Blog

Gëzimi nuk i është ndarë asnjë çast këtij sheshi të lirisë, pavarësisht prej brengave dhe krizës ku e ka zhytur Shqipërinë Republika e vjetër, sepse është gëzimi i përligjur i shpresës për Republikën e re, i besimit tek e ardhmja që po vjen, që do të marrë rrugë në një ditë të madhe, ditën e shtunë, ditën e bashkimit më të madh të shqiptarëve, ditën e themelimit të Republikës së re, si realitet i pakthyeshëm për çdo shqiptare e çdo shqiptar.

Vëllezër e motra, zonja e zotërinj, të rinj e të reja, së shpejti do të mbushen plot 12 javë, 3 muaj qëndresë, tre muaj bashkim, tre muaj ngadhnjim i të mirës mbi të keqen. Për fatin e mirë Shqipëria ka shpirtin tuaj,  qëndresën tuaj, ka vullnetin tuaj, garancinë e vetme për Shqipërinë europiane. Dita e shtunë, është dita kur ne kurorëzojmë një lëvizje të madhe, që nisi e vazhdon e do të vazhdojë deri në fitoren e kauzës së zgjedhjeve të lira e të ndershme.

Kjo kauzë mposhti frikën, ky bashkim i trimëroi e i dha kurajo dhe shpresë qindra e mijëra e miliona shqiptarëve të dëshpëruar nga shteti i deshtuar, nga arroganca e pushtetit, nga krimi e droga me lidhje qeveritare që ju shkatërruan ekonominë, ju shkatërruan mirëqenien, ju shkatërruan sigurinë dhe i zhytën shqiptarët në dëshpërim.

E kërkuam rrugëdaljen nga kjo gjendje e rëndë, kudo. Në luftën e përballjen tonë parlamentare, në përpjekjet me çdo faktor të goditur nga qeveria e inkriminuar dhe e korruptuar e Edi Ramës, veç e veç nuk e gjetëm dot. Sepse shpëtimi ishte dhe duhej të ishte në rrugën e bashkimit, që ju i dhatë me fytyrat tuaja, me zërat tuaja  dhe shpirtin tuaj më 18 shkurt e tash 83 ditë e 83 netë.

Përballë shëmtisë së fytyrave kriminale të banditëve me pushtet, përballë skërmitjes së pushteturëve të majmur me gjakun, djersën dhe paratë e shqiptarëve të varfëruar, përballë trushpëlarjes së mediave të kapura e trysnuara me paratë e taksave të shqiptarëve dhe kërbaçin e bandave të drogës, rrezatoi fytyra e dëlirë europiane e shqiptarëve të bashkuar, e burrave, e grave që i bashkon vlera më e shenjtë pa të cilën nuk ia vlen të jetohet liria, liria e votës.

Në asnjë cep të kontinentit europian nuk luftohet aktualisht kaq fuqishëm për vlerat e Europës se sa në këtë shesh të lirisë. Prej 18 shkurtit e deri më sot, Europa e vlerave është Europa e zgjedhjeve të lira. Pa zgjedhje të lira s’kish për të pasur kurrë Europë.  Europa e vlera është Europa e shtetit ligjor, e cila nuk ndëshkon të pafajshmin dhe ngre në pushtet kriminelin dhe trafikantin. Se po të ndodhte kjo vetëm Europë nuk do të ishte. Europa e vlerave është Europa e demokracisë së vërtetë, jo me votime moniste, por vetëm me zgjedhje konkurruese alternativash të padiktuara nga krimi e droga. E ç’t’jua them unë këto, i dinë fare më mirë ju, madje edhe më mirë se ndonjë europian i dini ju, shqiptarët europianë.

Ndaj beteja jonë, është beteja e drejtë për Shqipërinë, është beteja e drejtë për Europën, sepse është beteja për vlerat elementare pa të cilat nuk mund të ketë Europë e nuk mund të ketë Shqipëri.

Teksa marshojmë të sigurt drejt destinacionit që e pret këtë popull europian, që është Bashkimi Europian, bashkimi i vlerave, ndjejmë mbi supet tona peshën e sfidës dhe përgjegjësisë me të cilën na përball historia në këtë udhëkryq të fundit kombëtar para realizimit të ëndrrës së çdo shqiptari: Të ulim kokën para krimit dhe drogës, të ulim kokën para narkorepublikës dhe të pranojmë fatin tonë jo si njerëz të lirë por si robër të narkorepublikës e cila nuk do zgjedhje të lira, por do një parlament të kapur nga krimi e të diktuar nga  droga? Apo të ngrihemi e të bashkohemi të gjithë këtu më 13 maj ditën e shtunë, në një protestë që nuk është vetëm protestë, në një manifestim që nuk është vec manifestim, në një bashkim që do të ketë një emër e do të hyjë në histori si referendumi për Republikën e Re.

Kësaj i trembet republika e vjetër, kësaj itrembet kupola politika e saj, kësaj i trembet krimi dhe droga. Dhe duhet ti tremben. Nuk ka forcë kriminale, nuk ka shtet të korruptuar ti bëjë ballë dëshirës së qytetarëve për liri. Nuk ka betejë më europiane se beteja për zgjedhje të lira dhe të ndershme. Ju  e keni bekuar këtë betejë për zgjedhje të lira me sakrificën tuaj. Në 83 ditë kjo ka qenë beteja më patriotike, më paqësore dhe më europiane që ka njohur Europa në këto vite. i tillë do të jetë dhe bashkimi më i madh i shqiptarëve ditën e shtunë.

Kukumjackat e republikës së vjetër, nuk na trembin, nuk na shkurajojnë dhe nuk na ndalin dot nga kauza europiane e zgjedhjeve të lira dhe të ndershme. Miqtë tanë anembanë botës e dinë dhe duhet ta dinë fare mirë, se rruga euriopaine e Shqipërisë nuk mund të kalojë dhe nuk do të kalojë nga bojkoti. Nuk mund të kalojë dhe nuk do të kalojë nga mospjesëmarrja. Por kurrsesi nuk mundet dhe nuk do të kalojë as mnga asgjësimi i garës së vërtetë. Nuk mundet e nuk do të kalojë nga rikthimi i monizmit 27 vite pasi e shporrëm me votë njëherë e mirë për të mos e kthyer më kurrë.

Nuk mundet e nuk do të kalojë nga votimet farsë të diktuara nga krimi dhe droga. E ardhmja europiane e Shqipërisë do të kalojë nga autostrada referendare e 13 majit që do t’i japë zërin e popullit shqiptar, vulën e popullit shqiptar, qëndresës tuaj për zgjedhje të lira e të ndershme, të vetmet zgjedhje që do të bëhen në Shqipëri.

Ndaj bashkohuni me mua, me familjen time, me fëmijët e mi do të jemi këtu. Ejani me zemrat e mbushura me besim tek e nesërmja që na pret. Unë e kam parë këtë të nesërme që po vjen, ju po e ndërtoni ditë për ditë të nesërmen e Shqipërisë së shqiptarëve. Bashkë do të shembim çdo pengesë. Bashkë do të nxjerrim në pension kupolën politike të republikës së vjetër dhe këtë të fundit do t’ia dorëzojmë Muzeut Kombëtar në pavijonin e turpit.

Ejani pa frikë, ky do të ketë manifestimi më gjigant që shqiptarët kanë organizuar në ekzistencën e tyre si komb. Askush të mos mungojë në këtë moment të historisë, në këtë moment të Shqipërisë, në këtë moment të Europës që do të vijë e shpalosur me vlerat e saj të vërteta e do të zbresë permes frymës së Zotit dhe bashkimit të shqiptarëve më 13 maj, ditën e shtunë, këtu në këtë shesh.

Forca jonë ka qenë kauza e drejtë. Forca jonë ka qenë interesi qytetar. Kjo jo vetëm nuk na ka lodhur, por na ka bërë më të fortë, na ka bërë të pamposhtshëm këto 83 ditë. Me ketë besim tek njëri-tjetri, tek pastërtia dhe dlirësia e synimeve tona, që nuk bëjmë asgjë për pushtetin dhe pasurinë tonë, por bëjmë gjithçka për mirëqenien dhe pushtetin e qytetarëve shqiptarë, le të bashkohemi vëllezër e motra, të gjithë në shesh, në sheshin e lirisë, ditën e shtunë në orën 12:00.

Askush të mos mungojë në festën dhe referendumin e Republikës së re që themelojmë të shtunën.

Zoti i bekoftë shqiptarët!

Zoti e bekoftë Shqipërinë! ​

Mesazhi i Lulzim Bashës në ditën e 83-të të protestës për zgjedhje të lira e të ndershme, 11 MAj 2017

Mesazhi i Lulzim Bashës në ditën e 82-të të protestës për zgjedhje të lira e të ndershme, dhe projekti i Republikës së Re për shumicën e shqiptarëve

Maratonomakë të lirisë, demokracisë, të zgjedhjeve të lira dhe të ndershme, Arkitektë të Republikës së Re, që po agon e që do të njoftohet nga bashkimi më i madh i shqiptarëve ditën e shtunë këtu në këtë shesh, në “Sheshin e Lirisë”, në sheshin e të vërtetave, në “Sheshin e Republikës së Re”, të qytetarëve shqiptarë.

Dita po afron, ku republika e vjetër e krimit, drogës dhe korrupsionit, do të shembet nga themelet për t’i hapur vendit, përmes zgjedhjeve të lira dhe të ndershme, një republike për qytetarët shqiptarë, të qytetarëve shqiptarë, që mund të vijnë vetëm nga qytetarët shqiptarë, me votën e tyre të lirë.

Këto janë ditët e fundit të republikës së vjetër.

Për 4 vite me rradhë, kupola politike e republikës së vjetër, me në krye Edi Ramën, shkatërroi një nga një, të gjitha themelet e bashkëjetesës demokratike. Ata shkelën dhe dhunuan Kushtetutën. Ligjin themelor të shtetit, që organizon marrëdhëniet mes institucioneve dhe pushteteve, në mënyrë që përmes kontrollit dhe balancës, të sigurohet harmonia e vendimmarrjes në demokraci.

Sepse demokraci me të vërtetë do të thotë, vendimmarrje nga shumica e zgjedhur legjitime, por do të thotë kontroll, po kështu nga pakica e zgjedhur legjitime. Kontroll politik në Parlament, kontroll institucional në institucione, por kupola politike e republikës së vjetër, kishte dhe ka tjetër projekt. Projekti i saj prej ditës së parë, nuk ishte as demokracia, as drejtësia, as shteti i së drejtës, as ekonomia, as shëndetësia dhe as arsimi.

Projekti i vetëm dhe axhenda e vetme e kupolës politike të republikës së vjetër, e teatrit të shëmtuar të kukullave që luhet ditë për ditë për trushplarjen e popullit, ka qenë dhe mbetet, pasurimi dhe pushteti i një grushti pushtetarësh me në krye Edi Ramën.

Në funksion të këtij projekti, u sollën kriminelët në institucione. Deputetë në listat e çdo qarku të Shqipërisë e në veçanti të qarqeve të veriut. Kryetarë bashkish, drejtorë të institucioneve, drejtorë të policisë.

Një nga një institucionet u kapën nga kriminelët që Edi Rama nuk i gjeti, por i solli në Partinë Socialiste për t’i përdorur si vegla në projektin e tij të kapjes së shtetit. Në projektin e tij për përdorimin e shtetit jo në të mirën e qytetarëve, jo për mirëqenien e shqiptarëve, as për avancimin e të ardhmes së Shqipërisë, por vetëm e vetëm për pasurimin dhe pushtetin e tij dhe të çetës së tij bandite në pushtet.

***

Kjo është arsyeja pse Edi Rama e ka jetike kapjen e zgjedhjen të ardhshme. Diktimin e parlamentit të ardhshëm nga krimi dhe nga droga dhe jo nga vota e lirë e qytetarëve shqiptarë. Kjo është arsyeja se përse Edi Rama e ka jetike që reforma në drejtësi të mos bëhet sipas konsensuit të 22 korrikut, sipas formulës euro-amerikane, por të bëhet sipas formulës, Rama-Xhafa-Shullazi-Tahiri që garanton mbrojtjen dhe jo ndëshkimin e kriminelëve në pushtet dhe të korruptuarve që zhvatën dhe grabitën Shqipërinë në këto katër vite.

