Blog

Bashkëbisedimi sot në Sheshin e Lirisë, ishte entuziast dhe i zjarrtë, pasi 20 shkurti është ditë e vecantë për shqiptarët. 26 vite më parë shqiptarët rrëzuan shtatoren e diktatoritr. Si sot, 26 vite më parë shqiptarët kërkuan themelin e një demokracie, zjedhje të lira. Sot shqiptarët janë mbledhur përsëri në shesh, për zgjedhje të lira e të ndershme. Ky ishte mesazhi që bashkoi sot në sheshin e lirisë qindra qytetarë, për të kujtuar të shkuarën dhe për të përsëritur guximin dhe fitoren e kauzës së lirisë në demokraci.

Drejtori i atëhershëm i gazetës “RD” Preç Zogaj, kujton se si 26 vite më parë, rinia vrau frikën për të kërkuar lirinë e saj.

“E nisën studentët e Kamzës. E vazhduan ata të Universitetit të Tiranës. E kulmuan qytetarët e Tiranës më 20 shkurt ’91 ne 14:07. E përfundoi po atë ditë e gjithë Shqipëria, Korça, Fieri, Shkodra. Shqipëria u ngrys pa Enver Hoxhën.”

Për Preç Zogajn, mesazhi i lëvizjes së 20 shkurtit 1991 është ende i qartë sot.

Demokracia smund të shartohet me diktaturën – tha Zogaj – Ndaj sot Partia Demokratike bashkoi njerëzit për të rrëzuar monumentin e zgjedhjeve të vjedhura e të prishura.

Përmes risjelljes së shprehjes së shkrimtarit Viktor Hygo i cili thotë se “ska fuqi më të madhe sesa një kauzë koha e së cilës ka ardhur”, Preç Zogaj u shpreh se stilimi i kësaj lëvizje është një: fitorja.

Për Bislim Ahmetajn, shqiptarët 26 vite më parë bënë të mundur që ëndrra të bëhej realitet.

Më parë thirrja ka qënë: e duam Shqipërinë si gjithë Europa – tha Ahmetaj, duke shtuar se sot, qeveria e ka kthyer në: duam që gjithë shqiptarët të ikin nga vendi i tyre në Europë.

Prandaj duhet të ngrihemi si në vitin ’91 për të rrëzuar këtë demokraturë – tha Ahmetaj.

Dje një nga studentët e qëndresës kundër diktaturës komuniste, sot pedagog, për Ilir Kadukun shoqëria përbëhet nga qëndrestarë idealistë.

Duke risjellë një shprehje të Winston Churchill, Kaduku thirrjen ia drejtoi popullit: Një popull që harron, vdes. Ne nuk duhet të harrojmë sakrificat e intelektualëve dhe të të burgosurve politikë.

Mesazhin Kaduku ia drejtoi kryeministrit Rama: “Viktor Hygo ka thënë se kur diktatura është fakt edhe pozicioni është detyrë. Ne nuk ikim nga këtu”.

Fatmir Merkoçi kujtoi përgjigjen e qytetarëve ndaj thirrjes së studentëve të 91-shit, të cilët mbushën sheshin si rrallë ndonjë.

“Një masë e madhe njerëzish të ndërgjegjshëm për çfarë po bënim, u përball me forcën më të madhe të shtetit. Ishte dita kur ne nuk përmbysëm vetëm shtatoren e diktatorit, por përmbysëm frikën”.

Si udhëheqës i 20 shkurtit ’91 Merkoçi mbështeti bindshëm kryetarin demokrat Lulzim Basha për thirrjen e kësaj lëvizje dhe vendimet e marra deri më sot. Thirrjen e rezervoi për popullin e Tiranës: “Na u bashkoni si në 20 shkurt 1991 pasi diktatura nuk njeh ngjyra partiake”.

Kreu i selisë blu, Lulzim Basha përsëriti për të pranishmit kauzën e qytetarëve të thirrur nga Partia Demokratike në Sheshin e Lirisë:

“Jemi këtu sepse njësoj si para 26 vitesh bijtë e etërve duan të zëvendësojnë demokracinë e vërtetë me demokracinë fasadë. Demokracia fasadë është e keqja e të këqijave ndaj jemi mbledhur sot këtu në këtë ditë të madhe të madhe të përkujtimit të 20 Shkurtit, për të rinovuar edhe një herë mesazhin e madh popullor që dhamë tre ditë më parë: Se shqiptarët nuk do të pranojnë më demokraci fasadë, ekonomi fasadë, Parlament fasadë, shëndetësi fasadë, bujqësi fasadë, arsim fasadë. Se shqiptarët janë ngritur për demokracinë e vërtetë dhe lirinë e vërtetë dhe se kjo mund të arrihet përmes vetëm zgjedhjeve të lira dhe të ndershme”.

Për Bashën, vendimit qytetar të marrë dy ditë më parë, do t’i bëjnë jehonë së shpejti të tjera mitingje.

“Tani që ky vendim është shpallur, ky vendim është marrë ne i themi sot, siç i thamë dje, siç i thamë para dy ditësh në mitingun më të madh, siç do ti themi së shpejti në një miting tjetër edhe më të madh, se zgjedhje të lira dhe të ndershme ka dhe do të ketë me një qeveri teknike.

Nga kjo nuk ka kthim.”

Zoti Basha argumentoi se Partia Demokratike, një vit më parë i shteroi mundësitë institucionale.

“Ne i shteruam të gjitha  mundësitë. Tani nuk kanë përballë vetëm PD, tani nuk kanë përballë vetëm opozitën. Tanimë kanë përballë një popull të tërë me mbështetje të fortë ndërkombëtare që pret zgjedhje të lira dhe të ndershme, qeveri teknike”.

Për Lulzim Bashën, vendimi për bojkot të Parlamentit, vjen ndaj qeverisë së inkriminuar, jo popullit, parlamenti i të cilit është në shesh.

“PD dhe grupi i saj parlamentar do të zhvillojnë, deri në arritjen e objektivave tona për një qeveri teknike, aktivitetin parlamentar këtu, aktiviteti parlamentar do të zhvendoset në Parlamentin e vërtetë në demokracinë e vërtetë direkte këtu në sheshin e lirisë me ju dhe me qytetarët shqiptarë”.

Sot kanë ofruar përmes mediave të kontrolluara nga kryeministri, kokën e Saimir Tahirit.- tha kryetari demokrat Basha – Por ne nuk jemi mbledhur këtu për koka turku dhe pastaj të ulim kokat tona e të pranojmë prapë zgjedhje të prishura, të kapura të vjedhura dhe të dhunuara. Dëgjoje zërin e qytetarëve. Respekto vullnetin e tyre. Hapi rrugë qeverisë teknike e mendo zgjedhje të lira dhe të ndershme e dil e ndeshu po ta mbajti, e të shikojmë se kush  fiton.

Vajza e Azem Hajdarit, Rudina Hajdari i tha qytetarëve të mbledhur në çadrën e lirisë se vetëm sëbashku mund të godasim fasadat e qeverisë dhe të ri-sjellim pranverën që shumë të pranishëm e sollën për ne 26 vjet më parë.

Arben Imami, duke rikujtuar një mbledhje të tensionuar të mbajtur tek ish presidiumi i Kuvendit Popullor me kryetar Ramiz Alinë, risolli kërkesën e artikuluar 26 vjet më parë: “Askush nga ne nuk kishte menduar për pushtetin, por për zgjedhjet në vetvete. Pas fasadës së lirisë 26 vite më parë ishte dhuna dhe terrori. Edhe sot duhet të luftojmë për zgjedhje të lira njëherë e mirë.”

Njoftim per shtyp i Partise Demokratike, 20 Shkurt 2017

Gazetarët e njohur Armand Shkullaku dhe Sonila Meço u bënë sot pasdite pjesë e një bashkëbisedimi me të rinjtë në Sheshin e Lirisë, në Bulevardin Dëshmorët e Kombit. Të rinjtë e pranishëm ngritën shumë pyetje dhe shqetësime për kriminalizimin e shtetit, për pasigurinë e votës, për gjendjen e rënduar të ekonomisë dhe demokracisë në vend. Kryetari i Partisë Demokratike, Lulzim Basha, i falenderoi gazetarët Shkullaku dhe Meço për kontributin e tyre në ruatjen e vlerave të rëndësishme, si liria e fjalës dhe e shprehjes.

“Ky është një moment ku duhet të jetë opozita, duhet të jetë Partia Demokratike dhe kryetari i saj z.Basha, ata që duhet të mbështesin njerëzit dhe qytetarët. Në këtë kuptim unë e shoh këtë akt që ju keni nisur si diçka pa kthim. Unë mendoj se qendresa këtu e opozitës është mbështetja më e mirë që opozita mund tu japë qytetarëve. Qytetarët këto 4 vjet janë ndjerë të nëpërkëmbur, të lënë pas dore dhe pavarësisht përpjekjeve të opozitës nuk ka pasur një përfaqësim më të fortë, për të pasur një zë, për të qënë zëdhënës të shqetësimeve të tyre. Mendoj se ky është momenti. Partia Demokratike ka hedhur një hap që çdo kthim pas nuk do dëmtonte vetëm atë por do vriste përfundimisht shpresën e njerëzve që në fund mund të ketë një ndryshim”, u shpreh Armand Shkullaku.

