Blog

Kryetari i Partisë Demokratike, z.Lulzim Basha priti në një takim shefen e misionit të FMN-së për Shqipërinë, zonjën Anita Tuladhar dhe përfaqësuesin e FMN-së në Shqipëri, z.Jens Reinke.

Kreu i opozitës Basha theksoi se situata është dramatike në të gjitha aspektet e jetës së vendit, për shkak të korrupsionit, kapjes së shtetit nga një grusht oligarkësh dhe individësh me rekorde kriminale, drogës, gjobave dhe arbitraritetit të tatimoreve, gjë që ka sjellë mbylljen e mijëra bizneseve, varfërim të përditshëm të shqiptarëve, rritje të përdoruesve të lëndëve narkotike dhe një situatë depresive për shoqërinë.

Taksat u rritën, informaliteti është në nivelet më të larta, transparenca është në nivelet më të ulëta historike, ndërkohë që rritja e çmimit të karburanteve, rritja e çmimit të energjisë për konsumatorët dhe bizneset ka shkaktuar problem mbijetese për bizneset dhe ka përkeqësuar treguesit jetësorë për qytetarët.

Zoti Basha ndau me drejtuesit e misionit të FMN-së shqetësimet e mëdha të opozitës, për gjendjen kritike të ekonomisë shqiptare si rezultat i politikave të gabuara të qeverisë “Rama”, dhe korrupsionit në çdo fushë të menaxhimit të financave publike. Rritja e taksave si dhe skemat korruptive të koncesioneve kanë zhytur vendin në krizë.

Ndonëse rriti taksat, qeveria ka dështuar të shtojë të ardhurat, theksoi zoti Basha i cili u ndal dhe në  rritjen e pakontrolluar të borxhit publik, nga 62.7% të PBB në 2013-ën, në 72-73% që vlerësohet aktualisht dhe në të njëjtën kohë janë rritur detyrimet e pashlyera të qeverisë ndaj palëve të treta.

Nuk ka asnjë investim publik,  investimet e nisura para 3 vitesh vazhdojnë të jenë me të njëjtin status, ndërkohë që miliona euro shkojnë për shëtitore me palma, shatërvanë si edhe për shpenzimet e luksit; për vetura qeveritare, për rikonstruksione zyrash.

Tenderat dhe koncesionet të cilat në 50% të rasteve bëhen pa garë e në rastet e tjera përzgjidhen ofertat më të larta, fitohen nga një grusht oligarkësh pranë kryeministrit.

Aferat korruptive me koncesionet nuk kanë të ndalur, theksoi zoti Basha, duke u ndalur tek koncesionet në shëndetësi, që i marrin buxhetit të shtetit 350 milionë euro pa i dhënë asnjë shërbim qytetarit shqiptar.

Buxheti i shtetit trajtohet si pronë private e kryeministrit, theksoi zoti Basha dhe sektorë jetikë si bujqësia janë lënë pas dore. Nuk ka asnjë investim në infrastrukturë ndërsa subvencionet i marrin vetëm 50 persona të lidhur me qeveritarët.

Mbledhja e të ardhurave vazhdon të jetë në rënie, megjithëse taksat janë rritur si shkak i korrupsionit të lartë në tatime dhe dogana. Z. Basha theksoi se investimet publike kanë shkuar për fasada dhe investime sipërfaqësore, pa asnjë impakt në ekonomi e punësim.

Ky vit, tha zoti Basha shënon vitin me prodhimin më të madh të drogës në vendin tonë. Kjo situatë është pasojë e drejtpërdrejt e kriminalizimit të shtetit nga Edi Rama, theksoi Basha, dhe refuzimit për të zbatuar ligjin e  dekriminalizimit.

Paratë e drogës janë të destinuara për të korruptuar funksionarë të shtetit dhe për të blerë votat, theksoi kreu i demokratëve, Lulzim Basha.

