Blog

Kryetari i PD, Lulzim Basha priti në selinë e Partisë Demokratike ambasadorin e Federatës Ruse z. Aleksandër Karpushin.

Gjatë takimit z Basha iu përgjigj interesit të ambasadorit Karpushin mbi zhvillimet politike në vend. Z. Karpushin nga ana e tij nënvizoi se parimi bazë i politikës së jashtme të Rusisë, të cilit i qendron edhe Ambasada Ruse në Tiranë, është parimi i mosndërhyrjes në punët e brendshme të vendeve të tjera.

Zoti Basha dhe zoti Karpushin shkembyen opinione edhe mbi zhvillimet në rajon.

Zoti Basha theksoi se njohja e pavarësisë së Kosovës dhe mbështetja për zbatimin e plotë të marrëveshjes së Ohrit në Maqedoni përmes aplikimit të dygjuhësisë nga Federata Ruse do të rihapnin një kapitull të ri në marrëdhëniet bilaterale.

Ambasadori Karpushin theksoi se Federata Ruse vlerëson se ekzistojnë mundësi të pashfrytëzuara për të rritur bashkëpunimin ekonomik pragmatik mes dy vendeve tona dhe shpreson se në të ardhmen të punohet për të rritur nivelin e këtij bashkëpunimi. Z. Karpushin shprehu besimin se një impuls të fortë shkëmbimeve dypaleshe ekonomike do t’i japë takimi në muajin prill në Tiranë i bashkëkryetarëve të Komisionit Ndërqeveritar Rusi-Shqipëri për Tregtinë, Bashkëpunimin Ekonomik dhe Tekniko-Shkencor, si dhe sesioni i ardhshëm i këtij Komisioni qe pritet të mbahet ne vjeshtë, kur të formohet qeveria e re shqiptare.​

Zoti Basha dhe ambasadori Karpushin vlerësuan si konstruktiv një komunikim të tillë dhe vlerësuan se pikëpamjet e ndryshme në disa ccështje nuk duhet të pengojnë përpjekjet për të eksploruar fusha të bashkëpunimit reciprok.

Njoftim per shtyp, 14 Mars 2017

Elbasani është zemra e traditës së mrekullueshme të Ditës së Verës. Sot jam shumë i lumtur që jam në mes qytetareve dhe qytetarëve të Elbasanit, por edhe shumë qytetarëve të tjerë të Shqipërisë që ndodhen këtu për të festuar Ditën e Verës. Nga zemra, i uroj çdo shqiptari e në veçanti elbasanllinjve: Gëzuar Ditën e Verës! Sjelltë shpresë për një të ardhme më të mirë për çdo shqiptare dhe çdo shqiptarë. 

Pyetje: Z.Basha si e komentoni deklaratën e z.Rama se çadra e lirisë po i shërben qarqeve të huaja?

Basha: Nuk do të merrem me komente broçkullash, se është Dita e Verës. Por dua t’iu uroj të gjithë shqiptarëve: Gëzuar Ditën e Verës! Dhe qoftë fillimi i punëve të mbara dhe mbarimi i punëve të nisura si Rruga e Elbasanit dhe i punëve të tjera të mira, të shumta, që do të bëjmë së bashku për Shqipërinë dhe për gjithë shqiptarët.

Bashkëbisedim me gazetarët Dritan Hila dhe Patrik Sadikaj. Basha: Hila është këtu për të mbështetur kauzën kombëtare dhe europiane të zgjedhjeve të lira dhe të ndershme, kauzën e dekriminalizimit të politikës.

Në ditën e 24 të qëndresës në Sheshin e Lirisë, për zgjedhje të lira e të ndershme, qytetarët u bënë pjesmarrës në një bashkëbisedim me gazetarët Dritan Hila e Patrik Sadikaj. 

Patrik Sadikaj  tha se sipas tij varfëria është plaga më e madhe e shoqërisë shqiptare sot. Njerëzit që luftojnë për vaktin e ditës, tha Sadikaj, nuk e kanë shumë mendjen dhe nuk kanë fuqi të luftojnë për votën e lirë.  Gazetari e quajti qëndresën popullore në sheshin e lirisë, në këtë kuptim një kontribut për shoqërinë. E vetmja gjë për të cilën intelektualët, njerëzit e angazhuar, përtej bindjeve politike apo ambicieve personale, Sadikaj tha se me rëndësi është që të ndihen të lirë në mendje dhe shpirt. 

Dritan Hila, i cili nuk e kishte menduar se do të fliste ndonjëherë përballë demokratëve, sepse deklaron se më shumë mendimet e ndajnë sesa e bashkojnë me të djathtët, mbështetjen për kauzën e opozitës e mbështet fillimisht si qytetar e më pas si gazetar. 

“Ne nuk mund ta bëjmë këtë vend të ndarë.Pavarësisht se na ndajnë mendimet, kjo nuk na bën armiq, thjesht kemi mendime të ndryshme për mënyrën se si duam të shkojmë përpara. Janë më të mëdha gjërat që na bashkojnë se ato që na ndajnë. Mua më tërbon kur dikush flet me arrogancë dhe akoma më tepër kur kjo bëhet ndaj opozitës e cila minimalisht përfaqëson 35% të shqiptarëve.Ne nuk e kemi luksin të humbasim Partinë Demokratike”.

Hila shprehu gjithashtu mendimin se kjo qëndresë duhet të luftojë edhe për ndryshimin e sistemit zgjedhor. Partia Demokratike e ka potencialin për ta çuar këtë vend përpara ashtu si bëri edhe 26 vite më parë , tha Hila, i cili i kërkoi PD-së të përmbushë rolin e saj historik. 

“Shikoni përpara, ndërtoni lidershipin tuaj të ri, krijoni një parti poullore sepse jeni parti e cila i ka të gjitha potencialet”.

Disa studentë ngritën disa pyetje nga sheshi i lirisë. Dy prej tyre pyetën zotin Hila mbi vështirësinë e shprehjes së mendimit në rast kur ai shkon kundër vendimeve të qeverisë apo propagandës së saj.

Hila u shpreh i zhgënjyer nga qeverisja e kryeministrit, të çilin e ka mbështetur në vitet e para të marrjes së pushtetit, pasi sipas tij  Rama nuk ndërtoi atë për të çilën qytetarët e votuan. 

“E kam thënë tezën që Rama duhet ndalur dhe nuk e tërheq. Unë jam i majtë në ambient të djathtësh. Duhet të jesh pak kokëkrisur që t’i dalësh pushtetit kundër dhe unë prandaj ju vlerësoj ju për këtë revoltë. Unë bëj timen, jo gjithmonë pa kosto, por ja vlen”.

