Blog

Lulzim Basha në takim me përfaqësues të sipërmarrjes 

Në tryezën e debatit mbi stabilitetin politik dhe reformat të organizuar ne sipërmarrës shqiptarë, kryetari demokrat Lulzim Basha diskutoi paketën fiskale të demokratëve dhe rëndësinë e një stabiliteti politik i cili vë në lëvizje edhe ekonominë shqiptare. Por kjo, për Lulzim Bashën, vjen vetëm pas zgjedhjeve të lira e të ndershme.

Lulzim Basha tha për të pranishmit se programi i forcës së tij politike do të mbështesë atë 47% të popullsisë që preket nga sektori i bujqësisë. Sipas tij, fermerët sot zhyten në borxhe sepse aktiviteti bujqësor është kthyer në jofitimprurës pasi në këto katër vite, Shqipëria ka pushuar së investuari në bujqësi. Çmimet e larta të produkteve bazë dhe rritja e taksave e ka rënduar edhe më tepër sipas kryedemokratit Basha, jetën e fermerëve dhe sipërmarrësve në bujqësi. Për këtë arsye, shtylla e parë e programit të demokratëve bazohet tek kthimi i skemës së subvencioneve.

“Ne planifikojmë një buxhet prej 1,5% të Prodhimit të brendshëm bruto për bujqësinë shqiptare duke nisur nga vititi i parë një shumë totale prej 150 milion dollarësh, nga të cilat dy të tretat, pra  100 million euro do të përdoren për subvecionimin e drejtëpërdrejtë të prodhimit blegtoral, të peshkimit të blegtarisë dhe një e treta do të përdoret për investime në infrastrukturën ndihmëse të bujqësisë, që nga infrastruktura bazike.”

Taksa e sheshtë 9% është taksa që e rikthen Shqipërinë në hartën e  konkurueshmërisë rrajonale – tha Basha – sepse Shqipëria nuk mund ta ketë më shumë se vendet e rajonit. 9% tatimi mbi të ardhurat personale. 9% tatimi mbi fitimin. Zero tatimi mbi dividentin. 15% TVSH. 9% taksa e transferimit të  pronës.

Për kryedemokratin Basha, kjo përmbysje e sistemit fiskal llogaritet vetëm në vitin e parë me një injeksion në ekonomi mbi 1 miliard euro.

Lulzim Basha foli edhe për rëndësinë e ligjeve por sidomos të zbatimit të tyre, duke përmendur faktin se dekriminalizimi nuk po zbatohet sot nga qeveria. Basha tha se dështimi i sotëm i reformës në drejtësi, nuk do të kushtëzojë mbarvajtjen e vendit. Sipas tij reforma do të bëhet, ashtu sic do të bëhet edhe ajo elektorale, të cilën kryetari Basha e quajti edhe më të rëndësishme.

Lektorët në bashkëbisedim me qytetarët. Studentët na kërkojnë të mbështesim kauzat e mëdha të shoqërisë. Basha: Sot në KQZ, partitë opozitare do të dorëzojnë ultimatumin me shkrim për zgjedhje të lira dhe të ndershme. Kush i fryn borive të bojkotit, gabohet rëndë. Nuk do të ketë bojkot, do të ketë zgjedhje të lira dhe të ndershme, do të ketë Republikë të Re, qytetarët do të fitojnë.

Sot në ditën e 21 të protestës në Sheshin e Lirisë, ku kërkohet vota e lirë dhe e ndershme për zgjedhjet që po vijnë, u diskutua me pedagogë e njerëz të universiteteve në lidhje me temën; Pse të gjithë duan të vijnë në cadër?

“Kjo është ngjitëse”, tha pedagogia Belina Budini, e cila shpjegoi pse e vlerëson Sheshin e Lirisë, agorën e mendimit të lirë, si një platformë të jashtëzakonshme komunikimi.

“Kam ardhur pa asnjë ngurim. I jam përgjigjur ftesës së PD pa asnjë kompleks, pa dyshim në pozita krejtësisht të lira për të qenë këtu. Në auditorë kemi presion nga studentët për të marrë pjesë, për t’u angazhuar, për të mbështetur kauzat që i gjykojmë të drejta. Në këtë tempull, në këtë hapësirë të re, në këtë agorë, mund ta bësh me efikasitet. Studentët më thonë që duan të gjejnë forma për ta mbështetur këtë protestë që u flet atyre jo nga pozita politike por dhe shoqërore dhe sociale. Ata janë të angazhuar këtu në forma nga më të larmishmet. Kjo është para së gjithash një kauzë morale, para se të jetë partiake. Nuk duhet askush të ketë kompleks për t’iu bashkuar kësaj kauze, qoftë në linjën partiake ose jo”, tha Budini.

Leonard Boduri, është pedagog dhe autor i emisionit televiziv, Disco Lajme.

“Vota e lirë nuk është çështje e opozitës, nuk është çështje e zotit Basha, nuk është çështje e partive të tjera të koalicionit opozitar. Eshtë çështje e të gjithëve. Vota garanton të gjithë qytetarët, ata që votojnë dhe ata që nuk votojnë. Problemin që ne kemi me blerjen, me dhunimin, me presionin për të larguar nga puna njerëz, duke u marrë karta identiteti, janë trajta parafashiste të një shteti”, u shpreh Boduri.

Hari Aleksi është pedagog në Universitetin e Arteve.

“Doja të komplimentoja këtë protestë unike sepse është ndryshe nga ç’do protestë tjetër që është bërë. Në Universitetin tim kam parë përpjekjet e qeverisë për të goditur arsimin me disa reforma absurde. Do doja të ishim një nismë qytetare jo vetëm për arsimin por për mbarë kombin. Sot nuk flas vetëm si pedagog. Unë këtu flas is taksapagues, si një i ri që punon për vendin e tij. Nuk dua që në të ardhmen të kemi një vend që vazhdon të jetë eksportues kanabisi dhe importues plehrash. Unë dua një vend që të prodhojë inxhinierë, shkencëtarë, intelektualë dhe politikanë të ndershëm”, tha Aleksi.

Albano, pedagog i shkencave sociale thotë se: Askush nuk mund ta quajë veten edukator, mësues apo pedagog nëse nuk është në gjëndje të flasë dhe të mendojë i lirë. Rilindja po shkrin arsimin për xhepat dhe interesat e tyre. Kjo nuk është e lejueshme. Kësaj duhet ti themi stop! Unë premtoj që bashkë me kolegët e mi do e mbështesim këtë kauzë sepse nëse mbështesim të ardhmen, arsimin, mbështesim lirinë.

Lulzim Basha e nisi bisedën me një falenderim të vecantë për pedagogët që angazhohen për kauzat e mëdha të shoqërisë dhe që prej ditës së parë mbështesin lëvizjen popullore për zgjedhje të lira e të ndershme.

“Nuk ka kontrast më të qartë, mënyrë më të mirë për të shpjeguar të djeshmen që po ikën dhe të nesërmen që po vjen, se sa kjo agorë. Ti me kriminelë, unë me pedagogë. Ti me hajdutët, unë me qytetarët. Ti me vesin, ne me virtytin. Ti me antiligjin, ne me ligjin. Ti kundër zgjedhjeve, ne për zgjedhjet. Ti për drejtësinë e kapur, ne për drejtësinë e vërtetë, të pakapur që nuk mbron por ndëshkon krimin dhe korrupsionin. Ky është thelbi, kjo është fabula”, tha Lulzim Basha.

Kryetari i opozitës, njoftoi për hapa të reja të koalicionit qeveritar në drejtim të garantimit të votës së lirë e të ndershme.

