Blog

Saimir Tahiri i ka shtuar karteles së tij kriminale dhe një akt tjetër shumë të rëndë që është përgjimi i paligjshëm. Prej ditësh, është konstatuar se Tahiri mban një pajisje përgjimi të paligjshme, sepse ky veprim kryhet vetem nga Prokuroria dhe me autorizimin e saj.

Tahiri e thellon këtë skandal paligjshmërie pasi refuzon të dorëzojë pajisjen edhe pas kërkesës së organit të akuzës.

Me të drejtë lind pyetja, për cfarë e përdor Tahiri këtë pajisje përgjuese telefonatash, kur Baroni i drogës Balilaj u arratis edhe pse e kërkonte gjysma e botës dhe u bë kronikë deri tek CNN.

Pse i përgjon telefonat Tahiri, kur krimi po bën kërdinë e droga ka mbuluar vendin. Kë përgjon Tahiri, kur Shullazit e ushtarëve të tij po ju shërben deri në fund? Kë regjistron Tahiri kur Habilajt po shtojnë parcelat me kanabis?

Hipotezat jane të shumta. Tahiri përgjon e regjistron telefonatat e rivalëve të bandave të tij. Tahiri përgjon rivalët politikë të Edi Ramës, opozitën, gazetarë dhe ambasadorë të rëndësishëm.

Pajisja e Përgjimit është krimi i fundit dhe më flagranti që lidh bashkë Ramën dhe Tahirin dhe kështu të zhytur të dy në llumin e krimit mbajnë njëri-tjetrin.

Në cdo rast, Tahiri është duke kryer një krim të rëndë shtetëror.

Si Zv.Kryetar i Komisionit të Sigurisë i kërkoj Prokurorit të Përgjithshëm të reagojë menjëherë, me forcë dhe me energji për të ndalur këtë paligjshmëri kriminale. Prokuroria duhet të hetojë e të hedhe dritë se pse përgjoi dhe kë përgjoi Saimir Tahiri.

Ky akt i rëndë kundër ligjit e kushtetutës është qershia mbi tortë e veprimtarisë kriminale të ministrit të brendshëm, i cili duhet të largohet një orë e më parë nga detyra.

Kjo është një kërkesë sot e çdo shqiptari që ka parë e ka dëshmuar zhytjen 3 vjecare të Saimir Tahirit nga një krim në tjetrin.

Nesër Komisionit të Sigurisë Kombëtare do ti kërkohet zyrtarisht thërritja e Sajmir Tahirit, Haki Çakos si dhe Prokurorit të Përgjithshëm dhe Drejtorit të SHISH për të dëshmuar në një seancë dëgjimore të Komisionit të Sigurisë Kombëtare mbi këtë skandal politik që përveç tjerave kompromenton rëndë sigurinë kombëtare dhe luftën kundër krimit dhe korrupsionit.

Deklarata për mediat e nënkryetarit të Komisionit të Sigurisë Kombëtare, Flamur Noka, 15 Maj 2016

Qeverisë Rama-Meta po i rrëzohen përditë e më shumë alibitë dhe zhurma propagandistike që qeveria paraqet përpara publikut. Duket gjithnjë e më e shpërfytyruar përballë realitetit dhe përballë studimeve ndërkombëtare që dëshmojnë gjendjen e mjeruar të vendit.

“Korrupsioni i kudogjendur” është vlerësimi në çdo raport ndërkombëtar për Shqipërinë dhe pasojat e tij i ndjen çdo qytetar që sot është më i varfër, më i pasigurtë, dhe nuk i ofrohet shërbimi nga zyrat e shtetit  pa paguar më parë.

Studimi i fundit i Southeast Europe Leadership for Development and Integrity mbi korrupsionin në Shqipëri për vitin 2016 tregon se numri i qytetarëve që pranojnë se ju është dashur të paguajnë rryshfet për të marrë shërbimin që ju takon u rrit me 5 % krahasura me vitin paraardhës. Plot 49.6 % apo 1 në çdo 2 qytetarë janë detyruar të japin rryshfet në këmbim të marrjes së shërbimeve të detyrueshme falas në zyrat e shtetit.