Kryedemokrati Lulzim Basha theksoi rëndësinë e pranimit dhe diskutimit mbi idetë e ndryshme nga tonat, në funksion të një debati konstruktiv i cili në fund e çon vendin përpara. Por që kjo të funksionojë, Basha tha se nevojitet një frymë qytetare dhe bashkëpunimi si ajo që sot gjendet në sheshin e lirisë nën kërkesën për zgjedhje të lira e të ndershme. 

“Sot mes jush si çdo ditë ka jo vetëm demokratë dhe mbështetës të opozitës por edhe qytetarë, madje edhe mbështetës të Partisë Socialiste të cilët ndajnë me ne kauzën e zgjedhjeve të lira dhe të ndershme, ndajnë me ne kauzën e dekriminalizimit. Ju e mirëpritët dhe ndoqët çdo mesazh të Hilës dhe reaguat me inteligjencën, me mençurinë dhe me vetëdijen politike që karakterizon qytetarët shqiptarë. Duartrokitët dhe mbështetët mesazhet e z.Hila dhe ju të gjithë e kuptoni që ai nuk është këtu për të mbështetur Partinë Demokratike, apo thjesht dhe vetëm opozitën, nuk është këtu as për të mbështetur Lulzim Bashën, por është këtu për të mbështetur kauzën kombëtare dhe europiane të zgjedhjeve të lira dhe të ndershme, kauzën e dekriminalizimit të politikës. Unë dua ta falënderoj me shumë mirënjohje. Dua t’i them se me praninë e tij sot këtu, ai dëshmon shpirtin e vërtetë të këtij sheshi të lirisë, të kësaj tende të lirisë, shpirtin e vërtetë të këtij themeli, të Republikës së Re”.

Ndryshimeve të 24 orëve të fundit në kabinetin “Rama”, zoti Basha i drejton vetëm një mesazh. 

“Largimi i çirakëve jo vetëm nuk na shtendos nga qëndrimi që kemi mbajtur, por na inkurajon për t’i shkuar deri në fund betejës që kemi nisur. Republika e Re për të cilën jemi mbledhur këtu, është në fakt integrimi i vërtetë europian i Shqipërisë, sepse republika e re, është dhe do të jetë e tillë, vetëm kur të kemi demokraci të vërtetë, që do të thotë, zgjedhje vërtetë të lira dhe të ndershme. Fuqizim i qytetarit, kufizim i pushtetit”.

Në Republikën e Re, Basha tha se opozita do të ketë instrumentat e saj për të luftuar betejat e kufizimit të pushtetit të mazhorancës në mënyra institucionale.

“Po kështu në Republikën e Re, mazhoranca dhe opozita do të kenë të drejta dhe detyrime të reja. Në Republikën e Re, opozita e re do të ketë rolin e shenjtë të kontrollit dhe kufizimit të pushtetit të mazhorancës së re, përmes të drejtave institucionale, përmes një parlamenti që funksionon, përmes një Kushtetute që mundëson kontrollin dhe balancën reale të pushtetit. Përmes një përfaqësimi të vërtetë të qytetarëve që do të thotë, jo noter i kryeministrit, por noter i qytetarëve dhe ditë për ditë përballë kryeministrit e përballë ekzekutivit. Kjo është detyra e parlamentit të ri në Republikën e Re. Ne i mirëpresim këta gjigandë të kurajos qytetare në këtë shesh, individë të lirë, i mirëpresim si njerëz të kauzës  që na bashkon, por shpresa jonë dhe lutja jonë është që edhe kundërshtarët tanë politikë të përfitojnë nga ndërgjegjia e pastër qytetare, nga vlerat dhe virtytet e intelektualëve, njerëzve me integritet dhe që nesër me zgjedhje të lira dhe të ndershme të konkurojnë si forca politike dhe jo si batalione të krimit dhe shqiptarët të kenë mundësi, të bëjnë zgjedhje”.

Në fund një mesazh dhe paralajmërim për atë ççka rrezikon të jetë afera më e madhe e mbetjeve në vend.

“Mbrëmë, miq gazetarë nga SHBA, kanë njoftuar se janë shumë pranë zbulimit të dimensionit të vërtetë të skandalit të plehrave të depozituar në Shqipëri. Bravo për gazetarët. Nëse këto fakte, shpalosen, ashtu siç jam njoftuar, atëherë ai që qëndron prapa kësaj fasade në zyrën e tij do të duhet të zbresë e t’u shpjegojë shqiptarëve se pse i hapi dyert mijërave ton mbetje të rrezikshme që mund të kenë filluar që tani të helmojnë, tokën, bukën, ujin dhe ajrin e shqiptarëve dhe fëmijëve të tyre. Kjo javë do të jetë përcaktuese për transparencën e këtij megaskandali. Në qoftë se është e vërtetë, kjo nuk është asgjë më pak se genocid ndaj shqiptarëve”, tha Lulzim Basha.

Dita e 24-të e protestës na gjen më të bashkuar dhe më të vendosur se kurrë. Ndaj dua ta nis fjalën time në këtë paradite të lavdishme me diell me një falënderim për të gjithë ju, për të gjithë qytetaret e qytetarët, e në veçanti për të rejat dhe të rinjtë, që kanë qenë dhe vazhdojnë të jenë shpirti i papërkulshëm i kësaj lëvizjeje të madhe, i kësaj lëvizje popullore, qytetare dhe demokratike për një kauzë të madhe shqiptare dhe europiane, që janë zgjedhjet e lira dhe të ndershme.

Sot mes jush, si çdo ditë, ka jo vetëm demokratë dhe mbështetës të opozitës por edhe qytetarë, madje edhe mbështetës të Partisë Socialiste, të cilët ndajnë me ne kauzën e zgjedhjeve të lira dhe të ndershme, ndajnë me ne kauzën e dekriminalizimit.

Sot, këtu na nderon me praninë e tij një përfaqësues i spikatur i mendimit dhe veprimit politik të së majtës, që është gazetari Dritan Hila.

Ju e mirëpritët dhe ndoqët çdo mesazh të tij dhe reaguat me inteligjencën, me mençurinë dhe me vetëdijen politike që karakterizon qytetarët shqiptarë dhe kjo është e pamanipulueshme nga çdo politikan apo çdo media manipulatore.

Duartrokitët dhe mbështetët mesazhet e z.Hila dhe ju të gjithë e kuptoni që ai nuk është këtu për të mbështetur Partinë Demokratike, ai nuk është këtu për të mbështetur thjesht dhe vetëm opozitën apo aksionin opozitar në vetvete, nuk është këtu aspak për të mbështetur Lulzim Bashën, por është këtu për të mbështetur kauzën kombëtare dhe europiane të zgjedhjeve të lira dhe të ndershme, kauzën e dekriminalizimit të politikës.

Unë dua ta falënderoj me shumë mirënjohje. Dua t’i them se me praninë e tij sot këtu dëshmon shpirtin e vërtetë të këtij sheshi të lirisë, të kësaj tende të lirisë, shpirtin e vërtetë të këtij themeli, të republikës së re.

