Blog

“Ajo që kërkojmë ne është diçka plotësisht parimore. Po  kërkojmë një ndryshim që është plotësisht i bëshëm sot, i miratueshëm nga Parlamenti dhe në aspektin teknik nuk ka asnjë pengesë. Ajo që ne kërkojmë është, ndryshimet sot, në Ligjin për dekriminalizimin në mënyrë që deputetë dhe funksionarë të këtij niveli, të mos jenë në parlament, të mos ushtrojnë funksion publik, kur janë të arrestuar në flagrancë për krime për vrasje ose plagosje. Nuk mundet që një person i tillë të ushtrojë një funksion publik, që kërkon besim publik. Ajo që ne kërkojmë është që, me ligj, kjo kategori të përjashtohet menjëherë nga parlamenti në ushtrimin e funksioneve, pra të pezullohet në ushtrimin e funksionit deri sa të marrë një vendim gjykata. Nuk  kërkojmë më shumë se kaq. Eshtë ndryshim parimor, është një procedurë e ndjekur tashmë nga mazhoranca. Ju kujtoj ndryshimet në momentin e fundit në Ligjin për reformën territoriale, ku për të akomoduar kërkesat e PDIU, Shpëtim Idirizit, u ndryshua ligji duke krijuar njësi fare të vogla në kundërshtim me standartet, kurse ajo që kërkojmë ne është parimore, është largimi i personave kriminelë të arrestuar në flagrancë për vrasje ose plagosje nga parlamenti. Eshtë kaq e thjeshtë dhe çdo gjë tjetër është kacavjerrje mbi xham, vetëm e vetëm për të mbrojtur kriminelët. Vetëpezullimi nuk ekziston as si kriter ligjor dhe aq më pak, kriter kushtetues, për rrjedhojë vlera është nul”.

Prononcimi për mediat i deputetit, Oerd Bylykbashi mbi kërkesën e PD për të përjashtuar, të zgjedhur apo zyrtarë të kapur në kushtet e flagrancës për krime si vrasja apo plagosja, 26 Shkurt 2016

​

Me dorën dhe mendjen e Edi Ramës mercenari i tij bandit dhe përgjakës i qytetarëve të Laçit njoftoi sonte në mbrëmje në një letër “vetëpezullimin”. Partia Demokratike refuzon me përbuzje këtë truk të ulët që ka për synim të justifikojë bllokimin e nismës ligjore të PD për amendimin e ligjit të dekriminalizimit. Opozita dhe qytetaret shqiptaret nuk mund te pranojne kurre nje parlament ne meshiren e premtimeve te Armando Prenges.  Zero vlere ka sot perbetimi i ketij plackitesi vilash ne Itali qe Edi Rama e solli ne Parlament per dhune dhe kanosje, qe e shperbleu me Lagunen e Patokut dhe qe e nxorri nga qelia ku perfundoi pasi pergjaku bashkeqytetaret e tij ne komisariatin e Lacit per ta riperdorur serish. Edi Rama duhet te miratoje neser ndryshimet ne ligjin e dekriminalizimit qe i hapin rruge pezullimit ligjor te Armando Prenges nga parlamenti dhe paketen e akteve te tjera qe opozita depozitoi ne Kuvend. Bllokimi i kesaj nisme ligjore vetem do te konfirmoje lojen kukafshehtas te Edi Rames me Prengen dhe do te rezultoje ne aksionin e paralajmeruar opozitar te bllokimit te funksionimit te Kuvendit.​

Njoftim për shtyp i Partisë Demokratike, 24 Shkurt 2015

Top-Channel : Zoti Basha, Knut Fleckenstein i ka kërkuar qeverisë dhe opozitës që të miratojë me shpejtësi aktet nënligjore për zbatimin e ligjit të dekriminalizimit. A do të afrojë nesër opozita nesër për ta bërë këtë?

Basha: Absolutisht po! Opozita ka propozuar miratimin nesër të aktit nënligjor për zbatimin e ligjit të dekri​minalizimit si dhe ndryshimin e ligjit të dekriminalizimit për të pezulluar në çdo rast funksionarët e arrestuar në flagrancë duke kryer vepra kundër jetës dhe shëndetit, pra vrasje ose plagosje me armë zjarri deri në marrjen e një vendimi të formës së prerë nga gjykata. Miratimi i këtij  ndryshimi në ligjin e dekriminalizimit dhe miratimi i aktit nënligjor për të cilin shpreh mbështetjen e plotë për qëndrimin e z.Fleckenstain janë në fakt dy nga kushtet e Partisë Demokratike.

Top-Channel : A po e shtoni shumë “menynë” e dekriminalizimit?

Basha: Aspak!

Top-Channel : Po qeveria do ta miratojë këtë?

Basha: Do ta shohim nesër por mungesa e vullnetit për ta miratuar do të dëshmojë edhe një herë se qeveria dhe kryeministri Rama nuk janë seriozë për dekriminalizimin dhe kjo do të ketë pasoja të rënda për vendin.

Top-Channel : A po e përdorni krizën “Prenga” si një mundësi për të penguar reformën në drejtësi?

Basha: Absolutisht jo!  Absolutisht jo!

Top-Channel : Çfarë prove jepni për këtë?

Basha: E para, premisa nuk u krijua nga PD. Prenga  nuk u kthye në atë sallë nga PD por nga presioni i paligjshëm i EdI Ramës nga gjyqësori për të ushtruar këtë standard të tmershëm ku një njeri botërisht i kapur në flagrancë jo vetëm nga policia por edhe nga media duke përdorur një armë të paligjshme zjarri  gjakosi disa qytetarë dhe në vend që të jetë sot në arrest, në vend që të jetë i dënuar në fakt në një proces të shpejtë dhe të drejtë gjyqësor është rikthyer në Parlament si pjesë e vullnetit të mbrapshtë të Edi Ramës. E kundërta qëndron. Edi Rama ka nesër rastin të provojë që ky nuk është një skenar personal i tij dhe e vetmja rrugë për ta bërë këtë është miratimi i ndryshimit të ligjit të dekriminalizimit dhe i vendimit për të futjen në fuqi të ligjit të dekriminalizimit, menjëherë.

Nga ana tjetër aq sa absurde është pretendimi që PD përmes kësaj synon bllokimin  e reformës në drejtësi kur PD është investuar nga dita e parë për reformën në drejtësi dhe ka qenë EdI Rama ai që edhe sot pengon dialogun politik dhe konsesusin për një reformë sipas parimeve të shpallura nga Venecia. Unë mund të them edhe të kundërtën që nëse Edi Rama nuk vepron duke miratuar ndryshimin për ligjin e dekriminalizimit, duke miratuar vendimin që e fut këtë ligj në zbatim atëherë është Edi Rama ai që ka interes të pengojë Parlamentin dhe të pengojë reformën në drejtësi.