Këto të dhëna demostrojnë vetëm njërën anë të përkeqësimit të situtatës së korrupsionit në Shqipëri, sepse siç deklaron raporti vjetor i Departamentit Amerikan i shtetit korrupsioni është i kudogjendur

Në dy vjet 2.2 miliardë euro u janë vjedhur shqiptarëve nga doganat, tatimet, tenderat, koncesionet, CEZ, OSHEE  etj.

Ndërsa papunësia dhe varferia rriten, qeveria ka harxhuar në mënyrë korruptive rreth 90 milion euro për luks, karburant, bileta avioni e makina.  Vetëm me këto para do të ishin punësuar  të pakten 14 mijë shqiptarë për një vit me rrogën 500 dollarë në muaj ose do të kishin marrë ndihmën e plotë ekonomike prej 68 mijë lekë të vjetra në muaj, plot 109 mijë familje.

Korrupsioni është shkaktari kryesor që vendi ndodhet në krizë totale ekonomike, në varfëri, në papunësi, në pamundësi për të mbyllur muajin.  Korrupsioni  është arsyeja që 46% shqiptarëve siç e shfaqin edhe statistikat e fundit të Bankës Botërore, jetojnë në varfëri me vetëm 5 dollarë për familje ne ditë. Korrupsioni është një nga arsyet  kryesore të përkeqësimit të klimës së biznesit, largimit të investitorëve të huaj dhe mbylljes së mijëra vendeve të punës.

Ky raport është një tjetër dëshmi tronditëse në pak javë për korrupsionin e ngritur në sistem nga qeveria Rama, përmes vjedhjes dhe abuzimit me taksat dhe pasuritë e shqiptarëve dhe rryshfetit të shumëfishuar në çdo zyrë publike dhe shtetërore.

Deklarata për mediat e zëdhënëses, Ina Zhupa, 15 Maj 2016

Arratisja e Klement Balilajt është prova më e fundit për lidhjet kriminale të ministrit të Brendshëm Saimir Tahiri.

Gjatë 48 orëve që Klement Balilaj zuri hapësirën kryesore të mediave ndërkombëtare, Saimir Tahiri u rrek tu mbushte mendjen qytetarëve se ai ishte i pafajshëm dhe nisi akuzat kundër mediave se po e përflisnin pa të drejtë, madje na e nxori Balilajn edhe në televizion nga zyrat shtetërore të kërcënonte opozitën me procese gjyqsore.

Kur nuk ia doli dot ti siguronte pafajsinë Balilajt,  Saimir Tahiri i krijoi kushtet dhe i dha kohë për tu arratisur vetëm pak para se ti dërgonte policinë të fshinte provat siç e ka tashmë zakon.

Pas kesaj Tahiri vrapoi tu thoshte mediave se në sistemin TIMS nuk rezulton që Balilaj të ketë dalë jashtë vendit. Por a nuk tha të njëjtën gjë edhe për Arben Frrokun?

I mësuar me shantazhet ndaj mediave shqiptare Tahiri u përpoq të shantazhojë edhe mediat ndërkombëtare për të mbrojtur Balilajn, ortakun në trafik droge të kushërinjve të tij Habilaj, por nuk ia doli.

Rrjeti prestigjioz amerikan CNN pasi publikoi reagimin e vartësit të Tahirit në Athinë, menjëherë rikonfirmoi se CNN i është referuar një takimi sekret në Shqipëri mes policisë greke dhe asaj shqiptare ku përfaqësues te policisë shqiptare kanë thënë qartë se “në Shqipëri nuk mund të preket ky njeri, sepse ai ka lidhje politike dhe kontakte me parti e politikanë të nivelit të lartë”.