Njoftim per shtyp i Partise Demokratike, 27 Tetor 2016

Bujqësia është një ndër dështimet e mëdha të Edi Ramës, i cili jo vetëm s’ka mbajtur asnjë premtim ndaj fermerëve por e ka përkeqësuar gjendjen e tyre me rritjen e taksave, çmimit të energjisë, naftës dhe produkteve të tjera të domosdoshme.
Në Peqin, kryetari i Partisë Demokratike, Lulzim Basha u ndal në një fermë mollesh. Pronari tha se para katër vitesh ka marrë vazhimisht subvencione, ndërsa tani asgjë.
Basha: Sa rrënjë mollë ke?
Fermeri: Këtu janë 550 rrënjë. Ah bravo! Këtu në kohë të qeverisë së parë kam marrë 1 milionë e 650 mijë subvencion.
Basha: Grant?
Fermeri: Po, grant. Bëna për tubacionet vjet, humba 180 mijë –s’fitova asnjë lekë. S’mi dha ato mu se ishte përmbyt Fieri.
Basha: Sa rrënjë ke?
Fermeri: 600 rrënjë ullinj. Jam shumë i demoralizum, s’dua ti shikoj me sy. Këto po kalben këtu. ça të rri të dal me arkë me kile në rrugë unë? Ku ti çoj unë? Kemi tre vjet që duhani na rri stok në shpi.
Banor: Kemi rrugët e fshatit këtu që na janë bërë mizerie, nuk shkohet, ndërkohë që taksat e makinës të gjitha i paguajmë.
Banor: Këta na zhytën në mjerim. Të shikosh listat, se unë kam një dyqan të vogël atje, të shikosh listat atje komplet njerëzit marrin edhe bukën me lista.
Banor: Unë jam banor i komunës Pajovë, fshati Hasnjok, jemi pa rrugë, pa gjë. Mbjellim domate i biem me kafshë, me mushka, s’ka.
Basha: Asnjëri s’ka marrë subvencion prej jush?
Fermerët: Asnjëri, jo. E s’do ta dijë njeri.
Basha: 140 milionë dollarë tha do ti hedh për vaditje dhe për kullim. Sa kanale ka pastru dhe sa kanale ka ndërtu?
Fermerët: Asnjë kanal nuk është pastru tash tre vjet.
Basha: A ju kanë kompensuar për naftën? A ju kanë dhënë subvencione për plehrat kimike, për fidanët?! Asgjë s’keni marrë.
Fermerët: Asgjë. Bëjnë drogën ata, se ne s’bëjmë gjë.
Basha: Për drogën vjen flet ai se është ai shef i drogës, s’kam ça t’ju them unë.
Fermerët e konsideruan absurd qëndrimin e kryeministrit, ku u sygjeron të marrin kredi dhe pse kur u mori u premtoi subvencione. Ata thonë se e kanë të pamundur të paguajnë këstet e kredisë çdo muaj, pasi prodhimet e tyre për shkak të rënies së konsumit dhe konkurrencës së pandershme që u bëhet me produkte importi në shumicën e rasteve nuk shiten.
“E qartë është se këtu nuk është derdhur asnjë lekë për ju. As subvencione s’keni marrë, asnjë metër rrugë nuk është ndërtua, asnjë metër kanal nuk është pastru, asnjë metër kanal ujitje nuk është ndërtu. Dhe s’ka si të jetë ndryshe, në fund të këtij dështimi vjen ju thotë do të merrni kredi 300 milionë euro, kam fonde 300 milionë, do merrni kredi. Cili nga ju më thoni, cili nga ju është në gjendje të marrë kredi dhe të shlyejë interesat e kredisë?”- tha Basha.
Fermerët: Asnjë.
Basha: Në çdo vend të Europës  fermeri mbështetet me grante. Në Shqipëri kjo është shumëfish më e nevojshme, për shkak të kushteve të vështira në të cilat funksionon femra shqiptare dhe jeton familja në fshatin shqiptar. Vjen dhe ju thotë s’ka para shteti por merrni kredi. Po mirë, pse jep 88 milionë euro në vit për orendi, për zyra, për perde, për tavolina dhe nuk gjen 88 milionë euro për fshatarët?”
Për liderin e opozitës zgjidhja për fermerët janë subvencionet. Në programin e Partisë Demokratike, 100 milionë euro do të akordohen si subvencione per fermerët.
“Zgjidhja për fermerët, zgjidhja për fshatin është granti, është subvencioni. Ne subvencionet për fshatin do ti çojmë 100 milionë dollarë në vit. Një për qind e Prodhimit të Brendshëm Bruto do të jetë si subvencion për fermerët. Shteti do të marrë të gjithë masat që prodhimet e importit të mos ju konkurrojnë. Se ndodh edhe kjo, punoni gjithë sezonin, bëni gati prodhimin, ngrihet trau atje edhe vjen malli i importit me gjysëm çmimi. Pse?! Për të futur lekët në xhep dy tregtarë, dy importues edhe i pari i doganës dhe i pari i vendit. Kjo nuk ka për të ndodhur. “
Kryetari i Partisë Demokratike dëgjoi dhe bashkëbisedoi dhe me drejtues të strukturave të PD në Peqin. Me Edi Ramën, tha Basha nuk ka zgjidhje për situatën e rëndë për krimin dhe drogën si dhe nuk mund të ketë zgjedhje të lira dhe të ndershme.
“Cili është koncepti i Edi Ramës për qeverisjen: buxhetin për vete, drogën për kriminelët që ka sjellë në pushtet; për popullin varfërinë, emigracionin, burgun dhe tani së fundi ka shpikur edhe argatin e drogës. “

