Blog

Drejtuesit e PD takohen me banorët e njësisë Stravaj. Salianji: Qeveria ka vetëm fjalë, njerëzit në mjerim

Zonat e varfëra, pa punë dhe pa asnjë mundësi zhvillimi në Stravaj të Përrenjasit, kanë pësuar një goditje të rënda nga moti i acartë i këtyre ditëve që ka sjellë izolim total. Ndërkohë, banorët e këtyre zonave nuk kanë marrë asnjë shërbim, ndihmë apo përkujdesje nga qeveria prej një jave.

Drejtuesit e Partisë Demokratike dhe sekretari Ervin Salianji ishin pranë banorëve.

“Jemi në mbështetje të banorëve të zonave të bllokuara dhe me probleme për shkak të motit të acartë të këtyre ditëve. Ndryshe nga herët e tjera ku këto zona mbulohen edhe më shumë me borë, keqmanaxhimi i qeverisë ka bërë që fshatrat e Librazhit, ashtu si në të gjithë Shqipërinë, të jenë të bllokuara për shkak të mosshpalljes së situatës së emergjencës, apo të një emergjence artificiale të krijuar nga qeveria në ekrane në Tiranë. Këtu njëherë në katër ditë ka mjek dhe një nga banorët tha se duhet të sëmuresh me grafik në këto fshatra. Ka dështuar edhe sistemi dhe rrjeti elektrik në Shqipëri. Në fshatra elektriçistët profesionistë që kanë mbetur pa punë dhe nuk punojnë për OSHEE-në, kanë bërë të mundur lidhjen me energji elektrike. OSHEE vetëm ka rritur çmimin e energjisë, ka rritur kostot për qytetarët dhe u ka marrë me kërbaç qindarkat e fundit. Nuk ka investuar për rrjet por i ka kaluar investimet për fasada. Kjo është situata në të cilën ndodhet sot Shqipëria, një situatë e kapitullimti të shtetit dhe qeverisë, të propagandës dhe fjalëve boshe në televizione dhe të mbetjes në varfëri të madhe për qytetarët shqiptarët”, tha Salianji.

“Jam banor i kësaj zone dhe kam studiuar në universitet. Nuk po arrij të gjej një vend pune. Kudo që drejtohem më kërkojnë teserën e partisë, apo drejtori që të kërkon lekë”, shprehet një i ri i papunë.

“Mjeku na vjen nje herë në disa ditë. Nuk mund të sëmuresh sot, por ditën që vjen mjeku”, thotë një kryefamiljar.

“Nuk kemi asnjë përkrahje. Nuk kemi as tokë. Marr vetëm 50 mijë lekë të vjetra asistencë. Pavarësisht se çar thotë ministri, unë e vuaj vetë. Jemi 4 vetë në shtëpi vec me këtë asistencë”, ankohet një banor i zonës.

Partia Demokratike është e shqetësuar nga vendimi i sotëm i autoriteteve gjyqësore Franceze që Ramush Haradinaj, të mos kthehet në Kosovë. Vendimi që ai të lirohet nga paraburgimi, por jo të kthehet në atdhe, nuk është drejtësi e plotë.
Partia Demokratike shpreson dhe beson se organet e drejtësisë në Francë do të përshpejtojnë procedurat dhe t’i japin fund kësaj padrejtësie ndaj Ramush Haradinajt, i cili është çliruar plotësisht nga pretendimet për krime lufte me vendimet e Gjykatës së Hagës.

Deklaratë e Partisë Demokratike, 12 Janar 2017

Këshilltarët e djathtë bashkiakë, panë nga afër bllokimin e rrugëve dhe trotuareve në një nga hyrjet kryesore të kryeqytetit, në Rrugën e Elbasanit. Leonard Olli denoncoi braktisjen që qeveria dhe bashkia i kanë bërë qytetarëve duke mos pastruar rrugët të cilat kanë shkaktuar dhjetra aksidente. Mosmarrja e masave paraprake dhe vazhdimi i kësaj situate edhe gjatë ditës së sotme, kanë vënë në rrezik jetën e qytetarëve dhe pronat e tyre.

Prononcimi i kryetarit të këshilltarëve bashkiakë të Tiranës, Leonard Olli:

“Pak minuta rreshje dëbore dhe shumë pak centimetra kanë mjaftuar për të bllokuar gjithçka në kryeqytetin e Shqipërisë.

