Blog

“Ishim për ngushëllim në familjen e Estref Halilit. Një familje e këputur ku dy prindërit kanë rritur fëmijët e tyre me shumë sakrifica duke mbledhur lulet e malit. Një familje që nuk ka asnjë lidhje me kultivimin e narkotikës. Estrefi është arrestuar ndërkohë që pastronte makinën e vëllait të vet, gjoja për posedim të një cigareje të dyshuar me marijuana, që nuk është provuar akoma dhe në kushtet e depresionit të thellë, ka vrarë veten në burgun e Rrogozhinës. Një djalë 22 vjeçar i rritur me sakrificë nga prindërit e tij i cili arrestohet për një krim të dyshuar, që në fakt konsumohet çdo ditë nga kryeministri, konsumatori më i njohur i kokainës në vend. E njëjta polici e cila nuk guxon të ngrejë dorën për Klement Balilin, për trafikantët, i njëjti shtet që liron kriminelë të njohur si Lul Berisha, i merr jetën një 22 vjeçari. Kjo është një vrasje shtetërore. Politikisht, përgjegjësi i kësaj vrasjeje shtetërore është Edi Rama. Unë shpreh ngushëllimet më të thella për këtë humbje tragjike të jetës së këtij 22 vjeçari, të Estrefit, jo vetëm familjes por gjithë komunitetit këtu në Kolonjë të Lushnjës dhe kudo në Lushnje, dhe u jap fjalën familjarëve të Estrefit, të rinjve lushnjarë se kjo padrejtësi e madhe do të marrë fund. Se shteti që dhunon njerëzit dhe mbron trafikantët dhe politikanët e lidhur me trafikantët, do të marrë fund. Se Partia Demokratike dhe unë, me ndihmën e gjithë qytetarëve tanë do të ndërtojmë një shtet që është në krah të qytetarëve dhe në krah të të rinjve. Një shtet që nuk i shpall luftë të rinjve të pamundur e të papunë të rritur me shumë sakrifica si Estrefi, por që i ndihmon ata të kapërcejnë vështirësitë e jetës, e të ndërtojnë një jetë të sigurtë, një të ardhme të sigurtë për veten dhe fëmijët e tyre. Dhe po kështu një shtet të ashpër deri në fund për trafikantët, kriminelët e vërtetë dhe për politikanët e papërgjegjshëm mbi të cilët rëndon sot edhe vdekja e Estref Halilit”.

Lulzim Basha ngushëllon familjen e 22 vjecarit, Estref Halili, nga Kolonja e Lushnjës që u arrestua dhe u cua në vetvrasje, mbi dyshime për një cigare hashash, 6 Janar 2016

Situata në vend është e rëndë, kemi zona të tëra të izoluara, rrugë të bllokuara dhe mungesë energjie elektrike.

Strukturat e Partisë Demokratike kanë sjellë informacion për njësitë dhe zonat më të goditura nga moti i keq.

Edhe pse pritej një mot i tillë, qeveria është e papërgaditur dhe mungon ndërhyrja e saj. Eshtë tronditëse ajo që u pranua edhe dje në shtabin qendror të emergjencave, nga drejtori Premci, se ka mungese kripe për të zhbllokuar rrugët e zëna nga dëbora dhe akulli. Kjo tregon papërgjegjshmëri dhe abuzim ekstrem.

Më kontretisht, informojmë si vijon për qytetet dhe fshatrat më të goditura;

Puka është një ndër bashkitë më të goditura. Rruga nacionale është pothuaj e pakalueshme për shkak të ndërhyrjes me vonesë. Sot asnjë makinë nuk ka levizur drejt Shkodrës për shkak të pasigurisë. Të gjitha njësitë administrative si Rrapë, Qelez, Luf-Qerret dhe Gjegjan janë të bllokuara totalisht dhe prej 48 orësh janë pa energji elektrike. Njësia e Gjegjanit vuan edhe mungesën totale të ujit të pijshëm. Shtabi i emergjencës nuk është mbledhur akoma.

Has-

Të dhënat tona tregojnë se prej dje, i gjithë rrethi është izoluar, të gjitha rrugët janë të bllokuara, dhe nga dje nuk ka drita, as ujë të pishëm. Nuk ka asnjë ndërhyrje qeveritare për ndihma, apo për të hapur rrugët. Banorët e rrethit të  Hasit e kanë të pamundur të marrin ndihmë shëndetësore. Trashësia e dëborës shkon nga 50 centimetra, deri në 1 metër në shumë zona.

Malësi e Madhe

E bllokuar, në vecanti njësia administrative e Kelmendit. Fshatrat e Vermoshit dhe Vuklës janë të izoluara. Rruga nacionale që lidh qytetin kalohet me veshtirësi dhe nuk ka pasur asnjë ndërhyrje për pastrimin e saj. Prej 3 ditësh në zonat administrative të Shkrelit, Kelmend, Kastrat nuk ka drita dhe rrugët nuk janë pastruar, dhe sot janë tërësisht të izoluara. Aktualisht gjysma e bashkisë ka mungesë të energjisë elektrike.

Kukësi

Mbi 24 orë i gjithë territori i Kukësit është pa energji elektrike. E bllokuar njesa administrative e Bushtrices, në  Kalis, Gryke -Caje Ujmisht dhe nuk ka ndërhyrje në rrugen nacionale Kukes- Diber. E bllokuar rruga Kukes-Fushe-Arrez, e per pasoje janë të izoluara fshatrat e njësisë Malzi. Të bllokuara janë edhe njësitë; Shishtavec, Topojan, Zapod. Të kalueshme me veshtirësi jane Rruga e Kombit, rruga Kukes -Bicaj, dhe fshatrat e kesaj njesie janë të izoluara dhe pa drita. Spitali rajonal i Kukësit është pa drita.

Dibër-

Të bllokuara nga dëbora janë të 7 njësitë administrative. Ka mungesa të pastrueseve të dëborës dhe nuk ka kripë për rrugët. Nga dje, nuk ka drita në zonat Lurë, Kala e Dodës, Fushëcimë, Selishtë. Mungesë totale të furnizimit me ujë në 18 fshatra. Problematike mbetet furnizimi me ilace dhe ushqime për zonat e bllokuara nga dëbora.

Mirditë-

Kacinari, Selita, Fani dhe Oroshi janë pa drita, prej ditës së djeshme, dhe me rrugë të brendshme të bllokuara . Asnjë ndërhyrje qeveritare deri tani në këto zona.

Bulqizë-

Të bllokuara nga dëbora akset e njësive administrative që lidhen me qytetin e Bulqizës. Konkretisht; Trebishtë -5 fshatra; Ostren -12 fshatra; Krastë -5 fshatra; Zecan -5 fshatra; Shupenzë -4 fshatra. Ka mungesë të borëpastrueseve dhe të furnizimit me kripë. Janë pa drita zonat e Ostrenit, Zecanit, Trebishtës.

Tropojë-

Eshte e bllokuar njesia Bytyq, ku 2 mijë banorë janë të izoluar dhe prej dy ditësh pa drita. Njësia Bujan, 3 fshatra të bllokuara, dhe pa drita. Në Fierzë, disa fshatra të izoluar dhe pa energji elektrike. Në Tropojë fshat, 7 fshatra të bllokuara dhe pa drita. Njësia Margegaj është pa energji elektrike. Zona e Gashit është në errësirë prej 2 ditësh. Në Lekbibaj janë izoluar 6 fhstra dhe janë pa drita. Dëbora në Tropojë shkon nga 50 në 100 centimetra.

Shkodër-

Janë bllokuar segmentet: Qafe Thore – Theth, duke izoluar tërësisht Njësinë Shalë. Eshte bllokuar segmenti Kir – Mali Shoshit – Ndreaj.  Në njesinë “Rrethina”, gjysma e zonës është pa drita, nga dje. Në 5 fshatra te  “Berdicës” nuk ka energji elektrike nga dita e djeshme. Në Dajc nuk ka drita prej dy ditësh. Në Shosh dhe në Shalë disa fshatra janë pa drita.

Korce-

Të bllokuara rruget : Korce -Lekas , Korce -Dardhe, Korce Vithkuq. Me probleme të medha rruga Korce -Liqenas. Te bllokuara dhe pa energji elektrike pjesa me e madhe e fshatrave të njesise administrative Vithkuq , Lekas , Vokopoje.

Lezhë-

Eshtë izoluar zona e Kashnjetit, dhe pothuajse të gjitha fshatrat e rrethit janë pa drita.

Mat-

Pa drita zonat e Xibrit dhe Gurrës, prej ditës së djeshme. Rruga Klos Dibër nuk është hapur ende për mjetet.

Kurbin-

Pa drita prej 24 orësh, gjysma e qytetit dhe të gjithë fshatrat. Ndërkohë janë krejt të izoluara fshatrat Vinjollë, Gorrnec, Livadhëz, Daul, Selitë, Shemri, Vilëz.

Krujë-

Në njësinë Cudhi; të bllokura fshatrat Shkrete, Mafsheq, Cudhi Kamp, Bruz-Mal, Rranze. Pa energji elektrike fshatrat; Rranzë Bruz-Zalle Bruz-Mal.

Librazhd-

Njësia Sterblevë e izoluar.

Partia Demokratike i bën thirrje kryeministrit të zgjohet, të lërë propagandën. Njerëzve nuk i vihet në ndihmë me llafe, por me prani në terren, me hapje rrugësh, me furnizime me ushqime, ujë e medikamente, dhe energji elektrike. Partia Demokratike po monitoron në vijimësi situatën dhe do të komunikojë me publikun cdo rast që do të shërbejë për tiu gjendur pranë qytetarëve.

Edmond Spaho me një raport të detajuar për zonat më të goditura në vend nga moti i keq, 6 Janar 2016

Partia Demokratike shpreh shqetësimin për gjendjen e rëndë ku ndodhet i gjithë rrethi i Hasit.

Të dhënat tona tregojnë se prej dje, i gjithë rrethi është izoluar, të gjitha rrugët janë të bllokuara, dhe nga dje nuk ka drita, as ujë të pishëm.

Raportohet se mungojnë absolutisht ndërhyrjet qeveritare dhe banorët e kanë të pamundur të komunikojnë apo të marrin ndihma.

Ndërkohë, kësaj gjendje i shtohet edhe epidemia e gripit, dhe banorët e rrethit të  Hasit e kanë të pamundur të marrin ndihmë shëndetësore.

