Blog

Të nderuar anëtarë të kryesisë

Mbledhja e sotme i dedikohet tërësisht përgatitjes të strukturave të Partisë Demokratike për një proces të ndershëm dhe të lirë zgjedhor, dhe për fushatën fituese të PD dhe opozitës, në zgjedhjet e ardhshme, në zgjedhjet e ndryshimit të madh që pret dhe dëshiron çdo shqiptar.

Gjatë këtij takimi i cili natyrisht do të zhvillohet nën moton e njohur dhe të praktikuar të NATO-s, standardet e të cilit aplikojmë prej anëtarësimit në këtë organizatë, animus in consulendo liber, diskutime të lira pa praninë e mediave, por duke marrë shkas nga prania  e mediave, për hir të transparencës; si një parti e hapur që jemi, parti e debatit, parti e dialogut, jo e kulisave dhe as e intrigave, as e krimit, as e korrupsionit, dua të njoftoj përmes tyre qytetarët shqiptarë për disa nga çështjet që po diskutojmë sot.

Në raport me përgatitjet e zgjedhjeve të lira dhe të ndershme, sot në këtë sallë opozita e bashkuar ka nënshkruar një memorandum i cili trajton çështjen më të rëndësishme për Shqipërinë dhe shqiptarët, jo vetëm për opozitën: Lirinë e votës, pamundësinë për ta vjedhur apo tjetërsuar atë. Sepse të gjithë e dimë që problemi më i madh në këtë vend është shitblerja e votës dhe me mazhorancën aktuale, kjo është kthyer në një industri të vërtetë.

Dhe në propozimet tona kryesore ku hyjnë: zbatimi i ligjit të dekriminalizimit, mospërdorimi mjeteve, resurseve shtetërore në fushatë, kriminalizimi i resurve shtetërore në fushatë, aksesi mediatik i barabartë, masat për tiu kundërvënë sjelljeve të paligjshme të shtetit, në veçanti segmenteve të kriminalizuara të policisë dhe shërbimeve të tjera shtetërore,  spikat, propozimi ynë për votim elektronik dhe numërim elektronik. Një propozim tashmë i bërë zyrtar që me datën 17 maj të vitit të kaluar dhe që jep i zgjidhje përfundimtare disa prej problemeve kryesore në zgjedhje.

Duke votuar me shenjën e gishtit, siç e mundëson sot teknologjia, asnjë shqiptari nuk do ti mohohet më e drejta për të votuar. Cdo kush do të mund të votojë.

Mbledhja e kartave nga reparte kriminale të lidhura me pushtetin, blerja e tyre nuk do të funksionojë. Nuk do të funksionojë as mekanizmi i tyre i votuesve shëtitës, i votimit të shumëfishtë, i votimit tjetër për tjetër, çdo qytetar do të mund të votojë, askush nuk do të mund të votojë për dikë tjetër.

Dhe së dyti, askush nuk do të mund të fusë më duart tek votat e shqiptarëve. Nuk do të ketë kuti votimi për të futur duart dhe nuk do të ketë mundësi që ushtritë e kriminelëve apo militantëve të tjetërsojnë vullnetin e votuesve.

Si të votojnë qytetarët shqiptarë, ashtu do të lexohet vota. Qytetarët do të vendosin, jo militantët, as kriminelët, as korporatat e korrupsionit dhe fasadave.

Procesi i garantimit të zgjedhjeve të lira dhe të ndershme është një betejë që PD bashkë me aleatët, bashkë me çdo qytetar do ta luftojë dhe do ta fitojë. Do ta fitojmë së bashku këtë betejë,  jo për veten tonë.

Baltë është hedhur dhe mund të hidhet, sulme, shpifje, gënjeshtra, justifikime nga më të ndryshmet, nga ata që nuk e duan votën e lirë të qytetarëve. Por shqiptarëve iu kam borxh tju them se çfarë propozojnë, nëse nuk pranojnë votimin elektronik. Nëse ka një propozim më të mire, jemi të gatshëm ta dëgjojmë dhe ta pranojmë. Përndryshe, nuk tërhiqemi nga kjo betejë.

Ne, këtë betejë nuk e luftojmë për veten tonë. Ndaj, shpifjet, sulmet, denigrimet e atyre që mbrojnë interesat e hajdutëve dhe kriminelëve të veshur me pushtet nuk na bëjnë përshtypje.

Ne e luftojmë këtë betejë për qytetarët shqiptarë, për çdo qytetar, jo vetëm për demokratët, por për çdo shqiptar.

Në funksion të rakordimit opozitar, kjo Kryesi, Këshilli Kombëtar i PD, të gjitha strukturat e PD, do të angazhohen në një dialog të drejtpërdrejtë jo vetëm me votuesit dhe simpatizantët e PD, opozitarë, por me gjithë qytetarët shqiptarë sepse është detyrë e çdo qytetari shqiptar të luftojë së bashku me ne, e të sigurojmë lirinë e votës, votën e lirë. Pa të cilën nuk mund të ketë as qeveri të përgjegjshme, as ekonomi të shëndoshë, as të neserme të sigurtë për ta dhe për fëmijët e tyre.

Një çështje tjetër e rëndësishme të cilën pritet diskutimi dhe vendimmarrja e Kryesisë sot, ka të bëjë me procesin e mbledhjes së propozimeve për kandidatët për deputetë të PD, për zgjedhjet e ardhshme parlamentare.

Pas konsultimeve me të gjitha grupet e punës që janë ngritur për këtë qëllim, propozimi im siç edhe e kam shpallur publikisht është për një konsultim të hapur, jo vetëm me strukturat e PD, seksionet, grupseksionet, degët, por për një konsultim të hapur me qytetarët, me mbështetësit tanë, me simpatizantët tanë apo edhe me të gjithë qytetarët, po kështu me shoqërinë civile dhe botën akademike dhe studentore, dhe botën e sipërmarrjes së ndershme, me të përndjekurit politikë, me të rinjtë, me pronarët, me moshën e tretë, me pensionistët, me fermerët, me organizatat jofitimprurëse, të vërtetat dhe jo ato falsot që i bëjnë fresk qeverisë nga mëngjesi deri në darkë.

Pra, me të gjithë Shqipërinë, për një proçes sa më të hapur të evidentimit të njerëzve që gëzojnë respektin dhe reputacionin e panjollosur në komunitet, kapacitetet morale dhe profesionale për të përfaqësuar vlerat dhe idealet e larta me të cilat ka lindur kjo parti dhe për të cilat qëndron kjo parti.

Që proçesi të jetë sa më i hapur, përveç rrugës statutore që do të ndiqet sipas përcaktimit në statut, dhe kjo do të monitorohet – jo për fasadë se partinë e fasadës e kemi në anën tjetër të bulevardit – por që në të vërtetë çdokujt t’i jepet mundësia për të propozuar, për të dhënë mendimin e tij për kandidatët e mundshëm të Partisë Demokratike, kjo mundësi do të ekzistojë edhe drejtpërdrejt për anëtarësinë e Partisë Demokratike dhe për çdo qytetar përmes një aplikacioni të posaçëm në faqen e Partisë Demokratike online, tek demokratet.al.

Ky proçes duhet të përfundojë, përsa i përket strukturës, brenda datës 5 Shkurt.

Kandidatët e Partisë Demokratike, lista e kandidatëve të cilën unë do të kem nderin t’i kryesoj në këtë betejë për një Shqipëri ndryshe dhe për një ndryshim në Shqipëri, do t’i nënshtrohet një proçesi vetingu, kontrolli të imtësishëm, sipas standardeve më strikte dhe praktikave më të avancuara amerikane, me ekspertë të cilët kanë qenë në bashkëpunim të ngushtë me mua dhe përmes këtij bashkëpunimi, dhe në bashkëpunim me Komisionin e Kontrollit të Integritetit dhe Etikës drejtuar nga Dr.Halim Kosova, do të bëjmë të mundur që çdo demokrate dhe demokrat, anëtar kartëmbajtës i Partisë Demokratike, të flejë i qetë, dhe të jetë i qetë dhe ballëlart, se kandidatët e Partisë Demokratike, janë të pastër si kristali. Një proçes vetingu i hollësishëm, që shkon përtej kërkesave të vetingut për drejtësinë, përtej kërkesave të ligjit për dekriminalizimin, që përfshin natyrisht edhe vetingun e të kaluarës në diktaturë, dhe që siguron një listë dinjitoze, përfaqësuese të aspiratave më të mira të të rinjve shqiptarë, të nënave dhe baballarëve, të gjysheve dhe gjyshërve dhe të brezave që vijnë.

Të mos bëjmë asnjë gabim, zonja dhe zotërinj të kryesisë. Kjo është një pikë kthese fondamentale, jo thjeshtë me potencialin, por me detyrën për të eliminuar plotësisht çdo njollë kriminaliteti, korrupsioni, apo bashkëpunimi me organet e diktaturës nga lista e ardhshme e Partisë Demokratike të Shqipërisë.

Asnjë surprizë, përveç  vullnetit të pastër të qytetarëve, të anëtarëve, simpantizantëve dhe strukturave të Partisë Demokratike, kapaciteteve më të mira profesionale, vlerave më të larta njerëzore, morale, shoqërore dhe patriotizmit.

Këtë pres, këtë kërkoj, dhe këtë do të arrijmë, përmes një proçesi të tillë, të vetingut të plotë të listës së ardhshme të kandidatëve të Partisë Demokratike.

Nesër nisem për në Shtetet e Bashkuara të Amerikës me ftesë zyrtare nga Komiteti Kombëtar Republikan dhe grupi i mazhorancës në Kongres në Senatin Amerikan, për inagurimin e Presidentit Donald Trump.

Dua t’iu informoj se gjatë vizitës në Uashington do të kem takime zyrtare me anëtarë të Kongresit dhe të Senatit, me drejtues të lartë të institucioneve, politikbërësve të politikës së jashtme, sigurisë, institucioneve dhe insituteve të Partisë Republikane të cilët na asistojnë si në procesin e zgjedhjeve të lira dhe të ndershme ashtu edhe për hartimin e programit të Partisë Demokratike në disa fusha të veçanta. Do të marr pjesë i ftuar zyrtarisht edhe në disa prej ceremonive dhe pritjeve zyrtare festive për inaugurimin e Presidentit Trump.