Përcjellja në arrati e Klement Balilaj drejtues i organizatës ndërkombëtare të Trafikut të Drogës është një tjetër provë e pakundërshtueshme për lidhjet e Saimir Tahirit me narkotrafikun dhe krimin e organizuar.

Çdo ditë e tij në detyrë është një favor për krimin dhe bandat e veshura me pushtet, është një dëshmi më shumë qe kallëzon drejtperdrejt Edi Ramen si kapobanden e grupit kriminal në pushtet.

Deklarata e kreut të Departamentit për Rendin dhe Sigurinë, Enkelejd Alibeaj, 15 Maj 2016

Pse Edi Rama vazhdon ta mbajë akoma Sajmir Tahirin?

Çfarë di Saimir Tahiri për Edi Ramën që nuk e shkarkon dot edhe pse ai është i faktuar botërisht si garanti i bandave më te rrezikshme të trafikut të drogës dhe krimit jo vetëm në Shqipëri por në Ballkan e më gjerë?

Vetëm një kryeministër i kapur do të sfidonte qytetarët e tij,  partnerët europiane dhe amerikanë duke mbajtur në krye të rendit një njeri të implikuar e të inkriminuar deri në fyt si Saimir Tahiri.

Një seri ngjarjesh kanë dëshmuar se Shqipëria ka pasur në krye të rendit që prej shtatorit të vitit 2013 një ministër të inkriminuar, ndërlidhësin e trafiqeve të drogës e shumë krimeve të tjera. Banditët më në zë të vendit nuk kanë pasur thjesht një pikë kyçe në polici, një lidhje politike diku, por kanë pasur drejtpërdrejt në dispozicion ministrin e Brendshëm.

E nisi me një fushatë selektive e klienteliste për lojërat e fatit, ku lulëzuan miqtë e tij e u fundosën të tjerët, një krekosje korruptive e Tahirit që la pas dhe një viktimë, një mikun e tij të afërt për të cilin ai ka përgjegjësi siç ia kanë bërë të ditur dhe familjarët.

Projekti i madh i Tahirit ishte krijimi i një hambari të madh droge të pahasur më parë në vend, dhe ai organizoi gjithë infrastrukturën për këtë. Nën drejtimin e tij mbarë territori u mboll me kanabis. Pas çdo kodre me drogë është nje pakt 30 përqindësh i bandave me Tahirin. Tahiri ka një grusht njerezish koordinatorë të mbjelljes, rritjes dhe shitjes së drogës, mes tyre spikasin Habilajt, banda e Shullazit, dhe siç u evidentua Balili i Sarandës.

Kur Partia Demokratike e denoncoi në vitin 2014 emërimin e trafikantit të njohur në krye të transporteve në rajonin e Sarandës, qeveria e mbrojti dhe Tahiri u kujdes ti jepte dhe më shumë pushtet e paprekshmëri.

Kur doli se makinën private të ministrit të Brendshëm e përdornin Habilajt dhe s’kish polic ti ndalonte, Tahiri u zgjeroi atyre territorin.

Sa më shumë denoncohej lidhja e tij me Shullazin, aq më shumë ky i fundit rendonte krimet, vrasjet, gjobveniet, aq më i paprekshëm bëhej.

Shullazi u kap me policin e Tahirit në shërbim të tij, u kap duke kaluar makinën e blinduar në doganë pa kontroll, u kap në përplasje me armë, dhe në të gjitha rastet doli i pastër. Praktikisht, kupola e ministrisë dhe e policisë ishte zhvendosur në rrugën e Kavajës, në rezidencën e Shullazit.

Dhe kur u ndalua pas kërcënimit që i bëri kandidatit për rektor, Tahiri foli vetë me Shullazin përmes nëndrejtorit të policisë së Tiranës dhe e garantoi se do jetë thjesht një shëtitje, pa e ditur se prokuroria kishte punuar prej muajsh për gjetjen e provave për dhjetra krime.

