Blog

Mirëmbrëma zonja dhe zotërinj,

 

Vëllezër dhe motra,

 

Mirëse ju gjej në sheshin e lirisë, në sheshin e fitores!

 

E di se jo vetëm protestuesit e pranishëm sot, por cdokush po pret lajme nga zemra e demokracisë, nga Uashingtoni, nga Shtetet e Bashkuara të Amerikës. Kam kaluar pak më shumë se 48 orë në zemrën  e demokracisë dhe lirisë, në kryeqytetin e Shteteve të Bashkuara të Amerikës, dhe më duket sikur jam shkëputur për një kohë të gjatë nga ju dhe nga ky shesh i lirisë, ndaj nga zemra dua t’u përgëzoj dhe t’u them edhe unë me mall: mirësejugjej në këtë shesh të lirisë dhe të fitores!

 

Sesioni i sotëm që kemi zgjedhur, do të analizojë një nga mesazhet më të rëndësishme të administratës amerikane, raportin e Departamentit të Shtetit.

 

Por, para se ta bëjmë këtë, në praninë e qytetarëve, të rinjve dhe të rejave, të pedagogëve që shikoj këtu, më lejoni t’u sjell tre mesazhe kryesore. Mesazhet kryesore, të një vizite, të një pritje të jashtëzakonshme që më është ofruar jo thjesht si Lulzim Basha, jo thjesht si drejtuesi i opozitës, por në radhë të pare, si ushtar i kësaj kauze të madhe popullore për zgjedhje të lira dhe të ndershme.

 

Nga takimi im i parë, mbrëmjen e së martës deri tek takimi i fundit, pasdrekën e së premtes, me përfaqësuesit më të lartë të Partisë Republikane, të Senatit të Shteteve të Bashkuara të Amerikës, të Kongresit Amerikan dhe po, të bashkëpunëtorëve të Presidentit Trump në Shtëpinë e Bardhë, mesazhi i parë është mesazhi i përgëzimit për qytetarët shqiptarë, për këtë qëndresë të jashtëzakonshme, për këtë zgjim, për këtë kauzë të madhe, që i ndan kombet në të civilizuara dhe të pacivilizuara, në të lira dhe në të robëruara, në të forta dhe në të dobëta, në liridashëse dhe të nëpërkëmbura: kauzën e zgjedhjeve të lira dhe të ndershme, kauzën e demokracisë, kauzën e lirisë.

 

Përgëzimet vijnë drejtpërdrejt, jo për mua, por për gjithësecilin prej jush që jeni në këtë betejë epike, historike, që do të ketë vetëm një përfundim, fitoren tuaj, fitoren e Shqipërisë, fitoren e demokracisë.

Mesazhi i dytë, i sinqertë, që buron drejtpërdrejt, jo nga kalkulimet politike të aleatëve tanë strategjikë, por nga bindja e tyre më e thellë, e këtij brezi drejtuesish dhe politikanësh në Kongres, në Senat, në Shtëpinë e Bardhë dhe dhjetra brezave para tyre, që e dinë fare mirë kuptimin e kësaj lufte në historinë e tyre, pra mesazhi i dytë, që ua kam premtuar bashkëbiseduesëve të mi, politikanëve më të lartë të Shteteve të Bashkuara të Amerikës që takova në Uashington se do ta përcjell besnikërisht këtu në këtë çadër, është: falenderimi për ju!

 

Jo thjesht si njerëz që ngriheni për të drejtën tuaj për zgjedhje të lira e të ndershme, por si një armatë e vërtetë që luftoni për liri këtu në këtë front, ku ajo është e kërcënuar nga krimi i organizuar, nga droga, nga paratë e pista që nesër mund të financojnë terrorizmin, dhe e kërcënuar nga nomenklatura e ish komunistëve anti-amerikanë dhe stalinistë të Tiranës. Falenderime për ju sepse beteja për lirinë zhvillohet kudo, zhvillohet kudo ku ajo është e kërcënuar. Dhe këtu kjo betejë luftohet jo vetëm për lirinë e Shqipërisë po për lirinë e çdo kombi të nëpërkëmbur, të dhunuar, të robëruar, të cilit i kërcënohet e drejta e votës, e drejta e lirisë së mendimit, e drejta e lirisë së shprehjes. Prandaj, mesazhi i dytë që ju sjell nga Uashingtoni, janë falenderimet e Amerikës mike dhe aleate për qëndresën tuaj, për betejën tuaj.

 

Mesazhi i tretë, është mesazhi i mbështetjes totale të miqve tanë! Mbështetjes politike, mbështetjes parimore dhe morale dhe po, mbështetjes së gjithanshme për Partinë Demokratike të Shqipërisë, nga ekipi fitues i Presidentit Trump, jo vetëm për këtë betejë, por edhe për zgjedhjet që do të vijnë, për zgjedhje të lira e të ndershme, me një qeveri teknike. Partia Demokratike dhe opozita shqiptare do të kenë ekspertizën dhe ndihmën e ekipit fitues në zgjedhjet e Shteteve të Bashkuara të Amerikës.

 

Beteja jonë ka hyrë në një fazë vendimtare. Në fazën kur vendosmëria, kurajo dhe besimi në kauzën e zgjedhjeve të lira dhe të ndershme do të përcaktojnë të vetmin përfundim të kësaj beteje. Ka një, dhe vetëm një përfundim. Largimin e Edi Ramës, një qeveri teknike që do të garantojë zgjedhje të lira dhe të ndershme.

 

Me forcën tuaj, me bekimin e Zotit dhe me ndihmën e miqve tanë amerikanë, ne patjetër do t’ia dalim. Kam ardhur me zemrën plotë, me besim në fitoren e jashtëzakonshme të kauzës sonë, në Uashington, në Bruksel dhe anembanë botës së lirë dhe demokratike, dhe dua ta ndaj me ju, bashkëluftëtarët e kësaj beteje, besimin tonë total se kësaj beteje, që i kemi dhënë zemrat tona, shpatullat tona, prej ditës së parë, do t’i dalim në krye, do ta fitojmë për Shqipërinë, do ta fitojmë për Europën, për Shtetet e Bashkuara të Amerikës.

 

Read More

VOA: Basha mire se erdhët.

Basha: Mirë se ju gjeta!

VOA: Basha, sot presidenti dekretoi datën e zgjedhjeve në kavajë, a do të merrni pjesë ju në to?

Basha: Qëndrimi i Partisë Demokratike dhe i gjithë opozitës është shprehur tashmë. Partia Demokratike, opozita dhe shumica dërrmuese e qytetarëve shqiptarë që prej 18 shkurtit ndodhen në një lëvizje popullore, qytetare, kombëtare dhe demokratike për zgjedhje të lira dhe të ndershme, as nuk do të pranojnë, as nuk do të lejojnë zgjedhje farsë, zgjedhje me krimin, zgjedhje me drogën.

Dhe për këtë, kusht i patjetërsueshëm është largimi i Edi Ramës dhe formimi i një qeverie teknike me vullnet të të gjitha forcave politike, që do të mundësojnë krijimin e kushteve për zgjedhje të lira dhe të ndershme, duke zbatuar Ligjin për Dekriminalizimin, dhe duke luftuar influencën e krimit të organizuar dhe parave të pista të drogës.

VOA: Do të ndalemi pak më gjatë në qëndrimin e opozitës, por le të ndalemi fillimisht tek synimi i kësaj vizite, për të cilën ishit këtu në Uashington.

Basha: Po, jam i ftuar këtu, jam mirëpritur nga udhëheqësit republikanë të Kongresit dhe të Senatit. Kam takuar krerët e komisioneve relevante, Komisionit të Jashtëm, të Komisionit të Sigurisë Kombëtare, një numër të madh senatorësh dhe kongresmenësh të cilët merren drejtpërdrejt me politikën e jashtme të Shteteve të Bashkuara, si edhe bashkëpunëtorë të nivelit të lartë të administratës Trump, ku kemi diskutuar për gjendjen në Shqipëri, për zhvillimet politike në Shqipëri, për impaktin që ka kriza politike dhe në veçanti krimi i organizuar, paratë e drogës dhe influenca e tyre mbi procesin politik në Shqipëri, jo thjesht për popullin shqiptar dhe Shqipërinë, por për rajonin në tërësi dhe interesat gjeostrategjike të Shqipërisë dhe Shteteve të Bashkuara të Amerikës.

 

Dua të ndaj sot me kënaqësi të jashtzakonshme nga kjo studio e juaj, lajmin e shkëlqyer me qytetarët shqiptarë,  jo thjesht me protestuesit të cilët i përshëndes këtu nga Uashingtoni nga studio e Zërit të Amerikës, lajmin për mbështetjen që kam marrë nga të gjithë bashkëbiseduesit nga të gjitha nivelet e administratës Trump, të Kongresit dhe të Senatit, për kauzën e drejtë të zgjedhjeve të lira dhe të ndershme, dhe për betejën e qytetarëve shqiptarë për të mos lejuar asnjë standard tjetër përveç standardit europian dhe euroatlantik në proçesin e ardhshëm zgjedhor.

VOA: Çfarë prisni ju nga zyrtarët amerikanë? Çfarë ndihme prisni prej tyre? Çfarë mbështetje prisni ju prej tyre për zhvillimet në Shqipëri, pasi problemet që keni ju në vendin tuaj besoj, ka ardhur koha tashmë që mos ta zgjidhin të huajt, apo jo?

Basha: Jo, nuk presim zgjidhjen nga të huajt, sepse po të prisnim zgjidhje nga të huajt nuk do të ishim në këtë ditë të 35-të të një proteste të paprecedentë, non-stop. Ka rëndësi informimi ashtu siç duhet i qendrave kryesore të aleatëve tanë strategjikë, të Uashingtonit, të Brukselit dhe partnerëve tanë, sepse për fat të keq, me futjen edhe të parave të narkomafias shqiptare është investuar fuqishëm në keqinformimin, si të publikut ndërkombëtar, ashtu edhe të qendrave të vendimmarrjes politike. Prania ime këtu është një prani në vazhdim, unë kam qenë këtu para disa javësh me rastin e inaugurimit të Presidentit Trump.

VOA: A e vini ju në dyshim mënyrën se si funksionon qeveria amerikane, ka një ambasadë jo të vogël në Shqipëri. A e vini ju në dyshim informacionin që u jep ambasada politikëbërësve në Uashington?

Basha: Jo nuk ka të bëjë kjo, sepse është çështje e komunikimit diplomatik midis ambasadës dhe Departamentit të Shtetit.  E kam fjalën për lobistët e paguar me paratë e narkomafias shqiptare, të cilët veprojnë në Uashington, në Bruksel, në Berlin, në Londër, për të fshehur të vërtetat e hidhura të Shqipërisë, dhe për të keqinformuar aleatët tanë.

Për fat të mirë, një nga meritat e mëdha të protestës së 18 shkurtit që vazhdon, është që është çjerrur kjo vello e paguar me paratë e drogës dhe narkomafias shqiptare. Dhe qendrat kryesore të politikëbërjes shohin me tronditje të madhe se si në  qeverisjen e Edi Ramës, Shqipëria është shndërruar në një bazë kryesore të furnizimit të Europës jo vetëm me marijuanë por edhe me heroinë dhe kokainë. Se si shteti ligjor është zhbërë, bashkë me garancitë për liritë dhe të drejtat e njeriut, dhe se si, procesi demokratik është asgjesuar, jo nga një parti politike, jo nga socialistët shqiptarë, por nga kriminelët me damkë, të dënuar për vepra të rënda të krimit të organizuar që sot bën ligjin në shtetin shqiptar dhe brenda Partisë Socialiste të Shqipërisë.

Ky është një realitet që sot njihet nga të gjithë dhe konstatohet si problemi kryesor për të ardhmen e Shqipërisë. Këtu në Uashington, sikundër edhe në Europë, e ardhmja e Shqipërisë shihet si e ardhmja e një vendi në Bashkimin Europian, por pengesa kryesore që Shqipëria të anëtarësohet në BE, që të hapen negociatat për anëtarësim, diçka që ShBA e mbështet plotësisht, diçka për të cilën Partia Demokratike ka luftuar si në qeverisje ashtu edhe në opozitë sot dhe do të luftojë fuqishëm edhe nesër, pengesa kryesore pra është kriminalizimi total i shtetit dhe kërcënimi që krimi i organizuar dhe  paratë e drogës perbëjnë për zgjedhje të lira dhe të ndershme.

VOA: Pa dyshim, konstatimet tuaja mund të jenë mëse të drejta, mëse të sakta, por unë do t’ju pyes për diçka tjetër. Kërkesa juaj për qeveri teknike është hedhur poshtë nga kryeministri, i cili ka theksuar se në zgjedhjet e 18 qershorit, do të shkohet edhe pa opozitën. Nëse nuk plotësohet kërkesa juaj për qeveri teknike dhe zgjedhjet zhvillohen në datën që janë dekretuar më 18 qershor, a do të merrni ju pjesë në to?

Basha: Nuk do të ketë zgjedhje pa opozitën dhe nuk do të lejojmë, as opozita, as qytetarët, zgjedhje fasadë, zgjedhje farsë.

VOA: Më falni, nuk do të ketë zgjedhje pa opozitën, nuk e përcaktoni ju.

Basha: Sigurisht, këtë e përcaktojnë qytetarët shqiptarë. Qytetarët shqiptarë kanë folur qartë më 18 shkurt. Po flasin ditë për ditë dhe natë për natë, pa censurë, nga ai shesh i lirisë.

VOA: Ata janë pjesa që ju mbështet ju, pjesa tjetër nuk bëhet pjesë.

Basha: Nuk do të thoja se Dritan Hila apo Artan Fuga janë militantë të Partisë Demokratike, po përmend dy emra, po ka me qindra e me mijëra të cilët nuk kanë asgjë të përbashkët me programin tonë elektoral, por që thonë; zgjedhje me krimin në pushtet, zgjedhje pa dekriminalizuar shtetin shqiptar, nuk mund të ketë.

VOA: A mendoni se ka mekanizma Partia Demokratike për t’i bllokuar zgjedhjet?

Basha: Sigurisht që po. Të gjitha mekanizmat paqësore për të mos lejuar një proces farsë dhe këto mekanizma ne do t’i shpalosim hap pas hapi në varësi të situatës politike në vend. E sigurtë eshtë një gjë, dhe ky është një mesazh i qartë që sot e përsëris nga Uashingtoni: zgjedhje me krimin, zgjedhje me drogën, zgjedhje me Edi Ramën kryeministër nuk do të ketë.

VOA: Dakord me ju, ndahem teknikisht. Por edhe njëherë të kthehemi, zgjedhjet janë dekretuar nga Presidenti më 18 qerhsor, zgjedhjet mund të organizohen nga institucionet përkatëse, KQZ, qeveria, etj. Nëse zgjedhjet zhvillohen, a do të marrë pjesë PD apo jo?

Basha: Nuk do të zhvillohen zgjedhjet. Unë ju garantoj që zgjedhje fasadë nuk do ketë. Nuk mund të ketë një proces demokratik, votime po, ka pasur 50 vjet votime në Shqipëri, por nuk ishin zgjedhje.

VOA: Por kishte?

Basha: Votime po, zgjedhje jo.