Top-Channel :: Por ju keni thënë se do të bllokoni Parlamentin, do të thotë se do të bllokoni edhe reformën në drejtësi nëse PS nuk vepron?

Basha: Absolutisht është e kundërta. PD ka qenë, është dhe mbetet e gatshme që të japë gjithë kontributin e saj për reformën në drejtësi. Edi Rama nuk mund të kushtëzojë reformën në drejtësi me mbrotjen e një personi që është arrestuar në flagrancë duke gjakosur qytetarët e tij me armë pa leje.  Nuk ka asnjë dilemë në këtë nëse Edi Rama e bën këtë është ai penguesi i çdo hapi tjetërm, është ai që me veprimet e tij bëhet pengesë për të gjithë hapat e tjerë dhe reformat e rëndësishme që vendi do të ndërmarrë. Partia Demokratike mbetet e vendosur për reformën në drejtësi por Partia Demokratike dhe qytetarët shqiptarë nuk mund të pranojnë asnjë çast që një person i kapur në flagrancë duke shtirë me armë të paligjshme mbi qytetarët të ulet në bankat e Parlamentit. Miratimi i ligjit për dekriminalizimin, miratimi i amendamenteve në këtë ligj nesër dhe miratimi i paketës, vendimit që fut ligjin në fuqi apo në zbatim është rruga e thjeshtë për të zgjidhur këtë problem të tmerrshëm që i është krijuar përsëri Shqipërisë dhe imazhit të saj në Europë. Mungesa e vullnetit politik për ta bërë këtë, që shpresoj të mos demonstrohet nesër, tregon qartë se Edi Rama nuk është serioz për zbatimin e ligjit të dekriminalizimit, për shpirtin dhe germën e këtij ligji. Dhe në raport me reformën në drejtësi  tregon qartë se është gati të përdorë këtë kauzë kaq të rëndësishme siç është dekriminalizimi për të bllokuar më tej hapat që i shpërbejnë reformës në drejtësi. Por PD është e vendosur për reformën në drejtësi, sikundër mbetet e vendosur për zbatimin pa kushte të ligjit për dekriminalizmit dhe largimin e personave me rekorde kriminale dhe kriminelëve në hetim nga Parlamenti.

Top-Channel : Faleminderit!

Basha : Faleminderit!

Intervistë e kryetarit të PD, Lulzim Basha dhënë për Top Channel, 25 Shkurt 2016

Partia Demokratike depozitoi në Kuvend dy iniciativa ligjore për dekriminalizimin dhe komisionet hetimore parlamentare.

Propozimi për dekriminalizimin, parashikon përjashtimin nga politika për funksionarët dhe të zgjedhurit kur ata arrestohen në kushtet e flagrancës të krimit kundër jetës dhe shëndetit.

Propozimi tjetër pamundëson bllokimin nga mazhoranca të punës së komisioneve hetimore përmes mospranisë së anëtarëve të mazhorancës, siç ka ndodhur deri tani në rastet e Komisionit Hetimor për Serverin e Tatimeve dhe Komisionit Hetimor për Emërimet në Administratën Publike.

Bashkëngjitur, dy iniciativat e depozituara në Kuvend nga Grupi Parlamentar i Partisë Demokratike.

 REPUBLIKA E SHQIPËRISË

GRUPI PARLAMENTAR I PARTISË DEMOKRATIKE

KRYETARI

 Tiranë, më _____/_____/2016

DREJTUAR:            ZOTIT ILIR META

KRYETAR I KUVENDIT TË SHQIPËRISË

OBJEKTI:                 PROPOZOHET PËR SHQYRTIM DHE MIRATIM NJË PROJEKTLIGJ

BAZA LIGJORE:                 Neni 81 i Kushtetutës të Republikës së Shqipërisë dhe neni 68 i Rregullores së Kuvendit të Republikës së Shqipërisë.

1. Kryetar i Kuvendit,

Në funksion të arritjes së qëllimeve të plota të procesit të dekriminalizimit, bashkëlidhur ju dërgojmë për shqyrtim dhe miratim projektligjin “Për disa shtesa dhe ndryshime në ligjin nr. 138/2015 “Për garantimin e integritet të personave që zgjidhen, emërohen ose ushtrojnë funksione publike”, sëbashku me relacionin shoqërues. Projektligji është iniciativë e deputetëve të Grupit Parlamentar të Partisë Demokratike.

Përsa më lart, kërkojmë shqyrtimin me prioritet të këtij projektligji në Kuvendin e Shqipërisë dhe miratimin e tij pa asnjë vonesë të pajustifikuar.

KRYETARI

EDI PALOKA

REPUBLIKA E SHQIPËRISË

KUVENDI

PROJEKTLIGJ

Nr. ______/2016

PËR DISA SHTESA DHE NDRYSHIME NË LIGJIN NR. 138/2015 “PËR GARANTIMIN E INTEGRITET TË PERSONAVE QË ZGJIDHEN, EMËROHEN OSE USHTROJNË FUNKSIONE PUBLIKE”

Në mbështetje të neneve 6/1, 81 pika 1 dhe 2, 83 pika 1, dhe 84 pika 4 të Kushtetutës, me propozimin e një grupi deputetësh,

KUVENDI

I REPUBLIKËS SË SHQIPËRISË

VENDOSI:

Në ligjin nr. 138/2015 “Për garantimin e integritet të personave që zgjidhen, emërohen ose ushtrojnë funksione publike”, bëhen këto shtesa dhe ndryshime:

Neni 1

Në nenin 2 bëhen këto shtesa dhe ndryshime:

1. Fjalia e parë e paragrafit 1 ndryshohet si më poshtë vijon:

“1. Nuk mund të kandidojnë dhe as të zgjidhen deputetë në Kuvendin e Shqipërisë, kryetar bashkie apo qarku, këshilltar në këshillin bashkiak apo të qarkut, drejtues të njësive administrative, dhe në çdo rast nuk mund të marrin një funksion me votim nga Kuvendi, përfshirë funksionin e Kryeministrit apo anëtarit të Këshillit të Ministrave, apo me votim nga këshillat bashkiakë ose të qarkut, personat e dënuar me vendim gjyqësor të formës së prerë, brenda apo jashtë territorit të Republikës së Shqipërisë, për:”.

1. Në paragrafin 2, të nenin 2, pas shkronjës “a”, shtohet shkronja “a/1” me këtë përmbajtje:

“a/1) ndaj të cilëve është zbatuar masa e arrestit në flagrancë për krime kundër jetës të kryera me dashje, ose veprat penale të kryera me dashje kundër shëndetit.”.

