Blog

Pas Fred Kobures së Partisë, dhe Elisës së Traut të Ngritur, radha për të bërë gargarë me jargët e shefit i erdhi Oltës, nuses së Partisë.

Nusja e partisë u keqpërdor sot nga Rama për të vënë shenja barazimi mes veprave të rënda kriminale dhe krimeve çnjerëzore të banditëve të rilindjes, me një arratisje nga Shqipëria e Ramizit dhe një aksident rrugor të 24 viteve më parë.

Eshtë qesharake se si Edi Rama mendon të fshehë banditët e tij, duke u kapur pas fijes së kashtës.

Vetëm pak ditë më parë ai katapultoi në krye të PS në Kavajë të dënuarin për drogë e trafiqe Gentjan Daja, i cili iku nga posti i Drejtorit Rajonal të Transportit në Tiranë sepse e kapte ligji i dekriminalizimit.

Por kjo tashmë është normë në partinë e Shullazit dhe Habilajve. Eshtë kthyer normë në partinë e Ndokës, Bardhit, Bushit, Roshit, Cubit, Frrokut, Prengës.

Edi Rama është lidhur prej kërthize me të gjithë të inkriminuarit e tij. Ai nuk ka as vullnetin dhe as dëshirën të ndahet nga ta. Ndaj jargavit pengje pa personalitet kundër opozitës, sepse mendon të legjitimojë kësisoj vendimin e tij për të mos dorëzuar tutorët, banditët, trafikantët, vrasësit.

Por e ka kot. Dekriminalizimi do të bëhet. Republika do të pastrohet nga krimi dhe politikanët që e promovuan atë. Shteti do u kthehet qytetarëve.

Njoftim per shtyp i Partisë Demokratike, 29 Maj 2016

Departamenti Mjedisit, Pyjeve, Turizmit dhe Departamenti i Kulturës në Partinë Demokratike së bashku me ambjentalistë dhe studentë morën pjesë dje në fushatën “Clean Up the Med” ku pastruan një zonë shumë të ndotur tek Kalaja e Skënderbeut në Kepin e Rodonit. Kjo zonë është e veçantë  ku ndërthuret turizmi, kultura dhe mjedisi, por që sërish nuk i ka shpëtuar ndotjes. Ndonëse në prag të sezonit turistik, pastrimi i kësaj zone nuk ka nisur ende nga pushteti lokal. Mbi 100 thasë me mbeturina u grumbulluan nga aktivistët dhe u transportuan me varkë pasi nuk ka akses rrugor. Kjo ndotje kryesisht depozitohet nga zonat urbane dhe që përfundojnë në det nga mos trajtimi i duhur i mbetjeve. Disa mbeturina ishin bërë pjesë e territorit duke u mbuluar me baltë e bimësi. Aktivistët e Partisë Demokratike u bënë thirrje të gjithë pushuesve të mirambajnë zonat turistike dhe të mbrojnë mjedisin.

Njoftim për shtyp i Partise Demokratike, 29 Maj 2016

Kryetari i Partisë Demokratike, Lulzim Basha u takua me banorë të Shirgjanit, Gjergjanit dhe Bradasheshit. Fermerët e Gjergjanit thanë se kanë tre vjet që nuk shohin asnjë investim për bujqësinë, as subvencione, asgjë. Investimet e fundit në këtë zonë, thonë banorët, përsa i përket infrastrukturës bujqësore ashtu dhe asaj rrugore kanë qenë në kohën kur Basha ishte deputet i Elbasanit. I kujtojnë se çdo premtim që u ka dhënë e ka bërë realitet dhe sot janë të bindur se nesër kryeministër, Lulzim Basha do ta ndryshojë Shqipërinë.

Fermer: E shikon kanalin e mbuluar me kallama  atje? Është kanali që kullon gjithë parcelat atje sipër.

Basha: Sa vjet ka pa u pastruar?

Fermer: Që kur e ke pastruar ti që ishe deputet.