Miliarda euro u vodhën. Një grusht njerëzish u pasuruan. Një grusht krimilenësh e kthyen Shqipërinë në Panamanë dhe Kolumbinë e Europës. Shqiptarët u varfëruan, ekonomia u shkatërrua, vendet e punës u asgjesuan, shëndetësia ra në kolaps, arsimi në ditën e tij më të zezë, fuqia blerëse e shqiptarit në nivele afrikane, studentët të diskriminuar, të lënë jashtë universiteteve me tarifat e larta dhe me arbitraritetin qeveritar.  Pensionistët me sytë përtokë sepse çfarë u jepet me një pension, u merret me dorën tjetër me faturat e kripura të energjisë, me çmimet e rritura nga urbani tek nafta, tek shporta e ushqimeve. Kjo është vepra e rilindjes së krimit dhe krimit të rilindur në nivelet më të larta shtetërore.

Në planin e Edi Ramës – i cili është vetëm për pasurimin dhe pushtetin e Edi Ramës dhe të çetës së tij dhe të çirakëve të tij në media, të lobistëve të tij, që majmen me paratë e popullit më të varfër të Europës dhe të korruptuarve të tij, me pasaportë shqiptare apo të huaj që s’i bëhet kurrë vonë për Shqipërinë, por i bëhet vonë vetëm për xhepat e tyre – në planin e tij ogurzi, prishja e zgjedhjeve të ardhshme, kapja dhe diktimi i parlamentit të ardhshëm, ka rëndësi jetike. Ndaj gjithçka është bërë në funskion të kapjes së zgjedhjeve të ardhshme.

Duke diktuar një parlament fasadë, mundësisht me ne si opozitë fasadë, përmes drogës dhe krimit, dhe nëse ne nuk pranojmë të jemi fasadë, një parlament monist, rikthimin 27 vite më parë, me përjashtimin jo thjeshtë të opozitës, por të shumicës dërrmuese të shqiptarëve që duan dhe kërkojnë ndryshim.

***

Të gjithë elementët e komplotit ishin përgatitur për këtë skenar. Droga, krimi, korrupsioni, realiteti i përditshëm i shqiptarëve ishte fshirë nga mediat e kapura nga qeveria, ishte fshirë nga raportet e zyrtarëve të korruptuar ndërkombëtar në Tiranë, të cilët nuk raportonin drogën, nuk raportonin kriminelët edhe kur këta gjakosnin qytetarët në dyert e stacioneve të policisë të korruptuar të Edi Ramës dhe që sot janë bashkëfajtor me Edi Ramën dhe nuk dalin dot nga rrethi vicioz ku e kanë futur veten e tyre, sepse kanë mohuar krimin, sepse kanë mohuar drogën dhe janë bërë njësh me Edi Ramën, jo për interesat e Bashkimit Europian, jo për interesat e aleatëve tanë strategjikë por vetëm për xhepat e tyre të korruptuar.

Kjo është e vërteta, por nuk ia dolën dot. Për tre vite e gjysëm ne bëmë betejë në Parlament, në studio televizive, konferenca për shtyp, vizitë pas vizite, por e vërteta e Shqipërisë dhe shqiptarëve të zhytur në dëshpërim prej drogës, krimit të organizuar të ngritur në pushtet dhe korrupsionit galopant të Shqipërisë, nuk depërtoi dot, deri sa ju u ngritët dhe u bashkuat në këtë lëvizje madhështore, qytetare, kombëtare dhe demokratike.

Të vetmit që ia dolën t‘i  tregojnë miqve tanë në Bruksel, Berlin, Uashington dhe anembanë botës perëndimore të vërtetën e Shqipërisë ishit ju, qytetarët shqiptarë, ishte kjo lëvizje popullore, ishte ky bashkim i madh.

Sot Europa mbarë e njeh problemin e madh të drogës, krimit dhe korrupsionit qeveritar në Tiranë. Sot të gjithë aleatët tanë e njohin dhe e kanë pranuar se Edi Rama e zhyti Shqipërinë në një gjendje dështimi dhe falimentimi total. Sepse ai ngriti krimin në pushtet dhe me krimin mbushi Shqipërinë me drogë.

Sot të gjithë e dinë se shumica dërrmuese e qytetarëve shqiptarë janë në këmbë e në këmbë do të qëndrojnë derisa të sigurojnë zgjedhje të lira dhe të ndershme, përmes një qeverie teknike që do të zbatojë ligjin për dekriminalizimin, që do të luftojë drogën dhe paratë e drogës, do t’i kthejë sovranit të drejtën për zgjedhje dhe votën e lirë e të ndershme.E di gjithë bota, e dinë miqtë e shumtë të Shqipërisë, e di çdokush se rrugë tjetër nuk ka.

Por një njeri i vetëm qëndron si pengesë drejt këtij hapi historik që Shqipëria duhet të hedhë për t’ia kthyer Shqipërinë qytetarëve, për të ndërtuar një republikë të qytetarëve dhe jo të partive as të politikanëve, një Republikë të Re të ligjit, të drejtësisë së vërtetë, të zgjedhjeve me të vërtet të lira e të ndershme si garanci për një zhvillim të vërtetë ekonomik që të krijojë punësim të vërtetë, që të shërbejë me standarde të vërteta europiane fëmijëve shqiptarë, që të garantojë kujdesin shëndetësor për pacientët dhe familjarët e tyre, që të garantojë rritjen dhe zhvillimin ekonomik për biznesin e vogël, të madh e të mesëm, punë, dinjitet për fermerin shqiptar, që të garantojë bijtë e Shqipërisë që të luftojë drogën dhe të kthejë sigurinë në rrugët, sheshet, shkollat dhe shtëpitë tona. Për një Republikë të Re  të një ekonomie të fortë e një të nesërme të sigurtë për çdo shqiptare e çdo shqiptar.

***

E vetmja forcë që mund ta garantojë këtë sot nuk janë argumentet dhe arsyeja e shëndoshë që Edi Rama nuk i pranon. Mos kini asnjë shpresë. Nuk ka negociator në botë ta bëjë Edi Ramën të pranojë faktet katërcipërisht të njohura e të pranuara nga bota për drogën, krimin, korrupsionin dhe ta bëjë të pranojë përgjegjësinë për t’i hapur rrugë zgjedhjeve të lira e të ndershme.

Unë e shpresoj dhe jam i gatshëm që të marr përgjegjësitë e mia me dialog për ta çuar drejt zgjidhjes politike, e shpresoj dhe i lutem Zotit që kjo të ndodhë. Por në veçanti pas dy takimeve shterpë nuk kam asnjë dyshim se Edi Rama nuk do t’i bindet zërit të arsyes, as forcës së argumentit por vetëm imponimit të shqiptarëve të bashkuar e të vendosur për të mbyllur kapitullin e drogës dhe krimit, e republikës së vjetër që iu shërben vetëm një grushti politikanësh, kriminelëve dhe oligarkëve dhe së bashku për të hapur derën e Republikës së Re dhe të ardhmes për  çdo shqiptar.

Ndaj data e parë më e rëndësishme në këtë kalendar është data 13 maj, ora 12:00 në mes të Tiranës ku së bashku do të bashkohemi. Kam marrë privatisht dhe publikisht kërkesat dhe konfirmimet e njerëzve të thjeshtë, të papunëve, të të rinjve, të maturantëve, të studentëve, të grave, të të rejave, të profesorëve dhe akademikëve, të sportistëve dhe artistëve, të sipërmarrësve dhe sindikalistëve se të gjithë do të jemi bashkë e do të jemi një me me zë të vetëm. Ditën e shtunë së bashku do të shpallim nga ky shesh falimentimin e republikës së vjetër dhe themelimin e Republikës së Re.

***

Rrena nuk i lë vend rrenës. Kështu ka qenë këto 4 vite e kështu do të jetë këto ditë që i kanë mbetur republikës së vjetër. Procesi i zgjedhjeve të 18 qershorit përveçse dështoi politikisht e moralisht, dështoi edhe ligjërisht. Të gjithë e dinë, të gjithë dini të numëroni deri në 50, në çdo listë, absolutisht çdo listë e dorëzuar në KQZ është e jashtëligjshme, procesi është në kolaps ligjor.

Të gjithë dini të numëroni deri në 50. Cdo listë e dorëzuar në KQZ është e paligjshme, procesi është në kolaps ligjor. Edi Rama dhe serumet që e mbajnë në këmbë Made in Albania apo kudo që bëhen apo made in Soros. Ata  nuk e thonë një fjalë për skadimin e datës ligjore zyrtare për zgjedhjet. Nuk e thonë, duan ta anashkalojnë dhe shpresojnë që me presione ndaj Kolegjit  Zgjedhor do t’i thonë shqiptarëve që, një edhe një nuk bëjnë dy, por bëjnë një. Se 17+31+2 nuk bëjnë 50, por bëjnë 51.

Dy rrugë ka, Kolegji Zgjedhor do të ballafaqohet së shpejti me kërkesën për të hedhur poshtë 18 Qershorin dhe listat e paligjshme, duke hedhur poshtë sipas ligjit të Republikës së vjetër do ti japë një shans Republikës së vjetër ta përfundojë misionin e saj ,përmes konsensusit dhe negociatave. Në qoftëse me presione apo zhage Kolegji zgjedhor vendos tu thotë shqiptarëve se 17 plus 31 plus 2 bëjnë 51dhe jo 50, atëherë  Kolegji zgjedhor, ligji zgjedhor dhe  Kushtetuta e Republikës së vjetër do të merren përpara nga bashkimi i shqiptarëve për  Republikën e Re.

Data e vendimarrjes është data kur shqiptarët do ta dinë nëse fundi i pashmangshëm, i paevitueshëm i republikës së vjetër do të jetë një proces i një konsensusi, i një shansi për gjithëpërfshirje edhe për mëkatarët e republikës së vjetër apo do të jetë nisja, fillimi, inicimi i lëvizjes popullore, për mosnjohjen mospranimin dhe rrëzimin  e çdo ligji, e cdo institucioni të Republikës së vjetër përmes mosbindjes civile dhe akteve të tjera të rezistencës dhe  qëndresës  paqësore dhe demokratike.

Paqësore  dhe demokratike. Bashkimi ynë do të jetë i tillë, i tillë do të jetë akti i rrëzimit formal të republikës së vjetër. I tillë do të jetë akti i lindjes së Republikës së Re, me garancitë e përfaqësimit për qytetarët shqiptarë në vend të partive politike me garancitë e llogaridhënies para qytetarëve shqiptarë dhe jo para oligarkëve dhe kriminelëve.

***

Rrena tjetër e sforcuar e Edi Ramës, se beteja e tij bëhet për reformën në drejtësi, e merr përgjigjen nga çdo qytetar shqiptar,  i majtë apo i djathtë. Reformën në drejtësi dhe vetingun e do kjo çadër, ky bashkim qytetar. Reformën  e vërtetë në drejtësi largon me të vërtetë prokurorët dhe gjyqtarët e korruptuar që kanë mbrojtur dhe mbrojnë kriminelët në pushtet dhe që kanë mbrojtur dhe mbrojnë, duke mbyllur dosjet e të korruptuarve të Edi Ramës, që i kanë zhvatur  2, 8 miliard euro këtij populli në vetëm katër vite.

Ju e dini këtë.

Kush e do Reformën në drejtësi, ju qytetarët shqiptarë apo Arben Ndoka?

Kush e do  Reformën në drejtësi,Ilir Beqja apo qytetarët shqiptarë?

Kush e do  Reformën në drejtësi dhe vetingun e vërtetë, Sajmir Tahiri dhe Habilajt apo ju qytetarët shqiptarë?

Kush e do  Reformën në drejtësi, Eskobari dhe padronët e tij politikë apo ju qytetarët shqiptarë?

Kush e do  Reformën në drejtësi, Damjan Gjiknuri i 600 milion eurove të CEZ,  apo ju, qytetrarët shqiptarë?

Kush e do  Reformën në drejtësi, Edi Rama që e mbushi vendin me drogë  dhe institucionet me kriminelë dhe që bleu banka, pasuri të pamata në Shqipëri e jashtë Shqipërisë, me paratë që ju grabiti ju, apo ju populli shqiptar, qytetarët shqiptarë?

E pra reformë në drejtësi dhe veting të vërtetë, do të ketë. Askush nuk i shpëton dot. I çfarëdo ngjyre politike që të jetë çfarë  posti të ketë sot apo nesër. Drejtësia e vërtetë do të ndërshkojë krimin dhe të korruptuarit e çdo ngjyre. Por drejtësi të vërtetë pa zgjedhje të lira nuk ka.

Dhe zgjedhjet lira me Edi Ramën dhe kuplonë e tij kriminale në pushtet, nuk ka.

Ndaj i vetmi shteg, një rrugë e gjerë jo sa ky bulevard, por sa vetë drita e diellit është bashkimi ynë ditën e shtunë, në orën 12.00 këtu, në këtë shesh. Asnjë, asamble popullore apo kombëtare në historinë e njerëzimit, nuk ka qenë  kaq e madhe dhe kaq e vendosur në themelimin e  një Republike të re, sa bashkimi i shqiptarëve ditën e  shtunë.