Në kthim, do të kem takime në Bruksel dhe në Berlin në lidhje me mbështetjen që Partia Popullore Europiane dhe Partia Kristiandemorkatike Gjermane të Unionit Kristiandemokrat Gjerman po i japin Partisë Demokratike për programin e saj elektoral. Këtu në këtë sallë, para 5 javësh këshilltarët ekonomikë të Angela Merkelit, kanë bërë vetingun e programit ekonomik të Partisë Demokratike, proces i cili ka certifikuar dhe validuar propozimet tona për nxjerrjen e vendit nga kriza e thellë ekonomike ku e ka zhytur papërgjegjshmëria dhe korrupsioni i Edi Ramës, nxjerren e Shqipërisë nga recensioni dhe kriza Rama, që njihet sot në Europë, dhe po kështu pas takimeve për të rakorduar për çështje të programit dhe zgjedhjeve të lira dhe të ndershme do të kemi në mesin tonë të dërguarit e CDU-së, të dërguarit e Partisë Popullore Europiane, të Institutit Republikan Ndërkombëtar dhe partive të tjera simotra për të ndihmuar Partinë Demokratike si në rrafshin e logjistikës, të përgatitjeve për fushatë, të programit dhe në trajnim të drejtpërdrejtë të njerëzve. Do ti diskutojmë në detaje, sepse pavarësisht se janë interesante për anëtarësinë e Partisë Demokratike do të jenë të njohura publikisht.

Fushata për zgjedhje të lira dhe të ndershme dhe nisja e fushatës së Partisë Demokratike për evidentimin e kandidaturave, vetingun e kandidaturave, përfundimin e pjesës logjistike që ka të bëjë me kontaktin dhe regjistrin e votuesve për të cilin janë nxjerrë vendimet nga mbledhja e fundit e kryesisë, janë ndër detyrat kryesore me të cilat Partia Demokratike, anëtarësia jonë, simpatizantët tanë, mbështetësit tanë do të angazhohen fuqimisht në ditët dhe javët në vijim.

Një gjë është e sigurtë. Ky dimër i ashpër fizik i cili edhe në këto momente shkakton vështirësi për qytetarët, padyshim do apo nuk do Edi Rama, do ti lërë vendin pranverës. Ky dimër 3 vjeçar politik do ti lërë vendin një pranvere politike ndryshimesh të mëdha për Shqipërinë dhe shqiptarët. Ne së bashku do ti prijmë këtij ndryshimi.

Fjala e kryetarit të PD, Lulzim basha në mbledhjen e kryesisë, 16 Janart 2017

Forumi Rinor i Partisë Demokratike përkujtoi sot lindjen e themeluesit të shtetit shqiptar si edhe firmëtarin e parë të deklaratës së Pavarësisë së Shqipërisë, Ismail Bej Vlora.

Kryetari i FRPD-së, Belind Këlliçi, së bashku me të rinj të tjerë demokratë, u përulën pranë shtatores së rilindasit i cili ia kushtoi jetën e tij shtetit shqiptar.

“Sot është një ditë kujtimi e vlerësimi për Ismail Qemalin, por edhe reflektimi për situatën ku gjendemi”, tha Këlliçi duke shtuar se nuk ka mjerim më të madh, nuk ka përdhosje më të madhe që i bëhet dijes dhe mençurisë. Të shkosh nga Ismail Qemali tek Edi Rama, nga Abdi Toptani tek Arben Ahmetaj, nga Luigj Gurakuqi tek Lindita Nikolla, kjo është Rilindja e Ramës”, tha Kelliçi.

“Vlerat janë zëvendësuar me antivlerat. Sot kriminelët dhe hajdutët drejtojnë vendin. Të aftët, të arsimuarit, të diturit, kanë marrë rrugët e emigrimit. 105 vite pas shpalljes së pavarësisë, vendi drejtohet nga injorantë, të korruptuar, e trafikantë”.

Kelliçi theksoi se sot është dita e rinisë shqiptare që me votën e saj të rikthejë shpresën dhe besimin tek vlerat, tek dija, tek puna e ndershme, si mënyra e vetme që Shqipëria të ecë përpara. Sot është dita që të garantojmë votën e lirë, ta mbrojmë nga armiqtë e saj në pushtet dhe me votë të bëjmë ndryshimin që çdo qytetar po pret më 18 qershor.

Nënshkruhet memorandumi. Firmosin dhe Dule e Spahiu. Pritet nënshkrimi dhe nga parti jashtë koalicionit opozitar 

Opozita konsolidoi sot qendrimin e saj për zgjedhjet. Me anë të një memorandumi të nënshkruar nga partitë e koalicionit opozitar, u theksua se votimi dhe numërimi elektronik është një kusht thelbësor për garantimin e votës së lirë e të ndershme.

Memorandumi pritet të nënshkruhet edhe nga parti të tjera jashtë koalicionit opozitar.

Bashkëngjitur memorandumi i nënshkruar sot.

Memorandum per zgjedhjet i partive parlamentare 12.01.2017

Sot në 25 vjetorin e FRESSH, Edi Rama mbajti një fjalim të gjatë, të gjatë, të gjatë dhe tha atë që e ka mjeshtrinë e tij më të madhe, mashtrim, mashtrim, mashtrim.

Flet për votën, njeriu që shkatërroi procesin politik. Njeriu që futi krimin për të shantazhuar për votën, përdori  hashashin për të marrë votën, lekët e krimit dhe korrupsionit për të blerë votën. Njeriu i cili refuzoi procesin politik dhe zgjedhjet edhe brenda vetë PS duke u rizgjedhur në krye të partisë me referendum dhe 95.5% të votave.

Sot nuk tha asnjë fjalë për 300 mijë vendet e punës, sepse dhe në atë sallë 90% e atyre në moshë pune janë të papunë. Se jo vetem s’ka hapur asnjë vend pune, por e ka shtuar papunësinë varfërinë e mjerimin.

Sot nuk u tha asnjë fjalë të rinjve për arsimin e lartë sepse është përgjegjës për kaosin e shkaktuar. Mijëra maturantë humbën të drejtën e zgjedhjes së degës në bazë të meritë preferencës. Mijëra maturante u shtynë drejt universiteteve private duke rritur dëshpërimin tek prindërit për të siguruar paratë e mjaftueshme për arsimimin e fëmijeve. Qindra studente u detyruan të ndërpresin studimet për shkak të tarifave të rritura në universitete.

Nuk pati kurajon sot ti thotë asnjë fjalë nënës së Ardit Gjoklajt, të cilës i hapi një plagë në zemër me vrasjen makaber të djalit të saj. Edhe Arditi kishte endrra dhe dëshira. Të shkonte në shkollë si gjithë bashkëmoshatarët. Por vrasësit që ti mbron sot, Erion Veliaj e kryetari i PS së Peqinit ia prenë në mes.

Edi Rama doli sot para të rinjve krenar për vlerat që promovon, Elvis Roshin i dënuar për përdhunim në grup, Arben Ndokën tutor prostitutash, Mark Frrokun tutor dhe vrasës. Artur Bushin trafikant droge e dhjetra të tjerë me meritë se kanë kryer krime, merren me trafik droge ose prostitucioni.

Ky është modeli i Ramës në qeverisje, por ky nuk është dhe nuk mund të jetë kurrë modeli i të rinjve që e duan Shqipërinë si e gjithë Europa.

Reagim i kreut të FRPD, Belind Këlliçi, 15 Janar 2017

Në të vërtetë, skandali i pasurisë 1 miliardë e 100 milionë lekë të deputetit Alfred Pezës, tregon pellgun e madh të korrupsionit të kësaj maxhorance.

Miliardat e Pezës janë vetëm pjesa e dukshme e miliardave që kanë përfituar deputetë, ministra e njerëz të afërt me Edi Ramës qysh ditën e parë që erdhën në pushtet.

Kur Alfred Peza ka arritur në pak vite të shumëfishojë pasurinë e tij, përfytyroni sa miliarda ka bërë Ilir Beqaj, Damian Gjinknuri, Saimir Tahiri, Arben Ahmetaj, Erjon Veliaj, e më tej, Edi Rama vetë.

Peza nuk ka firmosur vetë tendera e koncesione dhe ka bërë 1 miliardë e 100 milionë.

Po beqaj e koncesioneve, po Tahiri i mijëra parcelave me drogë, po Ahmetaj i carterave, tatimeve e doganave, po gjiknuri i energjisë e aferës CEZ, po Veliaj i pallateve e industrisë së mbetjeve.

Po Edi Rama, tek i cili dorëzohet haraci më i madh?

Miliardi i Pezës meriton hetim të shpejtë e serioz, po përvec kësaj është dëshmia më e pastër se sa dhjetra miliardë kanë vjedhur Edi Rama e të tijtë në këto 3 vite e gjysëm.

Ndërkohë që ata bëjnë miliardat, populli zhytet në varfërinë më të skajshme dhe njerëzit braktisin vendin cdo ditë.

Këta hajdutë duhen ndalur. Shqiptarët meritojnë një qeveri për shqiptarët, një qeveri për njerëzit, që ta kontrollojnë e ta kenë në dorën e tyre.

Deklarata per mediat e Ina Zhupes, 15 Janar 2017

PD organizon një dëgjesë publike me ekspertë e akademikë; dënohet mungesa e transparencës dhe trajtimi i qytetit si plaçkë

Këshilltarët e djathtë të Bashkisë së Tiranës, drejtues të departamenteve të Partisë Demokratike, profesorë, intelektualë, ekspertë dhe qytetarë të Tiranës diskutuan në lidhje me abuzimet dhe problemet e thella që sjell plani i ri urbanistik i kryeqytetit.