Basha: Subvencione jo, rritje pensionesh jo, ulje të çmimit të energjisë jo, përkundrazi e ka rrit. Rritje taksash, rritje fukarallëkut. Çfarë i bën lekët? 2.2 miliardë euro i ka vjedh për dy vite oligarkia me atë në krye. I bie 2 milionë lekë të vjetra për vit për familje.

Fermer: Ka vajt gjendja ku nuk mban uji pilafi më. Shpresa e fundit je ti, drita jeshile për këtë popull. Duhet të mbështesim, duhet të punojmë të gjithë, ti je Kryeministri i ardhshëm i Shqipërisë.

Basha: Çmimi i energjisë do të ulet për konsumatorin dhe për biznesin. Prioritet numër një do të jetë bujqësia, 150 milionë euro, nga të cilat 50 milionë euro për infrastrukturën dhe 100 milionë euro subvencione të drejtpërdrejta për fermerin.

Zoti Basha u ndal dhe në një fermë lopësh. Nga 20 kokë që ka patur tre vite më parë, Shpëtimi sot ka 10 pasi e ka të pamundur t’i mbajë. Varfëria ka bërë që qytetarët të konsumojnë më pak ndërsa shteti nuk i ka dhënë asnjë subvencion.

Banor: Njëzet lopë kam pas.

Basha: Po pse ke dhjetë tani?

Banor: Po kam dhjetë tani se si plotësoj dot kushtet, duan lekë. Qumështi shitet 300 lekë.

Basha: Subvencione a ke marrë?

Banor: Jo, jo asnjë gramë.

Basha: Ne do ta mbështesim blegtorinë me subvencione të drejtpërdrejta. Çdokush që ka bagëti, lopë, dele, dhi do të marrë për kokë subvencionet, për kokë.

Në Bradashesh gjendja është e mjerueshme. Papunësi, varfëri, pamundësi për të siguruar bukën e përditshme. Pas kërkesës së banorëve Basha vizitoi disa familje. Nëntë persona banonin ne një dhomë dhe jetonin me ushqimet që u falnin të tjerët. Që kur u morën votat në 2013-ën askush nuk u përgjigjet më, thanë banorët.

Banor: Më parë ne kemi punu, sa e mori ky ne kemi maru. Se ai ndërtimin e preu, ku do të shkojmë të punojmë ne? Se a të vjedhim, të vrasim?! Se kjo është, jam vetë i nëntë me një dhomë.

Banor: Kam mundësi unë t’i laj dritat me 40 mijë lekë? Pastaj thonë mos i nxjerr fëmijët në rrugë të lypin, të mbledhin kështu, të mos bëjnë ashtu, na marrin votat e kur vjen puna ai i le pa bukë.

Banore: Kam gjashtë kalamaj, secili me nga tre kalamaj me një dhomë, janë edhe dy çunat. Unë s’kam shpi po flej tek shkallët.

Banore: Hajde në shtëpinë time në çfarë gjendje jam. Jemi pa bukë, borxhe andej, borxhe këtej, dritat mënjanë, bukë s’hajmë.

Banore: 2016-a të vdesësh për një thes miell, ky është nami i zi!

Banore: Çuni pa punë, nusja pa punë, ku do të ikim djali i nënës?! Të keqen! Po ta japim me gjithë shpirt vetëm ti ta marrësh o Zot!

Basha: Familjet në ndihmë ekonomike nuk do të paguajnë taksa, as faturë energjie deri në 300 kë dhe as faturë ujë. T’i japësh pesë lekë fukarait me një dorë dhe t’i marrësh dhjetë me tjetrën, ky është krim, kjo nuk është ndihmë ekonomike.

Njoftim për media i Partisë Demokratike, 29 maj 2016

Fakte të reja tregojnë se si e kishte ngritur Balili, i quajtur nga CNN si eskobari i Ballkanit, industrinë e tij të trafikimit të drogës.

Në fillim ai kapi transportet, pasi Edi Rama e emëroi drejtor rajonal për Sarandën.