Njoftim per shtyp i Partise Demokratike, 27 Tetor 2016

Grupi Parlamentar i Partisë Demokratike dorëzoi sot në Kuvend një kërkesë për thirrje urgjente të Konferencës së Kryetarëve pas pengimit seancave dëgjimore në dy Komisione Parlamentare.

Komisioni i Shëndetësisë dhe Komisioni i Mediave dhe Edukimit u penguan sot nga deputetët e maxhorancës për të zhvilluar dy seanca dëgjimore, përkatësisht me gazetaren Alida Tota mbi censurën në media duke i kushtuar asaj largimin nga detyra si drejtore Informacioni pranë një televizioni si dhe seanca dëgjimore me ministrin e Shëndetësisë.

Grupi Parlamentar i PD kërkon marrjen e masave nga Kuvendi për cënimin e së drejtës kushtetuese të opozitës dhe Komisioneve Parlamentare në përmbushjen e detyrës së tyre.

Pengimi i qëllimshëm i realizimit të seancave dëgjimore në Komisionet Parlamentare është një precedent i rrezikshëm kundër demokracisë parlamentare në Shqipëri ndaj Partia Demokratike do të kërkojë në Konferencën e Kryetarëve që ky veprim të mos përsëritet në të ardhmen.

Bashkëngjitur kërkesa e dorëzuar sot në Kuvendin e Shqipërisë.

Njoftim per shtyp i Partise Demokratike, 26 Tetor 2016

Të miratohet dekreti i Presidentit, të miratohet një moratorium për importin e plehrave derisa qytetarët të shprehen me referendum, sepse ky vendim nuk i takon më asnjë qeverie, as kësaj që po ikën dhe as asaj që do të vijë, i takon qytetarëve shqiptarë ta vendosin me referendum popullor.

