Blog

Një ngjarje e rëndë kriminale ka ndodhur para dy netësh në Ersekë, ngjarje që tregon se Edi Rama ka thirrur banditët në armë, dhe synon ta kthejë Partinë Socialiste në një sipërmarrje kriminale.

Njeriu të cilit Edi Rama i ka besuar Partinë Socialiste të Ersekës, Orest Malushi, jo vetëm është me precedent penalë për plagosje të rëndë me armë, por bredh edhe me pistoletë në brez, dhe godet e kërcënon demokratët.

Ky drejtues socialist i Edi Ramës, në shoqërinë e kreut të PS së Leskovikut, Sergei Peshtani dhe drejtorit të Ujësjellësit, Robert Hamzaj, ka qëlluar me armë drejt anëtarit të Partisë Demokratike, Zylyftar Byreku, në një lokal në Shelegur.

Për fat, plumbi nuk e ka kapur qytetarin, dhe më pas disa të pranishëm kanë ndërhyrë duke i hequr armën.

Edhe pse anëtari i Partisë Demokratike ka bërë kallëzim, Shefat e policisë janë kujdesur që banditi i Ramës të jetë i lirë, dhe i lirë është edhe sot pas kësaj ngjarje të rëndë. Shefat e policisë janë kujdesur për drejtuesin e Edi Ramës, me armë në brez që shtin mbi qytetarët, që të mungojnë dhe provat kundër tij, duke prishur kamerat e lokalit.

Partia Demokratike i siguron këta drejtues të Policisë që do të përgjigjen para ligjit deri më një për këtë fshehje të ngjarjes dhe bashkëpunim me krimin.

Inkriminimi skandaloz, dhe bashkëpunim i shefave të policisë me urdhër nga lart, në favor të krimit dhe kundër qytetarit, është standardi më i keq ku ka mbërritur vendi ynë, me Edi Ramën e cubat e tij që sundojnë nëpër qytete e nuk i kap ligji, që i sjell edhe në parlament për të votuar qeverinë pasi kanë shkaktuar gjakdershje me armë pa leje.

Edi Rama po sfidon çdo ditë qytetarët e vendit, dhe të ardhmen europiane, duke refuzuar pastrimin e politikës nga krimi, e duke zgjedhur të ndajë pushtetin me banditë, trafikantë e vrasës.

Deklarata për media e kreut të Departamentit të Rendit dhe Sigurisë, Enkelejd Alibeaj, 28 Shkurt 2016

Kryetari i Partisë Demokratike Lulzim Basha i ka dërguar një mesazh urimi Presidentit të zgjedhur të Republikës së Kosovës,zotit Hashim Thaçi

I nderuar President i zgjedhur i Republikës së Kosovës,

I dashur Hashim,

Me rastin e votimit tuaj nga Kuvendi i Kosovës në detyrën e lartë të kreut të shtetit, kam kënaqësinë t’ju përcjell përgëzimet dhe urimet e mia dhe të Partisë Demokratike.

Zgjedhja juaj si Presidenti i katërt i Republikës së Kosovës është kurorëzim i suksesshëm i historisë dhe kontributit tuaj politik për lirinë, pavarësinë dhe përparimin e Kosovës tonë të shtrenjtë.

Shpreh bindjen se në lartësinë e besimit që ju morët, do të kontribuoni në ecjen përpara të Kosovës në rrugën e integrimit euro-atlantik, konsolidimin e fuqizimin e shtetit demokratik të së drejtës si dhe forcimin e paqes dhe stabilitetit në rajon.

Më lejoni që bashkë me konsideratën më të lartë t’ju uroj punë të mbarë dhe t’ju rikonfirmoj vullnetin tim dhe të Partise Demokratike për bashkëpunim të mëtejshëm me ju, institucionet e Republikës së Kosovës dhe qytetarët e saj për realizimin e aspiratave të përbashkëta kombëtare.

Përzemërsisht,

Lulzim Basha

Njoftim për media e Partisë Demokratike, 27 Shkurt 2016

Kryetari i Partisë Demokratike Lulzim Basha mori pjesë në Forumin e Tiranës për Liri Ekonomike me popranine e filozofit dhe ideologut konservator britanik Roger Scruton.

Sot përballja nuk është mes socialdemokratëve dhe konservatorëve, theksoi kreu i opozites, por mes qytetarëve dhe një maxhorance e cila ka instaluar në Shqipëri një regjim kleptokrat, të inkriminuar dhe me tendenca të forta të totalitarizmit.

“Taksat janë rritur, s’ka diskutim. Akcizat, tarifat janë rritur por paratë nuk përfundojnë në arkën e shtetit. Paratë vidhen dy herë, një herë në doganë dhe tatime dhe çfarë mbetet ndahet përsëri mes qeverisjes dhe klientelës së saj oligarkike. Një grusht njerëzish të cilët vetëm vitin e kaluar sipas burimeve zyrtare të institucioneve shqiptare futën në xhepat e tyre 1/3 e të ardhurave të shtetit. 777 milionë euro, shto këtu edhe 400 milionë dollarë apo 360 milionë euro të zhdukura pa lënë gjurmë, pa nam e nishan nga doganat e tatimet, e në veçanti nga zëra të tillë si karburanti, akciza e karburantit apo akciza e duhanit.”

Zoti Basha u ndal dhe tek koncesionet ose mënyra e re e përvetësimit të parave të qytetarëve. Sot, mazhoranca po i beson gjithçka një grushti njerëzish të lidhur ngushtë me interesat e kësaj.

“Në kuptimin teorik na kanë befasuar ne Partinë Demokratike të Shqipërisë, partinë e lirisë ekonomike, partinë e liberalizimit të çmimeve të ekonomisë se centralizuar të Enver Hoxhës. Këta janë shtyrë, jo 1 apo 2 hapa, por  2 km djathtas nesh në besimin e madh që kanë tek sektori privat… …por jo çdokujt në sektorin privat, sigurisht. Një grushti njerëzish të lidhur ngushtë me interesat e kësaj kontrate koncensionare në shëndetësi, këta socialistët shqiptarë i sollën. 1/5 e buxhetit të shëndetësisë i është dhënë importuesit të parë apo të dytë më të madh të duhanit me një tender korruptiv për të bërë check-up-in, kontrollin profilaktik shëndetësor të popullsisë mbi 40-vjeç.

