Blog

Sapo e dëgjuat skizofrenin e vetëdeklaruar sepse e ka thënë vetë në intervista, që është në situatë skizofrenie midis artit dhe politikës ..

E dëgjuat pra kryeministrin që foli dhe për dëshpërimin tonë , për parti të dëshpëruar në opozitë, por nuk e di pse nxinte ky njeri, ky që ishte sot pranë triumfit. Ka kaq kohë që Rama me media të kapura apo nën presion dhe me të gjitha mjetet e tij të propagandës, po përpiqet ti fusë me dhunë në kokë shqiptarëve, se ai lideri botëror, reformatori i madh po kërkon ti shpëtojë shqiptarët një herë e mirë nga të gjitha të zezat që u kanë rënë mbi kokë. Kërkon t’i shpëtojë jo vetëm nga korrupsioni dhe padrejtësia nga papunësia mjerimi, nga varfëria, krimi e kriminelët, sidomos nga ata në parlament, qeveri e bashki, por do ti shpëtojë edhe nga sëmundjet dhe fatkqeqësitë natyrore. E dëgjuam dhe sot të thotë të njëjtat fjalë. Po që të realizojë të gjitha këto, e pengon opozita. E pengon opozita  e cila sipas tij nuk pranon të votojë reformën në drejtësi, ashtu siç e do Rama. Ja pra kush është fajtore për të gjitha vuajtjet dhe mjerimin e shqiptarëve. Po a ka shqiptar me dy fije mend në kokë, pas tre vitesh sundim të kësaj mazhorance që nuk e sheh se korrupsioni, krimi, padrejtësitë, varfëria, papunësia e mjerimi e kanë burimin vetëm tek mbrapshtitë e kësaj qeverie? Jo se nuk kanë ekzistuar më parë jo se nuk ekzistojnë kund tjetër, po këtu si askund tjetër dhe kurrë ndonjëherë është vetë kryeministri i vendit, i cili me vullnet të plotë, krimin, padrejtësitë, korrupsionin, varfërinë dhe represionin, i ka kthyer në mjete të sundimit të tij dhe i mban në këmbë me të gjitha mënyrat.

Ky kryeministër që bërtiste sot, ky pra që akuzon opozitën se nuk dashka reformën në drejtësi, atë reformë që e duan mbi 90% e shqiptarëve.

Po çfarë është kjo e shumëpërfolur reformë në drejtësi dhe çfarë kërkojnë në fakt mbi 90% e shqiptarëve?

Tek ky 90% i shqiptarëve jam edhe unë, janë edhe të gjithë kolegët e mi të opozitës. Jemi të gjithë ne, viktima apo jo të drejtpërdrejtë të një drejtësie, po e vërtetë është, shpesh të korruptuar e të papërgjegjshme. Janë të gjithë shqiptarët që kërkojnë që drejtësia të japë drejtësi e të mos vendosë në favor të më të fortit kundër të dobëtit, të mos vendosë në favor të të pasurit kundër të varfrit, mos veprojë nën ndikimin e pushtetit, parasë dhe krimit, por të ligjit dhe të së drejtës.

Këtë kërkojnë në fakt mbi 90% e shqiptarëve. Këtë kërkojmë edhe ne, si opozitë.

Po Rama që na akuzon ne se nuk e duam reformën në drejtësi, çfarë kërkon ai në fakt?

Për të kuptuar këtë o shqiptarë dhe ndërkombëtarë, nuk ka nevojë të hysh në labirintet e strukturës apo arkitekturës së institucioneve të drejtësisë, sipas këtij apo atij drafti. Nuk ka nevojë të mësoni se çfarë është KLGJ-ja apo KLP-ja. Do votohen me dy të tretat apo tre të pestat.

Jo. Për të kuptuar se cila është reforma që kërkon Rama, mjafton të shihni e kuptoni konceptin që ai ka për drejtësinë,atë koncept që shfaqi edhe sot e që ka shfaqur që kur ka ardhur në pushtet. Për këtë mjafton të shihni në sy faktet dhe të vërtetën.

Cilat janë faktet?

E dëgjuat të ulëriste këtu se i vinte keq për ato nënat që iu qenkan vrarë fëmijët dhe gjykatësit e korruptuar i kanë nxjerrë vrasësit në rrugë . Po kush janë ato nëna , kush janë këta vrasës ?

Kur kjo drejtësi liron një vrasës pse ai është djali i deputetes së Ramës, kjo drejtësi funksionon, dhe kryeministri del në tribunë me deputeten që e paraqet si heroinë dhe si shembull për t’u ndjekur.