“Sot në Komisionin Qendror të Zgjedhjeve, partitë opozitare do të dorëzojnë ultimatumin me shkrim për zgjedhje të lira dhe të ndershme. Kush i fryn borive të bojkotit, gabohet rëndë. Nuk do të ketë bojkot, do të ketë zgjedhje të lira dhe të ndershme, do të ketë Republikë të Re, qytetarët do të fitojnë, ju do të fitoni, Shqipëria do të fitojë. Me hapin e sotëm, opozita shqiptare provon luajitetin tonë ndaj kauzës së çdo qytetari shqiptar, kauzës së zgjedhjeve të lira dhe të ndershme. Republika e vjetër dhe klanet kriminale në pushtet guxuan të vënë në pikëpyetje gadishmërinë tonë për t’iu përgjigjur thirrjes dhe vendimit tuaj popullor më 18 shkurt.

Dje e morën mesazhin nga komunikimi ynë politik, sot do ta marrin me firmë dhe me vulë seriozitetin dhe vendosmërinë tonë për të qendruar me popullin dhe për popullin deri në arritjen e qëllimit tonë madhor, zgjedhjeve të lira dhe të ndershme; të lira nga krimi, të lira nga droga, të lira nga paratë e korrupsionit”, u shpreh Basha.

“Në kushtet e kriminalizimit që sa vjen e thellohet, të qeverisë së republikës së vjetër që e ka kapur paniku dhe kur ne flasim sdinë ku të fusin kokën, në kushtet e drogës dhe parave të drogës, dhe rrezikut real për demokracinë dhe stabilitetin e vendit, për ekonominë, shoqërinë dhe familjet e fëmijët e shqiptarëve nga sezoni i ri i mbjelljes së drogës që po afron, në kushtet e mungesës totale të reformës zgjedhore me qëllimin e vetëm për të shtypur dhe tjetërsuar votën e shqiptarëve, në kushtet e sabotimit me vetëdije të reformës në drejtësi sipas përcaktimeve kushtetuese të 22 korrikut, nga ata që kanë frikë nga drejtësia e vërtetë dhe e pakapur; ka një dhe vetëm një zgjidhje”, pohoi Lulzim Basha.

Dhe zgjidhja është: Qeveri teknike, largimi i Edi Ramës dhe kabinetit të turpit, kabinetit të krimit, kabinetit të drogës. Asnjë tërheqje nuk ka e nuk mund të ketë sepse çdo tërheqje do të ishte tradhti para qytetarëve shqiptarë para të ardhmes së shqiptarëve dhe fëmijëve të tyre.

“Ndaj jemi këtu duke u njohur edhe më shumë me njëri tjetrin me ju qindra mijëra heronj. Tashmë jo të heshtur por zë-lartë, të lirisë, demokracisë dhe zgjedhjeve të lira e të ndershme duke frymëzuar kurajon qytetare duke vrarë frikën cep më cep të Shqipërisë. Duke i kërkuar qytetarëve kudo ku janë, të ngrihemi dhe të përmbysim republikën e krimit, drogës dhe zgjedhjeve të kapura”, tha Basha.

Kryetari i opozitës ka siguruar qytetarët se: Kjo betejë nuk bëhet për interesat tona politike. Nuk bëhet për të sjellë në pushtet një parti për të bërë një person një kryeministër. Kjo betejë bëhet për të fituar një herë e përgjithmonë pasaportën e dinjitetit evropian për çdo shqiptar e çdo shqiptare.

“Ta dinë po mirë që sado të pasur të jenë bërë, sesa do kriminelë të fusë në oborrin apo në zyrën e kryeministrisë nuk ka qeveri të inkriminuar e të korruptuar ti bëjë ballë popullit që ngrihet bashkë për të drejtën legjitime dhe sovrane të zgjedhjeve të lira dhe të ndershme. Fronti zgjerohet orë për orë. Të papunë, fermerë, pensionistë, intelektualë, të reja, të rinj, burra gra të moshuar, artistë sportistë, sipërmarrës e punëmarrës, sindikata, jemi të gjithë në këtë front, të djathtë e të majtë qytetarë të bashkuar deri në fitore”, deklaroi Lulzim Basha.

Në ditën e 20 të protestës, në Sheshin e Lirisë u diskutua për ekonominë, për rrënimin e mirëqenies së familjeve shqiptare, për vendet e punës që po mbyllen, për shtetin që po shkatërron biznesin por edhe rrugët e daljes, për një ekonomi që hap mundësi për të gjithë.

Të rinj dhe pronarë biznesi ndanë me Lulzim Bashën eksperiencën e tyre gjatë këtyre viteve. Olti nga Elbasani tha se është në prag të falimentimit. “Unë kam një restorant dhe fjalët janë pak se çfarë po heq biznesi në këto 4 vite. Që në vitin 2013 ky kryeministër e nisi si në vitin 46, dhe ne biznesin, na quajti matrapazë. Duhet të dalim të mbrojmë të drejtat tona dhe kjo sot është gjëja më e bukur e jetës time që po flas para jush. Ne duhet ti themi Ramës ik se nuk e meriton të quhet kryeministër që kujdeset vetëm për kollaret e  veta”, tha ai.

Boris Sopi erdhi nga Durrësi dhe foli për biznesin e tij që ndodhet pranë sheshit ku Vangjush Dako po shpenzon 6 milionë euro nga taksat e durrsakëve e po varros historinë e qytetit. “Po tregoj  këto fotot. Këtu po ndërton Dako sheshin me 6 milionë dollar, ja ku shkojnë taksat tona. Përballë tij unë kam biznesin që e hap kur nuk bie shi, por edhe të nesërmen kur nuk bie shi të vijnë tatimet. Çdo ditë ne përballemi me këtë fatkeqësi. Ndërkohë, Vangjushi hedh 6 milionë dollarë vetëm për veten e vet. Nuk mund të vazhdohet më kështu”.

Po ashtu, edhe Artion Bajramaj nga Durrësi, një i ri që punon si specialist në bankë u shpreh se kjo qeveri ka vrarë shpresën ndërsa bizneset po rrënohen çdo ditë. “Ne në sektorin bankar shohim se si çdo ditë falimentojnë bizneset. Ka shumë të tjerë që mezi paguajnë këstet e kredive. Nga viti i kaluar, sipas shifrave të Bankës së Shqipërisë janë rritur 7% kreditë me probleme. Biznesi kërkon tjetër strategji dhe rregulla loje. E vetmja gjë që kjo qeveri i ofron biznesit janë kontrollet e përditshme dhe gjobat. Biznesi po fundoset. Unë jam ndër ata të rinj që ka vendosur të ndërtojë të ardhmen në këtë vend. Por kjo qeveri vrau shpresën ndaj do të doja që ti ftoja të gjithë ëktu dhe ti thoja liderit Basha që ne duam të ndërtojmë Shqipërinë, ta bëjmë një vend të begatë”, tha Bajramaj.

Daniel Ndregjoni është një djalë i rikthyer nga emigracioni por që sot po falimenton në biznesin e tij të vogël për shkak të rritjes së varfërisë. “Jam rikthyer nga emigracioni 3 vite më parë dhe hapa 2 biznese të vegjël, një dyqan për rimbushje elektronike dhe një market të vogël. Por pa kaluar 3 muaj me erdhi letër nga tatimet ku me thonë që je biznes i madh duke më thënë që kaloj 5 milionë xhiro. Po si mund të taksohem unë si biznes i madh kur mbledh faturat e OSHEE-së, dhe me një fitim vetëm prej 0.8%. Fuqia blerëse ka rënë shumë dhe janë rritur shumë borxhet. Në mbushjet ditore që bëj shoh që ka ditë që më shumë kam dhënë me borxh, se sa me lekë. Në këtë situatë nuk ka mbetur më asgjë dhe e vetmja mundësi është të ngrihemi. U bëj të githë thirrje të gjithë bizneseve të vijnë këtu të protestojnë”, tha Danieli.