1/5 tjetër i është dhënë një emigranti shqiptar në Itali, me një ndërmarrje me 1 mijë euro kapital dhe një murator si punëtor, për të operuar përmes një kontrate “outsource” –i. Një investim tashmë të bërë me paratë publike nga qeveria jonë e djathtë, me punonjës të trajnuar me paratë e taksapaguesve në formën e një huaje nga Banka e Këshillit të Europës. Furra për sterilizimin e instrumenteve është bërë fringo e re, punëtorët aktualisht janë trajnuar dhe pastaj vjen PS e Shqipërisë dhe këtë investim të paguar me taksat e shqiptarëve ia jep këtij emigrantit në Itali me një murator në firmën e tij bashkë me 1/5 apo 1/4 e buxhetit të shëndetësisë.

Doganat shqiptare kanë dy vite që “gjakojnë” të ardhurat e shqiptarëve. Hemorragji totale, 400 milionë dollarë vjet, 200 e kusur milionë dollarë parvjet.  E ndonëse “Croën-Agents”, agjentët e kurorës nuk na ndihmuan dot këtu, na ndihmuan vetëm të kuptojmë pak sesi vidhet por nuk e ndaluan dot vjedhjen. Mesa duket James Bond-in e kishin lënë në Londër, këtu kishin sjellë vetëm analistët.

Prapë se prapë po bëjnë gati të japin me koncesion mbledhjen e TVSH-së. Shtyllën kurrizore të të ardhurave të shtetit. “Po bëjnë gati është shprehja, këtë po e them me delikatesë se në fakt e kanë përcaktuar se kush do ta marri. Do ta marrë vëllai i kryeministrit  përmes një kompanie guackë, “offshore” në Hong Kong, të paktën kështu raporton një media që ka mbetur apo i thotë vetes e pavarur,  Rrjeti i Gazetarëve Investigativ  të Ballkanit Perëndimor. Ndërkohë këtë javë na kanë njoftuar se ka edhe dy propozime të tjera të pa kërkuara, të pa kërkuara d.m.th kërkuara por të pa kërkuara për koncesion. Njëra ka të bëjë me taksën e pronës, kadastrën fiskale dhe tjera ka të bëjë me agjencitë doganore.”

Lideri i opozitës në fjalën e tij u ndal edhe në një shqetësim të madh që kanë sot investitorët e huaj por edhe ata vendas. Inkriminimi i pushtetit dhe pasiguria juridike. Zoti Basha tha se kryetari i PS solli në Parlament persona me precedent penal vetëm e vetëm për të fituar me dhunë disa zona ku ishte i pashpresë në përballjen politike.

“Ky regjim ka ardhur në pushtet me një aleancë me krimin dhe në parlamentin shqiptar tashmë janë larguar në forma dhe rrethana të ndryshme 5 individë të dënuar në Itali, në Zvicër, në Belgjikë. S’janë socialistë, s’kanë milituar asnjë ditë në PS por janë sjellë në PS nga kryetari i tyre  për ti garuar në zona që i konsideronte të pashpresa, pa sjellë horra, rrugaçë, njerëz të armatosur dhe me paratë e drogës në xhep.

Dy vite e gjysëm jemi përballur me këtë betejë menduam që e kaluam këtë fazë duke miratuar ligjin për dekriminalizimin. Por javën e kaluar kryeministri provokoi një krizë parlamentare sepse refuzon të fusë në zbatim këtë ligj, refuzon që përmes amendimit të këtij ligji t’i ndalë rrugën një banditi i cili megjithëse u arrestua duke goditur me armën e tij të paligjshme e duke gjakosur katër bashkëqytetarë të tij, prapë se prapë përmes një tjerrje mes policisë –prokurorisë dhe gjykatës përmes një alibie, përmes një mrekullie të gjetjes së një gëzhoje dy muaj pasi kishte ndodhur ngjarja, ia doli të vinte në Parlament.”

Lidhur me reformën në drejtësi kryetari i opozitës Lulzim Basha theksoi se Edi Rama nuk asnjë interes tani që ka kapur drejtësinë, e shantazhon dhe e përdor atë. Dhe i vetmi I interes i tij, tha zoti Basha është se si ta mbajë nën kontroll.

“Kanë vetëm një interes, që këtë kapje e çimentojnë, të ruajnë lakun në fytin e gjyqtarëve të ndershëm apo të korruptuar. Të ruajnë levat mbi prokurorët të ndershëm apo të korruptuar,  të ruajnë kontrollin mbi gjyqësorin, kësaj i thonë reformë. Por gjithçka tjetër edhe kur rekomandohet nga Komisioni i Venecias edhe kur ka mbështetje euroatlantike këta i fut në një kolaps, në një dilemë të vërtetë.

Pse? Sepse një sistem i reformuar i drejtësisë me gjyqtarë e prokurorë të pakapur politikisht, të pashantazhueshëm nuk ka si të tolerojë zhdukjen dhe vjedhjen e 1/8 të buxhetit të shtetit në një vit. Nuk ka si të pranojë këtë aleancë të krimit me politikën.”

Zoti Basha ka sjellë në vëmendje dhe fyerjet dhe kërcënimet që kryeministri përdor në Parlament dhe jashtë tij.

“Ky diskutim do të ishte fyerje për ata protestues jashtë e për mijëra  e mijëra shqiptarë që sot nuk shohin një përballje midis një botëkuptimi socialistë dhe një botëkuptimi liberal, por me një kleptokraci kriminale që për t’i vënë kapakun ka një kryeministër që flet me gjuhën që do të bënte edhe Duçen, të skuqej.

Nuk mbaj mend as nga leximet e mia, as nga përvoja ime që Duçja të ketë thënë që kush nuk voton partinë fashiste është dele a budalla. Ky e ka thënë, piktori ynë. E ka thënë para një jave që kush nuk voton Partinë Socialiste është o dele o budalla. Dhe kjo është kopertura totalitare por jo vetëm, edhe subkoshienca totalitare.”