VOA: Pasojat janë të tjera gjëra, por votime mund të zhvillohen.

Basha: Proces farsë në Shqipëri nuk mund të zhvillohet, ky është zotimi ynë. Dhe së bashku me qytetarët shqiptarë jemi të gatshëm të ndërmarrim të gjitha veprimet demokratike dhe paqësore…

VOA: Pra ju nuk pranoni të thoni që nëse zgjedhjet do të zhvillohen ju nuk do të merrni pjesë?

Basha: Jo, e kam sqaruar njëherë e mirë këtë. Nuk do ketë bojkot, por nuk do të ketë zgjedhje të diktuara nga krimi dhe nga droga.

VOA: Nuk do të zgjedhje se keni ju në dorë… nëse do të ketë zgjedhje, qoftë edhe nga ato që mund të jenë farsë, ju do merrni pjesë apo jo?.

Basha: Nëse ka përjekje për zgjedhje fasadë, PD dhe qytetarët do bëjnë atë që i takon çdo shoqërie të civilizuar; do të ndalë një maskaradë të tillë, dhe do t’u japin shqiptarëve, në një mënyrë apo në një mënyrë tjetër, zgjedhje të lira dhe të ndershme. Nuk mund të ketë bojkot, sepse nuk mund të ketë zgjedhje fasadë, zgjedhje me krimin, dhe njëherë e përsëris. Eshtë me rëndësi që këtë mesazh e jap sot, në këtë ditë në 35 të protestës, dhe e jap këtu nga Uashingtoni pas takimeve me krerët më lartë, me udhëheqësit më të lartë të Kongresit, të Senatit.

VOA: Historia e Shqipërisë në të kaluarën në këto 20 e ca vite demokraci me zgjedhje pluraliste ka treguar se palët shkojnë buzë greminës, deri në minutën e fundit dhe pastaj gjendet një marrëveshje, gjendet një formë zgjidhjeje dhe situata zhbllokohet. A shikoni ju një lloj zgjidhje të mundshme, përveç kërkesës maksimale për qeveri teknike?

Basha: Zgjidhja që ne kemi propozuar është zgjidhja e vetme në këto kushte. Mos harroni që ne për një vit, u munduam ta zgjidhim me Edi Ramën kryeministër, me këtë koalicion, duke propozuar paketën e majit të vitit 2016, paketën e zgjedhjeve të lira dhe të ndershme, përfshirë votimin elektronik. Duke propozuar në korrik kalimin në të njëjtën kohë me paketën kushtetuese për reformën në drejtësi, edhe largimin e të gjitha pengesave ligjore, pikërisht për votimin elektronik, biometrik dhe numërimin elektronik dhe një sërë propozimesh të tjera të cilat do të adresonin problemin e shitblerje së votës, problemin e kapjes së medias, problemin e përdorimit të shtetit në fushatë.

Me vetëdije, z.Rama asgjesoi ditë pas dite, çdo mundësi për të zgjidhur këtë çështje në kuadër të institucioneve.

18 Shkurti, është produkti mbi të gjitha, i arrogancës dhe i bindjes kriminale të z.Rama se Shqipëria dhe shqiptarët do të pranonin një proces zgjedhor të kontrolluar nga krimi dhe aq më shumë tani, me pretendimet absurde se ky proces zgjedhor do të zhvillohet pa opozitën.

Nuk ështe e vërtetë që ne kemi ardhur në kërkesa maksimaliste. Ne kemi ardhur me kërkesa të diktuara nga koha, pasi kemi shterruar çdo mundësi tjetër. Eshtë plotësisht e mundur. Jo vetëm kaq, por është një rrugë e ndershme edhe për z.Rama që të çlirohet nga mafia që sot dikton qeverisjen dhe emërimet e ministrave. Eshtë një oportunitet, është një mundësi për z.Rama të çlirojë edhe Partinë Socialiste nga zgjedha e krimit të organizuar dhe ti japë vendit, së bashku me PD, dhe forcat e tjera, një kabinet teknik i cili do të organizojë procesin e zgjedhjeve të lira dhe të ndershme.

VOA: Ju përmendët majit e vitit 2016 ku keni paraqitur propozimet tuaja për përmirësimin e procesit zgjedhor, ligjin e zgjedhjeve e me radhë. Megjithatë, ajo që bie në sy është fakti që nga maji i 2016 deri më sot, u bë pak a shumë një vit, ju nuk keni këmbëngulur deri një muaj më pare, se çështja e zgjedhjeve të ishte kaq problematike e parësore për PD-në. Nuk ju kemi parë të këmbëngulni prej kohësh për këtë çështje, kur ju më herët e keni bojkotuar parlamentin edhe për gjëra më të vogla siç kanë qënë çështjet e konfliktit të interesit të disa deputetëve socialistë që nuk u shqyrtuan nga parlamenti. Pra, përse nuk keni këmbëngulur ju dhe PD më përpara me forcë kaq të madhe për çështjen e ligjit zgjedhor?

Basha: Dua ta kundërshtoj këtë premisë. Fakti është që ne i atashuam kushtet për zgjedhje të lira dhe të ndershme si kusht për votimin e reformës në drejtësi.

VOA: Nuk kemi dëgjuar nga bashkësia ndërkombëtare të thotë që Partia Socialiste ka shkelur marrëveshjen që kishte me ju dhe bashkësinë ndërkombëtare për ti bërë këto me konsensus. Ajo i ka mbështetur, përshëndetur. Si mund të pretendohet që njëra palë ka thyer marrëveshjen kur bashkësia ndërkombëtare i ka përshëndetur këto ligje?

Basha: Bashkësia ndërkombëtare është një term shumë i gjerë. Ambasadori amerikan në Tiranë ka mbështetur qartësisht disa prej shqetësimeve që ne kemi ngritur, ka ofruar rrugë praktike për zgjidhjen e tyre, meqë jemi në SHBA, një nga përfaqësuesit e komunitetit ndërkombëtar. Ai vetë ka ndihmuar që ligji për SPAK të kalonte me konsensus, 6 ligjet e tjera kanë kaluar pa konsenusin e opozitës. Edi Rama donte ta përjashtonte opozitën nga ato ligje që të kontrollonte sistemin. Këto janë fakte, jo opinione. Të vijmë te fakti tjetër. Edhe sikur sot opozita të ishte në parlament, ligji për vetingun nuk zbatohet dot. E dini pse? Se kanë futur duart dhe kanë bërë një rrëmujë të paparë në përpjekjen e tyre për të kapur drejtësinë.

VOA: Ligjet ju i kundërshtuat në Gjykatën Kushtetuese, Komisioni i Venecias e dha mendimin e tij..

Basha: Jo, jo. Nuk shterohet kurrë procesi politik.

VOA: Ju s’mund të dilni mbi ligjet.

Basha: Ne nuk dalim mbi ligjet. Ne shprehim vullnetin politik. Ne na përjashtuan nga ky proces sepse duan ta bëjnë pa opozitën. Urdhëroni, le ta bëjnë pa opozitën, por kjo nuk ishte ideja e 22 Korrikut, dhe as ideja e partnerëve tanë. Po të ishte pa opozitën, e bënin drejtësinë siç e donte Rama. Rama e do drejtësinë për Shullazin, për Hakmarrjen për drejtësi, për Prengën, për Ndokën. Nuk e do për qytetarët shqiptarë. Duhet të kuptoni që ne këtu jemi në një mision kombëtar për ta mbrojtur jo thjesht nga qeverisja aktuale, por nga ç’do qeveri që do të diktojë sistemin e drejtësisë, sepse kjo e çon Shqipërinë 27 vjet prapa kohë kur qeveria dhe gjyqtarët ishin një. Një nga themelet e shoqërive perëndimore është që gjyqësori është i ndarë nga qeverisja. Pse? Sepse duhet të hetojë edhe qeverinë, lidhjet potenciale të qeverisë me krimin, korrupsionin qeveritar.

VOA: Faktori ndërkombëtar i ka mbështetur gjithë këto ligje. Si ka mundësi? Ju ka thënë shkoni në parlament, votoni ngritjen e komisioneve, pastaj vazhdoni protestën. Pra, ligjet i quan të miratuara.

Basha: Faktori ndërkombëtar ka mbështetur reformën në drejtësi. Dikush mund të quajë të mirëqënë që në Shqipëri po ecin reformat. Dikush ka ardhur në Tiranë dhe ka thënë që Shqipëria po ecën përpara. Këtij dikujt, duhet t’i themi dy gjëra. Nuk mund të thuhet që Shqipëria nuk ka probleme, kur sapo doli këtë javë raporti i Departamentit të Shtetit, ku thuhet se do ta rifusin Shqipërinë në listën e zezë të pastrimit të parave sepse është kthyer në vendin kryesor të prodhimit të marijuanës, vend tranzit për heroinën dhe kokainën, korrupsioni nga i përhapur ka kaluar në jashtë kontrollit, në këto kushte, ne nuk mund të pretendojmë që gjërat në Shqipëri janë normale. Duhet patjetër të ndërmarrim veprime konkrete sepse ne nuk jemi analistë. Opozita është alternativa. Alternativa e shqiptarëve po propozon këtë rrugëdalje. Qeveri teknike dhe zbatim të reformës në drejtësi sipas përcaktimeve kushtetuese të 22 Korrikut, jo sipas skemave të Edi Ramës dhe Emiljano Shullazit me shokë. Këtu nuk lëvizim ne. Dikujt që nuk i di mirë faktet, le t’i shohë mirë. Kush e di këtë, dhe sërish thotë votoni apo veproni sipas një reforme e cila në vend që të çojë kriminelët para drejtësisë, i ndihmon të dalin nga burgu siç kanë dalë këtë muaj, këtij personi i themi e ke gabim zotëri apo zonjë. Interesi ynë është interesi i qytetarëve shqiptarë.

---

Interviste e Lulzim Bashës për Zërin e Amerikës, 24 Mars 2017

Read More

Bashkëbisedim në Sheshin e Lirisë për një prej problemeve më të mprehta të tranzicionit. PD nuk e zgjidhi dot plotësisht cështjen e pronave, por ka një plan realist dhe të zbatueshëm. Rama ka projekt për shpronësim të ri. Zgjidhja vjen me votë të lirë e të ndershme

Paraditen e 35-të në sheshin e lirisë, në qëndresën për zgjedhje të lira e të ndershme, qytetarët diskutuan rreth problemit të vazhdueshëm të pronave në Shqipëri. Gazmend Bardhi, këshilltar ligjor i grupit parlamentar demokrat, bashkëbisedoi me pronarë të shpronësuar nga periudha e komunizmit, të cilët ende sot nuk i kanë zgjidhur problemet me pronat.

Familjet e pronarëve, të shpronësuar nga periudha e diktaturës, treguan eksperiencën e tyre ndër vite të fatit të pronave të tyre. E drejta e pronës, e barabartë me atë të jetës, i është mohuar prej vitesh pronarëve të cilët ende nuk janë shpërblyer apo kompensuar me ardhjen e demokracisë.

Kryefamiljari i familjes Plaku nga Konispoli i Sarandës tregoi për persekutimin e vuajtur gjatë komunizmit, të cilit demokracia nuk i ktheu atë cfarë i takonte.

“Në ’90 e mirëpritëm demokracinë por për fatin e keq, ajo pronë neve nuk na është kthyer akoma sot, përjashtuar një shtëpi e cila i ka shërbyer zonës si shkollë. Pronë e vënë me djersën e ballit e duke u kujdesur deri tek kokrra e fundit e ullirit. Gjëra të vogla të cilat familjen tonë e kanë goditur shumë rëndë. Babai im ka kontribuar në luftën nacional clirimtare”.

Gazmend Bardhi tha se edhe Partia Demorkatike, në 8 vitet në pushtet, nuk e zgjidhi dot përfundimisht problemin e pronave, megjithë bilancin, edhe pse cështja e pronave u trajtua. Qeveria e sotme, ashtu si edhe në periudhën 98-2005 kur socialistët ishin në pushtet, nuk ka bërë asgjë, nuk ka zgjidhur asnjë rast. Sot, ai ligj, pavarësisht premtimeve elektorale të Kryeministrit, mbetet ende një ligj i papërfunduar dhe i kundërshtuar në Gjykatën Kushtetuese.

“Është e vërtetë që ne kemi qenë 8 vite në qeveri dhe për fat të keq nuk arritëm të zgjidhnim problemin e pronës. Dhe një nga arsyet themelore që ka ndikuar në moszgjidhjen përfundimtare të kësaj cështjeje ka qenë vendimi politik për t’i kthyer 100% pronën qytetarëve shqiptarë. Sigurisht ne mund të kishim zgjedhur modelin rumun që  e kthente pronën vetëm në 20% të masës që ishte shpronësuar gjatë regjimit komunist por vendimi politik ishte që prona e marrë dhe e grabitur nga komunizmi, duhet t’u kthehej 100% pronarëve të ligjshëm. Sepse e drejta e pronës ka të njejtën vlerë si e drejta e jetës dhe si e tillë as nuk mund të merret dhe as nuk mund të mohohet”, tha Bardhi.

Teuta Kalakula nga Durrësi tregoi se si kryetari i Bashkisë Tiranë, Erion Veliaj, pa njoftim dhe paralajmërim, i dhunoi pronën përmes një firme private.

“Në janar të 2016, lali Eri na dhunon pronën pa na njoftuar dhe pa na marrë leje. Ne hodhëm në gjyq Bashkinë dhe firmën FUSHA SHPK, firmën aktuale që kryen punimet. Por gjykimi ndërpritet sepse ata që kanë marrë lejen nuk vijnë në gjyq, ashtu si edhe Bashkia nuk vjen në gjyq. Prona dhunohet, pa njoftim dhe as nuk na dëmshpërblejnë”.

Gazmend Bardhi tha se kabineti “Rama” e nisi me shpronësimin e pronarëve të ligjshëm dhe përfundoi me zgjidhje, ku pronarëve të cilëve iu mohua e drejta e pronës për 45 vjet, sot, i propozohet vetëm kompensim i pjesshëm.

“Qeveria pronarëve i propozoi një të dhjetën e cmimit real që prona ka sot. Kjo u kundërshtua nga pronarët gjatë draftimit të ligjit dhe sigurisht u mbështet edhe nga Partia Demokratike. Pronarët kanë të drejtë të marrin pronën e tyre 100%”.

Ligji i kabinetit ‘Rama’ propozon për pronarët atë cka mund të quhet si një shpronësim i dytë.

“Rama propozon që kur prona të ishte e lirë, të mos ia kthente pronarit, por t’a kalonte atë në fond shtetëror dhe t’ju shpërblente apo kthente atë pjesë të pronës që korrespondonte me vlerën e pronës në vitin ’45 kur ua mori Enver Hoxha”.

Hamdi Kaziu, ish i burgosur politik me 4 vetë të arrestuar në shtepi, tregon se si persekutimi i periudhës së komunizmit, i rikthehet në formë terrori në kohë demokracie.

