Blog

Përvec taksës së sheshtë 9% dhe uljes së taksave, për industrinë e prodhimit Partia Demokratike do të ketë një paketë të veçantë lehtësuese që do të perfshijë uljen e çmimit të energjisë, naftës, si dhe lehtësira në lidhje me TVSH për lëndën e parë. Kjo u deklarua nga kryetari i Partisë Demokratike, Lulzim Basha  gjatë bashkëbisedimit me sipërmarrës dhe punëtor të fabrikës  “Migo Blind”.

Sipërmarrës: Energjia elektrike dhe cilësia, mënyra se si jepet, ne kemi harxhuar 40 mijë euro për të bërë një kabinë.  Po s’e bërë nuk vjen energjia.

Basha: Për biznesin në tërësi ne kemi një paketë taksash, taksë e sheshtë 9%, kontributi shoqëror 18%. Por për prodhimin në veçanti na duhet një  paketë e veçantë që të ulë koston e prodhimit, që ka të bëjë me energjinë elektrike, me çmimin e naftës, ka të bëjë me TVSH-në për lëndën e parë dhe me aspekte të tjera që ne po i diskutojmë.

Punëtor: Gjendja e lekut në proporcion me gjendjet e tregut është shumë e vështirë. Ishalla me këtë ardhjen tënde mos vënë dorë në këtë popull e në biznesin e të gjitha që të ecë përpara populli. Se ka kaluar, ka ik në pikë të fundit.

Basha: Ulje e kostos së prodhimit do të thotë rritje e eksportit, rritje e prodhimit, më shumë vende pune dhe paga më të larta për ju.

Pronari i fabrikës së prodhimit të kartonit në Porto Romano theksoi se si pasojë e rritjes së taksave dhe kostos së prodhimit prej 3 vitesh nuk ka rritur dot asnjë pagë ndërsa para 3 vitesh ato rriteshin vazhdimisht.

Sipërmarrësi: Taksat do i paguajmë, energjinë do e paguajmë, të gjitha do i paguajmë, e hanë punëtorët. N​e  para tre vitesh vazhdimisht i rrisnim rrogat, tre vjet kemi që i kemi mbajt rrogat fikse.

Basha: Pjesa e paketës lehtësuese për prodhimin fillon me çmimin e energjisë, çmimin e naftës me TVSH-në për lëndën e parë.

Sipërmarrësi: Këto janë kryesoret për ekonominë.

Basha: Ne duam vetëm një gjë, që të transferohet një pjesë e taksës që do ta ulim tek rritja e rrogave për punonjësit.

Sipërmarrësi: Problem i madh çmimi i energjisë. I gjithë rajoni paguan 5 cent energjinë elektrike, ne e paguajmë 10.

Zoti Basha theksoi se përmes politikës së taksave të ulëta, përmirësimit të klimës së biznesit, reduktimit të burokracisë dhe uljes së kostos së prodhimit synohet rritje e investimeve vendase dhe të huaja, rritje e numrit të të punësuarve dhe rritje pagash.

Njoftim per shtyp i Partise Demokratike, 12 Korrik 2016

Partia Demokratike dorëzon sot kërkesën për ngritjen e një komisioni hetimor në lidhje me krimin shtetëror të përgjimit të paligjshëm.

Eshtë provuar dhe vërtetuar botërisht se në mes të muajit mars, në Shqipëri hyri pa u deklaruar dhe regjistruar në doganë një paisje përgjuese IMSI-Catcher, dhe u përdor më tej kjo paisje për interesat e Edi Ramës dhe Saimir Tahirit, pa pasur autorizimin e Prokurorit të Përgjithshëm, siç parashikon ligji dhe Kushtetuta.

Ky krim i rëndë shtetëror, cënim i sigurisë kombëtare, shkelje brutale e të drejtave të njeriut, është nën hetim nga prokuroria, por një hetim i plotë parlamentar do të zbardhë rrethanat dhe faktet, sidomos në kohën kur Edi Rama po ushtron një presion kriminal ndaj drejtësisë për ta mbyllur çështjen.

Ishte pikërisht shantazhi mafioz i Edi Ramës ndaj gjykatave që solli rikthimin në detyrë të drejtorit të Policisë Cako, dhe dy vartësve të tij, që janë njëri prej segmenteve që kanë përgjegjësi direkte për këtë krim shtetëror.

Qëllimi i Komisionit Hetimor është shqyrtimi i fakteve, provave dhe rrethanave, që dëshmojnë mënyrën e administrimit dhe përdorimit të pajisjes “IMSI Catcher” nga Policia e Shtetit.

Ne besojmë, se është në interesin e Shqipërisë dhe shqiptarëve, që kjo çështje të zbardhet në mënyrë të plotë dhe gjithëpërfshirëse. Një hetim i plotë parlamentar, hedh dritë mbi këto fakte dhe nxjerr përgjegjësit nga i pari tek i fundit.

Përgjimi i paligjshëm është në krye të krimeve të Edi Ramës e Saimir Tahirit në këto tre vite. Nuk është thjesht një cështje e opozitës.