Zoti Basha ka sjellë në vëmendje platformën e Partisë Demokratike e cila do ta bëjë Shqipërinë konkurruese dhe do t’i japë frymëmarrje biznesit duke nxitur punësimin dhe zhvillimin.

“ Programi ynë fiskal parashikon taksën e sheshtë 9% dhe kur themi taksë e sheshtë e kemi në të gjitha nivelet, duke përfshirë dhe sigurimet shoqërore.  Reduktimin e TVSH-së në nivelin 15% bashkë me një paketë robuste për çmontimin e të gjitha pengesave administrative dhe burokratike në raport me regjistrimin e biznesit, operimin e biznesit me kontrollet  nga inspektoriatet e shumta që sot u marrin frymën në raport me sektorë të caktuar, siç është bujqësia ku do të eliminohen të gjitha  kërkesat parazitare të cilat parazitojnë korrupsionin pasi nuk kanë sjellë asgjë të mirë në formalizimin e biznesit bujqësor. Ndihmë të targetuar për sektor prioritarë të zhvillimit si bujqësia, energjia turizmi e infrastruktura. Sigurisht platformën e kemi, vizionin e kemi, alternativën e kemi dhe do t’ua japim shqiptarëve rrugët e zgjedhjes. Por vetëm pasi të largojmë me çdo kusht e me çdo çmim rrezikun totalitar të një regjimi të inkriminuar dhe kleptokrat. Dhe për këtë nuk ka rrugë tjetër përveç rezistencës, përballjes, protestës deri në zhbërjen me themel të këtij regjimi”.

Njoftim për media e Partisë Demokratike, 27 Shkurt 2016

Në emër të grave demokrate, por jam e sigurt se në emër të çdo gruaje, vajze dhe nëne sot në vend, dua të dënoj ashpër gjuhën dhe sjelljen fyese, të paprecedentë që ka ushtruar ne mënyrë të përsëritur Edi Rama e që e ushtroi edhe në seancën e fundit në parlament ndaj zonjave, kolegeve Deda dhe Halimi.

Askush nuk kishte arritur deri në këtë fjalor e adresim publik fyes e agresiv ndaj një gruaje, ndaj një nëne, ndaj një përfaqësuese politike, siç bëri Edi Rama në seancën e të enjtes.

Më tej, Byroja e Parlamentit nën urdhrat e tij, dhunoi sërish gratë deputete, duke mos marrë asnjë qëndrim, e duke ndëshkuar viktimat.

Edi Rama, në këtë mënyrë, nuk ka dhunuar vetëm dy kundërshtare të tij politike, por çdo grua shqiptare, çdo socialiste, çdo vajzë e nënë, me parti, pa parti. Çdo grua që sjell jetë, çdo grua që zoti e ka krijuar. Një akt i papranueshëm tradicionalisht, i papranueshëm aq më shumë sot në vitin 2016.

Prej tre vitesh në qeverisje, ai ka dhunuar verbalisht, psikologjikisht, fizikisht mijëra gra duke i hequr nga puna padrejtësisht, po dhunon gratë e profesioneve te lira duke ju falimentuar bizneset nga rritja e shumëfishtë e sigurimeve shoqërore dhe shëndetësore,  ka mashtruar çdo zonjë që ka bërë mamografinë e lëvizshme e që ende s’ka marrë asnjë përgjigje; po dhunon çdo grua që dergjet spitaleve pa shërbim e mjekim se ai e ka kthyer shëndetësinë në biznesin e tij më të madh përfitues. E tani po dhunon te gjitha gratë që kanë një biznes të vogël me barrën e tmerrshme të taksave e tarifave lokale në bashkitë që drejtohen nga PS.

Edi Rama, u tall e fyeu çdo grua e vajzë që i doli përpara në rrugën e tij. I shtyu drejt vetvrasjes nëna, gra dhe motra që s’përballonin dot arrogancën e pushtetit të tij.

Ne nuk mund të heshtim. Ne duhet të reagojmë per çdo grua që sot dhunohet fizikisht, ekonomikisht dhe psikologjikisht nga Edi Rama.

Ne gratë, duhet te protestojmë jo vetëm për Albina Dedën dhe Arbiola Halimin por edhe për zonjat Merjeme Dilishi (Suku) dhe Mirela Neli kandidate për deputete te Partisë Socialiste për qarkun e Lezhës që u kërcënuan e dhanë dorëheqjen për t’i hapur rrugën një personi me precedent penal, edhe për Silvana Maksutin kandidate për deputet e LSI për Durrësin që e detyruan të mos e pranojë vendin e deputetes.

Ne duhet të protestojmë edhe për  Melita Çengen, infermieren nga Shkodra, edhe për Brunilda Meken nga Korça, të cilat Rama i hoqi nga puna dhe i çoi drejt vetëvrasjes. Ne duhet të protestojmë edhe për zonjën Resmie Alla, 35-vjeçaren, e cila humbi jetën sepse donte që fëmijët e saj të kishin pak dritë, edhe për mijëra gra e nëna që sot vuajnë se s’kanë mundësi të plotësojnë as nevojat me minimale të fëmijëve.

Në dorë e kemi vetë ne, gratë e vajzat, të çojmë nderin në vend. Ne do ngrihemi në këmbë për ti dhënë fund fyerjes dhe dhunimit e për të jetuar me dinjitet ashtu siç e meritojmë!

Të martën në orën 12, le të jemi të gjitha bashkë, para Kryeministrisë në protestë për të ndalur dhunën e për të mbrojtur të drejtat tona!

Deklaratë e kryetares së Lidhjes Demokrate të Gruas, Albana Vokshi, 27 Shkurt 2016

Bashkimi Evropian ka shpenzuar përmbi 6 milion euro për përafrimin e legjislacionit mjedisor shqiptar me Direktivat e mjedisit të BE. Por korrupsioni i kësaj qeverie po bën që paratë e taksapaguesve europianë të shkojnë për shtimin e rryshfeteve të militantëve në kurriz të dyqaneve të vogla të lagjeve.

Përmes miliona eurove të taksapaguesve europianë u hartua Ligji Nr. 10448, datë 14.7.2011 “Për lejet e mjedisit”, me ekspertize të huaj sipas kërkesave të Direktivave të BE.

