Blog

Qëndrimi i grupit parlamentar do të mbetet i njëjti përderisa nuk ka ende një reflektim nga mazhoranca për çështjet që ne kemi ngritur që tashmë ju i njihni shumë mirë. Atë që lidhet me ligjin e dekriminalizimit,  funksionimin e komisioneve hetimore dhe dërgimin në Gjykatë Kushtetuese të deputetëve, të cilët ne na rezultojnë se janë në shkelje të kushtetutës dhe konfliktit të interesit përderisa kanë përfituar fonde publike. Javën  e kaluar ju patë që pati një votim për Koço Kokëdhimën por nuk u  votua kërkesa jonë për deputetin Suli, kërkesë e cila do të votohet nesër dhe shpresojmë që qëndrimi i mazhorancës nesër të jetë në përputhje me vendimin e Gjykatës Kushtetuese për ta dërguar në Gjykatë Kushtetuese kërkesën e opozitës, më pas kemi një kërkesë edhe për znj. Leskaj për të njëjtën çështje e cila pritet të diskutohet nga Këshilli i Mandateve për të marrë edhe ajo rrugën e saj drejt Gjykatës Kushtetuese. Gjithashtu amandamentet tona për Ligjin e dekriminalizimit dhe komisionet hetimore janë në pritje pët t’u diskutuar në komisionin e ligjeve fillimisht dhe më pas në seancë plenare.

-Ju do të jeni vetëm për çështjen e z. Suli në seancë nesër?

Qëndrimi i grupit parlamentar nuk ka ndonjë ndryshim. Aq ,më tepër që jo vetëm nuk shohim reagim nga mazhoranca por shohim që kryeministri bën krejt të kundërtën e asaj që pritet prej tij dhe që është zbatimi i ligjit, zbatimi i Kushtetutës, por në rradhë të parë ndjekja e disa parimeve morale që i kërkohen jo vetëm nga opozita, jo vetëm nga shoqëria shqiptare por edhe nga ndërkombëtarët. Kemi një qëndrim krejtësisht arrogant të kryeministrit në kundërshtim edhe me vetë ligjin që miratoi për dekriminalizimin. E shohim që ata që bëri sikur i nxori nga dritarja si të inkriminuar, po i fut haptas apo fshehtas nga dera.

-A do t’i shtohet këtyre kushteve ngritja e Byrosë së Hetimit brenda 2 javëve. I referohem këtu një postimi të z. Berisha në FB.

Për momentin byroja e hetimit mbetet një çështje që duhej të ishte zgjidhur. Ne prej kohësh kemi deklaruar që duhet që Byroja e Hetimit sipas rekomandimeve të Venecias të kalonte në parlament sa më parë, nuk ka asnjë arsye për t’u vonuar. Sigurisht grupi, nëse kjo çështje do të ngrihet, do ta diskutojë si çështje për tu zgjidhur, jo si kushte. Ne kërkojmë që amazhoranca të zbatojë ligjet që ka miratuar vetë dhe Kushtetutën e vendit.

1. Paloka, është e vërtetë që opinioni final i Venecias ka rrëzuar Partinë Demokratike me kërkesat dhe parashtrimet që ka bërë opozita, si edhe për reformën në drejtësi?

Nëse do të merrnim për të vërtetë këtë do të merrej si e vërtetë fakti që Komisioni i Venecias ka vendosur kapjen politike të institucioneve të drejtësisë shqiptare. Nuk ka asnjë gjë të tillë. Sigurisht, Komisioni i Venecias ka dhënë rekomandimet e tij finale që përputhen plotësisht me parimet kryesore që ne kemi dhe që Komisioni i Venecias i ka qëndruar që në fillim. Që janë parimet kryesore, jo pikat dhe detajet, sepse ato sigurisht i diskuton Komisioni i Reformës, por parimet kryesore tonat janë, moskapja, moslejimi i kapjes së drejtësisë dhe dialogu politik. Zgjidhja e të gjitha çështjeve politike, kompromisi dhe marrëveshja. Të dyja këto pika Komisioni i Venecias i ka theksuar që në fillim dhe nuk I ka ndryshuar asnjëherë qëndrimet e saj. Ne jemi plotësisht të njëjtë me Komisionin e Venecias dhe do të vazhdojmë të ngulim këmbë që të fillojë sa më shpejt dialogu politik për ti dhënë rrugë edhe Reformës në Drejtësi. Po presim reagimin e palës tjetër e cila duket që nuk  e ka këtë qëndrim.