Trashësia e dëborës shkon nga 50 centimetra, deri në 1 metër e gjysëm në shumë zona.

Partia Demokratike i bën thirrje qeverisë të ndërhyjë menjëherë dhe tu vijë në ndihmë banorëve të rrehit të Hasit.

Ne do të raportojmë sot në mënyrë periodike për situatën në zonat më të goditura nga moti i keq, me besimin se do tu vijmë në ndihmë banorëve.

Grida Duma për gjendjen e rëndë ku ndodhen banorët e Hasit, 6 Janar 2017

5 Janari është dita e shtypit të lirë shqiptar.

Nuk ka qenë dhe nuk është nevoja të shpallej me ndonjë vendim a dekret të veçantë.  E njeh të tillë vetë historia e shtypit tonë të lirë.

Ku nisi?

Ja, përgjigja e kësaj pyetjeje na mbledh çdo vit ne ketë takim nderimi dhe respekti për gjenezën, për pikënisjen.

PD dhe unë si kryetar i saj kemi kënaqësinë të ndajmë jo vetëm me RD-në, por me gjithë median shqiptare këtë ditë historike.

Përpjekjet e njerëzve që e themeluan dhe e rritën Rilindjen Demokratike janë shembull i jashtëzakonshëm i kurajos dhe sakrificës për ta nxjerrë vendin nga dhuna izolimi, genjeshtra dhe shtypja politike dhe për të ndërtuar një të ardhme të lirë, të denjë dhe europiane.

Përpjekjet e tyre janë shembulli më i shkëlqyer i shërbimit të njerëzve të medias ndaj të vërtetës, ndaj interesit publik.

Sikurse dua tu shpreh mirënjohjen gjithë gazetarëve e analistëve pavarësisht pozicioneve që mbajnë, për kontributin e tyre në gjithë këto vite.

5 janari i vitit 1991 solli bijën e parë të lirisë së medias, e sot kemi një shpërthim të lirisë, me gazeta, radio, televizione moderne, portale nga më të larmishmet, që përbëjne botën e medias shqiptare, opozitare, proqeveritare, të djathtë, të majtë, të qendres, të  lirë, e kështu me radhë.

Media shqiptare ka qenë dhe mbetet në pararojë të Shqipërisë europiane. Është fakt se media ka mbërritur para politikës, para institucioneve dhe vetë shoqërisë sonë në stacionet e integrimit europian të vendit.

Nderim për gjithë gazetarët, për gjithë publicistët, për gjithë mediat që kanë qenë dhe janë pjesë e këtij udhëtimi të vështirë, por të bukur dhe fisnik.

Media shqiptare në tërësinë e saj ia ka dalë të qëndrojë si një nga shtyllat e lirisë, pavarësisht përpjekjeve që ka bërë e bën pushteti apo bota e krimit për t’i mbyllur gojën, për ta trembur, për ti diktuar censurën ekonomike, për ta kapur.

Ne emër të opozitës dhe si qytetar i këtij vendi unë përshendes dhe mbështes fuqishëm lirinë e medias dhe median e lirë shqiptare; mbështes pluralitetin dhe profesionalizmin e saj; mbështetes përpjekjet e çdo gazetari, analisti, apo botuesi për të ruajtur pavarësinë dhe busullën e interesit publik .

“Liria jonë varet nga liria e mediave”- ky postulat i Thomas Jeferson vazhdon të tingëllojë i vërtetë për çdo demokraci, pavarësisht nga vendi dhe mosha e saj.

Ja përse në konceptin dhe bindjet e mia, liria e medias, si e mirë publike, është një detyrë dhe një gur prove për çdo politikan dhe shtetar.

Kush tundohet ta cënojë lirinë e medias, e ka me Lirinë.

Kush shërben lirinë e medias shërben Lirinë.

Besoj se këto takime do të ishin zbehur përgjatë viteve nëse 5 janari do të mbetej vetem në përmasën e nderimit apo nostalgjisë.

Ku jemi? Ku do shkojmë? Cila është e ardhmja?

Ne mblidhemi sonte edhe për këtë.

Eshtë një analizë që e bën çdo media për llogaritë e saj. E bëjnë e duhet ta bëjnë edhe institucionet e demkoracisë, pra edhe opozita.

Korrupsioni në sistem, krimi në sistem, klientelizmi në sistem, arroganca dhe arbitrariteti i skajshëm, janë sfidat dhe dorashkat që na ka hedhur të gjithëve në fytyrë pushteti i sotëm: opozitës, medias, shoqërisë civile, shoqërisë shqiptare.

Kjo është qeveria që edhe kur kapet duke abuzuar e vjedhur, me presh në duar, me fakte dhe shifra të pakundështueshme, na thotë ne, ju thotë ju, ju thotë qytetarëve “pse hidhni baltë”.

Kjo është qeveria e mjerimit dhe përkeqësimit, që i kërkon popullit të këndojë për të!

Një qeveri si kjo, kërkon të mundë njerëzit e t’u mbyllë gojën me të keqen e saj.

Opozita e refuzon këtë cinizëm ekstrem të qeverisë. Media lypset ta refuzojë dhe neverisë  nga pozicioni i vet.

Sonte do të doja të dalim nga pozicionet, e të afrojmë qëndrimet për disa çeshtje që nuk kanë ngjyrim politik, por janë standarde të etikës demokratike.

Së pari, diversiteti i opinioneve si vlerë, por jo si burim mjegulle për të fshehur të vërtetat që janë çeshtje faktesh dhe shifrash konkrete.

E kam fjalën për të vërtetat e thjeshta, të pandshme, logjike.

Nuk ka dy të vërteta për drogën. Ka vetëm një. Pesëfishim i sipërfaqes së mbjellë, në vitin 2016.

Nuk ka dy të vërteta për bosët e drogës. Ka vetëm një: nuk kapen dhe këtë nuk e pengon vetingu. E pengon Qeveria, Ministri i Brendshëm, Kryeministri.

Kujt ia paguajnë paratë për cdo rrënjë droge trafikantët? Shoqërisë civile? Mediave? Apo opozitës? Ka vetëm një të vërtetë për këtë.

Nuk ka dy të vërteta për botën e korrupsionit dhe  krimit dhe: ka vetëm një.

Kudo ku vidhet me tendera dhe koncensione, janë njerëzit e qeverisë dhe kryeministrit. Nuk ka të tjerë!

Kush i hodhi në xhepa klientësh mbi 300 milionë euro gjasme të shëndetësisë. Kush? Qytetarët, pacientët, opozita, gazetarët? Ka vetëm një të vërtetë për këtë.

Kudo ku lartësohen ndërtime pa leje, kudo ku shqyhen, tjetërsohen e përvetësohen prona në mënyrë kriminale, janë njerëzit e lidhur me qeverinë, është krimi me pushtet.

Nuk ka dy të vërteta për rrogat dhe pensionet në tërësi. Ka vetëm një: nuk janë rritur asnjë qindarkë.

Nuk ka dy të vërteta për hapjen e negocitave: ka vetëm një. Nuk hapen sepse nuk janë përmbushur standardet dhe, sepse kemi zgjedhjet përpara dhe qeveria nuk ka besueshmërinë se mund ti zhvilloje sipas standarteve.

Europa kërkon provën. Ora e provës po vjen.

Meqë jemi të zgjedhjet, unë u bëj thirrje të gjitha mediave të vendit, pa asnjë dallim, përfshirë mediat që janë kritike e shumë kritike me opozitën apo me mua: të bashkohemi sot në një angazhim të përbashkët për zgjedhje të lira e të ndershme:

-të luftojmë sëbashku kundër çdo forme të riciklimit direkt apo indirekt në politikë të individëve me rekorde kriminale që ligji i dekriminailzimit i nxjerr nga dera, por vullneti i mbrapshtë i atyre që i promovuan në politikë po kërkon ti fusë nga dritarja, me bedelë e me forma të tjera.

-të luftojmë se bashku për të zhdukur njëherë e mirë shitblerjen e votës si atentati më i madh që mund t’u behet zgjedhjeve të lira e të ndershme.

Të dashur miq,

Dua të pohoj para jush se si opozitë, prej të vërtetës ekzistojmë dhe prej saj do të fitojmë. Këtu kam parasysh edhe të vërtetën që lidhet me punën, me sjelljen, me qëndrimet e opozitës.

Kam qenë, jam dhe do të jem kurdoherë i hapur, bashkëpunues dhe mirëkuptues me mediat, me kritikat e saj. Vizioni im i hapjes së PD-së e përfshin këtë dimension: hapjen ndaj mendimit të lirë, hapjen ndaj mendimit ndryshe, hapjen ndaj medias pa dallim, hapjen ndaj kritikave.

Refuzimi i kritikës është refuzimi i vetë idesë së ndryshimit. Kjo është një nga pikat ku unë dëshiroj të bëj ndryshimin.

Besoj dhe uroj që kjo ditë të shënojë bashkëpunimin e ri të opozitës me median e lirë në funksion të së vërtetës, për të mirën e lirisë dhe interesit publik.

Mirësekeni ardhur sonte.

Gëzuar të gjithëve ditën e shtypit të lirë. Vit të mbarë për ju dhe mbarë shqiptarët.

Lulzim Basha në 26 vjetorin e themelimit të gazetës Rilindja Demokratike, 5 Janar 2016

Me Edi Ramën, Klement Balili që e kërkon gjysma e policive të Europës, e cilësohet nga CNN si, Eskobari i Ballkanit, trafikanti më i madh i drogës në rajon, gëzon mbrojtje, liri, pushtet, madje dhe zyrë të lartë drejtuese në shtet, dhe asgjë nuk e gjen atë, edhe pse duhej arrestuar prej majit të vitit 2016.

Me Edi Ramën, një i ri 22 vjecar, Estref Halili, i arrestuar nga policia sipas familjarëve të tij me 3 gram hashash, trajtohet pa mëshirë, dhe shtyhet drejt vetvrasjes në qeli.

Këto janë dy standardet e Edi Ramës.

Në shërbim të trafikantëve, të krimit të organizuar, të bandave që kontrollojnë drogën në rajon, dhe i dhunshëm me të pamundurin, me të vobektin që është kapur me 3 gram hashash.

Kjo është padrejtësia që ka mbjellë ai, në këtë vend, që po trondit sot shoqërinë, që po vret shpresën.