Zbardhja e kësaj cështje është një sprovë për vendin.

Jemi me sundimin e bandës, apo me ligjin?

Me interesat e Ramës, apo jemi me kushtetutën?

Jemi me të drejtat e banditëve, apo me të drejtat e njeriut?

Me aferat kriminale Rama-Tahiri, apo jemi me sigurinë kombëtare?

Jemi me shtetin mafioz të Edi Ramës, apo jemi me shtetin ligjor?

Deklaratë për mediat e Nënkryetarit të Komisionit për Sigurinë Kombëtare, Flamur Noka

KERKESE PER NGRITJEN E KOMISIONIT HETIMOR PER PERGJIMET

Prej 13 ditësh, shtetasi i huaj numër 2, siç e quan FBI, ose Edi Rama, aktualisht kryeministër i vendit, është publikisht nën akuzë se ka investuar një krim federal në Shtetet e Bashkuara të Amerikës, duke futur në mënyrë të paligjshme, 80 mijë dollarë në fushatën e Obamës, për të siguruar një foto me të.

Foto të cilën më pas shtetasi i huaj numër 2, pra Edi Rama, e përdori në fushatën e zgjedhjeve politike në Shqipëri në vitin 2013.

Për shtetasin e huaj numër 2, siç e quan FBI, pra për Edi Ramën, për përfshirjen e tij në këtë krim federal, kanë shkruar gazetat më të mëdha të globit.

Gjithkush e di, gjithkush e tregon me gisht.

Vetëm ai hesht.

Ndërkohë që dorasi, Bilal Shehu e ka pranuar krimin dhe pritet të dënohet në vjeshtë deri në 5 vite burg dhe 250 mijë dollare gjobë, sipas ligjit amerikan, porositësi, shtetasi numër 2, Edi Rama duhet urgjentisht të merret nën hetim nga prokuropria shqiptare për veprat penale të ndikimit të paligjshëm, të fshehjes së pasurisë dhe pastrimit të parave.

Pavarësisht hetimit, Edi Rama ka detyrimin para shqiptarëve dhe opinionit publik të përgjigjet se;

Ku i mori 80 mijë dollarë që pagoi për një foto me Obamën?

Kush është burimi i këtyre parave?

Kush është donatori?

A janë para të ligjshme, apo para që vijnë nga aktivitet kriminal?

A është investuar krimi federal me para droge e trafiku?

Këto janë pyetje që shtetasi i huaj numër 2, ose Edi Rama, nuk i shmang dot.

Sa më shumë e zvarrit transparencën dhe llogaridhënien, aq më shumë vetëdenoncohet si autor i këtij krimi të shumëfishtë.

Deklaratë e Sekretarit të Përgjithshëm, Arben Ristani, 11 korrik 2016

Sekretari i Aksionit Qytetar, Ervin Salianji denoncoi sot zvarritjen 3 vjeçare të punimeve të projektit të Lungomares në Vlorë gjë që ka krijuar një situatë të papërballueshme për qytetarët e Vlorës por edhe për turizmin në jugun e vendit. Salianji tha se ky projekt i bërë sipas kapriços së kryeministrit ka krijuar një kosto shtesë për qytetarët, një trafik të papërballueshëm i cili u shtohet vështirësive të tjera në këtë sezon turistik.

“Ka 3 vite e gjysëm që projekti i Lungomares i nisur nga kryeministri, projekti imagjinar për lungomaren e Vlorës nuk po përfundon. Të vetmet pasoja që ka sjellë ky projekt është kjo Lungomare dhe ky trafik i papërballueshëm i cili u shtohet kostos së qytetarëve të cilët vijnë të bëjnë pushimet në bregun e Vlorës dhe më tej. Bizneset e shumta dhe qytetarët kanë shprehur shqetësimin e tyre pranë Partisë Demokratike ku përveç mungesës së energjisë elektrike gjatë gjithë sezonit, përveç mungesës së ujit, u është shtuar edhe trafiku i papërballueshëm për shkak të kapriços personale të kryeministrit”, tha Salianji.

Ai u shpreh se Partia Demokratike do të ketë një projekt të ri për këtë rrugë i cili do të zgjidhë shpejt problemin e trafikut.

“Partia Demokratike garanton qytetarët e Vlorës dhe gjithë Shqipërisë që vijnë për pushime në këtë zonë të bukur turistike që do të bëjë një projekt të ri. Jo një projekt për kapriçot e kryeministrit të radhës por do të jetë një projekt i konsultuar me qytetarët, një projekt që do ti shërbejë qytetit, qytetarëve shqiptarë dhe një projekt do të zgjidhë njëherë e mirë problematikën e trafikut që qytetarët e ndjejnë në mënyrë të përditshme kur vijnë me pushime në qytetin e Vlorës, në Himarë apo në gjithë bregun e jugut”, u shpreh Salianji.

