përdorej nga trafikantët të cilët kanë udhëtuar në Itali me makinën e ministrit, ndërkohë që ajo ishte e regjistruar në emër të tij?

A nuk janë prova plantacionet e drogës dhe magazinat e drogës që mbroheshin nga policët e korruptuar të cilët, figurojnë në këto përgjime se ngarkonin thasët e drogës në gomone?

A nuk është provë se krimi kishte kontroll edhe tek dhoma e radarëve nga ku policët e korruptuar i drejtonin se kur dhe ku e si ti dërgonin skafet për në Itali?

A nuk është provë  kur sheh sesi trafikanti blen 9 mijë euro varësen për familjarët e ministrit, dhe se si, atij i paguhen 30 mijë euro për një shërbim?

Se ka bërë të paktën 5 milionë euro në muaj por i duhen 20 milionë për fushatë?

Kush ka sy në ballë dhe mend në kokë e kupton se faktet dhe provat janë të mjaftueshme për të pranuar kërkesën e prokurorisë.

Vetëm ata që tremben nga këto fakte dhe prova të mbledhura nga antimafia italiane, bëjnë sikur nuk kuptojnë.

Edhe përballë këtyre fakteve dhe provave, Edi Rama mohon atë që e ka marrë vesh e gjithë bota: se Saimir Tahiri është kapur në flagrancë si bashkëpunëtor, mbrojtës dhe përfitues i krimit të organizuar dhe trafikut të drogës dhe armëve.

Arsyeja pse Edi Rama mohon këtë që di e gjithë bota, është e thjeshtë dhe e kuptueshme: Sepse është ai pas Saimir Tahirit, është ai pas cdo Habilaj, është ai pas cdo shefi policie që ka ngarkuar thasët me drogë.

Ai si askush tjetër ka përfituar nga qindra milionë euro që erdhën nga droga dhe kanabizimi i krejt vendit, sepse i duheshin për të blerë votat dhe për të mbajtur pushtetin.

As krimi, as trafiku i drogës, as përfshirja në to dhe as ndarja e pushtetit me kupolën mafioze, nuk mund të bëheshin e nuk janë bërë, pa dijeninë, bekimin, lejen dhe mbrojtjen e Ramës.

Kjo dhe vetëm kjo është arsyeja se pse, në vend që t’i hapin rrugën drejtësisë, Edi Rama po mbron Tahirin me imunitetin parlamentar dhe po i bën gjyqin prokurorisë dhe drejtësisë.

Kjo është arsyeja pse sot një i akuzuar për trafik droge dhe korrupsion, kërcënon prokurorët duke ju thënë unë trafikoj drogë, e vë shtetin në shërbim të krimit të organizuar, dhe ju nuk më bëni dot gjë. Sepse Tahiri dhe Habilajt janë shteti dhe ligji i Edi Ramës.

Në narkoshtetin e Edi Ramës ka dy drejtësi:

Një për qytetarët e thjeshtë, të cilët arrestohen për një faturë dritash, ju prishen shtëpitë me rruspa paligjshmërisht, dhe një drejtësi tjetër për Saimir Tahirin dhe pushtetarë të tjerë që janë të paprekshëm dhe nuk mund t’u afrohesh dot as tek makina edhe kur kryejnë krime të rënda.

Beteja e sotme nuk është për Sajmir Tahirin.

Po, Edi Rama do që Saimir Tahirit të mos ndalohet, të mos i kontrollohen shtëpitë, të mos i kontrollohen pronat, të mos i kontrollohen makinat, të mos i kontrollohen paratë.

Do që Saimir Tahiri të lihet i lirë që të zhdukë provat, të manipulojë drejtësinë, të kërcënojë dëshmitarët, hetuesit, prokurorët dhe gjykatësit.

Por mbi të gjitha, kjo është pjesë e një pakti mafioz mes Ramës dhe Tahirit për të mbrojtur të gjithë këtë kupolë mafioze, Ramën dhe ministra të tjerë e kryebashkiakë të tjerë të kapur në flagrancë me fakte dhe prova, përgjime dhe foto nga partnerët, si bashkëpunëtorë të krimit të organizuar të trafikut të drogës.

Edi Rama e di se ai dhe qeveria e tij janë të vdekur politikisht. Para shqiptarëve dhe para syve të gjithë botës ata janë faktuar si të zhytur në krim dhe të kapur nga krimi.

Nga paniku Edi Rama ka urdhëruar anti-mitingje me sharës dhe delinkuentë për të bërë presion bëjnë presion prokurorëve.

Duke dënuar me forcë këtë akt të paprecedent, i bëj thirrje Edi Ramës të heqë dorë nga presioni rrugacëror ndaj drejtësisë. E ka kot.

As mbrojtja ndaj Tahirit, as paktet mafioze me të dhe ministrat e tjerë të kapur në flagrancë, as sharjet dhe sulmet ndaj opozitës dhe medias së pakapur, nuk do ta shpëtojnë dot nga e vërteta, nga drejtësia dhe llogaria para qytetarëve.