Ne e dimë se frymëzuesi e kësaj klime është Edi Rama, por ata që kanë direkt dorë në vdekjen e 22 vjecarit, duhet të dalin para drejtësisë.

Partia Demokratike i bën thirrje prokurorisë të hetojë me urgjencë dhe seriozitet të gjithë procedurat që janë ndjekur nga policia dhe autoritetet e burgjeve në rastin e 22 vjecarit Estref Halili. Të hetojë e të nxjerrë para ligjit përgjegjësit.

Deklarata per mediat e Grida Dumes, 4 Janar 2017

Partia Demokratike dënon kërcënimin me jetë të ish-kryetarit të Bashkisë, Leskovik, Fatmir Guda, një akt kriminal qartazi me sfond politik dhe me nxitjen e zv-kryeministrit, Niko Peleshi.
Zoti Guda një anëtar dhe aktivist i Partisë Demokratike, mori kërcënime të përsëritura gjatë fushatës së fundit zgjedhore në Kolonjë, por kulmi arriti dy ditë më parë kur bandat e lidhura me pushtetin i vendosën pistoletën në kokë.
Partia Demokratike i kërkon Prokurorisë të hetojë me shpejtësi këtë rast të rëndë, këtë kërcënim kriminal dhe të nxjerrë para ligjit bandat e Peleshit.

Deklarate e Partise Demokratike, 30 Dhjetor 2016

Fevziu: Z.Basha, faleminderit që pranuat ftesën. Eshtë një format ndryshe, nuk janë pyetje të mirëfillta politike, nuk ka as tension. Eshtë një intervistë pak a shumë në atmosferën festive dhe një gjysëm profili i asaj që ju bëni, edhe thjesht jashtë zyrës, por kam edhe dy-tre pyetje politike në fund.

Basha: Faleminderit për ftesën Blendi.

Fevziu: Çfarë raporti keni me festat. I kam pyetur të gjithë të ftuarit e tjerë të këtij emisioni të sotëm. Nuk flas vetëm sot, sepse e di që kryetari i opozitës është gjithmonë më shumë i ngarkuar se ç’e imagjinojmë ne. Por flas edhe në përgjithësi, edhe në rininë tuaj, edhe në fëmijërinë tuaj dhe tani që jeni prind.

Basha: Gjërat kanë ndryshuar shumë, në mënyrë themelore. Për mua, festat në radhë të parë, janë mundësi për të kaluar më shumë kohë me familjen. Eshtë borxhi më i madh që kam. Eshtë ndaj familjes time, ndaj vajzave të mia, ndaj bashkëshortes time, ndaj prindërve. Por kjo ka ndryshuar ndër vite. Brezi ynë ka njohur festat në kohën e diktaturës të cilat ishin një mundësi për të qenë bashkë, në gëzimin e festimit familjar.

Fevziu: E ruani akoma këtë traditë, festoni në shtëpi zakonisht për Vitin e Ri?

Basha: Me sa mundemi po. Herë me prindërit me mi, herë me prindërit e Aurelës. Me vëllain tim, me vëllain e Aurelës dhe shpeshherë vitet e fundit me miq, brenda familjes.

Fevziu: E ndjeni atmosferën festive, pasi ka njerëz që i bezdisin festat

Basha: Pa dyshim, kur je në një pozicion publik, festat sjellin me vete jo vetëm privilegjin, por edhe detyrimin e një kontakti edhe më intensiv me njerëzit, duke filluar nga familjarët, miqtë, bashkëpunëtorët, qytetarët. Pra në këtë kuptim, sezoni i festave sjell impenjim ekstra.

Fevziu: Ta prish axhendën rutinë të ditës

Basha: E prish, por nga ana tjetër është edhe një mundësi për një kontakt të çliruar nga stresi dhe brengat e përditshme. Të urosh njerëzit në telefon, me mesazhe, kur i takon…

Fevziu: E keni dekoruar shtëpinë?

Basha: Kemi vënë një bredh.

Fevziu: Kush merret me dekorimin?

Basha: Aurela me vajzën e madhe, Dafinën.

Fevziu: Vajzat kënaqen nga atmosfera e festave?

Basha: Jashtëzakonisht! Gëzimi i festave për mua sot, është gëzimi i fëmijëve. Kur shoh fëmijët që gëzohen, kur shoh vajzat që gëzohen, ky është gëzimi që përjetoj për festat.

Fevziu: Ju thatë që zakonisht e ruani traditën për ta festuar sërish në shtëpi, në mënyrën tradicionale që kemi njohur gjithmonë. Por kam përshtypjen se ka gjithmonë akuza se në fakt ju udhëtoni më shumë në Hollandë se sa në Shqipëri, që do të thotë, e bëni atje apo këtu Vitin e Ri.

Basha: Ne e bëjmë vitin e ri këtu, këtë vit do ta bëjmë këtu, ka pasur disa raste kur e kemi bërë atje, por në tërësi familja feston këtu, familja jeton këtu.

Fevziu: Përse ju ngatërrojnë kaq shumë me Hollandën. Vura re LSI-në, në një deklaratë të fundit që sërish e riforcon këtë çështje.

Basha: Unë kam jetuar në Holandë, kam studiuar në Holandë dhe pa dyshim që kam shijuar vitet e mia në Holandë dhe i jam mirënjohës përjetë atij vendi për atë që më fali. Privilegjin që kam patur dhe vitet e para të hapjes së Shqipërisë për të shkuar e studiuar, për të krijuar miqësi atje, për të mësuar rreth një shoqërie me mundësi të barabarta për njerëzit. Ky është një privilegj që unë e kam patur, por unë kam vendosur vetë të rikthehem në shtëpi në vitin 2004, pas një periudhe katër vjeçare shërbimi në Kosovë.

Fevziu: Kishit një dilemë, të ktheheshit në Shqipëri apo të qëndronit?

Basha: Pa dyshim. Ka qenë një vendim i rëndësishëm i jetës sime, por një vendim i prerë, i marrë në konsultim me bashkëshorten time Aurela, atëherë nuk kishim fëmijë. Ne ndodhemi prej vitit 2004 këtu. Nuk janë mediat që kanë spekuluar për këtë. Por ka qenë Edi Rama që ka spekuluar. Ajo është një sajesë, një baltosje. Për fat të keq, është një nivel shumë i ulët për dikë që akuzon çdo ditë mediat si kazan e vetë bie në nivelin e baltosjes së jetës familjare të fëmijëve të kundërshtarit politik. Por siç e kam thënë edhe më parë, unë kam zgjedhur ta injoroj këtë. Ka shumë miq, komshin të pallatit, që thonë, si nuk i kthen përgjigje. Jemi në qendër të vëmendjes së publikut dhe jemi këtu për publikun dhe jo për veten tonë. Ky është një nivel i ulët i kundërshtarit politik, të merret me fëmijët e kundërshtarit, por kur kam parasysh se ç’heqin fëmijët e shqiptarëve nga i njëjti kundërshtar politik, fëmijë që për këtë festë nuk marrin dot dhurata, shumë prej tyre jetojnë në shtëpi ku u është këputur energjia elektrike, apo ku prindërit janë pa punë dhe nuk sigurojnë dot mjetet bazë të jetës, pra kur shoh se çfarë për fat të keq kundërshtari politik ka shkaktuar me politikat e tij, me papërgjegjësinë e tij, për qindra, mijëra fëmijë shqiptarë, mendoj që nuk është e domosdoshme që të reagoj sa herë që merret me fëmijët e mi.

Po, ne jetojmë në të njëjtin apartament që prej vitit 2005, apartament që e kemi blerë në vitin 2003, para hyrjes në politikë. Vajzat shkojnë këtu në shkollë, vajza e madhe shkon në shkollë dhe vajza e vogël shkon në kopësht. Gjithçka tjetër është një sajesë e pastër që bëhet vetëm për qëllime politike.

Fevziu: Ju jeni larguar në Holandë në moshë shumë të re, apo jo?

Basha: Në vitin 1993.

Fevziu: Ishit maturantë në mos gaboj… Ose në vitin e parë të studimeve dhe keni studiuar atje. Në momentin që jeni kthyer në Shqipëri, sipas të dhënave që kam unë, të mos jem i gabuar, keni pasur një pagesë shumë të mirë në Kosovë. Përse një çift që paguhet mjaft mirë në një vend tjetër, që ka ndërtuar edhe një lloj jete në një shtet tjetër ku ka jetuar për më shumë se sa një dekadë, vendos të kthehet në Shqipëri? Cili ishte motivi që ju shtyu të ktheheshit?

Basha: Motivi ishte dhe është, sepse ne besojmë, besojmë tek Shqipëria. Besojmë se edhe Shqipëria ka të gjitha shanset dhe mundësitë të kthehet në një vend ku jo vetëm unë dhe familja ime, por çdo shqiptar, të ketë mundësinë të jetojë mirë.

Fevziu: Ju ftuan apo vendosët të vinit vetë z.Basha?

Basha: Pa dyshim edhe jam ftuar, por vendimin e kam marrë unë. Vendimin e kam marrë unë bashkë me bashkëshorten time, kishim një vit që ishim martuar, në vitin 2004 ishim martuar. E kam shpjeguar para disa vitesh por po e kthej prapë në vëmendje. Isha para disa vendimeve, kisha një ftesë për të punuar në një institucion ndërkombëtar në Hagë që sapo themelohej, kisha një ftesë për të punuar në New York, po kështu për Organizatën e Kombeve të Bashkuara dhe një ftesë të përsëritur nga opozita, nga Partia Demokratike, nga Sali Berisha, për t’iu bashkangjitur përpjekjes opozitare dhe me thënë të drejtën, shpirti më qante prej vitesh…

Fevziu: Gjatë kohës që ishe në Holandë, ishe i lidhur me Shqipërinë?

Basha: Në mënyrën më intensive.

Fevziu: Vinit shpesh në Shqipëri?

Basha: Pothuajse çdo muaj. Puna më lidhte sepse gjatë kohës që studioja kam punuar part-time kryesisht me zyrën e marrdhënieve me jashtë të Fakultetit Juridik, kemi pasur disa projekte me Shqipërinë dhe kjo më mundësonte me mjete të tjera, jo me mjetet e studentit, të isha në një kontakt shumë më të shpeshtë se sa ç’i rastis një studenti në veçanti siç ishin vitet ’90 që ishin vite edhe me mundësi më të pakta për studentët se sot.

