Blog

Ulja e taksave, punësimi dhe zhvillimi, prioritetet në fushën e financave, dhe çështjeve sociale. Prezantohen platformat për sigurinë kombëtare dhe kulturën.

Partia Demokratike ka vijuar me konsultimin dhe debatimin e programit të saj në të gjithë sektorët, me ekspertë e njohës të spikatur të fushave. Në krye të prioriteteve të platformave të PD janë zhvillimi, punësimi, përmirësimi i jetës, ulja e taksave dhe thjeshtimi i procedurave. Po ashtu, janë prezantuar edhe platformat në fushën e sigurisë kombëtare dhe kulturës.

Departamentet e Sigurisë Kombëtare, Financave Publike, Punësimit dhe Çështjet Sociale, Kulturës, Rinisë dhe Sporteve kanë zhvilluar diskutimet dhe konsultimet me anëtarët e departamenteve, deputetët  dhe ekspertët e fushës. Më pas do të vijohet me procesin e tryezave publike mbi programin e PD.

Departamenti i Financave Publike, gjatë prezantimit të programit u përqendrua në uljen e taksave me qëllim përmirësimin e klimës së biznesit dhe luftën kundër korrupsionit dhe informalitetit në Tatim-Dogana. Vendosja e taksës së sheshtë në nivelin 9% mbi të ardhurat dhe kontributet, ulja e normës së TVSH në nivelin 15%, eleminim i taksave të fshehta apo tarifave administrative paralele siç jane taksat mbi karburantet dhe ambientin dhe lehtësim të procedurave, parashikon platforma fiskale e demokratëve.

Një prej drejtimeve kryesore të programit është reforma për zhvillimin e biznesit përmes politikave të reja të kreditimit të ekonomisë dhe transaprencës online të procedurave tatimore, doganore, etj.

Departamenti i Punësimit dhe Çështjet Sociale u fokusua tek programi i punësimit dhe përmirësimit të cilësisë së jetës, nëpërmjet rritjes së pagës minimale dhe rritjen e masës së ndihmës ekonomike për shtresat në nevojë. Orientimet e programit të PD për këta sektorë mbështeten dhe në korrigjimin e skemës së kontributeve, duke eliminuar rritjen abuzive të kontributeve për profesionistët e lirë, ngritjen e skemave eficente për shërbimet sociale për pensionistët dhe personat me aftësi të kufizuar.

Departamenti i Kulturës, Rinisë dhe Sporteve disktuoi programin me ekspertë dhe artistë të njohur, duke u përqendruar në fuqizimin e institucioneve të artit dhe kulturës, rivitalizimin e monumenteve të trashëgimisë, ngritja e strukturave përgjegjëse për të drejtën e autorit, programet për rininë dhe hartimin e një strategjie me standarde evropiane për fuqizimin e saj, si dhe promovimin e sportit në të gjitha zhanret.

Platforma e sigurisë kombëtare, synon ti rikthejë Forcave të Armatosura statusin dhe misionin e tyre, sipas standardeve të Aleancës së Atlantikut, reformave të lëna pas dore dhe të kapura nga interesat klanore gjatë këtyre viteve të qeverisë së majtë.

Njoftim për shtyp i Partisë Demokratike, 7 Shkurt 2016

Edi Rama po shton dozat e propagandës me regji qendrore, me anëtarësime të paracaktuara, me fjalime të gatshme e të sforcuara, ndërkohë që prej dy ditësh, ka një denoncim publik se brenda partisë së tij, deputeti socialist Eduart Ndocaj është kërcënuar me jetë nga njerëzit që Edi Rama u ka besuar degën e Partisë Socialiste të Lezhës.

Deputeti i Ramës ka denoncuar publikisht se kërcënimi me jetë i ka ardhur nga kordinatori i Edi Ramës për Partinë Socialiste të Lezhës, Arben Ndoka, i cili, pavarësisht se beteja jonë për dekriminalizimin e nxori jashtë parlamentit, vazhdon me të njëjta metoda kriminale të drejtojë në emër të Edi Ramës partinë e Lezhës.

E turpshme është retorika e Ramës me të rinjtë për partinë e për vlerat, kur ai e ka inkriminuar atë në qelizë, kur nuk gjen kohë të mbajë një qëndrim për faktin se deputeti i tij kërcënohet me jetë nga kordinatori i tij.