Në diskutimin e hapur u analizua problematika e një plani i cili nuk sjell zhvillim ekonomik për qytetarët, shton trafikun duke mos eleminuar gazin karbonik, mbjelljen e pemëve të cilat janë të papërshtatshme për dekorim, pasi rrezikojnë jetën e banorëve nga alergjitë, filozofinë e vazhdimit të ndërtimeve dhe humbjen e metrave katrorë të gjelbërimit, shtimin e betonizimit si edhe moskonsultimin dhe lënien në errësirë të qytetarëve shqiptarë për t’u njohur me planin e ri ubanistik të miratuar me urgjencë në natën e ndërrimit të viteve ku qytetarët e kishin të pamundur të informoheshin.

Artur Sulçe, ekspert për sigurinë rrugore, theksoi se shoqata që ai përfaqëson ka reaguar e para kur Edi Rama mbolli pemët në rrugët interurbane kryesore nga mbikalimi i Kamzës deri në mbikalimin e Kasharit. “I thamë që ke shkelur ligjin. Pas një viti ai e ndryshoi këtë ligj për të përligjur atë ndërtim të paligjshëm që bëri. Dhe asnjë nuk u çua për ta goditur në aspektin juridik. Po rritet dita ditës numri i përdoruesve të lëndëve psikotrope të cilat nga mediat e shkruara dhe vizive ka dalë që janë mbi 50 mijë përdorues. Këta janë nga 18 deri në 60 vjeç, të cilët përdorin mjetet. Nga 500 mijë mjete që kemi  1/10 janë këta njerëz që i japin makinave. Imagjinoni probabilitin e rriskut të një aksidenti rrugor. Ka shumë probleme që ne i kemi bërë publike”, tha ai.

Ndërkohë Burhan Sakiqi, ish-kryetar i Këshillit Bashkiak, inxhinier ndërtimi, tha se ka mbetur i pazgjidhur qarkullimi i automjeteve në shesh. “Një shtet që është shtet nuk shkel planin rregullues të tij sidomos sistemi rrugor. “Unazë të vogël nuk kemi. Unazë të dytë mesatare, ajo që vjen nga Rruga Bardhyl deri tek Ura e Tabakëve dhe kalon përbri Ambasadës Amerikane. Aty është ngritur një ndërtesë tetë katëshe. Pra është shkelur në mënyrë flagrante plani rregullues i Tiranës. Tirana ka sistem unazor, dhe nuk e kuptoj se si prishen unazat. I pyes studentët e arkitekturës se a të pëlqen ky bllok betoni, ky ndërtim në formë piramide, a të pëlqen që u prish kafe Gjirokastra? A të pëlqen që po bëhet ky parking këtu mes qytetit? Unë nuk kam parë në një vend të botës që të ketë parkim në mes të qytetit, parkimet bëhen jashtë qytetit që të mos prishë mjedisin. Thonë se kam shumë të drejtë”.

Andi Tepelena, aktivist i shoqërisë civile theksoi: “Tirana po kthehet në një qytet skizofrenik ku duke filluar që nga shtëpitë tona nuk po e kryejnë rolin e tyre pasi jemi të gjithë të stresuar që kur zbresim poshtë pallatit. Rrëmuja gjeometrike që karakterizon Tiranën është pa dyshim shumë e qartë. Nëse e shihni Tiranën nga Dajti, e vetmja hapësirë, zonë që ka hapësirë, janë varrezat e qytetit. Është një rrëmujë, nuk kuptohet, a është qytet oriental, Amerikë Latine, Indi apo Azi. Është një qytet pa një lloj identiteti vizual. Tirana po humbet humanizmin. Është një qytet që po jeton nervozizëm të tejskajshëm. Në Tiranë duhet të shtohen hapësirat e gjelbërta dhe nuk ka nevojë më për ndërtime”.

Gjok Vuksani, profesor i Arkitekturës së Peisazhit në Universitetin Bujqësor të Tiranës, vuri në dukje se përfundimisht kjo qeveri dhe bashkia janë armiq të gjelbërimit.

“Qoftë në parkun e qytetit, qoftë në lulishten në qendër të Tiranës, qoftë në të gjitha lulishtet e Shqipërisë. Kjo është diçka e deklaruar se janë armiq të gjelbërimit. Ne duhet ta mbrojmë. Që në kohën e Ramës është mbjellur rrapi. Mund t’ju duket jo shumë e rëndësishme por arsyeja është e thjeshtë. Rrapi është një bimë që rritet shpejt dhe është i lirë dhe po mbillet në të gjitha rrugët që po ndërtohen në Tiranë. Kam dëgjuar se edhe në Vlorë po hiqen palmat dhe po mbillet rrap. Është një bimë e papërshtatshme për rrugët, j’ua them me kompetencë. Qoftë përsa i përket madhësisë së saj si edhe polenit që çliron gjatë kohës së lulëzimit. Po mbillen bimë të papërshtatshme që nuk ndihmojnë shëndetin e njeriut. Gurët dhe bimët e marra nga trevat është manipulim. Nuk mund të marrësh pishat e Tropojës e ti mbjellësh në Tiranë pasi nuk ka kushtet e përshtatshme për zhvillim. Është një mashtrim i pasktrupullt”, tha ai.

Ledian Bregasi, arkitekt, përfaqësues i Unionit të Arkitektëve dhe Urbanistëve, theksoi se më datë 31 dhjetor është dalë me deklaratën e fundit për shtyp mbi planin e përgjithshëm vendor që u miratua në Këshillin Bashkiak ku ngritëm shqetësime në lidhje me infrastrukturën e cila nuk do të ketë atë fuqi sa pretendohet të jetë zhvillimi i Tiranës si në banor ashtu edhe në shkëmbime ekonomike. “Idea e pesë unazave thellon edhe më shumë problemin e trafikut që ndodh në Tiranë. Idea e pesë unazave ishte në planin e viteve ’39, ’43 dhe në planin e vitit 1989. Plane që në atë kohë makina ligjërisht ishte e pamundur. Me të njëjtin koncept nuk mund të vazhdohet edhe tani. Nuk parashikohet asnjë skemë alternative për të shmangur trafikun. Parku i Liqenit është kthyer në simbol të të gjithë betejës së zhvillimit të paqëndrueshëm”.

Artan Manushaqja, qytetar i Tiranës, tha: Unë kam lexuar planin e përgjitshëm të Tiranës dhe që në pikën 1, kundërshtoj ku thuhet: Një metropol intensiv në rritje brenda kufiqjve duke rivendosur hapësirat e saj të pashfrytëzuara duke shfrytëzuar ndërtimet e vjetra. Që këtu jepet logjika e ndërtimeve brenda qytetit. Që në nisje plani i përgjithshëm i Tiranës reflekton filozofi betonizimi.

Kujtim  Gjuzi, qytetar i Tiranës:  Si  qytetarë të hershëm të Tiranës, nuk e kemi marrë atë me qera sikurse duket se e ka marrë kryetari i bashkisë. Ne duhet ta bllokojmë këtë nisëm dhe ftoj të gjithë dashamirësit e këtij metropoli, ta mbrojmë qytetin me forcë. Duhet të rezistojmë me forcë për sheshin. Këta nuk e kanë marrë qytetin me qera, por ia kanë dhënë.

Në diskutimin e tij këshilltari bashkiak Besnik Aliaj theksoi se: “Janë atakuar disa ligje si ligji për planifikimin e territorit, ligji për transparencë dhe informimin e publikut, ligjet për çështjet mjedisore dhe ligji për trashëgiminë. Po flasim për aktivitete dhe ndërmarrje që atakojnë pjesën qëndrore që është në një regjim mbrotje të trashgimisë historike të qytetit. Përse bëhet kjo me kaq nxitim dhe me kaq shqetësim?! Nuk ka nevojë ta them pasi ajo dihet. Unë e kam shprehur edhe publikisht. Unë dua të nënvizoj faktin që vetëm me këtë argument që u ngrit, funksionimi i Këshillit Bashkiak ka rënë. Nuk egziston më ky këshill për mendimin tim. nuk ka më një shtrat dhe kolona ligjore sepse nuk janë kushtet që të funksionojë në mënyrë demokratike, nuk është informuar, nuk janë mbledhur as komisionet përkatëse. Na është dhënë informacioni 5 ditë para. Është bërë takimi 3 ditë para dhe pastaj është çuar në mbledhjen e këshillit. Nuk ka ndodhur asnjëherë në historinë e qytetit kjo. Unë jam në të tretin mandat dhe kemi pasur në raste të tjera debate por në fund të fundit ka pasur diskutime, kemi pasur diferenca mendimesh, por janë bërë takime publike, në media, etj por ky ka qënë një rast eskprem dhe i mbajtjes së fshehtë. Kjo është shumë e rëndë. Tani për mendimin tim gjithaçka ka ikur nga institucionet e zgjedhura dhe demokratike dhe i takon sovranit të vendosë. Opozita duhet të bëjë gjithçka të fitojë besueshmërinë që kjo nuk është një betejë e radhës politike por është një përpjekje serioze në kuadër të një krize serioze të demorkacisë që ka vendi.

