Blog

Forumi Rinor i Partisë Demokratike mori mbështetjen e të rinjve të djathtë europianë për kauzën e zgjedhjeve të lira e të ndershme, të ngritura nga opozita shqiptare bashkë me qytetarët, në një qëndresë tashmë 73 ditore.

Gjatë një kongresi të mbajtur në Kroaci, të rinjtë europianë dhanë mbështetjen e tyre të plotë për zgjedhje të lira dhe të ndershme në Shqipëri. “Pa zgjedhje te lira dhe të ndershme, asnjë shoqëri nuk ka bërë progres dhe asnjë demokraci nuk ka të ardhme të sigurtë”, u shprehën ata.

“Siç u faktua në çdo palë zgjedhje të organizuara nga Edi Rama në këto 4 vite, paratë e drogës, krimit dhe korrupsionit do perdorën për të blerë zgjedhjet e ardhshme. Për këtë arsye, opozita në Shqipëri me mbështetje të fortë të rinisë, po proteston prej më shumë se 70 ditësh. Sot s’ka njeri që nuk e di se me Edi Ramën nuk ka zgjedhje të lira dhe të ndershme. Por dhe Edi Rama është i vetëdijshëm se pa patur karriken e kryeministrit, nuk mban dot pushtetin dhe paratë që u ka vjedhur shqiptarëve. Kjo është arsyeja kryesore perse ai nuk i hap rrugë zgjedhjeve të lira dhe të ndershme”, tha kreu i FRPD, Belind Këlliçi.

Të rinjtë demokratë shqiptarë ndanë edhe shqetësime mbi rininë shqiptarë me drejtues të organizatave rinore nga vende të ndryshme të BE-së si dhe me Kryetarin e sapozgjedhur të të rinjve të EPP, Andrianos Giannou. Ata theksuan se rinia shqiptare përballet me papunësi në shifra mbi 40%, një reformë arsimore që i la jashtë universiteteve, kriminalizim e kanabizim të vendit.

“Parlamenti dhe administrata u shndërrua nga Edi Rama në strehë të krimit. Falë mbështetjes që Rama dhe drejtues të policisë i dhanë trafikantëve, Shqipëria u shndërrua në Kolumbi të Europës siç e fakton dhe raporti i DASH apo EUROPOL. E vetmja mundësi punësimi që iu dha të rinjve në qeverinë Rama ishin arat me kanabis”.

Njoftim per shtyp, 1 Maj 2017

Mesazhi i Lulzim Bashës në ditën e 73 të protestës për zgjedhje të lira e të ndershme  

Kjo ditë e 73 e bashkimit më të madh qytetar popullor dhe kombëtar për zgjedhje të lira dhe të ndershme përkon me 1 Majin.

1 Maji, është një datë e historisë komuniste. Këtu ku jemi ne, baballarët tanë dhe më të rriturit mes nesh, bënin parade me lule letre përpara diktatorit, që rrinte pak a shumë para kësaj fasade.

Cdo 1 Maj, duke brohoritur për mirëqënien që nuk e kishim, për kushtet e mira të jetës që nuk i kishim, për kushtet e mira të banimit që nuk i kishim, për lirinë individuale që mungonte totalisht, për shëndetin që e kishim të fundit në Europë.

Këtu pra, një popull i tërë i skllavëruar nga një diktaturë mizore, ideologjike, që shpenzonte 30% të buxhetit për 30 vite me radhë për të ndërtuar bunkerë, ndërkohë që fëmijët e shqiptarëve vdisnin nga uria me përqindjen më të lartë të vdekjeve foshnjore në Europë, këtu pra, një një popull i tërë, i skllavëruar maj për maj, cdo 1 Maj i bindej ritualit të skllavërimit dhe të mashtrimit, para diktaturës dhe para byrosë politke.

Ndaj, 1 Maji nuk ka si të jetë festë, nuk ka si të jetë festë as për popuj të tjerë që kanë njohur zgjedhën, fatkeqësinë dhe mjerimin e komunizmit, por për ne shqiptarët që komunizmi na hodhi për nga prodhimi i brendshëm dhe mirëqënies, në mes të Afrikës ekuatoriale, 1 Maji është dita për të kujtuar se deri ku mund të poshtërohet një popull. Deri ku, mund të poshtërohet, një baba, një nënë para fëmijëve të vet, nga një rregjim i cili ka humbur cdo ndjenjë realiteti, cdo ndjenjë dhembshurie, cdo ndjenjë përgjegjësie, para fateve të popullit të vet.

Kujtojeni ju që keni qenë 1 Maj për 1 Maj, të detyruar të parakalonit këtu ose të rreshtoheshit në trotuare, ju e ata që detyroheshin ta ndiqnin me radio e me televizoret bardh e zi, parakalimin e 1 Majit. Shfaqje e shëmtuar, macabre, e një popullli që festonte mjerimin e vet, që festonte izolimin e vet, që festonte poshtërimin e vet. Mbajeni mend, sepse ky në fakt ishte një mëkat i përbashkët, jo i barabartë, por i përbashkët.

Mëkati dhe mëkatarët e parë ishin ata që i imponuan vendit për 50 vite me radhë, diktaturën. Por bashkëmëkatarë ishin dhe ata shqiptarë, që nuk guxuan të ngrihen, por pranuan me kokën ulur fatin e rezervuar nga xhahilët, injorantët, nga analfabetët, nga tradhtarët, që i imponuan Shqipërisë për 50 vite me radhë,  sistemin më gjakatar dhe më mjerues që njohu Europa komuniste.

Kush e harron historinë, është i destinuar ta përsërisë.

Ndaj sot, është dita për të parë njëri-tjetrin në sy, të djathtë e të majtë, e për të thënë, a jemi gati ti themi “JO” zgjedhës së re, që po përgatisin bijtë politikë dhe ideologjikë të byrosë politike, që deri para 27 vitesh rreshtohej në atë tribunë, ndërkohë që populli zvarritej në paradë.

Sepse, nëse sjeni gati për këtë, duhet të bëhemi gati të pranojmë edhe një diktaturë tjetër, një tirani të krimit, të drogës, të korrupsionit, të barkderrave oligarkë dhe krimit të organizuar me në krye Edi Ramën, që dëshiron që prej datës 18 Qershor, ta shuajë edhe formalisht pluralizimin.

Këto janë dy zgjedhje, o njëra, o tjetra. Kjo lëvizje popullore, ky bashkim i madh qytetar, e ka bërë zgjedhjen e tij dhe, ftesa ime, ndaj cdo shqiptari të ndershëm, që nuk dëshiron të zvarritet në këtë bulevard si para 27 vitesh, para oligarkisë krimit dhe pushtetit të inkriminuar të Rilindjes, është të ngrihemi e ti shporrim, me forcën e bashkimit popullor,

Mashtrimi dhe propaganda, ishin vecoritë e atij regjimi, mashtrimi dhe propaganda janë arma më e fuqishme e Edi Ramës. Mashtrimet që ai prodhon, media e kapur dhe e zotëruar nga zhaget e korrupsionit, e drogës, i shumëfishon ditë për ditë. Dhe sot, shpallën mashtrimin e ditës së punës. Sipas tij 79 mijë e 980 të punësuar në 3 vite nga zyrat e punës.

Rrenë e sofistikuar i duket atij, të paktën pra, afërsisht 80 mijë vetë qenkan futur në punë nga zyrat e punës këto vite. Rrena më e turpshme më e pamoralshme, sepse njeriu që premtoi 300 mijë vende pune, sot në fund të mandatit të tij ka për bilanc 300 mijë shqiptarë të larguar nga vendi i tyre në azil politik dhe në kërkim të një jete më të mirë në Gjermani, Europë Perendimore dhe në SHBA.

Ky është fakt.

Fakti tjetër është i botuar nga Banka Botërore, nga Elen Goldshtajn, një mikeshë e kryeministrit, e cila ka firmosur qindra milionë euro, kredi, që ky i ka bërë rrush e kumbulla, i ka vjedhur, i ka shpërdoruar dhe abuzuar.

Kjo Elen Goldshtajn, mikeshë e kryeministrit, shkruan në raport se në gjashtë vitet e fundit në të gjithë Ballkanin Perëndimor, janë krijuar 300 mijë vetë. Në gjithë Ballkanin perendimor, Shqipëri, Kosova Maqedoni,  Mal i Zi, Kroaci, Bosnje.

Por, në Shqipëri e Bosnje, nuk janë krijuar vende pune por janë humbur vende pune. 2,4%, vende pune më pak në Shqipëri, 5% më pak në Bosnje.

Pra, vetë mikesha e tij në Bankën Botërore konfimon atë që cdo shqiptar e di fare mirë, e di fare mirë nga fati i vet, apo i familjarëve të vet se; në Shqipëri me Edi Ramën, ekonomia u shkatërrua, vende të reja pune nuk u krijuan, por vendet ekzistuese të punës u asgjesuan nga Rilindja, nga krimi, nga korrupsioni. Ky është fakt, kjo është e vërtete, dhe këtë 1 Maj dhe cdo 1 Maj, në vend që të zvarritemi në bulevardin e gënjeshtrave, ne kemi ndërtuar këtu Sheshin e Lirisë, sheshin e të vërtetës, ku të vërtetat do t’i themi ashtu siç janë.

Dhe e vërteta e tmerrshme e Shqipërisë nën Edi Ramën është se, Edi Rama me taksat e larta, me arrogancën dhe arbitraritetin e taksidarëve, me rritjen e çmimit të energjisë, dhe të naftës, me pasigurinë totale juridike dhe shkatërrimin e rendit për shkak të krimit në pushtet dhe pushtetit të inkriminuar, e rrënoi ekonominë shqiptare. Ju e dini këtë, shqiptarët e dinë këtë, punëdhenësi madh e di këtë, punëdhenësi i mesëm e di këtë, biznesi i vogël i vetëpunësuar e di këtë. Shqiptarët anembanë e dinë që në këto 4 vite Shqipëria pati një recesion total të ekonomisë që vërtetohet edhe nga shifrat kyçe që tregojnë mirëqenien e njerëzve, rënien e fuqisë blerëse, rënien e investimeve të huaja, rënien në pikiatë të investimeve në tërësi, rritjen e borxhit të keq dhe mbi të gjitha largimin masiv të shqiptarëve.

Ndërmarrjet e mëdha e në veçanti investitorët e huaj po shikojnë se ku të largohen e si të largohen sa më parë. Biznesi i vogël është në gjendje të paprecedentë në 27 vite, nga terrori i taksave dhe presioni, dhe e gjitha kjo shfryhet tek vendet e punës.

Para disa javësh deklaruan se do të rrisin pagën minimale nga 22 në 24 mijë lekë në muaj. Njësoj si paraardhësit e tyre, pagën këta e rrisin me dekret, por shqiptarët e dinë mirë se pagat e rritura me dekret janë zero, nuk vlejnë sepse pagën dhe mirëqenien e rrit ekonomia. Po nuk u rrit ekonomia, nuk rriten pagat.

Unë kam qenë në dhjetëra punëdhënës të mëdhenj dhe kam pyetur punëmarrësit dhe kryesisht punëmarrëset, sa është paga e tyre reale, kur paga minimale me ligj ishte 22 mijë lekë dhe merrnin 150 apo 160 mijë lekë të vjetra, pra 15 apo 16 mijë lekë të reja. Kjo është paga reale dhe punonin 6 ditë në javë. Punonin 6 ditë në javë me orare të zgjatura, me kushte të mjera pune dhe merrnin një pagë të padenjë për realitetin gjeografik europian.

Sepse, edhe në Afrikë ka paga më të lartë. Por Edi Rama dhe e ashtuquajtura Parti Socialiste që nuk ekziston më, “Rahmet pastë!”, “U prehtë në paqe!”, por rilindja e inkriminuar, nuk do t’ia di as për punonjësit, as për pagat e tyre, as për të drejtat e tyre, as për të papunësuarit, as për të punësuarit që janë vepra e tyre.