Në këto 24 ditë, ne kemi parë e kemi takuar shumë qytetarë dhe anëtarë të Partisë Socialiste të Shqipërisë.

Në këto 27 vite të pluralizmit politik, socialistët shqiptarë kanë qenë kundërshtarët tanë në çdo palë zgjedhje.

Në çdo palë zgjedhje jemi ndeshur me ta dhe kemi fituar ose kanë fituar ata. Por ne nuk kemi harruar për asnjë çast se pavarësisht prej përplasjeve apo platformave politike, na bashkonte shqetësimi i drejtë se; ku po shkonte vendi. Pavarësisht prej zgjidhjeve që shikonim për problemet e vendit, na bashkonte të qënit shqiptarë.

E pra sot, socialistët shqiptarë që kanë patur dhe kanë guximin të jenë pjesë e këtij bashkimi të madh popullor, dhe nuk janë të paktë në numër, por janë shumë dhe janë këtu ditë për ditë, dhe demokratët shqiptarë, dhe çdo qytetar shqiptar, i bashkon një shqetësim shumë i madh. Dhe ky është shqetësimi i kriminalizimit total të politikës. Ky është shqetësimi i kriminalizimit total të vendimmarrjes së institucioneve shqiptare.

Kjo është gjëma e madhe dhe unike në Ballkan e kapjes së shtetit nga krimi i organizuar. Nga krimi i organizuar që duke kapur shtetin, duke kapur qeverinë e Edi Ramës, duke kapur Partisë Socialiste përmes të ashtuquajturës “Rilindje”, që nuk është gjë tjetër veçse maska e krimit mbi një formacion politik shqiptar, ka agjesuar procesin politik dhe bashkë me të edhe mundësinë e qytetarëve për vendimmarrje.

Pasojat e kësaj ndihen kudo. Ndihen në radhë të parë në institucionet shqiptare, në bankat e Parlamentit që duhet të përfaqësojnë interesat e shqiptarëve, por kur janë ulur tash katër vjet, njerëz, që nuk përfaqësojnë jo nivelin më të lartë siç duhet të përfaqësojnë, jo nivelin mesatar, por as nivelin me të ulët. Janë njerëz që përfaqësojnë llumin e shoqërisë, njerëz të dënuar për trafiqe, për drogë, për prostitucion, për vrasje. Njerëz që nuk i lidh asgjë me politikën, njerëz që madje nuk i lidh asgjë as me Partinë Socialiste të Shqipërisë, kundërshtarin historik të Partisë Demokratike të Shqipërisë.

Ata njerëz janë sot në bankat e parlamentit dhe janë sot kryetarë bashkish sepse i solli Edi Rama për pushtetin e tij dhe për fatin e tij personal. Për të marrë pushtetin politik u lidh me krimin e organizuar. Për të mbajtur pushtetin politik është gati që bashkë me krimin e organizuar dhe drogën të prishë institucionin fondamental të demokracisë, zgjedhjet e lira dhe të ndershme.

Ju e dini këtë fare mirë, shqiptarët e dinë këtë fare mirë.

Ndaj u mblodhën me 18 shkurt në bashkimin më të madh popullor, në lëvizjen më të madhe, për të marrë një vendim të madh, një vendim të rëndësishëm. Vendimin për të mos u larguar nga ky shesh, derisa të garantojmë zgjedhje të lira dhe të ndershme, përmes një qeverie teknike me mbështetje të gjerë politike, që do të thotë domosdoshmërisht, dhe pa asnjë kusht, largimin e Edi Ramës si kryeministër i qeverisë shqiptare.

Ne e dimë se Saimir Tahiri shërbeu denjësisht për kriminalizimin e kupolës drejtuese të Policisë së Shtetit, çka solli kanabizimin e vendit dhe ngritjen e kriminelëve në fron.

Ne e dime se, Ilir Beqaj, shërbeu përulësisht për krimin më të rëndë, shpenzimin  e parave të taksapaguesve shqiptarë që duhet shkonin për shëndetin e të sëmurëve, e pacientëve, e familjarëve tanë, e fëmijëve, tanë në xhepat e dy apo tre oligarkëve të lidhur drejtpërdrejtë me pushtetin.

Por ne po kështu, të gjithë e dimë se këta të dy dhe ata dy të tjerët janë shërbëtorë të njeriut që është në krye të kupolës së krimit dhe korrupsionit në këtë vend.

Ndaj flijimi i tyre, largimi i çirakëve, jo vetëm nuk na shtendos nga qendrimi që kemi mbajtur, por na inkurajon për t’i shkuar deri në fund betejës që kemi nisur.

Tani në teorinë e konspiracionit, të shkarkuarit, ju kanë thënë disa gazetarëve dje se na shiti Ed Rama ke Lul Basha, na shiti te Lul Basha, që Lul Basha të ndalë protestën.

E kuptoni se sa mbrapa janë apo jo?

Kujton se Lul Basha është në gjendje të ndalë këtë protestë? Nuk e kuptojnë që kjo lëvizje nuk ndalet, e nuk do të ndalet, derisa republika e vjetër e krimit, e korrupsionit, e drogës, e paligjshmërisë, e antikushtetueshmërisë, republika e vjetër që i trajton zgjedhjet si një mundësi për të kapur pushtet dhe jo si tempullin e shenjtë të demokracisë, do të bjerë deri në kullën e fundit.

Republika e Re, për të cilën jemi mbledhur këtu, është në fakt integrimi i vërtetë europian i Shqipërisë, sepse Republika e Re, është dhe do të jetë e tillë, vetëm kur të kemi demokraci të vërtetë, që do të thotë, zgjedhje vërtetë të lira dhe të ndershme dhe Po, z. Hila, Po, të gjithë ju qytetarë që doni një sistem zgjedhor që ju përfaqëson ju, dhe jo kryetarët e partive në Parlamentin e ardhshëm shqiptar, fuqizimi i qytetarit, kufizimi i pushtetit, janë parime të shenjta, mbi të cilat janë ndërtuar vendet e Europës Perëndimore, vendet e Shteteve të Bashkuara të Amerikës, janë ndërtuar mbi këto parime dhe garantojnë progres, pikërisht sepse në këto vende, qytetari është Zot i fateve të tij, brenda Kushtetutës dhe ligjit dhe pushtetari është shërbëtor i qytetarit, brenda Kushtetutës dhe ligjeve.

Kjo garanton lirinë e çdokujt dhe përmes lirisë, mundësinë e çdokujt për të fituar lumturinë, jetën, shëndetin, të ardhmen e tij apo të saj dhe të fëmijëve, përmes punës së ndershme, përmes punës dhe djersës, dhe jo përmes horrllëkut, krimit, korrupsionit, gënjeshtrës dhe mashtrimit. Dy republikat, janë dy realitete të papajtueshme me njëra-tjetrën.