Pastaj futi nën kontroll pikat kufitare, duke caktuar përmes Tahirit, si shef të kufirit për komisariatin e Sarandës, Asim Canajn, të cilin Balili e kishte për 10 vite drejtues në biznesin e tij, në policinë private.

Kështu, prej viti 2013, Klement Balili rilindi duke futur në dorë rrugët e transportit të drogës, pasi ishte vetë drejtor, dhe duke pasur gjithashtu në dorë pikat e kalimit të drogës jashtë vendit, me hyzmeqarin e tij, si shef kufiri.

Po çfarë ndodhi kur aksioni ndërkombëtar i policisë greke, belge dhe DEA-s amerikane iu afrua Balilit, dhe ai ia doli të arratisej falë bashkëpunimit të suksesshëm të Tahirit.

Shefi i komisariatit të Sarandës u pezullua për këtë neglizhencë të vogël, dhe në krye të policisë atje, u komandua për disa ditë, pikërisht i punësuari nga Balili, Asim Canaj.

Duhej disa ditë në krye të policisë së Sarandës njeriu i Balilit, për të kopsitur letrat, për të rregulluar punët, apo për të fshirë gjurmët.

Ky është inkrimkiminimi, kapja e shtetit nga krimi. Krimi i veshur me pushtet dhe pushteti i veshur me krim.

Këto fakte jo vetëm dëshmojnë se Tahiri dhe Rama e dinin shumë mirë kush ishte Balilaj, por kishin vënë në dispozicion të tij gjithë infrastrukturën shtetërore.

Saimir Tahiri del edhe një herë drejtpërdrejt i përfshirë në krim, në trafik droge.

Çdo ditë e tij në detyrë, është një ditë më shumë në pushtet e krimit, e drogës, e trafikantëve.

Deklaratë e kreut të Departamentit të Rendit dhe Sigurisë, Enkelejd Alibeaj, 29 maj 2016

Nuk mund të gjente Edi Rama person më të përshtatshëm për të bërë gargarë me jargët e tij, se sa Elisën e traut të ngritur, që krekoset nëpër tavolina miqsh se ka bërë 5 milionë euro për një vit në dogana. Po ç’turp mund të ketë Rama dhe Elisa e tij që hapën gropën më të madhe ne historinë e doganave me 1 milionë dollarë vjedhje në ditë. Syri ju sheh vetëm para, dollarë, euro, ndaj nuk arrijnë të dallojnë vrasesit, tutorët, trafikantët, nga një aksident rrugor 24 vite më parë. Elisa e traut të ngritur u përdor dhe sot për te vënë barazinë mes krimeve të tmerrshme e ç’njerëzore të Frrokut, Nokës, Bushit, Roshit, Prengës, Bardhit, me arratisjen nga Shqipëria e Ramizit. Elisa e traut të ngritur duhej të ishte në kaushin e plehrave për evazion, por me Ramën atë se kap drejtësia. Drejtësia do të bëhet, dekriminalizimi do të bëhet dhe jargët që dalin nga selia e Ramës nuk e pengojnë dot.

Njoftim per shtyp i Partise Demokratike, 28 Maj 2016

Saimir Tahiri është kapur në një tjetër aferë kriminale.

Duke ofruar shërbimin e tij, ka garantuar  paprekshmëri për Durim Bamin, i cili u denoncua nga qytetarët pasi me 21 maj, në orën 17.00, ky i fundit ishte në një lokal në qendër të Niklës, i pajisur me armë pa leje e me veshje antiplumb, edhe pse gjendet nën masën e sigurisë arrest shtëpie dhe e ka të ndaluar me vendim gjykate të dale nga banesa.

Dhe është pikërisht policia e Tahirit që duhet të garantojë zbatimin e këtij vendimi gjykate.

Me ndihmën e shefit të komisariatit, Erjon Ismaili, pjesë e grupit të besuar Shullazi-Tahiri, Bamit i janë ofruar lehtësi. Një nga ushtarët e tij është paraqitur dhe është lejuar ta marrë përsiper ai, përgjegjësinë per armët dhe pajisjet e tjera të paligjshme.