Rilindja e Edi Ramës, ka vetëm një mision, misioni u ka dal në shesh nga të dhënat zyrtare të Kontrollit të Lartë të Shtetit; 2.8 miliardë euro kanë vjedhur në 4 vite. 2.8 miliardë euro të buxhetit të shtetit, taksave të shqiptarëve me tendera, me koncensione, me abuzime, i kanë vjedhur në 4 vite.

Ky është misioni i vërtetë i rilindjes, i kësaj makinerie, i këtij mekanzimi që mban në këmbë komplotin politik dhe ekonomik kundër shqiptarëve, që mundëson vjedhjen, zhvatjen e përditshme të shqiptarëve që ka shkatërruar ekonominë tonë, që ka mbyllur dyert e bizneseve të vogla, që ka mbyllur dyert e fabrikave dhe vendeve të tjera që prodhonin punësim dhe që ka orientuar të gjithë resurset drejt krimit, drejt drogës, drejt koncensioneve fasadë që janë skemat e rilindjes për të vjedhur akoma më shumë nga xhepat e shqiptarëve.

E vetmja pengesë për të, janë zgjedhjet e lira dhe të ndershme. I vetmi kërcënim për të ndaluar këtë batërdisje, janë zgjedhjet e lira dhe të ndershme. Ndaj kjo betejë për të ndalur me çdo kusht zgjedhjet e lira dhe të ndershme, para se të jetë një betejë politike për rilindjen, për Edi Ramën, dhe për bashibozukët që e rrethojnë, është një betejë ekonomike, është një betejë për resurset, është një betejë për të ruajtur kontrollin mbi të ardhurat, mbi buxhetin, mbi tenderat, mbi koncensionet, mbi pasuritë e shqiptarëve, është një betejë për të vazhduar të pasurohen e  të vetëmbrohen nga ligji dhe drejtësia.

Mos harroni, në 4 vite ndërsa shqiptarët zhyteshin në mjerim, ndërsa shqiptarët nxirreshin nga vendet e punës që mbylleshin për shkak të rilindjes, ndërsa shqiptarët merrnin rrugët e emigracionit, një grusht njerëzish më në krye Edi Ramën janë pasuruar në mënyrë marramendëse.

Ky grusht njerëzish, përbëhet nga ministra dhe pushtetarë, përbëhet nga oligarkë dhe kriminelë.

Dhe është ky grusht njerëzish, ky grusht njerëzish që do me çdo kusht të mbajë kontrollin dhe pushtetin përmes zgjedhjeve të manipuluara të 18 qershorit.

Ky grusht njerëzish dhe kapoja e tij, dje na paskan dhënë një ultimatum se kemi 48 orë për t’u bërë edhe ne pjesë e fasadës, pjesë e alibisë, pjesë e teatrit të kukullave.

48 orë që opozita të bëhet alibia e teatrit të kukullave që do të vazhdojë vjedhjen dhe batërdisjen e shqiptarëve, që asgjë të mos ndryshojë, që kriminelët të vazhdojnë të jenë në Parlament, në krye të bashkive, drejtorë të administratës, që ligji të shkelet me të dyja këmbët, që pasuritë të vazhdojnë të grabiten dhe që opozita të jetë fasada e kësaj shfaqjeje të shëmtuar.

Përgjigja ime është kjo: Ke 48 ditë para se të shpallim luftën totale për asgjesimin e republikës së vjetër!

Mosbindja civile, bashkimi i shqiptarëve në çdo formë dhe mjet paqësor e demokratik, i cili do të përshkallëzohet duke nisur me datën 7, në çlirimin e Kavajës, kryeqytetit të lirisë dhe demokracisë, nga vjedhja, krimi dhe droga; Mosbindja civile do të shtrihet në çdo qytet, në çdo lagje, në çdo fshat për të kulmuar në 18 qershor ku shqiptarët e bashkuar do të rimarrin kontrollin fizik të Shqipërisë që i takon dhe iu takon vetëm atyre dhe kurrë jo krimit, drogës dhe qeverisë së lidhur me ta.

Ndaj, harroje se mund të trembësh apo blesh Partinë Demokratike, apo këtë bashkim të madh qytetar, apo aleatët tanë.

***

Sot në KQZ, në atë palo KQZ, që bën ato palo deklarata, që është diskredituar si një instrument partizan antiligjor, antikushtetues, është regjistruar vetëm një subjekt zgjedhor.

Eshtë koalicioni i 2015-ës, edhe ai nuk është i plotë. I ka lënë rrugës disa bishta, nuk i morën dot me vete. Në udhëtim e sipër, në pazar e sipër, njëri ha ngjalën, tjetri ha peshkun. Dikujt i ngeli hala, dikujt i ngeli bishti, kështu që nuk i morën dot të gjithë me vete.

Disa u kanë rënë nga kamioni. Janë mërzitur disa që kanë rënë nga kamioni i pazarit të peshkut. Nuk kanë çfarë të bëjnë, kanë ngelur rrugës. Por, fakti është që ka ngelur një subjekt zgjedhor, mos harroni. Një subjekt zgjedhor. Këta ishin koalicioni i qeverisë së 2015-ës. Dhe tani për t’i hedhur hi syve të shqiptarëve dhe ndërkombëtarëve, pretendojnë se janë 17 subjekte zgjedhore.

Koalicioni i turpit, koalicioni i vjedhjes, koalicioni i abuzimit, koalicioni i drogës, koalicioni i krimit me në krye Edi Ramën, me Ilir Metën, me mercenarët e tyre si, Bamir Topi, si Ben Blushi, si Gjergj Bojaxhi, janë një dhe vetëm një.

Shqiptarët do t’i refuzojnë me mosbindje civile. Monizëm në Shqipëri nuk ka për të pasur më, me asnjë çmim, me asnjë mënyrë.

Nuk ka për të pasur më monizëm në Shqipëri. Edhe Ramiz Alia, përpara se ta detyronin studentët liberatorë të Dhjetorit, intelektualët dhe qytetarët, me Lëvizjen e Dhjetorit, donte të kishte Partinë e Punës, Frontin Demokratik. Kur nuk ia doli dot Ramizi, nuk do ia dalësh dot ti Ramë, hiqe nga mendja.

Hiqe nga mendja se do të të lejojmë ta marrësh prapë Shqipërinë peng, e të përgatisësh këtu në këtë shesh të lirisë, paradat e 1 Majit, paradat e mjerimit, paradat e mashtrimit. Harroje!

***

E shkelën ligjin, duke nxjerrë nga puna mijëra punonjës publikë të trainuar me lekët e shqiptarëve, të trainuar me lekët e europianëve dhe amerikanëve, e shkelën ligjin për t’i nxjerrë nga puna, dhe sot janë prapë shqiptarët që do të paguajnë nga taksat e tyre 40 milionë deri në 70 milionë euro fatura, për të mbuluar padrejtësitë e Edi Ramës, për të paguar padrejtësitë e tyre, që nga njëra anë nxorrën nga puna nënpunësit, duke i lënë në mes të katër rrugëve, dhe nga ana tjetër, faturën për këtë paligjësi ia japin shqiptarëve.

E njëjta paligjësi edhe sot.

Nuk ka zgjedhje me 18 qershor edhe për faktin e thjeshtë, se edhe formalisht këta i dogjën afatet. Listat i dorëzuan 24 orë me vonesë.

Ky me të vërtetë nuk është një kriter themelor, por është një kriter ligjor; o ka ligj o s’ka ligj. Nëse ka ligj, këta e kanë shkelur ligjin. Asnjë parti, asnjë kandidat për deputet nuk është regjistruar sipas ligjit. Këto mund të jenë zgjedhjet e pazarit të peshkut, por kurrsesi jo, zgjedhjet e shqiptarëve. Edhe formalisht, edhe ligjërisht janë të pavlefshme.

***

Sot, ne do të planifikojmë në detaje, bashkimin më të madh të shqiptarëve, të dielën e ardhshme, në Kavajë, më 7 maj, për të çliruar Kavajën me forcën e bashkimit, nga krimi, droga dhe zgjedhjet fasadë.

Prej ditës së hënë e tutje, do ta shtrijmë anembanë Shqipërisë mosbindjen civile dhe lëvizjen e madhe popullore, për zgjedhje të lira dhe të ndershme, për të kulmuar me 18 qershor.

Nuk e di se si i ke bërë planet Edi Rama, e se ku po të çon mushka e kupolës kriminale ku ke hipur, nga e cila refuzon të zbrezësh duke i zënë rrugën një populli të tërë.

Por, të jap fjalën. Çfarëdo të kesh planifikuar me 18 qershor, nuk do të qeverisësh dot asnjë orë të vetme pas 18 qershorit.

Asnjë orë të vetme! Asnjë orë të vetme!

Lëvizja popullore e bashkuar është totalisht e vendosur për Republikën e Re, ndaj ke vetëm një rrugë, bëhu pjesë e zgjidhjes ose shporru bashkë me republikën e vjetër.

Qytetarët nuk do të kthehen pas. Opozita nuk i tradhëton dhe nuk do t’i tradhëtojë. E keqja do të mposhtet! E mira, do të fitojë!

Zoti e bekoftë Shqipërinë!

Zoti i bekoftë shqiptarët!

Mesazhi i Lulzim Bashës në ditën e 72 të protestës për zgjedhje të lira e të ndershme: Nga Kavaja nis bashkimi, clirimi dhe fitorja e shqiptarëve të bashkuar për Republikën e Re. 

Një përshëndetje të veçantë kavajasve, të rinjve dhe të rejave, grave dhe burrave të Kavajës, që kanë mbushur dhe ndriçuar sot këtë agorë të lirisë.

Përshendetje të gjithë qytetarëve dhe qytetareve të kryeqytetit të lirisë dhe demokracisë, të Kavajës heroike.

Sot është një ditë e madhe për Shqipërinë.

Dua ta nis me mirënjohjen dhe falenderimin më të thellë njerëzor, për sakrificën, kurajon dhe përgjegjësinë tuaj, e të qindra, mijëra qytetarëve që në 72 ditë të bashkimit më të madh qytetar dhe popullor, për liri, demokraci, për zgjedhje të lira dhe ndershme dhe për Republikën e Re, keni transformuar njëherë e përgjithmonë historinë moderne të Shqipërisë.

Tashmë, çdokush e di, i madh e i vogël, shqiptar e i huaj, se pluralizmi për Shqipërinë nuk mjafton. Duhet dhe do të kemi demokraci të vërtetë.

Demokraci të vërtetë që nuk do të thotë sundim nga partitë, prej partive e për partitë, por do të thotë sundim nga populli, për popullin, dhe prej popullit.

Një falenderim të veçantë kam për të gjithë partitë opozitare, për të 27 aleatët e Partisë Demokratike, të cilët duke i dhënë shprehje vendimit popullor të 18 shkurtit, kanë qendruar të bashkuar e të vendosur në betejën qytetare për zgjedhje të lira dhe të ndershme.

Mbrëmë në orët e mesnatës u luajt pazari i fundit i republikës së vjetër.

Ky Pazar, tregon edhe një herë para shqiptarëve, se sa poshtë ka rënë demokracia shqiptare. Se si është zëvendësuar mundësia e qytetarëve për të diktuar me votë qeverisjen e vendit, se si është zëvendësuar mundësia e qytetarëve për të vendosur me votë, nga një kupolë kriminale dhe e korruptuar e cila është pasuar mbi gjakun, djersën dhe taksat e shqiptarëve.

Dje, një grusht partish të pushtetit, anëtare të pazarit të peshkut që është qelbur nga koka, dhe një grusht parazitësh, të cilët janë paguar me paratë e pista të drogës dhe korrupsionit për të bërë fasadën e kupolës kriminale te republikës së vjetër, nxituan, në shkelje totale të ligjit elektoral, të paraqisnin listat e turpit pranë KQZ-së.