“Ajo që më sjell mua këtu është terrori që është bërë këto 4 vjet. Mua më kanë shembur shtëpinë me leje ndërtimi, me pronë të vitit ’33. Erdhën të shembnin shpinë të armatosur deri në dhëmbë. Më rrethuan dhe më kërcënuan se do më shoqëronin në rajon. Gruaja ime, me tre të pushkatuar në shtepi, që ka punuar 40 vjet në kombinatin e tekstilit, sot nuk ka vend ku fle. Ngjit me mua është një pallat i 12 komunistave deputetë. Pallat i paligjshëm. Pse nuk e shembin atë dhe shembin shtëpinë time e cila ka leje, projekt dhe cdo dokument tjetër”.

Gazmend Bardhi tha se edhe për shkak të gabimeve të periudhës kur pushtetin e kishin demokratët, problem i pronave nuk u zgjidh në mënyrë përfundimtare. Ju kërkojmë ndjesë për këtë – tha Bardhi. Sot për arsye jo legjitime, për vonesa të shkaktuara nga shkelja e të drejtës themelore të pronës, Rama ktheu formulën e komunizmit dhe qeverisjes në diktaturë që bënte shpronësimin e pronarëve të ligjshëm.

 

Read More

Në ditën e 33-të të protestës për zgjedhje të lira e të ndershme, në Sheshin e Lirisë pati një diskutim dhe reflektim për 22 Marsin 1992, ku 25 vite më parë shqiptarët rrëzuan me votë të lirë përfundimisht diktaturën komuniste.

Historiani Romeo Gurakuqi tha se 22 Marsi shënon periudhën e ndërtimit të Shqipërisë së lirë e demokratike. Gurakuqi tha se Shqipëria sot ndodhet në një situatë të vështirë ndaj duhet një përpjekje e madhe për të themeluar një republikë të re.

“Më 22 mars filloi periudha e rindërtimit institucional të Shqipërisë, bazuar në parimet e lirisë, shtetit të së drejtës, ndarjes së pushteteve, një sistemi Republikë parlamentare që respektonte liritë dhe të drejtat e njeriut. Por, sot jemi mbledhur këtu për të përkujtuar këtë datë, por njëkohësisht jemi mbledhur në kuadrin e një situate shumë të rëndë që po kalon vendi jonë, e lidhur me destabilitetin e përgjithshëm të institucioneve të shtetit, për shkak të thyerjes së parametrave themelorë të demokracisë, që lidhen me respektimin e shtetit të së drejtës, me ndarjen e pushtetit nga shteti, me ndarjen e institucioneve dhe pushteteve dhe krijimin e një sistemi pluralist të mirëfilltë që nuk është funksional në vendin tonë. Në këto rrethana, nisma për themelimin e një Republike të Re nuk është një shprehje e rastësishme kalimtare, por do ta thoja është një nismë esenciale që kërkon reflektim dhe marrjen e masave konkrete përmes konstitucionalistëve më të mirë jo vetëm shqiptarë, por do të ftoja PD-në që këtë ta bëjë përmes konstitucionalistëve më të mirë perendimorë, për ta rithemeluar Shqipërinë si një Republikë të ngjashme me të njëjtat reforma që vende të Europës Lindore, post komuniste, ato që kanë avancuar më përpara në sensin e ndërtimit të shtetit të së drejtës dhe këtu shembulli i Sllovenisë është më konkreti në rithemelimin e Republikës dhe ndërtimin e një Republike të balancuar. Një Republikë të vlerave dhe jo një Republikë të krimit të organizuar!”, tha Gurakuqi.

Rudina Hajdari ftoi protestuesit të ngrihen me mirënjohje ndaj grave e burrave shqiptarë që udhëhoqën vendin drejt fitores të plotë të demokracisë me 22 Mars 1992.

“Disa prej burrave dhe grave që udhehoqën këtë lëvizje janë të pranishëm sot. Për ta, do tu ftoj që të ngrihemi dhe ti japim duartrokitje me mirenjohjen tonë më të thellë. Partia Demokratike ka akoma shumë për të bërë. Ne kemi zgjedhje për të fituar. Nuk mund të jemi utopikë ndaj kësaj beteje. Ne duhet të jemi realistë, por duhet ti qëndrojmë besnik idealeve tona deri në fitore, prandaj dhe qendrojmë ketu sepse kerkojmë zgjedhje te lira për të arritur ëndrrat që kemi sot”, tha Hajdari.

Sali Berisha, lideri historik i demokratëve dhe Presidenti i parë i Shqipërisë demokratike të dalë nga zgjedhjet e 22 Marsit, ndau me qytetarët rëndësinë e kësaj date historike. Berisha tha se kjo datë është një mesazh për shqiptarët 25 vite më pas për të mbrojtur fort liritë e tyre, për të garantuar zgjedhje të lira dhe të ndershme.

“Më 22 Mars në mbarë vendin vërshoi entuziasmi, shpresa dhe besimi i jashtëzakonshëm i shqiptarëve për një të ardhme që meritonin ndërkohë situata ishte më katastrofike se sot këtu, dhe ata që e kanë përjetuar mund ta imagjinojnë. Historia në një aspekt është arkiv dhe për këtë duhet të jemi të lumtur, por historia është edhe mesazh dhe për këtë ajo na duhet shumë”.

25 vite më pas, Berisha tha se për shkak të qeverisë aktuale, shqiptarët janë goditur në shpresën për të votuar të lirë.

“Momentalisht për shqiptarët ka humbur çdo shpresë për të votuar të lirë. Sot Shqipëria, për shkak të politikave elektorale dhe kriminale të Edi Ramës është mbushur me kanabis nga thellësitë e alpeve deri në skajin jugor të vendit. Edi Rama ka vendosur para shqiptarëve, një mal parash droge, me qëllim që të shtypë votën e shqiptarëve. Njëherë shtrova pyetjen se çfarë dallimi ka ky nga narkodikatori Noriega?! Ky ishte diktator i Panamasë. Atë fillimisht e mbështetën miqtë tanë por ai punën e parë që bëri ishte mbushja e Panamasë me drogë e më pas Presidenti Bush i dërgoi marinsat dhe e kapi të strukur në bunker në shkretëtirë dhe e dënuan në SHBA me mbi 100 vjet. Do i them Edi Ramës që në mënyrë absolute ti ske asnjë dallim nga Noriega për ne. Po të duash merre si betim, si paralajmërim, po të duash si kërcënim, si të të pëlqejë por të jap fjalën se nuk do të largohesh me marinsa por do të largohesh nga këto vajza e djem në mënyrën më të mjeruar, po nuk u largove”.

Ai apeloi që të dëgjohet zëri i qytetarëve që protestojnë në çadër pasi ata janë të vendosur për çdo sakrificë që të votojnë të lirë.

“Edi Rama mos mendo se do bësh zgjedhje, po ta themi këtu ke djegur çdo shans dhe shansi i yt i vetëm është të krijohet qeveri teknike, dhe pastaj të bëhen zgjedhje. Jo vetëm qeveri teknike por një qeveri që do të përcaktojë të gjitha kushtet që këto vajza, këto djem dhe këta qytetarë i gjykojnë të domosdoshme për vullnetin e tyre të lirë. Edi Rama bën mirë të dëshosh zërin e Çadrës sepse përfaqëson të ardhmen, përfaqëson atë që po lind ndërsa ti të shkuarën më të zezë të shqiptarëve. Partinë Demokratike, çadrën dhe lëvizjen sot e udhëheq një udhëheqës i ri, as i gjeneratës time dhe as i tendës. Krejt tjetër i cili doli këtu të ndërtojë një vend me vlera të vërteta europiane ndërsa ti përfaqëson xhelatët e shqiptarëve. Të këshilloj, sepse e ke vetë parasysh që e keqja nuk ka fund, duhet të mësosh nga mençuaria e popullit dhe duhet të fillojmë në krijimin e qeverisë teknike me kushte të caktuara mira që do bindin çdo shqiptar se këtu do votojnë të lirë. 22 Marsi është dita e kushtrimit, e frymëzimit, e apelit për të gjithë shqiptarët. Të gatshëm për çdo sakrificë që të votojmë të lirë, të votojmë me dinjitet për të sotmen dhe të ardhmen që meritojmë”.

Protestuesit ndoqën më pas një dokumentar mbi përpjekjet dhe arritjet e Partisë Demokratike në këto 27 vite të pluralizimit politik për zhvillimin e vendit, lirinë dhe demokracinë shqiptare.

---

Njoftim per shtyp 22 Mars 2017

Read More

Gazetarja, Olta Blaceri: Pranë meje është Kryetari i Partisë Demokratike Lulzim Basha, do të doja ta filloja me një pyetje të drejtpërdrejtë. A do të niseni nesër për në Shtetet e Bashkuara të Amerikës?

 

Lulzim Basha: Unë kam një program vizitash në Europë dhe në Shtetet e Bashkuara të Amerikës, duke përfshirë ftesa nga kryeministra apo krerë qeverish, partitë simotra, përfaqësues të lartë të politikës Europiane dhe Amerikane dhe po, do të jem në një tur diplomatik dhe do t’iu njoftoj për të gjitha detajet në momentin e duhur.

 

Olta Blaceri: A do e lini vetëm çadrën për shumë ditë?

 

Lulzim Basha: Do t’ju njoftoj për të gjitha detajet e lëvizjes time dhe gjithçka është në funksion të kësaj lëvizjeje popullore dhe zgjedhjeve të lira dhe të ndershme.

 

Olta Blaceri: Një pyetje z.Basha, një ditë më parë Presidenti i Republikës e dekretoi Ministrin e Brendshëm Fatmir Xhafaj, por ai i kërkoi Parlamentit që ta rrëzojë atë, do të shkojnë në parlament deputetët e Partisë Demokratike të votojnë kundër?

 

Lulzim Basha: Sigurisht që jo, asnjë kauzë, përveç zgjedhjeve të lira e të ndershme dhe një kabineti teknik me mbështetje të gjerë politike, nuk e rikthen në parlament opozitën.

 

Olta Blaceri: Po ju do ta pengonit me trupat tuaj z.Xhafaj të hynte në Ministri!

 

Lulzim Basha: Krimi i rëndë që i bëhet Shqipërisë dhe shqiptarëve në vitin 2017, gjëma që çdo shqiptar do ta shohë dhe ta kuptojë dhe duhet të reagojë, është fakti që kemi të bëjmë me një person i cili e ka fshehur së pari, se ka qenë hetues i sigurimit të shtetit dhe i hetuesisë politike, që ishte njësoj me sigurimin e shtetit, dhe së dyti në kapacitetin e tij si hetues, jo thjesht ka bërë detyrën, por është akuzuar drejtpërdrejtë nga viktimat e tij për tortura çnjerëzore. Kjo meriton një përgjigje mbarëpopullore, por nëqoftëse Edi Ramës dhe patericës së tij Ilir Meta, nuk iu bën pështypje kjo, dhe ecin përpara me vendimin për të patur një person të tillë në krye të Ministrisë së Brendëshme, ky është gjesti më i qartë se çfarë kanë ndër mend dhe çfarë duan të bëjnë me vullnetin e shqiptarëve dhe padyshim për këtë do të marrin pëgjigjen që meritojnë.

 

Rudina Xhunga: U ezauruan pyetjet e para por gjithsesi ajo që më bën përshtypje në të gjitha daljet tuaja publike, që janë të shumta së fundmi, në çdo emision jeni, është se rrethoheni nga portrete vajzash dhe djemsh të rinj, të gjithë simpatikë dhe entuziastë.

 

Lulzim Basha: Faleminderit Rudina.

 

Rudina Xhunga: Ndërkohë mënyra se si ju drejtoni, gjuha juaj është e panjohur më parë, personalisht unë nuk e dija që ju flisnit në këtë mënyrë, unë e para. Sot ju dëgjova kur i kujtonit Ramës fatin e Duçes, e perifrazuat metaforën e Aurel Plasarit në një farë mënyre, pra gjuha juaj është e dhunshme, ndryshe nga portretet edhe i juaji edhe i atyre që ju rrethojnë.

 

Lulzim Basha: Nuk është e vërtetë, kjo s’është e vërtetë. Po të keni pamjet dhe fjalët e mia do të shikoni që s’është aspak e dhunshme, unë i kam thënë që Republika e Re, nuk do të lërë ty, të kesh fatin e Duçes, pra kjo nuk është gjuhë e dhunshme, unë me të vërtetë mora një citim për të cilin z.Plasari thotë që nuk e kam marrë të plotë apo ashtu siç duhet, fakti është që ai në shkrimin e tij përshkruan fatin e Republikës Italiane apo të shtetit Italian, se ishte akoma monarki atëhere, të shtetit Italian, se çfare pësoi nga një person dhe nga një ideologji si e Duçes që përjashtonte kundërshtarin politik, përjashtonte mendimin ndryshe, përjashtonte opozitën dhe pak rëndësi ka se si përkthehet kjo, përkthehet në fatin e Duçes në kuptimin në fatin e diktaturave apo në fatin e tij personal. Mesazhi që ka marrë e do të marrë nga ne këtu, është që Republika e Re për të cilën qëndrojmë tash 31 ditë e do të qëndrojmë deri në fitore, eshtë republika e të drejtave të individit, qoftë edhe e mëkatarëve edhe të atyre që kanë shkelur ligjin, dhe një nga misionet është që asnjë të mos përfundojë si Duçja, pra mos të ketë kaos, mos të ketë anarki, me të cilën kërcënon tash një javë Edi Rama dhe sejmenët e tij, duke përmendur ’97. 97 nuk ka për të pasur as për mjekrën e Ramës, as për qimet e ndonjë tjetri, se nuk ia vlen as një jorgan shqiptari të digjet për ta, e jo më Shqipëria, por do të ketë qeveri teknike, do të ketë largim të Edi Ramës për ti hapur rrugë zgjedhjeve të lira e të ndershme.

 

Erl Murati: Z. Basha mirëmbrëma, unë kisha në fakt dy pyetje të shkurtra.

Kam parë sot në rrjetet sociale një irritim apo një mllef nga ana e mbështetësve të Partisë Demokratike, ose të opozitës në përgjithësi, kundër Presidentit Nishani, për faktin që ai dekretoi z.Fatmir Xhafaj, si Ministër i Brendshëm, ju dje e morët në mbrojtje z.Nishani, por a do të kishit pritur ju që Presidenti i Republikës ta kishte refuzuar dekretin për z.Xhafaj? Pyetja e dytë është, nëse nuk do të kemi qeveri teknike deri në datën 18 Qershor, a do të vazhdojë çadra të rrijë e ngritur para Kryeministrisë?

