Blog

Zonja dhe zotërinj, të rinj dhe të reja, mirë se vini në këtë ditë të 87 të qëndresës tonë, ditën e dytë të Republikës së Re që e shpallëm njëzëri.

Dita e sotme, sjell bashkë të rinj dhe të reja, të moshuar, profesionistë, intelektualë, artistë, si gjithmonë pjesë e kësaj tende. Disa prej tyre e shprehin zemrën e lirisë, shpirtin e tyre të lirisë më mirë me dorë, me krijim, dhe emocionohen kur vijnë e flasin këtu, por kjo nuk besoj se është asnjë problem apo jo?!

Por të gjithë flasin të vërtetën. Ky është realiteti.

Çfarë flitet këtu as nuk censurohet, as nuk sponsorizohet, as nuk mësohet përmendsh, as nuk shtrembërohet nga propaganda. Kjo është Shqipëria e vërtetë pa regji qendrore, Shqipëria e halleve dhe problemeve, e mbushur me pasiguri, papunësi për shkak  të një ekonomie të shkatërruar nga qeverisja e bërë njësh me krimin dhe drogën.

Pasi ka shkatërruar dhe kapur gjithçka, qeveria e Edi Ramës dhe ai vetë ka një plan të kapë zgjedhjet e ardhshme. A e dëgjuat dje si u thoshte shqiptarëve, se parlamenti i ri do të jetë më i mirë pa opozitën se do të ketë më pak sherre?!

Parlamenti më me pak sherre ka qënë Kuvendi Popullor i Republikës Popullore Socialiste të Shqipërisë, aty s’kishte sherr fare sepse dajaku, terrori, plumbi, internimi dhe burgosja e qindra-mijëra shqiptarëve, ishte në rend të ditës.

Sa më pak sherr në Parlament, aq më shumë njerëz të terrorizuar, aq më shumë të drejta të shkelura. Sa më pak të ketë mundësinë të ngrejë zërin në Parlament përfaqësuesi i popullit, aq më shumë shtypet, vidhet dhe nëpërkëmbet populli. Ky është një mësim i patjetërsueshëm i historisë.

Prandaj, edhe nëse e marrim dhe me gjuhën e tij naive, do të thoja është në kufijtë e idiotësisë politike.

Le t’i themi sot, ta harrojë se do të ketë një Parlament të emëruar nga droga dhe krimi, një Parlament monist dhe gojëmbyllur. Sepse kjo do të thotë edhe më shumë dhunë, edhe më shumë terror edhe më shumë papunësi dhe varfëri mbi qytetarët e thjeshtë të këtij vendi.

Ky binom; parlament pa zë, pa opozitë dhe një popull i shtypur, nuk ka për të ndodhur! Parlament të tillë, as nuk ke për të pasur, as nuk ke për të gëzuar, asnjë orë të vetme! Prandaj thirri mendjes kur artikulon ëndrra diktatoriale sepse përndryshe të vjen fundi i diktatorit.***

Vëllezër e motra, ai, bashkë me shpurën e tij kriminale, e konsideron këtë një lojë shahu, një lojë force. Këto halle, këto probleme që ngreni ju bashkë, 87 ditë e netë me radhë, halle që ju mblodhën dy herë në vërshimet më të mëdha popullore, më 18 shkurt, edhe më shumë më 13 maj, këto probleme nuk i sheh Edi Rama dhe kupola e tij politike e republikës së vjetër.

Sepse, për ta, pushteti ka vetëm një qëllim, ka vetëm një axhendë, axhendën e pasurimit dhe kontrollit total të vendit nga ana e tyre.

Por, kjo nuk është axhenda juaj, ky nuk është interesi juaj. Ky është vetëm interesi i Edi Ramës dhe çetës së korruptuar kriminale në pushtet.

Ndaj nuk e sheh të vërtetën, siç refuzon të shohë problemin e krimit dhe të drogës. Për të, gjithçka është një lojë shahu, e tha vetë apo jo?! Unë i kam thënë se është teatër kukullash. Nuk jemi shumë larg, e ka pohuar vetë. E pohoi me ndërgjegjen e tij, e pohoi këtë që kemi thënë. “Kjo është lojë shahu”. Lojë shahu apo teatër kukullash, pak rëndësi ka. Ai ju sheh ju, ai sheh politikanët, ai sheh miqtë tanë ndërkombëtarë, si gurë shahu në lojën e tij të shahut.

A jeni ju gurë shahu?

(Jooo)

A janë hallet tuaja lojë?

(Jooo)

A janë hallet, problemet tuaja pjesë e lojës ?

A janë shpresat tuaja pjesë e lojës?

(Jooo)

Sigurisht që jo! Sepse kjo nuk është lojë. Kjo lëvizje, ky bashkim shqiptarësh nuk është lojë. Hallet tuaja nuk janë lojë. Shpresat tuaja nuk janë lojë. Republika e Re që po vjen nuk është lojë!

Po pse e shikon si lojë shahu Edi Rama këtë përballje për jetë a vdekje, midis dëshpërimit e shpresës, midis errësirës dhe dritës, midis papunësisë dhe varfërisë dhe shanseve për mirëqenie në bazë të punës së ndershme për çdo shqiptar? Pse?

Pse e shikon si lojë shahu? Sepse, për të, njerëzit janë statistika, janë shifra, janë gurë shahu. Për të vetëm pasurimi i tij, vetëm pushteti i tij ka rëndësi.

Shikoni se çfarë bëri me procesin monist dhe farsë që po gatit me 18 qershor. Pasi e futi procesin në kolaps ligjor, listat i ka 24 orë me vonesë dhe nëse ia dalin ata burra dhe gra të Kolegjit Zgjedhor të clirohen nga dara e presionit qeveritar që ka filluar dhe nga zhaget qe po u tundin, do ta konstatojnë këtë, sepse çdo shqiptar mund të numërojë nga zero deri në 50 apo jo?

Nëse jo, faqja e tyre e zezë, por le të shohim. Le të shohim, a do të kenë kurajon dhe integritetin të numërojnë, siç numëron çdo shqiptar nga zero deri në 50 dhe të deklarojnë, siç deklaron çdo shqiptar, çdo fëmi, se afati ka kaluar dhe 18 qershori është rrëzuar edhe ligjërisht.

Tani çfarë po bëjnë? A e patë? U kanë dalë lakrat në shesh. A i patë listat e partive që kishin futur të gjithë fisin? I patë apo jo? Gjithë fisin! Turp i madh! Po ato partitë e tjera që s’ia kishin dalë të fusnin kandidatë as me shkollë të mesme, a i patë? I patë apo jo?

Nuk kam asgjë kundër, që përfaqësuesit e popullit nëse janë zëdhënës të vërtetë të popullit, të ketë çfarëdo arsimi që kanë pasur mundësinë të ndjekin, por kjo nuk është arsyeja, sepse në ato lista kishte njerëz me shtatë vjeçare. Nuk janë tribunë të popullit. Se mund të jenë tribunë edhe me shtatë vjeçare e të përfaqësojë njerëzit e popullit, se ne për këtë lufttojmë, për republikën e qytetarëve, për republikën e popullit.Po nuk janë të tillë!

Janë gurë shehu, në lojën e shahut të Edi Ramës. Merre – veje këtu. Sa më pak shkollë, aq më mirë. A ka mundësi të mos flasë fare. Siç kishte ata kriminelët në Parlament që nuk lidhnin dot dy fjalë, ata kandidatë për kryetar bashkie që ngatërroheshin kur fjalia kishte dy folje. E mbani mend apo jo?

Gurët e shahut nuk kanë nevojë të flasin. Zot na ruaj kur të flasin edhe gurët e shahut, të ngatërrohet loja totalisht.

Nuk mbaron këtu. Listat me fisin. Listat me kandidatë me shtatë vjeçare, janë njëra faqe. Faqja tjetër, janë ofertat e ndyra që i bëjnë aleatëve tanë për t’u bërë pjesë e proçesit.

Një partie i ofruan 15 deputetë, dikujt tjetër 10, dikujt tjetër 5, për të lënë dhe braktisur luftën e përbashkët të interesit qytetar të kësaj levizje popullore.

Kryetarët e partive aleate i thanë JO! I thanë JO! I thanë JO kësaj oferte të ndyrë, për t’i bërë pjesë të lojës së shahut, për arsyen e thjeshtë, sepse njësoj si unë, njësoj si Partia Demokratike, edhe ata janë në këtë betejë krah për krah jush qytetarëve shqiptarë, jo për interesat e tyre politike, por për një Shqipëri të re të qytetarëve shqiptarë, e cila po vjen e do të vijë sepse kjo nuk është lojë shahu por është bashkimi më i madh i shqiptarëve për zgjedhje të lira dhe të ndershme.

Edhe partnerët ndërkombëtarët që vijnë, i trajton si gurë shahu. Në lojën e tij, sigurisht nuk është fushë shahu tamam, sepse fusha nuk është fushë prej druri, gurët nuk janë prej druri, apo jo? Dhe nuk lëvizen thjesht me dorë, por lëvizen edhe me gjëra të tjera e keni parasysh apo jo?

Çfarë është kjo? Zhagia? Edi Rama nuk ka lekë, por ofron 500 mijë euro vetëm për një kryetar partie që ta fusë në zgjedhje. Lekët e kujt janë këto? Tuajat dhe të gjithë shqiptarëve. Janë lekët që kurrë nuk shkojnë tek kryefamiljari këtu, që ka fëmijën 6 muajsh, që ka mbaruar shkollën dhe kualifikimet, por ska punë.

Ja ku është prej mishi e prej gjaku. Nuk është gur shahu, e si ky ka me qindra e me mijëra në Shqipëri që nuk kanë punë e nuk kanë mundësi për punë sepse narko-republika dhe narko-kryeministri, lekët që hapin vende pune, i ka për vete dhe i përdor me pikatore në lojën e tij të shahut.