Tahiri është shërbëtor i zellshëm dhe i qendron paktit me krimin. Kur goditen linja të trafikut nga shërbimet partnere ai shfajësohet se nuk ka dijeni, nuk e kanë prej tij. Ai i vuri shkrepsen provave të drogës në laborator për të fshirë gjurmët e bashkëpunetorëve.

Me Tahirin në krye, u ngrit impianti më i madh i kokainës në Ballkan, në Xibrakë të Elbasanit, impiant që dhe sot do te ishte në punë nëse nuk do zbulohej nga policia gjermane.

Kreret e policisë me të cilët ai drejton, janë të gjithë një hartë interesash kriminale, të promovuar në postet kyçe nga Shullazi, prej besnikërisë që kanë treguar ndaj tij. Partia Demokratike i ka denoncuar me emra dhe me fakte dhe do të vazhdojë ta denoncojë në ditet në vijim kupolën e narkotrafikut në Policinë e Shtetit.

Janë këta më të besuarit e Tahirit, të cilët  prishin provat në vendngjarje, zhdukin armë e telefona që janë dëshmi e lidhjeve me krimin dhe dëshmi e krimeve të mëparshme.

Saimir Tahiri e pranoi vetë se kishte bërë biseda private në zyrë e në plazh me Bamin e akuzuar si vrasës me pagesë. Pra, ministri i Brendshëm ishte ulur me të si përfaqësues i njerës prej bandave. Janë disa vrasje pa autor sot, sepse autorët i njeh dhe i di Saimir Tahiri, kanë mbrojtjen e tij.

Sa kohë të jetë Ministër i Brendshëm i vendit Saimir Tahiri, bandat janë në pushtet, droga leviz ngado, krimet kanë licensë. Tahiri duhet të largohet menjëherë, ai është turpi i shqiptarëve, dhe shfytyrimi më kriminal i ndonjë  ministri të Brendshëm në 25 vite.

Deklarata për mediat e kreut të Departamentit të Rendit dhe Sigurisë, Enkelejd Alibeaj, 14 Maj 2016

Jemi këtu në emër të këshilltarëve të Partisë Demokratike, por besoj që shprehim shqetësimin e madh të çdo qytetari që respekton ligjet dhe Kushtetutën e Republikës së Shqipërisë. Maskat sot ranë. Erion Veliaj, kjo vegël e keqpërdorur në duart e Ramës, nuk u kursye sërish për t’u bërë kurban për interesat e Ramës dhe Koço Kokëshimës. Me një rast të paprecedentë, me një sulm të pashembullt në shkelje flagrante të Kushtetutës së vendit dhe ligjeve të tjera në fuqi, vijuan akuzat e paprecedenta, në vend që kryetari i Bashkisë të japë llogari për shkelje e pafund ligjore që tashmë ka kryer.

Sigurisht është e mirëkuptueshme për një pjesë të shoqërisë largimi i Kokëdhimës nga Parlamenti pasi tashmë i ka lënë pa atin e tyre shpirtëror dhe Rama ka humbur gjakftohtësinë. Sulmi është frontal, sulmi është ndaj çdo sistemi ende të pavarur që funksionon në një sistem demokratik. Antisistemi, antiligji dhe antishteti sot morën fytyrën dhe fjalët e Erion Velisë. Drejton pyetje pafund. Rrethon gjykatat njëlloj si në kohën famëkeqe të gjyqeve popullore të komunizmit kundër “tradhëtarëve”të vendit. Shpall edhe tradhëtarët duke filluar nga gjyktarët e deri tek Presidenti I Republikës.

Por është e kuptueshme pse e bën. E para është urdhëri politik që ka marrë nga shefi i tij Rama duke minuar në sytë e gjithë publikut maskën dhe elementët e Reformës së famshme për Drejtësi dhe mendojnë se kjo duhet të jetë mënyra se si do të vendosin drejtësinë. Pjesa tjetër që është edhe më e rënda është që pas këtij sulmi fshihet përpjekja e z Veliaj për të mbuluar gjurmët e abuzimeve dhe krimeve pafund që ka kryer në Bashkinë e Tiranës.