Neni 2

Pika 6 e nenit 4, ndryshohet si më poshtë vijon:

“6. Për personat e dëbuar sipas parashikimeve të germës “b” të pikës 2 të nenit 2 të këtij ligji, kohëzgjatja e ndalimit për kandidim, zgjedhje apo ushtrim të funksionit është:

1. i) përjetë për dëbim, në lidhje me rastet e parashikuara nga neni 2, pika 1, shkronja “a”;
2. ii) 20 vjet për dëbim, në lidhje me rastet e parashikuara nga neni 2, pika 1, shkronja “b”;

iii) 10 vjet për dëbim, në lidhje me rastet e parashikuara nga neni 2, pika 1, shkronja “c”, pavarësisht uljes së dënimit për shkak gjykimi të shkurtuar apo  procedure të ngjashme me të që passjell uljen e dënimi.”.

Neni 3

Pika 4 e nenit 5 ndryshohet si më poshtë vijon:

4. Formulari i vetëdeklarimit dorëzohet dhe administrohet, sipas rastit:
5. a) pranë Komisionit Qëndror të Zgjedhjeve për të zgjedhurit dhe kandidatët për deputetë në Kuvendin e Shqipërisë apo në organet e qeverisjes vendore;
6. b) pranë Kryetarit të Kuvendit për kandidatët për funksione në organet kushtetuese apo të krijuara me ligj dhe që zgjidhen nga Kuvendi;
7. c) pranë Prefektit të qarkut përkatës për personat që emërohen në funksione publike me votim nga këshilli bashkiak nën juridiksionin e prefektit apo nga këshilli i qarkut përkatës;

ç) pranë Komisionit Qendror të Zgjedhjeve për anëtarët e Këshillit të Ministrave që nuk kanë mandat deputeti dhe nuk kanë paraqitur vetëdeklarim, sipas shkronjës “a” të kësaj pike;

1. d) pranë titullarit apo organit që bën emërimin për funksionarin publik që emërohet sipas gërmës “a”, pika 1, të nenit 3 dhe kur ky emërim është i ndryshëm nga funksionet e zgjedhura me votim nga Kuvendi si dhe kur emërimi bëhet sipas shkronjave “d” dhe “g”, të kësaj pike;
2. dh) pranë Kryeministrit, për rastet e parashikuara nga shkronjat “c” dhe “ç”, të pikës 1, të nenit 3, të këtij ligji;
3. e) pranë Drejtorit të Shërbimit Informativ Shtetëror apo Drejtorit të Përgjithshëm të Policisë së Shtetit, sipas rastit, për shkronjat “dh” dhe “ë”, të pikës 1, të nenit 3, të këtij ligji;

ë) pranë Departamentit të Administratës Publike, për rastet e parashikuara nga shkronja “e”, të pikës 1, të nenit 3, të këtij ligji;

1. f) pranë Ministrit të Mbrojtjes, për rastet e parashikuara në shkronjën “f”, të pikës 1, të nenit 3, të këtij ligji.

Neni 4

Paragrafi 5, i nenit 10, ndryshohet si më poshtë vijon:

​“5. Për personat që plotësojnë kushtet e shkronjës “a” dhe “a/1” të pikës 2, të nenit 2, të këtij ligji, ndalimi që zbatohet për ta është pezullimi i ushtrimit të funksionit, me përjashtim të rasteve të parashikuara në pikën 1, të nenit 16, të këtij ligji. Për rastin e parashikuar nga shkronja “a” e pikës 2 të nenit 2 të këtij ligji, pezullimi zgjat përgjatë gjithë periudhës që ekzistojnë rrethanat për të cilat zbatohet ky ndalim. Në cdo rast, pezullimi mbaron kur personi deklarohet i pafajshëm, me vendim gjyqësor të formës së prerë.”.

Neni 5

Hyrja në fuqi

Ky ligj hyn në fuqi menjëherë dhe botohet në Fletoren Zyrtare.

Miratuar më _____/_____/2016.

KRYETARI

ILIR META

RELACION PËR PROJEKTLIGJIN

‘PËR DISA SHTESA DHE NDRYSHIME NË LIGJIN NR. 138/2015 “PËR GARANTIMIN E INTEGRITET TË PERSONAVE QË ZGJIDHEN, EMËROHEN OSE USHTROJNË FUNKSIONE PUBLIKE”’

Kapja e pushtetit publik nga krimi nëpërmjet përfshirjes së individëve me rekorde të rënda kriminale nga partitë politike në kandidaturat dhe zgjedhjen e tyre në Kuvend apo pushtetin vendor, si dhe nëpërmjet emerimit në funksione të larta apo funksione kyçe të administrates publike dhe organeve ligjzbatuese, përbën një kërcenim të rëndë për integritetin dhe funksionimin e demokracisë dhe institucioneve demokratike. Në demokraci duhet garantuar që personat që konsiderohen nga shumica e votuesve si të papërshtatshëm për të vendosur për interesat e tyre të qendrojnë jashtë vendimmarrjeve legjislative apo Qeverisë. Qëllimi i këtyre kufizimeve ka për synim mbrojtjen e funksionimit demokratik të institucioneve nga ndikimi i personave me rekorde të rënda penale apo që konsiderohen që mund të ndikojnë negativisht, mbi bazën e dyshimeve të arsyshme. Është interes i lartë publik që politikbërja dhe vendimmarrja të imunizohen nga ky ndikim.

Me ligjin nr. 138/2015 “Për garantimin e integritet të personave që zgjidhen, emërohen ose ushtrojnë funksione publike”, janë miratuar rregullat bazë për mbrojtjen dhe garantimin e mirëfunksionimit demokratik të Kuvendit, organeve të qeverisjes vendore, institucioneve kushtetuese apo të krijuara me ligj, administratës publike, Forcave të Armatosura, organeve të rendit publik, sigurisë kombëtare dhe çdo institucioni apo entiteti tjetër ekonomik shtetëror, nga ndikimi apo pjesëmarrja në politikëbërje dhe/ose vendimmarrje i personave, të cilët janë dënuar apo ndaj të cilëve janë marrë masa sigurie ose janë dënuar me vendim jopërfundimtar për kryerjen e krimeve. Miratimi i këtij ligji ishte padyshim suksesi më i rëndësishëm i Kuvendit të Shqipërisë gjatë vitit 2015 dhe reforma kyce e përkrahur gjerësisht nga partnerët ndërkombëtar. Tashmë Shqipëria duhet të ndërmarrë hapa konkret për zbatimin e këtij ligji dhe pastrimin e organeve publike nga ndikimi i personave me rekorde kriminale.