Ju e njihni shumë mirë këtë realitet. Ju e dini se, ekonomia jonë është shkatërruar nga taksat e larta, nga keqqeverisja, nga pasiguria. Ju e dini fare mirë se motivimi i forcës sonë punëtore dhe konkurueshmëria e tyre, është më e ulëta në Ballkan për shkak të keqqeverisjes, çmimit të lartë të naftës dhe të energjisë. Ju e dini fare mire, se sa e vështirë është bërë sot të mbash vendin e punës e jo më të gjesh një vend tjetër pune. Sa e vështirë është të marrësh kredi, akoma më e vështirë, të shlyesh kedinë e marrë. Se sa të larta janë çmimet në tërësi e në veçanti çmimet e nergjisë dhe të naftës. Të gjitha këto, ju i dini fare mirë, sepse kjo nuk është lojë shahu. Kjo është jeta e përditshme e shqiptarëve të zakonshëm.

Ndaj dhe jemi këtu, ndaj dhe jam këtu. Nuk e harrojmë, dhe mos harroni. Nuk është lojë shahu. Mos e merr kaq lehtë Edi Rama, është jeta e miliona shqiptarëve.Thirri mendjes!

Nuk ka për të pasur zgjedhje pa opozitën dhe pa popullin. Nuk ka për të pasur një parlament monist.

Mos abuzo me natyrën tonë demokratike, paqësore dhe europiane sepse kur gjithçka të shterohet, shqiptarët dhe unë në krye të tyre, do të ta mësojmë që nuk është lojë shahu.

E dini që vetëm në Elbasan, 1/3 e kartave të identitetit i kanë mbledhur. I kanë mbledhur. Mendoni që kështu shkohet në zgjedhje? Mendoni se kështu do ta marshoni Shqipërinë dhe shqiptarët deri në zgjedhje?

Gaboheni rëndë. Kjo nuk ka për të ndodhur.

Qeveri teknike, që do të zbatojë ligjin e dekriminalizimit, që do të luftojë paktin e drogës dhe parave të drogës në zgjedhjet e ardhshme, që do të garantojë votën e lirë të shqiptarëve, e të pacënuar.

Ne kemi qenë dhe jemi të bashkuar. Ne kemi qenë shumë, dhe sot jemi më shumë. Kemi qenë të fortë e sot jemi akoma më të fortë.

Kemi qenë të duruar, por sot jemi më të paduruar.

Ose zgjedhje të lira dhe të ndershme, ose zgjedhje të tjera në Shqipëri nuk do të ketë. Bashkimi i shqiptarëve nuk do të lejojë më kurrë kthimin në monizëm.

Ka vetëm një rrugë përpara: zgjedhje të lira dhe të ndershme. Rikthimin e Shqipërisë tek shqiptarët. Republikë e Re!

Zoti i bekoftë shqiptarët!

Zoti e bekoftë Shqipërinë!

Mesazhi i Lulzim Bashës në ditën e 87 të protestës për zgjedhje të lira e të ndershme 

Një ditë pas marshimit të 13 Majit në Sheshin e Lirisë, qytetarët u bashkuan për të 85-ën ditë rradhazi ku sëbashku me Lulzim Bashën folën për kauzën e protestës dhe Republikën e Re.

Dhjetëra studentë, të rinj dhe profesionistë treguan përse u bënë pjesë e qëndresës dhe bashkimit më të madh popullor për liri dhe demokraci.  Ata thanë se vlerat dalin fituese ndaj antivlerave që kjo qeveri promovon dhe mbështet.

Të rinjtë deklaruan se në qendër të kësaj kauze të madhe nuk janë vetëm interesat e secilit prej qytetarëve të Sheshit të Lirisë, apo atyre që ngrenë zërin kundër padrejtësive. Në themel të kësaj proteste, sipas studentëve, është vetë individi, qytetari, të drejtat e tij të barabarta, jo vetëm mes njëri-tjetrit por edhe mes çdo europiani, që qeveriset nga vullneti dhe zgjedhja që ka bërë përmes votës së lirë.

“Sa më shumë fuqizohemi ne, aq me shumë na sulmojnë”– tha një prej studentëve të pranishëm, duke i bërë thirrje çdo të riu e të reje të bashkohet në shesh për të vërtetat e tyre, jo për të vërtetat që i imponojnë përmes propagandës qeveritare, mediatike.

Të rinjtë treguan se pjesa më e madhe e tyre duan të largohen, në mënyrë që të gjejnë një të ardhme më të mirë, studim, punësim dhe siguri në jetë. Profesionistët thanë se shumë kolegë të tyre studiojnë gjuhë të huaja, në mënyrë që njohuritë profesionale t’i ushtrojnë në një shtet tjetër, që do i paguajë dhe trajtojë si qytetarë të denjë. Qindra mijëra të tjerë aplikojnë për llotarinë amerikane, sepse kur je shqiptar, të largohesh nga vendi yt, Shqipëria, konsiderohet fat i madh. “Kjo nuk është Shqipëria që duam”, thanë studentët të cilët formimin dhe kontributin e tyre për vendin duan ta japin në vendin e tyre.

Mungesa e alternativave në politikë, në shoqëri dhe së fundmi edhe në hapsira për t’u shprehur është ajo që të rinjtë, qytetarët shqiptarë denoncojnë si vrasëse të shpresës dhe mundësisë se gjërat mund të ndryshojnë për mirë.

Lulzim Basha i kujtoi qytetarëve premtimin se të vetmet zgjedhje që do të mbahen në Shqipëri janë zgjedhjet e lira dhe të ndershme dhe garanci e kësaj është vetë qëndresa 85 ditore e qytetarëve, të cilëve Lulzim Basha i rezervoi falenderim dhe mirënjohjen më të thellë.

“Falenderoj nga zemra gjithsecilin prej jush, qindra mijëra shqiptarë që sfiduat frikën, provokimet, shantazhet dhe propogandën qeveritare, që u ngritët mbi besimin dhe shpresën e zemrës tuaj për të ardhmen tuaj dhe të fëmijëve tuaj në sheshin e Republikës së Re.

Dua të falenderoj në veçanti ata mijëra të rinj, studentë, të sapodiplomuar, të punësuar apo të papunë, gjimnaziste, brezin e ri që e mbushi si asnjëherë Sheshin e Lirisë dhe që votoi me praninë e tij Republikën e Re të shqiptarëve.

Mirënjohje e thellë edhe për ata qindra mijëra shqiptarë që nuk u bashkuan dot fizikisht, por ishin me ne me mendje e me shpirt, e na ndoqën deri në përfundimin e referendumit tonë popullor.”

Falenderimet zoti Basha ia drejtoi edhe aleatëve, për qëndresën ndaj presioneve dhe ofertave të pista për të braktisur kauzën e qytetarëve, votën e lire.

“Mirënjohje të veçantë kam për aleatët e koalicionit tonë opozitar, për partitë opozitare, për kryetarët e tyre. Askush në historinë 27 vjeçare nuk ka qënë me më shumë fat se unë si kryetar i opozitës për besnikërinë, qendresën, besimin tuaj të patundur të dashur aleatë. Por mbi të gjitha për besnikërinë që keni demonstruar së bashku me mua ndaj qytetarëve shqiptarë dhe kauzës së tyre të drejtë.

Sepse thelbi i lëvizjes tonë, thelbi i bashkimit qytetar ka qënë dhe mbetet zëvëndësimi i një kupole politike të korruptuar e cila kontrollohet nga krimi, droga dhe oligarkët, me një qeveri që kontrollohet nga qytetarët shqiptarë. Kjo mund dhe duhet të vijë vetëm përmes zgjedhjeve të lira e të ndershme.”

Basha i premtoi të rinjve të pranishëm, profesionistëve dhe studentëve se nuk do të heqë dorë nga kërkesa e tyre për garantimin e zgjedhjeve të lira, të cilat janë të vetmet që do të mbahen në Shqipëri.

“Nëse republika e vjetër e krimit, drogës dhe e vesit nuk tërhiqet nga plani për t’u angazhuar në një proces farsë elektoral monist, e nëse nuk pranon përmes dialogut politik t’i hapë rrugë zgjidhjes së butë me zgjedhje të lira e të ndershme, atëhere Republika e Re do të marrë në dorë, në të gjitha format dhe mënyrat, fatet e qytetarave, institucionet e republikës, Kushtetutën e re, ligjin e ri të republikës dhe së bashku paqësisht por me vendosmëri totale do të përmbysim republikën e vjetër.

Republika e Re e cila së shpejti do të zëvëndësojë institucionalisht, ligjërisht dhe realisht të vjetrën që po bie, kërkon tranzicionin e butë përmes zgjedhjeve të lira dhe të ndershme të cilat mund të sigurohen vetëm përmes një qeverie teknike që ndahet nga krimi, që lufton drogën, që përpiqen të japë të gjitha garancitë dhe besimin përmes reformës zgjedhore, votimit elektronik dhe numërimit elektronik.”

Lulzim Basha tha se askush nuk do të lëshojë nga interesi i qytetarëve për të marë diçka për veten e tij dhe se kjo rrugë e republikës së re do të shkojë deri në fund duke u finalizuar me fitoren e kauzës qytetare në marshimin e tretë dhe të rradhës së shqiptarëve të lirë.

Njoftim per shtyp, 14 Maj 2017

Vëllezër e motra

Mëngjesi i parë i Republikës së Re ka aguar në zemrat e çdo shqiptari e çdo shqiptareje që u bashkua dje në protestën më madhështore, në bashkimin më të madh shqiptar në Sheshin e Lirisë dhe miliona të tjerëve që u bashkuan me zemër me ne në referendumin për Republikën e Re të qytetarëve shqiptarë.

Sot dua t’ju falenderoj nga zemra gjithsecilin prej jush, qindra mijëra shqiptarë që sfiduat frikën, që sfiduat provokimet, që sfiduat shantazhet, që sfiduat diversionet, që sfiduat propogandën qeveritare, që u ngritët mbi besimin dhe shpresën e zemrës tuaj për të ardhmen tuaj dhe të fëmijëve tuaj në sheshin e Republikës së Re.