Prononcim për mediat i Kryetarit të PD, Lulzim Basha pas takimit me AKIP

Përshëndetje! Dua t’ju informoj shkurtimisht për një takim që pata bashkë me bashkëpunëtorët e mi me përfaqësuesit e AKIP-it, Aleancës Kundër Importit të Plehrave.
Partia Demokratike prej ditës së parë ka qëndruar qartë në mbështetje të objektivit të kësaj aleance për të ndaluar në mënyrë përfundimtare importin e plehrave në Shqipëri. Qeveria e Edi Ramës në mënyrë të pabesë jo vetëm ka shkelur angazhimin për të mos importuar plehra, me anë të të cilit  keqpërdori shoqërinë civile, qytetarët për të ardhur në pushtet, por iu ka mohuar qytetarëve shqiptarë të drejtën për referendum që e kanë përfituar në përputhje me Kushtetutën e Shqipërisë duke mbledhur 65 mijë firma.  Në mënyrë të pabesë ka kaluar një ligj i cili i hap rrugën mafies ndërkombëtare të plehrave, të sjellë helmet dhe plehrat e Europës për t’u përpunuar, për t’u djegur këtu në Shqipëri, për të helmuar shqiptarët dhe fëmijët e tyre.

Sot kjo çështje ka ekspozuar në mënyrë të plotë pafytyrësinë e qeverisjes, pafytyrësinë kriminale të Edi Ramës, sepse jo vetëm anuloi këtë ligj në 2013-ën, por në 2014-ën me një Vendim të Këshillit të Ministrave, në mbështetje të anulimit të ligjit, krijoi një detyrim ligjor që deri në fund të vitit 2016, pra për dy muaj, të gjitha bashkitë e vendit të përfundonin me mbështetje qeveritare procesin e diferencimit të mbetjeve. Me anë të së cilës; e para do të arrihej një pastrim më i mirë i Shqipërisë nga plehrat, nga mbetjet; dhe e dyta do të arrihej një objektiv sekondar, ai i përpunimit, riciklimit të tyre nga industria e riciklimit në Shqipëri.
Sot, Edi Rama ka dështuar të zbatojë VKM-në që vetë miratoi. Shqipëria është  e mbuluar nga plehrat, qytetet tona, fshatrat tona, lumenjtë tanë janë mbuluar me plehra. Plehrat digjen në mënyrë kriminale, ndotin ambientin tonë.
Të dhënat e Organizatës Botërore të Shëndetësisë tregojnë se të sëmurët e rrugëve respiratore dhe sëmundjet e rënda, siç është kanceri në mushkëri janë dhjetëfishuar si rezultat i përkeqësimit të ndjeshëm të cilësisë së ajrit, në veçanti në tre vitet e fundit në Tiranë, siç e tregoi studimi i para disa ditëve.

Dhe në vend që të pranojë dështimin e të marrë masa për zbatimin e VKM-së që vetë ka firmosur, çfarë thotë Edi Rama?! Jo vetëm që nuk do të pastrojë plehrat e bashkive, siç kanë premtuar dhe siç e kanë kthyer në vendim qeverie, por tani që nuk pastroi dot Shqipërinë nga plehrat, do të sjellë edhe plehrat e Europës.
Pafytyrësi tipike e një qeveritari i cili kërkoi votat dhe erdhi në pushtet duke premtuar ligj dhe  sot ia ka lënë Shqipërinë peng krimit dhe kartelit të drogës.
Pafytyrësi e një njeriu që e konsideron Shqipërinë jo një vend me qytetarë të cilëve iu ka marrë votën dhe ka me detyrim t’ju shërbejë, por një burg të madh ku ai sillet si drejtori psikopat dhe i droguar i këtij burgu.