Kështu Bami i shpëtoi procedimit, me një ndërhyrje të kontrolluar nga fillimi deri në fund prej Saimir Tahirit. I akuzuari si vrasës me pagesë nga vetë radhët e mazhorancës, i dyshuari për vepra të rënda penale, është një njohje e vjetër e Saimir Tahirit.

Saimir Tahiri ka ndërmjetësuar e ka kuvenduar me të privatisht në zyrën e Ministrit të Brendshëm, në plazhe e rezidenca qeveritare.

Bami mbajti qendrimin e duhur në kohën kur u akuzua se ishte pajtuar nga Meta për të vrarë dy deputetë, qendrim që solli mbylljen e çështjes dhe ndihmoi Ramën për të kapërcyer krizën e madhe politike, ndaj sot shpërblehet nga Saimir Tahiri me paprekshmëri e me leje për të qarkulluar i armatosur.

Kjo është një tjetër dëshmi e lidhjes së Saimir Tahirit me krimin.

Dëshmi e marrdhënies së ngushtë që ai ka me banditë, trafikantë e vrasës.

Deklarata për mediat e kreut të Departamentit të Rendit dhe Sigurisë, Enkelejd Alibeaj, 28 Maj 2016

Grupi Parlamentar u mblodh dhe diskutoi lidhur me përjashtimin tjetër që Byroja politike e Ramës vendosi të marrë ndaj z Berisha.

Vendimin besoj se e morët vesh, është bojkot për të njëjtin afat për të gjitha aktivitetet e Parlamentit. Pra për komisionet dhe seancën plenare. Sepse në një Parlament ku nderohen kriminelët dhe trafikantët e drogës dhe prostitutave dhe dënonhen ata që denoncojnë krimin, ky duket akti më i lehtë që mund të ndërmarrim.

Duket qartazi që kjo maxhorancë ka vendosur ose shpreson ti mbyllë gojën opozitës.  E ka gabim. Vetëm gojën smund të na e mbyllë kurrë. Absolutisht edhe sikur të dalim fare nga ai parlament, ne tashmë e kemi filluar punën tonë si deputetë me parlamentin e vertetë, qytetarët e këtij vendi. Por duket që tentative nuk është thjeshtë për ti mbyllur gojën opozitës por duket se duan ti mbyllin çdo derë opozitës.

Prononcimi për mediat i kryetarit të Grupit Parlamentar, Edi Paloka, 28 Maj 2016

Kriza ekonomike, varfëria, papunësia, rritja e çmimeve ndihet në çdo cep të Elbasanit. Rritja e çmimit të energjise elektrike dhe abuzimet e OSHE-së me faturat janë shqetësimet e para që i shprehin banorët e Elbasanit kryetarit të Partisë Demokratike, Lulzim Basha. Në takimin me tregtarët e Elbasanit zoti Basha u njoh me rënien e fuqisë blerëse. Ky vit, thonë tregtarët, është më keq edhe se një vit më parë ndërkohë që taksat janë rritur e çmimet po ashtu. Qytetarë ankohen për papunësinë dhe ata që kanë një ndihmë ekonomike nuk u mjafton as për faturën e energjisë. Një shitëse i tha zotit Basha se është detyruar t’i ndërpresë studimet e larta vajzës pasi e kishte të pamundur t’i paguante tarifat.

Banore: Me ndihmë ekonomike. Me 17 mijë lekë mund të jetohet?
Pa strehë, pa të gjitha. Jemi më të mbarum, të vdekur. Ky është shteti.

Banore: Unë 110 mijë lekë i du vetëm ilaçe muaj për muaj. Është gjynah vajza nuk vazhdon dot shkollën e lartë, ka dy vjet që nuk ikën në shkollë.

Banorë: Njerëzve të thjeshtë këta po ua marrin frymën fare. Këta po na marrin frymën o burrë.