Fevziu: Z. Basha ju u larguat fiks në momentin e një kthese të madhe të Shqipërisë në aspektin shoqëror. Kur u kthyet pothuajse 12 vjet më pas, sa kishte ndryshuar Shqipëria? Jo në anën e ndërtimeve, atë vizive, por edhe në shoqëri.

Basha: Pa dyshim që ishte një Shqipëri ndryshe nga ajo që unë kisha lënë. Kishte zhvillim dhe kishte edhe prapambetje. Varet nga pikëvështrimi. Pikëvështrimi im ishte pa dyshim dhe mbetet i dikujt që ka shijuar dhe gëzuar frytet e lirisë dhe mundësive që ofron liria në Europë, në Perëndim, në një nga vendet më të zhvilluara, më demokratike, më tolerante siç është Holanda. Kështu që, nga kjo pikëpamje, kërkesat e mia për realitetin shqiptar edhe para futjes direkte në politikë, kanë qenë shumë më të larta se realiteti. Padurimi, frustrimi me gjendjen, dëshira për të bërë diçka, besimi se mund të bëj diçka, kanë qenë motivuesit kryesorë për të marre vendimin që mora.

Fevziu: Z. Basha, në këto momente që keni qenë i angazhuar si kryetar opozite, si Ministër dhe si anëtar i mazhorancës. Ka pasur ndonjë moment që jeni ndjerë i penduar që morët vendimin për t’u kthyer?

Basha: Asnjëherë! Në asnjë çast.

Fevziu: A ka pasur moment që jeni lodhur nga politika. Keni thënë, dreqi ta marrë, le të shkojë ku të shkojë…

Basha: Jo te shkojë ku të shkojë… por me të vërtetë jam kryetar i opozotës por jetoj me realitetin shqiptar, me hallet, me zhgënjimet, me shpresat e shqiptarëve dhe unë si çdo njeri kam momentet e frustrimit tim total në veçanti me pamundësinë për të ndryshuar gjërat shpejt dhe mirë siç dua dhe siç besoj se mund të ndryshojnë. Momente të tilla ka patur plotë e në veçanti këto tre vitet e fundit. Por po kështu, ka patur edhe momente shumë pozitive. Si sot që po flasim, shqiptarët kanë marrë një lajm shumë të mirë. Dy ditë para fundvitit më në fund beteja për dektiminalizimin ka shënuar fitoren e parë. Pra sigurisht është një problem që u krijua nga politika. Nuk e krijuan shqiptarët e thjeshtë, e krijoi politika. Beteja që ka nisur është në një farë mënyre për të prishur një të keqe të madhe, një dëm të madh, që politika po i bën Shqipërisë, po i bën shqiptarëve, po i bën fëmijëve të tyre. Por megjithatë njerëzit duhet të dinë te shijojnë edhe arritjet, edhe fitoret. Dhe sot mendoj që është një ditë fitoreje, shprese, për shqiptarët. Eshtë edhe një sinjal i fortë që shoqëria, njerëzit e kanë forcën për t’u ndarë nga e keqja. Nuk do të jetë një betejë e lehtë. Sepse krimi në politikë ka mbështetje dhe ka mbrojtje qeveritare, por jam i bindur që nëse shqiptarët e ndershëm bashkohen në vendosmërinë për t’u ndarë nga e keqja, do të ndahen nga e keqja dhe do të ecim përpara. Kjo është bindja ime.

Fevziu: Z. Basha çfarë bëni ju në kohën e lirë pasi kam përshtypjen shumë pak veta e dinë që në rininë tuaj ju keni qenë një volejbollist. Çfarë mbeten nga pasionet e vjetra, çfarë pasionesh të reja keni?

Basha: Pasionet e vjetra, sporti…

Fevziu: Vazhdoni të luani volejboll?

Basha: Jo, nuk është se më mbetet shumë kohë. Kam vite Blendi që nuk kam arritur të luaj në asnjë ndeshje të vetme. Sigurisht që volejbolli është një lojë skuadre, është lojë ekipi. Edhe po të kem një moment nuk është se mund të luhet menjëherë. Koha dhe rrethanat në të cilat veproj, si kryetar i partisë më të madhe opozitare, më kufizon mundësinë për të patur kohë të lirë. Koha e lirë zakonisht shkon për familjen, për fëmijët dhe pak për lexim.

Fevziu: Keni akoma mundësi të lexoni?

Basha: Kush do, e gjen gjithmonë mundësinë për të lexuar, por për mua janë orët e vona të natës.

Fevziu: Dita zakonisht, sa e ngarkuar është? Dhe çfarë axhende ka dita?

Basha: Ka një axhendë jashtëzakonisht të ngarkuar e cila komplikohet në mënyrë të rregullt, të padiskutueshme nga ndërhyrjet, ngjarjet e ditës, të cilat kurrë nuk të lënë të kesh një ditë të planifikuar. Siç nis në mëngjes, nuk mbaron kurrë në darkë.

Fevziu: Gjatë gjithë këtyre viteve që ju keni qenë edhe ministër i mazhorancës, dhe më pas do t’ju pyes edhe për vitin 2016, cili ka qenë momenti që keni ndjerë sadisfaksionin më të madh?

Basha: Kam disa. Lidhen sigurisht me produktet e punës, lidhen me momente të cilat është e thjeshtë të thuash që i kemi ëndërruar, por as nuk i kemi ëndërruar, si momenti i marrjes së ftesës për në NATO, kur isha Ministër i Jashtëm, momenti i shpalljes së Pavarësisë së Kosovës, heqja e vizave për shqiptarët, udhëtimi i parë me studentët më 15 dhjetor pa viza, fiks 6 vjet e dy javë më parë, moment i paharrueshëm. Kur ingranazhet që punojnë në kokën e politikanit dhe që racionalizojnë gjithçka në fakte, argumente, në shifra, i lënë vendin një reflektimi personal, njerëzor, një miklimi që ja isha pjesë e diçkaje që realisht ndryshon jetën e njerëzve për të mirë dhe kjo nuk ndodh në momentin e sallës, të dritave apo lajmit, ndodh kur takon një çift… nuk e harroj një çift të moshuarish në tregun e Tiranës, dy apo tre javë pas liberalizimit të vizave, të cilëve u shkelqenin sytë sepse për herë të parë në 10 vjet do të shkonin të takonin djalin në Gjermani dhe ajo që merr nga një moment i tillë është shumë më e madhe se sa madhështia e heqjes së vizave, ceremonia në Bruksel. Fakti se si influencon jetën e përditshme të njerëzve të zakonshëm, të njerëzve të thjeshtë dhe kupton se ke pasur rolin tënd, që unë kam pasur rolin tim për t’i bërë këta të ndjehen kështu.

Fevziu: Pra ke një kontribut personal në këtë rezultat të themi…

Basha: Politika është një sport i vështirë. Një sport gjaku thonë në Uashington por po kështu nëse orientohet nga e mira është një mundësi e jashtëzakonshme për të bërë gjënë e duhur, në javët, muajt apo vitet që na fal Zoti në këtë jetë.

Fevziu: Po momenti më i vështirë i karrierës së mëparshme, jo i këtij viti?

Basha: Padyshim ka patur shumë. Ka pasur sfida. Nuk dua sonte të risjell momentet tronditëse që kam kaluar edhe në përgjegjësitë e mia. Por ka patur të tilla.

Fevziu: Po në vitin 2016 cili ka qënë momenti më i vështirë?

Basha: Edhe aty do të ndaja disa momente. Ky ka qënë një vit sfidash të jashtëzakonshme për mua si kryetar i opozitës, si qytetar. I kam rënë Shqipërisë cep më cep dhe kam parë njerëzit në varfërinë e tyre, braktisjen e tyre, pamundësinë e tyre.

Fevziu: Gjithsesi varfëria ka qënë aty z.Basha edhe me më përpara. Nuk i ka lindur këtij vendi 3 vitet e fundit?

Basha: Ka qenë, por e kombinuar me vrasjen e shpresës që është një risi e këtyre 3 viteve dhe e theksuar në veçanti në vitin e fundit, është një dramë, një gur që të varet rëndë në shpirt. Ka edhe momente të vështira në kuptim racional të fjalës. Ka qënë momenti i realizimit, pas zgjedhjeve në Dibër, që krimi…

Fevziu: Ishte moment i vështirë zgjedhjet në Dibër apo produkti i tyre? Mesazhi i tyre?

Basha: Produkti i tyre. Mesazhi që jep për të nesërmen.

Fevziu: Përse?

Basha: Sepse tregoi që krimi ishte bërë kaq i fuqishëm me mbështetje qeveritare dhe politike sa që jo vetëm influenconte por asgjesonte procesin politik. Pra nga njëra anë shohim program, me kandidat, me fushatë, me një përpjekje klasike për të bindur njerëzit për të votuar për alternativën tënde, dhe në fund e kupton që e gjitha ishte një përpjekje që përballë nuk kishte simotrën e vet të kampit kundërshtar por kishte krimin e kamufluar, do të thoja lehtë.

Fevziu: Dhe ky do të transferohet si një problem i madh edhe në zgjedhjet e ardhdhme…

Basha: Problem i jashtëzakonshëm. Shkatërrim i procesit politik nga krimi është problem i jashtëzakonshëm. Eshtë sfida më e madhe që kanë sot shqiptarët sepse është sfida që nuk ka të bëjë vetëm me zgjedhjet e ardhshme por ka të bëjë me mundësinë apo pamundësinë për të ndryshuar jetët e njerëzve, për të ndryshuar Shqipërinë. Zgjedhjet çfarë janë?! Janë një mundësi për të ndryshuar për më mirë. Pra shkatërrimi i zgjedhjeve dhe i procesit politik, shkatërrimi i ofertave dhe i garës është në fakt përpjekja me tinzare e këtyre 26 viteve për të asgjesuar shpresën e shqiptarëve se janë ata që kanë në dorë ndryshimin dhe jo një dorë njerëzish.

Fevziu: Nuk doja të hyja në politikë, por ky mund të jetë një problem për zgjedhjet e ardhshme dhe çfarë do të bëni konkretisht?