Je të jemi të sinqertë. E ka ndjerë rrezikun për përballjen e tij me drejtësinë dhe tashmë po përpiqet të intimidojë drejtësinë. Tashmë është i prekur nga aferat e tij korruptive si për çështjen e parkingut nëntokësor tek Parku Rinia, si për vandalizmin e pashëmbullt tek liqeni, si për elementët e tjerë të një njeriu që tenderon dhe abuzon paratë publike sipas dëshirave. 30 tendera janë me prokurim të drejtpërdrejtë. Rekord unikal në këtë periudhë të qeverisjes vendore. Iu përpiqet tu fshihet gjyqeve për pushimet masive nga puna të cilat janë bërë nul nga gjykatat. Përpiqet ti shpëtojë ndërshkimit për betonizimin e paligjshëm të liqenit por edhe për projektet e tjera famëkeqe. Tashmë kullomania ka fituar. Mafia e betonit tashmë mendon se ka marrë revanshin. Është e kot se do të përballet me drejtësinë deri më një. Nuk do të lejojë kush një të çartur dhe një vegël që të intimidojë jo vetëm Presidentin e Republikës dhe sistemin e drejtësisë por asnjë punonjës të pushuar nga puna dhe asnjë biznesmen që kërkon të drejtën e vetë.

Frika e tij është e dukshme. Gjithë ky sulm që i drejtohet kryetarit të Këshilit të Lartë të Drejtësisë ka për qëllim të intimidojë çdo trup gjykues që do të marrë në shqyrtim aferat e tij korruptive të pafund. Çdo intimidim që ai kërkon të bëjë ndaj institucioneve të pavarura, institucionit më simbol si ai i Presidentit të Republikës, ka të bëjë vetëm e vetëm me tentativën për të intimiduar prokurorët që hetojnë që nga falsifikimi i firmës së tij dhe deri tek koncensionet apo ndërtimet e paligjshme. Pra të jetë i bindur për diçka, nuk do ti shpëtojë drejtësisë. Nuk do të jetë kurrë në gjendje ky bufon i politikës shqiptare të intimidojë këdo dhe për çfarëdo lloj arsye.

Deklarata për mediat e kreut të këshilltarëve të Partisë Demokratike, Leonard Olli, 13 Maj 2016

Në kuadër të përpjekjeve të përbashkëta që po bëjmë për hartimin e një platforme për zgjedhje të lira dhe të ndershme, tryeza e koalicionit të partive të djathta sot diskutoi rreth sistemit të votimit dhe numërimit dhe arritëm në konkluzionin e përbashkët për të mbështetur praktikën e votimit dhe numërimit elektronik, votimin biometrik dhe numërimin elektronik. Në tryezat e ardhshme të koalicionit do të vazhdojmë me çështje të tjera të cilat përfshijnë sistemin zgjedhor, financimin e partive politike, marrëdhëniet me mediat, depolitizimin e mëtejshëm të sistemit zgjedhor dhe çështje të tjera të cilat janë me interes për të gjithë partitë pjesëmarrëse në këtë koalicion.

Prononcimi për mediat i nënkryetarit të Partisë Demokratike, Edmond Spaho pas tryezës me partitë aleate, 13 Maj 2016

Sekretarja për Marrëdhëniet me Publikun, Grida Duma ishte sot në vendin e ngjarjes në Kavajë ku humbën jetën dy fëmijë nga një aksident për shkak të interesave të njerëzve të lidhur me pushtetin.

“Këtu humbën jetën dy fëmijë. Në këtë rrugë humbëm dy jetë njerëzish, për shkak të mbrojtëseve të rrugës, të cilat mungonin. Mendoni se kjo ndodhi vetëm për shkak të mungesës së mbrojtëseve?!Absolutisht jo. Ndodhi për shkak të interesave klienteliste të pushtetit. Ndërsa qindra qytetarë përfundojnë burgjeve për një suva, për një çati, për një mur shtëpie në pronë të vetën, ky shtet, kjo qeveri, ajo ministri, ai autoritet rrugor, prej dy vitesh nuk zbatojnë një vendim gjykate për të vendosur mbrojtëset e rrugëve.