Drejtuesi i departamentit të Mjedisit Jamarbër Malltezi Malltezi tha se plani i ri që i imponohet Tiranës e kthen  si të vetmin kryeqytet në botë që bulevardi  përfundon në qytet tjetër. “Duhet prishur një park urban për të ndërtuar një tepsi betoni, ky duket të jetë  fokusi i kësaj çështjeje. Po të bëjmë një krahasim mes planit që u bë në 2013 dhe planit që kaloi në mënyrë shumë të rrufeshme dhe të fshehtë pa u konsultuar në fund të dhjetorit 2016. Si bashkëautor i vlerësimit  strategjik mjedisor për planin 2013 dua të bëj paralelizma midis dy planeve. Plani 2013 një proçes i gjerë konsultimi pjesëmarrjeje, të dokumentuara me dhjetëra e dhjetëra takime të grupeve strategjike me qytetarë, intelektualë, artistë dhe me ekspertët që shihnin me vizion dhe logjikë. Dhjetëra mbledhje të hapura të paktën pa logo partish, mbledhje të hapura për çdo qytetar pa presione,  plani i 2013-ës i vuri kufizime ndërtimeve, u tha stop nuk mund të ndërtosh ku të teket. Sot me planin e ri nuk kemi asnjë kufizim për ndalimin e ndërtimeve në zonat urbane, ka vetëm tek zonat kombëtare. Kjo bëhet sepse brenda një viti jemi dëshmitarë se si kryeministri Rama po ndërton më mënyrë sistematike në parqe e lulishte për interesa të klientëve. Kemi prerjen e dhjetëra e dhjetëra pemëve, betonizimin e parkut kinse për kënd lojrash. Kemi prishjen e pyllit urban tek sheshi  Skënderbej. Kemi betonizimin e parkut Rinia me një vendim të fshehtë, kemi ndërtime brenda parkut të Tiranës në dy anët e Korpusit të Universitetit Politeknik. Kemi blerjen e mediave nga oligarkët që bëjnë ndërtime edhe brenda lulishteve. Plani i ri rrezikon të betonizojë të gjithë parqet dhe lulishtet brenda qytetit. Kjo ndërhyrje e shtrenjtë prej afro 17 milion dollarë në sheshin Skënderbej po kryhet për interesa të vogla, bëhet pa asnjë studim paraprak hidrogjeologjik, modelim ujrash sipërfaqësore dhe nëtokësore, modelim gazrash dhe ky plan po kryhet pa asnjë diskutim të hapur publik  dhe me ekspertë.

Zonat e varfra të Pukës në mjerim të plotë nga izolimi prej motit. Salianji takohet me banorët që denoncojnë braktisjen totale nga qeveria 

Puka dhe fshatrat e saj janë nga zonat më të varfëra e të papuna të vendit, por njëkohësisht me të goditurat nga moti i acartë i këtyre ditëve. Shumë familje në zona të thella, dhe njësi të tëra kanë mbetur të izoluara, pa drita, pa ngrohje, në krizë edhe për ushqime.

Ndërhyrjet e qeverisë kanë munguar totalisht, dhe prezenca e tyre ka qënë vetëm për propagandë. Njerëzit në Pukë e dinë se edhe ato pak ndihma që janë dhënë, janë dhënë për të afërmit e deputetëve e pushtetarëve.

Ervin Salianji dhe kreu i degës së PD, Pukë, ishin pranë banorëve.

“Kanë ditë që ngrihen shqetësimet e banorëve të Pukës dhe të rrethinave, për motin e acartë dhe bllokimin që i është bërë pothuajse të gjithë zonës së rrethit të Pukës. Siç duket qartësisht nga pamjet, këtu jemi pothuajse 30 metra nga Bashkia e Pukës dhe trashësia e borës është më shumë se një metër.

Janë zona dhe lagje të qytetit të Pukës, të gjitha të bllokuara, të gjitha të pahapura, të gjitha të pastabilizuara apo të pandihmuara nga ana e qeverisë apo nga ana e Bashkisë së Pukës.

Ministri i Brendshëm i cili ishte dje në zonës e Pukës, ka bërë vetëm shfaqje dhe propagandë, ka vazhduar me intensitet propagandën po njësoj sa ç’është intensiteti i reshjeve por asnjë ndihmë nuk ka shkuar për banorët e qytetit të Pukës as në infrastrukturë, as në ushqime, as në ushqime për bagëtitë.

Ndihmat e shpërndara kanë qenë vetëm 200 pako të dhëna kushërinjve të Mark Frrokut, dhe kushërinjve të Gjonit të Bashkisë i cili po ashtu është një i emëruar i Mark Frrokut. Ndihma të dhëna nga ministri i Brendshëm dje, ishin në fshatin e Pjerin Ndreut dhe miqve e të afërmve të tij në fshatin Jakaj”, u shpreh Salianji.

“Me këtë rast ngrice, realisht është emergjencë. Fshatrat e të gjithë rrethit të Pukës, pothuajse janë totalisht të gjitha të izoluara, duke filluar nga qafa e Mugut, njesia administrative e Çelës dhe ka telefonata prej banorëve që nuk u shkon askush në ndihmë. Edhe pse telefonojnë nuk u përgjigjet asnjë njeri”, thotë kreu i PD, Pukë, Prel Gjoni.

Në Luf të Pukës, gjendja është edhe më e rëndë.

“Këtu 70% e familjeve trajtohen me ndihmë ekonomike. Marrin më pak se 10 mijë lek të vjetra për njeri. Ujë të rrjedhshëm nuk kemi. Nuk na ka ardhur asnjë lloj ushqimi, asnjë lloj ndihme. Nuk është marrë askush me këtë punë”, ankohet një banor.

“Pushteti qëndror dhe ai vendor këtu nuk kanë ardhur. Ministrin nuk e kemi pare”, denoncon një familjar.

Në Gjegjan kriza thellohet.

“Kemi vetëm një elektriçist, është faturues dhe elektriçist. Për të marrë një asistencë 20-30 mijë lek duhen 40 km për të shkuar në Pukë në bankë për të marrë asistencën”, pohon një banor i zonës.

“Të gjitha shkollat e njësive administrative të rrethit Pukë, janë pa ngrohje zjarri, janë të gjitha me ngrohje me rezistencë”, thotë një banor.

Peka: Z.Basha, përshëndetje. Të falenderoj që je sërish në “Fakt”. Po e nis me një lajm i cili prej dy vitesh është lajmi kryesor i opinioneve. Presidenti Trump dje akuzonte median kryesore amerikane për lajme të manipuluara dhe dje në Tiranë ka ndodhur diçka e papritur, njëkohësisht, paralelisht, tre media janë sulmuar në mënyrë të habitshme. Dy drejtorë mediash, që sipas tyre nuk kanë pranuar të ndryshojnë linjën editoriale dhe të mos i përshtaten linjës editoriale të pronarëve të tyre, dhe një media tjetër televizive është sulmuar nga AMA. Sot, mund të flasim pa frikë se të gjitha mediat vizive në Shqipëri tashmë janë të njëanshme. Z.Basha, a jeni i kompleksuar për të bërë atë që bëri presidenti i zgjedhur Trump i cili në mënyrë të habitshme fitoi kundra të gjithëve duke i konsideruar mediat amerikane si palë të establishmentit dhe duke zgjedhur si palë të tij, qytetarët amerikanë. Sot në këto momente që po flasim, absolutisht nuk ka hapësirë vizive në median shqiptare për opozitën. Ndërsa, kryetari i opozitës, në këtë moment që po flasim, të paktën në gjykimin tim, nuk ka guximin të bëjë atë që bëri presidenti i zgjedhur në Shtetet e Bashkuara të Amerikës.

Basha: E para, nuk ka paralele midis Amerikës dhe Shqipërisë sa i përket gjendjes së medias. Në Shtetet e Bashkuara të Amerikës me të vërtetë që një palë mediash ka treguar njëanshmëri dhe presidenti Trump e ka konsideruar këtë njëanshmëri të skajshme, por të mos harrojmë që SHBA ka një numër jashtëzakonisht të madh mediash, dhe kontrolli i një pale, në këtë rast, i qeverisë mbi mediat është i pamundur. Unë do të shkurajoja çdo krahasim midis Amerikës dhe Shqipërisë kur vjen fjala tek liria e mediave dhe tek mediat e lira. Më mirë se unë, sot e kanë thënë gazetarët në hapësirën e lirë të rrjeteve sociale e kanë konsideruar, si ishullin e fundit të lirisë mediatike, rastin e ABC News, i cili është pushtuar sot, ka rënë sot në duart e qeverisë. Eshtë fakt që sot të gjitha mediat tradicionale, televizionet dhe gazetat, janë nën pushtetin e Edi Ramës. Nën pushtetin dhe kontrollin e qeverisë, proces që ka nisur që në ditën kur Edi Rama është bërë kryeministër. Vetë kryeministri ka adoptuar një retorikë që i quan “media kazani”, ato media dhe gazetarë që janë jashtë kontrollit të tij. Eshtë një gjuhë neveritëse, e padenjë për kryeministrin e vendit. Kë quan kazan? A nuk është Edi Rama që ka llokoçitur dhe futur duart prej 15 vitesh në të gjitha mediat kryesore të vendit? I ka manipuluar, i ka financuar, i ka kërcënuar, i ka bërë palë dhe ky është problemi që kanë sot shqiptarët. Nuk është problem vetëm i gazetarëve, është në radhë të parë problem i demokracisë, i shtetit shqiptar. Kur nuk ka media të pavarura, nuk ka më demokraci.

Peka: Përse jeni i kompleksuar dhe nuk përdorni të njëjtën retorikë apo ashpërsi ndaj mediave, për të cilat nuk ekziston më opozita?