Investitori Roberto Caparrota tha se kolegët e tij kërkojnë të ikin nga Shqipëria ndërsa ngriti edhe alarmin e mbylljes së biznesve call-center ku ajnë të punësuar 25 mijë të rinj shqiptarë. “Në vitin 2013 pati një rritje të madhe taksash, si tatim fitimi, me 50 %. Të ishte një rritje e moderuar, le të themi 5% do ishte e pranuar, por me 50% nuk justifikon asgjë. Për një biznes kjo do të thotë falimentim. Unë jam përfaqësues i Konfindustrias Italiane në Shqipëri dhe mund të them se shumë prej biznesve italiane duan të ikin nga Shqipëria. Kanë shpresë vetëm tek 18 Qershori, tek programi i Partisë Demokratike. Shumë të tjerë më kanë pyetuar a ke frikë që del në protestë. Unë u them që jo, dhe u them që do rri këtu deri në fund. Dua të ngre edhe një shqetësim tjetër, pasi në datën 1 Prill do të hyjë në fuqi ligji për call-center. Këtu në Shqipëri janë 800 call-center me të punësuar 25 mijë të rinj, ç’ka do të thotë që do të dalin nga puna. Por qeveria nuk flet për këta të rinj. Ata duhet të ngrihen të protestojnë”, tha Caparrota.

Dorian Teliti tha se ekonomia shqiptare është rrënuar dhe këtë ta konfirmon çdo familje shqiptare që sheh portofolin e shpenzimeve familjare. Teliti tha se shpresa e shqiptarëve është program i opozitës për taksa të ulëta, një qeveri miqësore me biznesin dhe një lider si Basha.

“Presidenti Regan, një nga më të shquarit e SHBA-ve, kur po fliste një ditë për ekonominë tha se ekonomia ecën përpara nga bizneset dhe njerëzit. Por kanë nevojë për një mbështetje nga ana e qeverisë e cila me politikat e saj bën të mundur që mekanizmi i ekonomisë të ecë përpara. Një pyetje, për të gjithë. A janë ndërmarrë gjatë këtyre viteve politika të duhura që të mbështesin familjet, bizneset dhe individët?! Një kryeministri që ka shkelur kontratën me qytetarët i thuhet të largohet dhe të ikë në shtëpi. Taksat e rritura gjatë këtyre viteve janë më pak para në xhepin tuaj, më pak para për të hapur evnde pune. Ndaj dhe ka më pak vende pune dhe shumë qytetarë detyrohen të largohen nga vendi. Ne jemi këtu për të njoftuar shqiptarët dhe për ti bërë me dije se në Shqipëri nuk do të ketë më mashtrime por një republike të së vërtetës dhe së drejtës. Ndonëse situata e ekonomisë dhe familjeve shqiptare është shumë e keqe, po ashtu e bizneseve, po realisht ka një dritë të fund të tunelit. Shqipëria dhe ekonomia ka nevojë për taksa më të ulëta, ka nevojë për programin e Partisë Demokratike, ka nevojë për Lulzim Bashën”, tha Teliti.

Biznesi i vogël duke filluar nga e Hëna e kësaj jave që po mbyllet po pëson dhe po përjeton një sulm, një masakër, një terror të vërtetë nga falangat e taksidarëve të Edi Ramës, Arben Ahmetaj dhe kryetarëve të papërgjegjshëm të bashkive. Me urdhër të kësaj qeverie të bërë njësh me krimin dhe drogën, i janë vërsulur bizneseve të vogla gjatë gjithë kësaj jave, me gjoba, me presione, me inspektime pas inspektimesh. Këtë e dinë shumë mirë urdhëruesit, e dinë shumë mirë në kurrizin e tyre përfaqësuesit e biznesit dhe bëjnë mirë edhe mediat të heqin censurën dhe autocensurën dhe të pasqyrojnë dramën e përditshme dhe të përnatshme të mijëra bizneseve të vogla të mesme dhe të mëdha që tash 5 ditë janë nën terrorin e taksidarëve të Edi Ramës. Kjo është një dramë kombëtare që luhet në fakt prej 3 vitesh e gjysëm. Sa herë dështojnë me mbledhjen e taksave, sepse fusin paratë e taksapaguesëve në xhepat e tyre ose sepse baza e ekonomisë sa vjen e tkurret, se bizneset mbyllin qepenat dhe falimentojnë kanë vetëm një avaz, ti përvishen popullit, ti përvishen sipërmarrjes, ti përvishen biznesit të vogël që mezi qëndron në këmbë nga barra e shumëfishuar e taksave dhe e faturave”, tha Basha.

Kryetari i opozitës i paralajmëroi sërish abuzuesit që po ushtrojnë dhunë ndaj biznesit të vogël.

“Mbrëmë ju kam dhënë një paraljmërim dhe sot dua ta përsëris nga ky shesh i të vërtetës, nga ky shesh i lirisë dhe themel i Republikës së re që po ndërtojmë, mbani shënim emrat dhe mbiemrat, Republika e re do ti vërë para ligjit, do ti bëjë përgjegjës një për një. Nuk do të shpëtoni nga forca e hekurt e ligjit, të gjithë ju që në mënyrë të paligjshme, abuzive, terrorizoni shqiptarët, terrorizoni bizneset, Republika e re po vjen”, tha Basha, duke kërkuar që ti bëhet rezistencë këtij represioni.

“Shqiptare dhe shqiptarë ngrihuni, çohuni dhe bashkojuni rezistencës, biznesmene dhe biznesmenë, sipërmarrës të ndershëm rezistoni, protestoni dhe shënoni çdo padrejtësi dhe emrin e çdo zuzari të veshur me pushtet. Nuk ka për të pasur asnjë falje, asnjë amnisti për ata që kanë marrë zvarrë dinjitetin e shqiptarëve në këto 4 vite, do të përgjigjeni një për një para ligjit të Republikës së re dhe këtë e dini fare mire”, pohoi Basha.

Ku shkojnë paratë e taksave të mbledhura që çojnë në falimentim bizneset, që mbyllin dyert e bizneseve, që flakin shqiptarët nga vendet e punës dhe i detyrojnë të dalin në rrugë, të kridhen në dëshpërim apo të marrin rrugët e emigracionit?, ngriti pyetjen Basha.

“Ku shkojnë paratë e taksave tuaja, ku shkojnë paratë që ju paguani për shëndetësinë, për arsimin, për investimet? Të gjitha në duart e 5 oligarkëve të lidhur drejtpërdrejtë me Edi Ramën, që marrin çdo tender, çdo koncesion”, tha Basha.

Kryetari i Partisë Demokratike siguroi se Republika e Re do ta nisë punën duke shpërndarë të ardhurat në mënyrë të drejtë e të barabartë.

“Në fund të 4 viteve të para të Republikës së Re, nuk do të ketë pension nën 250 mijë lekë të vjetra. Hajdutët do ti dorëzojnë, do tua marrim dhe do tua japim pensionistëve shqiptarë. 40% do të jetë rritja mesatare e pensioneve në Republikën e Re të drejtësisë, demokracisë dhe shtetit ligjor. Në Republikën e Re taksa e sheshtë 9% për fitimet personale mbi 300 000 lekë, 300 000 lekëshi i parë do të mbetet i pataksuar. 9 përqind për fitimin korporativ dhe për taksën e transferimit të pronës që e kanë çuar 15%, duke ngrirë transaksionet e pronave të shqiptarëve. TVSH-ja 15%, formalizim total të tregut, sepse shqiptarët do të jenë krenarë të kontribuojnë taksën më të ulët në Ballkan, në Republikën e Re të lirisë dhe mundësive për të gjithë. Biznesin e vogël do ta marrë malli për të parë taksidarë me sy, taksidarët do të mbyllen në kazermë, asnjë nuk do të jetë havale përpara biznesit shqiptar. Me pullën fiskale të ekspozuar në dritare dhe vitrinat e çdo biznesi, do i themi ndal dhe shporru, taksidarit shqiptar”, tha Basha.