Prononcim për media e kryetarit te Grupit Parlamentar të Partisë Demokratike, Edi Paloka, 16 mars 2016

Prej një javë, shqiptarët janë njohur nepërmjet medias se Byroja Federale e Hetimit (FBI) ka zbarkuar në Shqipëri pasi ka rënë në gjurmët e një krimi financiar.

Kompania e cila hetohet është drejtuar nga Knidi Bashari, këshilltari i Ministrit të Financave Arben Ahmetaj, që siç e pohon edhe ai vetë ka drejtuar këtë kompani deri në gusht 2015.

Pavarësisht të dhënave hetimore që ka publikuar media për 5245 veprime elektronike të cilësuara si kriminale, qeveria shqiptare nuk ka pasur asnjë reagim për këtë megaskandal, hesht dhe merr në mbrotje të kërkuarin e FBI-së.

Këshilltari i financave hetohet nga zyra më e njohur e globit për mashtrim financiar ndërsa ministri e ka emëruar si këshilltar të tij.

Ky është një kombinim kriminal mes një të kërkuari për mashtrim financiar nga FBI dhe një ministri hajdut e me skandale si Arben Ahmetaj. Për më tepër, edhe pas këtij lajmi, personi në fjalë vijon të këshillojë ministrin e Financave.

Kjo është situatë e pastër inkriminimi ku një mashtrues financiar punon në ministrinë e Financave. Edi Rama dhe ministri i tij i skandaleve nuk kanë vullnet për të zbatuar ligjin e dekriminalizimit.

Ky rast dëshmon qartë vullnetin e Edi Ramës për të bashkëjetuar e bashkëqeverisur me krimin.

Deklarata për mediat e deputetit, Luçiano Boçi, 16 Mars 2016

Qindra qytetarë në Kurbin protestuan sot përpara bashkisë në Ditën e Verës kundër djegies së mbeturinave në kodrën e gjelbër të qytetit duke u kthyer në një rrezik të madh për jetën e tyre. Protesta nisi në sheshin qendror të qytetit të Laçit ku protestuesit kanë kërkuar largimin e qeverisë së Edi Ramës që po i varfëron ata çdo ditë e më shumë. Kreu i Departamentit të Mjedisit në Partinë Demokratike, Jamarbër Malltezi akuzoi qeverinë dhe pushtetin lokal se po vret qytetin e Laçit me djedien e mbeturinave duke e kthyer në një skemë të pastër korrupsioni për të ndarë paratë publike.

“Gjithë qyteti duhet të vuajë për shkak se dy persona ndajnë miliona. i gjithë qyteti duhet të bëjë analizat se rrezikohet nga kanceri i mushkrive për shkak të djegies së mbeturinave në kodrën e qytetit. Kjo rrezikon edhe ujin e pijshëm të Laçit. Për fat të keq qytetarët nuk kanë të sigurtë as ajrin që thithin dhe as ujin që pijnë, disa të tjerë ndajnë miliona. Kjo është shumë e rëndë dhe në një shtet ligjor kjo nuk mund të egzistojë. Duhet të kishte njerëz që duhet të përgjigjeshin penalisht për këtë çështje. Para disa vitesh ka pasur gjobë ndaj bashkisë së Kurbinit kur ishte dhe më e vogël për mostrajtimin e mbeturave, pra për djegien e tyre që çlirojnë gazra toksikë. Unë besoj se shëndeti i fëmijëve tuaj është shumë herë më i rëndësishëm se sa miliona e dy personave që ndajnë me njëri tjetrin”, tha Malltezi.