Gazetari i njohur tha se vlerëson zgjedhjen që ka bërë opozita, për një protestë paqesore, si të thuash gandiste, por theksoi se nëse qeveria është një fasadë, opozita s’mund të bëhet fasadë e fasadës.

“Unë mendoj se nuk duhet të ketë kthim prapa në këtë që ka nisur, sepse nëse do fillojnë negociatat, apo këto bisedimet tërhiqu këtu e shto atje, ne do të kemi një arnim ose riparim të një sistemi që vetëm mashtron. Nëse do i shkojmë deri në fund, mund të kemi ndryshime, mund të kemi përmbysje. Nuk është fjala thjeshtë për ndryshim. Nuk do kishte kuptim nëse do shkojmë në zgjedhje me këtë këtë qeveri. Nëse opozita është e bindur përditë që qeveria ka kapur të gjitha pushtetet; presion drejtësisë, mediave, qytetarëve, paratë e drogës, të krimit, dekriminalizimi që bëhet sa për sy e faqe, kemi pasur shumë prova që vota e lirë nuk ka më vlerë, atëhere për çfarë duhet shkuar në zgjedhje. Atë që z.Basha e quajti qeveri fasadë, atëhere do bëjë edhe opozita fasadën e fasadës?! Apo të vendosë të thotë stop e të mos shkojë në zgjedhje me këtë qeveri. Unë do të thoja që nuk ia vlen të shkohet në zgjedhje. Këtë e tha edhe një minsitër i qeverisë që denoncoi me raste në Durrës banda të caktuara bashkë me kryetarin e Bashkisë së Durrësit, që kanë mobilizuar krimin bashkë me policinë për të vjedhur votat e njëri-tjetrit. Kur ata i vjedhin njëri-tjetrit, imagjinoni se ç’mund të bëjnë. Slogani që mund ti shkojë më mirë kësaj që keni nisur është; përmbysje, jo ndryshim”, pohoi Shkullaku.

Gazetarja Sonila Meço vlerësoi protestën e 18 shkurtit dhe qëndresën që po vazhdojnë të bëjnë qytetarët në Sheshin e Lirisë.

“Le të jetë kjo një iniciativë e cila në një farë mënyre ndryshon dhe përmbys një mentalitet të shqiptarëve që gjithmonë kanë besuar se fati i tyre do të vijë nga një prej kateve të asaj godine. Jo. Shpresoj që çdo shqiptar përpara se të vendosë të niset për tek ky vend, tek kjo çadër, të shohë vetëm brenda 4 mureve të tij. Nëse cilësia e arsimimit të fëmijëve të tij është përmirësuar, nëse shkon në spital dhe merr një shërbim të mirë, nëse hap ekranin dhe sheh media të lira që nuk bëjnë cinizëm edhe me këtë revoltë që vjen edhe nga njerëz pa përkatësi partiake, nëse sheh që në fund të muajit kursen dhe i tepron, atëhere nuk ka arsye për të dalë nga shtëpia”, tha Meco.

Gazetarja shpjegoi arsyet pse i është bashkuar kësaj proteste.

“Unë për vete i bashkohem sepse e kam ndjerë mbi kurriz se çfarë do të thotë presion i qeverisë mbi punën time. Unë jam gazetare dhe kishim një televizion, dhe vetëm sepse orekset e kësaj klase në pushtet nuk bashkoheshin me fjalën e lirë, 500 kolegë mbetën pa punë. Vetëm sepse kryeministri i vendit vendosi të bëjë edhe prokurorin, edhe gjykatësin. Brenda 4 mureve të shtëpisë time të ardhurat kanë rënë. Nuk bëjmë një jetë më të mirë se më përpara. Na janë ngushtuar shumë mundësitë. Shqetësohem shumë për kolegët gazetarë që sa vijnë e mbeten të papunë. Unë për vete i kam të gjitha arsyet për të dale, i ftoj gjithë të tjerët të shohin brenda tyre”, tha Meco, duke shtuar se ka ardhur koha të jemi të lirë në mendim, të jemi të lirë në zgjedhje dhe vendime.

I pyetur nga një i ri se cfarë plani ka PD në lidhje me kriminalizimin e shtetit dhe a do lejojë nesër në pushtet të ndodhë kjo gjë e rëndë, Lulzim Basha u shpreh i prerë:

“Ne së bashku do ta dekriminalizojmë shtetin deri në qelizën e fundit. Ne do ti heqim kriminelët nga politika, do ta zbatojmë ligjin për dekriminalizimin të cilin sot e bllokon i njëjti njeri që i solli trafikantët e grave dhe vajzave shqiptare dhe i bëri deputet, kryetarë bashkish, u dha pushtet dhe i bëri drejtorë. Kryeministri i kërkoi dhe si solli sepse i duhehsin për të marrë, vjedhur e shantazhuar shqiptarët. Nuk ranë nga qielli kriminelët në karriget e pushtetit. Ishte kompromisi, pazari i Edi Ramës për të marrë pushtetin dhe sot është pazari për të mbajtur pazarin kundër vullnetin të shumicës dërmuese të shqiptarëve”, theksoi Basha.

Kryetari i Partisë Demokratike, duke analizuar tiparin e qeverisë, që investohet dhe bën gjithcka për fasadë, tha se edhe zgjedhjet kërkon ti bëjë të tilla. Por Basha theksoi se kjo nuk do të ndodhë.

“Që dje bota ka dëgjuar diçka të madhe nga shqiptarët, vendosmërinë për tu ngritur bashkë dhe për ti thënë kurrë më dhe fund kësaj maskarade, fund kësaj fasade. Demokraci fasadë, ekonomi fasadë, shëndetësi fasadë, arsim fasadë, pensione fasadë, kujdes social fasadë, është e gjitha një fasadë, dhe tani do të bëjë zgjedhje fasadë. Prandaj nuk e deshi votimin dhe numërimin elektronik sepse kështu nuk i fuste dot duart, nuk i manipulonte dot vullnetin e qytetarëve shqiptarë. Ndaj ne morën një vendim të madh dje, dhe nuk ishte vetëm i mi apo i Partisë Demokratike. Bashkë ishim këtu kur e morëm me tubimin dhe bashkimin më të madh të shqiptarëve. Vendimi ishte në dorën tuaj dhe vendimi është i qytetarëve shqiptarë. Vendimi është që, nuk do të ketë më zgjedhje fasadë, nuk do të ketë më zgjedhje të manipuluara. Do të bëjmë zgjedhje të lira e të ndeshme ose zgjedhje në këtë vend nuk do të ketë derisa të jenë të lira dhe të ndershme. A mund të ketë zgjedhje të lira dhe të ndershme me këtë kryeministër të bërë njësh me bandat e drogës?! A mund të ketë zgjedhje të lira dhe të ndershme me këtë koalicion të krimit dhe korrupsionit?! Zgjedhje të lira dhe të ndershme vetëm përmes një qeverie teknike, një qeverie të zgjedhjeve të lira. Ky është kushti, kjo është zgjidhja”, deklaroi Lulzim Basha.

Njoftim per shtyp, 19 Shkurt 2017

Të dashur bashkëqytetarë,

Vëllezër dhe motra,

Nga Tirana dhe nga gjithë Shqipëria, shqiptarë të ndershëm, shqiptarë të lirë, bashkimi më i madh popullor që ka njohur ndonjëherë ky vend, është derdhur sot këtu në këtë shesh, sheshin e lirisë, sheshin e protestës, sheshin e vendimit të madh për Shqipërinë dhe gjithë shqiptarët.

Mirë se vini!

Ne jemi mbledhur sot këtu, ju keni ardhur sot këtu, sepse kjo qeveri e ka çuar vendin në mjerim, në varfëri dhe kaos, dhe tani që ju ka vjedhur gjithçka nga xhepat dhe shtëpitë tuaja, do t’ju vjedhë edhe zgjedhjet.

Ju të gjithë e dini mirë këtë.

Ju, ne jemi mbledhur sot këtu për të thënë: Boll më! Boll kemi duruar ato që durojmë përditë që kur erdhën këta në pushtet.

Sot, ne nisim rrugëtimin drejt një fillimi të ri për të cilën vendi ka kaq shumë nevojë, për të cilin ka nevojë kaq shumë çdo shqiptarë, për të cilin ka nevojë çdo fëmijë, i ri dhe e re.

Sot jemi këtu për ta shpallur këtë vendim me zë të lartë: Po, duam zgjedhje të lira dhe të ndershme!

Duam ndarjen e politikës nga krimi!

Duam dinjitet!

Duam drejtësi!

Duam punë!

Duam ta vëmë interesin e njerëzve të thjeshtë të parin!

Duam një të ardhme dinjitoze që na bën krenarë për vendin tonë!

Duam shpresën, shpresën që po lind, nga ky bashkim më i madhi në historinë e shqiptarëve.