Ky ligj i hartuar sipas kërkesave të BE përjashtoi nga detyrimi për leje mjedisore rreth 70% të aktiviteteve ekonomike në vend. Përjashtimi nga detyrimi për të marrë leje mjedisore ulte kostot e biznesit, reduktonte kohën e liçensimit dhe shmangte korrupsionin por nga ana tjetër, nuk demtonte as mjedisin.

Por qeveritaret e korrupsionit na hiqen si më të ditur dhe më të përkujdesur për mjedisin sesa evropianet, dhe për të mundësuar rryshfetin shkuan deri në ndryshimin e ligjit të hartuar nga BE!

Më datën 19.6.2014 Parlamenti kaloi LIGJIN Nr. 60/2014 “Për një NDRYSHIM NË LIGJIN NR. 10448, DATË 14.7.2011, “Per Lejet e Mjedisit”, dhe detyruan të pajisen me leje mjedisore pikerisht ato aktivitete që ishin hequr nga ekspertët e huaj dhe për të cilat nuk kërkohet leje mjedisore as në vendet e BE, te tilla si:

1. Gatimi dhe tregtimi i produkteve ushqimore të gatshme dhe gjysmë të gatshme (fast food dhe byrektore)
2. Furra të prodhimit të bukës
3. Magazinimi frigoriferik i produkteve ushqimore të ambalazhuara
4. Farmacitë dhe dentistet
5. Ambulancat, spitalet ditore pa shtretër,

Kjo po bën që hajdutët e qeverisë të sulen nëpër dyqanet e lagjeve duke i kërcënuar me gjoba të mëdha për mungesen e lejes mjedisore. Të shantazhuar dyqanxhinjte japin rryshfete që emisioni STOP tregoi, që shkojnë deri në 3000 euro për një leje mjedisore që ligji sipas standarteve të BE nuk i kërkon fare.

Po paraqesim këtu një proces-verbal apo kërcënim gjobe të pardjeshem për një fast-food me permasa 3 x 3 metra (9m2), pranë gjimnazit Partizani në Tiranë, dhe që nuk ka asnjë nevojë për leje mjedisore dhe as nuk parashikohet sipas Direktives së BE për lejet mjedisore. Kërcënohet dyqanxhiu me 5 milionë lekë nëse nuk ngjyen rrotën e korrupsionit.

Ky është modeli që zuzarët e qeverise përdorin për të shantazhuar hallexhinjte e këtij vendi dhe për të vjelur rryshfete nga të pamundurit e bukës së gojës.

Sipas standardeve të kesaj qeverie, një fast food ka nevoje për leje mjedisore ndërsa Betonizimi i Parkut të Liqenit për Lodrat dhe Bizneset e Erionit nuk paska nevoje për leje!!! Partia Demokratike e denoncon fuqishëm këtë akt korruptiv që shkon deri në perversitete të ndryshimit të ligjit të hartuar nga Bashkimi Evropian.

PD kerkon shfuqizimin urgjent të këtyre amendimeve ligjore korruptive dhe zotohet që nesër në pushtet të heqë detyrimet e padrejta dhe tinzare për biznesin.

Deklaratë e kreut të Departamentit të Mjedisit në PD, Jamarbër Malltezi, 27 Shkurt 2016

Byroja e Kuvendit vendosi sot pasdite të rrëzojë kërkesën e opozitës për masë disiplinore ndaj kryeministrit Edi Rama dhe kryetarit të Komisionit të Ekonomisë Braçe për fjalorin e tyre të rëndë fyes ndaj deputeteve të opozitës në Kuvend. Në mënyrë të njëanshme, Byroja vendosi përjashtimin e deputetëve Gent Strazimiri dhe Bedri Hoxha për 7 ditë nga punimet e Kuvendit dhe 2 ditë për deputeten Albina Deda. Nënkryetarit i Kuvendit Edmond Spaho e cilësoi këtë vendim si tërësisht arbitrar dhe paralajmëroi përshkallëzimin e reagimit të opozitës.

Prononcimi për mediat

Edmond Spaho: Ne kërkuam masë ndaj kryeministrit dhe ndaj kryetarit të Komisionit të Ekonomisë që me fjalorin e përdorur prej tyre u bë rrjedhojë për veprimet e disa deputetëve të opozitës. Për fat të keq, siç ka ndodhur edhe herë të tjera, Byroja e Kuvendit dënoi viktimat dhe jo shkaktarët dhe agresorët. Në vend që të dënonte kryeministrin dhe kryetarin e Komisionit të Ekonomisë për fjalorin që përdorën, dënoi deputetët që reaguan në përgjigje të këtij fjalori thellësisht fyes për deputetet femra por edhe për deputetë të tjerë. Nuk habitemi me një veprim të tillë pasi ky Parlament e ka treguar tashmë fizionominë e tij mjaft të qartë, një Parlament i mbushur me persona të inkriminuar të cilët hyjnë e dalin sipas dëshirës sa herë që duan ata në Kuvend. Ndërsa ne i nxjerrim nga dritarja ata hyjnë e krekosen në Kuvend nga dera. Dy deputetët e opozitës u dënuan me 7 ditë përjashtim nga Kuvendi dhe deputetja Albina Deda me 2 ditë përjashtim. Kurse kryeministrit dhe kryetarit të Komisionit të Ekonomisë iu rrahët krahët dhe u përgëzuan për fjalorin e përdorur në Kuvend.

Pyetje: Çfarë do të veproni ju më tej?

Edmond Spaho: Ne do ta përshkallëzojmë në përputhje me këtë qendrim të maxhorancës. Do të shtyrtojmë të gjitha opsionet.

Pyetje: Çfarë ndodhi në mbledhje?

Arbjola Halimi: Së pari, ne u përpoqëm që të argumentonim akuzat që kemi ngritur kundrejt Kryeministrit Edi Rama për fyerjet që ka bërë në Kuvend dhe reagimin tonë më pas dhe kundrejt deputetit Erion Braçe për fyerjet që ai ka bërë ndaj meje kryesisht. Kjo ishte arsyeja përse ne ishim këtu. Albina Deda për të mbrojtur pozicionin e saj pasi ajo është e akuzuar nga pala tjetër dhe është kërkuar që të merret një masë disiplinore ndaj saj. Ndërsa unë isha për të argumentuar masën disiplinore që kisha kërkuar ndaj deputetit Braçe.