Ndaj me shoqërinë civile jo vetëm që jemi të bashkuar  për të realizuar qëllimin tonë për të ndalur importin e plehrave, por jemi të bashkuar edhe për të rikthyer votën e qytetarit, zgjedhjet e lira dhe të ndershme si themeli i një shoqërie të drejtë. Dhe për këtë drejtori psikopat dhe i droguar i burgut duhet të largohet një orë e më parë.
Na bashkon ky ligj për të cilin qëndrimi jonë është i qartë. Të miratohet dekreti i Presidentit, të miratohet një moratorium për importin e plehrave deri sa qytetarët të shprehen me referendum. Sepse ky vendim nuk i takon më asnjë qeverie, as kësaj që po ikën dhe as asaj që do të vijë, i takon qytetarëve shqiptarë ta vendosin me referendum popullor. Dhe deri në atë moment të miratohet dekreti i Presidentit Nishani dhe bashkë me të një moratorium për importin e plehrave.
Dhe bashkërisht jam i bindur se në të njejtën frymë do të punojmë në një aleancë të madhe kundër drogës, për dekriminalizimin, për zgjedhje të lira dhe të ndershme dhe për të rikthyer dinjitetin e shqiptarëve duke iu rikthyer besimin dhe të drejtën për të zgjedhur me votë qeverisjen që dëshirojnë.
Ju faleminderit!

Njoftim për media i Partisë Demokratike, 25 tetor 2016

Edi Rama ka pranuar dje dështimin e check-up, ai ka pranuar publikisht se i ka dhënë Vilmës 5 milionë euro më shumë ne vit se sa nevojiteshin për analizat.

Ministria e Shendetesise deklaroi se me të njëjtin fond që i kanë dhënë Vilmës, do të bëhen analizat edhe për 350 mijë qytetarë më shumë, duke rritur fashën e grupmoshës, duke e shtrirë nga 35 deri në 70 vjec.

Pa e kuptuar, Rama ka pranuar qe kontrata e firmosur me koncesionarin është abuzive, pasi kanë përcaktuar një dysheme prej 475 mijë qytetarësh për të cilët Vilma paguhet pavarësisht nëse i bëjnë apo jo analizat. Shifra e vendosur në kontratë ( 475 mijë) është abuzimi real. Nuk është e bazuar në studim apo analizë shkencore.

Duke pranuar që në një vit e gjysëm s’janë bërë 475 mijë analiza të check-up, por paratë janë dhënë për aq, Rama ka pranuar vjedhjen e 5 mln Euro më shumë në vit mënyrë fiktive tranzit në xhepat e tij.

Cdo të ndodhë tani me 5 milionë euro që ka marrë Vilma cdo vit, më tepër se sa duheshin për të bërë check-up?

Ku kanë shkuar ato para?

A do ti kthehen shqiptarëve, apo tashmë janë ndarë si plackë mes Ramës dhe donatores së tij?

Koncesioni i check-up, dështoi që në fillim për shkak të analizave skandaloze dhe humbi besueshmërinë. Burrat rezultuan shtatzanë dhe gratë me prostat…dhe pothuajse të gjithë i përsëritën analizat të privati…

Njerëzit refuzuan këtë aferë të Edi Ramës, refuzuan ti përgjigjeshin një prej vjedhjeve të tij më të mëdha në këto 3 vite.

Vilma merr 15 euro, vetëm për shërbimin taksi, ndërkohë që e gjithë puna bëhet në qendrat tona shëndetësore nga mjekë e specialistë që paguhen me taksat e qytetarëve.

Shtimi i fashës së qytetarëve që duhet të bëjnë check-up nuk është mbulim i vjedhjes. Eshtë pranim i saj. Eshtë pranim i faktit se Vilma ka marrë miliona euro, më shumë se sa puna që ka bërë.

Cila është pjesa e Edi Ramës në këto miliona euro?

Cila është pjesa e kampionit të tij të korrupsionit Ilir Beqaj?

Deputetët e Partisë Demokratike në Komisionin e Shëndetësisë kanë thirrur në një dëgjesë urgjente Ministrin Beqaj të mërkurën, që të informojë mbi këtë çështje.

Prokuroria është e thirrur të bëjë detyrën, të hetojë ku shkuan këto shuma. Të bëjë drejtësi e tu kthejë paratë shqiptarëve. Para të vjedhura në emër të shëndetit, kur në spitale ska shtretër, ska ilace, mungojnë gjërat bazike.