Banorë: Na rrejti, na persekutoi, na përdhunoi, të gjitha gjënat e këqija na i kanë bë. I majtë jam, nuk jam i djathtë. Nuk na japin as asistencë, as asgjë. Jemi në ajër fare.

Tregtar: Nuk ka shtet më të korruptum se ky. Më kupto, po paguajmë kot, po gjobitemi, po goditemi nga shteti.

Banore: Punët janë si mos më keq, duket vetë çdo gjë. Të shohim, shpresa kemi tek juve.

Banore: Fëmijët janë burra rrinë nëpër shpija. Fëmijët e fëmijëve pa hangër, pa pirë edhe kemi shku aty ku s’mban më.

Tregtare: S’kemi bërë akoma me shnet, asgjë nuk kemi shitur, vetëm rrimë roje malli.

Basha:Po dje ?

Tregtare: Kemi afro  një vit kështu.

Tregtar: Shtrëngesë nga të gjitha anët, një presion i paparë. Situata është shumë, shumë e keqe.

Basha: Taksat rriten, rruga Tiranë-Elbasan nuk mbaron, shëndetësia në ditë të zezë, pensionet nuk rriten, rrogat nuk rriten, normalisht që nuk ka xhiro. Hapi i parë është të ulim taksat. Ulim taksat të ketë më shumë para për biznesin, më shumë para për qytetarët, më shumë para për konsum. Hapi tjetër është që paratë që do të mblidhen do të shkojnë vetëm për investime që hapin vende pune, jo për luks, për orendi, për bileta avioni për qeveritarët.

Tregtar: Të tërë popullin e ke me vete, zdurohe ma

Tregtare: Ça bëhet kështu, jemi shtet?! Paguaj taksat një më një, ku është shteti?  Të ndihmojë popullin. Rrojmë pesë veta me këtë dyqan.

Tregtar: Shtet nuk ka, punë nuk ka, treg nuk ka, asnjë gjë nuk ka.

Tregtar: Edi Ramën ta heqim, ta qërrojmë.

Tregtare: Ti dalim atij Ramës dhe ta vrasim se asgjë tjetër nuk ka mbet. Vemi në shpi nuk kemi kokërr leku.

Basha: Me votë, me votë ta vrasim.

Tregtare: Dobët fare, taksat e larta.Shihe dyqanin këtu me kasa, me të gjitha. Çfarë ngelet për mua vetë e gjashtë në shtëpi?

Kryetari i Partisë Demokratike u ndal dhe në dy biznese të mëdha të Elbasanit, prodhues tubash plastik dhe përpunim të drurit. Taksat e larta dhe rritja e çmimit të energjisë janë shqetësimet e tyre. Kostoja e prodhimit të tubave plastik është rritur 30 për qind si pasojë e rritjes së çmimit të energjisë, theksoi pronari i fabrikës. Të dy sipërmarrësit e garantuan zotin Basha se zbatimi i platformës së tij fiskale do të sjellë shtim të numrit të të punësuarve dhe rritje të pagave për punonjësit.

Basha: Me uljen e taksave, 9 për qind taksë e sheshtë, 9 për qind edhe për kontributet e sigurimeve shoqërore, 15 për qind TVSH. Kjo do të ketë efekt tek rroga?

Tregtar: Patjetër, direkt në rritjen e tyre.