Basha: Nuk jam i kompeksuar, e ke gabim. Kam reaguar sot, kam reaguar sa herë është cënuar media, jo vetëm me denoncime por edhe me akte konkrete, në mbështetje të gazetarëve, me kundërshtime të forta për këtë politikë e cila bashkon pushtetin, interesat e biznesit dhe interesat e medias në një pikë të vetme. Pavarësisht se konkurojnë apo nuk konkurojnë dot, pra, është apo nuk është konkurues, Edi Rama, partia e tij, oferta e tij për shqiptarët, është apo nuk është konkurues filan biznesmen, ofrojnë diçka të mirë për shqiptarët apo jo, këta bashkohen në një pikë, edhe po nuk konkuruan dot, duke mbështetur njëri-tjetrin, partia që preferojnë rri në pushtet, biznesi kontrollon lekët e shqiptarëve dhe për këtë na duhet media. Kjo është skema. Pra t’ia themi troç shqiptarëve. Kjo është punë lekësh. Nëse qyetari i zakonshëm, apo tregtari e biznesmeni thonë sot se nuk kanë lekë, lekët i ka korporuar ky trekëndësh. Interesa biznesi, politikë, media. Dhe për këtë arsye, një nga një, mediat janë kapur dhe janë vënë në shërbim të pushtetit. Pushteti çfarë ofron? Ofron që bizneset pa konkurencë të kapin tendera, konçesione, kontrata të majme. Kështu janë kapur mediat. Si kapen mediat? Si nënshtrohen mediat? Përmes tenderave, konçesioneve, lejeve të ndërtimit. Ky është një zanat që e ka shpikur Edi Rama në fillimet e tij si kryetar i Bashkisë dhe sot si Kryeministër, me rënien e ishullit të fundit, t’i referohemi edhe një herë gazetarëve, ABC News e cila kishte mbetur një dritare e hapur për opozitën, qeveria ka vënë nën kontroll të plotë të gjitha mediat tradicionale shqiptare. Të gjitha televizionet dhe gazetat e vendit. Nuk kam pasur asnjëherë kompleks ta konstatoj këtë. Ka një lajm këtu, që nuk është lajm i keq. Si rregull, kjo është faza e fundit e një pushteti, kur përqendrohet pushteti në këtë nivel që kap të gjitha mediat. Sot pamë edhe shqetësimin e Zërit të Amerikës për largimin e dy drejtuesve të mediave, të Armand Shkullakut dhe Alfred Lelës, por jo thjesht për dy individë, por atë që përfaqëson kjo për median shqiptare. Nuk ka më asnjë media të pavarur jashtë kontrollit qeveritar, në kuptimin tradicional të fjalës, televizion dhe gazeta, kjo tregon që demokracia ka arritur në një pikë kritike. Nuk është e rastësishme që ndodh tani, ndodh 5 muaj para zgjedhjeve, gjithçka është në funksion të kapjes dhe të prishjes së zgjedhjeve të ardhshme, në mënyrë që në zgjedhjet e ardhshme të mos vendosin qytetarët, në bazë të fakteve, në bazë të të vërtetave, në bazë të platformave, por gjithçka të jetë në duart e kësaj kaste, politikanë, të korruptuar, jokonkurues, ku nuk kanë çfarë ti ofrojnë qytetarëve, biznesmenë që nuk prodhojnë gjë, jetojnë me paratë e shqiptarëve, me tendera, me konçesione, me leje ndërtimi dhe një grusht mediash që janë në shërbim të këtij realiteti. Ky është problemi sot në Shqipëri dhe në të njëjtën kohë, kjo është grahma e fundit e një sistemi që nuk është më demokratik. Nuk ka lekë për investime publike, nuk kanë lekë për tu përballur me emergjencat. Nuk kanë lekë për shëndetësinë, nuk kanë lekë për pensionistët. Nuk kanë lekë për shërbimet minimale që shteti duhet të ofrojë, sepse lekët janë akaparuar nga trekëndëshi Pushtet- Interesa Biznesi dhe Media. Prandaj mediat janë kapur sepse i shërbejnë kësaj skeme. Ta them thjeshtë me tre fjalë: është punë lekësh.

Peka: Z.Basha a keni menduar se me këtë situatë mediash, si do të bëni fushatë?

Basha: Nuk është çështje fushate, është çështje e demokracisë. Sigurisht që Edi Rama e shikon me një pazar shumë të ngushtë punën. Atij i duhet një fushatë ku nuk ka zëra të pavarur, nuk ka gazetari të pavarur, nuk ka televizione dhe gazeta të cilat të pasqyrojnë diçka jashtë regjisë së tij qendrore. Por në thelb, kjo nuk është çështje vetëm e fushatës. Natyrisht që ai llogarit me fushatën. Pse?! Sepse me mediat të pavarura, me zgjedhje të lira dhe të ndershme nuk i dalin llogaritë për atë që do, vazhdimin me çdo kusht të mandatit si kryeministër në krye të një vendi që sot në të gjitha planet është më keq sesa ishte tre vite më parë; në planin ekonomik, në planin e papunësisë kryesisht, dhe këto janë dy plagët më të mëdha, dy mosarritjet më të mëdha të kësaj qeverie. Ekonomia është në ditën e saj më të zezë. Kapitali, leku është zhdukur nga tregu, nga xhepat e shqiptarëve, dhe kjo reflektohet në mirëqenien e tyre, në tavolinat e tyre, në fuqinë e tyre blerëse, në aftësinë e tyre për të kursyer, për të blerë komoditetet bazë të jetës, që nga ushqimi për një numër shumë të madh familjesh e deri tek shlyerja e kredive për apartamentet apo automjetet për shtresat e mesme, e deri tek bllokimi i qindra, mijëra bizneseve të cilat janë një spirale të pafundme falimentimesh.

E di ti, që, çdo muaj falimentojnë me qindra biznese, jo sepse biznesi i tyre nuk është konkurues dhe nuk ecën, por sepse klima ekonomike që ka krijuar kjo qeveri me taksa të larta, me shantazhin tatimor, me një mijë e një inspektoriate duke e bërë të pamundur që një biznes i ndershëm të ecë përpara, të konkurrojë, të ekzistojë pa favore qeveritare.

Duke patur parasysh këtë situatë, Edi Rama po merr masa në disa plane. Njeriu që ka futur kriminelët në politikë, që përbuzi dhe sot e konsideron antikushtetues një nga arritjet më të mëdha për shqiptarët, Ligjin e Dekriminalizimit, njeriu që ka sjellë kriminelët në politikë, njeriu që ka shkaktuar përhapjen e madhe të krimit të organizuar përmes drogës, nuk është problemi këtu tek fara e kanabisit apo mbjellja e kanabisit nga fermeri, fakti është që fermerët, edhe ata që kultivuan kanabisin me shtytje dhe me sy-shkelje qeveritare sot janë në gropë, nuk janë bërë milionerë brenda natës, sepse milionerë janë bërë një grusht njerëzish të lidhur drejtpërdrejtë me Kryeministrin, dhe droga, krimi, kapja e çdo medie tradicionale; ekrani televiziv dhe gazete, dhe varfëria e shtuar, janë pjesë e një skeme për të diktuar një rezultat në tavolinë i cili nuk i përgjigjet vullnetit dhe votës së qytetarëve. Vullnetit dhe votës së qytetarëve në raport me bilancin e kësaj qeverie, çfarë ka bërë në këto vite dhe aq më pak vullnetit të qytetarëve për të zgjedhur një alternativë tjetër. Siç është alternativa e Partisë Demokratike e cila ofron përmes taksave të ulëta, një klime pozitive për biznesin më shumë mundësi për rritje ekonomike, për punësim dhe një qasje krejt tjetër ndaj shëndetësisë, arsimit dhe problemeve të tjera të qytetarëve shqiptarë. Ai nuk përballet dot me ofertë, nuk përballet dot me program, ky nuk përballet dot me ekip, prandaj ka nevojë të ketë kriminelët në krah siç i kishte në Dibër dhe këtë dëshiron ta bëjë tani në gjithë vendin. E nervozon edhe një zë i vetëm gazetaresk. E ke parë që mezi duron në konferenca për shtyp, mezi duron pyetjet. Janë tipare të njeriut që ka humbur çdo lidhje me realitetin dhe në fakt ai e ka humbur se ai jeton në një realitet tjetër. Ai jeton në një dhomë të rrethuar nga vizatimet.

Shqipëria është e mbytur në halle. Shqiptarët janë të rrethuar në halle. “Halle- halle kjo dynja, halli-hallit nuk i ngja!” -Por që nga ata që nuk ushqejnë dot fëmijët me bukë, deri tek ata që kanë një farë ekonomie, njeri të lumtur nga qeveria e Edi Ramës në Shqipëri pas tre vite e gjysëm qeverisje, nuk ka.

Por nuk janë këto preokupimet e kryeministrit. Jo, ai është i rrethuar dhe jeton në botën e vet dhe nuk ka turp. Ka edhe arrogancën ta shpalosë këtë para shqiptarëve. E patë se ç’thoshte në intervistën e Vitit të Ri: “krenar për pikturat, tani ka filluar të bëjë edhe qype balte”. Ai është njeri që argëtohet, jeton në një botë argëtimesh, udhëtimesh jashtë shtetit, ekspozita pikturash, vetë është i rrethuar me piktura është një njeri që ka humbur tërësisht realitetin. Dhe kjo është një situatë ku kemi dy Shqipëri. Një Shqipëri ku jeton Edi Rama dhe një grusht njerëzish, shërbëtorët e tij, kriminelët me pushtet, një grusht biznesmenësh që është turp t’i quash biznesmenë, të cilët bëjnë prokopi vetëm si klientë qeverisë me tendera, me koncesione, me leje ndërtimi, por jo me konkurrencë. Dhe bota tjetër, ku jetojnë shumica dërrmuese e shqiptarëve, të djathtë dhe të majtë.

Peka: Keni emra për këta biznesmenë z.Basha?

Basha: Padyshim që kam emra. Por nuk kam ardhur këtu që të bëjë policin apo denoncuesin. Unë këtu kam ardhur si kryetar i opozitës për t’iu thënë shqiptarëve, për të ndarë me shqiptarët atë që është problemi i vërtetë në këtë vend, që këtu procesi politik, demokratik, konkurenca mes partive politike, mes ofertave dhe programeve, konkurenca në treg që çon përpara kapitalizmi, hap më shumë mundësi, hap më shumë investime, hap më shumë vende pune, këtu konkurrenca është asgjesuar nga një njeri i cili i trembet konkurrencës dhe për këtë arsye ka bërë trekëndëshin: Pushtet-Biznes i favorizuar dhe mediat.

Peka: Kur z.Rama ka arritur të zhdukë konkurencën, biznesin dhe gjithçka. Sigurisht që sipas jush qëllimi është zhdukja e konkurrencës edhe në politikë. Si do të arrini të riktheni konkurencën e ndershme në politikë? Si do të arrini të siguroni zgjedhje të ndershme në qershor z.Basha?