Njoftim per shtyp i Partise Demokratike, 10 Korrik 2016

Pyetjet kryesore qe FBI i ka drejtuar Bilal Shehut, në lidhje me krimin federal të futjes së 80 mijë dollarëve nga një burim i huaj në fushatën e Obamës, kanë të bëjnë me shtetasin e huaj numër 2. Shtetasi i huaj numër 2 i përfshirë në këtë krim të rëndë federal, është Edi Rama, aktualisht kryeministër i Shqipërisë.

Po rendisim më poshtë dhe ju mund ti shihni dhe në ekran pyetjet e FBI që lidhen me shtetasin e huaj numër 2, pra me Edi Ramën, që është përfituesi i krimit federal. Siç dihet, Bilal Shehu, i është përgjigjur pozitivisht gjithë pyetjeve, dhe ai pritet të marrë dënimin në vjeshtë.

1. Gjatë, ose rreth muajit tetor 2012, në Distriktin e Nju Xhersit dhe gjetkë, a keni ndihmuar dhe nxitur me dijeninë dhe dëshirën tuaj individë të tjerë, duke përfshirë Shtetasin e Huaj 1, shtetas i Greqisë dhe Shtetasin e Huaj 2, për të kontribuar me rreth 80 mijë dollarë nga Personi i Huaj 1 dhe Kompania e Huaj 1 për një komision të përbashkët për mbledhje fondesh (më poshtë “Komisioni i Përbashkët për Mbledhje Fondesh”), i cili përfshinte komisionin e autorizuar të fushatës për Presidentin Obama?

   2. Afërsisht gjatë muajit shtator 2012, a keni mësuar rreth një plani për të mundësuar Shtetasin e Huaj 2 që të merrte pjesë në një aktivitet fushate, që do të mbahej më 8 tetor 2012, në San Francisco të Kalifornisë (“Aktiviteti i San Franciscos për Mbledhje Fondesh”)?

   3. Gjatë, ose nga fundi i muajit shtator 2012, a mësuat gjithashtu se Komisionit të Përbashkët për Mbledhje Fondesh do t’i jepeshin fonde prej rreth 80 mijë dollarë përpara 8 tetorit 2012, me qëllim që dy individë të merrnin pjesë në Aktivitetin e San Franciscos për Mbledhje Fondesh në atë datë?

   4. A mësuat gjithashtu se, për të hyrë në Aktivitetin e San Franciscos për Mbledhje Fondesh, një jo-shtetas që kërkon të marrë pjesë duhet të jetë i shoqëruar nga një shtetas amerikan?

   5. A mësuat gjithashtu se, sipas ligjit amerikan, jo-shtetasi nuk mund të jetë burim i një kontributi prej rreth 80 mijë dollarësh, që do të thotë se e tërë shuma prej 80 mijë dollarësh duhet të dhurohet nga shtetasi amerikan, që shoqëron të ftuarin jo-shtetas?

   6. A ratë dakord të merrnit pjesë bashkë me Shtetasin e Huaj 2 në Aktivitetin e San Franciscos për Mbledhje Fondesh, për të mundësuar kështu hyrjen në Aktivitet të Shtetasit të Huaj 2 përmes statusit tuaj si shtetas amerikan?

   7. A ratë dakord gjithashtu të shërbenit si kontribues i shumës prej 80 mijë dollarësh për Komisionit e Përbashkët për Mbledhje Fondesh, pra të pranonit fonde prej 80 mijë dollarësh nga një burim i huaj, të cilat do t’ia jepnit pastaj Komisionit të Përbashkët, duke bërë që të dukej sikur ky ishte kontribut i juaji personal?

   8. Gjatë, ose nga fundi i muajit shtator 2012, a i dhatë një tjetër individi në SHBA emrin, datëlindjen dhe informacionin tuaj personal si dhe atë të gruas suaj, me dijeninë se këto informacione do t’i jepeshin Komisionit të Përbashkët për Mbledhje Fondesh, në pritje të pjesëmarrjes suaj në Aktivitetin e San Franciscos?

   9. A i dhatë të njëjtit individ informacionin e llogarisë suaj bankare, duke e ditur se ky do të përdorej për transferimin e rreth 80 mijë dollarëve, nga një burim i huaj tek llogaria juaj personale, që ju kishit rënë dakord t’ia kalonit pastaj Komisionit të Përbashkët për Mbledhje Fondesh?

   10. Gjatë, ose nga fundi i muajit shtator 2012, a morët një shumë prej rreth 80 mijë dollarësh, me transfertë elektronike, në llogarinë tuaj bankare në Nju Xhersi nga llogaria e Shtetasit të Huaj 1, duke e ditur se këto nuk ishin para që ju takonin dhe që ju do t’ia dorëzonit Komisionit të Përbashkët për Mbledhje Fondesh?

   11. Në ose rreth datës 29 shtator 2012, ndërsa ishit në Nju Xhersi, a i përdorët ju dhe gruaja juaj këto 80 mijë dollarë për të blerë dy çeqe bankare në emrin tuaj dhe të gruas suaj për 70 mijë dhe 10 mijë dollarë?

