Blog

Të dashur qytetare dhe qytetarë,

Anëtarë të këtij Parlamenti të vërtetë të Shqipërisë ku po ushtrohet prej gjashtë ditësh demokracia direkte, demokracia direkte, sepse krimi dhe droga kanë asgjesuar institucionet e tjera të shtetit. Sot nuk ka dy parlamente, por një parlament dhe ai ndodhet këtu në këtë Shesh të Lirisë me çdo qytetar, përfaqësues i drejtpërdrejtë i zërit dhe vullnetit të tij. Godina që i thotë vetes Parlament, është sot streha më e qartë e krimit, korrupsionit, mashtrimit dhe maskarallëkut.

Mbrëmë i bëra një thirrje çdokujt, duke përfshirë edhe ata deputetë të së majtës që kanë një fije ndërgjegje dhe një fije kurajo, që ashtu si shqiptarët vranë frikën dhe u bashkuan të vijnë këtu në këtë parlament të vërtetë, të mos rrinë në strofullën e krimit, të mos i bëjnë fresk krimit, të mos bëhen pjesë e parlamentit fasadë dhe e demokracisë fasadë.

Kjo thirrje qëndron.

Qytetarët shqiptarë janë ngritur njëzëri, kanë marrë një vendim dhe vendimi është që nuk do të ketë më kthim mbrapa në demokraci fasadë, në parlament fasadë, me zgjedhje fasadë të diktuara nga krimi, të diktuara nga bandat, të diktuara nga droga.

Dua të përshëndes të gjithë qytetarët e Durrësit, të cilët e kanë përdorur këtë parlament të vullnetit popullor sot për të denoncuar me fakte, për të denoncuar dhimbjen e madhe që ky qytet ndjen. Sepse ka rënë peng i bandave, ka rënë në mëshirën e bandave të cilat kanë emëruar në krye të punëve Vangjush Dakon, si përfaqësues dhe si menaxher të aferave të pista të krimit të organizuar.

E kanë emëruar bashkë me Edi Ramën për t’iu shërbyer interesave të tyre dhe prandaj sot Durrësi është një qytet ku papunësia është ndër më të lartat në Shqipëri. Prandaj Durrësi sot është një qytet ku shëndetësia është përtokë. Prandaj Durrësi është sot një qytet ku nxënësit studiojnë në kushte të mjerueshme, ku ndihma ekonomike i jepet vetëm një numri shumë të vogël familjesh, ndërkohë që mijëra të tjera që kanë nevojë për këtë ndihmë, nuk e marrin. Eshtë një qytet i mbi faturuar, i shkatërruar me këto gjoba energjie e uji. Eshtë një qytet tipik i menaxhuar nga mafia, ku miliona euro beton hidhen për fasada, ndërkohë që qindra-mijëra familjarë, çifte të reja nuk marrin dot kredi për strehim social. Të gjitha këto janë derivat i zgjedhjeve të shkatërruara të vitit 2015 ku Vangjush Dako me bandat mori Durrësin.

Ja çfarë ndodh kur kapen zgjedhjet, ja çfarë ndodh kur krimi dikton zgjedhjet. Kjo është një orë e madhe e zgjimit kombëtar, është një orë zgjimi për Durrësin, është një orë zgjimi për gjithë Shqipërinë është një vendim i pakthyeshëm. Kurrë më zgjedhje të kapura dhe të prishura nga krimi! Kurrë më zgjedhje me bandat! Vetëm zgjedhje të lira dhe të ndershme që nisin me largimin e Edi Ramës dhe qeverisë së tij të inkriminuar e të korruptuar. Nisin me një pakt të madh kombëtar, për një qeveri të zgjedhjeve të lira dhe të ndershme.

Sot është një ditë e madhe për Shqipërinë jo vetëm sepse për të gjashtën ditë radhazi shqiptarët protestojnë pa pushim nga ky shesh i lirisë, por sepse anembanë vendit, frika po vritet, njerëzit po bashkohen, kurajo qytetare po ngrihet në nivele të papara e të padëgjuara që prej revolucionit demokratik të vitit 1990.

Kjo është një lëvizje e madhe popullore, është një lëvizje e madhe kombëtare, kjo është mbi të gjitha lëvizja juaj të nderuar qytetarë dhe qytetare të Shqipërisë. Dhe Partia Demokratike ka nderin të jetë pjesë, të jetë në ballë të kësaj lëvizjeje dhe të mos ju lërë në baltë, deri në përmbysjen e republikës së krimit, deri në përmbysjen e republikës së korrupsionit dhe ndërtimin së bashku të një republike të vërtetë demokratike të qytetarëve shqiptarë.

Kjo nis me zgjedhje të lira dhe të ndershme dhe për këtë nuk ka e nuk do të ketë asnjë kompromis, për këtë nuk ka dhe nuk do të ketë asnjë negociatë, qeveri teknike ose populli do të qëndrojë këtu e do të përballet deri në largimin e qeverisë së bërë njësh me krimin.

Parlamenti i shqiptarëve, parlamenti i qytetarëve është këtu. Parlamenti i pastruar nga kriminelët dhe që i shërben me zërin e vet me vendimet e veta qytetarëve, është këtu.  Atje është vetëm shtëpia e krimit. Në shtëpinë e krimit ka vetëm deputetë kokëulur dhe deputetë që i shërbejnë fasadës. Në shtëpinë e lirisë cdo qytetar është përfaqësues sovran i popullit të vet dhe interesave të tij. Ndaj le ta kenë të qartë të gjithë ata që nuk e kanë dëgjuar zërin e popullit se tërheqje nuk do të ketë. Se nuk do të ketë asnjë hap mbrapa, se, ditë për ditë , ne do të avancojmë deri në fitoren e plotë të kauzës qytetare për zgjedhje të lira dhe të ndershme përmes largimit të kësaj qeverie, dhe vendosjes së një qeverie tjetër që i garanton ato. Ditë për ditë shqiptarët po bashkohen. Dua të përshëndes sot në mënytrë të vecantë marshin epik të banorëve të Zharëzës, të cilët po i afrohen ora orës Tiranës, po i afrohen ora orës sheshit të lirisë, parlamentit të qytetarëve shqiptarë, do ti mirëpresim këtu këta njerëz të vuajtur këta njerëz të nëpërkëmbur të zhvatur dhe të goditur rëndë nga arroganca nga korrupsioni dhe papërgjegjshmëria e kësaj qeverie. Por, do të mirëpresim kështu cdo qytetar që niset të bashkohet me këtë parlament të shqiptarëve, me këtë aulë dhe agorë të vërtetë të demokracisë shqiptare. Mbrëmë, Ambasadori i OSBE-së Bern Borshard më në fund lëshoi kushtrimin për kauzën që ne kemi ngritur tash 3 vite. 2 miliardë euro të pista për të blerë zgjedhjet e shqiptarëve. Para të pista, qeveri e pisët, lojë e lisët, zgjedhje të pista. Ne nuk do ta pranojmë kurrë. Koha ka ardhur që përballë banditëve të veshur me pushtet e pushtetit të përforcuar me banditë, të rreshtohemi të gjithë qytetarë të lirë të Shqipërisë, të rreshtohemi në këtë betejë për të sotmen e të nesërmen e Shqipërisë dhe shqiptarëve. Dënglat e tyre se ata duan reformën në drejtësi, dhe ne nuk e duam, nuk i bëson më askush. Nuk ka zog gomari ti besojë. Nga vetingu i vërtetë dhe drejëtsia e vërtetë ka frikë Edi Rama, ka frikë Vangjush Dako dhe bandat e lidhura me to.