Basha: Ky është një problem i jashtëzakonshëm për Shqipërinë, një problem për të cilin unë dhe opozita jemi investuar prej më shumë se një viti e gjysëm dhe sot ndodhemi në pikë kritike. Cila është kjo pikë?! Ne duam që zgjedhjet e ardhshme të mos i vendosin kriminelët, por t’i vendosin qytetarët. Ne duam që në zgjedhjet e ardhshme të mos flasë varfëria, që shitet e blihet për një thes me miell, apo për 20 apo 50 mijë lekë, apo 200 mijë lekë për votë, sepse nuk i dihet se sa do të shkojë çmimi për zgjedhje, por të vendosë vullneti i qytetarëve. Pala tjetër nuk e do. Ne kemi paraqitur një platformë me kushte për zgjedhje të lira dhe të ndershme. Shqiptarët duhet ta dinë që ajo që kërkojmë ne, janë zgjedhjet e lira dhe të ndershme. A ka shqiptar që nuk e di se pa zgjedhje të lira dhe të ndershme, nuk ka më demokraci, nuk ka më liri, nuk ka më mundësi, nuk ka më ekonomi të lirë?

Por çfarë kemi propozuar ne konkretisht?! Kemi kërkuar identifikimin biometrik të qytetarëve, votimin elektronik, numërimin elektronik. Por çfarë do të thotë identifikimin biometrik i qytetarëve?! Çfarë do të thotë identifikim biometrik? Do të thotë që shqiptarët kur të shkojnë për të votuar në zgjedhjet e ardhshme, mos të kenë nevojë të kenë me vete as kartë identiteti as pasaportë, por me shenjën e gishtit në një proces fare të thjeshtë të identifikohen dhe pastaj me një ekran të votojnë për partinë, për koalicionin, në varësi të sistemit dhe për kandidatin.

Cfarë bëhet me këtë? E para e punës garantohet e drejta e cdo qytetari për të votuar. Askush që ka humbur apo ia kanë marrë kartën, nuk përjashtohet nga votimi, pra garantohet që cdo qytetar voton. E dyta, garantohet që askush nuk voton në emër të dikujt tjetër. Shenja e gishtit është garanci që askush nuk voton në emër të dikujt tjetër. Dhe e treta, garantohet që nuk ka mundësi të ndërhyhet në numërim. S’fut duart njeri tek vota, shkurt, nuk fut duart njeri në kuti se nuk ka kuti. Nuk ndryshon njeri rezultatin në tavolinë, sepse rezultati del automatikisht nga procesi i votimit. Këtë kërkojmë ne, kjo është kërkesa jonë. Pra ne nuk kërkojmë asnjë favor, ne kërkojmë që shqiptarëve tu garantohet vota e tyre.

Peka: Teknikisht është e mundur kjo ?

Basha: Plotësisht, plotësisht, nëqoftëse ka vullnet politik, plotësisht. Sigurisht kur e parashtruam këtë në maj të vitit të kaluar, koha ishte më e bollshme, por nëqoftëse ka vullnet politik zgjidhjet mund të gjenden. Ky është një standard që mund të arrihet.

Peka: Dhe ju mendoni se vetëm kjo gjë mund të shmangë deforimimin e votës në Qershor të 2017?

Basha: E shmang do të ishte një teprim, por pa dyshim për një qeveri që është e angazhuar me të gjitha mjetet për të kapur zgjedhjet me cdo kusht, nuk është se votimi elektronik do të eliminojë cdo problem, por sic thashë, 3 probleme do ti eliminojë, cdokush që do të votojë, do të mund të votojë, askush nuk mund të votojë në emër të dikujt tjetër, dhe e treta, nuk do të mund të fusin duart tek vota. Nuk ka snjë forcë qeveritare apo politike që mund të ndërhyjë tek votimi.

Peka: Tek listat e hapura, ju keni thënë që nuk keni pengesa, e pranojmë nëse realizohet votimi elektronik. Zoti Basha, pse nuk mund jeni të hapur për një kërkesë që ka bërë një parti tjetër, p.sh zoti Kokëdhima ka kohë që flet për lista të hapura. Ai i tremebet Lulzim Basha listave të hapura?

Basha: Jo, po ju them dicka. Unë kam shpallur një platformë për PD, një platformë të hapjes, e cila në fakt nuk i drejtohet vetëm demokratëve apo votuesve tanë, por i drejtohet të gjithë shqiptarëve. Unë mbështes gjithcka që e kalon vendimarrjen tek qytetari shqiptar, tek votuesi shqiptar që fuqizon votuesin shqiptar. Jam shprehur, dhe po e përsëris prapë, që jam edhe më shumë për listat e hapura, unë jam për një mazhoritar të pastër, mos të ketë lista që i bëjnë kryetarët e partive, po të jenë kandidatët nga partitë politike, por dhe kandidatë të tjerë të pavarur, të cilët konkurojnë dhe marrin votat e qytetarëve. Unë jam edhe për garë për kandidatin brenda partisë, “primare” sikurse i thonë në SHBA, kandidatin për deputet të mos e vendosë as kryetari, as kryesia, asnjë forum partiak, por ta vendosin anëtarët, me një anëtar një vote.

Peka: Kur jeni për “primare”pse nuk e praktikoni?

Basha: Unë jam për të gjitha këto dhe unë kam shpallur që primaret, pra votimi nga anëtarësia është objektivi im si kryetar i Partisë Demokratike. Sigurisht, do të jenë të vërteta jo fallse. Cfarë klam parasysh me këtë. Nëqoftëse do të jetë Cim Peka që është pesë herë në ditë në lajme me një tjetër që është shumë i gatshëm për të marrë përgjegjësinë e deputetit, sigurisht ti je më i njohur. Pra duhet të ketë dhe një platformë, të garantohet dhe një farë barazie dhe PD dhe unë jemi të angazhuar ta ndërtojmë këtë platformë dhe nuk bëhet shpejt, por do të fillojmë që këtë vit, që këto zgjedhje ta planifikojmë dhe do ta përdorim në një territor të caktuar me qëllimin, dhe unë këtë do ti kërkoj Këshillit kombëtar, që zgjedhjet e ardhshme parlamentare, jo këto, por në të tjerat të aplikojmë “primaren” në nivel kombëtar.

Por cështja këtu nuk është primare, mazhoritare, apo lista të hapura. E kam thënë dhe po e them; unë personalisht mbështes gjithcka si kryetar i opozitës, jo vetëm si qytetar, cdo gjë që fuziqon qytetarin, që votuesi të ketë më shumë pushtet se c’ka sot, të vendosë se kush do të jetë deputet i ardhshëm. Problemi qëndron nëqoftëse kemi një sistem që nuk vendos qytetari, por vendos krimineli cfarë do që të vendosësh ti; me lista propocionale, lista të hapura, lista të mbyllura, me mazhoritar, nëqoftëse krimineli do të jetë ai që do të luajë rolin kryesor, nëse rolin kryesor do ta luajë fenomeni i shëmtuar i blerjes së votës, pra i blerjes së varfërisë së shqiptarëve nga ata që kanë shkaktuar apo thelluar varfërinë e shqiptarëve, atëherë sistemi nuk ka pikë rëndësie. Sistemi merr rëndësi në momentin që ne garantojmë zgjedhje të lira dhe të ndershme, pra votën. Prandaj, ne insistojmë tek votimi elektronik dhe me votimin elektronik absolutisht jemi të hapur, le ta zgjedhin vetë sistemin, le ta zgjedhin ata. Në momentin që garantohet vota e qytetarit shqiptar, në momentin që qytetari shqiptar mund të votojë pa asnjë pengesë, pa asnjë kërcënim dhe në kushtet ku nuk mund të shitet dhe të blihet vota, le ta zgjedhe vetë Edi Rama, le ta zgjedhe vetë Ilir Meta ose të dy bashkë, cfarë sistemi duan të garojnë me PD, me Lulzim Bashën. Le ta zgjidhin ata, ajo që kërkoj unë është kushte për zgjedhje të lira dhe të ndershme. Kushte për zgjedhje të lira dhe të ndershme. PD dhe unë jemi gati të konkurojmë në cfarë do sistemi dëshiron Edi Rama apo Ilir Meta, të garojmë me ta dhe ti mundim.

Peka:  Nëqoftëse këto kushte nuk plotësohen?

Basha: Nëqoftëse këto kushte nuk plotësohen, pra nëqoftëse nuk garantohet vota e qytetarit, atëherë nuk është problem vetëm i imi , vetëm i opozitës, është dhe problem yt, është problem i cdo shqiptari. Nëqoftëse nuk garantohet vota e lirë, nëqoftëse prishen zgjedhjet e ardhshme, ky është problemi i cdo shqiptari dhe na takon ne të gjithëve, të reagojmë.

Peka: Sigurisht që, është problem i cdo shqiptari zoti Basha, ju i keni dalë për zot të drejtoni opozitën. Opozita cfarë do të bëjë?

Basha: Opozita ka një plan veprimi të cilin ne e kemi shpallur dhe dje me aleatët dhe nëqoftëse nuk garantohet vota e shqiptarëve të jeni të sigurtë se opozita do të marrë të gjithë peshën e përgjegjësisë që i takon. Edhe qëndrimi për këtë, të jesh i sigurtë, unë e kam të qartë vendimin vetë, që nuk do të jetë një qëndrim i marrë në vetmi, por pavarësisht se unë i kam atributet si kryetar i PD, do të jetë një vendim i marrë nga të gjithë demokratët.

Peka: Pra ju e keni të qartë se cfarë do të bëni nëse do preket vota

Basha: Unë besoj se cdo shqiptar e di se prekja e votës, prishja e zgjedhjeve  është fundi.

Peka:  Lulzim Basha e ka të kristalizuar se çfarë do të bëjë nëse preket vota.

Basha: Unë po. Unë besoj se në kushtet ku ndodhet vendi sot, Shqipëria nuk ka më hesap, nuk ka më këllqe që të mbajë një proces zgjedhor tjetër të manipuluar. Ka vuajtur Shqipëria 25 vite nga zgjedhjet e prishura.

Peka: Mediat e sponsoriauzra nga kryeministri dhe biznesi afër tij janë shprehur se në takimin që keni pasur me aletatët, ju i keni kërkuar atyre të mos njohin zgjedhjet dhe ata ju kanë kundërshtuar.