Basha: Ne e kemi të qartë rrugën dhe do ta ndjekim atë deri në fund. Alternativë tjetër përveç fuqizimit të qytetarit, kthimit të vendimarrjes tek qytetari dhe jo tek një grup politikanësh, kriminelësh dhe oligarkësh për Shqipërinë, nuk ka dhe nuk do të ketë. Për këtë është e domosdoshme që Shqipëria të organizojë zgjedhje të lira dhe të ndershme. Jo vetëm kaq, por që tu ofrojë qytetarëve një sistem përfaqësimi ku qytetarët përfaqësohen nga deputetët dhe deputetët përfaqësojnë qytetarët përpara se të përfaqësojnë vullnetet politike të kryetarëve të partisë. Kjo kërkon një reformë të thellë kushtetuese. Urgjenca numër një është ndarja e politikës nga krimi. Urgjenca numër dy paralelisht me këtë, është të sigurojmë zgjedhje të lira e të ndershme. Në bindjen time, zgjedhje të lira e të ndershme me këtë kryeministër nuk ka dhe nuk mund të ketë ndaj beteja dhe sfida që na pret është që ti japim Shqipërisë instrumentet që çdo shqiptar të vendosë pa frikë, pa shantazh, pa shitblerje, si e do ai formën e qeverisjes dhe cilit program dëshiron ti besojë me votë dhe cilin deputet kërkon të zgjedhë në Kuvendin e Shqipërisë.

Fevziu: Kur bëhesh kryetar i opozitës me një pozicion të fuqishëm si i juaji, ose kur bëhesh kryeministër, kryetar Kuvendi, President apo edhe ministër, gjithmonë krijon një zhbalancë forcash. Humb miq dhe fiton njerëz të tjerë që në shumicën e rasteve afrohen për shkak të postit. Ju ka qëlluar që në këto vite në politikë të humbisni miq apo njerëz të afërm? Ose njerëz që u besonit  dhe krijon një mosbesim mes jush?

Basha: Dua të shpresoj që jo. Por padyshim që ngarkesa dhe sfidat me të cilat përballesh në detyrën e drejtimit të opozitës janë të tilla që kërkojnë shpesh të vendosësh interesa shumë më madhore mbi, le të themi interesa personale, apo shpeshherë edhe mbi miqësi personale. Kjo është barra e lidershipit.

Fevziu: Eshtë e vështirë kjo?

Basha: Eshtë e vështirë por është diçka që unë e kam pasur të qartë që prej ditës së parë që kam marrë këtë përgjegjësi.

Fevziu: Krijon keqkuptime?

Basha: Jam i sigurtë që po.

Fevziu: Detyrohesh ti thuash shpesh jo, një miku të vjetër sepse mendon që nuk e ben dot atë që duhet dhe mund ti thuash po, dikujt që mund të ketë qënë kundërshtari yt…

Basha: Detyra e lidershipit nuk është vetëm të udhëheqë por edhe të ruajë për sa është e mundur mirëkuptimin për vendimet e vështira që duhet të marrë. Dhe kjo ndodh përmes komunikimit. Nëse komunikohet, nëse bëhet përpjekja për të shpjeguar se cilat janë motivet e një vendimi që duhet marrë dhe nuk favorizon një mik, një koleg, një bashkëpunëtor por favorizon një ndërmarrje shumë më të madhe atëhere kam bërë pjesën time. Ajo që më bën të ndihem keq është nëse ka pasur raste kur komunikimi ka munguar dhe kjo në radhë të parë është përgjegjësia e lidershipit.

Fevziu: A jeni njeri që e ruani mërinë?

Basha: Jo.

Fevziu: Që do të thotë se i kapërceni situatat me ata që ju shajnë, ju kritikojnë, që janë agresivë me ju?

Basha: Nuk ruaj mëri. Eshtë një tipar që e kam mbartur që nga jeta civile nëse mund të themi këtu para futjes time në politikë. Mundësia për tu detashuar nga vorbulla e politikës që shpërfytyron njerëzit, kundërshtarin politik, presioni i jashtëzakonshëm që i bën ata të dalin nga vetja nga e cila nuk jam imun as unë sepse edhe unë kam pasur momentet e mia të tejkalimit të së drejtës, por në tërësi ndjek parimin që të jem i drejtë në raport me ato që besoj, pra parimet.

Fevziu: E drejtë aq sa mundet sepse drejtësi absolute nuk ka asnjëherë…

Basha: Përpiqem. Gjyqtari nuk jam unë. Gjyqtari janë qytetarët.

Fevziu: Edhe një pyetje që do të doja një përgjigje të sinqertë që duket sikur është bërë gjithmonë por po e ndërtoj në formë ndryshe. Sa e vështirë është të drejtosh PD-në në një moment që ka humbur zgjedhjet në një mënyrë spektakolare dhe mbi të gjitha pas një drejtimi 21 vjeçar të njërit prej figurave më simbol të politikës shqiptare të këtij tranzicioni, të Sali Berishës…

Basha: Shumë e vështirë. Nuk e kam fshehur në asnjë moment këtë. Eshtë shumë e vështirë, ka qënë shumë e vështirë.

Fevziu: Që kur mendohej zëvëndësimi i Berishës mendohej një ndërmarje e pamundur. Por në momentin që ju e morët përsipër, sa sa e keni ndier këtë presion?

Basha: Presion i jashtëzakonshëm.

Fevziu: Krahasimi me atë, vednimarrja duke menduar gjithmonë se si do ta bënte ai…

Basha: Krahasimi me të…unë besoj se e kam bërë të qartë pozicionin tim që nga fillimi, që kur kam kërkuar votën e demokratëve, që mos prisni që të zëvëndësoj Sali Berishën. Unë jam Lulzim Basha. Kam stilin tim, kam mënyrat e mia, kam format e mia. Natyrisht me Sali Berishën, me bashkëpunëtorët e mi në PD, me lidershipin e PD-së në vite ndaj jo vetëm krenarinë për historinë pozitive të kësaj partie, peshën e përgjegjësisë për pjesën jo pozitive, edhe vlerat e tjera. Por stili është i imi. Mënyrat, format me të cilat unë drejtoj partinë janë të mia. E bukura e kësaj që kam marrë përsipër është mundësia për të ndryshuar sepse ajo që u prit nga unë dhe pritet, është ndryshimi në PD, hapja e Partisë Demokratike. Një Parti Demokratike që u përgjigjet sfidave me të cilat Shqipëria duhet të përballet në vitin 2016 dhe jo në 2013 apo në 2005, e aq më pak në 1990, apo kur u krijua. Janë sfida të tjera. PD është një forcë e madhe që ka influencuar 26 vite të një historie, të asnjë vendi tjetër në tranzicion, po ta krahasojmë ku ka qënë Shqipëria në 1990 dhe ku është sot. Pra ka brenda vetes jo vetëm forcën por edhe detyrimin tu japë shqiptarëve dicka ndryshe. Mua më ka rënë barra, privilegji dhe përgjegjësia të udhëheq këtë ndryshim. Të udhëheqësh një ndryshim, për mua, qoftë i vogël apo një ndryshim i madh si ky që po përjeton PD-ja sot dhe që nesër do të përjetojë Shqipëria, është diçka jashtëzakonisht frymëzuese, inkurajuese, eksituese do të thoja. Eshtë një mundësi që nuk mund ti jepet çdokujt. Eshtë padyshim një përgjegjësi e madhe.

Fevziu: Ndërkohë në vendimarrjen tuaj, në momente të vështira e keni përfshirë në vendimarrje Berishën apo keni tentuar ta mbani larg?

Basha: Jo. Z.Berisha ka zgjedhur me vullnetin e tij të lirë jo vetëm të largohet nga drejtimi i PD-së por po kështu të largohet nga jeta partiake, në kuptimin që ai është pjesë e grupit parlamentar…

Fevziu: Ka momente që keni nevojë ta telefononi për ti kërkuar një këshillë apo për ta pyetur për diçka?

Basha: Padyshim, atij dhe gjithë bashkëpunëtorëve të tjerë të PD-së. Këshillat, rrahja e mendimeve etj është diçka tjetër. Por drejtimi i Partisë Demokratike është një proces i cili ndodhet eksluzivisht në duart e institucioneve të Partisë Demokratike ku unë kam rolin tim si kryetari i kësaj partie.

Fevziu: Z.Basha edhe dy pyetjet e fundit të cilat unë po i quaj edhe më politiket. Vitin e ardhshëm kemi zgjedhje, sa të vështira do të jenë këto zgjedhje në PD dhe a keni frikën e një disfate?

Basha: Viti i ardhshëm me të vërtetë që ka një sfidë të jashtëzakonshme, që janë zgjedhjet. Por përtej zgjedhjeve, sfida më e madhe e vitit 2017 është ndryshimi.

Fevziu: Për të ndryshuar duhet të fitosh zgjedhjet?

Basha: Unë kam bindjen se Shqipëria kërkon ndryshim, se shqiptarët kërkojnë ndryshim, se shqiptarët dhe kur flas për shqiptarët i jap vetes të drejtën të flas edhe për të majtët nuk mund të pranojnë, nuk mund të tolerojnë më vazhdimin e kësaj situate.

Fevziu: Eshtë një ndërmarrje shumë e vështirë për opozitën?

Basha: Sigurisht sepse politika e në veçanti pusheti kanë kapur gjithë interesat e vendit; kanë kapur interesat finaciare; kanë kapur interesat kriminale; kanë kapur pushtetin pra, paranë, drogën. Pra ka interesa të prekshme. Këtu nuk bëhet fjalë për të ndryshuar njerëzit nga kolltuku, bëhet fjalë për miliarda e miliarda para të drogës, para të koncensione, para të drogës, tendera publikë, që vidhen, shpërdorohen dhe japin këtë efekt në ekonomi, në gjendjen shoqërore të njerëzve, në arsim, në shëndetësi, në kujdes social, në gjendjen e fëmijëve, të moshuarve, të të rinjve, të studentëve. Pra, çdo vendim që marrim ne politikanët e në veçanti çdo vendim që merr pushteti në mënyrë të menjëhershme afekton jetët e qindra, mijëra, miliona shqiptarëve. Kemi ardhur këtu sepse politika ka humbur sensin e realitetit, sepse një grusht politikanësh sot jetojnë në një botë që s’ka asnjë lidhje me botën në të cilën jetojnë të gjithë shqipitarët dhe ky është ndryshimi që ne duhet të sjellim. Ne duhet të sjellim një politikë rrënjësisht të ndryshme. Kjo kalon përme betejash të vështira, përmes ndarjes nga krimi. Betejë e cila sot ka filluar me një lajm të mirë por që është një betejë e gjatë dhe e vështirë. Ne nuk do të ndalemi në këtë rrugë, ne do ta çojmë deri në fund këtë betejë. Sot Elvis Rroshi nuk është më kryetar i bashkisë Kajavë.