   12. A ia dërguat ju më pas këto çeqe Komisionit për Mbledhje Fondesh për të siguruar hyrjen në Aktivitetin e San Franciscos për veten dhe për Shtetasin e Huaj 2?

   13. Në fillim të tetorit 2012, a shkuat ju me avion në San Francisco, ku shoqëruat Shtetasin e Huaj 2 në vendin ku do të mbahej Aktiviteti për Mbledhje Fondesh?

   14. A iu mohua Shtetasit të Huaj 2 hyrja në Aktivitetin e San Franciscos për Mbledhje Fondesh, por iu lejua të bënte fotografi me Presidentin e Shteteve të Bashkuara?

   Siç e shihni, në 14 pyetjet kyçe të FBI, shtetasi i huaj numër 2, përmendet në pjesën dërrmuese të tyre. Ndërkohë shtetasi i huaj numër 2 nuk jep asnjë shpjegim ku i gjeti paratë, nga i mori, cili është burimi i tyre. Shtetasi i huaj numër 2, pra Edi Rama, hesht edhe pse mediat më të rëndësishme ndërkombëtare kanë publikuar këtë skandal, e kanë treguar ate me gisht, i kanë publikuar dhe foton e krimit.

Por shtetasi i huaj numër 2, pra Edi Rama, ka detyrimin të përgjigjet publikisht për këtë krim të rëndë.

Kush është burimi i 80 mijë dollarëve?

A janë para të ligjshme, apo të paligjshme?

A janë para droge dhe aktiviteti kriminal?

A janë të pista paratë me të cilat ai pastaj financoi një tjetër krim, krimin federal për të cilin po heton FBI?

Sa më shumë i fshihet këtyre pyetjeve, aq më shumë rëndohet pozita e shtetasit të huaj numër 2, aq më shumë rriten përmasat e skandalit të Edi Ramës që e nisi rrugën e ardhjes me krim, e vazhdoi me krim, dhe po e mbyll me krim.

Deklarata për mediat e sekretares së Marrëdhënieve me Publikun, Grida Duma, 9 Korrik 2016

Prej 10 ditësh, goditja më e rëndë e sigurisë kombëtare, pushtimi me armë e me maska i aeroportit të vetëm ndërkombëtar, është shoqëruar me heshtjen e plotë të Edi Ramës. Asnjë cicërimë prej tij, edhe pse ngjarja në mesditën e 30 qershorit në Rinas, konfirmoi rënien totale të shtetit, të çdo standardi sigurie në vend.

U përpoq me metoda bizantine të gjente fajtorë e përgjegjës jashtë vetes, por dështoi pasi faktet e bera publike nga opozita, nga mediat dhe nga zyrtarët e Aeroportit, tregojnë se policia ka qënë vetëm disa metra larg grabitjes dhe nuk ka reaguar.

Drejtori i Kufirit në Ministrinë e Brendshme, e ka konfirmuar vetë se policët kanë qënë fare pranë vendit ku ndodhi grabitja, por sipas tij nuk kanë pasur fushëpamje. Pra në fushën e hapur të pistës së avionëve, policët nuk kanë arritur të dallojnë persona me maska dhe të armatosur që grabisin disa thasë me euro dhe ikin pa u hyrë ferrë në këmbë.

Këto rrethana, kalimi i 10 ditëve pa gjetur asnjë autor, ngjarje të rënda të përsëtirura në këtë aks që është një nyje strategjike, dëshmojnë rënien e shtetit, rënien e çdo standardi të sigurisë në këto 3 vite.

Arsyeja kryesore pse krimi arriti në këtë nivel të paimagjinueshëm, ka të bëjë me;

rënien e ligjit në këto 3 vite,
me sundimin e bandave,
me krimin e veshur me pushtet dhe pushtetin e veshur me krim,
me drogën që ka mbuluar cdo pëllëmbë të vendit,
me trafikun e armëve,
me inkriminimin e pikave kyçe të policisë
me faktin se kriminelë të njohur ulen në zyrën e ministrit të brenshëm për ndërmjetësime private,
me faktin se kriminelë, trafikantë, vrasës e përdhunues me Edi Ramën u bënë deputetë, kryetarë bashkie e shefa të zyrave publike.

Janë të gjithë këto arsyet pse krimi goditi, sulmoi dhe pushtoi aeroportin e vetëm ndërkombëtar në vend. Janë të gjithë këto arsyet pse Shqipëria, me Edi Ramën, nuk është më një vend i sigurtë.

Deklarata për mediat e kreut të Departamentit të Rendit dhe Sigurisë, Enkelejd Alibeaj

Publikohet propozimi i Partisë Demokratike. Bylykbashi: Ja 6 hapat që sjellin zgjidhjen e procesit të Vetingut

Sot jemi përpara jush, ashtu siç premtuam para dy ditësh, për t’iu prezantuar propozimin e opozitës për formulën e kompromisit, e cila zgjidh në mënyrë të plotë dhe pa asnjë lloj ngërçi, përzgjedhjen e 12 anëtarëve, të komisionerëve të vetingut, të cilët janë shkalla e parë e këtij procesi të rëndësishëm të parashikuar për reformën në drejtësi. Sigurisht që kjo është një formulë e aplikueshme me modifikimet e nevojshme edhe për rastet e tjera, për institucionet e tjera. Siç e thashë, është një formulë e cila garanton në mënyrë fare të thjeshtë përmbylljen me sukses të procesit të përzgjedhjes së komisionerëve me hapa të thjeshtë të besueshëm, të pranueshëm nga të gjithë, në përputhje të plotë me paragrafin 88 të opinionit final të Komisionit të Venecias.