Në shkelje të Kodit Zgjedhor, KQZ, kjo vegël e pavlerë e republikës së vjetër që synon të tjetërsojë vullnetin e qytetarëve shqiptarë, i pranoi me 24 orë vonesë, në thyerje të Kodit zgjedhor, listat e turpit, të pazarit të peshkut, të Edi Ramës, të Ilir Metës, të Shpëtim Idrizit, dhe të një tufe mercenarësh të kësaj tresheje grabitqare të republikës së vjetër.

Ju duhet ta dini se republika e vjetër, kupola kriminale në pushtet, dje gjatë gjithë ditës dhe në orët e vona të natës, i ofroi shuma të majme, partive politike opozitare me qëllim regjistrimin e tyre në thyerje të vendimit të koalicionit opozitar, në thyerje të vendimit popullor të 18 shkurtit.

500 mijë euro, iu ofrua vetëm një kryetari partie, për t’u shkëputur nga opozita. Për t’u shkëputur nga ky vendim popullor, nga ky bashkim popullor, e për t’iu bashkuar pazarit të ndyrë, komplotit politik të republikës së vjetër.

Qindra mijëra euro të tjera, iu ofruan kandidatëve të tjerë potencialë të partive aleate.

Ata thanë JO. Askush nuk e mori lugën e çorbës së prishur të Edi Ramës, Ilir Metës me shokë. Arsyeja kryesore e refuzimit te sekserëve të ndyrë të republikës së vjetër, ishte fare e thjeshtë.

Këto para, nuk janë paratë e tyre, këto janë paratë e shqiptarëve të papunë, këto janë paratë e pensionistëve që mezi ia dalin të paguajnë faturat me pensionet e tyre të mjera, këto janë paratë e pacientëve shqiptarë që nuk marrin as ilaçet as trajtimin e duhur, sepse i vjedh Edi Rama me Ilir Beqën.

Këto janë paratë e nxjerra me zor nga xhepat e mjerë të nënave dhe baballarëve që paguajnë tarifat e rritura të universitetit, këto janë paratë e subvencioneve të munguara për fermerët. Këto janë paratë e asistencës së prerë për 40 mijë familje shqiptare dhe të reduktuara në nivele të papranueshme mbijetese për ata që akoma e marrin. Këto janë paratë e krimit dhe drogës.

Këto janë paratë e haramit që është ndërtuar mbi fatkeqësinë e një populli të tërë. Ne nuk i marrim këto para. Ne nuk i prekim këto para. Këto para do t’ju zënë fytin dhe frymën së shpejti.

Ky ishte qëndrimi burrëror i aleatëve të Partisë Demokratike që janë aleatët e kësaj lëvizje popullore dhe qytetare pa kthim për Republikën e Re.

***

Nuk është heroizëm të refuzosh zhaget e korrupsionit dhe drogës. Nuk është heroizëm, por detyrë. Ndaj do të thoni pse kaq shumë falenderime.

Por sepse në tregun e ndyrë të politikës së vjetër, vend ka për gjithçka, përveçse virtytit.

Sepse nga ana tjetër, ben blushër, bamir topër e të tjerë me shokë, jo vetëm kanë gëlltitur lugën e çorbës së prishur, por janë kthyer në parti-organizata të institucioneve publike.

Fryma e Re Demokratike është në fakt OSHEE-ja, e cila ka dhënë firmat e një partie që nuk ka asnjë anëtar dhe një kryetar me kohë të pjesshme. Ben Blushi apo siç do të njihet tani e tutje si Sali Rexhepi, është alibia, fasada e një pseudo opozite, makiazh për surratin e pamakiazhueshëm, të shëmtuar të republikës së vjetër, që është në gjunjë dhe po bëhet gati të japë shpirt.

Kjo është hera e parë dhe e fundit që unë merrem me ta dhe këshilla ime për ju dhe çdo shqiptar të ndershëm është t’i varrosni në harresën dhe indiferencën totale të një shoqërie e cila lufton kundër padrejtësisë, por përbuz akoma më shumë të shiturit, hamzatë e kohërave moderne, shushunjat që u gënjyen dhe u blenë me lekët e korrupsionit dhe drogës, në vend që t’i bashkoheshin kësaj kauze popullore, të pathyeshme, për demokraci të vërtetë.

Kjo është republika e vjetër. Zhagia e mbushur me paratë që u merret nga goja fëmijëve të shqiptarëve, që u merret nga trupi pacientëve shqiptarë, zhagia që u merret nga dëshpërimi i të papunëve, nga frika e atyre se mos humbasin vendin e punës nesër.

Zhagia, trajsa, torba e mbushur me lekët që u grabiten shqiptarëve, ky është mjeti i vetëm i republikës së vjetër.

Ndaj kanë shteruar dhe ekzekutuar çdo mjet tjetër të të bërit politikë në interesin e qytetarëve shqiptarë.

Kjo republikë e vjetër e ka firmosur me dorën e saj, në këtë akt të fundit të asgjesimit të pluralizmit dhe demokracisë së vërtetë, nevojën e ngutshme, për të vdekur dhe për t’u varrosur një orë e më parë.

***

Data 7 maj do të jetë data e atakut kardiak total të republikës së vjetër. Me 7 maj, në kryeqytetin e lirisë dhe të demokracisë, në Kavajën e fisnikërisë dhe të burrave dhe të grave trime, që u ngritën të parët – askush nuk e harron, te gjithe ju jemi mirenjohes – Kavaja është në këmbë, Kavaja është e vendosur. Por ndryshe nga 11 korriku i vitit 1990, që është shkruar me gërma të arta në historinë e demokracisë, më 7 maj Kavaja nuk do të jetë vetëm, e gjithë Shqipëria do të jetë në Kavajë dhe me Kavajën. E gjithë Shqipëria do të jetë në Kavajë dhe me Kavajën dhe të bashkuar do t’i japim grushtin vdekjeprurës republikës së vjetër.

Qindra mijë shqiptarë të ndershëm, që do të bashkohen në Kavajë me datën 7 maj, në një bashkim gjigand dhe të paparë ne 27 vite pluralizëm, se bashku me mijëra banorë të Kavajës dhe në ballë me rininë e Kavajës, do të pamundësojnë zgjedhjet farsë, votimin farsë të diktuar nga krimi.

Do të pamundësojmë  rikthimin de juro dhe de facto të Kavajës në duart e Elvis Rroshit, që Kavaja e shporri me ligjin e dekriminalizimit, me ndihmën e qëndresës sonë të bashkuar, dhe së bashku me 7 maj, ne do t’i japim republikës së vjetër goditjen finale.

Të vendosur dhe në paqe totale asnjë lule dhe asnjë fije bari nuk do të preket.

Por asnjë qytetar i vetëm i Kavajës nuk do detyrohet nga krimi, nga droga dhe  republika e qeverisë së vjetër në një proces fasadë, në një farsë elektorale, sepse një proces të tillë nuk do të ketë, në 7 Maj në Kavajë, dhe as në 18 Qershor në Shqipëri.

***

Me aktin e djeshëm, me shkeljen e Kodit Zgjedhor me regjistrimin e tyre, me derdhjen e milionave të grabitura nga xhepat e shqiptarëve të varfëruar me zhagen e pseudo-partive, të pseudo-opozitës fasadë,  republika e vjetër firmosi aktin e saj të vdekjes.

Me 18 Shkurt ne kemi firmosur këtu vendosmërinë për të themeluar Republikën e Re.

Duke nisur nga dita e sotme, këto dy realitete të papajtueshme me njëra tjetrën, janë në një betejë totale për jetë a vdekje me njëra-tjetrën.

Nëse republika e vjetër nuk tërhiqet nga plani dhe projekti për të asgjesuar pluralizmin, për ta zëvendësuar atë me pluralizmin fasadë dhe për të vazhduar demokracinë fasadë, parlamentin fasadë që do të pjellë ekonominë fasadë, me papunësi, mjerim dhe vuajtje pas asaj fasade, nëse kjo ndodh, atëherë me 18 Qershor, në mesnate, kushtetuta dhe ligjet e republikës së vjetër për Republikën e Re do të jenë të pavlefshme, di të jenë nul dhe void, dhe me 19 Qershor asnjë qytetar i lirë shqiptar, që e ndjen veten pjesë të Republikës së Re, nuk duhet të paguajë asnjë taksë dhe nuk do ti bindet asnjë ligji të republikës së vjetër.

Bashkë me qytetarët e lirë ne do të shfrytëzojmë këtë kohë për të nisur krijimin e korpusit institucional ligjor dhe kushtetues të Republikës së Re, bazuar në parimet themeluese të SHBA dhe vendeve demokratike europiane që do të jenë Kushtetuta dhe ligjet e vetme të vlefshme për qytetarët e Republikës së re.

Nuk kemi cfarë të presim më. Gjithcka është e qartë. Republika e vjetër do të bëjë gjithcka që të qëndrojë në këmbë. Që të qëndrojë në këmbë, i duhet të zhvasë e të përvetësojë akoma më shumë, para, pasuri, koncesione, tendera nga xhepat e shqiptarëve dhe pasuritë tona kombëtare, i duhet të mbështet gjithmonë e më shumë te droga krimi e tek trafikantët që e sollën dhe po e mbajnë në pushtet, e po investojnë ta mbajnë kundër vullnetit popullor.

Të qëndrosh skllav i këtij realiteti, do të thotë pranosh pa vepruar tiraninë e krimit dhe të drogës, tiraninë dhe  diktaturën e re, antikushtetuese, antiligjore dhe që drejtohet kundër lirive dhe të drejtave të cdo shqiptari.

Një herë kjo ndodhi, dhe për 50 vite me radhe, Shqipëria mbeti në errësirën e diktaturës, e izoluar e varfëruar, e paditur, e përbuzur. I zgjuar nga ky gjume 50 vjecar, kombi shqiptar, shoqëria shqiptare e pa veten në fund të Europës, në mes të Afrikës në mes të mjerimit. 27 vite sakrifica të shqiptarëve të ndershëm , 27 vite sakrifica të burrave dhe grave, të majtë e të djathtë, 27 vite përparim me synim ta bëjmë Shqipërinë si gjithë Europa, megjithëse zigzaget e veta, me gjithë të mirat që janë pjesë dhe kontribute edhe e kundërshtarëve tanë politike, megjithë gabimet që janë pjesë edhe e jona, Shqipëria ka ecur përpara.

Sot, kjo klikë do ta ndalë këtë progres, ta kthejë Shqipërinë në një republikë të kontrolluar nga droga dhe krimi me një fasadë demokraci, me një fasadë parlament dhe një popull të skllavëruar.

Vendimi popullor i 18 Shkurtit prandaj u mor, që ky stacion të mos rikthehej kurrë më në historinë tonë kombëtare. Ndaj, vendosmëria dhe qëndresa jonë ka tashmë këtë synim, këtë objektiv; që kurrë më të mos kthehemi pas. Dhe nuk do të kthehemi.

***

Rruga që kemi përpara është e vështirë.

Për të gjithë ju që keni sakrifikuar këto 72 ditë dhe që keni vendosur themelet e kësaj Republikës së re, duhet ta dini që interesat shumë miliardëshe të republikës së vjetër dhe të kupolës politike që e kontrollon, të kupolës politike që ekziston vetëm për pasurinë e saj dhe për mbrojtjen e kësaj pasurie, të gjitha këto interesa përbëjnë një pengesë të madhe për zgjidhjen e kësaj cështje në format institucional të dialogut politik. Nga ana tjetër, jemi zotuar prej ditës së parë se Republika e Re nuk mund, e nuk do të themelohet mbi themele dhune, por vetëm mbi themele paqeje e demokracie.

Kjo dikton para nesh një rrugë, një rrugë që është bashkimi masiv dhe i vendosur i shqiptarëve në një lëvizje pa paralele, në Europë në Ballkan dhe në Shqipërinë e 27 viteve të fundit.

Bashkimi, pjesëmarrja aktive në betejat që na presin, është tani përcaktues në fitoren e Republikës së Re dhe ëndrrës që të gjithë bashkë kemi thurur prej 18 Shkurtit, këtu në këtë shesh.