Ato nuk mund të shartohen me njëra-tjetrën. Duhet të vdesë njëra, që të lindë tjetra. Nuk mund të qëndrojnë përbri njëra-tjetrës. Po kështu, në Republikën e Re, mazhoranca dhe opozita do të kenë të drejta dhe detyrime të reja. Në Republikën e Re, opozita e re do të ketë rolin e shenjtë të kontrollit dhe kufizimit të pushtetit të mazhorancës së re, përmes të drejtave institucionale, përmes një parlamenti që funksionon, përmes një Kushtetute që mundëson kontrollin dhe balancën reale të pushtetit, përmes një përfaqësimi të vërtetë të qytetarëve që do të thotë; jo noter i kryeministrit, por noter i qytetarëve dhe ditë për ditë, përballë kryeministrit e përballë ekzekutivit. Kjo është detyra e parlamentit të ri në Republikën e Re. Përndryshe, papërgjegjshmëria, makutëria dhe korrupsioni do të bënin në atë Republikë të Re, të njëjtën që kanë bërë me republikën e vjetër.

E kanë mbuluar vendin me drogë, kanë shkatërruar ekonominë, kanë shkatërruar shpresën e shqiptarëve, duke shkatërruar konkurencën në ekonomi dhe tashmë konkurencën në politikë. Sot, në këtë ditë të bukur, në këtë vend të bekuar nga Zoti, po shpaloset një skandal i mynxyrshëm, që tregon cfarë ndodh kur vendi i dorëzohet qeverisjes së papërgjegjshme të lidhur me krimin dhe mafian.

Mbrëmë, natën vonë, miq gazetarë nga SHBA, kanë njoftuar se janë shumë pranë zbulimit të dimensionit të vërtetë të skandalit të plehrave, që mafia ndërkombëtare ka depozituar në Shqipëri. Bravo për gazetarët. Nëse këto fakte, shpalosen, ashtu siç jam njoftuar, atëherë ai që qëndron prapa kësaj fasade në zyrën e tij do të duhet të zbresë e t’u shpjegojë shqiptarëve se pse i hapi dyert mijërave ton mbetjeve të rrezikshme që sot mund të gjenden në truallin tonë, prane burimeve tona ujore, e mund të kenë filluar që tani të helmojnë, tokën, bukën, ujin dhe ajrin e shqiptarëve dhe fëmijëve tanë.

Nuk mjaftoi që i drogoi shqiptarët, tani po i helmon shqiptarët. Ju e dini. Kam qenë i kujdesshëm këto dy javë të shpërthimit të skandalit, për të mos arritur në konkluzione të parakohshme. Kjo javë do të jetë përcaktuese për transparencën e këtij megaskandali. Në qoftë se është e vërtetë, kjo nuk është asgjë më pak se genocid ndaj shqiptarëve. Të sjellësh mbetjet e rrezikshme kundër ligjit, ta mbash të fshehtë, t’i depozitosh në tokën e qytetarëve të tu, pa u marrë asnjë autorizim apo leje, në kundërshtim total me ligjin, kjo do të thotë të jesh bashkëpunëtor për genocid kundër popullit tënd dhe në qoftë se kjo është e vërtetë, Edi Rama, unë do t’i bëj thirrje popullit të të trajtojë siç trajtohen ata që bëjnë genocid kundër qytetarëve të vet.

Ndaj, sa nuk është vonë, mos u fshih pas dorëheqjeve dhe shkarkimeve fasadë të shërbëtorëve të tu. Sa nuk është vonë, bëj transparencën e plotë për këtë megaaferë skandaloze dhe të tmerrshme të plehrave, sqaroji gjërat sot, sepse nesër do të jetë vonë.

Ndërkohë, ne jemi e do të jemi këtu të bashkuar, më të vendosur, më të shumtë në numër, çdo ditë, sepse kauza e zgjedhjeve të lira dhe të ndershme, nuk mund të dështojë, nuk mund të tërhiqet. Demokracia nuk mund e nuk do të largohet nga ky vend. Ajo që do të largohet nga ky vend, është oligarkia e lidhur me krimin dhe pushtetin që e solli në zyrat e shtetit.

Media ka një rol të jashtëzakonshëm për t’i dhënë shqiptarëve transparencën dhe informacionin e plotë.

Sot në këtë muzg të republikës së vjetër dhe në këtë agim të Republikës së Re, thirrja ime ndaj pronarëve të medias është, të shqyrtojnë përgjegjësitë e tyre si përfaqësues të pushtetit të katërt.

Dy rrugë ka, ne e dimë që gazetarët, operatorët, punonjësit e medias janë me interesin publik, janë me popullin e tyre, me qytetarët e tyre, ndërsa pronarët e medias sot kanë mundësinë, pavarësisht se çfarë kanë bërë deri më sot, të tregojnë qartë se a do të rreshtohen në anën e republikës së vjetër të elitës kriminale, politike dhe ekonomike, që i ka pirë gjakun shqiptarëve në këto katër vite dhe sot po i drogon dhe po i helmon, apo do të rreshtohen në interesin publik, në krahun e Republikës së Re dhe shumicës dërrmuese të qytetarëve shqiptarë?

Zgjedhja është e juaja.

Qytetarët kanë bërë zgjedhjen e tyre, rrugë pas nuk ka, e vjetra do të bjerë, e reja po ngrihet.

Pasditen e së shtunës në Sheshin e Lirisë, kryedemokrati Lulzim Basha priti një nga miqtë më të afërt të shtetit Shqiptar dhe një nga personat të cilët kanë kontribuar me intensitet në hapjen dhe demokratizimin e vendit tonë, ish-kryetar i Asamblesë Parlamentare të OSBE, Vlofgang Grossruck.

I shoqëruar nga krerët e partive opozitare, Lulzim Basha tha se qytetarët të cilët kalojnë ditë e netë, plot 22 të tilla tashmë, nuk janë aty për koka turku.

“Sonte jemi mbledhur këtu ndërkohë që qeveria duket se është në grahmat e saj të fundit. Kjo është sot lëvizja më e madhe popullore, qytetare, demokratike dhe kombëtare për zgjedhje të lira dhe të ndershme. Ndaj jemi mbledhur për të siguruar për shqiptarët sot e mot dhe për brezat që vijnë standardin europian të zgjedhjeve të lira dhe të ndershme. Ndaj, çfarëdo thashethemesh e prapaskenash të kurdisin, mesazhi ynë është një dhe i pandryshuar, qëndresa jonë është e vendosur deri në krijimin e një qeverie teknike me mbështetje të gjerë politike që do të bëjë detyrat para shqiptarëve dhe para Europës”.

Lajmin për shkarkimin e minsitrit të brendshëm Tahiri, Lulzim Basha edhe pse e sheh si truk politik të kryeministrit, suksesin ia atribuon vetëm qytetarëve qëndrestarë të sheshit të lirisë të cilëve në fund i bëri edhe një thirrje.