Mirënjohja ime është mirënjohja e njërit prej jush por mbi të gjitha është mirënjohja e miliona shqiptarëve sot dhe brezave që do vijnë, për aktin madhor që shpallëm dje, për Republikën e Re, republikën e qytetarëve shqiptarë, republikën tuaj.

Dua të falenderoj në veçanti ata mijëra të rinj e të reja, studente dhe studentë, të sapodiplomuar, të punësuar apo të papunë, gjimnaziste dhe gjimnazistë, brezin e ri që e kishte mbushur si asnjëherë Sheshin e Lirisë dhe që votoi me praninë e tij, me praninë tuaj për republikën europiane, Republikën e Re të të rinjve dhe të rejave shqiptare.

Dua të falenderoj qendrestarët e 18 Shkurtit dhe Çadrës së Lirisë, kantjerit më të mrekullueshëm politik që ka njohur Shqipëria dhe Ballkani. E djeshmja ishte dita e masivitetit më të madh që ka njohur Shqipëria në një protestë referendare por e djeshmja ishte po kështu dita e cilësisë më të lartë politike të një proteste në historinë e Shqipërisë dhe kjo është merita e zemrës dhe e shpirtit tuaj, e Çadrës së Lirisë, e qendresës tuaj. Nuk shpiket dot, nuk ka akademi politike t’i trajnojë njerëzit, pjesëmarrësit, folësit, ata që i dhanë zë zërit tuaj, halleve tuaja, problemeve tuaja, shpresave tuaja. Nuk ka akademi politike, as universitet, as konsulent që ta bëjë këtë siç e bëtë ju Çadra e Lirisë, laboratori politik i lirive politike.

Këtu ku triumfon e vërteta mbi rrenën dhe mashtrimin, realiteti mbi fasadën, liria mbi frikën, këtu u poqën, u ngritën dhe u lartësuan vlerat e vërteta, u lartësua synimi, objektivi dhe vendimi i madh që shpallëm dje. Ai nuk më takon mua, ai nuk i takon Partisë Demokratike, ai u takon ju, i takon çdo shqiptari e çdo shqiptareje. Faleminderit, mirënjohje të thellë këtij monumenti të lirisë, këtij monumenti të lirive politike, kësaj shkolle të të drejtave dhe lirive njerëzore dhe civile që tejkaloi përmes qendresës tuaj, përmes bashkimit tuaj edhe mësimet më të shquara të lirisë dhe demokracisë europiane.

Sot ju jeni mishërimi i vlerave të përbashkëta europiane. Sot ju jeni mishërimi, prova e gjallë e karakterit dhe identitetit europian të shqiptarëve. Sot ju jeni përfaqësuesit e denjë të Shqipërisë europiane dhe euroatlantike. Të vendosur përballë, të pathyeshëm ndaj së djeshmes që po largohet ndaj republikës së vjetër të vesit, të drogës dhe të krimit, me virtytin tuaj, me vlerat tuaja, me qendresën tuaj.

Këtu, me këtë qendresë që lindi nga 18 Shkurti, këtu lindi dhe u bë realitet edhe ideja e Republikës së re, ku njëherë e përgjithmonë vendimarrja do të jetë në duart e qytetarëve shqiptarë. Ku çdo zyrtar i lartë i shtetit nuk do të zgjidhet as në pazare, as në kulisa, por do të zgjidhet vetëm me votën e lirë të qytetarëve shqiptarë dhe do të japë llogari për çdo veprim para qytetarëve shqiptarë me një mekanizëm të ri, të një kushtetute të re e cila do të mundësojë kontrollin e vërtetë të qeverisjes nga qytetarët.

Po, thelbi i lëvizjes tonë, thelbi i bashkimit tuaj, ka qenë dhe mbetet të zëvëndësojmë një kupolë politike të korruptuar e cila kontrollohet nga krimi, droga dhe oligarkët me një qeveri që kontrollohet nga ju qytetarët shqiptarë. Kjo mund dhe duhet të vijë vetëm përmes zgjedhjeve të lira e të ndershme.

Ky ishte mesazhi më i qartë i pjesëmarrjes madhështore, më madhështore në 27 vite në referendumin për Republikën e Re, dje ditën e shtunë në këtë shesh. Mirënjohje e thellë edhe për ata qindra mijëra shqiptarë që nuk u bashkuan dot në bashkimin më të madh të shqiptarëve fizikisht por ishin me ne me mendje e me shpirt, e na ndoqën deri në përfundimin e referendumit tonë popullor.

Mirënjohje të veçantë kam për aleatët e koalicionit tonë opozitar, mirënjohja ime për partitë opozitare, për kryetarët e tyre. Askush në historinë 27 vjeçare nuk ka qënë me më shumë fat se unë si kryetar i opozitës për besnikërinë, qendresën, besimin tuaj të patundur të dashur aleatë. Por mbi të gjitha për besnikërinë që keni demonstruar së bashku me mua ndaj qytetarëve shqiptarë dhe kauzës së tyre të drejtë.

Vëllezër e motra

Mesazhi ynë është i qartë. Shqiptarët folën. Nuk ka e nuk do të ketë zgjedhje fasadë. Nuk ka dhe nuk do të ketë parlament të diktuar nga krimi dhe droga. Nuk ka dhe nuk do të ketë kurrë më zgjedhje pa popullin, zgjedhje pa opozitën, zgjedhje moniste.

Republika e Re e cila së shpejti do të zëvëndësojë institucionalisht, ligjërisht dhe realisht të vjetrën që po bie, kërkon tranzicionin e butë përmes zgjedhjeve të lira dhe të ndershme të cilat mund të sigurohen vetëm përmes një qeverie teknike që ndahet nga krimi, që lufton drogën, që përpiqen të japë të gjitha garancitë dhe besimin përmes reformës zgjedhore, votimit elektronik dhe numërimit elektronik.

Por le të jemi fare të qartë. Republika e Re e ka nisur rrugën e saj, nuk ka dhe nuk do të ketë asnjë hap prapa. Nëse republika e vjetër e krimit, drogës dhe e vesit nuk tërhiqet nga plani ogurzi dhe i papranueshëm për shumicën dërmuese të shqiptarëve për të bërë zgjedhje fasadë, për të zgjedhur parlament dhe qeveri me diktatin e krimti dhe drogës dhe jo me votën e qytetarëve shqiptarë, për t’u angazhuar në një proces farsë elektoral monist, nëse nuk pranon përmes dialogut politik t’i hapë rrugë zgjidhjes së butë me zgjedhje të lira e të ndershme, atëhere Republika e Re do të marrë në dorë në dorë në të gjitha format dhe mënyrat fatet e qytetarave, institucionet e republikës, Kushtetutën e re, ligjin e ri të republikës dhe së bashku, paqësisht por me vendosmëri totale do të përmbysim republikën e vjetër.

Me popullin nuk mund të luhet më. Zgjidhjet para nesh janë të qarta. Krimi dhe droga duhet të çmontohen. Ose përmes një qeverie teknike dhe zgjedhjeve të lira, ose përmes përballjes totale, midis të vjetrës që do të ikë dhe të resë që ka ardhur.

Ndaj le të jemi fare të qartë për rrugën që na pret. Le ta dinë skeptikët, cinikët, ndonjë media e blerë që dje rrekesh si e mjerë të pasqyronte përmes propagandës dhe censurës qeveritare, të censuronte pjesëmarrjen gjigande masive të paprecedentë dhe çdo vegël tjetër të blerë nga Edi Rama me lekët e shqiptarëve, le ta dinë mirë se, ajo që nisëm dje, nuk do të ndalet.

Kishim dy zgjidhje përpara. Njërën e kemi bërë, tjetrën e ka në dorë republika e vjetër.

Zgjidhja e parë ishte: nëse do të ulnim kokën e do të pranonim fatin tonë si skllevër të republikës së vjetër të krimit, të drogës e të oligarkëve. Përgjigjen republika e vjetër e mori dje, masivivisht nga bashkimi më i madh i shqiptarëve. Kurrë! Kurrë!

Zgjedhja e dytë është le ta dëgjojë çdo mik, çdo mbështetës, çdo qytetar i Republikës së re, çdo shqiptar që i do të mirën vetes së vet, familjes së vet dhe vendit, çdo mik i huaj, ta dëgjojnë miqtë tanë, ta dëgjojnë kundërshtarët tanë, zgjidhja tjetër është kjo; ose do ta çmontojmë krimin dhe drogën në pushtet e do të rikthejmë pushtetin dhe Shqipërinë qytetarëve, përmes zgjedhjeve të lira e të ndershme, ose do ta përmbysim republikën e vjetër përmes bashkimit, marshimit, qëndresës popullore të qytetarëve të Republikës së re.

Rrugë tjetër nuk ka. Në një mënyrë apo tjetër,  krimi do të çmontohet, droga do të çmontohet , republika e vjetër do të përmbyset.

Rruga që kemi zgjedhur është e vetmja rrugë për të ardhmen europiane të Shqipërisë. Çdokush tjetër që bën avokatin e qeverisë të lidhur me bandat, krimin dhe drogën, çdokush tjetër që nuk gjen akoma guximin për të braktisur interesat e veta personale të pushtetit  apo të pasurisë dhe për të luftuar për të vetmin interes që lufton sot Partia Demokratike, Koalicioni Opozitar, që është interesi i qytetarëve shqiptarë në braktisje totale të interesave tona të ngushta, le ta dijë se pazar dhe kompromis me zgjedhjet e lira e të ndershme,  nuk ka për të patur kurrë.