Nuk do të ketë, shtoi Basha, në qeverisjen e Republikës së Re, kryeministër që të shpenzojë qindra mijëra euro për palma, fasada, buzëkuqe, kur populli vuan për bukën e gojës. Në Republikën e Re nuk do të ketë familje që vuan për bukë, ujë dhe drita, sepse Republika e Re financat do ti ketë për qytetarët shqiptarë. Pra, si çdo diskutim tjetër edhe ky diskutim politik në fakt është në dikutim ekonomik. Kush kontrollon paratë, ku shkojnë paratë? Republika e vjetër i do për vete, për kryeministrin dhe një grusht hajdutësh rreth tij, republika e vjetër do gjithçka për vete, resurset, buxhetin, tenderat, koncesionet, hashashin gjithçka për vete. Republika e Re, republika e ligjit paratë e qytetarëve shqiptarë do ti shpenzojë vetëm për shqiptarët, për qytetarët, për banorët, për të papunët, për biznesin, për investimet, për shëndetësinë dhe arsimin.

Luzlim Basha siguroi se lëvizja popullore që ka nisur me 18 shkurt do të vazhdojë cdo ditë përpara.

“Asnjë tërheqje nga kjo betejë! Demokracia kërkon sakrificë, demokracia kërkon përgjegjësi, demokracia kërkon kurajo, ne i kemi të treja, kemi vendosmërinë, kjo betejë sapo ka nisur, por ne do ta fitojmë!”, u shpreh Basha.

Njoftim per shtyp 9 Shkurt 2017

Sot në 8 Mars, duke marrë kurajo nga kurajo e grave shqiptare, opozita e bashkuar ka marrë një vendim. Ky vendim që po kështu ka filluar të spinohet në forma dhe mënyra të ndryshme është i thjeshtë dhe i qartë. Vendimi përbëhet nga dy pjesë. E para; organizimin në të gjithë territorin e Shqipërisë të Kuvendeve Qytetare për Zgjedhje të Lira dhe të Ndershme. Këto kuvende do të jenë hapësirat e lirisë ku do të bashkohen qytetarë, do të bashkohen punëdhënës dhe punëmarrës, të papunë, të rinj e të reja, intelektualë, akademikë, artistë, sportistë, fermerë, pensionistë, për ti dhënë thellësi dhe qendresë qëllimit tonë madhor, zgjedhjeve të lira dhe të ndershme, përmes një qeverie teknike. Këtu do të marrë formë përmes kontributit të çdo shqiptari Republika e Re, republika e vlerave europiane, republika e barazisë së qytetarëve para ligjit, republika e kufizimit të pushtetit për politikanët dhe fuqizimit të pushtetit politik dhe ekonomik për qytetarët.

Në këto forume, gjithkush ka mundësinë, është i mirëpritur dhe i thirrur të jetë pjesë e hartimit të këtij projekti të madh kombëtar. Nuk është e nuk mund të jetë kurrë, as monopol i Lulzim Bashës, as monopol i Partisë Demokratike dhe as monopoli i opozitës, Republika e Re është është që nga gjeneza, kërkesa juaj e do të jetë projekti i çdo shqiptari.

Vendimi i dytë i opozitës së bashkuar nuk është bojkoti i zgjedhjeve. Jo more zotërinj, nuk do tia hidhni kaq lehtë. Nuk ka për të patur bojkot zgjedhjesh, sepse zgjedhje fasadë me krimin, nuk do të ketë. Qytetarët shqiptarë janë të vendosur. Rezistenca civile, mosbindja civile, armata e republikës së re do të pengojë me të gjitha mjetet popullore, qytetare, demokratike dhe paqësore, zgjedhjet me krimin, zgjedhjet me drogën dhe zgjedhjet fasadë. Ua kemi dhënë paralajmërimin nga ky shesh me 18 Shkurt. Ua përsërisim ditë për ditë, e natë për natë. Ngule mirë në mendje. Zgjedhje fasadë nuk ka për të pasur më në Shqipëri.

Ndaj i ke bërë hesapet pa popullin, ose siç thotë populli pa hanxhinë. Populli është këtu, vendimi është marrë, zbrit me këmbë në tokë. Shqiptarët nuk i dorëzohen më dëshpërimit. Askush nuk do të vrasë më veten për gjëmat e qeverisjes tënde. Të gjithë bashkë, do të vrasim republikën e vjetër, siç kemi vrarë frikën. Dhe do ti japim shqiptarëve atë që duan dhe meritojnë, Republikën e Re ku ka vend për të gjithë. Ata njerëz, burra, gra të rinj e të reja që duan një Shqipëri europiane të votës së lirë, të ligjit të barabartë për të gjithë, të drejtësisë së vërtetë që nuk mbron, por ndërshkon krimin dhe korrupsionin. Këto janë vlera të përbashkëta europiane. Këto janë vlera esenciale perëndimore. Ky është edhe themeli i demokracisë më të madhe në botë, Shteteve të Bashkuara të Amerikës, nga kemi marrë dhe vazhdojmë të marrim përkrahje dhe mbështetje pa kushte për zgjedhje të lira dhe të ndershme. Sonte dua të risjell në vëmëndje dhe të falenderoj përzemërsisht të gjithë ata që përmes mesazheve, letrave, telefonatave, bisedave të drejtpërdrejat me mua apo me përfaqësuesit e nderuar të koalicionit tone, siç është z Mediu që sapo u kthye nga Uashingtoni, Kanë mbështetur dhe mbështesin këtë beteje, si; kongresmenët: Dan Lipinski, Randy Hultgren, Richard Hudson, Louie Gohmert, John Moolenaar, Thomas Suozzi, Jeff Fortenberry, Trent Kelly dhe Robert Aderholt. Si dhe senatorët Lamar Alexander, James Lankford, Mike Enzi, Luther Strange, Susan Collins, Jim Inhofe, Tom Cotton, Roger Wicker, Mike Rounds dhe Ted Cruz.

Deklarata e Lulzim Bashës në Sheshin e Lirisë, 8 Mars 2017

Gruaja shqiptare është sot e dhunuar pikologjikisht, për shkak të largimeve masive nga puna, nga vështirësitë e padrejtësitë e jetës që tek mungesa e ndihmës ekonomike deri tek shëndetësia me probleme. Në sheshin e lirisë, nëna, profesioniste, vajza të arsimuara, dëshmuan persekutimin që qeveria u ka bërë, duke i larguar nga puna me pa të drejtë. Madje largimet ishin edhe më tronditëse ku shumë nëna u larguan nga vendi i tyre i punës pa paralajmërim, gjatë lejes së lindjes, apo edhe në rastet  kur fëmijët e tyre vuanin nga sëmundje të rënda. Të gjitha këto rrëfime tronditëse ishin pjesë e bashkëbisedimit sonte me kryetarin demokrat Basha.

Juvina, tregoi historinë e saj ku u largua nga puna teksa kishte marrë lajmin e hidhur se djali i saj i mitur kishte lindur me një sëmundje agresive.