Kur kjo drejtësi liron deputetin e Ramës që qëllon për të vrarë qytetarë të thjeshtë përpara komisariatit të policisë, kjo drejtësi funksionon dhe kryeministri impenjohet që ti shpëtojë dhe mandatin deputetit të tij vrasës.

Kur kjo drejtësi lë të lirë drejtorin e policisë së Ramës dhe pse është kapur në flagrancë e denoncuar nga vartësi se ka shkelur ligjin duke fshehur të dhënat për një tjetër deputet vrasës të Ramës, kjo drejtësi prapë funksionon.

Funksionon kjo drejtësi sipas Ramës dhe kur dënon një baba fatkeq pse kërkon të rregullojë çatinë e shtëpisë për fëmijët e tij, apo kur çon drejt vetëvrasjes në qelitë e burgut një tjetër baba fatkeq për 30 mijë lek të vjetra energji elektrike.

Në të gjitha këto raste e qindra të tjera të ngjashme, kjo drejtësi funksionon për Ramën.

Por, nëse drejtësia i heq mandatin Koço Kokëdhimës sepse duke shkelur ligj e Kushtetutë, ka vazhduar të grabisë shqiptarët, atëherë  ”kjo është një arsye më shumë pse duhet reformuar”.

Kur drejtësia pezullon drejtorin e policisë së Ramës dhe Tahirit sepse në mënyrë flagrante ka shkelur ligjin duke futur e më pas përdorur ilegalisht një pajisje përgjimi, atëherë kjo drejtësi është e korruptuar dhe ka nevojë për reformim.

E ndoqëm dje se me çfarë histerie e tërbimi u sulën Tahiri e Rama mbi gjyqtarë e prokurorë, për një rast mëse evident, të një krimi shtetëror, tanimë të pranuar dhe nga vetë drejtori i policisë.

Po pikërisht kjo i tërboi dhe i bëri histerikë Ramën dhe Tahirin, fakti që Çako po flet.

I kemi parë se si bërtasin në kor kur ne denoncojmë skandalet e tyre “shkoni në prokurori” thonë, por tani që prokuroria e gjykata vepruan mbi bazë të fakteve mëse evidente, u çorrën ndryshe.

Folën dje për komplot të opozitës që përdorka gjyqtarë të kapur që qenkan kthyer në sistemin e drejtësisë në mënyrë të padrejtë dhe prapë dolën bllof, si në shumë raste të tjera, sepse nëse ajo që thonë paska ndodhur, rezulton që “fajtor” të jetë gjykata e Fehmi Abdiut e cila i dha të drejtë atij gjyqtarit, pikërisht gjykata e Fehmi Abdiut dhe  KLD e Bamir ziut, njëri ish-deputet i PS dhe tjetri aleati më i ngushtë i Ramës sot. Se me aleatët e  tjerë nuk ka marëdhënie dashurie si ka me Bamirin. Aleatin tjetër e kërcënon njësoj si opozita me të ashtëquajturën reformë në drejtësi

Histeria e djeshme ishte nga paniku se Çako po flet e nuk pranon mesa duket të bëhet kokë turku. Për këtë sulen me tërbim dhe Rama e Tahiri, jo sepse janë të shqetësuar për drejtësinë, por sepse kanë frikë se ky skandal do ti marrë me vete këta të dy. Mos harrojmë që për një skandal të ngjashëm ka ikur dhe një President i SHBA-së.

Kaq besoj mjafton për të kuptuar se cfarë drejtësie kërkon Edvin Rama  dhe pse ne, pse kjo opozitë e kundërshton drejtësinë për të cilën flet Edvin Rama. Rama kërkon një drejtësi që të mbrojë kriminelët, vrasësit, trafikantët e përdhunuesit sepse kolanës së tij të deridjeshme, ku kishte vrasës në parlament, trafikantë prostitutash, trafikantë droge, iu shtua edhe Rrosh përdhunuesi, dhe sot, e patë që bërtiste këtu kundër gjyqtarit që paska liruar një përdhunuesi. Po kush është ai që e cakton përdhunuesin kryetar bashkie? Ky këtu, është. Ky është autori që përdhunuesin e bën kryetar bashkie e ndan pushtet me kriminelë të tjerë me të cilët ai ka mbushur administratën dhe ka zënë bashkitë. Kriminelë që harrojnë se sa krime kanë kryer. Kërkon të mbrojë hajdutët e tij në qeveri e Parlament, që vazhdojnë të grabisin shqiptarët duke përfituar nga postet që mbajnë dhe lidhja me Ramën.