Mirëpo, në ligjin nr. 138/2015 vërehet se mungojnë një rrethanë e cila në vlerësimin tonë është me rëndësi parësore në arritjen e qëllimit të vetë ligjit. Konkretisht, ligji nuk parashikon mundësinë e pezullimit nga detyra të funksionarëve  publik në rast se ato arrestohen në flagrancë për krime kundër jetës të kryera me dashje, ose veprat penale të kryera me dashje kundër shëndetit. Arrestimi në flagrancë për kryerjen me dashje të një veprave penale kundër jetës ose shëndetit, nënkupton se zyrtare nuk mund të vijojë ushtrimin e funksionit, pa u përfunduar cështja me vendim gjyqësor të formës së prerë, për shkak se ajo bie ndesh me parimet që udhëheqin ushtrimin e funksionit publik dhe që ka të bëjë me ofrimin e shërbimeve ndaj qytetarëve, përfaqësimin dhe mbrojtjen e interesave të tyre. Nëse një funksionar publik arrestohet në flagrancë për kryerjen me dashje të një vepre penale kundër jetës ose shëndetit të shtetasve, atëherë krijohet dyshimi i bazuar për pamundësinë ligjore që ai njëkohësisht të ushtrojë funksionet publike në shërbim të qytetarëve.

Për këtë qëllim, në nenin 2 është shtuar një formulim ndalues, i cili nuk passjell shkarkimin e tij nga detyra, për arsye të respektimit të parimit të prezumimit të pafajësisë, por pezullimin nga detyra deri në përfundimin e cështjes me vendim gjyqësor të formës së prerë. Nëse funksionari publik deklarohet i pafajshëm me vendim gjyqësor të formës së prerë, atëherë pezullimi konsiderohet i pushuar. Në të njëjtën linjë me këtë shtesë, është riformuluar edhe pika 5 e nenit 10 të ligjit, ku rrethana e parashikuar nga shkronja “a/1” e pikës 2 të nenit 2, është shtuar në rastet e pezullimit të funksionarit nga detyra. Nga ana tjetër, është riformuluar edhe pika 1 e nenit 2, edhe për shkak se konstatohet se nuk janë përcaktuar në mënyrë shteruese të gjitha funksionet publike që duhet të përfshihen. Konkretisht, janë shtuar funksionet e kryetarit/këshilltarit të qarkut, dhe drejtuesit e njësive administrative, në përputhje me ligjin e ri të organizimit dhe funksionimit të pushtetit vendor, si dhe është përputhur parashikimi me shkronjën “dh”, të pikës 2 të nenit 71 të Kushtetutës.

Gjithashtu, për shkak të procedurave të gjata të shqyrtimit të këtij projektligji nga Komisioni i Posacëm Parlamentar dhe ndërhyrjeve në të deri në momentet e fundit, pas miratimit të projektligjit nga Kuvendi, është dërguar për zbardhje pranë strukturës përgjegjëse të Kuvendit, versioni i projektligjit me disa gabime në referimin e brendshëm të ligjit. Konkretisht, gabime në referim janë vërejtur:

1. në pikën 6 të nenit 4, ku duhet të referohet pika 1 e nenit 2, dhe jo pika 2 e tij.
2. Në pikën 4, të nenit 5, ku shtimi i një shkronje tek neni 3 (shkronjës “b”), nuk është reflektuar edhe në nenin 5 të ligjit.

Për këtë arsye, është e nenvojshme që të bëhen këto saktësime, me qëllim që ligji të mos keqzbatohet në praktikë.

Në përputhje me pikën 4 të nenit 84 të Kushtetutës, ku specifikohet se: “Në rastet e masave të jashtëzakonshme, si dhe në rast nevoje e urgjence, kur Kuvendi vendos me shumicën e të gjithë anëtarëve dhe Presidenti i Republikës jep pëlqimin, ligji hyn në fuqi menjëherë, vetëm pasi të jetë njoftuar publikisht. Ligji duhet të botohet në numrin më të parë të Fletores Zyrtare”, dispozita e hyrjes në fuqi parashikon se ligji hyn në fuqi menjëherë. Nevoja dhe urgjenca që paraqet fillimi nga zbatimi sa më parë të jetë e mundur e legjislacionit për dekriminalizimin, është jetike për funksionimin normal të vetë institucioneve publike. Shqipëria dhe shqiptarët meritojnë një përfaqësim dinjitoz, jo nga njerëz me rekorde kriminale, por nga burra dhe gra që punojnë në interes të tyre. Ky projektligj i shërben pikërisht këtij qëllimi dhe për pasojë duhet të përkrahet nga të gjitha forcat politike në Kuvend, si një tregues i vullnetit të tyre të sinqertë për dekriminalizimin e politikës dhe mos përdorimit të krimit për të ardhur apo mbajtur pushtetin.

DEPUTETI

EDI PALOKA

REPUBLIKA E SHQIPËRISË

GRUPI PARLAMENTAR I PARTISË DEMOKRATIKE

KRYETARI

Tiranë, më _____/_____/2016

DREJTUAR:            ZOTIT ILIR META

KRYETAR I KUVENDIT TË SHQIPËRISË

OBJEKTI:                 PROPOZOHET PËR SHQYRTIM DHE MIRATIM NJË PROJEKTLIGJ

BAZA LIGJORE:                 Neni 81 i Kushtetutës të Republikës së Shqipërisë dhe neni 68 i Rregullores së Kuvendit të Republikës së Shqipërisë.

1. Kryetar i Kuvendit,

Në funksion të përmbushjes me efikasitet të funksionit kushtetutues të pakicës parlamentare për kontroll parlamentar, bashkëlidhur ju dërgojmë për shqyrtim dhe miratim projektligjin “Për disa ndryshime në ligjin nr. 8891, datë 2.5.2002 “Për organizimin dhe funksionimin e Komisioneve Hetimore të Kuvendit”, sëbashku me relacionin shoqërues. Projektligji është iniciativë e deputetëve të Grupit Parlamentar të Partisë Demokratike, në kuadër të respektimit të nenit 77 të Kushtetutës dhe të zbatimit të Rezolutës së datës 24.12.2014 “Për Marrëveshjen midis maxhorancës qeverisëse dhe opozitës në Kuvendin e Shqipërisë”.

Përsa më lart, kërkojmë shqyrtimin me prioritet të këtij projektligji në Kuvendin e Shqipërisë dhe miratimin e tij pa asnjë vonesë të pajustifikuar.

