Blog

Partia Demokratike ka përkujtuar sot 25 vjetorin e grevës së studenteve e cila i parapriu rrëzimit të shtatores së diktatorit.  Pedagogë dhe studente kanë rrëfyer momentet e grevës së urise, arsyet që i shtynë për t’u futur në grevë, terrorin  që regjimi ka ushtruar ndaj tyre, guximin dhe vendosmërinë për t’i shkuar deri në fund kauzës së tyre të drejtë për liri dhe demokraci për Shqiperinë si gjithë Europa.  Kryetari i Partisë Demokratike, Lulzim Basha tha se studentet grevistë janë shembulli më i mirë se si me zjarrin e idealit të lirisë sakrifikuan gjithçka dhe bënë të mundur përmes sakrificës dhe guximit të tyre mposhtjen e diktaturës më të egër në Europë.

“Partia Demokratike sot në opozitë, në kushtet e një injorimi të dhimbshëm dhe do të thoja në kufinjtë e kriminales që qeveria e sotme i bën përvjetorit të 25-të të grevës së urisë së studentëve dhe shembjes së diktaturës me shembjen e shtatores së diktatorit Hoxha në qendër të Tiranës, nuk do  ti kalojë në heshtje, duke nisur që sot e me aktivitetet që vazhdojnë me 19 dhe 20 Shkurt.

Dua ta nis me një mirënjohje të thellë për të gjithë ata studentë që u futën në grevën e urisë e që sot përcjellin tek rinia atë që për mua është vlera më e madhe e grevës së urisë;shembullin e të rinjve të cilët me zjarrin e idealit të lirisë sakrifikuan gjithçka dhe bënë të mundur përmes sakrificës dhe guximit të tyre mposhtjen e diktaturës më të egër në Europë.

Në procesin e kontaktimit të protagonistëve, një pjesë e madhe e të cilëve nuk ndodhen në Shqipëri, bashkëpunëtorët më informuan emocione prevaluese. Prekje deri në ngashërim e derdhje lotësh për evokimin që është bërë, për thirrjen në skenën e opinionit publik të këtyre heronjve gjigandë që në fakt pasi kryen detyrën e tyre karshi lirisë, demokracisë e kombit vazhduan me jetët e tyre normale. Në fakt prekja është dhe duhet të jetë e jona. Mirënjohja është dhe duhet të jetë përjetësisht e jona për veprën e tyre të jashtëzakonshme për Shqipërinë dhe shqiptarët. Le ta kuptojmë pra sa të mundemi e sa më mirë. Uroj që ky panel të bëjë një përpjekje për tu relatuar ju të rinjve domethënien e vërtetë të grevës së urisë dhe vlerën e madhe të guximit që sot përsëri pas 25 vitesh koha dhe sfidat e Shqipërisë europiane siç e duam ne po e thërrasin përsëri në skenë e unë jam i sigurtë që rinia shqiptare përsëri nuk do të zhgënjejë por do të ngrihet për lirinë dhe demokracinë”, tha Basha.

Ish kryetari i Partisë Demokratike, Sali Berisha ka rrëfyer përjetimin e tij për grevën e studentët dhe si nisi greva e pas rrëzimin e shtatores së diktatorit.