Rama kërkon të mbrojë Rroshët, Bushët, Bardhët, Kokëdhimët, Prengët, Beqët, Frrokët e Tahirët. Kërkon të mbrojë veten.

Sa për dënimet, drejtësia i duhet për të dënuar ata që guxojnë të denoncojnë krimin dhe hajdutërinë e pushtetarëve. Të dënojë dhe mbajë nën presion dhe qytetarët e thjeshtë të cilët çdo ditë luftojnë me të zezat që i ka sjellë kjo qeveri, që nesër me dhunë e para t’ju marrë edhe votën.

Kjo është drejtësia dhe reforma që kërkon Rama e kjo është e qartë prandaj nuk ka nevojë të na tregojë askush, dimë shumë mirë ta dallojmë errësirën nga drita e diellit. Për këtë nuk do të lejojmë kurrë që satrapi të shtjerë në dorë dhe drejtësinë.

Shqiptarët kanë nevojë për drejtësi e mirëqenie e këto nuk mund t’ua japë ai që i groposi, Edvin Rama.

Fjala në Parlament e Kryetarit të Grupit Parlamentar, Edi Paloka, 9 qershor 2016

Sekretari i Aksionit Qytetar Salianji: Tahiri e ktheu panairin në frengji për të sulmuar institucionet

Partia Demokratike ka denoncuar sot bilancin e lidhjeve kriminale të Saimir Tahirit. Sekretari i Aksionit Qytetar, Ervin Salianji ishte sot pranë panairit që ai ka ngritur në qendër të Tiranës, ku Tahiri shfaqet prej disa ditësh duke sulmuar institucionet.

“Për ditë me rradhë Panairi i Policisë që shihni këtu, nuk arriti që të ekspozonte sukseset personale të Ministrit Sajmir Tahiri. Nuk u ekspozua gjatë panairit të policisë suksesi i Ministrit Tahiri, që është mbulimi i gjithë Shqipërinë nga droga. Nuk u arrit të ekspozohej makina e famshme AA003GB e kushërinjve të ministrit e cila transportonte drogë e nuk ndalej nga policia. Nuk u arrit të ekspozohej suksesi i ministrit Tahiri për të nxjerrë jashtë kufijve të Shqipërisë Arben Frrokun, vrasësin e komisar Lamajt, nuk u arrit të ekspozohej mënyra se si ministri Tahiri arriti të nxirrte jashtë shtetit dhe ndihmoi të arratisej Balilin, apo Eskobarin e Ballkanit, baroni i drogës siç njihej për mediat ndërkombëtare. Nuk arriti të ekspozohej as kriminaliteti i lartë në vend, as gjobat dhe represioni që policia e shtetit ushtron ndaj qytetarëve”, tha Salianji.

Sekretari i Aksionit politik dënoi sulmet e Tahirit ndaj hetimit që ka nisur për përgjimin, dhe mbrojtjen që ai dhe Rama po i bëjnë krimit.

“Për 2 ditë me radhë u arrit që ky panair të kthehej në frengji, nga ku Ministri filloi të sulmonte pas asnjë kulturë institucionale, pa asnjë parim të qeverisjes së mirë, gjykatës dhe prokurorë të cilët e kanë vendosur sot ministrin Tahiri si të akuzuarin kryesor për pajisjen e përgjimit e cila edhe ajo nuk u ekspozua në këtë panair. Ndaj Edi Rama dhe Sajmir Tahiri nuk e duan reformën në drejtësi sepse në rastin më të parë, në momentin më të parë që u vu në provë për ti hapur rrugë drejtësisë, për ti lënë që drejtësia të thotë fjalën e fundit ashtu siç e parashikon Kushtetuta dhe Ligji, Edi Rama dhe ministri i vet i akuzuar sot për përgjimin e ambasadorëve, të mediave, të krerëve më të lartë të shtetit, për një skandal me përmasa të mëdha shtetërore, pengon hetimin, pengon drejtësinë, i bën kërcënime mafioze gjykatësve”, u shpreh Salianji.

Njoftim për media i Partisë Demokratike, 9 qershor 2016

Sot jemi para jush për të bërë transparencë mbi një numër faktesh të cilat faktojnë katërcipërisht fleksibilitetin e plotë të Partisë Demokratike ndaj gjithë procesit të negociimit, diskutimeve dhe dialogut jo vetëm me palët politike por mbi të gjitha edhe me partnerët ndërkombëtarë në lidhje me paketën kushtetuese të ndryshimeve për sistemin e drejtësisë.