Sot jemi të bashkuar në këtë shesh sepse nuk e pranojmë dot më këtë gjendje; jemi të bashkuar sepse kemi besim se mund të ndërtojmë një jetë dinjitoze; jemi të bashkuar nga alarmi kombëtar dhe ndërkombëtar se pushteti i korruptuar dhe kriminelët duan të vjedhin zgjedhjet e ardhshme.

Sot jemi bashkuar për të marrë një vendim të madh, vendimin për të ndalur një herë e mirë maskaradën e grabitjes se zgjedhjeve.

Ose do të bëjmë zgjedhje të lira ose zgjedhje nuk do të ketë.

Rrugë të mesme nuk ka. Rrugë tjetër nuk ka.

Zgjedhjet për fasadë, zgjedhjet e njollosura nuk do t’i pranojmë.

Zgjedhjet e standardeve të krimit në vend të standardeve të Europës nuk do t’i pranojmë.

Zgjedhje me kriminelë të veshur me pushtet nuk do t’i pranojmë.

Zgjedhje që shtrembërojnë vullnetin tuaj, vullnetin e shqiptarëve nuk do të ketë më në Shqipëri.

Partia Demokratike lindi në rrugë dhe në sheshe, me ju popullin në krah.

Partia Demokratike lindi sepse e deshët ju, qytetarët e këtij vendi.

27 vite më parë, shqiptarët kishin nevojë për një lëvizje të madhe demokratike.

Sot, ne prapë kemi nevojë për një lëvizje të madhe kombëtare dhe demokratike.

Kjo qeveri palaçosh ka dështuar! Ju e dini këtë!

Kjo mazhorancë është një dështim total! Ju e vuani këtë!

Ky kryeministër është turpi i vendit! Ju e shihni këtë!

Sot, ne nisim kthimin e Shqipërisë, sot ne nisim kthimin e vendit tonë në rrugën e sigurtë drejt të ardhmes.

Unë jam këtu, me ju, sepse dua që ju, njerëzit e lirë, shqiptarët e lirë, të jeni të parët për qeverinë e re që duam të kemi për Shqipërinë tonë.

Unë dua që ju, të jeni krenarë për vendin tuaj.

Unë dua që ju të jeni e të ndiheni të sigurtë.

Unë dua që ju të jeni e të ndiheni të mbrojtur.

Të mbrojtur nga arroganca.

Të mbrojtur nga padrejtësia.

Të mbrojtur nga varfëria.

Të mbrojtur nga korrupsioni dhe krimi.

Të mbrojtur nga propaganda.

Të mbrojtur nga ky sistem i pashpirt e i padrejtë.

Po, jam sot këtu sepse dua t’ju mbroj nga politika që i shërben krimit dhe jo ju. Politikanët e lidhur me krimin po e shkatërrojnë vendin. Ata po ju shkatërrojnë jetën.

Droga nuk është e ardhmja e Shqipërisë.

Korrupsioni nuk është e ardhmja e Shqipërisë.

Krimi i organizuar nuk është e ardhmja e Shqipërisë.

Papunësia nuk është e ardhmja e Shqipërisë.

Varfëria nuk është e ardhmja e Shqipërisë.

Emigrimi nuk është e ardhmja e Shqipërisë.

Kjo qeveri nuk është e ardhmja e Shqipërisë!

Bashkëqytetarët e mi, Shqipëria po shkatërrohet.

Shqipëria po shkatërrohet sepse ky sistem nuk punon.

Shqipëria po shkatërrohet sepse kjo qeveri nuk punon për njerëzit.

Ata punojnë vetëm për veten e tyre, vetëm për xhepat e tyre.

Ata dështuan për të sjellin një jetë më të mirë për shqiptarët.

Një grusht pushtetarësh dhe kriminelësh, po gëzojnë gjithçka, ndërsa shqiptarët po marrin rrugët e botës.

Shqipëria është bërë sot hambar i krimit dhe i drogës.

Ata dështuan dhe mashtruan me 300 mijë vendet e punës.

Ata dështuan dhe mashtruan me shëndetësinë falas.

Ata dështuan me demokracinë e vërtetë.

Dështuan me lirinë e vërtetë.

Si mund të jenë të lirë njerëzit kur kanë frikë për të nesërmen?

Frikë për të ardhmen e fëmijëve.

Frikë për shëndetin.

Frikë se do humbasin ose nuk do e gjejnë kurrë një vend pune.

Frikë nga taksidari që u vjen tek biznesi dhe ua mbyll.

Frikë nga kriminelët e veshur me pushtet.

Frikë për të votuar të lirë.

Frikë se do t’ju duhet të lënë shtëpitë e tyre, për të nisur një jetë të vështirë, plot të panjohura në emigracion.

Kjo qeverisje ka detyruar 300 mijë shqiptarë të braktisin vendin, kjo duhet të marrë fund!

Ne kemi qenë në pushtet dhe kemi qeverisur. E dimë sa e vështirë është. E dimë që duhet kurajo, për të marrë vendimin e duhur, çdo ditë.

Ne u përpoqëm ta përmirësojmë jetën për njerëzit. Në fakt ne e bëmë këtë.

Ne e vendosëm Shqipërinë në vëmendjen ndërkombëtare, e futëm në NATO, hoqëm vizat. Ne punuam fort për ruajtur vlerat tona, lirinë, taksat e ulëta, investimet madhore në infrastrukturë.

Ne punuam për të mirën e vendit tonë.

A bëmë mjaftueshëm? Jo.

Por a e shkretuam vendin kështu? A lamë fatin tuaj në dorë të krimit dhe kriminelëve? Jo.

A jemi ne ndryshe nga këta? Po!

Sot, dua të ndaj diçka me ju dhe mendoj se ka ardhur koha ta dëgjoni.

Unë jam gati!

Jam gati, t’ju udhëheq në rrugën që na nxjerr nga ky kaos- drejt së ardhmes.

Jam gati të ndërtoj me ju, për ju, një shoqëri të re, një vend të ri, një të ardhme të re për çdo shqiptar të ndershëm.

Po, jam gati. Sot, më shumë se kurrë.

Tani, kam një pyetje të thjeshtë për ju, për ju qindra, mijëra shqiptarë në këtë bashkim më të madhin popullor në histori dhe për shqiptarët anembanë vendit:

A jeni gati të luftojmë bashkë?

Të luftojmë bashkë për Shqipërinë?

Të ngrihemi bashkë për zgjedhje të lira?

Për të shporrur qeverinë e krimit, për të shporruor qeverinë e korrupsionit.

Bashkë për një qeveri të njerëzve? Bashkë për një qeveri të qytetarëve?

Le të nisim sot, jo nesër. Sot, sot, sot, lëvizjen e madhe kombëtare dhe demokratike për të cilën Shqipëria ka kaq shumë nevojë.

Sot, qëndroj këtu bashkë me ju për t’ju dhënë fjalën se do të punoj pa pushim për të përmbushur aspiratën tonë të përbashkët që gjithsecili prej jush të bëjë realitet ëndrrën e tij për një jetë më të mirë për veten tuaj dhe për familjen tuaj.

Sot është dita kur nisim marshimin drejt këtij qëllimi!

Ky qëllim është më i madh se gjithsecili prej nesh.

Më i madh se qëllimet e një partie politike.

Më i madh edhe se qëllimet e koalicionit tonë.

Shumë më i madh se rrotacioni politik i radhës nga e kuqe ne blu, apo nga blu në të kuqe.

Sepse ka të bëjë me vendin tonë.

Sepse ka të bëjë me njerëzit tanë.

Ka të bëjë me të ardhmen tonë.

Ka të bëjë me vendimin që ne vetë, ne vetë, dhe askush tjetër të mos vendosë për fatin tonë!

Miqtë e mi, gjithçka në jetë varet nga vendimet që ne marrim.

Sot, bashkë do ta marrim një vendim të madh!

Ky vendim është në dorën tuaj.

Kjo që po ndodh në Shqipëri nuk është fatalitet i pashmangshëm.

Ju, njerëzit e thjeshtë të këtij vendi, e keni shkruar njëherë historinë.

Unë e mbaj mend si të ishte dje, 8 dhjetorin 1990, atë ditë ne morëm një vendim, vendimin se nuk mund të vazhdonim më si më parë.

Vendimin për tu ngritur kundër krimit dhe tiranisë shtetërore, vendimin për të zgjedhur lirinë!

Sot unë dua që ju, të gjithë bashkë, të marrim një vendim tjetër të madh.

Thellë brenda vetes, e dimë se kështu nuk mund të vazhdojmë më.

Sot, ne vendosim:

Ose vendi do vazhdojë kështu, dhe ne do të zhytemi përditë e më shumë në varfëri dhe kaos;

Ose ne, do të hapim një derë të re drejt të ardhmes, një derë që na çon në një fillim të ri për vendin tonë, mundësi të reja për një jetë më të mirë.

Ky është një vendim i madh, sepse është një vendim i vështirë.

Ky vendim kërkon nga të gjithë ne këtu në këtë shesh dhe anembanë Shqipërisë të zgjedhim mes frikës ose kurajos, mes indiferencës ose përgjegjësisë, mes oportunizmit ose sakrificës.