Në të vërtetë, realiteti i Partisë që drejton Rama ky është.

Banditë e trafikantë të njohur kanë nën kontroll këtë forcë politike, në Shkodër, Lezhë, Krujë, Kavajë e shumë qytete të tjera. Ata kanë jo vetëm partinë në dorë, por edhe emërimet e tenderimet.

Këta sigurisht nuk janë socialistë e as nuk i përfaqësojnë socialistët e ndershëm. Janë thjesht kriminelë që përfaqësojnë Edi Ramën.

I bëjmë thirrje Prokurorisë të hetojë këtë rast me profesionalizëm e pa ndikim politik, pasi denoncimi i kërcënimit me jetë tashmë është bërë publik.

Bëhet fjalë për të njëjtin dhunues e shantazhues, për të cilin Gjykata e Lartë dha pafajasi nën presionin e Edi Ramës. Dhe sot ky mercenar i Edi Ramës kthehet sërish në rolin e tij të kërcënuesit e dhunuesit të kundërshtarëve të kryeministrit.

Eshtë e qartë se Edi Rama nuk ka ndërmend të heqë dorë nga inkriminimi.

Por është e sigurtë se qytetarët e vendit, demokratë e socialistë, me dhe pa parti, do ta shkulin këtë farë të keqe të politikës nga rrënjët. Dita po afron.

Deklarata për mediat e zëdhënëses, Ina Zhupa, 7 Shkurt 2016

Deputetja Hajdarmataj takohet me familje në skamje, jashtë ndihmës ekonomike, me banesa të prishura dhe pamundësi për të paguar energjinë.

Në Tropojë dhe fshatrat përreth, m​e dhjetra familje të kthyera nga azili vuajnë krizën e rëndë ekonomike, papunësinë dhe banesat e dëmtuara nga reshjet e këtij dimri. Në fshatrat Babinë, Margegaj, Bujan, e zona të tjera, deputetja e Tropojës Mimoza Hajdarmataj takoi banorët, të cilët i shprehën asaj shqetësimin e madh për heqjen nga lista e ndihmës ekonomike dhe braktisjen e emergjencave civile për ti ardhur në ndihmë me banesat e dëmtuara. Në familjen e Ibrahim Haxhiaj dhe Astrit Sulaj gratë e këtyre familjeve u shprehën se mungesa e kushteve të strehimit, shoqëruar dhe nga kufizimet e energjisë po rrezikojnë jetën e fëmijëve dhe  të moshuarve në kushtet e një dimri të ashpër.

Nënat  e këtyre familjeve i thanë deputetetes Hajdarmataj se nuk marrin asnjë përkrahje dhe ndihmë nga qeveria ndërkohë  që kryefamiljarët që po kthehen nga azili, po përballen me papunësinë dhe mungesën e të ardhurave. Nga ana tjetër, me dhjetra familje e kanë të pamundur përballimin e çmimeve afrofe të energjisë elektrike.

Deputetja Hajdarmataj tha se braktisja e familjeve në nevojë është një realitet tejet i dhimbshëm veçanërisht në zonat e braktisura të Veriut dhe verilindjes. Ajo tha se qeveria me strukturat përkatëse është inekzistente, ndërkohë që bashkia është e pambështetur nga ekzekutivi me fonde.

Zonja Hajdarmataj i bëri apel Shërbimit social, Emergjencave Civile, Ministrisë së Energjetikës, që të mbështesin me masa konkrete dhe skema lehtësimi për energjinë, familjet e pamundura ekonomikisht.

Njoftim për shtyp i Partisë Demokratike, 7 Shkurt 2016

Deputetja Deda sheh nga afër kushtet e Maternitetit të Lezhës dhe mungesat e mjeteve bazë.

Ndërsa hajdutëria e Rama-Beqës me biznesin e tyre në shëndetësi vazhdon, spastrimet e personelit mjekësor thellohen, gjendja e spitaleve sidomos në rrethe është në degradim të përditshëm.

Deputetja e komisionit të shëndetësisë Albina Deda u takua me paciente dhe familjarët e tyre në Maternitetin e Lezhës, ku mungesa e furnizimit me ilace bazike dhe infrastruktura e amortizuar janë dy problem kryesore. Nënat e reja dhe të afërmit e tyre i thanë deputetes Deda se ilaçet i blejnë vetë pasi ato mungojnë tërësisht në këtë spital.