Deputeti Mhill Fufi dhe kreu i PD në Kurbin Altin Biba kërkuan largimin e qeverisë Rama për keqqeverisjen dhe rritjen e varfërisë. Në mënyrë simbolike, protestuesit lidhën me zinxhir hyrjen e Bashkisë së Kurbinit. Më pas, dhjetra qytetarët janë ngjitur kodrave të qytetit të Laçit, aty ku dhe hidhen prej vitesh mbetjet pranë kurorës së gjelbërt të rrethuara nga pishat. Hedhja e mbeturinave në këtë zonë ka shkaktuar një ndotjet të madhe duke u kthyer në një rrezik real për qytetarët.  Pranë grumbullit të mbetjeve ndodhet dhe rezervuari i ujit të pijshëm për qytetarët laçiane, një mundësi dhe më shumë e perhapjes së ndotjes dhe indiferecës së drejtuesve vendorë. Protestuesit mbollën disa fidanë pranë zonës ku mjetet e bashkisë depozitojnë plehrat e qytetit.

Njoftim per shtyp i Partisë Demokratike, 14 Mars 2016

Partia Demokratike është e tronditur nga sulmi i përgjakshëm terrorist mbrëmë në qendër të Ankarasë, ku humbën jetën mbi 30 qytetarë. Partia Demokratike shpreh ngushëllimet e saj për familjet e viktimave dhe uron shërim të shpejtë të të plagosurve. Ne gjendemi në krah të popullit turk në këtë ditë të vështirë dhe në krah të autoriteteve turke. Partia Demokratike e dënon me forcë këtë akt të rëndë dhe shprehet e vendosur në mbështetjen e luftës ndaj terrorizmit dhe ekstremizmit të çdo lloji.​

Njoftim për shtyp i Partisë Demokratike, 14 Mars 2016

Kryetari i Partisë Demokratike Lulzim Basha i cili po merr pjesë në takimin e organizuar nga Partia Popullore Europiane mes krerëve të Partive simotra dhe Ministrave të Jashtëm të partive anëtare të PPE-së u takua dhe bisedoi me Presidentin e PPE Joseph DAUL, kryetarin e  Komisionit për Punët e Jashtme në Parlamentin Europian, Elmar BROK me  komisiinerin per zgjerim Johannes Hahn, ministrin e Jashtëm Austriak Sebastian Kurz etj. Një nga çështjet kryesore të diskutuara në këtë takim ka qenë situata në Ballkanin Perëndimor. Zoti Basha i ka njohur bashkëbiseduesit me situatën në Shqipëri, krizën ekonomike që ka përfshirë vendin, korrupsionin galopant, refuzimin që mazhoranca i bën zbatimit të vendimeve të Gjykatës Kushtetuese, ecurinë e procesit të dekriminalizimit, Reformën në Drejtësi etj.

Shpirti i ligjit për dekriminalizimin po sfidohet akoma pa nisur punë, theksoi zoti Basha duke përmendur shfaqjet e kryeministrit në krah të personave me precedentë kriminal, që nga ish-deputeti socialist Arben Ndoka, tek kryebashkiaku i Kavajës dhe Krujës, apo rasti flagrant i kthimit në Parlament të deputetit Armando Prenga i cili plagosi katër persona brenda në Komisariatin e Policisë.

Kryetari Basha theksoi faktin se, Edi Rama se largon dot nga Parlamenti Armando Prengën pasi deputeti i radhës është i dënuar me burg.

Duke shprehur shqetësimin se lidhja e Ramës me krimin dhe korrupsionin mbetet e fortë, Basha tha se dekriminalizimi që të zbatohet kërkon vullnet politik, gjë që tek Kryeministri i vendit për shkak të lidhjeve të tij mungon. Zbatimi i ligjit te dekriminalizimit eshte njr kusht themelor për zgjedhje të lira dhe të ndershme, theksoi zoti Basha.  Raporti i OSBE/ODHIR-it për zgjedhjet e 2015-ës ishte një sinjal alarmi për shitblerjen e votës, intimidimin e votuesve, përdorimit të administratës, keqpërdorimit të Policisë së Shtetit etj. Kryetari i Partisë Demokratike ka theksuar se Shqipëria nuk mund të bëjë asnjë hap përpara pa zgjidhur problemin e rikthyer fuqishëm nga Edi Rama ne zgjedhjet e 2015-ës, të cilat u konsideruan si zgjedhje jo të lira dhe të ndershme.  Reforma në Drejtësi ishte një tjetër çështje e diskutuar në takimet e zotit Basha. Lideri i opozitës ka shprehur shqetësimin për mungesën e vullnetit nga ana e mazhorancës për të bashkëpunuar në frymën e konsensusit politik, për të prodhuar një Reformë në Drejtësi, e cila lufton korrupsionin, pamundëson kapjen politike dhe vendosjen e gjyqtarëve dhe prokurorëve në shërbim të qeverisjes, qeverisë apo Kryeministrit. Rekomandimet e Venecias janë udhërrëfyesi më i mirë për Reformën në Drejtësi, theksoi zoti Basha.