Gjatë këtij procesi kemi pasur zhvillime të cilat na kanë çuar deri në pikën fundore, ku në këto momente e vetmja pikë që na ndan është çështja themelore që garanton mos kapjen e sistemit të drejtësisë, që është modeli me të cilin do të emërohen zyratrët  më të lartë të sistemit të drejtësisë.

Sot, ne do t’iu paraqesim një numër faktesh dhe provash që dëshmojnë qendrimin fleksibël të PD mbi bazën e propozimeve të bëra nga partnerët ndërkombëtarë OPDAT dhe EURALIUS dhe së fundmi edhe nga Komisioni i Venecias.

Këtu kemi një email të datës 10 shkurt që është emaili me të cilin na janë paraqitur ne opozitës, qoftë në nivelin politik, qoftë në nivel ekspertësh, një numër zgjidhjesh, propozimesh nga OPDAT dhe EURALIUS, në lidhje me modelin e emërimit të zyrtarëve të lartë në sistemin e drejtësisë. Janë një numër alternativash, që përfshijnë ndër to edhe mdoelin e vendeve të rezervuara. Me propozimin e partnerëve ndërkombëtarë na u dha mundësia që ne të përzgjidhnim nje prej këtyre modeleve, ai që garantonte më së miri, atë që kërkonte Komisioni i Venecias që në dhjetor, përfshirjen substanciale të opozitës në procesin e emërimit të këtyre zyrtarëve dhe përfaqësimin e opozitës në organet kolegjiale në sistemin e drejtësisë.

Midis modeleve të paraqitur nga ekspertët e OPDATIT dhe EURALIUS-it dhe të mbështetura edhe nga nivelet politike të partnerëve ndërkombëtarë ajo që zgjodhi PD ishte pikërisht modeli i vendeve të rezervuara, me modelin ku dy anëtarët jo gjyqtarë ose jo prokurorë zgjidhen nga propozime profesionistësh të përzgjedhura nga partitë e mazhorancës dhe dy kandidatura do të zgjidhen nga partitë e opozitës, dhe anëtari i pestë i cili zgjidhet nga shoqëria civile do të zgjidhet me shumicë prej 3/5 nga Parlamenti për të garantuar konsensusin maksimal.

Pra siç e shihni, ky është modeli, është ekzakt edhe në grafikë  i paraqitur nga partnerët ndërkombëtarë OPDAT dhe EURALIUS për këtë zgjidhje. Ky është propozimi i bërë në datën 10 shkurt nga këta partnerë dhe në datën 27 shkurt nënkryetari i Komisionit për Reformën në Drejtësi, zoti Eduard Halimi, në një përgjigje zyrtare mbi këtë propozim i përgjigjet OPDAT-it dhe EURALIUS-it duke zgjedhur në mënyrë specifike modelin e vendeve të rezervuara atë që ju paraqitëm më përpara, duke iu thënë që ky ishte modeli më i përshtatshëm, modeli më i thjeshtë, ai që garantonte përfshirjen substanciale dhe përfaqësimin e opozitës në organet e sistemit të drejtësisë dhe ishte sistemi më i thjeshtë dhe më pak i komplikuar dhe më pak i korruptueshëm.

Më pas, këto kanë vijuar me raportin final të Komisionit të Venecias i cili në mënyrë shumë specifike përcakton e zezë me të bardhë në paragrafin 17, në footnote nr4, ku thuhet që; kandidatët që do të përzgjidhen nga lista e kandidatëve të mazhorancës dhe lista e kandidatëve të opozitës, nga kjo listë e kandidatëve të mazhorancës do të përzgjidhen 3 dhe nga lista e kandidatëve të opozitës do të përzgjidhen dy. E shkruar e zezë mbi të bardhë, propozim i Komisionit të Venecias si një nga modelet për zgjidhjen e kësaj çështjeje thelbësore që garanton mos kapjen e organeve kolegjiale të sistemit të drejtësisë nga mazhoranca qeverisëse. Në paragrafin 88, gjithashtu të këtij raporti, në mënyrë specifike konsakrohet nga Komisioni i Venecias nevoja që të garantohet përfaqësimi i opozitës në këto organe kolegjiale.