“Lajmi se ka shkarkuar Tahirin është një përpjekje mjerane për ti shpëtuar përgjegjësisë që vetë Edi Rama ka për gjendjen ku e ka sjellë vendin, për shkallën e mosbesimit që ka përfshirë çdo shqiptar, të djathtë e të majtë se ai mund të garantojë zgjedhje të lira e të ndershme. E pra, nëse lajmi është i vërtetë kjo është fitorja vetëm e juaja, vetëm e bashkimit qytetar dhe prova e qartë se forca e vetme e ndryshimit në këtë vend është bashkimi qytetar dhe kjo lëvizje popullore. Eshtë koha për një bashkim edhe më të madh, për një realizëm edhe më të qartë, se beteja që kemi përpara mund dhe do të fitohet vetëm përmes kurajos, qëndresës dhe sacrifices”, tha Basha.

Kryedemorkati Basha tha se miqtë e Shqipërisë që vijnë nga jashtë kufijve, i janë bashkuar qytetarëve në qëndresën e tyre për dy arsye. Fillimisht pasi pikëllohen për regresionin e vendit tonë, por edhe sepse kanë shpresë se qytetarët shqiptarë përbëjnë garancinë e vertetë për Shqiperinë moderne europiane.

Volfgang Grossruk falenderoi kryeopozitarin Basha për mundësinë që i dha të përjetojë atë që e quajti si një moment historik në Tiranë.

“Tashmë e di se çfarë do të them pas e kam vizituar Shqipërinë që para 24 vitesh dhe kam qënë vizitor mbi 60 herë. Ju keni shumë miq në Europë dhe Austri. Zonja dhe Zotërinj, ne jemi të gjithë të interesuar që Shqipëria të luftojë kriminalitetin, korrupsionin dhe padrejtësinë dhe garant i kësaj fitore është kryetari demokrat Lulzim Basha. Të gjithë ne do të punojmë për integrimin europian të Shqipërisë në mënyrë që njerëzit të përfitojnë nga kjo”.

Njoftim per shtyp 11 Mars 2017

Vëllezër dhe motra, qytetare dhe qytetarë, mbrëmja e 22-të e protestës, kjo e Shtunë e tretë që pas 18 Shkurtit, që ka ndryshuar njëherë e për gjithmonë Shqipërinë, premton ardhjen e shpejtë të pranverës politike, të pranverës së lirive për çdo shqiptare e çdo shqiptar, dhe kjo falë jush, falë qytetarëve që qëndruan e qëndrojnë me vendosmëri për zgjedhje të lira dhe të ndershme, për qeverinë teknike, për Republikën e Re, të mundësive dhe lirive për çdo shqiptar.

Sot në këtë tendë, protestuesit e rinj, vajzat dhe djemtë e shqiptarëve që kanë vendosur ti thonë Jo të djeshmes dhe Po të nesërmes europiane që po lind nga ky shesh, u bashkuan e u përshëndetën nga përfaqësuesit e të rinjve konservatorë. Sonte jemi mbledhur këtu ndërkohë që qeveria duket se është në grahmat e saj të fundit. Në fakt, ka tre javë që nuk bën asnjë punë përveçse përgjon protestën e qytetarëve, përgjon popullin e vet. Sado ta përgjojë, sado të shtijnë fall e të lexojnë filxhanët e kafesë, prapa fasadës qeveritare, konkluzionin e kësaj proteste ua kemi thënë që ditën e pare; ne jemi këtu, jemi ngritur bashkë me 18 Shkurt e bashkë do jemi, në këtë shesh, deri në largimin e qeverisë të bërë njësh me krimin dhe drogën. Ju kemi thënë e ua përsërisim se pë ne kjo lëvizje i ka tejkaluar kufijtë e çdo partie politike, i ka tejkaluar kufijtë e Partisë Demokratike, i ka tejkaluar kufijtë e opozitës, është sot lëvizja më e madhe popullore, qytetare, demokratike dhe kombëtare për zgjedhje të lira dhe të ndershme.

Ndaj, nuk jemi mbledhur këtu as për koka turku, as për koka delesh, as për koka kecash, jemi mbledhur për të siguruar për shqiptarët sot e mot dhe për brezat që vijnë, standardin europian të zgjedhjeve të lira dhe të ndershme dhe, zgjedhje të lira e të ndershme me një qeveri dhe kryeministër garant të krimit dhe të drogës nuk mund të ketë. Ndaj, çfarëdo thashethemesh e prapaskenash të kurdisin, mesazhi ynë është një dhe i pandryshuar; qëndresa jonë është e vendosur deri në krijimin e një qeverie teknike me mbështetje të gjerë politike që do të bëjë detyrat para shqiptarëve dhe para Europës.

Lajmi se ka shkarkuar Tahirin është në rradhë të parë një truk pë ti hedhur hi syve shqiptarëve, për ti hedhur hi syve opinionit ndërkombëtar, për ti hedhur hi syve protestuesëve që janë këtu ditë e natë për 22 ditë me rradhë. Eshtë pra, një tjetër nga ato proçkat e këtyre 4 viteve, një përpjekje mjerane për t’i shpëtuar përgjegjësisë që vetë Edi Rama ka për gjendjen ku e ka sjellë vendin, për shkallën e mosbesimit që ka përfshirë çdo shqiptar, të djathtë e të majtë, se ai mund të garantojë zgjedhje të lira e të ndershme, për bindjen që ka i madh e i vogël se, vetë qenia në pushtet e Edi Ramës, përbën kërcënimin kryesor për zgjedhje të lira e të ndershme, kryesisht për shkak të lidhjes së faktuar të kabinetit të tij dhe atij vetë me krimin e organizuar që e ngriti në pushtet dhe që e liroi nga burgjet, pikërisht për interesat e tij.

Sot e deri në fitore nuk do të lodhemi së përsërituri se kjo protestë nuk bëhet për pushtetin e opozitës, për pushtetin e Partisë Demokratike, për pushtetin e Lulzim Bashës. Kjo protestë, do të përfundojë vetëm kur t’i garantojë çdo shqiptari zgjedhje të lira e të ndershme, votën e lirë. Por, duke refuzuar, siç refuzojmë sot të gjithë në bllok, truket e fasadat për ti shpëtuar përgjegjësisë, nuk mund të mos ju uroj gjithësecilit prej jush dhe ju qindra mijëra, miliona shqiptarë që jeni pjesë e kësaj lëvizjeje unike në historinë tonë kombëtare, tiu uroj, sepse sido që ta përcjellin lajmin, fakti është që për më shumë se tre vite, opozita ka kërkuar dorëheqjen e Ministrit të Brendshëm, për shkak të lidhjeve të tij me krimin në mënyrë institucionale dhe ky nuk ka dëgjuar.