E pra këto janë mesazhet e mëdha të ditës së djeshme, 13 Majit të Republikës së Re së qytetarëve shqiptarë. Fatlumë janë ata, që përjetojnë këto ditë të mëdha të historisë tonë kombëtare. Ditët e zgjimit të ndërgjegjes individuale europiane të çdo shqiptari e çdo shqiptareje. Ditët kur luftojmë për fëmijët tanë dhe për fëmijët e fëmijëve tanë që të kenë një Shqipëri si gjithë Europa. Sakrificat që keni bërë deri më sot, nuk na kanë lodhur, na kanë bërë më të fortë, më të mençur, më të vendosur më të pathyeshëm.

Betetja vazhdon e do të vazhdojë deri në fitoren totale.

Zoti e bekoftë Shqipërinë!

Zoti e bekoftë Republikën e Re!

Zoti i bekoftë shqiptarët!

Mesazhi i Lulzim Bashës në ditën e 85-të të qendresës kombëtare për zgjedhje të lira dhe të ndershme, 14 Maj 2017

Vëllezër dhe motra,

Zonja dhe zotërinj,

Bashkëqytetarët e mi,

Të rinj e të reja,

Student dhe student, dhe ju të dashur fëmijë shqiptarë, drita e syrit tonë.

Kurrë më parë nuk ka mbledhur Shqipëria kaq shumë shqiptarë në një vend të vetëm si sot.

Kurrë më parë nuk ka bekuar drita e Perëndisë, drita e Zotit një bashkim kaq të madh zemrash dhe vullnetesh si sot.

Kjo nuk është protestë, ky nuk është manifestim, ky është referendumi i shqiptarëve për Republikën e Re.

Ju shoh dhe e ju dëgjoj edhe ju atje në fund fare para heroit kombëtar Skënderbeut, ju shoh e ju përshëndes, siç ju kam dëgjuar 85 ditë e 85 netë me radhë që nga fillimi i lëvizjes tonë të madhe kombëtare, popullore e qytetare në bashkimin e 18 Shkurtit.

Sot jemi 3 herë më shumë, mbi 600 mijë shqiptarë në këtë shesh dhe miliona të tjerë bashkë me ne në këtë referendum historik.

Me 18 shkurt, 3 muaj më parë u bashkuam në këtë shesh për t’i thënë ndal keqqeverisjes, ndal drogës, ndal krimit me lidhje qeveritare dhe për të kërkuar me doemos zgjedhjet e lira si themeli i bashkëjetesës demokratike, themeli i mirëqenies, i sigurisë dhe i të ardhmes europiane të kombit tonë.

U bashkuan në këtë shesh për 85 ditë e për 85 netë me radhë shqiptarë nga gjithë Shqipëria, intelektualë, profesorë, artistë, sportistë, fermerë, pensionistë, gjimnazistë, punëdhënës e punëmarrës dhe miq nga e gjithë bota që na qëndruan e na qendrojnë në krah në betejën tonë të pakthyeshme për demokraci të vërtetë.

Ajo që nisi si rruga e bashkimit, i vetmi shteg për miliona shqiptarë të shtypur, të nëpërkëmbur, të zhgënjyer, të dhunuar, të mashtuar e të shpunësuar.

Ajo që nisi si shtegu i vetëm përpos dëshpërimit që kish kapluar të madh e të vogël, gegë e toskë, demokratë e socialistë, myslimanë e të krishterë, çdo shqiptar, për shkak të qeverisjes dhe shtetit të dështuar e kriminal, që ju shkatërroi ekonominë, që ju vrau vendet e punës, që ju shkatërroi shëndetësinë dhe arsimin dhe ju la si rrugëdalje vetëm dëshpërimin ose emigracionin.

Ajo që nisi si një kërkim thellë në shpirtrat tanë për rrugën e vetme të daljes nga gjendja e mjerë e vendit, ajo u kthye në motorrin më të fuqishëm të shpresës që vrau frikën anembanë vendit, që ngjalli kurajon në zemrat e çdo shqiptari, që mbushi çdo shqiptar e çdo shqiptare të ndershme përmes frymës së shenjtë të besimit në Zot, e në atdhe, e në Shqipëri, për një të nesërme më të mirë për fëmijët tanë, shpresën dhe vendimin e madh për ta shporrur dëshpërimin, për ta mposhtur frikën, për ta përmbysur republikën e vjetër e për të ngritur së bashku të renë, të vetmen republikë të qytetarëve shqiptarë.

Ja tek jemi sot, ja tek jemi sot në një bashkim që nuk e ka parë Shqipëria, nuk e ka parë Ballkani, nuk e ka parë Europa, nuk e ka parë bota. Ky nuk është thjesht dhe vetëm bashkimi kundër keqqeverisjes, ky nuk është thjesht dhe vetëm marshimi kundër të keqes, kjo është shpallja e shpresës dhe besimit tek vetja juaj, tek familjarët tuaj dhe gjithë sëbashku tek Shqipëria jonë.

Këtu kemi ardhur sepse besoni tek Republika e Re, këtu nuk keni ardhur sepse besoni tek një njeri, as vetëm tek një parti, sepse arritja më e madhe e këtyre tre muajve qëndresë dhe bahskim që ka hyrë në historinë tonë kombëtare është ripërtëritja e besimit të çdo shqiptari tek vetja e vet. Përtëritja e besimit të çdo shqiptari tek vetja e vetë, ripërtëritja e besimit tek vetja e vetë, tek familja e vetë dhe të gjithë së bashku tek njëri tjetri. Zoti na e jep këtë besim dhe nuk ka njeri në botë të na e marrë dhe përmes këtij besimi ka lindur, shpresa që nuk vdes kurrë, shpresa dhe vendimi për Republikën e Re.

E nisëm për një objektiv; zgjedhje të lira dhe të ndershme si themeli i demokracisë por sot jemi këtu për shumë më shumë. Nuk jemi mbledhur kaq shumë sot për një ndryshim të vetëm, as për një ndryshim të vogël por për ndryshimin më të madh në 27 vite të historisë tonë kombëtare. Gjithçka duhet të ndryshojë dhe falë bashkimit tonë, falë qendresës tuaj, me ndihmën e Zotit gjithçka do të ndryshojë, asgjë nuk do të jetë më si më parë. Republika e vjetër sot shpallet objekt i Arkivit të Muzeut Kombëtar.

Ne shqiptarët e bashkuar nuk e pranojmë, nuk e njohim dhe nuk do ta njohim më republikën e vjetër të krimit dhe drogës. E si mund të pranojnë më shqiptarët një shtet ku 18 vjeçari shtyhet drejt vetëvrasjes në qelitë e burgut për një cigare hashash dhe trafikantët e hashashit, heroinës dhe kokainës bëhen deputetë, kryetarë bashkish, ministra, drekojnë e darkojnë me të parin e qeverisë, mbushin valixhet dhe kontot e tij bankare.

E si mund të pranojmë një vend kur të papunët kërkojnë më kot bukën e përditshme për fëmijët e tyre. Mijëra familje enden pa ndihmë sociale pa kushtet minimale për të paguar dritat dhe ujin ndërsa pushtetarët, kriminelët dhe oligarkët ia shtrojnë me dreka dhe darka që kushtojnë secila prej tyre sa ndihma ekonomike e një qyteti të tërë.

E si mund të pranojmë republikën e vjetër, republikën e turpit, ku pacientët shqiptarë dhe familjarëte tyre rropaten spitaleve që vetëm emrin kanë spitale. Në farmacitë spitalore që vetëm ilaçe për ta nuk ka. Me mungesë mjetesh e përbuzjesh totale, me një sistem të kolapsuar sepse qindra miliona euro të taksave të shqiptarëve i merr me një dorë Edi Rama me oligarkët dhe koncensionet kriminale të shendetësisë.

E si mund të pranojmë si republikën e vjetër që nis ushtritë e taksidarëve dhe inspektorëve në qafën e biznesit të vogël, shtyllës kurrizore të ekonomisë shqiptare duke i shantazhuar, gërryer deri në qindarkën e fundit me taksa të larta dhe me haraçe, duke i privuar nga buka e gojës në familjet e tyre, ndërkohë që vetë ata dhe pushtetarët e korruptuar ndërtojnë vila, hotele dhe blejnë pasuri në vendet më të shtrenjta të Europës me paratë që i grabisin qytetarëve të tjhjeshtë.

E si mund të pranojmë republikën e vjetër që la mijëra maturantë jashtë auditorëve, me tarifat e rritura studentonte me abuzivitetin dhe kaosin që krijoi, me qindra e mijëra studentë të tjera që i detyroi të ndërpresin studimet për shkak të kushteve të pafavorshme, ndërkohë që një grusht okigarkësh dhe pronarësh universitetesh të bërë njish me pushtetin e korruptuar të Edi Ramës, bëjnë miliona euro vit për vit nga paratë e djersës dhe gjakut të shqiptarëve.

E si mund të pranojmë në këtë republikën tonë ku të përdjekurit politikë poshtërohen, vidhen, dhe pastaj u vihet për ministër i Brendshëm njeriu që i torturoi për fajin e vetëm se gëzuan ditën që vdiq diktatori.

E si mund të pranojmë ne republikën e vjetër që e shndërroi vendin në Kolumbinë e Europës. Një të katërtën e tokave bujqësore ua rrëmbeu fermerëve që i ktheu në skllevër. E mbushi me drogë dhe e futi në tunele dhe e shet për pasurinë dhe pushtetin e Edi Ramës dhe një grushti kriminelësh e politikanësh të lidhur me të.

E si mund të pranojmë ne republikën e vjetër që i rrënoi fermerët shqiptarë. Asnjë lekë subvension por dhjetra e qindra taksa e fatura të pakapërdishme. Një treg i rrënuar nga monopolet që bëjnë të pamundur shitjen e djersës e sakrificës së tyre me dinjitet e për të mbajtur familjet gjallë.

E si mund të pranojmë ne republikën e vjetër shtresa e mesme, motorri i shoqërisë shqiptare, inxhinjerët, financierët, ekonomistët, jursitët, profesionistët të cilëve me taksat e rritura dhe kontrollet tatimore ju bëhet presion që të mbyllin gojën, ju bëhet presion që të ulin kokën.  Sot shtresa e mesme është nën presionin më të madh taksativ dhe ekonomik në Ballkan dhe gjithë Europën.