Sot, nga ky shesh dua tia bëj fare të qartë atyre dhe çdokujt që mund të ketë gënjyer. Partia Demokratike e bëri detyrën e vetë në Parlament. Ne e mbaruam detyrën tonë dhe jemi krenarë për ndryshimet kushtetuese që i hapën rrugë një drejtësie të pavarur që nuk mbron por lufton krimin dhe korrupsionin. Ishin ata që përjashtuan opozitën nga 7 ligjet duke thyer premtimin që dhanë përballë partnerëve tanë euroatlantikë. E përjashtuan me qëllim që të kapin institucionet e reja të drejtësisë. Sot, për këto institucione të reja të drejtësisë, kjo maxhorancë që e ka frikë reformën në drejtësi propozon 29 kandidatë për 27 pozicione. Pra nuk ka zgjedhje, ka emërime. Edi Rama dhe Ilir Meta duan ti emërojnë vetë në vend që të lejojnë zgjedhjen e më të mirëve e më të aftëve, më të pakorruptuarve për të ndërtuar drejtësinë që duan shqiptarët. A mund ta pranojmë ne këtë?! A mund të pranoni një drejtësi të kapur nga Edi Rama?! Kujt i shërben një drejtësi e kapur nga Edi Rama?! Kurrsesi nuk mund ta pranojmë, por nëse në të vërtetë janë ata që nuk kanë frikë nga Vetingu, ju them që menjëherë pas paktit për një qeveri të vullnetit të mirë për zgjedhje të lira dhe të ndershme, dhe pas korigjimit të 7 ligjeve sipas vërejtjeve konsensuale të opozitës, urdhëroni ta bëjmë vetingun e të shohim kush ka frikë nga drejtësia e pavarur. Kush ka frikë nga gjyqtarët dhe prokurorrët e pakapur?! Ata që e kanë lidhur fatin e tyre me bandat?! Ata që kanë vjedhur dhe shpërdoruar qindra e miliona euro në çdo sektor, apo opozita që e ka lidhur fatin e saj me fatin e qytetarëve shqiptarë?! Partia Demokratike do ta votojë dhe do ta çojë përpara reformën në drejtësi por vetëm sipas përcaktimeve europiane të Kushtetutës së Shqipërisë, sipas votës historike të 22 korrikut. Ne do ta hapim këtë rrugë bashkë me qytetarët shqiptarë. Nëse nuk tremben nga drejtësia e pakapur le ti hapin rrugë qeverisë teknike, le të ndryshojmë së bashku 7 ligjet që i bënë përshesh për të kapur drejtësinë dhe ne do të na kenë aty dhe bashkë me qytetarët shqiptarë do ta zgjidhim çështjen e zgjedhjeve të lira e të ndershme dhe çështjen e drejtësisë së vërtetë për qytetarët shqiptarë.

Qendresa jonë sapo ka filluar, beteja jonë po merr hov nga dita në ditë. Mbështetja për këtë betejë vjen nga e vërteta, se rrugë tjetër për Shqipërinë nuk ka. Rruga tjetër të çon në një republikë të kapur nga bandat dhe krimi ku çdo shqiptar do të jetë skllav i tyre. Se si funskionon kjo mund ta thotë mirë çdo durrsak. Durrësi është qyteti i parë që ka rënë peng i bandave dhe i krimit por Durrësi sot është këtu, Durrësi është gati, të ngrihemi të gjithë për të refuzuar republikën e krimit dhe për ti hapur rrugë të gjithë së bashku republikës së demokracisë së vërtetë, republikës së shtetit ligjor të vërtetë dhe drejtësisë së vërtetë.

Deklaratë e Lulzim Bashës sot në Sheshin e Lirisë, 23 shkurt 2017

Dita e gjashtë e protestës në çadrën e lirisë u bë arena e bashkëbisedimit mes qytetarëve, aktivistëve të shoqërisë civile dhe të zgjedhurve vendorë  të cilët ringritën shqetësimin për ndërtimin në Durrës mbi vepra arkeologjike me vlerë historiko-kulturore. Kryedemokrati Basha i ftoi të gjithë të shprehin problemet dhe mendimet e tyre në atë që e quajti: parlamenti i qytetarëve.

Flamur Pala, aktivist i shoqërisë civile e quajti ndërtimin në sheshin Veliera si problem i të gjithë shqiptarëve, e jo vetëm durrsakëve.

“Mbi dritën e diellit po bëhet një shkelje nga kryebashkiaku i Durrësit, Vangjush Dako. Nuk na duhet një velë betoni 2000 metra katror ndërkohë që Durrësi po qelbet nga mbeturinat dhe ujërat e zeza dhe mungesa e infrastrukturës. Zgjedhjet e lira që ne kërkojmë sot shpëtojnë çdo shqiptar. Vota e lirë i shërben të ardhmes tone”.

Për Ardian Mukën, urbanist dhe anëtar i këshillit bashkiak, ndërtimi në Durrës vjen për shqiptarët si shkatërrim në tre plane.

“Shkatërrim në plan arkeologjik, shkatërrim i planit historiko-kulturor dhe në planin urbanistik. Në Durrës, kryebashkiaku Dako ka shkelur dy Vendime të Këshillit të Ministrave sepe po ndërton në zonën A dhe B të cilët konsiderohen të mbrojtura dhe ndërtimi mund të bëhet vetëm me monitorim të rreptë. Ndërkohë për sheshin Veliera gërmimet bëhen me fadroma dhe eskavatorë duke shkatërruar qytetin, arkelologjinë dhe ekonominë e qytetarëve.”

Vaso Papaj, arkitekt, e quajti gropën e gërryer në Durrës si gropën politike të Vangjush Dakos.

Sazan Guri i cilesoi qytetarët pjesmarrës në bashkëbisedim si qytetarë europianë. Duke iu referuar vendimit të Gjykatës Adminsitrative për pezullimin e menjëhershëm të punimeve në sheshin “Veliera” në Durrës, Guri problemin e sheh jo në plan emrash nominal por në rang institucionesh. “Si mundet një institucion të shkelë dokumentat e shtetit. Kemi ardhur këtu të formojmë një epokë të re më të madhe se vettingu.Shoqëria civile mund t’i nisë protestat por vetëm ju, të zgjedhurit, mund t’i çoni deri në fund.”

Aluon Kalaja aktivist, kujtoi për qytetarët protestat e organizuara nga shoqëria civile kundër shkatërrimit të historisë dhe arkeologjisë në Durrës, të dështuara për shkak të presionit qeveritar. “Sheshi dhe rruga i takon qytetarëve. Rama të heqë dorë njëherë e përgjithmonë nga betoni. Edhe një thirrje për të gjithë ju këtu. Peshku qelbet nga koka”.

Për Lorisa Yllin, aktiviste e shoqërisë civile, trokitja në dyert e isntitucioneve për të gjetur drejtësi për këtë shkatërrim që po ndodh ka qënë e pavlerë. “Rama flet për vetting, ndërsa vendimi i Gjykatës Adminsitrative për “Velierën” po shkelet. Kush ka të drejtë të mbrojë vendimin e gjykatës? Ajo është detyrë e shtetit”.