Përse nuk e zbatojnë?! Sepse kështu i intereson një pronari të një pike karburanti, një Pilo Kerri, i cili si ish-deputet i PS, si baba i një drejtori të rëndësishëm në Ministrinë e Transporteve dhe sot e dikur ish-shef i kabinetit të Haxhinastos, përdredh ligjin për t’u shërbyer interesave të veta”, tha Duma.

Sekretarja Duma e cilësoi ngjarjen një krim shtetëror pasi skandali është edhe me i rëndë. Sipas saj, firma që marrë fondet publike për sigurinë rrugore është e njëjta që ka në pronësi edhe karburantin.

“Në fakt prokuroria e hapi çështjen në themel duke dërguar përballë drejtësisë dy drejtorë të Autoritetit Rrugor. Por skandali është shumë më i thellë se sa kaq.

Ironia më e madhe është se pikërisht firmës të cilës i intereson që mbrojtëset e rrugës të mos ekzistojnë është e njëjta firmë që përfiton fonde publike për mirëmbajtjen e këtij aksi rruge dhe këtij segmenti rrugor. Vlera e përfitimit: Qindra miliona lekë.

Emri i gjithë kësaj është i thjeshtë – krim shtetëror. Partia Demokratike inkurajon vazhdimin e punës së prokurorisë dhe institucioneve të drejtësisë. Por natyrisht ne kërkojmë që kjo çështje të shkojë në Tiranë, atje ku i ka rrënjët kjo aferë.

Vajzat, fëmijët që humbën jetën, ishin nisur me nënën e tyre për të takuar të atin që ky pushtet e plasi në burg për një çati që po ndërtonte pa leje. Nga ana tjetër krimi shtetëror shkon dhe  ulet këmbëkryq mbi vendimet e gjykatës. Është ky krim që na shkel dinjitetin. Është ky krim që na merr jetë”, tha Duma.

Deklarata per mediat Sekretares për Marrëdhëniet me Publikun, Grida Duma, 13 Maj 2016

Grupi Parlamentar i Partisë Demokratike i kërkon KQZ-së informacion për  Vetëdeklarimin e disa subjekte që e kanë detyrim në bazë të ligjit “Për garantimin e integritetit të personave që zgjidhen, emërohen ose ushtrojnë funksione publike”.

Grupi Parlamentar i Partisë Demokratike kërkon informacion për
a) listën e plotë të zyrtarëve publik që nuk kanë depozituar deri më datë 4 Maj 2016 Formularët e Deklarimit pranë Komisionit Qëndror të Zgjedhjeve, si dhe masat që ka marrë institucioni juaj.
b) Formularët e Vetëdeklarimit për subjektet deklaruese si më poshtë:
(i) 140 deputetët e Kuvendit të Shqipërisë;
(ii) Kryeministrit dhe ministrave;
(iii) 61 Kryetarëve të Bashkisë.

Njoftim për shtyp i Partisë Demokratike, 13 Maj 2016

Historia e publikuar në Ora News është dëshmia e modelit qeverisës në Shqipëri: Imoralitet, korrupsion dhe kriminalitet! Kryetari i Bashkisë së Peshkopisë në hierarkinë e abuzimeve seksuale për një vend pune, ka “shokë” në qeveri, administratë dhe polici.

Lidhja Demokratike e Gruas së Shqipërisë denoncon me neveri abuzimet në zyrat e shtetit me gratë dhe vajzat.