Deda konstatoi se në Maternitet ka mungesë totale të ilaçeve dhe mjeteve qënësore duke filluar nga oksitocina, setat e operacionit e katateri.

“Një problem i madh është amortizimi i mjeteve prej mëse 30 vitesh dhe moszëvendësimi i tyre, mungesë që  rrezikon jetën e nënave dhe foshnjave”, tha ajo.

Deputetja i bëri thirrje ministrit të shohë realitetin e spitaleve në Veri, mjerimin e tyre.

“Ka vetëm shfaqje dhe propagandë të kryeministrit dhe ministrit të shëndetësisë për reformë në shëndetësi dhe shërbim falas, ndërkohë që ata janë të zënë vetëm me koncesione dhe tendera me përfitime marramendëse. Në maternitetin e Lezhës ka mjerim dhe mungesë të theksuar, me mungesë  të ilaceve dhe kushteve normale të trajtimit të pacientëve” th​a deputetja Albina Deda.

Deputetja Deda u njoh dhe me shqetësimin e largimit nga puna të një pjese të konsiderueshme të stafit mjeksor, si në maternitet dhe në shërbimin shëndetësor të Lezhës.

Çështja e  spastrimeve politike në sistemin shëndetësor në Lezhë, ku një mjek mbulon një numër të lartë pacientësh ishte dhe temë e forumit të Departamentit të Shëndetësisë me mjekët dhe ekspertë të këtij shërbimi në Lezhë. Mjekët vunë në dukje se gjatë qeverisjes së PD emërimet në shëndetësi kanë qenë të decentralizuara sipas nevojës dhe kërkesave të komunitetit. Tashmë politikat e punësimit apo largimit nga detyra  janë monopol i Beqës dhe partisë në pushtet, pra e strukturave jo kompetente dhe jo profesioniste, por korruptive e nepotike.

Njoftim për shtyp i Partisë Demokratike, 7 Shkurt 2016

Kampioni i korrupsionit, Ilir Beqa, po vazhdon fushatën e tij të spastrimit të infermierëve e personelit shëndetësor në rrethe, duke larguar nga puna dhjetra profesionistë që kanë një jetë në shërbim, thjesht e vetëm për të nxjerrë paratë që i duhet të ndajë për koncesionet qindra milionë euroshe të miqve të tij dhe të Edi Ramës.

Nuk ka asnjë studim për shkurtimin e personelit mjekësor dhe jo-mjekësor, asnjë referencë apo analizë, asnjë konsultim. Këto shkurtime bëhen pa transparencë, në mënyrë tinzare.

Dhjetra infermierë e personel të hedhur në rrugë, nga veriu në jug.

30 janë larguar në Mirditë, 90 në Shkodër, 60 në Tepelenë, 49 në Pukë, 36 në Lushnje, 30 në Dibër, dhe priten këto ditë qindra largime të tjera në spialet e vendit.

Fshesa Beqaj, që ka vetëm një interes, sigurimin e parave për biznesin e tij dhe të Ramës në shëndetësi, jo vetëm po shkakton dramë sociale tek profesionistët që flaken në rrugë e tek familjet e tyre, por po degradon më tej gjendjen e spitaleve, duke e bërë të pamundur ofrimin e shërbimeve të specializuara.

Partia Demokratike i dënon me forcë këto masa skandaloze e korruptive.

Ne mbështesim protestën e infermierëve dhe personelit mjekësor dhe i bëjmë thirrje të ngrihen në rezistencë e të mos tërhiqen para kësaj padrejtësie e arrogance të dyshes Rama-Beqa.

Partia Demokratike i siguron këta profesionistë, infermierë, sanitarë e personel shërbimi mjekësor, se do të kthehen në detyrë, e do të rifitojnë dinjitetin e tyre, sapo qytetarët të na japin përgjegjësinë e drejtimit të vendit.

Deklarata për mediat e nëndrejtorit të Departamentit të Shëndetësisë, Gazment Koduzi, 6 Shkurt 2016

Gomonia me drogë e nisur nga Vlora  është vetëm një fragment i një trafiku të mirëorganizuar të tonelatave me hashash, ku janë të përfshirë Habilajt e Llanajt , drejtori i policisë Vlore, dhe sigurisht gjithçka bëhet me mbikqyrjen e Saimir Tahirit.