Kjo republikë e vjetër, kjo kastë dhe kupolë politike ka vetëm një axhendë dhe interes, interesin e pasurimit të tyre, interesin e pushtetit të tyre, interesin e kontrollit të tyre dhe nuk kanë në axhendë asnjë nga interesat tuaja, as të majtëve dhe as të djathtëve por vetëm interesat e veta kriminale.

Pasi kanë vjedhur dhe grabitur çdo aset, pasi ka abuzuar me qindra miliona euro të tenderave, tani republika e vjetër bëhet gati për vjedhjen më të madhe, vjedhjen më kriminale në histori, vjedhjen e zgjedhjeve të ardhshme që shqiptarët të mos kenë një parlament të diktuar nga vota e tyre por një parlament të diktuar nga krimi, dhe një qeveri të diktuar nga krimi. Ne jemi bashkuar dhe bashkë i kemi thënë ndal këtij projekti. Ne jemi dhe ju jeni bashkuar dhe u kemi thënë se zgjedhje pa opozitën nuk ka dhe  nuk do të ketë, zgjedhje me krimin dhe drogën nuk ka dhe nuk do të ketë. Do të ketë vetëm zgjedhje të lira dhe të ndershme me një qeveri teknike që nxjerr jashtë kriminelët, që lufton drogën dhe u kthen shqiptarëve besimin dhe garancinë te vota e tyre e lirë.

Nuk ka forcë më të madhe se forca e bashkimit tuaj. Nuk ka forcë më të shenjtë se forca e kauzës sonë të drejtë. Ndaj sot jemi 5, 10, 15 herë më shumë se dje e nesër do të jemi edhe më shumë.

Partia Demokratike që ju e lindët për kauzën e madhe të pruralizmit bëhet çdo ditë më e madhe dhe më e fortë duke luftuar me ju dhe për ju për kauzën e zgjedhjeve të lira dhe të ndershme. Historia na tregon se askush nuk dobësohet dhe as nuk bie nga lufta për kauzat e drejta. Lufta për kauzën e drejtë i bën njerëzit më të fortë, i bën lëvizjet më të pamposhtme, e bën bashkimin tonë të pathyeshëm kështu siç është sot në këtë shesh të madh të lirisë.

Beteja jonë bëhet për vlerat që ndërtuan Europën dhe Amerikën. Në asnjë vend të Europës nuk luftohet më fort për Europën se në këtë shesh të lirisë, në këtë shesh të bashkimit, në këtë shesh të qendresës. Ne jemi mbledhur së bashku sot për një vendim të madh. Për të vetmin vendim që e çon Shqipërinë në Europë, për të vetmin vendim që rikthen fatet e qytetarëve, fatet tuaja në duart tuaja. Vendimin për t’i thënë njëherë e përgjithmonë lamtumirë republikës së vjetër, komplotit politik dhe ekonomik kundër xhepave të shqiptare, kundër mirëqënies tuaj dhe fëmijëve tuaj, kundër të drejtave dhe lirive tuaja themelore.

Ne jemi këtu që përmes republikës së re t’ju kthejmë shqiptarëve atë që është e shqiptarëve. T’u japim 650 mijë pensionistëve shqiptarë të drejtën dhe mundësinë që në krye të 4 viteve të para të republikës së re, pensioni minimal të jetë 250 mijë lekë në muaj.

T’u japim studentëve shqiptarë tarifa të përballueshme bashkë me premtimin e republikës së re se askush bir apo bijë shqiptari nuk do të mbetet pa studiuar për shkak të pamundësive ekonomike, duke anuluar ligjin për arsimin e lartë, duke u dhënë tarifa të përballueshme me autonomi të plotë studentore, ju qindra e mijëra studentëve që keni mbushur këtë shesh si asnjëherë më pare.  Studentët që përfundojnë studimet do kenë mundësinë e stazheve të paguara të punës me një vlerë minimale prej 200 mijë lekësh në muaj në bazë të meritës tuaj si një urë nga auditorët e shkollave drejt tregut të punës, dhe si bekim i Republikës së Re, pronë e prindërve tuaj për tu uruar fillimin e mbarë të jetës këtu në Shqipëri, këtu në vendin tuaj.

Republika e Re do të jetë republika e taksave të ulëta, e taksës së sheshtë duke i dhënë fund taksave të larta, vjedhjes së madhe qeveritare në këto 27 vite. Me 9 % taksën e sheshtë ne do t’i japim frymëmarrje sipërmarrjes shqiptare, do të injektojmë 1 miliardë euro në ekonominë kombëtare, do të ndezim motorrët e saj për të çliruar energji pozitive, e do të krijojë mijëra vende pune, e do të përmirësojmë jetën e shqiptarëve, e do të rrisë rrogat dhe fuqinë blerëse të tyre.

Republika e Re e ka një premtim të madh për çdo sipërmarrës të vogël, për gjithë biznesin e vogël shqiptar, të një takse maksimale e cila kombinon taksat qendrore dhe lokale  dhe kurrë nuk mund të jetë më shumë se 1.5% e xhiros vjetore me një pullë në ambientet e jashtë të biznesit për t’i thënë lamtumirë një herë e përgjithmonë çdo inspektori, çdo tatimori e çdo taksidari.

Republika e Re do t’i kthejë klasës së mesme shqiptare përmes tatimit 9% dinjitetin dhe mundësinë ekonomike për të vazhduar motorri i përparimit, së bashku me elitën e mendjes dhe të shpirtit shqiptar.

Republika e Re do të kthejë mbi 40 mijë familje të hequra padrejtësisht nga ndihma ekonomike, në skemën e ndihmës ekonomike ku paratë që u jepen me një dorë nuk do t’u merren me dorën tjetër.

Sepse për të gjitha familjet me ndihmë ekonomike Republika e Re do të paguajë faturat e energjisë deri në 300 KV dhe faturat e ujit të pijshëm për konsum familjar.

Republika e Re do të investojë më shumë se gjithçka tjetër tek fëmijët e shqiptarëve, tek fëmijët tanë, tek fëmijët tuaj.

Nuk do të ketë asnjë ndërtesë më madhështore e të mirëpajisur në asnjë fshat dhe asnjë lagje qyteti se shkollat e fëmijëve tuaj, shkollat e fëmijëve shqiptarë.

Me dyfishimin e korpusit të mësuesve, me rritjen e rrogave të tyre, do të mundësojmë për çdo fëmijë shqiptar, nga mosha 5 deri në 18 vjeç, të kenë drekën falas në shkollat e Republikës së Re, me orarin nga ora 08:00 deri në orën 16:00 duke përfshirë bërjen e detyrave të shtëpisë, aktiviteteve sportive.

Fëmijët e shqiptarë do të dalin nga tempujt e arsimit vetëm kur prindërit e tyre të dalin nga puna. Republika e Re do t’i heqë fëmijët e shqiptarëve nga rruga.

Fermerët shqiptarë duhet ta dinë se në Republikën e Re paratë që sot zhduken në xhepat e qeveritarëve të korruptuar dhe oligarkëve barkderra, do të kthehen në subvencione.

Plot 100 milionë euro në vit për çdo familje fermere, në bazë të prodhimit, në bazë të tokës që punojnë dhe krerëve që mbarshtojnë.

Dhe mbi 50 milionë euro të tjera në vit për rrugë, vaditje, kullim, tregje. Doganat do ta ulin traun për prodhimet e eksportit që ju konkurojnë në mënyrë të pandershme tarifat e Republikës së Re do ta barazojnë djersën e fermerit shqiptar me djersën e fermerit europian.

Pronarët e ligjshëm e dinë tashmë se bashkë me reflektimin tonë për kauzën tuaj të drejtë, për të cilën bëmë por duhet të kishim bërë më shumë, vjen zotimi im, zotimi ynë për hedhjen menjëherë poshtë çdo platforme neokomuniste për t’ju rishpronësuar.

Pronat tuaja do të kthehen apo kompensohen vetëm sipas vlerës së tregut dhe asnjë kriteri tjetër antikombëtar dhe antieuropian.

Vëllezër e motra emigrantë, ju që jeni larg vendit tuaj dhe sot jeni shumë më shumë se para tre vitesh për shkak të vrasjes së shpresës, pasigurisë e varfërisë.

Dijeni se në Republikën e Re akti i parë do të jetë e drejta juaj për të votuar njësoj si familjarët tuaj përmes sistemit të votës elektronike, zëri juaj do të dëgjohet dhe kombi do të bashkohet në parlamentin e ri të Republikës së Re.

Të gjitha këto janë të mundura dhe të realizueshme nëse kuçedra e republikës së vjetër largohet nga burimi i resurseve, pasurive dhe parave të shqiptarëve.

Të gjitha këto janë të mundshme vetëm nëse presim një herë e përgjithmonë lidhjen mes krimit dhe politikës, diktatin e drogës dhe jetën e qytetarëve shqiptarë.

Asgjë nuk do të ndryshojë, keq e më keq do të bëhet Shqipëria nëse ja lejojmë diktatit të krimit dhe drogës të vendosë në vend të qytetarëve shqiptarë përmes zgjedhjeve farsë, përmes zgjedhjeve fasadë të diktuara nga droga dhe krimi.

Gjithçka do të ndryshojë, asgjë nuk do të jetë si më parë nëse ne së bashku marrin fatin tonë në duart tona.

Republika e Re nuk mund e nuk do të jetë kurrë republika e politikanëve, as republika e partive politike. Nuk do të jetë republika ku Parlamenti është noteri i Kryeministrit.

Në Republikën e Re me Kushtetutë dhe me ligj, anëtarët e Parlamentit do të zgjidhen vetëm si produkt i vullnetit tuaj qytetare dhe qytetarë shqiptarë, do të përfaqësojnë vetëm vullnetin tuaj dhe do të jenë kërkues, llogarikërkues dhe avokatët tuaj para qeverisë dhe institucioneve shtetërore.