Lulzim Basha theksoi se rëndësia e votës së lirë dhe të ndershme përforcohet me shembullin e Durrësit

“Durrësi sot është një qytet ku shëndetësia është përtokë, ku nxënësit studiojnë në kushte të mjerueshme, ku ndihma ekonomike i jepet vetëm një numri shumë të vogël familjesh, ndërkohë që mijëra familje që kanë nevojë për këtë ndihmë, nuk e marrin. Të gjitha këto, janë derivat i zgjedhjeve  të shkatërruara të vitit 2015 ku Vangjush Dako me bandat mori Durrësin. Ja çfarë ndodh kur kapen zgjedhjet. Kjo është një orë e madhe e zgjimit kombëtar, është një orë zgjimi për Durrësin, është një orë zgjimi për gjithë Shqipërinë është një vendim i pakthyeshëm”, tha Lulzim Basha.

Njoftim per shtyp, 23 Shkurt 2017

“Nesër në këtë tendë, do të nisë punimet Parlamenti i ri shqiptar. Nesër nga kjo tendë, nga kjo tendë ftoj çdo deputet jo të lidhur me krimin, pa rekodre kriminale, të vijë në këtë aulë të vërtetë të demokracisë, sepse ky është Parlamenti Shqiptar.
Grupi Parlamentar i Partisë Demokratike do ta bëjë seancën parlamentare këtu, me qytetarët. Deputetët e opozitës do të jenë të gjithë këtu. Këtu është vendi për çdo deputet tjetër të majtë që nuk është i lidhur me krimin që nuk i ka borxh këtij populli, i siguroj se qytetarët do t’i respektojnë nëse vendosin të jenë pjesë e këtij Parlamenti të vërtetë. Të vetmit që nuk janë të ftuar në këtë tendë e të mos u shkojë mendja t’i afrohen këtij parlamenti popullor, janë 19 deputetët me rekordet kriminale. Ata nuk kanë vend këtu dhe atje ku janë do t’i nxjerrim së shpejti. Deputetët e tjerë nesër kanë një mundësi për të vendosur duke zgjedhur, a do të jenë këtu në Parlamentin e vërtetë, në demokracinë direkte në auolën tonë apo do të jenë në Parlamentin kukull, fasadë. Kush është me popullin të vijë te populli. Kush është me krimin të rri atje deri sa populli t’i nxjerrë”.

Deklarate e Lulzim Bashes, 22 Shkurt 2017

“Prej të shtunës së 18 shkurtit, ata janë e shkuara”, u tha Lulzim Basha studentëve të universiteteve të Tiranës në bashkëbisedimin që zhvilloi me ta në Sheshin e Lirisë.

Kryetari i Partisë Demokratike tha se pikërisht në atë shesh ku janë mbledhur po ngrihet Shqipëria e së ardhmes, ku do të ketë zgjedhje të lira e të ndershme, sundim të ligjit dhe qeverisje për qytetarët.

“Kjo është një lëvizje popullore për ti kthyer popullit Republikën e zgjedhjeve të lira, të demokracisë e sundimit të ligjit. Republika e re sdo të ketë asgjë të ngjashme me republikën e vjetër që po lëmë pas, të korrupsionit, krimit, të fasadës. Kombi i është mirënjohës studentëve dhe rinisë për kontributin që po japin në këto ditë historike”, tha Basha.

Studentët e pranishëm ngritën shumë shqetësime që kanë të bëjnë me universitetin, me arsimin, me shanset për punësim, me standardet e munguara të vendit.

Dorentina Cupi, studente psikologjie tha se iu bashkua kësaj proteste për qëllimin e përbashkët, votën e lirë. “Si të rinj jemi koshientë se përpara kësaj proteste popullore e qytetare nuk ka qeveri që ti rezistojë. Kjo protestw do ia arrijë qëllimit sepse në krye të saj janë të rinjtë”, tha Dorentina.

Kristofer Hasko, student i shkencave politike tha se nuk beson në modele si ky i Edi Ramës që qeveris mes dhunës dhe krimit. “Unë kam mesim tek model i Bashës”, u shpreh ai.

Mikalela Lleshaj u shpreh se proteston sot sepse i është djegur shkollimi nga mënyra se si llogaritën mesataren. “E kisha 9.04 por nuk fitova dot asnjë degë. Duhet të ndryshojmë këtë sistem”, kërkoi ajo.

“Unë studioj fizikë dhe shoh që arsimi nuk është vlerësuar në këto vite. Shoh që ministrja e arsimit e dërgon vajzën e saj me studime në Francë. Taksat e studentëve rriten çdo vit dhe nuk ka asnjë përmirësim në mësimdhënie. Kushtet tona në fakultet dhe në konvikte janë mjerane. Mendoj që studentët e viteve 90 janë simboli dhe modeli që ne duhet të ndjekim. Si ata dikur, ne duhet të ngrihemi e të vrasim frikën, si më 18 Shkurt”, tha Rikard Lishaliaj.

Henri Goga, student mjekësie solli në vëmendje që edhe pse tarifat janë rritur, në fakultet nuk ka kushte dhe as salla për mësim.

Lelo Maraj, student në Universitetin Bujqësor të Tiranës, vuri në dukje se pas diplomimit, prej një viti nuk gjen punë pasi i kanë thënë duhet të kesh teserën e PS ose LSI.

Petro Cela, student në drejtësi tha se kryeministri qeveris jashtë binarëve kushtetues, me banda. E konsideron qeverinë si një skuadër basketbolli, ku ai mund të bëjë cfarë të dojë.

Renato Drava tha se kërkon të ndjekë masterin, por e ka të vështirë për shkak se tarifat janë rritur dhe ai dhe familja e tij nuk e përballojnë dot.

Kryetari i Partisë Demokratike premtoi se me qeverisjen e tij, askush nuk do të mbetet pa shkollë, për shkak të pamundësisë ekonomike.

“Një qeveri e zgjedhur me votë të lirë e të ndershme të shqiptarëve, që unë do të kisha nderin dhe privilegjin ti shërbeja si kryeministër, ka një plan të qartë për arsimin e lartë. Ditën time të parë, orën time të pare, do të firmos anullimin e ligjit për arsimin e lartë”, tha Basha duke e quajtur të papranueshme rritjen e tarifave.

Basha tha se vendimet për arsimin sdo ti marrin kurrë një grusht njerëzish, por do të jenë vendime të përbashkëta të pedagogëve dhe studentëve.

“Nga unë mos kërkoni asgjë më pak se modeli europian. Çfarë është e mirë për Europën është e mirë për shqiptarët, asgjë që nuk është e mirë për Europën, nuk është e mirë për shqiptarët”, tha Basha duke përmendur planin për 10 mijë stazhe në vit me pagesë 200 mijë lekë në muaj, plus sigurimet shoqërore dhe shëndetësore, një skemë që do të nxisë punësimin e të sapo diplomuarve. Në fund, Basha u bëri thirrje studentëve të bashkohen të gjithë në këtë lëvizje, sepse Shqipëria e re që po vjen do të jetë Shqipëria e tyre.

Njoftim per shtyp, 22 Shkurt 2017

Qindra naftëtarë nga Fieri, Patosi, Marinza, Ballshi, Rroskoveci iu bashkuan sot protestës në Sheshin e Lirisë. Naftëtarët mbanin në dorë pankarta ku denoncojën padrejtësinë ndaj tyre dhe thirrjen për tu bashkuar. Kryetari i Partisë Demokratike, Lulzim Basha i mirëpriti naftëtarët dhe i garantoi se interesat e tyre do të jenë prioritet për të.