Prej afro dy vitesh dhe për punët dhe interesat e veta ia kërkon edhe partneri i tij në koalicion, ky jo vetëm që s’ia ka vënë veshin por i hoqi edhe Ministrin e Drejtësisë.

Prej më shumë se 6 muajsh ia kërkojnë partnerët tanë strategjikë dhe ky u tall dhe tallet me partnerët strategjikë. E pra, nëse lajmi është i vërtetë, kjo është fitorja vetëm e juaja, vetëm e bashkimit qytetar dhe është prova e qartë se forca e vetme e ndryshimit në këtë vend është bashkimi qytetar dhe kjo lëvizje popullore, por sot nuk është koha as për eufori e as për festë, është koha për një bashkim edhe më të madh, për një realizëm edhe më të qartë, se beteja që kemi përpara mund dhe do të fitohet vetëm përmes kurajos, qëndresës dhe sakrificës. Ndaj dua tju pyes sonte, siç ju pyeta në mëngjes, siç ju pyes çdo ditë, a jeni lodhur? Jo. A jeni të vendosur të qëndrojmë deri në fitore? Po.

Mesazhi i Lulzim Bashës në mbrëmje në Sheshin e Lirisë, 11 Mars 2017

Të reja dhe të rinj, qytetare të Tiranës dhe mbarë Shqipërisë!

Eshtë mëngjesi i 22 i lëvizjes më të madhe popullore, kombëtare, demokratike, qytetare dhe paqësore për zgjedhje të lira dhe të ndershme, për demokracinë e vërtetë dhe për republikën e re të vlerave europiano-perendimore. Eshtë një mëngjes i lavdishëm sepse është një mëngjes më afër fitores tuaj, më afër fitores së Shqipërisë.

Dua të përshëndes në mënyrë të veçantë të gjithë qytetarët që kanë qenë pjesë e kësaj lëvizje madhështore të nisur si sot tre javë më parë me 18 shkurt dhe që janë ditë e natë pjesë e këtij projekti të madh të shpresës dhe lirisë.

Dua të përshëndes në mënyrë të veçantë sot të rinjtë dhe të rejat shqiptare, gjimnazistët, gjimnazistet, studentet dhe studentët e Shqipërisë që kanë qenë balli i kësaj proteste, janë garancia e vendosmërisë së kësaj proteste dhe do jenë kurora e kësaj lëvizje të madhe.

Dje në një bisedë me një nga gazetarët më të mirë të shtypit të shkruar, pata një reflektim, në fakt reflektimin e pati ai. Dhe m’u kujtua sot, kur njëri pas tjetrit të rejat dhe të rinjtë folën për vendosmërinë e tyre për ndryshim.

Thanë se ndryshimi po vjen, treguan besimin e tyre se ndryshimi do vijë. Mbrëmë ky person shumë i njohur i medias së shkruar, e njohin të gjithë gazetarët që janë këtu prapa kamerave, tha, në fakt ndryshimi ka ardhur.

Shqipëria, pas 18 shkurtit është krejt ndryshe nga ajo e para 18 shkurtit. Duket sikur 18 shkurti e ka ndarë historinë tonë në dy pjesë dhe në fakt kështu është. Para 18 shkurtit këta bënin hesape me njëri-tjetrin dhe opozitën e bënin para të njëri –tjetrit, pra kishin s’kualifikuar tërësisht shumicën dërrmuese të shqiptarëve, kishin nxjerrë nga loja me mendjen e tyre, me hesapet e tyre opozitën politike të vendit.

Sot e tash tre javë, janë strukur në birucat e tyre, maksimumi hanë ndonjë drekë apo darkë, por e kanë qepur gojën, këta që shpallin fitoren me tam-tame e dinë që humbja po ju vjen.

Para 18 shkurtit me instrumentet e frikës dhe terrorit kishin mbyllur gojët e shumicës së shqiptarëve, me frikë, me dhunë, me persekucion, me gjoba, me gënjeshtra, me mashtrime. Frika sundonte në Shqipëri. Sot, tre javë pas 18 shkurtit shqiptarët e kanë vrarë frikën, kurajo qytetare është ngritur kudo.

Ka frikë akoma, por e dini se kush ka më shumë frikë sot, se përpara 18 shkurtit?! Qeveria, me në krye Edi Ramën, janë sot lepujt e Shqipërisë, sepse shqiptarët janë ngritur, Shqipëria është ngritur, të gjithë jemi ngritur bashkë.

Pra, është e vërtetë, miku im gazetar ka të drejtë, ndryshimi tashmë ka mbërritur. 18 shkurti është dita kur Shqipëria ka nisur ndryshimin pa kthim.

Por, ne jemi sot këtu e do të jemi këtu deri në arritjen e objektivave të shpallura të kësaj lëvizjeje popullore që është garantimi i zgjedhjeve të lira dhe të ndershme përmes largimit të Edi Ramës dhe një qeverie teknike që i garanton ato.

Vetëm në këtë mënyrë, vetëm përmes zgjedhjeve të lira dhe të ndershme ne do të garantojmë që të mos kthehemi më në Shqipërinë e para 18 shkurtit. Sepse në demokraci, miqtë e mi, jo vetëm për shkak të protestave dhe jo vetëm përmes protestave popullore e madhështore, si ajo e 18 shkurtit, por prej ditës së parë që ulet në karriget e pushtetit e deri ditën e fundit, në çdo demokraci nuk është populli që ka frikë qeverinë, por është, e do të jetë qeveria shqiptare që duhet të ketë frikën popullin.

Prandaj kjo luftë, kjo betejë bëhet që Shqipëria ta arrijë këtë standard një herë e mirë. Jo qytetari të ketë frikë pushtetarin, por pushtetari të varet tërësisht nga vullneti dhe nga gjykimi i qytetarit. Kjo është Republika e Re për të cilën luftojmë, ky është standardi europian, ky është standardi amerikan. Ndaj është e domosdoshme ta vazhdojmë këtë betejë deri në fitore. Sepse, çdo tulatje, çdo kthim pas do ta vërtiste Shqipërinë edhe një herë atje ku ishim para 18 shkurtit.

Por kjo nuk ka për të ndodhur. Kjo nuk ka për të ndodhur sepse mbështetja popullore për këtë kauzë po arrin në kulmet historike që ndonjë kauzë ka patur ndonjëherë.

Dhe unë jam këtu ditë për ditë e natë për natë me ju për t’iu kujtuar, për t’u  zotuar dhe premtuar se, pas kësaj beteje epike të qytetarëve shqiptarë, borxhi i atyre që do të marrin përgjegjësitë e drejtimit të Republikës së Re është dhe do të jetë me të vërtetë, që asgjë të mos jetë më si më parë, gjithçka të ndryshojë për mirë në drejtim të standardeve, vlerave dhe parimeve europiane.