“Dua të përulem me nderimin më të madh para atyre 720 studentëve që me 18 shkurt vendosën të vetflijohen për një kauz shumë të madhe dhe u lartësuan në trimërinë dhe guximin e heronjve të vërtetë. Greva e studentëve, ka historikun e vet, pa mëdyshje me një diversitet tregimesh që është normale, por cilat janë momentet. De-Enverizimi ishte problemi më madhor i Partisë Demokratike. Pa de-Enverizimin, Partia Demokratike ishte një fasadë-opozitë. Ju them ju një gjë, që mund t’ju duket çudi sot. Në shkurtin e viti ’91, i gjithëfuqishëm  dhe i gjithëkugjetshëm i këtij vendi ishte Enver Hoxha, nga qendra e Tiranës  në çdo skaj të territorit, por fatkeqësisht edhe në mentalitetin e shqiptarëve.  Në këtë kontekst, gumëzhinte sigurisht mjedisi universitar dhe intelektual për këtë problem, por nisma nuk kishte. Dhe nga mesi i muajit janar unë i them Azem Hajdarit se, ne po nuk ndërmorëm de-Enverizimin ne nuk kemi të ardhme si opozitë dhe çdo ditë dhe më shumë ne dukemi para botës dhe shqiptarëve si një fasadë -opozitë, pasi çdo mëngjes dhe çdo darkë që ne kalojmë përbri shtatores së diktatorit, ai tallet me ne. Siç ishte ai, u ngrit në këmbë  më përqafoi dhe më tha se: “unë për tre ditë të heq Dullën”. i them jo prit, në asnjë mënyrë  pasi ata e vendosin përsëri dhe e vendosin dhe me vaj pastaj.  Ky ishte aksioni më i vështirë”, tha Berisha.

720 studentë të regjistruar por dëshmitë e tyre flasin për një numër edhe më të madh studentësh grevistë të ardhur nga rrethe të ndryshme të vendit duke sfiduar frikën dhe terrorin.

“Të ishe nga Kavaja dhe student nënkuptoje në mënyrë të menjëhershme pjesëmarrjen në grevën e urisë. Qyteti i Kavajës ishte ndër qytetet e para që theu frikën kundër atij regjimi diktatorial dhe me thënë të drejtën edhe në Qytet Studenti frika ishte thyer që më përpara, që një natë dhjetori kur ky burri pranë meje ( Sali Berisha) erdhi tek godina nr 4 dhe me thënë të drejtën që aty u kuptua qartë që ishte diçka që nuk do kishte kthim prapa. Regjimi kishte marrë të tatëpjetën dhe ne duhet ti bënim ceremoninë siç e meritonte. Edhe njëherë dua ti rikthem antikomunizmit të qytetit nga unë vij, Kavaja, sepse në këto 25 vite kanë ndodhur edhe gjëra të pakëndshme dhe unë i ftoj bashkëqytetarët e mi ti rikthen atij antikomunizmi dhe atyre virtyteve të cilët ata besuan 25 vite më pare”, tha Parid Teferiçi.

“Kam qënë 18 vjeç ditën që jam futur në grevën e urisë. Do të doja në radhe të parë të bëja një homazh për të gjitha femrat që morën pjesë në grevë për arsye se nuk ishin të shumta në numër. Homazhin e dytë doja ta bëja për ata 18 vjeçarë që u larguan pa leje nga shtëpitë për t’ju bashkuar grevës. Dhe mesazhi im i tretë. Është e vërtetë që ajo ishte grevë e studentëve por ajo grevë nuk do të kishte kuptim pa krijimin e Partisë Demokratike 2 muaj më parë. Ashtu siç nuk ka kuptim sot çfarëdo lloj greve apo proteste që në bëjmë nëse në dallë të saj nuk do të jetë Partia Demokratike”, tha Edith Harxhi.

Sot 25 vjet më pas, studentët grevistë kanë një mesazh për të gjithe ish studentët dhe studentet e sotëm, se janë gati të futen sërish në grevën e urisë për të ndalur të keqen që ka mbërthyer vendin.

“Unë u bëj thirrje të gjithë prap se nuk jemi të vjetër. Unë jam 48 vjeç. Jam gati të futem prap në grevë sepse shkurti sivjet është i errët dhe i zymtë sa shkurti i 1991. Shkurti i 1991 çoi të gjithë Tiranën e gjithë Shqipërinë në këmbë dhe ngjalli shpresë. Shkurti këtë vit është më keq se shkurti i 1991. Kemi më shumë bukë, banesa më të mira, kemi kushte më të mira por nuk ka pasur shkurt më të keq. Dhe shkurt po them që tua shkurtojmë këtyre”, tha Ajet Ramçaj.