Ta harrojë Edi Rama dhe Ilir Beqa se do ti gëzojnë këto para, kur qytetarët po rrezikojnë jetën në ferrin e spitaleve tona.

Herët a vonë do të ketë drejtësi për këtë krim mbi krimet.

Deklaratë e deputetes Albana Vokshi, 25 tetor 2016

Për dy orë më radhë Edi Rama u mundua, dhe jo për herë të parë, të justifikojë dështimin e tij me pranimet në universitet. Njeriu që si model të meritës dhe preferencës ka Elvis Roshin, Arben Ndokën, Artur Bushin, Armando Prengën e dhjetra deputetë që as dyert e universiteteve nuk i ka parë ndonjëherë, u flet për model pedagogëve e rektorëve të universiteteve. Njeriu që përdor kriminelë e trafikantë sa herë ka zgjedhje e kudo ka zgjedhje flet për meritë e vlera. Modeli i Ramës është krimi, është droga, është mashtrimi, ndaj ishte në siklet dhe në gjemba para pedagogëve, ndaj nuk i kupton dhe i përçmon kërkesat dhe sugjerimet e tyre. Prandaj nuk i kupton dot maturantët e shkëlqyer që kërkojnë të marrin atë që duan e për të cilën kanë investuar dhe jo atë që kërkon tu japë Edi Rama me paaftësinë dhe arrogancën që e karakterizon.

Deklaratë e Partisë Demokratike, 24 Tetor 2016

Kryetari i Partisë Demokratike, Lulzim Basha  dëgjoi dhe bashkëbisedoi me drejtues të strukturave të PD në Kamëz dhe Paskuqan. Detyrë kryesore sot, tha zoti Basha, jo vetëm për demokratët por për çdo shqiptarë është largimi i oligarkisë dhe sjellja e qytetarit në pushtet. Është shumë e rëndësishme, tha zoti Basha që çdo qytetar të kuptojë se vota e tyre e lirë dhe e ndershme  është forca që kanë qytetarët për të ndëshkuar të keqen dhe vendosur për të ardhmen e tyre dhe fëmijëve të tyre.

“Për pushtet këta janë gati të bëjnë çdo gjë, ta varfërojnë popullin që të qeverisin më kollaj, t’i fusin edhe drogën mbi shpinë edhe krimin mbi shpinë. Detyra jonë është që ai i varfëri, ai i dezoluari, i pashpresi, i zhveshuri nga çdo e ardhur, nga çdo shpresë ta kuptojë se me ne vota e tij, vota e saj ka forcë dhe se kjo forcë nuk është thjeshtë dhe vetëm që të bëjë Lulzim Bashën Kryeministër por që atij dhe asaj t’i kthejë të drejtat që ka sipas Kushtetutës në këtë vend; të drejtën për ndihmë ekonomike  kur s’ka mundësi; të drejtën për rimbursim të ilaçeve kur kjo i takon.

Ne duhet  të jemi garantët e të drejtave të këtyre njerëzve. Ne do të shporrim një oligarki të lidhur me krimin, do të sjellim qytetarin në pushtet. Si do ta sjellim qytetarin në pushtet?! Duke kufizuar pushtetin, duke fuqizuar zgjedhësin. Ne duhet të mësohemi me votën si instrument në vendimmarrje. Vota e lirë është garancia për të nesërmen.”

Bashkimi, hapje dhe aleanca me këdo që është kundër krimit, drogës dhe për zgjedhje të lira dhe të ndershme. Kjo është porosia që lideri i opozitës u dha demokratëve.  Forcës që sjell bashkimi, hapja dhe aleanca e vlerave nuk ka pushtet i korruptuar dhe i inkriminuar që i reziston, tha zoti Basha.