“Kërkuan largimin tim edhe pse djali im ishte diagnostidikuar me paralizë cerebrale. Ata nuk donin t’ia dinin. Isha e diplomuar në dy fakultete dhe sapo kisha nisur masterin shkencor. Kërkoj largimin e kësaj qeverie për shkak se dua që nënat me fëmijë me nevoja të veçanta të mbështeten nga një qeveri e re”.

Eda Grimci u largua nga puna pak ditë pasi kishte lindur fëmijën e saj të dytë. Ajo u njoftua për largimin nga puna nga Ministria e Mbrojtjes ku ushtronte profesionin e saj si juriste, vetëm me një telefonatë gjatë kohës që sapo kishte lindur dhe ishte ende në spital.

“U largova nga puna nga një ministre femër. Nuk u lejova të hyja në institucion pasi ishte dhënë urdhër. Largimi im nga puna nuk erdhi si pasojë e shkeljeve që unë kisha bërë, jo, isha demokrate. I kërkoj zotit Basha që të premtojë të zbatojë vendimet e gjykatave për rikthimin në vendin e punës të të gjithë atyre që janë hequr me pa të drejtë nga kjo qeveri”.

Në çadrën e lirisë bashkëshorti i Brunildës, e cila tragjikisht vrau veten në qytetin e Korçës, 3 vite më parë pasi u pushua nga puna, theksoi se bashkëshortja e tij kreu këtë veprim, për shkak të largimit nga puna.

“Vazhdojnë të na persekutojnë, edhe pse jemi familje e thjeshtë dhe e ndershme. Brunilda ishte e vetmja që punonte dhe mbante familjen”, tha ai.

Humbja e jetës së një pacienti nga mungesa e ilaçeve në spitalin e Lezhës, u rrëfye nga bashkëshortja e tij Dila. Ajo dëshmoi gënjeshtrën që ministri i shëndetësisë Beqaj u thotë shqiptarëve.

“Bashkëshorti im humbi jetën pasi nuk gjendej ilaçi për sëmundjen që ai kishte”, theksoi ajo.

Një tjetër rast i shkarkimit pa asnjë motiv, ishte ajo e zonjës Rina Istrefi, arsimatare, me 25 vite punë.

“Më hoqën për bindje politike. Ku është portali mësues për Shqipërinë? Profesionistët janë jashtë sistemit arsimor. Persekutimi është i jashtëzakonshëm. Sfidova problemet e mia shëndetësore sepse e dua këtë profesion. U shpikën testime pa bazë ligjore. Fyejnë rëndë inteligjencën shqiptare. Arsimtarët janë aty por janë flakur jashtë sistemit arsimor zonja ministre. Flakni tej frikën politike në arsim, ngrini zërin dhe kërkoni të drejtat tuaja. Guxova më tepër se të tjerët, ndaj jam jashtë sistemit arsimor. Zonja ministre në asnjë moment nuk tregove se je grua, nënë apo arsimtare. Largohu zonja Ministre. Ti ke ngelur në klasë”, tha mësuesja e gjuhës dhe e letërsisë.

Violeta Geca, e hequr nga puna me dhunë nga Erjon Veliaj, tha se ai ka hedhur në rrugë të madhe një familje prej 7 anëtarësh.

“Unë fitova gjyqin dhe duhet të rikthehem”, tha ajo.

Hariklla Zoto paralajmëroi ngujim përpara Ministrisë së Mbrojtjes pas një problemi me pronën e saj.

“Policët më kanë tërhequr zvarrë në katër të mëngjesit, teksa unë prisja një përgjigje nga Ministrja e cila sot ka shkuar me pushime. Isha në të drejtën time”.

Lulzim Basha tha se megjithë vuajtjet dhe persekutimet, dhe përvojat tronditëse, gratë janë kthyer në model të qëndresës e rezistencës për drejtësi e dinjitet.

“8 Marsi është ditë proteste, është ditë proteste dhe qëndrese dhe sot me 8 Mars 2017 gratë e pranishme në sheshin e lirisë i vunë vulën europiane 8 Marsit, jo ditë feste, ditë proteste! Sonte dëgjuam disa nga dëshmitë e grave, nënave, vajzave të pranishme këtu në këtë shesh të lirisë. Këtu ka dhe shumë burra, besoj se ndajmë të njëjtin mendim se ajo që dëgjuam ishte në rradhë të parë tronditëse dhe rrënqethëse, tha Basha, duke shtuar se në radhë të dytë, me gjithë vuajtjet, persekutimin, nëpërkëmbjen, sakrificat e jashtëzakonshme që këto gra dhe qindra e mijëra si ato anembanë Shqipërisë kanë hequr e po heqin nën këtë qeverisje të pashpirt, sërish me qëndresën që kanë bërë me forcën dhe kurajon që kanë demostruar, ato janë bërë heroinat tona, heroinat e çdo shqiptari”.

Duke u ndalur tek modeli i Edi Ramës, Basha tha se: “Ky model nuk ka të bëjë me ideologjitë, nuk është model i djathtë kurrsesi, sepse e djathta bazohet tek familja, tek vlerat familjare, tek respekti i ndërsjelltë midis bashkëshortëve, tek ngritja në piedestal dhe barazia e vërtetë midis gruas dhe burrit në familje dhe në jetë, por nuk është as model i majtë. Edi Rama me sjelljen e tij dhe pasojat e rënda ndaj grave shqiptare përfaqëson vetëm modelin e krimit, modelin e drogës, modelin e trafikantëve që i bëri deputetë dhe kryetarë bashkish”.

Për Bashën, dhuna që ushtrohet ndaj grave sidomos në zgjedhje do të ndalet, do të marrë fund. Basha siguroi se lëvizja popullore që ka nisur nuk ndalet deri në fitore, deri në garantimin e votës së lirë e të ndershme.

“Sot, Shqipëria gjendet para një udhëkryqi me pikëpyetje të mëdha. Kriminelët, trafikantët e drogës, që morën për veshi kandidatët për kryetarë bashkish në vitin 2015 e deri në zgjedhjet e pjesëshme të Dibrës në vitin 2016, e kanë treguar fare mirë se çfarë ndjejnë dhe se çfarë respekti kanë për qytetarët shqiptarë në tërësi dhe për gratë në veçanti. Me dhjetra me qindra dëshmi gjatë proceseve zgjedhore faktuan dhunën verbale, kërcënimet me jetë dhe dhunën fizike të këtyre horrave të veshur me pushtet ndaj grave në zonat elektorale. Të gjithë e mbani mend rastin e 18 vjeçares nga qyteti i Vorës, e cila me lotë në sy denoncoi në ekranin e Blendi Fevziut se ditën që priste të festonte të drejtën e saj për herë të parë si qytetare e Republikës, për të votuar, u mbyll 24 orë në shtëpi duke qarë sepse banditët e veshur me pushtet kishin kërcënuar nënën dhe babain e saj se do ti hidhnin në erë dyqanin nëse do të dilte të votonte. Ky është realiteti i krimit të lidhur me pushtetin dhe pushtetit që mbështetet te krimi. Përsëri krimi i bërë njësh me pushtetin kërcënon të drejtat tona themelore”, tha Lulzim Basha.

Kryetari i opozitës dënoi faktin se mediat vazhdojnë të diktohen dhe nuk I kushtojnë rëndësinë që meriton Shqipërisë reale.

“Ditë për ditë e natë për natë ky shesh ka dëshmi tronditëse të Shqipërisë së vërtetë dhe ditë për ditë e natë pë natë ekranet qeveritare bëjnë gjithçka, transmetojnë gjithçka përveç Shqipërisë së vërtetë. Sa herë që ekranet e kapura nga qeveria censurojnë Shqipërinë e vërtetë, drejtohuni Facebook-ut, aty do të gjeni të vërtetën e pacensuruar, të vërtetën troç, siç thuhet, haptazi në këtë shesh të lirisë”.