“Nuk është kosto e madhe që të veprosh që të reagosh dhe që të kërkosh ndryshimin thjeshtë bëhet, siç e kanë bërë studentët”, tha Mark Marku.

Por  studentët grevistë të Kavajës dhe Shkodrës hapën dhe sfidën se cilat ishin qytetet më antikomuniste. Askusht prej tyre nuk dëshironte të mos i përgjigjej kësaj sfide të heshtur edhe në kushtet kur sot simbolet e diktaturës po rikthehen frikshëm mes nesh.

“Unë jam nga Berati dhe pavaresisht se Berati tregohej si zona e vullnetarëve të Enverit në fakt ishin të shumtëë  studentët që ikën pa leje nga shtëpia, duke thënë se kishin provim për t’u futur në grevën e urisë. Sepse Berati i prin qytetarisë dhe kërkon dhe mbështetet fuqishëm në vlerat e lirisë dhe demokracisë”, tha Dritan Haznedari.

“Vlora nuk është më pak antikomuniste se Kavaja dhe këtë e treguar dhe do ta tregojmë gjithmonë”, tha Ermal Arapi një ish student nga Vlora, pjesëmarrës në grevën e urisë 25 vite më parë.

Njoftim për shtyp i Partisë Demokratike, 17 Shkurt 2017

Partia Demokratike kallëzoi sot penalisht kryetarin e Bashkisë së Tiranës, për ndërtimin e paligjshëm brenda Parkut të Liqenit të Tiranës.

Me objekt; shpërdorim detyre dhe ndërtim të paligjshëm, sot Sekretari për Aksionin Qytetar në PD, Salianji, depozit​oi në prokurori kallëzimin penal ndaj Veliajt.

“Sapo dorëzuam në Prokurori një kallëzim penal për kryebashkiakun e Tiranës, Erion Veliaj për shpërdorim detyre, për ndërtim të paligjshëm dhe për shkatërrim të pronës publike. Siç jeni në dijeni, dje qytetarët e Tiranës në dy aksione të ndryshme e kanë shkatërruar dhe e kanë hedhur poshtë ndërtimin e paligjshëm që kërkon të bëjë kryetari i Bashkisë së Tiranës Veliaj në një zonë të mbrojtur, në një zonë e cila është kategorikisht e mbrojtur me ligj nga ndërhyrjet, siç është Parku i liqenit të Tiranës. Siç e dini, ndërhyrja aty bëhet për interesa të pastra korruptive dhe klienteliste të kryebashkiakut të Tiranës i cili me pretekstin që kërkon të ndërtojë park lojërash për fëmijët do bëjë edhe një lokal për klientët e vet e më pas do ti ndryshojë destinacionin parkut të Tiranës që të ketë mundësi të ndërtojë ashtu siç ka miratuar edhe planin për hyrjen e parkut që të ndërtojë në të pallate shumëkatëshe. Partia Demokratike dhe qytetarët e Tiranës, ashtu siç nuk e lejuan dje ndërtimin e paligjshëm të kryetarit të bashkisë Veliaj”.

Salianji paralajmëroi aksion t​ë fuqishëm qytetar, nëse Veliaj nuk heq dorë nga ky ndërtim i paligjshëm.

“Do ta ndalojnë përsëri sa herë të ketë shkelje ligji dhe në rast se insiston për ta prishur të vetmin park që i ka mbetur qytetit të Tiranës atëhere qytetarët do ta nxjerrin nga zyra e kryetarit të bashkisë së Tiranës”, tha Salianji.

Prononcim për mediat i Sekretarit për Aksionin Qytetar, Ervin Salianji, 17 Shkurt 2016

Deputetja Deda dhe banorët e fshatrave sjellin shqetësimin për mungesën e rrugëve dhe të investimeve prej 3 vitesh.