“Bashkimi  i të gjithë faktorëve të bazës pavarësisht diversitetit të mendimit që është pjesë, aset, pasuri e demokratëve. Por kushdo, kushdo në këtë familje politike që kërkon të japë kontributin e tij apo të saj në këtë përballje me këtë të keqe të madhe që ka kapur Paskuqanin dhe Shqipërinë prej fyti dhe që ka fytyrën, zërin, formën dhe bëmat e Edi Ramës nuk mund dhe nuk duhet të mungojë në këtë bashkim.

Hapja për të përfshirë në familjen politike këdo që dëshiron të jetë pjesë e kësaj beteje dhe që ndan me ne të gjitha vlerat tona si demokratë. Për këtë e kam fjalën kur flas për hapjen. Flas për hapjen e dyerve të shtëpisë tonë, të familjes tonë. Ndryshe nga hapja që ka dalë në shtëpinë tonë, aleanca është një mekanizëm politik. Një mekanizëm politik i cili kërkon nga unë në radhë të parë dhe nga gjithsecili prej nesh të realizojmë domosdoshmërinë e bashkimit të çdo faktori politik dhe jo politik me familjen tonë politike në këtë betejë.

Në qoftë se Edi Rama ka paudhësi të bashkojë kriminelët më në zë rreth tavolinës së tij, atëherë si mund të kemi në skrupuj të bashkojmë në një aleancë sa më të madhe këdo që refuzon krimin, këdo që refuzon inkriminim, këdo që refuzon drogën, këdo që refuzon shit-blerjen e votës dhe asgjësimin e procesit politik, asgjësimin e zgjedhjeve të lira dhe të ndershme.”

Njoftim për media i Partisë Demokratike, 24 tetor 2016

Edi Rama rreket t’u mbushë mendjen shqiptareve se Agjensia Kombetare e Mjedisit (AKM) do na garantoje për importin e mbetjeve, pasi ajo ka rritur kapacitetet e perralla të tjera.

Por kjo Agjensi del se ka shkelur brutalisht disa ligje dhe konventa ndërkombëtare për mbrojtjen e mjedisit përgjate 3 viteve te fundit.

Shoqata e Gazetareve për Drejtesi (në një raport të financuar nga Ambasada Amerikane) ka vlerësuar lejet mjedisore të dhëna për ndërtim HEC-esh nga Janar 2014 deri në Qershor 2016, ku është zbuluar se për 38 HEC-e (nga 43 në total), miratimi është dhënë pa kryer fare Vlerësimin e Ndikimit në Mjedis të tyre!

Të dhënat që mungojnë përfshijne gjatësine e lejuar e devijimit të lumit, ndërkohë që asnjëri nuk përmban kushtet për masat që duhen marrë për mbrojtjen e habitateve dhe llojeve biologjike që do ndikohen nga projekti i miratuar.

Pra, Agjensia që sipas Ramës do na mbroje nga mbetjet e rrezikshme po shkel ligjet e biodiversitetit dhe te menaxhimin të integruar të burimeve ujore, si edhe disa Konventa ndërkombëtare, si ajo e Bernës dhe e Bonit, të dyja të nënshkruara nga Shqipëria.

Ironia shtohet kur mendon që në 2014, Aleanca e Plehrave futi duart dhe ndryshoi ligjin për lejet mjedisore të hartuar nga BE, vec për të detyruar edhe dyqanet e vogla te lagjeve të banimit të marrin leje mjedisore pas kryerjes se detyrueshme të vlerësimit mjedisor.

Këtu kam nje proces-verbal të nënshkruar nga zuzaret e qeverisë që terrorizojne nje fast-food vec 6m2 me 5 milione lekë gjobe nëse nuk do paguaje për vlerësim dhe leje mjedisore tek sekseret e qeverise.