 

Lulzim Basha: Faleminderit Erl. E para, nuk mendoj se është i drejtë çdo sentiment negativ ndaj qëndrimit të Presidentit të Republikës, në veçanti nga ata që me të vërtetë nuk e duan Fatmir Xhafajn Ministër të Brendshëm, për të shkuarën e tij si xhelat i komunizmit, për lidhjet e tij familjare, dhe, siç jam informuar nga partnerë ndërkombëtarë, edhe personale, me krimin e organizuar, në veçanti me narkotrafikun, me trafikantët e drogës. Nuk jam dakord për një arsye të thjeshtë, se në konceptin demokratik të Republikës së Re, të vlerave europiane, të shtetit ligjor, të ndarjes së pushteteve, kreu i shtetit ka një, dhe vetëm një detyrë, të zbatojë Kushtetutën. Kjo është Kushtetuta e një Republike Parlamentare në letër, e shndërruar në fakt një republikë krimi tani, por në një Republikë Parlamentare, ku aspekti thelbësor i vendimmarrjes i takon Parlamentit dhe në rastin e ekzekutivit i takon legjislativit, pra jo Presidentit, sepse përndryshe kjo do të merrte tiparet e një Republike Presidenciale, roli i presidentit nuk është thelbësisht formal sepse është detyra e tij të ruajë ato sinore që i ka caktuar Republika, sigurinë kombëtare, për shembull, nëse dikush dyshohet për veprimtari kundër integritetit territorial, kundër interesave të sigurisë kombëtare, etj, etj, nuk dua të bëj këtu doktrinën, se ne juristët na merr pasioni pastaj, flasim si juristë. Presidenti mori vendimin e duhur kushtetues, por Presidenti bëri edhe një akt atdhetar, kombëtar, qytetar duke i bërë thirrje forcave politike të mos e kalojnë këtë kandidaturë, jo thjesht për atë që paraqet në kontekstin e përgjithshëm, por edhe në kontekstin aktual, një përshkallzim të qartë të krizës politike, një provokim jo thjesht ndaj Partisë Demokratike apo opozitës, jo thjesht ndaj qindra mijëra të përndjekurve, e në veçanti viktimave të tij që kanë dëshmuar me zë dhe me figurë, por po ashtu një provokim ndaj gjithë qytetarëve që duan të lënë pas tronditjen, shokun, padrejtësinë e diktaturës dhe të adoptojnë standartet europiane, për jetën e tyre në radhë të parë dhe për shtetin ligjor, për Republikën e Re për të cilën qëndrojmë këtu, ku shteti ligjor, zbatimi i ligjit, ndarja e pushteteve, janë tema dhe parime qendrore.

Erl Murati: Z.Basha do të vazhdojë çadra të qëndrojë në 18 qershor përpara kryeministrisë?

 

Lulzim Basha: Kjo varet tërësisht nëse do të ketë reflektim nga ata që po sakrifikojnë ditë për ditë shpresat, dëshirat, projektet e shqiptarëve, që i kanë detyruar në këto 4 vite të marrin rrugët, si asnjëherë që prej eksodit të viteve 90, që e kanë kthyer Shqipërinë në një Republikë të drogës që tregohet me gisht nga Bashkimi Europian. E patë raportin e EUROPOL-it, nga Shtetet e Bashkuara të Amerikës e patë, e lexuat raportin e Departamentit të Shtetit. Qytetarët nuk e pranojnë më, kanë thënë jo dhe janë ngritur për një të drejtë bazike, themelore, të zgjedhin me votë të lirë dhe të ndershme, të pandikuar nga krimi, nga paratë e pista të drogës, nga shit-blerja e votës, qeverinë që duan. Kjo nuk është një luftë për pushtet në tavolinë e Partisë Demokratike, kjo është një luftë për një të drejtë themelore pa të cilën nuk mund të ketë Shqipëri Europiane, por do të ketë Shqipëri të krimit, Shqipëri të drogës, Shqipëri të varfërisë, Shqipëri të shtypjes, Shqipëri të pushtetarëve të korruptuar që i trajtojnë qytearët si dele. Kjo duhet të marrë fund dhe hapi i parë që të marrë fund kjo është që ata të hapin veshët e të dëgjojnë popullin e tyre. Çfarë ndodh kur pushtetarët nuk hapin veshët, nuk dëgjojnë qytetarët e tyre, e në veçanti në limitet morale dhe kohore të mandatit të tyre? Këtë na e tregon shumë mirë historia e kombeve të qytetëruara të Europës dhe Shqipëria nuk ka pse të bëjë përjashtim nga kjo.

 

Anila Basha: Mirëmbrëma, pëshëndetje Z. Basha, besoj se ka disa arritje kjo protesta juaj, pikë së pari duhet të falenderoni ndoshta mazhorancën që ju dha mundësinë për njohjen tuaj si Kryetar i Partisë Demokratike dhe për faktin se në përgjithësi, në të gjitha analizat ka pasur një dualizëm mes personazhit tuaj si Kryetar i PD dhe Z.Berisha, megjithatë dua të ndalem në disa pyetje konkrete që kanë të bëjnë me ne të tjerët. Ju, për sa kohë mendoni se do ta mbani çadrën aty në mes të bulevardit, pjesa më e madhe e qytetarëve sot janë të shqetësuar realisht dhe për disa gjëra sociale, pra ju keni bllokuar trafikun…..Cilat janë shpenzimet e cadrës, sa shpenzoni në ditë kush i shpenzon këto para?

 

Lulzim Basha: Të falenderoj për komplimentin, por cadra nuk ka qenë asnjë moment synim personal i Lulzim Bashës dhe nuk ka pasur asnjë moment qëllimin që ju thoni. Unë snjëherë nuk kam dashur të zbavis argumentat kryesisht të kundërshtarit, që bëjnë dualitetin midis meje dhe ish kryetarit të PD, zotit Berisha, sic kishte dicka legjitime në dualitetin midis Edi Ramës dhe Fatos Nanos kur ky i fundit ishte zhdukur nga skena politike, ishte larguar nga partia, madje edhe nga vendi, dhe kishte njerëz që besonin akoma se Rama ishte i përkohshëm. Duket pra se ka dicka përtej subjektivitetit. Ka dicka objektive kur liderë historik largohen dhe vendi zihet nga të rinjtë. Unë e kuptoj këtë, e pranojë këtë. Por duke pranuar këtë, të jeni e sigurtë që në të gjithë vendimarrjen time në këto tri vite e gjysëm kam ushtruar pa asnjë kompleks atributet dhe përgjegjësitë që më ka deleguar me votë anëtarësia e PD. Pra harrojeni se kjo cadër është për egon e Lulzim Bashës për potencimin e Lulzim Bashës. Nuk kam ndjerë asnjë kompleks, e di që shumë kush ka thënë është tepër i butë, është tepër evropian dhe ndoshta është e vërtetë. Profili im është ndryshe, stili im është ndryshe, formimi im është ndryshe nga paradhësi im, por dhe nga të tjerët e partive kryesore në vend dhe kjo për mua është një vlerë e shtuar, nuk është as gabim as difekt. Cadra sidoqoftë, sheshi, protesta ka marrë një vendim që shkon përtej Lulzim Bashës, përtej PD, përtej opozitës. Këtë vendim e mori në një nga mbledhjet më të mëdha, një nga bashkimet më të mëdha popullore që ka ndodhur, ndoshta më I madhi në 27 vite, e mori me koshiencë të plotë.

 

Anila Basha: Këshillin kombëtar a e mblodhët apo jo?

 

Lulzim Basha: Faleminderit Anila që po bën edhe interpretuesen e statutit të PD, të jesh e sigurtë që ka interpretues më të saktë të statutit. Të përgëzoj për këtë detyrë, por një detyrë tjetër që duhet të bësh si gazetare dhe nuk e ke bërë, është të investigosh si paguhet cadra. Mos të biem në stigma se pastaj mund të them fare kollaj, se je media e qeverisë, paguhesh me paret e qeverisë dhe ta mbyll diskutimin. Këta qytetarë këtu, nuk vijnë me para, ndryshe nga e ashtëquajtura greva e urisë, ku u palluan me ushqime dhe me gjëra të tjera. Këtu, tek cadra asnjë nuk paguhet këta janë qytetarë të lirë që vijnë me vullnetin e tyre për ti shërbyer një kauze të madhe, sic është kauza e zgjedhjeve të lira dhe të ndershme. Eshtë një kauzë e të majtëve dhe të djathtëve. Këtu, në këtë cadër ka pasur të majtë Anila, të cilët nuk bien dakort me ne, pothuajse për asnjë cështje tjetër, po ata bien dakort që në politikë të mos ketë kriminelë. Cështja është që këtu bëhet një betejë shumë më e madhe sesa fatet e partive politike. Këtu ka pasur të majtë 24 karat, socialistë jo nga ata banditët e rilindjes, socialistë që e kanë treguar me vepra luajalitetin e kauzës e ideologjisë së PS, kundërshtarët tanë historikë. Kanë ardhur këtu dhe kanë thënë asgjë nuk na bashkon me ju, prona private roli i personit, roli i shtetit , por na bashkojnë dy gjëra; të nxjerrim kriminelët nga politika dhe të kemi zgjedhje të lira dhe të ndershme. Kjo është e vërteta e cadrës, sado të hidhet baltë e shpifje, kjo është e vërteta e cadres.

 

Anila Basha: Më intereson demokracia e brendshme e PD. Ndërkohë që ju jeni në cadër ju nuk keni zgjedhur kryetarët e degëve të PD në rrethe, nuk keni bërë organizimin nëpër rrethe.

 

Lulzim Basha: Lëre mos u merr me organizimin e PD, e kupton sa fallso është kjo që po bën? Hajde bëhu anëtare e PD konkurro me mua dhe merre ti në dorë organizimin e PD. Për cështjen e qarkullimit rrugor. Kjo më kujton filmin multiplikativ ku kapet derkuci Cufo nga veshët duke ngrënë mollët, dhe ky i thotë; “më ndale qarkullimin e gjakut”. Dhe përgjigja që merr; “mor bukurosh më duket se të ndala qarkullimin e mollëve”.

 

Anila Basha: Kjo nuk është cështje batutash se nuk fiton gjë

 

Lulzim Basha: Këtu nuk është cështje e qarkullimit rrugor, është cështje e demokracisë, është cështje e zgjedhjeve të lira dhe të ndershme. Ne, nuk ndalemi dhe nuk do të ndalemi kundër qarkulllimit të krimit në politikë, qarkullimin e drogës në politikë, qarkullimin e kriminelëve në politikë dhe për këtë, cdo përpjekje ia vlen. Qarkullimi i krimit, qarkullimi i drogës, qarkullimi i parave të pista dhe i një elite të korruptuar politike, Po, do ndalur. Qytetarët i ke këtu në shesh ditë për ditë, 31 ditë në një protestë stoike, historike që ka thyer cdo rekord.

 

Sokol Shameti: Një sugjerim për ju, ka të bëjë me trajtimin e gazetarëve thjesht për të hequr vijën ndarëse midis atij për të cilin ju keni ngritur cadrën, dhe jush , pra një trajtim më ndryshe. Pyetja ka të bëjë me qeverinë teknike, që sipas jush do të bëjë zgjedhje të lira dhe të ndershme. Por a ka kohë që kjo qeveri të ngrejë zgjedhje të lira dhe të ndershme kur ka një sistem zgjedhor që dhe ju jeni bashkëfajtorë në hartim e tij? A ka kohë pra të reformohet ky sistem për zgjedhje të lira dhe të ndershme?

 

Lulzim Basha: E para, sugjerimin tuaj e pranoj me shumë dashamirësi . Nëse kam ardhur në ekranin tuaj, agresiv ose pa etikë, sigurisht kërkoj ndjesë. Nuk ka qenë ky qëllimi im, por të siguroja kohën dhe hapësirën për ti dhënë përgjigje koleges suaj dhe jo për të keqtrajtuar apo për ti mbyllur gojën asnjë gazetari, se nuk është në kulturën time, nuk është mendësia ime dhe nuk janë vlerat për të cilat unë qëndroj. Nuk ka asgjë të përbashkët, as se cfarë mendoj dhe as si i trajtoj unë gazetarët, larg qoftë me Edi Ramën, por edhe më të tjerë se Edi Rama është kampion i keqtrajtimit të gazetarëve dhe fjalës së lirë. Përkundrazi, cmoj, lartësoj mendimin kundër, kritikën në media në shoqëri, dhe brenda partisë sime dhe ju ftoj që këtë fakt ta shpalosim në një moment tjetër, jo kaq akut sa ky që kemi. Sa i përket qeverisë teknike, ajo do të ketë një mandat të fuqishëm politik që të mbështetet nga të gjitha forcat politike. Pra, jo një qeveri e njërit apo e tjetrit, por me mbështetje të fuqishme nga forcat kryesore politike për të ekzekutuar gjëra që kjo qeveri nuk ekzekuton dot, sepse është në konflikt interesi, gjëra sic janë; Dekriminalizimi. Largimi i personave me rekorde kriminale që janë akoma në parlament dhe kryetarë bashkishë dhe drejtorë e funksionarë të lartë të shtetit. Ligji është, por ligji nuk po zbatohet. Së dyti, një luftë të vërtetë kundër drogës, parave të drogës që po hidhen për të kapur përfundimisht Shqipërinë dhe për ta kthyer në një republikë të krimit. Dhe së treti, kushtet për zgjedhje të lira dhe të ndershme për të cilat ne kemi një propozim të detajuar, të gatshëm për ta diskutuar me kundërshtarët tanë politikë, në tryezën e dialogut, kur të vendosim qeverisjen teknike. Dhe, së katërti, zbatimin e Reformës në Drejtësi, sipas përcaktimeve kushtetuese të 22 korrikut. Këto janë propozimet tona, t’i diskutojmë këto, me kundërshtarët tanë politikë dhe këdo tjetër, me qëllim që t’i japim Shqipërisë një zgjidhje politike të problemit të madh të krimit dhe të drogës në raport me zgjedhjet e lira dhe të ndershme. Përmendët sistemin, është e vërtetë që sistemi është vepër e Partisë Demokratike dhe e Partisë Socialiste nuk ka asnjë dyshim për këtë. Personalisht kam rezerva. Rezervat e mia nuk kanë të bëjnë me formulën, sepse kjo formulë funksionon në Spanjë, me proporcional kombëtar në Hollandë, ku unë kam jetuar disa vite, por nuk funksionon këtu, jo për shkak të formulës, por për shkak të krimit, të diktimit që krimi dhe kriminelët bëjnë për shkak se u janë hapur dyert. Nuk ishte krimi që kapi prej xhakete Edi Ramën, ishte Edi Rama që i zhbiriloi, i nxori nga skutat e errëta dhe i tha, ejani, futuni në listë. E njëjta gjë mund të ndodhë me çdo sistem. Në çdo sistem mund të ndodhë e njëjta gjë nëse ne nuk ndahemi me krimin. Ndarja me krimin është sfida e parë dhe beteja e parë që duhet fituar që të kemi zgjedhje të lira dhe të ndershme.

 

Sokol Shameti: Nëse mund të bëj një parantezë. Ju parashtroni shqetësimet e forcës suaj politike. Dekriminalizimi dhe gjithçka tjetër, por edhe pse u ndalët tek sistemi dhe ju thatë se keni rezervat tuaja, ju ngelët këtu, thatë se keni rezerva dhe nuk keni propozim. Ky sistem nuk funksionon në Shqipëri.

