Blog

Bashkëbisedim në ditën e 77 të protestës për zgjedhje të lira e të ndershme, për vështirësitë dhe pamundësitë e të rinjve e studentëve. Shpresë dhe besim tek Republika e Re që ka nisur marshimin

Në ditën e 77 të qëndresës për zgjedhje të lira e të ndershme, në Sheshin e Lirisë, diskutimet me të rinj e pedagogë u fokusuan tek vështirësitë, problemet, shkeljen e të drejtave, papunësinë dhe mungesën në këto katër vite të qeverisjes së Edi Ramës.

Në hapje të agorës, studentja e Fakultetit të Drejtësisë, Aishe Isha, tha se, “Ligji për arsimin e lartë po shkel me të dy këmbët aspiratën e mijëra maturantëve shqiptarë për shkollim dhe edukim. Ata sot ndihen të zhgënjyer dhe të nëpërkëmbur nga premtim- mashtrimet e ministres Nikolla dhe Edi Ramës”.

“Në 7 Maj, në Kavajë tha ajo, republika e vjetër, e cila ka shkatërruar Shqipërinë në këto vite, do të marrë leksionin e lirisë dhe demokracisë së vërtetë”.

Enxhi Turtulli u shpreh se në Shqipëri me ministra e kryeministër të kapur nga krimi dhe droga, nuk mund të ketë investime dhe vende pune sepse ata kanë ngritur vetëm ekonominë e drogës dhe të korrupsionit.

“Sot nga cadra, shtëpia e të gjitha shqiptarëve, ku të vërtetat thuhet sic janë dhe jo të shtrembëruara nga propaganda e qeverisë, unë u them atyre që mendojnë se Shqipëria nuk bëhet, PO, Shqipëria bëhet! Behet vetëm me Republikën e Re dhe me Lulzim Bashën. Sepse Lulzim Basha e do Shqipërinë dhe do të punojë për të. Pas Kavajës në 7 Maj, është radha e të gjithë qyteteve shqiptarë për ti u kthyer qytetarëve dhe normalitetit të lirisë dhe ligjit” – tha Turtulli.

Pedagogu i Universitetit të Durrësit, Redi Myshketa në mesazhin e tij tha se, kjo ditë është një himn për të reflektuar për sakrficën e patriotëve, luftëtarëve të lirisë, për dhimbjen dhe vuajtjen e mijëra heronjve të heshtur të diktaturës që besuan tek Shqipëria e lirë dhe demokratike. Duke cituar filozofinë e një prej intelektualëve më të mëdhenj hebrej që i ka mbijetuar holokaustit, Delei, pedagogu Myshketa bëri apel për rrezikun e indiferencës së shoqërisë në udhëkryqin ku gjendet vendi.

“Nuk ka qytetarë të virtytshëm, nuk ka qytetarë të lirë dhe intelektualë, nëse do të ketë indiferencë. Ne nuk mund të jemi indiferentë ndaj Shqipërisë që vuan, me problem e halle kaq të mëdha, me drogën, krimin, varfërinë. Të heshtësh në këtë situatë nuk do thotë tolerance, por është injorancë, do të thotë të  braktisësh  veten dhe Zotin që ka secili prej nesh brenda vetes. Indiferenca për një shoqëri është vdekje dhe sot është koha që ne duhet të ringjallim Shqipërinë”.

Ejona Ruko theksoi se në 7 Maj, shqiptarët do ti kthehen Kavajës për liri e demokraci, dhe se të rinjtë do të jenë në pararojë të kësaj lëvizjeje, në mbrojtje të votës së lirë.

“Republika e Re që do të ngrihet me zgjedhje të lira e të ndershme është shpresa dhe mundësia e vetme për të rinjtë dhe cdo qytetar shqiptar.Vendi i secilit prej nesh në 7 Maj, tha ajo, është në Kavajën e rezistencës dhe djep i demokracisë shqiptare.

Studenti Bruno Kondi tha se të rinjtë besojnë në Republikën e Re sepse është sistemi i të gjithëve dhe jo pushtet  për Lulzim Bashën.

“Ajo është republikë e besimit dhe e vlerave reale dhe e jo mashtrimeve të parealizueshme sic bëri Rilindja e Ramës në këto katër vite. Të rinjtë do të jenë në Kavajë për tia rikthyer atë qytetarëve të lire dhe jo tia lenë Kavajën, kriminelëve dhe trafikantëve të drogës”.

Studentet Briselda Coba, Uejda Damjani dhe bashkëmoshatarë të tyre që dhanë mesazhin për ditën e 7 Majit në Kavajë, u shprehën se, kjo ditë është shpresë dhe besim edhe për ata qindra e mijëra të rinj që enden rrugëve të azilit për tu kthyer në Atdhe, ku do të triumfojë Republika e re.

“Më qeverinë e Ramës, reformat, ligjet vendimet, gjithcka ishte dhe është fasadë . Eshtë e dhimbshme dhe dëshpëruese të shohësh të rinjtë shqiptarë rrugëve të botës, sepse kanë ikur nga vendi, ku nuk ka shpresë, punë e para. Republika e Re do u sjellë atyre liri, alterantivë punësimi dhe të drejta për shkollim. Me Republikën e Re, e ardhmja dhe siguria e të rinjve është në Shqipëri dhe jo jashtë saj”, u shprehën të rinjtë.

Pedagogu Kreshnik  Bello tha se qeveria e Rilindjes ngriti pikërisht Shqipërinë që nuk duhet e që nuk e do asnjeri.

“Një vend ku cdo ditë ka krim, grabitje vrasje e drogë, kjo nuk është Shqipëria ku duam të rriten fëmijët tanë. Nuk ka zhvillim me votë të dhunuar nga krimi dhe varfëria. Vota e shqiptarëve masakrohet para se të shkojë në kutitë e votimit. Kjo është e vetmja ofertë e Rilindjes për të tashmen dhe të ardhmen. Por shqiptarët nuk mashtrohen më, dhe nga ky shesh, rezistenca për liri dhe demokraci është garancia e vetme për zgjedhje të lira e të ndershme. Në 7 Maj në Kavajë do të fitojnë shqiptarët, do të fitojë Republika e Re”.