Unë kam vendosur të zgjedh kurajon !

Unë kam vendosur të zgjedh përgjegjësinë!

Unë kam vendosur të zgjedh sakrificën!

Ka ardhur koha miqtë e mi.

Ka ardhur koha të marrim vendimin e madh.

Vendimin për të bërë realitet ëndrrat tona.

Vendimin për t’u ngritur bashkë!

Vendimin për të vrarë frikën dhe për të zgjuar shpresën për të cilën Shqipëria sot ka nevojë.

Vendimin për të caktuar vetë fatin e fëmijëve tanë.

Vendimin për të shpallur se ky vend i lashtë ka çfarë t’i ofrojë popullit të vet, ka çfarë t’i ofrojë Europës.

Vendimin për të vënë punën e ndershme, mirëqenien, demokracinë e vërtetë, në themelet e reja të Shqipërisë.

Vendimin, miqtë e mi, për të bashkuar, për të bindur, të gjithë ata që e duan Shqipërinë me zemër.

Vendimin për të dekriminalizuar shtetin, vendimin për të zhdukur ekonominë e drogës, vendimin për t’u kthyer njerëzve fuqinë ekonomike, vendimin për t’iu kthyer njerëzve pushtetin.

Ne do të qëndrojmë këtu në këtë shesh derisa të sigurojmë njëherë e mirë zgjedhje të lira e të ndershme.

Ne do të qëndrojmë në këtë shesh, dhe nuk do të lejojmë zgjedhje fasadë me këtë qeveri të kapur nga droga dhe krimi.

Unë do të qëndroj këtu në shesh. Ju ftoj të gjithëve të qëndrojmë së bashku!

Të qëndrojmë së bashku për të realizuar zgjedhje të lira dhe të ndershme, të cilat vijnë vetëm përmes shporrjes së qeverisë së krimit dhe një qeverie teknike të zgjedhjeve të lira.

Ky është vendimi im.

A është ky vendimi i të gjithëve këtu sot?

Miqtë e mi,

Fitorja është në zemrën e gjithsecilit prej jush!

Kjo do të jetë fitorja më e bukur sepse do të jetë fitorja juaj!

Ne ngrihemi bashkë,

Ne fitojmë bashkë,

Shqipëria fiton me ne!

Zoti ju bekoftë ju!

Zoti e bekoftë Shqipërinë!

Mesazhi i Lulzim Bashës, një ditë para 18 shkurtit: “Ftoj çdo shqiptar, eja nesër, bashkohu! Eshtë një bashkim i madh popullor, është një festë e çdo qytetari. Të vijnë me gratë, me të rejat, me të rinjtë, me familjet. Ne do të jemi me familjet tona. Do të jetë një protestë madhështore, do të jetë një bashkim madhështor dhe të gjithë së bashku do të hapim një derë të re për Shqipërinë tonë dhe për jetën e çdo shqiptari”

Pyetje: Zoti Basha fillimin e protestës e dimë, vazhdimin dhe mbarimin s’e dimë?

Basha: Fillimi i protestës është përcaktuar nga Partia Demokratike, nga opozita në orën 12:00. Qytetarët janë ata, të cilët do të vendosin kohëzgjatjen dhe mbarimin e protestës, padyshim me fitore. Me fitore qytetare, të kauzës qytetare, të kauzave të shumta që do të bashkojnë shqiptarët nesër në protestë.

Unë dua në radhë të parë të falenderoj mijëra qytetarë që më kanë dërguar mesazhe në telefon, në Facebook, në forma dhe mënyra të tjera. Në pamundësi për t’ju përgjigjur gjithsecilit prej tyre, në kohën e shkurtër kur i kanë dërguar këto mesazhe, dua t’iu përcjell një falënderim nga zemra për mbështetjen e jashtëzakonshme, për angazhimin, për konfirmimin e bashkimit të madh popullor që do të ndodhë nesër në Tiranë, të protestës së madhe, kësaj feste të demokracisë, të cilës do t’i bashkohen burra dhe gra, të reja dhe të rinj, intelektualë, artistë, sportistë, pa punë, punëmarrës, sipërmarrës, fermerë, punëtorë, studentë dhe gjimnazistë.

Jam shumë i inkurajuar nga këto dhjetra, mijëra mesazhe të cilat konfirmojnë atë që ndjen çdo shqiptar, se rruga e vetme për të garantuar të drejtat e tyre themelore është përmes zgjedhjeve të lira dhe të ndershme.

Unë sot dua t’i garantoj ata se nesër të gjithë bashkë me fuqinë e madhe të pjesëmarrjes popullore, me fuqinë e madhe të bashkimit përmes një proteste madhështore, një shfaqjeje demokratike të forcës së pamposhtur të qytetarëve të bashkuar, por po kështu paqësore, do t’i tregojmë çdo shqiptari dhe botës mbarë, e cila do të jetë me sytë tek ne, dhe do na mbështesë, dhe bota demokratike po na mbështet për fitoren e kauzës së drejtë të zgjedhjeve të lira dhe të ndershme, pra do tu tregojmë se shqiptarët kanë të njëjtat vlera qytetare, kanë të njëjtin përkushtim ndaj dinjitetit të tyre, ndaj të ardhmes së fëmijëve të tyre dhe familjeve të tyre dhe prandaj ngrihen, bashkohen dhe nuk thyhen deri sa të realizojnë zgjedhje të lira dhe të ndershme dhe përmes zgjedhjeve të lira dhe të ndershme një pushtet të qytetarëve dhe jo një pushtet të pushtetarëve të korruptuar e të lidhur me krimin.

Pyetje: Keni një mesazh për Policinë?

Basha: Policia i ka marrë mesazhet. Po ia përsëris edhe sot, të mos bie pre e asnjë manipulimi politik, të mos provokojë, përndryshe do të përballet me pasojat e sjelljes provokative. Por jam i bindur se e nesërmja do të jetë një festë gjigante demokracie, shprehja më e drejtpërdrejtë e vullnetit të qytetarëve për t’i dhënë fund të keqes, për të marrë sëbashku një vendim të madh nesër për zgjedhje të lira dhe të ndershme, që do ta marrim së bashku aty, të gjithë sëbashku, të gjithë qytetarët.

Edhe një herë dua të falënderoj dhjetra, mijëra qytetarë që kanë konfirmuar pjesëmarrjen, që kanë konfirmuar me mesazhet e tyre mbështetjen dhe qëndresën, përkushtimin deri në arritjen e fitores. Dhe të ftoj çdo shqiptar, eja nesër, bashkohu! Eshtë një bashkim i madh popullor,  është një festë e çdo qytetari. Të vijnë me gratë, me të rejat, me të rinjtë, me familjet. Ne do të jemi me familjet tona. Do të jetë një protestë madhështore, do të jetë një bashkim madhështor dhe të gjithë së bashku do të hapim një derë të re për Shqipërinë tonë dhe për jetën e çdo shqiptari.

Kryetarja e Lidhjes Demokratike të Gruas së Shqipërisë, deputetja Albana Vokshi bëri thirrje nga Kukësi  për pjesëmarrje masive në protestën e 18 shkurtit për të mbrojtur Shqipërinë nga destabilizimi. Vokshi tha se Rama po nxjerr nga burgjet kriminelët për të bajtur pushtetin me dhunë.

“ Rama po nxjerr nga burgjet të gjithë kriminelët e arrestuar nga Sali Berisha. Mbi 200 banda u arrestuan, shumë prej tyre u dënuan me burgim të përjetshëm për vrasjet dhe krimet e kryera. Cfarë ndodh tani, keni dëgjuar që me urdhër të Ramës gjykata shpalli të pafajshëm bandën më të rrezikshme  “Hakmarrjen për Drejtësi “.  Rama po nxjerr të gjithë kriminelët e arrestuar, ku jetojmë ne, fëmijët tuaj, a jemi ne të sigurt me këtë qeveri të lidhur me bandat dhe krimin ?. Ne duhet të reagojmë, ne nuk mund të heshtim më  jo për veten tonë, as për mirëqinien tonë, as për PD, reagoni për familjet tuaja, fëmijët tuaj, reagoni sa nuk është vonë për të shpëtuar familjet tona. Nëse gratë reagojnë, atëherë reagon gjithë shoqëria. Nëse ne ngrihemi në këmbë për të kërkuar të drejtat tona, atëherë të gjithë qytetarët e Shqipërisë marrin forcën që kanë gratë. Thirrja ime nuk është si politikane, as si kryetare e LDGSH dhe si deputete, por një thirrje  e imja si nëna e dy vajzave të vogla. Unë do të luftoj deri në fund që vajzat e mia të kenë një të ardhme të sigurt,  jo në Gjermani dhe në një vend të BE, por këtu në Shqipëri. Le të bëhemi bashkë në një lëvizje pa kthim në mbrojtje të vlerave , në mbrojtje të traditave familjare, në mbrojtje të të drejtave të të gjitha grave dhe vajzave shqiptare.”