Hapi i parë që parashikon formula e propozuar nga opozita, jo vetëm mediatikisht, por më shumë se dy javë më parë edhe tek mazhoranca, në kanalet e komunikimit dhe gjatë negociatave që janë bërë gjatë gjithë kësaj periudhe, parashikon që si hap i parë shpallen vakancat, sigurisht mbi bazën e kritereve kushtetuese dhe ligjore të përcaktuara dhe të bëra publike dhe transparente për të gjithë. Në gjykimin tone, për ti dhënë edhe staturën e mjaftueshme procesit, si organ i parë pra që e shpall vakancën dhe mbledh kandidaturat, është Presidenti i Republikës, por në alternativë mund të jetë edhe Avokati i Popullit. Sigurisht ky institucion në bazë të kësaj procedure do të bëjë shpalljen për 12 vakancat dhe do të presë brenda afatit aplikimet e të gjithë personave që mendojnë se përmbushin kriteret kushtetuese dhe ligjore për të 12 vendet e komisionerëve. Në përfundim të afatit, Presidenti i Republikës apo Avokati i Popullit do të përcjellë dosjet e të gjithë aplikantëve tek Gjykata Kushtetuese. Duhet thënë që Gjykata Kushtetuese është organ që nuk është pjesë e hierarkisë së sistemit gjyqësor, por mbetet një gjykatë me një rol absolutisht madhor në të gjithë sistemin kushtetues, por edhe në propozimet e draftet kushtetuese që kanë qarkulluar deri më sot, edhe Komisioni i Venecias e vlerësoi pozicionin e Gjykatës Kushtetuese në atë pikë që, Gjykata vazhdon dhe ushtron funksionet e pacënuar në strukturën e saj, me përjashtim të një formule të re e cila do të zbatohet dora dorës sapo të krijohet një vakancë.

Mendojmë se Gjykata Kushtetuese i ka të gjitha kapacitetet profesionale dhe integritetin për ta bërë këtë proces përzgjedhës. Në gjykimin tonë, në propozimin tonë, kreu i Gjykatës Kushtetuese do të përzgjedhë me short një panel prej tre gjyqtarësh kushtetues të cilët do të bëjnë vlerësimin e kandidatëve në përputhje me kriteret kushtetuese dhe ligjore, përfshirë dhe kërkesat për integritetin e kandidatëve. Pra, në këtë process, do të verifikohen se si ashtu siç propozohen kandidatura të ndryshme, avokatë, ish-gjyqtarë, ish-prokurorë, apo pedagogë të së drejtës, jo vetëm në përputhje me kriteret, por në përputhje me kërkesat për integritetin, nëse kanë pasuri të pajustifikuara apo probleme të tjera. Këtij paneli prej tre gjyqtarësh do t’i bashkëngjitet përfaqësuesi i operacionit ndërkombëtar të monitorimit në rolin e tyre, siç e përcakton qartë Komisioni i Venecias, të rojtarit të transparencës. Pra ne, parashikojmë një rol të rëndësishëm për ta, që të garantojnë këtë transparencë. Në këtë kuadër këta do të kenë akses  jo vetëm në proces, por tek i gjithë dokumentacioni i procesit të vlerësimit dhe i këtij pre-vetingu që i bëhet këtyre kandidatëve. Dosjet shqyrtohen individualisht, mbi bazën e këtyre kritereve, çdo gjë duhet të jetë e matshme dhe duhet të jetë së paku transparente për çdo individ që aplikon. Ky proces duhet të përmbushë plotësisht kriteret, t’i japë mundësinë çdo individi që mendon se i plotëson kriteret. Të vërtetojë që ai është individi i përshtatshëm për këtë funksion publik. Pra çdo gjë bëhet me prova dhe me akses, si për aplikantin ashtu edhe për përfaqësuesit e misionit ndërkombëtar të cilët kanë akses në të gjithë dokumentacionin.

Hapi i tretë, është që kundër këtij vendimi, pra mund të qëllojë që dikush të jetë i pakënaqur me vendimin e panelit tresh, me propozimin tonë parashikohet që të bëhet një ankim para Gjykatës Kushtetuese, para trupës prej 9 anëtarësh tashmë, e cila do të vendosë për pranimin e kësaj kërkese për rivlerësim të këtij vendimi të paneli tresh, dhe janë gjashtë anëtarë, që janë të papërfshirë, dhe flitet gjithmonë mundësia që edhe vendimi i panelit të rrëzohet ose të pranohet, nëse çdo gjë është e bazuar në ligj dhe në prova.