Njoftim per shtyp 8 Mars 2017

Në tryezën e sotme Koalicioni Opozitar vendosi ngritjen e Kuvendeve Qytetare Për Zgjedhjet e Lira dhe të Ndershme anembanë Shqipërisë, me përfaqësues të spikatur të komunitetit dhe të gjithë grupeve të interesit, si pjesë e Lëvizjes Popullore për zgjedhje të lira dhe të ndershme.

Koalicioni Opozitar ritheksoi vendimin e marrë nga bashkimi popullor i 18 shkurtit se vetëm një qeveri teknike që do të zbatojë plotësisht dekriminalizimin, dhe do të angazhohet në luftën ndaj drogës, krimit dhe parave të paligjshme kriminale, mund të garantojë kushtet për zgjedhje të lira dhe të ndershme.

Koalicioni Opozitar shpreh vendosmërinë për të mos lejuar asnjë proces zgjedhor të manipuluar nga krimi në pushtet dhe paratë e drogës, dhe për të vazhduar deri në fitore betejën për zgjedhje të lira dhe të ndershme si interes jetik i Shqipërisë dhe shqiptarëve.

Njoftim per shtyp 8 Mars 2017

8 marsi bashkon gratë, vajzat dhe nënat në Sheshin e Lirisë. Kërkohet votë e lirë dhe e ndershme. Basha: Republika e re do të ngrihet mbi respektin dhe vlerësimin për gruan

Në Sheshin e Lirisë, qindra gra nga e gjithë Shqipëria, protestuan sot para kryeministrisë me kërkesën për zgjedhje të lira dhe të ndershme, për drejtësi gjinore, për të drejta të mohuara për gratë.

Gra, nëna e vajza, Lidhja Demokratike e Gruas së Shqipërisë dhe kryetarja e saj Albana Vokshi, ishin pjesë e protestës në ditën e 19-të saj, në ditën ndërkombëtare të gruas, 8 marsin.

Kryetari demokrat Lulzim Basha, iu bashkua grave dhe vajzave duke theksuar se të drejtat e tyre për arsim, punësim, për pagë të barabartë, për përfaqësi në vendimmarrje, janë të drejta të kërcënuara në vende diktatoriale por edhe në ato shoqëri që i thonë vetes demokratike por që demokracinë e konsiderojnë fasadë.

“Fatkeqësisht në këto katër vite të fundit ky është edhe problemi më i madh i Shqipërisë, ku demokracia fasadë, parlamenti fasadë, qeverisja fasadë, rëndon mbi të gjithë, mbi gratë shqiptare. E kemi parë këtë, e ka parë gjithë Shqipëria, e kanë parë gjithë miqtë tanë se si në Parlamenitn e Shqipërisë gratë deputete u spostuan për t’i bërë vend kopukëve, kriminelëve të dënuar pikërisht për akuzat e rënda dhe veprat e përbindshme të trafikimit të qenieve njerëzore, pra kryesisht të trafikimit të nënave dhe motrave shqiptare. Kemi një qeveri dhe një kryeministër që e ka gojën plot kur vjen fjala për të drejtat e grave por që në fakt e ka bilancin e zi, bilancin zero. Them se e ka bilancin e zi, pasi jo më shumë se një javë më parë Shqipëria është renditur në krye të listës së vendeve të trafikut të qënieve njerëzore”, theksoi Basha.

Lideri i opozitës solli edhe një herë në vëmendje kujdesin që nënat dhe fëmijët do të kenë, pas rrëzimit të Republikës së Vjetër.

“Republika e Re e ka për detyrë të veprojë jo vetëm në rrafshin e planeve dhe programeve, por edhe në rrafshin e veprimeve  konkrete që ndihmojnë dhe përmirësojnë të drejtat, liritë dhe fatin e grave në shoqëritë shqiptare. Duke nisur me programin tonë për arsimin 9-vjeçar dhe të mesëm si rezultat i të cilit shteti dhe arsimi publik shqiptar do të garantojnë që fëmijët e shqiptarëve të jenë të kujdesur nga sistemi arsimor përgjatë gjithë orarit të punës të grave shqiptare kudo ku ato punojnë. Nga ora 07.30 e mëngjesit deri në orën 16.00, shteti shqiptar, arsimi publik shqiptar do të marrë përgjegjësitë e plota për fëmijët e shqiptarëve duke çliruar nga barra e sakrificës e pasigurisë të gjitha gratë shqiptare në marrëdhënie pune. Ky është fillimi i një arsimi publik të përmasave europiane pa të cilin nuk mund të kemi dinjitet dhe kushte europiane për gratë dhe nënat shqiptare”, garantoi Basha.

Basha vlerësoi qëndresën e grave në protestë në lëvizjen mbarëkombëtare për votë të lirë dhe të ndershme.

“Fytyra e vërtetë e Republikës së Re, vlerat e vërteta të Republikës së Re, premtimi i vërtetë për një standard europian për Republikën e Re, themelohet mbi bashkimin e grave shqiptare rreth kësaj aspirate kombëtare, qytetare dhe demokratike”, tha Basha.

Kryetari i Partisë Demokratike, Lulzim Basha priti në një takim pjestarë të misionit të OSBE-ODIHR, Richard Lappin, zëvendëskryetar i Departamentit të Zgjedhjeve, Ana Rusu, këshilltare për zgjedhjet, Alexey Gromov, këshilltar për zgjedhjet, Francesco Pagani, kreu i këshilltarëve politikë në Asamblenë Parlamentare të OSBE.

Ky mision i OSBE gjendet në Tiranë për të analizuar situatën parazgjedhore.

Kryetari i Partisë Demokratike i njohu me shqetësimet e opozitës që kanë të bëjnë me rrezikun real që i kanoset zgjedhjeve, votës së lirë.

Basha tha se zgjedhjet janë në rrezik nga qeveria, e cila nuk zbaton dekriminalizimin dhe vazhdon të ndajë pushtetin me kriminelë dhe banditë të njohur. Zgjedhjet janë në rrezik, tha Basha, nga droga që ka mbuluar vendin dhe nga paratë e këtij trafiku që arrijnë në disa miliardë euro në vit.

Z.Basha tha se krimi është një kërcënim për zgjedhjet e lira e të ndershme. Ai theksoi se qeveria nuk ka reflektuar pas rekomandimeve të fundit të OSBE-ODIHR për zgjedhjet e vitit 2015 të cilat ishin një hap i madh pas në drejtim të standardeve demokratike.

Kryetari i opozitës vuri në dukje se Edi Rama ka prishur të gjitha zgjedhjet që janë bërë qysh se ai erdhi në pushtet duke dhunuar votën e lirë, përmes blerjes së saj, apo përmes kërcënimit e dhunës.

Gjithashtu, Basha theksoi se KQZ ka treguar andshmëri duke i bërë rezistencë ligjit të dekriminalizimit duke mbrojtur hapur interesat e kryeministrit dhe lidhjet e tij me krimin.

Po ashtu, Basha pohoi se edhe Kolegji Zgjedhor është një institucion nën presion për shkak të kërcënimeve që i bën qeveria gjyqësorit.

Pasi parashtroi të gjithë këto rrethana ku ndodhet vendi, z.Basha i bëri të ditur misionit të OSBE-ODIHR se e vetmja rrugë për të pasur zgjedhje të lira e të ndershme është që ato të mbahen nga një qeveri teknike, e cila do të fokusohet në zbatimin e dekriminalizimit, në luftën kundër drogës, krimit, dhe parave të trafikut të paligjshëm.