Në mesazhin e tij, kryetari i opozitës Lulzim Basha tha se marshimi i Republikës së Re ka nisur. Basha siguroi të pranishmit se 7 Maji në Kavajë është stacioni i parë i Republikës së re, dhe stacioni i fundit i republikës së vjetër.

“Ne jemi gati, dhe stacioni ynë më i rëndësishëm, i pari në këtë betejë finale që do ta fitojë e nesërmja, shpresa dhe e ardhmja, do ta fitoja Republika e Re, është Kavaja. Përballja e pare, është dita e dielë në kryeqytetin e lirisë, në kryeqytetin e demorkacisë, në Kavajë. Nga Kavaja le të përhapet lajmi i mirë kudo se republika e vjetër është një tigër letre, është një grusht kriminelësh, pushtetarësh të korruptuar dhe oligarkësh. Ditën e dielë, le ta mësojë çdo shqiptar dhe çdo mik i huaj, dashamirësit e shumtë të Republikës së Re dhe kundërshtarët e paktë, se në 7 Maj republika e vjetër rrëzohet në Kavajë.

Ndaj, për fatet dhe drejtat e shqiptarëve, për fatin dhe të drejtat e çdo kryefamiljari dhe çdo kryefamiljareje, për të ardhmen e çdo të riu dhe të reje, për të ardhmen e çdo fëmije shqiptar le të bashkohemi të dielën në bashkimin më të madh popullor. Në përballjen paqësore por të vendosur që të shënojë simbolikisht rënien e republikës së vjetër dhe themelin e parë të Republikës së Re”, tha Basha.

Mesazhi i Lulzim Bashës në ditën e 77 të protestës për zgjedhje të lira e të ndershme

Çdo agorë ka rrezatimin e vet të bukurisë, mençurisë, fisnikërisë, fytyrës dhe shpirtit europian të popullit shqiptar. Por agorat më të bukura janë pa dyshim, agorat e rinisë, agorat e shpresës që po lind me rininë shqiptare, me të rejat dhe të rinjtë shqiptarë, shpresën dhe vendimin për Republikën e Re.

Vëllezër dhe motra, zonja dhe zotërinj, të rinj dhe të reja, 77 ditë pagëzojnë rekordin historik të kësaj lëvizje popullore qytetare, të këtij bashkimi kombëtar për zgjedhje të lira dhe të ndershme dhe për Republikën e Re. 77 ditë që kanë ndryshuar Shqipërinë sot, 77 ditë investim në të ardhmen që po vjen, Republikën e Re.

Nga honet e errëta të dëshpërimit, të induktuar nga krimi, droga dhe arroganca qeveritare, nisi bashkimi dhe marshimi ynë i madh i 18 shkurtit. U mblodhën qindra mijëra shqiptarë këtu në këtë shesh, në këtë agorë e deri tek sheshi Skënderbej, së bashku për të marrë siç kishim paralajmëruar, një vendim të madh. Një vendim të madh, që koha dhe vuajtjet dhe shpresat e shqiptarëve, e thirrën në shesh. Vendimin për të mos ulur më kokën para arrogancës, padrejtësisë dhe hajdutësirë, për të mos u trembur më nga krimi në pushtet dhe pushteti i i inkriminuar, vendimin për t’i thënë jo republikës fasadë, teatrit të kukullave, për të refuzuar komplotin politik dhe ekonomik, që luhet tash 4 vite në kurriz të shqiptarëve. Vendimin, për të mos pranuar zgjedhje fasadë të diktuara nga krimi dhe nga droga. Vendimin, për të mos u bërë më as alibi e as fasadë e republikës së vjetër, vendimin për të marrë fatin tuaj në duart tuaja, e kështu për të marshuar drejt një Republike të Re të qytetarëve shqiptarë, të djathtë e të majtë, por të lirë e të vendosur për  fatin e tyre europian.

Asgjë nuk është më si më parë. Që nga ajo ditë e bekuar e bashkimit të 18 Shkurtit, javë pas jave, ditë pas dite, saktrifica, kurajo, vendosmëria juaj, shembin njëri pas tjetrit fasadat e shëmtuara të republikës së vjetër. Bota mbarë e pa, e pranoi, e njohu vuajtjen e një kombi të tërë, thirrjen e një shoqërie të tërë për t’u ngritur bashkë kundër drogës, krimit dhe korrupsionit qeveritar.

Sot, në takime si ky që sapo mbarova me një nga ministret e jashtme kryesore të Europës, me qindra takime të tjera që kam pasur këto 77 ditë, ajo që nuk pranohej si argument i mirëqenë, sot është fakt i çertifikuar falë jush, falë qëndresës suaj, të këtij bashkimi.

Zëri juaj i bashkuar, e vërteta juaj e bashkuar, është sot e vetmja e vërtetë që njeh Europa, Amerika dhe mbarë bota. E gjithë bota e di siç e dimë ne të gjithë këtu se zgjedhje të lira ku qytetarët të mund të shprehin vullnetin e tyre pa asgjesuar problemin e krimit në pushtet dhe drogës, nuk mund të ketë. E gjithë bota e di se krimi dhe droga janë përgjegjësia dhe projekti politik i qeverisë dhe kryeministrit të fasadës. E gjithë bota ashtu si çdo shqiptar se zgjidhja mund të vijë vetëm duke marrë në dorë fatin e zgjedhjeve me një qeveri teknike që do të luftojë krimin dhe drogën dhe do të mundësojë votën e lirë të qytetarëve shqiptare.

