Blog

Kryetari i Bashkisë së Vorës, Fiqiri Ismaili, përgënjeshtroi Ministrin e Brendshëm Fatmir Xhafaj dhe Kryetarin e Bashkisë së Tiranës, Erion Veliaj se ai kishte braktisur qytetarët.

Duke vizituar një nga zonat problematike, tek Liqeni i Marikajt, zoti Ismaili tha se Bashkia e Vorës është në krye të detyrës.

Kryebashkiaku i Vorës tha se bizneset në territorin e saj, përgjatë autostradës, janë përmbytur për dy arsye, për të cilat është përgjegjëse Bashkia e Tiranës.

Arsyeja e parë është shkarkimi pa paralajmërim nga liqeni i Kasharit.

Arsyeja e dytë është bllokimi i kanaleve kulluese nga mbjellja e palmave prej bashkisë së Tiranës.

Mbjellja e palmave kushtoi 600 mijë euro, por dëmi i tyre është i disafishtë. Për zëvendësimin e  tyre jo vetëm do të shpenzohen edhe 2.5 milionë euro të tjera, por prej tyre është shkatërruar autostrada Tiranë Durrës, si dhe qindra biznese.

Kryebashkiaku i Vorës tha se është përgjegjësi e pushtetit qëndror mospastrimi kanaleve anash autostradës.

“Bashkia e Vorës është në krye të detyrës dhe po kryen të gjitha funksionet e saj.  Nga informacionet që kemi, në lidhje me përmbytjet që kanë ndodhur tek City Park, tek Mercedes-i, tek Qafa e Kasharit, kanë ardhur si arsye e bllokimit të kanaleve që administrohen nga Bashkia e Tiranës. Ato kanale të mos zihen me palma, siç janë zënë aktualisht, por kanalet të jenë të pastruara dhe uji të shkojë në pjesën e vetë. Kemi informacione që edhe Liqeni i Kasharit është hapur nga reshjet e dendura të shiut duke krijuar këtë situatë.”-tha Kryetari i Bashkisë së Vorës, Fiqiri Ismaili.

Bashkia e Vorës ka hartuar një plan të detajuar veprimi për të menaxhuar situatën e krijuar.

Partia Demokratike e kundërshtoi aktin antikushtetues të Edi Ramës për shkarkimin e Kryetarit të KQZ Klement Zguri.

Kryetari Basha tha se kërkesa duhet të hiqet jo vetëm nga kalendari 3 javor, por edhe nga programi i punës së Kuvendit, sepse është një kërkesë antikushtetuese, që cënon pavarësinë e institucioneve.

“Ligji thotë që të shkarkohet kryetari i KQZ duhet të vijë propozimi nga 5 anëtarë të KQZ-së. Keni sjellë ju një propozim nga 5 anëtarë të KQZ-së?! Nuk e keni sjellë. E dini pse?! Sepse motivi me të cilin doni të shkarkoni Klement Zgurin është i rremë. Sepse qendrimi që ka mbajtur Zguri për rastin e kryetarit të Bashkisë së Mallakastrës është qendrimi që ka mbajtur Denar Biba për rastin e kryetarit të Mallakastrës dhe se e gjitha kjo është një përpjekje e mjerë për t’iu imponuar debatit publik me falsitete”.

Basha refuzoi inskenimin e Ramës për marrëveshjen e 18 Majit.

“Marrëveshja ka vdekur sepse marrëveshjen e vratë ju, sepse ishte për zgjedhje të lira dhe të ndershme. Vetëm këtë javë Ramës i ka ardhur raporti i financuar nga BE-ja që thotë se mbi 20 % e shqiptarëve pranojnë se kanë shitur votën, që i është kërkuar shitja e votës”.

Kryetari i Partisë Demokratike, Lulzim Basha propozoi shkurtimin e prezantimit të amendamenteve nga deputetët e PD në Kuvend, që qeveria dhe deputetët të shkojnë në terren pranë zonave të përmbytura.

Për shkak se situata është në përkeqësim, Basha tha se seanca duhet përshpejtuar që ministrat dhe kryeministrit të gjenden në terren

“Në këtë rrethanë rënduese unë dot i kërkoj grupit tim parlamentar të procedojmë në këtë mënyrë dhe shpresoj që kjo egzigjencë politike nga ana jonë të përdoret nga ju për të qënë sa më afër njerëzve në nevojë.”-tha Basha.

Kryetari i PD tha se kishte informacion se në zona të tëra të Shkodrës, në Anë të Malit, në Gur të Zi dhe në zona të tjera mungon totalisht shërbimi shëndetësor. Në Kamëz ka njerëz të izoluar. Në QSUT ka përmbytje si asnjëherë në 27 vjet

Basha tha se “jo gjithçka mund të sigurohet në kushtet e përmbytjes, por aksesi i shërbimit shëndetësor në veçanti për fëmijët, për nënat dhe për pleqtë, duhet të sigurohet me çdo çmim.“​