Në vijim të gjithë kësaj, në datën 21 Prill, pra pas daljes së raportit të Komisionit të Venecias, eskpertët ndërkombëtarë të OPDAT-it dhe EURALIUS-it bëjnë një komunikim të fundit me ne duke përcaktuar qartë se të vetmet propozime që ata kanë janë 2; njëri është i vendeve të rezervuara, i përzgjedhur nga Partia Demokratike si dhe një sistem propocional votimi kompleks me potencial të madh bllokimi dhe i korruptueshëm, i përzgjedhur nga maxhoranca dhe aleatët e saj.

Këto janë komunikimet elektronike të Partisë Demokratike me parnerët ndërkombëtarë për propozime që më pas janë të reflektuara në raportin e Komisionit të Venecias. Në bazë të ofertës së bërë, kemi zgjedhur në mënyrë transparente modelin e vendeve të rezervuara si modeli më i thjeshtë, më i qartë, më funksional që garanton më shumë se kushdo moskapjen e institucioneve të sistemit të drejtësisë. E kemi komunikuar këtë në mënyrë transparente e në mënyrë të vazhdueshme që nga shkurti i këtij viti dhe pikërisht mbi bazën e këtij qendrimi të bërë publik nga PD, ka vazhduar edhe negociimi. Siç e bëri të qartë edhe në përfundim të takimit të datës 6 qershor, kryetari i Partisë Demokratike, çështja e modelit për emërimin e funksionarëve të organeve kolegjale në sistemin e drejtësisë është çështja e e fundit dhe e vetme që ndan palët për të përmbyllur me sukses paketën e ndryshimeve Kushtetuese edhe për ta bërë gati atë për votim në Parlament. Edhe në takimin e datës 6 Qershor ne kemi bërë në mënyrë të detajuar, transparente, gjatë atij takimi, propozimet tona konkrete duke detajuar modelin e vendeve të rezervuara, model i cili nuk gjeti asnjë kundërshtim principial, por ashtu siç ju e dini, kryeministri doli më pas me një deklaratë të shkruar e të përgatitur më përpara, duke thënë që takimi dështoi. Edhe pse opozita fare qartë tregoi gadishmërinë për të vazhduar dhe për të gjetur zgjidhjen më të mirë që garantonte maksimalisht moskapjen nga maxhoranca kurdoqoftë të organeve kolegjale.

Këto fakte të bëra tashmë publike, të cilat do të jenë në dispozicion të medias, vërtetojnë edhe njëherë fleksibilitetin maksimal të Partisë Demokratike e cila në procesin e dialogut dhe të konsensusit ka bërë hapat e saj përpara për të gjetur pikat e takimit, të gjitha çështjet e tjera tashmë edhe me negociimin e partnerëve ndërkombëtarë të mund të konsiderohen të zgjidhura dhe e vetmja çështje është kjo. Eshtë shumë e thjeshtë, fare e qartë, që i vetmi që e pengon zgjidhjen përfundimtare është kryeministri i cili nëse vendos të zgjedhë, jo modelin e propozuar nga PD, por modelin e propozuar nga Komisioni i Venecias, OPDAT-it dhe EURALIUS, i vë vulën përfundimtare zgjidhjes dhe përgatitjes për aprovim të paketës kushtetuese për Reformën në Drejtësi. E gjitha mbetet në vullnetin e kryeministrit për të qënë vullnetmirë e për ta mbyllur këtë proces dhe jo për të ndjekur rrugën demagogjike për ta çuar reformën në drejtësi drejt dështimit nëpërmjet një zgjidhje që siç e propozon, ai garanton kapjen e plotë të organeve kolegjiale nga ai. Këto emaile dhe prova do tu vihen në dispozicion dhe do të jenë publike në websitin e PD për të qënë të aksesueshme dhe plotësisht transparente për të gjithë publikun.

Faleminderit!

Deklarata për mediat për mediat e nënkryetarit të Komisionit të Drejtësisë, Oerd Bylykbashi, 8 Qershor 2016

Letra për nënkryetarin e Komisionit të Sigurisë Kombëtare, Flamur Noka

I njëjti kryeministër që thotë nuk ka përgjime të paligjshme, ndërkohë që përgjime të paligjshme ka pasur, i njëjti që thotë s’ka trafik droge, kur droga ka mbuluar vendin, i njëjti që tha Elvis Rroshi nuk është dënuar asnjëherë, kur ai ishte dënuar më shumë se një herë, deklaroi sot në një retorikë 40 minutëshe se ekonomia qenka mirë.

Madje ai sulmoi me tone kërcënuese edhe bizneset që mund të kenë ankesa.

Ndërkohë, faktet për ekonominë janë këto:

Dhoma Amerikane e Tregtisë është shprehur se besimi ka rënë me 4.83 pikë, dhe 65 përqind e të anketuarve janë shprehur se klima për biznes është e pafavorshme ose shumë e pafavorshme.