Sot, nga kjo agorë, nga ky bashkim i madh qytetar, është rasti të shpreh mirënjohjen time të thellë ndaj çdokujt qytetar dhe faktor politik, që qëndruan bashkë në këto 77 ditë dhe javë pas jave, ditë pas dite duke rrëzuar fasadën e republikës së vjetër. Ne vendosëm se; zgjedhje pa opozitën nuk ka dhe nuk mund të ketë. Opozita qëndroi e bashkuar, qëndroi e bashkuar siç ua dha fjalën ju, dhe këtij bashkimi të madh e të paprecedent qytetar. Opozita qendroi e bashkuar dhe refuzoi regjistrimin me një fasadë të shëmtuar elektorale të diktuar nga krimi dhe droga.

Të përballur me forcën tonë, të përballur me forcën tuaj, edhe partitë qeveritare nuk ia dolën të regjistronin koalicionin e tyre  dhe sot një gjysëm koalicioni i shpërndarë si zogjtë e korbit, është prova më e qartë, bashkë me dështimin për t’u regjistruar sipas datës zgjedhore, se, 18 qershori ka rënë politikisht, moralisht dhe ligjërisht. Por ndonëse rënia morale, politike dhe ligjore e 18 qershorit është sot një fakt i konfirmuar nga të gjithë, republika e vjetër po bën gjithçka ta ndalë apo ta ngadalësojë vrullin e bashkimit popullor që është nisur drejt destinacionit tonë përfundimtar, Republikës së Re.

Arsyet janë të qarta; ata janë një grusht njerëzish me në krye Edi Ramën, ata janë roshët dhe bushët dhe nushët me shokë, kriminelë, oligarkë dhe politikanë të korruptuar të cilët në vetëm tre vjet iu vodhën shqiptarëve, vetëm nga buxheti 2.8 miliard euro.

Kjo është arsyeja, pse studentët shqiptarë, pse prindërit e tyre duhet të paguajnë tarifa më të larta nga viti në vit. Kjo është arsyeja, pse shërbimi shëndetësor është në ditët e tij më të zeza dhe pacientët e familjarët e tyre duhet t’i blejnë ilaçet që duhet të garantoheshin nga taksat e tyre. Kjo është arsyeja se pse pensionet shqiptare kanë ngelur aty ku ishin, se fuqia blerëse e shqiptarëve ka rënë, pse me të njëjtat para mund të blesh më pak, pse faturat janë rritur,p se taksat janë rritur dhe gjitha këto para janë në xhepat e republikës së vjetër.

Por sot, ndryshe nga 77 ditë më pare, republika e vjetër nuk është më zoti i fateve të shqiptarëve. Sot, ndryshe nga 77 ditë më pare, nuk e ka të lehtë t’i shtypë, vjedhë, mashtrojë dhe poshtërojë shqiptarët një e nga një, familje me familje. Sepse shqiptarët janë bashkuar dhe ushtria paqësore e Republikës së Re po nis marshin e saj të pandalshëm.

Ne do të marshojmë të bashkuar qindra-mijëra shqiptarë.

Ne do të marshojmë për Republikën e Re. Ne do të marshojmë që brenda 4 viteve të para të Republikës së Re, asnjë pension të mos jetë më pak se 250 mijë lekë të vjetra në muaj. Pra, që pensioni minimal të jetë 250 mijë lekë të vjetra në muaj. Ne do të marshojmë për taksën e sheshtë më të ulët në Ballkan. Ne do të marshojmë për çlirimin e biznesit të vogël dhe mbylljen në kazerma të taksidarëve dhe inspektorëve të shtetit. Ne do të marshojmë për një ligj të ri për arsimin e lartë, në mënyrë që çdo bir dhe bijë shqiptare t’i mundësohet arsimi i lartë pavarësisht prej pamundësisë ekonomike. Ne do të marshojmë për të shembur krimin dhe drogën, dhe oligarkinë që kanë kuçedrat që përpijnë ditë për ditë paratë dhe shpresat e shqiptarëve në republikën e vjetër.

Ne jemi gati, dhe stacioni ynë më i rëndësishëm, i pari në këtë betejë finale që do ta fitojë e nesërmja, shpresa dhe e ardhmja, do ta fitoja Republika e Re, është Kavaja. Përballja e pare, është dita e dielë në kryeqytetin e lirisë, në kryeqytetin e demorkacisë, në Kavajë.

Nga Kavaja le të përhapet lajmi i mirë kudo se republika e vjetër është një tigër letre, është një grusht kriminelësh, pushtetarësh të korruptuar dhe oligarkësh. Ditën e dielë, le ta mësojë çdo shqiptar dhe çdo mik i huaj, dashamirësit e shumtë të Republikës së Re dhe kundërshtarët e paktë, se në 7 Maj republika e vjetër rrëzohet në Kavajë.

Ndaj, për fatet dhe drejtat e shqiptarëve, për fatin dhe të drejtat e çdo kryefamiljari dhe çdo kryefamiljareje, për të ardhmen e çdo të riu dhe të reje, për të ardhmen e çdo fëmije shqiptar le të bashkohemi të dielën në bashkimin më të madh popullor. Në përballjen paqësore por të vendosur që të shënojë simbolikisht rënien e republikës së vjetër dhe themelin e parë të Republikës së Re.

Nuk do të lejojmë krimin, drogën, Rroshin dhe kaposhin që të nëpërkëmbë Kavajën. Ne do të jemi të gjithë aty, përmes pjesëmarrjes, përmes bashkimit, përmes vendosmërisë le të diktojmë agimin e Republikës së Re.

Zonja dhe zotërinj, të rinj e të reja tregojuni botës dhe Shqipërisë ku do jemi ditën e dielë?

(Protestuesit: Kavajë!)

Ku nis fitorja?

(Protestuesit: Kavajë!)

Ku themelohet liria?

(Protestuesit: Kavajë!)

Ku rritet dhe ngrihet demokracia?

(Protestuesit: Kavajë!)

Ku do jemi?

(Protestuesit: Kavajë!)