“Ta dinë mirë se çdo përpjekje për të bërë pazar me shpresën, me besimin, aspiratën e shqiptarëve për zgjedhje të lira dhe të ndershme, do të dështojë me turp. Para çdo interesi tjetër, para interesit tim, para interesit të PD, para interesit të opozitës, është interesi juaj dhe i çdo qytetari shqiptar.Të flasim çfarë realisht ndjejmë”, tha Basha.

Ftesës së kryetarit iu përgjigjën naftëtarët të cilët ngritën shqetësime të ndryshme për mënyrën si janë trajtuar në punë apo mungesën e njohjes së kontributeve dhe viteve të punës së tyre.

Një nga naftëtarët falenderoi kryetarin Basha për atë që e quajti seancë plenare me dyer të hapura në sheshin e lirisë.

“Ajo naftë që ju keni nxjerrë gjithë jetën tuaj, ka krijuar Fierin, patosin dhe një pjesë të Shqipërisë. Ata morën arin dhe ju lanë të zezën. Ajo që ilustron arrogancën dhe zhvatjen është kryefjala e sotme: Zharrëzi. E gjithë Shqipëria është Zharrëz sot”, u shpreh deputeti Kozma Dashi.

Një ish naftëtar, të cilit shteti nuk i njeh kontributin 30 vjecar dhe po përballet me shtetin në Gjykatën Administrative për këtë problem, thirrjen ia drejtoi grevistëve fierak.

“I mbështes banorët që janë në grevë urie por dua që ata të dalin dhe të vijnë këtu sepse kjo qeveri nuk i përkrah. I lutem të dalin dhe t’í bashkohen protestave dhe këto kërkesa t’ia drejtojnë kryeministrit të ardhshëm, Lulzim Basha”.

Lulzim Basha i tha të pranishmëve se gjendja në të cilën ata ndodhen vjen pasi një gup njerëzish vjedhin gjakun dhe djersën e tyre për xhepat e klientëve dhe se po këta njerëz, janë ata që i tremben zgjedhjeve të lira dhe të ndershme.

“Ju e dini, naftëtarët e dinë, shumica e banorëve në pellgun naftëmbajtës të zonës së jugut e dinë, po le ta themi sot këtu për çdo shqiptar se kjo pasuri kombëtare e shqiptarëve ka një vlerë sot në treg prej 350 milionë dollarësh. Unë jam sot këtu me ju dhe do të jem me ju deri në fitore sepse jam i vendosur që me fitoren e zgjedhjeve të lira dhe të ndershme, të mos bëjmë thjesht dhe vetëm një rrotacion politik. Të hapim një kapitull të ri për demokracinë shqiptare, ku pushtetin do ta keni ju.”

Fundi i kësaj vale qytetare për Lulzim bashën është vetëm një dhe i kushtëzuar.

“Jam këtu për të garantuar se kjo lëvizje e madhe popullore nuk mund të përfundojë pa u siguruar që qeveria e ardhshme, prej ditës së parë deri ditën e fundit kur të vijë me zgjedhje të lira, i bindet vetëm zërit tuaj. Nafta, mineralet, bujqësia, pasuritë e ndryshme të këtij vendi do t’u kthehen shqiptarëve , fuqia ekonomike do t’u kthehet shqiptarëve, vetëm kur të kemi një qeveri që ka dalë nga vota e lirë dhe e ndershme. Që ju të vendosni, që ju të jeni sovrani por jo për një ditë, por çdo ditë, 365 ditë në vit”, pohoi Basha.

Ftesën për bashkim në sheshin e lirisë kryetari i selisë blu ia drejtoi edhe njëherë naftëtarëve zëri i të cilëve po injorohet nga pushteti.

“Dua ti bëj një thirrje çdo naftëtari, çdo punonjësi të këtij sektori, të ngrihen aty ku janë, akoma më mirë të vijnë këtu në këtë shesh në Tiranë, të bashkohen me këtë valë të madhe popullore. Zgjidhja është zgjedhje të lira dhe të ndershme dhe një qeveri që mendon për ju”,deklaroi Basha.

Njoftim per shtyp 22 Shkurt 2017

Basha: Diskutuam për zgjedhjet e lira dhe të ndershme të cilat janë të kërcënuara nga krimi, korrupsioni dhe praktika e shëmtuar e shitblerjes së votës. Zgjedhjet kërcënohen nga mungesa me qëllim e reformës zgjedhore. Kërcënohen nga moszbatimi i ligjit për dekriminalizimin për të cilin zoti Fleckenstein ka dhënë një kontribut të jashtëzakonshëm. Kërcënohen nga lirimi i bandave dhe i banditëve siç është pranuar edhe nga vetë anëtarë dhe ish anëtarë të kabinetit Rama, me urdhër kryeministror. Jemi pranë një situate kolapsi total të institucioneve. I vetmi që qendron në këmbë, është institucioni që është përgjegjës për kolapsin e institucioneve të tjera, që është qeveria e kryeministrit Rama. Dhe në këto kushte, i shpjegova vendosmërinë tonë, vendimin e madh që kemi marrë me qytetarët shqiptarë për të mos u sprapsur nga beteja për zgjedhje të lira dhe të ndershme përmes një qeverie të zgjedhjeve të lira dhe të ndershme, një qeverie teknike, ku partitë politike të shprehin vullnetin për të punuar së bashku për zgjedhje të lira dhe të ndershme. Kjo nuk mund të ndodhë me këtë qeveri. Kjo nuk mund të ndodhë me këtë kryeministër. Ndaj, Partia Demokratike dhe opozita është e bashkuar rreth këtij qëllimi. Eshtë e vendosur, të jetë me qytetarët shqiptarë, pranë qytetarëve shqiptarë deri në realizimin e këtij qëllimi. Këto janë çështjet që bisedova me zotin Fleckeinstein, duke shpjeguar natyrisht edhe rast pas rasti problematikën e thelluar të krimit, të drogës, ku vetëm javën e fundit shifrat janë të frikshme, të kapjes së drogës në Itali, e cila është një sasi e vogël e asaj që nuk kapet, të milionave e milionave në duart e krimit të organizuar të bërë njësh me pushtetin. Në këto kushte, nuk ka asnjë zgjidhje tjetër, përveçse një qeverie teknike që garanton zgjedhje të lira dhe të ndershme dhe vendimin e opozitës për të mos qenë pjesë e një Parlamenti fasadë deri në momentin kur partitë politike në atë Parlament, por edhe partitë politike jashtë atij Parlamenti, të jenë pjesë e një pakti kombëtar për një qeveri teknike të zgjedhjeve të lira dhe të ndershme.

-Zoti Basha si u prit fakti që ju keni bojkotuar jetën parlamentar, duke patur prasysh një deklaratë të mëngjesit të zotit Flecneiksein sipas të cilit do të ishte mirë që anëtarët e Parlamentit gjithçka ta diskutojnë në Parlament. Sa mund ta dëmtojë kauzën e opozitës për të kërkuar zgjedhje të lira dhe të ndershme, debati i zhvilluar jashtë Parlamentit nga pikëpamja kushtetuese dhe politike gjithashtu…

Basha: Unë i komunikova zotit Fleckeinstein, jo thjeshtë vendimin e opozitës por edhe bindjen time të thellë se, me këtë Parlament të padekriminalizuar, në këtë Parlament fasadë, opozita nuk ka vend, sa kohë që prioriteti jetik i shqiptarëve për zgjedhjet e lira dhe të ndershme, është në rrezik. Ne do të kthehemi në Parlament vetëm në momentin kur të gjithë faktorët politikë do të marrin përsipër përgjegjësinë para shqiptarëve, për ti dhënë shqiptarëve një qeveri që do të garantojë zgjedhje të lira dhe të ndershme.