Njoftim per shtyp i Partise Demokratike, 13 Mars 2015

Deklarata për mediat e zëdhënëses Ina Zhupa, 13 Mars 2016

“Shqipëria dhe Kosova duhet të bashkojnë agjendat për të  Drejtat e Grave në të gjitha trevat shqipfolëse”, kështu deklaroi në Prizren, Albana Vokshi, Kryetare e Lidhjes Demokratike të Gruas së Shqipërisë, e ftuar në një takim për 26 vjetorin e themelimit të Forumit të Gruas së Lidhjes Demokratike të Kosovës.

Zonja Vokshi tha se në Shqipëri dhe Kosovë, qytetarët kanë humbur besimin dhe i janë drejtuar portave të Evropës për mbijetesë, si kombi me numrin më të madh të azilkërkuesve në Union, ku Shqipëria zë vendin e dytë pas Sirisë. Mijëra familje, mijëra gra, nëna të zhytura në skamje e mjerim azilojnë çdo ditë shpresëhumbur, pa kthyer kokën pas.

Politikat anti- sociale të ndjekura nga qeveria e Edi Ramës në Tiranë kanë thelluar varfërinë në Shqipëri, e cilat më së shumti rëndon mbi supet e grave, deklaroi deputetja Vokshi.  Çdo tre muaj INSTAT raporton rritjen pa kthim të papunësisë ndër gra dhe vajza e cila shkon në rajone të ndryshme edhe mbi 50 deri 70%. Papunësia ndër të rinj ka arritur 34%. Fasada me numrat e grave në qeveri e Parlament nuk reflektohet aspak në një përmirësim të numrit dhe statusit të tyre në administratën publike dhe atë private. Në të kundërt, rritja e çmimeve, taksave, tarifave këto 3 vjet e kanë përkeqësuar gjendjen dhe statusin e tyre.

Kryetarja e LDGSH, Vokshi inkurajoi partitë politikë në Kosovë të ndiqnin iniciativat e mira në drejtim të promovimit të rolit të grua në politikat lokale. Kuota 50% a lançuar nga PD dhe z.Basha tashmë është realitet në Shqipëri. “Sfida të tjera na presin së afërmi për rritjen e kuotës së grave parlamentare në Shqipëri e Kosovë”, tha Vokshi.

Sa më shumë gra në parlament e poste drejtuese në administratë, aq më pak burra me të shkuar kriminale e precedentë penalë. Sa më shumë gra në politikë, aq më pak burra të korruptuar, theksoi Vokshi.

Një grua jo e fuqizuar ekonomikisht, është a mënjanuar, e pambështetut dhe papromovuar politikisht. Ndaj dhe është domosdoshmëri kombëtare që më ardhjen e PD në pushtet, të zhbëhen të gjitha politikate masat anti-grua e të vendoset promovimi i saj në të gjitha axhendat qeveritare.

Znj vokshi kërkoi që PD dhe LDK tu bashkangjiten nismave të Organizatës së kombeve të bashkuara: “Step it up for Gender Equality!!”

Ajo iu bëri thirrje grave në Shqipëri dhe Kosovë të ngrihen për të drejtat e tyre ekonomike që fëmijët  e tyre të mos brakstisin vendlindjet nga varfëria dhe pasiguria. E ardhmja e fëmijëve tanë –tha deputeja Albana Vokshi- duhet të ndërtohet në Shqipëri dhe në Kosovë.