Pasditen e tetëmbëdhjetë në sheshin e lirisë, kryetari demokrat Lulzim Basha bashkëbisedoi me mësuesit e niveleve të ndryshme te arsimit publik në Shqipëri, të cilët në këtë 7 mars ngritën zërin për rikthimin e dinjitetit dhe respektit tek mësuesia.

Forumi u çel me performancën operistike të dy nxënësve Adejon Kola dhe Fortunato Ndoi të cilët përshëndetën me këngë, mësuesit shqiptarë kudo ndodhen.

Irma Marku, mësuese gjuhë letërsie tek shkolla Ismail Qemali në Tiranë, denoncoi shkarkimin e saj nga Këshilli i Etikës së shkollës vetëm sepse kishte ngritur shqetësim lidhur me marrëdhënien jo gjithmonë të mirë mes mësuesit dhe nxënësve të tij.

“Dokumenti zyrtar i drejtorit të shkollës, i jep udhëzime Këshillit të Etikës për shkarkimin tim komplet jashtë rregullores pa ju drejtuar komisionit i cili është përgjegjës për këtë punë.”

Një mësues nga Devolli, me arsim të lartë, e gjeti veten të përjashtuar nga reforma në arsim e kabinetit Rama dhe prej tre vitesh është i papunë. Mesazhin zotëria ia drejtoi ministres së arsimit Lindita Nikolla.

“Ju na nxorrët përkohësisht nga sistemi arsimor, por titullin mjeshtër, mësues nuk ma merr dot, as diplomën. Ashtu sikudër nuk më merr dot edhe tufat me lule që më sollën sot nxënësit e mi”.

Shqetësimet e tjera të ngritura nga mësues të ardhur nga anë e mbanë Shqipërisë akuzojnë kryeministrin se përmes reformës së tij, jo vetëm ka përjashtuar mësues të kualifikuar dhe i ka lënë të papunë, por ka vënë në pozicionet e tyre mësues pa një ditë eksperiencë në profesion.

Alma Lama, kryetare e sindikatës së arsimit për degën e Tiranës, tha se edhe pse shqetësimi i saj ka parë edhe pasqyrim mediatik madje është kulmuar edhe me një protestë, ende sot mësuesit e Tiranës punojnë jashtë orarit, nuk paguhen për ato orë, madje prej tre vitesh nuk marrin më as shpërblimin e fundvitit.

“Kërkojmë të drejtën e normës së punës. Kurrikula e re nuk na shqetëson vetëm ne, por edhe fëmijët dhe prindërit të cilët nuk arrijnë të përballojnë shpenzimet e saj. Shpenzimet që kërkon kurrikula për dosjet e lëndëve nuk përballohen nga familjet. Nuk është marr mendimi as i mësuesve dhe as i familjarëve kur është përpiluar ky plan.”

Kryedemokrati Lulzim Basha, pasi uroi 7 marsin çdo mësuesi, tha se në këtë 130 vjetor të mësonjtores së Korçës, arsimi shqiptar ndodhet në ditë të vështirë.

“Nuk ka dritëshkurtësi më të madhe sesa të presësh fondet për arsimin të godasësh mësuesit, të bësh fushata spastrimi politike apo korruptive në korpusin e mësuve apo pedagogëve të një vend. E pra të gjithë jemi dëshmitarë se në këto katër vite ka ndodhur kjo e fundit. Drejtoritë rajonale të arsimit janë shndërruar në qendra të pastra korrupsioni dhe krimi ndaj brezit të ri ndërkohë që mësuesit ndodhen përpara një presioni psikologjik dhe politik të përmasave të papara e të padëgjuara në këto 26 vite, duke përfshirë edhe presionin politik elektoral ku i ka vendosur tani qeveria e krimit dhe e drogës duke kërkuar evidentimin me listë të mësuesve, të familjarëve dhe të komshijve të tyre, për zgjedhjet fasadë që duan të mbajnë më 18 Qershor”.

Zoti Basha parashtroi shtyllat e programit të qeverisjes së tij sa i përket sistemit arsimor.

“Sot dua të përsëris këtu në këtë shesh të lirisë dy shtyllat kryesore të programit të arsimit të ulët nëntëvjecar dhe atë të mesëm. Shtylla e parë është : kthimi i orareve arsimore të fëmijëve shqiptarë në parametra evropianë që do të thotë që fëmijët e shqiptarëve nuk do të bredhin rrugëve por njësoj si fëmijët e vendeve të Bashkimit evropian do ti krijohen kushtet që pas mbarimit të orëve të rregullta të mësimit të kenë mundësi të kenë konsumuar edhe drekën e shkollës, të kenë orët e tyre të kryerjes së detyrave të aktivitetit sportive, të aktivitetit kulturor, të mësimit të gjuhëve të huaja, të gjitha të paguara nga taksapaguesit dhe qeveria shqiptare që do të zgjidhet me votë të lirë e të ndershme”.

E dyta. Ne dyfishuam rrogat e mësuesve po prapë kjo është shumë poshtë nivelit evropian. Ndaj unë dua tju jap fjalën sot se në fund të mandatit të pare, të qeverisë së parë të republikës së re, rrogat aktuale të mësuesve do të dyfishohen përsëri. Do të dyfishohen për të dyfishuar vlerësimin tonë për këtë punë të jashtëzakonshme dhe delikate për të ardhmen e shoqërisë. Ekipi ynë i ka bërë llogaritë dhe llogaritë na dalin kur ti shporrim hajdutët nga qeverisja dhe paratë e shqiptarëve ti harxhojmë në radhë të parë për fëmijët e shqiptarëve”.

Investimet do të nisin që në muajin e parë – tha Basha duke shtuar gjithashtu se mësuesit do të testohen dhe punësohen vetëm përmes meritokracisë.

Njoftim per shtyp 7 Mars 2017

Senatori Italian Mario Mauro, ish-Ministër i Mbrojtjes në Itali, ish-Zëvendes-President i Parlamentit Europian, ishte sot në Sheshin e Lirisë ku bashkëbisedoi me qytetarët mbi vlerat e lirisë, të votës së lirë, të luftës ndaj drogës, krimit, dhe mbi standartet demokratike të një vendi. Mauro u shpreh se e mbështet plotësisht lëvizjen popullore për votën e lirë duke e quajtur atë një kauzë të drejtë. Ai theksoi se nuk është opozita por qeveria ka bojkotuar standardet demokratike.

Më poshtë bashkëbisedimi i plotë i senatorit Italian sot në Sheshin e Lirisë

Mario Mauro:

“Unë jam sot këtu për të dhënë mbështetje maksimale nga Partia Popullore Europiane, për kryetarin Basha dhe Partinë Demokratike. Dua të jem i qartë. Nuk jam këtu se jeni një parti që është pjesë e Partisë Popullore Europiane por jam këtu sepse ju po bëni edhe luftën tonë për demokracinë dhe lirinë. Jemi ne që duhet ti themi falemnderit Partisë Demokratike shqiptare. Unë kam ardhur këtu për tu thënë faleminderit. Pse e them, që ju po mbroni demokracinë dhe lirinë?!

Miqtë e mi. Shteti ka për detyrë të mbrojë lirinë e qytetarëve të vet. Shteti është mbrojtësi i lirisë dhe jetës së qytetarëve dhe jo pronari i tyre.

Sot të gjitha partitë thonë që mbrojnë liritë. Por unë dua që ne të kujtojmë dicka. Kur në vitin 1989 ra sistemi sovjetik, të gjitha partitë komuniste në Europë ndryshuan emrin e tyre. Të gjitha partitë komuniste në Europë, u bënë socialiste. Dhe të gjithë u bënë “europianistë”.

Dua të them se ne jemi këtu për ti thënë njerëzve çfarë është Europa e vërtetë. Europa e vërtetë është historia dhe dashuria e popullit shqiptar për lirinë dhe vendin e tij. Europa e vërtetë ka nevojë për Shqipërinë.