-Cfarë tha zoti Fleckeinstein për këto kërkesa të opozitës për të negociuar në mënyrë që me mazhorancën së bashku të siguroni standardet që ju kërkoni për zgjedhjet e lira dhe të ndershme….

Basha: Zoti FLeckeinstein nuk ka ardhur në Shqipëri për të negociuar. Ai është këtu në cilësinë e raporterit për Shqipërinë. E falenderova për rezolutën e Parlamentit Europian, e cila flet qartësisht për drogën, për krimin e organizuar, për nevojën e zgjedhjeve të lira dhe të ndershme, për të ardhmen e Shqipërisë. Detyra ime, dhe kënaqësia ime, ishte ta informoja atë për zhvillimet e fundit, për qendrimet e opozitës dhe për vendosmërinë tonë për ti shkuar deri në fund kauzës kombëtare për zgjedhje të lira dhe të ndershme.

-Sa mund ta pengojë reformën në drejtësi, fakti që opozita nuk do të jetë në Parlament duke patur parasysh dhe angazhimin maksimal të faktorëve ndërkombëtarë për të investuar në këtë reformë..

Basha: Partia Demokratike është krenare për kontribuitn që ka dhënë për reformën në drejtësi duke miratuar paketën kushtetuese për reformën në drejtësi. Mazhoranca Rama-Meta premtoi se 7 ligjet organike do të bëheshin me konsensus me opozitën. Ajo e shkeli konsensusin, të dhënë edhe ndaj partnerëve ndërkombëtarë, dhe sot nuk ka se si ta drejtojë gishtin nga opozita, sepse ne nuk u vetpërjashtuam. Ishte mazhoranca Rama-Meta që përjashtoi opozitën, në shkelje të premtimit të bërë nga hartimi i 7 ligjeve. Por sot, prioriteti jetik i shqiptarëve janë zgjedhjet e lira dhe të ndershme dhe rruga e vetme për të garantuar këtë si dhe për të garantuar kthimin e opozitës në Parlament, është një pakt kombëtar për një qeveri të zgjedhjeve të lira dhe të ndershme.

-Por a do të pengohet reforma në drejtësi z.Basha duke patur parasysh afatet që përcakton reforma kusghtetuese…

Basha: Dua ta keni shumë të qartë, reforma u pengua në momentin kur 7 ligjet, në kundërshtim me premtimin dhe angazhimin e marrë para partnerëve ndërkombëtarë, u kaluan duke përjashtuar opozitën. Kur e përjashton opozitën, çfarë i kërkon pastaj? Ne jemi përjashtuar që prej shtatorit, nga ky aspekt i reformës në drejtësi, dhe sot, 4 muaj para zgjedhjeve, prioriteti jetik i shqiptarëve, garantimi i zgjedhjeve të lira dhe të ndershme, kërkon që ky Parlament me opozitën brenda të marrë pikësëpari vendimin për një qeveri që do të garantojë zgjedhje të lira dhe të ndershme.

-A do të pranojë PD zgjidhje tjetër përveç qeverisë teknike?

Basha: Jo. PD nuk mund të pranojë asnjë fasadë e cila do të sjellë përsëri zgjedhje të manipuluara, zgjedhje të kapura nga krimi. Zgjedhje me kriminelë ne nuk do pranojmë. Ky është një vendim jo thjeshtë i PD, jo thjeshtë i opozitës, është një vendim i madh i qytetarëve, një konsensus që sa vjen edhe rritet, që kalon kufijtë e PD apo të opozitës. Sepse zgjedhjet e lira dhe të ndershme dhe largimi i kriminelëve nga politika, jam i sigurtë është edhe aspirata e çdo socialisti dhe socialisteje të ndershme, dhe çdo shqiptari të ndershëm. Ndaj ne, nuk do pranojmë asnjë zgjidhje fasadë. E vetmja zgjidhje është një qeveri e vullnetit të mirë për zgjedhje të lira dhe të ndershme. Ka dy rrugë: Ose do të kemi zgjedhje të lira dhe të ndershme përmes një qeverie që i garanton ato, ose populli e qytetarët do të vazhdojnë qendresën derisa kjo të bëhet realitet.

-Me opozitën apo pa opozitën..

Basha: Nuk do të ketë zgjedhje! Zgjedhje nuk do të ketë. PD, opozita nuk do të lejojë mbajtjen e zgjedhjeve fasadë, nuk do të lejojë zgjedhje me krim, korrupsion dhe drogë. Ky është një vendim i marrë dhe ne kësaj do ti shkojmë deri në fund.

Këtë pasdite në tendën e protestës qytetare, u diskutua mbi problematikat e familjeve shqiptare dhe përjetimi i tyre nga nënat, bijat, e gjithë gratë shqiptare.

Në përkrahje të kauzës së protestuesve ishte edhe tenori Rudi Sata i cili mbështetjen e tij e dha përmes fjalëve por edhe notave muzikore të këngës “Rrjedh në këngë e ligjërime.”

“Jam këtu jo vetëm si artist por si qytetar. Jam këtu në emër të artistëve që i denigruan, i nëpërkëmbën dhe i denatyralizuan. Ky i kryeminsitrit tonë është rast unikal. Ky është artisti që urren artistët. Por artistët jetojnë vetëm përmes fjalës së lire”– tha Sata.

E pranishme në bashkëbisedim ishte edhe bashkëshortja e z.Basha, Aurela Basha, e cila dha një mesazh të shkurtër. “Unë jam këtu si bashkëshorte por edhe si nënë e dy fëmive të vegjël. Jam këtu edhe si përfaqësuese e brezit të parë të të rinjve shqiptarë që iu dha mundësia të ikin jashtë shtetit, të studiojnë e të kenë një mundësi për një jetë më të mirë. Jam këtu edhe si bija e atyre prindërve, nënave dhe baballarëve, që na rritën me aq sakrifica.Dhe sot, është detyra jonë që ta kthejmë këtë sakrificë mbrapsht. Eshtë detyra jonë që sot të bëjmë ne sakrificën tonë. Tani që ne dimë më mirë, kemi parë më shumë, është detyra jonë që të qendrojmë këtu në këtë shesh e të mos pranojmë asgjë më pak se sa standardet europiane.”. 

Zonjat e pranishme ngritën shqetësimet e tyre nga pasiguria e shkollimit të fëmjëve deri tek pamundësia ekonomike për të përballuar jetesën e cila për supet e nënave shqiptare është rënduar për shkak të taksave të larta dhe çmimeve në rritje të shërbimeve shtetërore.

“Jam bijë pronari, por babai im vdiq pa u bërë pronar i tokave të vetë. Zoti kryeministër premtuat legalizime falas. Ku janë? Ku është puna? Nuk kam të ardhura të paguaj shkollën e fëmijëve”, tha Merita Çela, avokate.

“Nuk e kam shkelur kurrë ligjin. Kam qënë rrogëtare. Kam dal nga shërbimi civil sepse isha bijë e një ish të dënuari politik. Ajo që për 25 vjet kishim harruar, mu kujtua në formën e shprehjes që nënë ma thonte kur shkonim në Spaç: Ne nuk jemi njësoj si të tjerët.Lufta e klasave është sot aktuale nga kjo qeveri. Çfarë t’i them unë fëmijëve të mij? Bëhuni të ndershëm? Unë jam e ndershme dhe jam pa punë. Kjo nuk është demokraci, është totalitarizëm”, shtoi Cela.