Më parë Dhoma Gjermane e Tregtisë denoncoi korrupsionin e taksat e larta. Konsumi ka pësuar rënie në rekorde historike.

Eksportet dhe investimet janë në rënie, dhe këto tregues janë ekonomia e vendit.

Asnjë investitor i huaj nuk ka shkelur në këto tre vite, madje investitorët po largohen. Kryeministri vazhdon të krenohet me TAP-in dhe Hidrocentralin e Devollit, të dyja punë të nisura nga qeveria e mëparshme.

Konkurenca është eleminuar, vetëm nëse je mik i Ramës e klanit të tij të ngushtë përfiton tendera e fonde publike.

Kjo është ekonomia e Ramës dhe Ahmetajt të cilët vazhdojnë të flasin me “do të”, a thua se nuk ishin këtu këto 32 muaj, a thua se nuk janë ata shkaktarët e krizës së thellë.

Deklaratë e nënkryetarit të Partisë Demokratike, Edmond Spaho, 8 qershor 2016

Saimir Tahiri i kapur nga paniku i arrestimit për shkak të krimit që ka kryer, përgjimi i paligjshëm, është hedhur në një sulm të paprecedent ndaj drejtësisë.

Ai sulmoi ashpër sot gjykatësin që miratoi kërkesën e prokurorisë për pezullimin e drejtorit të Përgjithshëm të Policisë, sulmoi dhe organin e akuzës.

Vreri i Tahirit vjen pikërisht në kohën që prokuroria është duke kryer verifikimin e rolit të tij në krimin shtetëror të përgjimit të paligjshëm.

Me këtë sulm vandal e mafioz ndaj drejtësisë, Tahiri kërkon të shantazhojë  gjykatën e Apelit, për të shpëtuar Çakon e tij. Nëse Çako nuk shpëton, Çako pastaj do flasë dhe do të marrë me vete edhe Tahirin.

Ky presion kriminal ndaj gjykatës së Apelit tregon edhe një herë përse ata nuk e duan drejtësinë sipas Venecias, por e duan të kapur.

Rama dhe Tahiri kanë dalë zbuluar në sytë e gjithë qytetarëve dhe partnerëve ndërkombëtarë duke dëshmuar se cila është drejtësia, prokuroria dhe gjykata që ata duan. Ata nuk duan drejtësi sipas standardeve europiane, por duan prokurorë e gjyqtarë që urdhërohen prej tyre, duan prokurorë e gjyqtarë që të mos hetojnë krimet e tyre.

Partia Demokratike i dënon këto sulme të Edi Ramës e Tahirit të tij ndaj drejtësisë, dhe ne inkurajojmë prokurorinë e gjykatat të bëjnë punën e tyre të pandikuar nga presionet mafioze.

Ne i bëjmë thirrje faktorit ndërkombëtar, ambasadës së Shteteve të Bashkuara të Amerikës, të Bashkimit Europian dhe vendeve të tjera euroatlantike, në Tiranë, të dënojnë sulmin e hapur të Edi Ramës kundër hetimit të këtij krimi të rëndë të sigurisë kombëtare dhe i kërkojmë të shprehen e të prononcohen në favor të hetimit të pavarur, të pandikuar politikisht, në favor të hetimit të plotë të kësaj afere skandaloze.

Deklaratë e nënkryetarit të Partisë Demokratike, Edi Paloka, 8 qershor 2016

Edi Rama ka sulmuar sot Prokurorinë me një letër tipike nga ato që bën për Elvis Rroshin, pikërisht pasi drejtësia kapi në shkelje të ligjit Drejtorin e Përgjithshëm të Policisë dhe disa vartës të tij, për përgjimet e paligjshme.

Edi Rama duhej sot ti kërkonte ndjesë popullit të tij, qytetarëve, sepse u vërtetua që pajisja e përgjimit është futur në mënyrë të paligjshme dhe është përdorur në mënyrë të paligjshme. E në vend të kësaj, ai i kërkon një falje të pakërkuar, të panevojshme qeverisë italiane, duke e kërkuar me zor ta beje edhe atë palë në këtë krim shtetëror. Ne e dimë mirë se drejtësia atje, opinioni publik, mediat, shoqëria civile do të reagonin me forcë nëse një pajisje e paligjshme do kishte hyrë në territorin e tyre, pa u deklaruar, dhe do të përdorej pa autorizimin e Prokurorit.