Takimi i sotëm ishtë për fat të keq një përsëritje e takimit të djeshëm. Zoti Rama erdhi në tryezë pa asnjë ofertë, përveç mos-ofertës së takimit të djeshëm, i cili buron nga mungesa totale e vullnetit për të kuptuar e njohur krizën e rëndë politike në vend, si rezultat i gjendjes së rendit dhe sigurisë, për shkak të krimit dhe pushtetit të inkriminuar, si rezultat i drogës dhe parave të droges, si rezultat i marshimit të administratës publike si një garnizon elektoral në funksion të partisë socialiste dhe pushtetit.

Mosnjohja e dy problemeve, tashmë ndërkombëtarësisht të njohura, dhe të pranuara si kërcënim ekzistencial për votën e lirë të shqiptarëve, përbën një mospremisë për zgjidhje. Nëse nuk pranohet nga pala tjetër se kriminelët e veshur me pushtet, të cilët në shkelje dhe dhunim të ligjit të dekrimializimit vazhdojnë të mbajnë pushtetin e tyre, nëse nuk pranohet problemi i madh dhe kërcënimi që vjen nga droga, paratë e drogës dhe fenomeni i kultivimit të drogës, për mundësinë që qytetarët shqiptarë të shprehen të lirë, të pakërcënuar, të pablerë e të pa shitur nga skalionët e baronëve të drogës të lidhur me pushtetin, atëherë si mund të vihet në një zgjidhje realiste për krizën e rëndë politike.

Pyetje: Oferta juaj cila ishte zoti Basha?

Basha: Vendi ka nevojë për një zgjidhje politike. Këtë e thonë shqiptarët. Këtë e them unë, Partia Demokratike, opozita dhe e thotë tashmë e gjithë bota. E gjithë bota e di se Shqipëria në këto katër vite ka akumuluar një problem të tmerrshëm, të kriminelëve në zyrat e shtetit, deputetë, kryetarë bashkish, drejtorë policie, dhe në institucioneve të tjera shtetërore. E gjithë bota, e njeh problemin e jashtëzakonshëm të Shqipërisë së kthyer në një Kolumbi në zemër të Europës, por në ndryshim nga Kolumbia, me një kontroll hierarkik vertikal nga vetë pushteti i cili e përdor drogën si një instrument politik dhe si një instrument pasurimi dhe bëhet gati ta përdorë atë si një instrument asgjesimi të vullnetit të lirë të qytetarëve shqiptarë.

Zgjidhja e ofruar sipas kryeministrit, nuk është një zgjidhje politike. Monitorimi në radhë të parë, është detyrë e institucioneve të monitorimit, dhe monitorimi nuk mund të kufizohet, dhe nuk do të kufizohet as nga institucionet e monitorimit vetëm në çështjen e keqpërdorimit më të shëmtuar dhe më masiv të shtetit, punonjësve të shtetit, të afërmve të tyre, të cilët marshohen me urdhra dhe kërcënime për pushim nga puna në mitingjet paraelektorale të Edi Ramës.

Nëse ne pranojmë të jemi alibi dhe fasadë e këtij procesi, shqiptarët do të marshohen në të njëjtën mënyrë për të votuar jo si qytetarë të lirë por si skllevër të një shteti të bërë njësh me pushtetin, të kërcënuar nga krimi dhe kriminelët me pushtet, e të kërcënuar nga droga.

Pa njohjen e këtyre dy problemeve themelore, natyrisht edhe problemit të tretë të shtetit si garnizon elektoral, pa njohjen dhe pranimin e kërcënimit jetik ekzistencial për demokracinë, për bashkëjetesën demokratike, për zgjedhje të lira dhe të ndershme, nga krimi në pushtet dhe nga droga, nuk mund të ketë asnjë premisë për të kërkuar dhe gjetur sëbashku zgjidhje.

Vullneti politik i Partisë Demokratike, i opozitës dhe i imi nuk ka munguar në asnjë çast. Vullneti politik i palës tjetër vihet në dyshim, dhe në fakt asgjesohet në momentin që pala tjetër nuk pranon, jo thjeshtë përgjegjësinë për situatën e vendit, për krizën politike, dhe e trajton atë si një krizë partiake kur gjithë bota flet për një krizë politike, por, as nuk pranon të njohë problemet kryesore që e sollën Shqipërinë në këtë krizë politike.

Probleme që u demonstruan qartësisht në të gjitha zgjedhjet e administruara nga kjo qeveri dhe nga ky kryeministër. Prandaj, gjykoj se e vetmja rrugë përpara është njohja e krizës ku gjendet vendi nga pala kundërshtare, nga pala tjetër politike në këtë proces, me një sens realiteti, në radhë të pare.

Në radhë të dytë, njohja e faktorëve të kësaj krize, të akaparimit total të shtetit, nga interesat e krimit dhe drogës, të oligarkëve të koncesioneve dhe tenderave dhe trajtimit të shtetit si pronë private, që sjellin edhe problemet kryesore me të cilat përballen shqiptarët, që janë sot varfëria, papunësia, shërbimi shëndetësor në kolaps, sistemi arsimor në të gjithë zinxhirin e tij në kushte jashtëzakonisht të pavaforshme për fëmijët dhe studentët shqiptarë, ekonomia në ngërç total që jo vetëm nuk prodhon më vende pune dhe paga dinjjtoze për njerëzit, por është në procesin e shkatërrimit të biznesit të vogël, përmes falimentimit, nxjerrjes në rrugë të njerëzve nga të gjithë kompanitë në kushtet e një asfiksimi ekonomik.

Të gjitha këto, janë produkt i një shteti të kapur nga krimi dhe droga. Me paratë e krimit dhe të drogës, tani synohet kapja e zgjedhjeve. Njohja dhe pranimi i këtyre të vërtetave të mëdha, që ju i njihni shumë mirë, që bota i njeh, që shqiptarët i njohin, mund të vijë vetëm përmes dy rrugëve; Së pari, nëse pala tjetër ndal fshehjen pas gishtit dhe së dyti me pranimin e përgjegjësive dhe bashkë me pranimin e përgjegjësive është gati të marrë përgjegjësitë për të dalë të bashkuar kundër krimit dhe drogës dhe jo për ta konsideruar krimin dhe drogën aleat të pazëvendësueshëm për prishjen e zgjedhjeve.