Sekretari i Partisë në Sarandë që kërkoi favore seksuale me fëmijën 14 vjeç, Drejtoresha e Arsimit në Lushnje që iu dërgonte mësueset shokëve të partisë, shefi i komisariatit në Velipojë që abuzonte seksualisht me viktimat e dhunës në familje dhe Kryetari i Bashkisë në Peshkopi që abuzoi seksualisht me një vajzë 20 vjeçe, janë reforma e Rilindjes në administratën publike.

Po sa raste të tjera mund të ketë në zyrat e Rilindjes? Sa raste të tjera abuzimi për të cilat gra e vajza të pazëshme nuk guxojnë që të flasin?

Duke dënuar ngjarjen e rëndë të Kryetarit të Bashkisë Peshkopi, Lidhja Demokratike e Gruas së Shqipërisë, i bën thirrje të gjitha grave dhe vajzave që të reagojnë fuqishëm ndaj këtyre fenomeneve të turpshme të cilat ky pushtet po tenton ti kthejë në institucion!

Lidhja Demokratike e Gruas së Shqipërisë ka denoncuar pushimet e padrejta nga puna në administratën publike të rreth 3000 grave dhe vajzave, në mes tyre edhe të shumë nënave kryefamiljare. PD ka denoncuar pushimet me motiv politik të rreth 1000 grave nga sistemin spitalor, pothuajse të gjitha me problem sociale, kryefamiljare, me fëmijë apo burra të sëmurë.

Mbi 1000 vajza e gra, që nuk do kenë mundësi të çojnë pagën për të mbajtur familjen apo fëmijët e tyre. Secila prej tyre, në dëshpërim të jetesës e mbijetesës  mund të rrezikojë të jetë viktima e radhës të cilës do t’i kërkohen favore seksuale për ta mbajtur apo kthyer në punë.

Gruaja shqiptare është viktima e madhe e qeverisjes së Edi Ramës. Shifrat e INSTAT tregojnë që papunësia rritet çdo tremujor dhe ka arritur nga 35 – 50% në rajone të ndryshme. Rritja e taksave vendore e qendrore, mbyllja e bizneseve, rritja e çmimeve mohimi i të drejtave kushtetuese për arsimim dhe shërbim shëndetësor, prishja e mekanizmave të mbrojtjes së të drejtave të grave e kanë përkeqësuar statusin e gruas në shoqërinë shqiptare.

Rama premtoi 300 mije vende pune, premtoi mirëqenie për 97% të qytetarëve shqiptarë, por solli diskriminim, dhunë psikologjike dhe përndjekje gjinore në këmbim të punësimit.

Rama premtoi 300 mijë vende pune, bërtet e thotë çdo ditë që s’ka profesionistë, po ai dhe përfaqësuesit e tij në kanë ngritur një sistem të tërë paralel, korruptiv që ofron zgjidhje apo vende punë vetem në këmbim të favoreve të llojeve të ndryshme.

Ndaj edhe shumë gra e vajza po azilojnë jo vetëm s’kanë më shpresën, por ikin se kërkojnë një shoqëri ku askush mos t’i shohë me sytë tërë epsh të zyrtarëve por të mund të kërkojnë punë, të trajtohen e të jetojnë me nder e dinjitetin që ato meritojnë.

Në përkrahje edhe të revoltës qytetare që ka shpërthyer në rrjetet sociale , kërkojmë nga Prokuroria hetim të plotë të abuzimeve në zyrat e shtetit!

Ju bëj thirrje familjeve shqiptare,aktivisteve të të drejtave të grave të mos heshtin, por të tregojnë kurajën e nënës që denoncoi rastin në Sarandë, të vajzës që tregoi abuzimet e kryetarit të bashkisë në Peshkopi, të gruas që denoncoi kryekomisarin në Velipojë.

E gjithë shoqëria duhet të dalë nga indiferentizmi dhe të reagojë në mbrojtje të fëmijëve, grave dhe vajzave që abuzohen verbalisht, psikologjikisht, apo seksualisht në zyrat e rilindësve.

Deklaratë e deputetes së Partisë Demokratike, Albana Vokshi, 13 maj 2016