Ju sot kujtoni 130 vjetorin e shkollës së parë shqipe. Miqtë e mi, çfarë do të thotë të arsimohesh?! Të arsimohesh do të thotë që të bësh dallimin mes të mirës dhe të keqes. Dhe cila është ajo qeveri që mund të arsimojë dhe edukojë, qeveria e cila nuk kupton që droga është e keqe e që bën dëm?! Cila është ajo qeveri që mund të arsimojë dhe të ndihmojë në arsimimin e brezave, ajo që nuk kupton luftën kundër kriminalitetit dhe e nuk e zbaton atë maksimalisht?!

Dhe cila është ajo qeveri që mund ta çojë Shqipërinë në Europë dhe që është e aftë që të mbrojë këto vlera?! Ua them unë, se cila do të jetë ajo qeveri. Qeveria e Lulzim Bashës.

Pikërisht sot kur projekti europian kalon vështirësitë e veta përgjegjësia është akoma edhe më e lartë. Projekti politik i Europës së bashkuar është projekti që i ka lejuar Europës të jetojë në paqe për 70 vjet. Nëse vëreni historinë tonë, gjendja normale e jetës tone, nuk ka qënë paqja, por lufta. Pa këto vlera dhe pa këtë vision, ka konflikt dhe vetëm konflikt. Dhe për këto arsye, është shumë e rëndësishme që të luftojmë për lirinë dhe demokracinë.

Sepse mjafton në një vend që liria dhe demokracia të jetë e nëpërkëmbur, më tej në të gjithë Evropën vlen e njëjta gjë. Dhe për këtë arsye, populli shqiptar duhet të jetë më i vendosur se kurrë për të mbrojtur lirinë dhe demokracinë dhe për këtë arsye është shumë e rëndësishme që qytetarët shqiptarë të kërkojnë zgjedhje të lira dhe të ndershme.

Sepse zgjedhjet e lira në Shqipëri, çojnë përpara projektin e Europës së bashkuar, sepse kjo bën që Europa të jetë vetvetja, toka e lirisë dhe e demokracisë. Në të kundërt, do të kthehej ne një Bashkim Sovjetik dhe këtë nuk do ta lejojmë.

Miq të dashur, dua ta mbyll fjalën time me një situatë që unë e kujtoj çdo ditë.

Shumë vite më pare, kur unë isha 19 vjeç shkova në Poloni, një vend që ishte nën diktaturën komuniste. Isha student në universitet dhe qëllimi ishte të merrnim shkrimet, librat e shkrimtarëve polakë, e ti nxirrnim jashtë Polonisë që të njihnim gjithë Europën me vuajtjet dhe eksperiencat e këtij vendi.

Në vitin 2005, si zëvendëspresident i Parlamentit Europian u ktheva në Poloni në 25 Vjetorin e Lëvizjes së Solidarnosit. Në kantjerin e ndërtuar, polakët kishin ngritur një ekspozitë të madhe e cila shërbente për të celebruar 25 Vjetorin e Lëvizjes së Solidarnosit dhe për ti kujtuar popullit polak  se cila ishte diktatura komuniste.

Ishin 25 foto të mëdha tek ky shesh dhe në këto foto shfaqeshin tanket, telat me gjemba, trupat e të vrarëve, të plagosurve, nga sistemi. Në këto foto, nga ana bardh e zi ishin ngjarjet e 25 viteve më parë, ishin fotografi të luftës për liri dhe demokraci të popullit polak. Nga ana tjetër, ishin 25 foto me ngjyra. Ishin foto me të rinjtë, djem dhe vajza 25 vjeçare të lindur pikërisht në ato rrethana, në atë periudhë. Dhe çdo të riu i bëhej një pyetje, çfarë ishte diktatura, çfarë ishte komunizmi?  Dhe përgjigja ishte “nuk e di, nuk e mbaj mend, nuk ma kanë shpjeguar”.

Fotoja e fundit ishte krejtësisht e zezë, ku ishte shkruar në shumë gjuhë “kush nuk ka kujtesë për të kaluarën e vet, nuk ka të drejtë për liri”.

Për këtë arsye jemi këtu në këtë shesh. Ja përse jemi këtu në këtë tendë sepse kjo tendë është zëri i popullit shqiptar dhe është ky popull që do çojë Shqipërinë në fitore.

Pyetje-Cfarë mendimi keni ju për zgjedhjet e lira dhe të ndershme në Shqipëri, a do të realizohen ato ndonjeherë?

Mauro-Kam lexuar në shumë gazeta evropiane se qeveria shqiptare, po akuzon opozitën që po bojkoton Parlamentin. Nga këndvështrimi im, qeveria po bojkoton demokracinë, pra ajo që po bëhet në këtë tendë nuk është vetëm e bazuar dhe e legjitimuar në kushtetutë, por edhe politikisht është e vetmja gjë që mund të përbëjë një garanci politike për të siguruar lirinë e votës.

Me 27 Janar, ne u bashkuam të gjitha partitë popullore dhe votuam në unanimitet dhe në  solidaritet një dokument ku i japim mbështetje strategjisë së Partisë Demokratike. Ky dokument është i disponueshëm në internet dhe ju mund ta qarkulloni mes jush.  Ju duhet të jeni të qetë dhe të sigurt sepse nuk jeni vetëm në këtë betejë!

-Pyetje: Zoti senator një këshillë sesi mund të mësojnë të rinjtë këtu mbi historinë e komunizmit.

Mauro-Problemi më i madh i komunizmit është se komunizmi është ideologji dhe ideologjitë janë të rrezikshme sepse nuk të bëjnë të kuptosh dhe të duash  realitetin. Po ua shpjegoj me shembuj. Kur Stalini mori pushtetin në rusi donte të bënte një shoqëri për punëtorët. Por në 1917, një shekull më parë, 100 vite më pare, në Rusi nuk kishte  punëtorë. Kishte fshatarë dhe bujkrobër. Lenini dhe Stalini morën 20 milion fshatarë të vegjël që ishin pronarë dhe quheshin kulakë dhe i vranë të gjithë. Kjo është ideologjia. Kur realiteti nuk është ashtu si e dua unë, shpik një realitet tjetër të ri, në të cilin heq qafe cdokënd që mendon ndryshe nga sa mendoj unë. Për këtë arsye, ne duhet të jemi të kujdesshëm ndaj ideologjive. Ideologjitë e 1900-tës, komunizmi, nazizmi, fashizmi, cfarë kishin të përbashkët? Kishin të përbashkët një përqendrim pushteti dhe ku pushteti ishte gjithcka dhe individi, personi, ishte asgjë. Dhe gjithë furia ideologjike e këtij pushteti bëhej në emër të popullit dhe në emër të popullit bëheshin masakra. Edhe sot ka ideologji. Përshembull emri i popullit është zëvendësuar me Zotin. Dhe fondamentalizmi islamik është kthyer baza e terrorizmit sepse ka fshirë vlerat e një feje për ta zëvendësuar me një projekt ideologjik. Dhe ne e dimë se brenda një partie me vlera demokratike, të gjithë fetë mund të qëndrojnë bashkë. Për këtë arsye, ju mund të ktheheni në një shembull për të gjithë Evropën. Për këtë arsye, me mbështetjen tuaj mund të mposhtim  ideologjitë. Ne duhet të pyesim veten, nëse qeveria aktuale i ka braktisur apo jo ideologjitë. Sepse, nëse nuk ka hequr dorë nga ideologjitë nuk mund të bëjë mirë për popullin e vet”.

Njoftim per shtyp 7 Mars 2017