Sasi të mëdha droge qëndrojnë në pritje për tu nisur drejt Italisë, në zonën e Çoles, në Dhërmi dhe në grykderdhjen e Vjosës.

Furgona të ngarkuar dhe garazhe e magazina ne Çole dhe perrreth, kanë gati mallin për skafin ose gomonen e radhës.

Të paktën 3 mijë ton hashash gjendet gati për tu trafikuar, dhe ruhet me policët besnik të Drejtorit të Vlorës, i cili është pika kyçe e Habilajve dhe Tahirit.

Një biznes prej qindra milionë euro që ka nisur dhe është konsoliduar ditë pas dite qysh se ministër i brendshëm u bë Saimir Tahiri.

Një ditë përpara se gomonja me drogë të pikasej nga policitë fqinje në det, ne e paralajmëruam, unë e denoncova në Parlament.

Sigurisht, Tahiri që është krenaria e Ramës heshti, nuk reagoi. Të nesërmen, megjithë këtë denoncim publik në parlament, në prani të medias kombëtare, sërish gomonia e ngarkuar me hashash doli në det dhe u nis për në Itali.

Ky është pra shteti kriminal, grupimi mafioz me Tahirin e bandat e tij, që kontrollojnë drogën, që nga mbjellja, rritja, paketimi, magazinimi e deri tek trasnporti i saj. Miliona euro çdo muaj që ndahen mes banditëve e trafikantëve, Tahirit e shefit të tij.

Ky shtet kriminal i zhytur në drogë po pasurohet me miliona euro të pista, teksa vendi po rrënohet, shqiptarët po varfërohen çdo ditë.

Shqiptarët nuk mund ta pranojnë këtë shtet kriminal.

Eshtë në dorën e qytetarëve të bashkohen, e ti hapin vendit një rrugë të re,  larg sundimit të krimit të veshur me pushtet e pushtetit të veshur me krim.

Deklarata për mediat e deputetit Flamur Noka, 6 Shkurt 2016

Përfaqësues të Partisë Demokratike të Vlorës dhe disa drejtues të Departamenteve të PD-së, takuan banorë të zonave të përmbytura të cilët ende nuk kanë kaluar pasojat e reshjeve dhe ende nuk kanë marrë asnjë shpërblim nga qeveria.

Përfaqësuesit e Partisë Demokratike panë nga afër situatën në plazhin e vjetër në Vlorë, si edhe në fshatrat Bishan dhe Fitore.

Në zonën e plazhit të vjetër mbi 420 familje përmbyten vazhdimisht, për shkak të bllokimit të një kanali sipërfaqësor. Komuniteti ka kërkuar shumë herë ndihmë nga bashkia dhe qeveria, por kërkesat kanë mbetur në vesh të shurdhër.

“Nuk erdhi njeri të na thoshte – “Si u bëtë”? Minimumi që kërkoj është të jetoj në atë shtëpi që kam bërë. E kam bërë si e kam bërë, të paktën të jetoj. Nuk po e gëzoj dot sepse sa del reja në Karaburun, unë rri zgjuar sepse mbytem”, u shpreh një banor i zonës.

Në përmbytjet e tetorit 2015, lartësia e ujit arriti mbi 1 metër duke u shkaktuar dëme të shumta në pajisje dhe orendi shtëpiake por edhe në bizneset familjare të zonës. Për fat të keq asnjë nga qeveritarët as nuk i vizitoi, as nuk shënoi ndonjë dëm të shkaktuar, as nuk premtoi ndonjë kompensim dëmi dhe as nuk morën përsipër zgjidhjen e kësaj situate për të mos u përsëritur më. Sa herë ka përmbytje ujërat sipërfaqësore përzihen me ujërat e zeza duke rrezikuar jetën dhe shëndetin e mijëra banorëve të Vlorës. Ata kërkojnë zgjidhjen e këtij problemi madhor për një jetesë të sigurtë.

Partia Demokratike kërkon nga qeveria që të tërhiqet nga marria për blerje makinash Jaguar dhe të dekoderave, fondet e të cilave duhej t’i përdorte për sistemimin e kanalizimeve të këtij komuniteti prej qindra familjesh. Këshilltarët bashkiakë të PD-së në Vlorë, do të kërkojnë ndërhyrje dhe masa për të zgjidhur këtë shqetësim të banorëve.