Edi Rama duhej sot të dorëzonte Saimir Tahirin, e të hiqte kështu pengesën që ka drejtësia për të bërë hetim të plotë e të gjithanshëm për këtë skandal mbi skandalet.

Por ai bën krejt të kundërtën. Sulmon institucionin e prokurorisë, sulmon drejtësinë, vetëm e vetëm për të mbrojtur paligjshmërinë dhe krimin shtetëror.

Edi Rama u vetëdenoncua se është ai në krye të përgjimeve të paligjshme.

Dhe prandaj kërkon ta mbrojë krimin deri në fund.

Deklarata për mediat e Partisë Demokratike, 7 Qershor 2016

Kryetari i Partisë Demokratike Lulzim Basha, priti në një takim ministrin e jashtem grek Nikolaos Kotzias

Z. Basha vlerësoi shumë të rëndësishme marrëdhëniet me shtetin fqinj dhe theksoi angazhimin e Partisë Demokratike për të mbështetur dhe nxitur më tej këto marrëdhënie. Por kryetari i Partisë Demokratike nenvizoi dhe faktin se në marrëdheniet midis dy vendeve ka cështje të mprehta që duhen trajtuar pa paragjykime dhe me kurajo për të gjetur rruget e zgjidhjes përmes një dialogu dhe veprimi të sinqertë mes dy palëve.

Zoti Basha shprehu shqetësim se prej tre vitesh ka shumë retorike dhe propagandë por nuk ka asnjë veprim konkret nga ana e dy qeverive në zgjidhjen e problemeve të mbetura pezull.

Ceshtja e statusit absurd të ligjit të luftes, trajtimi i të drejtës së popullatës Çame si e drejtë themelore e njeriut, të drejtat pronësore të shqiptarëve në Greqi dhe cështje te tjera të mbetura pezull midis dy vendeve meritojnë të trajtohen e zgjidhen sa më parë duke demonstruar vullnet të përbashkët dhe vizion europian.

Anulimi i ligjit të luftës, është një çështje e rëndësishme theksoi zoti Basha jo vetëm për shkak të përceptimit, por veçanërisht të problemeve në lidhje me sekuestron konservative për pronat e qytetarëve shqiptare, veçanërisht atyre Çamë.​

Njoftim per shtyp i Partise Demokratike, 7 Qershor 2016

I kërkoj Prokurorisë të mos ndalen me koka turku por të hetojë urdhëruesin e përgjimit të paligjshëm 
Mirëdita të nderuar përfaqësues të medias,​

Të dashur bashkëqytetarë,

Në qeverisjen e njëmijë e një skandaleve ka një skandal që del mbi gjithë të tjerët dhe ky është skandali i përgjimeve, i cili përveç të qenit një krim i madh dhe monstruoz është edhe një cenim i qartë dhe shkelje flagrante e sigurisë kombëtare të Republikës së Shqipërisë dhe çdo qytetari të Republikës së Shqipërisë.

Ky skandal që është denoncuar nga opozita prej disa muajsh dhe për të cilin kemi kërkuar në mënyrë të vazhdueshme hetim dhe transparencë për hetimin, sot ka dalë në dritë.

Gjykata ka dhënë masë sigurie për ish-drejtorin e Përgjithshëm të Policisë së Shtetit, Haki Çako përmes pezullimit dhe ka urdhëruar arrestimin e drejtorit të Operacionales dhe Përgjimeve.

Hapa padyshim që unë i inkurajoj, që tregojnë integritet nga ana e Prokurorisë, por që nuk janë të mjaftueshëm. Kryeprokurori i vendit, prokurorët e çështjes, duhet ta dinë qartë qëndrimin tonë. Ne nuk pranojmë dhe nuk do të pranojmë koka turku në këtë proces kaq të rëndësishëm për interesin esencial të vendit, sigurinë kombëtare. Ne nuk do të pranojmë që njeriu në krye të këtij operacioni të pistë të vazhdojë të mbetet në detyrë.

Ndaj inkurajojmë me forcë hetimin e shtrirë dhe të plotë të të gjithë personave përgjegjës që kulmojnë në zinxhirin urdhërdhënës me Saimir Tahirin.

Në çdo vend me standardin minimal demokratik një Ministër i Brendshëm që kapet duke futur në mënyrë të paligjshme një pajisje të paligjshme përgjimi do të kishte ikur, do të ishte larguar, do të ishte në dispozicion të drejtësisë.