KRYETARI

EDI PALOKA

REPUBLIKA E SHQIPËRISË

KUVENDI

PROJEKTLIGJ

Nr. ______/2016

PËR DISA NDRYSHIME NË LIGJIN NR. 8891, DATË 2.5.2002 “PËR ORGANIZIMIN DHE FUNKSIONIMIN E KOMISIONEVE HETIMORE TË KUVENDIT”

Në mbështetje të neneve 77 pika 3, 78, 81 pika 1 dhe 83 pika 1 të Kushtetutës, me propozimin e një grupi deputetësh

KUVENDI

I REPUBLIKËS SË SHQIPËRISË

VENDOSI:

Në ligjin nr. 8891, datë 2.5.2002 “Për organizimin dhe funksionimin e Komisioneve Hetimore të Kuvendit”, bëhen këto ndryshime:

Neni 1

Fjalia e dytë e nenit 12 ndryshohet si më poshtë vijon:

“Prania e personave të tjerë në mbledhjet e komisionit vendoset me vendim të Komisionit.”.

Neni 2

Neni 13 ndryshohet si më poshtë vijon:

“Neni 13

Marrja e vendimeve

1. Mbledhjet e komisionit janë të vlefshme kur në to marrin pjesë së paku të gjithë anëtarët që i takojnë grupimit politik ku bëjnë pjesë nismëtarët e komisionit.
2. Komisioni merr vendime me shumicën e të gjithë anëtarëve të pranishëm.
3. Komisioni voton zakonisht me ngritjen e dorës, përveç rastit kur me kërkesën e të paktën tre anëtarëve kërkohet që votimi të bëhet nominal ose i fshehtë.
4. Kërkesa për hetime ose marrje provash nga çdo anëtar i komisionit pranohet nga komisioni pa votim.”.

Neni 3

Hyrja në fuqi

Ky ligj hyn në fuqi 15 ditë pas botimit në Fletoren Zyrtare.

Miratuar më _____/_____/2016.

KRYETARI

ILIR META

RELACION PËR PROJEKTLIGJIN

PËR DISA NDRYSHIME NË LIGJIN NR. 8891, DATË 2.5.2002 “PËR ORGANIZIMIN DHE FUNKSIONIMIN E KOMISIONEVE HETIMORE TË KUVENDIT”

Ushtrimi normal i veprimtarisë së Kuvendit kërkon ekzistencën e elementeve të domosdoshëm që kanë të bëjnë me krijimin e kushteve për respektimin e ligjeve nga të gjitha organet e tjera të pushtetit publik e shtetasit, si dhe pajisjen e tij me mjetet e përshtatshme për realizimin e kontrollit mbi mënyrën e zbatimit të ligjeve. Komisionet hetimore që ngrihen për këtë qëllim, në kuptim të nenit 77 të Kushtetutës, janë një mjet që i shërben pikërisht ushtrimit të kontrollit parlamentar. Ato janë instrument i rëndësishëm i parlamentit për mbledhjen e informacionit për çështje të veçanta, me qëllim arritjen në përfundime të caktuara.

Në funksion të përmbushjes me efikasitet të funksionit kushtetutues të pakicës parlamentare për kontroll parlamentar, si dhe në kuadër të respektimit të nenit 77 të Kushtetutës dhe të zbatimit të Rezolutës së datës 24.12.2014 “Për Marrëveshjen midis maxhorancës qeverisëse dhe opozitës në Kuvendin e Shqipërisë”, legjislacioni duhet të ofrojë të gjitha mekanizmat e nevojshëm që nuk lejojnë në asnjë rast bllokimin e hetimit nga shumica parlamentare.

E drejta e hetimit realizohet vetëm brenda funksionit të kontrollit parlamentar dhe detyrave kushtetuese që parlamentarët kryejnë si përfaqësues të popullit, për sqarim, apo hulumtim të hollësishëm të një cështje. Dobishmëria e hetimit parlamentar sigurisht që shihet në nxjerrjen e përgjegjësive institucionale, duke ndihmuar në evidentimin e problemeve dhe mospërsëritjen e fenomeneve me ndikim në mbrojtjen e interesit publik në të ardhmen. Nëse i referohemi praktikës ndërkombëtare, natyra e çështjeve të hetuara nga komisionet hetimore ka qenë e një rëndësie substanciale apo parësore për publikun, me ndikim të veçantë në marrëdhëniet ndërshtetërore, me qëllim nxjerrjen e përgjegjësive institucionale dhe mospërsëritjen e fenomeneve të hetuara në të ardhmen.

Gjykata Kushtetuese në jurisprudencën e saj e cilëson si “kompetencë kushtetuese” të drejtën e pakicës parlamentare për ngritjen e komisionit hetimor parlamentar. Duke e veshur një të katërtën e deputetëve me këtë pushtet, Kushtetuta “… institucionalizon një lloj tjetër autoriteti kushtetues, që njihet si pushtet i pakicës parlamentare”, që realizohet “… në mënyrë të pavarur…” dhe që është “…i pakufizuar nga vullneti i shumicës”. E drejta e kontrollit hetimor i është njohur pakicës parlamentare, e cila, duke i pasur të kufizuara mjetet, “mund ta shndërrojë atë në një instrument të fuqishëm kushtetues”.

Mirëpo, nga analiza e ligjit nr. 8891/2002, rezulton se parashikohen mekanizma të tillë që i mundësojnë një mazhorance parlamentare bllokimin e veprimtarisë së Komisionit Hetimor, apo mosrealizimin e hetimit. Në thelb këto mekanizma përbëjnë premisë për mohimin e të drejtës së pakicës parlamentare për hetim parlamentar. Një nga këto mekanizma është rregulli mbi vlefshmërinë e mbledhjes së Komisionit, apo vlefshmërinë e marrjes së vendimeve. Edhe pse jurisprudenca e Gjyktatës Kushtetuese parashikon se kompetenca kushtetuese e pakicës parlamentare për kontroll parlamentar realizohet në mënyrë të pavarur dhe është e pakufizuar nga vullneti i shumicës, neni 13 i ligjit nr. 8891/2002, parashikon se mbledhjet e komisionit janë të vlefshme kur në to merr pjesë më shumë se gjysma e anëtarëve të tij.

Parashikimi i bërë nga neni 13 nënkupton se pa prezencën e përfaqësuesve të mazhorancës në Komisionin Hetimor (të cilët janë në cdo rast shumicë e Komisionit, për shkak të parashikimit të bërë nga pika 2 e enenit 9 të ligjit nr. 8891/2002), nuk mund të zhvillohet asnjë mbledhje e vlefshme e Komisionit. Praktikisht, nëpërmjet këtij parashikimi ligji e ka lidhur pazgjidhshmërisht veprimtarinë e kontrollit parlamentar të opozitës, me vullnetin e mazhorancës për të marrë pjesë në mbledhjet e Komisionit Hetimor!