Janë këto kushte që i nxorën bojën bashkisë virtuale dhe qeverisë së fasadave. Sot shumë nga kolegët tanë kanë monitoruar që në orët e para të mëngjesit trafikun në Tiranë dhe j’ua them me garanci skurse e ka pasqyruar dhe media. I gjithë qyteti ishte i ngrirë.

Jo vetëm që nuk u mor asnjë masë për të hedhur pak kripë sa për të penguar ngrirjen e të gjithë akseve qëndrore dhe sekondare në kryeqytet, dhe që qytetarët u përpoqën t’i zgjidhnin vetë, Veliaj, stafi i tij dhe sigurisht shefi Rama flinin gjumë dhe gëzonin ëndrrat  se gjerat shkojnë shumë mirë.

Vetëm pak centimetra borë vunë jetën dhe pronat e qytetarëve në rrezik. Me dhjetëra aksidente automobilistike. Në orët e natës, mungesa e shtetit, mungesa e bashkisë është bërë shkak për dhjetra aksidente.

Mungesa  e shtetit, mungesa e bashkisë është bërë shkak për paralizimin e plotë të transportit publik. Mungesa e bashkisë dhe papërgjegjshmëria kriminale e kryebashkiakut Velija gjunjëzoi kryeqytetasit në kushtet e një moti aspak ekstrem.

Imagjinoni sikur Tirana të ishte në kushtet e motit të një qyteti tjetër si psh Korça se çfarë do të ndodhte. Ndërkohë shumë jetë janë vënë në rrezik nga mungesat e urgjencave spitalore sepse mjetet e transportit të urgjencave nuk mundën të qarkullonin.

Dhe kur kjo situatë paralizuese ndodh në zemër të Shqipërisë imagjinoni se çfarë po kalojnë zonat e thella.

Ka vetëm një përgjegjës dhe ky është Veliaj, i cili në vend që të merret vetëm me administrimin e qytetit tenton duke vjedhur projekte duke riinaguruar punë publike të parardhësit të tij, të tentojë kreun e PS por sigurisht duke braktisur tërësisht besimin e qytetarëve të Tiranës që i dhanë për menaxhimin e qytetit.

I bëjmë thirrje bashkisë për të hedhur sa më parë kripë në rrugë dhe trotuare”.

Enkelejd Alibeaj për kartelin qeveritar të drogës që vazhdon aktivitetin pa ndërprerje

Në 10 ditët e para të këtij vitit, rreth 4 ton e gjysëm drogë, kanë kaluar përmes kufinjve të Shqipërisë në drejtim të Italisë dhe Greqisë.

Në Otranto, Torre-Veneri, Napoli, Lece, Brindizi, kanë mbërritur rreth 4 tonë drogë në këto 10 ditë, të kapura e të sekuestruara nga policia italiane.

Po ashtu, në Igumenicë, Selanik, Kostur, janë kapur rreth 500 kg droge, nga policia greke.

Afërsisht 4 tonë e gjysëm, në 10 ditë, vetëm sasia e kapur, e sekuestruar.

Këto të dhëna tronditëse, dëshmojnë qartë se karteli qeveritar i drogës vazhdon pa ndalesë aktivitetin, dhe qeveria, Rama e Tahiri, i ofrojnë atyre rregullisht lehtësitë për ta transportuar brenda vendit, e për të kaluar kufinjtë tanë.

Këto të dhëna, dëshmojnë se droga mbetet edhe për këtë vit alternative e Edi Ramës, dhe angazhimi kryesor i tahirit të tij.

Koha ka ardhur për ta larguar këtë të keqe, e për të sjellë një qeveri që krijon mundësi për zhvillim e punë të ndershme.

Lulzim Basha ishte sot pranë banorëve të qytetit të Kukësit të cilët po vuajnë gjendjen e rëndë të motit.  Banorët i thanë Bashës se kanë mungesë të energjisë elektrike. Çmimi i druve për ngrohje është dyfishuar.  Basha tha se këto dy probleme i ka hasur nga kontakti me qytetarët në këto ditë të vështira në mjaft zona. Ai konstatoi se ndihma e qeverisjes qendrore ka qënë minimale. Bashkitë ia kanë dalë të vetme të përballojnë situatën e krijuar.