Kjo njohje do të vijë herët a vonë. Shpresoj herët duke i thirrur llogjikës dhe arsyes, por në çdo rast duke u përballur me vullnetin e një populli i cili pasi ka parë ti vidhet ekonomia, shëndetësia, arsimi, punësimi, rendi dhe siguria e të helmohet e të drogohet, nuk është më i gatshëm të pranojë edhe vjedhjen e fundit, vjedhjen e të nesërmes përmes asgjesimit të zgjedhjeve, por është e do të jetë i gjithi në këmbë, të djathtë e të majtë, për të pamundësuar vjedhjen e vullnetit të shqiptarëve për të zgjedhur qeverinë dhe Parlamentin me votë të lirë e  drejtë e sanksionuar 27 vite më pare, cka kurrsesi nuk mund të zhbëhet në kushtet ku ndodhet vendi sot.

Pyetje: Z.Basha, po draftin e McAllister do ta pranonit sot?

Basha: Ne kemi qënë në një proces negociatash. Nuk ka kam ndërmed ti përgjigjem pyetjeve me nëse. Ajo që është ofruar sot, është siç u shpreh kryeministri, një proces monitorimi dhe jo një zgjidhje politike siç kërkohet dhe lypset nga momenti dhe nga shqiptarët.

Pyetje: A paraqitët kundër-propozim ju z.Basha?

Basha: Po, kundër propozimi ynë ka qenë i qartë. Përbëhet nga dy kollona. Kollona e parë është një qeveri teknike me mandat pikërisht për të zgjidhur dhe për të ndalur influencën e krimit dhe drogës në zgjedhjet e adhshme, për ti dhënë shqiptarëve kushtet për zgjedhje të lira dhe të ndershme, dhe në këto kushte, kolona e dytë është ekplorimi i mundësisë që brenda 6 muajve nga momenti i marrëveshjes politike, të realizohet votimi elektronik biometrik dhe numërimi biometrik për të cilat ka munguar tërësisht vullneti politik.

Pyetje: Z.Basha, mesa duket edhe ju paskeni ndryshuar ofertën. Megjithatë a jeni ju i gatshëm të hiqni dorë për hir të kompromisit, të mos kërkoni largimin e kryeministrit dhe përse nuk e pranuat paketën McAllister para 10 ditësh?

Basha: Mendoj që përgjigjen për këtë ju e keni marrë para dy ditësh në shkallët e Partisë Demokratike, por po e përsëris, meqë jemi para qytetarëve. Propozimet e ofruara të cilat më ishin bërë të ditura dy javë më parë përmes kanaleve afër kryeministrit, pra me siguri propozime të lobuara nga kryeministri, nuk ofrojnë zgjidhjen politike. Katër ministra teknikë të propozuar nga kryeministri me aprovimin e opozitës, në kushtet kur kryeministri ka akaparuar parti të tëra opozitare, deputetë të opozitës madje edhe deputetë të koalicionit të tij, si manovra politike për të realizuar synimet e tij politike, nuk ofrojnë asnjë garanci që e njejta gjë nuk do të ndodhë me 4 qytetarë që i zgjedh Edi Rama që i aprovojmë ne dhe brenda 24 orëve do të gjenden para zgjedhjes; zhagen ose presionin total të kryeministrit.

Zgjidhja politike vjen përmes vullnetit politik, i cili duhet të ketë si premisë kuptimin e gjendjes ku është vendi. Duhet të ketë si premisë pranimin e gjendjes së krimit dhe drogës në vend dhe vetëm mbi këto baza mund të shkohet drejt një zgjidhje me dialog.

Pyetje: Z.Basha, për hir të kompromisit, do ishit dakord që të hiqnit dorë për kryeministër teknik?

Basha: Ne kemi paraqitur dy shtylla dhe nga ky propozim ne nuk kemi marrë asnjë përgjigje. Sigurisht, nuk kam ndërmend të zbuloj para jush pozitat tona negociatore. E kam thënë dhe e përsëris, jam i gatshëm që çfarëdo që Partia Demokratike dhe unë personalisht mund të ofrojmë, ta ofrojmë në funksion të zgjidhjes që duhet të jetë për qytetarët. Por, ajo që nuk mund të bëjmë, është që t’u japim qytetarëve alibinë se do kenë mundësi të votojnë të lirë dhe të pakërcënuar, kur kërcënimi nga droga, krimi dhe një administratë e marshuar nën urdhëra politikë, janë realiteti siç kanë qënë në këto 3 vite e gjysëm në të gjitha proceset elektorale.

Pyetje: Cilat do të ishin hapat që duhet të ndodhin brenda 6 muajve?

Basha: Propozimi ishte i detajuar. Nëse do të kishte një marrëveshje politike, propozimi im ishte fare i thjeshtë nisur nga momenti i marrëveshjes politike, brenda 3 javëve të eskploronim nëse votimi elektronik do të ishte i mundur brenda një periudhë 6 mujore. Nëse do të ishte i mundur, atëhere të veprohej menjëherë, sepse, kjo në vetvete ndonëse duket si një zgjidhje teknike, ofron garanci politike për një numër problemesh që ju i njihni fare mirë siç është tjetërsimi i kartave të identitetit, sekuestrimi i tyre nga krimi apo nga shumat e parave, kartat e identitetit falso, votimi i shumëfishtë, votimi tjetër për tjetër dhe i gjithë presioni i një ushtrie prej 40 mijë mijë militantësh të helmuar dhe kontaminuar në radhët e tyre me kriminelë për tjetërsimin e vullnetit të qytetarëve përmes procesit të numërimit. Të gjitha këto marrin fund. Qytetarët votojnë në një dhomë pa komisionerë të partive politike, vetëidentifikohen dhe në momentin e votimit të qytetarit të fundit, rezultati kombëtar shpallet para qytetarëve. Pra eleminohen të gjitha këto probleme.