Bashkia e Mirditës vuan mungesën e rrugëve që lidhin fshatrat me qendrën. Qeveria dhe pushteti lokal nuk kanë investuar asnjë fond në rrugët dytësore apo urat që lidhin Rrëshenin me Repsin, Fanin, Rrubikun, Kacinarin, Oroshin dhe shumë zona e fshatra të tjera. Deputetja e zonës Albina Deda së bashku me banorët kanë protestuar për braktisjen e qeverisë, e cila në 2013 premtoi investime dhe ndërhyrje në infrastrukturë.

“Mirdita është e izoluar, gjendja  në terren tregon qartë se kjo qeveri ka mashtruar mirditorët dhe të gjithë shqiptarët. Ajo nuk ka mbajtur asjnë premtim, i ka braktisur këta banorë në hallet dhe mjerimin e tyre. Premtuan do asfaltojnë rrugët që lidhin njësitë administrative me qendrën, por këtu nuk është hedhur asnjë lopatë dhe askush nga Drejtoria e Rrugëve nuk  inspekton gjendjen e rëndë”, tha Deda.

Qeveria e mëparshme investoi në Mirditë në Rrugën e kombit, investim strategjik që përshkon Mirditën në gjithë gjatesinë e saj, Fan-Rrubik- Rrëshen-Rreps.

Vetë banorët thanë se ecin me orë të tëra nga fshatrat për në Rrëshen, duke rrezikuar dhe jetën nga reshjet, pasi automjetet nuk i përballojnë dot rrugët e rrënuara.

Ndërkohë, deputetja Albina Deda solli në vëmendje dhe largimin nga puna të afro 70 punonjësve të mirëmbajtjes së rrugëve për shkak të punësimit të militantëve të majtë. Drejtuesit e Bashkisë  në këtë sektor, tha Deda, përfaqësojnë interesat kriminale dhe jo ato të komunitetit të Mirditës.

Njoftim për shtyp i Partisë Demokratike, 17 Shkurt 2016

Partia Demokratike, përfaqësuesit e saj në Këshillin Bashkiak dhe qytetarët e Tiranës protestuan sot në zonën e Parkut të Liqenit ku Erion Veliaj ka vendosur të ndërtojë.

Qytetarët dhe përfaqësues të Partisë Demokratike duke e kundërshtuar këtë ndërtim si të paligjshëm dhe korruptiv, shkulën rrethimin e jashtëm të kantierit të Veliajt.

Po ashtu, protestuesit mbollën dhjetra fidane pemë për të zëvendësuar masakrën që ka bërë Erion Veliaj duke prerë pemët.

I pranishëm në protestë, këshilltari demokrat në Bashki, njëherësh kreu i Departamentit të Planifikimit dhe Zhvillimit Urban në PD, Besnik Aliaj u shpreh se: “Jemi në kushtet e një terri informativ dhe jo vetëm për qytetarët por edhe për vendimarrësit. Anëtarët e Këshillit Bashkiak nuk janë informuar për çka po ndodh këtu. Duhet të dimë se edhe në rast përjashtimor të prerjes së pemëve, kjo bëhet me ligj dhe në këto raste, ekspertë të caktuar duhet të bëjnë vlerësimet dhe duhet të hedhin firma që nesër verifikohen deri në Prokurori. Ministri i Mjedisit në varësi të territorit duhet të marrë në dorë kompetencën. Të mos harrojmë që kjo është pjesë e kurorës së gjelbër të Tiranës. Ka një vendim qeverie, ka një përcaktim dhe një shpallje të kësaj kurore dhe askush nuk mund ta shkelë. Në këtë terr informacioni nuk është anashkaluar vetëm opozita apo qytetarët por edhe prefekti që është garanti. Po ju them që prerja e pemëve ndalohet me ligj. Të presësh një pemë është ekzekutimi i një jete të gjallë. Kjo gjë është denocuar edhe nga shoqëria civile e cila sot ka bërë një akt dhe prishi gardhin e më pas ka bërë edhe denoncimin”.