“Ngrohja dhe problemet me energjinë elektrike janë halle të mëdha që janë ngritur nga të gjithë qytetarët, të majtë, të djathtë, pa dallim. Ndërkohë, kamionët e qeverisë ngarkohen me dru dhe qytetarët ndëshkohen për shkurre. Situata është rënduar në gjithë vendin. Cmimi i latave të druve në Korcë, Ersekë, Përrenjas, Dibër, Kukës, Has, Tropojë, Malësi e Madhe, Dukagjin, Shkodër, këtu në Kukës, është dyfishuar, nga 20 mijë lekë, në 40 mijë. Në Korcë nga 35 mijë lekë, në 70 mijë. Dy problemet më të mëdha pra sot për njerëzit janë cmimi i lartë i druve dhe mungesa e energjisë elektrike”, tha Basha.

Kryetari i Opozitës u shpreh barra e madhe e mungesës së investimeve po bie mbi banorët. Strukturat e OSHEE-së dhe pushteti lokal po punon në kushte ekstreme për shkak të braktisjes nga qeveria në këto 3 vite. Ai i bëri thirrje kryeministrit ta njohë realitetin.

“Banorët janë të izoluar dhe në errësirë. Por qeveria nuk e merr përsipër emergjencën. Shpreh mirënjohjen më të thellë dhe keqardhjen gjithashtu, për punonjësit e OSHEE të cilët punojnë në kushte ekstreme, ku shpëtohen nga banorët kur rrezikojnë dhe jetën. Kjo tregon se nuk është investuar në këto 3 vite. Qeveria ia ka lënë barrën bashkive, por duhet të kthejë sytë kendej sepse emergjenca nuk ka kaluar. Kjo është një gjendje emergjence, dhe qeveria nuk përgjigjet sic i takon, duke shpallur emergjencën”, tha Basha.

Kreu i demokratëve u bëri thirrje drejtuesve të bashkive por edhe degëve të Partisë Demokratike për t’iu gjendur sa më pranë njerëzve.

Njoftim per shtyp i Partisë Demokratike, 10 Janar 2017

537 milionë lekë do harxhojë Edi Rama për ngrohjen e tij në Kryeministri, këtë vit.

Në fakt, këto 537 milionë lekë janë vetëm një pjesë e vogël e mbi 13 miliardë lekë që Edi Rama do shpenzojë për vete dhe godinën e Kryeministrisë të cilën e ka kthyer në pallat argëtimi.

Prioriteti kryesor i Edi Ramës është luksi për vete. Mirëqenia e njerëzve nuk ka rëndësi për të.

Prandaj shkollat nuk kanë ngrohje dhe janë mbyllur, sepse Edi Rama harxhon për ngrohjen e zyrës së tij më shumë se për ngrohjen e të gjitha shkollave të Shqipërisë.

Prandaj njerëzit po vdesin nga të ftohtit, sepse Edi Rama është ngrohtë në zyrën e tij.

Ndërsa pushteti lokal mezi po përballon situatën me burimet e veta, Edi Rama jep shfaqje me shtab emergjence nga zyra e tij e ngrohtë.

Ndërkohë njerëzit po e përballojnë vetë të ftohtit, po përballojnë vetë kosoton e mbajtjes së fëmijëve në shtëpi dhe mbajtjes ngrohtë të shtëpive për fëmijët.

Edi Rama nuk mendon për njerëzit. ndaj, së bashku duhet ta ndryshojmë qeverinë nga qeveri e Edi Ramës në qeveri të njerëzve.

Grida Duma për harxhimet e Edi Ramës për luksin e tij, 10 Janar 2017

Me Edi Ramën, krimi ka mbrojtjen dhe mbështetjen qeveritare.

Prej 9 muajsh ka një urdhër arresti ndërkombëtar për Klement Balilin që nuk është zbatuar ende. Klement Balili është ende i lirë dhe i pa shqetësuar nga Policia. Shteti i Edi Ramës godet të pambrojturit si Estrefin 22 vjeçar që vrau veten nga depresioni në burg pasi ishte arrestuar për 1 cigare hashash të dyshuar. Eskobari i Ballkanit nuk arrestohet sepse ka mbrojtjen e Edi Ramës dhe leviz i lirë.