Mirësevini shqiptarë të ndershëm, shqiptarë të lirë, të djathtë e të majtë, të rinj dhe të moshuar, toskë e gegë, të rinj e të reja. Në 13 Maj themelojmë Republikën e Re.

Zoti e bekoftë Shqipërinë!

Zoti i bekoftë shqiptarët!

Kryetari Lulzim Basha bashkëbisedoi me qytetarët e qarkut Shkodër për krizën ekonomike dhe sociale

Në ditën e 82-të të protestës qytetare për zgjedhje të lira dhe të ndershme, në Sheshin e Lirisë ishin banorët e qarkut Shkodër në bashkëbisedim me kryedemokratin Lulzim Basha lidhur me krizën politike, ekonomike dhe sociale të shqiptarëve në këto katër vite qeverisje të Rilindjes.

Izmita Ulqinaku është studente për arkitekturë dhe tha se qyteti i saj i Shkodrës po degradon dita ditës nga mungesa e fondeve dhe investimeve, si rezultat i qeverisjes së kryeminsitrit Rama. Edhe  Kunora Lohja do të diplomohet së shpejti dhe do të përballet me tregun e punës më të cunguar se kurrë më parë.  Për pak muaj diplomohem por nuk kam asnjë perspektivë për të ardhmen, për punësim dhe mirëqënie – tha Lohja – ndaj në 13 maj çdo i ri duhet të bërtasë më fort se kurrë për të drejtat e tyre dhe të ardhmen e të gjithëve ne.

Behar Lezha është banor i qytetit të Shkodrës dhe ka në pronësi një dyqan të vogël familjar. Ai kujtoi se si në fushatën e vitit 2013-ës, Edi Rama doli në rrugët e qytetit të Shkodrës për të kontrolluar listat e borxheve në dyqane si tregues për varfërinë e popullit shqiptar. Por sot ato lista janë shtuar, borxhet që marrin qytetarët janë rritur dhe sasia e konsumit ka rënë – tha Behari, i cili solli në vëmendje faktin se kryeministri edhe kur e viziton Shkodrën, vjen vetëm për t’u konfliktuar me kryetaren e Bashkisë, me të cilën thotë se nuk mund të merret, a thua se është zgjedhja e tij të merret me të zgjedhurën e qytetarëve shkodranë.

Shqetësuese, jo vetëm se ilustron gjendjen e vendit, por edhe për imazhin që Shqipëria jep ndërkombëtarisht, ishte dëshmia e Ardi Zajës, i cili tregoi eksperiencën me një grup pune të televizionit BBC, i cili donte të bënte një dokumentar për zonat e veriut të Shqipërisë, por në moment të fundit u tërhoq për shkak të frikës nga pasiguria dhe rendi në vend.

“Punova dhe takova njerëz që të përgatiteshim për kur grupi i punës së BBC të vinte në Shqipëri, në tetor apo në nëntor, por në një moment u bllokua ç’do gjë dhe ne nuk e kuptuam pse. Një ditë më pyetën si është siguria në Shqipëri? Paçka fjalëve të mia të bukura, ata më dërguan një email me disa linqe të ndryshme të televizioneve, gazetave në botë, ku tregohej një kanabizim total i Shqipërisë, edhe në zona të caktuara të Dukagjinit, Malsisë së Madhe edhe territorit ku grupi planifikonte xhirimet. Ndaj më thane se nëse flitet kaq shumë për një shkelje të madhe, çfarë sigurie kanë ata për të ardhur dhe për të xhiruar një dokumentar? Ata nuk erdhën. Dokumentari nuk u bë.”

Realitetin me të cilën përballen qytetarët dhe i trëmben edhe gazetarët e huaj, kryeministri nuk e njeh, duke larguar jo vetëm turistë, investitorë dhe media por edhe 300 mijë qytetarë, në eksodin më të madh të shqiptarëve në këto vite pluralizëm.

Afrim Cufaj, Zaim Kezi dhe Esmeralda Bega janë qytetarë të Shkodrës, Bërdicës, Tepelenës dhe gjithë Shqipërisë, për lirinë dhe mbarëvajtjen e së cilës i bënë thirrje çdo qytetari, të rinj, prindër, studentë, të papunë dhe profesionist, të varfër e të flakur pa një ndihmë, të protestojnë më 13 maj për lirinë e zgjedhjes, së Parlamentit të tyre, sistemit arsimor për fëmijëve të tyre, shëndetësinë që çdo qytetar meriton dhe vetë dinjitetin e të qënit votues i një republike demokratike.

Lulzim Basha kujtoi me studentët thelbin e demokracisë që është pikërisht kontrolli i qeverisë së zgjedhur me votë, nga opozita, pakica parlamentare edhe ajo e votuar nga qytetarë shqiptar.

“Për 4 vite me rradhë, kupola politike e republikës së vjetër, me në krye Edi Ramën, shkatërroi një nga një, të gjitha themelet e bashkëjetesës demokratike.

Ata shkelën dhe dhunuan Kushtetutën. Ligjin themelor të shtetit, që organizon marrëdhëniet mes institucioneve dhe pushteteve, në mënyrë që përmes kontrollit dhe balancës, të sigurohet harmonia e vendimmarrjes në demokraci.

Sepse demokraci me të vërtetë do të thotë, vendimmarrje nga shumica e zgjedhur legjitime, por do të thotë kontroll, po kështu nga pakica e zgjedhur legjitime.”

Për këtë arsye, tha Basha, Edi Rama i solli kriminelët jo vetëm në Partinë Socialiste, por në poste drejtuese, bashki, institucione, polici, dogana dhe drejtori. Gjithçka në funksion të së vetmes gjë që mund t’a shpëtojë politikisht, kapja e zgjedhjeve.

“Në planin e tij prishja e zgjedhjeve të ardhshme, kapja dhe diktimi i parlamentit të ardhshëm, ka rëndësi jetike. Ndaj gjithçka është bërë në funskion të kapjes së zgjedhjeve të ardhshme.

Për tre vite e gjysëm ne bëmë betejë në Parlament, studio televizive, konferenca për shtyp, vizitë pas vizite, dhe e vërteta e Shqipërisë dhe shqiptarëve të zhytur në dëshpërim,drogë, krimi të organizuar e të ngritur në pushtet, nuk depërtoi dot aq sa shqiptarët u ngritën dhe u bashkuan në këtë lëvizje madhështore, qytetare, kombëtare dhe demokratike.

Të vetmit që ia dolën t‘i  tregojnë miqve tanë në Bruksel, Berlin, Uashington dhe anembanë botës perëndimore të vërtetën e Shqipërisë ishin qytetarët shqiptarë, ishte kjo lëvizje popullore. Ndaj sot Europa mbarë e njeh problemin e madh të drogës, krimit dhe korrupsionit qeveritar në Tiranë.”

Lulzim Basha tha se pas dy takimeve me Edi Ramën në funksion të dialogut politik për zgjidhjen e krizës dhe rezultatit shterpë të tyre, bindja është se kryeministri i përgjigjet vetëm bashkimit popullor më të madh të shqiptarëve për demokracinë dhe lirinë e votës.

“Data e parë më e rëndësishme në këtë kalendar është data 13 maj, ora 12:00 në mes të Tiranës ku së bashku me njerëz të thjeshtë, të papunë, të rinj, maturantë, studentë, gra dhe vajza, profesorëve dhe akademikëve, sportistë dhe artistë, sipërmarrësve dhe sindikalistë, të gjithë do të jemi bashkë me një zë të vetëm.

Ditën e shtunë së bashku do të shpallim nga ky shesh falimentimin e republikës së vjetër dhe themelimin e Republikës së Re. Paqësorë  dhe demokratik, bashkimi ynë do të jetë akti i rrëzimit formal të republikës së vjetër.”

Gëzuar ditën e 81-të të bashkimit më të madh qytetar kombëtar për zgjedhje të lira e të ndershme, bashkimit më të madh pro-europian e pro-amerikan që ka njohur Shqipëria dhe Ballkani, dhe gëzuar Ditën e Europës, ditën e lirisë, ditën e fitores së të mirës mbi të keqen, të vërtetës mbi gënjeshtrën, të së drejtës mbi  krimin. Kjo është Dita e Europës, ky është 9 Maji dhe ne jemi lëvizja proeuropiane e Shqipërisë. Eshtë ditë e veçantë për Europën. Eshtë ditë e veçantë për shqiptarët.

Anti-europianët e antiamerikanët, janë mbledhur në një kotec, ku sot bëjnë bilancin e tyre anti-europë, anti-amerikë, anti-Nato dhe anti-kombëtar, të katër viteve të regjimit të dështuar të korruptuar dhe të inkriminuar të Edi Ramës, Ilir Metës dhe çetës së tyre.

9 Maji është dhe dita kur kupola politike e republikës së vjetër, ka shpallur ceremoninë e çmimeve OSCAR.

Çmimet OSCAR po jepen në Durrës, në Durrësin e Vangjush Dakos, ku luhet tash katër vite teatri i shëmtuar kriminal, teatri i narkotrafikantëve, teatri i betonizimit, teatri i korrupsionit  si kudo anembanë Shqipërisë. Republika e vjetër, në grahmat e saj të fundit, po ju dhuron këtë shfaqje të shëmtuar të hipokrizisë, të gënjeshtrës, të mashtrimit të shqiptarëve.

Kanë zgjedhur datën 9 Maj. Kanë zgjedhur Ditën e Europës si për të na kujtuar kontrastin e thellë, kontrastin bardhë e zi që qëndron mes atyre që erdhën në pushtet me emrin, Aleanca për Shqipërinë Europiane, dhe u faktuan në katër vite si aleanca e drogës dhe e krimit, si aleanca anti-europiane, anti-shqiptare, anti-popullore, anti-qytetare e 27 viteve pluralizëm.

Tani janë në ceremoninë OSCAR. Japin dekorata dhe statuja njëri-tjetrit. Kush e mori OSCAR-in për luftën kundër krimit të organizuar, Sajmir Tahiri, Sajmir Shullazi që e mbushi Shqipërinë me drogë dhe policinë me kriminelë? Njeriu që përdori makinën e tij për trafikun e drogës, në dispozicion të bandës më të rrezikshme të drogës në jug, kushërinjve të tij Habilaj.

Apo e mori Fatmir Xhafaj, njeriu i faktuar si torturues i të rinjve dhe i të rejave të Krujës për llogari të Sigurimit të Shtetit, si hetues dhe persekutor i Sigurimit të Shtetit, për krimin e vetëm sepse ngritën dolli kur vdiq diktatori dhe xhelati i shqiptarëve Hitleri i pasluftës të Dytë Botërore, Enver Hoxha. Njëkohësisht vëllai i Agron Xhafës, numri dy i një bande ndërkombëtare të trafikut të kokainës me lidhje nga Venezuela në Itali. Kush nga këta e meriton çmimin OSCAR për luftën kundër krimit të organizuar. Kujt ia dha Edi Rama?

Po çmimin për rritjen dhe fuqizimin e ekonomisë dhe vendeve të punës, a ia dha Arben Ahmetajt? Njeriut që ka futur duart në çdo fond e në çdo koorporatë publike duke nxjerrë qindra mijëra, miliona euro të taksave tuaja për t’i futur në xhepat e tij dhe në lidhjet e tij oligarkike, nga landfilli i Elbasanit, te koçesionet korruptive të sistemit fiscal. Apo e mori Damian Gjiknuri? I cili, në fakt me një lëvizje të vetme vodhi 600 milion euro nga xhepat e shqiptarëve, duke i ndarë me një skemë korruptive hajdutërie me korporatën CEZ, paratë dhe borxhet e kësaj kompanie ndaj shqiptarëve, dhe duke rritur faturën e energjisë për 70% të shqiptarëve.

Kush e mori çmimin OSCAR për shëndetësinë? Ilir Beqja apo Vilma Nushi? Ajo që i merr, apo ky që i jep100 milion euro të shqiptarëve që nuk shkojnë për shëndetin e tyre, të fëmijëve të tyre. Nuk shkojnë për pacientët shqiptarë, por shkojnë për xhepat e një oligarkeje të vetme, me një kontribut, sepse është sponsorizuese e Edi Ramës. Mori tani dhe koncesionin e laboratorëve.