“Qendra multifuksionale e premtuar nga qeni sulmues i Ramës në bashki është në vetvete qendër multifuksionale grabitjeje e hapësirës publike dhe mushkërisë së gjelbër. Atë që z.Rama nuk guxoi vetë ta bëjë si kryetar bashkie tashmë po e realizion me z.Veliaj, dhe për fat të keq të dy bashkë vijojnë të jenë pjesë integrale e mafies së betonit. Janë premruar edhe 10 ndërhyrje të tjera të cilat janë në kundërshtim flagrant me ligjin por edhe me statusin e veçantë që gëzon ky park, e vetmja mushkëri e gjelbër që ka Tirana për momentin. Janë shkelur e hedhur poshtë me një të hedhur të lapsit vendime të Këshillit Bashkiak, ligji për ndërtimet në territorin e Republikës së Shqipërisë. Ne do të vijojmë betejën tonë politike dhe ligjore në mënyrë që ky ndërtim i paligjshëm dhe skandaloz, i paprecedentë dhe i urdhëruar nga ortakët e 20 përqindëshit të para ca viteve në Bashkinë e Tiranës, të mos kalojë”, tha kreu I këshilltarëve demokratë në Bashki, Olli.

Kreu i Departamentit të Mjedisit në PD, Jamarbër Malltezi tha se: “Prerja e pemëve është një akt tmerrësisht i rëndë, një vepër penale e dënueshme nga neni 205 i Kodit Penal. Gjithashtu, është në dhunim të planit rregullues të Tiranës me nenin 42 të rregulloreve. Për fat të keq në këtë vend nuk po shihet më ligji por vetëm maliqi. Për fat të keq, këtu po dhunohen çdo ditë zonat e gjelbërta të Tiranës. Në programin për mjedisin të Partisë Demokratike ndalohet kafshimi i mushkërive të Bashkisë së Tiranës. Referendum, qoftë edhe për parkun për të mos lejuar më banditët e betonit të ndërtojnë brenda parkut të liqenit. Këto ne nuk i falim më”.

Njoftim per shtyp i Partise demokratike, 16 Shkurt 2016

Edi Rama vazhdon të mbrojë nga drejtësia deputetët e tij Kokëdhima, Suli dhe Leskaj, vazhdon të mbrojë korrupsionin e tyre.

Nga njëra anë, ai urdhëron parlamentin të mos shqyrtojë kërkesën e opozitës për mbarimin e mandateve, nga ana tjetër Edi Rama nuk i hap rrugën drejtësisë për këta deputetë, që haptazi në kundërshtim me Kushtetutën kanë përfituar para publike dhe kontrata me qeverinë.

Abuzimet e deputetëve, 150 transfertat financiare të Kokëdhimës për biznesin e tij, dhjetra milionë lekë në muaj që merr Rakip Suli nga paratë e OSHEE me godinën e tij – para gjaku të shqiptarëve të mbledhura me kërbaç, hekurudha Fier- Vlorë që mori Leskaj, janë raste tipike të kapjes së shtetit, janë shembuj të oligarkisë në veprim.

Edhe pse lufta kundër korrupsionit dhe reformimi i drejtësisë janë prioritete kyçe, të theksuara edhe nga Sekretari Kerri me 14 shkurt, Edi Rama sërish vazhdon në drejtim të kundërt, duke i bërë presion Gjykatës Kushtetuese të mos zbardhë vendimin  për Kokëdhimën, duke penguar Kuvendin të shkarkojë 3 deputetët e tij të kapur në flagrancë, duke mbrojtur aferat e tyre me paratë dhe pasuritë e shqiptarëve.

Ky është prioriteti i Edi Ramës dhe jo drejtësia dhe lufta ndaj korrupsionit.

Ky është modeli që ka ai për drejtësinë. Ta ketë nën kontroll, ta urdhërojë. Drejtësi që nuk ndëshkon njerëzit e tij, drejtësi që nuk lufton korrupsionin e njerëzve të tij.