Dhe me të vërtetë miqtë e mi, pas fitores së kësaj lëvizjeje asgjë nuk do të jetë më si më parë.

Demokraci e vërtetë do të thotë qytetarët zotër të pushtetit dhe jo pushtetarët zotër të qytetarëve.

Drejtësi e vërtetë do të thotë gjyqtarë e prokurorë  në shërbim të ligjit dhe jo në shërbim të pushtetarëve të korruptuar të lidhur me krimin.

Shtet ligjor do të thotë garanci të hekurta për çdo qytetar të Republikës së Re ku të gjithë trajtohen të barabartë para ligjit me mundësi të barabarta.

Këto të tre janë shtyllat, themelet e Shqipërisë europiane. Gjithçka që është jashtë tyre dhe ndryshe nga ato, nuk ka të bëjë me Europën, nuk ka të bëjë me realitetin europian.

Dje, në një tur vizite të paguar nga fondacioni i socialdemokratëve gjerman, që mundohet të na e shesë si vizitë shtetërore, Edi mashtruesi na paska thënë: “Integrim para se të jetë vonë”.

Ou…. Integrim para se të jetë vonë? Mos ju duket gjë si kërcënim apo jo?! Apo e kam gabim?!

Kë kërcënon ky? Kërcënon Gjermaninë, kërcënon Europën, më integroni para se të jetë vonë?

Po a i ke bërë detyrat e shtëpisë o Ed mashtruesi? A e ke luftuar krimin?! Jo. Në vend që ta luftoje e ke marrë dhe e ke ulur në Parlament, e ke ulur në krye të bashkive të vendit. I ke dhënë pushtet maksimal, drekon e darkon me kriminelët me nam të Shqipërisë, ju ke dhënë çelësat e doganave, policisë, tatimeve, institucioneve kryesore shtetërore. Ju ke dhënë imunitet mbi ligjin, ke kapur dy palë zgjedhje me ta dhe do të prishësh zgjedhjet e treta në bashkëpunim me krimin.

Pra, nuk e ke bërë këtë detyrë shtëpie. Ngelës!

E ke luftuar korrupsionin? A e ka luftuar korrupsionin? Përkundrazi, të gjitha raportet, duke përfshirë atë që doli para një jave nga Departamenti Amerikan i Shtetit dhe raport-progresin e Bashkimit Europian e kanë të shkruar të zezë mbi të bardhë, ose si ka qejf ta thotë Ed mashtruesi, troç: korrupsioni është i përhapur në ç’do degë të qeverisjes shqiptare.

Askush nuk e di më mirë këtë sesa ju, qytetarët e këtij vendi që e ndjeni në lëkurën tuaj, e ndjeni mbi kurrizin tuaj peshën e rëndë të korrupsionit që nga njëra anë ju fut duart në xhep dhe ju merr me taksa të larta, me fatura të larta, me tarifa të larta, me gjoba të larta, ç’do kacidhe, e nga ana tjetër, këto para nuk ua kthen as si rrugë, as si spitale, as si shkolla, as si investime, as si ujësjellës, as si subvencione, as si pensione, as si paga sepse i vjedh Ali Baba me katër hajdutë. Pra, luftë kundër krimit jo. Luftë kundër drogës jo e jo. Luftë kundër korrupsionit jo. Si do e fusësh, o Ed mashtruesi Shqipërinë në Europë? Kujt i thua ti “Integrim para se të jetë vonë”? shqiptarët e dinë, të djathtë e të majtë e dinë se ti me krimin në pushtet, me Shqipërinë hambar droge, me korrupsionin në nivele rekord, je sot pengesa kryesore për Shqipërinë Europiane.

Pra, nëse të bëhet vonë për Shqipërinë dhe për integrimin, nëse e ke me të vërtetë “Integrim para se të jetë vonë”, jep dorëheqjen para se të jetë vonë. Largohu dhe hapi rrugë qeverisë teknike, si garancia e vetme që kjo lëvizje popullore do të pranojë, për zgjedhje të lira dhe të ndershme. Megjithatë, kjo është një kërkesë retorike sepse ne e dime sa të bëhet vonë ty për Shqipërinë dhe shqiptarët. Ne e dimë se sa përzemër e ke ti Bashikim Europian dhe standardin europian. Siç e di edhe europa se, standardi europian dhe Bashkimi Europian dhe Shqipëria në Europë do të thotë fund i pushtetit të inkriminuar, i krimit të lidhur me pushtetin dhe i politikanëve që sollën krimin në pushtet. Pra Bashkimi Europian, standardi europian është në fakt edhe fundi yt politik. Shqiptarët e kanë vendosur dhe do të luftojnë deri në fund për vlerat e përbashkëta europiane që nisin me zgjedhje të lira dhe të ndershme. Ndaj, prej 18 Shkurtit, nuk e ke ti më në dorë. E ka populli në dorë dhe unë kam besimin më të patundur se populli nuk do tërhiqet deri në fitoren e projektit europian të Republikës së Re.

Apo do tërhiqemi? Jo. Deri në fitore.

Sot në këtë tendë, jemi përsëri me aleatët tanë. Partia Demokratike, anëtare e formacionit më të madh të qendrës se djathtë europiane, Partive Popullore Europiane që ka grupin më të madh parlamentar në Parlamentin Europian, Kryetarin e Komisionit Europian, Kryetarin e Unionit dhe Kryetarin e Parlamentit, në fakt, nuk është i vetmi grupim i djathtë. Në familjen e të djathtës europiane, ka parti të tjera historike të së djathtës si; konservatorët britanikë, dhe shumë parti të tjera. Ky grupim, njihet si grupimi i konservatorëve europianë dhe Zv.Presidenti i rinisë së këtij grupimi, Jakub Sivak ndodhet sot këtu për të përshëndetur protestën tonë, lëvizjen tonë dhe për t’i dhënë mbështetjen e grupimit të tij politik, konservatorëve europianë, kauzës së zgjedhjeve të lira dhe të ndershme. Ndaj, le ta mirëpresim mikun tonë që vjen këtume mbështetjen dhe mesazhin e kurajos për protestën dhe lëvizjen tonë popullore.

Fjala ne sheshin e lirise, 11 Mars 2017

Paraditen e 22-të të qëndresës popullore në sheshin e lirisë, të rinj, të reja, pedagogë, përfaqësues të konservatorëve europianë dhe republikanë iu bashkuan agorës qytetare për të ngritur zërin dhe për të shprehur mbështetjen e tyre ndaj kauzës popullore për zgjedhje të lira.