Prononcimi për mediat i deputetit Enkelejd Alibeaj 

Dua ta nis me falenderime për median. Ju keni bërë të mundur që të gjithë shqiptarët të ndjekin dhe të kuptojnë të vërtetën në mënyrë transparente të ndoshta skandalit më të madh që i ka ndodhur këtij vendi edhe kësaj qeverisjeje. Ajo, përse kemi dalë këtu sot është fakti që tashmë që është faza e fundit e diskutimit në komision, e diskutimit e shtjellimit të argumentave tona, të gjithë  deputetëve edhe atyre të mazhorancës,  Gramoz Ruci nuk pranon që media të jetë brenda.

Ia kërkuam në bazë të rregullores . Rregullorja është fare e qartë në nenin 35 të saj thotë që mbledhjet e komisionit zhvillohen në prani të medias. Dhe nëse ka një kërkesë për ta bërë të mbyllur, kjo kërkesë hidhet në votë. Zoti Ruci e hodhi në votë dhe kërkesa e tij morin 5 vota, pra jo shumicën, sepse janë vetëm 10 anëtarë, të ndarë në dy pjesë të barabartë . Kjo është cështja më delikate që shqiptarët duan ta dinë, duan të kuptojnë dhe ajo që po ndodh tani është fakti që mazhoranca, Edi Rama, në pakt të plotë mafioz me Sajmir Tahirin, duan të lënë në errësirë shqiptarët, ti ndalojnë për të kuptuar të vërtetën, për të kuptuar një vërtetë që është e tyrja.

Eshtë pakt mafioz. Nën dritën edhe të provave që ju patë, i dëgjuat dje, por edhe provave të dhëna  sot nga ana e  prokurorisë, tashmë ka ndodhur një gjë. Xhindet kanë dalë nga shishja. Kanë dalë nga shishja dhe nuk futen më brenda. Kjo është ajo cfarë duan ti fshehin tani shqiptarëve. Nuk përballen dot me argumentin, duan që shqiptarët ti lënë në errësirë për të mos kuptuar, për të mos mësuar, se cila është e vërteta e këtij skandali të madh e përfshirjes, jo vetëm të ministrit të brendshëm në këtë aferë, por dhe më lart sesa aq.

Pyetje: Z. Basha si i komentoni deklaratat e ministrit të Brendshëm z.Fatmir Xhafaj, sot?

Basha: Solidaritet i kupolës mafioze. Fatmir Xhafa është në konflikt interesi. Vepra e parë dhe e fundit që ai duhej të bënte si Ministër i Brendshëm, para se të jepte dorëheqjen, duhet të ishte arrestimi i vëllait, i cili kërkohet nga autoritetet italiane prej më shumë se një dekade si trafikant i dënuar i kokainës.

Fatmir Xhafa është në konflikt të pastër interesi, ai nuk mund të rrijë asnjë ditë më si Ministër i Brendshëm. Por, Fatmir Xhafaj është një nga levat që Edi Rama po përdor për të bërë presion ndaj Prokurorisë dhe për të zbatuar paktin e tij, paktin Rama-Tahiri, ku Tahiri t’ia hedhë me sa më pak kosto, me qëllim që të mos dekonspirojë dosjet e tmerrshme që lidhin Edi Ramës personalisht  dhe familjarisht me krimin e organizuar dhe trafikun e drogës, në veçanti, trafikun e kokainës.

Opozita është në kontakt të vazhdueshëm dhe ka informacione të besueshme të cilat shpresojmë dhe besojmë se do ti vihen në dispozicion publikut shumë shpejt. Por, thirrja ime ndaj Edi Ramës dhe Fatmir Xhafës, sot është; të japin menjëherë dorëheqjen, të largohen dhe t’i lënë vendin një qeverie anti-mafia, e cila është e vetmja garanci që lufta kundër krimit të zhvillohet në përputhje të plotë jo vetëm me ligjin por me pritshmëritë e qytetarëve shqiptarë.

Këta janë të zhytur në krim. Këta janë të kapur nga krimi. Këta e kanë përdorur krimin dhe janë përdorur nga krimi.

Kanë marrë miliona euro, rryshfete dhe dhurata për fushata elektorale dhe i kanë venë në dispozicion krimit, portet, aeroportet, policinë, qendrën operative të radarëve dhe çdo mundësi tjetër.

Ky është një narko-shtet dhe kjo është një kupolë mafioze.

Ndaj, deklarata e sotme e Fatmir Xhafës nuk është gjë tjetër veçse solidaritet i kupolës mafioze. Asgjë nuk do të ndryshojë pa ndryshuar drejtimin e vendit, pa larguar këtë kupolë mafioze.

Ky do të jetë vazhdojë të jetë një narko-shtet që i trajton shqiptarët si skllevër për hesap të një grushti kriminelësh, një grushti politikanësh të bërë bashkë. Janë bashkë të zhytur në krim.

Ndaj thirrja ime është për largimin e tyre të menjëhershëm nga detyra dhe për hapjen rrugë, të një procesi që do të vërë para drejtësisë kokat e mëdha, peshqit e mëdhenj të krimit të organizuar, të cilët sot janë në kabinet dhe në karriget qeveritare.