​Deklarata për mediat e nënkryetarit te Partisë Demokratike, Edi Paloka, 16 Shkurt 2016

Mimi Kodheli pati rastin të takohej me Sekretarin amerikan të Shtetit, Kerry, i cili theksoi si sukses ligjin e dekriminalizimit.

Dy ditë më pas, ministrja e Edi Ramës shfaqet me Arben Ndokën, që është objekt i dekriminalizimit, një nga arsyet pse kjo nisëm e opozitës me mbështetjen e partnerëve ndërkombëtarë, u bë ligj.

Ja ku është fotoja e ministres së mbrojtjes me ish-deputetin, që dekriminalizimi e largoi nga parlamenti, por jo nga Edi Rama i cili i ka besuar qeverisjen e Lezhës të dënuarit për prostitucion dhe rrëmbim personi.

Jo vetëm kaq, por PS-ja e Lezhës tha dje se Ndoka është krenaria e saj.

Dy ditë pas vizitës së Kerrit, Edi Rama vazhdon të sfidojë mesazhin e tij, kërkesën e Shteteve të Bashkuara të amerikës, të miqve ndërkombëtarë dhe kërkesën e qytetarëve të vendit për pastrimin e politikës nga krimi.

Dy ditë më parë, Ndoka prezantoi prefektin e Lezhës. Dje ai u shfaq me Ministren e Mbrojtjes.

Pra është e qartë. Edi Rama ka zgjedhur Arben Ndokën, dhe jo sekretarin Kerri.

Ka zgjedhur krimin, dhe jo partnerët ndërkombëtarë.

Ka zgjedhur trafikantët, banditët, dhe jo qytetarët.

Deklarata për mediat e kreut të Departamentit të Rendit dhe Sigurisë, Enkelejd Alibeaj, 16 Shkurt 2016

Deputetja Elmazi sheh nga afër gjendjen dhe dëgjon akesat e pacientëve

Deputetja Liliana Elmazi ishte në spitalet e Sarandës dhe të Delvinës ku pa nga afër gjendjen e mjerueshme të sistemit shëndetësor, dhe dëgjoi ankesat e kërkesat e qytetarëve.

Pacientët, të afërmit e tyre, dhe mjekët i shprehën zonjës Elmazi, shqetësimin e mungesës së ilaceve, paisjeve  të amortizuara dhe kushteve skandaloze të spitaleve.

“Ne më shumë marrim sëmundje sesa arrijmë të kurohemi”, u shpreh një pensioniste e cila i bëri të ditur deputetes se ushqimet, ilaçet dhe carcafët i blejnë me paratë e tyre.

Deputetja Elmazi tha se është absurde dhe antihumane që ministri i shëndetësisë Beqaj fut në xhepat e tij, kryeministrit dhe klientelës së qeverisë, 330 milion euro nga koncesionet dhe nuk investon as edhe një lek në spitale.

“Ju e shihni vetë që në Maternitet atje ku lind jeta çdo gjë është në degradim. Në spitale lagështira është mbytëse, nuk ka dyer e dritare dhe kushtet janë skandaloze. Pra sistemi nga Tropoja në Sarandë ka degraduar nga rilindasit Rama –Beqaj”, tha deputetja  Elmazi  e cila i bëri thirrje kryeministrit që si deputet i Vlorës të inspektojë nga pranë spitalet e Jugut.

Ndërkohë që nga koncesionet në shëndetësi fitimet e pushtetarëve janë marramendëse, shumica e banorëve të Jugut kryejnë trajtimet dhe lindjet në spitalin e Janinës duke u thelluar edhe më shumë në borxhe e halle, për të përballuar sëmundjet dhe problemet shëndetësore.

Njoftim për shtyp i Partisë Demokratike, 16 Shkurt 2016

Departamenti amerikan i shtetit e cilësoi të papranueshme që Arben Ndoka, i dënuar në Itali për trafik prostitucioni dhe rrëmbim personi, të ishte pjesë e parlamentit.

Sekretari Kerry, pasi e vlerësoi dje në Tiranë procesin e dekriminalizimit, e veçoi atë si sukses dhe model që duhet ndjekur.