Alfrida Dedgjonaj, zv kryetare e bashkisë Lezhë, kërkesën e protestuesve për zgjedhje të lira dhe të ndershme e komentoi si minimum të ligjshmërisë.

“Sot paradite dikush më shkruajti: si do e arsyetosh faktin që sot duhet të ishe në zyrën e Bashksië dhe jo në protestë? Jam e bindur se kjo proteste e nisur nga Partia Demorkatike ne emër të të drejtave dhe lirive themelore të njeriut e ka kaluar dimensionin politik dhe është bërë kauzë mbarëkombëtare. Unë dhe bashkëqytetarët e mi jemi këtu në emer të kushtetueshmërisë dhe kushteve që populli vendos përballë cdo qeverie”.

Klea Progni, është një 14 vjeçare e cila përfaqëson rininë e talentuar të këtij vendi, e cila përmes recitimit të vargjeve të poezisë së Gjergj Fishtës, ngriti në këmbë të gjithë të pranishmit në “sheshin e lirisë”.

Për kryedemokratin Lulzim Basha, zgjidhjet për mundimet e ankthin e grave dhe nënave, vijnë përmes zgjedhjeve të lira e të ndershme.

“Zgjedhje të lira e të ndershme mund dhe do të ketë vetëm pa qeverinë e lidhur me krimin, pa qëverinë që kriminalizoi parlamentin, qeverinë që përbuzi dhe hodhi në rrugë edhe gratë socialiste për tu hapur vend trafikantëve të grave, siç ishte rasti në Lezhë, për t’u hapur rrugë dhunuesve të grave, siç janë qindra e mijëra raste në administratën shtetërore.”

Lulzim Basha theksoi edhe njëherë rëndësinë e mesazhit të dhënë më 18 shkurt në nisjen e protestës qytetare.

“Nëse ka një mision të shenjtë për të cilën ia vlen të sakrifikojmë e të qendrojmë deri në fitore është siguria, liria, mirëqënia e brezave që do vijnë. Ndaj qendresa jonë këtu sot, nesër e deri në arritjen e fitores tonë, është garancia, është domosdoshmëria, është vendimi që do ti shkojmë deri në fund të gjithë së bashku këtu”.

Nga sheshi i zërit të qytetarëve të thjeshtë, kryetari i Partisë Demorkatike i dha një këshillë qeverisë.

“Ti thërrasë mendjes, ta dëgjojnë zërin e qytetarëve, të mos i bëjnë hesapet gabim, përndryshe sheshi i 18 shkurtit do të mbushet 2 herë më shumë dhe nuk do të ketë njeri ta ndalë këtë valë popullore”.

Njoftim per shtyp 21 Shkurt 2017

Në bashkëbisedimin e sotëm në Sheshin e Lirisë u fol me të ftuar por edhe të rinj e qytetarë të thjeshtë për censurën e fjalës së lirë. Gazetarët Alfred Lela, Alida Tota dhe Basir Collaku ndanë me pjesmarrësit eksperiencën e tyre profesionale, përvojën dhe pasojat personale që kanë pasur në kushtet e presionit qeveritar ndaj medias.

Për Alfred Lelën, sot qeveria është e vetëakuzuar. “Ju kujtoj një shprehje të Kryeminsitrit Rama: punë ka por nuk ka profesionistë. Tani më lini t’ju prezantoj me një profesionist. Une jam i tillë dhe jam i papunë”. Por Lela theksoi se qytetarët janë bashkuar në atë shesh, jo për punë po për liri.

Gazetari i kronikës së zezë Basir Collaku, i anatemuar pas publikimit të informacionit mbi implikimin e makinës private së minsitrit të Brendshëm Sajmir Tahiri në trafik droge, foli për pritshmëritë e protestuesve dhe mundësinë që ajo të prodhojë liri për qytetarët, por edhe për mediat. “Ky organizim është një formë e medias së lirë të mungur tashmë dhe falenderojmë kryetarin e PD Basha për këtë nismë”.

Alida Tota e etiketoi ‘town hall-in’e mundësuar nga kjo protestë popullore si burimin e mundshëm të rikthimit të lirisë dhe të drejtave të njeriut. “Ju keni nisur marshin e lirisë dhe një mini revolucion mediatik të cilit i jeni bashkuar dhe ju (qytetarët). Ka pasur tentativë për ta denigruar dhe lidhur ngushtësisht me politikën këtë lëvizje e cila realisht është popullore, e sigurisht që do të udhëhiqet nga një lider. Unë kam parë nga afër censurimin dhe një formë të re skllavërimi që i bëhet mediave dhe gazetarëve. Sigurisht që ka lidhje me dinjitetin, por këtu nuk jemi për të luftuar për veten. Ne jemi pushteti i katërt dhe nuk mund të kontrollohemi apo censurohemi nga pushteti i qeverisë”.

Një ndërhyrje spontane ishte ajo e aktores Suela Konjari e cila u shpreh e nderuar për pjesmarrjen dhe i kujtoi kujtdo se vrasja e frikës sjell edhe zërin për të kërkuar të drejtat dhe lirirtë qytetare. “Ndryshe janë emocionet e skenës, këto janë emocione njerëzore të vërteta. Sulmohem prej dy ditësh në portale, blogje, por, për të gjithë strucët që më kërcënojnë me mesazh, dua t’u theme: Unë e vrava frikën kur isha 29 vjec dhe me barkun tek goja pasi isha shtatzënë, shkoja në cdo protestë të qytetit studenti”. Me vargjet e poetit Ali Podrimja, aktorja Konjari shprehu përjetimin e saj – “Toka ime digjet ne cdo cep të shpirtit tim, ndaj unë jam këtu ndaj jam me ju dhe do të jem me ju”.

Kryetari Lulzim Basha e quajti kauzën e mbështetur tashmë prej katër ditësh pa ndërprerje nga qytetarët e Tiranës dhe gjithë Shqipërisë, si më të madhe se të gjithë ne, sepse është kauza e së ardhmes.

“Jemi këtu dhe do të jemi këtu çdo ditë e më shumë, çdo ditë e më të vendosur deri në realizimin e plotë, jo të pjesshëm, por të plotë të kushtit tonë: Zgjedhje të lira dhe të ndershme, largimin e këtij kryeministri dhe një qeveri teknike që garanton votën e lirë të qytetarëve shqiptarë”.

Për Lulzim Bashën, qëndresa e qytetarëve duhet të vazhdojë për të shpëtuar të vetmin institucion që mund të mbajë Shqipërinë në këmbë, zgjedhjet e lira dhe të ndershme.

“Dy rrugë ka: ose do të pranojmë të shkatërrojmë, ta lëmë të bjerë edhe ky institucion, zgjedhjet e lira dhe të ndershme, ose së bashku të qëndrojmë këtu deri sa të largojmë qeverinë, derisa të largojmë burimin e problemit dhe së bashku të japim zgjidhjen që meritojnë shqiptarët”.

Pasi falenderoi folësit gazetarë për mbështetjen ndaj kauzës së qytetarëve dhe forcën për të ngritur zërin kundër censurimit qeveritar, kryedemokrati Basha foli edhe për detyra.

“Falenderoj sot gazetarët, operatorët dhe punëtorët e medias të cilat në kushte të jashtëzakonshme presioni psikologjik, politik, personal dhe ekonomik, po mundohen përsëri t’i tregojnë Shqipërisë dhe botës fytyrën e vërtetë të protestës tonë qytetare dhe vendosmërisë tonë për fitore. Sot nuk ka detyrë më të madhe sesa këtë protestë ta shtrijmë anembanë Shqipërisë”.