Kjo fazë përmbyll procesin e verifikimit dhe vlerësimit të të gjitha kandidaturave që kanë aplikuar për postin e komisionerit që do të kryejë vetingun. Në këtë moment, kryetari i Gjykatës Kushtetuese mbyll procesin dhe ia dërgon të gjitha kandidaturat e kualifikuara Kuvendit të Shqipërisë. Këtu fillon hapi i katërt i procedurës që është përzgjedhja e kandidatëve nga Kuvendi i Shqipërisë apo nga strukturat e Kuvendit për ti bërë gati për procesin e votimit në seancë plenare. Në propozimin tone, në përputhje me atë që thuhet në futnotën 16-të, që i korespondon paragrafit 60 të opinionit final, ne kërkojmë që kjo të bëhet nga një komision parlamentar “ad hoc” me 12 anëtarë (dhe ky është rasti më kompleks sepse në rastet e tjera numri do të jetë më i vogël), ku 6 anëtarë do të jenë nga maxhoranca dhe 6 nga opozita.

Siç e dini, tashmë është traditë e konsoliduar e parlamentit që të ketë komisione të rëndësishme me paritet numri dhe të njëjtën gjë propozon edhe Komisioni i Venecias. Ky komision do të zgjedhë pa debat 12 kandidatura që do ti paraqiten Kuvendit për miratim dhe kjo bëhet duke përcaktuar që çdo anëtar i komisionit “ad hoc” të ketë vetëm një votë dhe të votojnë vetëm për 1 kandidat. Logjikisht në fund të procesit do të dalin 12 kandidatë të përzgjedhur nga komisioni. Në propozimin tonë ky është një moment i rëndësishëm sepse votimi është i fshehtë dhe elektronik. Votimi elektronik bëhet me qëllim për të garantuar që në fund fare të dalin 12 kandidatë. Pra të 12 anëtarët e komisionit do të votojnë të gjithë në të njëjtën kohë. Pra nuk është votim sekuencial, të gjithë votojnë në të njëjtën kohë, të gjithëve u shfaqen në të njëjtën kohë e njëjtë listë kandidatësh dhe nëpërmjet sistemit elektronik bëhet e mundur që një kandidat të votohet vetëm nga një anëtar i komisionit “ad hoc”. Pra një deputet dhe jo nga më shumë se një deputet. Kjo bëhet e mundur nga sistemi elektronik i cili bën të mundur që kur votohet një kandidat nuk mund të votohet nga deputeti tjetër. Kush e zgjedh i pari mund të kalohet tek kandidatura tjetër, sepse të mos harrojmë e gjithë lista prej 20 apo 30 kandidatësh është e barasvlefshme.

Çdo kandidat është i certifikuar dhe ka të njëjtën vlerë përsa i përket kritereve të tyre të përmbushura. Në fund të votimit i cili është mjaft i shpejtë dhe mjaft i thjeshtë siç e shihni, sistemi shfaq listën e kandidatëve të përzgjedhur. Pra është me votë të fshehtë e për rrjedhojë nuk mund të përcaktohet se cili kandidat është votuar nga cili deputet. Lista në këtë moment zyrtarizohet, nuk ka votim tjetër e për rrjedhojë kjo listë bëhet gati për t’ju paraqitur Kuvendit për votim në seancë plenare. Kuvendi bën një votim miratues të listës, ose miratues ose refuzues. Pra votimi është në bllok i kësaj liste. Nuk votohen individë. Lista me 12 kandidatë ose miratohet e tëra ose rrëzohet e tëra. Arsyet e rrëzimit mund të jenë të ndryshme por sigurisht me konsensus paraprak apo me një qëllim pozitiv të të gjitha forcave të përfshira në këtë proces, që të zgjedhin kandidatët më të mirë të mundshëm. Kjo listë me 12 kandidatë i ka të gjitha garancitë që të votohet e miratohet nga Kuvendi. Pra çdo deputet ka një votë, e shpreh votën e tij dhe ne mendojmë që në propozimin tonë ky votim të jetë më shumicë të cilësuar sepse kjo i jep një legjitimitet më të madh listës prej 12 vetësh të miratuar.

Siç e thashë, ekziston mundësia që sistemi, ose formula parashikon rastin, kur kjo mund të rrëzohet. Në këtë rast, të gjithë 12 kandidatët rikthehen tek grupi i kandidatëve të kualifikuar sipas hapit të tretë të bërë nga Gjykata Kushtetuese dhe komisioni rifillon procedurën e përzgjedhjes nga fillimi mes të gjithë kandidaturave. Pra nuk ezaurohet lista. Mbeten po ato kandidatë dhe një përzgjedhje e re do të prodhojë me atë procedurë që shpjegova më herët, një listë të re prej 12 anëtarësh.