Refuzimi, refuzimi paqësor, por i vendosur prej datës 18 Qershor i cdo ligji dhe i cdo takse të republikës së vjetër, është detyra patriotike e cdo shqiptarie cdo shqiptareje të ndershme bashkëthemelues i Republikës së Re.

Kjo është një rrugë e lodhshme. Kjo është  një rrugë me sakrifica, por kjo është e vetmja rrugë e ndershme, paqësore, patriotike, europiane, që na con drejt të ardhmes që të gjithë duam dhe dëshirojmë.

Ajo ditë po vjen, ku ju ta keni në dorë fatin tuaj dhe të gjithë së bashku të kemi në dorë fatin e Shqipërisë. Dita kur populli e ka në dorë, dita kur njerëzit e kanë në dorë, dita kur qeveritarët nuk janë pushtetarë arrogantë, por shërbëtorë të përulur të qytetarëve, unë  e kam përë këtë ditë, e kam parë në vendet e Europës kur kam jetuar dhe kam studiuar, dhe nga thellësia e shoh se; kjo ditë për të gjithë ne po agon edhe në Shqipëri.

Por për këtë, duhet të refuzojmë me vendosmëri dhe të bashkuar pushtetin arrogant dhe kupolën politike të republikës së vjetër. Për këtë, duhet të bashkohemi në një betejë vendimtare, totale, cdo ditë, dhe pa asnjë tërheqje nga kjo ëndërr e madhe kombëtare. Bashkimi nis nga Kavaja, clirimi nis nga Kavaja. Fitorja nis nga Kavaja.

Zoti e bekoftë Kavajën e lirisë, Kavajën e demokracisë. Zoti e bekoftë Shqipërinë dhe shqiptarët!

Bashkëbisedim i qytetarëve të Kavajës në Sheshin e Lirisë, për problematikat e komunitetit, për fasadën që fsheh varfërinë e mjerimin dhe sundimin e qytetit prej krimit të lidhur me shtetin

Në ditën e 72-të të protestës për zgjedhje të lira dhe të ndershme, kryetari i opozitës Lulzim Basha, bashkëbisedoi me qytetarët e Kavajës në Sheshin e Lirisë.

Mesazhi i qytetarëve ishte që shqiptarët të mos kenë frikë nga qeveria e krimit dhe e drogës, por t’i thonë jo, diktatit të krimit e të drogës mbi votën, duke nisur nga 7 maji në Kavajë.

“Kjo është qeveri që ka vetëm numrat, dhe Kavaja ka rënë shumë poshtë në nivelin e saj të përfaqësimit me kandidatin i cili vjen nga partia e krimit”, thanë ata.

Për Xhorxh Simakun prania e kavajasve në Çadrën e Lirisë, është një sinjal dhe mesazh për të gjithë shqiptarët se kjo është Kavaja e vërtetë e vitit 90, e cila u kthye në qytetin simbol të shëmbjes së diktaturës.

“Kavaja do të kërkojë me çdo kusht të drejtën. Jemi në prag të një situate të vështirë ku rrezikohet e ardhmja e fëmijëve tanë. Të luftosh sot për zgjedhje të lira dhe kauzën e Republikës së Re, është jetike dhe vendimtare për të ardhmen e demokracisë dhe qytetarëve. Jam krenar që jam kavajas, qytetit i cili gëzon statusin “Pishtar i Demokracisë”.

Për kavajasit, të cilët sakrifikuan rininë, si dëshmori Josif Budo, i cili bëri bashkë kavajasit për të shembur diktaturën më të egër, sot qytetarët e saj nuk e kanë të lehtë. “Kemi një kryeministër të papërgjegjsjëm i cili di vetëm të kërcënojë. Nuk e pranojmë burgosjen e lirisë”, tha z.Simaku.

Bruna Lakçori theksoi se në Kavajë dhe në të gjithë Shqipërinë, shihet rritje taksash, çmimesh.

“Ku është kjo Shqipëria e bukur dhe e rilindur? Ne shohim një tallje publike për qytetarët e të gjithë Shqipërisë dhe jo më të Kavajës. Shohim atë që na shqetëson të gjithëve, liria për t’u shprehur, liria e fjalës.

Ne sot kemi frikë. Na kanë vjedhur të drejtën më të shenjtë, të drejtën për t’u shprehur, të drejtën për të zgjedhur, për të marrë atë që na takon. Shërbimi shëndetësor është përtokë. Ne kërkojmë shpëtim jashtë vendit, përse ta kërkojmë jashtë. Ne kemi Shqipërinë. Përse mos bëhet Shqipëria nga shqiptarët. Shtetin tonë duhet ta bëjmë vetë. Më 7 maj t’i themi jo talljes publike, jo botës së krimit, t’i themi po vullnetit që i takon sovranit, na takon të gjithëve ne, votën e lirë”, tha zonja Lakçori.

I riu Elvis Gravardari, e vlerësoi kritike gjendjen e të rinjve në Kavajë. “Jam nga qyteti i demokracisë dhe lirisë. Rinia duhet të marrë përsipër fatet e vendit tonë. Ashtu si në vitet 90 si shkëndija e demokracisë, më 7 maj nuk do të ketë zgjedhje me krim e me drogë, as me 18 qershor. Kjo klikë qeverisëse nuk do të shkelë në Kavajë. Ftoj të gjithë të rinjtë e Kavajës t’i themi jo klikës së krimit. Më datë 7 ju presim të gjithëve në Kavajë”, tha Gavërdari.

Arsimtari Genci Gylsheni, theksoi se nuk falet propaganda në orën e mësimit dhe çon me dhunë në mitingun e dështuar të Edi Ramës në Kavajë. Më 7 maj të jemi bashkë, në protestë paqësore. Kandidati është farsë dhe ka ulur poshtë nivelin e qytetit, tha z.Gylsheni.

Lulzim Basha tha se qytetarët e Bashkuar do ta ndalin farsën zgjedhore pushtetarëve të korruptuar, të krimit, të drogës, të republikës së vjetër

“Do të pamundësojmë  rikthimin de juro dhe de facto të Kavajës në duart e Elvis Rroshit, që Kavaja e shporri me ligjin e dekriminalizimit, me ndihmën e qëndresës sonë të bashkuar dhe së bashku me 7 maj, ne do t’i japim republikës së vjetër goditjen finale. Të vendosur në paqe totale. Asnjë lule dhe asnjë fije bari nuk do të preket. Por asnjë qytetar i vetëm i Kavajës nuk do detyrohet nga krimi, nga droga dhe republika e qeverisë së vjetër, në një proces fasadë, në një farsë elektorale, sepse një proces të tillë nuk do të ketë, në 7 Maj në Kavajë, dhe as në 18 Qershor në Shqipëri”, tha Basha.

Duke paralajmëruar pasojat, nëse marrëzia e Edi Ramës vazhdon me farsën elektorale, Basha bëri të ditur se:

“Nëse republika e vjetër nuk tërhiqet nga plani dhe projekti për të asgjesuar pluralizmin, për ta zëvendësuar atë me pluralizmin fasadë dhe për të vazhduar demokracinë fasadë, parlamentin fasadë që do të pjellë ekonominë fasadë, me papunësi, mjerim dhe vuajtje pas asaj fasade, nëse kjo ndodh, atëherë me 18 Qershor, në mesnate, kushtetuta dhe ligjet e republikës së vjetër për Republikën e Re do të jenë të pavlefshme, të jenë nul, dhe me 19 Qershor asnjë qytetar i lirë shqiptar, që e ndjen veten pjesë të Republikës së Re, nuk duhet të paguajë asnjë taksë dhe nuk do ti bindet asnjë ligji të republikës së vjetër. Bashkë me qytetarët e lirë ne do të shfrytëzojmë këtë kohë për të nisur krijimin e korpusit institucional ligjor dhe kushtetues të Republikës së Re, bazuar në parimet themeluese të SHBA dhe vendeve demokratike europiane që do të jenë Kushtetuta dhe ligjet e vetme të vlefshme për qytetarët e Republikës së re”.

Në ditën e 71 të protestës për zgjedhje të lira dhe të ndershme, qytetarët e Qarkut të Korçës bashkëbiseduan me kryedemokratin Lulzim Basha për keqqeverisjen që ka rritur varfërinë në këtë qark.

Qyteti i Korçës ka sot vetëm investime fasadë e kulla korrupsioni, ndërkohë që të rinjtë po ikin nga qyteti, varfëria është rritur, bizneset po mbyllen dhe fermerët e kësaj zone nga më të njohurat nuk po prodhojnë më.

Kryetari i Shoqatës së biznesit të vogël e të mesëm në Qarkun e Korçës, Koli Biraj tha se është premtuar se do hiqeshin xhandarët tatimorë por ndërkohë ata janë akoma aty. “Premtimi për ulje taksash kompensohet me vendosje gjobash që vetëm shumëfishojnë taksat”, tha Biraj.

Bujar Muço nga shoqata e biznesit të vogël tha se biznesi në Korçë është në prag të falimentit. “180 familje që punonin në pazarin e Korçës u hodhën në rrugë. Sot biznesi është drejt falimentimit. 42 % ka rënë fuqia blerëse sipas të dhënave tona. 27 mijë biznese janë mbyllur vjet dhe vetëm në Korçë falimentuan 970 biznese të vogla e të mesme”, tha ai.

Fermeri Mustafa Zhurka tha se po dëgjojnë të njëjtat premtime nga Rama ndërkohë që nuk kanë më besim se do të mbështeten.

Por sot Korça është mbërthyer nga një oligarki e cila po përqendron vendimarrjen në duart e veta. Mirela Qeleshi, financiere me eksperiencë mbi 20 vjeçare në Korçë, u largua padrejtësisht nga puna. Ajo akuzoi të majtët se kanë marrë peng qytetin duke e zhytur në mjerim të thellë. “Korçën e ka rrëmbyer dhe hipotekuar një oligarki peleshjane e cila ka mbërthyer këtë qytet duke marrë çdo vendim nga një lokal që e di çdo korçar”, tha ajo.

Viola Tasi, nënë e re e papunë tha se nuk ka asnjë mbështetje dhe shpreson nga Republika e re. Edhe psikologia Katerina Mullalli tha se priste të niste punë në qytetin e saj, por edhe pse me kriteret e duhura, asaj iu refuzua puna sepse nuk ishte pjesë e listave të partisë në pushtet.

Pedagogia, Ledina Aliolli tha se gjendja e të rinjve është e pashpresë. Ajo shprehu vlerësimet për programin ekonomik të Partisë Demokratike. “Të rinjtë korçarë nuk kanë shpresë të gjejnë punë dhe të vetmen shpresë kanë të ikin nga qyteti. 50 % e të rinjve korçarë sot janë të papunë. Sot Korça identifikohet si Korça e kullës së shëmtisë dhe e fasadave të rikostruktuara por të një pazari të falimentuar. Kanë nisur të shantazojnë të rinjtë por edhe mësuesit. Këtu me vete kam një formular patronazhi që ata u kërkojnë të sjellin në këmbim të vendit të punës. Kjo nuk është republika që ne duam. Duam një republikë të re”, tha ajo.

Enina Facaj, avokate nga Korça akuzoi qeverisjen duke treguar se vite më parë ka punuar në administratën e Ramës në Bashkinë e Tiranës dhe kishte dhënë dorëheqjen për shkak se punohej vetëm për fasadë. “Duhet të marrim shembullin e Rumanisë me protestat e vazhdueshme për të arritur të drejtat e në veçanti të drejtën e votës. Kjo është arsyeja që unë po vazhdoj të luftoj si ju”, tha Facaj.

Pedagogia Sorina Koti tha se “të rinjtë dua të ikin nga Korça dhe shoh që studentët dua ti ikin. Sot nuk jemi vetëm të denoncojmë por ne po shpalosim programin tonë për të treguar se çfarë do bëjmë për Korçën”.

Kryedemokrati Lulzim Basha tha se republika e re do kthejë shpresën duke nisur nga shkulja e korrupsionit, krimit dhe narkotrafikut.