Pyetje: Kanë marrë masa disiplinore ndaj jush zonja deputete? 

Albina Deda: U diskutua gjatë se si erdhi situata në atë pikë. Edhe për akuzat që u ngritën për tre deputetët e Partisë Demokratike, ku jam unë, zoti Strazimiri dhe zoti Hoxha. Kryesisht ne insistuam në kërkesën e Partisë Demokratike, për dënimin e Kryeministrit Rama dhe të deputetit Braçe, të cilët kanë fyer në vazhdimësi opozitën, të cilët kanë fyer në vazhdimësi deputetet femra.

Jemi në një situatë paradoksale, në një Parlament, ku opozita proteston për të drejtën e saj legjitime dhe përballë kemi fyerje që vijnë nga goja e Kryeministrit në mbrojtje të kriminelëve dhe të korruptuarve që ndodhen në atë Parlament dhe që janë të mandatuar pikërisht dhe të futur e të kompozuar nga Rama vetë.

Ne diskutuam gjatë, prezente ishin edhe zonja Leskaj dhe zonja Hafizi. Kryesisht unë debatova me zonjat sepse ato ishin të dyja aty, zonja Leskaj drejtoi seancën atë ditë, ishte shumë arrogante, filloi menjëherë votimin dhe aty ishte përballja më e madhe që nisi mes deputeteve dhe unë kam goditur Ramën me atë shukun e letrës së lagur që ishte në foltore. E sqarova qartë këtë. Por zoti Balla tha që nuk i kemi pamjet filmike me zë, sepse duan të fshehin fyerjet që ka bërë Rama në drejtimin tim dhe reagimin pastaj të zotit Strazimiri dhe të zotit Hoxha, të cilët pastaj goditën Kryeministrin.

Pyetje: Me kaq sa thatë, cili ishte vendimi i Byrosë zonja Deda?

Albina Deda: Vendimi i Byrosë është që të dënohen deputetët e opozitës, por të mos preken Kryeministri. Është i paprekshëm Kryeministri. Pra, ai ka çdo të drejtë në këtë vend, të emërojë ministra të korruptuar, të marrë kriminelët, t’i fusë në Parlament, të na përballë në fushata me elementë të tillë. Është një situatë paradoksale. Opozita, nëse do të dënohen deputetët e PD, do ta përshkallëzojë më tej aksionin dhe unë deklaroj këtu para jush se sot është fundi i moralit dhe i ekzistencës së këtij Parlamenti, nëse do të dënohen deputetët e opozitës.

Pyetje: Kur thoni që do të përshkallëzoni protestën, çfarë nënkuptoni? 

Albina Deda: Ne do të qëndrojmë aty dhe do ta përshkallëzojmë aksionin tonë opozitar në Parlament. Përshkallëzimi është se ne do të bllokojmë seancat. Ato duhet që të tolerojnë, është një e drejtë e opozitës kjo, është e argumentuar qartë nga Partia Demokratike që ne kemi të drejtë parimore dhe teknikisht mund të realizohet kjo ndërhyrje që në Parlamentin shqiptar të mos ketë njerëz që janë të kapur në flagrancë, duke dhunuar qytetarët, të cilët i kanë votuar.

Pyetje: Nuk mendoni se jeni duke prishur rendin e reformave që po diskutohen në komisionet parlamentare?

Arbjola Halimi: E ka prishur Edi Rama duke sjellë kriminelët në Parlament.

Albina Deda: Opozita nuk e kishte parashikuar këtë ardhje të Armando Prengës, të këtij elementi kriminal në Parlament. Ne ishim në mbështetje të Reformës në Drejtësi dhe të të gjitha hapave të tjera. Vendimi është që ne, nuk do të marrim pjesë në komisionet parlamentare edhe këtë javë. Do të shikojmë reagimin e mazhorancës, nuk presim ndonjë reagim të themi të vërtetën. Sepse Rama ka treguar që është i papërgjegjshëm përderisa arrin dhe fyen në atë gjuhë deputetët, absolutisht të mos mendojë se do të rrijë gjatë në atë karrige.

Pyetje: Zonja deputete një pyetje, a është normale që Shqipëria është një vend kandidat për në BE dhe të shikojmë ato skena duke u goditur me letër të lagur apo me vezë?

Albina Deda: Ne ato mjete kemi. Ne kemi punuar në të gjitha seancat, madje kemi folur më shumë se mazhoranca, mazhoranca ka deputetë, ka dhe ministrat, e gjithë salla është me mazhorancën aty, ne kemi folur ndoshta edhe trefishin e mazhorancës, pra, kemi treguar vullnet për të diskutuar, për të argumentuar dhe unë vetë si deputete kam qenë gjithmonë përballë ministrave, kryesisht përballë ministrit të Shëndetësisë sepse atë fushë e njoh edhe më mirë, jam profesioniste aty, kam qenë përherë me argumente dhe nuk e kam fyer as Beqajn, mediat e kanë parë momentin kur ai më ka fyer. Këta fyejnë sepse nuk kanë argumente, përballë me opozitën dhe nuk kanë mënyrë tjetër për t’u shprehur ndaj opozitës. Pra, fyerja është mbrojtje për kriminelët, për të korruptuarit që Rama ka futur aty.

Pyetje: Cila ishte përgjigjja e Byrosë për kërkesën tuaj?

Albina Deda: I lamë duke shqyrtuar këtë pjesë. Sepse ne ia vendosëm si kusht nëse do të dënohen kolegët duhet të dënohet edhe Rama. Kushti duhet zbatuar.

Pyetje: Zonja Halimi, ka një pretendim nga zoti Braçe se ju gjatë ditës së djeshme keni goditur me shkelm punonjësit e sigurisë në Kuvend dhe pikërisht kjo ka provokuar dhe reagimin e tij.