Pyetje: Z.Basha, nëse 4 ministrat do të propozoheshin nga ju dhe do të miratoheshin nga Edi Rama, a do të ishte kjo një ofertë e cila mund të pranohej nga ju?

Basha: Tani nuk kam ndërmend këtu të përgjigjem për nëse dhe as se. Sepse jemi në proces negociate, nuk kam ndërmend t’i paraprij negociatave duke bërë hamendësime të cilat nuk na çojnë askund. Fakti është që, Edi Rama mbetet tek propozimi i djeshëm që është një mospropozim dhe mosofertë për zgjidhje dhe ky është edhe shkaku se përse bisedimet e sotme janë në vendnumëro.

Pyetje: Kur do jetë takimi i radhës. A do vazhdojnë negociatat?

Basha: Prej ditës tonë të pare, kemi parashtruar dialogun si mënyrën tonë të preferuar të zgjidhjes së krizës politike në vend, sepse besojmë dhe jemi të përkushtuar që zgjidhja e kësaj krize të rëndë politike me kosto për çdo shqiptar, për tavolinat e çdo shqiptari, për xhepat e çdo shqiptari, për punën, shëndetin, arsimin, mirëqënien e çdo shqiptari, duhet të vijë me një faturë sa më të vogël dhe kjo vjen përmes dialogut politik dhe zgjidhjes politike.

Por asnjë shqiptar nuk duhet të ketë iluzion se diçka do përmirësohet për mirë në jetët e tyre kur krimi, droga, dhe përdorimi i shtetit si çiflig personal, tjetërsimi i të ardhurave të shqiptarëve në funksion të një grushti oligarkësh, kriminelësh dhe baronësh të drogës, që e kanë shtepinë në selinë e qeverisë dhe janë në funksion të qeverisë dhe kryeministrit, do të vazhdojnë sic janë.

Asgjë nuk do të ndryshojë nëse opozita tradhëton këtë kauzë qytetare për hir të interesave të saj të ngushta politike. Gjithçka do të ndryshojë vetëm nëse ne qendrojmë të bashkuar në këtë betejë për ti dhënë shqiptarëve një republikë me të vërtetë të qytetarëve dhe jo të politikanëve dhe aq më pak të krimit, drogës dhe korrupsionit.

Kryetari i Komisionit të Jashtëm në Parlamentin e Hungarisë, Zsolt Nemeth, ishte sot në Sheshin e lirisë ku shprehu mbështetjen për protestën 76 ditore për zgjedhje të lira e të ndershme.

Nemeth u shpreh se Hungaria dhe Europa nuk do të dëshironin një narko-shtet, sic është kthyer Shqipëria. Ai tha se zgjedhjet e lira e të ndershme janë të lidhura me të ardhmen europiane të Shqipërisë.

“Unë ju sjell sot këtu mesazhin e popullit hungarez, mesazhin e kryeministrit hungarez, Viktor Orban dhe të qeverisë hungareze dhe dua t’ju them që sot jam me ju, sot jemi me ju të dashur shqiptarë. Ju keni miq në Europë, nuk jeni të vetëm në këtë përpjekje. Dua t’ju uroj për qëndresën tuaj 76 ditore. Kjo vërteton më së miri se ju keni arritur në agimin e ri, Shqipëria ka arritur në një ditë të re.

Dhe është e njëjta luftë, që ne e kemi pasur të përbashkët. Ne kemi luftuar kundër turqve me Skënderbeun, me Janosh Huniadin, heroin tonë kombëtar në Hungari dhe ashtu siç kemi luftuar komunizmin, me Viktor Orban dhe Sali Berishën. Nuk ka qenë një luftë e thjeshtë por fitorja ka qenë e jashtëzakonshme.

Por ta fillojmë nga e para, çfarë është më e keqja në komunizëm? Çfarë e pason komunizmin?

Lufta juaj sot është me postkomunizmin. Korrupsioni i ndërkombëtarëve është sot e keqja më e madhe e postkomunizmit. Ndërhyrja e të huajve është një lloj korrupsioni politik në Europën Lindore.

Ne nuk duam të shohim në Europë një narko-shtet. Ne do të qëndrojmë dhe do t’ju mbështesim në luftën tuaj për zgjedhje të lira dhe të ndershme. Jam i bindur se do ta fitoni këtë betejë sepse e shkuara e jonë është e përbashkët, por edhe e ardhmja jonë është e përbashkët, në BE. Ne kemi një të ardhme europiane të përbashkët. Unë uroj që Zoti të bekojë Shqipërinë dhe qytetarët e saj”, deklaroi Zsolt Nemeth.

Njoftim per shtyp, 4 maj 2017

Qytetarë dhe qytetare të lëvizjes më të pathyeshme që historia 27 vjeçare e Shqipërisë ka prodhuar për liri e demokraci dhe zgjedhje të lira dhe të ndershme, ju përshëndes dhe ju uroj në këtë ditë të 75, të rimarrjes në dorë të fateve tona dhe themelimit të Republikës së Re nga qytetarët prej qytetarëve dhe për qytetarët.

Sot, përfaqësuesit e republikës së vjetër dhe përfaqësuesit e Republikës së Re u ulën në tavolinën e Presidentit Nishani pas ftesës së tij, për të gjetur një zgjidhje me dialog, të krizës së rëndë politike, elektorale, ekonomike dhe të gjithanshme që është produkti i vetëm i katër viteve të qeverisjes së dështuar, inkriminuar dhe korruptuar të Edi Ramës dhe çetës së tij mafioze në pushtet.

Unë shkova në këtë tryezë ashtu siç iu premtova ju, me vullnetin e plotë e të palëkundur për të mos kërkuar, pranuar dhe marrë asgjë për përfitime politike të miat, Partisë Demokratike dhe opozitës, por po kështu, për të mos lëshuar asgjë nga të drejtat legjitime, hyjnore të qytetarëve shqiptarë, për zgjedhje të lira dhe të ndershme, për votën e lirë si themeli i vetëm i bashkëjetesës demokratike sot e tutje në Shqipëri.