Që kjo të ndodhë vellezër e motra, ne duhet të kemi patjetër zgjedhje të lira e të ndershme.

Zgjedhje të lira e të ndershme ku çdo qytetar të mund të shprehë vullnetin e tij apo të saj i pakërcënuar, i pashitur, i pablerë, paterrorizuar nga krimi dhe droga, apo nga pushtetarët që e kanë kthyer administratën në një garnizon të tyre elektoral.

Nuk mund të ketë zgjedhje të tjera në Shqipëri.

Nuk mund të ketë zgjedhje moniste në Shqipëri.

Koha e monizmit shkoi një herë e përgjithmonë. Ne as nuk do të lejojmë, as nuk do pranojmë kurrë rikthimin e monizmit dhe zgjedhjet pa opozitën t’i harrojë republika e vjetër e çdokush që qëndron pas saj.

Por do të ketë zgjedhje të lira e të ndershme. Sepse forca jonë është forca e bashkimit dhe qëndresës. Këtë betejë e nisëm së bashku. Ju pyeta a jeni gati të luftojmë. Ju premtova se jam gati t’ju udhëheq drejt një beteje pa kthim për Shqipërinë europiane, për Shqipërinë e zgjedhjeve të lira e të ndershme.

Dhe sot jam këtu për t’ju thënë se unë dhe Partia Demokratike e kemi mbajtur premtimin që ju dhamë 85 ditë më parë.

Nuk kanë rreshtur kritika, sulmet, shpifjet, qëndrimet totalisht të padrejta ndaj meje dhe ndaj Partisë Demokratike.

Por ju e keni parë që unë as s’jam stepur, as s’jam ndalur, as s’jam kthyer nga rruga ku kam premtuar që do t’ju udhëheq deri në fund, as nuk jam joshur për dy arsye.

E para sepse këtë betejë nuk e bëj për veten time as për karriken time, as për pushtetin tim apo të partisë time por për të gjithë ju, bashkëqytetarët e mi, për shqiptarët të djathtë e të majtë, e për Shqipërinë e sotme dhe të nesërme.

Arsyeja e dytë, sepse këto sulme, kritika, baltosje, shpifje e qëndrime të padrejta nuk më bëjnë asnjë përshtypje sepse forca ime është te bashkimi juaj, është te qëndresa juaj.

Shikojeni njëri-tjetrin në sy teksa Zoti na sheh.

A ka forcë më të madhe në këtë Shqipëri se ky bashkim?

A ka forcë më të madhe në këtë Shqipëri, se ky bashkim, se kjo qëndresë?

Vëllezër dhe motra, të majtë që nuk jeni sot me ne këtu dhe ju vëllezër e motra të Policisë së Shtetit që ju përshëndes përzemërsisht.

Asnjë frikë nuk duhet të ketë askush, forca jonë që ditën e parë nuk ka qenë dhuna. Forca jonë që ditën e parë nuk ka qenë forca. Forca jonë, çelësi i artë i derës së historisë që hapet sot është bashkimi ynë, është qëndresa juaj.

Ju ftova të vini me gëzim në zemrat tuaja dhe më duket së kështu keni ardhur.

Mbi supet tuaja, mbi supet e mia dhe çdo shqiptari të ndershëm peshon pesha e madhe e përgjësisë dhe historisë që marrim sot përsipër në këtë shesh.

Në zemrat tona, në shpirtrat tanë dhe tek miliona shqiptarë, drita e të vërtetës, drita e shpresës së Zotit e ka mposhtur errësirën e frikës apo jo?

Ju jeni gati të hedhim hapim drejt të ardhmes që na pret?

Ju jeni gati të marrim sëbashku vendimin e madh?

Dhe unë jam gati ta mbaj premtimin tim para jush, së bashku për t’ju çuar deri në fitoren totale.

Dita e parë e Shqipërisë po afron.

Unë e dija se kjo ditë po vinte, ishte thjeshtë dhe vetëm çështje kohe. Çështje kohe sa shqiptarët të rizbulonin kreshnikun e kreshniken brenda vetes së tyre, fisnikërinë e moçme, qytetarinë europiane.

Dhe ja tek ka ardhur kjo ditë e bekuar.

Le ta shpallim sot njëzëri, Republikën e Re.

E sotmja ka hyrë në histori, si dita e bashkimit më të madh deri sot, historia e Republikës së Re është vulosur sot me votën tuaj më të shenjtë, praninë tuaj në këtë shesh.

E vjetra po mundet, por që beteja jonë të përmbyllet me fitoren totale, ajo është akoma në dorën tuaj dhe unë kam një pyetje për ju.

Nuk ju kërkoj asnjë sakrificë tjetër. Ju lus që gëzimin dhe paqen ta merrni me vete në fund të këtij referendumi popullor e të shpërndajmë lajmin e mirë në çdo fshat e çdo qytet, por pyetja ime është kjo.

A jeni gati të qëndrojmë të bashkuar?

E të bashkohemi përsëri këtu në këtë shesh derisa Republika e Re të jetë realiteti institucional, kushtetues dhe qytetar me zgjedhjet e lira dhe të ndershme që po vijnë.

A jeni gati ta vazhdojmë këtë betejë?

Ju kërkoj vetëm qëndresë dhe bashkim dhe Zoti do ju bekojë e do të na bekojë me fitore.

Për zgjedhje të lira dhe të ndershme, të vetmet zgjedhje që Shqipëria do të ketë, për Republikën e Re të qytetarëve shqiptarë, kështu sot siç u mblodhëm sot në këtë referendum, të jemi gati për të tretën, të vërtetën, marshimin tonë final

T’i lutemi Zotit t’i hapë veshët kundërshtarëve të pakët të Republikës së Re, përballë këtij bashkimi kombëtar. T’i thërrasin mendjes e t’i hapin rrugë përmes dialogut.

Por, po kështu le të zotohemi se kjo që themeluam sot këtu, pasuria jonë e përbashkët, vendimi juaj i madh, shpresa e çdo shqiptari e çdo shqiptare, Republika e Re, nuk do të ndalet, nuk do të thehet, por do të marshojë në fitore totale.

Ne me Republikën e Re, ne duam dhe do ta bëjmë Shqipërinë si gjithë Europa.

Sepse e duam Shqipërinë si gjithë Europa!

Vëllezër dhe motra,

Referendarë të Republikës së Re,

Zoti ju bekoftë ju dhe familjet tuaja!

Zoti e bekoftë Shqipërinë tonë të dashur, e çdo shqiptar e çdo shqiptare kudo qoftë.

Drita e shpresës që ndriçoi në këtë shesh, u përhap anembanë.

Fitorja e Republikës së Re, qoftë fitorja e çdo shqiptari.

Zgjedhje të lira, qeveri teknike, Republikë e Re, Republike e Re, Republikë e Re.

Me gëzim dhe paqe në zemrat tuaja, kthehuni në shtëpitë tuaja në Tiranë, në qytete dhe fshatra nga keni ardhur.

Rrëfeni të vërtetën tuaj, vendimin tuaj për Republikën e Re dhe bëhuni gati për marshimin final.

Jeni gati apo jo?

Zoti ju bekoftë!

Zoti e bekoftë Shqipërinë!

13 Maj 2017

Faleminderit!

Faleminderit Lulzim Basha! Faleminderit te gjithëve ju!

Unë besoj se jo vetëm të gjithë shqiptarët duhet t’ju jenë mirënjohës juve që jeni këtu, por të gjithë europianët.

Sepse ju po luftoni për lirinë, për lirinë e gjithëkujt, lirinë e Shqipërisë, lirinë e familjeve tuaja dhe gjithë Europës.

Ne italianët, që jemi kaq afër me Shqipërinë, jemi afër jo vetëm nga pozicioni gjeografik por jemi afër me zemër, jemi afër sepse shumë prej jush janë në Itali dhe njihemi mirë mes njëri tjetrit.

Duhet të dëgjojmë veçanërisht fort solidaritetin dhe miqësinë ndaj jush dhe mirënjohje për atë që po bëni.

Të luftoni për zgjedhje të lira është thelbësore, tepër e rëndësishme. Unë i them një faleminderit shumë të madhe për Lulzim Bashën dhe ju që e mbështesni, dhe të gjithë ata që punojnë çdo ditë për këtë gjë.

Një njeri i çmuar për popullin e tij, sepse mund të ishte duke u marrë me shumë gjëra të tjera, ashtu si edhe ju, por në fakt jeni këtu sepse e dini se këtu  është në lojë e ardhmja juaj, e ardhmja e familjeve tuaja e fëmijëve tuaj dhe gjithë Shqipërisë e Europës.

Ndryshimi mes demokracisë dhe diktaturës nuk është se në demokraci votohet dhe në diktaturë jo. Por ndryshimi është se në demokraci merret vesh fituesi pas mbajtjes së zgjedhjeve, ndërsa në diktaturë fituesi dihet para zgjedhjeve, dhe është kjo ajo që po tentojnë të bëjnë këtu.

Duhet të ketë rregulla të qarta. Duhet të ketë rregulla që nuk lejojnë mashtrimet, shit-blerjen e votës, që nuk lejojnë marrjen e votës me dhunë apo kërcënime.

Është kjo është ajo për të cilën ju po luftoni. Zgjedhjet nuk mund të pranohen nëse nuk janë të lira sepse nëse pranohen atëherë rezultati mbetet dhe ata do të thonë se kanë mbështetjen e pjesës më të madhe të popullsisë, dhe kur kjo nuk është e vërtetë.

Të maten me armë të njëjta, jo duke i lidhur duart pas kurrizit kundërshtarit. Le të hyjnë në garë të barabartë.

Keni punuar për 12 javë dhe jeni heronj!

Unë nuk e di sa të tjerë do ishin kaq konsistent, kurajoz dhe të fortë për të rezistuar kaq gjatë.