Lulzim Basha: Kemi sigurisht. Ne jemi të hapur për të diskutuar jo thjesht sistemin zgjedhor, por tërë strukturën kushtetuese të Shqipërisë. E para është të garantojmë zgjedhje të lira dhe të ndershme. Nëse ka vullnet të plotë politik, absolutisht po, dhe unë po ju them atë që u kam thënë qytetarëve. Kjo duhet diskutuar edhe në strukturat e Partisë Demokratike, edhe në strukturat vendimmarrëse, edhe me aleatët opozitarë, përpara se të formalizohet si qëndrim. Eshtë thjeshtë një mendim i imi tani. Unë dua që të kemi një fuqizim total të qytetarëve, për të vendosur kandidatët. Kjo kompetencë të mos jetë siç është, de facto, e kryetarëve të partisë, por të jetë një kompetencë sa më afër qytetarëve. Do propozimin tim? Propozimi im është, me ligj, primare të detyrueshme për partitë, dhe pastaj sistem mazhoritar me korrektim proporcional. Por kjo, na fut në një diskutim që na nxjerr nga aktualiteti, nga gjendja akute ku ndodhet vendi. Unë po ju them që Po; Republika e Re, për mua nuk është thjesht dhe vetëm një sllogan, është një univers vlerash europiane në esencë, euroamerikane. Koha ka ardhur që shqiptarët të mos kenë asgjë më pak, se ky standard në zgjedhjet e tyre, në ekonominë e tyre, në jetën e tyre. Kjo është Republika e Re.

 

Ervis Iljazi: Z.Basha, përse ju nuk kushtëzuat miratimin e Reformës në Drejtësi me aprovimin e Reformës Zgjedhore për të marrë të gjitha garancitë legjislative, institucionale për të patur vota të lira dhe të ndershme. Qoftë edhe me votimin elektronik, apo të gjitha ato teza që ju keni hedhur. Pra, për të marrë një zgjidhje institucionale, ligjore dhe a nuk ju duket se po kërkoni të realizoni një parim të rëndësishëm që është vota e lirë, duke shkelur një parim tjetër, që është e drejta kushtetuese e kësaj mazhorance për ta çuar këtë mandat deri në fund. Pra ku e gjeni ju forcën politike ti kërkoni një mazhorance mbi 80 vota, që t’jua dorëzojë pushtetin në tavolinë?

 

Lulzim Basha: Po e nis me të parën. E vërteta është krejt ndryshe. E vërteta është që unë e kushtëzova votën tonë për Reformën Kushtetuese. Kushtëzova votën për Kushtetutën me dy kushte. Kushti i parë, të hiqeshin të gjitha barrierat për votimin elektronik dhe numërimin elektronik. Kushti i dytë, shtatë ligjet kryesore të miratoheshin me konsensus për të shmangur që mazhoranca e bërë pishman për ndryshimet kushtetuese të standardit europian, e në veçanti për formulën Nulland-Han, të kapte ato që humbi gjatë negociatave për kushtetutën, kur ne, BE, SHBA dhe në veçanti Komisioni i Venecias, triumfuam për një paketë kushtetuese të standardeve europiane. Kjo marrëveshje ka dy dëshmitarë. SHBA-të me përfaqësuesin e tyre në Tiranë dhe BE-në me përfaqësuesin e tij në Tiranë. Pasi u bë kjo marrëveshje, Edi Rama e theu, siç ka thyer në dijeninë time shumicën dërrmuese, për të mos thënë, të gjitha marrëveshjet deri më sot, si kryeministër dhe si kryetar opozite. E theu këtë marrëveshje dhe kjo është kriza aktuale e Reformës në drejtësi. Çfarë ndodhi pas kësaj? Për Reformën në Drejtësi, SHBA-të ia futën dy këmbët në një këpucë dhe e detyruan të pranonte formulat konsensuale të opozitës dhe si rezultat ligji për SPAK-un, për strukturën e posacme antikorrupsion dhe BKH-në e famshme, Byronë Kombëtare të Hetimit, ka votat tona në Parlament. Eshtë votuar në mënyrë unanime. Nuk është faji i BE-së se Rama ka mashtruar BE-në, SHBA-në dhe Presidentin e SHBA-së, edhe si kreyeministër, edhe më parë si kryetar opozite. Pse jemi këtu në këtë shesh. sepse Edi Rama me vetëdije sabotoi çdo mundësi institucionale, politike, për ta zgjidhur këtë. Kjo pra është e vërteta. Ne insistuam, mos harroni. Shikoni arkivat tuaja si gazetarë. Me 21 korrik më ka marrë Angela Merkel në telefon. Shikoni transkriptin e bisedës. Përgëzime për rolin tonë për përcaktimet kushtetuese dhe garanci për zgjedhje të lira dhe të ndershme. Shiko transkriptin e bisedës me Komisionerin Han, me Victoria Nulland.

 

Ervis Iljazi: Përse nuk krijuat një krizë politike në atë moment?

 

Lulzim Basha: Përse nuk krijova unë një krizë politike në atë moment? Po, ç’është kjo pyetje? Po pse, çfarë është kriza politike. Ha groshë, dhe bëj një krizë politike? Sepse u përpoqa me të gjitha forcat për një zgjidhje institucionale. Dhe një nga një, hapat u shteruan. Këmbana ishte Dibra, ku u tregua se plani i Edi Ramës nuk ishte thjesht influencimi i procesit zgjedhor nga krimi por asgjesimi i zgjedhjeve. E di çdo të thotë kjo? Që mos të kesh më forca politike. Por që të kesh nga një anë forcat politikë, dhe nga ana tjetër krimin. S’kishte PS në Dibër. E ke të qartë këtë? U strukën një pjesë, një pjesë erdhën tek ne, të neveritur nga kriminelët që ishin futur në shtabe, dhe nuk pati fushatë. PS nuk pati fushatë dhe ditën e zgjedhjeve nuk pati zgjedhje. Asgjesim i proçesit politik. Ky është udhëkryqi ku ka ardhur Shqipëria dhe kjo është një këmbanë shumë më e madhe se sa për fatin e partive politike. Sipas kësaj logjike, duhet ta lëmë që ta bëjë të gjithë Shqipërinë Dibër, ta bëjë një thertore elektorale, pastaj çfarë? Pastaj ka destabilizim. Nëqoftëse ne lejojmë që ky të vjedhë dhe të shkatërrojë zgjedhjet e Qershorit, Shqipëria shkon drejt destabilizimit. Prandaj kjo është një lëvizje stabilizuese, jo destabilizuese. E gjithë gjuha e destabilizimit vjen nga këta, ’97, etj, etj. Ne jemi këtu për stabilizim, për paqe, për zgjedhje të lira dhe të ndershme.

Ervis Iljazi: Nuk ju duket se po kërkoni pushtet në tavolinë, të pamerituar?

 

Lulzim Basha: Jo pra jo, fare. Sapo ia sqarova kolegut tuaj. Përgjigjia është e qartë, jo. Dhe nuk ke asnjë arsye ta thuash këtë sepse kështu do të ishte nëse do i thosha, ik ti, të vij unë. Ti thua ky ka mandatin. Kjo është shumë e rëndësishme por do kesh durim ta dëgjosh. Mos të bëjmë propagandë me njëri tjetrin.

 

Ervis Iljazi: Jo unë s’po bëj propagandë, po bëj pyetje.

 

Lulzim Basha: Unë t’i lexoj shkrimet dhe ndonjëherë janë puro propagandë. Nuk e di nëse e ke nga mosthellimi.

 

Ervis Iljazi: Zoti Basha, unë nuk jam i mosthelluar sepse studimet e mia i kam bërë që të thellohem.

 

Lulzim Basha: Më vjen shumë mirë dhe uroj mos të jesh nën presion, sepse universiteti ku punon, është klienti numër 1 i kesaj qeverisjeje, është arsyeja pse u bë ligji për arsimin e lartë.

 

Ervis Iljazi: Kolegët e mi i ke ç’do ditë në çadër, ndaj lëre këtë propagandë.

 

Lulzim Basha: Shumë mirë, bravo iu qoftë. Nuk e kam me ty këtë debat. E kam me pronarin e universitetit tënd.

 

Ervis Iljazi: Pse kjo është Republika e Re? Njerëzit që janë kundër teje qenkan të frustruar, ata që janë pro teje qënkan të lirë. Eshtë mendësi totalitare. Më vjen keq që po ta them.

 

Lulzim Basha: Këtu, në këtë protestë, kanë ardhur kundërshtarë politikë të Partisë Demokratike, kështuqë kjo që thua ti nuk vlen fare.

 

Ervis Iljazi: Ku e gjeni forcën ti kërkoni kësaj mazhorance të ikë nga pushteti?

 

Lulzim Basha: Unë e gjej forcën te Xhorxh Uashingtoni, kur i tha sovranit, mbretit anglez, shporru. Shporru se këtu do jenë SHBA-të, nuk do jetë më kolonia jote. Forca është kjo. Ku e gjen forcën ky, që Republikën e Shqipërisë ta kthejë në Republikë krimi? Mandatin për çfarë e mori? Që të sillte Arben Ndokën, të sillte Armando Prengën, Elvis Roshin, Artur Bushin? Që të sillte Shqipërinë në krye të listës së prodhimit të kanabisit? Që të zhbënte ç’do garanci demokratike? Që ta kthente parlamentin në teatër ku nuk respektohet as rregullorja, as kushtetuta, as ligji. Po të përgjigjem me një fjali që për fat të mirë nuk është e imja por e një miku që erdhi këtu, Senatori, Mario Mauro, ish zv-Kryetari i Parlamentit Europian, ish Ministër i Mbrojtjes: Kur qeveria bojkoton demokracinë, mos i kërko opozitës pse bllokon parlamentin sepse s’ka më parlament.

 

Ervis Iljazi: Kjo që thua ti është keqqeverisje zoti Basha. Unë po flas për sistemin.

 

Lulzim Basha: Sistemi është vetëm një nocion abstrakt në momentin që nuk funksionon në praktikë.

 

Ervis Iljazi: Këtë keqqeverisje e dënon populli me votë, regjimin e ndërton opozita me mazhorancën. Eshtë tjetër gjë.

 

Lulzim Basha: Kjo është beteja, që të kenë votën qytetarët, mos ta kenë kriminelët kjo është beteja për të cilën po qëndrojmë këtu.

 

Anila Basha: Zoti Basha, gjithsesi në ç’do lloj rasti, duke menduar që ç’do lloj zgjidhjeje që mund të bëhet, mund të jetë e pranueshme prej jush. A do lejonit ju që gjykatat që do krijohen pas vetingut, t’ju hetojnë ju për Rrugën e Kombit dhe për vrasjet e 21 Janarit?

 

Lulzim Basha: Abuzimet për Rrugën e Kombit janë një sajesë politike dhe u demontuan në një proçes të rregullt.

 

Anila Basha: Kontrolli i Lartë i Shtetit ka raport për atë zoti Basha.

 

Lulzim Basha: Nuk u lodhe 8 vjet duke thënë gënjeshtrën këtu dhe s’dëgjon një minutë të vërtetën. Merr dhe lexo vendimin e Gjykatës së Lartë.

 

Anila Basha: Nuk është gënjeshtër. E thotë KLSH.

 

Lulzim Basha: Mirë, ok. Futu në internet, e ke në faqen e Gjykatës së Lartë vendimin e proçesit gjyqësor.

 

Anila Basha: Eshtë proçedurë zoti Basha, e kemi botuar njëmijë herë.

 

Lulzim Basha: Botoje edhe njëherë dhe do shikosh që kjo që thua është një sajesë politike

 

Anila Basha: Eshtë për procedurën.

 

Lulzim Basha: Ta kanë vënë lakrën në kokë, dhe kupton vetëm këtë, procedurë.

 

Anila Basha: Jeni akuzuar për Rrugën e Kombit dhe unë po flas për gjykatat që do krijohen nga vetingu, do pranoni këto dy gjykime dhe 21 Janarin, 4 vrasjet në bulevard?

 

Lulzim Basha: “Do pranosh” është një koncept jo perëndimor sepse qytetarët nuk kanë mundësinë të pranojnë apo të mos pranojnë shtetin ligjor. Barazia para ligjit është parim themelor i shtetit ligjor, i demokracive perëndimore.

 

Anila Basha: Që ju u shmangët me procedurë.

 

Lulzim Basha: I thua ti këto. Ta ka futur lakrën Edi Rama në kokë dhe ti e përsërit kudo. As nuk e di se çfarë po thua. Çfarë do të thotë për procedurë? Nuk e di çfarë po thua. Thua tre fjalë që i ke lidhur.

 

Anila Basha: Ju u shmangët nga gjyqi për procedurë.

 

Lulzim Basha: Më vjen keq që keqpërdoresh kaq keq nga propaganda e Ramës. Është një lakër. Ke 42 faqe vendim. Merri, lexoji po pate dëshirë, publikoji dhe do shikosh se çfarë do të thotë për procedurë. Do ta pranosh që të ka futur lakrën në kokë për këtë çështje. Pastroje kokën dhe e ke të qartë. Absolutisht para ligjit vendosen të gjithë, demokratë e socialistë.

 

Anila Basha: Ne kërkojmë që vendi ynë të ketë një opozitë dinjitoze. Unë ju bëra një pyetje. Gjykatat që do vijnë nga proçesi i vetingut, do hetojnë pra vrasjet e 21 Janarit dhe e dyta abuzimet me Rrugën e Kombit.

 

Lulzim Basha: Nuk ka asgjë për të fshehur para asnjë trupe gjyqësore, para asnjë gjykate. Jam deputeti i parë dhe i vetmi që kam kërkuar heqjen e mandatit.

 

Anila Basha: Ju nuk jeni deputet zoti Basha.

 

Lulzim Basha: Do bësh lojëra fjalësh tani. Atëhere pra, kur u hoq. I pari dhe i vetmi që kam kërkuar heqjen e mandatit tim, nëqoftëse e ke harruar. Pra, Lulzim Basha nuk trembet. Përkundrazi. Do drejtësi të pavarur, do gjyqtarë të pavarur, do prokurorë të pavarur, për këdo që të përballet me drejtësinë e të marrë atë që meriton sipas ligjit, jo sipas kundërshtarit politik.

 

Anila Basha: Pra, ju po thoni që gjykatat post veting do i pranoni për këto dy çështje.

 

Lulzim Basha: Hera e tretë që të përgjigjem. Fute në kokë. Nuk është çështje pranimi ose mospranimi. Në një shtet ligjor qytetarët i binden ligjit, i binden vendimeve të Gjykatës.

 

Anila Basha. Pra, do i bindeni.

 

Lulzim Basha: Siç kam bërë gjithmonë Anila.

 

Ervis Iljazi: Ky është një parlament i dalë nga vota të lira dhe të ndershme sepse i ka menaxhuar qeverisja e partisë tuaj dhe ky është fakt. Duke qene i tillë mendoj që ka të gjithë të drejtën kushtetuese, moralin politik dhe juridik të aprovojë ç’do reformë që i duhet vendit. Atëhere ju pse nuk i ndani këto dy gjëra. Pse nuk i ndani zgjedhjet e lira dhe të ndershme nga drejtësia? Ky është një parlament që ka dalë më vota të lira dhe ka të drejtën kushtetuese dhe morale për të aprovuar reformën në drejtësi, ndërsa zgjedhjet e lira janë për legjislacionin tjetër. Nuk e kuptoj pse nuk i ndani këto dy gjëra, këto dy momente? 

 

Lulzim Basha: Nuk e kuptoj se çfarë nuk kupton zoti Iljazi. Sepse reforma në drejtësi ka kaluar. Paketa kushtetuese ka kaluar, Partia Demokratike dhe Lulzim Basha janë përgëzuar nga Europa dhe nga Amerika për këtë. Për çfarë e ke fjalën? Për vettingun? Tani, vetëm nëse bëjmë përsëritje. Për arsyen e thjeshtë, sepse kjo që kanë sjellë në parlament, është në thyerje të paktit që kanë bërë para SHBA-ve dhe BE. Shkelën paktin dhe e bënë ligjin për vettingun, ligjin për KLGJ, KLP dhe ligje të tjera, siç ua donte qejfi.