“Në Republikën e Re, 100 milionë euro subvencione të drejtpërdrejta për fermerët dhe 50 milionë euro investime në infrastrukturën bujqësore vit për vit, çka do të thotë se, mesatarisht, siç u shpreh këtu edhe profesor Bardh Sallaku, do të thotë, afërsisht pesëdhjetë mijë lekë për dylym asistencë, subvencion, çdo fermeri, çdo familjeje fermere.  Zerim pra, i akcizës, i taksave dhe i gjithë peshës së madhe që sjell abuziviteti me fidanët, me farërat, me plehrat kimike dhe inpute të tjera bujqësore, që i shërbejnë një qëllimi, pasurimit të një grushti njerëzish”, tha Basha.

Ai premtoi mundësi për të rinjtë dhe studentët shqiptarë, si dhe taksa të ulëta dhe lehtësi për biznesin.

“Qeveria me ligj do të vendosë si kufi maksimal të taksave të biznesit të vogël 1.5 % të cilat do të shlyhen me këste dhe me vetëdeklarim dhe çdokush që i përmbahet këtij rregulli dhe që demonstron pullën përkatëse, ka fituar të drejtën që asnjë taksidar, asnjë inspektor, asnjë punonjës i shtetit të mos i shkojë ndër mendje ti futet biznesit të vogël përveçse si konsumator i biznesit të vogël”, tha Basha.

Njoftim per shtyp, 29 Prill 2017

Sot me kënaqësi të jashtëzakonshme kemi dëgjuar në këtë agorë fjalën, të vërtetën e korçarëve, e qytetarëve dhe fermerëve të Korçës, që janë sot, jo për herë të parë, jo vetëm pjesëtarë të këtij tempulli të lirisë, por edhe flamurtarë të këtij bashkimi të madh qytetar, popullor për Republikën e Re dhe për zgjedhje të lira e të ndershme.

Dita e sotme është fillimi i javës së 11-të të kësaj proteste, protestë e cila ka një qëllim, një objektiv; zgjedhjet e lira dhe të ndershme.

Por ajo që lindi përmes kësaj proteste, ky bashkim i madh i shqiptarëve, pa dallim bindjesh politike, përkatësie krahinore, fetare apo statusi ekonomik dhe social, ajo që lindi përmes këtij bashkimi të madh popullor, ëndrra për Republikën e Re, ka hedhur vetëm hapin e parë.

Ne me forcën e bashkimit do t’ia dalim ta fitojmë totalisht betejën për zgjedhje të lira e të ndershme. Por kjo betejë është vetëm e para, vetëm e para betejë që na pret në rrugën drejt Republikës së Re, drejt atij realiteti për çdo shqiptar, për çdo kryefamiljar, për çdo nënë e baba, për çdo të ri e të re, për pensionistët, për studentët, drejt atij realiteti që nuk do të ketë asgjë të përbashkët me realitetin e sotëm ku është kredhur Shqipëria.

Të vërtetat e sotme të çdo shqiptari shpalosen këtu, pa censure, me njëri tjetrin, sepse arma e fuqishme e oligarkisë, që janë mediat e kapura, për fat të keq, kanë 70 ditë që censurojnë fjalën e qytetarëve dhe japin vetëm fjalën time, ndaj unë, përpiqem të bëj një përmbledhje. Kjo armë e fuqishme që grasatohet me zhaget e korrupsionit, që lyhet me paratë e taksave të shqiptarëve dhe madje është dhe pjesë e narko-kartelit, kjo media, nuk kam fjalën natyrisht për operatorët, për gazetarët, të cilët i përshëndesim dhe që kanë qenë dhe janë pjesë e pandashme e këtij bashkimi qytetar, po për një grusht pronarësh që e kanë lidhur fatin e tyre me fatin e kupolës së Republikës së Vjetër, përmes parave të korrupsionit dhe 101 marifeteve, i pret zërin qytetarëve, teksa flasin të vërtetat e tyre të dhimbshme, këtu në këtë çadër, siç e kanë censuruar tash 4 vjet, Shqipërinë e halleve dhe problemeve, duke mos shikuar kudo ku ajo është, në shtëpi, në punë, në fusha e kudo tjetër.

Pra, hallet e njerëzve, që shpalosen këtu ditë për ditë dhe Republika e Re, ai realitet që nuk do të ketë asgjë të bëjë me realitetin e sotëm. Gjithçka do të ndryshojë dhe asgjë nuk do të jetë më si më parë. Republika e Re do ti adresojë këto probleme, duke vënë në dispozicion të zgjidhjes gjithë asetet e Republikës së Re, asetet e Shqipërisë, që do ti kthehet shqiptarëve.

Kështu do të mundësojmë në Republikën e Re që fermerët e mashtruar, të zhgënjyer, të braktisur, e të goditur deri në palcë, nga padrejtësitë, dredhitë, taksat, dhe tregu i shkatërruar për prodhimet e tyre, të rikthehen fuqishëm në ekonominë shqiptare, jo thjesht duke prodhuar sa për të mbajtur frymën gjallë, por duke u bërë një pjesë e rëndësishme e luftës kundër varfërisë, e zhvillimit rural dhe një tregu ku përfitojnë jo vetëm ata, por edhe konsumatorët e prodhimeve të tyre, e djersës së tyre.

Ne do ta mundësojmë këtë në Republikën e Re, kur qindra milionë euro që sot i përpijnë kuçedrat e koncesioneve dhe tenderave me në krye Edi Ramën, do ti rikthejmë sipas një skeme prej 1.5% të prodhimit të brendshëm, shpenzime për bujqësinë.

Në Republikën e Re, 100 milionë euro subvencione të drejtpërdrejta për fermerët dhe 50 milionë euro investime në infrastrukturën bujqësore vit për vit, çka do të thotë se, mesatarisht, siç u shpreh këtu edhe profesor Bardh Sallaku, do të thotë, afërsisht pesëdhjetë mijë lekë për dylym asistencë, subvencion, çdo fermeri, çdo familjeje fermere.  Zerim pra, i akcizës, i taksave dhe i gjithë peshës së madhe që sjell abuziviteti me fidanët, me farërat, me plehrat kimike dhe inpute të tjera bujqësore, që i shërbejnë një qëllimi, pasurimit të një grushti njerëzish.

***

Për studentët, Republika e Re do të mundësojë anullimin që në orën e parë të këtij ligji të tmerrshëm për arsimin e lartë, kthimin dhe forcimin e autonomisë universitare, që do të thotë që, për fatet e universiteteve do të vendosin vetë kolegjet e padagogëve dhe studentëve dhe jo ministrat e korruptuar, të kupolës së korruptuar të republikës së vjetër.

Me uljen e tarifave shtetërore, mbështetjen financiare të universiteteve publike, Republika e Re do të mundësojë që asnjë studenti, asnjë biri dhe bije shqiptari të mos i mohohet e drejta për shkollën e lartë, për shkak të pamundësisë ekonomike.

Dhe, studentëve që mbarojnë studimet, Republika e Re do t’u mundësojë një urë 1 vjeçare nga bankat e shkollës tek tregu i punës, përmes stazheve të paguara, 200 mijë lekë të vjetra në muaj, plus sigurimet, me qëllim që të rinjtë dhe të rejat shqiptare të kenë erën e mbarë në velat e anijeve të tyre, të cilat do të hynë në tregun e punës të një ekonomie të çliruar nga oligarkia, nga terrori, nga taksat e larta, nga pasiguria dhe nga krimi.

Në Republikën e Re koncesionet e derrave të korrupsionit që mblidhen nga mëngjesi deri në darkë, për të ndarë mes tyre, paratë e gjakut dhe djersës së shqiptarëve, do t’u kthehen edhe pensionistëve shqiptarë dhe në krye të katër vitetve të para të qeverisë së parë të Republikës së Re, pensioni minimal i shqiptarëve do të jetë jo më i vogël se 250 mijë lekë të vjetra, dhe do ketë rritje prej 40% në të gjithë sektorët e pensionit.

Këto do të jenë avantazhet e para të një Shqipërie ku asgjë nuk do të jetë si sot.

***

Por asgjë nuk do të ndryshojë, nëse ne lëmë në këmbë mekanizmin kriminal dhe korruptiv që ndërtoi dhe çimentoi kupolën kriminale dhe korruptive të Republikës së Vjetër. Ju e njihni fare mirë se cili është ky mekanizëm, ia keni parë bëmat e një Shqipërie me ekonomi të falimentuar, e një Shqipërie me taksat më të larta në rajon, me çmimin e energjisë më të lartë në rajon, me çmimin e naftës ndër më të lartët në Europë, që prapë se prapë, jo vetëm nuk ia del ti përgjigjet nevojave të qytetarëve, por i bën hi 600 milionë euro me qoka korruptive të Edi Ramës, me buzëkuqin e fasadave të të ashtuquajturës Rilindje Urbane, me shëndetësi të falimentuar, ku shushunjat pijnë gjakun e pacientëve dhe familjarëve të tyre përmes koncesioneve korruptive që janë bërë të larta sa mali i Dajtit.Me arsim në recension total, me pasiguri në rrugët tona, me Shqipërinë në pararojë të krimit dhe prodhimit të drogës, këto janë gjëmat e republikës së vjetër, këto janë gjëmat e kupolës kriminale.

Ju i dini të gjitha këto, por sot është rasti t’u përsërisim së bashku shqiptarëve mekanizmin kriminal, se si të gjitha këto bëhen të mundura. Mekanizmi kriminal i kupolës kriminale të republikës së vjetër, është mekanizmi i pazarit me interesin qytetar, me të ardhurat e qytetarëve, me burimet e vendit dhe me drogën që ka lulëzuar kudo. Emri i mekanizmit është pazari, njësoj si pazari i 1 Prillit para katër vitesh, që është dhe themeli i kupolës politike të republikës së vjetër, pazari ka vazhduar pa pushim ditë e natë.

Kupola politike e republikës së vjetër ekziston vetëm për një qëllim: që të pasurohet dhe të mbrojë pasuritë që vë në kurriz të shqiptarëve.

Ky bashkim shqiptarësh do ta zëvendësojë qeverinë që ekziston vetëm për pasurimin dhe pushtetin e saj dhe që kontrollohet nga krimi dhe droga me një një qeveri që kontrollohet nga qytetarët shqiptarë. Ky është thelbi i Republikës së Re, të zëvendësojmë pazarin e peshkut që është qelbur nga koka me kontratën morale mes bashkimit më të madh të shqiptarëve në histori dhe një qeverie që do të dalë vetëm nga vota e lirë e qytetarëve shqiptarë.

Pazari i peshkut që u qelb nga koka, që kur ishte ngjalë e u rikthye si peshk në Pazarin e Ri, ka përpirë qindra milionë euro çdo muaj e çdo vit, para të shqiptarëve. Ka përpirë qindra milionë euro çdo muaj e çdo vit para të shqiptarëve. Kjo është arsyeja se pse ekonomia është në faliment. Kjo është arsyeja pse biznesi ka mbyllur qepenat, biznesi i Korçës dhe i mbarë Shqipërisë vuan ditë për ditë. Baza e shkatërrimit të biznesit të vogël është abuzivizmi i një qeverie arrogante dhe një ushtrie taksidarësh mizorë të cilët janë sulur mbi familjet e vetëpunësuara dhe biznesin e vogël që është vetë shtylla e punësimit në Shqipëri.

Biznesi i vogël e di se në republikën e re, asnjë taksidar nuk do të lejohet në premisat e biznesit që afishon pullën e pagesës së detyrimeve të cilat kurrsesi nuk do të kalojnë 1.5 % të xhiros vjetore. Ky do të jetë limiti maksimal i detyrimeve qendrore dhe lokale që paguan biznesi i vogël. Nuk do të ketë pagesë mbi 1.5 % të xhiros. Nuk do të ketë sharlatanë që shpikin taksa siç është kryetari i Bashkisë së Tiranës dhe disa të tjerë që ndjekin shembullin e tij. Qeveria me ligj do të vendosë si kufi maksimal të taksave të biznesit të vogël 1.5 % të cilat do të shlyhen me këste dhe me vetëdeklarim dhe çdokush që i përmbahet këtij rregulli dhe që demonstron pullën përkatëse, ka fituar të drejtën që asnjë taksidar, asnjë inspektor, asnjë punonjës i shtetit të mos i shkojë ndër mendje ti futet biznesit të vogël përveçse si konsumator i biznesit të vogël.