Një falenderim kryetari i demokratëve Lulzim Basha ia dha edhe rinisë gjimnaziste që iu bashkua sot tendës së protestës së qytetarëve.

“Kur isha gjimnazist 17 vjeçar edhe unë i mora të gjithë shokët dhe shoqet dhe u bashkuam me studentët në Lëvizjen e madhe të Dhjetorit. Për arsyet tona për liri, për demokracinë, për ëndrrën tonë për Shqipëri europiane. Kjo qëndresë është për këta të rinj që sot janë në ballë të protestës. I përshëndes nga zemra dhe i garantoj se nesër do të jenë në ballë të Shqipërisë.”

Në vazhdim studentë, maturantë, qytetarë të thjeshtë dhe pensionistë ndanë shqetësimet e tyre dhe pritshmëritë e lëvizjes popullore, qytetare e cila vazhdon pa ndërprerje prej katër ditësh.

Njoftim per shtyp, 21 Shkurt 2017

Fevziu: Ju keni deklaruar që do të qëndroni në protestë para selisë së KM ose në forma të ndryshme të shpërndara në të gjithë vendin, deri në momentin e krijimit të një qeverie teknike. Nëse z.Rama do t’ju refuzojë deri në fund siç ju ka refuzuar deri tani, a ka  një plan B të PD dhe a mund të negociohet ky vendim i juaji?

Basha: Nuk ka një plan B. Plani është zgjedhje të lira dhe të ndershme. Qeveria “Rama” ka patur 3 vite e gjysëm kohë dhe shanse për të provuar nëse është pro zgjedhjeve të lira dhe të ndershme apo kundër tyre. Ka humbur çdo shans, duke filluar me Korçën, dy muaj pasi erdhën në pushtet, duke vazhduar me zgjedhjet lokale të vitit 2015, duke kulmuar me Dibrën. Dhe kjo është vetëm një simptomë e problemit të thellë të z.Rama dhe qeverisë tij. Një qeveri e lidhur kokë e këmbë me krimin e organizuar dhe me bandat.

Fevziu: Për këtë duhet të shkoni në zgjedhje z.Basha, ta mundni. Nëse Rama nuk ndërton qeveri teknike çfarë do të bëni ju, nëse nuk tërhiqet?

Basha: Dëgjoje deri në fund z.Fevziu, t’i përgjigjem pyetjes së parë dhe pastaj bëj pyetje sërish. Pra, ka humbur shansin e parë sepse tre herë që i është dhënë mundësia të organizojë zgjedhje i ka dhunuar standardet zgjedhore. Problemi i dytë dhe më i madhi faktikisht i Shqipërisë, jo vetëm i Edi Ramës është lidhja kokë e këmbë e kësaj qeverie me krimin. Ne kaluam ligjin për dekriminalizimin, bëmë një qëndresë të jashtëzakonshme, ndërgjegjësuam shqiptarët dhe  ndërkombëtarët me përkrahjen e tyre kaluam ligjin për dekriminalizimin, Edi Rama nuk e zbatoi.

Edhe në një rast kur u detyrua të nënshkruante largimin e Elvis Rroshit, Elvis Rroshi vazhdon “de facto” të jetë kryetari i Bashkisë së Kavajës.

Dhe së treti zvarriti deri në asgjesim reformën zgjedhore. Një vit më përpara i kërkuam reformën zgjedhore, pamë mungesën e vullnetit prandaj ishim ne që propozuam platformën duke përfshirë votimin elektronik, zvarriti dhe zvarriti reformën zgjedhore.

Në këto kushte ku vendi po hyn në një vit të dytë të ciklit të drogës i cili prodhon qindra milionë euro në duart e krimit të organizuar, në kushtet e moszbatimit të ligjit të dekriminalizimit në parlament, per kryetarë bashkish dhe pozicione të tjera, në kushtet e kapjes së Edi Ramës në flagrancë nga media, nga qytetarët, nga ndërkombëtarët, si dhunues, shkatërrues të proceseve zgjedhore, e vetmja mundësi tashmë e artikuluar jo vetëm nga PD, nga opozita, por nga gjithë qytetarët, është një qeveri që do të garantojë zgjedhje të lira dhe të ndershme, një qeveri teknike. Ky është një vendim i marrë në sheshin e popullit dhe jo në zyrat e partive, është një vendim i cili nuk ka kthim. Në Shqipëri do të ketë këtej e tutje vetëm zgjedhje të lira dhe të ndershme. PD dhe unë jemi të vendosur ta luftojmë këtë betejë deri në fund, jo për PD por sepse kauza e zgjedhjeve të lira dhe të ndershme është një kauzë që bashkon çdo shqiptar, të djathtë dhe të majtë.

Fevziu: Nëse Edi Rama nuk pranon, z. Basha, cili do të jetë fundi?

Basha: Le të shohim nga historia e këtij vendi dhe nga historia e popujve të civilizuar. Çfarë ndodh me ata që nuk pranojnë të zbatojnë të drejtën themelore të qytetarëve, të drejtën e votës së lirë? Kush do të tërhiqet populli, qytetarët apo ai që merr përsipër këtë barrë? Jam i bindur që fitorja do ti takojë qytetarëve, do ti takojë popullit.

Fevziu: Z.Basha thatë pak më parë që ka dhënë prova që në dy raste që ka tentuar të organizojë zgjedhje të lira, z.Rama ka dështuar. Por i kujtoni zgjedhjet lokale dhe në Vorë dhe në Lezhë, ku ju konkuronit me LSI-në, ndërkohë që duket se aktualisht po e kërkoni shpëtimin në një aleancë me LSI-në dhe një qeveri teknike që mbështetet nga Meta?

Basha: Ne nuk kërkojmë shpëtimin tek askush tjetër përveçse tek qytetarët shqiptarë dhe qytetarët shqiptarë janë bashkuar sepse shpëtimi janë zgjedhjet e lira dhe të ndershme.

Fevziu: Keni negociata me Metën?

Basha: Nuk ka shpëtimtarë te tjere përveçse shqiptarëve që bashkohen siç janë bashkuar të shtunën, siç janë të bashkuar këtu tre ditë. Çdo orë kjo protestë rritet, bëhet gjithmonë e më e madhe, çdo orë rritet konsensusi i qytetarëve. Edhe atyre që të kërcënuar, të dhunuar nga kjo qeveri nuk i janë bashkëngjitur orëve të para të protestës por që me zemër janë këtu. Janë me mijëra mesazhe. Hapni “FB” e Partisë Demokratike, hapni “FB” tim dhe do të shikoni qe, kjo lëvizje nuk është më një lëvizje politike, është një lëvizje popullore, kombëtare e cila nuk kthehet mbrapsht pa fitore, që është, zgjedhje të lira dhe të ndershme, qeveri teknike.

Fevziu: A keni negociata me Metën?

Basha: Nuk ka negociata. Pa dyshim që çdo faktor politik shqiptar që ndjen përgjegjësi  para qytetarëve shqiptarë, që nuk është i mbyllur në bunkerin e konfliktit të interesit me qytetarin shqiptar, në bunkerin e krimit, në bunkerin e korrupsionit, në bunkerin e drogës, sot duhet të marrë përgjegjësi. Kjo vlen për çdo parti politike.