Në shumë shtete ku liria është paguar shtrenjtë, edhe pse shumë kohë më parë, do të ishte e vështirë të gjeje njerëz si ju dhe si Lulzim Basha që rezistojnë kaq gjatë për lirinë.

Nesër më thonë se do jetë manifestimi më i madh se kurrë në Shqipëri.

Do të jetë një ditë e rëndësishme për ju sidomos që jeni këtu. Ju duhet të bëheni shembulli për shumë të tjerë që do të vijnë.

Kundërshtarët tuaj, kundërshtarët tanë do të shpresojnë në ndonjë incident apo akt të gabuar. Nuk duhet bërë kjo, duhet ndaluar.

Forca juaj, forca jonë është të rrijmë në anën e së drejtës, anën e lirisë dhe së vërtetës.

Atëherë unë kur të kthehem do të kërkoj ndihmën më të madhe të mundshme të Forzza Italias për kauzën tuaj. Ju e dini se eksponentë të tjerë të Forzza Italias kanë ardhur këtu për të dhënë për ju dhe zotin Basha solidaritetin e tyre.

Të tjerë do të vijnë dhe do të kërkojmë vëmendjen e organizmave ndërkombëtare dhe qeverisë italiane.

Sepse liria është ngjitëse, kalon nga shteti ne shtet, por edhe diktatura mund ta bëj këtë.

Dhe lufta që bëni për dekriminalizimin e politikës, Parlamentit dhe organeve shtetërore është thelbësore për të gjithë Europën. Një vend i rëndësishëm, anëtar i NATO-s, aspirant për në Bashkimin Europian nuk mund të ketë kriminelë që dominojnë jetën politike.

Atëherë e përmbyll duke thënë faleminderit për betejën tuaj, betejën tonë.

Të gjithë ju meritoni mbështetjen vëmendjen e italianëve, europianëve dhe natyrisht gjithë shqiptarëve. Dhe mirënjohjen për Lulzim Bashën sepse është një vlerë e shtuar për Shqipërinë dhe Europën dhe shpresoj  të vij për vizitë të na mbështesë edhe ne në Itali. Faleminderit atij që lufton për lirinë dhe ju që e mbështesni.

Rroftë Liria.

Rroftë Shqipëria.

Mesazhi i Senatorit Italian Lucio Malan në Sheshin e Lirisë, 12 maj 2017

Të rinj e të reja, qytetare dhe qytetarë, vëllezër e motra, ju përgëzoj nga zemra për këtë rekord të ri të lëvizjes sonë qytetare, kombëtare dhe popullore, për mbylljen e javës së 12–të të qëndresës suaj 24 orëshe.

12 javë, pra 3 muaj qëndresë dhe nesër kjo qëndresë do të inaugurojë Republikën e Re, nga ky shesh i bashkimit më të madh i shqiptarëve në historinë e tyre.

Nesër nis rrugëtimi i bashkimit të shpresave të çdo shqiptari dhe shqiptareje të ndershëm, i besimit të patundur në të ardhmen më të mirë që na pret, i vendimit të madh për të rrëzuar me forcën e bashkimit nga themelet republikën e vjetër të vesit, republikën e vjetër të korrupsionit, republikën e vjetër të krimit dhe drogës, republikën e vjetër të pazareve të ndyra politike, republikën e vjetër të kupolës së vjetër politike, që luajti gjithë këto vite teatrin e ndyrë, teatrin e kukullave në kurrizin e shqiptarëve dhe për të themeluar që nesër përmes forcës së bashkimit republikën e qytetarëve shqiptarë.

Nesër bashkohen në këtë shesh si kurrë më parë shqiptarët.

Bashkohen të papunët të cilët në 4 vite u gënjyen, u zhgënjyen, u mashtruan, u përbuzën dhe u nëpërkëmbën sepse paratë që duhet të hapnin vende pune përmes investimeve publike apo uljes së taksave për biznesin që të krijonte vende pune i përpiu kuçedra e oligarkisë.

Mirë se vini të papunë e të pashpresë sot! Shpresa nesër merr rrugën e zgjidhjes së problemit të papunësisë, të një ekonomie të fortë, të një të nesërme të sigurtë përmes republikës së re të taksave të ulëta, të investimeve publike dhe çlirimin ekonomik për Shqipërinë.

Nesër bashkohet në këtë shesh qindra-mijëra të rinj e të reja, studentë dhe gjimnazistë sepse e dinë që me bashkimin e tyre, me vendosmërinë e tyre për të mos lejuar dhe as pranuar zgjedhje të diktuara nga krimi dhe droga, por për të  luftuar dhe fituar vetëm zgjedhje të lira e të ndershme, në Republikën e Re, do t’i hapim rrugën arsimit dinjitoz, arsimit cilësor, një ligji të ri për arsimin e lartë me tarifa të përballueshme që secili prej të rinjve shqiptar të ketë mundësinë të ndjekë studimet, pavarësisht prej mundësive apo pamundësive ekonomike të prindërve të vet.

Kjo që sot është një iluzion në republikën e vjetër, tash 84 ditë është një ëndërr e çadrës së lirisë dhe nesër do të sanksionohet me pjesëmarrjen tuaj si ligji i parë i Republikës së Re që lind nga bashkimi.

Do të marrë fund kaosi korruptiv me maturantët. Merita dhe preferenca, vetëm merita dhe preferenca do të përcaktojnë mundësinë që çdo maturant dhe çdo maturante të zgjedhë degën që dëshiron të studiojë me Republikën e Re në krahun e tij dhe të saj, duke iu uruar lundrim të mbarë anijeve të shpresave të gjimnazistëve shqiptarë.

Me ne bashkohen nesër qindra-mijëra sipërmarrës të vegjël, të cilët kanë përjetuar 4 vite terrori, taksat e larta, inspektorët  e pashpirt, korrupsioni që i ka detyruar në kufijtë e ekzistencës dhe shumë prej tyre të mbyllin binzeset e tyre familjare. Republika e Re sjell me vete premtimin e çlirimit tuaj nga taksat e larta, nga abuziviteti dhe arroganca e taksidarëve. Çlirimi i biznesit të vogël është mision parësor i Republikës së Re që themelojmë nesër në këtë shesh.

Nesër bashkohen me ne qindra-mijëra fermerë të lënë në dëshpërim, të cilët në 4 vite përjetuan prapakthehun më të madh të investimeve tyre dhe të familjeve tyre, zero subvencione, zero investime, konkurrencë e pandershme, dogana të vëna kryekëput në funksion të oligarkëve dhe korrupsionit qeveritar.

Por nesër fermerët bashkohen në bashkimin më të madh të shqiptarëve këtu në këtë shesh dhe nga ky shesh me votën e lirë, me Republikën e Re do t’i kthejnë fermerëve shqiptarë jo thjesht shpresën, por mundësinë përmes subvencioneve të drejtpërdrejta, investimeve në bujqësi dhe sigurimit të tregut që produktet e tyre të shiten cilësisht dhe me çmime të përballueshme për çdo qytetar shqiptar.

Nesër bashkohen në këtë shesh 650 mijë pensionistë të cilët janë trajtuar si qytetar të dorës së dytë, me pensione që u rritën më pak se inflacioni, me fuqi blerëse të degraduar,  me fatura energjie të shtrenjta, me bileta autobusi të shtrenjtuara, ilaçe të shtrenjtuara. Pensionistët shqiptarë bashkohen me Republikën e Re nesër në këtë shesh dhe Republika e Re brenda 4 viteve do të mundësojë që pensioni miminal të jetë jo më pak se 250 mijë lekë në muaj për çdo pensioniste dhe çdo pensionistë shqiptar.

Dhe një nga aktet e para të Republikës së Re do të jetë përgjysmimi me ligj i çmimit të biletave të urbanit në Tiranë dhe ne çdo qytet tjetër. Sepse paratë e pensionistëve do të jenë për pensionistët e jo për lali fikun me të korruptuarit e tij.

Bashkohen qindra mijëra shqiptarë, në shtrëngesë ekonomike, që humbën padrejtësisht ndihmën ekonomike, sepse paratë e ndihmës ekonomike i vjedh Edi Rama me çetën e tij të oligarkëve. Bashkohen sepse Republika e Re, do të realizojë që në ditën e saj të parë, rikthimin e listave të ndihmës ekonomike, të çdokujt që ka nevojë për ndihmë ekonomike.

Dhe jo ndihmë fallco,10 mijë, 30 mijë, 40 mijë lek të cilat jepen me një dorë dhe në dorën tjetër shteti ua merr me faturat e energjisë. Por ndihmë ekonomike dinjitoze dhe pagesën e faturës së energjisë deri në 300KV në muaj për çdo familje në ndihmë ekonomike dhe bashkë me faturën e ujit të pijshëm.

Paratë e qytetarëve shqiptarë që sot i vjedh dhe i shpërdoron oligarkia, Republika e Re që themelojmë nesër, do t’jua kthejë atyre më në nevojë. Ata do të jenë të parët në listën e përfitimit.

Nesër bashkohen me ne punëdhënësit dhe punëmarrësit, për platformën tonë të taksës së ulët, të taksës së sheshtë më të ulët në Ballkan 9%, që do të injektojë në ekonominë tonë kombëtare çdo vit, 1 miliardë euro, të cilat do të kthehen në investime, do të kthehen në punësim, do të kthehen në rritje rrogash për punonjësit shqiptarë.

Paratë që sot vidhen dhe shpërdorohen nga çeta e Edi Ramës, plotë 2.8 miliardë në tre vite, përafërsisht 1 miliard çdo vit, para me të cilat kanë blerë, hotele, vila, prona dhe banka, kjo do të marrë fund me Republikën e Re.

Ndaj bashkohet nesër çdo punëdhënës dhe çdo punëmarrës, në Republikën e Re.

Horizonti i mirëqënies dhe i prosperitetit do të matet vetëm me mundësinë për të konkuruar me djersën e ballit. Asnjë pengesë, asnjë kufizim. Talenti, kreativiteti, djersa e shqiptarëve, do të jetë vetëm për mirëqënien e shqiptarëve.