 

Ervis Iljazi: Ligji u shpall kushtetues nga Komisioni i Venecias dhe nga Gjykata Kushtetuese.

 

Lulzim Basha: E ke gabim. Nuk bëhet shpallja nga Komisioni i Venecias.

 

Ervis Iljazi: Po e pranoi pra, nuk e ktheu.

Lulzim Basha: Do të futesh në argumenta? Atëhere dëgjo pak dy gjëra. Venecia nuk shpall ligjin e vettingut kushtetues apo jo. Lexo vendimin e Gjykatës Kushtetuese se çfarë ka thënë. I paske lexuar titullin, jo substancën. Një për një i ka dhënë të drejtë opozitës. Drejtori që kontrollohet nga kryeministri nuk mund të bëjë kontrollin e gjyqtarëve sepse nuk do e bëjë sipas formulës Hahn-Nuland por do e bëjë sipas formulës Rama-Shullazi. Ky është problemi. Ky është shqetësimi im se nuk kam asgjë personale as me ty, as me pikëpamjet e tua. Luftoj që të kesh pikëpamje të kundërta me mua, të kesh lirinë ti shprehësh, por thelbi është thelb, fakti është fakt. Shqiptarët dhe Partia Demokratike votuan për reformën Hahn-Nuland, jo për reformën Rama-Shullazi. Kaq është.

 

Rudina Xhunga: Pas kthimit nga Amerika, a ka gjasa që ju të uleni në tryezë dhe të dialogoni me zotin Meta dhe Rama?

 

Lulzim Basha: Siç ju thashë, kam një sërë ftesash në Europë, SHBA. Sigurisht që do ju mbaj të informuar për të gjitha lëvizjet e mia. Të gjitha janë në funksion të betejës popullore që po zhvillohet këtu në këtë shesh për zgjedhje të lira dhe të ndershme dhe po në funksion të tyre jam i gatshëm të ulem e të dialogoj me kundërshtarët e mi politikë për ti dhënë formë dhe jetë një qeverisjeje teknike që do garantojë zgjedhje të lira dhe të ndershme. Pa këtë asgjë. Nuk mund të bëhet fjalë për dialog fasadë. Asgjë nuk mund të ecë përpara pa garantuar të drejtën themelore të njeriut në demokraci, që është e drejta për zgjedhje të lira dhe të ndershme përmes një qeverie teknike.

 

Anila Basha: A do mendonit të hynit në koalicion parazgjedhor me LSI për të fituar zgjedhjet e 18 Qershorit?

 

Lulzim Basha: Nuk mendojmë fare për koalicion as me LSI as me PS, por mendojmë për zgjedhje të lira dhe të ndershme. Kemi koalicionin tonë që po zgjerohet dita ditës.

 

Rudina Xhunga: Me kë po zgjerohet?

 

Lulzim Basha: Herën e fundit me një parti e cila përfaqëson një shtresë të diskriminuar në vite dhe që ka qënë në koalicionin e Edi Ramës, Partia Europianiste për Integrim që është partia që përfaqëson interesat e komunitetit rom dhe egjiptian.

 

Anila Basha: Z.Basha kush do e drejtojë çadrën kur ju të jeni në SHBA?

 

Lulzim Basha: Ata që e drejtojnë edhe kur unë jam këtu. Fryma e shenjtë e besimit për zgjedhje të lira dhe të ndershme në liri dhe në demokraci, qytetarët.

 

Read More

Apeli i mbesës së At Zef Pllumit në një bashkëbisedim për shpirtin e Republikës së Re, në ditë e 32 të protestës. Artistë e historianë japin mesazhe në Sheshin e Lirisë

 

Në ditën e 32-të të protestës për zgjedhje të lira e të ndershme, në Sheshin e Lirisë u fol për letrat, mendimin, artin, krijimtarinë dhe shpirtin e një republike të re.

 

Në nisje, artistja Zana Turku ftoi të gjithë qytetarët të protestojnë duke kënduar së bashku, të mblidhemi në Sheshin e Lirisë. “Ne jemi këtu për liri, për demokraci, për zgjedhje të lira dhe të ndershme”, tha zonja Turku.

Aktorja Rajmonda Marku interpretoi në çadër dy poezi të njohura nga Gjergj Fishta dhe Arshi Pipa.

 

Mbesa e At Zef Plllumit, Angjelina Gjeka lexoi një paragraf nga libri “Rrno për me tregue”. “Unë nuk e mora dot librin me vete, e lashë në shtëpi, por librin e mora në zyrën e kryetarit Basha”, shprehu vlerësimin Angjelika Gjeka. Ajo bëri thirrje për të mos të harruar të kaluarën duke u ngritur në protestë për të mos lejuar më që në parlament të ketë ish-zyrtarë komunistë dhe kriminelë.

 

“U bëj thirrje të gjithë të bashkohen me ne sepse nuk do ta harrojnë të kaluarën. I bëj thirrje popullit shqiptar që të mos të harrojmë të kaluarën dhe komunizmin. Unë flas në emrin tim dhe nuk dua në Parlamentin shqiptar kriminelë dhe ata që kanë qenë në qeverinë komuniste. Shqipëria ka të rinj e të reja të shkolluar dhe ata duhet ti shohim në Parlament. Unë dua që në parlament ta shoh veten dhe fëmijët e mi ta shohin veten të përfaqësuar tek njerëz me vlera. Unë i bëj thirrje edhe z.Basha që në parlament të ketë sa më shumë vajza e djem të rinj”, tha Gjeka.

 

Historiania Henriketa Papaj u shpreh se republika e sotme nuk u përket qytetarëve por një grushti pushtetarësh. “Sot në pyesim se sa liri na garantohet përveç fasadës së demokracisë. E kujt është kjo republikë që kemi sot?! E Kolumbisë?! Eshtë e mbushur me hashash Shqipëria. Si mund të kemi këtë republikë kur pushtetin e kanë njerëzit e krimit dhe drogës. Demokracia është përfaqësim i popullit dhe duhet të kemi garanci të shkojmë të votojmë të lirë. Pushtetit duhet të jetë i popullit në një Republikë të Re. Fakti që ne jemi mbledhur këtu 3 muaj para zgjedhjeve tregon se demokracia sot në Shqipëri është e brishtë”, tha Papaj. Papaj theksoi rëndësinë e respektimit të të drejtave të njeriut dhe në vecanti të të drejtës për të votuar të lirë.

 

Tenori Rudi Sata shprehu mirënjohje për Partinë Demokratike që çdo mengjes këndon himnin kombëtar dhe ngre flamurin në çadër. Ai shprehu indinjatën e thellë të komunitetit të artistëve që sot nuk janë të lirë dhe nuk kanë mundësi të shprehin artin e tyre.

 

“Dua ti kujtoj z Rama një thënie të Sokratit; rreziku nuk vjen nga reagimi i të mençurit, por nga heshtja e injorantit. E pra, ky popull nuk është injorant por me dinjitet e kulturë dhe çadra e tregoi këtë”, tha Sata.

 

Read More

Ilva Tare: 31 ditë në çadër, cili është bilanci juaj? Sepse qeveria është aty ku ka qenë, janë ndërruar 4 ministra, z.Rama, për arsye elektorale ka thënë ai, koalicioni është sërish së bashku. Çfarë keni arritur?

 

Lulzim Basha: Asgjë nuk është më siç ka qenë para 18 Shkurtit. Shqipëria është krejt ndryshe. Frika është vrarë, kurajo qytetare është bashkuar në këtë shesh, i ka dhënë formë aspiratës për liri, për mundësi për jetë më të mirë. Eshtë një projekt që sot quhet Republika e Re që gjen konsensus, gjithmonë e në rritje jo vetëm mes mbështetësve të opozitës por mes mbështetësve anembanë Shqipërisë, gjithë qytetarëve shqiptarë. Asgjë nuk është si më parë dhe asgjë nuk do të jetë si më parë. Ky është bilanci i deritanishëm.

 

Ilva Tare: Ne në studio kishim një debat me analistët e pranishëm. Çfarë është Republika e Re, çfarë sistemi propozon, çfarë pikash ka në platformë?

 

Lulzim Basha: Nuk kemi minutazh për ta diskutuar në detaje por po u them atë që u thashë sot qytetarëve dhe që të arrijmë në këtë produkt, nënkupton shumë lëvizje. Një nga produktet e Republikës së Re është; pushtetari që ul kokën para qytetarit dhe jo qytetari para pushtetarit. Do të thotë një shtet ligjor i garancive për çdo individ, pavarësisht prej statusit social, ekonomik, politik, do të thotë një demokraci e vërtetë, jo fasadë ku qytetarët kanë në dorë me të vërtetë të caktojnë dhe pushojnë pushtetarët në çdo nivel dhe të vendosin mbi çështje të rëndësishme siç janë arsimi, shëndetësia, mbetjet, etj. Do të thotë, një drejtësi e vërtetë ku gjyqtarët dhe prokurorët luftojnë dhe nuk mbrojnë krimin dhe korrupsionin në nivele të larta qeveritare. Do të thotë, një konkurrencë e vërtetë e lirë, ku çdo qytetar në bazë të aftësive, në bazë të ideve, të mundësive ecën përpara në fushën e jetës, ndjek fatin e tij apo lumturinë e tij, apo të saj, dhe jo vetëm një grusht njerëzish që ngrysen dhe gdhihen para zyrave të pushtetit, të cilët kontrollojnë të gjithë asetet kombëtare, të gjithë tenderat publikë dhe tashmë kontrollojnë edhe tregun e zi të drogës, që e ka shndërruar Shqipërinë në një nga vendet më problematike në botë dhe numrin një në Europë, për drogën dhe kriminalitetin e lidhur me të.

Iris Luarasi: Përshëndetje, z.Basha! Në fakt pyetja që kisha ka lidhje me pjesën e komunikimit, në qoftë se ne presim nga politika shqiptare me figura të reja, një komunikim politik që do ishte shumë më modern sesa komunikimi që ne shohim sot. A nuk mendoni se juve do t’u shkonte më për shtat “një kostum” i ri, me këtë dua të them një komunikim i ri pa gjuhën e përdorur nga çadra, në kuptimin e atyre fjalive dhe fjalëve që kemi dëgjuar në retorikën tuaj të këtyre ditëve që ju jeni brenda në çadër. Sepse gjuha e vjetër i takon xhaketave të vjetra dhe politika pret që njerëzit e rinj në politikë të jenë modernë dhe veçanërisht kur vjen fjala për komunikimin politik?

 

Lulzim Basha: Faleminderit Iris! Çështja e komunikimit politik është edhe çështje estetike, por sot nuk është më çështje estetike. Ju kujtoj se si kryetar i opozitës në fjalimin tim të pare, i kam uruar mbarësi Edi Ramës dhe e kam siguruar për mbështetjen time dhe të Partisë Demokratike në gjithçka që lidhet me integrimin europian të vendit, sigurisht duke premtuar se do të bëjmë rolin tonë si një opozitë e fortë, ballore, argumentuese, denoncuese që është roli i opozitës në demokraci, por edhe krijuese dhe propozuese që po kështu duhet të jetë roli i opozitës në një demokraci europiane.

E kam bërë këtë, i nisur nga koncepti im për demokracinë, për rolin e opozitës, për rolin e qeverisjes që është një koncept krejtësisht i ndryshëm nga ai i kundërshtarit tim politik, është një koncept që buron sa nga gjenerata ime, aq nga privilegji që më është dhënë për t’u formuar në një nga vendet me demokraci dhe shtet ligjor të avancuar, ku jam ekspozuar ndaj këtyre vlerave dhe ka qenë ekspozimi ndaj këtyre vlerave që më ka frymëzuar të jap edhe unë kontributin tim që, këto vlera europiane, të qeverisin shqiptarët.

Përgjigjja ka qenë barbare; shkelje e Kushtetutës, shkelje e ligjeve, shkelje e ligjit duke filluar me nëpunësin civil i cili është harruar tani, futja e kriminelëve në politikë, ngritja e tyre në fron, shndërrimi i Shqipërisë në një hambar droge. Kur i thonim ne, na thonin pse nxini imazhin e Shqipërisë. Sot ke DASH, Europol që thonë të zezë mbi të bardhë atë që kemi denoncuar ne prej fillimit. Çështja këtu nuk është çështje estetike, por është çështje jetike, morale. Kur kemi një pacient që kollitet dhe dikush thotë pa e vizituar fare se ka kollë, jepi shurup, kur ndërkohë pacienti ka kancer dhe vdes. Atëherë opinioni tjetër, opinioni i dytë ka bërë një krim dhe një faj nëse nuk ka thënë: Ndal, këtu ka kancer, pacienti duhet të operohet.

Gjuha jonë, prej momentit të parë ka kërkuar të denoncojë rrezikun e jashtëzakonshëm jo vetëm për zgjedhjet e ardhshme, por për gjeneratat e ardhshme, në qoftë se Shqipëria kthehet në një bastion të krimit të institucionalizuar. Jo thjesht 30 kriminelë deputetë, kryetarë bashkish, drejtorë administrate, por në një Republikë ku krimi zgjedh Parlamentin, krimi zgjedh qeverisjen, krimi administron shtetin, krimi administron pronat dhe kjo do të ndodhë, është gati të ndodhë, në qoftë se do ta lejojmë, jo Partinë Socialiste, se Partia Socialiste është në koma, por Rilindjen e kriminalizuar, të zëvendësojë zgjedhjet e lira dhe të ndershme me një përballje mes partive politike në njërën anë dhe krimin në pushtet në anën tjetër. Këtu nuk ka vend më për estetikë, por për përballje, për të treguar faktet siç janë.

Në qoftë se Elvis Roshi ka përdhunuar në grup një minorene, unë do ta them këtë dhe të skuqen ata që e kanë bërë kryetar bashkie, dhe jo unë. Në qoftë se Armando Prenga ka plagosur 4 qytetarë me armë pa leje në derën e komisariatit si cub, unë do ta them këtë, dhe le të skuqet ai që e ka bërë deputet. E kështu me radhë se nuk dua të zgjatem se çështjet janë monstruoze. Pra, problemi është etika morale dhe jo estetika.

 

Ilva Tare: Problemi është se si është thënë ajo. Z. Basha vërej se në daljet tuaja nga çadra mbani afër zonja dhe zonjusha shumë simpatike. E keni për estetikë këtë apo do të reflektojë edhe numrin e zonjave në listat e ardhshme për deputetë të Partisë Demokratike?

 

Lulzim Basha: Faleminderit Ilva për komplimentin! Këto zonja dhe zonjusha, dhe këta zotërinj dhe të rinj dhe të reja, janë ditë për ditë e natë për natë në këtë çadër. Mjafton që mediat ta japin pak hapësirë, dhe jo vetëm kur flet kryetari i Partisë Demokratike, apo personalitetet e huaja që na vizitojnë, se sot për shembull këta të rinj dhe të reja për një orë kanë folur dhe janë shprehur më mirë, më bukur, më qartë se sa jam shprehur unë për Republikën e Re, për kërkesën e tyre për ndryshim, për dashurinë e tyre për këtë vend dhe për dashurinë e tyre për gjithë njerëzit, të djathtë dhe të majtë, të cilët meritojnë një mundësi për një jetë më të mirë dhe jo një klikë kriminale në pushtet.