Fevziu: Edhe për Metën?

Basha: Përfshi Partinë Socialiste të Shqipërisë apo çfarë ka mbetur prej saj, përfshi Lëvizjen Socialiste për Integrim, çdo faktor politik ka shansin të dëshmojë nese është me qytetarët, është për popullin, është për zgjedhje të lira dhe të ndershme, apo është me krimin, me drogën, me pushtetin e parave të pista. Kjo është zgjedhja e sotme, zgjedhje tjetër nuk ka, rrugë tjetër nuk ka.

Fevziu: Z.Basha si do ta arrini këtë kur Bashkimi Europian sot përmes Maja Kocijancic ka deklaruar se nuk njeh asnjë formë të bashkëbisedimit politik veç atij që është në Parlament. Dhe ju nuk jeni në Parlament.

Basha: BE ka folur me rezoluta, me deklarata ku vlerat themelore të Europës, zgjedhje të lira dhe të ndershme janë të panegociueshme dhe këtu ju kujtoj se zgjedhjet të lira e të ndershme janë tashmë një kusht formal i Bundestagut Gjerman për të përparuar Shqipëria drejt integrimit europian, ju kujtoj se po kështu Parlamenti Europian ka nënvizuar se zgjedhjet janë test për integrimin europian të Shqipërisë. Vetëm një i marrë mund të ketë guximin që tu thotë shqiptarëve që Bashkimi Europian do të tolerojë një Shqipëri ku krimi e droga vendosin zgjedhjet dhe jo qytetarët shqiptarë. Zgjedhjet e lira e të ndershme, kauza e shqiptarëve është një e drejtë themelore është pjesë e identitetit europian. Smund të jetë Europa, pa zgjedhje të lira e të ndershme dhe padyshim që edhe sot kanë ardhur mesazhet e përkrahjes nga Italia, nga Gjermania për këtë kauzë, për zgjedhje e lira dhe të ndershme. Ndaj, është Bashkimi Europian që ndihmoi me ligjin për dekriminalizimi, është Bashkimi Europian që ndihmoi me një reformë në drejtësi me paketën kushtetuese e cila lufton krimin dhe korrupsionin, është Bashkimi Europian i cili e ka bërë fare të qartë për shqiptarët dhe Shqipërinë dhe kësaj qeverie shurdhe se; pa zgjedhje të lira e të ndershme Shqipëria nuk do të bëjë përpara drejt integrimit europian.

Fevziu: Z Basha, a ka lidhje kjo proteste me bllokimin e procesit të vetingut? Dhe pse nuk i jepni ok procesit të vetingut që të shkojë paralel me protestën tuaj?

Basha: Ky është një mashtrim tipik. Ai që ka bllokuar procesin e vetingut është Edi Rama. Ne jemi krenarë për paketën kushtetuese që mundësuam me konsensus historik më 22 Korrik. Qendruam dhe luftuam një vit e gjysëm sepse Edi Rama kërkonte ta kapte drejtësinë, donte të kontrollonte gjyqtarët dhe prokurorët në mënyrë që të mbrohej ai dhe kriminelët dhe kriminelët e lidhur me të. Mori fund kjo përpjekje e tij dhe ai u detyrua të pranojë para Bashkimit Europian dhe SHBA-ve si pjesë e konsensusit të 22 Korrikut se 7 ligjet kryesore të Reformës në Drejtësi do të bëheshin vetëm me konsensus me opozitën. Menjëherë pas kësaj Edi Rama shkeli premtimin para SHBA-ve dhe BE-së dhe i kaloi ligjet siç deshi vetë duke përjashtuar opozitën. Na ka përjashtuar Edi Rama duke shkelur premtimin e tij para SHBA-ve dhe BE-së 7 ligjet do të bëheshin vetëm me konsensus me opozitën. Nuk jemi vetëpërjashtuar. Na kanë përjashtuar me ndërgjegje për të dëmtuar reformën në drejtësi sepse nuk duan reformë në drejtësi që ndërshkon krimin dhe korrupsionin, por drejtesi qe liron bandat, që liroi Lul Berishën, që liroi Hakmarrjen për Drejtësi, që përgatitet të lirojë Aldo Baren, që mban gati për të liruar Shullazin. A ka shqiptar që beson sot se një kryeministër i zhytur deri në grykë me korrupsion, drogë e krim do gjyqtarë e prokurorë të ndershëm e të pastër që ta hetojnë. Jo. Ai do gjyqtarë e prokurorë që mund ti shantazhojë, që mund ti urdhërojë në telefon siç tha vetë ministri i tij i Drejtësisë. Gjerat janë të qarta. Keto jane fake news qe ka shpërndarë Edi Rama. U bëj thirrje mediave të mos bëhen pjesë e tyre. Opozita u përjashtua nga Edi Rama, përgjegjësia për të është e Edi Ramës por unë dua të siguroj sot gjithë shqiptarët se nesër Partia Demokratike në pushtet do të mundësojë zbatimin e paketës kushtetuese, per një drejtësi të pavarur që do të vërë para përgjegjësisë politikanët e korruptuar dhe kriminelët të cilitdo krahu politik qofshin.

Fevziu: Do radikalizohet protesta nëse nuk ka përgjigje?

Basha: Protesta do të rritet, nga ora në orë me pjesëmarrje dhe entuziazëm. Partia Demokratike dhe Lulzim Basha kanë qënë dhe janë për protestë paqësore. Ne do ta mundim të keqen, ne do ta mundim tiraninë e varfërisë dhe korrupsionit. Ne do ta mundim krimin. Do ti mundim me pjesëmarrje dhe bashkim qytetar. Populli do fitojë, tirania do të zbrapset. Zgjedhje të lira dhe të ndershme dhe një qeveri ku pushtetin ekonomik dhe politik do tia kthejë qytetarëve.

Intervista e Lulzim Bashes dhene gazetarit Blendi Fevziu ne emisionin Opinion, 21 Shkurt 2017

Nën tingujt e këngës wind of change, në Sheshin e Lirisë u organizua sot një mbrëmje artistike, si përkujtim dhe reflektim per 20 Shkurtin 1991.

Nën moderimin e artistit Arben Skënderi, dhjetra të rinj lexuan poezi e disa protagonistë rrëfyen për ta orët e vështira të 26 vite më parë por edhe solidaritetin e qytetarëve të Tiranës e gjithë Shqipërisë me grevën e studentëve në shkurt 1991.

Mbrëmja nisi me artisten Ramona Tullumani, soliste e parë në Operan e Tiranës performoi para protestuesve me këngën Lule borë. Pjesë e kësaj mbremje ishin edhe poezi të njohura të Visar Zhitit e Havzi Nelës që u intepretuan nga të rinjtë pjesëmarrës në protestën e qytetarëve për zgjedhje të lira e të ndershme.

Roland Bejko ndau me të rinjtë eskperiencën e tij me studentët e Gjirokastrës mbi lëvizjen për të rrëzuar dikaturën komuniste. Ai tregoi edhe dokumentat e rralla të organizimit të studentëve për grevën e urisë dhe solidaritetin e mjaft qytetarëve me ta.

“Të gjithë të na bashkohen këtu sepse po qendrojmë e po protestojmë për një kauzë të madhe”, tha Arben Skënderi i cili më pas ftoi qytetarët të ndiqnin një dokumentar mbi rrëzimin e bustit të ish diktatorit duke elektrizuar protestuesit me mesazhin e tij; misioni vazhdon.

Njoftim per shtyp, 20 Shkurt 2017