Njoftim për shtyp i Partisë Demokratike, 28 Maj 2016

Nuk është se prisja ndonjë vendim ndryshe nga ajo që ishte formuluar ne kërkese, me mekanizmin e votave që kanë në Byro dihet përfundimi i mbledhjes. Por unë theksova se gjithçka që është cituar dje nga ish kryeministri Berisha në seancë, kanë qënë akuza me karakter politik që i janë drejtuar direkt kryeministrit të cilat prisnin përgjigje por që kryeministri i bëri bisht. Eshtë e disata herë që ndodhemi në një situatë të tillë. Mendoj që është kthyer për të qeshur e për të qarë pasi po të jesh deputet me lidhje me krimin, kontrabandist, trafikant apo të jesh zhvatës i fondeve publike konsiderohesh i nderuar, respektohesh dhe ke vend në Parlament. Gjithashtu nëse ke kontribuar në ngritjen e një Kuvendit të tillë dhe jo vetëm Kuvendi por edhe të organeve të qeverisjes vendore, po të kesh vendosur drejtues që i përkasin këtij grupi individësh që përmenda më sipër, konsiderohesh drejtues i zoti e madje të atribuohet merita e shtetformimit, po krijon shtet. Pavarësisht se ky mund të jetë shteti i horrave. Në të kundërt, po qe se demaskon prezencën e këtyre individëve në Kuvendin e Shqipërisë apo në nivele të ndryshme të pushtetit vendor, përjashtohesh nga Kuvendi me argumentin se është shkelur Kodi i Etikës. Dhe kjo lloj etike dominoka mbi prezencën e individëve me rekorde të tilla kriminale. Përshembull në Kuvend mund ti drejtohesh kolegut e ti thuash “ti ha veshët”, e në këtë rast konsiderohesh burrë i mirë e madje trim. E nëse ndokush do ngrihet dhe do të thotë se kemi individë që bejnë të tilla kërcënime rrezikon të përjashtohesh nga Kuvendi për shkelje të Kodit të Etikës, e madje të përfundosh i sulmuar në ndonjë qoshe të Tiranës. Më është krijuar bindja pasi është e disata herë që sapo i afrohemi momentit të votimit të Reformës në Drejtësi, një grup brenda PS-së është i interesuar që ta shohë PD-në jashtë parlamentit dhe ndaj ndërmarrin iniciativa të tilla që realizohen lehtësisht me mekanizmin e votës që kanë në Byronë e Kuvendit.

Prononcimi për mediat i nënkryetarit te PD, Edmond Spaho pas vendimit të Byrosë që përjashtoi Berishën 10 ditë nga Kuvendi, 27 Maj 2016

Sadri Abazi, një prej oligarkëve të preferuar të Edi Ramës, që merr cdo tender pa garë, që ka kapur dhe zyrën e prokurimeve, ka përplasur sot një fëmijë me makinë dhe ka tentuar ta fshehë aksidentin.

Dëshmitarë të ngjarjes bëjnë me dije se pasi ka mbërritur policia, ai ka refuzuar të dorëzojë tek unifomat blu dokumentat e automjetit, dhe ka marrë në telefon Saimir Tahirin.

Kjo është sjellja tipike e një horri, e një halabaku deputet, që Edi Rama i ka dhënë tendera, miliarda lekë, leje ndërtimi, e leje për të ndërtuar pa leje, i cili ndihet aq i pushtetshëm sa të fshehë dhe aksidentet që bën në rrugë.

Poshtërsia shkon edhe më larg, ku​r tentojnë ta paraqesin sikur fëmija ka përplasur makinën e Sadriut dhe madje i ka shkaktuar atij dëme.

Policia nga ana tjetër nxjerr një deklaratë ku nuk i përmend deputetit as emrin, por inicialet A.S, ndërkohë që e njëjta polici, ndalon, gjobit, dhe arreston drejtues mjetesh për shkelje shumë të vogla se një aksident, madje mezi pret të publikojë emrat e qytetarëve që i kap në kundravajtje.

Sadriu ia del të detyrojë edhe të atin e fëmijës, të dalë e të thotë publikisht se ishte faji i tij, jo i oligarkut.

Me këtë soj e ndan dhe e ushtron Edi Rama pushtetin, që krekoset pastaj dhe në parlament dhe kërcënon deputetët e opozitës me fjalë banale e neveritëse. Të tjerët pastaj që përplas në rrugë me makinë, nuk i llogaritet fare.

Koha e maskarenjve është drejt fundit. Koha e oligarkëve po mbaron. Qytetarët shumë shpejt do të rikthejnë ligjin dhe drejtësinë në vend.

Njoftim per shtyp i Partise Demokratike, 27 Maj 2016