Në fakt, asnjë nga grupimet politike në Kuvend, përfshirë grupimet politike të mazhorancës parlamentare, apo asnjë deputet i Kuvendit të Shqipërisë, nuk mund të detyrohet që të marrë pjesë në mbledhjet e Komisioneve Hetimore jashtë vullnetit të tij. Përmbushja e funksionit të kontrollit parlamentar është mbi të gjitha cështje vullneti dhe ushtrimi i saj nuk mund të jetë e detyrueshme. Kjo mundësi parashikohet me të drejtë edhe nga paragrafi 5 i nenit 9 të ligjit nr. 8891/2002, ku sanksionohet se: “5. Anëtarët e komisionit kanë të drejtë të tërhiqen nga komisioni në çdo kohë që ata e çmojnë të arsyeshme……..”. Mirëpo, kjo i hap rrugë një praktike të hasur kohët e fundit, ku përfaqësuesit e mazhorancës parlamentare në Komision, refuzojnë të marrin pjesë në mbledhje apo e braktisin atë, duke pamundësuar zhvillimin e mbledhjeve të vlefshme të Komisionit dhe për pasojë, kalimin e afateve të veprimtarisë së Komisionit, duke mohuar në këtë mënyrë në thelb vetë të drejtën e pakicës parlamentare për kontroll parlamentar.

Me qëllim që realizimi i të drejtës së pakicës parlamentare për ushtrimin e funksionit të kontrollit parlamentar të realizohet në mënyrë të pavarur dhe të pakufizuar nga vullneti i shumicës, propozojmë ndryshimin e rregullave mbi vlefshmërinë e mbledhjes së Komisionit, apo mënyrës së marrjes së vendimeve. Konkretisht, mbledhjet duhet të konsiderohen të vlefshme kur në to marrin pjesë së paku të gjithë anëtarët që i takojnë grupimit politik ku bëjnë pjesë nismëtarët e komisionit. Ky parashikim do të mundësonte realizimin e kontrollit parlamentar, edhe në ato raste kur shumica parlamentare nuk ka vullnet për të marrë pjesë në veprimtarinë e Komisionit Hetimor.

Ky parashikim dikton edhe nevojën e ndryshimit të rregullave mbi vendimmarrjen në Komisionin Hetimor. Konkretisht, vendimet duhet të merren me shumicën e votave të anëtarëve të pranishëm. Në këtë rast, nëse mazhoranca ka vullnetin për të marrë pjesë në veprimtarinë e Komisionit Hetimor, atëherë nuk cenohet parimi i respektimit të vullnetit të shumicës, duke qenë se në cdo rast mazhoranca parlamentare ka shumicën në Komision dhe praktikisht vendimmarrja finale e Komisionit diktohet nga qëndrimi i saj. Mirëpo, kur mazhoranca nuk ka vullnetin për të marrë pjesë në veprimtarinë e Komisionit Hetimor, ky fakt nuk duhet të pengojë veprimtarinë dhe vendimmarrjen e Komisionit, për shkak se në të kundërt cenohet thelbi i konpetencës kushtetuese të pakicës parlamentare për të ushtruar kontroll parlamentar.

Përsa më lart, në përputhje me nenin 77 të Kushtetutës, jurisprudencën e Gjykatës Kushtetuese dhe Rezolutën e datës 24.12.2014 “Për Marrëveshjen midis maxhorancës qeverisëse dhe opozitës në Kuvendin e Shqipërisë”, kërkojmë miratimin e këtyre ndryshimeve në ligjin nr. 8891/2002, për të mundësuar në praktikë ushtrimin e komptencës së pakicës parlamentare për kontroll parlamentar.

DEPUTETI

EDI PALOKA

Njoftim për shtyp i Partise Demokratike, 24 Shkurt 2016

Me Edi Ramën Ujësjellësi i Pogradecit ishte kthyer në strehën e bandës më famëkeqe të qytetit.

Persona me precedentë të tmerrshëm kriminalë, persona që në vend se të ishin në burg, ishin në borderonë e Edi Ramës dhe paguheshin prej vitesh.

Dhe Edi Rama nuk ndalet në shërbimin ndaj tyre.

Tani që kryetari i ri i Bashkisë vendosi ta pastrojë ujësjellësin nga kjo bandë, del Talutant Balla, në krah të Edi Ramës, në një aktivitet partie, dhe i merr në mbrojtje.

Shihni pak kë merr në mbrojtje Edi Rama;

Ilir Berberi: I dënuar për gjobvënie, vjedhje dhe armëmbatje pa leje. Në Pogradec njihet si Lili i Rrushkës. I hetuar edhe për disa ngjarje të rënda kriminale si për vrasjen e shefit të komisariatit në Pogradec Agron Gjyrezi.

Meardi Berberi: I ndjekur disa herë penalisht nga Prokuroria për tentativë vrasje, gjobvënie, plagosje e rëndë me dashje dhe armëmbajtje pa leje. Kreu 1.4 vite burg për gjobvënie. Ky person është në mbikqyrje  të vazhdueshme nga Policia. Kanosi me armë Administratorin e ri të Ujësjellësit.

Bledar Berberi: I ndjekur penalisht nga Prokuroria për akuzën armëmbajtjes pa leje dhe trafikim armësh drejt Greqisë.

Mariglen Topuzi: I përfshirë në disa ngjarje të rënda kriminale me përdorimin e armëve të zjarrit.

Genci Allka: I ndjekur penalisht per tentative vrasje.

Xhuliano Topuzi dhe Aleks Mertkola të ndjekur penalisht nga Policia për trafik droge.

Këta banditë që mbron Edi Rama jo vetëm kishin zaptuar Ujësjellësin, por kanë shkaktuar një dëm prej  300 milionë lekësh për 5 muaj vetëm me pagat, duke përfshirë dhe një rast ekzemplar abuzimi, si blerja me paratë e ujësjellësit të makinës private të drejtorit, në shifrën 74 milionë lekë.

Ja pra standardi i Edi Ramës, ja si sundon ai me krimin, në parlament, në zyrat qendrore dhe në qytetet e vendit.

I punëson ata, u jep pushtet, dhe në fund i mbron edhe nga drejtësia, i mbron edhe kur kryebashkiaku demokrat i largon nga puna.

Deklarata për mediat e deputetit Flamur Noka, 24 Shkurt 2016

Çdo ditë po shohim dëshmi tronditëse të drejtësisë nën urdhërat e Edi Ramës, të drejtësisë që ai dëshiron.

Pak ditë më parë, gjykata nxiorri nga burgu dhe la të lirë administratorin e Edi Ramës për Kaçinarin, Petrit Bardhi, i cili u kap me 420 kilogramë drogë.

Ky është mekanizmi që ka vënë në punë Rama në aleancën e tij me krimin.