Ai tjetri ka marrë konçesionin e sterilizimit. Janë dhënë plot 500 milion euro kontrata konçesionare vetëm në shëndetësi, kur spitalet janë në ditën e tyre më të zezë, ku ilaçet në farmacitë spitalore janë kthyer në fantazi. Kur çdo pacient dhe familjar e di shumë mirë se duhet të dalë e t’i blejë ilaçet në farmacitë private, jashtë spitaleve, ku mungon minimumi i trajtimit si nga përgatitja dhe gatishmëria e personelit shëndetësor, ashtu dhe nga gjendja e aparaturave dhe medikamenteve e trajtimit për të sëmurët shqiptarë.

Kush e merr çmimin OSCAR për arsimin  shqiptar? Për rritjen e e tarifave për studentët, për nxjerrjen me një vendim të mijëra bijve dhe bijave të shqiptarëve nga auditorët e universiteteve, sepse u rritën çmimet, u rritën tarifat, u bë e papërballueshme ajo që duhet të jetë e garantuar nga shteti, arsimi i fëmijëve tanë. Kush e merr OSCAR-in për degjenerimin e sistemit arsimor, në një rrjet motelesh për pushtetarët e degjeneruar dhe në një bankë ku paguhen mijëra e euro rryshfet për të katapultuar analfabetët militantë në vend të mësuesve të përgatitur për të cilët kanë nevojë fëmijët  tanë. Kush e merr këtë çmim? Lindita Nikolla thoni!

Kush e merr çmimin që për tri vite e gjysëm, e ktheu Shqipërinë, nga një anëtare të NATO-s, Shqipërinë me sistemin më modern të radarëve të Europës, të vrojtimit detar të cilët i përdorte dhe Grqia, Mali i Zi dhe Italia, me moratoriumin që i dha fund trafikut të qënieve njerëzore dhe e solli në zero pothuajse trafikun e drogës, të gjitha këto për t’iu mundësuar qytetarëve shqiptarë heqjen e vizave dhe lëvizjen e lirë si qytetarë europianë në zonën Shengen, në një vend ku territorin dhe kufinjtë i kontrollojnë bandat  e krimit të organizuar, ku droga me tonelata transportohet nga toka deti dhe ajri. Ku infrastruktura e krimit është më e fuqishme, më e përgatitur dhe më vendosur se policia, Forcat e armatosura dhe  Shërbimi Inteligjent të marrë së bashku.

Kush ia dorëzoi territorin dhe kufijtë e Shqipërisë krimit të organizuar?

Kush e meriton OSCAR-in për katandisjen e fshatit shqiptar në ditën më të zezë që ka njohur këto 15 vite? Me bagëtitë e sëmura që nuk marrin asnjë asistencë, me tokat e pasubvencionuara, me kanalet ujitëse dhe vaditëse dhe kulluese që nuk u ndërtuan kurrë, me tregjet që nuk u ndërtuan kurrë, me monopolistët që i kanë hypur në qafë fermerëve dhe kanë asgjesuar prodhimin e tyre, investimet e tyre, i kanë zhytur në borxh e mjerim, dhe u kanë lënë dy alternativa, ose emigracionin ose kanabisin.

Pra sot, është dita e çmimeve OSCAR, për bandën në pushtet për kupolën politike të republikës së vjetër, e cila, në katër vite mendoi vetëm për pasurimin, vetëm e vetëm për pushtetin e vet dhe nuk punoi asnjë ditë, asnjë orë të vetme për qytetarët shqiptarë, për fatet tuaja, për punësimin për mirëqënien  tuaj. Katër vjet vetëm për veten e tyre, duke e katandisur Shqipërinë në një vend, nga i cili, qytetarët duan vetëm të largohen, me emigracionin më masiv në Europë, krahasueshëm vetëm me Sirinë, ku ndodh një ndër luftërat më të përgjakshme civile ndër dekada.

***

Por këtu ndodh tash katër vjet një luftë tjetër e heshtur, e ftohtë.

Lufta që krimi i organizuar, droga, oligarkët barkderra dhe pushtetarët e korruptuar, i kanë shpallur popullit të tyre, duke shkatërruar ekonominë me taksa të larta, duke shkatërruar mirëqënien me çmime të larta të naftës dhe të energjisë, duke i shkatërruar vendet e punës me arrogancën dhe arbitraritetin qeveritar, duke shkatërruar bujqësinë me mungesën e përkrahjes dhe konkurrencën e pandershme. Duke ishkatërruar shëndetësinë me koçesionet korruptive. Duke i shkatërruar arsimin me ligjin e lartë korruptiv për arsimin e lartë dhe degjenerimin  e arsimit nëntëvjecar dhe të mesëm. Këta pra i kanë shpallur luftë Shqipërisë, i kanë shpallur luftë shqiptarëve.

Kanë shkatërruar ekonominë, kanë varrosur shtetin, kanë ndërtuar shtetin e dështuar kriminal dhe narkorepublikën, dhe në këtë mënyrë, kanë asgjësuar ëndrrat e brezave të rinj të shqiptarëve.

Projekti i tyre i fundit, vula me të cilën duan të asgjesojnë përfundimisht Shqipërinë, si një vend ku ka bashkëjetesë demokratike, e ta kthejnë në një çiflig me bujkrobër të satrapëve të lidhur me krimin e organizuar, është asgjesimi i zgjedhjeve të lira dhe të ndershme. Në funksion të kësaj, kanë shpallur zgjedhjet moniste.

Sepse kanë refuzuar prej ditës së parë dhe refuzojnë edhe sot zgjidhjen që përcaktuan qytetarët më 18 shkurt. Vendimin e madh të cilin të gjithë bashkë e morëm, jo për hir të Partisë Demokratike, as për hir të opozitës, as për hir të ndonjë individi, por për të drejtën e patjetërsueshme, hyjnore dhe sovrane, themelin e demokracisë; zgjedhjet e lira dhe të ndershme, votën e lirë të qytetarëve shqiptarë.

***

Edi Rama e di fare mirë se pse e bëri këtë. Sepse ai i trembet gjykimit popullor me votë. Ai i trembet gjykimit popullor me votë, sepse nuk ka asnjë përgjigje, për pyetjet më të thjesha që ia drejton qytetari më i zakonshëm i Shqipërisë.

Ku i ke 300 mijë vende të reja pune?

Ku e ke shëndetësinë falas?

Ku e ke heqjen e TVSH-së për ushqimet e shportës?

Ku e ke uljen e TVSH-së në 6% për energjinë elektrike?

Ku e ke subvencionin e energjisë elektrike për familjet në nevojë?

Ku i ke subvencionet për fermerët?

Ku i ke legalizimet falas?

Ka kaq shumë gënjeshtra, nuk i mbaj mend të gjitha, i printova, ja ku janë përtokë. Ja ku janë premtimet e Edi Ramës!

Ja ku janë premtimet e Edi Ramës! Të gjitha! Të zezë mbi të bardhë. Premtimet e tij! Nuk ka mbajtur asnjë premtim të vetëm. T’i marr e t’ua lexoj. T’i marr e t’ua kujtoj, apo është harxhim kohe? Atëherë t’i vë aty ku i vuri ai premtimet e tij, përtokë. Edi Rama nuk mbajti asnjë premtim, jo thjesht dhe vetëm se nuk ishte i zoti t’i mbante.

Mos harroni!

Edi Rama nuk u përpoq kurrë të mbante asnjë premtim me të cilin erdhi në pushtet. Edi Rama me vullnet i braktisi premtimet e tij, sepse prej ditës së parë, marrja e pushtetit dhe administrimi i pushtetit nuk ishte për axhendën tuaj, për hallet tuaja, për interesat tuaja, por vetëm për interesat e tij dhe të kupolës politike, që përbëjnë komplotin ekonomik, kundër xhepave të shqiptarëve, komplotin politik, kundër lirive dhe të drejtave të shqiptarëve, komplotin më të madh në histori kundër Shqipërisë europiane dhe kundër të ardhmes së shqiptarëve.

Në këtë komplot përfitojnë një grusht njerëzish. Një grusht politikanësh të korruptuar, me në krye Edi Ramën dhe Ilir Metën dhe aleatët e tyre. Një grusht oligarkësh që përfitojnë të gjitha tenderat dhe koçensionet. Një grusht kriminelësh, të cilët, Edi Rama i bëri deputetë, kryetarë bashkish, drejtorë policie, drejtorë të mëdhenj të administratës, disa i nxori nga burgu, vetëm e vetëm për t’i shërbyer pushtetit dhe pasurimit të tij.

Një grusht pronarësh mediash të kapura, të kthyera tërësisht në vegla në dispozicion të kupolës politike, media të cilat nuk kanë axhendën e interesit publik, por kanë axhendën e pasurimit dhe të pushtetit të tyre të përbashkët me qeverinë, për të siguruar të ardhura mbi kurrizin e qytetarëve shqiptarë, me koçensione korruptive, me leje ndërtimi, me tendera, me favore të çfarëdollojshme. Koorporata mediatike shqiptare, në shërbim të kupolës politike të republikës së vjetër, është edhe arma më e fuqishme që ka një synim; trullosjen, trumpirjen e shqiptarëve që të vazhdojë teatri i kukullave, që të vazhdojë shfaqja me OSCAR, ndërkohë që duart e tyre futen thellë në xhepat e qytetarëve shqiptarë.

Ky komplot politik, ky komplot ekonomik, ky komplot kundër çdo shqiptari dhe shqiptareje, ka rekrutuar me paratë e ndyra të drogës dhe korrupsionit, lobistë të fëlliqur, të cilët përpiqen t’u shesin kryeqyteteve europiane dhe kryeqyteteve të aleatëve tanë, dëngla dhe dokrra, mashtrime dhe gënjeshtra në mënyrë që të asgjesojnë të vërtetën që e njeh çdo shqiptar, i djathtë dhe i majtë. E nëse nuk e asgjesojnë dot, t’i fusin në dyshim se çfarë është fakt, dhe çfarë është opinion.

Miliona euro, të cilat do të shpenzoheshin për fëmijët tuaj, për pensionet tuaja, për shëndetësinë, për arsimin, për punësimin, për taksa më të ulëta, për rroga më të larta, për të ndihmë ekonomike për njerëzit në nevojë, oligarkia dhe kupola politike e republikës së vjetër, ua paguan këtyre lobistëve mafiozë dhe të fëlliqur, të cilët nuk duan t’ia dinë as për Shqipërinë, as për shqiptarët, as për paratë e gjakut dhe të djersës së shqiptarëve. Ata, i fusin këto miliona në xhepat e tyre me një dhe një qëllim, që në mediat ku kanë akses, dhe zyrat ku kanë akses, të injektojnë, jo të vërtetën, por gënjeshtrën. Të injektojnë jo të drejtën, por të padrejtën, në mënyrë që të asgjesojnë çdo shans të vendimmarrjes së drejtë nga kryeqytetet europiane dhe të aleatëve tanë.

Sigurisht, kjo e ka bërë betejën më të vështirë, por oligarkia dhe kupola politike, nuk ia kanë dalë. Javët e fundit, këtu nga ky shesh, miqtë tanë europianë e amerikanë dhe kudo, e kanë grisur perden e propagandës së Ramës dhe kanë folur me zërin e bashkuar, se Shqipëria, është në krizë politike dhe ekonomike. Se shkaqet e kësaj krize, nuk janë opozita dhe as protesta e opozitës, as ky bashkim qytetar për të drejtën dhe të vërtetën, por janë droga, krimi me mbështetje qeveritare, është politika e degjeneruar, e dështuar, me në krye Edi Ramën.

Me këtë vetëdije, ditë për ditë, duhet të festojmë këtu këtë trofe tuajën dhe këtë shërbim të paimagjinueshëm, që ju i keni bërë Shqipërisë dhe të ardhmes së saj. E kam thënë dhe e përsëris. Në 3 vite e gjysëm, e kemi bërë këtë betejë në parlament, në kancelari, konferenca për shtyp, studio televizive. Unë, grupi ynë parlamentar, aleatët tanë opozitarë, e kemi luftuar këtë betejë dhe them se kemi luftuar mirë. E kanë luftuar këtë betejë njerëzit e vlerave, intelektualët, pjesa e pakapur dhe e pakompromentuar e medias, gazetarët, akademikët, studentët, në hapësirën që sa vinte e ngushtohej, të republikës se vjetër. Dhe e kanë luftuar shumë mirë. Por për fat të keq, në 3 vite e gjysëm të kësaj beteje, nuk ia kemi dalë të arrijmë as një të dhjetën e fitoreve që ju ia keni dalë këto 81 ditë.