Prej muajit Gusht, Edi Rama nuk dorëzon as kryesocialistin e Peqinit, Edurim Teqja i cili po hetohet për vrasjen e 17 vjeçarit Ardit Gjoklaj në landfillin e Sharrës. Edhe ai i pashqetësuar, madje merr pjesë në inaugurimet qeveritare sepse ka mbrojtjen politike të Edi Ramës.

Me Edi Ramën, krimi ka garancinë për ti shpëtuar ligjit, për ti ikur policisë.

Me Edi Ramën, shteti është inkriminuar duke u kthyer në shërbyes të trafikantëve të drogës.

Çdo ditë që Edi Rama qëndron në pushtet është një ditë e keqe për ne dhe të ardhmen tonë. Le ta ndalim së bashku këtë të keqe. Le ta vëmë qeverinë në shërbim të njerëzve.

Enkelejd Alibeaj për mbrojtjen që Edi Rama i jep krimit, 9 Janar 2017

Situata e rëndë nga moti në shumë zona të vendit nuk ka shenja përmirësimi.

Nga raportimet e qytetarëve dhe strukturave të Partisë Demokratike, mësohet se vazhdojnë të jenë të izoluara dhjetra fshatra, në Dibër, në Tropojë, në Has, në Pukë, në Malësinë e Madhe, në Shkodër, në Kukës.

Qeveria nuk është e pranishme me ndihma ushqimore, apo me medikamente në asnjë familje në zonat e izoluara dhe pa drita prej dy ditësh.

Moti i acartë konfirmon paaftësinë e qeverisë së Edi Ramës për tu përballur me realitetin. Por emergjenca ka nxjerrë në pah edhe një skandal tjetër tronditës.

Shumica e kompanive për mirëmbajtjen e rrugëve që janë të deputetëve të maxhorancës dhe qeveritarëve kanë marrë paratë por këto dy ditë nuk janë shfaqur asnjë minutë, as për të hedhur një lopatë me kripë apo skorje.

Në krye të këtij skandali është firma e deputetit Sadri Abazi regjistruar në emër të nipit, e cila në segmentin Koplik-Bog-Qaf Thore, dhe Koplik-Razem-Hani Hotit-Tamare-Vermosh, jo vetëm nuk ka nxjerrë asnjë punonjës në rrugë, por nuk denjon as tu hapë telefonin drejtuesve vendorë.

E njëjta situatë është edhe në zona të tjera.

Ndërkohë disa kompani mirëmbajtje të cilat kanë kryer detyrimet e tyre kontraktuale nuk kanë marrë asnjë qindarkë pagese dhe në disa raste si në aksin Milot-Peshkopi ju janë ndërprerë kontratat pa asnjë kriter dhe ua kanë rilidhur vetëm për një muaj në momentet e nisjes së emergjencës.

Ky abuzim në kurriz të qytetarëve në këto ditë të vështira meriton një hetim serioz nga prokuroria.

Ndërkohë Edi Rama vazhdon ti kthejë kurrizin qytetarëve, të izoluar, të mbërthyer nga i ftohti dhe errësira, duke mos pasur asnjë prani në terren, asnjë ndërhyrje në shërbim të tyre.

Arben Ristani për gjendjen në vend dhe abuzimet e qeverisë, 7 Janar 2017

Partia Demokratike përshëndet deklaratën e përbashkët të partive shqiptare në Maqedoni. Ky është një lajm i mirë dhe inkurajues për avancimin e të drejtave të shqiptarëve në këtë vend.

Bashkimi dhe bashkërendimi  mbi bazën e parimeve dhe qendrimeve demokratike dhe integruese duhet të përbëjë një orientim strategjik në qasjen faktorit politik shqiptar kudo ndodhet.

Partia Demokratike duke shprehur mbështetjen e plotë për këtë akt përbashkues, garanton se si sot në opozitë edhe nesër në qeverisjen e vendit, do ta shndërrojë  përbashkimin dhe bashkërendimin e faktorit shqiptar në aksin kryesor strategjik të komunikimit dhe punës për realizimin e interesave integruese të shqiptarëve në Ballkan.

Deklaratë e Partisë Demokratike, 7 Janar 2017