Arbjola Halimi: Faleminderit zotit Braçe që më bëri kaq agresive sepse unë nuk jam e tillë. Ata që më njohin e dinë. Unë kam kërkuar sot zbardhjen e regjistrimeve sepse ajo që ishte më e papranueshme nga ky takim, ishte që gjëja e parë që na u tha është që nuk janë regjistrimet apo nuk i gjejmë, janë shumë pak e nuk mund të shërbejnë si prova. Ne i sugjeruam kryetarit, që njëherazi ai është edhe kryetari i Kuvendit të marrë të paktën pamjet që janë shpërndarë dje botërisht në të gjitha mediat brenda dhe aty mund ta konstatojë fare mirë se çfarë ka ndodhur në atë seancë, ndërkohë që kryetari tha se nuk gjente aq regjistrimet që Kuvendi vetë i mban. As vetë nuk e kuptova se si nuk mund të kemi filmimet.

Albina Deda: Rama ka pranuar sot, me nënqeshjen e me tallje se e bëra për humor. Pra, ka pranuar që këto fyerje kanë ndodhur në Parlament, kanë dalë nga goja e tij kundrejt deputetëve të opozitës, në rastin konkret ndaj meje. Prandaj Rama e ka treguar se është i papërgjegjshëm, e kam goditur Ramën në shenjë të indinjatës së mirditorëve, çdo zyrë në Mirditë është e mbushur me kriminelë, nxori edhe ish-administratorin e Kaçinarit për gërhitje nga Gjykata e Lezhës. Pra, jemi para një situate paradoksale ku krimi dhe kriminelët afrohen nga Kryeministri, mbahen në Parlament dhe fyhen deputetët që kanë dinjitet, që kanë vlera dhe që respektohen në zonat që ata përfaqësojnë.

Njoftim për shtyp i Partisë Demokratike, 26 Shkurt 2016

Në një prononcim për mediat pas mbledhjes së grupit parlamentar kryetari i Partisë Demokratike Lulzim Basha ka theksuar vendosmërinë për t’i shkuar deri në fund betejës për dekriminalizimin e Parlamentit.

“Qëndrimi i Grupit Parlamentar është i qartë dhe i prerë : plotësimi i zgjidhjes që ne kemi ofruar, i dhënies fund të këtij provokimi te tmerrshëm ndaj shqiptarëve. Pra, largimit me ligj të deputetëve që plagosin dhe vrasin shqiptarë nga seancat e parlamentit deri në marrjen e vendimit të prerë. Është një kusht që nuk ka shqiptar demokrat apo socialist të mos e kuptojë dhe të mos ta pranojë për të shmangur bllokimin e Parlamentit.

I vetmi që nuk e pranon këtë zgjidhje është ai që solli Armando Prengën, ai që solli Arben Ndokën. Gojëfëlliquri i cili shikon veten e tij jo si kryetar të socialistëve por si kryetar të banditëve dhe ka të drejtë ta shikojë veten të tillë sepse është më i izoluar se kurrë. Partia Demokratike i ka të qarta qëndrimet e saj. Ne i kemi dhënë rrugëdaljen, zgjidhjen. Kështu që presim që Edi Rama të reflektojë. Në të kundërt vendimet që kemi marrë do t’i çojmë deri në fund.

Pyetje: Është e vërtetë që deputetët nuk do të jenë në komisionet parlamentare, z.Basha?

Basha: Vendimi  i kësaj jave mbetet në fuqi. Nuk ka asnjë përmirësim të situatës. Përkundrazi është tashmë e njohur botërisht që ky recidivist në dhunimin verbal dhe jo vetëm të grave, dje ka bërë të njëjtën gjë. Ishte ky akt që provokoi goditjen e tij me vezë që fatkeqësisht  nuk e zunë në pjesën e zbuluar të kokës sepse sipas vendimit të gjykatës kjo nuk përbën vepër penale. Uroj të mos ketë guximin të provokoje përsëri grupin parlamentar ne sallë.

Partia Demokratike, theksoi zoti Basha ka depozituar  në Byronë Parlamentare kërkesën për përjashtimin e deputetit  Edi Rama nga seancat parlamentare për 10 ditë për fyerje vulgare ndaj  deputetes Albina Deda. Përdorimi i gjuhës rrugacerore në Kuvendin e Shqipërisë është një akt i përsëritur dhe botërisht i njohur nga Edi Rama.

Njoftim për shtyp i Partise Demokratike, 26 Shkurt 2016

Ashtu siç kishte paralajmëruar, Partia Demokratike bëri kallëzim penal në prokurori sot për Drejtuesit e Policisë së Tiranës, IKMT, INUV, Inspektoriatin e Mjedisit dhe firmën Grand, për ndërtimin e paligjshëm tek Parku i Liqenit të Tiranës.

Institucionet në fjalë kanë manifestuar dhunë e arbitraritet në çdo rast ndaj qytetarëve të vendit, edhe për vendosjen e një dritareje apo rregullim çatie, ndërsa kur është fjala për ndërtimin e paligjshëm të Erion Veliajt ato nuk kanë vepruar.

Kallëzimin penal, e depozitoi sot në Prokurorinë e Tiranës, Sekretari për Aksionin Qytetar, Ervin Salianji.

“Sapo dorëzuam  një kallëzim të ri në Prokurorinë e Tiranës për shpërdorim detyre, për ndërtim të paligjshëm, për prerjen e drurëve dekorativë dhe frutorë dhe për mos marrjen e masave për të ndëprerë gjendjen e paligjshme, për pengimin e së drejtës për tu shprehur, grumbulluar apo manifestuar. Janë kallëzuar penalisht Policia e Shtetit, konkretisht Ervin Hodaj si drejtor i Policisë së qarkut të Tiranës, Ermal Muça zëvëndësdrejtor, Dhimitër Ziu si zëvëndësdrejtori i Sigurisë, Agim Hoxha si shef i komisariatit nr-1 në Tiranë, Andi Banushi zv-shef i komisariatit nr 1 në Tiranë, Ilirjan Hasanaj si shef i rendit në komisariatin nr 1 në Tiranë,  Dallëndyshe Bici si drejtoreshë e Inspektoratit Kombëtar të Mbrojtjes së Territorit e cila në bashkëpunim me Policinë e Shtetit për një ndërim të paligjshëm në mes të Tiranës, në mes të të vetmit park që ka qyteti i Tiranës, nuk marrin masa dhe lejojnë veprimtarinë e paligjshme në një kohë që njerëzit futen kudo në burg pse lyejnë një fasadë. Po ashtu kemi kallëzuar drejtorin e Inspektoratit Ndërtimor Urbanistik Vendor të Tiranës, z Skerdi Drenova, kryeinspektorin e Agjensisë së Mjedisit dhe shoqërinë ndërtimore për ndërtimet e paligjshme që kryhen në këtë zonë të Tiranës. i bëjmë thirrje edhe njëherë Prokurorisë së Tiranës që të marrë masa që shteti i së drejtës të funksionojë e që ligji të jetë siç e parashikon Kushtetura, dhe jo fjala e kryeministrit të jetë më e rëndësishme se sa ligji në republikën tone”, u shpreh për mediat Salianji.