Fevziu: Por edhe një nga deputetët tuaj nuk është?

Basha: Sot Elvis Rroshi nuk është më kryetar i bashkisë Kajavë. Figurë emblemë e kriminalizimit, mesazh i pastër, i qartë për dhjetra të tjerë kryetarë bashkish dhe deputetë se ora e pastrimit të politikës ka trokitur. Se bashkë me shqiptarët e ndershëm ne duhet të sjellim ndryshimin që funksionon për jetët e tyre dhe jo vetëm për grupet e tyre parlamentare. Ndryshon grupet parlamentare, apo ndryshon ministrat. Ndryshimi duhet të jetë një ndryshim që ta prekin njerëzit, një ndryshim pozitiv. Që të ndodhë kjo, nuk mund të ndodhë me instrumenta te kalbëzuara të kësaj Republike. Kjo Republikë sot është gërmadhë. Institucionet e kësaj Republike pavarësisht prej synimeve që kanë pasur nga momenti që është bërë Kushtetuta dhe ndryshimet kushtetuese, janë të ezauruara. Demokracia direkte, demokracia direkte brenda PD, demokraci direkte për qytetarët, zgjedhje të drejtpërdrejtë të deputetëve nga populli, zgjedhje të drejtëpërdrejtë të presidentit nga populli, fuqizim të qytetarit dhe shkurorëzim të pashallarëve të politikës. Ky është ndryshimi që duhet dhe do të sjellë viti 2017.

Fevziu: Kjo z.Basha nga mënyra se si flisni më kujton pak një film mediokër që titullohej “Dhe i vetëm dhe trim në luftë”. Që do të thotë, jemi para zgjedhjeve, mazhoranca duket se po kalcifikon, po rajivëzon një koalicion të gjerë, ku për përfshin edhe LSI-në, dhe PDIU-në dhe parti të tjera. Ndërkohë që PD, përveç PR, që është aleate tradicionale nuk duket të ketë një koalicion të gjërë…

Basha: Nuk është ashtu.

Fevziu: A keni frikë se mbeteni i vetëm dhe i marzhinalizuar në këtë betejë?

Basha: Jo, nuk kam asnjë frikë që jam i vetmuar. Përkundrazi në qoftë se mund të ndaj diçka të mirë nga ky vit me ju dhe me ata që na ndjekin, dhe që dua ti falenderoj nga zemra, është mbështetja e jashtëzakonshme që kam marrë gjatë këtij viti të vështirë për betejat që kam luftuar, jo për veten time por për betejat që kam luftuar në emër të një Shqipërie ndryshe, në emër të një Shqipërie të së ardhmes. Zgjerimin e frontit opozitar, jo vetëm me koalicion tonë opozitar që përbëhet nga shumë parti, disa prej tyre parlamentare, disa prej tyre jo parlamentare, por që përfshin në gjirin e saj faktorë të shoqërisë civile, akademikë, intelektualë dhe mbi të gjitha të rinj. Të rinj, të cilët besojnë se përmes një përpjekje të përbashkët me PD, me këtë vizion timin, për një demokraci direkte, për fuqizim të popullit, rifuqizim të popullit dhe shkurorëzimin e pashallarëve në politikë, ne mund dhe do t’ia dalim. Dhe rrugë tjetër për Shqipërinë, nuk ka. Pra, jo vetëm që nuk ndihem i vetmuar por ndihem shumë i mbështetur, shumë i privilegjuar nga ngrohtësia dhe besimi që kam marrë nga shqiptarët gjatë këtij viti dhe që padyshim përbën për mua një stimul që vitin e ardhshëm ta nisim me një betejë sa më të fortë dhe vendimtare për të nesermen e Shqipërisë dhe shqiptarëve.

Fevziu: Ku do e festoni Vitin e Ri?

Basha: Në shtepi.

Fevziu: Me familjen?

Basha: Me familjen si gjithmonë.

Fevziu: Atëhere më mbetet vetëm t’ju falenderoj dhe t’ju uroj gëzuar festat dhe mbarësi për vitin e ardhshëm!

Basha: Edhe unë dua t’ju falenderoj, t’ju uroj ju personalisht dhe familjen tuaj, bashkëpunëtorët që keni këtu dhe të gjithë bashkëpunëtorët e televizionit tuaj, të gjithë median shqiptare. Por më lejoni, edhe qytetarët shqiptarë të cilëve dua t’iu uroj në radhë të parë shëndet dhe mirësi. T’iu uroj që ky vit i ardhshëm të jetë viti që iu rikthen shpresën, që të gjejnë kurajon për të bërë gjënë e duhur. Dhe të rishpreh bindjen time se kur njerëzit e mirë bashkohen nuk ka gjë që nuk mund të arrijmë së bashku!

Fevziu: Faleminderit z.Basha!

Basha: Falemnderit z.Fevziu!

Lulzim Basha në intervistën e fundvitit me Blendi Fevziun ne Opinion, 29 Dhjetor 2016

Sot jam para jush për të riparaqitur platformën e Partisë Demokratike për reformën zgjedhore. Ta bëjmë të qartë që në fillim, eshtë një platformë e dorëzuar zyrtarisht në Komisionin e Reformës Zgjedhore, pra në Parlamentin shqiptar, që më 17 maj të këtij viti.

Një platformë e cila është miratuar nga Grupi Parlamentar i Partisë Demokratike dhe nga partitë aleate të Partisë Demokratike, si platformë e cila mbërthen të gjithë problemet që ngrenë rekomandimet e OSBE-ODHIR-it, por edhe probleme të tjera, që janë probleme reale dhe vitale për zgjedhjet që duhen trajtuar patjetër.

Nga 17 maji i këtij viti, kanë kaluar 7 muaj e gjysëm dhe opozita ka kërkuar në mënyrë të vazhdueshme për zbatimin e kësaj platforme, sigurisht në një proces negociimi politik dhe teknik në Komisionin e Reformës Zgjedhore, por për fat të keq, jemi ndeshur në mënyrë konstante me shmangien, refuzimin apo kundërshtimin, nga mazhoranca, nga Partia Socialiste, nga Lëvizja Socialiste për Integrim, në forma të ndryshme gjatë gjithë kësaj periudhe.

Reforma zgjedhore është konsideruar nga Partia Demokratike që në fillimet e saj si një nga reformat më të rëndësishme, bashkë me Reformën në Drejtësi, madje siç po e kuptojnë të gjithë tani, ndoshta është edhe reforma më e rëndësishme.

Eshtë më e rëndësishme sepse vetëm suksesi i kësaj reforme do të bëjë të mundur, që në Parlament të mos futen kriminelë e për rrjedhojë, Kushtetuta herë tjetër të mos ketë nevojë për votat e kriminelëve, që për 7 ligjet e Reformës në Drejtësi, të mos duhej që për të bërë kuorumin vendimmarrës, të pritej deri sa të vinte edhe krimineli i fundit.

Eshtë turp për Shqipërinë që për hir të dekriminalizimit të ndryshohet Kushtetuta, por është më shumë se sa kaq, kur ligjet e reformës në drejtësi, janë votuar nga këta individë.

Reforma zgjedhore, në objektivin e Partisë Demokratike dhe opozitës është guri i themelit, për susksesin e çdo reforme tjetër. Për fat të keq, mazhoranca deri tani nuk ka bërë asgjë tjetër, vetëm se deklarata publike dhe asnjë tentativë që të ulet me ne për të diskutuar dhe për të rënë dakord mbi brendinë e platformës që ne propozojmë, të hapur me çfarëdo lloj propozimi tjetër që ata kishin.

Pala tjetër në Komisionin e Reformës, nuk ka bërë gjë tjetër veçse ka dëmtuar në mënyrë thelbësore mekanizmin me të cilin funskionon Reforma Zgjedhore që nga viti 2002, që palët të diskutojnë me njëra-tjetrën në nivel politik dhe teknik, bien në konsensus dhe miratojnë drafte.

Eshtë e paprecedent si kësaj radhe, që përfaqësuesit e mazhorancës në këtë komision nuk kanë bërë gjë tjetër veçse deklarata dhe kanë bërë propozime unilaterale, që nuk kanë asnjë vlerë nëse do të konfrontohen me propozime po aq unilaterale nga ana jonë, të cilat ne jemi të gatshëm dhe të aftë në çdo moment ti bëjmë, duke sjellë amendamente që nuk kanë të bëjnë me çakmakët apo shkrepset, me logot e partive, me fishekzjarret, dhe aq më pak, nuk do të synohet kurrë nga ne që Partia Demokratike të kapë 100 përqind komisionet zgjedhore të nivelit të mesëm dhe të qendrave të votimit siç bën propozimi i Partisë Socialiste, i cili garanton që të gjithë komisionet të jenë në raportin katër me tre për PS dhe LSI. Kjo jo vetëm që do të ishte një kthim prapa në vitet 2000 dhe 2001, por do të ishte rifillim i një krize gjigande politike, zgjedhore që me shumë vështirësi u shua në vitin 2005.

Ripropozoj edhe një herë para jush pikat kryesore të platformës së Partisë Demokratike.

Siç e thashë, trajton në mënyrë të plotë dhe me një qasje plotësisht shqiptare, të gjitha zgjidhjet që do t’i japin përgjigje rekomandimeve të OSBE-ODHIR-it, kështu që është plotësisht në përputhje me objektin e punës së komisionit. Çdo gjë që deklarohet lart e poshtë, por jo në Komisionin e Reformës, nga përfaqësuesit e mazhorancës, është tentativë për t’u shmangur, po aq sa u tentua të shmangej nga nevoja për shenjat e grishtërinjve për kriminelët.

DEKRIMINALIZIMI I PROCESIT ZGJEDHOR

Tashmë ka një ligj, tashmë ka një standard kushtetues, por askush prej jush, askush nga opinioni publik, nuk ka pikën e dyshimit që procesi zgjedhor është i rrezikuar nga kriminelët të cilët janë në partneritet të plotë me kryeministrin. E bëri paktin në vitin 2013, vazhdon ta bëjë edhe sot duke i nxjerrë edhe nga burgu.