Fillimisht i jep krimit pushtet, më pas e mbron edhe nga drejtësia.

E bëri këtë trafikant kryetar komune e më pas administrator, tani i jep dhe imunitet duke e lënë të lirë edhe pse shtëpinë e kishte mbushur me drogë dhe drogën e tregtonte në Greqi.

Gjykata e Edi Ramës lë të lirë trafikantin që kapet me gjysëm tonë drogë, sepse ky gërhet natën. Sepse Edi Rama e do të lirë trafikantin e tij, e do në shërbim, për delegatët e kongresit e për votat e zgjedhjeve që po afrojnë.

Me gjithë kërkesën e përsëritur për drejtësi të pavarur, megjithë mesazhin e sekretarit Kerri i cili vlerësoi dekriminalizimin dhe tha se është model që duhet ndjekur, Edi Rama çdo ditë shkon në drejtim të kundërt.

Për këdo që ka më të voglin iluzion, Rama e ka bërë të qartë zgjedhjen e e tij. Nuk është zgjedhja e tij ligji, drejtësia dhe pastrimi nga krimi.

Zgjedhja e tij janë Ndoka, Cubi, Bardhi, Bushi, Roshi e Armando Prenga.

Deklarata për mediat e kreut të Departamentit të Rendit dhe Sigurisë, Enkelejd Alibeaj, 24 Shkurt 2016

Një grup deputetësh të PD kërkojnë lirimin e protestuesve që mbahen në komisariatin numër 1. 

Një grup deputetësh të Partisë Demokratike, Albana Vokshi, Gent Strazimiri, Alban Zeneli, Bedri Hoxha, Kastriot Islami, Mimoza Hajdarmata ishin në Komisariatin nr.1 në Tiranë, aty ku po mbahen të shoqëruar disa të rinj, pas protestës së të hënës në  Parkun e Liqenit.

Deputetja Mimoza Hajdarmata duke iu drejtuar mediave theksoi se ndalimi i të  rinjve është  një  veprim i paligjshëm, pasi ata kanë  protestuar në  të  drejtën e tyre legjitime për të  mbrojtur Parkun e Liqenit nga betonizimi.

Kjo është  e drejta jonë  për të  protestuar tha ajo, duke shtuar se protestat do të  vazhdojnë.

“Jemi një  grup deputetësh të Partisë Demokratike në mbështetje të qytetarëve pas protestës së  ligjshme tek Parku i Liqenit, të ndaluar mbrëmë. Konstatojmë se këtu janë të ndaluar njerëz të cilët ishin në të drejtën e tyre të ligjshme për të protestuar. Paligjshmëria është  policia, kryetari i Bashkisë, paligjshmëria është  vetë qeveria e cila ka shkelur disa ligje duke ndërtuar pa leje në Parkun Kombëtar. Ky Park është  pronë  publike e këtyre qytetarëve dhe të  gjithë  qytetarëve të  Tiranës dhe të  Shqipërisë”, u shpreh Hajdarmata.

Deputetët e PD kërkuan lirimin e menjëhershëm të protestuesve dhe thanë se: “Do të  jemi në  mbështetje të  tyre sepse protesta ka qenë e ligjshme. Policia ka vepruar në  kundërshtim me ligjin. Këto janë shenja të një pushteti në grahmat e fundit. Këtu po ushtrohet dhunë e përditshme ndaj shoqërisë civile, ndaj bizneseve. Nuk shkohet më kështu me dhunë ndaj grave, me dhunë ndaj protestuesve dhe kjo është mirëfilltazi një neodiktaturë”.

Njoftim për media e Partisë Demokratike, 23 Shkurt 2016

Partia Demokratike, do të kallëzojë penalisht Policinë e Shtetit, INUK, INUV, Inspektoriatin e Mjedisit dhe firmën Grand, të cilët, në shkelje të hapur të ligjit, kanë shperdoruar detyrën dhe kanë mundësuar veprën penale të ndërtimit pa leje e kryer në bashkpunim,  parashikuar nga neni 199/a i Kodit Penal.

Qindra qytetarë shqiptarë që janë arrestuar e burgosur, vetëm se pse lyenin shtëpitë e tyre “pa leje”, ndërronin një tjegull në çatinë e tyre “pa leje”, dergjen burgjeve ose dyerve të gjykatave si të ishin kriminelë.

Nga ana tjetër Policina e Shtetit, INUK, INUV dhe Inspektoriati i Mjedisit, nuk bënë asnjë veprim për të marrë në mbrojtje një pasuri publike siç është Parku i Liqenit dhe për të parandaluar, apo për ti vënë para ligjit, shkelësit, dhunuesit dhe autorët e ketij ndërtimi në kundërshtim me ligjin, që janë Bashkia Tiranë dhe firma Grand.

Protesta e organizuar nga Partia Demokratike ishte një protestë në mbrojtje të ligjit dhe ligjshmërisë së shkelur nga pushteti!

Ishte një protestë kundër paligjshmërisë dhe arbitraritetit flagrant të Edi Ramës dhe lakeut të tij në Bashki.

Policia, INUK dhe INUV, autorë të qindra procedimeve penale “për ndërtim të paligjshëm”, nuk mund të arrestojnë dhe procedojnë qytetarët e Tiranës, për fajin e vetëm, pse mbrojtën ligjet dhe ligjshmërinë e shkelur me të dyja këmbët nga dhunuesit e ligjit.

Deputetët e Partisë Demokratike, gjatë gjithë ditës së sotme kanë qënë të angazhuar në lirimin e qytetarëve që dje ishin në mbrojtje te ligjit.

Ne kërkojmë me forcë ndërprerjen e represionit policor ndaj qytetarëve dhe ndëshkimin sipas ligjit të shkelësve të vërtetë të ligjit që ndodhen në Polici, Inuk, Inuv, dhe Inspektoriatin Mjedisor, të cilët, me veprimet dhe mosveprimet e tyre, garantuan shklejen dhe moszbatimin e ligjit dhe shkatërrimin e pasurisë publike, sipërfaqes së gjelbër në Parkun e Liqenit.

Partia Demokratike i kërkon Prokurorisë, të veprojë me urgjencë dhe energjikisht për të liruar nga arrestimi i paligjshëm qytetarët, që po mbronin ligjin e shkelur, dhe të vërë para përgjegjësisë penale, ligj-shkelësit e vërtetë.

Deklaratë e Sekretarit të Përgjithshëm, Arben Ristani, 23 Shkurt 2016

Grupi i këshilltarëve të Partisë Demokratike në Bashkinë e Tiranës dorëzoi sot propozimin për uljen e taksave bashkiake.

Kjo është një kërkesë e përsëritur e këshilltarëve të PD në Bashkinë e Tiranës.