Nesër bashkohen me ne qindra mijëra të përndjekur politikë, bijtë dhe bijat e tyre. Bashkohen jo thjesht për reflektimin e madh të Republikës së Re, për shlyerjen totale të borxheve financiare për vitet e tyre të vuajtjeve. Por mbi të gjitha, për më të madhin shpagim, shpagimin moral që Republika e Re do ta ketë në themelin e saj për të përndjekurit politik.

Për pronarët e ligjshëm shqiptarë, të cilët duke u bashkuar nesër në manifestimin më të madh referendar të shqiptarëve, votojnë për hedhjen poshtë të ligjit të ndyrë komunist, që është ligji i shpronsimit të dytë, votojmë për ligjin e dëmshpërblimit, kthimit dhe kompensimit të pronave, sipas tregut, sipas standardit europian.

Nesër bashkohen me ne, të zhgënjyerit dhe të mashtruarit, vëllezërit dhe motrat tona, të majtë, socialistët e ndershëm shqiptarë që bashkë me ne do t’i thonë ndal krimit, ndal drogës, që njësoj si ne duam një Shqipëri që qeveriset përmes votës së qytetarëve, dhe jo përmes diktatit, drogës dhe krimit. Që po aq sa ne dhe me të drejtë, më shumë se ne duan ta pastrojnë të majtën shqiptare nga kriminelët, nga trafikantët, nga dallkaukët, dhe kështu së bashku ballë për ballë nga formacionet tona të vërteta politike, por vetëm në synimin tonë për një Shqipëri europiane, të bëjmë garën e ndershme, të alternativave që do të mundësohet vetëm me zgjedhje të lira dhe të ndershme.

Me ne bashkohen nesër intelektualët, akademikët, sportistët, artistët, truri dhe shpirti i kombit. Elita e vërtetë e kombit e cila sot rri mënjanë me sytë përdhe, sepse është zëvendësuar nga kriminelët, nga trafikantët, nga oligarkët barkderra dhe pushtetarët e korruptuar me në krye Edi Ramën.

Ja pse e nsërmja do të hyjë në historinë tonë kombëtare si  një ndër ditët më të mëdha të kombit shqiptar. Sepse është dita e një bashkimi të paparë e të padëgjuar ndër vite e dekada.

Me një qëllim, sigurimin e të ardhmes së shqiptarëve të një të nesërme të sigurtë, të një ekonomie të fortë, e të dinjitetit të çdo shqiptari e të çdo shqiptare, pavarësisht prej statusit social, prejardhjes krahinore, bindjeve.

Çdo shqiptar bashkohet nesër që përmes çelësit të artë, votës së lirë, të hapim derën e një të ardhme të re, për çdo shqiptar e çdo shqiptare.

Ky është bashkimi i madh për të cilin flitet tash një javë, në çdo shtëpi, në çdo vatër kudo ku shqiptarët bisedojnë dhe mbështesin e bëhen gati të derdhen drejt këtij bashkimi ditën e nesërme, në orën 12.00 në këtë shesh të lirisë, të qëndresës dhe shpresës që po lind.

Asgjë më e rëndësishme, asgjë më e rëndësishme nuk do të ndodhë këto 24 orë. Asnjë investim më të madh nuk ka bërë secili prej jush që vjen nesër, për veten e tij, për veten e saj dhe për fëmijët tuaj.

Forca e bashkimit, drejtësia e kauzës së zgjedhjeve të lira dhe të ndershme, premtimi i Republikës së Re, që është republika ku fatin tuaj do ta keni vetëm ju në dorë, dhe askush tjetër, janë arsyet, motivet, të cilat me bekimin e Zotit të madh, do t’i mbledhin shqiptarët në këtë bashkim, në këtë rrugëtim, në ditën e parë të Republikës së Re, realitetit të pakthyeshëm që nuk ka krim, drogë e oligarki ta ndalë.

Ndaj me vendosmëri, me paqe dhe gëzim në zemrat tona, me besimin e patundur që sjell forca më e madhe e një shoqërie, inkurajimi më i madh i një kombi, që është bashkimi më i madh rreth vlerave:

Mirësevini, vëllezër dhe motra, të rinj dhe të reja, qytetare dhe qytetarë, nga jugu në veri, nga lindja në perëndim, nesër në orën 12.00, në sheshin e historisë, në sheshin e vlerave, në sheshin e të ardhmes sonë europiane!

Zoti e bekoftë Shqipërinë!

Zoti i bekoftë shqiptarët!​

Mesazhi i Lulzim Bashës në ditën e 84-të të protestës për zgjedhje të lira e të ndershme, 12 maj 2017

Një ditë përpara marshimit të 13 Majit, në Sheshin e Lirisë qytetarët deklaruan arsyet se përse do të protestojnë nesër.

Të rinjtë i bën thirrje bashkëmoshatarëve të tyre, gjithë rinisë shqiptare, të bërtasin më fortë se kurrë zhgënjimet e tyre dhe të kërkojnë të drejtat si çdo qytetar europian. Frika nga pushteti mori fund 84 ditë më parë dhe do të kulmojë me protestën e së shtunës.

Të papunët, ata që mbyllën qepenat e bizneseve të tyre për shkak të politikave dërrmuese të qeverisë thirrën çdo sipërmarrës të mesëm e të vogël ti bashkohet protestës.

Të ardhur nga i gjithë vendi, qytetarët u bënë thirrje nga Sheshi i Lirisë bashkëqytetarëve të tyre në Durrës, Korçë, Laç, Shkodrër, Vlorë e  gjithë Shqipërinë, që më 13 maj të bëhen pjesë e kauzës për zgjedhje të lira e të ndershme, në mënyrë që të ngrenë kokën si qytetarë dinjitoz nesër.

Lulzim Basha e quajti 13 Majin si kurorëzimin e qëndresës dhe bashkimit më të madh të shqiptarëve që riktheu forcën dhe besimin se gjërat mund të ndryshohen vetëm nëse qytetarët ngrihen.

“Nesër nis rrugëtimi i bashkimit të shpresave të çdo shqiptari dhe shqiptareje të ndershëm, i besimit të patundur në të ardhmen më të mirë që na pret, i vendimit të madh për të rrëzuar me forcën e bashkimit nga themelet republikën e vjetër të vesit, të korrupsionit, krimit dhe drogës.

Mirë se vini të papunë e të pashpresë sot! Shpresa nesër merr rrugën e zgjidhjes së problemit të papunësisë, të një ekonomie të fortë, të një të nesërme të sigurtë përmes republikës së re të taksave të ulëta, të investimeve publike dhe çlirimin ekonomik për Shqipërinë.”

Basha i tha qytetarëve se në këtë marshim e gjen veten çdo qytetar, i majtë e i djathtë, i cili është përballur me padrejtësi dhe nëpërkembje këto katër vjet dhe si përgjigje ka marrë vetëm injorim dhe arrogancë.

“Nesër bashkohet në këtë shesh qindra-mijëra të rinj e të reja, studentë dhe gjimnazistë sepse e dinë që me bashkimin e tyre, do t’i hapim rrugën arsimit dinjitoz, ilësor, një ligji të ri për arsimin e lartë me tarifa të përballueshme që secili prej të rinjve shqiptar të ketë mundësinë të ndjekë studimet, pavarësisht prej mundësive apo pamundësive ekonomike të prindërve të vet.

Nesër bashkohen në këtë shesh 650 mijë pensionistë të cilët janë trajtuar si qytetar të dorës së dytë, me pensione që u rritën më pak se inflacioni, me fuqi blerëse të degraduar,  me fatura të shtrenjtuara. Një nga aktet e para të Republikës së Re do të jetë përgjysmimi me ligj i çmimit të biletave të urbanit në Tiranë dhe ne çdo qytet tjetër.

Bashkohen qindra mijëra shqiptarë, në shtrëngesë ekonomike, që humbën padrejtësisht ndihmën ekonomike, sepse paratë e ndihmës ekonomike i vjedh Edi Rama me çetën e tij të oligarkëve.

Nesër bashkohen me ne qindra mijëra të përndjekur politik. Bijtë dhe bijat e tyre bashkohen jo thjesht për reflektimin e madh të Republikës së Re, për shlyerjen totale të borxheve financiare për vitet e tyre të vuajtjeve, por mbi të gjitha, për më të madhin shpagim, shpagimin moral që Republika e Re do ta ketë në themelin e saj.

Nesër bashkohen me ne punëdhënësit dhe punëmarrësit, për platformën tonë të taksës së ulët, të taksës së sheshtë më të ulët në Ballkan 9%.

Bashkohen nesër qindra-mijëra sipërmarrës të vegjël, të cilët kanë përjetuar 4 vite terrori. Çlirimi i biznesit të vogël është mision parësor i Republikës së Re që themelojmë nesër në këtë shesh.”

Nesër bashkohen me ne qindra-mijëra fermerë të lënë në dëshpërim.

Bashkohen sepse Republika e Re, do të realizojë që në ditën e saj të parë, rikthimin e listave të ndihmës ekonomike, të çdokujt që ka nevojë për ndihmë ekonomike dhe jo ndihmë false. ”

Kryetari Basha tha se në Republikën e Re bashkohen intelektualët, artistët, sportistët dhe mendimtarët me qëllim sigurimin e një të nesërme më të mirë për shqiptarët e çdo statusi social, bindje politike apo prejardhje krahinore.

“Çdo shqiptar bashkohet nesër që përmes çelësit të artë, votës së lirë, të hapim derën e një të ardhme të re, për çdo shqiptar e çdo shqiptare.

Ky është bashkimi i madh për të cilin flitet tash një javë, në çdo shtëpi, e bëhen gati të derdhen drejt këtij bashkimi ditën e shtunë, në orën 12.00 në sheshin e lirisë, qëndresës dhe shpresës që po lind.”

Njoftim per shtyp 12 Maj 2017