***

Pazari i republikës së vjetër u kurorëzua dje me zgjedhjen e presidentit, me caktimin e presidentit nga pazari i Pazarit të Ri. E dua demokracinë, thotë presidenti i sapo zgjedhur, dhe ja, po e shijoj demokracinë. Por kjo nuk është demokracia e vërtetë. Pazari mbi shishet e verës, që kushtojnë më shumë se pensionet e një qyteti të vogël, për të zgjedhur presidentin nuk është demokraci e vërtetë. Nuk përfaqëson as vullnetin e popullit dhe as gjendjen kritike të përplasjes sociale dhe krizën politike në vend.

Ky është thjesht dhe vetëm kapitulli i fundit i pazarit politik të republikës së vjetër, mekanizmit që ka mbajtur në këmbë dhe ka ushqyer tash 4 vite këtë komplot ekonomik që ka zhveshur shqiptarët nga fuqia blerëse, që ka shpunësuar bijtë dhe bijat e tyre. Që ka bërë prindërit të paguajnë tarifa më të larta për universitetet, që ka dergjur pacientët dhe familjet e tyre në një sistem shëndetësor të falimentuar. Që ka krijuar një shtet të falimentuar, të korruptuar e të inkriminuar deri në palcë.

Ky është akti i fundit i teatrit me kukulla, i pazarit politik, i modelit që mbajti në këmbë republikën e vjetër tash 4 vite. Duke mbyllur njëherë e përgjithmonë jetën e saj me këtë akt politik, republika e vjetër po mbyll turpshëm ekzistencën e saj dhe barrën e saj tashmë të papërballueshme e të padurueshme për qytetarët shqiptarë.

Ilir Meta e di këtë. Edhe Edi Rama e di këtë fare mirë. Ai më kot dhe i dëshpëruar u përpoq të thoshte dje se Ilir Meta është një president më afër PD-së se sa partive të tjera. Le ti themi sot, se për ne, Partinë Demokratike dhe gjithë qytetarët që na besojnë, Ilir Meta është vetëm afër pazarit të peshkut që është qelbur nga koka ndaj Edi Rama ta gëzosh ti, atë, dhe peshkun e qelbur nga koka.

Ne nuk kemi ardhur në këtë betejë për pazare të fëlliqura politike. Ne nuk kemi ardhur në këtë betejë për pushtetin tonë. Ne nuk kemi ardhur në këtë betejë as që tu sigurojmë luksin disa deputetëve të opozitës që ta kenë edhe nga një karrige për 4 vitet e ardhshme. Ne kemi ardhur në këtë betejë për një mision të madh qytetar dhe kombëtar, dhe ky mision është të zëvendësojmë qeverisjen e kontrolluar nga krimi dhe droga me një qeverisje të kontrolluar nga qytetarët shqiptarë.

Që qeverisja të kontrollohet nga qytetarët shqiptarë, ne duhet dhe do të kemi vetëm zgjedhje të lira dhe të ndershme ku shqiptarët të votojnë të pashitur e të pablerë, të pakërcënuar dhe të pavënë në rresht nga një shtet kriminal dhe i dështuar, i bërë njësh me partitë në pushtet. Prandaj e vetmja rrugë për për zgjedhje të lira dhe të ndershme është largimi i Edi Ramës, një qeveri teknike me mandat popullor dhe politik, për të luftuar drogën, për të larguar kriminelët dhe për të garantuar kushtet për zgjedhje të lira dhe të ndershme.

***

Sot, vetë procesi elektoral ka kolapsuar edhe në kuptimin ligjor të fjalës. Mbrëmë në mesnatë, ka skaduar afati i fundit i Kodit Zgjedhor për dorëzimin e listave emërore të kandidatëve për deputetë të atyre partive që ishin regjistruar në Komisionin Qendror të Zgjedhjeve. Bëhet fjalë kryesisht për partitë e pushtetit, për partinë e Edi Ramës dhe partinë e Ilir Metës. Deri tani, asnjë prej këtyre partive kryesore të pushtetit nuk kanë dorëzuar listat emërore të kandidatëve. Me këtë akt, dhe sipas Kodit Zgjedhor të Republikës së Shqipërisë, në këtë moment është asgjesuar 18 Qershori si një datë ligjore për zgjedhje në Republikën e Shqipërisë.

Atë, që kjo lëvizje dhe ky bashkim qytetar, e ka asgjesuar përmes qëndresës demokratike dhe paqësore, atë që ju e keni asgjesuar politikisht mbrëmë në mesnatë, dy partitë duke mos dorëzuar listën e tyre shumëemërore, e kanë asgjesuar edhe ligjërisht. Natyrisht në këto katër vite, jo zbatimi i ligjit por shkelja e tij ka qënë tipari i kësaj qeverisje dhe me siguri tellalët do të dalin sot me lloj-lloj justifikimesh e interpretimesh, se pse data nuk ishte dje, por ishte sot. Nuk kam ndërmend dhe nuk ju ftoj ta ndiqni këtë shfaqje të shëmtuar. Fakti është se data ka skaduar. Fakti është, po kështu, se këta nuk duan tia dinë as për ligj, as për Kod Zgjedhor dhe as për Kushtetutë. Ndaj, është në dorën tonë të vazhdojmë së bashku.

Dy janë mundësitë para nesh.

E para që republika e vjetër të vazhdojë avazin e saj. Asgjë nuk do të ndryshojë. Gjerat do të shkojnë keq e më keq me një tjetër parlament dhe një tjetër qeveri të zgjedhur, jo nga populli, por nga krimi, droga dhe paratë e korrupsionit. Ftesa ndaj opozitës, Partisë Demokratike dhe meje personalisht dhe presioni ndaj nesh ka një qëllim; që të bëhemi pjesë e këtij pazari të fëlliqur, alibi dhe perde për një proces zgjedhor të paracaktuar nga krimi dhe droga.

Ne i kemi thënë jo. Unë i them jo e do të vazhdoj ti them jo deri në fund.

Rruga tjetër para nesh, është të vazhdojmë këtë betejë për votën e lirë, themelin e bashkëjetesës demokratike.

Kjo është një sakrificë tashmë 71 ditore. Unë nuk mund t’ju premtoj se sa më shumë do të zgjasë kjo sakrificë. As nuk mund tu premtoj se mund ta bëj këtë betejë më të lehtë apo më luksoze për ju. Por unë, ju premtoj ju, këtu në këtë shesh, para sakrificës që keni bërë deri më sot, para këtij bashkimi qytetar dhe para Zotit të madh se, në qoftëse jemi të bashkuar, nëse jemi të vendosur, nëse jemi të frymëzuar nga i vetmi interes i lartë patriotik, kombëtar dhe demokratik, për të siguruar me çdo kusht vetëm zgjedhje të lira dhe të ndershme, ne do të fitojmë, ju do të fitoni, Shqipëria do të fitojë.

Eshtë në dorën tuaj, por edhe fitorja do të jetë e juaja dhe e mbarë shqiptarëve. Zoti e bekoftë Shqipërinë. Zoti i bekoftë shqiptarëve.

Mesazhi i Lulzim Bashës në ditën e 71 të protestës për zgjedhje të lira e të ndershme, 29 Prill 2017

Mbrëmë në mesnatë ka kaluar afati ligjor për regjistrimin e listave të kandidatëve për deputetë.

Oerd Bylykbashi, ishte sot pranë Komisionit Qendror të Zgjedhjeve, ku deklaroi se çdo veprim që do të bëhej sot e në vazhdim për regjistrimin e kandidatëve për deputetë është shkelje e ligjit.

Më poshtë, prononcimi i Bylykbashit për mediat.

“Me datë 28 prill në mesnatë ka skaduar afati i regjistrimit për kandidatë në parlamentin e Shqipërisë. Që pas kësaj date, askush nuk mund të regjistrojë më lista. Çdo regjistrim i listave në KQZ do të ishte shkelje e ligjit. Kodi Zgjedhor është shumë i qartë. Listat e kandiatëve të partive politike apo edhe e kandidatëve të pavarur, regjistrohen jo më vonë se 50 ditë para datës së zgjedhjeve. Data e dekretuar e zgjedhjeve është 18 qershor, e cila fillon në orën 00.00 dhe nuk llogaritet në afat, kështu që dita e 50-të përpara kësaj date është data 29 prill në ora 00.00 sot në mëngjes. E për rrjedhojë çdo regjistrim që do të bëhej gjatë ditës së sotme do të ishte i paligjshëm sepse do të ishim para 49-të ditësh e disa orësh. Komisioni Qendror i Zgjedhjeve nuk ka më asnjë mundësi ligjore të regjistrojë lista. Nëse e bën është duke shkelur ligjin. Komisioni Qendror i Zgjedhjeve dhe askush tjetër nuk ka asnjë mundësi ligjore për të ndryshuar Kodin Zgjedhor, për të ndryshuar rregullat. Nëse e bën do të jetë haptazi jo vetëm në një paligjshmëri por haptazi edhe në një veprim të njëanshëm politik e partizan që nuk është aspak çudi me qendrimin që ka treguar deri tani, por kjo do të ishte një paligjshmëri e hapur. E theksoj, nga dita e sotme askush nuk regjistron më lista dhe nga dita e sotme ose më mirë të themi nga mbrëmë në mesnatë ka përfunduar ligjerisht, përveçse politikisht, edhe kjo farsë që u quajtën zgjedhjet e dekretuara më 18 qershor. Praktikisht dhe ligjërisht ka rënë edhe dekreti i Presidentit. E vetmja mënyrë që shqiptarët nga sot e tutje të votojnë të lirë në zgjedhje të lira dhe të ndershme është një marrëveshje gjithëpërfshirëse politike e cila do ti mundësojë ata në një moment tjetër të votojnë me kushte të tjera dhe jo me këto që imponon kjo maxhorancë”.

Prononcim i Oerd Bylykbashit për mediat, 29 Prill 2017

Mesazhi i Lulzim Bashës në ditën e 70 të protestës për zgjedhje të lira e të ndershme

Përshëndetje, vëllezër e motra, të rinj e të reja, të pranishëm në këtë monument 70-ditor të lëvizjes më të madhe popullore, qytetare, kombëtare për demokraci të vërtetë, për zgjedhje të lira dhe të ndershme. Një përshëndetje të veçantë protestuesve nga Vlora, nga gjithë Qarku i Vlorës që gjenden sot këtu me ne.

Keni ndarë ditën e sotme problemet, hallet dhe shqetësimet e mëdha të banorëve të Qarkut të Vlorës. Shumë prej tyre i ngjajnë problemeve që ne dëgjojmë ditë për ditë, të vërtetave të dhimbshme nga anembanë vendit. Por siç e thanë me të drejtë miqtë tanë nga Vlora sot, nëse ka një fjalë që përkufizon marrdhënien e këtij kryeministri në ikje, me qytetin e Vlorës dhe me Qarkun e Vlorës, ajo fjalë është “tradhti”. Tradhtia e Edi Ramës ndaj interesave të qytetarëve shqiptarë nuk shpaloset në asnjë pjesë të territorit më brutalisht sesa në qytetin e Vlorës dhe në Qarkun e Vlorës.

Edi Rama u vu në krye të listës së deputetëve të rilindjes dhe lidhi me ta një kontratë specifike, një kontratë morale me elektoratin shqiptar dhe një kontratë të veçantë me elektoratin vlonjat.