Unë shkova po kështu, me zotimin e marrë para miqve dhe partnerëve ndërkombëtarë e në veçanti familjes tonë politike PPE, Presidentit Daul, Komisionerit Hahn, njëkohësisht nënkryetarit të PPE, se Partia Demokratike dhe unë personalisht nuk do të lëmë asnjë mundësi pa eksploruar për një kompromis dhe një marrëveshje politike me kushtin e vetëm e të patjetërsueshëm, që të garantojë zgjedhje të lira dhe të ndershme.

***

Dy janë kollonat e vullnetit politik pa të cilat asnjë mekanizëm nuk funksionon.

As ndryshimet në kodin zgjedhor, as ndryshimet në kodin penal për të penalizuar me ndëshkime më të rënda ligjore shitblerjen e votës apo fotografimin e saj, apo transfertat e dyshimta të parave gjatë fushatës elektroale, apo të tjera ndryshime që kanë të bëjnë me median, me struktrën institucionale të zgjedhjeve, asnjë nga këto nuk kanë vlerë nëse janë në dorë të të njëjtit mekanizëm që për katër vite e ktheu Shqipërinë në hambar droge dhe në të vetmin vend në Europë ku kriminelët që duhet të ishin në burg, janë deputetë, janë kryetarë bashkish, janë drejtorë policie, drejtorë doganash drejtor taksash dhe drejtorë të tjerë të administratës dhe kupolës politike të republikës së vjetër.

Dje, këmbanat e Europës kanë rënë për çdo shqiptar të ndershëm, kanë rënë madje edhe për Edi Ramën. Shqipëria është në krizë politike dhe kërkohet zgjidhje politike. Ky që kishte fërkuar duart bashkë me lobistët e tij që majmen me paratë e drogës dhe të korrupsionit qindra milionë eurosh të transferuara përmes bankash, të kapura nga kupola politike, dhe përmes zhageve të korrupsionit, ky kishte shpresuar të pamundurë, që ne, kallëzuesit e problemeve të Shqipërisë, luftëtarët kundër krimit dhe drogës, të tgregoheshim me gisht si fajtorë.

Dje e kuptoi se edhe kur investon miliona me lobistë, edhe kur gënjen sa mundesh me media të kapura dhe emisarë të korruptuar, e vërteta dhe e drejta vonojnë, por një ditë arrijnë në stacion. E vërteta ka arritur tash 75 ditë në këtë stacion dhe tempull të lirisë dhe kjo është e vërteta e shqiptarëve jo e partive politike por e çdo shqiptari, të djathtë e të majtë. Por e vërteta po kështu ka mbërritur në stacionet e mëdha të perëndimit, droga dhe krimi janë kërcënimet kryesore për zgjedhje te ardhshme në Shqipëri.

Pa zgjidhje për krimin e veshur me pushtet dhe drogën e paratë e drogës, pa zgjidhje të vërtetë, zgjidhje poltike, siç theksuan miqtë tanë mbrëmë, nuk ka dhe nuk do të ketë zgjedhje në Shqipëri !

Pra, nuk do të ketë as bojkot, se ne vetëm duarkryq nuk do rrimë teksa kupola e krimit mundohet t’i marrë shqiptarët si dele në një proces fals dhe monist të një gjysmë koalicioni, një subjekti zgjedhor, për ti mohuar atyre të drejtën e fundit që ka mbetur pa iu përdhosur, të drejtën për të zgjedhur Parlamentin e tyre pa diktat nga krimi dhe paratë e drogës.

Jo!

Nuk do të rrimë duarkryq.

Kemi ofruar sot në tavolinë gjithçka që Partia Dmekratike dhe opozita mund të ofrojnë për zgjidhje, pala tjetër është tërhequr edhe nga propozimet e javës së kaluar, që vetë i loboi dhe që në vetvete ishin shumë më pak se çmund të pranohet për të siguruar minimumin e garancive për qytetarët shqiptarë.

Sot, Edi Rama vulosi faktin, para partnerëve ndërkombëtarë se ai jo vetëm është pengesa e vetme, por se nuk ka asnjë argument qenësor.

Tani që ballafaqimi i argumentave dhe i forcës së argumentave tregoi se kush do zgjidhje për shqiptarët, se kush vendos interesin e qytetarëve para interesit   politik dhe personal, tani që forca e argumentave tregoi superioritetin total të kësaj kauze popullore, Edi Ramës nuk i ka mbetur gjë tjetër veçse argumenti i forcës së kriminelëve të hurit dhe të litarit, që për të, mund të jenë burra të mirë dhe padyshim që për të, të mirë kanë qenë sepse me ta e mori pushtetin, me ta e menaxhon pushtetin, me ta dëshiron ta mbajë pushtetin përkundër dëshirës dhe vullnetit të shqiptarëve.

Forca e Edi Ramës është trajtimi administratës shtetërore si një garnizon elektoral si kurrë më parë në 27 vite të pluralizmit, ku padyshim përdorimi i administratës ka qenë një problem nga të dyja palët por kurrë si sot. Si kurrë më parë në 27 vite të pluralizmit, ku padyshim përdorimi i administratës ka qenë një problem nga të dyja palët, por kurrë si sot.

Forca e Edi Ramës janë paratë e narkokartelit të bërë njësh me qeverinë që ai drejton. Forca e Edi Ramës është shpresa se mjerimi dhe varfëria e shtuar e shqiptarëve kanë shuar dinjitetin dhe vullnetin për të luftur për dinjitet e liri, tek çdo baba e nënë, te çdo i ri dhe të re.