Basha: Eshtë tërësisht e pavërtetë, e vërteta është krejt ndryshe. E ka shprehur zoti Ndoka publikisht. Aleatët kanë kërkuar si kusht për të mos hyrë në zgjedhje me këtë qeveri, një kërkesë që në fakt është në sintoni të plotë me atë që unë e kam shprehur që në Dhjetor të 2015, se zgjedhje të lira me Edi Ramën nuk ka. Pse? Sepse ka 3 prova të qarta, ka  sjelljen e tij me tre palë zgjedhje, me Korcën, në 2015, dhe Dibrën, ka faktin që është ky që i ka marrë dhe i ka përdorur kriminelët, të cilët i dinte kush ishin, e ka bërë sepse pikërisht e dinte shumë mirë kush ishin dhe cfarë përfaqësojnë, për të marrë pushtetin. Pra ky solli kriminelët në politikë, për të marrë pushtetin dhe për të mbajtur pushtetin dhe e treta, është ky, Rama, arsyeja kryesore pse nuk kemi  reformë zgjedhore sepse propozimet për reformë zgjedhore janë në tavolinë që prej datës 17 Maj 2016. Të treja këto, tregojnë qartë që Edi Rama nuk ka vullnet për zgjedhje të lira e të ndershme, i trembet zgjedhjeve të lira e të ndershme, i trembet konkurencës, por ajo që na takon ne si opozitë është, dhe këtë kam argumentuar në tryezën me partitë opozitare, parlamentare, të hënën do të ketë një takim të zgjeruar me të gjithë partitë opozitare të koalicionit për të dalë me një vendim final, dhe ajo që kam argumentuar është që interesi madhor i shqiptarëve është të kenë kushte për zgjedhje të lira e të ndershme dhe ne na takon të bëjmë gjithçka për këtë interes të shqiptarëve, prandaj, së pari, duhet të provojmë gjithçka për të patur një rrugë që mundëson zgjedhje të lira e të ndershme. Kjo rrugë për ne kalon përmes identifikimit biometrik, votimit elektronik, propozimit për financimin e partive politike, dekriminalizimit dhe propozimeve të tjera, por këto janë tre shtyllat kryesore. Këto janë në tavolinë dhe në këtë fazë të procesit i takon mazhorancës të tregojë përpara shqiptarëve, ka apo nuk ka vullnet për zgjedhje të lira e të ndershme. Nëse ka vullnet dhe një nga partitë është shprehur që është pro votimit elektronik, shpresoj që edhe partia tjetër, partia e madhe të adoptojë këtë qëndrim, atëherë mund të ecet pa problem në këtë qëndrim. Koha nuk mund të jetë kurrë alibi, nëse nuk ka vullnet, opozitës i takon që bashkë me qytetarët shqiptarë të ndërmarrim të gjitha hapat për të mundësuar zgjedhje të lira e të ndershme. Zgjedhje farsë, votime si në kohë të Enverit, Shqipëria nuk mund të ketë.

Peka: Z. Basha ka një perceptim nga opinionistët se opozita shqiptare i ka varur shpresat tek një gafë e Edi Ramës gjatë zgjedhjeve në Amerikë ndaj Presidentit tashmë të zgjedhur Donald Trump dhe tek fitorja e Presidentit?

Basha: Nuk më rezulton kështu, unë kam kontakt të përhershëm me gazetarët dhe nuk më rezulton që të jetë një perceptim i tillë. Partia Demokratike dhe unë nuk mund të varim shpresën tek kjo, sigurisht që zgjedhjet në amerikë, shembulli i zgjedhjeve në Amerikë është një shembull frymëzues për ne. Pse është frymëzues, sepse siç e thatë në nisje të këtij emisioni, përkundër gjithë shanseve të deklaruara nga një pjesë e madhe e mediave, e establishmentit, sondazheve madje edhe e segmenteve brenda partisë së tij, Trump tregoi që fuqia në fund të fundit për të ndryshuar një vend është tek qytetari. S’qenka pra as tek establishmenti, as te mediat e kapura, as te biznesmenët e korruptuar, por qenka tek qytetarët dhe ky është një shembull shumë frymëzues, jo vetëm për Shqipërinë, por për të gjitha vendet që kanë një deficit të madh demokratik, si Shqipëria sot. Por shpresa jonë, pikërisht për këtë arsye, është te qytetarët shqiptarë, besimi im është tek qytetarët shqiptarë. Sot një pjesë e madhe e faktorëve që duhet të luajnë rolin e tyre në demokraci, balancë – kundër balance, midis të mires dhe të keqes, nuk e luajnë këtë rol.

Rikthehemi prapë tek media, media ka mbaruar, ekranet televizive janë të kapura, gazetat janë të kapura, falë Zotit për mediat sociale dhe për portalet që vazhdojnë me guxim, ndërkohë që ka iniciativa për ti kapur dhe për ti shantazhuar edhe këto. Ajo që dua të them është që sado të përpiqen, edhe kjo që ka ndodhur dje me Shkullakun dhe me Lelën, lajmi i mirë është që kjo është faza e fundit, faze e fundit e një pushteti që shkon në mënyrë të pashmangshme drejt rënies. Pse? Sepse fuqia e një demokracie është qytetari, ky është shembulli i Trump, nëqoftëse qytetarët bashkohen dhe duan ndryshim, kanë besim se bashkë mund tia dalin, atëherë nuk ka force t’i ndalojë në demokraci.

Peka: Ishulli I fundit thatë pak më pare për ABC-në, unë po them ndoshta ishulli i fundit i autoritarizmit në Ballkan mund të konsiderohemi edhe ne. Z.Basha, Edi Rama është e sigurtë që e mallkon veten nga mëngjesi deri në darkë për deklaratën që ka bërë kundër Presidentit Trump. Po Lulzim Basha është penduar që mori pjesë në Konventën e Demokratëve përpara zgjedhjeve?

Basha: Aspak, unë jam ftuar nga të dyja Konventat, në Konventën e Republikanëve e cila ka ndodhur në javën e 18 dhe 21 Korrikut, kam pasur mirëkuptimin e plotë të ftuesëve të mi, të Komitetit Kombëtar Republikan dhe të stafit të ngushtë Presidentit Trump sot, atëherë kandidatit Trump, në kushtet e krizës së kalimit të paketës Kushtetuese për reformën në drejtësi, unë nuk mund të udhëtoja drejt SHBA. Prania ime javën tjetër tek Konventa e Demokratëve, ishte po kështu në bazë të një ftese e cila më ishte drejtuar mua, por edhe partive të tjera simotra, Partive Popullore Europiane, një pjesë e të cilave ishin aty me Sekretarin e Përgjithshëm të PPE. Prania jonë në të dyja konventat nuk ishte shenjë mbështetjeje për asnjërin prej kandidatëve, sepse ishte një vendim që i takonte tërësisht amerikanëve, amerikanët kanë vendosur. Unë jam shumë i lumtur që pas zgjedhjes së tyre, Partia Demokratike, për të cilën sigurisht mund të themi që ka një qasje ideologjike më të afërt me Partinë Republikane, që prej ditës së parë të themelimit të saj, dhe unë personalisht gëzojmë marrdhëniet më të mira me administratën që pritet të vij dhe me Presidentin Trump.

Peka: A keni komunikim me administratën e re Z. Basha?

Basha: Sigurisht dhe jo tani, ne kemi patur komunikim të hapur me stafet kryesore të të dy kandidatëve dhe kjo është detyra normale e çdo faktori të përgjegjshëm politik, për më shumë, e opozitës që pritet të jetë pushteti i nesërm, e kryetarit të opozitës që pritet të jetë Kryeministri i vendit nesër. Unë nuk e bëj këtë për veten time, unë e bëj këtë për interesat e shqiptarëve. Sot përfaqësoj interesat e shqiptarëve, dhe nesër do të përfaqësoj interesat e të gjithë shqiptarëve. Si opozitë, unë jam opozita e gjithë shqiptarëve, nesër si pushtet do të jem pushteti i të gjithë shqiptarëve dhe për shqiptarët. Marrëdhënia me SHBA është një marrëdhënie strategjike e rëndësisë së pa krahasueshme me asnjë vend tjetër. Detyra jonë është ta forcojmë këtë marrdhënie, sepse aspektet më kryesore që kanë të bëjnë me integritetin tonë, me orientimin tone euroatlantik, me sigurinë tone kombëtare dhe me aspiratat tona për prosperitet e zhvillim, për një Shqipëri të zhvilluar e të fuqishme, janë të lidhura në mënyrë të pazgjidhshme me SHBA dhe ajo që ndodhi tregoi edhe në herë cektësinë, por edhe dëshirën e kundërshtarit tim politik për të hedhur zare, me fatet e shqiptarëve. Nuk mund të ndodhte ajo kurrë, sepse nuk ishte vendimi i tij, vendimi është i amerikanëve, pavarësisht se ata mund ta identifikojnë veten më afër Partisë Demokratike, dhe ne më afër Partisë Republikane. Fakti është që ne në gjithë këto 25 vite kemi kooperuar shkëlqyeshëm me të dyja krahët. Unë kam pritur Presidentin Bush si Ministër i Jashtëm, në Rinas, në vizitën e parë të një Presidenti në detyrë, por kam bashkëpunuar shkëlqyeshëm me administratën e Presidentit Obama dhe me Sekretaren Klinton në fazën e përfundimit të hyrjes së Shqipërisë në NATO, apo të pavarësimit të Kosovës dhe të lobimit për njohjen e shtetit të Kosovës, apo në aspekte të tjera që kanë të bëjnë me sigurinë kombëtare të Shqipërisë dhe sigurinë në tërësi, ku ne kemi peshën tonë si vend në NATO.

Peka: Qarkullojnë lajme të ndryshme Zoti Basha mbi një ftesë të mundshme për të marrë pjesë në ceremoninë e inagurimit të Presidentit Trump. A ka një ftesë Lulzim Basha dhe në rast se po nga kush?

Basha: Po. Ka një ftesë zyrtare nga Komiteti Kombëtar Republikan, thënë ndryshe, nga Partia Republikane dhe nga grupi i Kongresmenve Amerikanë Republikane në Kongresin Amerikan.