Mos harroni, themeli i marrdhënies mes qytetarëve dhe pushtetit para se të jenë Kushtetuta dhe ligjet, është kontrata morale me elektoratin, kjo është një e vërtetë e lashtë sa vetë koncepti i demokracisë.

Kjo do të thotë se nëse ai që shkel kontratën, që shkel pra zotimet morale me të cilat ka marrë votat, refuzon të përgjigjet përsëri, para votës së lirë dhe të ndershme, anës tjetër të kësaj kontrate, popullit, i lind e drejta e patjetërsueshme ta përmbysë.

Qeverisja jashtë Kushtetutës dhe ligjit është tirani.

Qeverisja në shkelje të kontratës morale me elektoratin, me qytetarët, është diktaturë. Dhe sot, këtë javë të 10-të të protestës dhe lëvizjes tonë të madhe kombëtare për zgjedhje të lira dhe të ndershme është vendi të përsërisim njëzëri se koha kur në Shqipëri tolerohej diktatura e një pakice kundër shumicës ka shkuar për të mos u kthyer kurrë më!

***

Edi Rama dështoi me ekonominë e vendit.

Politikat e tij të rritjes së taksave ndaj qytetarëve dhe ndaj biznesit, rritja e çmimeve të komoditeteve bazë të ekonomisë, si nafta dhe energjia elektrike, represioni i vazhdueshëm i taksidarëve të korruptuar që mbushnin me taksat e qytetarëve shqiptarë xhepat e tyre dhe kontot bankare të bosëve të inkriminuar dhe të korruptuar të rilindjes, kanë shkatërruar ekonominë e Vlorës dhe mbarë Shqipërisë.

Qeverisja e Edi Ramës ka dështuar totalisht të sjellë një ekonomi më të mirë, më të fortë, me më shumë shanse për punësim për vlonjatët dhe mbarë shqiptarët. Në vend të saj, Shqipëria sot ka një ekonomi në rënie, papunësi në rritje, mjerim dhe varfëri që shtrihet nga jugu në veri.

Në majë të këtij kaosi ekonomik qëndron mungesa e besimit të konsumatorëve dhe investitorëve.

Dje, pata nderin të pres në zyrën time, presidentin e “Konfindustria italiane”, z.Paolo Agnelli, i cili përfaqëson 28 mijë kompani të mesme dhe të mëdha të Italisë fqinje. Me turp të madh konstatova, se, isha i vetmi ndër përfaqësuesit e lartë shqiptar që e prisja këtë personalitet. Nga qeveria nuk i kishin kthyer fare përgjigje, fare. Asnjë përgjigje për një njeri që përfaqëson 28 mijë investitorë të një vendi që tash 27 vjet është vendi me investimet e huaja më voluminoze në Shqipëri, që ka transferuar në Shqipëri kapital, vende pune dhe përvojë në të gjitha fushat, nga kuzhina deri tek teknologjia e informacionit dhe inovacionit.

Dhe Edi Rama, i cili gjen kohë të drekojë dhe darkojë me kriminelët me damkë në vilat qeveritare në Vlorë, në Himarë, në Durrës dhe këtu në zyrën e tij, nuk gjen kohë të diskutojë me kreun e Konfindustrias italiane, problemet e mëdha që po shtyjnë dhjetëra investitorë italianë të mbyllin bizneset e tyre në Shqipëri duke larguar qindra-mijëra shqiptarë nga puna, duke i hedhur në mes të katër rrugëve për shkak të taksave të rritura, për shkak të çmimit jokonkurrues të energjisë dhe të naftës në Shqipëri dhe rrethanave të tjera rënduese.

Nuk gjen kohë Edi Rama për dy arsye. Arsyeja e parë është se kjo çështje nuk lidhet me xhepin e tij, nuk lidhet me pasurinë e tij. Kjo është çështje jetike për ekonominë tonë kombëtare, prania dhe kushtet për investitorët italianë, që ka të bëjë me fatet e dhjetëra-mijëra nënave dhe baballarëve në Vlorë, në Durrës, në Shkodër, në Lezhë, anembanë Shqipërisë, që ka të bëjë me mundësinë për të punësuar më shumë apo për të siguruar që ata që janë në punë nuk largohen nga puna, për të kërkuar kushte më të mira pune, për t’i rritur rrogat.

Kjo as nuk i hyn fare në defter Edi Ramës. Sepse Edi Rama dhe pazarit të peshkut që është qelbur nga koka, vetë kupola e republikës së vjetër, ekziston vetëm për një arsye, për t’u pasuruar dhe për të mbrojtur interesat e veta. Për popullin nuk u bëhet vonë, Shqipëria për ta është plaçkë, Vlora për ta është plaçkë.

I shpjegova presidentit Agneli planin tonë ekonomik, që do të nxjerrë Shqipërinë nga kriza, duke krijuar një klimë konkuruese për investitorët e huaj dhe biznesin shqiptar, me taksën e sheshtë 9%, me çmime konkuruese të komoditetit bazë, si energjia dhe nafta, të cilat në Shqipëri nën qeverisjen e re, të Republikës së Re, do të kenë çmimin më të ulët dhe konkurues në rajon. I fola për vendosmërinë tonë, për të aplikuar metodat europiane të administrimit fiskal duke futur në kazerma ushtrinë abuzive të taksidarëve, duke i mundësuar biznesit të vogël që të vazhdojë aktivitetin i pashqetësuar vetëm me ekspozim të pullës së pagimit të detyrimeve vjetore me vetëdeklarim, si dhe duke garantuar në mënyrë të plotë dhe të gjithanshme rend dhe siguri, në rrugët dhe sheshet e Shqipërisë si një parakusht për klimën e biznesit.

Dhe këtu zbulohet edhe arsyeja e dytë, vëllezër dhe motra.

Arsyeja e parë pse Edi Rama nuk gjen kohë ta presë presidentin e Confindustrias është sepse nuk i bëhet vonë për asgjë tjetër, përveç xhepave të tij. Arsyeja e dytë, është, sepse në subkoshiencën e tij, Edi Rama e di se është kryeministri në largim, kryeministri i papërgjegjshëm në largim. Ka nisur të sillet që tani si opozitë e papërgjegjshme, ndërkohë që ne, opozita juaj, opozita e qytetarëve shqiptarë, që sot, po marrim përgjegjësitë për qeverisjen e nesërme të Republikës së Re.

***

Tradhëtia është sot fjala që u shkon ndër mend shumicës dërrmuese të një pjesë të shqiptarëve me bindje të majta, që më kot besonin dhe shpresonin se Edi Rama e ka me të vërtetë kursin e reformave në Shqipëri. Sot është provuar se reformat që Edi Rama i ka në majë të gjuhës, nuk janë gjë tjetër veçse pjesë e teatrit të kukullave që është luajtur tash 4 vjet.

Edi Rama nuk do reforma dhe nuk ka dashur kurrë reforma, sepse Edi Rama nuk do një Shqipëri të reformuar, por një Shqipëri plaçkë dhe çiflig të tij, të cilin mund ta grabisë me konçesione dhe tendera, me leje ndërtimi, ta mbushë me drogë dhe të bëjë pazar me gjithçka dhe çdo gjë që ky vend ka duke përfshirë zyrën e kreut të shtetit, funksionin e Presidentit të Republikës.

Ndaj sot, më shumë se në çdo ditë tjetër, në këto 70 ditë, edhe më skeptikët, edhe më kritikët ndaj kësaj çadre dhe lëvizjes së pamposhtur qytetare që ajo përfaqëson, e kuptojnë, se ajo që ne kemi thënë prej ditës së parë, është e vërteta dhe e drejta. Se Shqipërinë, Edi Rama e do për plaçkë, zgjedhjet i do për fasadë, opozitën e do për alibi, që të vazhdojë pazaret për të nxjerrë në treg gjithçka ky vend ka. Zyra, funksione, ministrat, Presidentin, gjithçka, përveç karrikes së tij me të cilën ka lidhur pazgjidhshmërisht ekzistencën politike në bashkëpunim me krimin dhe drogën.

Ndaj, sot shpaloset fare qartë, para çdo shqiptari e në veçanti para atyre të majtëve stoikë, që akoma besonin se me Edi Ramën Shqipëria do të reformohej, se Edi Rama përfaqëson kërcënimin më të madh, kërcënimin më real ndaj shpresave të çdo shqiptari të majtë dhe të djathtë, për liri, mundësi, progres dhe jetë të ndershme me djersën e ballit në vendin e vet.

Dita e sotme konfirmon katërcipërisht se këta konsiderojnë gjiçka plaçkë të tyre. Konsiderojnë gjithçka çifligun e tyre. Këtu është katandisur demokracia fasadë me kupolën e Edi Ramës dhe Ilir Metës.

Këtu ka përfunduar posti i Presidentit të Republikës që pasi i hoqën me ligj çdo kompetencë dhe e shndërruan në një zyrë me më pak fuqi veprimi se drejtori i postës në Vlorë, tani e trajtojnë si një rifuxhio, si një plaçkë për të kënaqur orekset e njëri-tjetrit dhe për të mbyllur pazarin e pisët me anë të të cilit mendojnë se do të asgjesojnë demokracinë shqiptare.

Edi Rama ka dështuar me eknonominë, Edi Rama ka dështuar me arsimin, Edi Rama ka dështuar me shëndetësinë, Edi Rama që solli kriminelët në pushtet ka dështuar të zbatojë ligjin për dekriminalizimin. Edi Rama është autor i mbushjes së Shqipërisë me drogë dhe sot Edi Rama ka firmosur edhe dështimin e tij total për reformën në drejtësi, që e përdori si kalë beteje, si alibi për dështimin e tij të madh kombëtar.

Kontrata morale me elektoratin është kthyer në kontratën amorale që elektorati shqiptar përgatitet ta grisë, në rastin më të parë, me zgjedhje të lira dhe të ndershme. Edi Rama e di këtë fare mire. Ai e di fare mirë se me zgjedhje të lira dhe të ndershme do ta ketë të pamundur t’u diktojë qytetarëve, dicka tjetër përveç gjykimit të tyre të drejtë, me votë të lirë. Ndaj dhe, gjithë përpjekja e tij bëhet për të shmangur orën e gjykimit të ndershëm  popullor.

Sot në këtë ditë të 70-të, është rasti t’i përsërisim se, tani që dështimi i tij me ekonominë, me arsimin, me shëndetësinë, me rendin, me sigurinë, me drejtësinë, me dekriminalzimin, është shpalosur ashiqare, tani që ka vendosur karriken e tij si pengesën e vetme midis këtij populli të tërë, që kërkon zgjedhje të lira dhe të ndershme dhe një kupole kriminale që bën pazar me gjithçka dhe që trajton Shqipërinë si plaçkën e tij, ti përsërim se; rruga e vetme e shpëtimit për të, është qeveria teknike si garante e zgjedhjeve të lira dhe të ndershme, duke zbatuar dekriminalizimin, duke luftuar drogën duke implementuar reformën zgjedhore përfshirë votimin elektronik dhe numërimin elektronik dhe, që orën e parë të qeverisë teknike, vetingun që bën sikur e do, por që i trembet, i trembet si vampiri dritës së diellit.

Ja pra ora e të vertetës është ulur këmbëkryq në këtë shesh.

Kush e do vetingun e vërtetë dhe zgjedhjet e lira dhe të ndershme, bashkohet me  këtë rrugë, si e vetmja rrugë, për zgjedhje të lira dhe të ndershme, dhe vetingun e vërtetë.

Qeveri teknike, dhe ditën e parë të kësaj qeverie, vetingun e vërtetë dhe rrugën drejt demokracisë së vërtetë. Ne e dimë dhe ju e dini shumë mirë pse Edi Rama nuk e bën këtë, pse Edi Rama refuzon ofertën qytetare për një zgjidhje me dialog.

Frika e tij ka si motiv mijëra gjëma e bëma për të cilat nuk ka nevojë t’i hamendësoni,  por janë shpalosur këtu në këtë shesh, janë shpalosur anembanë Shqipërisë dhe sot, janë faqosur në mediat kryesore të botës nga Uashingtoni në Bruksel. Këto janë ankthet, frikat,  arsyeja e vërtetë pse Edi Rama nuk pranon as vetingun e vërtetë, as zgjedhjet e lira dhe të ndershme.