Deputetja Vokshi deklaroi se Kukësi dhe Shqipëria janë lënë qëllimisht në varfëri për t’i shtypur njerëzit si në kohën e diktaturës. Gjysma e familjeve kuksiane jetojnë me 60 lek në ditë, ndërsa Edi Rama grabit pasuritë minerare dhe hidrike të Kukësit.

“A kemi ne gratë arsye për tu ngritur të revoltuara për shkeljen e të drejtave tona.  A kemi ne gratë arsye për tu ngritur dhe për të protestuar se fëmijët tanë po emigrojnë, sepse Edi Rama genjeu kur tha se do të hapë 300 mijë vende pune. A është hapë ndonje vend I ri pune në Kukës,  a është punësuar ndonjë nga vajzat apo djemtë tuaj këtu në Kukës, në vendet që hapi qeveria, qoftë edhe një prej jush ? Unë do të isha shumë e kënaqur  të takoja një djalë apo vajzë të punësuar nga vendet e puëns që krijoi Edi Rama.

Arsim nuk kanë se ju mbylli dyert e universiteteve, punësim nuk kanë se Edi Rama mashtroi. Atëherë cfarë do të bëjnë djemtë dhe vajzat tona…do të emigrojnë !

Sa familje kanë emigruar vetëm vitet e fundit. Po flisnim edhe me Kryetarin e Bashkisë së Kukësit, se cfarë po bën Edi Rama, ai po shfaros popullsinë shqiptare. Ka me dhjetra fshatra që nuk kanë asnjë derë shtëpie të hapur. Banka Botërore në  raportin e saj të fundit ka thënë se gjysma e popullsisë jeton në varfëri ekstreme në Shqipëri. Në këtë rajon me pasuri natyrore, a mund të jetojë më ndihmë ekonomike një familje që merr mesatarisht 3500 lek të reja në muaj ? Gjysma e familjeve kuksiane jetojnë me gjysëm dollarë në ditë ? Gjëndja në Shqipëri është bërë alarmante, ajo është bërë jeshile prej kanabisit ,. Ky është një rrezik që më vonë do të ketë efekte më të madhaja te fëmijët dhe familjet tona.

Deklaratat e deputetes Albana Vokshi u bënë në Kukës në takimin me Lidhjen Demokratike të Gruas ku mori pjese edhe Presidentja e Forumit të Grave Popullore Europiane, Doris Pack dhe Deputetja e Lidhjes Demokratike të Kosovës, znj. Kimete Bytyci dhe këshilltarja e Kryeministrit të Kosovës, Znj. Mybera Mustafa.

Lulzim Basha me qytetarët e njësisë 4 në Tiranë: “Dicka e madhe po ndodh dhe është përtej axhendës tonë politike, është axhenda e cdo qytetari shqiptar, është axhenda e gjithë Shqipërisë edhe e këtyre fëmijëve për nesër. Prandaj, të gjithë bashkë, ju ftoj të dalim në shesh të shtunën në orën 12 të marrim vendimin e madh”.

Kreu i Partisë Demokratike, Lulzim Basha, takoi qytetarë të njësisë 4 në Tiranë të cilët i ftoi të bashkohen më 18 shkurt, në një lëvizje mbarëpopullore për të ngritur njëzëri problemet e tyre. Zoti Basha takoi edhe sipërmarrës të zonës, të rrënuar nga kriza ekonomike, nga rënia e konsumit të mallrave dhe taksimit të papërballueshëm.

“Njerëzit po vrasin frikën dhe me kurajo po bashkohen me njëri-tjetrin për të ndarë të gjithë së bashku hallet dhe brengat që i kanë vënë përposhtë një nga një,  këto katër vite, një nga një, secili ka patur hallin e tij apo të saj të papunësisë të shkarkimit arbitrar nga puna, të mbylljes së biznesit të vogël, të shëndetësisë në kolaps, të arsimit që nuk ofron asgjë për fëmijët e shqiptarëvet”, tha Basha.

Për kryedemokratin Basha, lëvizja e datës 18 shkurtit vjen si mposhtje e frikës ndaj shtypjes dhe arrogancës së pushtetit përmes instrumentit më demokratik të qytetarëve: manifestimit paqësor mbarëpopullor.

“Por ajo që po ndodh, ajo që shoh kudo, shoh dhe sot këtu në këtë lagje të Tiranës, në mes të qytetarëve të Tiranës, është një vendosmëri e madhe për të mos e lejuar këtë të keqe të vazhdojë më. Do të jetë një manifestim i jashtëzakonshëm, një madhështi që vjen nga bashkimi i qytetarëve, por po kështu do të jetë një rast edhe për ti treguar botës mbarë qytetarinë tonë, me një protestë paqësore,  demokratike, por të vendosur deri në realizimin e objektivave të qytetarëve shqiptarë për zgjedhje të lira e të ndershme”.

Për Lulzim Bashën, kur shqiptarët ngrihen bashkë duke mposhtur frikën, kthehen edhe në ilacin më të mirë të demokracisë.

“Ata që i fryjnë tamtameve të frikës, janë ata që kanë frikë nga bashkimi qytetar, nga bashkimi popullor. Bashkimi i qytetarëve është ilaci i vetëm i popujve të qytetëruar. Eshtë ilaci i vetëm për demokracinë e grabitur për ëndrat e nëpërkëmbura, për shpresat dhe mundësinë që kanë vrarë cdo qytetar e në vecanti për rininë shqiptare. Dicka e madhe po ndodh dhe është përtej axhendës tonë politike, sepse është axhenda e cdo qytetari shqiptar, është axhenda e gjithë Shqipërisë edhe e këtyre fëmijëve për nesër. Prandaj, të gjithë bashkë, ju ftoj të dalim në shesh të shtunën në orën 12 të marrim vendimin e madh”.

Takim i departamentit të pronave të PD me pronarët në Vlorë. Qeveria aktuale ka përkeqësuar gjendjen me ligjin anti-kushtetues. Zgjidhja e çështjes së pronave me programin e Partisë Demokratike

 Pronarët vlonjatë të cilët kërkojnë prej katër vitesh kthimin e pronave të tyre, do të marrin pjesë në protestën e 18 shkurtit në Tiranë.

Ata theksuan se me këtë qeveri nuk kanë gjetur asnjë derë të hapur dhe se  në  katër vite Rilindja, çështjen e pronave, e la krejtësisht në harresë duke mos trajtuar asnjë kërkesë në themel.

“Me këtë qeveri nuk ka drejtësi e zgjidhje por vetëm, zvarritje dhe korrupsion. Ne duhet të protesojmë për këtë të drejtë kushtetuese të mohuar dhe vetëm programi i djathtë sjell shpresë për zgjidhjen e çështjes së pronave”, tha një pjesmarrës në takimin e organizuar nga Departamenti i Pronave në Partinë Demokratike.

“Partia Demokratike do të shfuqizojë ligjin aktual të qeverisë për pronat dhe do të hartojë një ligj që do t’i kthejë të drejtën pronarëve për kompensim fizik dhe monetar”, u shpreh kreu Departamentit të Pronave në PD, Genti Malko.

Gjatë fjalës së tij, Malko tha se qeverisja aktuale bëri një ligj antikushtetues, që nuk i ka dhënë zgjidhje asnjë pronari, madje ka shtuar kalvarin e vuajtjeve të tyre.

“Ligji i qeverisë kërkon të fundosë të drejtat e pronarëve, ndër të tjera me ndryshimin e zërit kadastral, heqjen e çmimit të tregut dhe vetëvendosjen e standarteve të pronës nga vetë agjensia e kthimit dhe kompensimit të pronave. Kjo agjensi në kundërshtim me të drejtat e pronarëve, në ligjin aktual nuk  i referohet standarteve të BE. Të gjitha çfarë ka bërë qeveria, janë hapa mbrapa, që bien në kundërshtim jo vetëm me parimin kushtetues të së drejtës së pronës , por bien në kundërshtim dhe me jurisprudencën që ka  mbajtur Gjykata Evropiane  e të Drejtave të Njeriut kundër shtetit shqiptar. Unë mendoj se situatë më të keqe për pronarët se kjo që po kalojnë me këtë qeveri, nuk ka. Me ardhjen e PD në qeverisje do të jetë prioritet, trajtimi i dosjeve sa më shpejt të cështjeve të patrajtuara ndonjëherë nga Agjensia që janë reth 12 mijë”, tha Malko.

Takimet e departamentit të pronave pranë PD do të vijojnë intesivisht në qytetet e Shqipërisë, me ish-pronarët, për të ofruar zgjidhje kësaj çështje. Në këtë takim në Vlorë, u theksua që zgjidhja vjen përmes programit të Partisë Demokratike, dhe zgjidhja vjen me vendimin e madh të 18 shkurtit që do të sigurojë votë të lirë e të ndershme.

Parafolësi (Arben Ahmetaj) të shkojë aty se harroi çizmet e hajdutit.