Por mbi të gjitha siç e patë dje, nën urdhërin e tij, KQZ bëri çmos, dhe përfaqësuesit, qoftë të këtyre personave që Edi Rama i ka sjellë në pushtet, por edhe përfaqësuesit ligjor të mazhorancës, bënë çmos për të zgjatur ditët në detyrë të zyrtarëve të dënuar për krime, përdhunim, trafiqe, etj, vetëm e vetëm që t’i qëndrojë Edi Rama paktit që ka bërë, dhe për të garantuar njerëzit që dekriminalizimi nuk do të sjellë pasoja, pra kriminelët do të jenë përsëri në proçesin e 2017-ës.

Kjo nuk do të zgjasë shumë siç e dini, kjo kërkesë është jo vetëm e opozitës, por edhe i Shteteve të Bashkuara, tashmë është një kusht për Shqipërinë në procesin e hapjes së negociatave.

Zbatimi me efikasitet i ligjit, duke filluar nga heqja e kryetarit të Bashkisë së Kavajës, i cili duhej të ishte shkarkuar nga Kryeministri, por tani nuk ka asnjë shpresë përveçse të zgjasë me 48 orë qëndrimin e në detyrë, për turp të mazhorancës.

Ata që do të kandidojnë në zgjedhjet e vitit 2017, të mendohen mirë jo dy herë por më shumë, përpara se të firmosin kërkesën e tyre për kandidaturë tek Edi Rama.

Sigurisht që është e nevojshme të detajohen elementët e tjerë që do t’u heqin mundësinë kriminelëve të penetrojnë në administratën zgjedhore, të jenë në qendrat e votimit apo numërimit. Ju e dini shumë mire, madje dhe ambasadori amerikan ka qenë dëshmitar i bandave kriminale përpara qendrave të votimit të cilët intimidonin zgjedhësit.

Platfroma e Partisë Demokratike e trajton këtë në mënyrë shterruese dhe çdo përpjekje për të vonuar me deklarata punën e Komisionit të Reformës Zgjedhore, nuk është gjë tjetër veçse përpjekje për të mbajtur status quonë që ishte deri dje.

Çështja e dytë, PERDORIMI I TEKNOLOGJIVE NE VOTIM, kërkesë themelore e platformës së Partisë Demokratike dhe opozitës. Por unë besoj se kjo ka dhe mbështetjen e publikut dhe të gjitha forcave të tjera politike me përjashtim të dy forcave kryesore në mazhorancë. Të gjitha partitë, jo vetëm PD, por edhe partitë e tjera në spektrin politik në parlament ose jo, e mbështesin. Por mbi të gjitha ajo që është e rëndësishme, që përdorimi i votimit elektronik, identifikimi biometrik dhe numërimi elektronik, e gjitha në një sistem të vetëm të integruar, është garancia e vetme që kanë sot shqiptarët që të mos ndodhin procese që i kanë parë me sy, i kanë prekur, tashmë nuk janë më sekrete, por që ua kanë shpifur të gjithë shqiptarëve.

Çfarë bën në propozimin tonë sistemi elektronik dhe biomterik i votimit, i identifikimit dhe i numërimit të votave?

Garanton që të reduktohet në mënyrë drastike, në mos të eleminohen, probleme të cilat sot me kodin zgjedhor më të mirë që ne mund të bëjmë, është e pamundur të trajtohen. Një nga këto, është shitblerja e votës. Sot ju e dini, të gjithë shqiptarët tashmë e dinë, se si paraja në sasi të jashtzakonshme me burim drogën por edhe korrupsionin galopant, një pjesë e madhe e tyre do të përdoret , është ndarë më vete për të blerë vota.

Mund të marrim disa modele, si zgjedhjet e Durrësit në 2015, ku kishte një mekanizëm kirurgjikal, kontrolli të shitblerjes së votës, ku për secilën qendër votimi ka një agjent shitblerje, i cili mund të jetë kriminel apo njeri që aspiron për të mbajtur postin e drejtorit, model i cili u implementua në mënyrë të plotë në zgjedhjet e pjesshme në Dibër. Milionat që shpenzohen nga feudalët lokalë të Edi Ramës, një pjesë e tyre qoftë për të bërë vela betoni si në Durrës, apo projekte të rilindjes urbane janë të ndara, pra një pjesë e parave do të përdoren për këtë.

Për të blerë vota, për të blerë karta identiteti, për të blerë komisionerët, në mënyrë që vota që hedhin shqiptarët të mos jetë ekzakt ajo që do të numërohet nesër dhe, në fund fare kur të numërohen votat , të numërohen në një mënyrë komplet tjetër.

Do ju marr një shembull të thjeshtë. Ju e dini shumë mirë tashmë, nuk është sekret, të gjithë shqiptarët e dinë se si agjentët e partive turren për të marrë kartat e identitetit të zgjedhësve. Nëse ndokush e konsideron këtë si shitblerje vote në fakt e ka gabim. Praktikisht anullohet e drejta e votës, duke marrë kartën e identitetit atë që duhet të ishte garancia e zgjedhësve për të votuar në mënyrë të sigurt, i zhduket e drejta. Po u merret kjo e drejtë dhe kërcënohen për të mos qenë pjesë në votim. Identifikimi biometrik tashmë është absolutisht i mundshëm për shkak të databazës së dokumentave të identitetit që tashmë kemi, dhe kjo e bën të mundur që në çështje sekondash, zgjedhësi të identifikohet në mënyrë të sigurt. Teknologjia në votim, e bën të pamundur për komisionerët nëpërmjet çfarëdo lloj forme manipulative apo kriminale, të ndërhyjnë në procesin e votimit të shqiptarëve.

Në të njëjtën formë, pra ajo që ne propozojmë për votimin elektronik, bën të mundur që brenda pak orësh, rezultati të jetë i shpallur dhe përfundimtar në të gjithë Shqipërinë me një siguri të lartë 100% dhe nëse dikush ka dyshime, është mundësia që të rinumërohet rezultati në mënyrën më të sigurt të mundshme sepse ajo që propozojmë ne i heq mundësinë çdo lloj manipulimi nga segmente të ekzekutivit apo kujtdo tjetër.

Ju e dini që një problem i madh është zgjatja e numërimit, pasiguaria që ajo jep dhe efektet politike që prodhon. Kjo zhduket, sepse rezultatet do të dalin në më pak se një ose dy orë në të gjithë Shqipërinë, me  atë që propozojmë ne.

Me këto avantazhe që do të jape votimi elektronik dhe identifikimi biometrik, vjen pyetja: Pse PS po e pengon reformën?! Pikërisht për të bërë të pamundur implementimin e kësaj platforme. Në këtë aspekt, paratë janë, sado të kushtojë janë të gjitha të rikuperueshme. Nuk mund të ketë PS për justifikim sasinë e parave që duhet të shpenzohen. E vetmja gjë që ata duan të minojnë në këtë histori është koha. Unë besoj se zgjedhjet janë çështje standardi. Nuk mund të bëjmë ne zgjedhje të këqija për shkak se koha është e pamjaftueshme. Zgjedhjet ose kanë standarde, ose janë thjesht votime, ajo që kërkon z.Rama që të rikonfirmojë pushtetin nëpërmjet votash, që nuk kanë lidhje fare me atë që do të hedhin shqiptarët më 18 qershor.

Ne do të insistojmë në këtë aspekt, sepse është e vetmja mundësi për të garantuar standarde dhe 12 nenet e propozuara nga PS, sigurisht as s’i prekin minimalisht, jo vetëm 53 rekomandimet, por as rritjen e standardit.  Eshtë vetëm një tallje me parlamentin shqiptar edhe me shpresën e shqiptarëve për zgjedhje të lira dhe të ndershme në 18 qershor të vitit që vjen.

Çështje tjetër me rëndësi thelbësore e ripërsërisim është FINANCIMI I PARTIVE DHE FUSHATES, ulja e kostos së politikbërjes.

Pse shqiptarëve duhet t’u kushtojë me shifra të jashtëzakonshme, me dhjetëra miliona euro vetëm fushata zgjedhore? Pse shqiptarët duhet të shohin para të cilat në fund fare dalin nga xhepat e tyre në formën e taksave dhe përfundojnë në xhepat e politikës nëpërmjet tenderave korruptivë apo korrupsionit. Apo paraja e trafikantëve të drogës që lejohen nga Ministria e Brendshme dhe krerët e Policisë së Shtetit, të mbjellin gjithë Shqipërinë me drogë. Pra, është një rreth vicioz korrupsioni e krimi. Ne kërkojmë që kjo të ulet në mënyrë drastike, në mënyrë që shqiptarëve jo vetëm të mos u kushtojë, por edhe politika të jetë e shkëputur, të mos jetë peng i krimit apo atij biznesi, e vetmja mënyrë e të cilit për të mbijetuar është lidhja me pushtetin. Për këtë arsye, kemi propozuar financim shtetëror 100% të procesit zgjedhor dhe fushatës së partive. Kemi kërkuar kriminalizim të financimeve koorporative, private, dhe kërkojmë gjithashtu që të bëhen përllogaritje të qarta dhe për nxjerrjen e kostos shumë të qartë për një fushatë të plotë, sa kushton. Shqiptarët duhet ta dine, se sa partitë marrin dhe sa shpenzojnë. Duhet të ketë transparencë të plotë për këtë gjë, dhe të gjithë ata që shpenzojnë para që nuk janë të deklaruara, do të përballen edhe me drejtësinë penale.

Në këtë aspekt, PD e ka mjaft të detajuar platformën, po punon për setin e amendamenteve që po trajtohen në mënyrë të plotë. Jemi në bashkëpunim edhe me Këshillin e Europës dhe ekspertë të saj për këtë gjë, por rruga që ka ndjekur PS për të ecur në mënyrë unilaterale vetëm dëmton arritjen e standardeve të larta në këtë fushë.

Një çështje tjetër është PERDORIMI I BURIMEVE SHTETERORE DHE PRESIONI MBI ADMINISTRATEN.

Besoj se asnjë shqiptar nuk ka dyshime në lidhje me mënyrën se si Edi Rama, në mënyrë të skajshme në 2015-ën, por është e sigurt nga të gjitha informacionet që ju mund ti investigoni vetë, po e rivendos të gjithë administratën në funksion të zgjedhjeve. Ky është një përdorim i burimeve shtetërore i ndaluar sot nga Kodi Zgjedhor. Por ne do shkojmë në shtrëngim deri në dispozita penale për drejtuesit e administratës që do të përdorin burimet shtetërore. Nuk do të jetë një detyrim vetëm politik apo moral por çdo drejtor apo zyrtar tjetër që do të përdorë burimet shtetërore do të përballet me Kodin Penal. Kjo është një kërkesë e OBSE/ODIHR-it dhe jam i sigurt që nuk do ta gjeni tek 12 nenet që ka propozuar PS.