Prononcimi për mediat i Sekretarit të Aksionit Qytetar, Ervin Salianji, 26 Shkurt 2016

Partia Demokratike depozitoi sot në Kuvend kërkesën për masë disiplonore ndaj Edi Ramës dhe Erion Braçes për fyerjet e rënda ndaj deputeteve të PD, Albina Deda dhe Arbiola Halimi.

Partia Demokratike ka kërkuar përjashtimin nga kuvendi të Ramës dhe Braçes për 10 ditë.

Bashkengjitur kërkesat e depozituara sot në Kuvend.

Njoftim për media e Partisë Demokratike, 26 Shkurt 2016

KERKESE PER MARRJEN E MASES DISIPLINORE NDAJ EDI RAMA

kerkese per marrjen e mases disiplinore ndaj Erjon Braces

Të premten e 4 shtatorit të vitit të kaluar, ne kemi qenë këtu të gjithë. Kemi qënë në Tiranë, në Shqipëri.

Mos bëni sikur keni kujtesë të dobët.

Ishte kulmi i debatit për dekriminalizimin, për pastrimin e politikës nga të inkriminuarit që ti Edi Rama përzgjodhe me dorën tënde dhe i solle në këtë sallë, i solle me shumicë, dhe pikërisht në këtë kohë deputeti yt Armand Prenga, përgjaku oborrin e komisariatit të Policisë, duke qëlluar me armë pa leje disa qytetarë, anëtarë të familjes Cali.

Në komisariat të policisë, në institucionin ku viktimat kishin shkuar për të kërkuar mbrojtje e siguri.

Mbarë opinioni publik u trondit, Europa dhe mbarë bota u tronditën.

Ishte ky deputet që ti e kishe përzgjedhur pikërisht për bëmat e tij, e more se të duhej për të dhunuar votën në zgjedhjet e vitit 2013, dhe më pas e sule edhe kundër deputetëve të opozitës, kundër fjalës së lirë.

E sule këtu në sallë, e sule në komisione të ushtronte dhunë me grushta e me kaish, me kanosje dhe kërcënime kundër deputetëve të opozitës në detyrë.

Ky ishte skenari yt z.Rama dhe ti i qëndroje mbi kokë deri në zbatimin e tij të plotë.

E shpërbleve me Lagunën e Patokut dhe kur ai përgjaku komisariatin me armën e tij pa leje, për 10 orë urdhërove heshtjen në përpjekje për ta shpëtuar deputetin tënd, mercenarin tënd.

Kur nuk kishe nga t’ia mbaje u detyrove të pranosh arrestimin dhe procedimin e tij. Por jo me gjithë mend.

Shpike gëzhojën e vjetër që u gjet pas dy muajsh për të ndërtuar alibinë e Prengës tënd.

Ti Edi Rama me presion ndaj gjykatës e lirove në arrest shtëpie. Prenga agresori në shtëpi dhe Calët në burg. Perversitet, përdhunim i drejtësisë. Ti e bëre.

Dhe javën e kaluar, kur mandati i tij vihej në pikëpyetje për shkak të mungesës në Kuvend ti përsëri i dhe një dorë mercenarit tënd duke e nxjerrë edhe nga arresti shtëpiak.

Do të mjaftonin precedentët e tij, do të mjaftonte kërkesa e qytetarëve të mbarë vendit të ngritur në protesta, do të mjaftonte mbështetja e  partnerëve tanë ndërkombëtarëve për pastrimin e politikës nga krimi, që ti t’i jepje duart këtij deputeti.

Nuk e bëre kurrë.

A mund ta përfytyronte ndokush, që pas asaj përgjakje, i përzgjedhuri yt do të vinte sërish në Kuvend?

Askush s’mund ta përfytyronte.

Po kur është puna për keq, për mbrapshtira dhe djallëzira, ti ia del të bësh të pamundurën. Na befason gjithnjë.

Ja ku jemi pas 6 muajsh. Ti e risolle në Kuvend Armando Prengën, që është nën akuzë për plagosje me armë zjarri e për armëmbajtje pa leje.

Dhe ti bën sikur ska ndodhur asgjë.

Dhe ti bën sikur kjo është normale.

Si ka mundësi që ky akt skandalizon të madh e të vogël, demokratë e socialistë, shqiptarë e të huaj. Ndërsa për ty prapë nuk është problem.

Unë e di, ne e dimë që ti je në ethet e kongresit, dhe këtë soj, këta njerëz të hurit e të litarit ti i ke thirrur nën armë.

Paranoja jote, të bën të mendosh se deputeti-bandit që gjakos me pistoletë në mes të komisariatit, duke lënë disa të plagosur, është ok, është më i vlefshëm është më i dëshirueshëm se një socialist i thjeshtë.

Ti e di se je më i izoluar, më i pabesueshëm, më i braktisur se kurrë.

Ankthi yt, kriza që ke, sepse e di që nuk të besojnë më as socialistët, e jo më qytetarët, të bën të thërrasësh sërish nën shërbim kriminelët, banditët, trafikantët.

Siç ke bërë nga veriu në jug.

Me bushët, roshët, me ndokën, cubin, me Bardhin që e le të lirë se gërhiste shumë, dhe ti je i ndjeshëm ndaj kësaj meoldie, dhe tani së fundmi dhe me deputetin tënd Prenga.

Kjo është një ditë vendimtare për Parlamentin.