Fshatrat Bishan dhe Fitore u përmbytën rëndë nga dalja e Vjosës në Shkurt të vitit 2015 dhe shumë prej tyre nuk kanë sistemuar ende shtëpitë. Ndërsa Edi Rama deklaroi në Parlament se ka kompensuar gjithë dëmet nga përmbytjet e 2015-ës, banorët e këtyre fshatrave tregojnë se kjo është një mashtrim.

Banorët e fshatrave Bishan dhe Fitore tregojnë se ndihen të braktisur nga shteti, se nuk kanë marrë thuajse asgjë përveç disa ndihmave të papërfillshme.

“Kam bërë dokumentin por nuk kam marrë asnjë lloj ndihme. Erdhën, shkruajtën sa fidanë ke, nuk na kanë dhënë asgjë”, shprehet një banor.

“Ka shtet, apo nuk ka shtet. Ne po na torturojnë. Çfarë po bëhet kështu?”

“Kanë ardhur dhe i kanë verifikuar dëmet. Edhe po të kërkojmë kompensim nuk na jep njeri”, thotë një kryefamiljar.

“Para votimeve u bë një listë se kush përfitonte, pas votimeve u zhduk lista. Se kush mori lek, se kush nuk mori, nuk u mor vesh”.

“Dëmshpërblimet jepen sipas ndarjes partiake”, denoncon një banor.

Gjatë përmbytjes qeveria refuzoi të shpallte gjendjen e jashtëzakonshme që të ligjëronte të drejtën për kompensim të banorëve, por deklaroi se po bënte verifikimin e dëmeve dhe më pas do i kompensonte për humbjet. Por, deri më sot shumica e banorëve nuk kanë asnjë copë letër nga verifikimi i dëmeve, nuk kanë asnjë datë të premtuar për kompensim. Vetëm një banor kish arritur të merrte një kopje të proces-verbalit të hartuar nga grupi i verifikimit dhe ndërkohë që lista e dëmeve përfshinte 13 objekte, ai kishte marrë dicka vetëm për 2 objekte. Banorët shprehen të revoltuar me mashtrimet e qeverisë që ndryshe deklaron në parlament dhe krejt ndryshe është realiteti në terren.

Përfaqësuesit e PD diskutuan për gjendjen e rëndë të banorëve, për mashtrimet dhe papërgjegjshmërinë e qeverise, dhe u angazhuan që këshilltarë bashkiak të protestojnë për këtë gjendje. Këshilltarët bashkiake të PD në Vlorë do kërkojnë që qeveria të mbajë përgjegjësitë e saj dhe të kompensojë dëmet ndaj këtyre familjeve në vështirësi ekonomike. Këshilltarët do të kërkojnë:

1. Çdo banori t’i jepet kopja e tij e proçes-verbalit të hartuar për verifikimin e dëmeve të tij nga përmbytjet.
2. Qeveria t’i kompensojë banoret sipas listes se hartuar nga zyrtaret e saj.
3. Nëse qeveria nuk kompenson, të detyrojë bashkinë e Vlorës që të ndajë një buxhet të caktuar për të kompensuar sadopak hallin e këtyre banorëve, një pjese e të cilëve nuk ka arritur dot as të ringrejë rrethimin e shtëpisë pas dëmeve të pësuara.

Banorët dëshmuan raste të turpshme të dyfytyrësisë së pushtetit në varësi të bindjeve politike të banorëve, si edhe raste të turpshme të vjedhjes së ndihmave apo abuzimeve masive me fondet.  

Njoftim për media i Partisë Demokratike, 5 Shkurt 2016

Pyetje: Z Basha do të donim nga ju një përgjigje për draftin e dakortësuar me amerikanët, si e parashikon varësinë e byrosë Kombëtare të Hetimit?

Basha: Për draftin e dakordësuar mendoj që është mirë të bëhet një transparencë e plotë sepse është një draft ku opozita ka dhënë konsensusin. Padyshim ekspertët amerikanë kanë bërë një punë të lavdërueshme por është qeveria ajo që ka përgjegjësinë për të dhënë konsensusin e saj. Projekti i Byrosë Kombëtare të Hetimit sot nuk është ai që kishte ndërmend Edi Rama. Sepse ai ishte një plan për të kapur politikisht hallkën më të rëndësishme në luftën kundër korrupsionit. Kush nga shqiptarët e beson se korrupsioni luftohet më mirë nga ministri i Brendshëm.