***

Mësimi është i qartë. Konkluzioni është i dukshëm për këdo që ka sy në ballë dhe mendje për ti analizuar faktet. Edi Rama nuk e njeh gjuhën e argumentimit. Nuk e njeh forcën e arsyes. Ai njeh, respekton dhe do të respektojë, vetëm imponimin nga bashkimi qytetar dhe popullor përmes protestës, përmes manifestimeve, përmes mosbindjes civile, përmes betejës totale për zgjedhje të lira e të ndershme.  Beteja që na bashkon bëhet në emër të një parimi themelor për bashkëjetesën demokratike dhe ky është parimi i votës së lirë. Për shumëkënd, në kushte varfërie ekstreme, padrejtësie ekstreme, vota e lirë mund të duket si një premtim abstrakt. Madje, edhe i padobishëm për nxjerrjen nga gjendja ku ndodhen.

Ndaj sot, është përsëri rasti që së bashku ti themi cdo qytetari e qytetareje se; beteja 81 ditore që do të vazhdojë deri në fitoren totale të kësaj kauze, manifestimi dhe bashkimi më i madh në historinë e Shqipërisë demokratike, të shtunën në orën 12, është axhenda dhe kauza e çdo qytetari. Me votën e lire, qytetarët do vendosin këtej e tutje. Me votën e lire, republika nuk do jetë më as e politikanëve, as e partive politike, por do jetë pronë e drejtpërdrejtë, pa sekserë, pa kallauz, e cdo qytetari e qytetareje të republikës.

Në duart tuaja, duhet e do të jetë instrumenti i pushtetit dhe i kotrollit. Ky instrument, është vota e lirë. Në duart tuaja, do jetë e drejta hyjnore dhe arma më e fuqishme që sovrani ka karshi qeverisë, vota e lirë. Me votën e lire, nuk do diktohet thjeshtë dhe vetëm përfundimi i zgjedhjeve të ardhshme parlamentare, por do diktohet një rrugë tjetër e pashkelur, për fat të keq deri më sot për qytetarin e republikës së Shqipërisë, por që shumë prej jush e keni parë, prekur dhe shijuar sa herë keni qënë në vendet ë BE apo SHBA.

Kjo është Republika e Re. Republika e demokracisë pjesmarrëse dhe jo përfaqësuese. Pjesmarrëse do të thotë që, në çdo moment, me kushtetutë, ligje dhe instrumente institucionale, të drejtën e vendimmarrjes, do ta keni ju, pëmes përfaqësuesve që do ti kontrolloni ju. Që do ti emëroni dhe zgjidhni ju. Që do ti shkarkoni, qortoni apo largoni ju dhe vetëm ju, me votën tuaj, në zgjedhje, në referendum dhe në një strukturë tërësisht të rinovuar të kontrollit dhe balancës së pushteteteve.

Që lumi i parave dhe pasurive tuaja që merret nga gjaku juaj, nga xhepat tuaj, nga djersa juaj, duke ju lënë në varfëri ekstreme, në dëshpërim, në pasiguri, të kthehet tek ju, tek qytetarët shqiptarë duhet të asgjesojmë mekanizmin që e ka shndërruar këtë republikë të vjetër në një apartheid, ku përfitojnë një grusht njerëzish në kurriz të shumicës absolute. Duke kthyer këto asete, taksa, pasuri, resurset e vendit, tek qytetarët shqiptarë, Republika e Re, do të mbajë premtimin ndaj çdo aksioneri të saj, ndaj cdo qytetari.

Edhe ata që do të jenë në gjëndje të përfundojnë studimet e tyre, të integrohen në tregun e punës, por edhe nëse futen në tregun e punës, ata të paktë, fatlumë, do e kenë të pamundur të sigurojnë një vend pune që u përshtatet me kualifikimet që kanë marrë.

Republika e Re u siguron një pagë dinjitoze, për të hedhur hapin tjetër në jetë që është themelimi i familjes, që është gjetja apo blerja e një strehe familjare dhe avancimi i aspiratave normale në një shoqëri normale.

Kjo është një nga dramat më të mëdha që Shqipëria ka sot. INSTAT i kontrolluar nga Rama, shpalli sot se 30% e të rinjve shqiptarë as nuk gjejnë dot punë, as nuk ndjekin dot shkollën. Kur e thotë INSTAT-i i Ramës, e kuptoni që shifra e vërtetë është diku te 60%. Që 6 ndër 10, të rinj shqiptarë, në këtë republikë të vjetër, në këtë shtet të dështuar dhe të korruptuar, nuk garanton minimumin e të ecurit përpara.

Këta që flasin për të ardhmen europiane, këta, kanë shkatërruar të ardhmen e vendit që janë fëmijët shqiptarë. Sepse, kanë shkatërruar ekonominë, kanë shkatërruar arsimin e lartë.

Si do shkojë Shqipëria drejt Europës, kur 6 ndër 10 të rinj, nuk kanë as punë as shkollë. Kur 8 në 10 të rinj, duan të largohen nga Shqipëria.

A i thëret mendjes ky i papërgjegjshëm? Sigurisht që jo. Sepse republika e vjetër, është teatri i kukullave. Eshtë fasada, axhenda politike e Edi Ramës, është dhe do të mbetet, sa kohë që ju do ta lini aty, sa kohë që ne do të lejojmë pasurimin e tij dhe të çetës së tij.

Por me një Republikë të Re, që buron nga zgjedhjet e lira e të ndershme, fondet që sot përfundojnë në xhepat e oliarkëve, që sot vidhen e shpërdorohen e përfundojnë në konto bankare, në llogari offshore të Abi Bank dhe bankave të tjera kryeministrore dhe ministrore, do ti kthehen qytetarëve shqiptarë dhe në radhë të parë fëmijëve të tyre.

Ja pra, sesi duke anulluar vetëm një nga konçesionet korruptive të Edi Ramës që u kushton xhepave të shqiptarëve 25milionë euro në vit, vetëm njëri prej tyre, (25 milionë merr zonja dhe i ndan me zotërinjtë) vetëm me anullimin e një konçesioni të tillë, Republika e Re u mundëson 10 mijë studentëve shqiptarë, pas përfundimit të studimeve, një vit stazh të paguar me rrogë minimale 200 mijë lekë në muaj plus sigurime e taksa të paguara nga shteti.

Kjo është beteja. Republika e vjetër këto para i ka për një njeri, për Vilma Nushin dhe për Edi Ramën, Republika e Re i ka për 10 mijë studentë shqiptarë me stazhe të paguara.

Republika e vjetër, i ka paratë, 2.8 miliardë euro për abuzime në tre vjet, shifra zyrtare e KLSH.2.8 miliard do të thotë, që një buxhet, e kanë gllabëruar vetëm me vjedhje dhe shpërdorime. Këto para, i përfiton vetëm çeta më në krye Edi Ramën, prandaj nuk ka rritje pensionesh.

E mbani mend se çfarë premtonte për pensionet apo jo?!  Ja t’ia lexojmë pak; 650 mijë pensionistëve shqiptarë, surratzëzi, u premtoi rritje pensionesh çdo vit, jo vetëm rritje pensionesh çdo vit, por çdo fundviti do t’i shpërblente me tre pensione shtesë.Nuk ka tre pensione shtesë, nuk mund të ketë tre pensione shtesë, sepse lekët përfundojnë në ‘Abi Bank’, përfundojnë në konto personale, ne Kejmen Island, bëhen vila luksoze, bëhen hotele me pishina, bëhen rrush e kumbulla me 15 milionë dollarë vetëm me bileta avioni, 45 milionë dollarë vetëm për naftë, me qindra milionë euro vetëm për orendi, me 600 milionë euro vetëm për buzëkuq elektoral, prandaj nuk ka lekë për pensionistët shqiptarë.

Kjo është zgjidhja, do të vazhdoni me këtë që thotë po ika do të humbas shumë, jo shumë, por do humbasin shifra astronomike që i vjedh nga xhepat e shqiptarëve, do rrimë me këtë, do ta tolerojmë këtë të qëndrojë këtu e të vazhdojë t’ju vjedhë?

Asgjë nuk do të ndryshojë për ju, keq e më keq do të bëhet.

Apo, do të bashkohemi e do të luftojmë për Republikën e Re, e cila ju garanton qytetarëve dhe pensionistëve 650 mijë pensionistëve shqiptarë, që me luftën e vendosur kundër oligarkëve, me kthimin e parave tek qytetarët, në krye të 4 viteve, pensioni minimal në Shqipëri të jetë 250 mijë lekë të vjetra në muaj.

***

Republika e vjetër, ka shumë armiq mes shqiptarëve. Një nga armiqtë më të rrezikshëm, më i rrezikshmi pa dyshim, është rinia. Tmerr ka rininë, se rinia sjell ndryshimin.

Armiku numër 2, janë shtresa e mesme e shqiptarëve, profesionistët, ata të ciliët kanë një farë pavarësie financiare. Shumë e rrezikshme kjo. E rrezikshme për komunistët, i pushkatonte Enveri, e rrezikshme për bijtë e Enverit.

Sepse, pavarësia financiare sjell pavarësi mendimi, nuk i marshon dot për kafshatën e gojës as ky, as Tërmeti, as kriminelët e tij, ndaj i ka ngarkuar me taksa, me gjoba, me trajtime çnjerëzore.

Para, të cilat merren nga mundi i tyre, nga aftësia e tyre krijuese.

Shtresa e mesme është aftësia krijuese e një kombi është kolona e stabilitetit, është garancia e përparimit, janë ata që çajnë të parët dhe shoqëria i ndjek, i ndjek madje edhe politika.

Shoqëria shqiptare ka vuajtur shumë për krijimin e shtresës së mesme, e cila sot mbetet e vogël dhe e dobët. Por ky, kërkon ta zhdukë, ta asgjesojë në radhë të parë financiarisht, pastaj edhe si faktor social, politik dhe kulturor.

E pra, shtresa e mesme shqiptare, qoftë biznesi i vogël dhe i mesëm, qofshin profesionistët, mjekë, ekonomistë, inxhinierë, financierë, juristë, të gjithë profesionet, duhet ta dinë se dita e parë e Republikës së Re, do të sjellë për ta çlirimin total nga zgjedha mafioze e taksave mafioze të Edi Ramës. Se tatimi i sheshtë 9% duke ruajtur shifrën e 300 mijë lekëve të para, pa tatim, do të jetë çlirimi total, që iu vendos përsëri në kushte barazie për konkurencën, konkurencën e ndershme, dhe në kushte pavarësie ndaj shtetit. Jeni ju që do t’i diktoni shtetit dhe jo shteti që do t’iu diktojë ju.

Ky tatim prej 9% do të shoqërohet nga eleminimi total nga taksat e padrejta që kanë frenuar aktivitetin ekonomik. Një nga këto do të jetë edhe taksa për transferimin e pronës, që ka arritur sot në 15% duke ushqyer informalitetin total, duke ngrirë transaksionet e shitjes së pronës. Taksa për shitjen e pronës, do të fiksohet në një maksimum, në një tavan prej 0.5% të vlerës së pronës. Ky do të jetë tavani maksimal për zonat më të shtrenjta të Shqipërisë dhe Tiranës dhe do të ketë edhe kufinj më të ulët se ky.

Shteti, nuk do të jetë një shushunjë që majmet me transaksionet pronësore të shqiptarëve, por do të jetë një aleat në çlirimin e energjive pozitive ekonomike që padyshim kanë për bazë edhe tregun e pronës, edhe tregun e tokës, edhe tregun e ndërtesave. Këto, do të çlirohen nga këto taksa të padrejta.

Dividenti, po kështu, një taksë idiote që nuk ka sjellë asnjë të ardhur në buxhetin e shtetit, por ka zhytur në informalitet kompanitë, ka frenuar riinvestimin e fitimeve të kompanive, do të zerohet në platformën e Republikës së Re për një ringjallje të shpresës dhe besimit, për një ekonomi të fortë dhe një të nesërme të sigurtë për çdo shqiptar.

Ne do t’i kthejmë klasës së mesme, shtresës së mesme dinjitetin, sigurinë dhe mundësinë për të udhëhequr Shqipërinë nga dalja e krizës ekonomike, drejt rritjes ekonomike, krijimin e vendeve të punës, çlirimin nga frika, çlrimin e pozitivitetit dhe çdo energjie në funksion të rritjes ekonomike që do të thotë; vende pune dhe vende pune me paga dinjitoze për shqiptarët dhe në veçanti për rininë shqiptare.

Fermerët shqiptarë që nuk kanë parë kokërr leku në këto 4 vite të vjedhjes dhe hajdutërisë totale, ku janë vjedhur paratë për subvencione, janë shtuar taksat për inpute bujqësore, janë vjedhur përsëri, sepse, edhe atë prodhim që kishin nuk e shisnin dot se e fusnin grositët e lidhur me qeverinë; fermerët, duhet ta dinë se në Republikën e Re mirëqenia e tyre, përparimi i tyre ekonomik do të mbështeten fuqishëm nga masa të vendosura për të ndihmuar fermerin shqiptar. Duke nisur me subvencione direkte, 100 milionë euro të përvitshme, duke vazhduar me investimet rurale, duke vazhduar me bllokimin doganor të çdo prodhimi bujqësor dhe nënprodukti bujqësor që konkuron në mënyrë të pandershme prodhimet e fermerëve shqiptarë përmes tarifave proporcionale, doganore, që pjesa e fermerit shqiptar do të jetë e barabartë me pjesën e çdo fermeri europian.