Peka: Zoti Basha, sot media globale po flet për një përplasje publike të Presidentit Donald Trump dhe George Soros. Në Shqipëri është folur shumë për një vizitë që Soros ka bërë në Selinë e Partisë Demokratike. Ish-kryeministri Berisha e ka atakuar si një spekulant brilant George Sorosin. Mediat janë munduar pas zgjedhjes së Presidentit Trump t’u afishojnë edhe ju si një përkrahës i George Sorosit. Pyetja konkrete është: A është Lulzim Basha i pavarur dhe i pakapur nga George Soros?

Basha: Po sigurisht që po Çim Peka. Aq sa je dhe ti. Ai ka qënë një takim i kërkuar nga stafi i Sorosit në kuadrin e një vizite që ka bërë në Shqipëri dhe unë kam pranuar kërkesën e tij për takim. Ka qënë një takim i hapur, publik, me stafe. Eshtë interesuar për gjendjen në Shqipëri dhe unë i kam bërë pasqyrën e kriminalizimit të shtetit nga Edi Rama, që për të thënë të drejtën, është qartësisht një njeri i sponsorizuar në karrierën e tij politike nga qarqe të financuara nga zoti Soros. I kam shpjeguar për shqetësimin tim të madh sesi nën maskën e një shoqërie të hapur ai ka krijuar një shoqëri të mbyllur të krimit këtu në Shqipëri dhe të akaparimit të ç’do lirie dhe të dëmtimit të lirisë së qytetarëve shqiptarë. I kam treguar me fakte sesi po mundohej në atë moment ta kthente reformën në drejtësi në një grusht shteti, institucional për të kapur të gjitha pushtetet vetë, dhe sesi Partia Demokratike ishte e vendosur t’i rezistonte deri në fund një përpjekjeje të tillë. Dhe po kështu i kam thënë që për Partinë Demokratike, përpos Reformës në Drejtësi, vendi ka nevojë për një Reformë Kushtetuese. Ka dalë në pah tani, një Kryeministër i lidhur ngushtë me krimin që ka zhbërë të gjitha garancitë kushtetuese dhe balancën e pushteteve. Të gjitha këto do i shohësh në deklaratën për shtyp. Kjo ka qënë biseda. Më shumë ka dëgjuar. Nuk ka pasur ndonjë kërkesë ndaj meje apo ndaj Partisë Demokratike. Pastaj se çfarë ka marrë nga ato që i kam thënë unë, është puna e tij, por fakti është që në këtë takim unë kam bërë ç’do përpjekje për transparencë maksimale sepse për fat të keq një pjesë e mirë e axhendës së errët te Edi Ramës është për të kapur institucionet e drejtësisë, për t’iu shitur të huajve një Shqipëri që po ndryshon për mirë, por në fakt këtu gjërat kanë shkuar keq e më keq këto 3 vite. Nuk gjen një person të vetëm të thotë që gjërat janë më mirë se para 3 vitesh. Këto kanë ndodhur duke përdor influencën e rrjetit të George Soros, të cilën Edi Rama e ka shaluar tash e disa vite. Por ndryshe kur e shalonte në opozitë, ndryshe kur e shalon si Kryeministër bashkë me pushtetin për ti bërë gjëmën vendit. Kjo e dyta është e papranueshme.

Peka: Zoti Basha pyetja e fundit. A ka Lulzim Basha një deklaratë në mendje në rast se nuk fiton zgjedhjet?

Basha: Partia Demokratike dhe opozita do shkojnë në zgjedhje të lira dhe të ndershme me besim të plotë se qytetarët jo vetëm do ndëshkojnë keqqeverisjen e Edi Ramës për shkak të së cilës sot paguajnë më shumë, blejnë më pak, jetojnë më keq, por do i besojnë një alternative e cila i kthen lirinë individuale si thelb i mundësive për një jetë më të mirë, për punësim dhe për një cilësi më të lartë të shërbimeve që shteti i detyrohet qytetarëve si taksapagues.

Peka: Zoti Basha, nëse garantohen zgjedhjet e lira dhe shqiptarët nuk ndëshkojnë mazhorancën aktuale, a do ta ndëshkojë Lulzim Basha vetë?

Basha: Unë kam besim shumë të madh te demokracia. Unë kam besim shumë të madh te qytetarët shqiptarë. Jam i sigurtë që zgjedhjet e ardhshme të lira dhe të ndershme do jenë një pikë kthese për Shqipërinë. Një brez i ri shqiptarësh do lënë përfundimisht pas krizat e shkaktuara nga zgjedhje të prishura që çojnë në pushtet të kapur, ne biznese të kapura, media të kapura. Dhe ne do hapim një kapitull të ri të një Shqipërie që ka lirinë të punojë, që ka lirinë të prodhojë, që ka lirinë të mendojë, që ka lirinë të konkurojë. Jam i bindur që jemi shumë afër momentit. Dimri është i rëndë por pas dimrit ka pranverë. Pas reve ka dritë.

Peka: Po në rast se preken zgjedhjet a do kemi një Bashë tjetër? Një Bashë agresiv dhe jo një Bashë elastik siç e kemi parë vitet e tjera?

Basha: Nëqoftëse quan elasticitet ligjin për dekriminalizmin, atëhere është problemi yt. Vendosmëria ime për t’iu qëndruar parimeve nuk matet as me tonin e zërit, as me zgurdullimin e syve, por me produktin. Unë kam dy vjet që e kam thënë para shqiptarëve që zgjedhjet e lira dhe të ndershme janë një test i patejkalueshëm për Shqipërinë. Ne duhet dhe do kemi zgjedhje të lira dhe të ndershme. Nuk mund dhe nuk do pranojmë asnjë proçes tjetër zgjedhor përveç zgjedhjeve të lira dhe të ndershme. Rekordi flet vetë. Dekriminalizimi kur askush nuk e besonte, ndodhi. Reforma në Drejtësi u bë sipas përcaktimeve kushtetuese të Partisë Demokratike, përkundër gjithë presioneve. Tani, unë ftoj të gjithë shqiptarët, të bashkohemi për zgjedhje të lira dhe të ndershme. Eshtë çështje e dinjitetit të tyre personal, është çështje e lirisë së tyre personale, e mirëqënies së tyre personale.

Peka: Keni fituar dy beteja. A do e fitoni edhe këtë betejë?

Basha: Patjetër që po. Sepse kauza që mbështesim është kauza e çdo shqiptari, jo vetëm kauza e të djathteve, jo vetëm e demokratëve, jo vetëm e opozitarëvë, por e çdo shqiptari. Rruga që propozojmë garanton votën e lirë të çdo shqiptari. Nuk po kërkojmë asgjë për veten tonë. Votën e lirë të çdo shqiptari.

Peka: Edhe një pyetje të fundit. Jeni shprehur se Zoti Berisha e ka në dorë vetë nëse do dojë të vazhdojë të jetë deputet apo jo. Përveç Lulzim Bashës dhe ish Kryetarit të PD, a ka deputet tjetër që është i garantuar?

Basha: Nuk ka asnjë deputet të garantuar. Forumet do vendosin për të gjithë. Unë kam shprehur mendimin tim personal për Zotin Berisha si lider historik i Partisë Demokratike që, sa më takon mua, sa herë të deshirojë do ishte i mirëpritur por vendimi për çdo rast është i forumeve të Partisë Demokratike. Risia këtu është që Partia Demokratike, besoj që në ditët në vazhdim do hapë një proçes që nuk ka ndodhur më përpara, sa i përket konsultimit me anëtarësinë, me grupet e interesit, me qytetarët, jo vetëm me anëtarët e Partisë Demokratike, por me qytetarët, me komunitetin për deputetët e ardhshëm. Këtu përfshihet edhe shoqëria civile, edhe bota akademike, edhe sipërmarrja e ndershme, në mënyrë që të përfaqësohemi jo vetëm me ekipin më të mirë, me juristët, ekonomistët, shkenctarët, artistët, profesorët, sipërmarrësit, të rinjtë, të rejat më të mirë, ekipin më të mirë, më përfaqësues që ka Shqipëria, por që ky ekip të mos ketë lindur thjesht dhe vetëm në kokën e Kryetarit, por në dhomat dhe forumet e Partisë Demokratike. Të përfaqësojë sa më shumë vullnetin e qytetarëve shqiptarë.

Lulzim Basha në një intervistë me Çim Pekën për Syri.net , për reformën zgjedhore, kapjen e medias nga Rama,  alternativën e PD, dhe vizitën në SHBA, 13 Janar 2017

Edi Rama vendosi veton në Komisionin e Reformës zgjedhore kundër votimit elektronik, duke vrarë kështu reformën zgjedhore.

“Me veton e sotme Partia Socialiste praktikisht ka vrarë Reformën Zgjedhore. Votimi elektronik, indentifikimi elektronik i zgjedhësve me shenjën e gishtit dhe numërimi i votave në mënyrë elektronike është thelbi i reformës zgjedhore për zgjedhje të lira dhe të ndershme”, u shpreh Oerd Bylykbashi pas mbledhjes së Komisionit.

Votimi elektronik dhe numërimi elektronik largon partiakët dhe militantët nga procesi i numërimit dhe rezultati i zgjedhjeve del menjëherë dhe i pamanipuluar. Votimi dhe identifikimi elektronik i votuesve me shenjat e gishtit, shmang votimin me karta fallso apo votimin disa herë të të njëjtëve persona, apo mbledhjen/blerjen e kartave te identitetit, që zgjedhësi të mos mundet të votojë. Votimi elektronik bën të mundur që cdokush të votojë, dhe askush të mos votojë në emër të dikujt tjetër. Numërimi elektronik shmang futjen e duarve në kutinë e votave, shmang presionin dhe blerjen që i bëhet votës përmes mjeteve të identifikimit.

“Ky është thelbi i reformës zgjedhore, së bashku me dekriminalizimin dhe financimin e partive”, tha zoti Bylykbashi. Pa votimin elektronik nuk ka reformë zgjedhore, ajo kthehet në një farsë, theksoi ai.