Pra, Aleanca e Plehrave jep leje mjedisore pa proces të Vleresimit të Ndikimit në Mjedis për HEC-e, që cenojne qindra hektare dhe ndryshojne rrjedhen ujore per dhjetra km (perfshi HEC-e ne Valbone, Librazhd dhe Korce), por detyron kthinat e qofteve me 5m2 të kryejnë VNM dhe të pajisen me leje mjedisore!

Rilindasit janë sulur nëpër dyqane dhe biznese si hiena per rryshfete, duke keqperdorur ligjin e lejeve mjedisore.

Te gjitha këto janë kriminale.

Partia Demokratike:

Denoncon shkeljet flagrante te ligjeve dhe konventave mjedisore nga qeveria per miratimin e HEC-eve pa VNM.

I ben thirrje prokurorise të hetoje për këto shkelje.

Kërkon studime të thelluara për ndikimet mjedisore të cdo ndërhyrje madhore në mjedis.

Shqipëria do jetë me mirë pa Aleancen e Plehrave.

Shqipëria do jetë më mirë pa Edi Ramën.

Deklaratë e kreut të Departamentit të Mjedisit, Jamarbër Malltezi, 24 tetor 2016

Edi Rama flet për rritje pagash, por në fakt ka hapur thesin për donatorët dhe miqtë e tij. Me 12 tetor, Rama ka vendosur ti japë Vilma Nushit edhe 5 milionë Euro më shumë në vit.

E ka bërë këtë duke rritur fashën e grupmoshës që gjoja bëjnë (check-up). Nga  40-65 vjec që ishte, tani e ka bërë në 35-70 vjec, dhe këtë e ka bërë pa asnjë studim, dhe pa të dhënat klinike, shkencore, epidemiologjike.

Nuk e ka bërë për suksesin e check-up-it, sepse nuk ka shqiptar mos ta dijë se kjo është një skemë e dështuar. Qytetarët e kanë refuzuar, dhe në ato pak raste kur kryhet përgjigjet e analizave shpesh kanë qenë  skandaloze, absurde e të pabesueshme.

Kjo rritje e fashës nuk bëhet për të ndihmuar qytetarët por pë të vjedhur më shumë së bashku me donatoren e tij, Vilmën.

Pra ka shtuar rreth 350 mijë qytetarë për regjistrat e Vilmës që përkthehet në 5 mln Euro më shumë në vit për donatoren e tij personale.

Megjithëse check-up është një prej aferave më të mëdha korruptive në 3 vjet të kësaj qeverie, Edi Rama dhe Ilir Beqaj, jo vetëm nuk hoqën dorë, por kanë vendosur ta thellojnë skandalin, të vjedhin edhe më shumë, të ndajnë më shumë para me Vilmën.

Spitalet dhe kujdesi parësor janë zhytur në mjerim, sepse paratë që duhet të shkonin për barna, kura, pajisje, mjete për shëndetin e shqiptarëve, zhduken në xhepat e Vilmës, dhe Beqes e Ramës.

Në vendimin e qeverisë, që është zhdukur nga faqet e Kryeministrisë, Ministrisë se Shëndetësisë apo Fletorja Zyrtare, nuk jepet asnjë sqarim. Nuk ka transparencë. As kampioni i korrupsionit Beqja që bën cdo ditë reklamë për Vilmën nuk tregon asgjë. Kjo është errësira që shoqëron këtë aferë të re korruptive.

Si Kryetare e Komisionit për Shëndetësinë, pas shumë kërkesavë zyrtare, prej një viti nuk kam marrë asnjë informacion nga Ministri Beqaj për koncesionin e Vilmës, ndërkohë në ekranet televizive paguhet për reklamimin e kësaj vjedhje shtetërore.

I bëjmë thirrje Prokurorisë të mos trembet nga shantazhet e kryeministrit, por të thellojë hetimet të veprojë konkretisht për këtë histori të pashembullt korrupsioni me fondet e shëndetit, me paratë e shqiptarëve.

Deklaratë e deputetes Albana Vokshi, 24 tetor 2016