Në këtë mënyrë, mbi 47% e popullsisë që jeton në fshat në kushte të mjeruara, do të ketë instrumenta, kapitalin, ndihmën, lehtësimin nga taksat. Në mënyrë që fermeri të fillojë të punojë për veten e tij, jo thjesht për të mbajtur frymën gjallë dhe familjen me bukë, por për të krijuar vende pune, për të krijuar mirëqenie, për të krijuar punësim në një sektor që sot është 19% e Prodhimit të Brendshëm Bruto.

Fshati dhe fermeri shqiptar, blegtori shqiptar, peshkatarët, do të përbëjnë kështu një shtyllë të fuqishme të shëndoshjes së ekonomisë, forcimit të ekonomisë për vitet e ardhshme.

Prodhuesit e të gjithë llojeve, do të kenë përmes taksës së sheshtë 9% një injeksion prej afro 1 miliard eurosh vit për vit, me cka do të jenë në gjendje të hapin mijëra vende të reja pune dhe të rrisin pagat për punonjësit e tyre.

Këto para sot vidhen dhe shpërdorohen nga kupola në pushtet. Nesër në Republikën e Re do të jenë injeksione kapitale, financiare për rritjen ekonomike, për punësim, për kushte më të mira pune dhe për paga më të larta.

Arsimi shqiptar do të jetë kryefjalë e Republikës së Re, asgjë nuk do të kursehet për fëmijët e shqiptarë. Në Republikën e Re çdo shqipar kudo ku jeton, pavarësisht nga statusi social apo ekonomik do të ketë një subvencion të drejtpërdrejtë mujor prej 30 mijë lekësh të vjetra nga Republika e Re.

Shkollat shqiptare, njësoj si shkollat europiane, do të mundësojnë përmes kapaciteteve të reja duke përfshirë mensat në çdo shkollë, rritjen e numrit të mësuesve, shtimin në kurrikulumin e mësimit edhe të mundësive për të kryer detyrat e shtëpisë në ambientet shkollore, për të marrë pjesë në aktivitete sportive, në ambientet shkollore, për të mundësuar gjuhë të huaja dhe për t’u marrë me çështje të tjera të kulturës, të artit në ambientet shkollore.

Nga ora 8 e mëngjesit, deri në orën 16:00 të pasdites, fëmijët e shqiptarëve do të jenë përgjegjësi e sistemit arsimor të Republikës së Re, përfshirë drekat e paguara për çdo fëmijë shqiptar në sistemin 9-vjeçar dhe në sistemin e shkollave të mesme.

Këto të gjitha janë të mundura, nëse ne çlirojmë Shqipërinë nga kthetrat e republikës së vjetër, nëse ne asgjesojmë kupolën kriminale, nëse pamundësojmë planin e kupolës politike për të vazhduar t’i shërbejë pasurimit të vet dhe pasurimit të vet duke kapur zgjedhjet e ardhshme.

Ndaj, 13 maji vjen si një pikë kulmore e këtij bashkimi popullor dhe vazhdimi i përditshëm i kësaj beteje deri në fitoren e saj totale. Fitorja e zgjedhjeve të lira dhe të ndershme, nuk është thjesht dhe vetëm një hap i madh, gjigand për lirinë e shqiptarëve, por është vetë hapja e derës drejt një realiteti të ri, drejt Republikës së Re. Eshtë mbyllja një herë e përgjithmonë e derës së republikës së vjetër, të padrejtësisë, të arrogancës, të krimit dhe drogës.

Le ta falimentojmë së bashku teatrin e shëmtuar të kukullave. Le t’i japim fund komplotit politik dhe ekonomik kundër shqiptarëve, le ta përcjellim me ceremoni republikën e vjetër.

Të gjithë bashkë, me 13 maj, të hapim derën e historisë së re, të Shqipërisë europiane, këtu në këtë shesh, të gjithë së bashku.

Zoti e bekoftë Shqipërinë

Zoti i bekoftë shqiptarët!

Mesazhi i Lulzim Bashës në ditën e 82 të protestës për zgjedhje të lira e të ndershme, dhe projekti i Republikës së Re për shumicën e shqiptarëve, 9 Maj 2017

Ju përshëndes dhe ju uroj nga zemra për ditën e 80-të të bashkimit më të madh të shqiptarëve, për zgjedhje të lira dhe për Republikën e Re, autorë të së cilës jeni ju qytetarë dhe qytetare, të rinj dhe të reja, autor i së cilës është populli shqiptar.

Miqtë tanë të nderuar, publicistët Fitim Zekthi, opinionisti Ergys Mërtiri, nënat që folën këtu në këtë forum, studentët, Ibrahimi një nga njerëzit me të cilët Shqipëria është krenuar në arenën ndërkombëtare, një ekspert i jashtëzakonshëm, trajtuan shqetësimin e madh kombëtar të një Shqipërie pa zgjedhje por me votime moniste. Dhe për ju të rinj që keni lindur pas viteve ’90 apo që keni lindur pak përpara viteve ’90 dhe nuk keni kujtesën historike për votimin monist, do të thotë të mos zgjedhësh dot, të mos kesh mundësi të zgjedhësh.

Ky është plani kriminal i Edi Ramës, t’iu mohojë shqiptarëve mundësinë për të zgjedhur. Fillimisht, plani ishte t’ua mohonte këtë me opozitën në letrën e votimit, por me krimin dhe drogën në qafën e votuesve. Kur ju, kur ne, u ngritëm më 18 shkurt dhe ia dogjëm këtë plan orgurzi, tani plani tij kriminal është të shkojë në një palë zgjedhjeve të asgjesuara moralisht, politikisht dhe ligjërisht, vetëm me një subjekt politik, me koalicionin e sharlatanëve, hajdutëve dhe kriminelëve, me të cilët qeveris Shqipërinë në këto 4 vite.

***

Edi Rama, ka disa ditë që flet për destablizimin e Shqipërisë. Në fakt Edi Rama e destabilizoi Shqipërinë me themele në këto 4 vite.

Faktorët kryesorë të destabilizimit të Shqipërisë janë krimi i ngritur në pushtet, në institucione, me deputetë kriminelë, me kryetarë bashkish kriminelë, me kryepolicë kriminelë, me doganierë kriminelë, me tatimorë kriminelë, me drejtorë kriminelë dhe me njeriun që drejton këtë ushtri krimi dhe droge, që është vetë Edi Rama, projektuesi, arkitekti, përfituesi i Shqipërisë së inkriminuar dhe të droguar.

Kush i solli kriminelët në Kuvendin e Shqipërisë?

Kush i solli kriminelët në krye të bashkive të Shqipërisë?

Kush i solli kriminelët në Policinë e Shtetit?

Kush i solli kriminelët në krye të institucioneve?

Kush i solli eskobarët?

Kush e mbolli Shqipërinë më drogë nga jugu në veri?

Edi Rama me ushtrinë e tij të krimit, me batalionin e tij të krimit me të cilin sundoi Shqipërinë, të djathtë e të majtë, në këto 4 vite.

I solli kriminelët e mbushi Shqipërinë me drogë, prishi çdo palë zgjedhje që pati në dorë, që nga Korça, e mbani mend apo jo?Dy muaj pasi kishte marrë pushtetin, në një situatë të vështirë për opozitën, kur ne garuam për hir të garës qytetare me një qytetar të jashtëzakonshëm, e mbani mend apo jo, me Sotiraqin?! Vetëm e vetëm për t’i dhënë demokracisë garën e ndershme, realisht dy muaj pas humbjes në nivel kombëtar dhe pas promovimit të ish-kryetarit të bashkisë si zv.kryeministër. Ajo që vlente, ishte beteja. Por jo, Edi Rama nuk u mjaftua, u filmua duke shpërndarë para për vota.

Mbani mend 2015-ën si e vonoi ligjin për dekriminalizimin që të çonte Roshin në Kavajë, Tur Bushin në Krujë, Artur Ndojin apo Bardhin, apo si të dojë, se ka nja 7 emra, në Kurbin, kandidatë me rekorde kriminale në Fushë-Arrëz, në Pukë, në Has, Tërmetin e famshëm në Tepelenë.

Tërmeti, ai është shoku i Edi Ramës, ta dini, me atë krenohet Edi Rama. Unë kam krenari kur ulem e pi një kafe me Artan Fugën dhe shokët e tij, ky krenohet kur pi kafe me Tërmet Peçin, me Klement Ndonin, edhe me Gjushin, të mos harrojmë Gjushin, poliedrikun e krimit, injorancës dhe korrupsionit.

Dhe pas kësaj, kur OSBE/ODIHR i tha se me këto zgjedhje ke shkatërruar besimin e shqiptarëve tek procesi elektoral, cfarë bëri, për t’iu rikthyer besimin shqiptarëve në procesin elektoral?

E mbushi Shqipërinë me drogë, ia dorëzoi PS-në e Dibrës kryekriminelëve të Shqipërisë, dhe futi duart edhe në zgjedhjet në Kolonjë.

Sepse, Edi Rama ka tmerr nga zgjedhjet e lira dhe të ndershme, prandaj projekti i tij i vetëm politik ishte dhe mbetet, shkatërrimi i zgjedhjeve, diktimi i Parlamentit dhe qeverisë së ardhshme, jo nga vota juaj, por nga krimi dhe droga në pushtet. Ky është plani, ky është projekti, këtë ka bërë 4 vite me radhë.

E ka destabilizuar Shqipërinë e ka shkatërruar ekonominë, ka rrënuar shëndetësinë, e ka çuar vite e dekada mbrapa arsimin, ka varfëruar shqiptarët; nga pensionistët që sot blejnë më pak me pensionin e tyre, tek biznesi i vogël që është në pikë të hallit, tek investitorët e mëdhenj shqiptarë apo të huaj që kanë filluar të gjithë njëri pas tjetrit të largohen dhe të mbyllin bizneset e tyre dhe vendet e punës në Shqipëri.

Edi Rama e ka destabilizuar Shqipërinë. Ky vend që ne, të gjithë shqiptarët, të djathtë e të majtë, e bëmë anëtare të NATO-s në vitin 2009, ky vend, sot nuk kontrollon dot as kufijtë, as territorin. Sepse kufijtë dhe territori i Shqipërisë janë nën kontrollin e krimit të organizuar, bandave të drogës dhe kupolës së korruptuar kriminale të Policisë së Shtetit e cila s’mund të jetë gjë tjetër veçse zgjatim nga njëra anë i kriminelëve që pasurohen duke shtypur e skllavëruar shqiptarët në industrinë e drogës, dhe nga ana tjetër, e pushtetit të korruptuar dhe kriminal të Edi Ramës.

Këta janë faktorët e destabilizimit. Nuk ka nevojë asnjë kundërshtar i Shqipërisë të fusë duart dhe të bëjë diçka për Shqipërinë, se gjitha të zezat ia bën Edi Rama nga A tek ZH-ja.

Investimi i vetëm i atyre që nuk duan përparimin e Shqipërisë, investimi më i zgjuar i tyre, është të mbajnë në pushtet Edi Ramën me çdo kusht, se kështu ia bëjnë gropën Shqipërisë dhe shqiptarëve të djathtë e të majtë.

Por kjo nuk mund të jetë kurrë e ardhmja e vendit tonë, ky nuk mund të jetë kurrë fati i Shqipërisë dhe fati i shqiptarëve, as i djathtëve, as i të majtëve. Kjo është historia e 4 viteve që shkuan dhe që mbyllet përfundimisht me 18 qershor.

Shqipëria është e destabilizuar sepse është në dorë të kriminelëve, sepse policia është në dorë të kriminelëve, sepse shteti është në dorë të kriminelëve dhe të drogës. Shqipëria është e destabilizuar sepse qytetarët janë në dëshpërim dhe pasiguri totale. E tha nëna e dy vajzave, por sa nëna të tjera kanë histori të tilla, ku droga sheshit, jo vetëm u shitet por u ofrohet fëmijëve 11 vjeç nëpër shkolla për të krijuar tregun kriminal të konsumit  duke helmuar fëmijët e shqiptarëve.