Votimi i dytë në propozimin tonë, më pas edhe ai i tretë, kryhet me një maxhorancë që vjen në ulje. Pra mund të niset me 2 të tretat, zbret me 3 të pestat, pastaj me shumicën absolute. Në gjykimin tonë është një formulë e cila nuk ka bllokim sepse po të jetë e nevojshme mund të ulet maxhoranca deri në atë pikë sa nëse vihet në dyshim një maxhorancë 50 plus 1, atëhere vihet në dyshim maxhoranca në Kuvend e për rrjedhojë nuk ka as qeveri. Gjykojmë që formula është ndërtuar në mënyrë të atillë që nuk ka nevojë për mekanizëm të jashtëm zhbllokimi dhe na garanton shumë shpejt e thjeshtë, pa komplikacionet e asaj formulës që në kushtet e Shqipërisë është në votën e vetme të trafikueshme që do të krijonte një problem të një karakteri politik shumë të më të rëndë se sa zgjedhja e 12 anëtarëve me integritet.

Besojmë që kjo është një formulë që garanton një kompromis dhe më tepër se kaq, edhe një funksionim të shpejtë e të thjeshtë. E ripërsëris, ka më shumë se dy javë që kjo formulë është paraqitur në kanalet e negociimit tek pala tjetër. Deri më sot nuk ka pasur asnjë argument thelbësor për ta kundërshtuar. Për fat të keq maxhoranca vazhdon ta kundërshtojë pa argumente. Sigurisht që, mungesa e një vullneti për të arritur në një kompromis siç kërkohet nga Komisioni i Venecias, siç kërkohet edhe nga ajo marrëveshje e 24 Dhjetorit 2014, nuk është një gjë që mund të zëvendësohet me batuta. Nuk duhet të harrojmë që duhet të shkojmë drejt përfundimit me sukses të këtij procesi, përndryshe vullneti është që kjo reformë të mos bëhet nga maxhoranca. Ky ishte një shpjegim dhe një prezantim i thjeshtë dhe do tu vihet në dispozicion të gjithëve siç e premtuam.

Njoftim për media i Partisë Demokratike, 8 korrik 2016

Propozim i Opozites per Formulen e KPK

Prej një jave Edi Rama gjendet nën akuzë se ka financuar një krim federal në Amerikë, dhe ai nuk jep asnjë shpjegim.

Bilal Shehu, taksisti i New Jersey e ka pranuar se 80 mijë dollarëshi që ka paguar në fushatën e Obamës, për ti mundësuar Ramës një takim dhe një foto me presidentin amerikan, i ka ardhur nga jashtë. Nga një burim i huaj. Nga Shqipëria.

Edi Rama është nën detyrim të bëjë transparencë, se nga dolën këto para. Kush është burimi i tyre?

Dyshimet janë për para droge ose aktiviteti kriminal, cka e rëndon edhe më shumë pozitën e Edi Ramës në këtë skandal.

Nëse ato janë para droge dhe trafiqesh, paratë e atyre trafikantëve me të cilët Rama erdhi në pushtet, kemi të bëjmë me një krim edhe më të madh, dhe çështja duhet zbardhur sa më shpejt.

Edi Rama është përfituesi i drejtpërdrejtë i 80 mijë dollarëshit që u pagua nga një burim i huaj.

Dhe është ai që duhet të përgjigjet:

Nga vijnë këto para?

Kush është burimi?

Kush është pagatori, kush është ky donator i Edi Ramës?

A janë para të ligjshme, apo të aktiviteteve kriminale?

Sa më shumë struk kokën e nuk përgjigjet për këto pyetje, aq më shumë rëndohet akuza ndaj tij, aq më shumë bëhet e besueshme se Edi Rama financoi një krim federal në amerikë me para të pista.

Deklaratë e nënkryetarit të PD, Edi Paloka, 8 korrik 2016

Fermerët dhe banorët e fshatrave të Beratit protestuan për mashtrimin e qeverisë me dëmshpërblimin ndaj tyre. Dhjetra hektarë janë përmbytur dhe qindra tonë prodhime bujqësore janë shkatërruar nga përmbytjet e tri viteve të  fundit, dhe qeveria ka qenë inekzistente nuk u ka kushtuar asnjë vemendje. Kanë humbur gjithë pasurinë dhe nuk kanë sot me cfarë të jetojnë.

Banorët e fshatrave fshatrave Kuc, Ciflig, Hink, Arrëz, Banaj thanë se kanë investuar mundin dhe sakrificën e gjithë jetës në fermat dhe tokat të cilat u përmbytën tri herë. Sekretari për Aksionin Qytetar në PD, Ervin Salianji dhe dega e PD në Berat duke mbështetur protestën e fermerëve  theksuan se qeveria dhe Edi Rama grabisin fshatarët me niptet dhe taksat e larta dhe nuk denjojnë as të zbresin në terren e të dëgjojnë hallet e banorëve të cënuar nga përmbytjet.