E megjithatë, ja ku është i zgjedhuri i Edi Ramës, i besuari i tij në Lezhë, duke prezantuar Prefektin e Qarkut.

Ja ku është i dënuari që, pas denoncimeve të opozitës, pas qëndrimeve të partnerëve ndërkombëtarë, dhe pasi ligji i dekriminalizimit e nxorri jashtë parlamentit, sot, me bekimin e Edi Ramës, qeveris Lezhën, bën emërime, shkarkime, tenderime. Vendos për çdo gjë.

Edi Rama sfidon hapur dekriminalizimin, sfidon hapur mesazhin e z.John Kerry.

Ai vazhdon t’u japë pushtet personave të inkriminuar, vazhdon ti mbajë ata afër, dhe po i përgadit ata për zgjedhjet që po vijnë për të deformuar votën e lirë.

Si ta kuptojmë qytetarët këtë shpërfillje të Edi Ramës ndaj mesazhit të Kerrit?

Si duhet ta shohë publiku inkriminimin deri në palcë që Edi Rama tashmë po i bën edhe Partisë Socialiste.

Ende pa u mbushur 24 orë nga mesazhi i sekretarit Kerry për dekriminalizimin, Edi Rama po konfirmohet si promotor dhe protektor i krimit në politikë.

Deklarata për mediat e Sekretarit të Përgjithshëm, Arben Ristani, 15 Shkurt 2016

Edhe pse lufta kundër korrupsionit dhe reforma në drejtësi janë prioritete kryesore për vendin, siç u theksua edhe dje nga Sekretari amerikan i Shtetit, Edi Rama po vazhdon në drejtimin e kundërt duke i bërë presion gjykatës, e duke mbrojtur korrupsionin e njerëzve të tij.

Me ndërhyrjet e tij, Edi Rama vonon zbardhjen e vendimit të Gjykatës Kushtetuese për Koço Kokëdhimën, duke penguar kështu drejtësinë, e duke dalë në krah të korrupsionit.

Edi Rama po përdor çdo mjet për të vonuar drejtësinë për njeriun e tij Kokëdhima, i kapur me 150 shkelje të Kushtetutës, me 150 pagesa të paligjshme financiare të parave publike për biznesin e tij.

Ja pra se si e mendon drejtësinë Edi Rama, ja çfarë drejtësie kërkon ai. Kjo është dëshmia e mbrojtjes që ai i jep vjedhjes e abuzimit kur këtë e bëjnë njerëzit e tij.

Fillimisht Edi Rama urdhëroi parlamentin të mos merrte në shqyrtim kërkesën e Partisë Demokratike për heqjen e mandatit të Koço Kokëdhimës.

Ndonëse Gjykata Kushtetuese e shpalli anti-kushtetues këtë vendim të parlamentit, që në nëntor të vitit të kaluar, përmes presionit të Edi Ramës po vonohet zbardhja e tij.

Rasti Kokëdhima është shembulli i korrupsionit me fondet publike të njeriut pranë kryeministrit, është shembulli i kapjes së shtetit, shembulli i oligarkut qeveritar që qëndron mbi ligjin.

Qytetarët, partnerët tanë ndërkombëtarë dhe opozita, kërkojnë pikërisht që drejtësia të arrijë këto standarde, që të ndëshkojë raste të tilla, që njerëzit pranë kryeministrit të mos jenë të pandëshkueshëm, të mos jenë të mbrojtur kur marrin 150 pagesa nga paratë publike në shkelje të Kushtetutës.

Ky është rasti që në frymën e prioriteteve që ka vendi për luftën ndaj korrupsionit dhe reformimit të drejtësisë, në frymën e mesazhit të theksuar dje nga Sekretari Kerri, Gjykata Kushtetuese të tregojë pavarësi nga kryeministri e të hapë rrugën e drejtësisë.

Deklarata për mediat e deputetit Eduard Halimi, 15 Shkurt 2016