Kryetarja e Forumit të Gruas së Lidhjes Demokratike të Kosovës, Lirije Kajtazi përgëzoi kolegen Albana Vokshi për lobimin e saj jo vetëm në Partinë Demokratike , por edhe në forumet politike europiane dhe në agjencitë ndërkombëtare për të fuqizuar statusin e gruas në Shqipëri dhe deklaroi se edhe LDK është gati të ndryshojë statusin për më shumë gra në vendimmarrje.

Gjatë takimit në Prizren, përfaqësueset e forumeve të grave nga Shqipëria dhe Kosova u angazhuan për nisma rajonale të përbashkëta për të mbështetur projekte për fuqizimin e satusit të grave dhe vajzave.

Njoftim per shtyp i Partise Demokratike, 13 Mars 2016

18 mijë banorë të Mirditës nuk furnizohen me ujë të pishëm në çezmat e tyre. Shkak është bërë mospërmbyllja e projektit të Ujësjellësit të Bargjanës, i cili ishte premtuar nga qeveria që një muaj më parë. Për të parë nga afër gjendjen punimeve të lëna pezull në fshatin Prosek ishte deputetja Albina Deda e cila tha se asnjë ndryshim nuk ka ndodhur që nga premtim-mashtrimi i ministrit Haxhinasto.

“Pritëm një muaj se do të ketë ujë në cezma, por asgjë nuk ka ndodhur edhe pse vetë kryeministri ka deklaruar se rrënjët i ka nga kjo zonë, Proseku”, u shpreh deputetja Deda e cila tha se as tubacionet nuk shkojnë tek familjet dhe pse kontratat janë lidhur që në fushatën e zgjedhjeve të kaluara lokale me vlerë të konsiderueshme.

Ky projekt është i kushtueshëm dhe kontribuesit, taksapaguesit nuk po përfitojnë, pasi mbrapa shtyrjes së punimeve qëndrojnë interesat e klaneve të qeverisë dhe pushtetit lokal. Vetë banorët u shprehen se pusetat janë lënë të hapura, dhe tubat e ujit janë jashtë funksionimit. Ndërkohë që drejtoria e Ujësjellësit ka lidhur kontratat me banorët ata nuk marrin shërbimin që paguajnë. Mungesa e ujit u shkakton probleme të mëdha me bujqësinë dhe sjell shpenzime për jetesën e përditshme, u dhprehën banorët.

I nisur si projekt në qeverisjen e PD, me vlerë rreth 3 mln USD, ujësjellësi pret fazën përmbyllëse. Projekti ka parashikuar ndërtimin e dy burimeve, rehabilitimin e te gjitha depove si dhe ndërtimin e rrjetit shpërndares ne zonën rurale.

Njoftim per shtyp i Partisë Demokratike, 13 Mars 2016

Kryetari i Partisë Demokratike Lulzim Basha u takua me banorë të Klosit dhe me të rinjtë të Forumit Rinor të Partisë Demokratike.

Banorët e Klosit e kanë njohur kryetarin Basha me shqetësimet e tyre ku ndër më kryesoret ishte papunësia dhe arroganca e qeverisë. Banorët theksuan se e kanë të pamundur të riparojnë edhe shtëpitë e tyre, se i çojnë në burg ndërsa qeveritarët vjedhin miliona lekë nga taksat e tyre dhe nuk u ndodh asgjë.

Basha: Me ça po merresh?

Banorë: Hiç pa punë. Kam punu 20 vjet në “Elektrik” më ka heq i pari. Jam një ndër familjet më të persekutuara të rrethit të Matit. Fisi Allamani 100 vjet burg, 2 të pushkatuar pa gjyq, pa gjë fare dhe si përfundim sa erdhi në fuqi të parin më ka heq nga puna.

Bilanci i kësaj qeverie tha zoti Basha është zero, asnjë investim dhe asnjë premtim të mbajtur në 3 vjet. Kanë vjedhur 1.2 miliardë dollarë me të cilat për 6 vjet qytetarët do ta kishin energjinë falas.