Nëse ti, nëse ju, nuk konsideroni më asnjë vlerë, asnjë standard;

Nëse qytetarët nuk ekzistojnë më për ju;

Nëse për ju vlejnë vetëm paratë, pasuritë, tenderat e koncesionet;

Vazhdoni në këtë kurs, qëndroni në këtë bunker të zhytur në llucën e krimit e vjedhjes.

Ne skemi ndërmend ta bëjmë asnjë minutë.

Nuk i tradhtojmë ne sot qytetarët e vendit, të djathtë e të majtë, demokratë e socialistë, e të paparti.

Ne kemi ngritur një kauzë të madhe, bashkë me ta, bashkë me partnerët ndërkombëtarë, dekriminalizimin e politikës.

Ndërkohë që duhet me shpejtësi ta vëmë atë në punë, ti na sjell këtu Armando Prengën.

Ndërkohë që duhet të ndalojmë krimin, ta largojmë nga politika me aktet nënligjore, e ta vëmë në funksion të plotë dekriminalizimin, ti na sjell këtu plagosjen, gjakderdhjen, armën pa leje.

Dhe bën sikur gjithçka është normale.

Jo Edi Rama. Makuti e babëzia mund të ketë zvenitur tek ti çdo formë të vlerave minimale njerëzore. Por mos mendo se kjo ka ndodhur me të gjithë ne.

Ky parlament nuk funksionon. Mbyllet sot. Mbyllet këtu.

Ose vendosim të ecim pa krimin, ose nuk ka më asnjë seancë.

Me krimin vazhdo ti, ti që e ke kthyer partinë laborator të trafikantëve. Ne dhe qytetarët nuk të vijmë pas.

Kalojmë sot, kalo tani propozimin tonë që pezullon të zgjedhur e funksionarë të arrestuar në kushte flagrance plagosje apo vrasje me dashje.

Kalojmë sot vendimin e Kuvendit për zbatimin e dekriminalizimit.

Kalojmë sot, kalojmë tani kërkesën Gjykatës Kushtetuese për mbarimin e mandatit të deputetëve që janë kapur në shkelje të Kushtetutës duke marrë miliona euro dhe hekurudhën për vete dhe për fëmijët, Koco Kokëdhima, Rakip Suli e Valentina Leskaj.

Ose ndryshe parlament nuk ka më.

Me krimin, me korrupsionin, me shkeljen e Kushtetutës për xhepat e Kokëdhimës, Rakip Sulit e Vali Leskajt, me këto akte të rënda ulur në këto karrige, parlament nuk ka.

Ti ke thjesht kartonat, por kartonat s’janë parlamenti.

Parlamenti është themeli i standarteve, i vlerave që duhet të ketë një vend, që duhet të prijë një vend.

Kushtet që shpalosim sot, nuk janë një tekë. Janë rruga drejt normalitetit. Janë kthimi i normalitetit në vend. Eshtë marrëveshja politike e 24 dhjetorit të vitit 2014 që votuam me ndërmjetësimin e Parlamentit Europian.

Të ndalim dhunimin e kësaj marrëveshje, dhe kjo kërkon;

Miratimin e amendamentit në ligjin e dekriminalizimit që largon nga ky Kuvend deri në gjykimin final Armando Prengën;

Miratimin e vendimit që fut në zbatim ligjin për dekriminalizimin;

Dërgimin nga ky Kuvend në Gjykatën Kushtetuese të kërkesës për heqjen e mandatit të deputetit për Koço Kokëdhimën, Valentina Leskajn dhe Rakip Sulin, të cilët në dhunim të Kushtetutës kanë konsumuar paratë e publikut shqiptar, dhe pasurinë publike ndërkohë që janë vetë deputetë;

Heqjen e pengesës të komisioneve hetimore parlamentare ndalimin e zhvlerësimit të tyre, duke hequr instrumentin e kuorumit që e ke përdorur deri më sot vetëm për bllokim.

Pa këto, pa realizimin e këtyre kushteve ky institucion dhe kjo foltore nuk do të funksionojnë.

Kjo aulë është e sovranit, jo e krimit.

Kjo aulë është e popullit, jo e hajdutëve.

Nga kjo aulë pritet drejtësi, dhe jo e kundërta.

Pa drejtësi këtu, dhe sot, asnjë hap më tej nuk ka.

Ky është shansi i fundit për këtë parlament që të funksionojë.

Vlerësoje mirë këtë çast. Ke në dorë të paktën njëherë në jetën tënde të marësh vendimin e duhur, vendimin e drejtë.

Pas kësaj, fjalën e kanë qytetarët shqiptarë, ata që ti i quan dele dhe budallenj sepse nuk të besojnë ty, sepse të përbuzin ty, sepse të urrejnë ty dhe skotën tënde të hajdutëve që u vjedh kafshatën e fëmijëve nga goja e i detyron të ikin nga sytë këmbët ndërkohë që vetë kridheni në luks e pasuri të shfrenuara.

Atyre ju takon fjala dhe vepra nëse ti refuzon të marrësh hapat që ti përcakton Kushtetuta, ligji dhe marëveshja politike.

Zgjedhja tani është e jotja. A do të shkosh prapë kundër qytetarëve, kundër ligjit, kundër kushtetutës, kundër Europës? Për krimin, me krimin e prej krimit.

Ne e kemi bërë zgjedhjen tonë. Dhe jemi sot këtu për të të thënë se zgjedhja jonë është ligji, është drejtësia e pakapur nga ty është parlamenti pa kriminelë, janë zgjedhjet e lira dhe të ndershme.

Zgjedhja jonë janë qytetarët. Ata që nuk kanë pse të presin më asnjë minutë të vetme për ta zhbërë nga themelet regjimin tënd kleptokrat dhe kriminal që po ju merr bukën, shpresën, shpirtin.

Dhe ata do të marrin në dorë fatet e këtij Kuvendi dhe çdo institucioni.

Do ta çlirojnë këtë aulë dhe demokracinë në çdo cep nga krimi i veshur me pushtet dhe pushteti i veshur me krim.

Fjala në Kuvend e kryetarit të Grupit Parlamentar të PD, Edi Paloka, 25 Shkurt 2016