Por rruga e çmendur, në të cilën kërkon ta fusë Shqipërinë, është një rrugë qorre. Në këtë rrugë, ku ai dëshiron të tërheqë një popull të tërë me zgjedhje pa alternativë, pa opozitë, në votime të diktuara nga krimi. Eshtë rruga e shkatërrimit të demokracisë dhe instalimit institucional të tiranisë së krimit, drogës dhe korrupsionit.

27 vite më parë, Shqipëria u ngrit në këmbë për të braktisur një herë e mirë këtë rrugë që e coi kombin tonë, Shqipërinë tonë drejt falimentimit. Liria, demokracia e vërtetë, për të cilën ekziston kjo lëvizje populore, nuk ka çmim! Dhe  të ndërgjegjshëm e të vetëdijshëm për këtë, dua ti them fare qartë sot Edi Ramës se, në asnjë mënyrë, në asnjë formë dhe në asnjë moment nuk do të lejojmë të marrësh peng demokracinë shqiptare dhe të drejtën sublime për zgjedhje të lira e të ndershme.

Koha e përballjes po afron, shqiptarët janë të bashkuar e po bashkohen nga ora në orë, nga dita në ditë. Ky bashkim popullor është forca e vetme, që do të ndalë komplotin ekonomik, politik kundër shqiptarëve. Ky bashkim popullor i vendosur, paqësor, por i pathyeshëm, është garancia e vetme e Republikës së Re që po vjen. Asgjë nuk do ta ndalë.

Zoti është me të drejtën. Zoti është me shqiptarët. Zoti është me Shqipërinë. Fitorja po afron.

Bashkëbisedim për problematikat e Qarkut të Vlorës, për zhgënjimet e vlonjatëve, kërkesat dhe shqetësimet e tyre, papunësia në rritje, dhe dëmtimi i turizmit

Në ditën e 70-të të protestës për zgjedhje të lira e të ndershme në Sheshin e Lirisë, qytetarë të Vlorës bashkëbiseduan me kryedemokratin Lulzim Basha për qeverisjen e rilindjes, në këto katër vjet.

Duke pasur kryeministrin e vendit si deputetin e parë të qarkut, vlonjatët i kërkuan dy herë llogari për atë që vetë qytetarët e quajnë si gangrenën e qytetit bregdetar, Lungomare-n.

Brikena Danaj dhe Ada folën për problemet e shumta që sjell Lungomare për qytetarët, bizneset dhe turistët. Prej dy vitesh, Lungomare ka paralizuar bizneset e ndodhura përgjatë rrugës  ende të papërfunduar.

Pas pak ditësh në Vlorë do të çelet edhe sezoni turistik.

Por përpos problemit të shkaktuar nga Lungomare, qytetarët denoncuan mungesën e furnizimit me ujë të pijshëm dhe energji elektrike në Orikum, Zvërnec dhe zona të tjera me vlera turistike dhe arkeologjike. Mungesa e infrastrukturës rrugore, vështirëson edhe punën e agjensive turistike për të bërë të mundur turizmin kulturor dhe arkeologjik, të cilin, Vlora e ka pothuajse plotësisht të pashfrytëzuar.

Robert Bega nga Orikumi një pjesë të fajit për këtë e shpjegoi me reformën administrative të ndërmarrë nga Rilindja. Përpara saj Orikumi ishte bashki më vete me të ardhurat e saj të cilat në sezonin turistik arrinin shifrën 1 miliard lekë. Prej dy vitesh që Orikumi është përfshirë në Bashkinë e Vlorës, investimet janë zero.

Alketa Agolli, nënë e tre fëmijëve  tha se këto katër vite qeverisje do të mbeten në mendjen e vlonjatëve si qeveria e varfërimit të shqiptarëve. Ajo foli për frikën që ndjen për vajzat e saj dhe të ardhmen e tyre.

Rikard Dervishalliaj, student nga qyteti i Vlorës tha se edhe pse është i ri, përsëri do një kryeminsitër që i vesh, arsimon, paguan dhe kuron më mirë gjatë qeverisjes së tij, sesa të pyesë qytetarët si janë me hashashin, si i kanë gratë apo në fund t’i quaj qenër apo dele.

Enida Cami, mbesa e një familje të persekutuarish në Tiranë gjatë periudhës së komunizmit, në emër të unionit kombëtar të të përndjekurve politik, në emër të unionit artistik kombëtar shqiptar dhe në emër të familjes së Skënder Camit, të persekutuar nga regjimi komunist, mbështetjen e solli nga një thënie e Aristotelit: Do e them të vërtetën troç, edhe sikur të jetë kundër meje, pasi koha do të vijë që edhe të tjerat ta përqafojnë.

Lulzim Basha i tha qytetarëve të Vlorës, se një pjesë e mirë e problemeve të tyre, ata i ndajmë me të gjithë shqiptarët kur vjen puna tek ekonomia dhe mbështetja sociale. Por vlonjatët kanë një lidhje edhe më të ngushtë me kryeminsitrin, i cili në 2013-ën i premtoi vlonjatëve se nuk do t’i braktiste kurrë.

“Si e thanë me të drejtë miqtë tanë nga Vlora sot, nëse ka një fjalë që përkufizon marrdhënien e këtij kryeministri në ikje, me qytetin e Vlorës dhe me Qarkun e Vlorës, ajo fjalë është tradhti. Tradhtia e Edi Ramës ndaj interesave të qytetarëve shqiptarë nuk shpaloset në asnjë pjesë të territorit më brutalisht sesa në qytetin e Vlorës dhe në Qarkun e Vlorës. Edi Rama u vu në krye të listës së deputetëve të rilindjes dhe lidhi me ta një kontratë specifike, një kontratë morale me elektoratin shqiptar dhe një kontratë të veçantë me elektoratin vlonjat. Mos harroni, themeli i marrdhënies mes qytetarëve dhe pushtetit para se të jenë Kushtetuta dhe ligjet, është kontrata morale me elektoratin, kjo është një e vërtetë e lashtë sa vetë koncepti i demokracisë. Kjo do të thotë se nëse ai që shkel kontratën, që shkel pra zotimet morale me të cilat ka marrë votat, refuzon të përgjigjet përsëri, para votës së lirë dhe të ndershme, anës tjetër të kësaj kontrate, popullit, i lind e drejta e patjetërsueshme ta përmbysë”.

Zoti Basha tha se kryeministri Rama edhe pse gjen kohën të darkojë në vila qeveritare me klientët e tij, me të cilët ndan llokmat e pasurisë në kurriz të shqiptarëve, refuzon të presë në takim kreun e konfindustrisë italiane, për të diskutuar mbi problemet që po shtyjnë bizneset e vogla dhe të mesme drejt mbylljes së qepenave dhe shqiptarët gjithmonë e më shumë drejt papunësisë dhe varfërisë.

“Dje pata nderin të pres në zyrën time, presidentin e Konfindustria italiane , z.Paolo Agnelli, i cili përfaqëson 28 mijë kompani të mesme dhe të mëdha të Italisë fqinje. Me turp të madh konstatove se isha i vetmi ndër përfaqësuesit e lartë shqiptare që e prisja këtë personalitet, nga qeveria nuk i kishin kthyer fare përgjigje, fare.

Një njeri që përfaqëson 28 mijë investitorë të një vendi që tash 27 vjet është vendi me investimet e huaja më voluminoze në Shqipëri, që ka transferuar në Shqipëri kapital, vende pune dhe përvojë në të gjitha fushat, nga kuzhina deri tek teknologjia e informacionit dhe inovacionit.

Edi Rama nuk gjente kohë të diskutonte me kreun e Konfindustrias italiane problemet e mëdha që po shtyjnë dhjetëra investitorë italianë të mbyllin bizneset e tyre në Shqipëri duke larguar qindra-mijëra shqiptarë nga puna, duke i hedhur në mes të katër rrugëve për shkak të taksave të rritura, për shkak të çmimit jokonkurues të energjisë dhe të naftës në Shqipëri dhe rrethanave të tjera rënduese”.

Kreu demokrat Basha i tha qytetarëve se pazaret në kurriz të qytetarëve nuk janë në interes të republikës së re e cila po përgatitet me përgjegjshmëri për të hedhur themelet e drejtësisë.

“Ka nisur të sillet që tani si opozitë e papërgjegjshme ndërkohë që ne, opozita juaj, opozita e qytetarëve shqiptarë, që sot po marrim përgjegjësitë për qeverisjen e nesërme të Republikës së Re.

I shpjegova presidentit Agneli planin tonë ekonomik, që do të nxjerrë Shqipërinë nga kriza, duke krijuar një klimë konkuruese për investitorët e huaj dhe biznesin shqiptar, me taksën e sheshtë 9%, me çmime konkuruese të komoditetit bazë, si energjia dhe nafta, të cilat në Shqipëri nën qeverisjen e re, të Republikës së Re, do të kenë çmimin më të ulët dhe konkurues në rajon.

Për vendosmërinë tonë, për të aplikuar metodat europiane të administrimit fiskal duke futur në kazerma ushtrinë abuzive të taksidarëve, duke i mundësuar biznesit të vogël që të vazhdojë aktivitetin i pashqetësuar vetëm me ekspozim të pullës së pagimit të detyrimeve vjetore me vetëdeklarim dhe duke garantuar në mënyrë të plotë dhe të gjithanshme rend dhe siguri, në rrugët dhe sheshet e Shqipërisë si një parakusht për klimën e biznesit”.

Lulzim Basha kujtoi se e hap i parë drejt arritjes së standarteve europiane të demokracisë dhe lirisë, janë zgjedhjet e lira dhe të ndershme përmes një qeverie teknike.

Partia Demokratike u informua sot nga aleatët opozitarë për qendrimin e sotëm të ambasadores së BE në Tiranë, Romana Vlahutin, sikur Partia Demokratike gjatë pranisë së ndërmjetësuesve europianë në Tiranë ditën e martë, nuk pranoi propozimet e tyre dhe se nuk paraqiti kundërpropozime apo ofertë tjetër.

Partia Demokratike konstaton me keqardhje të thellë se ky është një shtrembërim total i të vërtetës, dhe fshehje e fakteve.

Pas paraqitjes të propozimit për zëvendësimin e 4 ministrave të qeverisë Rama me persona teknikë dhe shtyrjen e zgjedhjeve për datën 16 korrik, Partia Demokratike në emër të Opozitës së Bashkuar paraqiti një kundër-propozim me 3 pika, me qëllim arritjen e një kompromisi mes palëve:

1. Ofertën që kryeministri i qeverisë teknike të propozohej nga mazhoranca aktuale.

2. Përsa i përket datës së zgjedhjeve, oferta e PD ishte që të eksplorohej nëse zgjedhjet me votim elektronik, biometrik dhe numërimi elektronik do të mund të realizoheshin brenda tetorit. Nëse kjo do të rezultonte teknikisht e pamundur, të punohej për identifikimin biometrik të votuesve dhe numërimin elektronik të votës.

3. Partia Demokratike rikonfirmoi qendrimin e bërë publik prej 10 javësh se menjëherë pas formimit të qeverisë teknike, opozita do të kontribuonte në parlament për zbatimin e plotë të procesit të Vetingut dhe reformës në drejtësi.

Pas paraqitjes së kësaj oferte për kompromis, Partia Demokratike u informua se Edi Rama e refuzoi këtë ofertë, duke cuar në përfundimin pa sukses të përpjekjes për ndërmjetësim.

Partia Demokratike shpreh shqetësimin e thellë për dezinformimin e partive të vogla parlamentare nga ana e ambasadores Vlahutin dhe thekson se qëndrime të tilla qartazi të njëanshme dhe dezinformuese nuk i shërbejnë aspak zgjidhjes së krizës, por përkundrazi ndihmojnë në thellimin e saj.