“Paraqitëm sot kërkesën për të minimizuar taksat në kufirin që e lejon ligjin, pra 30% më pak se nga ishin parashikuar dhe për më  tepër, uljen e një numri tarifash dhe heqjen e taksës për arsimin, sepse në  gjykimin tonë si atëherë dhe sot vijon të jetë një taksë antikushtetuese. Sot, duke patur parasysh dhe ndjeshmërinë që ka shkaktuar tek biznesi, buxheti dhe paketa e re fiskale, të cilat tashmë  pothuajse detyrojnë 25 mijë biznese të Tiranës të  mbyllen, ne ripërsëritëm kërkesën tonë e cila nuk u mor në  shqyrtim herën e parë dhe shpresojmë shumë që të merret në shqyrtim sot ose në mbledhjen më  të  afërt të Këshillit Bashkiak”, u shpreh kreu i Këshilltarëve të PD në Bashki.

Olli u ndal dhe në rëndësinë e heqjes së tarifave të reja që ka vendosur Erion Veliaj.

“Nga ana tjetër, duke patur parasysh tarifat e çmendura, të cilat janë autoritet i bashkisë së Tiranës që i kanë  gjunjëzuar komplet bizneset, ne kemi kërkuar rikthimin e tyre në nivelet e mëparshme dhe heqjen e tarifës së  liçensimit e cila sërish është një tarifë abuzive. Janë të gjitha kërkesa që besoj duhet të  gjejnë mbështetjen e të  gjithë këshilltarëve në këshillin bashkiak, pavarësisht ngjyrimit politik”, tha Olli.

Prononcimi për mediat i kreut të këshilltarëve të djathtë, Leonard Olli, 23 Shkurt 2016

Sekretari për Aksionin Qytetar depozitoi sot në prokurori fakte të reja për paligjshmërinë e ndërtimit që po bën Erion Veliaj brenda parkut të Liqenit.

“Siç jeni njohur, i vendosur me shpalluat pas murit për aferën klienteliste dhe korruptive të shkatërrimit të Parkut të Liqenit, Erion Veliaj me nëpunësit e vet kanë deklaruar se kanë marrë një leje ndërtimi nga Këshilli Kombëtar i Territorit në datën 12.02.2016. Të ndodhur përpara këtyre fakteve por edhe fakteve të reja skandaloze të këtij abuzimi me pushtetin, të shpërdorimit të detyrës dhe ndërtimit të paligjshëm, sot dorëzuam përsëri plotësim me fakte të reja të kallëzimit penal për Erion Veliajn dhe nëpunësit e tij në Bashki”, tha Salianji.

I kallëzuari Erion Veliaj apo edhe Arbër Mazniku deklaruan në datën 14 shkurt, dy ditë pasi pretendojnë se kanë marrë lejen e ndërtimit, në një emision televiziv, që leja e ndërtimit është në proces, çka tregon se nuk ka pasur leje ndërtimi.

“Kemi dyshime të arsyeshme që ashtu siç falsifikoi firmën e punonjësit bashkiak për gjobën, të njëjtën falsifikim ka bërë edhe me lejen e ndërtimit në këtë rast”, tha Salianji.

Sekretari për Aksionin Qytetar shtoi se: “Nuk ka pasur në asnjë rast njoftim zyrtar publik, as nga kryeministria, ministritë, apo Bashkia për këtë mbledhje të datës 12, ç’ka tregon se nuk ka pasur mbledhje por kemi të bëjmë me falsifikim”.

Faktet dhe rrethanat e tjera që Salianji dorëzoi sot në Prokurori janë:

Vendimi i kallëzuar nuk ka të cituar nëse është miratuar me procedura të thjeshtuara, fakt ky që lë hapësira abuzivizmi, bazuar në ligjin 107/2014 “ Për planifikimin dhe zhvillimin e territorit ”, akteve nënligjore në zbatim të tij.

Në bazën ligjore të këtij vendimi nuk ka të përmendur, “Planin e Përgjithshëm Vendor të Qytetit të Tiranës”. Nuk e ka përmendur vetëm për një arsye sepse ky plan e ndalon në mënyrë kategorike ndërtimin dhe ndërhyrjen në këtë zonë të mbrojtur të qytetit.

Vendimi objekt kallëzimi citon që ky vendim shqyrtohet me propozim të Bashkisë Tiranë. Në praktikën ligjore dhe përshkrimin e punës së AKPT projektvendimet për miratim pranë  KKT pregatiten nga AKPT(Agjencia Kombëtare e Planifikimit të Territorit)  me opinionin përkatës, dhe jo nga Bashkia e Tiranës siç pretendojnë të kallëzuarit.

Vendimi edhe pse ka shumë mangësi formale vazhdon të jetë abuziv edhe në përmbajtje.

Leja rezulton të jetë dhënë me kushte. Asnjë kusht nuk është zbatuar dhe nuk ka se si të jetë dhënë leje. Nuk ka hartën e Planvendosjes së strukturave që ti bashkelidhet vendimit. Kjo hartë tregon se në liqen do të ndërhyet edhe për ndërtime të tjera, ndërtime betoni dhe pallate, përveç ndërhyrjes që tentojnë të bëjnë në mënyrë të paligjshme për atë të ashtëquajtur park apo Grand kafe.

Dokumenti i Lejes së Ndërtimit i jepet subjektit kërkues vetëm pas:

a˗ Plotësimit të dokumentacionit tekniko˗ligjor.

b˗Marrjes se Komformitetit nga Ministria e Mjedisit dhe Agjencia Kombëtare e Planifikimit të Territorit.

c˗Pagesës së taksës së ndikimit në infrastrukturë. Asnjë nga këto nuk ka ndodhur ç’ka e bën lejen të paligjshme dhe vendimin e kryebashkiakut një shpërdorim detyre dhe abuzim, e bën kryebashkiakun për të lënë zyrën e bashkisë e për të shkuar në qelitë e paraburgimit.

Në faqen zyrtare të bashkisë dhe në Agjensinë e Prokurorimit Publik edhe sot e kësaj dite është tenderi për supervizionin i cili mbyllet në datën 26 shkurt. Ligji e parashikon qartë se nuk mund të ketë asnjë fillim të punëve publike pa pasur më parë supervizionin.

“Të gjitha këto afera dhe fakte që paraqesim sot para jush i dorëzuam në prokurorinë e rrethit dhe shpresojmë dhe jemi të bindur që Prokuroria do të marrë masa e do të merret sa më shpejt me kallëzimin penal nga ana jonë”, tha Salianji.

Prononcimi për mediat i Sekretarit për Aksionin Qytetar, Ervin Salianji, 23 Shkurt 2016