 “Edi Rama rri dy orë në ditë në televizor ndërkohë që produktin e ka zero, zero për punësimin, zero për shëndetësinë falas, zero për legalizimin etj, etj. 1.2 miliardë dollarë të zhdukura në një vit të vetëm. 1 miliardë e 200 milionë janë baras me 900 shkolla të reja të ndërtuara nga fillimi. 1 miliardë e 200 milionë janë baras me 6 vjet fatura nacionale e energjisë elektrike e mbledhur së bashku e të gjithë shqiptarëve. Pra, është njësoj sikur shqiptarët 6 vjet të mos paguanin energjinë por ta kishin falas nga shteti.

Në takimin me të rinjtë, zoti Basha është njohur me shqetësimin e tyre për tarifat e larta të arsimit, të cilat po ua pamundësojnë vazhdimin e studimeve të larta. Përveç kostos së arsimit studentët thanë se në Tiranë kanë dhe kosto shtesë të jetesës që sa vijnë e rriten.

Student: Unë për vete kam studiuar tek Fakulteti i Shkencave të Natyrës dhe tarifa para 4 viteve ka qenë 40% e kësaj vlere që është tani aktualisht. E kemi të pamundur ta përballojmë.

Zoti Basha ka ripërsëritur premtimin e tij për ç ‘shfuqizimin e ligjit të Arsimit të Lartë dhe uljen e tarifave studentore. Një vend të veçantë në fjalën e zotit Basha ka zënë angazhimi i të rinjve dhe përcaktimi i kuotës prej 35% të kandidateve të rinj për deputet në Kuvendin e Shqipërisë. Kandidatët do të zgjidhen pas një debati dhe me parimin “një anëtarë- një votë” model që aplikohet në zgjedhjet presidenciale në SHBA.

“39 kandidatë në të gjithë Shqipërinë të rinj dhe të reja që do të shkojnë të garojnë për deputet të ardhshëm në Kuvendin e Shqipërisë. Aftësia për t’u përballur me problemet dhe për t’u dhënë atyre zgjidhje para anëtarësisë, para votuesve dhe para simpatizantëve tanë do të përcaktojë se kush do ta marrë besimin me votë të fshehtë.”

Të rinjtë demokratë të Europës kanë reaguar të shqetësuar për dhunën e qeverisë ndaj prostestuesve në Shqipëri. Në një letër që i ka dërguar kryetarit të FRPD, Belind Këlliçi, kreu i DEMYC, i kërkon autoriteteve ti japin fund arrestimeve të paligjshme dhe dhunës ndaj protestuesve. Kryetarii i DEMYC, Javier Hurtado Mira, i kujton qeverisë se dhuna ndaj lirisë së shprehjes dhe protestës, nuk mund të ushtrohet në një vend kandidat për në BE.

“Komuniteti i të Rinjve Demokratë të Europës është duke ndjekur me interes të veçantë ngjarjet e fundit në Shqiperi ku anëtaret e një prej organizatave tona, Forumit Rinor të Partisë Demokratike (FRPD) dhe protestues të shoqerisë civile janë arrestuar dhe dhunuar sistemakisht.

Disa protesta paqësore janë organizuar gjatë javëve të fundit në përpjekje për të mbrojtur parkun e fundit dhe të vetem publik në Tiranë. Policia ka përdorur forcë kundër protestuesve të cilët po ushtronin të drejten e tyre themelore njerëzore.

Protestuesit janë dhunuar fizikisht, po ashtu psikologjiksht, siç tregohet në foto dhe video të regjistruara nga qytetarët.

DEMYC u bën thirrje autoriteteve shqiptare t’i japin fund arrrestimeve të paligjshme dhe dhunës ndaj protestuesve paqësore. Askush nuk duhet të jete subjekt i ndalimit të lirisë së fjalës dhe protestës.

Këto nuk janë vlera që një vend kandidat në BE duhet të promovojë”, kështu shkruan në letrën e tij Javier Hurtado Mira, Kryetar i DEMYC.

Njoftim per shtyp i Partise Demokratike, 12 Mars 2016