Ky nuk e sheh drogën, ky nuk e sheh krimin, ky sheh vetëm opozitën si armik. Dhe çdo qytetar që është ngritur në këmbë për demokraci dhe zgjedhje të lira dhe të ndershme, ose e shan, ose e përbuz, ose e kërcënon.

Sepse projekti i kriminalizimit të Shqipërisë, projekti i drogimit të fëmijëve shqiptar, është vetë projekti politik i Edi Ramës, që ka qenë në gjendje dhe është në gjendje të bëjë gjithçka për pushtetin dhe pasurinë e tij dhe asgjë për ju qytetarë të këtij vendi, qytetarët sovranë të Shqipërisë.

***

Kjo nuk është parullë politike.

E mbani mend si erdhi me premtimet e 300 mijë vendeve të punës? A flet më sot ky njeri për vendet e reja të punës? Sigurisht që jo, se ky jo vetëm që nuk hapi vende të reja pune por me politikën e tij anti-ekonomike, anti-mirëqenie, mbylli me qindra –mijë vende pune, falimentoi me mijëra biznese të vogla, mbylli mundësitë që të tjerët të mbanin në punë njerëzit që kishin në punë e aq më shumë të merrnin edhe të tjerë.

Rriti taksat, rriti çmimin e energjisë, rriti çmimin e naftës dhe të gjitha këto fatura që i vilte me kërbaç, gjithë këtë haraç që vuri mbi shpatullat e shqiptarëve, kurrë nuk e ktheu tek shqiptarët as si investim, asnjë kilometër rrugë dhe në rrugët që i gjeti pa përfunduar prapë ashtu i ka lënë në atë gjendje të mjeruar, asnjë shkollë të re, asnjë spital për të qenë.

Të gjitha paratë i bëri rrush e kumbulla, pjesën më të madhe e ndau me oligarkët me nushët me shokë, me koncesione korruptive që nuk sjellin asnjë leverdi as për shëndetin e shqiptarëve, as për mirëqenien tuaj, as për xhepat tuaja, por vetëm për xhepat e Vilma Nushëve e të Edi Ramës me shokë.

Një pjesë tjetër ua dha ndërtuesve të korruptuar me të cilët ka 20 vjet që menaxhon karrierën e tij politike, me të famshmen rilindjen urbane, buzëkuqi që i kushtoi shqiptarëve të varfëruar deri në palcë 600 milionë euro. 600 milionë euro për palma nga 600-900 euro secila, që thahen me erën e parë të dimrit, ndërkohë që shqiptarët gërmojnë në xhepat e tyre qindarkën e fundit për të ushqyer fëmijët, gërmojnë dhe futen borxh për të paguar faturën e energjisë, gërmojnë dhe futen në borxh për të paguar taksat e larta apo tarifat e papërballueshme të arsimit të lartë për fëmijët e tyre. Sepse, gjithçka u bë më e shtrenjtë me Edi Ramën kryetar të shtetit të inkriminuar e të korruptuar e të droguar.

***

Edi Rama e ka destabilizuar Shqipërinë me themel dhe e vetmja shpresë për ta stabilizuar Shqipërinë dhe për ta çliruar Shqipërinë, dhe për ta kthyer Shqipërinë në rrugën e lirisë dhe demokracisë jeni ju, është kjo lëvizje popullore, është ky bashkim shqiptarësh i pathyeshëm.

Në këtë gjendje të mjerë ku e ka sjellë ekonominë, në këtë destabilizim përmes krimit dhe drogës ku e ka futur Shqipërinë ai e di fare mirë se nuk ka asnjë fabul ta shpëtojë para shqiptarëve.

Në traditën e etërve të tij politik ka shpikur armikun, dhe fushatën moniste për 18 qershorin do ta bëjë me armikun e shpikur, që nuk është thjeshtë opozita, nuk është thjeshtë PD, nuk jam thjeshtë unë, por janë gjithë qytetarët shqiptarë të cilët refuzojnë dokrrat e tij, mashtrimet e tij, justifikimet e tij për dështimin e tij total dhe qeverisjes së tij në këto 4 vite. Qeverisjen katastrofë, që ndërtoi shtetin e krimit e të drogës, shtetin e eksodit më të madh të shqiptarëve.

300 mijë shqiptarë të larguar në 4 vite të qeverisjes dhe qindra e mijëra të tjerë gati për të ikur ditën e parë, me mundësinë e parë. Kjo është arritja e Edi Ramës, 4 vite katastrofë, shkatërrim, varfëri dhe mjerim.

Ai e di se çfarë e gjen atë me përballje me votë të lirë, të ndershme para qytetarëve shqiptarë. Ai e di se çfarë e gjen atë, ministrat e tij dhe kriminelët më të cilët ka lidhur fatin e vet politik, me një drejtësi vërtetë të pavarur, me një veting që nuk e kontrollon ai me formulën Rama-Shullazi-Tahiri-Xhafaj, por formulën Hahn-Nuland, me gjyqtarë e prokurorë të pavarur? E di mire, se çfarë e pret, nga drejtësia e pavarur, njeriun që ngriti krimin dhe drogën në pushtet në këto 4 vite.

Plani i tij është fare i thjeshtë, t’i shmangë të dyja, as zgjedhje të mos ketë, as reformë të vërtetë në drejtësi të mos ketë.

Por i ka bërë planet pa hanxhinë. Hanxhia nuk jam unë, hanxhia nuk është Partia Demokratike. Sovrani, të cilin e ke përjashtuar nga llogaria, por para të cilit do të japësh llogari shumë shpejt, është populli shqiptar.

***

Republika e Re nuk është republika vetëm e demokratëve, nuk është ideja e Lul Bashës, është thirrja e kohës, është standardi minimal që janë gati të pranojnë bijtë dhe bijat tuaja, qëndrestarë dhe luftëtarë të dhjetorit ’90. Ju luftuat dhe sollët pluralizmin, luftuat dhe sollët liri në nivele dhe standarde të ndryshme, ne njohëm dhe prekëm funksionimin e demokracisë, por demokracinë reale, atë pjesëmarrëse, jo përfaqësuese, që e keni në dorë ju, siç e ka në dorë çdo qytetar i lirë europian, atë s’e keni pasur asnjë ditë.

Kjo është ëndrra e brezit të ri. Në fakt, më shumë se ëndërr ky është ultimatumi i brezit të ri. Lum kush e kupton, mjerë kush e refuzon sepse ëndrra e rinisë nuk ndalet!

Fundi i republikës së vjetër po afron. Republika e Re mban me vete një premtim të madh për çdo shqiptar, absolutisht për çdo shqiptar.

***

Republika e Re, do të thotë në radhë të parë që resurset e Shqipërisë dhe shqiptarëve, taksat e shqiptarëve, të gjitha burimet pasurore të administrohen në transparencë, në llogaridhënie totale, vetëm për shqiptarët.

Kjo do të thotë se do të marrë fund ajo kastë oligarkësh, ata 5 apo 6 miliarderë në kurrizin tuaj, që fryhen si shushunja me tenderat dhe koçensionet e parave tuaja. Sepse këto konçesione do të marrin fund që orën e parë të Republikës së Re. Paratë, plot 250 milionë euro vit për vit, të koncesioneve korruptive, do u kthehen shqiptarëve dhe sa më takon mua, do t’i kthehen të gjitha shtresave.

Do t’u kthehen pensionistëve, të cilët në Republikën e Re, do të kenë pensionin minimal, 250 mijë lek në muaj. Ky është premtimi i Republikës së Re për çdo pensionist, kjo është lufta, që ju ftoj të bashkoheni, çdo pensioniste dhe pensionist.

Ato 2.8 miliard euro të zhvatura nga buxheti i shtetit, përmes korrupsionit galopant siç e ka faktuar Kontrolli i Lartë i Shtetit, do t’i kthehen çdo shtrese shoqërore, çdo grupi interesi ekonomik, social, në Shqipëri. Duke përfshirë biznesin, i cili do të ketë garancitë e klimës më konkuruese në rajon, taksën më të ulët në rajon, taksën e sheshtë 9%, që të ndezë motorrët e ekonomisë, të çlirojë energjinë pozitive që e ka strukur nga frika e shtetit zuzar e të inkriminuar të Edi Ramës, të shtetit që i rri përballë me shkop, i cili në Republikën e Re, do të jetë aleat i sipërmarrjes, me një funskion; të hapë vende pune për shqiptarët.

Dhjetëra, qindra mijë biznese të vogla, e dinë dhe duhet ta dinë, se në Republikën e Re, nuk do t’i marrë malli më për surretërit e korruptuar të taksidarëve dhe inspektorëve që u marrin shpirtin nga mëngjesi në darkë, ditë për ditë. Pulla fiskale, me shlyerjen e detyrimeve që kurrë nuk mund të tejkalojnë 1.5% të xhiros në bazë të vetëdeklarimit, siç bëhet në Europë, pulla fiskale do të pamundësojë praninë e çdo inspektori shtetëror në bizneset tuaja, përveçse, nëse vjen si klient për të blerë apo porositur, përndryshe e pret burgu nëse vjen t’u bëjë presion apo t’u marrë rryshfet.

Mbi 40 mijë familje që janë hequr padrejtësisht nga ndihma ekonomike, një pjesë prej të cilëve kanë ikur në azil për të mbajtur frymën gjallë dhe mbi 70 mijë të tjerë, të cilëve shteti kriminal dhe i dështuar i Edi Ramës ua merr me fatura energjie, me taksa dhe me çmime të larta, atë që ua jep me një dorë, duhet ta dinë, se në Republikën e Re, çdokush që ka nevojë për ndihmën ekonomike, në kohën që përgatitet për të gjetur punësim në ekonominë e fortë dhe të nesërmen e sigurt që Republika e Re do të ndërtojë, do ta ketë shtetin në krah. Se faturat e energjisë, deri në 300KV, dhe faturat e ujit për konsumin jetik do të paguhen nga buxheti i shtetit për të gjitha familjet në ndihmë ekonomike.

Ku i ke paratë thotë. Pyete Vilma Nushin se ku i ke paratë? Do t’i nxjerrim paratë nga valixhet dhe kontot dhe bankat e oligarkëve dhe pushtetarëve të korruptuar dhe do t’ia kthejmë shqiptarëve, zotërve të vërtetë të tyre.

Për të gjithë fëmijët shqiptarë, cdo fëmi shqiptar, në Republikën e Re do të ketë shkollën nëntëvjeçare dhe të mesme, tempullin e të ardhmes dhe të dijes, si infrastrukturë, nuk do të ketë asnjë godinë më të mirë, më të mirëpajisur në asnjë lagje të qytetit dhe në asnjë lagje të Shqipërisë, se sa shkolla e atij fshati apo qyteti.

Kushte të garantuara nga ora 08.00 deri në 16.00 me drekën e paguar nga Republika e Re, për çdo fëmi shqiptar. Me mësues të çliruar nga vargonjtë e abuzivizmit, të drejtorive arsimore, që funksionojnë sot si motele dhe si banka për pushtetarët e korruptuar. Me mësues me rroga të dyfishuara. Nuk do të ketë asnjë investim më të fuqishëm të Republikës së Re, se sa fëmijët e shqiptarëve.

Droga do të marrë fund. Çdokush që do të kapet duke shitur apo ofruar drogë fëmijëve shqiptarë, e pret burgu i gjatë dhe i vështirë. Republika e Re, do të jetë e ashpër me ata që helmojnë fëmijët shqiptarë me drogë, ndaj teksa hedhim themelet e saj dhe rrëzojmë republikën e vjetër, u bëj thirrje kriminelëve që helmojnë fëmijët e shqiptarëve; hiqni dorë sepse do të uronit të kishit litarin në fyt me atë që do t’u bëjmë nëse vazhdoni të helmoni fëmijët tanë. E zeza do t’ju pijë, do t’ju shfarosim. Policia e Republikës së Re do të autorizohet të ndërmarrë të gjitha veprimet, për të trajtuar çdo person që shtrin drogën drejt fëmijëve, njësoj sikur drejton pistoletën drejt policit. Do t’iu asgjesojmë!

30 mijë lek të vjetra për fëmijët shqiptarë, do të jetë subvencioni i drejtpërdrejtë i Republikës së Re për shpresën, forcën, besimin europian, tek e ardhmja e Shqipërisë europiane, gjithçka për fëmijët e shqiptarëve, gjithçka për fëmijët tanë.

Fermerët shqiptarë nuk do të kenë më asnjë arsye të braktisin tokat, të therin bagëtitë, të shesin pasuritë e të nisen drejt emigracionit. Nuk do të kenë më asnjë arsye, të skllavërohen në skllavërinë e drogës.