Një pedagog i Universitetit të Shkodrës tha se dëshira e kësaj qeverie për të kapur drejtësinë vjen në të gjitha format. Rast konkret, tregoi se në bordin drejtues të universitetit ku jep mësim, katër nga shtatë anëtarë emërohen nga qeveria. Bindjes se kjo qeveri ka investuar para droge dhe do të ushtrojë presion mbi votën e lirë në zgjedhjet e ardhshme, shkodrani i shtoi edhe historinë e vitit 2013. Sipas tij, në Shkodër pasi gjithë bandat u organizuan rreth socialistëve dhe arritën të vidhnin dhe shformonin votën e qytetarëve atje, nga tejngopja, filluan të transferonin kutitë e votimit nga një qendër votimi tek tjetra, pa teklif. Një fakt nga Shkodra: 50% e deputetëve socialistë fitues në Shkodër, sot nuk janë më me PS.

Samuel Berisha, anëtar në organizatën e Komeve të Bashkuara në një projekt të organizuar nga trupat e paqes dhe Ambasada Amerikane  tha se zgjedhjet e lira për një vend si Shqipëria janë një domosdoshmëri bazike.

Kryetari i forumit rinor të republikanëve, Endi Skupi listoi tre arsye madhore për të cilat rinia sot duhet të bashkohet me qëndresën qytetare.

Ligji i arsimit të lartë ka shtuar pasigurinë tek të rinjtë – tha Endi – Më pas këta të rinj të sapodiplomuar s’dijnë ku do punojnë sepse i gjithë tregu i punës është i kapur. Në fund, sipas tij, rinia ftohet të hyjë në zgjedhje ku në lista deputetësh ka kriminelë dhe vota e qytetarëve vidhet. Skupi e mbylli me një thirrje drejtuar qytetarëve të cilët, sipas tij, me vendimin e tyre mund t’i japin Shqipërisë zgjedhje të pakontestueshme.

Belind Kelliçi, kreu i të rinjve demokratë tha se kërkesa e qytetarëve, për zgjedhje të lira e të ndershme, e cila është një e drejtë themelore kushtetuese, po merr dita ditës mbështetje të madhe jo vetëm nga brenda kufijve tanë por edhe jashtë vendit. Thirrjen ia drejtoi shqiptarëve të cilëve i kujtoi se ishte rinia dhe Partia Demorkatike ajo që shembi diktaturën në vitet ’90 dhe po ata do t’i rikthejnë sot shqiptarëve të drejtën për të votuar.

Kryetari demokrat Lulzim Basha, duke iu referuar komentit të një gazetari të njohur të medias, i cili është shprehur se ndryshimi tashmë ka ardhur në Shqipëri, bëri diferencën mes Shqipërisë para dhe pas 18 shkurtit.

“Para 18 shkurtit këta bënin hesape me njëri-tjetrin dhe opozitën e bënin para të njëri –tjetrit, pra kishin s’kualifikuar tërësisht shumicën dërrmuese të shqiptarëve, kishin nxjerrë nga loja me mendjen e tyre, me hesapet e tyre opozitën politike të vendit. Sot e tash tre javë, janë strukur në birucat e tyre, maksimumi hanë ndonjë drekë apo darkë, por  e kanë qepur gojën, këta që shpallin fitoren me tam-tame e dinë që humbja po ju vjen”.

Si të vetmen mënyrë të afrimit të Shqipërisë drejt vlerave europiane që seicili prej nesh përqafon, Lulzim Basha e sheh përmes garantimit të zgjedheve të lira e të ndershme nga një qeveri teknike.

“Vetëm në këtë mënyrë, vetëm përmes zgjedhjeve të lira dhe të ndershme ne do të garantojmë që të mos kthehemi më në Shqipërinë e para 18 shkurtit. Sepse në demokraci, jo vetëm për shkak të protestave dhe jo vetëm përmes protestave popullore e madhështore, si ajo e 18 shkurtit, por prej ditës së parë që ulet në karriget e pushtetit e deri ditën e fundit, në çdo demokraci nuk është populli që ka frikë qeverinë, por është e do të jetë qeveria shqiptare, që duhet të ketë frikën popullin”.

Premtimin për përgjegjësinë e afrimit të vlerave dhe parimeve europiane kryedemokrati ia dha të rinjve, të rejave dhe gjithë qytetarëve shqiptarë.

“Të gjitha raportet, duke përfshirë atë që doli para një jave nga Departamenti Amerikan i Shtetit dhe raport progresin e Bashkimit Europian e kanë të shkruar të zezë mbi të bardhë, korrupsioni është i përhapur në ç’do degë të qeverisjes shqiptare. Shqiptarët e kanë vendosur dhe do të luftojnë deri në fund për vlerat e përbashkëta europiane që nisin me zgjedhje të lira e të ndershme”.

Nga Praga erdhi, Jakub Sibak, zëvendës kryetar i të rinjvë konservatorë evropiane, në sheshin e lirisë për të shprehur mbështetjen e të rinjve konservatorë të Europës, në luftën për zgjedhje të lira e të ndershme.

“Unë vij nga Praga, Republika Ceke dhe jam shumë i entuziasmuar që shikoj këtu kaq shumë njerëz që luftojnë për demokraci, që luftojnë për sundimin e ligjit dhe për zgjedhje të lira dhe të drejta. Republika e Cekisë njësoj si Shqipëria ka qenë pjesë e kampit lindor gjatë luftë së ftohtë, dhe unë e kuptoj se sa e rëndësishme është beteja juaj, lufta juaj për ndryshim. Ne të rinjtë europiane konservatorë ju mbështesim plotësisht në përpjekjet tuaja, në betejën tuaj për zgjedhje të lira dhe të ndershme. Sytë e tërë vendeve të Evropës janë drejtuar nga ju me shpresë se rendi i vjetër do të zëvendësohet nga rendi i ri”.

Sibak tha se kërkesat e qëndresës qytetare vijnë jo vetëm për një rotacion politik të rastit, por për një ndryshim i cili trashëgohet në breza.

Njoftim per shtyp 11 Mars 2017

Partitë e koalicionit opozitar kanë zyrtarizuar sot vendimin se nuk do të lejojnë në Shqipëri zgjedhje fasadë, zgjedhje të kapura nga krimi dhe paratë e drogës.

Me një kërkesë zyrtare dërguar KQZ-së, partitë e koalicionit opozitar kanë vënë në dijeni se nuk do të paraqesin kërkesë për t’u regjistruar si subjekte zgjedhore, dhe as si koalicion zgjedhor, deri në arritjen e marrëveshjes politike që siguron zgjedhje të lira e të ndershme, vetëm me një qeveri teknike me mbështetje të gjerë politike, që do të sigurojë zbatimin e ligjit të dekriminalizimit, luftën efikase kundër narkotrafikut, krimit të organizuar dhe parave të drogës, si dhe përgatitjen e zgjedhjeve të lira e të ndershme.

Bashkangjitur, njoftimi drejtuar sot KQZ e firmosur dhe vulosur nga partitë e koalicionit opozitar.

Shkrese e koalicionit opozitar drejtuar KQZ