E vërteta është se ai i ka të gjitha këto; ai i ka krimin, ai i ka bandat, i ka drogën, ai ka në dorë të firmosë e urdhërojë paligjshmëritë e policisë dhe të çdo dege tjetër të administratës. Por ajo që ai nuk ka, është shumë më e madhe dhe e fuqishme se ajo që ai ka.

***

Ai nuk e di se përballet jo thjesht me një lëvizje popullore që proteston tash 75 ditë në formën e qindra-mijë qytetarëve, por përballet me shpresën e çdo shqiptari të ndershëm se kjo është koha për një ndryshim të madh dhe rrënjësor në jetët tona.

Se kjo është koha për të marrë në dorë fatet tuaja, fatet tona dhe se kjo është koha për të mos pranuar, por rrëzuar me forcën e bashkimit popullor çdo pengesë që qëndron mes mjerimit dhe varfërisë së sotme të shqiptarëve dhe shpresës për një Republikë të Re të demokracisë së vërtetë, të zgjedhjeve të lira e të ndershme, ekonomisë së fortë dhe të nesermës së sigurtë për çdo shqiptar.

Një pengesë pa argumente, i paisur vetëm me argumentin e forcës së krimit dhe paligjshmërisë, ky është Edi Rama, por përballë ka një forcë të pathyeshme, përballë ka vendosmërinë e bashkuar të çdo shqiptari dhe shqiptareje të ndershme për t’i thënë: Mjaft më arrogancës! Mjaft më krimit! Mjaft më drogës!

Bëtë çfarë deshët në 4 vite; kriminelët i bëtë zotër të vendit, drogën – prodhimin kryesor, zhytët një popull në varfëri dhe larguat 1 në 10 shqiptarë në emigracion, vodhët çfarë mundët nga posti i Presidentit të Republikës deri tek delet e kecat nëpër rrugët e Shqipërisë.

Por, zgjedhjet e lira e të ndershme nuk i dorëzojmë dhe nuk do t’i japim kurrë!

Vodhët të sotmen, por kurrsesi nuk mund t’iu lejojmë të vidhni të nesermen, të ardhmen e Shqipërisë dhe shqiptarëve.

Llogaritë e kupolës politike dhe kriminale në krye të republikës së vjetër janë bërë pa popullin. Dhe populli do ti provojë këto llogari gabim, duke nisur të djelën e ardhshme në Kavajë.

Nga Kavaja, sot vijnë lajmet e atmosferës më historike që qyteti ka përjetuar që në vitet e lavdishme kur u kthye dhe mbeti në zemrën e çdo shqiptari si kryeqyteti i lirisë dhe demokracisë.

Koha për ti thirrur mendjes është sot.

Çdo ditë që kalon, rrit vendosmërinë dhe bashkimin e shqiptarëve. Çdo ditë që kalon, shanset për një kompromis midis dy realiteteve zëvendësohen nga mundësia e padiskutueshme e realitetit që po vjen e do të vijë, Republikës së Re të qytetarëve shqiptarë.

***

Ndaj edhe sot, siç i thashë në fund të takimit, i përsëris thirrjen; ti thërrasë mendjes, të kuptojë se kriza shqiptare e konfirmuar botërisht që ka për bazë drogën, krimin dhe shtetin e njesuar me pushtetin, nuk zgjidhet me dokrra, nuk zgjidhet me fake news, nuk zgjidhet me gënjeshtrat që ke derdhur e derdh nga Brukseli në Uashington, nuk zgjidhet me deklarata të paguara, sado shtrenjt i paguan, por zgjidhet vetëm në qoftë se shqiptarët e konsiderojnë të zgjidhur, vetëm nëse shqiptarët e konsiderojnë të mjaftueshme për zgjedhje të lira e të ndershme.

Qeveria teknike me mandat për të larguar kriminelët nga politika, për të larguar drogën dhe për ti dhënë shqiptarëve reformën zgjedhore përfshirë votimin elektronik dhe numërimin elektronik, është rruga e ndershme për të kthyer Shqipërinë në binarët e normalitetit dhe për të siguruar bashkëjetesën demokratike.

Kushdo që bashkohet me këtë rrugë është i mirëpritur në një bashkim kombëtar pavarësisht prej përgjegjësive që mund të ketë patur deri më sot për thellimin e të keqes. Kjo lëvizje ka shpirtin e madh, të falë, të mos harrojë, por të ecë përpara.

Por, nëse forcën e argumentit dëshiron ta zëvendësosh me argumentin e forcës, atëherë populli është gati të të mposhtë totalisht.

Me fatet e shqiptarëve nuk mund të luhet më. Me popullin nuk mund të luhet më. E aq më pak, të shpresosh që opozita do të marrë rolin e alibisë së lojërave të teatrit të kukullave në kurriz të shqiptarëve.

Të djelën në orën 11:00, ku do jeni?

Protestuesit: Në Kavajë

E gjithë Shqipëria me forcën e bashkimit më të madh në historinë e saj, paqësor por të vendosur deri në fund.

Më 7 maj, çlirojmë Kavajën nga krimi, çlirojmë Kavajën nga droga, çlirojmë Kavajën nga pasiguria dhe poshtërimi.

Kavajasit e ndershëm, fisnikët dhe kreshnikët e lirisë dhe demokracisë janë në ballë të kësaj beteje. Por sot, dhe me 7 maj, nuk do të jenë vetëm. Me çdo zemër të lirë, të qytetarëve të Kavajës, do të rrahin mijëra zemra shqiptarësh.

Të djelën jemi të gjithë banorë të kryeqytetit të lirisë, jemi të gjithë në këmbë për lirinë e Kavajës, për lirinë e Shqipërisë, për lirinë e shqiptarëve.

Bashkë në Kavajë, bashkë për fitore, për fitoren e popullit, për fitoren e Shqipërisë demokratike, për zgjedhje të lira e të ndershme.

Zoti e bekoftë Shqipërinë!

Zoti i bekoftë shqiptarët!

Mesazhi i Lulzim Bashës në ditën e 75 të protestës popullore për zgjedhje të lira e të ndershme, 3 Maj 2017