 

Ilva Tare: Z.Basha, Rama e ka thënë dje përmes komunikimit mes “Facebook”-ut, se qeveri teknike nuk ka, shtyrje zgjedhjesh nuk ka, zgjohuni, dilni nga çadra! Çfarë keni arritur nëse nuk është afër zgjidhjes asnjë prej këtyre zgjidhjeve?

 

Lulzim Basha: Edi Rama është në një krizë të thellë politike, morale dhe psikike. Por nuk është detyra ime të merrem me Edi Ramën sot. Edi Rama ka vetëm një rrugëdalje; të japë dorëheqje! Vendimi popullor i 18 shkurtit është i pakthyeshëm. Qeveria teknike është e vetmja garanci për zgjedhje të lira dhe të ndershme, jo se duam ne, por sepse kështu e solli punën Edi Rama. Me krimin në pushtet, me refuzimin për të zbatuar ligjin për dekriminalizimin, me mbushjen e Shqipërisë me drogë, me lirimin e bandave për t’i shërbyer për zgjedhje, me pesë palë zgjedhje të prishura dhe me asgjesimin e reformës zgjedhore, nuk la asnjë tullë, asnjë gurë për të vënë ai këmbën dhe për të thënë: Shiko se mund ta zgjidhim ndryshe. Ikja e Edi Ramës është çështje kohe dhe ne jemi këtu, dhe unë jam këtu, që të garantojmë që ikja e tij të jetë me sa më pak kosto për Shqipërinë. Prandaj jemi të vendosur për këtë lëvizje paqësore. Ndërkohë që ai bën thirrje për dhunë duke kujtuar, evokuar vitin e zi ’97, duke kërcënuar protestuesit paqësorë, të cilët edhe i ka goditur, ka çuar njerëz t’i rrahë këtu. Ky është mentaliteti i tij, ky është Edi Rama dhe s’ka si të jetë ndryshe njeriu që kriminalizoi shtetin shqiptar.

 

Ilva Tare: Kryeministri Rama tha dje se jam i gatshëm kurdo dhe kudo, qoftë edhe në çadër të vij dhe të dialogoj me ju. Ka aktualisht një kanal komunikimi me Partinë Socialiste?

 

Lulzim Basha: Dialog fasadë, dialog për t’i hedhë hi syve qytetarëve dhe për të vazhduar prap avazin e vjetër nuk ka për të pasur. Ka për të patur dialog vetëm për përmbushje të kërkesës tonë për zgjedhje të lira dhe të ndershme, përmes një qeverie teknike ku natyrisht Edi Rama dhe PS duhet të marrin përgjegjësitë e tyre për ta mbështetur këtë qeveri.

 

Ilva Tare: Për të mbërritur tek qeveria teknike ju duhet marrëveshje me Partinë Socialiste, nëse nuk bisedoni me të dhe Rama thotë nuk e jap qeverinë teknike. Çfarë do të bëni?

 

Lulzim Basha: Do të qëndrojmë këtu, do të jemi gjithmonë e më shumë, gjithmonë e me të vendosur derisa qeverisja, vaji i së cilës ka mbaruar, ta kuptojë se nuk është më qeverisja e shqiptarëve dhe nuk përfaqëson më asgjë përveçse klaneve kriminale dhe banditëve që ka sjellë në pushtet.

 

Ilva Tare: Me Lëvizjen Socialiste për Integrim a ka komunikim? Z.Meta në qëndrimet publike ka thënë jo ultimatume por hajde të dialogojmë. A jeni të gatshëm të flisni me të?

 

Lulzim Basha: Nuk ka asnjë komunikim. Komunikim për të bërë telenovelë me Lulzim Bashën nuk mund të ketë.

 

Ilva Tare: Po ndërmjetës që komunikon me ju?

 

Lulzim Basha: Nuk ka.

 

Ilva Tare: Se thonë që shohin shpesh dikë që hyn  e del nga zyrat e njëri-tjetrit…

 

Lulzim Basha: Eh sa shohin ashtu Ilva. Ky qytet është i paparë.

 

Ilva Tare: Udhëtimi në SHBA është vizitë zyrtare apo private? Do keni takim me zyrtarë të lartë të DASH apo do të keni takime me kongresmenë, senatorë që janë lehtësisht të lobueshëm?

 

Lulzim Basha: Unë kam një sërë ftesash nga partitë simotra dhe nga kryeministra që nuk janë të lobueshëm. Bilal nuk do të ketë në mes, për këtë të garantoj. Një Bilal ke të dënuar dhe një kryeministër, të cilit duhet t’i hiqet viza. Bilali i shkretë e hëngri, ky vazhdon qëndron këtu. Do të kem takime në Europë dhe në SHBA në funksion të axhendës për zgjedhje të lira dhe të ndershme dhe do t’ju informoj kur t’i kem këto takime dhe kur t’i zhvilloj ato.

 

Ilva Tare: Pra, po niseni me një axhendë të qartë, me vizita zyrtare?

 

Lulzim Basha: Kur të nisem do t’ju informoj për të gjitha takimet dhe për gjithë axhendën time.

 

Ilva Tare: Çfarë ju kanë kërkuar ambasadorët gjatë takimeve të ditëve të fundit, por edhe ai amerikan gjithashtu? Një nga kërkesat e tyre është që të ktheheni në Parlament dhe të votoni Vettingun. Afati përfundimtar është 31 marsi. Do të ktheheni në Parlament z.Basha?

 

Lulzim Basha: Vetëm nëse ka një pakt kombëtar për zgjedhje të lira dhe të ndershme. Ambasadorët janë shprehur, kanë kuptuar qartësisht kauzën tonë, pashë me kënaqësi që disa prej tyre janë shprehur publikisht me deklarata që janë në mbështetje për zgjedhje të lira dhe të ndershme, si çështja më akute e Shqipërisë, këto humbasin pak në mediat e kontrolluara nga qeveria. Përfitoj nga ky ekran për të thënë mendimin tim. Kjo nuk është furtunë në gotë uji, është një krizë e thellë që vlonte dhe papritur ka dalë në sipërfaqe. Eshtë kriza e një shteti të kriminalizuar në palcë ku krimi dhe droga kërcënojnë fondamentin e bashkekzistencës demokratike, që janë zgjedhjet e lira dhe të ndershme. Këtu absolutisht kemi gjetur mirëkuptim dhe mbështetje, si dhe përgëzime për natyrën paqësore dhe thellësisht europiane dhe euroatlantike të protestës.

 

Ilva Tare: Thatë diçka që meriton një përgjigje, vetëm nëse do të ketë një pakt kombëtar do të kthehem për vetingun në Parlament. Çfarë parashikon pakti kombëtar?

 

Lulzim Basha: Kam parasysh një pakt politik të të gjitha partive politike, për një qeveri teknike, për zgjedhje të lira dhe të ndershme.

 

Ilva Tare: Jemi tre muaj nga 18 qershori, i cili duket se nuk do të shtyhet, të paktën siç deklaron maxhoranca. Mos po humbisni kohë dhe nuk po bëni fushatë?

 

Lulzim Basha: Zgjedhje fasadë, zgjedhje me drogën, zgjedhje me krimin, zgjedhje me Edi Ramën kryeministër nuk do të ketë as me 18 qershor dhe as me 18 nëntor. Standardet do të zbatohen. Shqiptarët do të kenë vetëm zgjedhje të lira dhe të ndershme. Dhe kjo është një betejë që do të fitohet, jo thjesht për zgjedhjet  e ardhshme por për gjeneratat e ardhshme të shqiptarëve. Vetëm zgjedhje të standardit europian. Zgjedhje të tjera nuk do të ketë

 

Ilva Tare: Kujt do t’ia  lini në kujdestari çadrën këto ditë që nuk do të jeni në Tiranë?

 

Lulzim Basha: Të rejave dhe të rinjve, të gjithë qytetarëve.

 

 

Read More

Kryetari Lulzim Basha në bashkëbisedim me të rinj dhe të reja shqiptarë në Sheshin e Lirisë. Në Republikën e Re, qeveritari do të ulë kokën para qytetarit, dhe jo qytetari para qeveritarit

Paraditen e 20 marsit kryetari i PD Lulzim Basha bashkëbisedoi me rininë shqiptare në Sheshin e Lirisë lidhur me problemet e shumta të shkaktuara nga qeverisja, por dhe për shpresën e besimin për të dalë nga kriza, për entuziasmin që ka ngjallur projekti i Republikës së Re.

Pjesmarrës në forum ishin të rinj dhe të reja të penalizuar nga reforma e arsimit të lartë, një ligj që ka sakrifikuar ëndrrat dhe të ardhmen e qindra studentëve shqiptarë.

Barbara Doda, studente e arkitekturës tha se realiteti me të cilën përballen studentët sot është shumë larg atyre vlerave europiane në të cilat rinia sot beson dhe aspiron.

Gerald Metko tregoi eksperiencën e tij, ku si student me mesatare 9.11 në gjimnaz dhe me rezultate maksimale në provimet e maturës, u gjend jashtë bankave të shkollës pasi nuk arriti të fitonte asnjë degë universiteti.

Marash Logu, student i fakultetit të drejtësisë në Shkodër hoqi një paralele mes protestës së studentëve të viteve ’90. Duke cituar profesor Artan Fugën i cili e quan sheshin e qytetarëve si çadrën e lirive politike, Logu tha se ashtu si 27 vite më parë edhe kërkesat e qytetarëve sot fillojnë me zgjedhje të lira e të ndershme dhe përmes qëndresës popullore dhe mbështetjes intelektuale dhe ndërkombëtare po kthehet në gurin e themelit të Republikës së Re.

Belind Këlliçi tha se të rinjtë dhe të rejat shqiptare sot kanë dy modele mes të cilëve të zgjedhin. Fillimisht është model i kryeministrit Rama, Shqipëria për njerëzit si Armando Prenga, Elvis Roshi dhe gjithë kriminelët të cilët i veshi me pushtet. Modeli tjetër është ai i vlerave europiane i propozuar nga kryetari i Partisë Demokratike Lulzim Basha.

Lulzim Basha i tha të rinjve të mbledhur në forum sot, se ashtu si çdo i ri që i është bashkuar kauzës për zgjedhje të lira e të ndershme, janë në ballë të kësaj proteste dhe do të jenë edhe në ballë të Republikës së Re që po vjen.

“Sa herë që ai flamur ngrihet këtu në hyrje të Sheshit të Lirisë dhe valëvitet mbi këtë qiell, kemi një ëndërr, kemi një shpresë dhe kjo është rinia shqiptare. Në këtë shesh rinia e ka thënë fjalën e saj që prej ditës së parë, e tha edhe sot. Sot e mot ky shesh dhe gjithë Shqipëria do të jetë prona e të të rinjve dhe të rejave shqiptare  dhe e vullnetit të tyre për liri, demokraci, barazi para ligjit dhe për konkurrencë të lirë e të ndershme. Republika e Re tashmë nuk është thjesht një koncept në kokën e askujt por është një shpresë dhe një vendim në shpirtin e gjithkujt.”

Të rinjtë duhet të jenë pararojë dhe pjesmarrës të republikës së re edhe përmes pjesmarrjes në politikbërje – tha Lulzim Basha.

“Republika e Re do të garantojë një shtet ligjor funksional, ku ligji shkruhet dhe votohet në emër të cdo shqiptari, zbatohet njësoj për çdo shqiptar. Republika e re e garanton këtë përmes zgjedhjeve të lira dhe të ndershme dhe zgjedhje të lira dhe të ndershme nuk do të thotë thjesht dhe vetëm rregulla loje me zbatime por do të thotë edhe rregulla loje brenda partisë , do të thotë qarkullim elitash, do të thotë sa më shumë të rinj e të reja në parlamentin e republikës së re. Sa më takon mua një e treta e kandidatëve të PD në zgjehdjet e lira dhe të ndershme do të jeni ju të rinj  e të reja të PD , të rinj e të reja shqiptarë”.

Politikat e kabinetit të tij, në momentin e parë të marrjes së pushtetit, do të sigurohen për mbrojtjen e interest të të rinjve dhe xhepave të familjeve të tyre e jo oligarkëve shqiptarë – tha Basha.

“Kur ju, kur qytetarët të kenë vendosur me zgjedhje të lira dhe të ndershme, qeveria e dalë nga vota juaj dhe kryeministri që ju do të zgjidhni do të konkretizohet me një akt. Këtu, në këtë shesh, orën e parë të betimit të kabinetit të Republikës së Re, do të firmoset anulimi i Ligjit për Arsimin e Lartë. Arsimi i lartë publik do të jetë me tarifa të përballueshme nga çdo i ri dhe e re shqiptare. 10 mijë të rinj do të paguhen nga Republika e Re çdo vit me stazhe 1 vjeçare për të ndërtuar urën mes bankave të Universitetit dhe tregut të punës.”

Zoti Basha tha se korrupsioni në fund do të dorëzohet por ajo që sëbashku me qytetarët nisi një muaj më parë, do të vazhdojë të shpërndahet anëembanë Shqipërisë si ëndrra më e bukur dhe projekti më i dlirë që prej Shqipërisë së vitit 1990.

Read More

Sa është zbukuruar ky shesh sot në këtë ditë të 31-të të protestës nga drita e syrit tonë, rinia shqiptare, të rejat dhe të rinjtë, nga shpresa më e dëlirë e atdheut, e kombit e shoqërisë tonë. Këto të reja dhe këta të rinj, e stolisin këtë shesh jo vetëm me pamjen e tyre, por me mençurinë e tyre, me fjalën e tyre, me forcën e tyre, me vendosmërinë e tyre.

Sa herë që ai flamur ngrihet këtu në hyrje të Sheshit të Lirisë dhe valëvitet mbi këtë qiell, sa herë që himni kombëtar ushton, sa herë që shpresa e përditshme rritet dhe buron nga zemrat tona, ne kemi një garanci, kemi një ëndërr, kemi një shpresë, dhe kjo është rinia shqiptare.

Në këtë shesh, rinia e ka thënë fjalën e saj që prej ditës së parë, e tha edhe sot. Jam i përulur por edhe i frymëzuar tek dëgjoj të rejat dhe të rinjtë në këtë shesh që artikulojnë me bindje atdhetare, me mençuri të jashtëzakonshme dhe me kulturë europiane, besimin e tyre dhe vendosmërinë e tyre për të mos e lënë Shqipërinë kështu siç ka qenë. Kur e themi ne, është një propozim, kur e thotë rinia është vendim dhe do të bëhet realitet.

Këtë e di mirë çdo shqiptar, na e tregon historia jonë, na e tregon dhjetori i vitit 1990, ku një komb i tërë, një shoqëri e tërë, e kërrusur në dëshpërim, izolim dhe shtypje, u ngrit në këmbë. Sepse, në këmbë e ngriti rinia, e ngritën të rinjtë dhe të rejat që panë të ardhmen përtej perdes së zymtë të realitetit të përditshëm, panë agimin e një dielli të ri e një shprese të re, të lirisë dhe demokracisë.