E në veçanti nga ky ministër i Brendshëm që është nën akuzë të drejtpërdrejtë nga punonjësit më të lartë të policisë si ndihmës, facilitues i trafikantëve të drogës dhe që është vetëdeklaruar si një person që ulet dhe bisedon në zyrë si ministër i Brendshëm me vrasës me pagesë.

Por në tërësi koncepti që lufta ndaj korrupsionit luftohet nga ministri i Brendshëm nuk qëndron. Sepse kush është faktori i parë i korrupsionit në një vend?! Kush është faktori i parë i korrupsionit në Shqipëri?! Është qeveria. Lufta kundër korrupsionit kërkonte dhe kërkon një vullnet të hekurt politik dhe në funksion të kësaj u mendua për një strukturë të pavarur të posaçme për të hetuar korrupsionin. Projekti i Ramës ra me vendimin e Gjykatës Kushtetuese. Pra ndonëse emri mbetet i njëjtë Byroja Kombëtare e Hetimit, nuk është më i njëjti projekt.

Byroja Kombëtare e Hetimit siç është konceptuar me ndihmën e partnerit tonë strategjik Shteteve të Bashkuara të Amerikës është një Task-Forcë permanente, një instrument i përhershëm i Prokurorisë dhe Policisë Gjyqësore për të hetuar korrupsionin në nivele të larta. Dhe në funksion të kësaj Shtetet e Bashkuara të Amerikës kanë vënë në dispozicion një shumë jo të vogël prej afro 8 milionë dollarë, nëse nuk gabohem, për të trajnuar prokurorët dhe punonjësit e Policisë Gjyqsore që do të jenë pjesë e kësaj strukture. Drafti është rakorduar dhe pas rakordimit të draftit ka ardhur edhe opinioni i Venecias i cili ka qartësuar çdo dilemë që mund të ekzistonte për pavarësinë e kësaj strukture nga Policia e Shtetit. Pra nuk është dhe nuk mund të jetë një strukturë e Policisë së Shtetit.

Pyetje: Por Policia Gjyqësore është pjesë e Policisë së Shtetit…

Basha: Jo, Policia Gjyqësore merr rrogën në Policinë e Shtetit por është në funksion të Prokurorisë, të hetimit. Pra është e ndarë pranë Prokurorisë dhe Policisë së Shtetit, por është në funksion të hetimit dhe me Kushtetutë hetimi drejtohet nga Prokuroria. Kështu që këto janë dilema të stisura për ti ikur përgjigjes ndaj pyetjes që unë kam shtruar. Kemi një draft të rakorduar për Byronë Kombëtare të Hetimit i cili po kështu është komentuar edhe nga Komisioni i Venecias dhe sot, nëse ka vullnet politik nuk ka pse të presim më. Ta çojmë në Parlament e ta miratojmë këtë draft të rakorduar sipas vërejtjeve të Venecias dhe ti hapim rrugë përzgjedhjes sipas kritereve të punonjësve të policisë dhe prokurorëve, trajnimit të tyre dhe nisjes pa vonesë të hetimeve të mirëfillta kundër korrupsionit në nivele të larta.

Tani politikisht ju e kuptoni se ku qëndron problemi. Problemi qëndron që Edi Rama ka frikë nga hetimi i korrupsionit në nivele të larta dhe gjithçka tjetër është një farsë.

Pyetje: Domethënë ju nuk mendoni që është legjitime ajo që thotë kryeministri që të pritet kompletimi i reformës në drejtësi ku pjesë e këtij procesi të jetë edhe Byroja ?

Basha: Është absurde që të presim më tej kur ne jemi rakorduar për këtë. Dhe kjo nuk kërkon as ndryshim në Kushtetutë, por mund të implementohet sipas sugjerimeve të ekspertëve amerikanë dhe sipas vërejtjeve të Venecias. Dhe për këtë unë edhe një herë përsëris sot gatishmërinë tonë, të opozitës, të Partisë Demokratike, të grupit tonë parlamentar për të votuar në Kuvend këtë produkt, pra këtë version përfundimtar të draftit, të rakorduar me sugjerimet e Venecias, të fundit të dhjetorit dhe për t’i hapur rrugë themelimit të Byrosë, trajnimit të personelit dhe nisjes pa vonesë të hetimit të korrupsionit në nivele të larta.