Në mbështetje të kërkesës së zonjës Topalli për mungesën e kryeministrit, theksoj se ai nuk është më kryeministër, ai është “pulla e kuqe” e këtij parlamenti! Ndaj mos të duket më në parlament! Mos t’ia shohim më bojën në parlament, ai nuk ka asnjë lidhje me këtë parlament! Një burracak që nuk përballet dot, një burracak që lakuriqësinë e vet do t’ia përcjellë parlamentit si “pullë të kuqe” – pulla e kuqe është e cullakut, e lakuriqit, e dini – ndaj dhe të mos vijë më në parlament!

Të marrim vendim që ta nxjerrin përfundimisht nga parlamenti. Ky është vendimi që presin shqiptarët. Më mirë ta marrim ne sesa ta marrë nesër sheshi, do të jetë më e urtë kjo. “Pulla e kuqe” të mos vijë më në parlement!

BERISHA: Dita e qytetarëve po vjen! 

18 shkurti është dita e një fillimi të ri, dita e misionit të madh për çdo shqiptar për të çmontuar regjimin e banditokracisë!

18 shkurti është dita e fillimit të madh, është dita e fillimit të ri, është dita e misionit të ri të çdo shqiptari, misionit historik para vetes, fëmijëve, vendit dhe të ardhmes!

18 shkurti është dita e misionit të burrave dhe grave, djemve dhe vajzave, që nuk duan kurrë që regjimi sundues i vendit të tyre të jetë një banditokraci, që nuk mund të tolerojë kurrë më tutje që Shqipëria, toka e Zotit, dheu i njerëzve që qëndruan shekuj e mijëvjecarë, dheu i njerëzve më të vuajtur dhe më me sakrifica në Europë, të shndërrohet në një Banditistan.

18 shkurti është dita e misionit të atyre që vendosin për t’i dhënë duart njëherë e përgjithmonë kryebanditit Ervin Kristaq Rama, njeriut që në pushtet solli terroristët, solli bandat kryesore, solli krimin më të shëmtuar.

Javën e kaluar denoncova këtu lidhjet direkte të Olsi Ramës dhe të ndrikull Jona Dervishit me grupin e “Hakmarrjes në Drejtësi”, me grupin e Xibrakës. Javën e kaluar solla fakte, data, fotografi të sistemit TIMS të shtetit ku faktohej se Olsi Rama dhe ndrikull Dervishi kishin kaluar disa herë kufirin me makinën e grupit të Xibrakës, grupit të “Hakmarrjes” vetëm e vetëm për të transportuar kokainë.

Edi Rama heshti si fije bari, Olsi Rama nuk thotë një fjalë. Të vijë t’u thotë shqiptarëve pse vëllai i tij përdor për të dalë jashtë shtetit pikërisht makinën e përshtatur për transportin e kokainës. Ka 4 javë që fshihet si mi dhe s’del dot! Të vijë këtu t’u thotë shqiptarëve se pse vet ai, në emër të Hakmarrjes për Drejtësi u implikua direkt në hotel Vollga, duke nxjerrë në plan të parë kryebanditët Dabulla. Të vijë këtu t’u thotë shqiptarëve se cilat mesazhe merr nga burgu, nga Aldo Bare, Dritan Dajti, cilat janë sms-të që merrte nga burgu nga Lul Berisha, se cila është marrëveshja që bëri në Bruksel me Hakmarrjen për Drejtësi, grupi terrorist më i fuqishëm i Ballkanit, që e shpalli të pafajshëm një javë më parë. Vetëm për shoferin shqiptarët e kanë të freskët në memorie reagimin e fuqishëm që bëri në atë kohë përfaqësuesi i vendit më të madh të botës, ambasadori Xhefrey kur këta sikarë, këta terroristë vranë dhe ekzekutuan në mes të bulevardit shoferin e prokurorit të përgjithshëm, që e keni dhe anëtar Asambleje sot (Sollaku).

Edi Rama është koka e krimit, e bandave, i denoncuar nga Dondollaku në prokurorinë e Firenzes si njëri i Bandës së Lushnjes, i përkulet deri te kembët Aldo Bares dhe i ka çuar dosjen për t’a nxjerrë dhe atë të lirë javën që vjen. Gradualisht po pregatit lirimin e Zani Caushit.

A e dini more të mjerë, që jeni fund e krye skllevër të banditëve, se hakmarrja për Drejtësi është dënuar në kohën kur Kondi ishte kryetar gjykate, i zgjedhur prej jush si dhe anëtar i kryesisë së PS. Por prap nuk ishte këlysh i Bllokut si Edi Rama, prap nuk kishte bërë pazaret që ka bërë Edi Rama me Hakmarrjen për Drejtësi. A e dini apo jo se kur u dënuan vrasësit e azem Hajdarit ishit ju në pushtet si parti dhe sot Edi Rama miraton vendime për shpërblimin e tyre sepse çon Hickën për të përfaqësuar shtetin në Gjykatë Ndërkombëtare.

Shqiptarë dhe shqiptare,

18 shkurti është dita e fillimit të madh të një misioni, më i madhi nga 20 shkurti i 1991, që do thërrmojë dhe do shkërmoqi Banditokracinë. Ky kryebandit rrethohet këtu në parlament nga banditë të tjerë, nga ministra të pafytyrë, hajdutë që ndërtojnë parajsë dhe vila me paratë e të sëmurëve me kancer, që me paratë e drogës dhe të bixhozit ndërton parajsën e tij, që instaloi skafin dhe trafikun e drogës. me përfaqësues në krye të diplomacisë një mashtrues dhe hajdut ordiner, një njëri i cili nën ligjin e Banditistanit i thotë komisionit parlamentar   se kishte informuar presidentin, dhe presidenti e nxjerr të pafytyrë siç është, ndërsa njoftimin ja dërgon presidentit dy ditë më mbrapa. Ja ky është diplomati i Banditistanit dhe i banditokracisë.

Dita e qytetarëve po vjen! 18 shkurti është dita e misionit të madh për çdo shqiptar sepse kryebanditi e ka mbushur parlamentin me përdhunues, sepse kryebanditi e ka mbushur parlamentin me trafikantë  dhe mashtrues…

(ndërpritet seanca)

Prononcimi zotit Berisha jashtë sallës së kuvendit për gazetarët:

Këta kanë tmerr nga data 18.

18 shkurti do të jetë fillimi i ri i madh i misionit të forcave demokratike dhe shqiptarëve për shpëtimin e mekanizmave demokratike, shpëtimin e Shqipërisë nga regjimi i banditokracisë. Do të jetë një lëvizje popullore, të cilën Shqipëria nuk e ka njohur që nga 20 shkurti i vitit ‘91. Do të jetë një lëvizje misionare, në të cilën shqiptarët do të çmontojnë një nga një regjimin e kryebanditit Edi Rama, banditëve të tij në qeveri, vrasësve dhe banditëve e trafikantëve të tij në parlament. Do të jetë një lëvizje që do i kthejë shqiptarëve shpresën dhe besimin tek vetja dhe e ardhmja.

Pikërisht në këtë kulm denoncimesh, vetë ja mbath i tmerruar dhe gjen rastin që të mos ndodhet pasnesër në zyrë. Por i them që kudo që të jetë, kudo që të shkojë ai do të japë llogari para shqiptarëve për çdo të zezë që ju ka bërë këto 4 vite.

Të shkojë po të dojë edhe në Australi se edhe atje do gjendet e do japë llogari.

PYETJE: Këto thirrje pse nuk i bëni nga selia e PD por i bëni në parlament?

BERISHA: Këto thirrje i bëj nga parlamenti sepse parlamenti është sheshi, është arena ku deputetët shprehin interesat e zgjedhësve shqiptarë pavarësisht se janë demokratë, socialistë apo pa parti.

Këta po prishin seancën, por është në të zezë të tyren. Në mënyrë absolute nuk ka shqiptar që ta kuptojë pse po prishet seanca e sotme. Ju ishit aty në sallë, kur po fliste Ben Blushi dhe Blendi Klosi nuk la gjë pa thënë si rrugaç ordiner.  Kurse “ndrikull lokomotiva” bënte sikur nuk po dëgjonte gjë ndërkohë që e kishte 2 metra larg.  Flisja unë, 2 çakej flisnin.…

PYETJE: Nuk thanë fjalë fyese?

BERISHA: Fyese është sepse kur flasin ata në asnjë mënyrë nuk u ndërhyj në asnjë presje, çfarëdo që trillohet, çfarëdo që shpifin. Ka një rregull të vjetër sa vetë dialogu. Kur flet tjetri do e dëgjosh pastaj të vjen radha ty.

PYETJE: Po sjellja e zotit Noka?

BERISHA: Sjellja e zotit Noka ishte një imponim, se ai (Braçe)  nuk la fjalë pa thënë nga vendi. Kush?! Erioni! Dhe unë çfarë i thashë? Gores i thuhet kuç! Po ai çka që flet. Ai ka të drejtë të marrë fjalën, e të flasë sa të duash pas meje. Por ai do të flasë edhe para meje, edhe kur flas unë, edhe pas meje. Po ky nuk është parlament pastaj. Ka rregulla. Janë të tmerruar siç e shihni. Unë i shoh, një fytyrë i vjen dhe një i ikën. Rrinë shohin nga unë se kujt po ja përmend emrin. Shihni ministrat si bëhen. Aty kudo që të vësh dorën një bandë i gjen, kudo gjen një bandë.