Sot e tash 4 vjet në një Shqipëri të nëpërkëmbur e të kërrusur nën peshën e krimit, drogës, korrupsionit, varfërisë, arrogancës, të qeverisë të bërë njësh me krimin dhe krimit të bërë njësh me qeverinë, do të ishte e pamundur të çoheshim e të bashkoheshim të gjithë kështu, nëse kësaj lëvizje të madhe popullore, më të madhe se Partia Demokratike, më të madhe se opozita, nuk do t’i printe ëndrra më e bukur e çdo kombi, shpresa më e madhe për të nesërmen, rinia shqiptare.

Ndaj, dua t’u them sot, se para së gjithash, dhe mbi të gjitha, Republika e Re që po buron nga ky shesh i qendresës, nga ky Shesh i Lirisë është republika juaj, e juaja të rinj dhe të reja shqiptare.

Deri para 31 ditësh, këtu në këtë shesh tundeshin hijerëndë të korruptuarit, të inkriminuarit e veshur me pushtet, sa në zyrat e shtetit, sa në zyrat e njëri-tjetrit, sa në restorante ku fryhen ditë për ditë me paratë e grabitura nga gjaku dhe djersa e popullit, ky shesh pra i qytetit, sheshi i kombit shqiptar, ishte prona e tyre.

E pra, sot e mot ky shesh dhe gjithë Shqipëria do të jetë prona e të të rinjve dhe të rejave shqiptare, e dëlirësisë së tyre, e çiltërsisë së tyre dhe e vullnetit të tyre për liri, për demokraci, për barazi para ligjit dhe për konkurencë të lirë e të ndershme.

Ja si ka filluar dalëngangadalë të tërhiqet dallga e vjetër e republikës së krimit, të struket pas fasadave, të mërmërisë me vete fjalë pa kuptim. Dhe ja si ka filluar ditë për ditë të burojë shpresa, vendosmëria, besimi se Republika e Re tashmë nuk është thjesht një koncept në kokën e askujt, por është një shpresë dhe një vendim në shpirtin e gjithkujt.

Republika e Re është republika ku qytetarët nuk kanë frikë hijerëndët që kapardisen me arrogancën e pushtetit.

Republika e Re është vendi ku pushtetarët ulin kokën para çdo qytetari.

Republika e Re e garanton këtë përmes një shteti ligjor funksional, ku ligji shkruhet he votohet në emër të cdo shqiptari, zbatohet njësoj për çdo shqiptar.

Republika e re e garanton këtë përmes zgjedhjeve të lira dhe të ndershme dhe zgjedhje të lira dhe të ndershme nuk do të thotë thjesht dhe vetëm rregulla loje, por do të thotë edhe rregulla loje brenda partisë , do të thotë qarkullim elitash, do të thotë sa më shumë të rinj e të reja në parlamentin e Republikës së Re dhe në nivelet vendimarrësë të Republikës së Re.

Dhe sa më takon mua, një e treta e kandidatëve të PD, në zgjedHjet e lira dhe të ndershme që do ti paraprijnë Republikës së Re do të jeni ju të rinj e të reja të PD, të rinj e të reja shqiptarë. Asgjë nuk ju mungon. Keni mencurinë, keni gjykimin politik, keni dashurinë për Shqipërinë, për atdheun, për familjen për shoqërinë për komunitetin.

Ju mungon dicka, dhe shyqyr Zotit që ju mungon, dhe kurrë mos e paci, ju mungon vesi, ju mungon dinakëria, ju mungon hipokrizia.

E pra, me këtë ciltërsi që keni demostruar sot në këtë shesh, me këtë vendosmëri që keni demostruar tash e 31 ditë, le ta dijë cdo shqiptar nga Jugu në Veri në Shqipëri, Kosovë, Maqedoni Preshevë, Mal të Zi e kudo në diasporë, se Republika e re jo vetëm që nuk do të ndalet por do të jetë realiteti politik kudo ku frymon dhe flitet shqip.

Le ta dinë miqtë tanë, se ky nuk është një projekt individual apo partiak, se nuk vjen e as nuk shkon me Lulzim Bashën apo me dikë tjetër. Se ky projekt ka një themel të patjetërsueshëm dhe kjo është shpresa dhe vendosmëria e rinisë për një jetë të re, për një Shqipëri të re, ku asgjë nuk duhet të jetë dhe asgjë nuk do të jetë më si më parë.

Këtë e di fare mirë dhe Edi Rama, i cili dje në monolog pranoi se, Shqipëria është në anomali, sigurisht nuk i njohin vetes përgjegjësitë se janë në këtë anomali, që janë përgjegjësit e drogës, krimit në pushtet, korrupsionit galopant që ia kanë shkruajtur të zezë mbi të bardhë SHBA, me Departamentin e Shtetit në raportin vjetor, BE në raportin e Europolit.

Jo, këto nuk i përmendi, por tha megjithëse është anomali, unë do ti shkoj deri në fund. E pra, përgjigjen më të mirë ia dha një nga gjigandët e mendimit intelektual, Aurel Plasari, kur  i tha; “Mos mor djalë se do të përfundosh si Ducja”.

Edi Rama, ta dish se jemi këtu për të të shpëtuar lëkurën që të mos përfundosh si Ducja. Republika e Re do të garantojë që as ti e as ndokush tjetër mos të përfundojësi Ducja. Edi Rama ti je i ikur. Je i ikur. Misioni ynë, këta misionarë këtu, janë mbi të gjitha misionarë të paqes, sepse ne duam që ikja jote të ketë sa më pak kosto për Shqipërinë dhe për shqiptarët e thjeshtë.

Se po të ishte puna për karshillëk, 18 Shkurti i dytë, të gjen në lanë dhe jo në zyrë. Por ne jemi këtu si patriotë, si demokratë, si njerëz të një lëvizje të madhe të paprecedentë në historinë tone, që është mbi të gjitha një lëvizje qytetare dhe një lëvizje paqësore. Do të qëndrojmë gjatë, ne në fakt na pëlqen të qëndrojmë këtu, sepse ky shesh është pagëzuar tashmë, dhe domethënia e tij për sot dhe nesër, ka hyrë në histori.

Por do të qëndrojmë këtu me një vetëdije të madhe se, me vendosmërinë dhe qëndresën këtu, përmes një qëndresë paqësore por të vendosur, do t’i sigurojmë Shqipërisë jo vetëm zgjedhje të lira dhe të ndershme, por dhe fytyrën me parametrat e vërteta të një vendi evropian, të gatshëm për anëtarësim në BE.

Do ta bëjmë këtë shërbim ne. Do ta bëjmë këtë shërbim sepse gjithçka që ti bëre në katër vite, është se largove Shqipërinë nga Europa. Gjithçka që bëre në katër vite, nxive Shqipërinë në sytë e Europës.

Me krimineltë, me drogën, me nxirjen e Shqipërisë në çdo raport ndërkombëtar, e ata që lexojnë këto raporte, na pandehin si njerëz të botës së tretë. Na pandehin për një shoqëri të pacivilizuar që nuk meriton të jetë as në gjeografinë europiane e jo më në gjeopolitikën europiane.

E pra, këtë borxh të madh që Edi Rama dhe një grusht kriminelësh ndërtuan për katër vite në konton europiane, po e lan ditë për ditë kjo qëndresë qytetare, europiane, nga ky Shesh i Lirisë.

Hiqe nga mendja se ka rrugë tjetër.

Sado të shpifësh ti dhe ca zullapër që ti ke shpërndarë në disa media zullape, të blera, kanale qeveritare, të cilat nga mëngjesi deri në darkë kanë marrë për detyrë, përkundër pagesave të majme me paratë e taksapaguesve shqiptarë dhe me paratë e ndyra të drogës, e vërteta është fare e thjeshtë.

Nuk ka patur që prej vitit 1990, lëvizje më europiane, më euroatlantike se kjo që zhvillohet sot në këtë shesh. Ndaj, përfundimi është i qartë, është fitorja e Shqipërisë europiane. Përfundimi është; Republika e Re që do të themelohet mbi votën e lirë të çdo qytetari shqiptar.

Zgjedhje pa garantuar votën e lirë të çdo qytetari shqiptar, ne nuk do të lejojmë. Nuk do të ketë zgjedhje fasadë.

Ndaj, bëji derman vetes, na kurse edhe ne, gjithë këtë hare dhe gëzim, rritjen e rradhëve ditë për ditë, bëhu i zgjuar, jep dorëheqjen, hap rrugën për qeveri teknike dhe për zgjedhje të lira dhe të ndershme.

Se çfarë do të ndodhë, do ta caktojnë qytetarët.

U them të rinjve dhe të rejave shqiptare, Demokratë, socialistë dhe çdo partie qofshin, apo pa bindje politike.

Kur ju, kur qytetarët të kenë vendosur me zgjedhje të lira dhe të ndershme, qeveria e dalë nga vota juaj dhe kryeministri që ju do të zgjidhni, realiteti i ri politik, Republika e Re, do të konkretizohet me një akt.

Këtu, në këtë shesh, orën e parë të betimit të kabinetit të Republikës së Re, do të firmoset anulimi i Ligjit për Arsimin e Lartë.

Këtu në këtë shesh, orën e parë!

Rinia do të ketë jo vetëm veshin, por edhe mbështetjen e fuqishme të Republikës së Re. Arsimi i lartë publik do të jetë me tarifa të përballueshme nga çdo i ri dhe e re shqiptare.

10 mijë të rinj do të paguhen nga Republika e Re çdo vit me stazhe 1 vjeçare për të ndërtuar urën mes bankave të Universitetit dhe tregut të punës.

Ndaj, kemi shumë e shumë çështje të tjera për të diskutuar e për të vendosur. Pjesë e një mozaiku të bukur të shpresës dhe të projektit të Republikës së Re.

Nuk e di sa kohë do të kemi këtu në këtë çadër.

Shanset janë që nuk do të kemi edhe shumë kohë, sepse e vjetra po bie, krimi do të bjerë, korrupsioni do të dorëzohet, por, ju garantoj se ajo që së bashku kemi nisur këtu do të vazhdojë dhe do të shpërndahet anekënd Shqipërisë, si ëndrra më e bukur, projekti më i dlirë, që prej Shqipërisë së vitit 1990.

Dhe për këtë, ka një autor, një meritë të madhe, dhe kjo është rinia shqiptare.

Zoti e bekoftë atë,

Zoti ju bekoftë ju, të rinj dhe të reja të Shqipërisë,

Zoti e bekoftë Shqipërinë.

 

Read More

Kryedemokrati Lulzim Basha, bashkëbisedim në forumin për papunësinë

Paradite në Sheshin e Lirisë, kryetari demokrat Lulzim Basha, bashkëbisedoi me pedagogë, profesionistë dhe student, për problemet e tyre lidhur me papunësinë.

Arbi Agalliu, pedagog në Universitetin e Ekonomisë prej thuajse 10 vitesh, tha se studentët sot gjenden të pambështetur, jo vetëm nga shteti por edhe nga bizneset të cilat i kanë tkurrur politikat e këtij kabineti. Agalliu denoncoi faktin se qeveria nuk ka asnjë plan B për personat të cilët sot po mbeten pa punë.

Ledina Alolli, pedagoge në Universitetin e Korçës, tha se çelja e vendeve të reja të punës është dhe thelbi i rritjes ekonomike të një vendi. Kësaj qeverie i mungon vizioni për çeljen e vendeve të reja të punës, tha Ledina, e them me plotë bindje sepse papunësia sot ka arritur në 30% të popullsisë.

Fredian Shehu tha se në mënyrë që Shqipëria të kthehet në një vend tërheqës për bizneset duhet të ekzistojnë tre kushte, rendi dhe siguria, konkurrenca e ndershme dhe taksat e ulëta, tre kushte të cilat Shqipërisë i mungojnë prej vitesh.

Një e re ngriti shqetësimin se ç’do të ndodhë me ata qindra mijëra të rinj, të cilët gjenden në mes të rrugës pas mbylljes së bizneseve si rasti i Call-Center-ave.

Kryetari Lulzim Basha tha se detyra numër një e Republikës së Re do të jetë punësimi i qytetarëve shqiptarë dhe ndihma ndaj miliona shqiptarëve të cilët meritojnë vëmendjen dhe zgjidhjen më të shpejtë në ekonomi.

“Ne jemi gati që me zgjedhje të lira dhe të ndershme dhe me besimin e shqiptarëve të nisim që nesër qeverisjen e Shqipërisë me një program që do ta nxjerrë atë nga kriza ekonomike, nga varfëria, drejt zhvillimit të pandalshëm ekonomik. Qeveria jonë do jetë qeveria më përkrahëse për sipërmarrjen që Shqipëria ka njohur në 27 vite. Sepse sipërmarrja do jetë aleati ynë kryesor për punësimin. Shtet do të thotë shtet ligjor, jo shtet i kryeministrit. Do të thotë mbrojtje sipas ligjit. Në radhë të parë do të thotë goditje e krimit dhe e bandave. Ky do të jetë akti i parë i qeverisjes së re në Republikën e Re. Luftë pa kompromis kundër bandave dhe krimit, shtet ligjor dhe garanci ligjore për sipërmarrjen dhe për ç’do qytetar të Republikës. Konkurrencë e lirë.”

Në këto katër vjet ekonomia shqiptare, bizneset, fuqia blerëse e qytetarëve ka rënë dhe kjo sipas kryedemokratit Basha vjen si pasojë e tregut të sunduar nga oligarkët.

“Edi Rama rriti taksat, rriti çmimin e naftës duke rritur dy vite radhazi me 120 lekë akcizën mbi naftën. 3 faktorë që kanë ndikuar në rritjen e drejtpërdrejtë të kostos së prodhimit në Shqipëri. Shto këtu edhe korrupsionin qeveritar galopant, siç thotë raporti i DASH në raportin e kësaj jave. Dhe në këtë treg të vogël për përmasat e tregjeve europiane, e vetmja formulë për gjallërimin e ekonomisë është konkurenca e ndershme që garanton rritjen e cilësisë, uljen e kostos dhe një treg funksional.Por kjo që kemi ne nuk është ekonomia e tregut të lirë. Kjo është ekonomia e tregut të kontrolluar nga qeveria.”

Zgjidhja për demokratët vjen përmes një pakete fiskale dhe krijimit të kushteve për një treg të lirë me konkurencë të drejtë.

“Për biznesin e vogël, për 1.5% të xhiros do të ketë një pullë të demonstruar në ambientin e biznesit të vogël. Do të thotë që taksidarët nuk do të duken më në ambientet e biznesit të vogël. Themeli i këtij sistemi europian i taksimit, është vetëdeklarimi nga sipërmarrja, që do të thotë ta trajtosh sipërmarrjen si partner, jo si hajdut të pagjykuar. Vetëdeklarimi, taksa 9%, ulja e çmimit të naftës dhe çmimit të energjisë për aktivitetin prodhues në Shqipëri, do të jenë stimuj të fuqishëm ekonomikë. Me këtë platformë ekonomike, të gjitha këto masa lehtësuese kuantifikohen në një sasi prej afro 1 miliardë euro më shumë në ekonominë shqiptare, që në vitin e parë, vetëm përmes masave lehtësuese fiskale.”

Read More