Pyetje: Nuk është se ju do ta ndërmerrni këtë nismë siç propozoi z.Meta?

Basha: Kjo është lojë fjalësh se ju të gjithë e dini se ne nuk kemi vota ta kalojmë këtë nisëm në Parlamentin aktual. Jetike është që lufta kundër korrupsionit të luftohet pa ndërhyrje politike dhe për këtë as qeveria “Rama” sot, as qeveria ime nesër nuk duhet të kenë gisht në Byronë Kombëtare të Hetimit por duhet t’ia delegojnë këtë kompetencë autoriteteve që Kushtetuta iu ka besuar hetimin dhe në këtë rast një grupi autoritetesh, një njësie të posaçme, me trajnim të posaçëm dhe me asistencë e vëzhgim të posaçëm nga partneri ynë strategjik SHBA.

Pyetje: Z.Basha ka një pretendim që pjesë e Byrosë Kombëtare të Hetimit ka një rol mjaft të rëndësishëm Ministri i Brendshëm përfshirë edhe Prokurorin e Përgjithshëm, pra për draftin e dakordësuar. A mund ta qartësojmë ky draft Byronë e Hetimit e vendos këtë institucion tërësisht nën juridiksionin e Prokurorit të Përgjithshëm ?

Basha: E vendos ashtu siç e parashikon Kushtetuta, ashtu siç rekomandon Komisioni i Venecias. Nuk mund të operohet me modele jashtë Kushtetutës, aq më shumë tani që Komisioni i Venecias është shprehur qartë për këtë çështje. Por që të jetë nën Ministrin e Brendshëm? Kjo sigurisht nuk mund të funksionojë. As me këtë ministër, as me këdo ministër të Brendshëm. Është absurde të pretendohet se mund të ecet me projektin e rilindjes, që ishte projekti i kapjes, i mbytjes së luftës kundër korrupsionit. Atë e hodhi poshtë Gjykata Kushtetuese.

Sot kemi një projekt tjetër të përgatitur nga ekspertët amerikanë, të rakorduar politikisht nga të gjitha palët dhe të futur në një suazë kushtetuese nga rekomandimet e Komisionit të Venecias. Në një pikë bie dakord, në qoftë se është gati Komisioni i Reformës në Drejtësi le të ulen që nesër, ta marrin këtë produkt, ta adoptojnë, ta bëjnë gati dhe ta sjellin javën tjetër në Parlament.

Pyetje: Pse nuk e bëjnë publik z.Basha projektin që është gati?

Basha: Kjo është një pyetje që duhet t’ia shtroni qeverisë. Normalisht është Ministria e Drejtësisë, Këshilli i Ministrave që duhet ta sjellin në Komisionin e Ligjeve apo qoftë dhe në Komisionin për Reformën në Drejtësi, nuk kam preferenca, dhe që këtej ta sjellin në seancë plenare.

Një gjë është e sigurt, çdo ditë e humbur në këtë drejtim është një ditë e fituar për korrupsionin në nivele të larta. Kështu që ju e kuptoni fare mirë se kush ka interes ta vonojë dhe kush ka interes ta përshpejtojë Byronë Kombëtare të Hetimit.

Prononcimi për mediat i kryetarit të Partisë Demokratike, Lulzim Basha, 5 Shkurt 2016

Partia Demokratike e konsideron të drejtë protestën e avokatëve ne gjithë Shqipërine dhe mbështet kërkesat e tyre, si të ligjshme e kushtetutese.

Vendimi i qeverisë për të caktuar ajo pagën minimale të avokatëve sjell rritjen disa herë të barrës së sigurimeve shoqërore e shëndetësore, cka është arbitrare, armiqësore, dhe në kundershtim flagrant me Kushtetuten e vendit.

Kjo barrë që Edi Rama ka vënë mbi profesionistët e lirë, është rrënuese per mbi 3000 avokatë efektive por veçanërisht mbi avokatët e rinj që sapo kanë nisur punën, çka e bën të pamundur për ta ushtrimin e profesionit.

Rritja e detyrimit per sigurimin shoqëror e shëndetësor deri në 4 herë më shumë, do të bëjë që 60% avokatëve të paguajnë deri në 300 mijë lekë në muaj sigurime, ndërsa 40% deri në 250 mijë lekë në muaj, pavarësisht nëse kanë pasur ose jo të ardhura. Caktimi i pagës për profesionet e lira, që nuk kanë lidhje me shtetin, është e drejtë e tyre kushtetutese.