Më thoni ju mua a nuk është mision të nxjerrësh Shqipërinë nga kanabistani. Po është mision historik ky. Ku shkojmë ne si Kanabistan më thoni. Shkojmë drejt çernikosjes së krimit në Shqipëri.

PYETJE: Cili është skenari i protestës?

BERISHA: Kryetari i PD e ka quajtur Lëvizje. Lëvizjet nisin sot dhe vazhdojnë. Nuk është një protestë strikte partiake, por lëvizje. A e keni marrë vesh se po shpërndahen paratë e bankave kundër protestës, 100 euro në Laprakë, 50 euro në një zonë tjetër, në Divjakë. I kam sms këtu po të doni. Këta po shpërndajnë paratë e drogës dhe paratë që vodhën në banka kundër protestës. Janë të pashpresë. Jo 50, jo 100 por absolutisht dhe 1000 për kokë po të shpërndajnë ai shesh do mbushet dhe do të jetë një uragan që kjo pranverë do të jetë pranvera e vërtet e rikthimit të vlerave në Shqipëri. Ky është një popull që ka vuajtur shumë por përsëri të gjithë ata që kanë kujtuar se u kanë vrarë aryre shpresën kanë gabuar, është ngritur. Pyeti pak? Ndaj thonë se nxjerrin 10 pikë përpara qeverinë e mëparëshme se sa këtë aktualen. Nuk ka gjë më fyese e poshtruese për një qeveri se sa të të dali qeveria paraardhëse 10 pikë para.

PYETJE:  Cili është misioni i protestës? 

BERISHA: Misioni i protestës është historik, së pari në nxjerrjen e Shqipërisë nga Kanabistani, nga banditokracia,  nga Banditistani dhe megakorrupsioni i madh dhe që qytetarët shqiptarë të votojnë të lirë në vullnetin e tyre si qytetarë europianë. Ky do jetë misioni. Në 20 shkurt të vitit 91 kishim një mision; përmbysjen e kultit më të lig dhe më mizor që shqiptarët kishin përjetuar në tërë historinë e tyre. E realizoi pupulli atë, e përmbysi. Tanke, autoblinda, mitraloza në të katra anët por një lëvizje e qëndrushme popullore dhe një grevë bëri që shqiptarët të ngadhënjejnë.

Përsëri shqiptarët do ngadhënjejnë. Është fillimi i madh. Ne jemi forca demokratike dhe jam i sigurt që, që nga themelimi dhe deri sot, atë që opozita ka realizuar me mjete demokratike, do t’a realizojë madhërishëm kësaj radhe!

-Kryedemokrati Basha takim me Lidhjen Demokratike të Gruas. “Si baba i dy vajzave e kuptoj ankthin e nënave shqiptare. Kemi një program konkret që ofron mbështetje dhe ndihmë. Zgjidhja kalon përmes vendimit të madh të 18 shkurtit. 

-Doris Pack: Ndiej keqardhje për situatën aktuale në Shqipëri. Kanabisi nuk është gjë e mirë. Unë e di për cfarë bëhet fjalë, pasi kam humbur vajzën time në betejën me narkotikët. Ndaj, ju lutem mundohuni t’i mbushni mendjen politikanëve të gjejnë mundësi të tjera punësimi për të rinjtë dhe jo ti shtyjnë drejt punës me kanabis.

Kreu i Partisë Demokratike, Lulzim Basha, zhvilloi një takim me Lidhjen Demokratike të Gruas në ambientet e Hotel International Tirana. E ftuar nderi ishte edhe presidentja e Forumit të Grave të Partive Popullore Europiane znj.Doris Pack. Kryetarja e Lidhjes Demokratike të gruas në Shqipëri, Albana Vokshi i bëri thirrje nënave, bijave dhe grave të bashkohen në një lëvizje të vetme për mbrojtjen e të drejtave të grave e çdo qytetari të braktisur nga kjo qeveri.

“200 mijë shqiptarë janë larguar nga vendi i tyre. Shkak kryesor është papunësia dhe mungesa e shpresës në vendin e tyre, ndaj ne duhet të jemi bashkë në një lëvizje për mbrojtjen e të drejtave përkundrejt kësaj qeverie arrogante” – tha Vokshi.

Për Doris Pack vuajtja është lëgjitime dhe frika e prindërve për fëmijët e tyre e justifikuar.

“Sot kam ardhur këtu sepse po flasim për situatën e grave në Shqipëri dhe Europë dhe ndiej keqardhje për situatën aktuale në Shqipëri. Nëse kanabisi është tema më e diskutuar në këtë vend kjo nuk është gjë e mirë. Unë e di për cfarë bëhet fjalë, pasi kam humbur vajzën time në betejën me narkotikët. Ndaj ju lutem mundohuni ti mbushni mendjen politikanëve të gjejnë mundësi të tjera punësimi për të rinjtë dhe jo ti shtyjnë drejt punës me kanabis.Gratë duhet të përfshihen më shumë në politikë pasi shumë gjëra i kuptojnë më mirë se burrat dhe shkalla e papunësisë 40-50% është tepër e lartë” – tha Doris Pack.

Për kryedemokratin Basha gratë e këtij vendi mbajnë në kurriz një peshë të pabarabartë dhe të padrejtë çdo ditë.

“Si baba i dy vajzave e kuptoj ankthin e përditshëm të nënave shqiptare. Pasiguria i shtohet pamundësisë. Pasiguria ndaj shtetit i cili në vend t’i mbrojë, po i godet qytetarët me forcë dhe arrogancë. Çelësi i përparimit për Shqipërinë është lufta ndaj të keqes dhe shpërblimi i meritokracisë dhe vlerave. Vlerave me të cilat na keni rritur ju nëna shqiptare” – tha kreu i PD.

“Përparimi i vendit vjen përmes ekonomisë dhe ekonomia e vendit tonë do të lëvizë sërish, me taksat më të ulëta në Ballkan, taksa të cilat do të lejojnë hapjen e vendeve të reja të punës. Do të investojmë për studentët e rinj jo me propagandë, por me taksat e shqiptarëve” – tha Basha duke vijuar me një propozim për nënat shqiptare.

“Fëmijët e shqiptarëve do i heq nga rrugët, përmes mbështetjes financiare do të mundësojmë që edhe pas orarit mësimor, fëmijët të qëndrojnë në shkollë deri në orën 15:30 – 16:00 ku do të mund të ndjekin dhe kryejnë aktivitete kulturore sportive dhe artistike nën vëzhgimin e mësuesve.”

Për kryedemokratin Lulzim Basha, konsultimi dhe parashikueshmëria e vendimmarrjes do të jenë rregulli i qeverisjes së re. Por më parë duhet të marrim një vendim më 18 shkurt në Tiranë – tha Basha – dhe në ballë të saj do të jetë rinia, por jam i sigurt që edhe gjithë nënat dhe bijat shqiptare do të prijnë lëvizjen mbarëpopullore të 18 shkurtit.

Shkodër/Lulzim Basha thirrje për bashkimin e madh të 18 shkurtit në Tiranë, mes rinisë shkodrane

“Diçka e madhe po ndodh në Shqipëri, diçka e madhe po ndodh anembanë vendit tonë, njerëzit po refuzojnë  dëshpërimin, njerëzit po refuzojnë të keqen, njerëzit kanë vendosur të bashkohen dhe unë dhe Partia Demokratike do t’i prijmë këtij bashkimi më 18 shkurt”, u tha Lulzim Basha të rinjve sot në Shkodër, të mbledhur në një takim që paralajmëron mbështetjen për protestën e madhe të 18 shkurtit në Tiranë.

“Ndaj, le ta japim edhe nga Shkodra mesazhin që po dëgjohet në çdo cep të Shqipërisë. Le t’i themi shqiptarëve se frika ka vdekur këtu në Shkodër, dhe se kurajoja qytetarë do marrë në dorë fatet e zgjedhjeve të lira dhe të ndershme, fatin e Shqipërisë, fatet e çdo shqiptari duke nisur nga bashkimi i madh të shtunën me datë 18 Shkurt në Tiranë”, u shpreh Basha mes entuziasmit të rinisë shkodrane, e mbledhur në sheshin 2 prilli.

Kryetari i Partisë Demokratike i ka informuar të rinjtë se ai ka një projekt që siguron shanse për ta, për punësim e mirëqënie, që askush të mos e braktisë vendin por ta ndërtojë të ardhmen këtu.

Projekti i z.Basha ofron stazh të paguar për 10 mijë të diplomuar në vit, por gjithashtu do të ketë mbështetje të vecantë për idetë dhe kreativitetin e tyre, që sjellin mirëqënie dhe zhvillim.

Por që të ketë një qeverisje për të rinjtë, për qytetarët, për njerëzit dhe jo për një grusht të korruptuar qeveritarësh, duhen mbajtur zgjedhje të lira e të ndershme. Zgjedhjet e lira e të ndershme sigurojnë ndryshimin e madh në vend.