“Të gjithë vuani nga një gjë, jeni braktisur nga qeveria. Gjithë investimin e jetës e keni hedhur në bujqësi sepse bujqësia është jeta juaj, tek toka, në bujqësi keni hedhur mundin, djersën, sakrificat e një jete, bukën e fëmijve, dhe e gjitha u është përmbytur nga fatkeqësi natyrore. Jo vetëm që nuk po ju japin para, por nuk ka ardhur t’u dëgjojë asnjeri. Ky është një problem i gjithë komunitetit. Qeveria e ka braktisur totalisht qytetarin. Siç ka ndodhur këtu tek ju që i ka dhënë  lekët tek një grup i ngushtë që kanë ngritur sera për të marrë lekët tuaja, ashtu po funksionon në të gjithë Shqipërinë. Qeveria nuk shkon pranë qytetarit nuk e dëgjon atë, nuk vjen këtu dhe ti japë zgjidhje. Sepse në fund të fundit për çfarë e duam qeverinë? Qeveria votohet nga ju, paguhet nga taksat e juaja dhe nga qytetarët e tjerë pikërisht për të ardhur dhe për ti dhënë zgjidhje problemeve. Qeveria mbështet importuesin i cili fiton miliona në kurrizin e djersës dhe mundit tuaj, vetëm e vetëm se është klient i qeverisë, dhe ka lidhje të drejtëpërdrejta me ministrat me kryetarin e bashkisë dhe me deputetët e PS, që ju vijnë këtu vetëm për zgjedhje . Ne sot nuk jemi në fushatë por kemi ardhur të dëgjojmë e të diskutojmë për problemin tuaj  dhe këtë problem e kemi ngritur dhe do të vazhdojmë ta ngrejmë publikisht do e ngrejmë zërin në parlament, do ta trajtojmë në departamentin e Bujqësisë në PD dhe ju garantoj që gjithë mundi juaj do të shpërblehet sepse në fund të fundit paratë e qeverisë nuk janë paratë e qeveritarëve por janë paratë tuaja të cilat duhen administruar për ju”, u shpreh Salianji.

“Dega e PD, Berat mbështet protestën e fermerëve të fshatrave Kuc, Ciflig, Hink, Arrëz, Banaj, të cilët janë përmbytur. Megjithëse u është premtuar që do të dëmshpërblehen nga ana e qeverisë dhe qeveria ka akorduar nëpërmjet fondit të emergjencave një fond të posacëm, deri më sot kanë përfituar vetëm njerëzit që kanë qenë afër PS. Paratë taksat e këtyre fshatrave dhe gjithë qytetarëve shqiptarë po trajtohen si pronë dhe si çiflig i partisë në pushtet. PD është e vendosur të mbështesë fermerët deri në dëmshpërblimin e tyre duke përshkallëzuar protestën”, tha kryetari i PD-së së Beratit, Gazmend Azizi.

“Unë kam në Sheq dy dylymë e gjysëm mandarina të përmbytura. Uji qëndroi mbi një muaj e kusur. Qeverinë as e kam parë e as kam dëgjuar. Kam tre dylymë grurë dhe kam marrë vetëm katër kuintalë grurë se është përmbytur”, u shpreh një banore.

“Unë kam tre dylym sera, më është përmbytur në nëntor të 2014 dhe në shkurt të 2015. Dy herë jam përmbytur. Qeveria nuk ka marrë masa për asgjë, ndau ca lekë sivjet. Kemi bërë aplikime por skemi marrë lekë. Nuk na përfshijnë tek dëmshpërblimet”, u shpreh një kryefamiljar i zonës.

“Kërkojnë tatimet këta, kërkojnë nipte po malli që është prishur, apo që nuk shitet ku ta cojmë. Këta na blenë ne ullirin, mandarinën, plehun kimik, që tani na kërkojnë lekët, taksat?”, ankohet një tjetër.

“Jam përmbytur dy herë në nëntor të 2014 dhe në shkurt të 2015. Fusha ka mbetur pesë ditë nën ujë, kam mbjellë shtatë dylym mandarinë. Investimi im është tetë million lekë. Kam blerë 400 mijë rrënjë mandarinë. Nga shteti nuk është vënë dorë fare. Ka ardhur një herë ministri i bujqësisë dhe Edi Rama ka bërë një mbledhje lart, na ftuan të merrnim pjesë në takim, por pastaj na thanë largohuni se do ulen dhe do bëjnë pyetje vetëm gazetarët, nuk na premtuan asgjë. Unë i kërkova ministrit të ndërtohen kanale, por ata vijnë vetëm për fushatë”, thotë një fermer.

“Mua m’është prishur një autokombajnë me vlerë dy milion e gjysëm lekë. Na kanë shkuar dëm kuintalë të tërë ullinj, dy kuintal qepë, 50 gjela deti dhe dhjetra kuintalë mandarina. Nuk më ka ardhur njeri të më pyesë as edhe cfarë dëmesh kam patur”

“Pata tre dylym fasule dhe grurë dhe ato mu përmbytën. Kam një invalid të sëmurë në shpi dhe dy pleq të moshuar që i mbaj unë me punën time në bujqësi. Rropatem gjithë ditën dhe sera ime është përmbytyr katër herë këto vite. Lekët i kanë marrë njerëzit pranë pushtetarëve”, denoncon një nënë.

Njoftim per shtyp i Partisë Demokratike, 8 Korrik 2016