Kjo masë tinzare dhe arbitrare e qeverisë, tregon urrejtjen e Edi Ramës për shtresën e mesme të shoqërisë dhe prek 23 profesione të lira, si avokatët, inxhinierët, dentistët, mjekët, dhe të gjithe profesionet e tjera ditë pas dite.

Rritja arbitrare që qeveria ka përcaktuar me masën e qerasë për zyrat, sipas interesit të saj dhe jo sipas tregut, duke ua dyfishuar këtë tarifë profesioneve të lira përmes çmimeve të references, jashtë cdo llogjike ekonomike, është një padrejtësi tjetër që me të drejtë avokatët e kundërshtojnë.

Partia Demokratike mbështet plotësisht protestën e profesioneve të lira dhe i inkurajon avokatet, si njerëz të ligjit, që të mbrojnë të parët të drejtat kushtetutese, për vete dhe profesionet e tjera të lira në Shqipëri, inkurajon ata të shkojnë deri në mosbindje civile, përballë kësaj qeveria e kryeministri që nuk sheh dhe nuk dëgjon kërkesat dhe shqetësimet e tyre.

Ne nuk do të pranojmë kurrë masa të tilla, taksime të tilla, që tregojnë inat e armiqësi, për këtë shtresë të shoqërisë që e nxjerr vetë bukën e gojës.

Ne jemi të angazhuar dhe do të shfrytëzojmë çdo mjet që profesionet e lira të çlirohen nga këto masa skandaloze të Edi Ramës, që ata të kenë kushtet për taksim të drejtë, të ndershëm e për ta ushtruar profesionin e tyre me dinjitet.

Deklarata për mediat e deputetit Eduard Halimi, 5 Shkurt 2016

Të kapur në mashtrim, paligjshmëri e korrupsion me aferën Skavica, qeveritarët kundërshtojnë njëri tjetrin, ose më sakte njëra palë i kundërvihet palës tjetër.

Dje Gjiknuri doli kundër Rames. Opinioni publik e pa qartë aferën korruptive që kjo qeveri donte të ndërmerrte me Skavicen, pasurinë më të madhe të shqiptarëve.

Si rezultat i denoncimeve të Partisë Demokratike dhe presionit publik, qeveria u tërhoq dhe pranoi më në fund se ajo ka në dispozicion një studim profesionist të vitit 2009.

Ky studim percakton qartë cili është opsioni më i mirë për të ndërtuar Skavicen, në dobi të interesit publik.

Në këto kushte, e gjithë procedura e marrjes ne konsiderate të studimit të kompanisë Syzer dhe dhënia e bonusit kësaj kompanie, pa transparencë por si rezultat i bisedimeve sekrete, del qarte që është një korrupsion i pastër.

Përse Rama pranoi, dhe i dha bonus studimit të Syzer mbi Skavicen, duke e paracaktuar si fituese, kur kishte ne dispozicion një studim profesional që prej vitit 2009?

Përse qeveria detyrohet tashme të pranojë se ekziston një studim i tillë, kur e kishte dhe e mbajti të fshehur, për të vazhduar me aferën e saj?

Si është e mundur që Rama pranoi një ofertë nga kompania Syzer, ndërsa studimi i plotë për Skavicen ishte ne sirtarin e ministrit Gjiknuri?

A e dinte Rama se Gjiknuri kishte ne dispozicion nje studim te mirefillte? Nqs po, perse ndermorri bisedime te fshehta me Syzer?

A e dinte Rama se eshte e paligjshme te pranosh nje propozim të pakërkuar, kur qeveria ka në dispozicion një studim të mirefillte?

Ne këto kushte, Partia Demokratike kërkon të shfuqizohet Vendimi që i ka dhënë bonus prej 8 pikesh klompanise Syzer.

Kerkojmë një hetim administrativ të mirëfillte, për të zbardhur këtë aferë korruptive.

Ministri Gjiknuri duhet të mbaje përgjegjësi për fshehjen e studimit mbi Skavicën.

Asnjë pazar me Skavicën nuk do të pranohet.

Skavica është dhe do te mbetet pasuri publike.

Deklarata për mediat e Sekretarit Organizativ, Enno Bozdo, 5 Shkurt 2016