Basha tha se garancia më e madhe e ndryshimit të Shqipërisë janë të rinjtë, dhe pikërisht rinisë i frikësohet më shumë kasta e korruptuar dhe kriminale që është në pushtet, që kërkon të ndalojë ndryshimin, duke mos lejuar zgjedhje.

Më poshtë, mesazhi i plotë i Lulzim Bashës sot në Shkodër

Erdha për këtë takim me rininë shkodranë, me demokratët shkodranë, me qytetarinë shkodrane, për t’i ftuar ditën e shtunë në orën 12:00, në bashkimin më të madh popullor që ka njohur Shqipëria në 27 vite.

Erdha për një takim por po më prisni me një manifestim madhështor që tregon se Shkodra si gjithmonë është gati t’i prijë ndryshimit dhe ndryshimi po vjen. Koha e mashtrimeve po mbaron, koha e batakçinjve po mbaron, koha e kriminelëve po mbaron. Po vjen ora e shkodranit të ndershëm, po vjen ora e shqiptarit të ndershëm.

Për katër vite me radhë qytetarët e Shkodrës dhe mbarë Shqipërisë janë braktisur, janë harrur, janë vjedhur, shkelur dhe nëpërkëmbur në dinjitetin dhe pasurinë e tyre, janë zhgënjyer nga premtimet për 300 mijë vende pune, taksa të ulëta, çmime të ulëta, energji e shëndetësi falas, që nuk u bënë kurrë realitet.

Realiteti është krejt ndryshe, një Shkodër e tërë, një Shqipëri e tërë e zhytur në depresion ekonomik për shkak të taksave të larta, çmimeve të energjisë dhe karburanteve më të lartat në rajon, e mbi të gjitha për shkak të një qeverie arrogante, hajdute dhe bërë palë me krimin.

Pasi vodhën dhe zhvatën pasuritë e Shkodrës dhe mbarë Shqipërisë, pasi futën duart e tyre të gjata dhe të pista, në xhepat e çdo kryefamiljari, në çdo vatër dhe çdo shtëpi shqiptarësh, sot kanë frikë të përballen me gjykimin e qytetarëve me votë të lirë e të ndershme.

Ndaj kanë bërë pakt me krimin për të ndaluar të drejtën themelore të demokracisë, zgjedhjet e lira dhe të ndershme.

Ndaj kanë bërë pakt me kriminelët, me banditët për të vjedhur, zhvatur votën e shqiptarëve, por le ti themi sot nga Shkodra e të shtunën në Tiranë, që zgjedhje me banditë nuk do të ketë, që banditët, krimi, të korruptuarit, nuk do të marrin dot peng vullnetin e shqiptarëve.

Anembanë Shqipërisë ku kam qenë këto ditë, ku kam takuar njerëz, qytetarë, pensionistë, sipërmarrës e mbi të gjitha të rinj dhe të reja, kam parë dhe dëgjuar me veshët e mi, kam parë dhe kam prekur, jo vetëm mjerimin, hallet e njerëzve por edhe shpresën dhe besimin që po ngrihet si nga hiri.

Diçka e madhe po ndodh në Shqipëri, diçka e madhe po ndodh anembanë vendit tonë. Njerëzit po refuzojnë  dëshpërimin, njerëzit po refuzojnë të keqen. Njerëzit kanë vendosur të bashkohen dhe unë dhe Partia Demokratike do t’i prijmë këtij bashkimi më 18 shkurt.

Me 18 shkurt nis një lëvizje e madhe popullore, lëvizje e shpresës dhe besimit se Shqipëria dhe Shkodra do të jenë ndryshe.

Se qeveria që do të vijë do të jetë një qeveri e njerëzve dhe jo një grushti pushtetarësh të korruptuar dhe të lidhur me krimin.

Se qeveria që do të vijë, taksat e shqiptarëve, taksat e shkodranëve nuk do t’i bëjë rrush e kumbulla, nuk do t’i vjedhë me projekte fasada, por do t’i kthejë në punësim dhe investime, do t’i kthejë në mirësi për çdo familje shqiptare.

Se në vitin 2017, nuk mund të pranojmë e as nuk do të pranojmë më mjerim të standardeve afrikane për shqiptarët.

Se në qeverisjen që po vjen nuk do të ketë asnjë familje pa bukë, pa ujë, pa drita anembanë Shqipërisë.

Se paratë e taksapaguesve shqiptarë nuk do të vidhen dhe shpërdorohen duke i lënë spitalet pa ilaçe, shkollat pa ngrohje, duke ngarkuar me mbi faturime në kurrizin e familjeve që nuk mbajnë dot më.

Por, me taksa më të ulëta, me investime që ndihmojnë jetën e qytetarëve, do të hapim vende pune për të gjithë shqiptarët e në veçanti për rininë.

Studentët shkodranë, të rinjtë shkodranë që sot kanë vetëm një rrugë, atë të largimit nga Shqipëria, në qeverisjen e ardhshme do të kenë një vit stazh të paguar nga taksat e shqiptarëve që sot vidhen dhe shpërdorohen nga një grusht hajdutësh.

Dhe kështu, do t’i shërbejmë një ekonomie që punëson, një të nesërme të sigurt për çdo shqiptar, do t’i shërbejmë paqes sociale.

Nuk do të ketë më kryefamiljarë apo të rinj dhe të reja që zgjohen me ankth dhe bien të flenë me ankth. Shqipëria e të nesërmes do të jetë një Shqipëri e paqes, e harmonisë, e punës dhe e mirësisë për çdo shqiptar.

Njerëzit do vlerësohen sipas punës dhe meritës. Nuk do jetë Shqipëria jonë Shqipëria ku kriminelët bëjnë para dhe pushtet, bëhen deputetë dhe kryebashkiakë dhe shtypin e zhvasin qytetarët e pafajshëm.

Shqipëria që do ndërtojmë sëbashku, do jetë Shqipëria e drejtësisë ku ç’do qytetar dhe qytetare, ku çdo i ri dhe e re, ku çdo shqiptar do ketë mundësinë që në bazë të punës dhe kreativitetit të tij, të ndërtojë, të realizojë, të sigurojë mirëqenie, të ndërtojë të ardhura të mjaftueshme për të jetuar me dinjitet, ai, ajo, dhe fëmijët e tyre. Ndërsa kriminelët dhe krimi do përballen me forcën e hekurt të ligjit. Ju jap fjalën se bandat dhe qeveritarët e korruptuar kanë vetëm një të ardhme: Përballjen me drejtësinë dhe prapa hekurave të drejtësisë.

Ata e dinë se nuk mund ta ndalin këtë ndryshim. Shpresa e vetme ka qënë ta zbrazin Shqipërinë nga ata që kërkojnë ndryshim. Në radhë të parë nga rinia.

Rinia është një rrezik i madh për krimin dhe qeveritarët e korruptuar sepse ka energjinë, idetë dhe idealizmin për t’u përballur dhe për të fituar.

Nga ky shesh historik ku Shkodra shënoi historinë e re të demokracisë shqiptare me rininë shkodrane dua t’i jap mesazhin, çdo të riu e të reje, anembanë Shqipërisë, se Shqipëria që po vjen do jetë mbi të gjitha Shqipëria e ëndrrave tuaja, Shqipëria e rinisë shqiptare.

Të gjithë bashkë, do bëjmë të mundur që ëndrrat tuaja të mos nëpërkëmben më. Që ju mos të harroheni e mos të braktiseni më kurrë.

Kurrë më nuk do harrohet dhe braktiset Shkodra. Kurrë më nuk do nëpërkëmbet e nuk do poshtërohet Shkodra.

Por që të ndodhë kjo ne duhet të garantojmë të gjithë sëbashku me forcën e bashkimit popullor, zgjedhje të lira e të ndershme.

Zgjedhjet e lira e të ndershme janë fundi i qeverisë së korruptuar, janë fundi i bandave. Më 18 Shkurt, të Shtunën në orën 12, Shkodra dhe Vlora, Korça dhe Durrësi, Gjirokastra dhe Elbasani, Fieri, Lushnja, Kavaja dhe gjithë Shqipëria bashkohet në Tiranë, për zgjedhje të lira dhe të ndershme. Për të diktuar me fuqinë e bashkimit një qeveri të qytetarëve dhe një ndryshim për jetën e ç’do shqiptari. Një ndryshim pozitiv për jetën e ç’do shqiptari.

Kjo që po nisim nuk është thjesht rruga drejt rrotacionit politik. Kjo është një lëvizje popullore që njëherë e përgjithmonë do diktojë politikën në shërbim të njerëzve, politikën në shërbim të qytetarëve.

Ndaj, le ta japim edhe nga Shkodra mesazhin që po dëgjohet në ç’do cep të Shqipërisë. Le t’i themi shqiptarëve se frika ka vdekur këtu në Shkodër, dhe se kurajoja qytetare do marrë në dorë fatet e zgjedhjeve të lira dhe të ndershme, fatin e Shqipërisë, fatet e çdo shqiptari duke nisur nga bashkimi i madh të shtunën me datë 18 Shkurt në Tiranë.

A do t’i prini ju? Atëherë edhe unë do i prij bashkë me ju deri në fitore.