Ne kemi një plan për mbështetjen totale të fermerëve. Me 1.5% të prodhimit të brendshëm bruto, 150 milionë euro në vit, nga të cilat 100 milionë euro do të përdoren për subvencione të drejtpërdrejta për çdo fermer, vetëm në bazë të prodhimit, dhe 50 milionë euro të tjera do të ndihmojmë vit për vit, infrastrukturën nga rrugët tek vaditja, kullimi, tregjet që ua kanë mbyllur pushtetarët e korruptuar dhe monopolistët, të cilet Republika e Re do t’i nxjerrë me gisht në gojë dhe do i hapë rrugën çdo fermeri të ndershëm, të jetojë me djersën e ballit, të krijojë mirëqenie dhe punësim për veten dhe familjen dhe ushqime cilësore me çmime të përballueshme për qytetarët shqiptarë.

Sepse, dogana do të mbyllet për çdo mall të huaj që konkuron në mënyrë të pandershme prodhimet e fermerëve tanë. Shënojeni këtë. Shënojeni këtë edhe ju, atashe tregtarë në Tiranë. Prodhimet e subvencionuara të fermerëve tuaj, nuk do të konkurojnë më kurrë prodhimet e fermerëve të mi në Shqipëri. Vetëm me tarifa doganore të ndershme, të cilat do t’i mundësojnë në radhë të parë fermerit shqiptar të shesë mundin dhe djersën e vet, vetëm në këto kushte bëhet fjalë për tregti të hapur dhe tregti të ndershme. Se që të subvencionosh fermerin e huaj dhe ta sjellin mollën, qepën, pataten me çmim konkurues, me çmime më të ulëta se sa fermerët shqiptarë, që u bie bretku, kjo për mua nuk shkon, unë këtë nuk e pranoj. Me ndihmën dhe votën tuaj unë këtë do ta ndaloj në Republikën e Re.

Studentët shqiptarë e dinë tashmë se, këtu tek kjo vijë e verdhë, orën e parë do të shfuqizoj ligjin për arsimin e lartë, ligjin e ndyrë të injorantëve dallkaukëve, hajdutëve të republikës së vjetër.

Këtu do ta firmos dhe se, ligji i ri, po përgatitet nga kolosët e mendimit akademik. Me ligjin e ri, asnjë bir, apo bijë shqiptari nuk do t’i privohet për arsye ekonomike, e drejta e studimeve të larta. Shteti do t’i heqë kthetrat nga menaxhimi i universiteteve. Ata do t’i menaxhojnë bota akademike, së bashku me botën studentore, siç bëhet kudo ku shqiptarët duan të studiojnë.

Kjo është formula e suksesit. Akademikët dhe studentët do të menaxhojnë së bashku universitetet tona. Edhe Henri me shokët e tij do kenë një copë diell në Republikën e Re. Jeni privatë, konkuroni si privatë. Po ofruat shërbimet më të mira dhe dikush do t’ua blejë me çmimet më të larta hallall, përndryshe nga sektori publik këtë do të merrni (tregon bërrylin).

Mediat shqiptare, kultura shqiptare, sporti shqiptar do të kenë nga Republika e Re, standardet më të larta të trajtimit përmes lirisë, përmes konkurencës, përmes garancive, që gjithësecili prej jush të prodhojë art, të prodhojë sport, arritje, të prodhojë për artdashësit dhe sportdashësit trofetë që ky komb dhe kjo rracë i ka në gen për t’ua marrë në gara të ndershme europianëve.

Këto janë realitetet e Republikës së Re që po vjen. Asgjë që ju thashë sot nuk ndryshon nga standardet e Europës, drejt së cilës drejtohen mjerisht shqiptarët, për shpresën që nuk e gjejnë në vendin e tyre. Por shpresa është këtu.

***

80 ditë qëndresë janë 80 ditë investim në shpresën e re që ka lindur. Ajo është në sytë, në shpirtrat, në zemrat tuaja dhe të çdo shqiptari të ndershëm. Republika e vjetër ka mbaruar.

E reja ka lindur në shpirtrat tuaja dhe me 13 maj nisim marshimin për ta institucionalizuar, për ta bërë realitet ligjor, kushtetues, institucional, qytetar, popullor kombëtar, Republikën e Re të qytetarëve shqiptarë.

E dimë fare mire, që bisha e plagosur në fund fare, ulërin më shumë. Krimi dhe droga kanë arsye për të ulëritur, sepse, nëse Republika e Re ka vend për këdo madje edhe për Edi Ramën e penduar, për krimin dhe drogën s’ka vend dhe nuk do të ketë vend.

Por Edi Rama dhe çeta e tij politike që në këto katër vite i shërbeu vetëm axhendës së vet politike dhe pasurore, dhe asnjë ditë axhendës tuaj, asnjë ditë halleve dhe probleme të shqiptarëve, asnjë ditë punësimit, arsimit shëndetësisë, ta mendojë mirë hapin tjetër që hedh. Jeni jashtë ligjit, jeni jashtë moralit, jeni jashtë politikës, dhe si të tillë do të trajtoheni nëse nuk tërhiqeni menjëherë.

Votim monist në 18 Qershor nuk do të ketë. Votim pa opozitën nuk do të ketë. Parlament të diktuar nga krimi dhe droga, nuk do të ketë.

Ne bashkohemi për të nisur në 13 maj, themelimin e Republikës së Re për çdo qytetare e qytetar shqiptar. Ne njohim dhe do të njohim vetëm këtë Republikë të Re. Bëhuni pjesë e konsensusit popullor për të shembur të vjetrën, shtetin e dështuar, të korruptuar e të inkriminuar e për të ndërtuar së bashku Republikën e Re. Bëhuni pjesë e konsensusit, ose përballuni me popullin.

Zoti e bekoftë Shqipërinë!

Zoti i bekoftë shqiptarët!

Mesazhi i Lulzim Bashës në ditën e 80 të protestës për zgjedhje të lira e të ndershme, 8 Maj 2017

Paraditen e 80-të në Sheshin e Lirisë bashkëbiseduan opinionistë, gazetarë, ekspertë dhe qytetarë për shqetësimin e rrezikut të votimeve pa zgjedhje, të përgatitura nga kjo qeveri për në 18 qershor.

Gazetari Fitim Zekthi tha se sfida me të cilën po përballet vendi sot është pikërisht mundësia e futjes në zgjedhje të njëanshme të shumicës qeverisëse. Mënyra se si një qeveri mund të kthehet në tirani, është dëshmuar gjatë këtyre katër viteve – tha Zekthi – tani imagjinoni që kjo të jetë e vetme në qeverisjen e vendit, pa kontrollin e pushteteve dhe ‘checks and balances’, se çfarë mund të ndodhë. Fitim Zekthi argumentoi se nëse Partia Socialiste dhe aleatët e saj, të parëndësishëm politikisht, hyjnë në zgjedhje de facto, moniste, kontrolli do të jetë i pamundur ndaj pushtetit, i cili kthehet në tirani nëse nuk ka kufizimin nga opozita parlamentare.

Ajo që sot duket e pamundur, nesër mund të bëhet e pakontrollueshme  – tha gazetari i cili e quajti edhe më të ngutshme nevojën e kësaj proteste për zgjedhje të lira, sa kohë tirania e shumicës lihet e pakontrolluar politikisht, mediatikisht apo kur tolerohet nga vetë elita intelektuale e vendit.

Ergys Mërtiri shprehu keqardhje që qytetarët shqiptarë, edhe 27 vite pas, ende protestojnë për zgjedhje të lira, në prag të një situate e cila duhet zgjidhur jo për interesa vetjake apo partiake, por fillimisht për hir të dinjitetit njerëzor dhe rregullave të lojës që garantojnë zgjedhjen e lirë të cdo individi. “Nuk ka rëndësi nëse je shumicë apo pakicë, pasi edhe sikur qytetarët e çadrës së protestës të ishin pakicë, e drejta është pikërisht tek përfshirja e pakicës në pushtet, në qeverisje”, tha Ergys Mërtiri.

Ai solli në vëmendje elementin monist të qeverisë Rama, i cili gjendet jo vetëm në planin e zgjedhjeve të 18 qershorit, si ato të 7 majit në Kavajë. Monizmi është jo vetëm në politikë, por edhe në biznes dhe shoqëri civile, media dhe kulturë – tha ai duke theksuar faktin se në mediat shqiptare nuk ka më hapësira opozitare që shprehin alternativën ndaj qeverisjes aktuale. Eshtë në dinjitetin tonë të protestojmë e të mos lejojme të kthehemi në telajon e kryeminsitrit, ku çdo mendim i tij duhet t’i imponohet gjithkujt, pavarësisht nëse shoqëria mendon se është ide e dështuar – tha Ergys Mërtiri.

Eriseda Rista, nënë e dy fëmijëve, tregoi se si djali i saj 11 vjeçar kishte rënë në kontakt me të rinj që shpërndanin drogë, ndërkohë që kryeministri thotë se po bën shtet.

Anxhela Petashi dhe Aurela Kurti, studente në prag të diplomimit treguan se të rinjtë sot nuk janë më as të motivuar të kërkojnë punë, pasi punë nuk gjejnë. Pasi u përballën me refuzimin e mundësisë për të studiuar në universitete publike, për shkak të formulës së dështuar të ligjit të arsimit të lartë, tani edhe ata që përfundojnë studimet mbeten mes katër rrugëve.

Ibrahim Hackaj, eknomist me eksperiecë shumë vjeçare deklaroi se në mënyrë që vendi të mund të përparojë në rrugën e tij europiane, parlamenti i shqiptarëve duhet të përbëhet nga njerëz intelektualë dhe me vlera, jo nga kriminelë që nuk i kanë shërbyer këtij vendi asnjë ditë. Parlamenti është i inkriminuar, kjo do të thotë se edhe niveli i tij është i dobët, por nuk mund të shkohet me këtë parlament, ku për hir të qasjes në Europë duhet njerëz me aftësi shkencore, tha Hackaj.

Mirlinda Çollaku me profesion jurist, është nëna e një djali 15 vjeçar të ardhmes së të cilit i trembet për shkak të modelit që fëmijëve u ofrohet sot. Më shumë se nga fjalët e mia, djali im edukohet me modelin që sheh – tha Çollaku – dhe shoqëria jonë për fat të keq ka inspiruar nëj model ku ska rëndësi sa njohuri ke, por sa lidhje ke me të fortët e zonës dhe të qytetit. Juristja theksoi se këtë model i cili shkul të ardhmen e fëmijëve nga duart e vetë prindërve, qeveria po mundohet ta zbatojë edhe në zgjedhejt e ardhshme. Ne duhet të garantojmë minimumin e një shteti normal, që është vota e lirë dhe arsyeja më e madhe është instikti mbrojtës për fëmijët tanë – tha Mirlinda Çollaku.

Lulzim Basha bëri një prezantim të gjërë se cfarë do të jetë Republika e Re për të gjitha shtresat e shoqërisë, duke shpjeguar thelbin e saj, që në qëndër do të jetë qytetari dhe ku cdo aset, pasuri e vendit, buxheti i shtetit, do të shkojjë vetëm për nevojat e njerëzve, për krijimin e vendeve të punës, për projekte që sjellin zhvillim.

Basha tha se qeveria në këto 4 vite ka dështuar në cdo drejtim, dhe se ka funksionuar vetëm për interesat e saj dhe të oligarkëve të saj. Ndaj, qeveria kërkon me cdo kusht të kapë votën, të mos lejojë zgjedhje të lira, pasi e di mirë se do të ndëshkohet.

“Plani kriminal i Edi Ramës, është t’iu mohojë shqiptarëve mundësinë për të zgjedhur. Fillimisht, plani ishte t’ua mohonte këtë të drejtë, me opozitën prezente në fletën e votimit, por me krimin dhe drogën në qafën e votuesve. Më 18 shkurt qytetarët ia dogjën këtë plan, ndaj tani plani tij është të shkojë në një palë zgjedhjeve të asgjesuara moralisht, politikisht dhe ligjërisht, vetëm me një subjekt politik, me koalicionin e sharlatanëve, hajdutëve dhe kriminelëve, me të cilët qeveris Shqipërinë në këto 4 vite”, tha Basha

Lulzim Basha i tha qytetarëve se për të mundësuar dhe institucionalizuar Republikën e Re, këtë realitet të ri për qytetarët shqiptar, në 13 maj çdo qytetar, të majtë e të djathtë, të rinj, prindër, burra dhe gra, duhet të ngrihen e të bashkohen për të ardhmen e tyre dhe të familjeve të tyre.

Opinionistë dhe qytetarë bashkëbisedojnë në Sheshin e Lirisë në ditën e 80 të qëndresës për zgjedhje të lira e të ndershme. Të vendosur për tu bashkuar në Tiranë me 13 maj në marshimin popullor