Sigurisht presioni mbi administratën, ka çuar që në zgjedhjet e 2015-ës ODIHR-it të konstatojë shkeljen e standardit bazë: frikën për të votuar të lirë nga punonjësi i administratës, nëse ata nuk votonin për kandidatët e mazhorancës. Verifikojeni në raportin e OSBE/ODIHR-it dhe do ta gjeni të zezë mbi të bardhë. Por ky është një turp të cilin shqiptarët e kanë superuar, të paktën që nga viti 2003.

Të kërcënosh me largim nga puna siç është konstatuar në zgjedhjet e 2015-ës, është cënim i parimit themelor: “Liria për të votuar”. Këtë ka arritur Edi Rama, këtë turp iu ka lënë shqiptarëve. 2017 duhet që këtë turp ta fshijë. Platforma jonë qoftë edhe nëpërmjet masash penale synon ta trajtojë këtë çështje.

Një çështje tjetër me rëndësi të madhe është MEDIA DHE FUSHATA.

Sigurisht që ka një ndërthurje të fortë me aspektin e financimin e partive politike, por ajo që ne do të kërkojmë do të jetë garantimi i kushteve të barabarta për subjektet, në një situatë ku media po censurohet gjithmonë apo po autocensurohet në mënyrë të vazhdueshme, për shkak të presionit mediatik, kontrollit apo edhe lidhjeve të biznesit me politikën.

Sigurisht që në muajin e fushatës ajo që dominon është e drejta e zgjedhësit për të marrë informacionin të pastër dhe të pacensuruar dhe e drejta e kandidatëve për të bërë fushatë në mënyrë të lirë në përputhje me atë që u jep Kushtetuta.

Kështu që do të trajtohet me theks të veçantë nga ana jonë për të garantuar që media të jetë e lirë nga çdo lloj presioni në procesin zgjedhor, në mënyrë që zgjedhësit dhe kandidatët të jenë të lirë në fund fare. Ata janë në qendër të skenës dhe nuk mund të jenë të tjerë. Çdo lloj interesi që rrotullohet rreth tyre është dytësor në atë moment.

Eshtë e papranueshme që subjektet zgjedhore harxhojnë miliona euro, kemi rastin e kryetarit të Bashkisë së Tiranës, që ka harxhuar miliona euro në publicitet në media, gjë që është e padeklaruar dhe madje e pandëshkuar.

LISTAT E ZGJEDHESVE DHE SISTEMI I ADRESAVE

Siç e dini tashmë listat kanë filluar, dhe do ti kërkojmë llogari qeverisë pse nuk trajtoi rekomandimet e OBSE/ODIHR-it në lidhje me listat përpara sesa procesi të fillonte. Situata që kemi me listat dhe procesi i adresave, i cili është deklaruar se ka nisur, në fakt ka mbetur me 1200 militantë të FREESH-it të cilët i kanë punësuar në një kompani private, e cila financohet nga një prej kompanive më të atakuara për korrupsion, siç është OSHEE, dhe pikërisht këta do të bëjnë një operacion që duhej të ishte ekskluzivisht i Ministrisë së Brendshme dhe bashkive.

Të shkosh derë më derë në shtëpitë e shqiptarëve për të mbledhur të dhëna në mënyrë private është e kundërligjshme dhe asnjë shqiptar nuk do t’i japë ato të dhëna sepse do të përdoren në mënyrë selektive kundër tyre në proçesin zgjedhor. Kjo është e paligjshme dhe është kundër çdo modeli që njihet në botë dhe e vetmja gjë që e shtyn Ramën, është nevoja për të manipuluar zgjedhjet nëpërmjet listave të zgjedhësve. Eshtë shumë e e vjetër dhe nuk shkon më larg se 2003, dhe mbas atij viti këto probleme janë zgjidhur, kështu që është turp që Shqipëria u rikthehet problemeve vetëm e vetëm që Edi Rama do të fitojë zgjedhjet.

VOTIMI I EMIGRANTEVE ishte pjesë e platformës tonë por ajo që duhet theksuar është që edhe me ndërhyrjeT e fundit në ligjin për gjendjen civile që u bënë në seancën e fundit të parlamentit, në mënyrë definitive Partia Socialiste i shuan të drejtën emigrantëve për të votuar në Shqipëri. Shqipëria edhe për shkak të vonesës që prodhoi në reformë PS-ja, e ka të pamundur ta shtrijë aftësinë e saj për votuesit jashtë por të paktën të mos i heqë të drejtën e votimit në Shqipëri të gjithë atyre që duan të votojnë. Këtë e realizoi me dindje të plotë PS-ja para pak ditësh kur në momentin që një emigrant regjistron veten në Milano, Berlin, etj, humbet të drejtën e votës së tij në Shqipëri.

Sigurisht që kemi çështje të tjera siç është ROLI I POLICISE NE ZGJEDHJE. Krerët e policisë duke qënë palë me krimin në trafikun dhe mbjelljen e drogës, askush nuk mund të besojë tek ta. Për më tepër që policia është politizuar në mënyrë të skajshme, ku njëherë në 3 muaj kryeministri mbledh një të tretën e policisë në shkallë vendi dhe u bën kongres për ti bindur që të votojnë në favor të maxhorancës. Në këto kushte, mos prisni që Policia e Shtetit do të jetë ajo që do të garantojë që kriminelët do të rrinë larg qendrave të votimit. Që kriminelët nuk do të ushtrojnë presion, që kriminelët nuk do të shkojnë të blejnë votën apo të intimidojnë zgjedhësit. Sa pritshmëri keni ju që do të jetë kjo polici që do të ndjekë agjentët e shitblerjes së votës së Edi Ramës dhe ministrit të Brendshëm? Zero. Kanë zhdukur çdo lloj elementi që siguron rolin e policisë, dhe këtë e kanë bërë në mënyrë të qëllimshme. Ne do ta rikthejmë këtë.

Një element me rëndësi është FORCIMI I POLITIKES PENALE.

Ne kemi tashmë një paketë e cila parashikon shtrëngimin e politikës penale kundër krimit zgjedhor. Siç e dini, ligji i dekriminalizimit e vë krimin zgjedhor në të njëjtin nivel me korrupsionin, sepse është një nga format më të rënda të korrupsionit që mund të ndodhë, që ndalon për 20 vite ushtrimin e funksioneve e për rrjedhojë do ta çojmë politikën penale në këto nivele. Shitblerja e votës do të transformohet në korrupsion zgjedhor për një arsye shumë të thjeshtë, që Prokuroria e Krimeve të Renda tani, dhe më pas SPAK-u, Prokuroria e Posaçme Antikorrupsion dhe Byroja Kombëtare e Hetimit, të jenë organet e specializuara të trajnuara edhe me një vullnet politik krejt ndryshe mbi korrupsionin, për të goditur këtë fenomen dhe Shqipëria, të shohë 15 apo 20 rastet e para të këtyre agjentëve të shitblerjes të përfundojnë në burg dhe kjo të mos mbetet një barsaletë të cilën e tregojnë të gjithë shqiptarët dhe askush nuk trembet.

Çështje të tjera që kanë më pak presion në lidhje me reformën zgjedhore kanë të bëjnë me REFERENDUMET DHE SISTEMIN ZGJEDHOR.

Sistemi zgjedhor, ky që është, ka nevojë për të shtrënguar disa elementë për ta bërë më efikas dhe për të korigjuar elemente që kanë provuar të jenë problematike. Përshembull, kemi parti politike që regjistrohen në mënyrë fiktive dhe është një mekanizëm mafioz për të kontrolluar votën. Parti të cilat nuk ekzistojnë, agjentët e shitblerjes së votës do të derigjojnë votën e familjeve të caktuara tek sigla të vdekura partish në koalicionin qeveritar. Nëpërmjet kësaj skeme, PS po bën gati kontrollin e votës së mijëra shqiptarëve. Kjo është një shuplakë në fytyrën e shqiptarëve dhe gjithsekush duhet ta refuzojë por detyra jonë është ti vemë fre me ligj kësaj skeme mafioze siçiliane të blerjes së votës.

Referendumi është një instrument me rëndësi të madhe përtej asaj që ju keni provat që maxhoranca ka bllokuar çdo mundësi refrendumi, por ka ardhur momenti që shqiptarët të vendosin përmes referendumeve përkundër asaj që kërkon politika. Nëse politika po shkëputet nga kontakti me realitetin e shoqërisë, referendumi duhet të jetë ajo goditje e fortë që kanë të drejtë shqiptarët ti japin politikës për ta kthyer në hullinë e asaj që ata kërkojnë.

Këto ishin 12 pikat e platformës. E theksoj që çështjet themelore janë dekriminalizimi, sistemi i votimit elektronik, identifikimi biometrik, financimi dhe media. Por të gjitha çështjet e tjera janë çështje shumë të rëndësishme dhe ne do të kërkojmë zbatimin e kësja në mënyrë të plotë dhe të menjëhershme.

Prezantimi i Oerd Bylykbashit para mediave, 28 Dhjetor 2016

Studentja e komunikimit pyet Kryeministrin

Jam Klevisa

Studioj për komunikim

Mesa duket, Edi Rama ka zgjedhur të heshtë, por unë dhe shumë moshatarë të mi, duam ta pyesim; pse nuk e shkarkon Elvis Rroshin nga Kryetar Bashkie?

A nuk i mjafton Edi Ramës, ajo që Elvis Rroshi ka bërë?

A nuk është i mjaftueshëm dënimi nga drejtësia europiane për përdhunim dhe trafik droge?

A e ka menduar Edi Rama se duke mbrojtur Elvis Rroshin po i nxit dhunuesit e grave dhe të fëmijëve?

A nuk e kupton Edi Rama se duke mbrojtur Elvis Rroshin po inkurajon drogën dhe trafikantët?

Pse ka zgjedhur Edi Rama të rreshtohet me të keqen?

Çfarë tjetër duhet të ndodhë që kryeministri të mbajë një qëndrim, të shkarkojë Elvis Rroshin?