Në shtetin e Edi Ramës që betohet dhe përbetohet për një drejtësi të reformuar, Ministri i tij i Brendshëm i kapur në flagrancë, i kapur nga skandali në skandale, jo vetëm nuk ikën por i bën presion Prokurorisë, saboton hetimin.

Ndaj ne kërkuam përmes seancës dëgjimore në Komisionin e Sigurisë Kombëtare dhe kërkojmë transparencë. Por Edi Rama i është shmangur deri më sot përgjegjësisë direkte politike që ka për të pezulluar dhe larguar ministrin e Brendshëm, që është politikisht përgjegjës për skandalin e përgjimit, që është -dhe faktet nuk kanë si të mos tregojnë në qoftë se hetohet me paanësi – vetë urdhëruesi i kësaj afere.

Pse e mban me thonj Saimir Tahirin, Edi Rama edhe pse hetimi ka nisur? Maja e policisë në përgjegjësinë direkte të Saimir Tahirit është pezulluar, kjo mund të nënkuptojë vetëm diçka, implikimin e drejtpërdrejtë të Kryeministrit në këtë aferë.

Nëse është kështu, dorëheqja e tij nuk mjafton, largimi i Kryeministrit një orë e më parë është domosdoshmëri.

Por, hapi i parë është dhe duhet të jetë firmosja nga Edi Rama e pezullimit të Drejtorit të Përgjithshëm të Policisë së Shtetit, largimi i tij nga detyra. Hapi i dytë, largimi i Ministrit të Brendshëm dhe hapi i tretë, deklarimi para shqiptarëve, se nuk ka asgjë për të fshehur dhe se është gati që këtë çështje t’ia nënshtrojë plotësisht drejtësisë dhe prokurorisë pa pengesa politike, pa presion ndaj hetimit.

Sigurisht si çdo shqiptar, pavarësisht bindjeve politike, edhe unë kam dyshime të mëdha se Edi Rama do ta bëjë këtë. Edi Rama i trembet një hetimi të pavarur dhe përgjegjësive politike që do të nxjerrë në raport me skandalin e përgjimit.

Ndaj, edhe dje, edhe sot, ngurron të japë konsensusin e tij për një projekt drejtësie të pavarur dhe të pakapur politikisht. Ndaj pengon çdo reformë që do të mundësonte që në skandale të tilla drejtësia të vepronte paanësisht dhe pa pengesë. Një drejtësi e tillë, sigurisht është problematike.

Një hetim që nis dhe nuk pengohet nga kryeministri, një krim shtetëror që ndodh dhe dorëzimi i autorit nuk pengohet nga kryeministri, është pa dyshim një realitet me të cilin Edi Rama nuk mund të përballet. Këtë ne e dimë dhe kjo nxjerr qartë mentalitetin e tij se pse do drejtësinë nën kontrollin e tij, nën vartësinë politike.

Por sot dilema e tij për një drejtësi të kapur politikisht ekspozohet fuqimisht përballë këtij skandali, ku duket qartë se operacioni i paligjshëm, antikushtetues dhe i anti-sigurisë kombëtare të Tahirit, ka vënë në përgjim drejtues të lartë të shtetit, të partive politike, trupit diplomatik, medias, biznesit dhe bankave.

Ka ekspozuar shtetin brenda shtetit, një bandë mbi ligjin dhe shtetin, me rregullat e veta mafioze dhe interesat e veta kriminale. Ndaj sot kërkojmë me forcë largimin e menjëhershëm të Saimir Tahirit nga detyra, si parakusht për largimin e çdo pengese që i është vënë përpara prokurorisë në hetimin dhe  zbardhjen e plotë të këtij krimi.

Dhe kjo nuk është një kërkesë për një kundërshtar politik të kapur në krim por një kërkesë e ligjshme për të siguruar kushtet për drejtësi të besueshme dhe objektive, të pa influencuar dhe të aftë për të zbardhur këtë skandal të paprecedentë.

I kërkoj Prokurorit të Përgjithshëm dhe prokurorëve të çështjes të bëjnë gjithçka sipas ligjit dhe brenda ligjit dhe të mos ndalen me koka turku. Hetimi i plotë i Saimir Tahirit, hetimi i plotë i përgjegjësive të tij për këtë skandal, është ajo çfarë presin shqiptarët, është ajo çfarë pret opozita, institucionet e pakapura të shtetit dhe faktori ndërkombëtar.

I bëj thirrje Edi Ramës të largojë Saimir Tahirin nga detyra një orë e më parë.

Deklaratë për media e kryetarit të Partisë Demokratike, Lulzim Basha, 7 qershor 2016